ZORI BY PC Malsawmzuala

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

ZORI BY PC Malsawmzuala

Unread post by Ngaia » January 11th, 2017, 9:52 pm

_____________ _____________
ZORI
[12.5.2016-17.6.2016]
13151991_265987273748016_1185100306652861247_n.jpg
13151991_265987273748016_1185100306652861247_n.jpg (30.05 KiB) Viewed 19887 times
http://www.storfb.com

Tar lam fa tih takah ka u te ho nen hian kan chhang a khât deuh a, ka u mipa pakhat leh hmeichhe pahnih te chuan kawppui neiin an in vawm hrang hlawm tawh. Inpuiah ka nu leh pa, upa lam tawh te uapna hnuaiah an fatlum ber nih man awm takin ka khawsa mek.

'Sawrkar hnathawh hi mi dik tan chuan hlawkna teh chiam a awmlo, nei hlei lo nghei hleilova awmna mai chauh a ni' ka pain a tih tlat avang chuan phaktawk ang hna pawh ka zawng buai ve tehchiam ngai lo. Aizawl veng lûn laiah Dawr pangai ve tak ka enkawl a chu chu ka nitin hna leh eizawnna chu a ni mai.

Tlema ka nu leh pa an kum lam a tam tak deuh avang chuan an țul leh mamawh ngaihtuah vangin ka phar kual nasa ve thei em em a, an tana thil han tihsak te chu an lawmthiam țhin em avang leh ka nu leh pa an nih miau avangin hrehawmah ka la ngai lo. Dawr min enkawlpui tur ka neih tho avang chuan pawipang ti a ka chhuahsan lawp lawp chang a tam mai.

A hman a piang emaw tih mai tur hian 'nupui nei ve tawh rawh in mamawh' tih thu hi min hrilh sek hlawm a. Ngaihzawng pawh nei uk lovin khawia nupui nge maw neise min han tih reng reng ni. Pawl kua kan nih laia ka bialnu ve deuh reuh Kimi bak kha chu ngaihzawng tia sawitur hi ka neih leh pawh ka hre ta lo.

"I u ten inhrang an chang vek tawh bawk si a, family declaration vel vawiin chu kan office lamah kan han buaipui dawn emaw ni le i hman angem?" ka pa in a tih chuan chawhmalamah ka hman tur thuin ka chhang a. Nia, chawhnu lamah chuan Dawr bungrua chinfel pahin order kan siam dawn nia ka lo ti vek tawh sia.

Kan chhungkaw lirthei neih ve chhun CBZ țawl lam tawh chuan ka pa, lu a kelsam țo vau tawh chu ka phur chhuak ta kha a nia. An office kan han thleng chu a thawhna hlui te a ni bawk a an lo rikpui hlut a, a hnung maiah chuan ka lo saum dil din ve reng ringawt a.

Establishment section lam pan chuan kan pafain kan inzui thla leh a. Corridoor-ah chuan ka lo nghak a, a ni inchhung lamah chuan lutin kan kalchhan ber chu a va buaipui a, a reh vang vang hnuah "Lo hre ve hrim hrim la, naktuk lamah te pawh kal leh a la ngaih hmel bawk sia, a sign tur ber DDO hi meeting in a lo chhuak daih bawk sia" tiin min koh lut a.

Dealing Assistant chu a hmelțha ve vaw kher mai! Keia nula mi lo nangiang pawhin ka melh nawn fo lo thei lo a ni. Ka pa nen chuan in hresa tih takah an titi dun bawrh bawrh a, eizawnna chung chang, kan unau chanchin tih vel an sawi dun țeuh mai.

A țawngkam lah chu a zangkhai viau mai bawk sia, a bula awm chu a hahthlak hauh lo mai. Thingpui te min han chahsak vei thlip thlep bawk sia, a fel reuh mange tih ringawta hnu kharpui atan chuan a uiawm ru phian a sin!

Tihtur tih theihloh na na na chuan awmreng thu awm heklo, kan pafa chuan a tuka kal leh tum chuan kan inphur haw leh ta lawp lawp a.

Chawhnu lam erawh chu buaina hlir mai a ni. Dawrah hna a tam lutuk tlat. Bungraw enfel leh order siam ngaiho buaipui chuan dawr min enkawlpui tu te pahnih Mapuii leh Lawma nen chuan kan virbuai hlawm hle a. Min dawrtute an awm ve neuh neuh țhin avang chuan kawngkhar chu a chanve dawn kan pawtthla ta ngawt kha a nia. Chuti chunga lo lut hram te chu dawnsawn loh theih pawh an ni lo thung. Kudam lam nen kn kar tawn sek a, kan zawhfel khat meuh chuan dar 5 a lo pel thuak tawh a, mi hnukhawiah baklengin kan haw ve ta kha a nia.

Ka nu bai siam ngei mai han ei hi chu a manhla țhin. Baibing rep an lo chhum tel ngei bawk a. Mahse, puar peng pawng laia thleng sil ziah erawh ka ning ve ta deuhin ka hria. Ka nu lah hian awmpui neih a duh lo er teh a. Thleng ka sil zawha ka pa Dumbur ka ban ruk ruk lai chuan awmpui neih țul thu bawk chu thupuia hmangin kan sermon leh pek a.

Ka nu chuan, "Awmpui hran ngai lovin mo kan nei ang chu tia, awmpui aisang hi kan la thleng hleitheilo chu a ni phawtah. Han zawng phawt teh awmpui tur chu, thlengsil i phunpui rei tawh bawk a" nui țha chung chuan a ti ta nge nge a. Awmpui tur pawh ka u te bawkin an lo ngaihtuah leh mailoh te chuan.

Pawla ka telve na zawng zawngah member ka ni fai vek! Nihna pawimawh ka nei hauh lo. Kohhranah ka inhmang han tih tur lahin sunday school ka kai hram hram a ni chauh mai bawk si. Vengchhung tan chuan tlangval chhawrnawm tak chu ka nih pawh ka ring lo. Khawhar hla lah chu ka thiam tlem vei phian bawk sia!

Nula rim te lah hi ka'n that chhe khawp a, duh dana awm theihloh leh mitmei ven ngaia awm hi ka peihthlawtlo niberin ka hria. Chuvangte pawh chu a ni mahna ngaihzawng lama rilru ka pek loh viau ni.

"Vawiin chu Upa pawlin Pu Rama țhiannu i ral ang an ti leh si a, nangmahin office lamah khan i han kal hreh em?" ka pa chuan min ti a, "Hreh lo ve, mahse, engnge tih tur ber ni a, in puin hming a sign te chuan a tawk mai lo mi?" "Nimai e, mahse, han chian kha a țha alawm, nakinah buai a awm palh loh na turin, personal copy tur te pawh kan ti tel a, chungte pawh chu i han hawn nghal ang a, office copy ringawt chu bo thlau te pawh a awm thei a.." Huiham.. dakah te pawh an lo thawn ve thei tho asin mawle kal kher ngai lovin ti rilru chung chuan ka 'awle' sak ta thova.

Dawr ka hawng hmasa zeta Dar 11 dawnah ka pa te office hlui lam pan chuan ka inkhalh chhuak leh ta a. Ka pa uluk leh tikher kher lutuk hi chuan hna a ti tam țhin mange aw.

Tlangnel lo ru angreng tak chuan ka lut dâk dâk a, ka dawr tur nu ber lah kha a hming ka zawt hauhlo lehnghal a. A ngaihtuah tlem thlak țhin mange aw. Pawilo e, a hmelțhat ang bawk khan a rilru pawh a țha tel turah ngai phawt mai ang.

A bula țhu nen an nuih har har lai chuan 'ka pi' ka han ti vei thut a, an tawp chiang dun kher a sin. "Lo țhu lawk aw," tih pah chuan a țhiannu lam hawi chuan, "..a kawrnghawng kha a zau bawk sia, inchei hi a thiam lo ve ngawt mai.." a'n tih chhunzawm zat a. An thil sawi chu ka bengkhawn zui ta lo. A pawimawh viau a niang chu min nghahtir miau mai bawk si a.

Nimin aiin ka hmu nalh lehzual! Kum 35 bawr vel a nih ka ring deuh. A pasal chu a vannei dawn mange aw.. Burma thosilen sendang hnuaiah dim light in a'n chhun paw heu mai tur chu le.. thikawm deuh nghal rum rum mai a.

Ka lam hawi chuan a țhutna chu a her rem ve ta. "In vanduai thei bawk sia aw nangni lo kal hun hi" tiin bul a'n țan zet a. Keilah ka lo hawimawl ve hle ringawt a. "Kan pu hi a chhungte an boral a, Office pawh alo la kal lova, chawhnu lam hi a rawn kal maithei chu an tia, engtinnge niang?" a tih zawm leh a.

"Ka hrelo le, tlailamah chuan ka lo kal leh mai dawn mi? A harsa chuang lova" ka tih chuan " I number dah mai la, chuan kan pu a rawn kal tak leh ka rawn hrilh che ang a, ka rawn hrilh loh che chuan a rawn kallo ah i ngai mai ang a" a ti ta zel a. "A remchan hlauh chu, vawiina a lo kal lo ta a nih leh naktuk lamah te chuan a lo kal ve tawh em ang chu mawle, a tih zia e" tih pah chuan kal mai tumin ka tho vut a. "I number pawh chu i uiviau emaw ni le" nui var var chung chuan a rawn ti a.

Huiham..A van manganthlak țhin tak em! "Aw, ka lo theihnghilh leh hman alawm mawle" tih pah chuan ka number chu ka sawi ta zung zung a. Nine four si țhik...A dinglama file tlangsirah chuan a ziak vei niap niap a. Hmanhmawh ber ang hrim chuan ka chhuak ta nal nal a.

Dawr ka thleng chu ka u, min chhangtu chiah leh a fapa an lo awmve a, chhuatlaiah chuan a fapa kum 3 mi vel chuan bungrua a lo theh hnawk ngang mai a, min han hmu chu ka lam pan chuan a lo tlan ve nal nal a. "A pute, a nuin min hau a" a lo ti nghal var a. He nau hi chu duat loh theih pawh a ni lo, mi a ngaina em em a, a pangchang thiam reuh bawk si. A bula awm tawh hi chuan mi a koh mawlh mawlh mai ni.

Chhun thingpui kan inlai chuan awmpui tur min lo zawn tur chuan ka u chu ka hrilh a, ani pawh ka nu ang tho a ni. Nupui neih chungchang bawk min sawipui leh pek a. Ka nuih liam pui vel ta mai mai a.

Haw kawngah ka tlan ve tar tar laiin ka bike an nuar tlat mai pekah! Mi fate bike angin hmeh zeuha nung ni ve nghal heklo, kawngsirah mi veivak tam lai chuan kan rap lauh lauh mai pek a nih kha! Nung duh miau hek lo le thlanfim bawl țak țak khawpa ka tlawh hnu chuan ka nawr ta nge nge a.

Thlan tla hluama ka nawr hnuah kawngsira workshop pakhatah chuan ka nawr lut ta ngawt a. Motor workshop a lo la ni zui leh ta nghal a! An tlangval pakhat, Meitei lam awphawi hmang te reuh chuan a rawn vel that that a, ka mi rin zawng a nih loh tehlul nen a kumkar a zen rek rek a, reipawh nghah ngai lovin a ti vu ta hlurh a. 'Sawm nga ni mai' awn de daw chuan an ti zui zat a.

In ka thleng chu ka pa chuan min lo zawt var a, kan hrechhuak ve leh chauh pek a! Min rawn phone silova a sign tu tur a kal ta lo niang ka ti ta ringawt a.

Muchunga lehkhabu ka chhiar mawlh mawlh lai chuan ka bussines phone (phone pahnih ka nei țat a, pakhat chu tunlai hman tlanglawn ang zahpui awm lutuk bik loh hi a nia, pakhat chu ka bussines phone ka tih mai, Nokia model hlui ve tawh tak, black & white, signal man țha zet mai, ka sumdawnpui te phailam ami ka biakna ber a ni) chu a lo ri țet țet a. Company message bak a nih ka rin loh vang chuan ka en lem lova.

A hnu daihah ka mutdawn ruaiah chuan a lo beep leh țat țat a. Clear mai tum chuan kan en a, 'induh hle mai' tih leh 'mu tawh em' tih hi a lo ni reuh a. Ka number save pawh a nih lemloh vang chuan ka ngai pawimawh lemlo. An thawnsual a nih ka ring deuh bawk.

Ka muhil tawh tlatin ka hria. Mahse, phone nghawr bawkin min ti harh leh pek a. Kan en a, number ngai bawk a la ni cheu mai. 'Muttui le, induh viau mah la' tih chu. A tu a chu nge maw ni fakau le aw... a thawnsual zo zai tawh lovang tiin ka call back ta ngawt a.

A ring ral leh țhak lawi bawk si. 'Inbiak nan chuan zan a rei tawh' tih message in a rawn zui nghal zat a. Kei tehlul hian sms pack te thun ve ngai heklo. Phone call a biak theih loh chu biak loh a ni mai. Khumlua dawhkanah chuan dahin ka inkhuh țha leh than a.

A tukah chuan ka pa thil buaipui bawk chuan an office-ah ka va kal leh a, harsa lo tak chuan ka va la fel ta mai a. Ekna ngaiah bawk dawr lamah karlovah ka mawng ka hung fel leh ta than a.

'Induh viau mah la i nalh e vawiin chu..' tih message ka dawng leh nawlh mai le. Nizana rawn thawntu ațang bawk khan! A tu chu nge maw ni dawn le aw... Ka pa te office a mi lah kha a nih ka ring ngam chiah bawk silova.

Ka phone pakhatah chuan a number ka neih ringin kan save lut a, chutah pawh chuan ka la nei chuang lo cheu! A tu chu nge maw ni dawn aw...

Zan a ni tawh lo bawka tiin ka call leh ta chawt pek a. A pick up ve mai. A hming 'Zori'. Engtinnge ka number i neih a te min rawn ti kual ta vel a. Ka insawi duh ta bik lem lova, amah lah ka hria a zeng pawh a ni silova. A hming ka save dan 'Tunge' tih chu 'Zori' ti chuan ka thlak ta thova.

Ka ngaihtuah zui hran lem lo. Hna tam bawk si nen mahni buai buai chuan ka buai zui leh mai a.

Haw hun ruai tawhah chuan kan thil order na țhin Ranbira mail ka thawn theihloh vang chuan whats app-ah thawn mai ka rilruk a, a number ka hmuh mai loh avang chuan kan tuai thla par par a. A tawpa 'Zori' tih hming lo lang kalh chuan ka mit a la kher mai. Zori tih sap pah chuan kan lut a, a dp chu kan check nghal a, rinloh tak maiin ka pate office a mi kha a ni tlat mai! A hmelțha kher asin le.. A dp pawh kan save hmak kha.

Mapuia chuan, "Kan haw thei nia" a rawn tia. "Kal ru ka lo khar mai dawn nia" ka tih chuan min kalsan ve mai bawk a. Ka Bussiness phone zawk chuan Zori chu kan call leh ngat a, rei a ri hman lo "hello" a rawn ti thawp sat a. "Ka pa thil vel min lo ngaihven sak a, a lawmawm khawp mai" ka ti a.

"Engtham mah a nih loh kha, kha te chu kan hna ve alawm" "A..i fel hrim hrim e dawr i nuam bawk si, nangmah ang vek kha ni se chuan mi hian office dawr te hi kan chak vek zawk tur a nia" ka ti luam a. "Em em chuan a, i ti zahthlak emai, a dawrtuin an zir te pawh a ni maithei a sin. An zir loh chuan kawlh thei teh mai nia aw" tih pah chuan a nui hak a.

"I haw tawh nge la haw lo?" "Haw tawh e, hawmek a nih chu, motorah ka chuang mek" "A nih tak chu, aw.. vawiin khan lawmthu takngial pawh ka sawiloin ka hria a, kan rawn sawi a nih chu. Tluang deuhin haw rawh. Chawei tui le" "Awle, nangpawh le.."

Ka thawl huai mai, pumna dam ang hlauh mai ka niin ka hria! Muangchang bik lo chuan dawr kharin ka haw zui ve ta nghal a.

Enghelh zui pawh chu ka nei lem hleilova, dan pangai tein zanriah eikhamah kawmchhak dawrteah kuhva ka han eikhawmuang leh phawt a, chumi hnuah lenzuina tur vak hrechuang heklo game khel turin ka haw leh ringawt a, rei ka khel peih ngai lem hlei lova, music ngaihthlak paha lehkhachhiarin ka chhunzawm leh țhin. Chu chu ka zantin hun hman dan a ni deuh mai tihtur ka neih hran loh chuan.

8:30 vel bawra ka nuin thingpui lo in rawh a rawn tih vau vau laichuan Zori message a lo lut țat a. SMS pack ka thun bawk silo, a whats app tho kha maw tiin ka phone pakhat chuan whats app-ah message chhanna chu ka thawn let ta ngawt kha nia. A reh zui vang vang mai.

Mu tura ka in singsak mek lai chuan whats app-ah chuan a rawn chhang ve ta hram a, chhanna han tih tur phei chu a ni hran lo. "I haw tawh em?" tiin.

"Khawi ațangin maw?" Ka ti let he haw a. "I bialnu i rim ang chu ka tia" "Rim tur nei lo tlat mai" "Hm.. awih lo ber awm e" "A nia lawm mawle, ka buai lohna lam tak a ni. Ka hmuzo ve lo chu nih ber hi" 'Ka awih e, ka awih e he he" hi a rawn ti zui hram pek a.

Chuta țang chuan kan inbe ta fova, chhunah coffee kan indun zeuh zeuh bawk. Inngaizawng ang chuan khawsa lo mah ila kan hnaih thawkhat viau chuan ka hria. Mahse, ka ngei chi tak maiin zanah 'mangțha' a inthlah mang hleilova mi mutsan a ching tlat pek a, la hrilh awm a ni.

Lo leng rawh a tih hma chu len ka tum bik hran lem hlei lova, ani lah chuan mi sawm a tum bik der lo.

Tlaikhat chu an haw hma deuh țumin dawrah min rawn tlawh haw mial a, ka naute pahnih lah chuan remchang chuh leh intizei fe mai hian min han hawsan hmak mai a! Kan pahnih chuan kan țhudun ta ran mai a. Sawi tur tehchiam pawh chu ka hre hran lo khawp mai.

Ka lamah pawt hnaiin ka'n fawp hmiah maiah! A țang deuh viau na chu thaah min hneh ngang silova. A dawh ve tawp mai. Min chhang let hran lem hleilova. A rilru erawh a chi ai hmel viau mai. Beh loh hmel deuh chuan a awm a, kan titi pui viau nangin a rilru a nuamlo deuh a niang min hawsan ta thova.

Zanah chuan a hun ngaiah bawk min rawn text leh a..thupha te a rawn chawiluam a, 'khatianga awm tur kha ka nilo asin mawle ka thiam loh a ni' te chu a rawn tih ve kha.

A ho teih teih hi kan ti khawp a. A na bawk silo, a hek bawk silo. Hmeichheho uikawm lutuk lah hi a!!

"Naktukah inhmu ang, thil pawimawh hrilh tur che ka nei. Chawhnu ka chawl mai ang. Office-ah darkhat velah min lo lam dawn nia" min râwn lova, min hrilh satliah heklo. Order min pe a ang mah zawk. A hnial lah ka hnial hman heklo. A reh zui leh nghal hmak tawh hi.

Bike te chu kan hrufai uluk ve ngial nain eng he huah chuan ka chhuah lem hlei lova. A mawi tur angin a nalh phah chuang lemlo a ni ber e. Dar chu a kal muang mah mah a ni. Keimah zawk chu ka hmanhmawh zawk nge mawni mawngvawm ba ang mai chuan ka phe sek mai pek a! A zia viau lo.

Dar khatah chuan an office bul kawngpuiah chuan ka ding vang tawh a. Ka be lâwk lova, min rawn be bik bawk lova. Darkhat leh minute 10 ah chuan a rawn chhuak ta zan zan a. Hmeichhe nghah ngailo chi hi kan tharchhuak hleitheilo chu a ni awm phawt a, engtia tih chi nge mawni dawn ni.

"Min nghak rei em? Ka laklawh deuh a" te chu an rawn timawi ve luam a. "Hm.. khawi lamah nge?" "Hermon, kawnghnuai lamah zawk"

Kan inbezui hran lo, Hermon veng lam pan chuan kan inphur chhuak ta a. Inhring lian deuh kawtah min dintir a, kan lut dawn emaw ka tih laiin inhnuai lamah chuan kan chhuk thla lawi a, a hnuaiber dawt chu tala in a lo inkalh bam a, bawlhhlawh bawm chu a'n khai kang a, a hnuaia chabi chu lachhuakin kan lut dun ta a, a chhung chu a fel kher khawr hle mai. Sofa set leh thildang awm te han hmuh chuan khawsak harsa tak an nih a rinawm hran lo. A felfai hle mai bawk.

A bag chu țhutthlengah chuan an thehthla tawp a, bedroom lamah chuan a luttlang nghal a, reiloteah a lo dak leh a, "Tlem ka lem dawn sin, a pawi em?" tihpah chuan min rawn nuih tlawn deuh a. "Umh.. tam lo se aw.." ka lo ti ve mai a.

Reipawh nghak lo chuan room lamah chuan ka va lut ve ngawt pek a, khum tlanga țhu chung chuan a lo in mek a. Min hmuh chuan a lai deuh. A nui sêng a. "Tlem in ve rawh aw" "Ka in ngailo a, ka lawm" "Mahni chuan nuamlo lawm, tlem tal aw.." a meng sî sap reuh tawh leh nghal a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 11th, 2017, 9:52 pm

No ah chuan ka intur chu a thli ta kar kar a, no khat chu harsa ti fe chuan ka lem liam ve ta hram a, amah lah chuan ka bula țhu chuan min lo en dauh dauh a. Tui ka tilo lutuk chuan Cigarate chu phawrhin țan mai ka han tum a, mahse a mitmeng ka hmuh chuan ka tum ka thlak rang kher mai!

A bana vawn pah chuan kan hnuk hnai deuh a, zawn chawp ngailo na na na chu kan hmui a insi rang kher mai! Amah nge danglam chak keimah zawk pawh ka hre lo, boruak a țang țha et awt kher mai.

Khumah chuan muangchangin kan tlu dun a, Min ei mai dawn maw tih tur khawp chuan zuk duhâm thiam a mawle! A thawkdan a mumalloh tluk zetin ka pangailo niin ka hria.

Náwrway kan paltlang zo chiah bawk a chim chin a sang chak khawp mai. Rum hak pah chuan "Min ti suh aw.. khawngaihin.." a ti sap a. Ka hmaa zangthal huang chunga mi hlat hlau fahrana awm chung si a chutiang țawngkam an hmang mai chu dawnsawn dan ka thiamlo viau. A ti ve mai mai a niang ka ring. A englaimah chuan min hnar mawlh hek lo mawle.

"Khawngaihin hei bak chu pel suh"

"Ka ngen che aw..khawngaihtakin.. min hrethiam rawh" teh fo chuan a! Rilru a ti nuamlo zo ta vek mai. Khum tlangah chuan ka țhu ta daih a. A hrilhhai leh inthiamlo hmel chu hmuh a hrehawm hauh silo. "Harsatna ka nei a, i duh ang ka puitlin sak theihloh che vangin min hrethiam dawn nia"

"A țha lawm"

"Mi rinawm leh rintlaka ka ngaih che vang a nia helai hmunah hian ka hruai che." "I rin ang chu ka ni leh meuh si nange chu?" "Chutiang lamin ngai suh, i rintlak zia chu kha a hriat mai alawm, min pui turin ka duh che a..." mak ti zet chuan kan melh a. "Mi te hriatpuiloh harsatna ka nei a, keimah chuan ka hneh thei ngang lo a ni"

"Eng thil?"

"Thawnthu sei tak a ni"

"I sawi siloh chuan inpuih a va har duhawm ve"

"Ka sawi dawn alawm, chuvang a nia zu pawh ka in. Harhfima sawiah chuan a rapthlak mah mah a ni. In țhang viauah min ngai mai thei a, mahse, ințhang tak chu ka ni bik lemlo a nia"

"Hm.. chuan, i harsatna ve thung chu..?"

A thaw hap a, khumah chuan Jean kekawr tawt țeng țawng tak mai leh tawnzau chauh hain a la mu ta reng a. Mit zawng a la na rawh e. A bawp sei thlerh thlawrh leh a mal chum bat te, a vun ngo sen siah mai leh a awmbawr kawh țha nelh nawlh a thawk zawnga pawng dat dat maite chuan min hui lauh lauh niber hian ka hria.

A mitmeng lian țha kel kawl tak mai hungtu a mit hnawih te chu awmlo pawh nise a nalhloh phah hauh lovang le. A hnarngul lah mizo hnarngul awmlo takin a bang a sang țha bawk si. Umh, ka fawh zawh chiah a hmui mawlh kha... a nêl thep! Chuti bakin ka sawi thiamlo.

"Min pui duh angem?"

"I sawi phawt loh te chuan, ka tihtheihloh zawng tak pawh a ni ve thei a"

"I thei lutuk ang, ka hrilh che anga min phatsan leh si ang tih ka hlau a ni."

"Min rin loh chuan hei aia intih rinawm dan ka thiam hauh lo nia keichuan"

"I duh chuan i thei ngei ang le. Ka rin zawng tak chu i nia lawm, mahse, mipa hi in mak țhin em a, rinloh ang deuha awm te in ching a.."

"Hmeichhia pawh inni ve tho lawm"

"Maithei, ka sawi anga, min pui duh ta lo a nih pawhin vui thei ka ni lova, mahse, min ti mualpho lovang tih tal min tiam rawh"

Ka ngawi reng a. Engthil nge pawh hriat hmaa lo tiam ve ngawt chu a fuh dawn emaw ni le.

"Promise em?"

"Promise"

A mutna a țang chuan thovin khum lu ngheng chuan a țhu te te a. A bulah chuan țhuthmun kan rem țha ve sauh sauh bawk a. Inhnaih viau e tilo chuan a boruak a dang ta deuh.

STORY OF Zori :

"Ka pa chu a hming chauh tal i hriat ka ring, MLA term hnih lai a chelh ve kha, Lalliana. Unau pali, mipa pakhat leh hmeichhe pathum kan nia, kei hi a pangber dawttu ka ni.

Kan chhungkaw khawsak hi ka pa MLA anih hma pawh khan a harsa hranlo, Damdawi dawr lian pangai ve tak pahnih kan nei a, kan duhzawng hi chu kan nei ve zel a ni ber ang chu. Pawlsawm ka pass ațangin phaiah school kalin ka chhungten min dah a, ka u hmeichhe pakhat nen in kan luah dun a, harsatna leh buaina em em awm lovin BA thleng khan tluangtakin ka chhuak ve mai a, tuna ka harsatna lo ințanna hi MA ka zirțan kum a mi a nia, chumi kum chuan Fresher Social kan neihna hmunah tlangval pakhat nen kan intawng a, a fel a, a hmelțha bawk a, sumlamah a buai lo viau bawk. Chuta țang chuan kan in kawp chho ta rawt a."

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 11th, 2017, 9:52 pm

"Mizo nge hnamdang?"

"Mizo ni e, Chhimlam chhuak deuh a ni awm e, Aizawlah in leh lo te chu an nei tho a chutihlai pawh chuan. Chutia inngaizawnga inhmureng na na na chu kan riak dun fova, vanglai chenin nun kan hmang a ni ber mai.

Mahse, Pathian ruat kan nilo aniang chu kumkhat leh a chanve dawn kan inzui hnuah MA kan zawh dawn ruaiah chuan kan ințhen ta hlauh a. Ani pawhin ngaihzawng te a neizui tih thawm ka hriat vangin ka ngaihsak zui ta em em hran lova.

MA kan han zova, Aizawl ka lo chhoh hnuah pawh inhmuh zeuh zeuh te chu awmtho mahse boruak kan nei ngai hran lova, hmelhriat pangai awmin kan awm mai țhin.

Zankhat chu engtinnge ka number a neih pawh ka hrelo min rawn phone nawlh mai a, chhuahpuiah min sawm a, chumi zan chuan ka hnar fithla țhak a. A karleh vel ni maithei min rawn sawm leh kha.. a tih tak tlut tlut vang chuan ka lo ngai ve deuh bawk nen kan chhuak dun ta a, hun nuamtak kan hmang lehpek khami zan pawh khan. Mahse, in ngaihven zui leh inngaihzawn zuina erawh kan nei hran lo..kan inbe zui em em lo.

Hun a liam ve zel a, bialpa te pawh a neih chu kan nei ve mai zel a. Tuna ka hnathawh ka zawm hnu deuh lawkah hian min rawn be leh a, vawihnih vawithum min rawn bia a, mahse ka chhuahpui duh ta lova.

Video clip pakhat hi min rawn thawn a, 'hei hi ka kuta awm a ni, i nun a chhiat vek i duhloh chuan min hnial suh' tih message a rawn thawn zui bawk a. Chu video chu ka download a..... phaia kan awmlaia kan khawsa dunlai, ngialngan tak mai hi a lo ni a, ka hmuh hlim phei chuan ka țap tawp nghe nghe a, khawngaih ka dil a, mahse, min vau nan ber a hmang tlat bawk si. Hunrei tak chhung chu chu video hmang chuan a duh dan danin min tikual a, ngaihzawng a nei reng mai bawk si. Ka nun a hrehawm tak zet a ni.

Min rawn biak hnuhnung ber khan chhuanlam ka siam a pawm ve mial a, Kum khat dawn chu a reh leh vang vang a, nupui a nei an tia chuvang pawh chu a ni mai thei. Mahse, tun thlatir ațang khan min rawn biak zauh zauh a ching leh tawh a, mi beisei zawng chuan ala awm lo nain engtikah emaw chuan min beisei leh ngei dawn in a lang bawk si a, tihngaihna ka hre tawh lo. Tihdan tur min ngaihtuah pui rawh, ka zuam tawh thlawt lo a ni" a mittui a bianga luang ngiai ngiai chu dimtea hruksakin duat takin kan infawp vawng vawng a.

Min kuah chial a, ka awmah chuan a bei tlan a. Chu nula nikhualo ru zet mai chuan min va hip si em!

"Mak min ti awm.. nikhualo min ti em? Hetiang hi ka chungah a thleng ang tih ka ring ngai lo asin mawle. Mahse, a lo thleng miau si. A rapthlak takzet a ni. Min pui thei ang tiraw.."

"Theih tawp kan chhuah dawn nia"

"Ka lawm e, a thlawn lovang" a ti sap a.

BULȚANNA CHU:

Zana ka mutnaah te chuan tihdan tur ka ngaihtuah a, ka bo map map khawp mai. Ani Zori lah chuan an in awmna pawh a hre bawk silo. Dawr a nei tih zawng a hre bawk si. Bul țan dan tur ber pawh ka hrethiam lo. Nupui a neih chuan a phone-ah a dah ngamlo mai thei. Chu pawh maithei chauh! A computer-ah a dah ngei ang a, in ah nge dawrah a dah ang? A hriatbawk siloh... Internetah te a lo back up angem? A țhiante a copy tir angem? Chu chu tilo turah ngai ta ila, tihtur a tam ang huin tihdan tur a vang riau lawi bawk si. Huiham tawn loh tur ka tawng a ni kei hian!

"Thil buaipui ngai ka nei a, dawrah ka awm hman vak dawnlo a nia aw" tiin kan Lawma chu ka hrilh a, mihrang a ni lem lo bawk a, a inthlahdah phah vak ka ring lem lo. Pa kalkhat leh rintlak ve deuh a nih kha maw.

Zori'n a dawr a tih lam pan chuan la inkhalh chhuak ta poh chu a nia. A tlachawpa ngaihdan siam mai loh chuan ruahman lawk ngaihna pawh ka hre hauh lo mai.

'Syo Enterprise' chu dawr lian tak mai hi a lo ni a, TV, Fridge leh washing machine adt. wholesale-a an pekna hmun a nih hmel e. Lut ta mai lo chuan an ep a pitar dawrteah chuan meizuk pahin ka chawl khawmuang a, titi phungchangah hmangin an ep a Syo Enterprise chung chang chu ka sawichhuak a, ka rin aitakin a lo țawngduh leh nghal a.

"Ka ning a nia, midang ngaihpawimawhna nei bawk silo, a neitupa lah saw a chapo hmel ropui si, hnathawk pawh a chhawr rei theilo an bansan zel saw, sawtiang mihring saw chu an tluang rei tak tak lovang, saw kawngsira saw an bawlhhlawh pawh an chhawp leh nghûk tawh saw" a ti teh erh a. An bawlhhlawh lah chu bungraw lian pack na thermocoal leh lehkhakhawng ho hi a nia, a hnawk reng lah tak a.

"Khawi veng a mi nge ni reng reng a?"

"Ka hre teh hrep lo, ka ngaihven zawng a ni lo niang, dawrtu te lah saw an hmuthei phian leh nghal a, misualte vanneihna tih zawng zawng an nei zo a nih saw" a tui barh barh khawp mai a ka pi te chu le.

"Nupui a nei tawh em khah, hmanah khan an innei dawn tih awm tak kha ka hre tlatin ka hria.."

"Nei ang chu mawle, an in zura dun khawp mai, an hawi ar mai a. An kawngkal te reng reng hian ka theih tak emaw an ti ni ngei tur hi nia, fa pawh an paitheihloh saw, an in hamtawnglo pawh a ni ta ve ang, a hrim hrimah sawtiangho saw chu chi thlah tam tlak pawh an nilo"

"Annu chu dawrah a rawn kal ve mai țhin a mi a?"

"Kal zûr zut ang chu mawle, nghak țha peih a zeng pawh ni chai silo sawn a rawn lang awl lova, a tih tam hmel ropui si, sawtiang em em a thatchhia te engtin nge mawni a nu leh pate pawh hian an hrin theih zawk ni" teh hrep chuan le.. Ka duh aithui ka hre ta. A sawidan hmangah a zawng zawng chu awihsak tlak a nih pawh ka ring bik lem lo. Mênah thlak țhen nual pawh a ngaita ve ang.

An bungraw en tur awm tak chuan ka han teilut ve ta nawlh nawlh a, an naute chuan min lo chiau au sap sap hlawm a, Fridge chu leitum niawm tak chuan kan thlur bing deuh a, an nula naupangte fai ving veng chuan a rate leh thildang chu min hrilh kual zung zung a. A kil lam a mi kan en lai chuan "Tunge in pi ber saw a hming khah, ka theihnghilh daih.." ka ti ru zauh pek a.
"Lucy tih bak ka hrelo"
"E ni dawn tak e. An pa hi vawiin a rawn kallo ni maw?"
"Kallo aw, chawhnu lamah a rawn kal ang ka ring"

Kan kal kual zel a, piber țhutna dawhkan pawh kan hnaih ruak ta. "I duhzawngte i hmu awm em?" alo ti ngial a. A hmel a țha han tih chiam tur nilo mahse a 'class' hmel viau. Lu zo veh vawh, mahni hmalam haikaw thei hmel tak, thingtlang tlangval tan erawh neihngawt chiloh, phurrit nimai tur hmuh hian ka hmu pek a! Pindan chhungril mita thlir chuan a khal, a chum tawk viau a, a zâng a sei ang aiin a bawp a tawi deuh! A awmbawr erawh haițheh ngawt loh chuan ngaihdan ka siam duh bik love a...

"Ka hrethiam lo angreng khawp mai, ka rawnchhuak hman zen zen bawk silova, card min pe mai ula ka rawn phone mai dawn mawni, Home delivery inti thei tho ni law mi?"

"Ti thei e, i duh hun hunah i rawn phone dawn nia, mahse i duh zawng model kha chiang thung la"

"Ok, a ranglamin rawn tih ka tum dawn nia"

Ka hmelțhat loh ang ai hian min thlir zuitu hi an awm ve chawk țhin tih ka sawi chhuak a nih tak rau rau si-ah chuan he 'Lucy' pawh hi ka sawi hmaih a rem bik hauh lovang le.

Hmalak mai dan tur hrelo chuan dawrlam pan chuan ka inkhalh haw ta a, ka zopa thluak hian a tlin meuh lo niawm tak a ni. Khabe dawma kan inngaihtuah ngial pawhin ngaihdan thar leh rintlak tur ka ngaihtuah chhuak hleithei meuh lo chu ni.

Zori ka phone a, 'tlaiah i haw pahin min lo tlawh kawi rawh' ka ti ngawt a. Kei aimah a awmnem leh bangbo zawk tur chuan thurawn danglam tak min pek teh chiam pawh ka ring hran law.. A hmel hmuh tal a nuam alawm le.

Office ban hun hma deuh chuan a lo thleng phei a, chhunlama ka kalna chanchin te chu kan hrilh thuak thuak a, an awmna veng te chu a lo hrechhuak ve mial a, chu erawh hma han sawnpui na chhan teh chiam tur a awm pawh ka hre lo. A țha phian thove.

"Mamawh i neih chuan sawi rawh, sum, motor, silai.. i mamawh apiang" a ti hem mai le.

Bike thar ka mamawh a, motor pawh, Silai te pawh chu a va țha awm ve. "Engmah a ngai love, a țul a nih leh kan inhrilh mai dawn nia" chu ka'n ti lawi a.

A bag a zen rak rak a. Chanchinbu hluia intuam pawisa clip niawm tak chhah țha leng lawng hi a phawrh chhuak a, Dawhkanah chuan ngawirengin a dah a, "I rethei ka ti lo nia, mahse, min buaipuina turah hian hunbak i sen loh ka duh"

"Engmah a ngailo. Ka mamawh a nih leh ka hrilh mai ang che"

"Petrol man te, ei leh in te.. a! Inhnialna vak hun pawh niin ka hre lo, a neituin ka phal a ka pe che ni mai. A tawp erawh min thlenpui hram ka beisei"

"A tawp kan thleng ta a nih leh chumi hunah chuan min pe zawk dawn nia"

"Chulam chu kan result in hril teh se. Vawiin chu vawiin atan ni rawh se"

"Teh tlat chuan, duh ang rum rum chuan hmasawn a har dawn a, dawhtheihnate pawh i neih deuh a ngai dawn a nia"

"Nia ka lo tum dawn nia..haw mai ka duh a nia, petrol lak kawi te ka ngai a..ka hawsan mai ang che" a ti a.

A scooty thawm a rehfel ta maw tih chuan dawhkana a thildah chu kan hawng chhin a, Rs 500/- clip!! Ka nuih a za hauh lo, lawm viau awm tak a nih laiin ka kova mawhphurhna tla chu chu pawisa chuan a buk zo ngut ange maw le.

Zanriah kan ei mawlh mawlh lai chuan tihdan tur hrechhuak ta hian ka inhria a, țhaber chu nilo mahse a dang hmalak dan tur ka hriat miau siloh vang chuan ka zawm mai a ngai dawn a nih hmel viau.

Ka nui sak a.

Ka nuih chhan tak erawh chu ka thil tih tur vang nilovin ka tihloh tur ka ngaihtuah chhuah vang zawk chuan a ni. Tukin ațang khan awmpui kan nei a, thleng sil ka awl thei dawn a!! Val hi.

Mutnaah te chuan ka hmabak chu ka ngaihtuahna tibuaitu ber a ni. Hlawhchham ta ila engtinnge ka tih leh tak ang. Palh awmthei laka in ven nan ruahmanna dang ka mamawh tel a ni. Pakhat ngaihtuah chhuah pawh ka harsat laia pahnih phei chu aw... lung a ti zing mange. Hunin a herchhuah pui ve leh mai ang chu maw..

Plan-B awm hauh lovin Plan-A hming phuah chuan ruahmanna chu khumah mu zangphar diai chung chuan kan zam chho ta a, James Bond a film ruangam chu tluk pha em mah suh se, a teuh ther ther viau ang le. Ka tih fuhloh chuan Jail bang ka zut thei a, ka chetsual chuan mi nunna lak leh ka nunna hial pawh ka chan ve thei tlat!!

Engpawh thleng se, min hriatpuitu ka mamawh dawn a ang ta riau mai. Zori hriat lova ka thlavengtu ka siam mai loh chuan a chhe ber lo thleng ta se. Ho deuh leh mualpho tak pawhin ka liam ve thei tlat mai. Lawma bawk ka rilruah a lo lang leh pek a, a țha leh phian tak ang, a zam a țha bawk si, a rintlak em em ang.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 11th, 2017, 9:53 pm

PLAN - 'A'

A tuk chawhnu herah zawtah Mapuii chu mi min biaksak lawk turin ka ti a, ni pawh chuan thildang vaka ngailo chuan a rawn kal ve mai a. Ka wallet a mi card min pek chu enin ka phone chuan kan dial mai a, mahse ngaihtuah chhuah ka neithut mai! Ka number hi hman a fuh leh lo!! Vawikhat a ring hman tih chuan ka off leh ta daih a, "A call theihloh, naktukah kan ti mai dawn nia" ka ti ta ringawt a. Ni a rei duh lauh lauh hle mai. Rilru awmlohna hmunah taksa kan nghat hmuah mai bawk si.

Bazara simcard black-a an zawrh chu Dawr kal pahin ka lei ta nghal a, ka bussiness phone aia la quality lo mah zawk, en reng reng pawha a to lovang tih hriat hliah hliah tur hi Rs 999/- in ka lei tel bawk a. Plan -A atana mamawh hmasa ber chu ka nei ta.

Mapuii bawk chu ka pûr leh lo thei lova, Syo Enterprise chu ka phone tir ta a, an pi ber Lucy țhian anga insawiin a number a phone chhiat vanga a bo thu hrilhin Lucy number ka dil tir a! A pasalin a lo la a niang, rin aiin an inberei, ka lo hlauthawng hman alawm le. A tawpah chuan lehkhathem banin phone number chu a rawn veiziah ta țat țat a. Ka lo thawhuai alawm mawle.

"An pa kha a strict hmel rap mawle" a ti bai bai a. Chulam chu ka ngaihtuah hman vak ta lo. Number chu ka nei ta, ka kuta hnehna a awmtheih nana bulțanna tur pawimawh tak a ni si a.

Whats app tal hmang thei ka lo lei law law lo ni aw... Tunlaiah sms an uar mang bawk silo, pawi love top up thun țeuh ila nimai.

Tlai dar 3 bawr velah chuan dawra a wm hlau ru ang reng tak chuan ka call ta a. A pick up ve mai. "Hei Lucy, i țha maw i induh hle mai, mi pawh i hre tawh lo a nia" kan ti thawr mai a, a awki ațang pawh chuan mak a ti tih a hriat reng mai. "I number ka nei bawk si lova, ka hre mai lo che ni. I insawi loh te chuan" a ti nang nang a.

"Mi pawh hreduh hleilo ka insawi awm biklo emai. Nakinah kan inhmuh hunah min hre mai ang" ka ti ve zel a. "Min hmu țhin a mi a?" a ti he haw a. "Hmu țhin chiang e mawle, min hre duh silova, ka be duh ngailo che lawm"

"Khawiah nge min hmuh țhin a?"

"I dawr kal tur te, hmuhna hun che chu a tam alawm"

"Engtinnge ka hriat ang che han insawi mai mai teh"

"Sawi duh bik lo e a, min la hre ve mai ang"

Chutiang vel chu kan inbiak vawikhatna a ni. A boruak chhaih a rit hran lo bawk a, ka thil ruahman chu ka puitlin zo turah kan ngai thla ngawt chu nia. Engnge maw kan an zel dawn ni.

A tukah pawh dar sawm bawrah ka phone leh a, dawrah a lo awm chu niin thil han sawikual duah na chi niheklo ' insawi mai mai teh' a tih chu ka hnial kual der vel vak vak a ni ber mai. 'Whats app te hmang ve ta che' a tih danah min ngaihven ve deuh a nih kan ring thla ve ngawt a, 'ka phone ka siamtir a, phone chuang alawm ka hman mai mai' ti te chuan kan phanawi ta vel kha nia.

Dawrah an nupa an awm tih ka hre ta bawk a, muangchang lo chuan an veng lam pan chuan ka bike țawngțawl lam tawh chuan ka tlanchhuak ve leh ta thlarh thlarh a, an in ka zawh a piang chuan 'sawlaiah sawn' an ti deuh zel a. Vengtawp lamah chuan hmunfal ve deuh lek lekah hian an in chu ka va hmu ta hram a, fal han tih a mal ngawk phei zawng a nilova, an țhenawm hnaiber te nen chuan a in auh phak mai tho awm e.

An in chu a lian luah lem lova, an sakdanah nei leh neilova sa an nilo tih erawh a hriat hle thung. Engkim felfai leh nalh tak vekin a ni a awm ni. An gate bulah chuan dingin Ciggarate kan zu vang vang a, kawngka luchunga Designation plate intar ka hmuh chuan min ti nersawk thei hial mai nia mawle.

Fin. Secretary
Kristian Țhalai Pawl
Shalom Veng Branch

Ngat mai a, ka hmachhawn tur hi civil zurui satliah a ni hauh lo mai le. A nihna erawh chuan ka thin a ti ur zual sauh thung a. A tlawmlai hmel hmuturin chu thil chuan phurna nasa tak min pe niberin ka hria.

A dawr țhenawmnu lah khan ar pan chuk tuilo awm ang khawp khan a rêl phâr lo chauh kha a ni sia, an vengah lêm KȚP hruaitu a lo ni ul bawk sia. Amah ka hriatdan lah a fuh hek lo. Khawvel hi lemchanna tualzawl mai a lo nih hi.

Zori hian a tihbuai duh vangin min bum a ni thei angem? Video lah chu ka hmu ve a zeng pawh a ni silova, kei hi a hmelah hian ka lo tawlhthlu mai mai a ni lek lo maw le.. Mahse, sum sen a huam viau lawi bawk sia, engnge maw a awmzia le.

A buaithlak zo ta.

"Dawt ka sawi hauh lo a nia, min ring hram rawh. I duh chuan kan inngaihzawn vel chungchang pawh ka u i zawt thei ang." Ka hmaa țhu chuan a ti a

"In inngaihzawn leh zawnloh kan buaipui loh hi, video chungchang alawm, i u in video chu a hriatpui che a mi?"

"Hriatpui love.. min biak zawh hian ka clear nghal zel bawk sia.. a buaithlak e"

"Buaithlak khawp mai. A finfiahna tur rawn nei phawt la kan chhunzawm dawn nia" ka ti ve ta hmak a.

"Min ring hram rawh, dawt ka sawi lo tak zet alawm, tih mualpho ringawt duh ni ila chuan nangmah kher pûr lo pawn ka ti ve thei tho alawm." a tih chuan a awihawm leh phian lawi bawk sia. Tihngaihna tak pawh ka hrethiam tehnuaih tawh lo.

"Ka tan dil chi a ni tawh bawk silo, ka harsatna hi min hriatthiampui hram rawh"

"Thil dik lo a inrawlh ka hlauh vang a ni tih min hriatpui ang che."

"Ka hrethiam alawm, dawt ka sawi emaw a nih chuan ka chungah engpawh i thlentir thei ang."

"Video chu mamawhna i nei chuang lova paih emaw delete emaw a ni mai ani lawmi?"

"Umh, tihbo a ni tawp mai, engtikawng zawng pawn nise a pawi pawh ka tilo. Ka zahawmna hi humhim ka duh zawk. A kutah ka zahawmna a awm tlat bawk sia, engti kawng pawn ka tihbo a ngai, suma lei a ngai a nih pawhin ka neih zawng zawng pawh ka pe mai ang che" a ti thlawt a. Rinloh chu a har ve țan deuh e.

"Tlaiah chaw eichhuak ang hmiang" tiin kan boruak rit lutuk tur chu ti ti ka thlak ta daih a, "Inlam hi kan buai thei lutuk a, ka chhuak hleitheilo. Nakinah ka remchan veleh kan ti dawn nia" a ti ve mai a. "Ka nu hi cancer a nia, inlamah kan enkawl vang hian kan buai lutuk a, lengah pawh ka sawm duhlo che nih kha lo vui lutuk lo la, chhunah kan inhmu thei thova" a tih zawm leh a. Ka chhang zui lem lo. Mak erawh ka ti ve deuh!

"Mamawh chu i nei lo maw, inthlahrunna tur a awmlo a nia i neih chuan aw.." coffee dawr ațanga kan chhuahpah chuan a ti a. "Neilo e.." ka ti ve mai a. Kan in bye bye hnu chuan a tlan liam zui ta nghal a. A nalh zawng a nalh teh e maw.. A vartleh kan la tuamdun chêk ang chu maw!!

LUCY:

"Vawiin engnge i thawh a?" tiin dawra a kalloh beisei takin kan be thawr a. "Inah ka awm, vawiin chu ka chhuak peih lo, khua a lum bawk sia, engnge i tih zawk a?" țha deuh chuan a rawn ti let ve mai a.

"Vawiin chu bill ka buaipui a, hei ka zo fel chiah, ka hman em em ringawt ta mai a nih hi" lo leng rawh a tih beiseina zawng zawng nen a ni ka chhamchhuah tak ni! "A nih chu mawle, lo leng rawh han ti dawn ila kan veng a hla sia inthlahrunawm awm bawk sia, i insawi duh bawk silo" an ti zui hlak a. "Saiha te nih loh chuan kal phak mai ang chu, inhmuh hunah min hre mai ang" kalloh chu ka hlau rapthlak mawle.

"I peih leh lo kal la, mahse kan veng ka hrilh lovang che, min hria nge hrelo chu kan fiah ang" "Naaa... in lo insawn ve thei a.. sawi mai la" te chu kan ti ve bawk a. A ruk tak chuan hmui lip duaiin ka nui reng sia!

"Ka sawi awm lo e mai. I sual emai, i insawi duh biklo alawm" a ti teh tlat a, ka zawtchhuak zo ta bik lo.

Minute tam a liam hma chuan an door bell chu hmetin an kawngkharpui chu ka dinchilh ta ran a. Vawi hnih vawithum ka hmeh hnuah chuan a lo ri ta rak rak a. Maktih hmel zeta min thlek pah chuan, "Ehe..nangmah mi?" an ti ngawt a.

"Ni e, keimah chu.."

"Ah.. ka sawi tum zawk chu min rawn betu kha.." a ti niaih a.

"Nia... i beisei ang ka ni meuh nange!?" ka nuih a za ru deuh tlat a nih chu mawle.

"Umh... ka hrethiam chiah lo. Ka ngaihtuah chhuak zo lo che" a ti phawng a. "Hmuh tawhna che chu ka nei bawk sia..Țhu la"

Kawrfual; a darbah tawp, a khup khuh deuh teuh toh hian a ha a. A tuihnai vei fu lehnghal a!

"Khawnge midang hi?"

"Pahnih chauh alawm kan nih, dawrah a kal nitin bawk sia, innghah hi nimai ka hna chu"

"Va khawharthlak duh awm ve, ka rin aiin nau in ak har a, in indang a mi a?"

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 11th, 2017, 9:54 pm

"Dang hran chuang nang, enteh nang i ni bawk a(awi hmeichhia tak hi chu awww) sawi ta mai mai ila, kan buairu ve lutuk. A tirah kha chuan innei hlim te kan ni bawk sia Honeymoon ve te kha ngai a tiin engemaw chen kha chu kan indang a, mahse, kan indan loh hnuah pawh hei kum a vei leh tawh Doctor pawh kan rawn kual ve nasa, engmah kan la ang thei lo a nih hi" a ti reuh a.

"A nih chu mawle, a inla pai ve mai dawn chu, fa neih duh a neih mai loh hi a hrehawm dawn hian ka ring lutuk a.."

"A hrehawm tih piahlama a ni. Hei kan life hrim hrim hi a nghawng vek ta maw..Kan pa pawh hi a ngui ve deuh țhinin ka hria" a ti deuh duah a. Hmeichhia hi chuan thil hrilh tur hi in lo van mamawh tak em ka ti rilru neuh neuh a.

"Nangpawh nupui i neih hmain test thlap rawh haha.." an ti zui a.

"A khai, ngaihzawng pawh nei uk lova khawia nupui nge maw keini te chuan kan han neih ve ngawt ang ni"

"I insawi duh bawk silo, kawmdan turche pawh ka thiam lo, ka hmuh hnu chu i ni bawk sia, a mak e. Ka haihawt tawh viau emaw ni le. Anuam pawh ka tilo e a"

"A ho lutuk chutiang care vak duh suh, hei kan inhria a, kan inhmu leh a a tawk mai alawm" ka ti liam ve mai a.

Pangngai takin ka țhian bumchawp nen chuan kan inkawm ti ila a sual awm love.

Ka tihtura ka insawrbing deuh vang nge mawni Zori pawh biakloh ni ka nei zauh zauh a, Lucy nen erawh kan in be awl lo a ni ber e. Zanlam erawh kawppui nei te a nih vang erawh chuan kan inbe hleithei lova, inbelo tawp erawh kan ni chuang lo.

Ani faneilo khawhar, an pa in an fa neihloh vanga a ngaihsak țhat duh vakloh chu ka tan chuan duhthusam a ni hawt e. A tirah fuihin han hnem ve viau mahila hmeichhe khawhar rukna nei leh tlangval awlthawng na na na chu karhnih khat vel kan han inbiak meuh chuan khawilai laiah emaw kan inhmu fuh thei ta viau mai a. Kan inhmuh fuh hlauh țhinna erawh chu vantlang hmun a ni ngai meuh lo thung.

Syo Enterprise pawh duhthusam chiah chu nilo mahse ka hrechiang thawkhat tain ka hria CCTV hmun hnihah an dah a, current a awm loh chuan battery back up a awm lo. Security duty pawnlamah pakhat a awm.

"Tlaiah dawr lo khar suh aw, ka lo phei dawn nia" tih message chu Zori hnen ațanga ka dawn a ni.

Coffee no tlang tuaikual zai zai pah chuan, "Tunge hmannia i phurh kha..? Zirtawpni khan" a hmel chu lungawi tia sawi chi a ni hran lo. "Tunge aw... e, Lucy nih kha, amah hmang khan i thil pawh ruahmanna ka siam tak a sin" "Ka awih lo. I bialnu a nih kha.. vawihnih ka hmu tawh che u," "A nilo, bialnu ka neilo ka tih mawlh mawlh kha." "Hm.. ka awih chuanglo e a, ngaihzawng ka neilo i tia, biak pawh min be ngai hleinem. A.. ka sawi tur pawh awm lo chutiang" a ti leh lawi a.

A thik ve tumhrang a ni awm e a. Hmeichhe dang laka ka kalsan phal silo, ka hnaiha awm țha duh chuang bawk silo mizia hi ka hrethiam chiah lo.

"I thik a mi?" kan ti deuh kher a, min melh ra ra a. "Chutiang sawi a ngailo, ninawm" tih pah chuan a hmui petsawi kualin a meng tal tap a.

Thang pakhata sava pahnih awh thei renga awm awk duhlo tu han nih chu mi pangai bak hret nih angai hial ta ve ang. Mahse kei chu rilru fim put ka ngaih kha mawle.

A haw tur chuan uang hlek lo hian uluk zetin min dût pek a! A duhthawh ngang mai. A thaw halh a, a hawtur chuan nuilui tih hriat zet chuan min han seih zauh a...

AFFAIRS :

"Pizza plizz... muah"

"K"

"Kawnghnuai lamah lo kal rawh aw, kawmthlang lamah khan... "

Ka bag penga thil awm chu kan en nawn a, Syringe 10ml leh Acid tui, Screwdriver leh glove, players leh electric wire, petrol plastic bur tereuhte a dah leh pawnchhia!!

An inhnuai lam ațanga ka lut chho chu kawngka bulah stepah chuan min lo nghak reng a, leggins pan zet leh mutkawr niawm tak hi a lo inbel a, min hmuh veleh chuan a lo thochhuak vat a, a hmui chu min rawn bel chawt mai a. Eh pawh ka ti hman meuh lo a ni, ka sihhnip ve ang reng bawk sia!

In ti romantic tawk chuan stepah chuan ka'n pawm ve ngei a, a nui ve har har mai. Mahse, duh aiin a rit mah mah a ni, zawngchhang chiloh khawp ang le. Step a tawi hrima leh.

An bedroomah chuan pawmlutin an khumah chuan ka nghat dat a, min kuahna chu thlah duh miau heklo le bag ak run chung chuan kan in bawh ur roh a! 'Kan infawp a' tih mai ai chuan 'min fawp a, ka fawp bawk a' ti ila a fiah zawk mai thei e.

Ka bag ah leh min tuam mawitute chu phelh țhat pawh awmlo chuan baklengin an tla thla zung zung a, a kutveilam a zingbun chu ka melh ran ran tih a hre deuh a niang "tihpalh" tihpah chuan a phelh a, khumluah chuan a dah phei ta nghal a. Zangphar diai a ka mut lai chuan min rawn nul kual dan dan a.. Patling mit meuh pawh a Arpui mitmen diar diar lai chuan "Duat, inbual hmasa phawt ila" an ti hlauh mai a! Ka mission ka va hrechhuak lo teuh ve le...

"Va inbual la, ka inbual zova ka lo kal asin!"

"A, mahni te chuan..." a ner nang nang a.

"Ka peih rihlo em a... ka fai tho alawm keichu,..."

"Van sual tak... nih ka va inbual lawk ang aw..ka rei lovang"

"Umh... ka lo ready viau ang"

"umh" tih pah chuan min rawn fawp a, bathroomah chuan a lut zui ta a.

Ka inperh tho rang kher mai!

An computer dawhkan chu ka chawiher nawlh a, ka hlauh pakhat CPU kilhna chu a lo in seal tawh lo hlauh a, Harddisc chu screwdriver a tin ranin Player chuan kan chhu pawp mai a, a perek leng hal hal tur tawk vel chuan a kaw phat a, Acid chu syringe hmng chuan kan kaplut ngheng mai a leh! Ka chawi letling kual vel a Acid chuan a chiah kim ngei tur a ni tawp mai.

Current line ka chep bung hmawk a, plug an hmeh ruala transformer kang thei ngei turin ka thlun zawm a, petrol bur leh pawnchhia te, wire te chu ka duhna hmun takah ka dah fel ta, a chhung chu acid chuan kan phuh leh hram pek a! Kang lo mahse acid chuan a eichhe tho tho tur a ni tawp mai ni.

Khum ka thleng hman lo teuh kher asin! Bathroom kawngkhar chu a rawn ri rak a..

A malno zet mai chu a rawn penchhuak var hai hai mai le!

Leggins a bova, chu aia chik leh zual a en chuan a awmbawr funna pawh a awmlo tih a kawr pante rawn 'pointed' dan ațang chuan hairual a ni lo.

Huiham.. a rawn hnai tial tial a, engkim chu a fiah em em vek a sin. Nunna lo chhuahna meuh pawh chu a zahawmna hliahkhuh țhintu chuan a peihloh san ta a ni ngei ang le!

Khumah chuan a khup biltaih mai chu a rawn nghat ta! Thlanfimin min bual a nih em loh pawhin chhungril khawsik talin min țhamru ta ve ang. Mi nupui pawmlai em phekphelen tur chuan ka huaisenna hian a tlin mawlhlo a sin. Aw...Vante u minpui teh u..

Zangthal, parh fe a mu kha ka nia, min rawn thlawp thlarh mai le. A hriak rimtui inchulh rim te nen lam chuan ka hnimpui ve lo thei ta lova, a thawri te chuan lei eden lam mual hrut turin min sawm hiam hiam asin.

Ka che ngam ta lo! Ka tlanchhuahsan phal bawk silo laitak chu a ni ka buaina ber chu ni ta! Ka beng a seh ner ner a, a thawlum ham ham mai te, a pang lum thar thar te, a kut awm hle hle lo tak maite chuan lungphu an va ti rang teh lul em!

"Lucy..."

"Umh.."

"Kan kal thui lutuk dawn a nia..." a ngawireng a, a thiltihlai chu a țhulhphah chuang hauh bawk silo.

"In nupa khum tihbawlhhlawh hi a țhalo a sin" a tho țham țham a, "Tho la, lo kal rawh.." Khum bula ding chuan min en ran a. Huai tak ei, ka țhuchhuak ta hlawl a. Ka chesual ta lo hlauh e.

"Lo kal la...." ka banah chuan min kai a, inchunglamah min chhohpui a, engtak chu kan ti dawn ni maw?

Room pakhatah hian kan lut a, single room fel thlep thlawp hi a lo ni a, mikhual room a nih ngei ka ring.

Kan lut fel chauh chu min fawp nghal mawlh mawlh a, ka chhanlet chuan a tawp kan thlen a ngai dawn si. Insum a har takzet! Engemaw chen chu ka dingkhawng reng a. Harhchhuak thut niawm tak chuan min dinchilh ta. Ngawireng chuan min en vang vang a.

"Pasal nei lai ila nia, hetia kan awm hi a rem rih lo a ni. Hrethiam hram rawh, uire tur chuan ka phal lo che.."

Ka awmah chuan a hmai phumin nghet deuh chuan min kuah a, a khur der derin ka hria.

Reingial chutiang chuan kan ding dun a, min han tilui deuh se chuan țang tur chuang ka awm hauhlo tih ka hrechiang kher mai. A hnungah chuan duat takin ka chulsak heuh heuh a, "Ka lawm e, ka chunga i thiltih vang hian" a ti sap a. Ka hrethiam chiah lo deuh, min tih elna nge, a lawm tak tak tih pawh chu.

"Kan duhna lam ringawta kan kal chuan a țha ber lo"

"A dik alawm, mi fel tak nangkher ka lo tawng che hi ka vannei hle mai. Ka nihna ka theihnghilh phah tih mai loh chu" ka awmah chuan na manglo hian an seh zauh a.

"Mahse..."

"Engnge..?"

"Nang leh zel ka chân che chuan engtinnge ka awm tak ang?" a ti keuh keuh a.

"Ka kalsan dawn hleinem che, lungngai mah ta che. Kan tan remchang a la awm ve mai dawn alawm, chutih hunah chuan venthawn awm lovin duhthalin hun kan hmang tawh ang a..."

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 11th, 2017, 9:54 pm

"Umh... ka chak tawh. I puitling bik si nang chu, a nuam ngawt ang. Lo tawng hmasa zawk che ila țha tur, ka vanduai bik"

"Khai, chutiang zawngin thil an ngaihtuah ngai hleinem. Mitin hian kan tan hian hun ruatbik kan nei vek alawm. Vanneih chang a awm ang a, vanduai changte pawh kan nei ve bawk ang chu. Chumi dawn sawn thiam chu kan tan hian a țha a ni mai. Kan hriatthiam loh țhin vang hi lawm rilru hah te kan tia kan buai kan buai. Thilțha chauh dawng tur kan ni biklo a ni tih hriattur a nia...dik em?"

"Umh dik" tih pah chuan min rawn fawp leh pek a, khai aw..thinlai nilo zawk mu hnu a kaitho leh dawn tlat mai ka ti. Min kuah nghet bawk si. A hmui a phawi meuh chuan a thaw a chham țepin ka ring, âm zetin boruak chu a hiplut vang vang a.

"Duhtawk ila" tih pah chuan a mawngah chuan kan țhamsak nawk a. Rumțhat pah chuan " I chân nasa mange..." a'n ti deuh kher pek a!

'Ka haw ta a,' ti mai ang. Hetiang lai ruam hi kan hrûtrei bik ziah mai!

Ka awm erawh a nuam hauh lo thung, current kha kalsualin an inte kangpalh ta se, '...ta se' tih ngaihtuah chuan ka rilru nuam hauh lo mai.

"Lo chhuk lo mai rawh, a mood a off lutuk, a computer a kang a.. a tumbur mai! "

"Pills i neih tho kha, a in turah pawlh mai rawh. Pawlh hnem lo la mahse"

"Umh i tih tlat chuan le... chanchin ka lo hrilh leh dawn che nia" tiin kan in text na chu a ti tawp ta kha a nia. Ka hlawhtling ta e pakhat chu!

Dar 9 a ri a, a la reh hmak mai.

9:30 velah chuan 'a mu ta e' tih message ka dawng ta hram a, ka room ațang chuan ka chhuak vut a, ka nu chuan maktih hmel zet hian min lo en a, "Khawnge i kal dawn tun ang hunah te?" A ti ta ngei reng a. "Damdawiinah kan dawr țhenawm a mi te an lut thut a ni awm e, ka han lang ve zawk ange.. chabi spare ka keng ang a talain lo kalh mai rawh ka rei tak hlauhin" tiin dawtin ka pha mar ta ringawt a.

Ka tlanchhuak dawn chiah tih chuan ka phone a lo ri leh a, Lawma a lo ni a, "Kan țhianpa ka bia a, Software Engineer an țhianpa ka biak tir a, mahse a inchhiar to khawp mai" "Engzatnge a tih a?" "Singthum a ti, mahse a rintlak ang, an recover thei tawh dawn lova a ti a, a tia" "A țhat chu, Sum lamah chuan harsatna awmlo ang, mahse a țhianpa chu direct a kan biak rem a tih chuan keimahniin dawr mai ila a va țha ve, a number te lo dil la" "Awle, ka lo tum dawn nia"

Kan han inhmu chu a mizia a dang viau, chhunlam nen chuan inthlau tak a ni. Reingial chu min kuah vang vang a, 'Ka ning e' a ti sap a. "In pa chu a mutui maw?" "Umh, tui viau chuan ka hria, i duh leh va confirm la" an ti hlauh mai a leh! A ngailo pawh ka tibuai lo, "Kan va en ange aw" tiin min kuahna ata chu ka kalsan ta a.

Room ka lut chu room spray rim a lo nam rum rum a, current kang rim hliahkhuh nan an ti a ni ngei ang. Zawng kahthlak ang derin an pa chu an khum lian zetah chuan a lo mu zangphar dur a, a hnar suk suk mai lehnghal. Computer table lam chu kan en a, a cover inhawng huaiin bang hrulah chuan an lo dah a, a chhung chu repair aichuan a thar lei a hlawk zawk ngeiin ka ring.

An khumbul side table chunga in neitupa phone let ngât mai chuan ka mit a la kher mai. Ka ak mai lo theilo, a hranpaa buaipui tura ruahmanna ka neih lai chuti taka awlsama ka kuta a awm maithei chu lawm avangin beng thleng thlengin ka bawp ka khai lo chauh a ni. Mahse, la ta ila rukru ka ni dawn asin.. Keimah chauh ka kal bawk si a, a latu chu midang puh a har viau lawng maw..

A ho teih teih emai, annu hian ka kal tih a sawi ngam dawn lo chiangkuang lutuk rapthlak mai a!!!

"A muttui hmel khawp mai.." ka ti chhuak lar lar a, inchung lamah bawk chuan kan chho dun leh a, khum chungah kan țhu fel zawt tih chuan ka pum nuamlo chhuanlamin toilet-ah chuan inthiar tur awmtakin ka luhsan a, an pa phone check chu a ni mai e ka hna tur chu.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)