SECRET LOVE IN A VILLAGE

[Ngaia]

SECRET LOVE IN A VILLAGE
'Hmangaihna chuan mi chakte a ti tlua, mi chak lote a kai tho thin'

By:Saihminga Sailo & Puitea Tuallawt

Dr.CRISTOPHER
Christopher Baruchli chu Colorado Living Stream Baptize Church a pro pastor rawngbawl hna thawk lai mek a ni a. Amah hi Kum 32 mi; palian feet 6 leh inchese 2 vel, sa tha telh tawlh, tisen sak, hmui mawi tak, hmel sär vuah mai a ni a. Mi nun nem tak leh inngaitlawm tak mai a ni.

Amah hi Colorado a seilian mah nise, England-ah lehkha a zir daih thung a, 1999 khan Oxford University atangin PhD in theology a zo ve a. Ph.D a zawh hnu chuan an khaw lampangah hawin a pa kohhran dinah pro pastor hna a zawm ve ta a ni. A kohhran enkawl mipuite pawhin an ngainain an nêl em em mai a. Amah lah hi naupang lawm tak mai leh fiam peih tak mai a lo ni chhap nen; tin, an kohhran tan thahnem a ngai em em bawk a, kohhran mipui pawhin an fakna ber pawh a thahnemngaihna leh inpekna ropui tak chu a ni reng a ni.

Pathian niin inkhawma a kaihruai thin a. Amaherawhchu amah hi tawngkam tlachham ve tak leh thusawi thiam lem lo a ni. A taka ti tawp mai chi a ni thung, ka ti ang a ti tawh chu a ti ngei ngei ri ngawt mai a ni. Chowkidar pawh rawn si se lem lo va biak in leh a vel tih fai te hi a thil ti duh thin dan a ni a. Pastor tha tawpkhawp a ni, a kohhran member pawh an pung chak fu mai.

VISIT THE CHURCH
Vawikhat chu an kohhran atanga an missionary tirh chhuah ho tlawh turin ram hranah a zin a tul tlat mai. An kohhran hi kohhran lian ve tak an ni a, missionary pawh 120 vel lai khawvel hmun hran hranah an tir chhuak ve a ni. Afghanistan ramah pawh an missionary tirh chhuah hi an awm nual nghe nghe. Hemi truma a zin hian ram panga lai a tlawh a, Afghanistan ram hi a lut hnuhnung ber a, thil tih tur a tam deuh avangin eng emaw chen chäm a ngai dawn nghe nghe a.

2002 February chawhnu lamah Afghanistan capital Kabul-ah chuan a thleng thla a. Afghanistan hi hmun ralti leh muslim firfiak tak tak tamna ram mah ni se, a ni tan han hlauh em em tur a awm lo bawk a, thlamuang tak chuan a awm a. Hotel changkang lem lo takah chuan a in pu lut ve rawih a. Kabul-ah hian zan khat chama, a tukah Kabul atanga hla lutuk lo, darkar hnih vel bus-a kal khaw pakhat Gardez-ah , an missionary te awmna lam pan tur a ni. Zanah chuan inlama a chhungte leh thiante an phone kual vel a, zinga tho hma tur a nih avangin meng rei lovin a mu thuai a.

A tuk zing dar 7 velah chuan a tho va, bus station lam chu a pan nghal a, bus pawh chuan a lo chhuahsan hman tep nghe nghe a. Tichuan an chhuak ta a, kal kawngah chuan a inngaihtuah neuh neuh a, ram panga a hmuh belh leh tawh te, a thil tihah a tluan zel avang te chuan a hlimin a lawm ru veng veng a.

REJOICE
Pathian hnenah rilru tawngtaina neiin lawmthu a sawi mawlh mawlh a. Chutia a in ngaituah lai chuan an thlen chin pawh hre lovin an tum ram chu an lo thleng der mai a. A khua, Gardez hi Afghanistana Paktia province a an capital a ni a, mihring hi 70000 vel awm anga ngaih a ni. Bus station an han thleng phei a missionary-a lo awm thenkhat te chuan an lo hmuak a, an han in chibai lawp lawp a, a thlenna tur in lam pan chhuan an chhuak leh nghal a.

A thlenin tur in chu an thleng phei a, Chris pawh chu inbualin a in singsa vela. A inbual zawh chuan chulai hmun vela christian lo awm te chu an rawn lut khawm ve trak trak a, chibai te an sem kual a. Inleng te an rem hnu chuan a room lam chu a pan a Bible chhiarin tawngtaina te a nei a, a chauh deuh avangin zanriah ei hma chuan a lo muthlu sek nghe nghe a.

THE LAND OF MUSLIM
He khua hi Muslim firfiak tak tak ho awmna a ni a, Kristian pawh an la tlem khawp mai. Kristiante chu chhiar tham lek tak tak an ni a, thaler vaivut kara tui tling zat chauh an ni, an mahni hual velin Musilim inti kulmuk ho erawh ruahuivanawn ang mai hian an tlim hmur a ni ber e. Kristiante erawh chu mi dang hriat hlauvin an la inthup ve hle bawk a ni. Kristiante chuan chutia hauh leh vau an tawk ren chung chuan vaubehna karah inkhawmnate pawh a ruk thei ang berin an nei a, vauna te pawh an dawng nasa thei hle mai a.

Mahse, Krista chu vau daih theih ni chai hek lo, Kristiana an inleh avanga an chhung ten an tih hlum tak pawh hi mi tam tak an awm ;mahse, accident anga an lan tir thin avangin han tih ngaihna vak a awm bawk si lo. Kristiana inleh chu sawi loh, Kristian mi ho hrim hrim tawh phawt chu an hlau em em vek a, chu mai a ni lo.

Kristiante khawih hnu hnimhnaih pawh thil hlauhawm takah an ngai hmiah mai a ni. Chris-a chuan an khaw chanchinte a han hre chiang a, Muslim ho hlauawm zia te leh an nun rawn zia te an hre chiang a, missionary-a lo awm ho pawh chu a fakin an huaisen a ti em em mai a. Tin, a pa(an Kohhrana Pastor ni lai mek) in helai hmunah hian enge maw chen experience neih nan cham turin a tih avangin thla thum aia tlem lo chu cham a tum ve nghe nghe bawk a, tin, an kohhran te hnena hriat tir tur missionary ho hnathawh dan zawng zawng hi report a ziak thla reng bawk a. Tin, an hnathawhna lamah te chuan theih ang tawkin a pui a, a buai nileng ve thak thak hi a ni ber.

A thlenna in hi missionary lo awm ve, nupa an ni a, Sarah leh Walter te an ni. Sarah hi Irish-American a ni a, Walter hi Native American (Red Indian) kan tih ang chi thla dal tawh tak a ni thung. Hemi te nupa hi an felin Chris-a chungah pawh hian an tha em em mai a. Tlai lamah hian awl deuh changin Chris leh chumite nupa chu evening walk an nei thin a.

Tlai khat chu evening walk an nei leh a, an in piah deuh maiah chuan nula pakhat, muslim nula ngei mai, hmai tuam vek ang chi hi bike chak lutuk a rawn tlan hian a rawn su thal tawp mai a. Bike pawh chu a tlu ve thelh; mahse hmanhmawh lutuka in siam remin a tlan tlang leh nghal daih mai a. Chris te pawh chu an va tlan phei a, chu nula chu an va buaipui nghal a. Ni khaw hre loa a awm avangin Chris chuan a pawm kang lawp a, damdawiin hnai ber chu an pan pui nghal a. Khung lai Afghan ho nulaah chuan hleitling pawl tak a ni, amah kha feet 5 leh inchese 8 vela sang a nih hmel, Chris-a tan pawh chuan rin ai takin a lo rit phian mai.

Damdawiin chu an va thleng phei a, a hmai khuhna pawh chu la thla lem lovin Casualty-ah chuan an dah lut ve tawp mai a. A hnu deuh ah chuan damdawiin thawktu te chuan a bag chhunga ID vel leh phone number atangin a chhungte an lo be pawp a, a chhungte pawh chu an rawn thleng vat a, Chris te pawh chuan an haw san ta a.

ISLAM LADY
Chuti ang an tawh hnu ni thumna velah, a thlen inah chuan Muslim nula lian ve lampang leh nu tar ve tawh tak hi an rawn lut hlawl mai a. A nula zawk chuan English pai ve tak mai hian,"Christopher Baruchli-a chenna in a ni em aw?

"Aw ni e, keimah hi ka nia, engeni in duh a?

"Eng dang ni lo ve, hmanni a Bike in a sut kha ka ni a, hei lawmthu sawi nan eng emaw rawn pek che kan duh a"

"Lawmthu sawina tur engmah a awm hlei nem, thu rawh u, thu rawh u"

Chris pawh chuan a lo dawngsawng thiamin leng thu tur chuan a sawm nghal a mahse nula chuan an rei hman loh thu a hrilh pahin a kuta a thil ken, chhang ur hlim ni awm tak chu pek pahin a hmai tuamna chu a hlip thla ta. Chutah le, Chris chu a trek ta chhak mai.

Christopher Baruchli, nula ngaisak ngai reng reng lo, zirna lam leh Pathian thua rilru dah nghet tlut mai thin mi, ngaihzawng tih tur fum fe pawh la nei lo, hmeichhia a ngaisak loh lutuk avanga a chhungte leh thiante pawhin a an chhaih fo thin chu a hma a vantirhkoh ang maia hlemtha nula a hmuh chuan a rilru zawng zawng chu a chawk buai ta vek mai.

A thil rawn pek pawh chu lak lawk nachang hre lovin ka hau va, chu nula hmeltha tak mai chu a en reng ringawt mai a ni. Nula chuan a a hmingin a ko leh a, chutah Chris pawh chu a suangtuahna khawvel atang chuan a harh chhuak zawk a, a thil pek pawh chua a la ve ta a. Nula chuan a hmai chu a khuh tha leh nghal a, an kal mai a ngaih thu a hrilh pahin a hming Aishah anih thu a hrilh nghal bawk a. Chris tan chuan Aishah chu khawvela hming mawi ber a va ni teh lul em!

Chuti ang nula a nun khawih danglam leh rilru her danglam vek tu chu Chris pawhin a la tawng ngai reng reng lo, mak pawh a ti zawk khawp mai. Zan a mut hmunah te chuan a ngaihtuah zui vawng vawng a. ‘Love at first sight’ an tih thinte hi a awih ngai reng reng lo; mahse, a chungah a thleng chu a ni ve ta reng mai si. Tirhkoh Paula sawi nupui neih loh hi a tha zawk tih te kha a rilrua a lo dah len em em thin a ni a mahse kha ngaihdan kha tunah chuan a rilru atangin thehhmeh ang hmiah in a bo tawh.

He nula hi a rilru in a vei tlut tlut a, thil dang engmah a ngaihtuah thei hek lo. A hmel a hmuh hmasak ber zan phei hi chuan a muhil thei lo va, a ngaituah zui vawng vawng a, a tlaivar phah hial a ni. A tukah chuan amah hriatchian belh tum leh a khawsakna hmun hriat tumin a rilru a siam rauh rauh va, khawvar hnaih lam chuan a lo chhing ve sek a. Mahse, a rilrua thil awm chuan a tur ngang ani ang, darkar chanve pawh muhil hman meuh lovin a harh leh ta zawk a.

A tuk zingah chuan tih hmasak ber tur leh kalna tur ber pawh hre lovin a ar khawthim kawh chhuah ve leh ta tawp mai. Ahma a bike in a sutna hmun kha a va pan leh thawr mai a. An hmel hre mah se, nula ho lah chuan hmai an khuha, an in ang thup hlawm mai bawk si. Chris'an a chhinchhiah theihna ber chu a savun bag uk hlui ve tawh lampang chauh kha a ni mai a. Chulai hmunah chuan nilengin a va thu ta ringawt a, tlaiah chuan beidawng takin a haw leh a. A rilruah lah chuan a lian tulh tulh bawk si, theihnghilh an tum ngial thin; mahse, a ni ang tlangval inringtawk teng tawng, hlauh leh zah pah em em pawh nei lem lo tan chuan thiehnghilh a har ve bawk a ni.

Chu nu chu a rilru leh a ngaihtuahna zawng zawngah a zam vel a, chu chuan a mut a ti chhuak hlawl lo, zan mu pawh a chhing mang meuh lo a ni. A tukah chuan a ngaite bawkin chulai hmunah chuan a va thu nileng leh a, kar khat vel nitin a va kal ziah a, a va thu nileng thak thak ringawt mai a ni. A tan khual khuaah leh nghal han zawn chhuah ngaihna a awm lo a ni ber e, Kristian pastor ni mek tan Muslim nula zawnga mi zawh kual vak lah tih chi ni hek suh, an missionary te ho lah zawh chi an ni der bawk si lo.

IMPOSSIBLE AFFAIR’S
Karkhat leh ni hnih naah chuan kawngsir thutlengah a lo muthlu lawp lawp chu a hma a a aw lo hriat tawh, khawvel zawng zawnga a tana aw no nalh ber leh mawi ber mai chuan a rawn ko harh zawk mai le. Chris pawh chu hmeichhia la chhai thang lo tih takah a thin chu a phu nghal dup dup mai a, chhan let mai nachang pawh a hre lawk lova, chu nula in ama lam a rawn pan lai chu a thlir reng ringawt a. Chu nula chu a bulah a rawn thleng phei a, a hmai khuhna hlim pah chuan,"Aishah kha ka nia, min la hria em?" tiin a rawn bia a.

Chris chuan," hre tehreng e, engtin nge ka theihnghilh theih ang che"

"Hetah enge i tih reng reng a?"

"Engmah ti love, mi nghah ka nei a"

"Saw laiah sawn kalna tur ka nei a, ka kal leh phawt mai ang"

Aishah chu kal leh mai a tum mek lai chuan Chris chuan a huaisenna zawng zawng sawm khawmin,"Aishah khawngaihin kan inhmu leh thei ang em? Mi nghah ka nei ka tih kha a dik tak chuan nangmah hi ka nghak che a. He lai hmunah hian hmanni kan ina in rawn kal atang khan nitin nangmah hmuh tumin ka la thu nileng zak zak a. I awmna hmun ka hre bawk si lo, hmuh leh che hi ka duh tak zet a. Thil pawimawh tak hrilh tur che ka nei a ni". Aishah pawh chuan mak tih hmel deuh hian a rawn en ha a.

"Eng thil nge min hrilh tur i neih chu, tunah khan sawi la"

"Aaa.. thil tam tak a nia, tuna han sawi mai theih pawh a ni lo"

Chris chuan helai hmunah sawi mai a rem loh thu leh hun leh hmun fal deuh a ngaih thu a hrilh zawm a. Aishah pawh chuan a lo 'aw' ve mai bawk a, a tuk tlai tun ang hunah an piah deuha Hotel ah chuan Chris chuan room a lo book ang a, tah chuan in hmu tur chuan an in be fel ta a ni. Chris pawh chu hlim deuhin in lam pan chuan a haw a, a tuka a thu hrilh dan tur te chu a ngaihtuah phei neuh neuh bawk a.

A hlim viau e ti lo chuan a huphurhna chuan a delh rit zawk mah a, ani lah muslim nula kulmuk tak mai, amah lah Kristian pastor ni lai mek ni bawk si, a rilru chu a buai khawp mai. Pathian hnenah te chuan a rilrua a vei zawng zawng te chu lak kian sak turin an dil leh ringawt thin mahse engmah a sawt bawk si lo. Zan mut hmunah pawh a in ngaihtuah nasa mai, amah lah chu a in thiam lo em em bawk a mahse a duhna leh a vei na chuan a hnuk kal dawr dawr mai bawk si a. Tin, a thawhpui missionary dang ho ten hria se mak an tih tur zia leh an dem tur zia te a ngaih tuah a, Muslim firfiak hruaitu deuh ten hria se a nuna tan hiala a hlauhawm tur zia te chu a ngaihtuah a, a rilru chu a hah em em mai bawk a.

A tukah chuan a duhna in nawr nasat em avangin an intiamna lam Hotel chu a pan phei vat a. A rilru hrehawm hle mahse a phur angreng avangin a thleng phei hma hle a. Aishah pawh chu a rawn la thleng lova, Chris chu darkar khat vel laiin a hma a. Room ah chuan a lo phi sek mai a, a thu hle hle thei lo, a vei tawn sek mai, a zak deuh bawk si, engtin nge a hmeichhia chuan a lo tih ang tih te a ngaihtuah buai nasa mai. Tawngkam thiam loh nen a thusawi tum a bahlah ang tih hlau bawk si. A hnu deuh ah chuan Aishah pawh chu a rawn thleng ve ta hlawl mai a, Hotel room chhungah chuan an pahnih chauh chuan an awm ta.

Thil tak tak an sawi hmain Chris chuan eitur leh in tur an order zung zung a. Biak pawh inbe vak lovin an thil order nghah pah chuan an lo thu ngawi dun reng ringawt a. Chutia minit sawm vel an thut hnu chuan an thil order pawh chu a rawn thleng a, thil vel an ei tan hma chuan Chris chu a rawn tawng chhuak ta. Aw khur deuh dar dar chung hian,"Aishah, kan la inhre chiang lo va, tun pawh hi vawi thum kan inhmuhna chauh a ni. Mahse thil hrilh tur che ka nei. Kei hi kan sakhaw (Kristian) lamah chuan puithiam ka ni a, kan Pathian thu chuan ringlo mite hi ngaihzawn emaw nupui pasala neih a remti lo. Tin, kei hi hmeichhe ngaihsak ngai reng reng lo, bialnu tih tur pawh la nei fumfe lo ka ni. Mahse hmanni ka hmu che atang khan ka rilruah i awm reng a, ka ngaihtuahna ata hi i kal bo thei hlawl lo a ni, keimah pawh ka inhrethiam tawh lo" tiin bah deuh neinuai chuan an hrilh ve sap sap a.

‘AISHAH’ THE INNOCENT ISLAM
Aishah chu a ngawi vang vang a hnu deuhah chuan a rawn tawng chhuak ve ta a, ani pawhin a rilru ang chiah a put thu an hrilh mai chu(h) Chris-a lawm lutuk chu a a mitah chuan lawmna mitui a rawn hnam sawk nghe nghe. Mahse a dinhmun a khirh zia leh inngaihzawn lampang chu a ngam loh thu chuan a chhunzawm nghal a. Aishah nu leh pa hi an sakhuaah mi in hmang tak an ni a, tin, a pa phei chu hruaitu te zinga mi a lo ni nghe nghe a. An chhungkua hi an khuaah chuan mi khawsa thei leh thil ti thei ve tak an ni bawk a.

Tin, an khuaah hian an chhungkhat vua leh vang an tam em em a, an inthurual em em bawk a. An in ngaizawng tih an hriat chhuah phei chuan an chhungte tih hlum emaw tuithlar hial a tawk ngei dawn tih a in hre ve reng bawk a. A pa lah hi Muslim firfiak tak mai a ni leh nghal a, tuna an in hmu tih pawh hi hria se a chungah hian eng thil nge thleng ang tih pawh hi ngaituah thiam phak bak a ni. Chutichuan an in then a lo hun a, phone number te chu an in pe a amaherawh chu an inhmu leh ang nge leh lo ang tih erawh sawi chunzawm ngam chi a ni tawh lo.

An han in then leh phawt a, Chris pawh chu lunghnur takin in lam pan chuan a haw leh ta a. Ni 4 ni 5 vel an han rial ve a mahse Chris-a lungleng chuan hmuh leh theih dan a rilru chuan a dap ruai reng mai. A tawp a tawpah chuan an thenawm nula chu a ruka biain Aishah chu a va phone tir ve leh rawih mai a, inhmuh a duh leh thu chu a hrilh tir ta a(Land line a ni a amah chuan a phone ngam lo a ni). Aishah pawh chuan a lo duh bawk a, an in hmuhna ngaiah chuan an in hmu leh ta a. Duh leh duh na na na chu a hmeichhe tan pawh hnial a lo har a ni ang, kar tin mai chuan an in hmu ta ziah mai a. A rei tual tual a an in hmu zing tial tial a, kar khatah vawithum lai te an in hmu thin ta. In ngaizawng tak tak ang chuan an awm ta der mai. Thla te a lo vei a, chutia inhmu reng, hmun fal ah leh nghal, an in chul nel ta phian mai a.

LOVE IS NOT BLIND
Chris-a pawh in lama a haw a lo hun dawn hnai tawh; mahse hawsan mai a hreh em avangin a pa leh kohhran te hnenah chhuanlam fahrah te te siamin cham belh dan a ngaihtuah a. An mahni tuakchhung Kohhran chu an buai lem loh avang leh a pa in a remtih avangin Chris pawh chu a cham chhunzawm leh thei ta. Chutia in hmu reng ta na na na chu an in hmangaihna pawh a sosang ve zel a, an in ngai em em bawk a. Mahse harsatna lian tak chuan a delh ve reng a, an dinhmun inang lo lutuk leh khawsak zia in ang lo lutuk chuan a phuar ve reng bawk a ni.

CAUGHT IN A WEB
Chutichuan hlauthawng reng renga leh inthup reng rengin an khawsa chho ve reng a. Mahse inthup sen bik hek suh le. Chris-a thawhpui te beng pawh a thleng ta zauh zauh mai. Chutih rualin Aishah chhungte pawhin an hre thawi tan ta. An tan khua hi a eng lova, an chungah chhum pui hi a zing mup a ni ber. Kawng tinrengah dodalna an tawk a, Kristian hovin an pastor khawsazia chu an lawm lo va, Islam ho lamin an nula awmdan chu an lawm hek lo. An pahnih chuah chuan an tang dun a, khawvel hian a do rawn a. Mahse, an mahni phuar khawmtu chu HMANGAIHNA a ni miau mai si. Nia, hmangaihna chuan ramri a then ve lo va, sakhua in awmzia a nei lova, huatna leh phuba lakna in awmzia a nei hek lo.

Ni khat chu Chris leh Aishah chu an inhmuhna ngaiah bawk chuan an inhmu leh a. Mahse an tum angin thil a kal ta tlat lo mai, hotel pindana an inkawm melh melh lai chuan hmai tuam pali an rawn lut ta rup mai. Chem sei pui pui an rawn lek fur mai a, an rawn vin nghal tuar tuar a. Pahnih chuan Aishah chu an man bet a, an hnung khirh a, an phuar hlawm nghal bawrh bawrh mai a. Chutih lai chuan Chris chu Aishah chhan tumin a lo ding chhuak, mahse han chet zui theih a ni lo, mi dang pahnih chuan an chem sei pui mai chu Chris-a nghawngah chuan an chuktuah nghal run mai a ni. Chris chuan Aishah mangang au thawm chu hriat hrehawm ti hle mahse chet ve chu a fuh berin a hre si lo. Chet a lak ve chuan ama nunna mai bakah a duh ber nunna hial pawhin tuar hial thei tlat a ni.

A hnu deuh chuan Chris pawh chu hnungkhirhin an phuar hlawm a, khaw hmu thei reng reng lovin a mit an tuam sak bawk a, room atang chuan ransa ang mai hian an phih chhuak dawr dawr a, motor hnung niawm takah hian an vawm hlawm lut tawp mai a. Aishah chu a tap zawih zawih a, mangangin a awm a ni. Chris chuan a hmangaih ber chutia manganga a awm chu a rilru a na hle mahse han tih vak theih a nei si lo. Motor chu an ti rum vut vut a, an tlan chhuak a. Khawi lam nge an pan pawh hriat lohvin darkar hnih dawn lai an tlan a.

A hnu chuan an kalna tur hmun an thleng a, hmai tuam vek chung chuan an kai chhuak leh dawr dawr a, inchhuang ah an hruai lut tih an inhre thei mai a. Chulai hmun chu boruak a tlemin thawk lak a harsa leh a, a boruak a uap deuh churh a, a rim pawh a thang deuh huam nghe nghe a ni. Chu pindan chhungah chuan thuthlengah an thut tir a, hnung khirhin thuthlengah chuan an phuar bet a. Aishah lah chu a mangang tih hriat tak hian a thaw hlawp hlawp reng bawk a, Chris chuan a thiam ang tawkin a hnem mawlh mawlh a mahse awmzia a awm si lo. Chutia thuthlenga an phuar beh hnu chuan pinadan chu a mantute ho chuan an chhuah san vek a, darkat khat dawn lai an rial a. Darkar khat hnu vel chuan pindan kawngkhar inhawng ri rak thawm an hre leh ta. An chungah enge thleng dawn ta le!

An lu an tan sak dawn nge, an kap hlum dawn nge engmah an hre lo. An hmaa thil lo thleng tur chu an inhmangaihna in huaisenna a pek chuan zam miah lovin an hmachhawn dun tawp mai a ni. Ke pen ri a rawn ri phei khauh khauh a, an bul hnai velah chuan a vei kual thauh thau va. Chutia minit 3 vel an bula a vei kual hnu chuan mipakhat hian an mit tuamna chu a rawn phelh sak ta. Aishah-i pa, a lo ni tlat mai. Mahse Aishah chuan pa mitah a en ngam lova, hlauvin a khur nghal zawih zawih mai a ni. A chhan chu a pa hi mi rilru lian tak, Muslim hel (terrorist) lamah pawh inhnamhnawihna nei ve nual a ni a, a duh loh zawng leh an sakhaw pela thil tite chu an nunna pawh a lo laksak hial ta ve thin ang. Chutiang taka an khaw mipuite pawhin an zah leh hlauh a ni a, an sakhaw kalha thil ti an nih chuan a fanu ngei pawh hi a zuah biak a rinawm loh a, chu chu a fanu hian a hrechiang em a ni.

A pa chu a rawn tawng chhuak a," I naupan tet atangin ka enkawl chho che a, ka chawi lian che a, kan sakhaw dan zawng zawng ka zirtir che a, ka mit tlunlohna engmah i nei ngai lo. Mahse hei tunah zawng thil pawi ber mai i khawih ta tlat mai. He thil atang hian i in hnuk dawk lova i kal lui zel a nih chuan i chungah hian enge thleng tur ka sawi lawk thei lo. Kar khat he pindan chhungah hian i rilru siam nan hun ka pe a ang che. Tin, nitin kar khat chhung i rilru i siam fel tawh nge siam fel lo ka rawn zawt ziah che ang a. Kar khat hnua i siam fel lo a nih chuan i chungah enge thleng tur ka sawi thei lo" tiin awki nem lo zet hian a hrilh ta khauh khauh mai a.

Aishah tan pawh han sawi tur a vang hle mai, Chris a hmangaih bawk si, a chhungte leh an sakhua a hmangaih ve tho bawk si, a rilru buai chuan a ti a tep hial a ni. Mahse Chris chuan an thusawi chu enge a awmzia a hre ve hauh lova, an inbiak lai chuan a lo ngawi reng ringawt mai a. Mahse a aw ki atang chuan vauna thu a ni tih chu a hai bik hauh lo. Chu thu a sawi zawh chuan a pa chu pindan atang chuan a chhuak leh nghal mai a.

Chu pindan tereuhte, rimchhe em em leh boruak tlem em emah chuan tui intur pawh nei lo, chaw ei tur pawh nei lovin thutlenga hnung khirh chung chuan an thu ngawi dun reng a. Sawi tur an van dun hle mai.

Tichuan a tuk khua a lo var a, a pa chuan a rilru a siam fel nge fel lo hriat tumin a rawn kal leh. Mahse Aishah pawh hmeichhe luhlul tak a ni a, tin, a hmngaihna chuan a ti luhlul a, a pa chu tawngkam khat pawhin a lo chhang hauh lo. A pa chu thinrim tih hriat takin pindan chu a chhuahsan leh a. Tichuan nitin a pa chu nitin a rawn kal a, ni li (4) lai a liam ta. Ni thum chiah hun a nei tawh a nih chu. Mahse Aishah chuan tawngkam khat pawhin a chhang chuang lo. Ni li hnuah chuan a pa pawh a beidawng ta khawp mai. Thlem dan chitin rengin a thlem a, mahse Aishah rilru chu hmin a hnehin Chris a hmngaihna chu a pung tial tial mai a. Tin, an awmna pindan hi a tein boruak a ipik em em a, tin, tui intur leh chaw ei tur an pe bawk si lo, an taksa chu a chauvin, a khaw hmuh te chua a vai ruai tawh mai a ni.

A ni 6 na zanah chuan Chirs chuan thapui thawhin an phuarna hrui chu tal chah an tum fat fat a, a tawp a tawpah chuan a tal chhuak thei ta hlauh mai. Aishah chu a va phelh sawk sawk a mahse engtin nge piandan atang chuan an chhuak tak ang? Pawn lam atangin an kalh hnan vek bawk si. Pindan chhung chu ligh 'dim' tak hian an ti eng ve ririai a, Chris chuan kawngkhar tihchhiatna tur an dap kual vel a. Bang kilah chuan thirtiang intung hi a va hmu fuh hlauh mai a. Mahse pawn lamah duty an awm ngei an ring bawk si. Duty an lo awma an ti harh hlauh a nih chuan a pawi dawn lutuk tlat. Chris chuan dim thei ang berin kawngkhar chu an kar a vel a, rei ngial a beih hnu chuan kawngkhar chu a hawng thei ta mai a. Hetih hun lai hian zing lam dar 2 vel a ni tawh a, muttui hun lai tak a ni.

Pawnah an pahnih chuan an chhuak a, kawngkhar bul maiah chuan Duty pakhat hi a lo muhil bawrh bawrh mai a, a harh lo kha thil mak tak a ni, Pathian thil tihtheihna an dawng a ni ngei ang. Pawn an han chhuak a, an awmna hmun chu hmun fal tak a ni tih a hriat theih mai a, a bul velah chuan in pakhatmah hmuh tur a awm lova, thlaler ramro tak vek a ni. An tui a hal tawh bawka, an piah deuh ami tuichhunchhuah atang chuan tui an thal chhuak a, an in bawrh bawrh a. Chutia tui an in zawh chuan an taksa te pawh a rawn harh ve leh ta deuh a, kal zai an rel ta a. Mahse khawi lam nge an pan ang?

An ar khawthim chhuah ve leh ta thawr mai a, pan lam tur ber pawh hre lovin hmanhmawh takin an kal hmawk hmawk mai a ni. Chris chuan Aishah chu a kai a, rei fe an kal hnu chuan kawlah ni a rawn eng tan siar siar a. Chris chuan Pathian hnena ngaihdam dil chuang leh tanpuina dil chungin kal pah chuan a rilruin a tawngtai mawlh mawlh bawk a. Rawn man leh ta nise, an hmuhna hmunah la la an that nghal dawn tih an inhre ve reng a ni.

Khua a rawn var fel a, anni pahnih pawh chu chu thlaler ram roah chuan an la kal ve hnak hnak a. A hnu deuhah motor kawng hi an va pawh phei a, rei vak lo an chawlh hnuin motor pakhat hi a rawn tlan hlauh mai a. Tah chuan khaw lam panin an chuang phei ve ta a. Mahse tu hnen nge an pan tak ang le?

THE ESCAPE
Aishah hian thian fel deuh mai a nei hlauh mai, chu pa chu ram pawna a ruka mi chhuak duh an awm pawha tanpui thin tu a ni a, a hming chu Gholam-a a ni. Ani hian ram pawna a ruka chhuak turte leh Muslim firfiak hovin tih hlum mai tura an tih pawh mi tam tak a lo tanpui tawh a, passport lem thlengin a lo siam sak thin a ni. Tin, Gholam-a hi pa fing tak leh mi hawi zau, pa huaisen em em mai, a dik ni-a a hriat chu an sakhaw dan kalh pawh nise ti zel mai chi a ni a, ram thenawm leh ram pawnah pawh hmel hriat a nei thain a nei ngah hle a ni. Gholam-a hnen chu Aishah leh Chris chuan an pan ve ta tawp mai a, mahse pawisa an nei der bawk si lo. An va thleng a, Gholam-a chu an chanchin chiang takin an hrilh a, Gholam-a chu pa rilru tha tak a nih avangin a lo khawngaih hle mai a, a theih ang anga tanpui turin a lo inhuam hle a. Aishah leh Chris pawh chu an lawm tak meuh a ni.

Mahse Gholam-a chuan hun engemaw chen a duh dawn thu leh an thil tur a buaitsaih leh ram pawna an chhuah theihna tur a buipui lai chuan khawiah emaw an bihruk hrih a ngaih dawn thu a hrilh a. Chris chuan tanpuina ngen turin an missionary te ho pawh a ring ngam tawh si lo, tin , Aishah tan lah tumah han rin tur leh amah puitu tur an awm tawh bawk si lo. Chris chuan ngam leh ngam lovin a thlenin Sarah leh Walter chu a va be pawp leh ta ngawt a. Mahse a rin ang a ni hauh lo, Sarah leh Walter chu an lo thinrim nasa mai si, a hmel hmuh an duh tawh loh thu leh Kristiante a tih hming chhiat ziain an lo an khum hrep mai a, tin, a pa (Chris-a pa) pawh a thinrim hle tih an lo hrilh tel nghe nghe a. Sarah leh Walter chuan a haw dan tur an lo buaitsaih sak ang a, Chris-a chu a duh chuan haw mai thei a ni. Mahse Aishah tel lo chuan a kal thei lo a ni, a hmangaih Aishah a phatsan thiang tawh lo. Tin, Chris hi Sarah leh Walter te hnenah va haw leh ngawt pawh nise Aishah pa leh a thuihhruai te hovin an hmu vaih chuan an that nghal mai dawn a ni.

Mahse Gholam-a chuan an dinhmun a ngaihtuah a, a khawngaih em em a, a in hnuai(basement) ah kar hnih chhung chu biru turin a ti ta ringawt a, kar hnih chhung chuan thil engkim a peih fel hman a inring bawk a ni. Aishah leh Chris tan chuan khawilaia han chhuah ngamna chi zia zang a ni lo, a pa leh a thuihhruaite’n an hmuh vai chuan an that nghal mai dawn si, tin, a pa lah thil ti thei tak leh an khuaah na na na chuan thuihhruai ngah em em a ni bawk si a. Chuvangin Gholam-a inhnuaiah chuan anni tan chuan pawn chhuak miah lova tawm im chu a him ber a ni.

Hetih chhung hian Aishah pa leh a thuihhruaite chuan an zawng nasa hle a, Sarah leh Walter te leh missionary dangte pawhin vauna an dawng nasa hle. Mahse engmah an chanchin an hre bik si lo. Aishah-i pa thuihhruaite chu khawlaiah an vei suau suau a, ram pawn chhuah theihna kawng hrim hrimah pawh an tlan khalh deuh vek a ni.

Chutia kar hnih ngawt inhnuaia an tawm hnu chuan an kal dan tur leh an mamawh turte chu Gholam-a chuan a peih fel chu a ni ta mai a.

Gholam-a lo ruahman danah chuan Europe ram lama lut chho turin duang a, passport lem pawh pali ngawt a lo siam sak nghe nghe. Iran an lut phei phawt ang a, chutah Turkey-ah an lut chho leh ang a, chuta tangin Black Sea kanin Romania lamah an lut chho zel ang a, Europe an thlen chuan thil engkim a awlsam tawh dawn a ni. Tin, Gholam-a hian Aishah-i pa hi a hre chiang em em a, Turkey lamah an kal tih a hriat phei chuan Turkey thleng chu a umzui duh ngei dawn tih a hre chiang a, chuvangin a ruahhmanna pawh a fimkhur hle a ni.

An ni ruat chu an thleng ta, Aishah leh Chris pawh an inpeih fel thawkhat hle. Gholam-a hian pawisa thahnem tawk tak a pai a, hmun ralmuang an thlen hnua an rulh leh tur a ni. Tin, an kal kawnga lo buaipui turte pawh a be fel vek tawh a, Romania-a hruai lut thei ngei turin mi hran hran a be kual a, an theln chin apianga lo dawngsawng tur a ruat lawk vek a. Tin, Gholam-a mi tirhte an ni tih an hriat theih nan Aishah leh Chris chu lehkha a pe tel bawk a.

Gardez atang hian zing dar 3 velah an chhuak a, Jeep trawng ve lam tawhin an kal a. Aishah-i pa thuihhruai te’n an lo chan lohna lam tura Gholam-a’n a rin kawng trum lamah an kal zel a. An kawng kalna hi a kual thui em avangin ni thum hnuah Iran border an thleng ve thei ta hram a. Chutah chuan Gholam-an a biak lawk tho mi hranin an lo dawngsawng leh a, tawi khawmuang lovin Turkey lam panin an chhuak leh nghal vang vang mai a ni. Aishah-i pa hi thil tithei ve tak a ni kan tih tawh kha, Iran lamah pawh lo chang turin kal kawng hran hranah mi a dah teuh mai. Mahse Gholam-a hi mi fing tak a ni a, a ruahmanna a kal sual mawlh lo, tluang takin an kal zel a. Mahse Turkey border an luh dawn hnai lamah Aishah-i pa thuihhruaite chuan an kalna lam an chhui chhuak ta tlat. Turkey an luh hma Km 20 vel a la awm tih chuan, Aishah-i pa thuihhruaite chuan an rawn um pha a, an rawn nang ching ta. Jeep pahnih khat tan hian an rawn inphur a, silai an rawn lek fur mai a. Anni lah chuan ralthuam chu sawi loh, chemte tak ngial pawh an pai si lo. Chris hi palian leh chak tak e ti lo chuan tharum thawhna hi a ngaisang lova, tin, tuna a thil tih hi Pathian lakah thil sual lian tak a ti a ni tih inhre mahse Pathian a trihna leh a thu awihna hi a la kalsan reng reng lo.

MIRACLE: THE WONDERFUL SAVIOR
Ral khat atangin a rawn umzui tute chu an hmu a, an rawn ho! ho! nasa mai si, sialai chuan an rawn kap nghal thuai thuai mai a. Aishah chu mangangin a mitui a tla zawih zawih a, an motor khal tupa lah chu a tap pur tawh mai a. An rawn man a nih vaih chuan tuma nunna an zuah dawn lo tih a chiang em a ni. Hetih lai hian thlaler phai zawlah an tlan a, a rawn umtute hi Km 2 vela hlaah an la awm a, phai zawl vek a nih avangin an hmuh theih vek a ni. Chutia manganga an awm lai chuan motor khalhtu hnenah Chris chuan motor chu ti ding turin a ti ta mauh mai. Aishah leh motor khalhtu chuan Chris chu a a ta emaw an ti hial a. Mahse Chris in ti ding tura a tih luih tlat avangin motor chu an ti ding ta. Eng rilru tak pu ang maw?

Chris chu motor atangin a chhuk a, tlaler vaivuit karah chuan a thingthi hnawk a, heti hian a tawngtai ta, “ka Lalpa leh ka Pathian i chungah thil sual nasa tak ka ti a, min ngaidam ang che aw. Ka hmangaih Aishah-i hi kei aiin i hmangaih tih ka hria e, tunah hian nangmah la nei lo tu a ni tih ka hria, ka dilna tlawmte hi min ngaihthlak sak la, heng min beitute lak ata hi chhanchhuak ang che. Kei chu i ramah i duh leh min la la, i thu thu a ni e” tiin.

A tawngtai zo, minit 5 pawh a ral hmain chu thlaler ram ro tak mai chhim lam atang chuan boruak a rawn thim ta khup khup mai. A rawn umtute pawh Km 1 vel leka hlaah an awm tawh a ni. Chu boruak thim em em mai rawn in zial mup mup mai chu an han en chian nak chuan thaler thlipui (Desert Storm) a lo ni reng mai. Chu thilpui chu an rawn thawk phei ta tak tak a leh. Chris-a te awmna chin rawn thleng si lovin a rawn umtute chu an rawn nuai ta tak tak a, an rawn um zui thei ta lo. Chutih lai chuan Chris te pawhin remchanga lain Turkey lam panin an tlan zel a, Turkey ram chhung chu an lut thei ta hram a. Gholam-an Turkey passport lem a siam sak vek avangin buaina an tawk hran lo. Turkey-ah chuan mihran bawkin an lo dawngsawng leh a, chung mite chuan an hruai chho zel a, Black Sea an kan hnuin Romania ram chu an luhpui ta a ni.

He mite pahnih, Chris leh Aisha hi tunah khawi hmunah nge an khawsak hriat a ni tawh lova, Europe ram khawi emaw berah chuan hlim takin an khawsa dun a ni.

(He thu hi nikum December thla vela ka ziah tan kha a ni a, ka ziah zawm mai loh avangin Puitea Tuallawt hnenah, “lo ziah zawm la, chuan kan pahniha hmingin i lo post mai dawn nia” ka ti a. Mahse ani chuan ziah zawm ta lem lovin a thu thenkhat a lo chei mawi deuha, chhum bung deuhin tun kum, kum laihawl vel khan a lo post ta ringawt a. Amah Puite Tuallawt ziah zawm tura ka tih a ni a, LOVE IS NOT BLIND tih thleng khian inbox lamah ka pe a mahse ziah zawm lovin khimi thleng tho khian a lo post a. Tunah amah ziah zawm tur ber a awm tak loh avangin ka thiam ang tawkin ka rawn ziah zawm leh ta a ni e. Tin he thawnthu hi Puite Tuallawt tan liau liau ka hlan e. Tin, a pic pawh hi amah Puitea lo design kha a ni a, a hmaa a post-ah pawh khan a hmang tawh nghe nghe a ni)