THE OTHER SIDE BY Puitea Tuallawt

[Ngaia]

THE OTHER SIDE
(Mystery Story of Tluangpuii)

TLEIRAWL DUHAWM TLUANGPUII
Hmeichhhe naupang kum 6 mi lek kha tunah chuan tleirawl kum 18 mi, hmel chhe lo tak. Hmai sawl deuh, nui khat tak mai a lo ni ta. Sikul kal zui zel duh mah se, chhungkaw harsatna leh a pa dam lohna (Chuap Cancer) avangin a kal zawm hlei thei tawh lo va. Mahse,lehkhbu chhiar lama a taima thung a. Pawl 12 a zir zo va, sikul lam chu a chawlhsan ta hrih a ni.

New Life Hospitalah a pa chu dah luh a ni a. Sikul ban apiangin a tlawh ziah thin, in lamah erawh a pi Zahmuaki nen an awm a. Chhungkaw chawmtu ber a pain hna a thawh theih tak si loh avangin an veng a dawr ruak thar hlim hlawl pakhat chu luah ve a dil a, a neitute chuan Tluangpuii dinhmun an hriat chian avangin an khawngaih a, dil tu dang tam tak zingah Tluangpuii chuan duhsakna hmuin a luah thei ta hlauh a. A lawm hle nghe nghe a ni.

A pi Zahmuaki hian tun hma atang tawhin pangpar hi a ngaina a, an in leh a bul velah te pawh an par chei chuai thin reng a ni. Heng pangpar te hi a then a zar la khawmin dawrah chuan a hung ve far a. Tin, dawr hmingah pawh TLUANGPUII VARIETY STORE tih ngat a phuah nghe nghe a ni .

HRETU HMASA
Nitin zing dar 9:30 ah dawr chu a hawng ziah a, tlaiah dar 4 ah a khar leh thin.
Inrinni a ni a, boruak a lumin a uap deuh churh a. Dawra eng eng emaw a lo rem fel vel mawlh mawlh laiin dawr chhungah chuan tlangval kum 27 bawr vel hmel pu, ngo veng vawnga hi a rawn lut a, thil dang alo buaipui lai a nih avangin Tluangpuii chuan a lo hmu lawk lo nghe nghe, a bul hnai lawka a rawn din takah chuan a hmu ve chiah a, a phu deuh zawk nghe nghe.

“Eng nge i duh ka pu?” tiin a han zawt a.

“Min tanpui ka ngai a ni, khawngah takin min pui rawh, ka hming chu Lalnunpuia a nia, nangin min pui duh lo a nih chuan, Malsaii min hmuh dan tur chu a rapthlakin a zahthlak dawn lutuk, engtikah mah ka thalau a hah chawl thei dawn lo a ni. Khawngaih takin min pui lul rawh.

Tin , ka hmangaih em avangin thil tih loh tawp tur ka lo ti a, a pawi ka tihzia min hrilh sak turin ka ngen takmeuh che a ni,” tanpui a mamawh zia chu a hmelah pawh a chhiar theih hiala a ni.

Chutih lai chuan nula leh tlangval hi hlim deuh maiin Tlangpuii dawrah chuan nui bawk bawk chung in an lo lut a, pangpar chi hrang hrang te chu an en lawk dan dan a, an bul maia ding ve reng Lalnunpuia chu an hmu ve hauh lo tih Tluangpuii chuan a hre thei. Nula leh tlangval ten an duh ang pangpar an lei zawh cuan pawisa an pe a an chhuahsan zui ve nghal mai a.

“A tir atang khan enga ti nge min hrilh mai loh?”

“Eng maw?” Nunpuia chuan ti sup.

“Thlarau mai inih thu hi mawle.”

“Min hriat nghal mai ka rin vang a ni.”

“A nih eng thilah chuan nge ka tanpui chu mamawh nia i inhriat?”

“Masaii hnenah engkim sawi fiah turin ka ngen duh che a ni, venghluiah an awm a hla lo.”

“Eng chu maw ka sawi fiah ang, eng nge sawifiah tur awm, engkim a hre fiah vek tawh ang chu?”

Nunpuia chu lungngaih hmel tak hian a han kun deuh ngaih a, “Nia, a hre fuh vek tawh pawh a ni mai thei, a pawimawh ber erawh chu a hre lo ka ti ngam sak a ni.”
“A nih leh thil awm dan chipchiar takin min han hrilh ta che.?

Nunpuia a thaw deuh huai hian a hriat a, “ Tawngkam erawh ka thiam lo a nia, a ngaihthlak dan i lo thiam tawh mai dawn ni. Kum 2011, nikum khan Nunpuii nen hian kan intawng tan, kan inhmuh phat atangin kan inngaina nghal em em a, tu dang mah kan ngai tawh lo.

Mahse, Nunpuii chu hmeltha, pian nalh leh ngaihno bei zet mai a ni, kei hi chuan engti kawng mahin ka phu hlawl lo tih pawh ka hria, mahse, a mah zawkin min rawn hnaih hmasa tlat mai. Ka duh ve tho si avangin phu lo inti viau mah ila, ka dang zo lo.”

“Tichuan....”

“Thla hnih vel chiah kan inzui hman tihah kan inkarah hêm thlak tum an awm tih ka hre nghal mai. Tu emaw chu a virbuai hle niin a ka hria. Mahse, Masaii chu rilru nghet tak mai a ni. Tuten emaw ka chanchin tha lo te chu dawt muhlum an lo sawi phei chuan a thin a lo rim a, ngaih pawh a ngaithla tha duh ngai lo. Nia chuti ang khawp chuan keia kar hi min tan ve tlat thin a ni.

Mahse, kan college Mister an tih mai, Rinsanga chuan tih tak na ngiangin Masaii hi ngaizawng ve a. Zarkawt mi hausa fapa, ruihtheih tho ti lo, kohhran leh KTP velah pawh in hmang tak mai a ni bawk. Kei lah thingtlang atang lehkha zir turin Aizawla mi inhnuai luaha khawsa ve naw naw ka ni. Kan inthlau lutuk ringawt mai a ni, mahse, Masaii chuan Rinsanga ai chuan min thlang zawk ve miah si.”

“Hmeichhe duhawm tak a nih dawn chu,” Tluangpuii chuan a lo ti bauh a.

“Duhawm e,a duhawm lutuk chu a buaithlak zawk hial a nil.”

RIN PHAK BAK
“College ah ni se, Masaii nen chuan kan inzui chawt a ni ber. Inrinni ah te hian ka inluah ve chep zetah chuan lo lengin zanriah te pawh a raw ei fo thin a ni. Heng thil thleng zawng zawng hi hmaih hauh lovin Rinsanga leh a thuihhruaite ( a kid te ) chuan an hre vek a. Msg leh lehkha tein min vau fo.

Nang thingtlangpa naran ve mai mai khan Masaii te ang hi i phu lo. Lo inthiar fihlim la a tha ang tih ang chi thu deng khawng tak takin min chhu fo ta mai. Mahse, mipa inti ve tak mai ka nia. An ni mi vauna avang mai maia kal san chi ka ni bik tlat lo. Pakhat leh pakhat ah ngat phei chuan chhe te pawhin ka hlau bik lo bawk. Mahse.....”

“Eng nge mahse...” Tluangpuii chuan a lo ti vat a.

Rinsanga te ho tum kha kha ti em emin a lo ruh ang tih ka lo ring pha lo. Tum khat chu zanah thuthleng seia thu mu tihi tih chunga lehkha ka lo chhiar mek laiin, ka farnu Matekawki, chu an kutah a awm thu an rawn sawi ta mauh mai. Dawt nge thutak ka hre lo. Kan khuaah han kal nal nalin heti ang thil hi an han ti a ni awm si a. An peih zawk ka ti hial.

Tin hlauhthawnna ka nei bawk. “Masaii hi i kalsan lo a nih chuan i farnu hian tu fa nge tih pawh hriat loh fa a pai ang,” tia min han vau zui phei chu awm ngaihna reng reng ka hre tawh lo, ka mangan dan chu pui tak a ni. Masaii hnenah engmah sawi lo tura vau beh tlat ka ni bawk si.

In lam ka han phone a, Matekawki chu exam chawlh lai a ni bawk a, ka u bulah ka zu awm teh ang tiin a rawn chhuk thlak kha an ti hleuh bawk si. Ka mang a ang nasa tawh mai. Thil awmdan dik tak ka hrilh chuan ka nu leh pa putar pui tawh te rilru na lutuk chu an thi thei hialin ka ring a, a rawn thleng tep ang, tiin ka hnem ta ngawt a.

LEMCHANG
A tuk atang chuan Masaii chu ka be duh ta lo a ni. Min biak pawhin a rul tawkin ka chhanga a bulah pawh ka awm duh tawh lo. Masaii rilru na hmel ka hmuh kha tun thleng pawh hian ka la theihnghilh lo. A hma ang renga ka awm chuan Matekawki dinhmun tur ka hre si. Ka rilru hah lutuk hi ka thaw kawih kawih a ni ber mai. Thil engkim chu lehkhaah ka ziak thlap thlap a, nakinah engpawh thleng se thudik puan chhuah a la nih theih nan ka ti a ni.

Masaii chuan “Naktukah ka lo leng dawn,” a ti a. A tuk ch inrinni a ni. Inah ka awm dawn loh thuin ka chhang leh tawp. Ka khawsak dan chu a mak tak em avangin ka lakah a inthlahrung tial tial a. Min hlat hret hret a, tin hmeichhia, kei ka ni inti ve pha chin a ni a. Keia kara ka han be tha duh lo vel chu a lawm lo khawp mai. Kar hnih hnu velah phei chuan en pawh mi en tha duh tawh lo.

Pathianni tlai vela Rinsanga nen an leng dun pawh ka hmu ta fo a. Min elsen nan a ti nge, Rinsanga zunah chuan a uai ta pawh ka hre lo ve. Thudik puan chhuah a tul ka ti a, tih dan ka hre ngang si lo. Chutah chuan tih loh tawp tur thil ka ti ta a ni. Engkim mai kan chungchang zawng zawng ka ziak vek a, vau beh tlat ka nih dan te, Masaii ka hmangaihzia leh Rinsanga ten min beih buai dan zawng zawngte chu ka copy tha a, computerah fel fai takin ka typein ka print chhuak thlap a.

Tichuan, nizan khan zu ka in nam deuh chhek chhawk a. Keima nunna ngei lain ka inluahah chuan ka inawkhlum ta a ni. Chu chauh chu a kawng awmchhun nia ka hriat miau a vangin. Tunah hian ka ruang pawh an la hmu lo vang, lehkha chu ka khum awng phah hnuaiah ka dah tih hi Masaii hnenah chuan min lo hrilh sak la ka duh a ni.”

Tluangpuii mittui rawn hnam sawk chu dah theih a ni lo. “Aw le, i duh ang ngeiin ka ti ang. Rinsanga te pawhin an thil tih dik loh rah chu an hmu bawk ang,” Tluangpuii chuan a ti a. A dawr a khar nghal sawk sawk a. “Masaii te awmna chu min hrilh rawh le?” a han ti a.

Engkim an inhrilh fiah hnuah Masaii te in chu Tluangpuii chuan thinphu ddawt dawt hian a pan a. Nunpuia sawi ang ngeiin an lo hausa khawp mai. Kawngkhar a bell chu a han hmet ri tlang tlang a. “ Lo lut rawh,” hmeichhe aw puam deuh talh hian a lo ti a. Masaii ngei a ni tih chu a lo awm a.

HRILHFIAHNA
“Eng nge ni ta?” Masaii aw chuan ngaihno a bei hle a.

“Lalnunpuia, college-a a thianpa hlui kha i la hria em.”

“Hria,” Masaii tawngkam chuan ngaihno a bei zui ta vak lo.

“ A thi tih i hria em?”

“Eng a, NP-a a thi maw, engtin nge, engtikah, awi ka rei, !!” a biangah mittui a luang a. A lo la hmangaihzia chu hai rual a ni lo.

“Masai, tunah hian Nunpuia chu ka bulah hian a ding reng a sin.”

“Eng nge i sawi awmzia chu, a thi i ti bawk si,” a ngaihna hriat loh hmel zetin a Masaii chuan Tluangpuii chu a en ho a.

“Nia, a taksa chu a thi tawh, tuman a thi tih pawh an la hre lo vang. Talent mak danglam tak ka nei a, mite thlarau hmuh theihna ka nei a, ka be thei a, anni pawhin min be thei a ni. Tunah hian ka bulah a ding a, i duh a piang sawi rawh, a ngaithla che.”

“Nunpui, i awm tak tak a nih chuan, ih ih...ka hmangaih che, eng vangin nge khati anga vawi leh khatah min biak duh loh va, min kalsan thut kha ka hre thiam thei lo. Englai pawhin ka hmangaih reng che....” Masaii chu a tap chhuak ta rawi rawi a.

HRIAT CHIANNA HLU BER
Hmanhmawh takin Masaii chua insiam mawlh mawlh a, Nunpuia inluah lamah chuan Tluangpuii nen scooty in an tlan phei dun ta. Rin ang ngeiin kawngkhar chu chhung lamah a lo kalh thlap a, thenawm te punin kawngkhar chu an kar chhia a. Nunpuia taksa lo inkhai kang vu mai chu an hmu ta a ni.

Tluangpuii chuan midang hriat ve vak hmain awngphah hnuaia lehkha chu a phawrh a, a ak tha nghal daih a, rei lo teah YMA hruaitu leh khawtlang mipuite an lo pungkhawm a.

Tluangpuii chuan Lehkhaip sei chi, a chhunga fel fai taka thu inziak chuan thlapna chu Masaii hnenah chuan a pe a. “Tah khan engkim a awm ang,” a ti a.