HMANGAIHNA BY Puitea Tuallawt

[Ngaia]

HMANGAIHNA

“Thihna luiral ka lo kai ta, khawvel mi ten an hrethiam lo,
tih lam ni lovin
“Kum 30 ral ka lo kai ta, hmangaihna ka lo hre thiam ta.
tih lam pangin, Big Daddy hlau ru deuh chungin kan luangliam puat puat teh ang.

Hringnun kawng harsa, inchher chhuan chhawng chho uaih mai, dam sen lel lula la rawn hmang turte tan, a bikin tuna kum 15-25 vel ho tan nula leh tlangval inhmangaihna kan tih. Run leh rim em em a kan lak, kan sam kan tih buan chhan leh tih phir chhan. Thu leh hla thiam ten thiam elkhen leh mawi chatuan hawlh pawpa an ziah thin Hmangaihna hi hrilh che ka duh a ni.

A hmasaberah chuan inawhhlum phah tham a ni lo kan ti nghal tawl mai teh ang. Tin, ka thusawi rinawmzia leh nghehzia sawi nan ka tawnhriat atang ngeiin ka sawi dawn bawk a ni. Mihring kan in ang vek hleinem tiin min hnial thei ang. Ka chhanna tur che chu, “Nia, in ang lo hlawm tak kan ni, mawl tawngkawlawng leh fing bingbilet pap te, luhlul tukhum tawngte, kan nih hlawm avangin kan in ang lo hlawm ngawt reng a ni,” tih hi a ni ang.

Hmangaihna hi tawp chin nei lo, unlimited, forever and ever chatuan siam tupa siam a ni. A tawp thei lo. Tawp thei nia i hriat tlat chuan, i chawh tawlh tawlh mai ang.
Kum 18 ka ni a. Hostelah ka awm a. Hmangaih ka tawng ta a. Ka va han hmangaih ngawih ngawih tak em kha nu zet kha chu. “Ka lam hawia i seih hianin, ka tan khuavel a par leh thin,” tih ai pawha thuk leh ril, luhai muai muai khawpin ka hmangaih a ni. Mahse, kan inkara palai a tan kan hman ber thin, ka thiantha tak mai chuan ama tan a lo kherh thlu ta hleuh mai. Na ka ti lutuk hi sawi dan ka thiam lo. Chemte zuma, thin hnuna vih ngar ngar ang hian ka awm a. Hostel atangin ka tlan chhuak a. Ka nu ka kuah a, naupang chhe tah tak meuh hian ka tap a. Khawvela vanduai champion lawrlak ni hian ka inhria a. Thih ka duh a ni.

Tin, hmangaihna chu ka hlau a. Hmeichhia zawng zawng hi a remchan dan apianga vuak zawt zawt mai hi ka chak a. Keimaha hmangaihna awm zawng zawng chu min ruk bo sak vek a, chu mai chu duh tawk lovin, ka silhfen te min hlih sakin min vaw ta nek a, chau rau ek ka thai ta ni hian ka inhria a. He khawvel hi ka tan chuan hlo har leh hnim hnawk a chang zo ta. Tumah ka hmangaih leh tak tak thei dawn tawh lo tih kha 100% a chiangin ka hria a ni; a hunlai kha chuan.

Mahse, kum hnih a han vei a, hmeichhe pakhat hi tih takzetin ka hmangaih leh ta. Bible lehlin hlui tawngkam ang mai khan hmangaih namenin ka hmangaih ta lo va. A hmaa min phatsantu ka hmangaihna kha chu a lem mai mai a ni tih kha ka han hre chhuak ta bawk a. Ka lo lawm ta em em mai a ni. Ka eng a thawl a, a chang phei chuan ka eng thawl lutuk khan a sen ngat te ka han ha vel thin. Nuam ka ti lutuk kha a hrehawm lek lek zawk.

Kum hnih vel kan inzui hnuah inrem lohna hote avangin kan inthen leh ta mai.
Na hi kan ti mai mai khawp a, a hma kha chuan khawvela vanduai champion lawr lak ni khan ka inhria a; mahse, tun tum zet zawng kan galaxy pumpuia vanduai champion lawr lak niin ka inhria a. “Hmangaihna hi a lo awm tak tak lo a nih hi, dawt mai mai a ni,” ka ti tun tun reng tawh mai. Hmeichhia phei chu ngaihzawn enin ka en lo, naupan laia kan Sir Biakdika’n Science chu a tih a tih a ni, a tih ang khan, hmeichhia reng reng chu a tih a tih tur a ni. Hmangaihna tih vel chu ka ha se kia kar ta hai a ni mai.

Kum a lo vei a, ka lo upa zel a, hmangaih dang ka tawng leh ta. A hmaa ka sawi te hi chu a lem mai mai a lo nia lawm, tun tum zet chu a dang ta zar mai. Hmangaihna zawng a lo awm chiang a nih hi tiin ka testimony thar kha nui vur vur chung khan ka sawi thei ta. Camping lut ngun lutuk, inhmuchhuak chiang thei bawnra, tlu leh chiang thei zet an tih ang vel kha ka ni. Camp chhuah apianga, “Tun tum zet chu a dang lam zar mai,” vawi nga vel kan tih tlauh tlauh tawh chinah hi chuan, “Chhungte pawhin, a rawn piangthar leh tawh a nia, buhfai bel kha kalh ula, ruk awlsam thei tur chi reng reng kha chu dah fimkhur ang che u,” tiin signal an in pe vat tawh mai a ni.

Chu chu a ni mihring te inhmangaih thin dan chu. Nia, chuti ang chiah chiah chu a ni. Hmangaih pakhat then vanga inawkhlum rap ho hi chu hremhmun lamah Eminema te ho nen an la rap ho rap rap mai dawn a ni.

Mahse maw, thil pakhat, chu chu a tak tak a ni. Mihring leh mihring in hmangaihna chu a hlimthla a ni. A tak tak chu Pathianin mihring a hmangaihna hi a ni. Chu hmangaihna (piantharna dik) i chan tawh chuan, a dang a awm thei tawh lo. Chu piantharna dik i chang tawh chunga i sual lui zel a nih chuan leiah hian hrem i tawk char char tawh mai ang. A chhan chu vanram i luh dawn tawh avangin.

Chatuan nunna lehkhabu a i hming a chuang tawh a nih chuan tuman an nawt reh thei tawh lo. Ruiin, pai tuang tuang leh thin mah la, i hming chu Pathian Goma char hnan a ni tawh, phelh theih a ni tawh lo. Mahse, ka piangthar tawh tho bawk a, ‘sual mah ila, vanram ka kai dawn tawh hrim hrim a’ ti zawnga i lak vaih chuan, tu tih dan takah emaw,bike in i accident ang a, i ke pahnih tan ngaiin a awm ang a, in thenawm pitar te te ho khan Pathian kohna che a nih hi an rawn ti sap sap ang che, “A koha in koh te chu ka hua pawh a ni hran lo, a ke bung zawng kher khera in koh hi chu a fair lo a lawm,” i ti nung nung mai ang.

2005 ah ka piangthar a. A hnuah vawi thum vel ka chau leh, Pathianin min koh dan chu, “Police ho hlap rawn nghek hmang te, malpui vun hlih ngai chi ten a ni min koh, a lu bung zawng kher khera min koh loh avangin hei pawh hi ka la ziak thei mai mai a nih hi.” Mahse, chuti ang piantharna dik chang tawh chuan amahah inhriatna a nei mai a ni.

Bible chuan ka mite chu vawi sarih tlu mah se, vawi sarih ka kai tho ang’ a ti mai a ni. He lai thu a vawi sarih tih hi vawi riat tluk palh chuan kai tho dawn lo, vawi sarih thleng tihna lam a ni lo. Pasarih chu Pathian number a ni. Vawi nuai sing sang sawm sarih pasarih tlu mah se , ka kai tho ang tihna ai pawhin a la tam zawk. Fa a hmangaiha piangte chu a vaw thin. Vuak pawh hlawh lo, sual vannei tluang par par te hi chu fa tak an ni lo.