WRITER AND FACEBOOKER’S BY Puitea Tuallawt

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

WRITER AND FACEBOOKER’S BY Puitea Tuallawt

Unread post by Ngaia » May 21st, 2016, 9:24 pm

WRITER ANF FACEBOOKER’S

“Nangni lehkhaziaktute u in chung a pik e....”
-Isua Krista

Tunlai chu ngaihnawm leh fiamthu lam rawngkai ai mahin thutak hian ka rilru a luah tam a. Tun tuma mi pawh hi ngaihnawm tur atana ka post em em pawh a ni lo.
\Ka beisei leh rin lawk loh deuhin hmanni chu ka fren list zinga pakhat hian mi rawn inbox ve nawlh mai a, “U Puite, ka pian tirh ata vawi khat mah writer nih hi ka la chak ngai lo. Ka taksa a chak tha a, infiam nuam ka ti bawk a. Sports lam hi ka tui bawk a. Lehkha ziak mi nih tumna hi lo, ka awt hek lo. Mahse, THE CODE i ziah ka hmuh khan writer nih ve ka chak ta em em mai a; thla li vel chauh a la liam a, ka ziak ve tan ta a,” tih pahin a ziah sa ho chu min rawn pe a.

A lo ziak hnem hman phian mai, “Lehkhabuah tih chhuah ve ka duh a, editing min tih sak thei ang em?” a ti a. Kei lah thlahrang lam edit-a ka buai buruseh mangmakhen lai a ni chhap si. Mahse, han hnial thlak tawl mai kha ka hreh em a. Han dah phawt la ka lo en chhin ang;mahse, engmah ka tiam thei lo che,” tiin thu ka thlah a.

Writer han tih hi mi tam tak chuan midum lei lai tih nen hian kan thlir dan a la in ang deuh ni ber hian ka hria. Writer ka ni i inti ve a maw? Engzah nge sum te i lakluh tawh a? tiin Sidney Sheldon, JK Rowlings te an rilru ah an hre ran tih hre chungin min han zawt a. “ Eng zat vak mah ka la lut lo, eng emaw zat ka ba zawk a ni,” han tih te an tul ta mauh thin. Zahthlak ve duh tak a ni. Nia, heti khawpa lehkhachhiar peih hnam inti si hian a ziaktute ngaihsan nachang chu kan hre lem hlei lo va. An dam laia chawimawi hlawh ta viau (a der ni lovin) hi an tam lo ang.

Ka account-a Freelance writer ka inti hi helh ngawih ngawih tawk an awm, ka hmai chhanah leh phone ah min hrilh bawl tawh. Engati nge an huat em em le?chuti ang nih chu ka phu lo ngawih ngawih a, chuti chunga frelance writer ka lo inti ve ringawt chu min zahpui em ni ang? Mahse, hria se ropuina lal kha an khengbet lo tur tih ang deuhin freelance writer nih chu thil ropui a ni hauh lo. I duh chuan freelance awmzia chu JF a Dictionary ah te, Oxford leh Cambridge dictionary ah te en rawh.

Tu thuhnuaiah mah kun lo, hlawh pawh nei lo. Lehkhaziak thin te hi an ni mai. A rovin a pui hran lo khawp mai. Writer inti ve si zinga nep ka intih ber avangin freelance writer hi ka dah zawk a ni. Hei aia ranking hnuai hi writer ah a awm vak tawh lo. Puitea Tuallawt ziak a nih hrim hrim chuan ka chhiar lo vang. Ti pawl te pawh an awm ta, ka lawm ngawt mai. Tin, ngeiawm bingbilet tawpa comment tum, pahnih khat hi ka hmu ve ta reng bawk. Ka lawm lehzual a ni. Pawi ber erawh chu ka dam tek tek chhung chuan ka ziak mawlh mawlh zel dawn.

Tuman chhiar dawn lo mah se, ka ziak zel tho dawn. A hmun ka sawi chuan a tha dawn si lo va, officer leh mi zahawm tak tak rualin mawl min tihzia min han hrilh tak tak mai chu. Ka lo mawl tiap tiap khawp mai. Mawl tak a ni. Mite chuan thil tha lo an hmu a, 'ekhai min kangkai ve palh ange; tiin inrawlh loh hram dan an zawng a. Kei, mi mawl erawh hi chuan thil dik lo ka hmuh hian "aw le, tanpui a ngai a nih hi' tiin ka pana, ka tel ve miah lohna turah ka va tel a. A mawl thlak em bawk a ni.

Freelance chu a awhawm loh viau naa, a zahawm a ni. A chhan chu Freelance writer chuan a thil hmuh leh hriat te chu dan a kalh em kalh lo em tih lam aiin a puang chhuak piap mai thin a ni. A chawh pawh an chawh tawlh tawlh zel. Writer tihhlum leh jaila tang tawh zingah freelance writer kan tih ang chi hi an tam ber hial ang. Tin, mi hausa tak pawh an ni ngai lem lo. Hausak a hnekin an chawibelh loh pawhin ngai an awh hram hram zawk tlangpui.

FB ah kan lut a, mi thuziak kan han chhiar a, thiam deuh maia an thuziak chuan min hneh a, thiam ve kan chak a, writer nih ve chu kan chak thin. Mahse, writer dik tak kawng chu englai mahin a awlsam ngai lo. Mahatma Gandhi kha writer a ni. A thuziak avanga an man ngun zia chu a chanchin hre tute chuan an sawi teuh thei ang. English ho, ni tla seng lova roreltu a in ngai te awpbehna hnuaiah a duh duh a ziak miah miah mai. A changin dan a kalh loh chang a awm a changin dan a kalh tlat chang a awm. Jail ah te an tang leh ren rawn thin.

Mahse, Gandhi-a zarah liau liau a ni India ram hian English ho laka zalenna a neih. Mizo thuziak mite zinga ka idol L.Keivom chuan, “Writerin a thil hmuh dan dik tak a sawi chhuak ngam lo a nih chuan writer a ni tawh lo, writer uire a ni tawh, chung mite aia hmuhsit awm an awm chuang lo,” a ti tawl mai bawk.

Mi dawihzep tan writer a nih theih loh tih hi hriat tur tul hmasa a ni bawk. Poet leh Novelist ho te chuan an ngaihtuahna chu thiam takin an pho chhuak a, chu chuan zalenna a keng tel a, buaina rim a ti nam nghal bawk. A hu ho, haw haw dur dur chunga thil tih hi chu kan thiam viau; mahse, writer nun chu chuti ang a ni ngai lo. Zan reh tawhah, sisip tak ngial pawh a reh diak tawh hnu daihah ziakfung nen a tho a. Haw haw dur dur chunga tih chi a ni ve tawh lo. Maltlat ngam nun nih a ngai a.

Writer tha kan tih ho tam tak, thlana min liam san ta te kha, a hun laia miten mi â bilinga an ruat an ni fur mai a ni.Kei ngei pawhin min nuihsawh tu tam tak ka tawng tawh a, min la nuih zel ang tih pawh ka ring a ni. Vawiina ka hming mawina tur hi zawng ila chu kei hian eng lehkhabu mah ka ziak lo vang. Ni e, hria sela ropuina lal kha an khengbet lo vang.

Tih tak meuh tih tak meuhin ka hrilh a che u, “Vawiinah hian dan ka hriat loh vang te, thudik ka puan chhuah phawng thin avang te, thiante huat pawh pawisa lo va, thudik hai chhuah tuma tan ka lakna te, nitin thumal sing chuang ka ziah tak ziah te hi.....a ropui ka ti a ni lo. Ka inchhuan pui lem lo. Mahse, hei hi ka hmu a ni.

I thih hunah chuan thla thum bak i chanchin an sawi zui lo vang. Kei zawng, thumal nuai 80 chuang ka ziah tawh avang ringawt pawh hian, hriat ka hlawh tawh ang. I tu leh fa chhuan chhawng riatna te pawhin min la rawn hre reng ang. Chu chu a ni, Pharoa fanu fapa a awm duh lo va, tlan bo tak Mosia khan a hriat ni. TORAH ziak tu hi mawle. Pharoa kha ni chho ta se, khawi lamah mah eng thu mah va ziak lek suh. A va chapo al al ve min ti rilru deuh pawh an awm mai thei. Chapo min ti chuan min lo ti mai se. Ka chapo avanga ziak ka ni lo tih ka inhriat chhung chuan ka chapo lo tih ka inhria.

FACEBOOK : Hman zan chu editing ka khawih lai leh aids vei pahnih in online atang min biak mawlh mawlh laiin, ka thiante inkhawm bang an rawn haw a. ‘Computer hi i Pathian tawh a ni hi,adt.’ tiin min kheng fak fak a. A nih leh thianpa, biak inah khian regular takin kum engzah nge i inkhawm tawh ka ti a. “Kum em em chu la tling lo ve, thla li vel chu hmeichhe inkhawm tih loh chu ka inkhawm kim, a lo that zia hi ka hre chiang em a ni,” a ti a. “I sawi dik lutuk, keipawh, i pianthar hma khan kum ruk zet chu hmeichhe inkhawm tih lohah chuan ka inkhawm kim parh a sin. A that zia ka hre chiang khawp mai,” ka ti a.

Chutah facebook hi kum engzat nge i khawih tawh?” tiin ka zawt let a. “Kum te i ti e a, vawi khat mah ka la khawih ve ngai lo hrim hrim,” a ti a. A thatna leh that lohna hre turin vawi khat mah i la khawih ngai lo a, chuti eng vanga tha lo em em a ngai nge i nih a? FB ah hian miin eng thil tha leh eng thil chhia nge an tih pawh i hria em ni. Inawkhlum tur pahnih ka chhanchhuah tawh thu te, nupa inrem thei lo, sawm chuang ka sawi rem sak tawh te hi, eng nge i ngaihdan?” Ka sermon ziah chhe fahrah te te kaltlanga, piantharna lo chang ta hi eng zat nge awm tawh i hria em?” ka ti let ve ta

“Kei chu kum ruk chuang regular taka ka inkhawm lai leh Judaism sakhua biaa Isua i hmuhsit em em lai te khan ka inkhawm ziah a, ka ka atang ‘hian inkhawm inkhawm ringawt pawh hi a ni lo’ tih lam chi tawngkam i hre ngai lo vang. A chhan chu inkhawm that zia hre turin experience ka nei a ni,” khawi lai speaker mawl tawngkawlawng deuhin Internet an sawi thaih che avanga i hlau em em ringawt te hi ngaihtuah chiang rawh. Major ST Dula chu USA velah a zu zin a, a lo haw hnuah a thil tih chu, facebook ah account a siam nghal a sin. Tunah phei chuan account pahnih a nei tawh.

Mi singkhat thianah a siam tawh a nih chu,” ka sawi awmzia chu i hria em?” ka ti a. A ngawi ta.

Internet la khawih chhin ngai reng reng lo, speaker thenkhatin sakawlh nena sawi zawm a zeldin thubawl nena an han sawi chiam phei hi chuan ka lo ip chawih chawih thin. Eng vangin nge Upa C.Ngurthantluanga, thusawi hi thalai ten an duha an ngaihthlak peih tlat zel i hria em? Will Grahaman Mizoramah crusade a nei dawn tih a hriat veleh a a tih chu, facebook ah a lut nghal a sin.

Thil tha lo tih nan zawng a hman theih ngei chhap. Chemte pawh hi invih nan chuan tha lo tak a ni. Mahse, chawhmeh chan nan chuan a tluk a awm lo. Engati nge ringtu dawihzep hi kan tam em em mai le. Attacking game khel lo va, tun hma serie A football stylea defencesive game ringawt kan khelh mai thin le. Khawl thil thar a lo chhuak a, setana hmanrua chi khat kan han ti nghal ringawt a. Thenkhat lahin sakawlh nen an lo sawi kawp hman ziah bawk.

Hlawk taka rawngbawl tur chuan i kut lehlamin bible keng la, i kut lehlamin magazine leh internet keng rawh an tih hi thu mawl mang naran mai mai a ni lo a sin. Atheisth pahnih ka hmachhawn ve tawh. “Ring tawp la a ni mai,chuan chhandam i ni ang,” tih formula te kha chu a hmana hman chi rual a ni tawh lo.

Pathian awm pawh ring lo, setana pawh ring lo, thlarau awm pawh ring chuang lo te hi zofate zingah hian an tam tawh a sin. Heng ho bei let tur hian biakin a inkhawm tluk tluk kher a tul lo. A chhan chu i beih tura te chu an inkhawm ve dawn tlat loh avangin.



Link:
BBcode:
HTML:
Hide post links
Show post links

Thailungi
Posts: 1
Joined: February 14th, 2019, 12:12 pm

Unread post by Thailungi » February 25th, 2019, 3:59 pm

A va dik ril ve aw...

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)