THIH KA DUH!! BY Puitea Tuallawt

[Ngaia]

THIH KA DUH!!

‘Hmangaihna hian mi chakte a ti tlu a; mi chak lo te a kai tho thin’

Daily leh Nightly a hna ka thawh lai, Aizawl daily news lar lo zet pakhata Joint editor, leiba ngah thei zet ka nih laia ka thil tawn lawmawm loh tak. Ngaihnawm loh luat avanga ngaihnawm lehling. Mawl luat avanga mifing ni hial awm khawpa lukawlh pakhat, kan veng thenawma mi nen zanlaia kan inbiakna leh a tuka a thih thuin min den dan a ni. A ti der mai mai emaw ka tih kha a lo ti der lo va, a tih tak tak ka rin loh avangin a tih der kha ka ring a. Pawi ka ti thlawt a ni.

Zan lam dar 8 hnu- lamah a tuk zing news tur vai khawmin internet leh phone kan hman chhâwk sek a. Kan tih neuh neuh chhûng hian zan nghâwng ruh te hi chu a lo pelh sawlh zung zung a, mut nachang hre lo, thawh nachang hre bawk lo an tih nun hi mi thenkhat hian an sel leh ngawt thin a. Kan hnathawhin a zir miau loh chuan mut leh thawh nachang chu hre sing sang sawmriat pasarih leh siki thum mah ila, eng kan tih chuan ang?

Kum 2008 November thla chawhnu thlang her bawih tawh a ni tih chu ka la hria a, a ni(date) tak erawh ka hre chhuak zo tawh lo. Pawngsual, tuilian, thlawhna accident, mobile phone dawr rawk tih vel hriat hlur mai kha ka hna khan a keng tel a. A thawven thlak teh huai lem lo. Tun thleng hian news hriat viau hi eng nge maw a tangkai teh chiam na le ka ti. (a tha lo ka tihna ni lovin).

Sana ka han en zing lam dar 2:47 a ni, zan dang aiin ka speed a sáng hret a ni mai thei. A tuk a chhuah tur chanchinbu chu ka print out zo chiah. Zanina ka hna chu ka zo ta. Office ka chuahsan a. Midang chu an haw vek tawh.

Kan editor ber khan computer hi awmpuitur a neih loh chuan a hlau tlat. Upat lamah zawng zir a har deuh tawh a nia nge! Ka zan tin danin mobile phone ka phawrh a, tun hnaia ka hla duh thar em em mai H.E.L.P ho hla sak, chu earphone vuahin ka ngaithlaa, in lam panin muang changin ka kal hnang hnang a.

Ka zinna kawng thlaler hmun khawhar,
He lei hrehawma’n mi chim lungngaih tahna ten;
Sualna hliam chu tuarin a lo chau zo...

hmmm...tiin a thlûk chu ka lo zâwm ve bal bal a.

Dawrpui vengthar chhuahsanin, kan veng ka thleng a, Temple bus stand, bathlar ang deuha an siamah chuan mi tute emawni, mi pahnih hi an thu a, a thim deuh avangin tu te nge an nih ka hre mai thei lo. Hriat kher pawh ka tum lo. Zan dar 3 rik dawn ruai tawha, helai hmunah thut hi thil ropui lutuk a chhiar theih a ni lo. Ka kal pel dawn thuak a...

“Puite,” tiin min rawn ko ta tlat mai. Ka ding a, ka hawi let a, temple bus stand a lo thute chu ka han pan hnaia, ka thian, kohhran thalai lamah pawh inti Pathian rawngbawl fahrana lo inzui ve hnak hnak tawh thin kan ni tih ka hmu chiang thei ta!! Ehe, pakhat zawk chu ka hriat ngai mi a ni lo. Pakhat erawh sawi tawh angin ka thiantha tak a ni. “Thianpa, tunah hunah te helaiah eng nge in tih, nghah in nei em ni?” ka ti a.

Chutah rin loh deuh mai hian mi rawn kuah chawt a, patling thankin zet tawh chu naupang chhe tah tak hian a tap ta hlawp hlawp mai a ni. A zurui lungpuam tap a nih ka ring nghal mai a. Ka thlem nasat poh leh a tap nasa zual dawn tih ka hria, a hnung zangah ka beng thak thak ringawt a. Engmah ka sawi duh hrih lo.

A mittui leh hnap tui lah chu a inchawm fin burh tawh mai. A hmel hi a inhmeh lutuk lo bawk nen. A photogenic viau a nih pawhin a livetogenic vak lo. Rawmawl a phawrh a inthiam lo tih hriat takin a hmai vel chu a han hru fai a, “Thianpa engati nge, nge nge ni ta?” ka ti a. “A na em a ni!” tih chiahin min chhâng a.

Kei aia naupang deuh fê a ni, kum 20 bawr emaw chauh a la ni. Chuti ang miin tap khawp hiala a tawrh theih tur chu pahnih ka hria, pakhatna : Chhungkaw thil. Pahnihna: Hmangahna/ngaihzawng. Khawi zawk emaw hi chu a ni ngei ngei ang tih ka ring mai, “Thianpa, i sas vang kha a ni tiraw?” ka ti a. A mittui kar atangin min rawn en a, “Aw, ni tho mai...!” a ti a.

Hmangaihna hi eng nge maw a nih le? He tlangval tê chhe lo tak, tun lai tawng taka hmeichhia ten ‘A MAN’ an tih ang chi hi a ni. Tum khat, pawh mi pathumin an sual rawn a, a hneh lo chiangkuang khawp a, “ I tlawm em?” an ti a. “Tlawm ve ngai lo,” tih pahin a then sen huam a, a ha hmai pawh hi a lem a vuah chawp tih ka hriatpui. Chuti ang khawpa hahmai chan thak khawpa huaisen chu hmangaihna avangin naupang chhe tah takin a tap chu a ni tak si a le!!

“Thianpa, tawngtai i duh em, ka’n tawngtai dawn em ni?” ka ti a.

“A ngai lo, tawngtai a sawt tawh lo.”

“A nih chuan, ka thlah haw ang che aw?" ka ti leh hram a.

“A ngai lo: Puite, thih ka duh.”

Tih pahin a kawngbawr dinglam atangin chemte fit khat vel dawn laia sei, hmawr sum zet mai hi a rawn phawrh a, “Khawngaihin, min vit hlum mai teh,” a ti ta. “Eh, ka ngam teuh lo mai, i ti rapthlak em mai a, khawi chemte pawh kha rawn la rawh, khati ang rilru pu chunga chemte ken kha a fel lo,” ka ti a. Chemte chu ka laksak a. “Naktukah i rawn lam leh mai dawn nia, ka hawsan phawt ang che, mipa i nih kha hre ta che, hmeichhe pakhat vang mai mai a khati taka tlawm a ngai em ni. Tuifinfiatah sangha pakhat chauh an awm lo,” ka ti a.

Nia, an chanchin chu ka hre ve deuh a ni. Bialnu, hmeltha deuh mai a nei a. Hmeichhia pawhin a duh viau niin ka hria a. Ka thian a phei chuan a atchilh a ni ber. Mahse, kha hmeichhia ber kher kha he Thu Ngaihnawm Huanga Hmeichhiate ang lo takin hmeichhe rinawm lo buruhseh, lerh kawh lam aia lerh herh ki kawi hockey stick deuh mai hi a lo ni. A hmel lah kha nikhua loh pui atana nikhuapui chakawm deuh mai a ni vei chhaps si.

Aizawl veng tin deuh thawah ngaihzawng a hung dul a ni ber a. Tu tih dan takah emaw a nikhua loh namen dan kha a namen lo namen a ni ber e. Chuti ang hmeltha vawr, belhchet dawl si lo chu kan thiana chuan a lo hmangaih laklawh tawh si. Kar kalta khan Aizawl veng pakhat ( a hming chu sawi lo mai ang) a miin a RU a. Ni thum an inkawl a, a tuk zanah midangin an LU..awh(tih palh tawngsual hi a awr lutuk a) an RU leh a. A mah lo atchilh hlum lo chauh tu ka thianpa tan chuan bengmuka liam zawih zawih tur a ni reng a ni.

Chuti ang ringawta han kalsan chu ka hreh kher mai;mahse, tih theih ka nei mawlh si lo. A thianpa hnenah chuan,”A tha lo zui viau a nih chuan min rawn hrilh ang che aw,” ka ti a. Ka haw san ta a.

Ka muhil miah lo.

Ngaihzawng(ngaihzawng han tih bawl chu ka hreh deuh mange!) laka rinawm lohna hian mi tam tak Krista hnen atangin a lo hruaibo thei reng mai tih ka ngaihtuah a. Tlema fing var deuh chin hi chu an in ngaihtuah chhuak a, an chapona an tipung a. Na mah se, na lo ang takin an inlantir a. A tawpah hnehna an chang thin. Ka thianpa pawh pawl 12 lai zir thleng ve tawh a ni. A rui a harh fim ang a, a in ngaihtuah harh ve mai ang chu ka ti a. Ka ngaihtuahna a luah zankhua a ni ber e.

Mahse, zing dar 4-a YMA information Mike atanga ka thu hriat erawh chuan min thawng na kher a sin le,”Tlangval Zorammawia, kum 20 mi chu tukin zing dar 3:50 khan a ma pindanah inawkhluma hmuh a ni.”

A chhan ka hria. Mahse, a chhânna ka hre lo a ni.