LEHKHATHAWN HNUHNUNG BY Puitea Tuallawt

[Ngaia]

LEHKHATHAWN HNUHNUNG BY Puitea Tuallawt

LEHKHATHAWN HNUHNUNG

LEHKHA HLUI
Zan khup ruh pelh sawlh tuma a innawh a innawh lai a ni tawh, pawn lam thawm pawh a reh riai tawh hnuah, kei ZAN RIDER hi muhil thei lo vin ka tal ka tal vel a. A tawp lamah phei kha chuan ka ning ta lutuk a, ka lehkhabu bawm ka hawng a, chhiar tur zawngin ka enlawr dun dun a, tuna ka rawn ziah tur lehkha thawn hnuhnung hi Sidney Sheldon ziah, ka chhiar nin hleih theih loh Lehkhabu ‘The Best Laid Plans’ tih ka han la chhuak a, ka rin loh deuin lehkhabu karah atang chuan A4 Fullscape paper pahnih chilh khawm, zawr zet hi a lo tla chhuak nawlh mai

A hmel han en reng rengin a hlui thawkhat hle tawh tih a chiang a, engti tiha helai lo awm ngawt nge a nih lah ka hre hlei lo va. Cleopatra leh Hermachis a te thawnthu tla hlang, thlaler vaivut zinga mi tuin emaw a chhar chhuak a, a ziak chhuak ta ang mai khan kei pawhin ka han phawrh a ni. A ziaktu hian Lawmzuala tiin a hming a ziak a, a ziah kum, thla leh ni erawh 10/05/2002 Friday 6:00 Pm tiin, a ziak lang thlap thung. A hawrawp hman chu ka la hmu ngai miah lo. Engtin nge helaiah hian a lo awm ringawt theih tih pawh ngaihdan ka nei lo. A ziahna a rei tawh hle tih chu a chiang, tunah 2012 August kan chuangkai tawh a, a tlem berah kum sawm dawn chu a liam tawh tih ka hre thei mai.

Chu lehkha hlui tawh tak chu A4 paper size phek hnih, khat ama type writer tha vak lo va chhut a ni tih pawh ka hre thei mai a. A mawih deuh lek lek tawh avangin dimtein la la chhuak a. Ka chhiar ta a ni.

LEHKHA THAWN HNUHNUNG
Ziah ni 10/05/2002 Friday,6pm, Lawmzuala.

“He lehkha in chhiar hunah chuan kei chu mitthi ka lo ni tawh ang. He ka inkhaina hrui hrual hian famkhua chu min hruai thleng dawn a ni. Ka damlai khan in tan ka tangkai lo nram mai pawh a ni lo, a hnawkin ka hnawksak ngawih ngawih a ni tih chu inhriat vek kha. Ka thih hnu-ah chuan in tan khawvel pawhin a awmze thar a nei ve leh thei tawh ang tih ka beisei ngawt mai. Kei ve zawng, min hrilh fo thin ang khan khawvel ti rim che tu mai ka ni si a.

Inawhhlum hi eng ang fakauva na nge a ni a; eng ang ema awlsamin nge mihing nunna i a lak theih tih vel chu nakkinah hremhmunah kan la sawi ho dawn nia. Tunah chuan ka la in awkhlum bik chiah lo va, eng ang fakauva rapthlak nge a nih han hrilh tur che u in tawnhriat(experience) ka la bre bim lo a ni. Ka damlaia in tana til ropui leh thil chhinchhih tlak engmah ka lo th sak lo che u kha a pawi ka ti a, ka inawhlum ka hrehna chhan leh inawkhlum mai tura min tur na ber tu a ni lawi si.

(...helaiah hian a thuziak hi a thler deuh a, a chhiar fuh chiah theih loh deuh PT)...ka mihring pui duh tak te u, hetia inzinga tel ve tlak lo va inngaia famkhua lawi san tum che u a chet ka thawh ta mai hi inhriat thiam hram hram ka ngën che u a ni. Mahse, ka han ngaihtuah let neuh neuh chang hian, ka dam aiin ka thih hian in tan boruak tha zawk a thlen ch u ka ring a. Ka ruang inhmuh huna in thusawi turte ka ngaihtuah lawk hian ka thih hi in tan leh ka tan a tha ber a ni tiin ka ngaihtuahna rilru buai tak hi buai takin ka vawthlu ta a ni. Min hrethiam dawn tih ka hriat avangin in chungah lawmthu ka sawi lawk nghal bawk a ni.

Kan VCP Pu Tlanga hnênah khan ngaihdam dil ka duh a, a ni khan vawi duai lo, mi ka an ve theih nan min vaw thin a. Tun thlenga ka ke veilam a bai tak nachhan pawh hi Iron Rod-a min vuak dam hlen thei ta lo kha a ni ;mahse, ka zui hauh lo a nia. Kei zawng sapial tlata tla, address mumal pawh nei lo, unau pawh nei lo ngang kha ka nia, in hriat vek tho kha. Mihring hi vuak nasat avanga tha/fel tur ni ila kei tluka tha leh fel hi he khawvel ram zauvah hian an tam lo tawp ang. Mahse, in vuak vak vak i thatna a lo ni lem lo a nia, ka sual dan em ema hian.

Hmana VC House-a min hlap chiam tum kha thenkhat chuan in la hre ve mai thei; nia, kha mi tum khan kan kohhran upa zahawm tak Pu Neiha te tape recorder ru-ah min pu kha a ni a, kha tape kher erawh kha chu ka ru miah lo. Ama faaapa ngei Liansanga’n Red Rose-ah cheng 300 in a hralh ru a ni zawk.Kha thilah khan inrawlhna pakhat mah ka nei ve lo. Mahse, a pawi lo, a pawi chai lo ve. Liansanga chu kohhran upa fapa duatlai a ni a, kei zawng misual ruk mang, addict theih zawng zawng addict kh ka ni miau a, ka chunga thil thleng kha a mak lo va, a awm hliah hliah zawk a ni. Ka ngaidam vek che u. Min hmangaih em avanga ka nakruh pahnih auh thawt a min vuak lai te khan min lo va hmangaih tehlul em!!!

A dawt leh-ah chuan, kan Head Master-in, sikul uniform leh zirlaibu ka neih ve loh avanga min hnawh chhuah ni khan ka lo thinrim ve viau kha a ni a; mahse, tunhnu-a ka han ngaihtuah kir leh chang hian ‘vuina tur reng ka hre ta lo;kei ang chi kha chu kan (an?) sikul khan min mamawh lo em a ni. Sikul ti hming hliautu ka ni dawn tlat a. Ka thinlung zawng zawngin kan Head kha ka ngaidam thlap a ni. Sikul tana tha tur a nih ringa huaisen taka min ben thlawrh thlawrh pahah min hnawtchhuak ngam kha a fakawm ka ti ngawt mai. Kan (an?) sikul kha sikul tha tak, an tum (motto) ang ngeia KRISTIAN NUNDAN THA NGAISANGTU an nih chhoh zel pawh ka beisei a ni.

Kar hmasa Pathianni chawhnu-a ka rawn inkhawm ve teh mial kha, a mak inti tirawh u? Kei pawhin mak ka ti ve tho, kohhran dan chhunga ka luh hnua vawi thum ka inkhawmna chiah a nih kha. Lalpa zanriah Sakramen an rawn sem diat diat lai te khan zak takin ka lo kim ki chawih chawih a. Kan upa-in min sem kan ta dai pawh kha a mawh lo ve;nia, kei ve hi zawk, sakramen kil ve tur chuan ka bawlhhlawh lutuk a ni. Ka kamis hak lai kha, kilh kim vek duh mah ila, kawr kilh pahnih chiam a awm tlat si a, tih ngaihna a awm ngang lo va ni. Ka kekawr lah kha, bawlhhlawh bawma ka chhar sahbawn tel lo va ka suk ve ngawt a ni. Ka bula tumah in rawn thu duh miah lote kha ka lawm hliah hliah a ni.

Inkhawm ban hmaa ka chhuak ta nulh kha, min en duh hlawm bawk a, min hmute chuan min la hre reng ang tih ka ring. Khati anga Biak in zahawm taka mawi lo taka ka che kha khawngaihin min ngaidam dawn nia. Biak in inkhawm zahawm tak ti khawbawtu kei tehlul hi inzinga inkhawm ve tlak ka ni lo. Khawngah takin in Biak ina ka lo inkhawm ve ringawt kha min ngaidam hram dawn nia, tun hnuah zawng ka rawn tibuai leh tawh ngai lo ang che u.

Lawmthu sawi tur ka va ngah em, zanah tui taka ka mut theih nana, phal taka an bathlara min riah tir thin tu, pa Zosangliana te chhungkaw chungah khan lawmthu ka sawi a ni. An bathlara min han mut tir phal mai kha ka tan chuan a hlu-in a ropui em em a ni.Ka lawm e Pa Zosanglian.

Ka damchhunga ka hmangaih neih ve chhun, nula hmeltha leh fel Tluangtei tak kha le... mi bathlara puanhlap pan leh bal zet nena ruahsur ka do tlawk tlawk laite pawh khan Tluangtei, tih hming duhawm eltiang avang ringawt khan nuam zu han ti thini’ia. Tluangte min khawngaihna avanga ka khawlai leng min lo be lum lam ve thin te kha ka tana a hlut zia i hre ngai lo vang, kha aia nasa kha i lakah engmah ka beisei lo ve.

Hei le, ka thihna tur atana ka lo dahthat ruk khiau, hruaizen chu le! ti hian ka nghawngah ka han rawng ang’a, rei lo teah minung ram hi lei si lo van si lovin ka chhuah san dawn ta a ni. Ka thih tak tak hma hian eng nge ka han sawi leh ang aw ekhai!! chuan sawi belh tur ka hre ta lo. Ka chanchin hi thawnthu ngaihnawm lo takin a intana, a tawp lam pawh ngaihnawm lo takin ka bâwk dawn a nih tak ber hi.

Lalpa, i hnen ka rawn pan dawn e. I tan engmah ka ti ngai lo va, ‘Misual ka ni’ tih chauh hi i hmaa ka din huna ka sawi duh chu a ni mai.

A pawi chai lo ve, khaw nge val hi, khai aw...ooh..oh...

( ka suangtuah zui dan chuan a tlar tawp ber a ziah lai hian a nghawngah hruihruai chua valh chiah a, duhthawh takin ooh,,oh, tih vel hi a la ziak lui hram a nih ka ring)