THE TWIN BROTHER BY Puitea Tuallawt

[Ngaia]

THE TWIN BROTHER BY Puitea Tuallawt

THE TWIN BROTHER
(Mystery Story of Tluangpuii)

Tluangpuii chuan choka ah zanriah a ei mek. Hmin zen zawna bawngsa ruhkawl chhum tui hang tle nuar nuar mai han ei tluka tui leh nuam hi a tam lo. Chhun lamah a hah deuh avangin zanin chua hma thei ang bera mut mai thain a hria a. Mahse....

Inlengkawmna pindan (sitting room)-a TV chu amahin a rawn in on a. Channel tin mai chu a inthlak zung zung a. Bawngsa ruhkawl ti tha leng lawng chu a han lek chhuak a, inlengkawmna pindan lam chu a pan phei ta nghal a. TV plug chu a phawi nghal bawk.

“I duh chu sawi mai rawh, vawiin lam ka hnathawk ka chau viau a nia?” a han ti ngawt a.

A hawi kual ngial pawhin eng thlarau mah a hmu miah lo. Mahse, khawiah emaw hi chuan, he pindan chhungah ngei hian tu emaw chu a awm chiang a ni. Heng thlarau te hian electric chakna zungzam hi an hmang tangkai thei tih a hriatna a rei tawh bawk.

Ngaihthat thlak loh khawpin thawm a reh vang vang a. Chaw ei zawm tura choka lam a pan phei leh dawn lai takin thlarau chu a hmu ta a ni. A hmai a dâng hle a, a hmui a duk chur bawk a. Tluangpuii chuan “Eng thilah nge min mamawh?” ram deuh hmak hian a han ti a.

GHOST MAN
Thlarau zakzum leh tawng mawh tak chu a ni ve hrim hrimin a lang.

“Sawi vat teh,” Tluangpuii aw chu a vin deuh lek lek tawh.

“Ih...sawi tan mai dan pawh ka thiam lo a ni...” a awah chuan a phili buai chhe lo chauh tih a hriat theih bawk.

“I duh duh na atang khan sawi tawp mai rawh.”

“Unaupa, kei aia minit hnih vela upa phirpui ka nei a. Kan in ngainain kan inkawmngeih a, college ah pawh thian dang kan kawm ngai lo. Kan pawl a inrual bawk nen, kan inzui chawt a ni ber. Mi tam takin min hai fo a, kan in ang thawkhat a ni. Ka pa meuh pawhin min koh sual zauh chang a nei. Ka hming chu Lalrindika a nia, Madik tiin min ko thin, ka phirpui chu Lalduhawma a nia, Duhawm tiin kan ko thin....” sawi zawm lovin a ngawi a. Eng emaw tak ngaihtuah tih hriat takin a en ngai a en vung vung a.

“Chu zawng chu emni inbuaina chu, a va ho ve, chuti ang te chu thil thleng pangngai mai mai a lawm.”

“Nia, a dik a lawm, chumi chinah chuan, thil a kal dik loh tanna chu ngaihzawng kan intawm tlat mai kha a ni. Hmeichhe fel leh fing, hmel pawh chhe lo tak a ni. Zep lovin sawi ta ila, ka phir puipa Duhawma ai pawhin ka hre hmasa a, kan inhmangaih thu pawh kan sawi ve ve tawh. Duhawma hnenah pawh min la hmuhpui ve dawn nia, a chhia chu i ti bik miah lo vang ka ti nghe nghe. Hetih lai hian Duhawma Delhi ah sumdawnna thil vel buaipui turin ka pa in a tir a, thlakhat dawn lai a cham tawh a. Hemi chhung hian a nia, Mazuali nen pawh kan lo inhmel duh tanna chu, ka hmangaiha ka thlahlel ngawih ngawih reng thin. Dik tak chuan a ni pawhin min hmangaih tih ka hria. Phirpui ka neih thu hrilh nachang ka lo hre lo kha pawi ka ti khawp mai, thil dang chu sawi loh a hleih kan nei lo.”

“Tichuan..”

“Nia, ka phirpui Duhawma chu thlakhat chuang mah Delhi lama a awm hnuin a lo haw a, Mazuali nena kan chanchinte pawh phur takin ka hrilh a, a ni pawhin hmuh a chak thute min hrilh bawk. Zan khat chu kan unauin Mazuali te inah chuan kan va leng a. Khami zana Mazuali mak tihzia kha (tlem a nui deuh a) ‘Madik tu zawk nge i nih?’ tiin min zawt a, a nui bawk bawk a. Kei chuan, “Han ring chhin la,” ka ti a. Min han en dun vang vanga a tawpah chuan min hre chhuak ta. Keimah zawk chu min rawn pawm chat a. “Ka hai lul lovang che ka Lalduhawm,” a ti a. Hlim tlang takin kan in kawm a. Zan dar sawm rik hma deuhin kan tinsan ta a ni.

“Tichuan....” Tluangpuii chuan thil awm dan tur awm ang chu a ngaihtuah pah zung zung a.

“Ka phirpui Duhawma chuan tih tak tein Mazuali chu a ngaizawng ve ta tlat mai a ni. Kan hmel a in ang si a, hriat hran kan har si. Mahse, Madika ai chuan kei hi ka hmasa a, tin min duh zawk tih pawh ka hria. Ka unaupa Madika, ka hmangaih em em, ka phirpui ngat lehnghalin ka chunga thil a tih zui dan chu rapthlak ka ti tawp thei lo..” Madika hmelah chuan thinrim tawpkhawk hmel a lo lang a. A lan dan chu a rapthlak kher mai.

“Uluk takin ka lo ngaithla reng a nia, sawi zel rawh,” Tluangpuii chuan a lo ti khauh a.

“Aw le, July 3, thlabial zan tak a ni, ka la hre chiang khawp mai. Zan lam dar riat vel a ni. Ka pindanah mut pahin lehkhabu ka chhiar a. Ka chhiar tui laklawh lai takin current a rawn thim thut mai a. Mei ka zuk ngai loh avangin meitalh (lighter) ka nei mai si lo. A awm leh thuai ang chu tiin mu chung chuan current awm leh hun chu ka nghak mawl ve tawp a. Rin ai takin current lah chu a rawn awm leh har si, thim a awm reng ta na na na chu ka mut te a lo chhuak ta a, ka lo muhil titih deuh a, mumang rapthlak zet hi ka lo nei a. Ka mumangah chuan, ka phirpui Madika chuan ‘Ka ta tur a nih saw, engti kawng mahin nang hian min chhuh sak lo vang, tih pahin ka hrawkah a rekbet a, ka thaw a chham titih ta....’

“Chu kher chu unau chungah tih a tan chuan a na mange,” Tluangpuii chuan a lainat tak tak reng a ni.

“Nia, ka mumang emaw ka tih kha ka mumang ni lovin, ka mut hilh laia ka chung thil lo thleng taktak vek a ni. Ka han harh leh chiah chu ka bo mup ringawt mai a ni. Ka han enkual vel Madika pindanah ka awm tih ka hre thei nghal mai a, chu zawng aia rapthlak chu ka ruang inkhai (inawkhlum) ka hmu reng mai chu a ni. Ka thi tih chu rin ngam har ka ti a. Mahse, ka rin ngam loh avangin engmah a inthlak danglam thei tawh chuang si lo, khum bul dawhkanah chuan lehkha inpharh sa thlap hi a lo awm a, kan unau hi Mount Carmel-a pawl sawm thleng zir kan ni, kan hawrawp pawh zawng fian phel ang maia in ang a ni. Chu lehkhaah chuan, “A ruka Aids ka vei a vang a heti ang thil hi ti ta mai ka ni. Madik, ka unau duhtak, min hrethiam hram rawh aw- I phirpui Duhawma tih hi a lo inziak a. Han pawh chhiat vek mai ka tum a, mahse, lehkha chu ka khawih fuh thei ta tlat lo mai....”

“Ka pindanah ka lut phei nghal a, Duhawma chu khumah rilru nawm loh hmel deuhin a lo thu a. Thlalak pakhat, Mazuali nena College a kan lak dun chu a lo thlir vang vang a. “Tha lo viau mah se, hmangaihna ah chuan thiang leh thiang lo hi a lo awm tak tak lo ve,” a ti sap sap a.

“Mazuali te inlamah ka kal nghal, kal ti ila ka kal chiah pawh niin ka hre lo, ka ngaihtuah rualin Mazuali bulah chuan ka lo der tawh. Ka chunga thil thleng chu ka hrilh a. Mahse, min hmu lo a, ka tawngri lah a hre hek lo. Tichuan, Mazuali bulah chuan ka mu a, ka hmangaihzia ka hrilh mawlh mawlh reng a. A ni lahin engmah a hre lem hlei lo va.

A tuk chanchinbu chhuakah chuan “Ramhlun North tlangval Lalduhawma chu ama pindanah inawkhlum a hmuh a ni. Heti ang tlangval fel leh la naupang tak hi eng vanga inawkhlum duh mai nge a nih hriat chian a la ni lo. Lehkha tawite a hnut chhiah a, chu erawh chu a chhungten mipui vantlang chhiar an remtih loh vangin kan tarlang thei ta lo a ni.” tiin.

“Tichuan eng nge i tih zui tak?”

“Ka pindan ka ngaihtuah rualin ka pindanah ngei chuan ka lo awm nghal der. Ka thlawk nge ka kal pawh ka hre lo. Ka thawmhnaw ngainat ber mai, T.Shirt hring, Mazualin ka birthday-a min present kha a lo ha a, ka chunga a thil tih avanga hrehawm ti hmel pawh a pu lo. Thlalak pakhat, Mazuali nen College background a hmanga kan lak dun chu a lo thlir veng veng a. Ka thinrim lutuk chuan han thuai nawk mai tum hian ka va bawh. Mahse, engmah ka ti thei lo. Boruak ang chauh ka ni tawh.

Beidawng takin ka thu hnawk a. ‘Madik, heti em hi chu ka lo ring lo a sin’ tiin ka phun sep sep a.

“Kumin July 3 a thleng a ni iti maw kha?”

“Aw ni e. Ka chiang khawp mai. Madika a thi tih a hriat rualin Mazuali chu min hnem turin a lo kal vat a.’A va pawi tak em PP’ tiin Madika zawk chu a kuah vawng vawng a. Hun a kal zel a, Duhawma chu a thi tawh. Madika chu Duhawma a ni ta hleuh mai a ni. Nimin piah khan ka chhungte ka chhungte Mazuali te inah palai an tir a. I hming Tluangpuii tih hi thlarau khawvelah chuan hre lo pawh an awm lo.I tanpuina beiseiin ka rawn pan ve tawp mai che a ni.”

Tluangpuii chuan chokaa a chaw ei thleng vel seng that mawlh mawlh pahin. “Palai te chu an hlawhtling em?”

“Aw,”

“Inneih hun atan eng ni nge an ruat?”

“Kar leh nilaini..”

THE HELPER
“Aw le, eng nge kan tih theih kan en ang chu;mahse, hun kan ngah tawh lo hle mai,” Tluangpuii chuan a han ti a. “Pi Tluangpui min pui thei a nih ngai chuan thlarau khawvel(Spirit world) a i chungchang an sawi dan leh hmelma tam tak i neih dan ka hrilh ve ang che. Tuman an sawi chhuak ngam lo va, mahse, min pui duh a nih ngat chuan ka hrilh ngei ngei ang che.

“Aw le, thil dang chu dah thain ka zawhna te hi min chhang ang che,” tih pahin inlengkawmna pindan lama a laptop chu a ti nung a.

“Mazuali nen khan in koh dan bik riau, midangin an hriat pui ve lem loh, hei inngaizawng ten in koh dan bik kan neih tlat thin ang kha in nei em?”

“Aw nei e, PP tiin kan inko thin, kan pahnih bak chu hria an awm miah lo vang.”

“A nih T.Shirt hring, i birthday a a present che khan thuziak tawite tal a hnutchhiah em?”

“Aw...PP i kum 26 tlin lawmpui nan hei hi...i always love you for ever and ever’ tih hi a dah tel.”

FACE TO FACE
A tuk zing dar riat rik hma deuhin Tluangpuii chuan Mazuali te in chu a thleng phei tawh. Kawngkhar a han kik dat dat a. Mazuali ngei chuan a lo chhawn a. “Eng nge ni ta ka pi, lo leng thu rawh,” a ti a. A hawihhawmin a fel hle tih a tawng hmang atang chuan hai rual a ni lo.

“Duhawma nen in innei hnai tawh niin ka lo hria a?”

Nui var var chungin Mazuali chuan, “Nia, ka helhhawlh, ka zam bechhe vek zel hlauhthawnna riau te hi ka nei a.” a ti a.

“Mazual, nizan khan Duhawma thlarau chuan min rawn tlawh a sin...!”

“Eng a, eng thu lawi lo nge maw i sawi le, mi ang pangngai emaw i nih ka tia...?”

“I awih emaw awih lo emaw ka pawisa lo. Ka thusawi tur hi lo ngai thla ringawt mai rawh. Tuna Duhawma i tih hi Duhawma a ni lo. A phirpui Madika zawk a ni. Madika(Duhawma?) a lo len leh hmasakberah he zawhna hi lo zawt ang che. I kum 26 tlin lawm nana T.Shirt hring ka leiah che khan eng thu nge ka ziah i la hria em? tih leh PP tih hi a awmzia i hria em?” tih hi.

Tluangpuii chu a tho a, hrilhhai leh buai taka Mazualin a en zui reng pawh chu a hmu lo.

NEXT WEEK NEWS
Tlai lam chhuak chanchinbu pakhat chuan heti hian a ziak a ‘Ramthar veng nula Lalrinzuali(Mazuali) leh Lalduhawma (Maduha) te inneih tuma an inbiak rem vek tawh chu, eng thil emaw avangin thulh leh a ni. Nula leh tlangval in hmangaih em em ni se, hetianga thil a thleng ta mai hi khawtlangin mak an ti hle. Tin, a hmeichhia Mazuali hian, a pasal atana a hual Lalduhawma chu vawikhat mah hmuh a duh tawh loh thu a sawi bawk niin hriat a ni’ tiiin.


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***