DAK CHHUAK LA... BY Puitea Tuallawt

[Ngaia]

DAK CHHUAK LA...

Ti khan, bar (thir pal) karah i hawi vual vual reng mai dawn em ni? Khatia, i ke pan thovin an bawm luih luih lai khan i thiante chuan BA result an nghak mek a sin ka thian.

‘Engtin nge ruihna tur pawisa ka neih theih ang,’ ti a i inngaihtuah vung vung lai khan, hmana i bialnu, i ruih em avanga an bangrela i lawn vak tum a, i harhchhuak lehin phengphehlep man ka tum a, tia thu awihawm lo buluk i hrilh avanga i then tak khan DAN THIANGHLIM ngatin, pawl riat i zir laia i kid Belnawta tia i koh duhdah thin kha pasalah a nei dawn ta tih pawh i hre chuang lo’ng maw! I bul lawka Gypsy ding reng kha tu ta nge i hria em? i hriat duh chuan kan hrilh ang che, ih maw...hmaaana Pathian rawngbawla i lo vah vaih pui thin, i kid, “I future a bright lo lutuk,” i tih pa ta kha zu ni daih tawh a. Mak thei ngei ti raw?

Tuna bar kar atanga i hmuh vuai motor changkang lutuk khalhtu kha, hmana a thir chhe hralh man i chhuhsak vek pa kha a ni tih hre phei la chu(h). A pawisa i lak sak hnu khan theihtawpin thir chhe dang a zawng leh a, Red Rose vela ruihhlo i lei vel lai khan company lian tak, thir chhe hralh lei chhawng thintuah a lo insiam milian chho va, tichuan motor changkang tak nen a rawn tlan pel ta puat che a nih kha.

Nang lah chu ti khan bar karah i la tawm sen lul reng mai si a. I chawh ka tih dawn chuan ka lainat deuh si che a, i chawh lo ka tih chuan, daktawrin damdawi chawh an chawh teuh ang che nga, i phungzawl hluah ang tih ka hlau si. Ei dawn leh ....ni se, paih dawn leh sa ni si’ tih velah kan chhuak ang tih ka hlau deuh bawk si.!

FAKNA : Zo sport a theuneu lo a mai mai lo....

I inchiu thinna avanga i ke vung lek luk te kha silfai ve thin teh, i bula mite khan rimchhia an ti teh mai a nia. I zah an hlaua an hrilh duh lo mai mai che a nih kha. I sawsel zut zut thin, KTP hruaitute khan bang lovin an tawngtai sak thin che tih pawh i hre chuang lo vang ti raw? An hmusit viau che niin nangmah leh nangmah i in ngaihbel a, mahse, an hmusit miah lo che. Hmuhsit a hnehin i tan chaw nghei hial ten an tawngtai thin a sin. Zah nachang lah chu i hre thei bawk si lo.

In kawmthlang nula mit kalh hakuh bengchhet deuh roh, hmelchhia i tih em em, cheng zahnih hlawh tur pawha i fawr pui peih miah loh tur te kha zu bem chiah teh, i ti fuh lo chai chai viau ang, nang thiante zara drugs addicts kha a ngaisang lo bawn bawtawl bingbilet rulpuiludin zangthal khaikhup thak mawle.

FAKNA : Engvangin nge LG kut chhuak kher i hman ang... insawi theih vang pawh ni lovin Manta bazarah kan bazar (Mapuia hmel mitthla zel ni ta se)

Heti khawpa tiduhdaha nek chep a, sawisa che mi zawng zawng hmuhsit ni tura Thir kual khung phena hnuk lut tu che Ruihhlo hi bansan vat teh. I naupan lai kha chuan i fel ve thin hle si a. Mahse, tunah hian eng i ti zo ta nge, i va han tla chhe mawngping khawlailung ta em em ve le.

FAKNA : Nitin bawnghnute no hnih tal in thin rawh, aleina inneih chuan:

I rualpui, i thiante chuan M.com an pas tawh a. Nang ve lah chu thir bar karah engting nge ka tlanchhuah theih ang aw tiin i lo la hmanhlel chu a ni tak si a. Khua hi chu i va tivar lo tak em.

Thianpa, heti ngawta hringnun hman zawh chu a dik thei dawn em ni? Tu nge i samah kek che a, tu nge chil chhak che, tuin nge nuih zat che a, tu nge thinrik che...i naupan lai pawhin i rualpui ten thuziak, lemziak, inkhelhah pawh tuman an tluk ngai loh che kha. I rilru a huaisen avangin in class ah pawh tuma’n an ngam ngai lo che a ni lo’m ni.

I tih that duh tak tak chuan nang tluk tur che hi an awm bik chai lo a sin.

Thianpa, DAK CHHUAK LA HAWI VEL TEH LE....