UNFINISHED BUSINESS BY Puitea Tuallawt

[Ngaia]

UNFINISHED BUSINESS
( THe Mystery' Story of Tluangpuii)

Ngawi teh zan thum lai chu a ni tawh hial lo maw?”

A tir chuan a fiah vak lo; mahse, zan rei lam hnu, khawlai thawm a zuai deuh hnu atang hian a ri chu hriat a awlsam leh zual daih thin. Khumah a mu meng kara, Aizawl khawpui hulum leh ri hulh hulh mai kara han tei vah vel phei chu a tan thil nuam a ni hlawl lo.

‘Ka ruang awmna an la hre miah lo a nia.”

Chu.aw chu a beng chhungah nge a thinlung chhungah zawk a rik tih a hre thiam lo.

“Ka nupui ka hmu duh a ni, thil pawimawh tak hrilh tur ka nei a ni, khawngaih takin min pui hram teh Tluangpui.”

Hei pawh ngenna bawk a ni leh ta. An thusawi lah chu a chiang viau mai bawk si. An mahni ber hmuh tur an awm si lo. Sanain zan dar 2 a kawk vu tawh. Naktukah hna pawimawh lutuk thawh tur a nei, a kal tlai vaih chuan boss a trek nasa dawn. Muthilh tumin a han beng a hup ringawt thin , lukham bawh meuhin a han bawk thlawp a.

“A Pi Tluangpui, a nute hnenah min hruai rawh,” a aw atang chuan hmeichhe naupang kum riat mi vel a nih hmel.

“Mamte, khaw nge i nute chu an awm a?”

“Ka hre bik lo, lammualah inkhel kan en a, a nu leh a u-in min lo kal san daih a, ka hmu zo tawh lo. Api khawngaih takin min zawn sak hram ang che aw,” a tap a ni tih hriat tak hian a inhnit fap fap a.

“Mamte, ka khawngaih lutuk che a lawm; mahse, engmah ka tihsak thei tawh lo che a ni. Min ngaidam rawh, mihring i ni tawh lo, i thi tawh a, thlarau chauh i ni tawh, i chhungte chu va hmu mah la, i beisei thil ang chu a thleng chuang lo vang.”.

Chu veleh Tluangpuii mutna khum chu a mahin a in vawrh kang dawrh a, ‘an chhe bawlhhlawh turu buru tak tak hi naupang ka atang chuan a rawn ti chhuak ta zawt zawt mai’ Tluangpuii chu hlau leh khur chungin inchhung atang chuan a tlan chhuak. A thin phu lah chu awihawm loh khawp hian a inthum rawn tlut tlut mai.

A tuk nilengin Tluangpuii rilru chu a nuam thei hauh lo mai. A thil hriat mak sak tak lah kha midang hnena han share dawn se, miten mi a emaw an ti mai dawn si.

A tuk zan a han mu tur chu huphurh tak te hian a huphurh a. A khum bulah chuan Bile leh Kros an dah ngawt a. Zan dar 11 chho velah thawm chuan a beng a rawn luah leh tan ta. A han te chhuak chiam chiam thin, a beng a hup thul , a hmai a phih, a lu a su, engmah a sawt thei chuang lo.

Khum bula bible hmel a hmuh ringawt pawhin a thla muang thin. Awih vek kher lo mah se, zanin zet zawng a dan a dang leh tlat tawh. Thla a eng nalh hle a, tuihu fim hi chhum anga insiamin a eng paw chuai mai a

“Ka pi khawngaih takin min pui lul rawh, a rei lo vang, tun hnuah ka rawn ti buai ngai tawh lo ang che,” chu aw chu zan dangah pawh a hriat fo thin tlangval aw kha a ni tih a hai lo.

Tluangpuii chuan a huaisenna zawng zawng sawm khawmin, “Eng thil nge ti tura min duh,” a han ti a.

“Police ho hnenah thil awmzia dik tak ka hrilh duh a ni.”

“Eng thu chu nge i hrilh duh a?”

“Sawi tura ka tih a piang che i sawi mai tur a ni,” inchhung thim deuh ruihah chuan tukverh kar atanga thla eng zungzam a rawn zam lut chiai chiai atangin tlangval lian tha thelh thawlh hmeltha , mi hausa fapa ni ngei hian a lang.

“Min hrilh phawt loh chuan ka sawi lo vang, tunah hian min hrilh rawh,” Tluangpuii chuan a ti ve ta ngat a.

Tlemin a hmel chu a rawn danglam deuh a, zawitein aa banah a rawn chelh a, chutah Tluangpuii chuan thil mak tak mai a hmu ta a ni.

Chhungkaw pakhat, an member pawh panga hi an awm, a te ber pawhin kum 15 vel hmel a pu tawh a, a hmel a thain a biangsum khuar kelha an nui thin te chu a mawi ngawt mai. Inchhung nu berin rawng a bawl a, hlim takin an infiam nui ar ar hlawm a. Tluangpuii chuan engtin nge ka awm a hre lo, engkim chu a indawt dan ang diakin a hmu vek a; mahse, tuman amah (Tluangpuii) chu an hmu ve si lo.

‘Ka thi ve ta a ni ngei mai le!! Rapthlakhlawmkhawmhian.’tiin a inngaihtuah a.

Rei vak lovah tlangval leh nula hmeltha tak hi inchung lam atangin an rawn chhuk a, thukhawchang sawia an rik luam hnuah. Zanriah an kil tlang ta hlawm a. An chhungkaw hlimzia a hmuhin Tluangpuii chuan a awt hle mai.

Zan dar sarih bawr velah hmeichhia (hmeltha kher mai!) chu haw turin a inbuatsaih a, zanriah tui tak an ei avangin lawmthu a sawi a. A aw mawi zia chu sawi fiah thiam hleih theih a ni lo. Sawiin a siak lo va, sawi lohvin a suak zawk a ni ber e.

Thil thlen dan chu a en reng a, tlangval chuan nula chu car-ah a luhpui a, an in lam panin a thlah haw ta a. Zan khua a tlai deuh tawh avangin zawi tein an hmuiah an infawp zauh a.

A hriat loh karin chak deuh mai hian nichina motor a sawiah khan min hruaitupa nen chuan a biling a balanga chakin an tlan a. “Ngaihzawng i nei hmeltha hle mai,” tiin Tluangpuii chuan a han fiam zauh a. Tlangval chu “Zawitein a nui suk a,” engmah dang a sawi zui lo.

Chutih lai tak chuan kan hmaah Gypsy leh car hi a rawn lang thut mai, signal engmah an pe si lo va, Tluangpuii te chuanna car nen chuan tlem a tlemah an insu lo chauh a ni.

Chuah motor atang chuan tlangval zurui tih hriat tak tak pathum hi thir lam chi hmanraw nelawm loh pui pui nen Tluangpuii te chuanna lam panin an rawn kal a. Tlangval (Tluangpuii thianpa) chu an vuak rawn ta chiam mai a ni.

Engkim aa hmu a, tanpui turin a kut chuan engmah a khawih thei bawk si lo. A thinrim lutuk chu a’n tawngtai leh ringawt thin. Engmah thil danglam a thleng thei chuang si lo. Tlangval pathumte lah chuan Tluangpuii chu an hmu ve thei tlat bawk si lo.

Dim lo sawk sawk hlawm bawk a, rei lo teah nikhaw hre lovin tlangval chu a let hlawm ta reng a, misual zinga a phanchang deuh ber leh thu hmel ber chuan, “Ti khan kawng thlang lamah mi hmuh loh turin zu phum bo rawh u; tin, nang ni pawhin hei hi hria ang che u Rinsangliani hi ka ta a ni. A der pawhin tuman min lo chuhbuai tawh suh ang che u,” tih khur khur pahin chu lai hmuna thisen sulhnu awm te chu fai thei ang berin an thian a, motor chu ral leh lam hla deuh feah him pialin an dah a.

Tluangpuii chu a rawn harh zawk a. A pindan chhuatah nikhaw hre lovin a lo leh hlawm reng mai.

Rang takin police number a dial nghal a, a thil hmuh chu a chin chhuakin a hrilh ta a ni. Mahse, police ho chuan chuti ang inlarna/zawlnei tih vel ang chi chu an lo ngaisang lo nasa mai. “Awih lo mah ula thudik chu a rawn ding chang tho vang,” tih pahin phone a dah tau bur a.

Thawmhnaw lum lam deuh a in bel a, suahdur te fel ren rawn keng, hmehen (torchlight) a keng bawk a.Mi ruang an phumna hmun chu a pan a zawng ta a, rei lo teah tlangval an sawi sakna lai hmun vel kha a va hmu chhuak thuai a, kawng thlang rualrem vak lovah chuan thosi leh chabet hual vel karah a chhuk thla a. Zan thla eng pawl ruih mai chu zan dang zawng aiin a nelawm loh niin a lang.

Minit sawm dawn lai Tluangpui a zawn fe hnuah, mi ruang an phumna chu ka hmu chhuak ta a ni. Zan thil thua nih tawh vang leh hmanraw tha an neih lem loh avangin an lo phum thuk vak lo va.

Police lam ten thil awm dan an hriat chhuah tak hnu chuan Tluangpuii an hmuh dan pawh a inher danglam ta dawrh mai. Chung tualthattu pathumte pawh chu an hmel nen lam a hre vek a, tu dang ni lovin, Aizawl chhim lam veng pakhata thian pathum, tun hnai lawka Jail atanga rawn chhuak an ni tih pawh an chhui chhuak thuai a. Rei lo teah police te chuan an man ta thuai a ni.

Tluangpuii chu chau takin a khumah a mu a, engati nge thlarau vak vel hi a hmuh theih tlat mai le. He thil hi a ngainat zawng a ni lo, duh pawh a duh hek lo. Dik chauh phei chuan a hlau a ni. A cell phone a phawrha earphone vuahin, ring tawkin Adele hla a ngaithla a. A bandana dum chuan a mit chu khawhmu thei miah lo turin a tuam phui tlat bawk.

A khum bul lawka, hmeichhe naupang ding reng pawh chu a hmu hauh lo.