THE HAUNTED HOUSE BY Puitea Tuallawt

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

THE HAUNTED HOUSE BY Puitea Tuallawt

Unread post by Ngaia » May 21st, 2016, 9:55 pm

THE HAUNTED HOUSE
(Ennawn leh ziah belh a ni)

" Do not go gentle into that night...Rage, rage against the dying on the Light"
-Dylan Thomas

BAD NEWS
Hlawh neia awmpui la tur chuan a sum thawh chhuahin a tlin lo tih a hria. Peih lo viau mah se, inrinni a lo thlen hi chuan inchhung tihfai leh bungbel remfel, thawmhnaw suk leh eng ilo buaipuiin a ni leng a ni deuh mai zel. Tlai lam dar 3 velah hi chuan a chau fe tawh thin. Khua a vawt lutuk lo naa, tui a lum a, a inbual phar phar a. Thawmhnaw hak nuam deuh tur kawrfual var a ha a.

Zingkar atangin chanchinbu takngial pawh a la bih hman lo, a tlangpui a han chhiar puat puat a, phek khatna tlar hnuai lampanga thu inziak, ‘Mizo Nulain Thlarau a Be Thei Em Ni?’ tih chuan a mit a la nghal zar mai. A han chhiar nghal zung zung a, ama hming te, naute nu leh pa thlarau a koh chhuah sak hnua, naupangin that lam a pan chakzia te adt. a inziak duah mai. Chung thil chu ngaihnawma tih zawng a ni hauh lo. Chanchinbu chu chhuatah a theh thla hnawk a.’Lalpa’ tiin a phun sep sep a.

Kar hmasa lawk khan a tukverh darthlalang phenah pitar leh putar, minung hmel pu tawh lo tih hriat tak a hmu a. Mahse, inleng a neih avangin a ngaihven zui duh lem lo. An hmel erawh a chhinchhiah chiang hman hle thung. Tu te nge an nih erawh a hre lo.

Tlai lam zanriah eirawngbawl a tum mek laiin a kawngkhar bell chu mi tu emaw hian dim vak lo hian a rawn hmet chiau vawng vawng a. A thil tih mek lai pawh thulh duh lem lovin, “Lo lut rawh,” a ti ram hmak a.

PROF. SANGA
In chhunga rawn lut pa chu hlauhawm tham khawpa palian a ni. A hmel erawh a ngaihawm phian roh a, midum nihliap niawm tak sei tak hi a hawl a, tleimin a han hawi hai deuh a; mahse, rei lo teah ngai a awh leh thuai a.

“Eng nge ni ta, zing zingah?” Tluangpuii chuan artui a kang mek a.

“Prof. Sang a ka nia, Westland University a thawk lai mek ka ni. I puihna chhete ka mamawh deuha lawm mawle, medical science atang fihfiaha hleih theih loh paranormal lam thil ni berin ka hria, ka ranw pan chawt mai che a ni.”

“Science thiamna hmang pawha chhut chhuah theih loh te chu Proffessor, kei hmeichhe naran, a hminga Graduat ni ve ringawt tan eng tia finfiah chi nge ni bik ang le;” Tluangpuii chu a nui a. A nuih a za tak tak a ni,

“Helai ka lo kal hma hian i chanchin an ziahna tam tak ka chhiar a, khawngaihin huatthuah lo la lo la, science thiamna lamah chuan chhuan tur i nei miah lo tih chu ka hria a lawm Miss Tluangpui.”

“A nih leh chuti si engati nge ka puihna i mamawh tak tlat mai le, Professor Sanglian?” Tluangpuii chuan a ti ve ta khauh mai a ni.

Prof. Sanga chuan Sikret a phawrh a, ‘zuk i remti em tiin’ Tluangpuii chu a han mit mei zauh a. Tluangpuii remtihna mitmei a hmuh hnu chuan meitalh (lighter) a phawrh a sikret chu a han hip khu vang vang a.

CONVERSATION
Prof. Sanga chuan,”He thil hi chhungkaw thuruk tak taka nih avangin college lama ka thawhpuite pawh ka hrilh ngam ngai lo. I hriat angin pa induh leh chapo ve tawk tak ka ni, thla khatah cheng 80,000/- ka la lut a, ka nupui Makimi hi a nu leh pate fa neih chhun tak meuh a ni a. Kar hnih liam ta khan Sairangah leng khawthawng turin gypsy in an kal a, lawngleng derthawng deuh hlekah an lo chuang fuh hlauh nge ni, vanduai thlak tak maiin an tuiah an tla hlum a, an ruang pawh tun thlengin hmuh a la ni ta lo. Tichuan, in leh lo ram zawng zawngte chu ka nupui kutah a awm ta vek bawk a. Kan damchhung eikhawp na na na chu a, a huphurhawm loh viau a ni.

Kei hian Aizawlah inhmun nghet ka nei lova, miin luaha khawsa ka nia, kan khua chu Champhai a ni, heti hi kan nih tak avangin Makimi nu te in lamah kan insuan lut ta a. Heta tang chiah hian thil mak tak mai, tuna ka rawn pan tak nachhan che hi a rawn intan ta a ni,kan nu phei chuan engmah pawh a hre ve lo, a thlabar ka hlauh avangin hrilh pawh ka hrilh duh lo law law hrih a ni,” Prof Sangliana chu a thaw huai a, A sikret zuk lai chu ling huam khawpin a han hip kawk a, ngaihtha vak lo hmel hian a han thaw chhuak hak a.

“Eng thil chiah nge thleng a?” Tluangpuii chuan zawhna a sawt fimkhur zual sauh a.

OLD MAN AND WOMAN
“Ka hmuh hmasakber zan chu kar kalta zirtawp zan kha a ni, zan mut hnuah, inlengkawmna pindan tukverh inkalh nghet lo a awm ni ngei tur a ni a in vaw ri leh bur thin a, hmehen ka la a, tukverh chu kalh ngheh tumin ka va pan a, chutih lai chuan tukverh bul lawkah chuan pitar leh putar sam tuak var deuh bem bum, thinrim deuh a min lo melh tang hru mai hi ka va hmu thut mai, hlau bak lengin kan nupa nutna lam ka pan a, rizaiin ka inkhuh a, ka khur ka khur mai a, kan nu lah chuan engmah a hre ve si lo.”

“In in luah thar hnuah bungrua tih danglam in nei nasa em?” Tluangpuii chuan a phur hmel zia chu thup hram hram a tum a.

“Kan nu tih vel kha a nia, eng eng emaw kha chu a thlak danglam nual ang, pitar leh putar chenna tih takah a hlui thing ve deuh tawh a, chei kha a mamawh ve deuh tawh reng reng a ni.”

“Rem in tih chuan zanin chu inlengkawmna pindanah chuan ka lo riak ang e.”

“Rem ti teh reng mai, rawn riak mawlh rawh, kan nu pawh a lawm khawp ang,” Professor chu a ding chhuang a a permanent card a pe a, “Ti khan i rawn zawng hmu chat mai ang,” tih pahin a chhuak ta a. Pawn lam chu a thim pa ar ek a ni tawh. Thla eng rawn chhuak tan tir chu chhum dum tur deuh ngun hian a hliah thim khup a. Ruah sur mai tur niawm takin boruak a inmung a. Professor chuan a nihliap ken lai chu a han kap parh a. A nui suk a. In lam panin a haw ta a ni.

THINK
Pitar leh Putar hmel tih baibaiawm tak tih khan awmzia a nei riau a ni. Tin, Professor ve meuh si, eng vangin nge chuti ang pitar leh putar naran mai mai hlaua a khurh chhiat mai.

Internet a ti nung a, kum 2019- a Aizawl khawpui chhunga inkang nasa zual ho thlalak leh an chanchin kim tawi inziakte chu a chhiar thla dan dan a. Rei lo teah a mit la deuh bik pakhat chu a hmu ta, chu in chu kum 1987 a sak a ni. In mawi tak hmanlai style deuh a sak, pangpar mawi tak takin a huai vel, kawt zawl nei nuam tak a ni. A sirah chuan a neitute Pu Neihsanga te nupa thlalak pawh fiah vak lovin an dah lang bawk.

Pu Neihsanga te nupa hmel a hmuh chuan a phu deuh zawk a, kar liam ta maia tukverha rawn dak pitar leh putarte kha an ni tih a hre chiang khawp mai. Professor Sangliana ten chenna pawh he lai hmun hi a nih a ring thei nghal mai bawk. Thil awm zia chu a man tan ruak ruakin a hria a.

Chanchin mak deuh inziak zui erawh chu, heng in neitu te ruang hi hmuh a ni lova, in hi a kang sawp chhe hneh hle a, chanchinbu thenkhat chuan an kang ral vek a nih an rin theih thu an sawi. Mahse, Professor khan in neitu (A nupuia nu leh pa) Pu Neihsanga te chu tuiah an tla hlum ni khan a sawi mauh mai si. Thil dik lo zawng a awm ngei a ni. Chanchinbu hlui lamte chuan, kha in atanga meialh a chhuah lai khan, in chhungah in neitunu leh pate hi an awm a, mei hian a kang hlum niawmin an sawi deuh vek si.

Eng vangin nge Prof.Sangliana khan Sairang lamah an awm a tih tlat thung si. Thil ni thei leh ni thei lo te uluk takin a buk kual a. Chanchinbu lam emaw Professor zawk emaw chuan dawt an sawi tihna a ni ngei mai. Chanchin chiang zawk hmuh beiseiin a han en zui a. Mahse, thil bengvarthlak dang engmah inziak a awm lem lo.

THE DARK NITE
Professor Sangliana te nupa chu an mu tawh; inlengkawmna pindanah chuan Tluangpuii chu a mu meng kar a, thil mak tak tak a suangtuah kual a. Zan dar 12 rik dawn hnaih chuan tlemin a lo chhing ve sek a ni mai thei, tukverh bula thawm han ri det chuan a kai harh hlawl a. A thil hmuh chu a rapawm kher mai. Pitar leh putar sam tuak bum tawh mai, thisen nei lo tih hriat taka dang bam mai, meng lian kel kawl. Kawr fual var tluan ha ve ve an ni. Tukverh inkalh thlap ah chuan an rawn lut tlang a, an kal pawh a ni lo va, an thlawk pawh a ni chiah lo. Thlifim ang maiin an rawn leng lut del del a ni ber mai.

Tluangpuii chu a inti huai lui a, “Ka Pa Neihsang, thil zawh duh che ka nei a, khawngaih takin min chhang thei ang em?” a aw khur chu thup a tum hram hram a. Putar zawk chu tlemin a rawn tawlh hma deuh a, sawi duh a nei ngei tih chu a landan chuan a ti chiang hle mai.

“Bawihi, eng nge i hriat duh chu min zawt ta che?” a rawn ti ve ta a.

Tluangpuii chuan dam thlap hian, “He in hi nangma hal a ni lo tiraw?”

“Bawihi, engvang tehlulin nge keima kut kawih ngei a thi leh thau pawlha ka sak ka in chu ka hal ngawt ang le?”

“A nih leh he in a kan lai hian in nupain inchhungah in awm em?”

“Awm lo, lei hnuaiah, ka nupui nen a nung chunga phum kan ni.”

Tluangpuii mak ti lutuk chu a phu deuh zawk a, “Professor Sangliana khan kha tih lai khan Sairangah lawngin in chesual niawm in a sawi si a.”

“Dawt a ni chu, kha mihring Professor Sangliana thil ruahman vek kha a ni. Kan nupain min sawisa a, inhnuaiah lei a laikhuar a, tah chuan a nung chungin min phum a, tichuan in hi a hal zui ta bawk a ni,”a nupui chuan lungchhe takin a pasal darah chuana rawn kuah a.

“Aw le, ka tiam a che u, he Prof. Sangliana hian a phu tawk hremna chu a hmachhawn mawlh ang, In ruang chu tunah pawh a la awrm reng ang tiraw?”

“Awm reng, Mami i chungah kan lawm e, Sanglianan an chantawk rorelna a hmachhawn hma chu ENG ( Light) ah kan lut thei lo a ni. Min rawn hre reng ang che,” an ti a . An tham ral ta riai riai a.

ONE YEARS LATER
Professor Sangliana thil tih dik loh zawng zawng chu chhui chhuah vek a ni a, Case rip tak awrh tir a nih bakah a thiamna nei zawng zawngte pawh a theih chen chenah hman chhuah theih loh tura hren beh a ni ta.

A nupui Makimi erawh chuan an in chu a luah zui zel a; mahse, eng harsatna mah a rawn thleng leh ngai tawh lo a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)