SOUL CHANGE BY Puitea Tuallawt

[Ngaia]

SOUL CHANGE

“You may say i’m a dreamer,
But i’m not the only one,
I hope someday you’ll join us.”
-John Lenon

INCIDENT
Zan dar sawm pakhat a ni, Rangvamual atangin taxi pakhat hi chak takina lo tlan chho mek a. Driver Rodingliana leh passenger pakhat Thansanga chiah an chuang a, zu hnathawhin an zung zam a fan hneh tawh avangin an ti ti tui bawrh bawrh hle a. Driver chuan kar kal ta mai khan Venghlui lam nula hmelchhe lo zet mai Mabiaki a neih thu leh, a passenger Thansanga pawh chu nupui nei ve tawh tura a duhthu te sawi puiin a phul hlut a..

Sairang kawng lei tlahniam an tlan lut chiah tihin taxi ke hnung veilam chu a vir kual nawk a, ‘leh’ pawh ti hman lovin kawng thlang lamah taxi leh a mi chuang pahnih te chu a biling a balangin an lum vir thla ta nawk nawk mai a ni. Zan rei lam ni tawh mah se, a thawm a rin em vangin Hunthar Veng tlawmngai pawl ten theih tawp chhuahin an buapui nghal a, taxi chu a chhe hneh viau a, driver leh passenger pawh biak tlak theih an ni lo.

Motor neiin an motor an rawn thawh a, miruang pahnihte chu rang takin damdawiin lamah an phur chho nghal a. Mahse, chhan tlak an awm tawh lo. An ruang bawihsawma an buaipui mek laiin Thansanga (passenger) chu a lungphu an hmu leh ta phut mai a. Oxygen te pein doctor leh nures ten uluk tak leh chhan him ngei tumin an buaipui nghal a, beisei angin hma chu a sawn chak vak lo naa, that lam chu a pan hret hret zel ni chuan a lang.

WAKE UP CALL
Tluangpuii muhil chu chiang zetin a rawn harh hlawl a, thawm a han ngaithla a, a thenawm lawka a thiannu Mabiaki tap hawm hawm ri chu hai rual a ni. Khum atang chuan a inperh tho nghal awt a. Thawmhnaw remchang, lum lam deuh hain Mabiaki te inlam pan chuan a tlan phei nghal a.

Inchhung a luh rualin thil awmdan chu a hre thiam nghal mai, hmanni lawka a neih, a chhungten an remtih vak loh thu an sawi pawh pawisa phal lo va, a neih Rodingliana chuan mihring a lo tling zo ta lo a ni, a va na dawn teh lul em. Thinnu nih manah Mabiaki bulah chuan a zu thu thla ve a, a mittui tla zawih zawih chu a dang zo bik lo a ni.

FOUR MONTH LATERS
Mabiaki chuan tukverh parda kar atangin pawn lam chu a han en ru zeuh a, a la thu reng mai, a thut dan pawh a ngai reng a ni. Ruah phingphisiau a sur seng seng a; mahse, chu pa hmelah chuan ruah a sur a ni tih hre awm hmel pawh a lang lo.A mizia ngeng lutuk chuan a pasal thi ta te pawh a hriat chhuah tir rum rum hial a ni.

Hetiang hian he pa hi nileng zankhua mai hian helaiah hian a rawn thu ziah mai. Ngawi teh, kar thum lai a ni hial tawh ang. Eng nge a duh ni ang? Inchhungah rawn luh a tum ngai bawk si lo. In lam chu a rawn thlir awl lo va, Mabiaki a hmuh phei chuan hlim hmel leh hmuhnawm ti hmel hi a pu thin. Chutianga a awm takte chu Mabiaki chuan a hlauh phah sawt zawk si.

Cell phone a ti nung a, “U Tluangpui, a thutna ngaiah chiah khan a rawn thu leh tawh, kei zawng ka hlau em mai, a hmelte lah khu a ser rang neng nung mai si, rapthlak ka tih zawng tak mai a ni. Min tanpui dan ngaihtuah teh, hei chaw hmeh lei tur tak ngial pawhin ka chhuak ngam tawh lo.” a ti a. A thlaphan zia chu a aw ri atang pawhin hai rual a ni lo.

“Lo hlauthawng suh ka rawn kal ang e.”

“Ka lawm lutuk u Tluangpui.”

THE SOLUTION
Parda kara a nupui, a hmangaih ngawih ngawih Mabiakin hlau thawng tih hriat taka a rawn bih thla dek dek thin te chu a mit sirin a hmu ru reng. Engati nge thla hnih khat emaw chauh an la innei si a, heti ang a, a lo phatsan tak mai le? Mabiaki tih hming ringawt pawh chu a tan damna tham a tling a, a hmangaih a, a nunna ai pawh a a hmangaih zawk daih a ni a sin.

A lam pan hmeichhe pakhat lo kal chu beidawng takin a lo thlir reng a; mahse, Mabiaki a ni tlat lo.

“Ka pu, hetah hian eng nge i tih min hrilh theih em?”

“Engah nge ka hrilh theih loh ang che, hei hi ka in a ni a, a chhunga cheng mek Biakchungnungi (Mabiaki) khi ka nupui a ni bawk?”

“I hre sual a ni lo maw, Mabiaki pasal chu thla 4 liam ta khan taxi accident-ah a thi daih tawh a lawm?”

“ I hre sual zawk a nih chu taxi ah chuan ka accident ngei a lawm; mahse, hei ka thi hlei nem, thlarau pawh ka ni hek lo, i duh leh ka taksate pawh hi khawih vek rawh, ka passenger kha vanduaithlak takin a thi palh hlauh zawk a ni.”

Tluangpuii chuan kar khat liam taa Mabiakin a ngaihthat loh thu a rawn hrilh atang khan he pa chungchang hi a lo chhui ru tawh. Thil awihawm lo leh mak tak ni mah se, a thil hmuhchhuah chu finfiah a tul tlat a ni. He pa taksa hi Thansanga ni mah se, a ngaihtuahna a rilru leh thlaraute chu Rodingliana (Mabiaki Pasal) a ni tlatin a hria a. Heti ang thil hi Kum 1879 khan Birmingham lamah a thleng tawh. Thil awihawm loh tak ni mah se, a thleng miau si a ni. Eng emaw zawng tak chuan a khawngaih hle a. Mahse, tih theih a nei vak bik si lo.

“A nih leh Thansanga tih hming hi i hre ngai em?”

A ngawi deuh vung vung a, “Thansanga, Thansanga, a hming chu ka hriat hnu a ang riau mai..”

“I hriat hnu a ni ngei ang, a chhan chu nang hi Thansanga zawk kha i ni tlat a lawm Mabiaki pasal nen hian Rangvamual kawngah in accident a, in thi ve ve a; mahse, eng thil chiah nge thleng ka hre lo, nang zawk kha i lo harh leh ta hlauh mai a, mahse, Thansanga ang ni lovin Rodingliana ang zawkin i rawn harh ta tlat a ni, Pawi ka ti khawi mai.”

Thansanga chu indawm kun ngawih a.. “Heti ang thil hi engtin nge a thlen theih, engati nge kei kha ka lo thih zawk loh le. Kei chu mi rethei, civil zurui mai mai ka ni, nupui ka neih awm pawh ka hre lo. Khawngaih takin Mabiaki hnenah chuan min hruai thei ang em.Tuna i thil sawi kha ka awm ve lai ngei hian sawi leh la ka duh a ni,” a ti a. Mabiaki te in lamah chuan an inzui chho dun ta a.

Thansanga chuan Mabiaki hmel chu duh leh thlahlel tih hriat tak hian a en tlawk tlawk a, a tana par ve ngai lo tur pangpar chu.. Zan rei lam a ni ta. Tin zai an rel ta hlawm a,

A tuk vanglaini chanchin bu phek sira thu inziak chu Mabiaki leh Tluangpuii tan chuan thu ngaihnawm a va ni lo ve le.

‘Tlangval Lalthansanga (34) Chanmari west chu a ma inchhungah in awkhluma hmuh a ni. Amah hi mi rilru kim zan lo nia hriat a ni.’