REVENGE BY Puitea Tuallawt

[Ngaia]

THE FAMILY
Ruah sur chuan ban zai a rel hlei thei lo. A tam em avangin han do luih mi pawh niin a lang lo. Khawlai chu a ruak huai a, taxi pahnih khat han tlan leh zauh thin tih loh chu mihring hmel hmuh tur a awm lo.

Khua a thim tep tawh a, ruah chu a baw hawk hawk reng a, vengthlang lam atanga taxi rawn tlan chho mek chu a hmanhmawh hmel hle a. Kawn thlen chhoh dawna concrete in lian tak kawtah chuan a ding dawt a. A hnung kawngkhar chu a inkhawng rawp a, nula pakhat Jeans kekawr rawng da lam tawh leh T.Shirt dum ban bul ha, zin bag liam tak ak hi a lo chhuak a. Inah chuan kawngka pawh kik lovin a lut tlang nghal a.

Inchhungah chuan pa hmel bumro angreng tak, putar kum 65 vel hmel pu hian tlai lam chhuak chanchinbu a lo chhiar mek a. Nula lo lut a hmuh rualin a chanchinbu chhiar lai chu a hma dawhkanah chuan a theh thla a. Mak tih hmel zein a en a.

“Ti nge, i lo haw leh tak mai? In kal daih tawh ang chu ka lo ti a sin,” putar chuan a ti a.

“Ruah sur nasat lutuk vangin thlawhna a thlawk ngam lo va, ka rawn haw leh ta mai a ni, ticket pawh ka refund nghal mai,” nula chuan a ti a, a bag atanga towel la chhuakin a sam huh chu a hru nawk nawk a. Putar chuan, “Chaw pawh i la ei awm si lo,” a ti a. Nula chuan, “Nia, la ei lo, ka ril pawh a tam hran lo, thingpui dawrah ka inhnawh puar a,” a ti a. Chutih lai chuan choka lam atangin nu kum 60 vel hmel pu, ngo lam deuh hi a lo chhuak a, “E khai, Mambawihi chu, engati nge i lo haw leh tak mai, eng nge thil awmzia?” a rawn ti lut a.

“Ruah a sur nasat avangin flight an cancel a.”

“Nia, ruah hi a tam em bawk a ni, a pawi hleinem, naktuk lamah i kal anga a ni mai, ti r’u chaw i ei ang u,” tih pahin nu ber chu choka lamah a lut pheiin, zanriah ei tur a buatsaih nghal sawk sawk a.

In neitupa Pu Lianhrima hi contractor a ni. Nupui neih nachang a hre dawn lo emaw an tih tawh hnuah thingtlang nula senior Sangziki a nei a. Fanu pakhat Zonunsiami(Zonuni) an nei a. Pi Sangziki hi fa neih harsat chi a nih avangin ama nunna atan pawh thil hlauhawm thei nia an hriat avangin doctor te chuan fa dang nei thei tawh lo turin an siam nghal a. Zonuni chauh hi fa an nei ta a ni.

Pu Lianhrima hi contractor hlun a ni a. Sawrkar lam pawhin an duhsak viau a, hna pawh a hmu thei hle a. Aizawl veng pakhat Vaivakawnah inhmn tha tak a lei a, concrete building lian tha hek hawk, chhawng hnih neiin a sa a, a hnuai, kawng an chu dawrkar an luahtir a, anni chu a chhawng chungah an awm a. An chhungkaw member hi pathum chauh an nih avangin an in chu an luah hneh lo hle.

An fanu neihchhun Zonuni chu an duat nupa hle a. An laina hnai thenkhat phei chuan an duat sual ang tih an hlauh pui hial a. Nikum khan Zonuni hian Delhi ah B.A 2nd year a zo a, kuminah final bei turin Delhi lam pan a tum leh mek a. Ruah sur nasa avangin thlawhna a thlawk chhuak ngam lo a, a lo haw leh rih a ni.

KIDNAPPER
A tukah chuan khua a tha ta et awt hle a. Zonuni pawh Delhi lam kal turin a inbuatsaih leh ta a. Lengpui Airport thlengin Taxi a la a, chuan man te a pek fel hnuah Airport bul thingpui dawrah hmawmsawm ei tur lei pahin a thu a, thlawhna thlawh chhuah nan minit 25 vel emaw lai a la awm a ni.

Thingpui dawr kawtah chuan Gypsy dum, hlui lam tawh hi a rawn ding dawt a. Tlangval pathum hi Gypsy atang chuan an lo chhuak a. Zonuni thutna lam chu ding takin an pan phei nghal a.

An zinga te ber, hmui pawrh deuh, sam phirsi sing seng chuan ring leng lawngin, “Misualnu, i chhungte hi min va ti mangang em em ve, khawiah mah i tlan bo dawn lo,” tih pahin Zonuni banah chuan nghet zetin a rawn chelh a, Gypsy lam pan chuan a kai phei dawt dawt a. Zonuni chu a hrilhhai hle mai, a bag pawh a chuh hman lo. Tal chhuah a’n tum dawn a, tlangval pahnih dangte khan a kut lehlamah an rawn chelh bet zi nghal a, tak vak a sawt dawn lo tih a hriat avangin chung mi pathum, tute nge an nih pawh a hriat lohte thu ang chuan Gypsy hnungah chuan a lut ve ta ngawt mai a ni.

A tira rawn chelh hmasa bertu pa te hmui pawrh deuh khan Gypsy chu a tinung a Airport chhuahsan zawngin a khalh zui nghal a. Tlangval pahnihte khan a hnungah Zonuni chu an veng a, hruizen fei hmel tak hian a kut chu an hnungkhirh zui mawlh mawlh bawk a.

A bang bo tak zet mai. Heng mi pathumte hi tute nge an nih, a pain a rawn tir em ni ang? Nge, misual, mi ruk bo ching em ni zawk? A tu amah lah chu a hmelhriat an awm lo va, tunhmain a hmuh ngai awm pawh a hre hek lo. Rilru chiai zetin, “Hei, eng nge a awm zia, engtia min tih nge in tum? tute nge in nih, min hai a ni lo maw?” tiin zawhna a han siam duah a.

An pathum zinga a te ber, motor khalhtu chuan, “Kan hai lo che, zawhna min zawt tawh suh. I tawng leh chuan i hmui kha ka hlep a ni mai,” a ti bung nghut a. Zawhna dang han zawh leh ngamna chi rual a ni ta lo. Ngawi rengin a chunga thil lo thleng tur chu a nghak ta ngawt mai a ni. An tlan zel a, amah vengtu tlangval pakhat zawk chuan bamdana dum hi a ipte atangin a phawt a, Zonuni mit chu a rawn tuam sak ta a. Zonuni hlau lutuk chu a khur dawt dawt tawh a. Eng nge a chungah thleng dawn ta le? Heng mi pathumte hi a pa mi tirhte chu an nih hmel ta lo tawp mai. An pawngsual rawn dawn nge, an that dawn zawk. A mittui a tla zawih zawiha a a tiril a khur dar dar a.

Lengpui khaw chhung an chhuahsan tawh tih chu a hre hman; a mit an rawn tuamsak tak avangin khawi lamah nge an kal zel tih chu a ngaihtuah thial tawh lo. An tlan zel a, kawng kawi pawh vawi 5 vel lai an tlan tlang hnuah motor chu a insawh ta bauh bauh a, metal road ni lo, kawng mumal vak lo an zawh mek tih chu a ngaihruat thiam ve mai.

Chuti ang kawng mumal lo zet chu minit 10 vel bawr an zawh a, motor chu a ding ta a. Tlangval pahnihte chuan Gypsy atang chuan dim baksak lo hian an hlang thla tawp a, a mit an tuam tlat avangin khawiah nge an awm tih Zonuni chuan a hre thei lo.

THE ECHO'S
In chhungah an lut ta tih chu a hrethiam a, thuthleng pakhatah an thuttir a, a mit an tuamna chu an phelh ta chauh a. A mit avai deuh chum chum a, thil a hmuh fiah theih veleh inchhung awmdan chu a han enkual a. In lian lo tak a ni. Pindan hran pawh a awm chuang lo va, a dinglamah tui dehna a awm a, dawhkan bal zet, fit 5 bial vel hi a awm bawk. Dawhkan chungah chuan Gas thuk a awm a, cooker litre 3 dawng vel tur hi gas ah chuan a in chhuang a. Tui dehna ep chiah bangah chuan almira hlui zet hi a inhung sawi bui a. Chu almira chhungah chuan thleng leh no tlem a zawng a inrem ve that a. Inchhung han luh chiah vei lamah chuan mutbu ni awm tak hi hnawk nuaiin a let phung a.

Bang chhaklamah chuan thing thuthleng pahnih a awm a, chutah chuan tlangval pahnihte kha an thu a. A te ber, motor khalhtu kha chu a ding thung a, a han awm dan velah chuan a meizanghlaptu ber a nih hmel hle. Inchhung zimtea vei kual sek chungin Patea chuan, “Kei hi Rosiamliana ka ni a, Siamte tiin min ko thin, hei ka thiante pahnih hi Zirsanga leh Davida-a an nih hi,” a han ti mawl tlawng ringawt a.

Zonuni chuan, “Engati nge heti anga min tih? Delhi a kal tur ka ni a, in pawi ka sawi ka hre miah si lo..” a ti a, a manganzia chu a awki atang pawhin hai rual a ni lo.

Rosiamliana chuan, “Kan pawi maw? Nia, nang chuan i sawi lo, kan pawi i sawi lo reng reng nula, kan pawi sawitu zawk chu i pa Lianhrima saw a nia,” a ti a. Thinrim tih hriat takin a tawng chu a sehchilh deuh nawk nawk a.
“Ka pa maw, a va pawi ve, engtin nge in pawi chu a sawi a?”

“I hre duh tak tak em ni? A nih chuan ka hrilh ang che. Saw i pa duhtak, mi duhampa sawn, keini pathum hi mualpho takin min siam a, kan hna atangin min ban bawk. Min hmusit a a ni. A chunga phuba la ngei turin kan intiam a, tunah hian phuba chu nangmah kaltlangin kan la dawn a ni,” Rosiamliana chuan nuam a tih hmel hle.

“Engtia min tih nge in tum, min that dawn em ni?” Zonuni chuan a chan chauhzia chu a hre chiang ta khawp mai. Heng mi pathumte hian a chungah zahngaihna lantir an tum dawn miah lo tih a hre chiang ta.

Mr. LECTURER
A Gypsy chu a in kawtah a dah mai thin. A neih tirh ata tuman an la ru bo ngai lo. Office kal na’na a hman thin a ni. Mi ta hlui an lei mai ni mah se, a thar tluk deuhthaw a la ni a, kum 6 lai chu harsatna e em tawk lovin a lo nei ve tawh a. Mahse, tunah hian a Gypsy chu a dahnaah hmuh tur a awm ta tlat lo.

Niminah dar 4:30 ah office a bang a, amah ngeiin a khalh haw a, a dahna thinah a dah ngei bawk, a hre chiang lutuk. Mahse, tunah a awm ta tlat si lo, misualin an ru bo em ni ang? Engtia tih chi nge ni dawn? A thenawmte inah a va lut a, a motor a bo thu leh an lo hmu mial em tih a va zawt; mahse, a thenawmte chuang engmah an hre lo.

Police station hnai berah kalin FIR a va thehlut ta a.

Lalthanpuia hi Lungleiah a piang a, unau pathum zinga a tlum ber leh mipa awmchhun a ni. Mizoram University atangin M.A a zo va, mahni intodelh tum tlat mi a nih avangin a chhungte bulah pawh awm lovin, amahin Aizawl Dawrpui Vengtharah in a luah a.College-ah lecturer hna a thawk a, mi inrenchem thiam tak a nih avangin a hlawh chu a kham khawp tawk hle a ni. Hna a hmuh veleh a pain a lo tiam tawh ang ngeiin Gypsy a leisak a. A dim thiam bawk a, kum 4 lai a neih hnuah pawh a la in fit tha zak zak hle a ni.

A motor ber a hmuh zawh tak tlat loh avangin taxi a hman a ngai ta a. A hnathawhna hmun a thlen hnu pawhin a rilru a la buai khawp mai. Police- te khan an zawng hmu zo ang em? A tu kher kherin nge lo ru bo ni ta ang le? A hnaah pawh rilru a pe hleithei lo. Han zawn mai dan tur lah a bangbo riau mai si.

A hnathawhna atanga a haw pah chuan khawlai motor kalte chu uluk takin a en a, a motor kha chu ralkhat atang pawhin a hai dawn lo. An lo inchulnel rei ve tawh tlat. A motor awm ang reng hmuh tur a awm si lo. A chaw ei pawh a tui lo. Lunglei lama a chhungte pawh a la hrilh miah lo tih a han hre chhuak leh hnuhnawh a.

A pa han hrilh chu a hreh khawp mai: mahse, a thiam loh em em pawh a ni bik lo va, a pa pawhin a hauh vak chu a ring lem lo. A va phone a, a pa chuan, “A va zia lo thin ve mawle, police lam te i hrilh tawh em?” a ti a. A hrilh tawh thuin a chhang a. “Lo lungngai suh u, kan zawng hmu vatin ka ring,” a ti thla ve ngawt a, an hmuh mai erawh a ring chiah lo.

Zahan pawh a mu hlei thei lo. Police ho lah chuan engmah an la rawn hrilh leh bawk si lo. Khawiah tak chuan awm ang maw? A rawng te kha an lo thlak hman vaih chuan a pawi khawp ang le. Chanchinbu lamah te pawh chhuah a that a ring a. A tukah chuan Vanglaini leh Evening Post office ah kalin a motor bo chungchang chu a chhuah tir a. A lo hmu an awm chuan mit var man pek pawh a tiam nge nge, a phone number pawh a dah lang vang bawk.
REVENGE THE SOLUTION

THE RANSOM
Zing dar 8 a ni. Pu Lianhrima chuan thingpui in pahin Vanglaini chanchinbu a chhiar mek a, a nupui Sangziki chuan ei rawngbawl pahin, “Ka rilru a nuam thei reng reng lo mai, heti chen chen min phone lo va a awm mai hi a dik thei lo. Khaw nge an thlen tawh tih te tal pawh min rawn hrilh awm a nia. Phone let ka tum lahin a ring zo thak zel, a phone a ti bo emaw ni zawk ni?” tiin a pasal chu beisei nei deuh hmel puin a en a.

Pu Lianhrima chuan, “Hmeichhia hi zawng in thla hi a phang hma thin lutuk, ngaihtuah duh suh ka tih kha. A thlen thlak hun law lawah rawn phone a tum te pawh a niang chu,” a ti a, chanchinbu a chhiar zui leh nghal mai a. Chutih lai chuan phone a rawn ri ral ral a, Pi Sangziki chuan hmanhmawh takin phone chu a la vat a, a fanuin a rawn phone a nih tawh ngei a beisei a.

Phone-a rawn betu aw chu a hriat ngai a ni ta hauh lo mai. “Hei hi contractor Pu Lianhrima in a ni em?” Tu nge min rawn chhangtu hi, a nupui em ni i nih?” a rawn ti a. Pi Sangziki chuan, ngaihtha zan lovin, “Ni e, a nupui ka nia, eng nge ni ta?” a han ti a. Pu Lianhrima chuan a chanchinbu phen atang chuan a nupuiin phone a chhang lai chu a rawn en a.

“Eng a?Mambawihi inkutah a awm maw?” Pi Sangziki chu a tap titih tawh.

Pu Lianhrima chuanm “Khawi maw , keiman..” tih pahin a nupui kut atangin phone a la a. “Eng nge ni ta, eng nge in duh? Kei hi Lianhrima chu ka nia,” a han ti nghal a.

Phone-a rawn betu chu ngeiawm takin a nui a, “Kan duh chu cheng nuaih sawm lek a nia,” a rawn ti bung nghut a. Pu Lianhrima chuan a ngaihna hriat loh hmel takin, “Cheng nuaih sawm i tia law? chuti ang zat zat pawisa ka nei hlei nem. A hrim hrim thuah eng vang ngawtin nge maw chuti ang zat zat pawisa ka pek ngawt ang che le? Tu nge i nih, i va zak lo teh chai ve!!” a ti a. A ngaih erawh a tha vak lo.

“Min pek nachhan tur maw? Ka’n hrilh ang che aw putar, i fanu neihchhun Zonunsiami kha kan kutah a awm tlat a lawm. Ti chuan i hrethiam tawh em?” a awki ah chuan elsen ri a tel chiang hle.

“E he, a tu phiangsen nge maw i nih le? Mambawihi in kutah a awm a maw? en teh ka hrilh ang che, tu nge i nih chu ka hre hauh lo;mahse, ka fanu kha i kut hmawr pawhin lo khawih suh aw,” a ti a. Pu Lianhrima ngaihtuahna chu a buai ta map mai le! A fanu neihchhun chu misualin an rubo a ni ngei ang? cheng nuaih sawma khul chhuah a tul dawn em ni ta?

Phone a rawn betu chuan, “Police i pun buai a nih vaih chuan nungdamin hmuh inring tawh suh ang che. Cheng nuaih sawm chu Vaivakawn Field pavillion-ah min rawn pe ang che. Chutah chuan mi pakhat a lo awm ang, i hmu anga i hre thei mai ang,” a rawn ti a. Pu Lianhrima chuan, “Mambawihi chu inkutah a awm ngei a ni tih engtin nge ka hriat theih ang? dawt hmangin min bum mai mai a ni lo maw? nangni ang bum mai mai rual ka ni lo a nia aw,” a ti a.

“Kan bum lo che, i fanu duat lai chu amah ngei han be ta che.”

Zonunsiami aw a lo ri a, “Ka pa, an sawi ang chuan ti mai rawh...hemite hian min thah pawh an hreh lo...” a tawp zui a.

“Tikhan kan bum leh bum loh che chu i hre tawh ang ti raw, ka’n sawi nawn leh ang e. Vawiin tlai dar 5:30 ah Vaivakawn field pavillion-ah pawisa chu rawn keng la; a kim thlap tur a ni ang. Tin, police rim kan hriat vaih chuan i fanu ruang i hmu nghal bawk ang!” Phone chu a thi ta hmiah a.

Pu Lianhrima te nupa chu an in en ngawt ngawt a, sawi tur an van dun kher mai. Pi Sangziki chuan, “Eng nge an sawi? Mambawihi chu an ru bo tak tak em ni?” a han ti a. A tawng khur dar dar tawh a. Pu Lianhrima chuan a lu a bu nghut a, “ Cheng nuaih sawm an phut a nih awm chu, police kan hrilh chuan Mambawihi chu an thah tur thu an sawi bawk. Duhthlan tur kan nei tlem khawp mai,” a ti chuai raih a.

Hmanhmawh takin an Safari car chu a tinung a, bank lam panin a khalh chhuak ta nghal a. Engzata tam pawh ni se, a fanu nunna tur a nih phawt chuan pek mai a ngai dawn a ni. Police han hrilh mai chu a tum deuh uk naa, misualho khan an thusawi kha an hlen duh tak tak mai ang tih rinna a neih avangin an thu awih phawt chu tih tur awmchhun niin a hre ta zawk a ni.

DISMAY
Zonuni chu a chau tawh hle a, thuthlengah an la phuar bet reng a, zanah pawh a muhil miah lo tluk a ni. A pa chuan amah tlanchhuah nan chuan engzat pawh pawh pek a huam ang tih a ring a, vawiin lamah chuan an chhuah zalen tawh ngeiin a ring bawk.

Cheng nuaih sawm chu tam a ti hle a. Mahse, a pa chuan a duh phawt chuan a nei thei ngei ang tih a ring a ni.

Amah ru botu zing an hotupa ber niawm; a pa te ber Rosiamliana chuan eng emaw a han sawi a, eng nge a sawi chiah chu a hre ve pha lo. A chanchin an sawi tih erawh a rin hriat thei, a kut phuarna chu an phelh a, chhuatah an mut tir a, a thawmhnaw chu an phelhsak tan ta mai a.

A mangang kher mai. Heng misual pathumte hian him dam taka chhuah tir an tum dawn lo tawp tih a hriat ta.”Min khawih suh u, khawngaih takin min khawih suh u!” tiin a au a. Davida chuan, “Ngawi mai mai rawh,” tih pahin a kaah chuan a kekawrte ngei chu arawn rawlh lut a, a thawmhnaw chu an phelh ruak vek tawh a, saruak ngalngatin a awm ta. Zirsangan a lo kuai dawrh bawk a. Rosiamliana chuan a mipatna chu Zonuni chungah chuan a hmang ta a. Theihtawp chhuahin inven tum mah se, mipa tha zawng a hneh ngang si lo.

THE RAPE
Rosiamliana’n a thawmhnaw a hak fel hnuah Zirsanga a che ve leh, a tawp berah David a chu a che bawk a. Zonuni chu a chau raih raih kher mai, a mittui a tla zawih zawih a, a hmaia an benna avangin a biang dinglam chu a vung deuh bur a. Nikhua pawh a hre mumal mang tawh lo. Engkim mai chu mumang ang ruaiin a hre tawh a. Amah rubotu mi pathumte chu eng thuah emaw an inhnial niin a lang. An awki pawh a ring sawt viau mai.

Zirsanga chuan a rawn pan phei a, a nghawngah a rek ta a, Zonuni chu a tal aih aih a, Zirsanga chuan a rekna telh telh a, a thaw chhuak hlei thei tawh lo, a vai riai a, inchhungte chu vir mup mupin a hria a, a leng awrh awh a, a thim ta vek a.

Zirsanga chuan Zonuni chu a han en a, nichin lawka minung kha tunah chuan mitthi a ni ni ta reng mai. Mi pathumte chu an ngawi thap a, suahsualna kawng zawh thin ni mah se, thihna meuh chu an nel bik lo a ni. An hlauthawng tih pawh an hmel atangin hai rual a ni lo.

Rosiamliana chu a rawn harh chhuak hmasa ber a, “Khai.. Zir, David, kan chet vat vat a ngai a nia. Rang takin he in hi kan chhuahsan vat a ngai. Tlaiah pawisa lak tur kan neih kha. Pawisa kan neih veleh Guwahati lamah kan chhuk thla nghal dawn nia. Tiru kan sulhnu awm thei ang chi zawng zawng hi tifai phawt teh ang u,” a ti a. An pathum chuan an che ta sang sang a, an meizial zuk bungte leh an sulhnu chhui theih awm ang chi zawng zawng chu an thian fai vek a. Zonuni erawh chu tuman khawih an tum tawh lo, a awm ang ang chuan an kalsan a, in chu an chhuahsan ta a.

FOR WAIT
Tlai dar 5:20 a ni. Pu Lianhrima chuan bag dumah pawisa a dah a, a car chu Vaivakawn field pavillion bulah chuan a hung a. Sana a en zauh zauh reng a. Unau hmel hai, thim pa ar ek a ni tawh, dar 5:30 minit thuma a pelh ah Kanan lam atangin Gypsy dum a rawn tlan a.

Gypsy chu Pu Lianhrima car bul chiahah chuan a ding a, a hma kawngkhar chu zimtein a rawn inhawng riai riai a, Pu Lianhrima chuan tute nge an nih hriat ngei tumin a en lui deuh ngial a, an hmai an tuam tlat avangin tute nge an nih a hre mai thei lo. Gypsy atanga hmaituam lo chhuak chuan, “Pawisa chu!” a rawn ti tawng a.

Pu Lianhrima chuan, “Ka fanu min pek phawt loh chuan ka pe dawn bik lo che u,” a ti ve tlat a. Hmaituama chuan, “Pawisa chu min pe rawh, i fanu kan dahna chu kan hrilh ang che,” a ti a.

Pu Lianhrima chu a ngaih a tha lo hle a;mahse, tun dinhmunah chuan heng misualte hi a fawng vuantu an ni tlat si. An sawi anga a tih zel mai loh chuan a fanu nunna atan a hlauhawm thei dawn tlat a. Pawisa chu a pe a, “Khawiah nge ka fanu chu?” a ti nghal a. Hmaituama chuan, “Kan motor hi zui rawh,” a ti bung nghut a. Gypsy chu a tlan zui nghal a. Pu Lianhrima chuan a umzui ve ta nghal a.

Sairang kawng lamah an tlan thla zel a, khua pawh a thim chiang tawh hle. Sairang thlen hma deuhin Gypsy chu a ding a, kawng thlang lam deuhah chuan in pakhat hlui tawh tak mai hi a mal din a. Gypsy atang chuan hmaituam pakhat hi a lo chhuak a, Pu Lianhrima hnenah chuan chulai in mal din chu a kawhhmuh a, Gypsy ah chuan a lut a, an tlan zui leh ta nghal a.

Pu Lianhrima chu hmanhmawh takin car atangin a chhuk a kawng thlang a in lam pan chuan a tlan thla hlawk hlawk a. Kawngkhar chu a han tlawh hawng thuai a, eng emaw ni hi a pal deuh nawk a. Lighter a han talh eng a, saruak ngalngata a fanu kawisawi zeta chhuatlaia lo let hlawm reng chu a hmu ta a.

REVENGE THE RELOAD

THE WITNESS
Chanchinbua Gypsy bo chungchang a chhuah tukah Thanpuia chuan phone call a dawng a.

“I motor bo chu i la hmu lo em ni?” phone a rawn betu chu hmeichhia a ni.

Thanpuia chu tlemin a han hamhaih deuh a, “Aw....la hmu lo, a vang khawp mai,” tiin a chhang thei hram a.

“Nimin piah khan ka u zin tur thlahin Lengpui Airport ah ka kal ve a, Gypsy dum chu ka hmu ngeiin ka hria.”

“A number i lo chhinchhiah hman em?” Thanpuia chu a phur tan hle.

“Chhinchhiah lo, eng number nge a nih chu ka hre miah lo.”

“A nih a awm dan i la hriat theih ang ang chu han sawi teh.”

“A dum a nia, kawngkhar darthlalang pawh a dum vek. A hnung ke pahnih a lian tha viau bawk. Thingpui dawra kan thut laiin dawr kawtah a rawn ding a, tlangval pathum an lo chhuak a, kan bul lawka thu hmeichhe pakhat chu hmanhmawh takin an luh tir a, chu hmeichhia chuan a bag a theihnghilh leh nghal. Chu zawng chu ka hmuh dan chu a ni mai. I motor a ni ngei em tih ka hre bik lo.”

Thanpuia chuan a motor a nih ngei a ring a. Phone a rawn betu ang chiah chu a motor lan dan a ni tlat. “Ka lawm e, i hming leh i awmna veng min hrilh theih chuan ka lawm ngawt ang.”

Hmeichhia chuan, “A ngai lo, i motor a nih ngei leh ngei loh pawh ka hre lo. A lo nih palh tak thutin tia rawn phone mai che ka nia. Lawmman lam ka beisei miah lo,” phone a dah nghal daih a.

Rang takin police awmna a pan a. A motor niawm tak Lengpui a an hmuh thu a han sawi a. Police lam chuan, “Kan lo ngaihven nghal dawn nia,” an ti a. Mahse, Police ho chu a ring zo tawh tlat lo. Tun thlengin engmah a la hre lo a nia, a motor bo atangin ni thum lai a liam tawh a. Amah ngeiin Lengpui lam pan mai chu a rilruk ta zawk a.

INVESTIGATE
Artui a kang a, a hma nia chaw thing a ei bang chu a ei a, puar khawp a hmu thuai a. A insiam sawk sawk a. Lengpui lam pan turin motor a chang zui ta nghal a. Lengpui Airport a kal tum nufa a hmu fuh hlauh a, anni nen chuan intumsemin taxi an la a, Lengpui chu a pan ta a.

A motor ang deuh hmutuin a rawn sawi thingpui dawrah chuan a lut a. Dawr neitu nu valai tak, hmai hlai phek phawk, hang lam aia ngo lam pawl zawk mah chu a pan phei a.” Ka pi, niminpiah lamah khan i dawrah hmeichhe pakhatin a bag a theihnghilh em?” tiin a han zawt ta tawng a.

Dawr neitunu chuan, “ Theihnghilh e, a va lawmawm ve, amah kan hre si lo a, hei kan la dah tha reng a lawm. A rawn lam leh thuai turah kan ngai a, a reh ta daih si a,” a ti a. Thanpuia chuan, “Ka pi , he bag theihnghilhtu hi i hmu ve em? a ti a. Ani lah chuan, “Hmu awm teh e, nula, tleirawl te a ni. Kum 20 vel hmel pu, a hmel pawh a chhe lo reuh khawp mai. I nau em ni, nge i bialnu zawk?”

“A ni lo ve ve. Ka hriat duh zawk chu kha hmeichhe rawn hruaitu tlangval pathumte zawk kha an ni. Gypsy dumah an chuang tiraw?”

Dawr neitunu chuan, “Aw niin ka hria. Hmeichhia kha an hau deuh bawrh bawrh a, ‘khawiahmah i kal dawn lo i chhungte i ti mangang lutuk’ te an ti ni tain ka hria, motor ah khan an kai lut a,” a ti a. Thanpuia chuan, “Khawi lam nge an pan i la hre thei em?” a ti nghal var a. Dawr neitunu chuan, “Aizawl lam panin an tlan let chho ta niin ka hria. Eng nge thil dik lo deuh a awm em ni? an in tih dan bawrh bawrh kha ka ngaih a tha vak lo a. A bag theihnghilh avang khan ka au zui a, an hre pha tawh si lo va,” a ti a.

Thanpuia chuan Bag chu a han hawng a, a chhungah chuan thawmhnaw tlem a zawng leh lehkha pawimawh hmel tak tak a lo awm nual a, Bag neitu hriat theihna tur awm a han zawng a, studen ID card a hmu ta a. Chutah chuan Zonunsiami, Vaivakawn , Aizawl Mizoram, tih a inziak a, passport size thlalak a chuang vang bawk a.

Thanpuia chuan, “ A chhungte hnenah ka han pe ang e, zawn chhuah a harsain ka ring lo,” a ti a. Dawr neitunu pawh chuan, “A tha khawp ang chu, an lawm viau ang. Keini tan lah han tih zui vak ngaihna a awm si lo,” a ti ve mai bawk a. Bag chu a ak a, taxi-in Vaivakawn lam chu a pan ta a. Bag neitu hi a hmuh ngat chuan a motor bo chu a zawng hmu thei maiin a ring a ni.

Vaivakawn chu a awmna veng thenawm mai a nih avangin Zonunsiami te in zawn chhuah chu harsa vak turah a ngai lo. Tlai lam dar 4 rik hma hretin Vaivakawn chu a thleng a, kawngsira kuhva dawr nghaktu hnenah chuan Zonunsiami te in chu a han zawt a, kuhva dawr nghaktu chuan mak tih hmel deuh hian Thanpuia chu a en a, Zonunsiami te in chu a kawh hmuh ta a.

Zonunsiami te in a va thlen chuan a ngaih a tha lo hle. Chu inah chuan mitthi an awm ni ngeiin a lang tlat mai. Tumah hriat a nei si lo va, va pawh ngawt pawh chu a hreh deuh viau a; mahse, Zonunsiami bag a ken chu pek ngei a tul si. Tim deuh duiin inchhungah chuan a lut a, inleng eng emaw zat chu an lo la awm a, bangrelah chuan mitthi pangpar thahnem tham tak hi a in khai dul a. Mut pindan leh inlengkawmna pindan daidangtu bang te chu thiah darh vek a ni. He inchhungah hian mitthi an awm a ni ngei mai le!

HOUSE OF PAIN
Mutna pindan ni awm tak kil sir deuhva thu nu upa lam, tah nasat avanga mit bui deuh chuk chuan Thanpuia bag ah lai chu a rawn hmu ta a, rang takin a ding chhuak a, Thanpuia chu a rawn pan phei nghal ruak ruak a. “Kha kha, khawi atanga i neih nge?” tiin bag chu a vuan nghal chawt a. Thanpuia chuan Zonunsiami ta ngei nia a hriat thu leh a motor bo a zawnna lama a hmuh a nih thu te a sawi a.

Thanpuia thusawi avang chuan inchhung a mite chu an ri ta hlut a, rei lo teah police pahnih an rawn lang nghal bawk a. In hnuai dawr lamah an chhuk thla a, in neitu fanu a thih avangin dawr luahtute chuan dawr an hawng lo a ni. Pu Lianhrima, Thanpuia leh Police pahnihte chuan in hnuai lam chu an pan thla a. Dawr chhungah chuan midang chimbuai lohin thil awmdan chu an sawi ho ta a.

Pu Lianhrima chuan a fanu ruang a chhar dan leh cheng nuaih sawm hmanga tlan chhuah a nih dan te, a fanu chu pawngsual hrep hnua thah a nih arion thu te a sawi a, a fanu ru botute chu pathum an nia a hriat thu leh Gypsy duma an chuan thu te chu a sawi bawk a. Thil awmdan an han chuktuah khawmin, Thanpuia gypsy rutute leh Zonunsiami thatute chu mi thuhmun an ni ngeiin an hre ta a ni.

REVENGE :WITH GHOST

THE BAD THE UGLY AND THE SMALL
Pu Lianhrima hnena a fanu awmna an hrilh a, an tlan bo leh hnu khan Rosiamliana te chuan Gypsy chu Sairang thlen hma deuh kawng thlangah an nam liam a, cheng nuaih sawm chu hmun thumah thenin an insem a. Rinhlelh an kai tawh ngeia an inrin avangin an pathuma inkawm zui zel chu him dawnin an hre lo va. An inthen darh ta a.

An inthendarhhnu atanga ni hnih a liam leh chiah tihin Sairang thlen hma kawng thlanga Gypsy an nam liam tak chu police ten an hmu chhuak a. An hmuh chhuah thu chu Thanpuia hnenah an hrilh vat a. Police ho motor hmuh chhuah chu a ma ta ngei a nih leh nih loh fiah turin Police station lam panin a kal ta nghal a. Motor chu a chhe sawp ang reng viau a. Fit sangkhat chuang zet a lum avangin siam that leh theih chi hmel pawh a pu tawh lo. Thanpuia chuan a hmuh rualin a gypsy ngei a ni tih a hre thei nghal mai a, a thinrim kher mai. Police ho lah chuan
tihpalh thil thua hmu chhuak an nih thu leh, motor chu nam liam luih ngei nia an rin thu bak eng vak sawi tur an hre si lo.

THE ANGRY MAN
Motor an hmuh chhuah hnu atanga kar hnih liam hnuah pawh police ho chuan hma an la sawn lo hle a. Chanchin thar a awm leh awm loh ngaihvenin Thanpuia chu Police station lamah a kal ziah a, engmah han puak chhuah tur a awm thei si lo. Motor rutute chu an khuangcher bo hmak mai ni berin a lang.

A khat tawkin Zonunsiami nu leh pate pawh a tlawh zauh zauh a. Upa lamte an ni tawh bawk nen, an fanu chunga thil thleng chu tawrh thiam har an ti hle a. An fanu theihnghilh hmu chhuaktu a nih vang ngawt pawhin Thanpuia chu an ngaina hle a. Thanpuia pawhin Pu Lianhrima te nupa chu a ngaina ve hle a, hun rei tak lo inhre tawh thin ang maiin, an inkawm bawrh bawrh thei a ni. A len chang apiangin riak turin an sawm ziah a, mahse, han riah em chu zia lo deuha a hriat avangin chhuanlam siamin a hnial thin.

Zonunsiami thih atanga kar thum liam hnuah Pathianni chawhnu lam hian Pu Lianhrima te inah chuan a va leng leh a, an ni nupa chuan zanriah ei tur leh riak nghal turin tih tak zetin an lo sawm a. A hmain a lo hnial ngun tawh a, a ni em em lo deuhin a hre ve ta deuh a, chumi zan na na na chu an sawmna pawh pawm ve tha a ti ta a ni.

Pi Sangziki chuan vawksa rep leh arsa a chhum pawlh hluah a, an pathum chuan zanriah tuihnai tak an kil ho a. An ti ti bawrh bawrh bawk a. Zan lamah chuan dar 10 vel thleng TV en pahin an inkawm ho leh a;. Zonunsiami room chu a thih atang khan engmah khawih danglam lohin an la dah a, an fanu sulhnute chu khawih danglam loha a nihna ang anga dah an duh tlat a ni. Thanpuia chuan thuthlengseia mut mai a tum a; mahse, Pu Lianhrima te nupa chuan Zonunsiami pindanah ngei mu turin an nawr tlat mai a. A hreh viau naa, a hnial zo ta bik lo. Zonunsiami khum, fai leh thianghlim taka thleh mam zaihah chuan a mu ta a ni.

LONELY NITE
Khum bul dawhkanah chuan emergency light chhe te a in hung a, chumi bulah chuan Zonunsiami thlalak fuh zet, frame mawi taka siam chu a inhung bawk a.

A muhil thei lawk lo. Mut than lohnaa han mut thut hi chuan heti anga mut theih loh hi a ching ve hrim hrim a. Zing lam dar hnih vel a ni a. Thanpuia pawh chu a muhil tan siar siar tihah thil tla ri bawl hi a han hria a. A harh zawk a. Emergency light chu a han hmet eng nghal a. Zonunsiami thlalak chhuata lo tla bal chu a hmu a, a muthilh hlanin a kutin a lo vai thla palh em ni ang tiin a ngaihtuah a. Mahse, thlalak chu emergency light hnung lama awm a nih tlat avangin vai thlak chu ni se, light chu a tla tel ve ngei ngei tur a ni tlat.

Tlangval hrisel tha tak a ni a, mihringah hian hlauh em em a neih a hre ngai lo. Mahnia in luah hrang ngam ngat a ni ve a, a thinphu han ti rang thei thil a tawn a la hre lem lo;mahse, tun tum zet chu a rilruah hlauhna a awm ve ta tlat mai. Zonunsiami hmanni lawka thi, a thih dan lah rapthlak tak khumah ngei tunah hian a mu a. A khuma a lo mut ve ringawt avangin Zonunsiami thlarau chu a thinrim pawh a ni mai thei a sin. A thil ngaihtuah dan chu a duh lo hle a;mahse, a ti tawp thei mai bik si lo.

Zonunsiami thlalak chu a chhar a, a hmaa a awmnaah chiah a dah leh a. Chutih lai chuan mihring thaw ri a hre ta thut mai. A han ngaithla chiang a. Thaw ri chu a ring tial tial a. A lo hnai telh telh niin a hria. Thaw ri naran mai pawh a ni lo, harsa taka thaw chhuak tawk tawk ri ang hi a ni. Khumah chuan a thu chhuak hlawl a, pindan chhung chu a han melh kual zung zung a. Engmah a hmu si lo.

THE ANGRY GHOST
Thawklehkhatah pindan chhung chu a rawn vawt thut a, a vawh namen a ni lo. Thanpuia chu a khur titih a, rizai chu a nghawng thlengin a pawt chho a, chutih lai chuan pindan chhungah chuan thlarau a rawn lang ta a. A tim uai uai a, a hmulthi a ding sung sung a. Zonunsiami ngei a ni. Thlalakah chauh lo chuan a hmel a la hmu ngai hauh lo, mahse, tuna a hmaa ding mek hi Zonunsiami ngei a ni tih a hre tlat mai a ni.

A hlau kher mai! A rilru tih harh fim a han tum hram hram a, mumang mai mai a ni tiin inhnem a tum a;mahse, a chiang lutuk tlat. Mumang mai zawng a ni tlat lo. Thlarau chu a rawn tawng chhuak ta a.”U Thanpui, min tanpui turin ka duh che a ni,” a ti a. Thlarau chuan a hming pawh a rawn hre nghal tlat mai. A hlauhna chu thup tumin a han intipachang hram hram a,” Eng kawngah nge tanpui i ngaih? Tanpui che chu ka duh lutuk a lawm,” a ti a, a aw chu a khur deuh tih amah ngei pawhin a hai lo.

Thlarau chuan, “Rawng taka min ti hlumtute kha zawng chhuak a, an phu tawk hremna pe tur chein ka duh che a ni,” a ti a. Tunah chuan Thanpuia hlauhna zualpui pawh a reh tan ta, a inthunun thei tan tawh. Thlarau chuan tih nat a tum lo va, a tanpuina a rawn ngen zawk tih pawh a hrethiam ta,” Zonun, nangmah ti hlumtute zawn chhuah chu ka duhthusam a lawm.. Ka motor rutute kha an nih ngei pawh ka ring, khawngaih takin ka zawn chhuah theih dan tur min hrilh rawh,” a ti ta hial a.

REWIND
Thlarau chuan a rawn pan phei a, Thanpuia taksaah chuan a rawn lut ta niin a lang.

Hmeichhe pakhat thuthlenga phuar beh tlat a hmu a. A bulah chuan mi pathum an awm a. Thuthlenga an phuar beh hmeichhia chu an en chiang a. Zonunsiami ngei a ni tih a hre nghal thei mai a. Mi pathum zinga pate ber chu a rawn tawng chhuak a, “Kei hi Rosiamliana ka ni a, Siamtea tiin min ko thin, hei ka thiante pahnih hi Zirsanga leh Davida te an nih hi,” a ti a.

Pindan chhung chu a han en chiang a, bungrua a tam lo hle mai. Pindan hran pawh a awm chuang lo va, choka lam niawm takah chuan gas thuk a awm a, cooker a inchhuang a, almira tlabal zetah hian thleng leh no tlem a inrem ve that bawk a.

Mi pathumte chuan thuthlenga hmeichhe inphuarbet an phuarna te hlipin, a thawmhnaw chu dim lo baksakin an hlihsak zui a. Rapthlak takin an pawng sual a. A hnu deuhah an zinga pakhat chuan a rek hlum zui ta a. A thil hmuh chu rapthlak a ti kher mai. Hmeichhia chu tanpui a han tum a, ‘mahse, engmah a ti danglam thei lo, Misual pathumte chu han sawisak hrep mai hi a nap a, mahse, boruak sawisak tum ang chauh a ni. Engmah a khawih thei tlat lo. Chung mi pathumte chuan an bulah a awm ve reng a ni tih pawh hre awm hmel an pu hek lo.

Mi pathumte chuan an sulhnute an thianfaia, in atangin an inzui chhuak a, Thanpuia chuan a zui chhuak ve zel a. Pawnah chuan a Gypsy dum bo ta ngei kha a lo in hung a, gypsy ah chuan an lut a, Thanpuia thinrim lutuk chu a insum zo ta lo, “ In zak lo’m ni zawngho!” tih pahnin motor khalhtu chu hnek a han tum a, a hnek fuh thei si lo, chutih lai tak chuan a muhil chu a rawn harh ta hlawl a. Thlan chhiain a lo bual huh zuih a.


A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***

[Ngaia]

REVENGE : THE TARGET

GHOST WORLD
Thlan tuiin a lo bual huh zuih tawh a, Thanpuia chuan a sana a han en vat a. Zing dar sarih a lo ri reng tawh a. Choka lama Pi Sangzik zai rat rat pawh chu a hre thei a. Thawmhnaw a ha sawk sawk a, choka lamah chuan a phei nghal a. Pu Lianhrima chuan chanchinbu chhiar pahin thingpui no a lo dawm mek a. Pi Sangziki chuan, “ E..i va rawn tho hma ve, i mutui meuh maw, in phihfai la, thingpui pawh ka lo siam ang che. Tukthuan pawh ka chhum kep nghal vek che a nia,” a lo ti var a.

“Thil mak deuh ka hmu tlat mai, ka pu.”

Pu Lianhrima chuan a chanchinbu chhiar lai chu a dah a, a rawn en hau a.

“Nizanah Zonunsiami thlarauvin min rawn tlawh a, amah thattute pawh min hmuhtir a ni.”

Pi Sangziki chuan, a no ken lai a thlauh keh chhawk a. Phawk fe hian Thanpuia chu a en a, “Eng maw?” a rawn ti deuh hu a.

“Ka pi Zik, nizanah Zonuni thlarauin min rawn kan a ni. Engkim ka hrefiah vek tawh, amah an thah dan zawng zawng pawh min hmuh tir vek a ni. A rapthlak lutuk!” a hnuk ulh teuh tawh a. Thanpuia titak hmel chu hai rual a ni lo. Pu Lianhrima chuan nghakhlel tih hriat zetin, “Rang takin han sawi chiang teh” ati ta a.

Thanpuia chuan thil awmdan zawng zawng chu chip chiar takin a hrilh ta vek a.

Pu Lianhrima chuan, “ Rosiamliana, Zirsanga leh Davida te chu hnathawka ka chhawr thin an ni a, sum leh paiah an rimawm lo tih ka hriat chhuah avangin thla hmasa khan ka bantir ta hlawm a ni. E khai....ka hre chhuak ta e, anni pathum kha an ni chiang mai, ‘i chungah phuba kan la ve khawp ang’ an ti nghe nghe a sin. A hma khan engati nge ngaihtuah nachang ka lo hriat loh aw!” a ti a, a rilru natzia leh a thinrim zia chu a lang chiang hle mai.

Thanpuia chuan, “A rang thei ang bera police kan hrilh a ngai a ni,” a ti a.

FIRST REVENGE
Rulngan lian leh sei zet mai hian a lo um a, thlan sa phulkaiin a tlan chhia a, a hnung lawkah rulngan chu chak zetin a rawn tleng phei a, rul tleng ri chu a hre pha hial a, a tlan zel a, a chau tawh kher mai. A awmna chu khawi lai nge a nih pawh a hre thei miah lo, vawi lehkhatah a tlanna kawng chu a tawp thut a, ahmaah chuan kham bakbahai leh trenbaram rapthlak zet mai hi a lo inkhawh thla zur mai a. Rul lah chuan a rawn pan hnai zel mai si. Khawi lam nge tlanchhiat tur tih pawh a ngaihtuah thiam tawh lo. Mangang takin a han hawi let a, rulngan chuan chuk ngei tumin a ring a fan uak uak a, khamah chuan a zuang thla ta a, chutih lai tak chuan Zirsanga muhil chu a harh ta hlawl mai a.

Thaw hlawp hlawp chungin khumah a han thu chhuak hlawl a, thlanin a bual huh zuih a. A mumang chu a han ngaihtuah let a, mumanga rul hmuha thah si loh chu a tha lo tia an sawi thinte chu a ngaihtuah chhuak a. Sana a han en a, zing dar 3 a pel hret. A mu leh a. Mahse, pawnlamah eng thawm emaw a hre tlat, a’n ngaithla chiang a, mihring phun ri niin a hria. A thinphu a in thumrawn nghal tlut tlut a.

An tualthah thu kha an hre chhuak ta em ni ang, police in man tumnin an veh mek a ni mai lo maw? Thawm chu a reh tawh a. Mahse, a ngaih a la tha chiah lo. khumah chuan a mu meng kar a, a mang chhe lutuk avang khan muthilh leh pawh a huphurh viau tawh a ni.

THE CHARGE
Tukverh ah chuan hlimthla han phe zauh a hmu leh ta. A mit vai nge thil tak tak? A mit a han nuai a, a tho chhuak a, tukverh ava hawng a, pawn lam a han en chuan khawfing a la chah loh deuh avangin a thim viau mai, engmah hmuh a nei lo. Khum lam bawk a pan leh a, chutah, kawngkhar chu na zetin an rawn kik ta dawt dawt mai a, a phu chiang kher mai. Hlauhnain a man leh nghal a.

“In awm em? Khawngaihin kawngkhar hi rawn hawng lawk teh u!”

Zing dar thumah tu nge mi inah leng ngai! A ngai a tha lo kher mai. Thil tha lo eng emaw tak chu a awm a ni. “ Aw le, ka rawn hawng dawn e,” tih pahin pawn light chu a han hmet eng a. Kawngkhar awng tereuhte atang chuan pawnlam chu a va en a, kawngkhar bula police pathum lo ding chu a hmu ta. An suahsual rawng bawl dan kha an hre chhuak ta a ni chiah mai. Hmanhmawh a ngai, heng police ho hi a in man tir tur a ni lo. Khum hnuaia a thingrem dah chu a pawt chhuak a, pawisa awm zawng zawng chu a ak a, Jacket a inthawlh sawk sawk a, tukverhah hmanhmawh takin a zuang chhuak ta a.

Kawngkhar ri zui bur bur chu a hre pha a, police te chuan an tlawh hawng ta a ni ngei ang. A han hawi let a, a zuan chhuahna tukverha police pakhat rawn zuang chhuak ve chu a hmu a. Chak zetin a tlan ta a. A hnungah an rawn umzui nghal a, a thim em avangin hmalam thui tak a hmuh theih loh, thim chu a tan malsawmna a ni.

Zan reh lai a ni bawk a, silai han puak ri dawp chu a ring kher mai. Zirsanga chuan a malpui veilam thip zawk chu a hria a, tlan luih zel a han tum ngial a, a thei ta ngang lo, a thu hnawk a. Police pathumte chuan an rawn dinhual nghal a. An zing a pakhat chuan puakruk hmawr la khu vang vang chuan a han tin a, chet ngaihna a awm ta lo. Bel chhunga sa ang chauh a ni ta. Kut kawl an bun tir lai chu a hre ruai ruai a, a malpui chu a rawn thip zawr zawr a, a mit deuh sulh a, engkim chu vir muai muai hian a hria a. Nikhua a hre zui ta lo.

A han harh leh chuan khumah a lo mu a, a malpui chu a incher khawng bur a, a bana invit bur ngur chu a han en a, thisen an pe a ni ngei mai. Khawiah nge a awm tih a hre nhgal mai thei lo va, a chung thil thleng te chu a han ngaihtuah let a, a tlanchhia a policein an um a, a malpui a thip nghal zawk a, engkim mai kha a thim ta mup mai ni khan a hria a. Police te khan manin, damdawiin lamah an hruai ta a ni ngei ang.

BLACK SHADOW
A chau ngawih ngawihin a hria a, a ka chu a phak chuap a, a luak a chhuak hluio a. A han hawi kual a, a vai deuh ruai a, midang tumah a hmu lo. Police ho chuan pawnah an veng pawh a ni mai thei. A khum bulah chuan hlimthla hi a han hmu a, en chian tumin han thawh kan a tum a, a malpui chu a thip zawk a, beidawng zetin a mu leh hnawk a. Hlimthla chu a lo hnai zel a, a hmu chiang thei ta. Zonunsiami ngei a ni.

Mahse, a ni chu a thi tawh, a ma kut ngeiin a rek hlum a ni. A hrechiang lutuk tlat. Hei hi chu a mit vai mai mai a ni. A nghawng ah chuang eng emaw hian a rawn rek ta, a thaw thei lo,. thawk chhuah tumin tan a han la ngial a, mahse, a rektu chuan a rek bet hneh em a, a tal chhuak zo ngang si lo. A thlanfim a far fawp fawp a, rapthlak taka Zonunsiami nui hmel chu he khawvel Zirsanga thil hmuh hnuhnungber a ni ta.


THE FINAL REVENGE

‘Ngai teh, hei hi ka hriat chhuah tak chu a ni: Pathianin tluang taka nung turin mihringte a siam a, anni erawh chuan an ti khirhkhan zo vek a ni tih hi.”
-Thuhriltu 7:29

THE ALERT
......chanchinbu chu a han chhiar nawn leh ngat a, an thianpa Zirsanga ngei a ni. Police ho chuan an hrechhuak ta a ni ngei ang. A cell phone a phawrh a, “Hello, David tukin Vanglaini kha i chhiar tawh em?” a han ti tlang nghal tawng a. David-a chuan bangbo hmel fein, a la chhiar loh thuin a rawn chhang a, “Eng thil nge ni ta?” tiin a zawt zui a.

“Nizanah Zirsanga an man. A tlanchhia a, a malpuiah an kap. Damdawiin ah an hruai a, a thi zui ta a ni awm e.”

Davida chuan, “A va mak awm ve, malpuia kah ringawt te chu thihpui tham a ni dawn em ni. Kan police hmelchhe ho chuan an sawisa hlum a ni zawk lo maw?” a han ti a.

“Ka hre bik lo, eng pawh chu ni se, min hre chhuak ta a ni ngei ang. Zirsanga an hriat chuan keini pawh min hre ngei ang tih a chiang. Didi-i thingpui dawrah lo phei nghal ang che, inhmu lawk teh ang, ro rel a ngai tlat.”

“Aw le, ka rawn kal nghal e.”

Rosiamliana chuan chokaa a nupui eirawngbawl lai chu a han en a, a rilru a tawt nghal up up a, inleng kawmna pindanah a fate pahnih mipa leh hmeichhiain lehkha an zir mek bawk a. A nupui fanaute hmuh laia police in man tir chu a tum hauh lo.

“Matea nu, thil hmanhmawhthlak tak a awm thut mai. Zin chhuah lawk a ngai, ka lo haw har lo vang.”

Rosiamliana nupui Nunmawii chuan phawk deuh hau hian a pasal chu a han en a, “ A va mak awm teh thut ve! Eng thil nge ni ta. Chaw te pawh ei phawt la mawle,” a ti a.

“Ni lo, a hmanhmawh thlak lutuk. Tunah hian chhuah nghal a ngai tlat, nakinah engkim i la hre mai ang,” tih pahin a thawmhnaw a thlak a, an nupa kum bula steel almira atangin pawisa eng emawzat a la chuak a, a wallet ah a thun a. A chhuak ta nghal a. A nupuiin ngaihtha lo tih hriat taka a thlir zui reng pawh chu a hmu ta lo.

RUN FOR LIFE
Didi thingpui dawr chu a langsar lo hle a, vai pahnih thingpui in an awm a, dawr neitunu Didi chuan a lu a lo zai lep mek a. David-a nen chuan an lut rual vel chiah a ni. Dawr kil thim deuh lam chu an pan nghal a, chhuanlamah thingpui leh a hmeh an han lam ve a.

Rosiamliana chuan, “Silchar lamah kan chhuk thla phawt mai dawn em ni ang? Aizawlah hi chuan kan him lo riauvin ka hria a ni,” a ti a. David-a chuan, “Rem han ruat dan pawh ka bangbo ang reng khawp mai. Kan nihna an an hre tawh a nih chuan Silchar-ah pawh kal ila, kan him dawn chuangin ka hre lo. Mahse, min hrechhuak ta ngei tih hi proof-na kan nei chiah em?” a ti a.

Rosiamliana chuan, “Nei miah lo. Zirsanga man an tumna chhan kha eng nge a nih chanchinbuah khan an tarlang tel tlat lo. Misual pakhat tih bak engmah an zial lo va, thil dang vanga man tum pawh an ni daih thei tho. Kan Zirsanga hi chu mahnia parawl tih bak engmah an ziak lo va, thildang vanga man tum pawh an ni daih thei tho. Kan Zirsanga hi chu mahnia parawl tih takah a nun hi a thlahdah ve reng reng a. Police ho man duhzawnga khawsak hi a hobby kha a ni ve a,” a ti a, a nui deuh suk a. David-a chuan, “Ni chiah e, chu chu a lawm ka ngaihtuah deuh. Tul hlei lovah kan lo hlauthawng ve chiam pawh a ni thei a;mahse, fimkhur tluk chu a awm lovin ka hria, zin bo rih pawh a sualin ka ring lo,” a ti a.

Rosiamliana chuan, “Sumo ticket han la ila, Silchar lam pan thla phawt mai ila a thain ka hria, pawisa i rawn ak chhuak nghal em?” a ti a. Davida chuan, “ Ak chhuak nghak e, ka rawn inring sa thlap e,” tiin a chhang a.

“A that chu, kei pawh ka rawn inring thlap e. Kan nu pawh thil hmanhmawhthlak tak a awm a, ka zin thut mai thei tiin ka rawn thlah fel nghal law law mai,” tih pahin thingpui chu a tlak pawp a. Didi dawr atang chuan an chhuak ta nghal a.

NEWS
Thanpuia chuan chanchinbu a chhiar zawh veleh Pu Lianhrima a va phone nghal a, “Tukin chanchinbu kha i chhiar tawh em ka pu,” a ti a. “Hei ka chhiar mek e, Rosiam liana leh David Lalrinsanga te chanchin hi a va lang ve lo ve,” Pu Lianhrima chuan a rawn ti a.

“Kei pawh chuti deuh chuan ka lo ngaihtuah a sin. ICU chhungah khan tumah an awm ve lo va. A enkawltu doctor lah ward danga a awm lai a ni bawk si. Police pahnihin pawnah an veng niin an sawi a. A thih lai tak hi tuman an hmu lo niin a lang tlat,” Thanpuia chuan a ti a.

THE OUTLAW
Silchar pan tur Sumo-ah chuan driver nen an vaiin pasarih an chuang a. A hmaah chuan Silchara chawhmeh la tur nuthlawi hmai fai veng vung hi a thu bawk a. A bulah second driver( driver pakhat a hah deuh huna khalh chhawk tur) a thu bawk. A hnung chiah seat-ah chuan vai sumdawng ni awm tak leh tlangval kum 25 vel tur; kut vung deuh bur hi a thu a, a hnung ber seat-ah chuan Rosiamliana leh Davida te chu an thu a. Passenger an tam loh avangin nuamsa deuh takin Silchar chu an thleng thei ang;mahse, kawng lakah passenger dang an hmuh chuan an kal ngei a rinawm thung.

An tlan tluang angreng hle a. Kolasib ah tukthuan an ei a, a thenin zun ram an thiar bawk. An tlan zui leh nghal char char a, Vairengte luh hma deuhin an motor chuanna chu a ri deuh hruk hruk a, a thi ta mai a. Driver pahnihte chuan an en fiah nghal thuai a, dil lo awmin a lang lo;mahse, a nung thei tlat si lo.

Driver dangte pawh an rawn ding a, an harsatna te an zawt a,. an han enpui ngial thin a, motor khawlah chuan dik lo engmah hmuh tur a awm tlat lo. Uluk deuh zawka en a ngai dawna a lan tak avangin driver chuan an motor chu kawng sir rualrem lai deuh, motor dang tana hnawk lo tura dah law law mai thain a hria a, passenger te chuan an nawr a, midang, an mahni tanpui tuma rawn dingte chuan an pui bawk a. Khua pawh a tlai ta viau mai. Ni a tla fel titih tawh a, driver pahnihte chuan motor chu hawng darhrin a khawl thenkhat te chu an hru fai a, a chhe lai an zawng zel a.

An beidawn tawh lamahm chauh-thu-ba-rawh tak takin driver pakhat zawk chuan motor chu tihnun a’n tum leh a, mak takin awlsam te hian a rawn nung tha ve leh ta mai a. An chhe rei bawk a, an lawm tlang hle. Kut an beng dar dar a.

THE FINAL REVENGE
Hmanhmawh takin motor ah chuan an lut a, an tlan leh ta a. Darkar khat aia rei daih an chawlh avangin dirver pawh a hmanhmawh tawh hle tih a motor khalh chak dan atang chuan a hriat theih. Vairengte an lut tan chiah tihin motor hmalam darthlalang chu a thim mup a, puanin a rawn khuh hlup a ang ber mai.

Mihring hlimthla hian motor darthlalang chu a rawn vel thuak thuak a. Thla ai ri rapthlak zet hi beng khawrh rum rum khawpa ringin a ri ruai ruai a. A seat hmaa nuthlawi thu chu a tre tuar a, driver chuan motor brake chu a rap tlum thawih a; mahse, an tlan chak em avangin a ding mai thei lo. Kawngpuiah chuan motor ke chu a inhrut ri phei hrawih hrawih a, a ke hmalam chu kawng thlang kham bakbahai leh trenbaram thim thla vuk maiah chuan a in khai kang vaw a.

Motor, chu a han bu lawk a, kawng thlanglam khamah chuan a biling a balangin a lum thla ta a ni.

Silchar pan tur Sumo accident thu chuan rei lo teah Aizawl a thleng chho a. Vairengte a tlawmngai pawlte chuan passenger leh driver te zawn hna an thawk nghal a. Motor chu a chhe sawp hneh hle a, second driver leh tlangval kum 25 mi vel kut vung deuh ber bur, ruihhlo tih ching mi ni ngeia lang chu hliam na tak tuarin an dam chhuak a, midang chu ka pawh chhawn lovin an thi vek a. Rosiamliana ruang phei chu a sawp deuh nulh avangin tu nge a nih pawh an hre lawk lo nghe nghe a ni.

Sumo accident chhan dik tak chu tuman an hre lo va, chanchinbu lam chuan driver chuan hmanhmawh avangin motor chu a khalh chak lutuk a, a thunun zo ta lo niin an chhuah a. A dam chhuak pahnihte lah an hliam a nat em avangin biak theih an la ni rih si lo.

Pu Liansiam te nupa leh Thanpuia te erawh chuan sumo accident-ah Rosiamliana leh David-a te an tel tih an hriat chuan Zonunsiami sulhnu a nih ngei an ring nghal a; mahse, an ngaihdan chu tu hnenah mah an sawi chhuak lo.

THE END