‘A SEN’ BY Puitea Tuallawt

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

‘A SEN’ BY Puitea Tuallawt

Unread post by Ngaia » May 21st, 2016, 10:38 pm

‘A SEN’
(THE RED)

BEIDAWNNA KHUM
Damdawiin banga Sana lian chi (wall clock) chu a ri chek chek reng a. Ramnghaka chuan chau takin sana chu a en a, a tan chuan hun hian awmzia a nei tawh lo. Doctor te pawhin tlang takin an hrilh lawk mai a, thla khat vel bak a dam an ring tawh lo. Thih hrim hrim chu a hlau hran lo; mahse, tunah kum 24 chauh a la ni a, a hmaah tih tur tam tak hual lawk a nei a, eng degree emaw tal chu sual chhuah ve a duh . Mahse, chu’ng te chu suangtuahna thamral mai tur a ni dawn ta.

E khai chu mai a ni lo, Lalremi mawlh mai kha, an college nulaah chuan a chhe lo lawrlak, a beisei phakah pawh a lo dah ngai loh khan amah chu a lo star tih a thiannu ka atangin a hre tlat. Damdawiinah pawh vawi thum lai a thiannu nen an rawn kan tawh. A natna diktak a thup tlat a, rei lo tea ngai awh leh mai tur angin a insawi zel a. Mahse, chuti anga dam leh mai chi a ni si lo.

A pian chhuah hlim hlawtin a thaw thei lo nghal a, a nu leh pa ten theihtawpa an bawihsawm hnuah a rawn tap chhuak thei ta hlauh a. Mahse, kum 6 mi a nihin Lung (Heart) tha lo a nei tih hriat chhuah a ni. Neih thinlung khawng tak meuhin an enkawl a, phaiah an kalpui thul, min a tha an tih apiang an pan a, tawngtai dam thei lah an pan tam tawh narawh. Mahse, dam a hnekin a hniam hret hret a, a lung chuan hna a thawk tha lo tial tial a; thih mai loh chu hmabak a awm ta lo.

CHETSUALNA
Zing dar ruk pelh hretah Guwahati atangin sumo hmangin an rawn tlan tawh, khaw lum uap churh leh pik mup mai chu tawrh tham zet a ni. An vaiin Passenger pali leh driver- te an chuang a, Zirtea chuan a nupui pheikhawk tur cheng sangthum ngawt senga a lei sak chu a bagah chuan a dah ran a. A mut a rawn chhuak chiai chiai a, a muthlu dawn tep tihah, eng emaw hi a ri bur a, an chuanna sumo chu kawngthlang kham bakbahai leh trenbaram zetah chuan a insawh vir thla nawk nawk a.

Zirtea chuan a bag chu nghet takin a vuan a, sumo insawh kawi nawk nawk chuan driver seat hnung lam chu a invuahna chawpin a ti thlawn hlawk a, Zirtea chal darah tak chuan a rawn deng pawp a. A bag khai chu a thlauh a. A thim mup a. Nikhua a hre lo zui ta nghal a. Mizoram chhung a nih tawh avangin mi tlawmngai rualin sumo accident chu an ngaihven vat a, driver leh passenger pathum te chu ka pawh chhawn lovin an thi nghal a. Zirtea erawh chu a mar ala phu det det a, rang takin damdawiin hnai ber an panpui nghal vat a.

Hun tam a nei tawh lo tih chu a thawk dan atang chuan a hriat theih mai, a thaw ri hrawih hrawih a, a lu chu an tuam bur a, eng emaw sawi duh nei niawm tak hian amah viltu doctor chu a han melh tawk tawk a, doctor pawh chuan hrethiam takin a beng chu ava dawh hnai a, “Ka taksa hmantlak lai apiang hi dam lo dangte tan ka donate vek a nia aw doctor..” tham chhalin a ti a. Doctor Sanga chuan, “Aa..chuti ang thil te chu chuti ngawta awlsama tih theih a ni lo a sin...” Zirtea chu a lo thi hman reng tawh a.

BEISEINA KAWL ENG
Doctor Sanga chuan an hotu lian zawk lam te be pawpin thil chinchang report a ziak mawlh mawlh a. Chutih lai chuan Zirtea nupui Mawipuii pawh Aizawl lam atangin a rawn thleng thla ve chiah a, nunna nei tawh lo a pasal hmel a han hmuh meuh chuan a hmeichhe lungno a chhuak a. Zah pawh dawn lovin damdawiin khawk rum rum khawpin a tap chhuak hlawp hlawp a. Mihring tan engmah tih theih a awm tawh si lo.

Zirtea ruang chu doctor thiam rual pathumin uluk takin an zir chiang a, a taksa hmantlak la awm thei tur ang chi pawh eng emaw zat an hmu chhuak bawk. A kal (kidney) A lung(Heart), a mit (eye) te pawh a thisen milpui an awm chuan hman theih a la ni. Uluk takin chung taksate chu a dahna tur bika siam bawmah an dah tha thlap a. Zirtea nupui Mawipuii phei chuan chuti ang thil chu engmah a hre ve hauh lo nghe nghe a ni. Hria se zawng a phal hauh lo vang le.

Zirtea thisen milpui chiah Ramnghaka, kum 24 mi, thih mai hmabaka kaikun reng tawh chuan beiseina thar a lo nei leh theih phah ta a ni. Phai ram, khawl leh damlo enkawlna chikim awmna hmunah Ramnghaka chu kalpui nghal a ni a. Zirtea lung chu vuah sak a ni ta. Mi thar, dam var mai a lo ni ta. Doctor te hnenah tu nge heti ang thil hi min pe tia a zawh lahin, doctor te chuan an chhang duh si lo, “Heti ang thilah hi chuan vala, a donate tute hming hi thup a ni thin, a tul tawpkhawk a nih loh chuan puanzar a thiang lo a ni,” a ti mai a.

LUSUN
A hmangaih a pasal Zirtean a thihsan atangin kar khat emaw awrh chauh a la vei, inleng an trin tan. Innei thar hlim deuh mai an nih avangin fa pawh an la nei hman si lo. Zirtei lungleng khawhar lutuk chu a tap ru keuh keuh reng a ni ber.

Zan dar 12 a ni tawh, Zirtei chuan inchhunga thil hnawk te chu a rem fel zung zung a, a mut chu chhuak lo hle mah se, mut a hun tawh tih a hria. Inlengkawmna pindan kawngpui hrula awm tukverh parda a zar thlak dawn lai takin kawngpuiah chuan mi tu emaw, amah lo en rengtu hi a zu hmu thut mai. A hlau deuh hle a, parda chu a zar thla vat a, hawi pawh hawi let tawh lovin khumah chuan a mu ta nghal a.

Zing dar 7 velah a harh hlawl a, ruah phingphi siau a sur seng seng a, engkim mai chuan nunhlui ram a chhui kir tir a, a mumangah lah a pasal chu a hmu thei der bawk si lo.Inlengkawmnaa tukverh parda sen inzar chu a han hlim chho a, hlauh lutuk avangin a hnung tawlh dawrh mai.

Kha pa kha, a ni chiang mai, kha pa ngei kha a ni. Nizana mi a hmuh kha, a dinna ngai chiahah a ding a, tukverh lam chu a rawn en chho reng a. ‘Eng nge maw a tih le?’ tih sup pahin parda pawh chu a zar chho duh ta lo a. Tukthuan rawng a bawl a, a rilruah pawna mi pakhat ding reng mai chu a rawn lut leh thin. Tunah te hian a la awm ang em le? Engvang nge ni ang? Eng emaw hrilh duh a nei pawh a ni mai thei a sin. Chuti nise, kawngkhar te rawn kika, rawn luh that ve mai tur a nia.

A dawhtheihnain a tlin ta lo, kawngkhar a hawng rawp a, a kut lehlamin chawhmeh channa chemte a keng khur dar dar a. “Vala, helaiah hian eng nge i tih, nizan atang khan ka hmu daih tawh che a nia, thil tha lo tih i tum a nih vaih chuan police ka call nghal a ni mai..” Ruah phing phi siau sur seng seng a. “Zirbawih, keimah ka nia, min hre tawh lo em ni?”

Zirtei chu a phu deuh zawk a pasal Ramnghaka khan Zirbawih ti ngatin a ko thin, midang tumahin chuti angin an ko a la hre ngai si lo. “Min bum tum hlek suh aw..i u rual fe ka nih tawh hi, va haw tawh la a tha ang. Hei ruah a tla bawk si., i dam loh phah ang e.”

“Zirbawih, hetah lo khawiah nge ka haw ang, khawvela ka neihchhun i ni a sin,” a fiamthu hauh lo mai.

“Engti tih tia Zirbawih tia min ko tlat nge maw i nih le, tirawh inchhungah i lut phawt teh ang,” a ti a.

THINLUNG THLAKTHLENGNA
Zirtei chuan a ei rawng bawl lai chu a chhun zawm mawlh mawlh a, tomato a rawt tur a siam dawn lai tak chuan, “Rawh kher loh chuan i ei duh ngai loh kha, hmarcha kha panga lo rawt la, tomato kha keiin ka lo rawh ang e,” tih pahin Ramnghaka chuan Tomato tlang hnih chu tul thirin a vit tlang a, gas ah chuan a rawh a.

‘Rawh kher loh chuan i ei duh ngai loh kha....hmarcha kha panga lo rawt la....’ Zirtei chu thuthlengah a thu hnawk a. “Hei hi engtin nge a nih theih, thil theih a ni lo, ka mumang mai mai a ni..” tiin a phun nawk nawk a.

A ding chhuak hluai a, “Tu nge i nih sawi rawh, i sawi loh chuan police ka ko nghal dawn,” Zirtei thinrim mangang lungngai hmel chu hmuh hrehawm tham a ni.

“Ngati ta nge Zirbawih, dam lohna i nei deuh em ni. Engtin nge min hriat loh theih a?”

“Ka hre lo che, vawi khat mah hmuh pawh ka la hmu ngai lo che, tu nge i nih sawi thuai mai rawh.”

“I pasal Mawipuia, Lalnunmawia,min hre lo a maw Zirte.”

“Ka pasal i ni lo, ka pasal Mawipuia chu a thi a, thlanah kan phum daih tawh, kar khat lai a liam tawh. Nang hi chu ka pasal ini lo tih ka chiang, min bum chu tum duh ting tang lo mai rawh,” phone a chuh a, police a be pawh nghal a. Ramnghaka chuan mak tih hmel takin a lo en reng a.

Minit 10 vel hnuah police an rawn lang a, thil awmzia an han zawt a. Zirtei chuan thinrim vanga aw khur deuh dar dar hian thil chinchang chu a hrilh hlawm a.

Chutih lai chuan Constable pakhat hian, “Sir, amah ngei a ni e, hei a thlalak pawh a chuang kalh a lawm,” tih pahin Inspector hnenah chuan file chhah vak lo hi a han pe a. Inspector chuan a kawng dinglama a puakruk pai lai chu rang takin a phawi dawk zawk a, “ Nang Lalramnghaka, Mi â dahna hmun, Grace Harvest atang tlan chhuak hi ka man a che, i kut rawn phar chhuak rawh,” tih pahin constable pakhat, thir kut kawl keng chu a han mitmei a.

A chunga thil thleng chu ngawi rengin Ramnghaka chuan a hmachhawn a. Lungawilo leh thinrim hmel pawh a pu hran lo. Police Gypsy a an chuan luh dawn lai chuan kawngkhar atanga lo thlir rengtu Zirtei chu a en ngawih ngawih a, “Zirbawih, ka hmangaih. I pheikhawk kha cheng sangthumin ka lei a, Vairengte LC (Local Council) hnenah a la awm reng a, i hman hunah i lo zu la dawn nia aw....”a biangah mittui a rawn luang a.

Zirtei chuan hamhaih takin Gypsy hnung lama thu Ramnghaka chu a han en a, “Phei khawk chu eng rawng nge?” tiin a han zawt a.

“A sen,i duhthusam ang chiah kha a ni mai.”

Ramnghaka leh amah mantu police te chu Gypsy chuan an tlan liam zui ta nghal a.

‘A sen, i duhthusam ang chiah kha a ni mai.’

Zirtei chu an nupa pindanah a tlan lut a, mangang leh thlabar tih hriat takin a tap zawih zawih a. “A sen, i duhthusam ang chiah kha a ni mai’ tih thu chu a bengah a ri nawn tlut tlut mai.

A pasal Mawipuia zin chhuak turin “Eng nge ka lo hawn ang che Zirbawih?” tia, a darah a kuah lai khan,
“Pheikhawk sen, nalh tawk a ni mai” tiin a chhang tlat.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)