HUAN NEITU BY HUAN NEITU

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

HUAN NEITU BY HUAN NEITU

Unread post by Ngaia » May 21st, 2016, 10:50 pm

HUAN NEITU

(Ka piana hnu lama ka thuziak zinga ka duh ber a ni. Mahse, nang chuan ho i ti viau mai thei.)

"Tin, Pathianin anmahni mala sawm a; Pathian vekin an hnenah, “Chi tam tak thlaha lo pungin, leilung hi luah khat ula, in thu thuin awmtir rawh u..”
-Gen 1:28

“Thingpui min han lak teh.”
“Nangman la ve mai la ti nia.”
“Min han lak ve lawk mai la.”
“I thaw ve a nih chu Hmela.”

Kan inhnial zel chuan a sawi loh tur thleng thleng kan sawi kai leh ang a, a tawpah a thiamlo zawk ka ni leh ngei bawk ang, chuvangin ngawih mai chu ka tan a tha a ni. Zing dar sarih pelh tawh hnu-a khum laizawl atanga ‘Thingpui’ han order vel hi chu Hotel changkang deuha thlen chang chauha tih chi a lo nih dawn hi. He inchhungah hi chuan intithuber mah chhiahhlawh ka nei tlat lova, nupui leh fapa kum 8 mi chauh ka kawl a, anni lah hian ka chhiahhlawh an ni lo tih an inhre kiau mai si.

Khua a vawh em avangin khum han thawhsan chu ka hreh hle a;mahse, thingpui leh chaw ka ei-in duh a nih chuan khum lum nuam tak chu ka thawhsan ngei a ngai si a ni. Tuidehnaa ka inphih fai mawlh mawlh lai chuan nu berin naupang sikul tlai hlauin chaw ei a lo siam a. Thingpui inna hun pawh ka nei ta lo. Dar riat a lo ri reng tawh tak a nih hi. Tukthuan ka ei sawk sawk a,’Vawiin chu eng nge ka han tih ang aw?’

Nimin lama ka kalna, hmun nuam leh mawi takah khan va kal leh ta ila, khalai hmun kha a thengthaw nuamin, boruak kha a hrisel hmel riau a. Kei ang lungphu \ha mang lo tan phei chuan a hmun hma leh a boruak ringawt pawh kha damdawi a tling hrim hrim tlat a ni. Chaw ei kham veleh ka insiam nghal sawk sawk a, phul hring dup awmna leh mihringte chawm len ni miah lova, pangpar mawi tak takte an par vul chukna hmunah chuan ka va kal leh ta a ni.

Zothlifim chuan min thawi dam nghal sawng sawng a, ka han hawi vel a, hmun tin mai chu uluk taka chei niawm tak hian a inrem fel thlip thlep a, pangpar mawi tak takte leh thingkung sang pui puite, phul hmun cham diai maite hi engvanga helai hmun biru tak, mihringte tlawh pawh ngai zen zen loh hmunah hian lo awm ve ngawt nge a nih ang le? Siamtu Pathian chuan a thlawn ngawtin ruahtui a tlaktir a, ni zung chakna ropui tak hmangin a chawm seilian a, a ni, ka nupuiin varanda cheimawi nana a khawi, uluk taka tuktin tui a pek thin pangpar te ai khan helai pangpar te hi chu an duhawm zawk a. Engmah sawi lo mah se, an zalen a ni tih an ti lang a ni.

Ngaihtuahna kawma damchhung khawsak lungkham pel a, khuanu themthiamnain min luah khah mek lai chuan hun hian awmzia a nei lova, rei lutuk hi a awm thei lova, ninawm hi a bo a, chatuan hun mak tak chuan hringnun hi a tuam \hin. Mahse, hun sala tang hringmi ka nihna chu he tisa hian a rawn nemnghet a, ekhai... chhun chawfak a lo hun dawn reng tawh mai.

Naupang kum sawm mi vel tur hi sava vehin ka piah lawkah chuan thawm dim takin a kal then then a, ka hmu reng a, a ni erawh chuan min hmu ve lo,“Vala, kha eng nge i tih a?”

Min rawn hmu a. A ding chawt a, “Eh..sava ka veh a.”
“Sava chu eng atan nge i tih a?”
“Ei atan, han perhthlak hrim hrim hi nuam ka ti bawk.”
“Vala, khawngaihin ka bulah hian reilote i lo thu ve hman lawk em?”
Naupang chu reilote a han tim deuh a, ka bulah chuan a rawn kal hnai a.
“Eng nge ni ka Pu?”
“Hei dar 12 a pel tawh a, eitur tlem a zawng ka nei a,i eidun ang hmiang.”
“Ka lawm e;mahse, ka pu, ka nu-in midangte thil eisak mai mai hi thil mawi lo tak a ni a ti a,”
Ka nui a, “Mahse, midangte thil chu i eisak \hin tho si a.”
“Ka pu, ka hriat theih tirh ata mite thil a thlawnin ka la eisak ngai miah lo a sin,”
“Vala, sava sa i ei thin a ni lawm ni?”
“Ei \hin e,”
“Sava hi tu ta nge i hria em?”
“A perh thlatu ta a ni mai a lawm, a ni lo em ni ka Pu?”
“A perh thlatu chu sava thattu chauh a lawm.”
“A nih leh tu ta nge ni a?”
“Pathian.”
“I ti mak mang’e ka Pu chu.”

Naupang chu ka bulah a thu a. Ka chaw fun ei lai chu min en reng a. A nu thu awih a duh avangin min eipui lo.

“I ril a tam lovem ni?”
“Ahh.. tam tho, ka hre lo.”
“Ei ve ta che, a thlawn ni lovin, thil engemaw min tih sak thung ang a.”

“Ka theih zawng a nih chuan i tana thil tihsak che chu ka chak zawng tak a lawm,mite tanpui hi thil tha tak a ni tih ka nu-in a sawi ka la hrereng.”

“Mahse, ka chaw min eipui si chuan min tanpui ni lovin, leiba i tlak a ni chauh dawn a sin, i nu in chuti anga tih chu a phal dawn em ni?” tiin ka han chhaih fiam a. Naupang chu a ding a,“Ka Pu, ka kalsan hrih phawt mai ang che, chaw chu ka eipui lo mai ang che,” a ti a. A ding a.

A ban dinglamah ka chelh a, ka chaw fun chu min eipui hram turin ka thlem a, fiamthu ka thawh thiam loh em avanga min ngaidam turin ka ngen a. Chaw chu kan eidun ta a.

“Ka Pu sava chu Pathian ta a ni tak tak maw?”
“I nu’n a hrilh lo che em ni?”
“Min hrilh hman lo a niang.”
“Hman lo a’ i nu chuan eng nge a tih a?”
“Nikum hmasa khan a thi tawh a lawm.”

“Vala a pawi ka ti hle mai, sawi loh tawp tur ka sawi pui che niin ka hria, min ngaidam ang che,” ka ti a. Chu naupang chanchin chu chiang lehzuala hriat ka chak a.

Chaw kan fak zova, naupang chuan,“I chaw ka eipui ta si che a, ka Pu eng nge ka tih sak ve thung ang che?” a ti a. A sairawkherh ken lai chu a vai vir pap pap a.

Naupang dar chu ka kut dinglamin ka nem a, “Vala, thil min tih sak turin ka phut lo che, thil min tih sak lo turin ka duh zawk che a ni,” ka ti a.

“Ka Pu, i thusawi chu ka hrethiam hauh lo mai.”
“Englo a nia, sava hi perh tawh lo la ka ti a ni.”

“Mahse, ka Pu, he huan hi ka ta a ni a, a chhunga awmte pawh hi ka ta vek a ni tih ka nuin min hrilh a ni, ka nu chuan dawt a sawi ngai miah lo a sin.”

“I nu chuan a hrilh hman lo che a ni maithei,he huan hi Pathian ta zawk a lawm.”

“Mahse, Pathian chuan he huana thing leh nungcha zawng zawngte hi a vaiin min pe tawh a lawm; sava te pawh hi,” naupang chuan a ti a.

Chu thu mawi tak chuan min hneh takzet a, sawi mai tur hre lovin ka ngawi reng a. Ka thinlung chu huan mawina leh Pathian hmangaihna mak tak chuan a rawn luah khat mup mup hian ka hria a. Naupang mitah tak chuan ka han en a.

“Vala, i hming min hrilh phal em?”
“Phal tehreng mai, Lalawmpuia a nia.”
“Hming mawi tak a nih chu le.”
“Ka pu ka tanpui i duh si lova, ka kalsan phawt mai ang che.”

Naupang chuan zuang tum elh elh chungin min kalsan ta a. A kal liam thlengin ka en zui reng a, ‘naupang fel tak a nih reuh kha’ ka fapa chuan nu fel tak a nei a;mahse, a ni kha chuan nu a nei ve tawh si lo. Khawiah nge a chen a, tu nge enkawl tih te ka lo zawt ta lo chu pawi ka ti hle a.

Khaw eng rorelna chu zan thim chuan luahlan tumin, chhawrthlapui chuan ni chu a vuiliam mek a, helai hmun nuam takah hian engti tura kal nge ka nih? Thawnthu, mite lungkuai thei tak tur ziah tumin chawfun meuhin ka thawk chhuak a ni. Ka ziakfung leh ziak loh bu ken la chuan eng thu mah ka la ziak si lo, thawnthu ziah lam a lang lo a ni.

Nimin lam ang bawkin ka hlawhchham lehta a nih hi. Kan nu chuan eng thu leh hla nge ka ziah min lo chhiar sak a tum leh ngei ang a, kei lahin engmah chhiar tur ka hawn dawn si lo, ‘vawiin chu ka hlawhchham leh ta a nih hi.Ka thutna atangin ka tho chhuak a, chhaktiangah chhawrthlapui pawh a eng pawl ruai tawh a, ka thawmhnawa hnim hnah kaite chu ka bengfai thawk thawk a, haw turin ka inpeih ta.

Ka haw kawngah chuan vawiin a naupang ka hmuh kha ka ngaihtuah zui neuh neuh a, sava kha a veh zui ta zel ang em, a kal ta daih si a. Ka kal zel a, huan kawngkhar bula thlanlung pahnih inphunna ka thlen chuan thla chu a eng tawh kher mai. Zan lam nungchate pawhin an thawm mawi tak an rawn chhuah tan mek a. Helaia thlanlung pahnihte hi chik lem lovin vawi eng emawzat ka kal pel tawh thin a, hmanlai mi tute nupa emaw thlan ani ang tih ka ring satliah ve mai a ni.

Zanin tlai erawh chu eng emaw takin min mawlh tlat a ni awm e, thlanlung chu tute thlan nge a nih en ka duh ta riau a, thla a eng tha bawk a, tlema han bih hnaih deuh chuan thlanlung thu inziak pawh chiang takin a hmuh theih a ni. Thlanlung pakhatah chuan heti hian thu a inziak a.

Lalrimawii : Kum 47
Thihni : 19/5/99
‘Pathianin Huan neitu a ni a ti’
tih hi.

Thlanlung te zawkah chuan heti hian a inziak ve thung a.
Lalawmpuia : Kum 8
Thihni : 19/5/99
‘Pathinin Huan rochuntu a tana a ruat chu’

tih hi. Chhun lama naupang ka biak kha, ka mur deuh chuai a. Ekhai vawiin chu ka hlawhchham hauh lo mai.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)