One Year Of Love Is Better Than Life Time Alone’
I
Ka pian a hnu lamah sava takngial pawh ka perh thlâk ka la hre lo. Nungcha humhalh tih velin min hneh êm vang pawh a ni hran lo, nunna chhat tura hriamhrei han chelek vel hi ka zei lo hranpa ve rêng rêng a ni ber.
Thianpa Zara leh Rina ten phûr zet maia ‘Ram kal ang’ tia min rawn sâwm pawh chuan ka phûr lo khawp mai. Hriam hrei chelek ka zei loh tluk zetin ram kal tih vel pawh hi ka zei lo va, ka zahmawh thênna lam a ni ngang lo a ni. Mahse, inrinni a ni a, pisa kal loh ni a lo ni chhap nen, in lamah lah ka chhûngte an awm a, in nghah a ngai tih chhûanlam han siâm bûangbar vel chu a rem teh teuh si lo.
Chu zawng aia ka thiante ka hnial hreh chhan a la awm, nizanah zu kan in ho a, tlemin ka lo lem hnem deuh a ni ta ve ang, ram kal ka châkzia leh ramah na nâ nâ chuan ramvachâl ka nih thute ka lo sawi chiam pek a. Ka fiamthu mai mai tih zawng an hre tho; mahse, an ngêiawm tukhum pâwn an rawn chhuah ve hrim hrim a ni. Anmahni pahnih pawh hi ram kal tih vel lamah chuan zui tlak êm êm chu an ni bik lo. Pisa khatah kan thawk tlang a, kum tam kan lo inkawm tawh, khual khuaa ka thisen zawmpui nazah zawngte ngawt ai chuan an ni pahnih Rina leh Zara hi ka ngai pawimawh zawk fe tih pawh zep ka tum lo.
Tukthuan eikham a ni a, ram kalna atana inhmeh deuh ber ni âwma ka hriat kawr leh kekawr ka ha a. Ka inpeih chu a ni der mai. Thianpa Rina te hian Phunchawng thlang deuhah ram zaupui mai an nei a, kan kalkawngin a zir bawk a, Rangvamualah kan han ding phawt a, tikte khat kan han paipawn phawt a, kan in ngei dawn tih kan hre chiang tlang bawk a, kan hmanhmawh lo.
Fiamthuin office-a kan thawhpui nuthlawi Mamuani kan sêp thla a, pa nei nung tih takah thianpa Zara phei chuan vawi khat chu a lo chû-kha tawh a ni awm e. Nui bâwk bâwk chungin kan tum ram Phunchawng chu kan lut ta hlawl a, motor-a kal zui a rem tawh loh avangin kawngsir remchâng laiah motor chu kan dah a, ke in Rina te huan lam chu kan pan thla ta hnak hnak a.
Thiante pahnih chuan ulhbun an keng ve ve a, kei erawh chuan Rangvamual atanga kan lak, chhâwlhãl dawm tura kan tih, Tikte (Tikte han tih mai hian zu in thang chuan an hrethiam mai ang, zu in ngai lo tan chuan hriatthiam a har deuh mai thei, a awmzia ber chu chow pack-naa thun zu fun li tihna mai a nia ) chu ka bag-ah ka hnungpuak a, ka kâwngah chemte hriam vak lo ka pai ve tât bawk a.
Thlam nuam ang reng tak mai hi a lo awm a, motor nei hlei lo keini takngial pawh a hminga Aizawla han awm ve tâkah chuan kea kal a khât a, thlam kan han thlen thlak meuh chuan biangah thlan tui a far kawi duah duah tawh mai, a bul tan nan ka bag-a kan ‘thil’ ken chu ka han seh hawng a, rial no bal zet pathum hi thlamah chuan remchang deuh hian a lo awmve kher bawk nen, kan ram kal bul tan nan no khat theuh chu kan han dawm tlang ta phawt a. Hah a dam huai mai. Amah kan Pu A.Thanglura tih dan takah ‘ruh nei hlei lo hrawka tui si’ hi chu nghei a har a ni.
Thianpa Rina chuan, “Zuala chu, hriamhrei hman tlak i keng ve mang si lo va, ti hian thlamah hian lo hah chawl la, keini Zara nen saw lai bûng bula rah tlan saw kan lo va chang ang’e, i peih leh mei kha lo nun la, kha buhfai pawh a awm kha, tui lah a tam, i duh dan danin lo khawsa mai rawh, englo erawh kha chu lo englo bik vek lo la,” a ti a.
“Nia, va kal tak teh u, chemtê a sava vawm thlak chu ka huphurh zawng tak a ni reng reng, chaw chu ka lo chhum dawn nia, a hmeh tur in rawn kap thla thei ta ngang lo a nih pawhin thlam bul velah hian maian han sih mai tur a awm nualin ka hria,” ka ti a.
Thiante pahnih kal liam tur chu thlam kawngkhar tlabal zet atang chuan ka thlir liam a, mei ka nun nghal a. Thlam bul velah chuan maian leh bawkbâwn tlem a zawng a awm bawk a, engmah rawn hawn lo mah se, hrawk ti tlai khawp chu kan hmu mai ang tia inhnêm chungin thlam namthlak bulah chuan patling tih atana mawi lo zet khawpa dawrh sawrh hian ka mu ta duai a.
Engtikah tak silai puak ang maw tia ka ngaituahna ka kawm kual mai mai lai chuan ka lo muhil ta a. Mumang ka lo nei a. Ka mumangah chuan, ‘putar sam var deuh veu vo tiang lianpui keng hian thlam hnuai dap rawh, thlam hnuai dap rawh,’ hi mi lo ti mawlh mawlh mai a. Ulhbun puak ri dawp chuan min ti harh zawka, ka lo muhil tui hman hle a ni awm e.
Thuka ka tui chhûan chu a lo so ri bawrh bawrh tawh a, arang arangin buhfai chu ka sil sawk sawk a, no li tha lam êl âwl hi ka thlak zui nghal a, ka chhum fuh viau loh chuan ka chhûm fuh lo ngawt ang. Silai ri kha ka thiante silai ri a ni ngei ang tih ka chiang a, eng emaw chu an kap a ni ngei ang, a fuh leh fuh loh erawh an rawn haw hunah a chiang mai turah ka ngai.
Ka mumang chu ka rilru ah a lo lut zawk a, putar kha a takah ka hmuh ngai reng reng ka la hre lo. Eng thu nge a sawi kha ka hrechhuak mai thei tawh tlat lo. Mumang naran mai mai zawng niin ka hre lo.
Ulhbun han ri leh thawr hi ka hria a, a hnai hle. Thlam bul maiah a ni, thiante hian fiamthu bawraw zet mai hi min thawh khum an tum pek em maw ni le ka ti a, sana ka han en a, tlai lam dar thum chiah a ni.
Chutah intithei fe hian Sakhi patuai nalh zeih zawih tak hi thianpa Rina chuan a rawn kuah ko ki chhuan lut a. Zan riah tuihnai a awm dawn a. Khua a tlai deuh tawh avangin kan puah sawk sawk a, rah tlan sava mai mai kan beisei (?) laia Sakhi patuai an rawn khai haw ta nual nual mai chuan min ti hlim kher mai.
Ka chaw chhum chu ka’n suan a, sakhi patuai khel bawr leh a pumpui tuihnai lai vel tura kan rin chu kan chan sawk sawk a, maian tlêm ka lo sih nen kan chhum ta a, unau hmel hai a ni tep tawh. Mahse, hunin kan hlimna te chu a luahlan zo lo, a tikte chu rialno ah ka han thli a, kan thil chhum rimtui zet mai chuan hnar a verh nung sawr sawr mai bawk nen. Nuam ve ham ham tak chu a ni.
“Engti tih tiha hetiangte rawn kâp thlu thei nge maw in nih le! Chawngzawng pahnih vel in rawn ak haw nelh nelh ang chu tih nâk alaiin,” ka han ti a.
Thiante chuan thil thlen dan chu an sawi tha vak duh lo, an sawi chu awih tur nge awih loh tur pawh ka hre chiah lo, engpawh nise, an sawi tha duh emaw sawi tha duh lo emaw, sakhi patuai chu tunah hian ei mai theih turin buatsaih mek a ni tlat. Thla a mûang a ni.
In lamah min lo ngaihtuah a kan haw hun lo ngai chang a, an thla lo phang ngawih ngawih tur an awm lo tih kan hre tlang a. A nihna takah chuan vawiin ah hi chuan kan haw an ring lo hrim hrim, keini pawhin haw nghal mai chu kan tum lo sa bawk, chu chu kan chhungte nena kan inkar chu a ni. Ngaih han ti tha lo tu hlek eng emaw tal pawh a awm miah lo chuan ngaih a ti tha lo lek lek zawk a ni.
Khawtlângin an ngaihdan chuan tlangval senior kan ni vek tawh a, zanah eng hunah pawh haw ila chhungte ngaih a tha tho, kan haw tlai poh leh an ngaih a \ha telh telh emaw tih mai tur a ni. Chutiang vel thah chu kan nih avangin thaw a veng angreng phian a. Nupui aia zu kan la thlan hlawm avang a niang; tun thlenga nupui kan la neih hlawm loh nachhan pawh hi.
A enga pawh chu nise tun hi chu nupui tih vel lam aia sakhi sa theh darh hun a ni. A veilam tur lah kan nei tling puau mai bawk. Hei bak bak hian khawvel hi a nuam thei chuang dawn em ni. Naktuk lah Pathianni (office chawlh), zanin lamah lo meng rim deuh mah ila naktukah nilêngin kan mu thei tho dawn a. Tingtang kan lo ken theihnghilh hlauh chu a pawi ngawt mai. ‘D Chambawihpui’ han tih veng veng nan a îtawm riau a ni.
II
Thla chu chhum karah a rawn de leh zeuh zeuh thin. Kan ineitin puar tlang ta bawk a, mut bâk hmabâk kan nei tawh lo. Khua a vawt vak lo a, mahni jacket theuh chu kan lukham atan kan hmang a, thlam chhuat ah chuan kaw kalh nuaihin kan mu ta hlawm a.
Chhun lamah ka lo mut sek tawh avangin kei chu ka mut a chhuak ve thei lawk lova, ka thiante pahnih an mut hnar suk suk tawh hnu pawh chuan nghate rep ang maiin ka la meng kar mai.
Ka chhun mumang bawk kha ka ngaihtuahnaah a lo lut leh ta thut mai, ka chan deuh ber chu thli chak mai hian ka rilruah a rawn lên lut thut ni berin ka hria. ‘Thlam hnuai dap rawh, thlam hnuai dap rawh’ tih ringawt mai hi ka lubur-ah hian a inthum rawn ta tlut tlut mai. Ho mai mai, mumang mai mai ka’n ti zet a; mahse, eng emaw tak min tur tet tet tu awm ang mai hian thlam hnuai zu en chu chakna riau ka nei ta tlat mai.
Thiante tih harh hlau takin, hmeh-ên (torch light) ka la a, eng emaw hlauhawm deuh te a lo awm tak thutah tiin ka chemte chu ka han hum a, thlam hnuai lam chu ka pan thla ta a. Mumang thil mai mai mah ni se, nuam ka ti lo tawp. Hmeh ên chuan thlam hnuai chu ka han ên kual dan dan a.
Eng teh vak mah hmuh tur a awm pawh chu ka hre lo, hnim bawrchhawr tlem azawng a to a, bahkhawr emawni hi tlem a to bawk a, chuti deuh zawng chu a ni mai. ‘Ho mai mai mang’e’ tia thlam lam pan leh ka tum lai tak chuan eng emaw ni thil chang deuh rut hi ka rapin ka hria a, hmeh ên chuan ka han ên vat a, kut leh lamin chemte chu ka hum thlan dup mai bawk.
Bawm ni ngeiin ka hria, chemte chuan ka han vit chhin a, bawm naran mai a ni lo tawp mai. Thir sakhat tak a ni tih ka hre thei mai. Lak chhuah ngei tumin ka bei zui ta a. A lo lian vak lo bawk a, rei lo têah Bawm killi nei inchis sawm (10) kual vel tur tala te reuh tê a inkalh hi ka hai chhuak ta a.
Thiante hrilh vat tur a nih hi tiin ka han ngaihtuah ren rawn hman a; mahse, ka rilru ah ‘Hrilh suh, i thiante hrilh hlek suh’ tih hi a lo lut zawr zawr mai. Chu aw chu ka mumanga putar ka hmuh ‘Thlam hnuai dap rawh’ titu aw ngei kha niin ka hre leh nghal, hlauhna hian min rawn man a, ka chil te a rial dawnin ka hria, ka zun lah chu a chhuak êm êm mai bawi si. Thiante hriat loha thil han zêp ruk chu ka hreh khawp mai; mahse, ka thinlunga min rawn be thintu aw chu ka hlau deuh tlat a ni.
Thlam lamah chuan ka chho leh ta a, thiante pahnih chu mitthi ang hlauh an ni, an lo la mutui chiah chiah khawp mai. Chu bawm killi nei chu hawng lovin ka bag ah chuan ka thun ta daih a.
A tuk Pathianni chuan Phunchawng ah zu tikte kan han la leh a, a hmunah in an phal loh avangin thlam lamah bawk kan inthiar thla leh a, nimin lama kan sa ei bâng nen puar el euhin kan lim leh ta nek a. A tuk thawhtan (tuk sakei) office kal ni a nih tawh avangin thlama riah leh ngawt chu tih chi ni tawh hek lo. Tlai lam a lo nih chuan pai deuh tuang tuang chungin motor awmna lam kan pan chho ta hlawm a.
Zan dar sarih velah in kan thleng thei hram a ni. Buaina kan tawk lova, kan vannei khawpin ka hria. Haw hlan ka nghakhlel lutuk chu thiante ngaih a tha lo lek lek zawk a. Chhuanlamah, “A, chhungte paw’n min ngaihtuah ve êm êm tawh ang, naktuk office kal a ni leh mai tawh si a, i haw phawt mai zawk ang u,” ka ti a. Anni chuan thianpa Zara inluah lamah kan zu in bang chu va lem zawh law law an rawt a, “A tam tham tawh chuang lo bawk a, ka kian ang che u, ka haw phawt zawk ang e,” ka tia, ka kalsan ta a.
In ka thlen veleh tuilum sa ver vawrin ka inbual nghal sar sar a, sakhi bawp kha chan darhin kan insem a, ka thahnem ngaiin bahkhawr tlem ka hawn bawk a, chu zawng chu ka ram kalin ka hawn chu a ni mai. A nihna takah chuan ram kal tih lêmah Phunchawng tih vel mai mai a kal kha kan nia, thil ropui tak ka hawn kha ka chhungte paw’n an ring lo sa reng a. An rin loh deuha sakhi bawp ka hawn chu mak an ti hle zawk a ni. Tu kah ber nge tih lah ka sawi duh der lo. Nuam ve tlat alawm.
Ka pindanah ka lut a, ka bawm chhar kha ka keng lut a, ka chhungte hnênah chuan, “ Ka chau a nia, tuma’n min rawn ti buai su,” ka ti bung nghut a. Ti kher lo mah ila, min rawn ti buai chuang lo ang. Kan chhungkua hi panga kan ni a, nu leh pa ka la nei a, farnu pahnih ka nei bawk a. Sum thawk chhuaktu ber ka nih ve avangin chhungte pawn min zah der ve a, duat pawh min duat ve hle a ni.
Bawm mawlh mai chuan ka rilru a luah khat a, a chhungah eng nge awm ang, rangkachak tlang lianpui emaw lunghlu tlang emaw te hi a lo awm nawlh mai anga ti ten ka ngaihtuah a. Hawn vat vat a tul a ni.
Choka-ah tuboh leh chemte ka va la a, ka chhungte chuan ka sakhi bawp hawn mawlh kha an lo la buaipui hlawm a, eng nge ka tih pawh an ngaihtuah lo, a tih zia phian mai.
Bawm chu hun rei tak leiah a inphum tawh a ni ngei ang, a then lai chu a tuiêk deuh tawh a, uluk deuhin pawnchhiain ka han hru fai, chutah zawng a landan a dang ta zar mai. Bawm naran mai mai zawng a ni lo tawp mai le! Vanneihna, ka vanneihna tur Bawm a nih ngei dawn hi ka ti rilru a, a in kalhna tala te reuhtê chu tubohin ka han chhu koh koh a, rei lo têah ka chhu chhe ta mai a, huphurh, nghakhlel, helhhawlh nuaihin bawm chu ka han hawng ta a, rangkachak emaw lunghlu emaw thil dang sum a han chantir theih tur chi rêng rêng a lo awm awzawng lo mai. Beiseina ka lo neih san tawh teh reng nen, ka hnual nghal rawih mai.
Bawm chhungah chuan lehkha a lo awm a, fullscape A4 size a ni, a ung deuh khurh tawh a, a chungah chuan phek number a inpe thlap a, a vaiin phek 40 chiah a ni. Silver zungbun lian tha hre hraw tak hi a awm bawk. Kutziak nalh tak hian thu a inziak khat vek a, a phek hmasaber dinglam chung kilsir ah chuan ‘Ziah ni 2009, March 31, Pari leh Mawia’ tih hi fiah takin a inziak a.
A ziaktu hming emaw thil dang engmah inziak a awm lo. Tu pa nikhua lovin emaw thawnthu ziah a tum ang a, a tih chhuahna tur sum a nei leh si lo ang a, ti hian a thulkhung bo ta a niang tih ngaihdan ka han nei hmasaber phawt a, chutah, ka mumanga min rawn betu putar khabe hmul leh leh sam sei var suau mai, tiang lianpui keng kha ka mitthlaah a rawn lang zawk a, ka ngaihdan hmasa ‘tu pa nikhua lo thu hla mai mai’ tih kha chu ka thlak leh nghal vat a. Eng emaw thuruk ropui tak a ni ngei ang tiin ngaih dan ka han siam leh hnuhnawh a. Eng pawh nise, a chhunga thu inziakte chu chhiar ila a chiang mai ang tiin a phek hmasa ber atang chuan ka chhiar tan ta a....
Ziah ni : 2009, March 31
Hmangaihna chuan mi chak lote a kai tho a, Mi chakte a titlu thin.
Chhiartu duh tak, he lehkha hi i tan thu ho lam mai mai pawh a ni thei a, thu runthlâk tak pawh a ni thei. He hmangaihna kawng hi i lo zawh sual ve tawh a nih phei chuan nangmah hnêmtu lehkhaziak tha tak pawh a ni mai thei. Khawngaihin engmah hmaih lovin chhiar chhuak dap la, i chhiar zawhah i halral dawn nia. He lehkha hi thlam pakhat a ka ziak a ni a, thuhrukna tur dang ka hriat loh avangin thlam hnuaiah ka phum a, ka phum zawh ah thingthiin Vana Pathian Jehova hnenah ka tawngtai a, ‘Lalpa he lehkha tlawm tak hi, tuma chhiar lohva a riral mai ka phal lo va, khawngaih takin, a chhiar âwm mi hnênah i thlarau thianghlim chuan a kawng kawhhmuh la zawn chhuah tir ang che, uluk taka a chhiar theih nan chu mi chu malsawmnain vûr la, he hmangaihna kawng chhuk chho tak ka zawh dan hi a hriatthiam theihna turin finna pe bawk ang che,” tiin.
Ka tawngtai zawh chuan ka tawngtaina chu chhânin a awm dawn tih chhinchhiahna ka dawng nghal a, ka thla a muang huai mai. He lehkha chhiartu duh tak, nangmah ngei hi Pathian mi thlan chu i ni e. Ei tur ka nei tawh lo va, vawiin ah hian ka thih loh paw’n naktuk ah chuan ka thi tawh ngei ang. Thil nasa tak ka tihsual avangin Pathian chuan min hrem a; mahse, tunah chuan min ngaidam tawh; a chunga ka thil lo tihsual tawhte erawh chu a hnên ka thlen theihnan a mal malin min hriatchhuah tir a, ka chungah a duh ang zánin phuba a la a, Pathian meuhin mihring chunga phuba a lak chuan tu mihringin nge do zo ang le ka thian. Ka tawrh tur zawng zawng ka tawrh zawhah Paradise ah lak chhohin ka awm dawn tih erawh ka thlarau hian a hrechiang a, chu chu ka tan a tawk a ni. Pathian chuan a fa a hmangaih chu a vaw \hin a ni.
(Lehkha mak tak mai niin ka hria a, ka khum bula table lamp chu ka hmet eng a, zanin hian ka chhiar chhuak pap teh ang tih rilru puin lehkha chu ka chhiar zawm leh ta a)
Number 4 addict ka ni. Inchhung thil ka hralh ruk nasat em avang leh zah pahna nei miah lova ka chhungte ka vau \hin avangin ka pa chuan a fapa atan min duh lova, min tuithlar a. Ka pa hi dem loh pawh tum ila dem loh har ka ti, officer lian a ni a, sum tam tak a eiru a, a eiruk rah chu a fapa hian ka lo tlan ve a ni mai a. Ka addict na a\anga min chhan chhuah tumin damdawi thiam chitin reng an râwn a, treatment hrang hrang, addict centre, home, camping, luh lohna ka neih pawh ka hre tawh lo, pawisa kan neih miau avangin miin a tha an tih piang kan pan zel a. Mahse, ka nghei thei chuang lo.
Kum 25 ka nih chuan ka pa nena kan inzawmna chu chhut chah a ni ta a, riahna tur ka nei tawh lo, khawlaiah ruk tur awm apiang ka ru a, gas bur ringawt pawh engzat nge ka ruk ka hre seng tawh lo. Mobile phone ka rûk avangin Central Jail-ah vawi 5 ka tâng tawh bawk.
Kum 26 ka nihin, ka nuin khawlaia ka awm lai min rawn zawng chhuak a, mittui nen min ngên a, “Kan vengin camping an siam dawn a, khawngaih takin bawihte lo haw leh hram rawh, camping-a i luh duh phawt chuan i pa thinrim pawh a ziaawm mai ang, tunah chuan i pa pawh a danglam tawh, a eiruk pawh a sim tawh, Pathian thu chauh lo chu buaipui a nei tawh lo. I hming a lam a lam thin che a sin,” a ti a.
“Ka nu, a tawp tawh, awmzia a awm chuang lo vang, ka tel lo hian in hlim zawk, ka lo haw leh chuan a hma ang bawk kha ka ni leh dawn a, chhungkua ka chawk buai leh vek dawn a, khawngaihin min kalsan zawk mai rawh, ti hian ka thih hun ka nghak tawp mai ang, in chungah thil ka tisual a ni. Min ngaidam dawn nia. Tunah chuan ka nun hi a beidawng tawh a camping tih vel mai mai a, siamthat leh theih chi a ni tawh lo,” ka ti a, dawt ka sawi hauh lo.
Mahse, ka nu chu a beidawng duh awzawng lo mai, “Bawihte, tun tum chauh, Pathian chuan mi beidawngte hi alawm a tanpui duh thin, ngaihdam dil thu-ah phei chuan i chungah hian ngaihdam dil tur kan ni zawk a sin,” a ti a, a tap ta a.
Nu hmangaihna phunchawng a kur dûam dûam an tih hi a lo dik a ni. Ka nu mittui chu ka hmu thei lo, ka hnuk a ulh a, ka nu chu ka pawm thlawp a, “Ka nu, i duh ang chuan ni rawh se, ka lo haw ang, camping-ah pawh ka lut ang e,” ka ti ta a.
Camping hi chu ka lut zing tawh bawk a, an kalphung tlangpui chu ka hre ve thawkhat tawh chuan ka inhria. Sual thu, duhthlanna, van indona, adt. ninawm em em vek ni mai hian ka hria.
Camp kan chhuah dawn zan chuan ka muhil thei hauh lo mai a, ka han hawi kual a, midang chu tui takin an mu hlawm tih ka hria a. Tih tur ber pawh hre lovin pawnah ka chhuak a, biak in chu êng deuh kulh hian ka hmu a, councellor ho an tawngtâi leh a nih dawn hi ka ti mai a; mahse, ka ke chu ka thunun thei ta hauh lo mai, ka kal tum miah lohna biak in lam pan chuan hmanhmawh zet hian ka kal ta hlawk hlawk mai a. Mak ka ti kher mai. Ka rilru chuan a duh lo; mahse, thil eng emaw, kei aia chak daih hian min thunun tlat a ni. Ka tang thei dêr lo mai.
Biak in kawngkhar chu ka pawt hawng rawk a, tumah an lo awm lo leh nghal, nuam lo ka ti kher mai. Min thunun tu ka tih mai biak in lama min nawr kaltu khan biak in Maichâm hmâah chuan khup pilh thawt khawp hian min thingthittir a, lungchhe vankaiin ka tap ta chiam mai a ni. Ka tah nachhan awm pawh chu ka hre chuang lem hlei lova. Chutah mak tak maiin Pulpit atang chuan êng var nalh tak mai hi a lo êng chhuak a, chu êng chu êng tak a ni, he khawvela eng êng nen mah hian tehkhin tur ka hre lo.
Eng chu ka lam hawiin a rawn êng phei zel a, chiang lutuk tak mai hian min rawn chhun ta siah mai a, khawvel thil a ni lo tih a chiang e, êng chuan min chhun tlang vek a. Vawi leh khatah ka rilru chu hlimna sawi hleih theih loh hian a lo khat a, ‘Ka Piangthar ta’ tiin ka au chhuak ta vak mai a. Chutih lai chuan biak inah eng nge thil thleng tih ngaihvenin counsellor thenkhat chu an rawn lut a, êng ropui zetin min chhun tlang sut mai chu an rawn hmu a, a tir chuan an hlau ve deuh a ni ngei ang, an ngawi thap a; mahse, thlarau thianghlim hnathawh a ni tih an hre chhuak ta a ni ngei ang, vawi leh khatah, “HALLELUIA” tiin an au chhuak ta a. Kan ri ta chêl chûl mai a ni.
Pianthar hi hrehawm ngawih ngawih turah ka lo ngai thin a; mahse, ka hlauh ang chu a lo ni miah lo. Nuam hlir erawh a ni lo. Chuta tang chuan kawng tha ka zawh chho ta ngar ngar a, kum hnih a vei hnu phei chuan KTP leh kohhran lamah pawh chanvo pawimawh tak tak ka chelh chho ve ta fur mai. Hrehawm ka tih ber chu ka chhungte ka lo tih retheih tawhna leh kan inchhung bungrua tam tak ka lo hralh ral tawhte rulh let lehna tura hnathawh mumal ka nei lo chu a ni.
Mahse, engkim ti thei Pathian ka nei a lawm tiin Pathian hnenah chuan hna ka dil ka tlut tlut mai a. Thiam lah chu ka nei tlêm nasa mai si, computer ka nei a, pagemaker ka thiam, games ka khel thiam hle bawk, chu deuh zawng chu ka thiam neih chhun chu a ni mai.
Ka beisei angin hna chu ka hmu mai lo, ‘Vanglaini’ a hnathawk tur an duh thu an chhuahna te chu ka en a, ka dil theih ve awm tawka ka ngaihte chu ka han dil ve thin, lak loh pawlah ka tang leh thin. Ka beidawn tawh lamah mak tak maiin ka thian hlui pakhat hian hnathawh tur tha tak min rawn kawhhmuh ta hlauh mai a. Ka lawm ngei mai.
He ka thianpa hi Private company pakhata hnathawk a ni, sawrkar hna a hmuh tak thut avangin a ai ka awh theih mai a rin thu min hrilh a. “I duh phawt chuan hna chu ka hmuhsak thei mai ang che,” a rawn ti a ni. Ka va han lawm tak êm. Pindanah ka tlan lut a, Pathian hnenah lawmthu ka sawi nghal mawlh mawlh a.
Hna chu ka han tan ta, a tir lam chuan ka thiam lo hle a; mahse, ka thawk rei telh telh a, a tihdan kawng ka hrethiam ve tial tial a, kan pute pawhin min ring telh telh a, nuam pawh ka ti sawt hle. Rei pawh ka thawh hmain Asst. Manager ah ka kaisang ta nghal mai a, Pathianin min chawisáng a ni tih ka hria, a hnêna lawmthu sawi ka bâng ngai lo.
Nitina hnathawh chu ka tan thil awlai a ni lo. Mahse, rim taka hnathawh chu ka tan a tha tih ka hria, sual lam ngaihtuahna hman ka nei miah lo, chu chu ka mamawh tak pawh a ni.
Ka chhungte pawhin ka thawhrimzia an hria a, min duat thiam hle a, ei leh in chungchângah pawh a tui tha tha min hlui a. Ka chhungte min hmangaihna hi ropui ka ti tawp thei lo.
Pathianin mal min sâwm a, kan company thil hralh chhuah pawh a pung ve telh telh a, hna thawh tur pawh a ni têlin a pung a ni ber. Ni khata darkar 10 kan thawh pawhin kan thawk zo hman mang lo a ni ta ber mai, kan pute hnênah min tawiawmtu tur lak belh kan ngên a, kan pu chuan, “Nia, kei pawh ka lo ti deuh a, in rim lutuk mah mah a ni, pui tur che u thawktu pakhat chu kan ngaihtuah vat dawn nia,” a ti a.
A hnu kar hnih velah hmeichhe pakhat hmeltha zet mai, kum 30 vel hmelpu hi min pui tur chuan an lak belh ta a. Mahni chauha hnathawh ngawt ai chuan midang titi pui tur an han awm ta ngawt pawh chu ka tan chuan lawmawm tak a ni.
Thla khatah Rs.2000/- a hlawh ve a, chu ngawt pawh chu an chhungkaw tan chuan hnemhnanna tham takmeuh a tling ve niin a sawi a. A bâk chu an chhungkaw chanchin ka hre vak lo, nula nge a nih nu tih pawh ka zawt ngai lem lo, ka tan hriat kher a tulna a awm pawh ka hre hek lo.
A mawng a zãng a, tirh a hnial ngai lo va, thil thar zir erawh a harsat ang reng. Min pui tur deuh bika lak thar a ni a, pindan khatah hna kan thawk dun thin. Hna har deuh thenkhat erawh ka hrilh ngial pawhin a lo ti dik lo leh nuai thin, mood fuh loh deuh tum phei chuan han inhauh bawrh bawrh chàng pawh kan ngah hle. Mahse, nitina thawk dûn a, inhmu reng kan nih miau avangin inhuat hlen tak tak chu a theih loh. Han in hau deuh thin mah ila a tâwpah hi chuan kan nui dun leh nge nge thin.
Ni tina thawk dûn reng ta na ná ná chu hun a lo rei a, kan innelin kan inhrechiang telh telh a, kan mizia a in ang vak lo naâ, fiamthu kan duh dun a, darkar 8 tih vel te hi chu hah pawh hre mang lovin hna kan thawk dun thei a ni.
Mipa leh hmeichhia chutianga room khata inkhunga awm dûn reng ta na ná ná chu kan lo inhnaih telh telh a, kan inkawm ngeihna chu hmangaihnain a rawn luahlan \an ta. Ngaihzawng nei ngai lo ve ve kan ni a,(kan insawi danin?) hmangaihna tuipui chuan kan inrin hmain min tuam ta hlup hlup mai....... ( Sana ka han en a, zan dar 2 a lo ri reng tawh mai, chhiar zawm chu la chak hle mah ila, naktuk lamah ka chhiar zawm tawh mai ang, office kal ngai nen, ka chau lutuk dawn e ka ti a, uluk takin lehkha chu bawm chhungah ka dah leh thlap a, êng ka ti thim a, tui takin ka muhil ta a.)
III
Zing dar 7-ah ka harh hlawl a, office kal a ngai tih ka han hre hmasaber a, ka peih lo kher mai. Ka lukham bula bawm dum ren run chhunga lehkha inziak chuan maknet chak tak ang maiin min hip a, Mawia leh Pari chanchin kal zel hriat chaknain ka khat a; mahse, office thulh ngawt thei ka ni si lo. Tuidehnaah ka inphih fai a, tukthuan eikham chuan peih lo zetin office lam chu ka pan ta hna hna a. Office lam thil pawh ka ngaihtuah hleithei lo, ka thawnthu chhiar kha engtin nge ni zel ang tih mawlh chuan min kàp a, sana ka en sek reng mai, office ka kal a chin-ah tun ang reng reng a tlai dar 4:30 a rik har tum hi ka la hre ngai lo. Sana in dar 4:29 a kawh chuan ka dawhkana lehkha intiang vum thur te chu ka rem fel sawk sawk a, hmanhmawh zetin office ka chhuahsan nghal a, nidangah chuan bus ka chang thin; mahse, vawiin chu ka rilru ah bus lam a lang lo tlat, taxi ngatin ka haw a ni. Nidang aiin in ka thlen hma phah ta reng bawk.
Zanriah kan ei lai chuan chaw bar nachang hre lovin ka chaw thlêng chu ka lo en leh vung vung thin ni ngei tur a ni, ka nu chuan, “Mawia, i ril a tam vak na nge? Hei a hma tawh lo a nia, zanin thalai inkhawm zan a ni lehnghal,” min rawn ti a, ka harh zawk a, hmanhmawh pheleng hian chaw chu ka bar sawk sawk a, eng nge kan hmeh pawh ka hre lo, ka kham hmasaber a, tuidehnaah ka inphih fai zawhin ka pindan-ah ka lut nghal a. Thil pakhat hriat chhuah zawk ka nei, lehkha hnutchhiah tu khan ‘i chhiar zawhah i hal ral nghal dawn nia’ a ti a. Mawia (Lehkhaziaktu) chuan Pari nena an inhmangaihna chu puanzar tam a duh lo a ni ngei ang tih ka ring; mahse, ngaihdan dang ka nei thut, tun atang chuan ka chhiar pahin computer-ah ka chhu lut hmiah hmiah tawh ang, duh leh an hming hi chu ka thlak kual mai ang. Tichuan an mualphona tur chu thup a ni mai dawn a ni tiin ngaihtuahna thar ka nei ta a ni.
Han rui ve bâwk bâwk thin mah ila, thawhtan zan thalai inkhawm na na na hi chu a theih hram chuan inkhawm ve ka tum thin, inkhawm tura ka insiam zo sitting room a ka va chhuah phei chuan ka nau Makawki’n, “Ka u chu le, ti khan em ni inkhawm i tum a, i kawr nghawng te kha, darthlalangah pawh i in en miah nange,” tih pahin ka incheina phelh deuh phung chu min siam that sak mawlh mawlh a. Ka naute hi ka nalh loh hlau reng renga min ngaihtuah reng mai an ni a. An chungah lawmthu ka sawi ngai lem lo naâ, ka lawm êm êm a ni tih chhiartuten min hriatsak dawn nia.
Inkhawm chhung chuan ka rilru ah Pathian thu a lang thei lo reng reng, haw vat vat a, Pari leh Mawia chanchin mawlh chhiar leh ka chak tawh, zan danga ka awmdan ka ang lo deuh a niang, thiante pawn, “Zuala chu vei nei i ang riau mai, in hna lamah harsatna deuhte a awm em ni?” tiin min zawt hial nghe nghe. Engtin nge ka chhan tak hlawm pawh ka hre lo. Ka duh ber chu ina haw vat a, ka pindana bawm chhunga lehkha kha chhiar leh tawh a ni tawp mai. Pathian thu lamin min luah thei mawlh lo.
Inkhawm banah Bial Conference a mi tur hla zir tur a ni a; mahse, ka peih tawh lo, ka thei tawh lo. Mi hriat lohin ka relhru a, in lamah hmanhmawh takin ka haw a. Ka chhungte chu LPS Special Report enin an lo thu thap a, LPS-a Special Report pe thin tu Pu Vana hi ka ngaisang a, a inpekna hi a ropui ka ti a, a theih hram chuan en ka tum thin, ka hmaih khat khawp mai; mahse, zanin zet zawng LPS Special Report aia hriat duh leh chhiar duh ka nei tlat. Ka chhungte pawh ngaihven duh lovin ka pindanah ka lut nghal a. Ka inthlak sawk sawk a, ka mu nghal a, ka lukham bula bawm ka dah chu ka han hawng a, a chhung a lehkha chu ka chhiar tan leh ta a....
...Hun a liam zel a, Pari nena kan inhmangaihna chuan reh lam aiin zual lam a pan zel a. An ina len/rim ka tum erawh chuan a phal lo bur zel. “Kan rethei si, chhuatah i thu duh em ni?” te a ti fiamthu a, mawi deuh deuh, hnial hlei theih mang si loh hian min chhang thla leh nelh thin.
Ani Pari erawh chu inrinni hian a rawn lêng thin, inrinni hi hna kan chawlh ve ni awm chhun a ni a, chawhma lamah tlem kan thawk a, chawhnu lamah hunawl kan nei thei thin. Hlawh lak ni phei chuan hotel-a riah dun mai te kan ching ta zauh zauh a.
Hetiang ni chung reng hian veng chhungah chuan Kohhran leh thalai pawla ka telnaah ka inthlahdah phah chuang miah lova, veng mi hlun kan lo nihna te leh ka nu leh paten sakhaw lam an ngaihsak thar tak vangte pawh a ni ta ve ang, Sunday School zirtirtu ah te hial min ruat ve tawh a. A ruk tak chuan hrehawm ka ti hle thin, ka phu hlawl lo tih ka hria.
Pari chu bansan daih mai tha berin ka hria a, a ni ka bansan mai loh chuan Pathian tan mi hlang ka ni thei ngai dawn lova, ka uire san reng tlat a ni. Mahse, hmangaihna hi a lo mak khawp, duh angin a awm theih loh. Hnaa ka kal dawnte hian ‘vawiin chu hun remchang ka zawng ang a Pari ka ti ti pui teh ang, kan inthen mai hi kan pahnih atan atha zawk’ ka ti dawn a ni, tiin ka han inhum sek chho ve ngial a; mahse, pisa ka han thleng a, Pari Zûn chuan zaman hmawng thing ang maiin mi phuar tlat a, talchhuah dan ka thiam lo, ka thei ngang lo a ni.
Hna laklawh deuh a awm changa, kan ban tlai deuh pawhin kan pute chuan ngaihtha takin min mut bosan daih zel a, min dipdal tu leh venthawn tur awm hek lo, hnathawh pahin Pari nen chuan nuam hi kan chên heuh heuh a ni ta ber mai.
Hun leh nite a liam zel a, Pari nena kan inhmangaihna chuan zual lam a pan zel a, ka pute pawhin tlem chuan min ringhlel deuh chuan ka hria; mahse, chhungkaw zahawm an ni, chutiang thil mai maiah chuan an ni te ang chin chu lo inrawlh ve zel turah an in ngai lo te pawh a ni ta ve ang. Kan kawng min dal tumna an nei lo. Kan hna tha taka kan thawh chuan an tan a tawk a ni mai.
Tumkhat chu Pari nen chuan inhualna angreng neih kan rawt dun ta a, ka thianpa tattoo chhu thiam deuh mai hnênah kan kal dun a, Love Sign phel ve ve hi kan ban puam laiah rawng senin kan chhuttir a, kan inhmangaihna chhinchhiahnan kan ti a ni.
Hotel-ah room kan book lâwk a, kan hlawh chhuah atang ve vein zungbun (Silver) kan lei lâwk bawk a, chu zungbun chu ‘Engtikah pawh, a hrehawmah emaw a nuamah emaw ka then ngai lo ang che’ tih thu intiam chungin kan inbun tir dun a. Zankhuain nuam kan chên a. Kan va hlim tak êm. Tu dang lêng dang kan ngai lo.
Ka rilru tihah ber mai tu chu veng chhunga ka chanvo neihte chu a ni, Sunday School zirtirtu ka ni. KTP ah Group Leader ka ni. Hruaitute enthlak leh an inngahna tak tak ka ni ve tawh, chuti chung chuan kei lahin khawvel ka chèn chu a ni tak si a. Ka hnathawk zo, khuma ka han mu turte hi ka inngaituah hah thei kher mai. Banna han thehluh rup mai lah chu dik berin ka hre si lo, tling lo chung chunga Pathian Pathian tih sek lah chu thinlungah a nun tawh miau loh avangin awmzia tak tak a nei thei tawh si lo. Ka rilru hah lutuk hi mutmu tuah mang lova ka inngaihtuah tlaivar thak thak chang a tam kher mai. Pari lah chu a ni telin a duhawm telh telh a, min duh thlu ve a ni ang, zanah dar hnih dawn thleng thleng te kan in sms a, hmangaihna tuipui ah kan liluh tak meuh a ni.
Ngaihthat lohna pakhat erawh ka nei, ‘engvangin nge heti khawpa kan inkawp chung pawha Pari hian an ina lên a phal ngai tlat loh, an inah chuan eng nge awm? eng anga rethei bakberh pawh nise, hmangaihna mit atang chuan hausak leh retheihin kawng ro a su hleinem. Ngaihdan ka siam fel ta, Pari te in chu ka zawng chhuak ngei tur a ni. A phal emaw phal lo emaw, ka zawng chhuak tho tho ang. Ar talh dan chi khat chauh a awm hleinem ka ti ta sauh sauh a....
(Sana ka han en a, dar 2 a lo ri hnai leh thuak tawh mai..Mawia chuan Pari te in chu zawng chhuak ta se eng nge lo thleng ang, hriat zui ka chak lutuk ringawt, mahse, mut chhuahnain min rawn zêm tawh tlat, mu phawt ang, naktukah leave ka la ang a, he mite pahnih inhmangaihna chanchin hi ka chhiar zo vek dawn a ni tiin ngaihdan ka siam fel ta a. Eng ka ti thim a, ka muhil zui ta a)
A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***
PARI ZŬN BY Puitea Tuallawt
IV
Dar 7-ah ka harh hlawl, chhungte hnênah nuamsam lo angin ka insawi ang a, vawiin chu Pari leh Mawia chanchin vawrtawp thleng chhiar turin chawlh ka la dawn a ni. Tuk\huan ka ei peih loh thu ka chhungte hnenah ka han sawi ta phawt a, min ngaihtuah ta reng reng, ka nu chuan, “Zualte, eng nge nawmsam lohna i nei em ni, damdawi ka ngaihtuahsak dawn che em ni?” a ti a. “Ka nu, min ngahtuah suh, vawiin chu chawlh ka duh a ni, ka kâwng napui kha a rawn chhuak leh deuh tlat mai a. A hrim hrimin kumin chhungin vawi khat mah chawlh ka la la lo va, hotute paw’n min hrethiam ang, inah mahni chauh a inkhung fal ka duh a ni. Damdawi lam chu ngaihtuah buai duh suh. Ngaihtuahawm ka ni lo,” ka ti a.
Ka nu chu a ngaih a tha vak chuang lo tih chu ka hre tho; mahse, ka thu chu hnial enah a en ta bik lo va. Ka pindan atang chuan min chhuahsan ta a. Chumi ni chuan office ka kal ta lo a ni.
Bawm chu ka han hawng a,...ka chhiar zawm leh ta a.....
....Ar talh dan chi khat chauh a awm hlei nem... ka ti a. ningani tlai khat chu Pari taxi-a a lut chu ka hmu a, rang takin taxi dang ka phar ding ve nghal a ka zui ru ta a. Treasury Square kan pel a, Sikulpuikawn lamah kan her liam a, kawng kawi kual deuhah hian kan taxi zui lai (Pari chuanna) chu kan hloh thelh a; mahse, rei lo têah a hnu kan chhui fuh leh thuai a, kan tlan zel a.
Pari chuanna taxi chu in pakhat concrete-a sak, changkang ang reng tak kawtah hian a ding a, keini chu an hnung deuh ah an mahni hmu pha rengin kan ding a, chu in ah chuan Pari chu a lut ta a. A sawi angin rethei bakberh tak chu an ni lo em ni ang? nge mi hausa Awmpui mai zawk.
Taxi fare ka pe a, ka chhuak a, chu in chu ka pan phei ve ta a. Kawngkhar lu chungah chuan Lalremruata tih hi a intar a, chu hming chu ka hriat ngai a ni hauh lo.
Han luh ve pawp mai chu ka hreh deuh si, kawngkhar sir dinglam tukverh parda inkeu kau deuh atang chuan inchhung chu ka han bih a, ka thil hmuh chuan min barakhaih chiang kher mai.
Naupang pahnih kum 6 leh kum 13 mi vel hian sitting room dawhkanah lehkha an zir malh malh a, an bul maiah chuan pa valai tak hmel pawh zahpuiawmlo tak hian naupang lehkhazir vil pahin TV a en a, Pari chu inchhungah chuan a rawn lut ta, naupang pahnih te chuan, “Anu, anu a lo haw, eng nge min lo hawn?” tiin an lehkhazir lai chawlhsan meuhin Pari chu an lo lawm a. Ka thinphu chu a inthumrawn nghal tlut tlut a.
Chutah Pari chuan naupang tana a hawn chocolate chu naupangte hnenah chuan a han pe a, “I pa thu in lo âwih em, lehkhate in zir tha em?” a han ti a. Naupang pahnihte chuan a rualin, “Aw, zir tha lutuk, apa thu pawh kan âwih, tiraw apa?” an ti a.
TV ena lo thu mipa chu a lo ding chhuak a, lungchim takin Pari chu a han kuah a, “Bawihte, kan fate hi an fel e, thu pawh an âwih, i lo haw tawh bawk a, zanriah kan ei tawh mai dawn em ni?” a ti zui a. Pari erawh chuan ngaihsak vak âwmin a lang lo.
Pari chuan, “Nia, ei ila, Chhingi (An burma awmpui) rawngbawl i peih tawh chuan chaw ei kha han siam nghal ta che,” a ti a.
Tukverh bulah chuan ka thu hnawk a, ka thinlung chu chemtê-a vih ngawr ngawr ang mai hian a nâ a, Pari chu nula ni lovin pawmlai nei a lo ni reng si. Engati nge, min bum, engati nge min tih der? Taxi khan min lo la nghak reng tih ka han hre chhuak zawk a, pawisa ka neih tam tawh loh avangin rang takin taxi lam pan chuan ka tlan chho a, thaw hlawp hlawpin ka lut a. “Kal ang le,” ka ti mawl tawp ringawt a.
In ka thleng chu ka pindanah ka lut a, lungchhe vankaiin ka tap ta hlawp hlawp a. Nula hnahkhat emaw ka tih kha mi nupui a lo ni reng si. Mi nupui mai pawh a ni lo, fa pahnih lai a lo nei tawh lehnghal. Ka zui ru a ni tih a hriat loh miau avangin Pari chuan eng mah a hre dawn lova, a hma ang bawk khan a zûnin min phuar leh dawn a ni. Ka duh lo, ka duh thei lo. Mahse, chu hmeichhia chu ka lo hmangaih hman lutuk tawh si!
Ka han ngaihtuah let ngial thin pawhin Pari khan ka bulah khan zep chin nei mah se, min hmangaihna kha chu a thup thei bik lo niin ka hria. Tukverh a ka bihthlak lai pawh khan a pasal Lalremruata’n thlahlel taka a lo chhâwnna kha a chhang \ha mumal tlat lo, a pasal chu a hmangaih miah lo tihna a ni thei ang em. Chumi zan chu chutiang thil vel ngaihtuah nan chuan ka hmang tlaivar thak a ni ber, muthilh chu hnai lo vet vet tak a ni. Zing dar li ah pawh nghate rêp ang kar ka la ni e.
Chumi ni a ka office kal chu ka phûr lo kher mai. Pari chuan min lo thlen khalh tawh a, computer leh thil tul dangte pawh engkim hman mai theihin a lo buatsaih lawk leh vek tawh a.
Nidangah chuan pisa ka luh rual hian uluk lutuk hian kan infawp ngawih ngawih phawt thin; mahse, vawiin chu chutiang lam a lang tlat lo. Pari pawh chuan mak min ti deuh tih ka hria. Ngawi rengin hna tul awm apiang chu ka thawk mawp mawp a, ka tawng chhuak lo reng reng.
Ka awm dan mak tak avangin chuan Pari ngaih chu a tha ta lo hle a ni ngei ang, ka bulah a rawn thu a, “Duat, i lung ti awi lohna ka nei em ni, ti nge min biak duh miah lohva, a hrehawm em mai, khawngaihin i rilru hahna chu min hrilh tlang mai teh,” a rawn ti a.
Ngawi rengin rei fe chu ka han en vang vang phawt a, a kut ka han en leh a, silver zungbun ka leisak kha a lo la bun va mai tih ka han hmu a, kei erawh chuan ka bun ve tawh lo. “Pari, sawi dun tur kan nei a ni, sawi tan dan chiah pawh ka thiam lo; mahse, sawi ngei a tul si, engati nge pawmlai nei i ni tih a tir atanga min hrilh loh?” ka ti chang ta khal a. Ka zawhna chuan a ti phu zawk tih ka hre mai. Kei lah ka tum kawh vuau tawh mai, “Duat, ka hmangaih che a ni,” a ti a. “Hmangaih maw? Ha ha ha, pasal nei chungin ka hmangaih che min ti a maw? I pasal chu engtin nge ni dawn?” ka ti a.
“Ani chu ka hmangaih lo, eng lai mahin ka hmangaih ngai lo.”
“A lo nih hrep tak chu, ka dinhmun i hria, ka tan ngaihzawng neih hi a pawina em em a awm hran lo; mahse, mi nupui lo khuaikhem vel zawng ka duh zâwng a ni mawlh lo a ni,” ka ti ta tawl a.
“Duat, ka hrethiam che alawm, keipawhin ka ti dik lo tih ka hria, a tir atang khan engkim lo hrilh tur che ka nia; mahse, i hmel ka han hmuh khan mumanga ka lo hmuh thin ka ‘dream boy’ chu nang hi i ni tih ka hre ta nghal tlat mai a, pasal nei ka ni tih ka sawi chuan ka dream boy chu ka chân dawn che si, duat, min ngaidam rawh, ka hmangaihna che hi a nasa em a ni,” a ti a.
He nu hi Setana mi tirh nge Pathian mi tirh zawk pawh ka hre ta hrep love, ka insum hman lo, ka kuai kûn a, a hmui vam ham maiah chuan duhthawh lutuk hian ka fawp leh ta vawng vawng a. Ani pawhin a theihtawpin min chhang let a ni.
Mahse, ka ngaihtuahna muthlu chu a rawn harh zawk a, “Pari, kan tih tawp a ngai a ni. Kan na dûn dawn tih chu kan hria ang; mahse, kan tih tawp a ngai a ni,” ka han ti a.
“Zep lovah chuan kei pawhin a hma atang khan tih tawp chu ka duh reng a sin; mahse, ka thei ngang lo a ni. Ka hmangaih em che a ni duat, engtin nge kan tih tawp ang?” a ti a.
“Fa pahnih i nei tawh, kei chu tlangval hnahkhat ka la ni, veng chhungah phei chuan kohhran leh thalai pawlah a kul ataia tang ka ni. I pasal hi then la engtin nge i fate an awm ang, tunah cheng sang hnih i hlawh tawk a ni a. Kei lahin nupui ah han nei dawn che ila, i fate nena ka hruai haw duah mai che chuan ka chhungte ngaihdan a ni dawn si lo. I hrethiam tiraw Lai?” (Lai tih hi ka koh thin dan a ni)
“Hrethiam e Duat, ka hrethiam che asin, eng pawh huam mah la khawvel hian an dem dawn che a, nupa hlim tak pawh kan ni thei chuang hek lo vang; mahse, he hmangaihna hi engtin nge kan tih tawp tâk ang le?”
“Ka hrethiam tawh bik lo,” ka ti a, ka hrethiam lo tak meuh si a.
(Sana ka han en a, chhun dar 12:34 chiah a ni, choka lamah ka phei a, thingpui ka va inlum chawp a, ka inhnawh puar hnuin Mawia Hmangaihna lehkha chu ka chhiar zawm leh ta a)
V Pari chuan harh thar deuh thut niawm ziazang hian, “Tih dan tha deuh ka hria, a rawn ti hluai a.”
“Engtin chuan maw?” ka lo ti tum hmuk a.
“Ka pasal hi ka then ang, ka fate chu a pute hnênah an awm mai ang, kum thum hnuah RL (Re-marriage License) ka la ang, tichuan Pathian hriatpuina ngatin nang nen kan innei thei dawn a ni, eng nge i ngaih dan?” a hmel duhawm lutuk chu mipa ka ni inti ve chin chuan an diar bik lo vang.
“Chumi kum thum chhung chuan engtin nge kan awm ang, tun ang renga kan awm chuan kohhran chuan RL (Re-marriage License) chu an pe duh dawn hauh lo che, tun atang chuan enthlak kan ni tawh dawn?”
“Lungngai suh duat Duat, ka naute Mamitah an awm, an bulah ka awm thei mai ang, kum thum chu ka awm bo vang vang ang, phone hmangin kan inbe pawh reng thei dawn tho a; tin, bazar tur tih vel pawn ka rawn chhuak chho fo dawn tho a, ‘ka hmangaih che always’ ka tih che hi ringhlel suh, engkim ka kutah dah rawh,” a ti a.
Ka ngaih chu a tha ta deuh huai a.
Hun a liam a, duhthusam khawvel te chuan mual an liam a. Kum thum chhung chu ngaihtha takin lo nghak phawt mai ang hmiang tiin rilru ka siam ta a. Ka hna chu ka thawk mawp mawp a, Pari erawh chu a hna atangin a bang ta. (Beiseina, beiseina duhawm)
Kum khat liam hnua ka sms hmuh chu , “Mamit chu a lum hle, tih tur a awm vak lo ka nau dawr ka nghahpui a, a bak chu awm mai mai leh eitui a ni mai, taka duat, ka hrilh hreh viau na che a, hrilh che a \ha ka ti si ’ ih maw ka fate an ti duhdah hle tih ka hria, an pa ber lahin engmah a ngaihtuah si lo, Ka fate ka ngaihtuah lutuk hi ka mu thei lo fo thin, duat, ka hmangaih che, duh tawk phawt ang aw,” phone a dah a. A bâk chu, “Ka hmangaih lutuk che, innghak hram hram zel ang aw,” tih vel a ni.
Pari te nupa an inthen hnuah an fate hi a pasal Lalremruata nu leh pate hnenah an awm a. Anni chhung lah an rual hle mai si. An pa ber Lalremruata chuan tun hmaa a lo chin thin damdawi ruih a ching thar leh a, an chhungkaw nun chu hah thlak bat bat tak a ni.
A fate thlavang lah chu hauh a hnekin ‘ka fa te pawh innih tak tak ka ring lo, in nu lah mihur ’ thi phiar ula a nia ka tih, tih te hi a tawng duh dan a ni. Lalremruata te chhung hi sawi tawh angin an rual ang reng a, amah Remruata hi upaber a ni a, farnu 3 nula senior rawngkai tawh pakhat leh nuthlawi 2, an fate pahnih nen an ni a. Eizawnna mumal an nei vak si lo va, an khawsak a harsa deuh nen, Remruata’n ruihhlo tih a lo ching ve leh kher nen, chhe chhawngate vai zin an sawi ang mai an ni ber mai.
Pari fate chan chu chhe rap rap tak a ni, an awmna ka hriat avangin eng emaw changin ka va thlithlai ru ve zauh zauh thin a. Thinrim hmai sen teuh a haw chang ka ngah mai.
Pathian rawngbawltu ka inti ve a, heng thil zawng zawng hi keimah vanga lo thleng niin ka hria a, hrehawm ka ti em em mai. Amah Pari ber lah ka then thei si lo, then a hnekin nitin zantin hian ka duhna a zual telh telh ni ber hian ka hria a.
Tlangval thalai ka ni ve a, ka rawngbawl puite zingah pawh min han ngaihmelh tu nula tuai tha tak takte chu ka tawng ve zauh zauh; mahse, Pari tan ka inserh hrang tlat a. A tan ka rinawmzia hi Pathian pawhin min hriatpui a ni.
Pari nen chuan zantin kan inbe pawh reng a, sms kan hmang tlangpui. Hmangaihna thu thlum tak takte, kum thum reizia te, lo haw a chak tawh zia te, sawi loh a hleih kan neih pawh ka hre lo. “Rimtu i nei em?” ka ti fiamthu a, “Nuthlawi tlawngawl na na na te chuan thingtlangah te chuan nei ve bawk e, ha ha, mahse, i ngaih ti tha lo duh suh, i ta ka ni tawh a lawm,” min ti a. Lawm takin ka nui a.
Mamit leh Aizawl inkar chu hla vak lo mah se, intlawh pawh na hun kan nei thei lo, kei ka hnaah ka buai em em a, Pari aiah khan nula pakhat tlaw zet mai an la thar a, a hmel ka hmuh ringawt pawh hian ka ra hi a so lo chauh ni ber hian ka hre thin.......
(Sana ka han en a, chawhnu dar 2 a ri tawh, ka thawnthu chhiar chu ngaihnawm ka tih em avangin hun lam ka lo ngaihtuah lo a ni, ka ril pawh a \am lo, ka chhiar zo law law mai dawn nge, ka inhnawh puar lawk dawn tih ka han ngaihtuah zawk a. Ka mit te a kham ve deuh bawk nen, chawlh hrih hlek chu ka tum ta zawk a, lehkha chu uluk takin bawmah chuan ka dah leh thlap a, choka lamah eitur zawngin ka chhuak phei ta a.
Eng mah tak tak ka rilru ah a awm thei tawh lo, ka lehkha chhiar lai hlir mai chu ka ngaihtuah reng mai, thingpui ka in zawh veleh ka pindan lamah ka phei leh nghal vat a, ka bawm roh thar tak em em chhunga lehkha chu ka la chhuak a, ka chhiar bak chin atang khan uluk takin ka chhiar tan leh ta a.......)
Pari nena kan awm hran hnu atanga Krismas lo thleng hmasa ber chu Mamit lamah hman ngei ka tum, ka hlawh pawh a theih ang angin ka khawl sauh sauh a. December 17-ah kan company pawh khar a ni ta hrih a, ka thawveng huai mai, Pari awm loh hnu phei kha chuan ka thawk rim zual a, ka thawhpuinu atana an lak ve lah chu hrilh chawp pawha biak tlak mang loh an tih ang chi deuh hi a ni a. Ka hah a ti zual riau a ni, kan han chawl ta chu hnar a hlît phawi ang huai huai a ni ber e.
Mamit-ah Krismas ka hmang dawn tih ka chhungten an hriat chuan mak an ti hle a. Helamah kohhran leh thalaiah rawngbawltu pawimawh ber zinga mi ka ni a, anihna takah phei chuan ka rawngbawlpuite hnenah phei chuan Mamit a krismas hman ka tum thu hi ka la sawi ngam lo a ni. Ka kal tawp ang a, an hre ve mai ang ka ti tawp mai a ni. Chuti a nih loh chuan zawhna chhan sen loh min zawt dawn, ka chhang thiam (Ngam?) dawn si lo. Rawngbawlpuite hmel han hmuh chu ka huphurh a ni.
December 20 ah Mamit pan tur sumo ticket ka la a, ngawi rengin Mamit lam pan chuan ka luai thla ta a ni. Pari Zûn chuan Zaman hmawng thing angin min phuar tlat tawh a, châng dang kânsan thei ka ni tawh mawlh lo. Rawngbawlna, biak in, Pathian thu tih vel lam pawh ka ngaihsak hman tawh lo. Pari Pari Pari tih chu ka thinlungah a ri tluk tluk a, kum khat deuh thaw a hmel ka hmu tawh lo va, zaninah hian ka duhlaii chu ka han hmu leh dawn a nia. Kan chuanna sumo te chu tlan muang ngawih ngawih hian ka hria a, thim hma ngeia Mamit luh ka duh a ni.
Mamit kan luh chuan Israel fateho tih dan ang mai a, Mamit leilung chu han fawh vawng vawng tak hi ka nap a. He hmunah hian ka duhlai Pathian ai pawha ka thlan Pari, Lal\hapari chuan riahrun a rem tlat a ni.
Mamit ah hian chhungte kan ngah angreng a, riah a, thlen nghal mai na tur pawh in 4 vel lai chu ka nei a ni. Pari awmna hnaih bera awm ka Pa Rosangliana te in ah chuan ka in nghat a, an ni chhung hi Mamit a kan chhungte zingah chuan a chenbeh deuh ber an ni; mahse, an rilru a tha a. Ni danga Mamita ka zin chang pawhin inptepui bânna atana ka hman ber te an ni hrim hrim a. A piah lawkah chuan Pari a awm tih ka hre bawk.
Pari nena kan han inhmu chu sawi dan pawh ka thiam lo zawk, a nuam lutuk hi a hrehawm zawk an tih ang vel hi a ni. Puitling ve ve kan ni tawh bawk a, kan chhungten min ngaihtuah em em tawh lova, duh thalin nuam kan tawl a. Hlimna sawi hleih theih loh hi kan inbán dun a ni ber.
Hun hi hlimnain a lo luah a nih chuan hun hi a pangngai aiin a lo che rang hret thin anih ka ring ta hial mai, sana pawh hi ka ringhlel rum rum a, December 28 chu rin loh karin a lo thleng reng tawh mai a, ka haw a hun tawh. January thla tir ah hna tan leh tawh a ngai dawn a. Haw lo thei ka ni tawh lo.
December 28 zan, chuan Mamit field ah kan pahnih chauhin kan awm a, tuman min tibuai lo, tumah kan ti buai hek lo. Pari nen chuan hmangaihna, hmangaina ropui ber mai chu kan chen a ni. A tuk maiah ka haw tawh dawn avangin kan âm dûn hle a. Zan dang zawng aiin engkim chu uar takin kan hmang a. Kan hlimna chuan a vawrtawp a thleng tak meuh a ni.
A tukah chuan ban invai lap lapin kan inthlah a. Pari lan theih chhung chu ka thlir reng a, ka va han hmangaih tak êm! Chu chu ka hmangaih Pari, Lai ti ngata ka koh thin ka hmuh tawpna tur a ni tih ka hre lo.
Ni a vei a, kar a ral a, thla vei a, hna thawh a hun leh tan ta, kan mi lawilo nu (an rawih thar Buangi kan ti mai thin) nen chuan hna chu kan han thawk dun leh tan ta poh a.
Zep lovah chuan Pari awm loh atang kha chuan hna-ah hian ka tui thei tawh thlawt lo a, tum khat phei chu ban mai ka tum a; mahse, ka pu (Kan hnathawhna pa) chuan, “ Mawia, i tel lo chuan kan buai lutuk dawn, Buangi nikhua lohzia lah i hria, khawngaihin min bansan lo hram rawh. He company hi kan chhungkaw innghahna ber a ni ve a, tunah bang ta ngawt la, midang rawih mai tur kan hmu mai dawn si lo, kei lahin computer hi amik amak pawh ka hre thiam ve si lo. I bang duh a nih pawhin hmanhmawh lo la, nakkinah, midang remchang i aiawh an awm hunah kan la ngaihtuah dawn nia, tun tum chauh chu min pui leh hram mai teh,” tiin min tahawh a.
Ka pu meuh kan inah lo kal a, ka khawngaihna dil a, an hnena awm zel tura min han ngen chuan min hneh hle a. “Aw le, ka bang leh lo mai ang e; mahse, ka hna tam zia hi chu i hriat ve tho ka ring, ka hlawh hi chu tlem tal chuan i pun ve tur a ni,” tiin ka intipaukhauh lui a.
“Hlawh pun chu ka lo tum sa reng tawh alawm, tunah cheng sangli i hlawh a, kumin atang chuan sangnga i hlawh tawh dawn nia, tichuan i lung a dum thei mai em,” ka pu chuan a ti a.
“Aw le ka lungawi e, kan thawk leh phawt a niang chu,” tiin tha takin kan inthlah a, kei pawhin ka hna chu a pangngai angin ka zawm leh ta nghal a. Ka hlawh pawh a pung ta ngei bawk. Dik chauh chuan ka hna ang thawk ka hmelhriat thenkhatte hi chuan thla khat ah cheng sangriat chuang te an hlawh tih ka hria. Mahse, an ni company changtlung tak taka thawk te an ni, anni chu ka thik pawh a ni hran lo. Thudik tluang pangngai ka hriat ka sawi ve mai a ni.
Pari nen chuan zantin kan inbia a, ka taksa chu Aizawlah awm mah se, ka rilru, ka ngaihtuahna zawng zawngte chu Mamit ah a awm a ni.
Kum a lo thar a, engkim mai hna lamah chuan a pangngaiin a kal; mahse, Pari sms ka dawnte chu a danglam ta tial tial mai. Thikthu lam chu a ni lo, ‘A pasala chhungten ten a fate an tih duhdah dan râpthlâk lutuk chanchin tih vel a ni ta fo mai’ han sawi pui vak dan ka thiam lo hle thin a, theihtawpa an thlavang lo hauh pui ka tum thu tein ka han hnem leh ngawt thin; mahse, chutiang chu ka tan tih theih a ni lo tih chu a hre chiang ber tu kan ni.
Kum hnih a vei dawn meuh chuan ngaihthat lohna lian tak ka nei ta, a chhan chu Pari sms chuan keimah lam aiin a fate pahnih retheihzia leh an exam-ah pawh an failed tak zel thu te hlir a thunawn ang maiin a sawi nawn ta sek mai.“Khawlaiah bal takin an vei a, an sikul uniform pawh a thler nuai tawh, an sikulah pawh miten an nuihzat tawh.
“Duat, ka fate hi ka hmangaih a ni, an pa lah hian drugs a ruihsan a, chhe tê pawhin a ngaihsak si lo.”
Heng message te hian thil tam tak min ngaihtuah tir a, Pari chuan a pasal chu thlahlelin a hmangaih a ni lo; mahse, a awm loh china a faten harsatna an tawrh zawng zawngte chu a chîn chhuakin a hria a. A rilru a hah takmeuh a ni.
Kum hnih a liam tawh, kohhran hnena RL laa kan inneih thatna tur ni pawh a hnai telh telh; mahse, harsatna harsa tak maiin Pari nena kan inkarah chuan bu a rawn khuar ta mek a ni.
Hmangaihna thu tih vel lam aiin a fate retheih tak zia leh an exam-ah pawh an failed tak zel thu te chu ka msg dawn zin pawl a ni ta. Engtin nge ni ta ang zel ang le?
Rawngbawltu ka ni, Pathian chu uire sanin a duh loh zawngin awm thin mah ila, a awm tih ka hrechiang a, min hnaih reng thin tih pawh ka hria. Duhthlan tur buruhseh zet mai ka hmaah min pharh sak ta tih pawh ka hria.
‘Eng duhthlanna maw?’
Pari pumbilh nge fahrah pahnihte chhanchhuah?
Duhthlanna awlsam tak chu a ni hauh lo mai. Heti ang ka duhin ka dil ngai lo.
Pari chuan a pasal (Lalremruata) chhungten lo haw leh mai tura an duh thu an rawn hrilh tih min hrilh bawk. Nia, a haw leh a nih chuan a pasal nen chuan an indang leh ang a, an fate pawh nun nuam zawkin an awm thei ang.
Pari ka hmangaihna chu eng ang hmangaihna nge a nih ka ngaihtuah a, a tisa ît vang ringawt a hmangaih ka ni em? A laka duat pangchan ka beisei vang chauha hmangaih ka ni em? Pathian rawngbawltu anga veng chhungin an ngaih ka ni. (Pathian chuan min ngai ve kher lo mai thei). Duhthlan tur pui tham tak mai ka nei ta, chu ka duhthlan tur chu hei hi a ni.
Pari chu haw leh rawh se, ‘I fate tan haw leh rawh ka tih a ngai dawn’ ‘Duhthlanna pakhatah chuan, ‘haw lovang, i fate chu an awm awmin awm rawh se, nang nen fa dang kan nei anga i fate chu i theihnghilh mai ang’ tih a ni.
Van Pathian hnenah ka tawngtai a, ka duhthlan tur min hrilh turin ka ngên a, ka tawngtai zawh hmain a chhanna ka dawng nghal, “Pari chu a haw leh tur a ni, eng ang pawhin hmangaih mah la, fahrah pahnih i siam hi ka remti lo,” tih a ni bur mai.
Ka beisei leh ka mihring duhthusam chhanna chu a ni mawlh lo; mahse, chu chu ka Pathian min chhanna a ni, A ni chuan , Ni chu NI, NI LO chu NI LO a ti mai \hin a ni. A thu chu hnial theih a ni lova. Amah leh amah a inphat ngai hek lo.
“Pari, kumkhuain ka hmangaih ang che; mahse, i fate pahnih tan ka hmangaihna che hi ka hlan dawn a ni. Tunah i pasala chhungten haw leh turin an ko reng bawk che a, khawngaih takin haw leh zawk mai rawh, mi pahnihin hmangaihna mumal lo zet an chen dun ai chuan fahrah tur pahnih nunna chhan chhuah chu a hlu zawk e. Haw leh ang che, mangtha, Lai,” tiin message ka thawn a, ka rin lawk ang ngeiin a ngaithiam hauh lo mai, tah chuan a ni khawvela ka tih duh loh ber, ka tih tak ni, “Pari ka hmangaih tak tak lo che, eng atan mah ka ti tak tak hlei nem che, nawm chen nan mai mai a lawm ka tih che, nupui atan ka duh tak tak lo che,...” (ka sawi ngam tawh lo, dawt vek a ni si a)
He message ka thawn lai hian ka phone screen hmu fiah thei lo khawpin ka mittui in min bual a; mahse, huaisen taka kawng dik zawk ka thlan avangin Pathian chu ka chungah a lawm ngeiin ka ring a ni.
Hun a liam vut vut a, Pari pawh tunah chuan a haw leh ta, a hmaa an luah tawh hnu in kha a pasal leh a fate pahnih nen chuan an luah leh tawh a. Keipawh ka hnaah ka buai leh hle tawh. Lunglenga mittui han tih tlak na hman pawh ka nei meuh lo. Pari ka hmangaihna erawh chuan a vawrtawp a thleng takmeuh a, he lei hnuai lamah ni se, lei tawp a thleng ang. Vanah ni se van tawp rât a hawlh ang. Hmangaihna chu vawng reng mah ila, fahrah naupang pahnih siam ai chuan ka hmangaihna chu nep ka ti zawk a, hrehawm ti reng reng a an puitlin ai chuan khawvela ka hmangaih ber then chu ka thlang ta zawk a ni. Mahse, mihring ve mai ka ni si a, a na zawng ka ti a ni.
(Lehkha inziak chu a pherh tan ta hle a, chhiar pawh a har tan ta, a ziaktu Mawia hian mumal vak lovin a ziak ta a ni ngei ang, uluk takin ka chhiar zawm zel a)
Hringnun hi ka tan chuan hlo har leh hnim hnawk ang mai a ni zo ta. Pari zûn chuan nasa leh zualin min phuar a; mahse, a lam ka hawi leh chu a thiang tawh si lo.
Ka tawrhna ti reh turin Pathian chuan engmah a tih ka hre lo, (a lo ti a nih pawhin ka hre lo a ni tal ang). Ka hna atang chuan ka bang tawp a, ka pute chuan min ui der ver viau mah se, kan pisa a Pari sûlhnu hmuh tur tam lutuk chuan ka duhthlanna chu min her danglam sak leh mai ang tih ka hlau a. Pari sûlhnu hrim hrim chu hmuh leh ka duh tawh lo a, ka ngam tawh mawlh lo a ni.
Ka nun hi a ruak ngawih ngawih a, a thar a bul tan leh tumin han insang phek thin mah ila, ka vawn apiang a chim zel a, he khawvel hian ka tan par a chhuah ve thei tawh lo. Pangparte chu ka tan chuan mittui thlem chhuak tu mai an ni a. Chu zawng zawng aia tawrh hrehawm ber mai chu Pari ka message na thu dengkhawng tak takte avanga Pari’n min haw ta tlat chu a ni. Ka hmangaih vang a ni tih lah chu a hrethiam si lo. Ka hmangaih vang a ni tih ka hrilh chuan, ka hmangaih vang a ni dawn si lo. Beram a hmul mettu hmaa a ngawi reng angin ka ngawi reng mai a ni. A na teh a sin ka thian!!
Ngaihzawng dang neih ka tum lahin ka tui thei thlawt bawk si lo. In atangin A-4 fulscape tam tawk nen ka chhuak a, ka kal ka kal a. Thlam nuam angreng tak hi ka hmu a, chu thlam ah chuan chau takin ka tlu lut a, he thu i chhiar mek hi mittui leh thlantui nen ka ziak ta a ni.
Thian duhtak, he lehkha hi thutak hlawm hlak a ni. Zungbun hi i hmu ang tiraw, he zungbunah hian thu tam tak a inphum asin, a theih hram chuan tiral mai lovin i lo vawng tha dawn nia, he zungbun hi, Pari kutin ka kut zungchala min buntir ngei zungbun kha a ni si.
Ka va chau tak em, ka chhungte chuan min ngaihtuah ngawt ang; mahse, he hmunah hian thi turin ka lo kal a ni. Chhuan sarih chaw ka nghei tawh a, ka hnuk hi a chat tep tawh ang. He lehkha chhiartu, ka thian duh tak, zungbun mawlh kha aw. A neitu, (min petu) hnenah ngei i lo pek let leh theih chuan i chungah ka lawmna a nasa ngawt ang.
Hei hi a ni ka thawnthu chu, hei hi a ni thutak chu. Ka thian (he lehkha chhiartu). Tu nge ka nih pawh i hre ngai kher lo mai thei, midang ka sawite pawh kha tu nge an nih i hre ngai lo mai thei. Engpawh ni rawh se, i hriat belh duh leh ka ziah kim loh nia i hriat zawng zawngte chu vanah min la zawt dawn nia, chutah chuan kei chu ka lo awm ngei dawn tih ka hre si a. Mangtha...Lai.
Lehkhaa thu inziak chu khati zawng kha a ni. Ka chhiar zo chu ka hnim deuh ruai hian ka hria a, Mawia hmangaihna ropui zia chu mak ka ti a, tluk lo ka inti ngawih ngawih a.
Zungbun chu ka han en chiang a, a chat tawh; mahse, a la bun theih, a len dan atang chuan a buntu kutzungtang pawh a lian thawkhat hle ang tih ka hre thei mai a. Dimtein lehkha leh zungbun chu bawm chhungah chuan ka dah lut a. He hmangaihna thawnthu ropui leh lung ti chhe zet hi halral ringawt atan chuan uiawm ka ti lutuk. Ka phal thei ngang lo. Ka computer ka on a, pagemaker file ka hawng a. A bul te atangin hmaih awm hauh lovin ka chhu chhuak ta dap a ni. An hming thenkhat erawh hi chu thil pawi thei te a awm ka hlauh avangin ka thup a, hming dang ka hmang nual. Chhiartuten inhriatthiam ka ring.
Engvangin nge kei kher kherin he lehkha hi ka chhar, he lehkhaa mihring chuangte hi ka hmelhriat leh lamhnai an nih awm reng reng lah ka hre bawk si lo.
Zungbun chu ka han en a, zungbun tha chi a ni lo. Cheng 300/- man vel a nih ka ring. Mawia, (Lehkhaziaktu) khan he zungbun hi Pari hnena pek let leh kha a duhthusam hnuhnungber a ni.
Lalthapari chu khawiah nge a awm ang? tunah hian eng nge a tih mek ang. Engmah lah chu hriat ka nei si lo. Mahse, zungbun chu ka pek let ngei a ngai a ni. He lehkha computer a ka chhut chhuah tak pawh hi ka pe tel ngei bawk ang. “Mawia, lungngai suh, he khawvelah hian awm ve tawh lo mah la, i duhthusam hnuhnung ber chu ka rawn hlen chhuah sak ngei ngei ang che, ka nunna hming chhal meuhin ka tiam a che,” ka ti a.
Lalthapari zawn chhuah dan tur ngaihtuah pah reng chungin ka mu ve ta a.
VI
A tukah chuan phur vak lovin office ka kal a, ka pute hnênah eng emaw chhungkaw thil avanga ka haw hma deuh a ngaih tur thu ka hrilh lawk nghal a.
Tlai dar 2 a rik chuan Treasury Square ah ka ding vang tawh, Bawm kha ka keng a, a chhungah chuan zungbun, Mawia kutziak ngei lehkha leh, a kutziak computer a chhut chhawn leh chu ka dah thlap bawk a.
Ka han ngaihtuah let vang vang a, Pari chu khawi vengah nge a awm ang? Mawia lah khan an awmna veng kha a sawi miah si lo. Han zawn tan dan mai tur ka bangbo angreng hle mai. Mahse, Aizawlah ngei hian a awm a, Aizawl hi ka vah chhuah vek peih na na na chuan Lalthapari chu ka zawng hmu mawlh ang, a pasal kha Lalremruata a ni tih ka hrechiang bawk.
Taxi ka phar ding a, Tuikhuahtlang ah kal ka duh thu ka sawi a, driver chuan ‘ kal ila’ a ti a. Engvanga Tuikhuahtlang chu pan duh tlat nge ka nih ka inhre miah lo, chutah chuan Pari chu a awm leh awm loh pawh ka hre hek lo. Mahse, ka thinlungah ‘Tuikhuahtlang’ tih chu fiah takin a rawn lang tlat a ni.
Tuikhuahtlang chu rei lo teah kan thleng chho mai a, driver chuan, “Ka pu, khawiah nge ni ang?” tiin ka din duhna lai min zawt a. “Ka hre chiah bik lo, tlan leh phawt mai teh,” ka ti a. Driver pawh chuan ihe lovin a motor chu a tikal ve leh nghal mai a.
“Ding la, i dinglam hawi rawh,” tih thu hi ka thinlung ah a rawn ri dawt mai, ka phu zawk. Driver hnenah chuan, “Ding rawh,” ka ti tuar a. Ka awka chu a vin deuh a niang driver pawh chu a hrilh hai ve lek lek mai, “ Tah hian min lo nghak la, saw lai inah sawn rei lo tê ka va lut lawk ang e, a rei lo ang, a fare chu i tih zat zat a ni mai,” ka ti a. Taxi atang chuan ka chhuk ta a.
Khawlai ah chuan ka han ding vang vang a, ‘ding lam hawi rawh’ tih kha ka thinlungah a lo ri nawn leh a, dinglam chu ka han hawi a, concrete building, hlui tawh lam, rawng hring dal deuh chuan ka mit a la ta chat a, kawng khar lu chung chu ka han en nghal var a, ‘PC. Lalremruata’ tih inziak kalh chu chiang takin ka hmu thei ta, Ka thaw huai a, ka tum chu ka hlen chhuak thei dawn ta, hmangaihna avanga a nun chan ta Mawia’n a hmangaih em em Pari te in chu hei ngei hi a nih dawn hi ka ti a, ka pan phei ta nghal a.
Kawngkhar ka kik a, hmeichhe aw tliang mawi ang reng tak hian min lo chhawnin, “ Lo lut rawh,” a rawn ti a.
Kawngkhar chu ka nam hawng a ka lut ta a.
Inchungah chuan naupang pahnih hian lehkha an lo zir malh malh a, ka hmel an hmu thut chu mak an ti tih ka hre mai. “Hei hi Pi Lalthapari te in a ni em, amah a awm em?” tiin ka han zawt nghal a.
“Awm e, keimah hi ka nia,” tiin a fate lehkhazir a vil lai mek chawlhsan meuhin min han en a.
Mawia’n a he nu a hmangaih chhan chu ka hre ta!!!
Hmai sawl lam deuh, ti nung sen siah mai, a mawi tawk chauh a mit dinglam kalh lek lek, mit kalh ni si lo a ni. A sam chu a dar thleng velin a zuah a, chutiang reng renga hmeichhe duhawm chu ka hmuh ka la hre lo. Ka lo entui deuh a niang. “Ka pu, eng nge i duh?” nelawm vak lo hian a han ti a, ka suangtuahna ram a\ang chuan ka harh chhuak zawk a. “ Pu Remruata hi khaw nge a awm ?” tiin ka han zawt kual leh phawt a.
“Ka hre lo, zing kar atangin a chhuak a...aa..?”
Ka hrethiam mai, Lalremruata chuan ruihhlo a tih thin chu a la bansan lo tawp a ni tih a chiang e, Pari hian hmel hriat loh bula a pasal chanchin tha lo sawi vak chu a duh lo a ni ngei ang.
“Englo a nia, eng emaw i tan, nangma ta tur ngei rawn pek che ka tum a.”
Pari chu a meng deuh kawk a, a hmelthat dan chu sawiin a siak lo. Hetiang hmeichhia hi mizote zingah kutzungtang thliaka chhiar tham chauh an awm ta ve ang. A engkim mai chu a fuh vel vek a ni ber e.
“Eng thil nge ni ta, thil tha lo lam em ni?” a ti a, a hmelah chuan hlauhthawnna a lang tel deuh a.
“Tha lo lam ni hran love, tha lutuk han tih tur phei chu a ni chuang lova; mahse, hlauhthawn phahna tham tur thil chu a ni lovang,” tih pahin ka bawm ken chu ka han lek chhuak a, “Hei hi i ta tur liau liau a ni, a chhunga awm zawng zawngte pawh kha i ta tur vek a ni,” ka ti a.
A tim deuh tih ka hria, a ngawi deuh vang vang a, “Ka pu min hai a ni lo maw?”
“Hai love, Pi Par, ka hai lo che a sin, i ta tur liau liau a ni. Mitthi tur pakhatin i hnêna pe tura min chah a nia, a theih hram chuan i pasal chu hriattir lo la i tan a that zawk ka ring, i thu thu phei chu a nia,” ka ti a.
Tim deuh dai hian a kut no tak chuan ka kut atangin Bawm chu a la ta a.
“Ka chhar tirhin tala in a inkalh a, a chahbi ka hmu zo tawh si lova, tubohin ka chhu hawng a; mahse, tala thar dang ka lei leh a, hei a chahbi pawh, tunah chuan ka kal san tawh ang che.”
“Thingpuite in ve phawt la, eng emaw dang te pawh sawi tur i la nei lo maw?” “Sawi tur dang chu ka nei teuh mai ka pi; mahse, ka sawi tur zawng zawng chu kha bawm chhunga lehkhaah khan kim biaiin a inziak vek tho, i chhiar ang a i hrethiam mai ang, pawnah taxi in min nghak reng si,” ka kal phawt mai ang e ka ti a.
“I tih tlat chuan ni mai e, i duh ang ngeiin bawm chhunga lehkhate chu ka lo chhiar dawn nia, taka, engtin nge ka awmna min rawn zawn chhuah theih?” a ti a.
“Ka hre bik lo. I duh leh awih la i duh leh awih lo la,i thu thu nise, englo, ka thinlungah hian AW a lo ri thin a, chu aw chuan helai hmun hi min hruai thleng mai a ni, mangtha Pari,” tiin ka chhuahsan ta a.
Taxi a ka chuan leh hnu chuan Bawm a hawn huna Pari mak ti tur hmel tur te chu ka suangtuah neuh neuh a. Mittui zawng a sêng ve nual dawn a ni.
Mawia kha ka han ngaihtuah let a, lehkha a ziah zawh khan a thi ta mai ni khan ka ngai mai a, a ruang lah chu hmuh tur a awm pawh a ni si lo. Khawi laiah emaw te hian riltam chau tak hian a lo awm reng ang a tite in ka ngaihtuah leh hnuhnawh a.
Taxi driver hnenah chuan, “Khawngaihin Phunchawng ah min zu kalpui leh lawk hman lo maw,” ka ti a. Driver chuan, “Hman e a, i thu vek a lawm,” nui huk huk chungin a ti a.
Phunchawng kan thlen thla a, ka thianpa te thlam lam kha hmanhmawh takin ka pan thla nghal a, khua chu unau hmel hai vel a ni tawh. Eng ka neih loh avangin khaw thim chhiat tak tak hmaa thlam thlen hman hram tumin ka hmanhmawh zual sauh a. Thlam chu a hmaa kan kalsan dan ngai ang ang khan a lo la awm bâm a.
Ring leng lawng hian, “Mawia, Mawia,” tiin ka au ta chiam chiam mai a. Ka aw thangkhawk ri mai lo chu min chhâwntu reng an awm lo.
Thlamah chuan ka bawk thlawp a, “Mawia, i duhthusâm ang ngeiin Bawm chu i hmangaih Pari hnenah chuan ka hlan ta a sin. A hmuh hunah chuan na ava ti ve dawn em,” tiin ka phun sep sep a.
Taxi in min nghak reng a ni tih ka han hre leh hnuhnawh thut a. Khua chu a thim chiang tawh viau mai, vanneih thlak takin thla a eng hlauh a, taxi lam pan chuan thluk-leh-ding-awn fawmin ka luai chho nawk nawk a.
Taxi chuan min lo la nghak reng a, hmanhmawh takin ka lut a, “Ka hman e,” ka ti a. Driver chuan a motor chu a tinung a, kan tlan tan ta a, “Ka pu, tape play ila i ning ang em?” Driver chuan a ti a. “E.. i duh duh play rawh, ning lul love,” ka ti a
Car Tape ah chuan cassette a thun a, he hla ber kher hi a rawn zai tir ta a:
Lonely rivers flow to the sea, to the sea
To the open arms of the sea
Lonely rivers sigh, wait for me, wait for me
I'll be coming home, wait for me
Dar 7-ah ka harh hlawl, chhungte hnênah nuamsam lo angin ka insawi ang a, vawiin chu Pari leh Mawia chanchin vawrtawp thleng chhiar turin chawlh ka la dawn a ni. Tuk\huan ka ei peih loh thu ka chhungte hnenah ka han sawi ta phawt a, min ngaihtuah ta reng reng, ka nu chuan, “Zualte, eng nge nawmsam lohna i nei em ni, damdawi ka ngaihtuahsak dawn che em ni?” a ti a. “Ka nu, min ngahtuah suh, vawiin chu chawlh ka duh a ni, ka kâwng napui kha a rawn chhuak leh deuh tlat mai a. A hrim hrimin kumin chhungin vawi khat mah chawlh ka la la lo va, hotute paw’n min hrethiam ang, inah mahni chauh a inkhung fal ka duh a ni. Damdawi lam chu ngaihtuah buai duh suh. Ngaihtuahawm ka ni lo,” ka ti a.
Ka nu chu a ngaih a tha vak chuang lo tih chu ka hre tho; mahse, ka thu chu hnial enah a en ta bik lo va. Ka pindan atang chuan min chhuahsan ta a. Chumi ni chuan office ka kal ta lo a ni.
Bawm chu ka han hawng a,...ka chhiar zawm leh ta a.....
....Ar talh dan chi khat chauh a awm hlei nem... ka ti a. ningani tlai khat chu Pari taxi-a a lut chu ka hmu a, rang takin taxi dang ka phar ding ve nghal a ka zui ru ta a. Treasury Square kan pel a, Sikulpuikawn lamah kan her liam a, kawng kawi kual deuhah hian kan taxi zui lai (Pari chuanna) chu kan hloh thelh a; mahse, rei lo têah a hnu kan chhui fuh leh thuai a, kan tlan zel a.
Pari chuanna taxi chu in pakhat concrete-a sak, changkang ang reng tak kawtah hian a ding a, keini chu an hnung deuh ah an mahni hmu pha rengin kan ding a, chu in ah chuan Pari chu a lut ta a. A sawi angin rethei bakberh tak chu an ni lo em ni ang? nge mi hausa Awmpui mai zawk.
Taxi fare ka pe a, ka chhuak a, chu in chu ka pan phei ve ta a. Kawngkhar lu chungah chuan Lalremruata tih hi a intar a, chu hming chu ka hriat ngai a ni hauh lo.
Han luh ve pawp mai chu ka hreh deuh si, kawngkhar sir dinglam tukverh parda inkeu kau deuh atang chuan inchhung chu ka han bih a, ka thil hmuh chuan min barakhaih chiang kher mai.
Naupang pahnih kum 6 leh kum 13 mi vel hian sitting room dawhkanah lehkha an zir malh malh a, an bul maiah chuan pa valai tak hmel pawh zahpuiawmlo tak hian naupang lehkhazir vil pahin TV a en a, Pari chu inchhungah chuan a rawn lut ta, naupang pahnih te chuan, “Anu, anu a lo haw, eng nge min lo hawn?” tiin an lehkhazir lai chawlhsan meuhin Pari chu an lo lawm a. Ka thinphu chu a inthumrawn nghal tlut tlut a.
Chutah Pari chuan naupang tana a hawn chocolate chu naupangte hnenah chuan a han pe a, “I pa thu in lo âwih em, lehkhate in zir tha em?” a han ti a. Naupang pahnihte chuan a rualin, “Aw, zir tha lutuk, apa thu pawh kan âwih, tiraw apa?” an ti a.
TV ena lo thu mipa chu a lo ding chhuak a, lungchim takin Pari chu a han kuah a, “Bawihte, kan fate hi an fel e, thu pawh an âwih, i lo haw tawh bawk a, zanriah kan ei tawh mai dawn em ni?” a ti zui a. Pari erawh chuan ngaihsak vak âwmin a lang lo.
Pari chuan, “Nia, ei ila, Chhingi (An burma awmpui) rawngbawl i peih tawh chuan chaw ei kha han siam nghal ta che,” a ti a.
Tukverh bulah chuan ka thu hnawk a, ka thinlung chu chemtê-a vih ngawr ngawr ang mai hian a nâ a, Pari chu nula ni lovin pawmlai nei a lo ni reng si. Engati nge, min bum, engati nge min tih der? Taxi khan min lo la nghak reng tih ka han hre chhuak zawk a, pawisa ka neih tam tawh loh avangin rang takin taxi lam pan chuan ka tlan chho a, thaw hlawp hlawpin ka lut a. “Kal ang le,” ka ti mawl tawp ringawt a.
In ka thleng chu ka pindanah ka lut a, lungchhe vankaiin ka tap ta hlawp hlawp a. Nula hnahkhat emaw ka tih kha mi nupui a lo ni reng si. Mi nupui mai pawh a ni lo, fa pahnih lai a lo nei tawh lehnghal. Ka zui ru a ni tih a hriat loh miau avangin Pari chuan eng mah a hre dawn lova, a hma ang bawk khan a zûnin min phuar leh dawn a ni. Ka duh lo, ka duh thei lo. Mahse, chu hmeichhia chu ka lo hmangaih hman lutuk tawh si!
Ka han ngaihtuah let ngial thin pawhin Pari khan ka bulah khan zep chin nei mah se, min hmangaihna kha chu a thup thei bik lo niin ka hria. Tukverh a ka bihthlak lai pawh khan a pasal Lalremruata’n thlahlel taka a lo chhâwnna kha a chhang \ha mumal tlat lo, a pasal chu a hmangaih miah lo tihna a ni thei ang em. Chumi zan chu chutiang thil vel ngaihtuah nan chuan ka hmang tlaivar thak a ni ber, muthilh chu hnai lo vet vet tak a ni. Zing dar li ah pawh nghate rêp ang kar ka la ni e.
Chumi ni a ka office kal chu ka phûr lo kher mai. Pari chuan min lo thlen khalh tawh a, computer leh thil tul dangte pawh engkim hman mai theihin a lo buatsaih lawk leh vek tawh a.
Nidangah chuan pisa ka luh rual hian uluk lutuk hian kan infawp ngawih ngawih phawt thin; mahse, vawiin chu chutiang lam a lang tlat lo. Pari pawh chuan mak min ti deuh tih ka hria. Ngawi rengin hna tul awm apiang chu ka thawk mawp mawp a, ka tawng chhuak lo reng reng.
Ka awm dan mak tak avangin chuan Pari ngaih chu a tha ta lo hle a ni ngei ang, ka bulah a rawn thu a, “Duat, i lung ti awi lohna ka nei em ni, ti nge min biak duh miah lohva, a hrehawm em mai, khawngaihin i rilru hahna chu min hrilh tlang mai teh,” a rawn ti a.
Ngawi rengin rei fe chu ka han en vang vang phawt a, a kut ka han en leh a, silver zungbun ka leisak kha a lo la bun va mai tih ka han hmu a, kei erawh chuan ka bun ve tawh lo. “Pari, sawi dun tur kan nei a ni, sawi tan dan chiah pawh ka thiam lo; mahse, sawi ngei a tul si, engati nge pawmlai nei i ni tih a tir atanga min hrilh loh?” ka ti chang ta khal a. Ka zawhna chuan a ti phu zawk tih ka hre mai. Kei lah ka tum kawh vuau tawh mai, “Duat, ka hmangaih che a ni,” a ti a. “Hmangaih maw? Ha ha ha, pasal nei chungin ka hmangaih che min ti a maw? I pasal chu engtin nge ni dawn?” ka ti a.
“Ani chu ka hmangaih lo, eng lai mahin ka hmangaih ngai lo.”
“A lo nih hrep tak chu, ka dinhmun i hria, ka tan ngaihzawng neih hi a pawina em em a awm hran lo; mahse, mi nupui lo khuaikhem vel zawng ka duh zâwng a ni mawlh lo a ni,” ka ti ta tawl a.
“Duat, ka hrethiam che alawm, keipawhin ka ti dik lo tih ka hria, a tir atang khan engkim lo hrilh tur che ka nia; mahse, i hmel ka han hmuh khan mumanga ka lo hmuh thin ka ‘dream boy’ chu nang hi i ni tih ka hre ta nghal tlat mai a, pasal nei ka ni tih ka sawi chuan ka dream boy chu ka chân dawn che si, duat, min ngaidam rawh, ka hmangaihna che hi a nasa em a ni,” a ti a.
He nu hi Setana mi tirh nge Pathian mi tirh zawk pawh ka hre ta hrep love, ka insum hman lo, ka kuai kûn a, a hmui vam ham maiah chuan duhthawh lutuk hian ka fawp leh ta vawng vawng a. Ani pawhin a theihtawpin min chhang let a ni.
Mahse, ka ngaihtuahna muthlu chu a rawn harh zawk a, “Pari, kan tih tawp a ngai a ni. Kan na dûn dawn tih chu kan hria ang; mahse, kan tih tawp a ngai a ni,” ka han ti a.
“Zep lovah chuan kei pawhin a hma atang khan tih tawp chu ka duh reng a sin; mahse, ka thei ngang lo a ni. Ka hmangaih em che a ni duat, engtin nge kan tih tawp ang?” a ti a.
“Fa pahnih i nei tawh, kei chu tlangval hnahkhat ka la ni, veng chhungah phei chuan kohhran leh thalai pawlah a kul ataia tang ka ni. I pasal hi then la engtin nge i fate an awm ang, tunah cheng sang hnih i hlawh tawk a ni a. Kei lahin nupui ah han nei dawn che ila, i fate nena ka hruai haw duah mai che chuan ka chhungte ngaihdan a ni dawn si lo. I hrethiam tiraw Lai?” (Lai tih hi ka koh thin dan a ni)
“Hrethiam e Duat, ka hrethiam che asin, eng pawh huam mah la khawvel hian an dem dawn che a, nupa hlim tak pawh kan ni thei chuang hek lo vang; mahse, he hmangaihna hi engtin nge kan tih tawp tâk ang le?”
“Ka hrethiam tawh bik lo,” ka ti a, ka hrethiam lo tak meuh si a.
(Sana ka han en a, chhun dar 12:34 chiah a ni, choka lamah ka phei a, thingpui ka va inlum chawp a, ka inhnawh puar hnuin Mawia Hmangaihna lehkha chu ka chhiar zawm leh ta a)
V Pari chuan harh thar deuh thut niawm ziazang hian, “Tih dan tha deuh ka hria, a rawn ti hluai a.”
“Engtin chuan maw?” ka lo ti tum hmuk a.
“Ka pasal hi ka then ang, ka fate chu a pute hnênah an awm mai ang, kum thum hnuah RL (Re-marriage License) ka la ang, tichuan Pathian hriatpuina ngatin nang nen kan innei thei dawn a ni, eng nge i ngaih dan?” a hmel duhawm lutuk chu mipa ka ni inti ve chin chuan an diar bik lo vang.
“Chumi kum thum chhung chuan engtin nge kan awm ang, tun ang renga kan awm chuan kohhran chuan RL (Re-marriage License) chu an pe duh dawn hauh lo che, tun atang chuan enthlak kan ni tawh dawn?”
“Lungngai suh duat Duat, ka naute Mamitah an awm, an bulah ka awm thei mai ang, kum thum chu ka awm bo vang vang ang, phone hmangin kan inbe pawh reng thei dawn tho a; tin, bazar tur tih vel pawn ka rawn chhuak chho fo dawn tho a, ‘ka hmangaih che always’ ka tih che hi ringhlel suh, engkim ka kutah dah rawh,” a ti a.
Ka ngaih chu a tha ta deuh huai a.
Hun a liam a, duhthusam khawvel te chuan mual an liam a. Kum thum chhung chu ngaihtha takin lo nghak phawt mai ang hmiang tiin rilru ka siam ta a. Ka hna chu ka thawk mawp mawp a, Pari erawh chu a hna atangin a bang ta. (Beiseina, beiseina duhawm)
Kum khat liam hnua ka sms hmuh chu , “Mamit chu a lum hle, tih tur a awm vak lo ka nau dawr ka nghahpui a, a bak chu awm mai mai leh eitui a ni mai, taka duat, ka hrilh hreh viau na che a, hrilh che a \ha ka ti si ’ ih maw ka fate an ti duhdah hle tih ka hria, an pa ber lahin engmah a ngaihtuah si lo, Ka fate ka ngaihtuah lutuk hi ka mu thei lo fo thin, duat, ka hmangaih che, duh tawk phawt ang aw,” phone a dah a. A bâk chu, “Ka hmangaih lutuk che, innghak hram hram zel ang aw,” tih vel a ni.
Pari te nupa an inthen hnuah an fate hi a pasal Lalremruata nu leh pate hnenah an awm a. Anni chhung lah an rual hle mai si. An pa ber Lalremruata chuan tun hmaa a lo chin thin damdawi ruih a ching thar leh a, an chhungkaw nun chu hah thlak bat bat tak a ni.
A fate thlavang lah chu hauh a hnekin ‘ka fa te pawh innih tak tak ka ring lo, in nu lah mihur ’ thi phiar ula a nia ka tih, tih te hi a tawng duh dan a ni. Lalremruata te chhung hi sawi tawh angin an rual ang reng a, amah Remruata hi upaber a ni a, farnu 3 nula senior rawngkai tawh pakhat leh nuthlawi 2, an fate pahnih nen an ni a. Eizawnna mumal an nei vak si lo va, an khawsak a harsa deuh nen, Remruata’n ruihhlo tih a lo ching ve leh kher nen, chhe chhawngate vai zin an sawi ang mai an ni ber mai.
Pari fate chan chu chhe rap rap tak a ni, an awmna ka hriat avangin eng emaw changin ka va thlithlai ru ve zauh zauh thin a. Thinrim hmai sen teuh a haw chang ka ngah mai.
Pathian rawngbawltu ka inti ve a, heng thil zawng zawng hi keimah vanga lo thleng niin ka hria a, hrehawm ka ti em em mai. Amah Pari ber lah ka then thei si lo, then a hnekin nitin zantin hian ka duhna a zual telh telh ni ber hian ka hria a.
Tlangval thalai ka ni ve a, ka rawngbawl puite zingah pawh min han ngaihmelh tu nula tuai tha tak takte chu ka tawng ve zauh zauh; mahse, Pari tan ka inserh hrang tlat a. A tan ka rinawmzia hi Pathian pawhin min hriatpui a ni.
Pari nen chuan zantin kan inbe pawh reng a, sms kan hmang tlangpui. Hmangaihna thu thlum tak takte, kum thum reizia te, lo haw a chak tawh zia te, sawi loh a hleih kan neih pawh ka hre lo. “Rimtu i nei em?” ka ti fiamthu a, “Nuthlawi tlawngawl na na na te chuan thingtlangah te chuan nei ve bawk e, ha ha, mahse, i ngaih ti tha lo duh suh, i ta ka ni tawh a lawm,” min ti a. Lawm takin ka nui a.
Mamit leh Aizawl inkar chu hla vak lo mah se, intlawh pawh na hun kan nei thei lo, kei ka hnaah ka buai em em a, Pari aiah khan nula pakhat tlaw zet mai an la thar a, a hmel ka hmuh ringawt pawh hian ka ra hi a so lo chauh ni ber hian ka hre thin.......
(Sana ka han en a, chawhnu dar 2 a ri tawh, ka thawnthu chhiar chu ngaihnawm ka tih em avangin hun lam ka lo ngaihtuah lo a ni, ka ril pawh a \am lo, ka chhiar zo law law mai dawn nge, ka inhnawh puar lawk dawn tih ka han ngaihtuah zawk a. Ka mit te a kham ve deuh bawk nen, chawlh hrih hlek chu ka tum ta zawk a, lehkha chu uluk takin bawmah chuan ka dah leh thlap a, choka lamah eitur zawngin ka chhuak phei ta a.
Eng mah tak tak ka rilru ah a awm thei tawh lo, ka lehkha chhiar lai hlir mai chu ka ngaihtuah reng mai, thingpui ka in zawh veleh ka pindan lamah ka phei leh nghal vat a, ka bawm roh thar tak em em chhunga lehkha chu ka la chhuak a, ka chhiar bak chin atang khan uluk takin ka chhiar tan leh ta a.......)
Pari nena kan awm hran hnu atanga Krismas lo thleng hmasa ber chu Mamit lamah hman ngei ka tum, ka hlawh pawh a theih ang angin ka khawl sauh sauh a. December 17-ah kan company pawh khar a ni ta hrih a, ka thawveng huai mai, Pari awm loh hnu phei kha chuan ka thawk rim zual a, ka thawhpuinu atana an lak ve lah chu hrilh chawp pawha biak tlak mang loh an tih ang chi deuh hi a ni a. Ka hah a ti zual riau a ni, kan han chawl ta chu hnar a hlît phawi ang huai huai a ni ber e.
Mamit-ah Krismas ka hmang dawn tih ka chhungten an hriat chuan mak an ti hle a. Helamah kohhran leh thalaiah rawngbawltu pawimawh ber zinga mi ka ni a, anihna takah phei chuan ka rawngbawlpuite hnenah phei chuan Mamit a krismas hman ka tum thu hi ka la sawi ngam lo a ni. Ka kal tawp ang a, an hre ve mai ang ka ti tawp mai a ni. Chuti a nih loh chuan zawhna chhan sen loh min zawt dawn, ka chhang thiam (Ngam?) dawn si lo. Rawngbawlpuite hmel han hmuh chu ka huphurh a ni.
December 20 ah Mamit pan tur sumo ticket ka la a, ngawi rengin Mamit lam pan chuan ka luai thla ta a ni. Pari Zûn chuan Zaman hmawng thing angin min phuar tlat tawh a, châng dang kânsan thei ka ni tawh mawlh lo. Rawngbawlna, biak in, Pathian thu tih vel lam pawh ka ngaihsak hman tawh lo. Pari Pari Pari tih chu ka thinlungah a ri tluk tluk a, kum khat deuh thaw a hmel ka hmu tawh lo va, zaninah hian ka duhlaii chu ka han hmu leh dawn a nia. Kan chuanna sumo te chu tlan muang ngawih ngawih hian ka hria a, thim hma ngeia Mamit luh ka duh a ni.
Mamit kan luh chuan Israel fateho tih dan ang mai a, Mamit leilung chu han fawh vawng vawng tak hi ka nap a. He hmunah hian ka duhlai Pathian ai pawha ka thlan Pari, Lal\hapari chuan riahrun a rem tlat a ni.
Mamit ah hian chhungte kan ngah angreng a, riah a, thlen nghal mai na tur pawh in 4 vel lai chu ka nei a ni. Pari awmna hnaih bera awm ka Pa Rosangliana te in ah chuan ka in nghat a, an ni chhung hi Mamit a kan chhungte zingah chuan a chenbeh deuh ber an ni; mahse, an rilru a tha a. Ni danga Mamita ka zin chang pawhin inptepui bânna atana ka hman ber te an ni hrim hrim a. A piah lawkah chuan Pari a awm tih ka hre bawk.
Pari nena kan han inhmu chu sawi dan pawh ka thiam lo zawk, a nuam lutuk hi a hrehawm zawk an tih ang vel hi a ni. Puitling ve ve kan ni tawh bawk a, kan chhungten min ngaihtuah em em tawh lova, duh thalin nuam kan tawl a. Hlimna sawi hleih theih loh hi kan inbán dun a ni ber.
Hun hi hlimnain a lo luah a nih chuan hun hi a pangngai aiin a lo che rang hret thin anih ka ring ta hial mai, sana pawh hi ka ringhlel rum rum a, December 28 chu rin loh karin a lo thleng reng tawh mai a, ka haw a hun tawh. January thla tir ah hna tan leh tawh a ngai dawn a. Haw lo thei ka ni tawh lo.
December 28 zan, chuan Mamit field ah kan pahnih chauhin kan awm a, tuman min tibuai lo, tumah kan ti buai hek lo. Pari nen chuan hmangaihna, hmangaina ropui ber mai chu kan chen a ni. A tuk maiah ka haw tawh dawn avangin kan âm dûn hle a. Zan dang zawng aiin engkim chu uar takin kan hmang a. Kan hlimna chuan a vawrtawp a thleng tak meuh a ni.
A tukah chuan ban invai lap lapin kan inthlah a. Pari lan theih chhung chu ka thlir reng a, ka va han hmangaih tak êm! Chu chu ka hmangaih Pari, Lai ti ngata ka koh thin ka hmuh tawpna tur a ni tih ka hre lo.
Ni a vei a, kar a ral a, thla vei a, hna thawh a hun leh tan ta, kan mi lawilo nu (an rawih thar Buangi kan ti mai thin) nen chuan hna chu kan han thawk dun leh tan ta poh a.
Zep lovah chuan Pari awm loh atang kha chuan hna-ah hian ka tui thei tawh thlawt lo a, tum khat phei chu ban mai ka tum a; mahse, ka pu (Kan hnathawhna pa) chuan, “ Mawia, i tel lo chuan kan buai lutuk dawn, Buangi nikhua lohzia lah i hria, khawngaihin min bansan lo hram rawh. He company hi kan chhungkaw innghahna ber a ni ve a, tunah bang ta ngawt la, midang rawih mai tur kan hmu mai dawn si lo, kei lahin computer hi amik amak pawh ka hre thiam ve si lo. I bang duh a nih pawhin hmanhmawh lo la, nakkinah, midang remchang i aiawh an awm hunah kan la ngaihtuah dawn nia, tun tum chauh chu min pui leh hram mai teh,” tiin min tahawh a.
Ka pu meuh kan inah lo kal a, ka khawngaihna dil a, an hnena awm zel tura min han ngen chuan min hneh hle a. “Aw le, ka bang leh lo mai ang e; mahse, ka hna tam zia hi chu i hriat ve tho ka ring, ka hlawh hi chu tlem tal chuan i pun ve tur a ni,” tiin ka intipaukhauh lui a.
“Hlawh pun chu ka lo tum sa reng tawh alawm, tunah cheng sangli i hlawh a, kumin atang chuan sangnga i hlawh tawh dawn nia, tichuan i lung a dum thei mai em,” ka pu chuan a ti a.
“Aw le ka lungawi e, kan thawk leh phawt a niang chu,” tiin tha takin kan inthlah a, kei pawhin ka hna chu a pangngai angin ka zawm leh ta nghal a. Ka hlawh pawh a pung ta ngei bawk. Dik chauh chuan ka hna ang thawk ka hmelhriat thenkhatte hi chuan thla khat ah cheng sangriat chuang te an hlawh tih ka hria. Mahse, an ni company changtlung tak taka thawk te an ni, anni chu ka thik pawh a ni hran lo. Thudik tluang pangngai ka hriat ka sawi ve mai a ni.
Pari nen chuan zantin kan inbia a, ka taksa chu Aizawlah awm mah se, ka rilru, ka ngaihtuahna zawng zawngte chu Mamit ah a awm a ni.
Kum a lo thar a, engkim mai hna lamah chuan a pangngaiin a kal; mahse, Pari sms ka dawnte chu a danglam ta tial tial mai. Thikthu lam chu a ni lo, ‘A pasala chhungten ten a fate an tih duhdah dan râpthlâk lutuk chanchin tih vel a ni ta fo mai’ han sawi pui vak dan ka thiam lo hle thin a, theihtawpa an thlavang lo hauh pui ka tum thu tein ka han hnem leh ngawt thin; mahse, chutiang chu ka tan tih theih a ni lo tih chu a hre chiang ber tu kan ni.
Kum hnih a vei dawn meuh chuan ngaihthat lohna lian tak ka nei ta, a chhan chu Pari sms chuan keimah lam aiin a fate pahnih retheihzia leh an exam-ah pawh an failed tak zel thu te hlir a thunawn ang maiin a sawi nawn ta sek mai.“Khawlaiah bal takin an vei a, an sikul uniform pawh a thler nuai tawh, an sikulah pawh miten an nuihzat tawh.
“Duat, ka fate hi ka hmangaih a ni, an pa lah hian drugs a ruihsan a, chhe tê pawhin a ngaihsak si lo.”
Heng message te hian thil tam tak min ngaihtuah tir a, Pari chuan a pasal chu thlahlelin a hmangaih a ni lo; mahse, a awm loh china a faten harsatna an tawrh zawng zawngte chu a chîn chhuakin a hria a. A rilru a hah takmeuh a ni.
Kum hnih a liam tawh, kohhran hnena RL laa kan inneih thatna tur ni pawh a hnai telh telh; mahse, harsatna harsa tak maiin Pari nena kan inkarah chuan bu a rawn khuar ta mek a ni.
Hmangaihna thu tih vel lam aiin a fate retheih tak zia leh an exam-ah pawh an failed tak zel thu te chu ka msg dawn zin pawl a ni ta. Engtin nge ni ta ang zel ang le?
Rawngbawltu ka ni, Pathian chu uire sanin a duh loh zawngin awm thin mah ila, a awm tih ka hrechiang a, min hnaih reng thin tih pawh ka hria. Duhthlan tur buruhseh zet mai ka hmaah min pharh sak ta tih pawh ka hria.
‘Eng duhthlanna maw?’
Pari pumbilh nge fahrah pahnihte chhanchhuah?
Duhthlanna awlsam tak chu a ni hauh lo mai. Heti ang ka duhin ka dil ngai lo.
Pari chuan a pasal (Lalremruata) chhungten lo haw leh mai tura an duh thu an rawn hrilh tih min hrilh bawk. Nia, a haw leh a nih chuan a pasal nen chuan an indang leh ang a, an fate pawh nun nuam zawkin an awm thei ang.
Pari ka hmangaihna chu eng ang hmangaihna nge a nih ka ngaihtuah a, a tisa ît vang ringawt a hmangaih ka ni em? A laka duat pangchan ka beisei vang chauha hmangaih ka ni em? Pathian rawngbawltu anga veng chhungin an ngaih ka ni. (Pathian chuan min ngai ve kher lo mai thei). Duhthlan tur pui tham tak mai ka nei ta, chu ka duhthlan tur chu hei hi a ni.
Pari chu haw leh rawh se, ‘I fate tan haw leh rawh ka tih a ngai dawn’ ‘Duhthlanna pakhatah chuan, ‘haw lovang, i fate chu an awm awmin awm rawh se, nang nen fa dang kan nei anga i fate chu i theihnghilh mai ang’ tih a ni.
Van Pathian hnenah ka tawngtai a, ka duhthlan tur min hrilh turin ka ngên a, ka tawngtai zawh hmain a chhanna ka dawng nghal, “Pari chu a haw leh tur a ni, eng ang pawhin hmangaih mah la, fahrah pahnih i siam hi ka remti lo,” tih a ni bur mai.
Ka beisei leh ka mihring duhthusam chhanna chu a ni mawlh lo; mahse, chu chu ka Pathian min chhanna a ni, A ni chuan , Ni chu NI, NI LO chu NI LO a ti mai \hin a ni. A thu chu hnial theih a ni lova. Amah leh amah a inphat ngai hek lo.
“Pari, kumkhuain ka hmangaih ang che; mahse, i fate pahnih tan ka hmangaihna che hi ka hlan dawn a ni. Tunah i pasala chhungten haw leh turin an ko reng bawk che a, khawngaih takin haw leh zawk mai rawh, mi pahnihin hmangaihna mumal lo zet an chen dun ai chuan fahrah tur pahnih nunna chhan chhuah chu a hlu zawk e. Haw leh ang che, mangtha, Lai,” tiin message ka thawn a, ka rin lawk ang ngeiin a ngaithiam hauh lo mai, tah chuan a ni khawvela ka tih duh loh ber, ka tih tak ni, “Pari ka hmangaih tak tak lo che, eng atan mah ka ti tak tak hlei nem che, nawm chen nan mai mai a lawm ka tih che, nupui atan ka duh tak tak lo che,...” (ka sawi ngam tawh lo, dawt vek a ni si a)
He message ka thawn lai hian ka phone screen hmu fiah thei lo khawpin ka mittui in min bual a; mahse, huaisen taka kawng dik zawk ka thlan avangin Pathian chu ka chungah a lawm ngeiin ka ring a ni.
Hun a liam vut vut a, Pari pawh tunah chuan a haw leh ta, a hmaa an luah tawh hnu in kha a pasal leh a fate pahnih nen chuan an luah leh tawh a. Keipawh ka hnaah ka buai leh hle tawh. Lunglenga mittui han tih tlak na hman pawh ka nei meuh lo. Pari ka hmangaihna erawh chuan a vawrtawp a thleng takmeuh a, he lei hnuai lamah ni se, lei tawp a thleng ang. Vanah ni se van tawp rât a hawlh ang. Hmangaihna chu vawng reng mah ila, fahrah naupang pahnih siam ai chuan ka hmangaihna chu nep ka ti zawk a, hrehawm ti reng reng a an puitlin ai chuan khawvela ka hmangaih ber then chu ka thlang ta zawk a ni. Mahse, mihring ve mai ka ni si a, a na zawng ka ti a ni.
(Lehkha inziak chu a pherh tan ta hle a, chhiar pawh a har tan ta, a ziaktu Mawia hian mumal vak lovin a ziak ta a ni ngei ang, uluk takin ka chhiar zawm zel a)
Hringnun hi ka tan chuan hlo har leh hnim hnawk ang mai a ni zo ta. Pari zûn chuan nasa leh zualin min phuar a; mahse, a lam ka hawi leh chu a thiang tawh si lo.
Ka tawrhna ti reh turin Pathian chuan engmah a tih ka hre lo, (a lo ti a nih pawhin ka hre lo a ni tal ang). Ka hna atang chuan ka bang tawp a, ka pute chuan min ui der ver viau mah se, kan pisa a Pari sûlhnu hmuh tur tam lutuk chuan ka duhthlanna chu min her danglam sak leh mai ang tih ka hlau a. Pari sûlhnu hrim hrim chu hmuh leh ka duh tawh lo a, ka ngam tawh mawlh lo a ni.
Ka nun hi a ruak ngawih ngawih a, a thar a bul tan leh tumin han insang phek thin mah ila, ka vawn apiang a chim zel a, he khawvel hian ka tan par a chhuah ve thei tawh lo. Pangparte chu ka tan chuan mittui thlem chhuak tu mai an ni a. Chu zawng zawng aia tawrh hrehawm ber mai chu Pari ka message na thu dengkhawng tak takte avanga Pari’n min haw ta tlat chu a ni. Ka hmangaih vang a ni tih lah chu a hrethiam si lo. Ka hmangaih vang a ni tih ka hrilh chuan, ka hmangaih vang a ni dawn si lo. Beram a hmul mettu hmaa a ngawi reng angin ka ngawi reng mai a ni. A na teh a sin ka thian!!
Ngaihzawng dang neih ka tum lahin ka tui thei thlawt bawk si lo. In atangin A-4 fulscape tam tawk nen ka chhuak a, ka kal ka kal a. Thlam nuam angreng tak hi ka hmu a, chu thlam ah chuan chau takin ka tlu lut a, he thu i chhiar mek hi mittui leh thlantui nen ka ziak ta a ni.
Thian duhtak, he lehkha hi thutak hlawm hlak a ni. Zungbun hi i hmu ang tiraw, he zungbunah hian thu tam tak a inphum asin, a theih hram chuan tiral mai lovin i lo vawng tha dawn nia, he zungbun hi, Pari kutin ka kut zungchala min buntir ngei zungbun kha a ni si.
Ka va chau tak em, ka chhungte chuan min ngaihtuah ngawt ang; mahse, he hmunah hian thi turin ka lo kal a ni. Chhuan sarih chaw ka nghei tawh a, ka hnuk hi a chat tep tawh ang. He lehkha chhiartu, ka thian duh tak, zungbun mawlh kha aw. A neitu, (min petu) hnenah ngei i lo pek let leh theih chuan i chungah ka lawmna a nasa ngawt ang.
Hei hi a ni ka thawnthu chu, hei hi a ni thutak chu. Ka thian (he lehkha chhiartu). Tu nge ka nih pawh i hre ngai kher lo mai thei, midang ka sawite pawh kha tu nge an nih i hre ngai lo mai thei. Engpawh ni rawh se, i hriat belh duh leh ka ziah kim loh nia i hriat zawng zawngte chu vanah min la zawt dawn nia, chutah chuan kei chu ka lo awm ngei dawn tih ka hre si a. Mangtha...Lai.
Lehkhaa thu inziak chu khati zawng kha a ni. Ka chhiar zo chu ka hnim deuh ruai hian ka hria a, Mawia hmangaihna ropui zia chu mak ka ti a, tluk lo ka inti ngawih ngawih a.
Zungbun chu ka han en chiang a, a chat tawh; mahse, a la bun theih, a len dan atang chuan a buntu kutzungtang pawh a lian thawkhat hle ang tih ka hre thei mai a. Dimtein lehkha leh zungbun chu bawm chhungah chuan ka dah lut a. He hmangaihna thawnthu ropui leh lung ti chhe zet hi halral ringawt atan chuan uiawm ka ti lutuk. Ka phal thei ngang lo. Ka computer ka on a, pagemaker file ka hawng a. A bul te atangin hmaih awm hauh lovin ka chhu chhuak ta dap a ni. An hming thenkhat erawh hi chu thil pawi thei te a awm ka hlauh avangin ka thup a, hming dang ka hmang nual. Chhiartuten inhriatthiam ka ring.
Engvangin nge kei kher kherin he lehkha hi ka chhar, he lehkhaa mihring chuangte hi ka hmelhriat leh lamhnai an nih awm reng reng lah ka hre bawk si lo.
Zungbun chu ka han en a, zungbun tha chi a ni lo. Cheng 300/- man vel a nih ka ring. Mawia, (Lehkhaziaktu) khan he zungbun hi Pari hnena pek let leh kha a duhthusam hnuhnungber a ni.
Lalthapari chu khawiah nge a awm ang? tunah hian eng nge a tih mek ang. Engmah lah chu hriat ka nei si lo. Mahse, zungbun chu ka pek let ngei a ngai a ni. He lehkha computer a ka chhut chhuah tak pawh hi ka pe tel ngei bawk ang. “Mawia, lungngai suh, he khawvelah hian awm ve tawh lo mah la, i duhthusam hnuhnung ber chu ka rawn hlen chhuah sak ngei ngei ang che, ka nunna hming chhal meuhin ka tiam a che,” ka ti a.
Lalthapari zawn chhuah dan tur ngaihtuah pah reng chungin ka mu ve ta a.
VI
A tukah chuan phur vak lovin office ka kal a, ka pute hnênah eng emaw chhungkaw thil avanga ka haw hma deuh a ngaih tur thu ka hrilh lawk nghal a.
Tlai dar 2 a rik chuan Treasury Square ah ka ding vang tawh, Bawm kha ka keng a, a chhungah chuan zungbun, Mawia kutziak ngei lehkha leh, a kutziak computer a chhut chhawn leh chu ka dah thlap bawk a.
Ka han ngaihtuah let vang vang a, Pari chu khawi vengah nge a awm ang? Mawia lah khan an awmna veng kha a sawi miah si lo. Han zawn tan dan mai tur ka bangbo angreng hle mai. Mahse, Aizawlah ngei hian a awm a, Aizawl hi ka vah chhuah vek peih na na na chuan Lalthapari chu ka zawng hmu mawlh ang, a pasal kha Lalremruata a ni tih ka hrechiang bawk.
Taxi ka phar ding a, Tuikhuahtlang ah kal ka duh thu ka sawi a, driver chuan ‘ kal ila’ a ti a. Engvanga Tuikhuahtlang chu pan duh tlat nge ka nih ka inhre miah lo, chutah chuan Pari chu a awm leh awm loh pawh ka hre hek lo. Mahse, ka thinlungah ‘Tuikhuahtlang’ tih chu fiah takin a rawn lang tlat a ni.
Tuikhuahtlang chu rei lo teah kan thleng chho mai a, driver chuan, “Ka pu, khawiah nge ni ang?” tiin ka din duhna lai min zawt a. “Ka hre chiah bik lo, tlan leh phawt mai teh,” ka ti a. Driver pawh chuan ihe lovin a motor chu a tikal ve leh nghal mai a.
“Ding la, i dinglam hawi rawh,” tih thu hi ka thinlung ah a rawn ri dawt mai, ka phu zawk. Driver hnenah chuan, “Ding rawh,” ka ti tuar a. Ka awka chu a vin deuh a niang driver pawh chu a hrilh hai ve lek lek mai, “ Tah hian min lo nghak la, saw lai inah sawn rei lo tê ka va lut lawk ang e, a rei lo ang, a fare chu i tih zat zat a ni mai,” ka ti a. Taxi atang chuan ka chhuk ta a.
Khawlai ah chuan ka han ding vang vang a, ‘ding lam hawi rawh’ tih kha ka thinlungah a lo ri nawn leh a, dinglam chu ka han hawi a, concrete building, hlui tawh lam, rawng hring dal deuh chuan ka mit a la ta chat a, kawng khar lu chung chu ka han en nghal var a, ‘PC. Lalremruata’ tih inziak kalh chu chiang takin ka hmu thei ta, Ka thaw huai a, ka tum chu ka hlen chhuak thei dawn ta, hmangaihna avanga a nun chan ta Mawia’n a hmangaih em em Pari te in chu hei ngei hi a nih dawn hi ka ti a, ka pan phei ta nghal a.
Kawngkhar ka kik a, hmeichhe aw tliang mawi ang reng tak hian min lo chhawnin, “ Lo lut rawh,” a rawn ti a.
Kawngkhar chu ka nam hawng a ka lut ta a.
Inchungah chuan naupang pahnih hian lehkha an lo zir malh malh a, ka hmel an hmu thut chu mak an ti tih ka hre mai. “Hei hi Pi Lalthapari te in a ni em, amah a awm em?” tiin ka han zawt nghal a.
“Awm e, keimah hi ka nia,” tiin a fate lehkhazir a vil lai mek chawlhsan meuhin min han en a.
Mawia’n a he nu a hmangaih chhan chu ka hre ta!!!
Hmai sawl lam deuh, ti nung sen siah mai, a mawi tawk chauh a mit dinglam kalh lek lek, mit kalh ni si lo a ni. A sam chu a dar thleng velin a zuah a, chutiang reng renga hmeichhe duhawm chu ka hmuh ka la hre lo. Ka lo entui deuh a niang. “Ka pu, eng nge i duh?” nelawm vak lo hian a han ti a, ka suangtuahna ram a\ang chuan ka harh chhuak zawk a. “ Pu Remruata hi khaw nge a awm ?” tiin ka han zawt kual leh phawt a.
“Ka hre lo, zing kar atangin a chhuak a...aa..?”
Ka hrethiam mai, Lalremruata chuan ruihhlo a tih thin chu a la bansan lo tawp a ni tih a chiang e, Pari hian hmel hriat loh bula a pasal chanchin tha lo sawi vak chu a duh lo a ni ngei ang.
“Englo a nia, eng emaw i tan, nangma ta tur ngei rawn pek che ka tum a.”
Pari chu a meng deuh kawk a, a hmelthat dan chu sawiin a siak lo. Hetiang hmeichhia hi mizote zingah kutzungtang thliaka chhiar tham chauh an awm ta ve ang. A engkim mai chu a fuh vel vek a ni ber e.
“Eng thil nge ni ta, thil tha lo lam em ni?” a ti a, a hmelah chuan hlauhthawnna a lang tel deuh a.
“Tha lo lam ni hran love, tha lutuk han tih tur phei chu a ni chuang lova; mahse, hlauhthawn phahna tham tur thil chu a ni lovang,” tih pahin ka bawm ken chu ka han lek chhuak a, “Hei hi i ta tur liau liau a ni, a chhunga awm zawng zawngte pawh kha i ta tur vek a ni,” ka ti a.
A tim deuh tih ka hria, a ngawi deuh vang vang a, “Ka pu min hai a ni lo maw?”
“Hai love, Pi Par, ka hai lo che a sin, i ta tur liau liau a ni. Mitthi tur pakhatin i hnêna pe tura min chah a nia, a theih hram chuan i pasal chu hriattir lo la i tan a that zawk ka ring, i thu thu phei chu a nia,” ka ti a.
Tim deuh dai hian a kut no tak chuan ka kut atangin Bawm chu a la ta a.
“Ka chhar tirhin tala in a inkalh a, a chahbi ka hmu zo tawh si lova, tubohin ka chhu hawng a; mahse, tala thar dang ka lei leh a, hei a chahbi pawh, tunah chuan ka kal san tawh ang che.”
“Thingpuite in ve phawt la, eng emaw dang te pawh sawi tur i la nei lo maw?” “Sawi tur dang chu ka nei teuh mai ka pi; mahse, ka sawi tur zawng zawng chu kha bawm chhunga lehkhaah khan kim biaiin a inziak vek tho, i chhiar ang a i hrethiam mai ang, pawnah taxi in min nghak reng si,” ka kal phawt mai ang e ka ti a.
“I tih tlat chuan ni mai e, i duh ang ngeiin bawm chhunga lehkhate chu ka lo chhiar dawn nia, taka, engtin nge ka awmna min rawn zawn chhuah theih?” a ti a.
“Ka hre bik lo. I duh leh awih la i duh leh awih lo la,i thu thu nise, englo, ka thinlungah hian AW a lo ri thin a, chu aw chuan helai hmun hi min hruai thleng mai a ni, mangtha Pari,” tiin ka chhuahsan ta a.
Taxi a ka chuan leh hnu chuan Bawm a hawn huna Pari mak ti tur hmel tur te chu ka suangtuah neuh neuh a. Mittui zawng a sêng ve nual dawn a ni.
Mawia kha ka han ngaihtuah let a, lehkha a ziah zawh khan a thi ta mai ni khan ka ngai mai a, a ruang lah chu hmuh tur a awm pawh a ni si lo. Khawi laiah emaw te hian riltam chau tak hian a lo awm reng ang a tite in ka ngaihtuah leh hnuhnawh a.
Taxi driver hnenah chuan, “Khawngaihin Phunchawng ah min zu kalpui leh lawk hman lo maw,” ka ti a. Driver chuan, “Hman e a, i thu vek a lawm,” nui huk huk chungin a ti a.
Phunchawng kan thlen thla a, ka thianpa te thlam lam kha hmanhmawh takin ka pan thla nghal a, khua chu unau hmel hai vel a ni tawh. Eng ka neih loh avangin khaw thim chhiat tak tak hmaa thlam thlen hman hram tumin ka hmanhmawh zual sauh a. Thlam chu a hmaa kan kalsan dan ngai ang ang khan a lo la awm bâm a.
Ring leng lawng hian, “Mawia, Mawia,” tiin ka au ta chiam chiam mai a. Ka aw thangkhawk ri mai lo chu min chhâwntu reng an awm lo.
Thlamah chuan ka bawk thlawp a, “Mawia, i duhthusâm ang ngeiin Bawm chu i hmangaih Pari hnenah chuan ka hlan ta a sin. A hmuh hunah chuan na ava ti ve dawn em,” tiin ka phun sep sep a.
Taxi in min nghak reng a ni tih ka han hre leh hnuhnawh thut a. Khua chu a thim chiang tawh viau mai, vanneih thlak takin thla a eng hlauh a, taxi lam pan chuan thluk-leh-ding-awn fawmin ka luai chho nawk nawk a.
Taxi chuan min lo la nghak reng a, hmanhmawh takin ka lut a, “Ka hman e,” ka ti a. Driver chuan a motor chu a tinung a, kan tlan tan ta a, “Ka pu, tape play ila i ning ang em?” Driver chuan a ti a. “E.. i duh duh play rawh, ning lul love,” ka ti a
Car Tape ah chuan cassette a thun a, he hla ber kher hi a rawn zai tir ta a:
Lonely rivers flow to the sea, to the sea
To the open arms of the sea
Lonely rivers sigh, wait for me, wait for me
I'll be coming home, wait for me
| Link: | |
| BBcode: | |
| HTML: | |
| Hide post links |
ADVERTISEMENT (A hnuai a milem hi a nia hmeh zeuh tur chu)