THE SALVATION BY Puitea Tuallawt

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

THE SALVATION BY Puitea Tuallawt

Unread post by Ngaia » May 21st, 2016, 11:10 pm

THE SALVATION

INTRO
Kum 1889 Nikir thla tir lam a ni. Zosang khaw Lal Chunglura leh a khawnbawl upaten lal inah ro an rel a. Chunglura khawnbawl mìn ber Trialmunga chuan, “Khual thuthanga kan lo hriat danin Rolura thlah te pawhin sapho chu remna sa ui an tan pui tawh a ni awm a, kan heti zel a nih chuan Sailo lalte nikin ni hi a hla tawh lovang tih ka hlauhlel lo a ni,” a han ti dap dap a.

Lal Chunglura chuan a vaibel chu vam huam khawpin a han hip hrawk a, “He ram hi kan pi leh puten lu chhum ban chhum huama an lo sah zau a ni, kan pipute thlarau zah vang chauh pawhin kei chuan ka ram hi ka phatsan dawn hlek law.. a thih leh kan thi mai ta lawng, ni leh thla kara leng kan ni ngai e,” tiin, a hmui chhah pui mai chu a han pet kaw vuau mai. Khawnbawl upa dangte pawh sap kuta inpek leh inpek loh chungchangah chuan an inhnial laih laih a, mahse, lal thu chu thu tawp a ni.

Hetih hunlai hian Zoramah British sipaiten khaw hrang hrang halin mizote hnênah tuk luih chhiah an phut a. Sailo lal ngen zual deuhten lo dodalin lo kap ve bawk thin mah se, a tama intam hleih na na na chu mizote tan hneh rual ni hek lo le. Sapho chuan an rawn hmatiam chho hmiah hmiah a ni ber mai. Sailo lal thenkhatte chuan sapho lo lian zel chu an hneh dawn chuang lo tih hriain, buaina thlen tam hmain remna saui an tan pui a, amaherawhchu, sailo lal thenkhat sapho hmaa tlawm duh hauh lo an awm chung mi te chu Lalnu Ropuiliani te, Lianphunga, te Thanghulha te leh tuna kan sawi mek Zosang khaw lal Lal Chunglura te hi an ni.

Kum 1890 Mimkut thla a lo thlen meuh chuan sapho chuan Mizoram chu an awp pumhlum lo chauh tawh a ni ber. Zosang khaw mipuite pawh an mangang takzet tawh a, an lal Chunglura luhlul lutuk chu an dem rawn luai luai tawh a ni ber. Mizote tan chanchin lawmawm hriat tur a tlem sawt hle mai. Lalsaipui, Lalthangvunga, Lallunga, Sangliana leh Lalruma te pawhin Kumpinu sipaite chu remna saui an tan pui tawh tih te chu khualthuthang langsar zual a ni.

THE TERRIBLE CAPTAIN
Captain Renauld chuan Zosang khaw lal Chunglura chu pa dehkhirh tak a ni tih a hre nghal mai, sailo lal dangten remna siampuia, sumpar uma sap ho ke phah liak lo chauha an awm laia, luhlul chhuaha inpe ve duh lo kha a ni tlat. A tawhkhirh hle ang tih pawh a hria; mahse, huphurhna chhete mah a nei lo. Sipai 200 thre thraw a nei a. Zosang khaw tlangval 40 bawr vel lek chu zan khat thil thuah pawh a hmet chibirh barh thei dawn tih a hre lawk tlat a ni.

1890 Mimkut thla ni 23 zan a ni. Captain Renauld chuan sipai 200 hruaiin Zosang khua chu hmeh chimih vek tumin a pan ta a ni. Zosang tlangval huaisen rual 40 thre thraw te chuan Zawlbukah bu an khua a, rei lo teah silai puak ri leh na tuar tre riin Zosang khua a tuam ta mup mup mai a ni. Darkar khat vel zet an inkah hnu chuan, a tlem zawk Zosang khaw tlangval te chu an thawm a zawi tial tial a, belchhung sa ang chauh an ni tran ta. Captain Renauld a pawlte chuan Zawlbuk chu an hual hnai tial tial a.

Zosang tlangvalte tan chuan Zawlbuk chhuahsan chu thihna a ni ber tawh. Nunna pawh a hek heuh heuh khawp mai. Mahse, mizo an ni a, tlawm thei an ni lo. Thih mai hmabaka an awm mek lai chuan thil mak tak mai a lo thleng ta thut mai a ni.

WONDERFUL HELPER
Captain Renauld a leh a hoten, Zawlbuk luhchilh tuma an inkau tran mek laiin, vawilehkhatah van a rawn inhawng thut a, thil êng em em, mit lâwnga hmuh ngam harsa khawpa êng hi Zawlbuk chung fit 200 velah chuan a rawn lang thut ta mai a. Chu thil chu thleng khaikhup ang deuh a ni, a vir muai muai a. Thawm engmah a chhuah lo.

Captain Renauld a hote chuan chu thil mak tak chu che lo chang lovin an thlir a, Zawlbuka mizo tlangval huaisen rualte pawhin silai ri reh ta duk leh an chung zawn rawn eng ta phut chu makti takin an ngaichang a. Chutiang thil mak tak chu tunhmain an la hmu ngai reng reng lo. A lo thlawk hniam zel a, a sir kil tinah chuan êng de neuh neuh a awm chuk a, a vir muai muai a, a len dan leh a lan dan a ropui tehlul nen thâwm reng reng a chhuah lo.

A thlawk vir chur chur a, Zawlbuk kawtah tak chuan a rawn trum ta chut mai a ni. Captain Renauld chuan intih huaisen chhuahin, chu thil mak tak chu a pan hnai a, a puakruk chuan a han kap dawp mai a, mahse, mak tak maiin thlawhna a thlen hmain silai mu chi a ting awl a, leicharah a tla khu sawt mai. A han kap nawn leh a, mahse, a fuh thei tlat lo. Chuveleh hlau thlabar tre ri a lo ri a, mahni sahimna zawngin ramhnuai lamah sipai ho zawng zawng chu an tlan darh ta chum chum mai a ni.

Chu Bawm mak tak chu vawi leh khatah a ri sur sur a, eng nasa tak mai hi amah atrang chuan a rawn chhuak a, a bul vel chu a khu vung vung bawk a, chutah,a sir kil khawi lai emaw ni chu a rawn in tawlh hawng ta ruai ruai a, chuta trang chuan eng hring pawl phut mai hi a rawn inkap chhuak khu chuai chuai a, eng nasa takin a hual vel karah chuan mihring ruangam hi a rawn lang ta.

Lal Chunglura chuan a lal in bathlar a trangin chu thil mak tak chu a vaibel seh keh rawp khawpin a lo thlir reng a. Chu Bawm atranga mihring ruangam lo lang chu Chunglura lam pan chuan a zawi muangin a rawn phei ta a. A pumrua leh a pianzia chu mihring ang chiah a ni; mahse, a lu chu mihring lu let khat deuh thawin a lian a;tin, a mit chu namen lovin a lian a, mitmu hlawm ang maiin a dum vek bawk a, a pawng pur bawk. Lal Chunglura chu a rawn pan phei zel a.

Lal Chunglura chuan lal nihna chu huaisen taka ken tlang a tum ruh hle, a chhungrilah erawh hlauhna namen lovin a tuam a; mahse, hlau lo awm taka awm a tum tlat thung. Tih dan pangngai angin ‘Chibai’ tiin a kut chu chibai rem turin a lek chhuak a. Chu mi mak tak mai chuan a kut chu a rawn phar chhuak ve a, kutzungtang pathum chauh a nei. Derdep hle hian a lang a, a mit lian tak chu a de ru bawk. Chibai an inbuk zawh chuan chu mikhual mak danglam tak chu thlengthlawkthei awmna lamah chuan zawitein a phei leh a. A lo chhuahna ah bawk khan a lut leh a, kawngkhar niawm tak chu a inkhar phui leh nghal thlap a. Vawi lehkhatah chu thlawhna chu van lam hawiin chak takin a leu chho leh ta puat mai a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)