THILPEK BY Puitea Tuallawt

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

THILPEK BY Puitea Tuallawt

Unread post by Ngaia » May 21st, 2016, 11:11 pm

THILPEK

(Hmeichhia zawng zawng zinga ka duh ber, ka chhuan ber, hmeltha ka tih ber, ka farnu zohnahthlak lanute tan aw)

TAWHSUAL :
Khawi atangin min zui tan ka hre lo. Biak in atanga kan chhuah hlim kha chuan ka la hmu lo; mahse, ka thiannuin an in penga min kawisan hnu lawk khan ka hnunglam fit 20 vela hlaah a rawn lang tran niin ka hria. Hlauh nachhan tur ka hre lova, zan thim a nih avangin ka hnunga mipa kal ve chuan min thlamuan ru viau zawk a ni.

Kan inpeng ka thlen hma chiahin a rawn kal chak thut a, zu rim a rawn nam huk a, hnunglam ka han hawi let a, min lo hnaih chilh hle tawh. Ka dinga, inkalpelh tir ka tum a. Ka tisual ta a ni. Ka ka a rawn hup a, ka che hman lo, ka keah min dai khalh a, ka tlu nghal thlawp a, ka hlabu ken lai ka thlauh a. Ka puan bih lai a pawt thla a, min pawngsual ta a ni.

VANDUAINA CHHERCHHUAN:
Nula puitling thawkhat zen zawn ka ni ve tawh. Keimahin harsatna tam tak ka lo paltlang ve tawh thin. Mahni tawka inringtawk ve tak thin ka ni. Mahse, heti ang vanduaina kher kher hi chu ka lo beisei ngai lo. Ka chhungte hrilh ka duh a; mahse, an thinrim dan tur leh an rilru natdan tur ka hria, FIR thehluh a phuba lak ngei an duh dawn tih ka hai lo. Chu chu ka ngam lo a ni. Ka rilru natna chu keimah ngeia tawrh ral ka thlang ta zawk a ni. Zanah mut ka hmu mumal ta mang lova, ka chhungte ngaihthat nan chauh tak tak chaw ka ei thin. Ka pindanah ka inkhung tlat a. Ka rilru leh thlarau hi hliamin a awm a. Mittui leh thinrimna hi ka chaw tui ber a ni.

Thlakhat a liam hnu-ah chuan, ka rilru pawh a harhin a pangngai tan leh ta; mahse, vanduaina chingchihlipin min awpbet zui leh ta. Ka rai.

HAR KA VA TI EM:
Ka pumchhunga naute awm chu hmangaihna hnathawh a ni lo. Ka ngaihdan diktak phei chuan Ramhuai fa a ni. Mahse, ka fa a ni tlat si. Ni e, ka fa ngei a ni. Paih ila, tu nge min dem thei ang? Pathian meuh pawhin min dem dawn em ni? Ka hre lo. Ka hriat chu, keimah leh keimah hi ka inthiam thei ngai lovang tih chauh a ni.

Mahse, ka chhungte hnenah eng thu nge ka sawi tak ang? Ka tawhsual tawh thu lah ka zep bo laklawh tawh si. Mihur em ni ka nih? Chhungkaw ti mualphotu fanu lak tlak loh mai maw ka nih dawn? Aw, Lalpa min pui lul teh. A sarhu laia ka chhungte ka lo hrilh lo kha ka tihsual a ni tih ka hria. Mahse, tunah chuan a tlai zo tawh.

KA PA MIN NGAIDAM RAWH:
Zep theih a ni ta lo. Ka nihna diktak chu ka pum puar kawh luah chuan chalkawlh pen ang fawka chiangin a tilang a. Ka Pain a han hriat chuan, engkhaw sawi set set lovin min beng nghal chawrh a. Ka nuin lo dawm bet lo phei se, min that thei hial ang.

“Ka pa min ngaidam rawh, ka thiam loh a ni.”

“Kha Ramhuai fa kha he inchhung hian a duh lo, vawiinah i nu nen va paih tir nghal rawh u,” chutiang em ema ka pa thinrim chu ka vawikhat hmuhna a ni.

“Ni love, ka pa, he naute hi ka nei dawn a ni,” ka bianga mittui luang chu a thianghlim a ni. Chu chu Van khian min hriatpui e.

HNUCHHAWN RAM:
Kohhranah rawngbawltu ka ni. Junior department-ah zirtirtu ka ni a, thalai pawl lamah Group Treasurer ka ni bawk. Chung ka rawngbawlna zawng zawng atang chuan chawlhtir ka ni a. Kohhran chhungkua atangin hnawhchhuah ka ni bawk. Fanu neihchhun, keh thei dawma dawm, hmangaihna leh duhsakna tinreng chhipchhuan thin ka ni. Mahse, chung thil zawng zawng chu ka tan hnuchhawn ram thil a ni zo ta. Hnawhchhuah ka nih em loh avanga lawm tur ka ni chauh tawh si.

A LO PIANG TA:
Damdawiin khum vawt takah ka mu a, ka bulah ka nu chu mittui tliang piauvin a thu a. Ka kut cher tak chu a vuan a. A chul heuh heuh a. Khawvelin min hnuchhawn mah se, “Nu hmangaihna Phunchawng a kûr diam diam e...”

Zan dar 2 pelh hnu-ah ka fanu chuan he khawvel êng hi a rawn hmu ve ta. A hmel chu ka han en a. Ka hmangaih a ni. Ka mitah tak a rawn en a, “Anu...min vuan tlat rawh aw,” tih thu hi ka thinlungah a rawn sawi a. “Bawihte, ka hmangaih che. Ka ta i ni, englai mahin ka thlah ngai lovang che.”

NUNNA:
Ka fanu ka en reng lai chuan, ka lu a rawn hai muai muai a, ka mit sulh a. Ka tai a rawn na fik ngat ngat a. Ka thaw a rawn chham titih a. Ka nu mangang chuan doctor a ko nghal ruai a. Naute chu a pi kutah an daha, pindan dangah hmanhmawh takin min hruai lut a. Tun hma atanga ka natna benvawn ka lûng(heart) chu nasa takin a lo tha lo zual hi a lo ni.

Nau nei hlim ka nih avangin thisen ka tlachham nasa mai si. Ka nunna chu thlan ko tlangah a dak mek a ni. Na chhawkna chak takin min chiu a, nikhua ka hre lo zui ta. Engtia rei nge nikhaw hre lova ka awm ka hre lo. Mumang mak tak tak ka nei a. Engmah hriat chian fak erawh ka nei lo.

THILPEK:
Damdawiin atanga kan chhuah hnuah thil awmdan dik tak chu min enkawltu Doctorin min rawn hrilh chiang ta. Khatia, nikhaw hre lova ka awm hnu khan, oxygen pek ngai khawpin ka awm zui a. Ka lungphu pawh an hmu lo hman hial a ni. Ka lung tha lo kha a lo nasa tawh lutuk a, doctor te tan pawh tih ngaihna awm lo khawpin a stage a lo sâng hman tawh. Mahse, mi tuin emaw a lûng min pe a ni.

Hetianga mahni taksa bung hrang petute hi an hming thup thin a ni. Mahse, min petuin nasa taka doctor te a ngen a vangin doctor chuan min rawn hrilh a ni. A hming chu Lalremruata a ni. Ka fanu pian tuk zan khan a thi a. Damdawiin hmun khatah kan lo awm reng a ni awm e.Doctor chuan lehkha min pe a, “Hei hi lo pe tur chein min chah a ni,” a ti a.

Lehkha chu ka han en a, “Sawmzual...min ngaidam rawh aw..kan fanu kha ka hmangaih tih lo hrilh ang che,” tih chauh hi a lo inziak a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)