THE CODE (Season 2) BY Puitea Tuallawt

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

THE CODE (Season 2) BY Puitea Tuallawt

Unread post by Ngaia » May 22nd, 2016, 12:22 am

“Khaw nge thil mak chu? eng nge thil mak chu? kan hmuh leh hriatte hi kan awih si lo…a fiahna kan phut; mahse kan hmu si lo..chu chu a ni lo’m ni thil mak chu?”

- BigDaddy Hmahmatea



THE DIATOMIC CHILD



2024 AD

Somewhere in Aizawl:



“Vaivutah i chêng leh ta a ni maw Bawihte, engati nge thu hi i awih duh reng reng loh mai le. I pa zin a lo haw hunah ka hrilh tawh ngei ngei ang mawle!”



Hmeichhe naupang hmaiah chuan vaivut a kai paw thur a, a pawnfen lah chu a khirin a khir uaih hi a ni ber a. Zopuii chuan, a fanu Zorinsangi (Sangtei) sam thur bam chu a chûl mâm sak thuak thuak a. “I inbualna tur tui ka lum tawh, i thawmhnaw hi nangmahin lo hlip la, bualin ah lo phei nghal ang che,” tih pahin bualin lam a pan phei nghal a.



Hmeichhe naupang chuan, a pawnfen paw thur mai chu duhdah zetin a hlip nawk nawk a, chhuatah theh thlak nawk pahin phur zetin bualin lam a pan a, chawhtawlha tuilum khu vang vangah chuan a zuang lut nghal a. A nui hâwk ar ar a. Anu- in a hnungzâng bâl, pangang tiat tiata a nawh khawk tawp tawp laite chuan, tui chu a lo beng per chhuai chhuai a. A vun ngo paw thek kara hmul buang nêm tawi tê tê to sir siar chuan a ti lang ngo zual a.



Tui atanga a nu-in a lak chhuah dawn lai chuan, a kut te tak tê chuan chawhtawlh kotlang chu a vuan tang tang a, “Ka la cheng duh a lawm,” tiin a nu kut atang chuan tal chhuah a tum a. Anu chuan, “Tui lah hi i lawm leh lutuk, a tawk, sikul i tlai dawn, khawng’e, khatin tang tung tung zel suh,” tih pahin a fanu chu a pawm kang nawlh a, towel hring hmul thep hian a tuam lum nghal a.



“Anu, apa hi ka ngai tawh e, a lo haw har si,” a nu chuan sikul form a hak tir mawlh mawlh a.

“A lo haw tep tawh ang. Naktuk ah chuan a lo haw tawh ngei ngei ang.”

“Naktukah i ti reng mai, hmanah pawh naktukah i ti, a lo haw chuang lo.”

“Hmanah te kha chuan a buai lutuk a, a lo haw thei lawk lo a lawm, tunah te chuan a buai tawh lovang, a lo haw tawh ngei ngei ang, Bawihtei khan anu thu a awih chuan thil tha deuh ka lo hawn dawn a tih che kha.”

“Anu, i thu ka awih tiraw?”

“Awih tho, vaivutah i chêng tih loh kha chu.”



THE UTOPIAN SURVIVOR



Ralkhat atanga thlir chuan Rihdil tui chu a lam cham duai a. Thil danglam leh pangngai lo engmah a lang lo. Tui chhung fit 80 a thukah chuan boruak lawng pakhat hi a bawk vung a.



“Helai hmun hi kan tum ram chu a ni meuh maw, map hian a chhui fuh reng em?” King Mogun chuan a hmaa darthlalang hmai chu a han khawih zauh a.

“A ni ngei chuan a lang. Tun hmain he tui hnuaiah hian Explorer 23 te khan hmun an lo zu khuar lailawk tawh a ni. Signal ka hmu tlat a ni,” Colonel Zook chuan a mit phe ruai chu a nuai nauh nauh a.

“A lan danin helaiah hian Magnetie force chak tak a awm niin a lang. Utopia keh them hian min rawn umzui mai lovang maw?” King Mogun hmelah chuan ngaihngam chiah lohna hi a lang thei a.

“Hlauhawm lovang, engkim mai kha Jupiter khan a hip khawm vekin ka ring, hetah chuan kan him ang.”



Chûng mi pahnih te chu Boruak lawng atang chuan an chhuak a, an chhuah fel rual chiahin boruak lawng chu mit lawnga hmuh theih loh turin a thâm ral nghal a. Rihdil tui vawt tak chuan harsatna a siam sak lem lo a nih hmel. Tui chhunga an awm avangin thawk chhuah an harsat phah lo bawk. Colonel Zook chuan, a ban puam veilama hmehkhep intlar thla thliai zinga pakhat chu a han hmet a, “Ti rawh le, Explorer 23 te sulhnu chu i han zawng chhin teh ang. Signal reader atanga a landanin a hla lovang,” a ti sup a. A tawng ri chuan tui chu a nek phuan so barh barh a.



ST. HERBERT SCHOOL

“Zorinsang, engati nge home work i tih loh leh tak, ding nghal teh.”

Zirtirtunu hmai chum buang mai chu a fawn hlurh hlurh a. A mitmeng tur khui mai chuan a thinrim a ni tih a tilang bawk. Class 4 naupangte chuan tlar hmasaber dawttu a thu hmeichhe naupang Zorinsangi lam chu hlauthawng takin an hawi thap a.



“Miss, ka theihnghilh daih a,” Zorinsangi hmelah chuan hlauthawng leh zam hmel a lang lo. “Theihnghilh ti reng mai, vuak i duh em?” zirtirtunu chuan dawhkana tairaw tiang te reuh te a dah chu a han lek chhuak a.

“Vuak chu ka duh lo miss.”

“Vuak duh silo, ti nge home work i tih loh?”

“Home work chu ka thiam vek tho a lawm miss,” zirtirtunu tiang ken lai chu a en kâl a.

“I thiam vek a maw? Ka va awih lo e. A nih en lovin han sawi teh. I thiam leh si loh vaih chuan ka vua ang che.”

“Khawi atangin nge ka sawi tan ang.”

“A vaiin; in home work zawng kha.”



Zorinsangi chu tlemin a han dak deuh, bahlah map lo hian an English home work chu a sawi ta zar zar a.

“A tawk,” zirtirtunu hmela mak tihna lo lang chhuak chu a nuihzatthlak lek lek mai.



“...at the same time, i also now see our world from many viewpoints. Depending on how one looks at it, our world can be very small or very big. In one way, it is an extended global village peopled by various races and....”Zorinsangi chuan nuam a ti telh telh mai.



“A tawk ka tia lawm...in homework chin chiah a lawm sawi tura ka ti che.” zirtirtunu chu thuthlengah a thu thla hnawk a. “Rapthlak zet zut lutuk,” a ti sup a.



School ban dar a rawn ri rang rang a. Naupang ho chu an phu nghal suau a. Zirtirtunu chuan class room a chhuah san nghal a.



INCIDENT

Tlai lam dar 4 a rik chuan zirlai naupangte chu school bus chhungah an thu thap tawh. Driver chuan, motor chu a han ti nung a. Muang dam ruih hian a khalh kal ta nghal a. Naupangte chu an beng chheng hle a. Dinglam sir tukverh bulah Zorinsangi chu a thiannu Mapuii nen an thu dun a.



Tuikual chhuk thlaa an tlan thlak mek lai chuan, an mahni tawk zawngin taxi pakhat hi chak zetin a rawn tlan chho a, horn a rawn hmet ri tuar tuar bawk. Reiloteah an inhnaih chilh nghal thuak a. Naupang ho chu thlabar takin an te nghal tuar tuar a. Bus driver chuan steering chu veilamah theihtawpin a herh vir a; mahse, a tlai lutuk hman ta. Taxi chu a rawn tlan lut zawk a.



Driver chuan brake a rap ri hrawk a. Bus chu kawng vei lam nger chhurin a ding chawih a. Kawngkhar hawn pahin driver chu hmanhmawh takin Bus atang chuan a zuang thla nghal a. Taxi chu an su ngei niin a lang.



Thlabar takin zirlai naupangte chu an tap chuah chuah a. Bus driver chu hlauthawng takin a han hawi kual ruai a, taxi chu him pialin bus hnung lamah chuan a lo ding reng a.

“Engti zia nge, i va khalh chak em em ve, kan insu lo chauh a nih kha,” bus driver chu a hlauhthawn bakah a thinrim lutuk ringawt.

“Nia, a brake a fail a. Ka thunun thei lo a ni.”

Bus Driver chuan mak tih hmel deuhin taxi chu a han en vung vung a, “Engtin nge hetah i din daih theih a. Kawng a zim hle sia, kan hnuaiah khan i rawn tlan lut ngei khan ka hre si.”

“Nia, in chuanna kha boruakah a kâng thut a.” taxi driver chu a meng kuau a.

“Awih awm loh loh,” bus driver chuan taxi hmai darthlalang chu a chûl hauh hauh a.



Zorinsangi chuan bus tukverh atangin pawn lam a thlir vang vang a. A mit chu a de sawr sawr a. A thi awrh locket chu zawitein a rum veng veng a.

------------------------------------------------------------------------------------------------------------------



SHE’S THE ONE AND ONLY



“..with great power comes great responsibility.”

(From the movie, ‘Spider Man’)



SILENT GOD

A tir chuan a mitah hmawlhte emaw, bawlhhlawh eng emaw tak a lut niin a hria a. A nu hnênah pawh lak chhuah sak turin a ngên nghe nghe. A nu chuan a han ensak ngial a; mahse, bawlhhlawh emaw, hmawlhte emaw, engmah a hmu si lo. A ni telin Mapuii mit chu a fiah lo tial tial a. Lehkha a chhiar dawn hlek lahin, a mittui a tla zawih zawih a, a mit thlûng a na ngur ngur a, a luak a chhuak hlui a. Tawrh harsa khawpin a lu a rawn nä fik ngut ngut a. Beidawngin a maimitchhing leh ringawt thin. Kar khat a liam hnu phei chuan sikul pawh a kal ngam ta lo. A nu’n tarmit dum a leisak chu a vuah a, khawhar takin khumah a mu nileng zankhua a ni ta ber.



Mapuii nu leh pate chu an mangang ta khawp mai. Doctor hnenah an kal a, mit lam enkawl thiam ber ber an pan a, an fanu mit damna tur nia an hriat apiang an pun a; mahse, beiseina beidawnthlak mai a ni. An fanu Mapuii nerve-ah chuan thil fel lo eng emaw tak a awm tih bak chu hriat belh an nei lo. Hriat belhna lah chuan damna a thlen chuang si lo.



Mapuiin a zawna ni thum lai sikul a rawn kal tak loh avangin an zirtirtute ngaih pawh a tha ta lo. An inah an va tlawh chhuak a, chutiang harsatna harsa tak maiin an zirlai naupang a han tlakbuak ta mai chu hrehawm an ti tlang hle mai.



Zorinsangi tak chuan hreawm a ti. Mapuii chu a thiantha ber a ni. An pahnih hian an inkâwm râwt a, midang pawh an kâwm ngai lo, a thiantha berin sikul a rawn kal ngai tak loh avangin sikul kal pawh a hreh phah zo a. Lehkha zir lam pawh a ngaihsak hlei thei tawh lo. A thiannu chu tanpui theih a duh ngawih ngawih a; mahse, tanpui dan tur a hre si lo. A khawngaih a; a khawngaihna lan chhuah tir dan a thiam si lo. Zanah a mut hmunah a tap ru fo a, Pathian hnenah a thiannu chu tidam hram turin a ngên awl lova. Mahse, Pathian chuan engmah a rawn ti si lo.



THE NEW EXPERIENCE

Sikul a ban veleh a nu hnenah Mapuii chhungte phone turin a ngên ziah a, a nuin a han phone lahin Mapuii chanchin tha lam hriat tur a awm mawlh si lo. A ni telin Mapuii mit chu a chhe tial tial a, kar hnih hnuah phei chuan khua a hmu thei ta lo. A mit a del chu a ni ta der mai. Hmeichhe naupang Zorinsangi rilru-ah chuan Pathian rinhlelhna a lo lut tan ta. Zantin a thiannu damna turin a dil a; mahse, Pathian chuan a rawn ti dam duh si lo. A nuin naupang tawngtainate chu Pathianin a chhang ziah thin tia a hrilh te chu a rin har a ti tial tial a. Zan mut dawnah pawh a tawngtai duh ta lo hial a ni.



Sana a chek keuh keuh a, ni a ral a, kar liam a, thla a vei a, hmeichhe naupang rilru thianghlim takah chuan khawharna awmzia a lang fiah telh telh a. Mapuii thutna hnu a hmuh ringawt pawhin a tah a chhuak ngawih ngawih a. Engkim mai chuan a thiannu a ngaihna a ti zual vek tawh mai a ni.



Mapuii chu phaiah an kalpui a, damna zawngin kawi tin kawi tang an vêl a. Mahse, dam a hnekin a mit chu a chhe tial tial a. Mitdel dik tak a ni ta. Beiseina a hlamzuih a, hlimna leh êngin romei angin a thâmral san a. A tan chuan khawvel hi thim a ni a. A lo piang ve hi anchhia a ni.



EXTRAORDINARY CHILD

August 23, 2025 chu Mapuii kum sawm pahnih tlinna pianchamphaphak a ni. A mitdel ni atanga thla hnihna chiah a ni bawk. Sikul ban veleh Zorinsangi chuan a thiannu piancham present tur a dah that khiau chu phur takin a phawrh chhuak a. A nu leh pate nen Mapuii te in lam panin an kal nghal a.



Mapuii chu inlengkawmna pindanah a nu nen khawhar takin an lo thu dun a. A nu Pi Zonunpuii chuan ‘The Wizard of OZ’ lehkhabu hi a lo chhiar sak a. Zorinsangi te chhungkua an rawn lêng tih a hriat veleh Pi Zonuni chuan a lehkhabu chhiar lai chu dah thlain, a thiannu Zorinsangi te an lo len thu chu a fanu hnenah a hrilh sap a.



Present a pek lai chuan Zorinsangi mittui a tla lo thei lo. A thiannu, a hmangaih em em, Mapuii hmel chu a han en thin a, a lung a awi thei mawlh lo a ni. Tun hma zawng aiin a lo chêr tawh a. Khaw hmu lo tih hriat takin a mit chu a meng pual rûm a. A thilpek dawn chuan a tan hlutna teh vak a nei hauh lo. Eng thil nge a nih a hre lova, a mawina pawh a hmu thei chuang hek lo. Naupang pahnih ten present an inhlan lai chu puitlingte chuan rilru na takin an lo thlir reng a. Mapuii nu Pi Zonuni chuan a mittui a hru fap fap a. Tih theih an nei hlawl si lo.



Zorinsangi chuan a thiannu chu lainat takin a kuah vawng vawng a. Naupang mai an ni, tawngkam thlum leh mawiin an in hnêm tawn thiam lo. Mahse, an rilru thianghlimna leh an thian dun inhmangaihna luangliam, an hmela lo par chhuak chu a hmuhnawm a ni.

“Mapui, lungngai reng reng suh aw.”

“Nangin min kawm la kawm duh phawt chuan ka lungngai miah lovang Sangte; mahse, ka mit hi, engmah ka hmu ve thei tawh si lo.”

Pi Zonuni tan chutiang tawngkam, a fanu kä atanga lo ri chhuak chu ngaihthlak ngam chi a ni ta lo. Mut pindan lamah a tlan lut a. Lungchhe vankaiin a va tap ta ringawt mai a ni.



Tlai dar 4 pelh hnuah Zorinsangi te chuan haw an tintuah tan ta. Pi Zonuni pawh a fanu bulah a rawn thu leh tawh . A lungchhiatna leh mangannate chu thup hram hram a tum a ni tih a hmelah hai rual a ni lo. An inleng te chu a fanu nen kawngkhar thlengin an va thlah a. Zorinsangi chuan a tawp nan a thiannu chu a han kuah leh vawng vawng a.

“Mapui, ka thian, i mit chu a na viau thin em?”

“Na tawh love, engtin mah a awm tawh lo. Engmah ka hmu thei lo a ni mai. A na chu a reh vek tawh a lawm.”

“Vawi khat chiah ka lo khawih chhin, zawitein ka khawih ang, i phal em?”



Zopuii chuan inthlahrung takin, “Bawihte, khawih kher a ngai hlei nem...” a lo ti vat a.

Mahse, Pi Zonuni chuan, “Aa..khawih rawh se, khawih rawh se, engmah na a awm tawh hlei nem,” a lo ti vat thung a.

Zorinsangi chuan a kut dinglamin a thiannu mit chu zawitein a han chûl sak a.

“A van pawi tak, theih ni se, ka mit hi pek che ka duh a sin Mapui.”

Vawilehkhata, Mapuii mit atang chuan tui fim tak hi a rawn dir chhuak zawih zawih a.

“Nu, ka hmu thei. Aaa..ka mit a dam daih.” tiin Mapuii chu a rawn te chhuak ta hlut mai a ni.



A rawn meng fiah kawk a, nia, Mapuii mit chu a dam a ni. Engkim a hmu thei. A thiannu, Zorinsangin makti taka a lo en reng pawh chu fiah takin a hmu.



THE FAMOUS

Chutiang thil mak tak chu thup bo theih a ni lo. Zorinsangi nu leh pate chuan ngawih bo pui daih duh mah se, Mapuii nu leh pate tan ngawihbo pui theih a ni ve tlat lo a ni.



Thil mak leh ngaihnawm zawnga eizawng, chanchinbu mite chuan Mapuii te chhungkua leh Zorinsangi te chhungkua chu an bawr nghal tuau tuau a. Interview an neih pui indawt zut a, TV lamin an hmanraw rit sak pui pui an rawn pu lut rum rum a. Mapuii mit-in khua a hmuh tukah chuan Aizawl mai ni lo, Mizoram pum pui hian Zorinsangi chanchin chu an phun pui mur mur a ni ta ber.



Nitin chanchinbu chhuakte lah chuan Zorinsangi chanchin leh a thlalak an vawrh darh chuai chuai a. ‘Vantirhkoh em ni?’ tih te, ‘Ramhuai hnathawh a ni thei em?’ ‘Hmeichhe naupang dangdai’ tih te chu an headline ah lianpui puiin an ziak bak chek chuk a. Hrisel lohna leh bawrhsawmna ruahpui vanawnin a nuai mek Mizoram mipuite tan Zorinsangi chanchin tluka ‘Thu Ngaihnawm huang’ a awm thei lo.



NEWS MAN

‘Thungaihnawm Huang’ chanchinbu Editor Hmangaihzuala chuan tukthuan hmeh atan artui pum hnih a kang sar sar a. Nizanah tum loh deuhin a thiante inah zanriah a ei a. Ama inah eirawng alo bawl hman vek tawh si, cooker khat tanin chaw thing a la awm. Artui a kân zawhah, chaw thing chu a han ur luam thuak thuak a.



Chaw ei dawhkana tukin chanchinbu chhuak hrang hrang inchap darh nuaih bih lawr thuak thuak pahin tukthuan a bar mawlh mawlh a. Chanchinbu hrang hrangte chuan hmeichhe naupang Zorinsangi chanchin chu headline ah an hmang deuh vek hlawm. A chanchin an ziah dan tlangpui pawh a in ang viau.



Vanglaini chuan a chhui chip chiar deuh ber a. Hmeichhe naupang thlalak pawh chiang takin an tar va bawk. Thungaihnawm Huang Daily News hi chawhnu lama chhuak thin a ni. Chanchinbu hrang hrangte thu chhuah chu ru thenin Zorinsangi chanchin chu ngaihnawm takin a ziak ve nghal thei dawn tih chu a hria. Mahse, chutiang chu a hnathawh thin dan a ni ve tlat lo. Tukthuan a ei puar zawh veleh, bike a ti nung a. Zorinsangi te in lam panin a in khalh chhuak ve ta nghal a.



Rin ai takin Zorinsangi te in chu a hla phian mai. Sana a han en a, dar 10 a pel tawh, hmanhmawh a ngai ta. Nizan lamah news thenkhat chu a khawnkhawm nual tawh. Mahse, headline tur duhthusam a la nei tlat lo. Zorinsangi chungchang hi headline atan a that a ring a, chik deuh hlekin, midangte ziah loh dan deuh a ziah ngei tumin a rilru a siam sauh sauh a.



Zorinsangi chu a nu nen inleng kawmna pindanah TV enin an lo thu dun rial a. Pa ber Rina chu Office turin a lo chhuak hman chiah thung. Chanchinbu miten an vir buai nasat lutuk avangin Zorinsangi chu sikul ah pawh an lo kal tir ngam hrih lo hi a lo ni.



Hmangaihzuala chuan zawhna kilkhawr leh kheuhbeuh tak tak a zawt kual a. Zorinsangi fin dan leh thil hriat dan em em chu mak a ti kher mai. A nu Zopuii hnena, Zorinsangi tobul, a pianna hmun leh a nausen lai chanchin vel a zawh a, chhanna mumal a dawng lo erawh a hrethiam chiah lo deuh. Darkar chanve chuang mah an inkawm hnuin Zorinsangi te in chu hlawhtling inti takin a chhuah san a. ‘Thu ngaihnawm Daily News’ an chhut na, Kulikawn a thlen phei chuan dar 11 a ri tawh. Phek 2,3,4 na te chu an lo her chhuak peih dim diam tawh a.



Ama pual bik office ah lut tlangin computer a ti nung a. A note bu chu a han keu nuap nuap a. Pagemaker file a hawng a, RLC Stamp hawrawp chu a han select a, lian kelh kawlhin ‘THE LITTLE HEXUS’ tih a han chhu lut a, a ngaihtuah vung vung a, a rilru a thlak leh thut a, a chhut sa chu nawt rehin, ‘THE LADY HEXUS’ tiin a thlak ta zawk a. Mizo tawnga han ziah zui nghal mai a tum a; mahse, thangtharte hip nan tha riaua a hriat avangin saptawng tawitein



‘The one who knows the future, past, present and over all upheavels and hapenings of certain time’



tih hi kualkhung chhungah a dah a. Zorinsangi chanchin chu mak danglam leh ngaihnawm thei ang ber turin mizo tawng ngeiin a ziah chhunzawm ta mawlh mawlh a.

--------------------------------------------------------------------------------------------------------------------



HEXUS, THE TARGET



“You may say i’m a dreamer,

But i’m not the only one,

I hope someday you’ll Join us.”

-John Lennon



FROM THE FUTURE

2027 AD :

Zan khupruh pelh sawlh tawh lam a ni. Khawvar nan darkar 3 emaw chauh a awm tawh. Tleirawl hawk lak rual, car-a chak tak taka rawn tlan leh zeuh thin tih loh chu mihring hmuh tur an vang tawh hle. Tun hma kum 30 emaw lai liam taa Assam Rifle thuhnuaia awm thin AR Lammual ram chu Mizoram sawrkar kutah a awm pumhlum tawh a. Lammual luhna gate-ah chuan thir kaih thleh kawngkhar nghet leh rinawm tak a in phan thla zui a. Zan lam inkhel an ban hnu hi chuan an kalh tlat thin a ni.



Zan reh tak a ni. Sisip takngial pawh a hram lo.Lammual gate bul lawkah chuan, vaivut nawi hi a invial vir kual mep mep a, a tek chiai chiai a. Eng thawm emaw hi a rum veng veng bawk. Chutih lai chuan tleirawl sam kawh phir seng sung hi lammual gate pui bul zawnah tak chuan bike mak sak zeta chei ran buai chunga chuangin a rawn tlan mek a. Thil tek eng chhiai chhiai a hmuh rualin a bike chu a tlawh ding nghal dawt a. Bike ke hnung lam chu leiah a in nawt hmui khu vung vung a.



Vaivut khu chu a inhlawm bial pep pep a, mihring ruangam niawm tak hi fiah lo riaiin a rawn lang riai riai a. Tleirawl sam phira chu a meng kawk, hlauthawng leh hmanhmawh zetin a bike chu tih nun a han tum a; mahse, a nung thei der lo mai. Vaivut khu chiai chiai kara rawn lang mihring ruangam chu a fiah tial tial a, current sâwt ang mai hian a tek chhuai chhuai reng bawk.



Tleirawl sam phira chuan a bike chu a nam thlu rawk a, tlan chhiat tumin a tawlh sawn nghal a. Chutih lai tak chuan, ban tha chak zet mai hian a nghawngah a rawn rek a, a hik chuai chuai a. Tal chhuah tumin tha tawp a han chhuah; mahse, a rektu ban tha chak lutuk chuan a thisen zung zam zawng zawng thlengin a fan hik uai uai a. Tleirawl sam phiran a damlaia a thil hriat hnuhnung ber chu khuar khurum mawng nei lo ang maia thuk thim mupa, a tla thla ta vawng vawng chu a ni.



WARNING

Inrinni a ni a. Inrinni dang ang bawk a ni. Zorinsangi chuan a zirlai bu chu a khup thak a. Choka lam panin a pindan a chhuahsan a. A nu Zopuii chaw ei siam mek chu a va pui ve nghal a.

“Bawihte, i home work chu i ti zo hman meuh maw?” Rina chuan tuidehnaah kut a sil mek a.

“Ti zo hman vek. Home work lo pawh ka zir hman teuh mawle.”

Rina chuan a kut hruk hul pahin chaw ei dawhkan a kil nghal a. Chaw hmeh inchhawpte chu en lawr diat diat pahin, a tem zeuh zeuh bawk a.



“Nang chu, ti khan i ti ziah, a mawi lo a nia,” tih pahin Zopuii chuan chaw ei dawhkan a kil ve nghal a.

Rina chuan nui vur vur chungin, “A tui hmel hlawm em a...” a ti sup a.



Tukthuan an eikham hnuah an chhungkuain TV an thlir thap a. ‘Chibai Mizoram’ puangtu Puii Chawngthu chuan a hneh zar zar khawp mai. Zorinsangi chuan, “Chanchinthar puang thiam deuh nih ve hi ka chak e kei chu,” tih pahin a pa malchungah a ke a hlang kang a. “I nulat hunah i la puang ve dawn nia, lehkha hi tha deuhin han zir tang tang phawt mai la. Lehkhathiam inih tak tak hunah chuan i duh apiang i la ti thei dawn a lawm,” Rina chuan a fanu ke zungtang chu a ulh rik sak rap rap a.



“Chu..lo bengchheng teh su, nizan thil thleng a puang dawn nia,” Zopuii chuan a bula remote control chu lak kan pahin TV volumn chu a han herh ring nghal a.



“Tukin zing dar 2:30 vel khan Lammual gate pui bulah mi tu tih hriat loh ruang chhar a ni,” thlalak a rawn lang zui nghal a. Ruang lan dan chu a rapthlak kher mai. A vun leh tisa zawng zawng chu a sawng râwp vek a. Ruhro, vun pantein a tuam ringawt ang hi a ni ber. A chhungte tan pawn hriat theih rual niin a lang lo.



Puii Chawngthu chu a rawn lang leh a, “Tun thlengin he ruang hi tunge a nih hriat theih a la ni lo. Ruang an hmuh lai hian thawmhnaw engmah a inbel lova. Hliam hnuhma leh thisen vel pawh engmah hmuh tur a awm lo. Tunah hian doctor ten an post mortem mek a. Chanchin chiang zawk hriat thuai kan beisei.”



“Ti tawp teh Nu-i, a rapthlak em mai. Naupang hmuh ve chi pawh a nih loh kha.”

Zopuii chuan channel dang a hmet sawn nghal a. “A rapthlak hle tak mai,” a ti sup.



UNDER WORLD

“Hei le, ka hmu ta e,” Colonel Meek chuan a banpuam veilam sira hmehkhep hring chu a han hmet zeuh a. A kiu nghal vang vang a. Rihdil tui chhûng hmar lam depah chuan, lei bawhin thir kawngkhar niawm takin hi a bawk phek thlur a, awlsam taka hmuh mai theih loh turin lung hian a indelh thuah lûk a. King Mogun chuan kawngkhar delhtu lung thenkhat chu a han dah sawn a, kawngkhar kil dinglam sirah chuan, darthlalang inchis thum vel, killi nei hi, remthlapin a phah a, a bulah hmetkhep 9, tlar khata 3 zel awm hi a pawng far a.



Colonel Meek chuan, hmehkhep chi hrang hrang chu vawi ruk a han hmet a, darthlalalangah chuan hawrawp mak tak hi a rawn inlan chhawk zut zut a. A kiu ri veng veng a. Kawngkhar chu a intawlh hawng ta riai riai a. A chhung atang chuan eng thil emaw, tha chak tak hi thli angin a rawn thaw chho sung sung a, chumi chakna chuan a chhunga tui lut tur chu a nawr kiang zel a. Rei loteah puarpawleng lianpui hi a rawn insiam a, chumi chhungah chuan King Mogun leh Colonel Meek te chu an pen lut a, kawngkhar chu a inkhar zui nghal thlap a. Thawm a reh zui ta vang vang a.

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 22nd, 2016, 12:23 am

THE HELPER

Zan a ni. Zan reh tak a ni. Chanmari kâwn traffic point dinna bul lawkah kawl a rawn phe zawr zawr a. Thawnga leivir rawn inhawt phur vel niawm takin, leia vaivut te chu chung lamah ah a in pangawzial vir chho mup mup a. Eng nasa tak hi a tek de chho zuai zuai bawk a.



Lei atanga fit 300 vela sangah chuan Boruak lawng lian zet hi a ding thim muk a. Vaivut vir kual chho chum chum te chuan van chung sanga boruak lawng lam chu an pan chho mum mum bawk. Boruak lawng chu zawi muangin a rawn inhawng tual tual a, eng zung zam chak tak hi lei lamah a rawn kap de thla zuai a. Leilam atanga vaivut invial khu chho chum chum leh boruak lawng atanga eng zung zam rawn inkap chhuak infin khawm karah chuan hmeichhe ruangam hi a rawn lang zawr zawr a.



Thawm ri mum mum leh vaivut khu te chu vawilehkhatah a hân duk a. Boruak lawng chu mita hmuh hman loh khawpa chakin van chung säng lam panin a leu chho puat a.



Chanmari traffic point bul kawnglai takah chuan hmeichhe pakhat, te lam deuh, ngo paw thek mai hi a mu kawm chal a. A taksa khawi lai lai emaw chu a tek chhiai chhiai a. Minit hnih hnu velah hmeichhia chu a rawn thu chhuak a. A kut phah dinglam chu a han ti pharh a. Eng zungzam mak tak hi a rawn inkap chhuak khu riai riai a. Chumi engah chuan Zorinsangi nui hmel hi fiah lo riaiin a rawn lang a.



Hmeichhia chu a nui sak a. A tho chhuak nghal a.



THE SABOTAGE

......tleirawl sam phira thawmhnaw chu a tan chuan a te lam hret niin a lang. Bike rawng tial buai mai chu Aizawl tlaklam veng pakhat panin chak takin a khalh a. A bul vela mihring kal thelh nuai nuai te chu a ngaihsak map lo.A ngaihtuahna chu chhiarkawp ang maiin a inchawk chhuak kual char char a. Nghet leh khawng takin hmalam a hawi vah a. Zorinsangi, Rinzuala leh Zopuii tih hming chu a thluak chhungrilah nghet takin a invuah thlap a. A mitthlaah chûng mi pathumte hmel chu chiang takin a lang fel thlap bawk......



MOTHER AND DAUGHTER

Zorinsangi chuan a sikul ipte chu a hnungpuak a. Engthawl leh inthazo takin an in lam a pan mek a. School bus a chhiat avangin ni hnih lai chu kein a haw tawh. Mahse, pawi a ti lem lo. Khawlaia kea han kal vel chu nuam a tih zawng tak a ni tlat. Kawng sirtuaka dawr lian pui pui intlar thluai te chu hmuhnawm ti takin a thlir pah zel bawk a.



A thiannu Mapuiin sikul dangah a kal san tawh avangin a ngai thei hle thin a. Tun thlengin thian dang han kawm nel em em pawh a la nei thei lo. An in peng a thlen dawn tepah, hmeichhe pakhat, te lam deuh, ngo paw thek mai hi, a bulah a rawn lang hlawl a. Chu hmeichhe landan chu Zorinsangi ngainat zawng tak a ni. A hmeltha a ti hle mai.

“Mami, tu nge i hming?”

“Sangtei, ih ih, ka hmingpum chu Zorinsangi a nia.”

“I bulah ka lo kal ve ang chu, i phal em?”

Zorinsangi chu a nui seih a, phur takin, “Tehreng mai. I duh phawt chuan lo kal ve rawh. Mahse, khawnge kal i tum a?” a han ti a.

“Saw tah...i kalna lam turah tho hian a nia kal ve ka tum.”

“A nih tak chu, kan kal rual thei a ni mai a lawm, engtin nge ka koh ve ang che ka pi?”

“Ka hming chu Vaza a nia, i duh leh ka nu pawh min ti mai la,” hmeichhia chu a nui a. Tlemin a lái deuh niin a lang.

“I hming chu a va mak. Nu Vaza ka ti mai ang che aw...i duh em?” Zorinsangi hmel chu a duhawm kher mai.

“Nia, Nu Vaza tih chu ka duh e, tichuan min ko dawn nia.”



Chung mi pahnih te inkai rial riala an kal lai chu kawngsir hnim buk phen atangin Hmangaihzuala chuan a lo thlir reng a, “Lady Hexus, nang hi eng emaw tak chu i ni chiang a ni. Ngawi tak rawh, i tobul hi chu ka la chhui chhuak dawn khawp. Tumah hian min dang dawn lo,” tiin a phun sep sep a.



-----------------------------------------------------------------------------------------------------------------

TERMINATE THE TARGET



“Van inhawng ka hmu a; tin, ngai teh, mi pakhat, tu a ni nge ka hriat loh hian, THE CODE thlarau chu ka chungah a rawn leih a; tin, ngai teh, heti hi a ni a...”



SEE YOU

Vaza kut a vawnna chu a thlah a.

“Nu Vaza, sawlai saw kan in chu a nia, anu pawh a awm ang, a hmu chak ngawt ang che, lo lêng ve la,” Zorinsangi chu biangsum lang kalhin a nui a, tlemin a zak deuh a ni.

“In in chu a va tha ve, nakinah ka hman veleh ka lo leng dawn nia. I nu leh pa pawh ka hmu chak lutuk a lawm.Taka i nu chu a fel em?”

A fanu hmel hmuhnawm a tihzia chu engtin nge a thup theih ang le?

“Anu chu a fel lutuk; mahse, thu ka awih loh chuan min hau vak zel, apa chu office a kal thin a, a buai thei lutuk.”

“Awle, tikhan va haw phawt la, nakinah ka lo leng dawn nia, i kal liam thleng ka lo thlir reng ang che.”

Zorinsangi’n zuang tum elh elh chunga in lam a pan lai chu a thlir vawng vawng a, “Bawihte, ka hmangaih che,”a ti sep sep a....



NEWS MAN

Thu Ngaihnawm Huang Daily News Editor Hmangaihzuala chuan chûng hmeichhe pahnihte in then lai chu a lo thlir reng a. He nu hi tunge a nih ve le? A thawmhnaw hak leh a lan dan hrim hrim chu a danglam riau mai. Tun hmain a la hmuh ngai pawh a hre lo. A hmel lah chu a tha reuh phian lehnghal.



Chu zawng aia Hmangaihzuala rilru luah tlat tu chu, chu hmeichhia leh Zorinsangi hmel in ang lutuk chu a ni. Nufa ang mai an ni, an hmai a bial a, an vun rawng lah a in ang chiah mai bawk si. He hmeichhia hi enzuia ngaihven deuh chu a ngai ve ngei dawn nih hi. A note butê ah chuan eng emaw hi a han chhinchhiah zauh a.



THE SABOTAGE

.......a bike khalh chuan duhthu a sâm lo hle. Aizawl tlâklam vëng pakhatah a tlan lut mêk a. Ngaihtuahna bûlbâl leh felfai tak a nei hauh lo. A nunkhua chu engtik atanga lo intan nge a hre lo va, engtia tawp leh tur nge a nih ka hre hek lo. He khawvela a hriat chhun chu Zorinsangi a ti hlum ang; tin, a thi awrh lai a laksak bawk ang tih leh, Rinzuala leh Zopuii chu a rang thei ang berin a tihlum nghal bawk ang tih chauh chu a ni. Chûng mite chu engvanga ti hlum tur nge a nih a inhre lova, a ngaihtuah hek lo; ngaihtuahna a neih miau loh avangin.....



TERMINATE

Zopuii chuan zanriah tur eirawng bawl pahin chhuat a nawt thuak thuak a. Tunlai chu a hna lamah chawlh a lak avangin in lamah a buai thei hle a ni. Sana a han en a, Zorinsangi pawh a lo haw tep tawh ang. Gas ah chuan thingpui a chhuang kai a. A fanu sikul bang riltam theih zia a han ngaihtuah chhuak a; a nui sak a.



Kawngkhar bell a rawn chiau vang vang a.

“Lo lut rawh,” tih pahin thingpui belah chuan thingpui fe a thlak a.

Kawngkhar chu a rawn inhawng ri rawp a. Zopuii chuan tu nge a nih en tumin kawngkhar lam a hawi phei nghal thuai a. Mi pakhat, Jeans kekawr chhing deuh leng lung ha, meng lian kel kul. Nelawm loh zet hi inchhungah chuan ngawi rengin a rawn pen lut a.

“Eng nge i duh?” Zopuii chuan a hlau deuh hlek a ni.

“Khaw nge Zorinsangi?” a aw ri chuan mihring awphawi pawh a ang chiah lo. A ri khal deuh rul rul a.

“Sikul a lo la bang lova, eng nge ni ta?”

Chu pa kut dinglam atang chuan êng zûng zâm chak tak hi a rawn inkap chhuak zawk a. Zopuii chu a rak thawt a, a nghawng thip zawr chu he khawvela a thil hriat hnuhnungber a ni. A lu bung chu chhuatah a lir tap tap a. A nghawng atangin thisen thar lam tak hi a rawn chik chhuak tawr tawr a.



Zorinsangi chuan an in kawngkhar inhawng huau chu mak a ti deuh hle a. Kawngkhar inhawnga kalsan hi a nu’n a phal ngai lo tih a hria.



“Nu, ka lo haw a nia, i awm em?” a reh thap a.

Ngaihtha vak lovin inchhungah chuan a pen lut a.

Inlengkawmna pindanah chuan thisen a lo tling pum a. TV hunna bul lawkah chuan mihring lubung, thisen kai nuau hi a lo let reng a.

“Nu, khaw nge i awm?”



Choka atangin mi pakhat hi a rawn chhuak a. Zorinsangi chu a tawm chawih a. Hlauhnain a thauah a rawn man nghal a. Chu mikhual hmelhriat loh pa chuan a kut dinglam a rawn phar chhuak a. Zorinsangi hlau lutuk chu chet pawh a che ngam tawh lo, a piah lawk a lu bung let reng chu a nu lu a ni tih a hre tawh. A thin a phu dawt dawt a. Lungchhiatna leh mangannain a thinlung a tuam khat mup mup a. A pa office lah a lo la haw mai awm tawp si lo.



Khur dawt dawtin mikhual pa chu a en tlawk tlawk a, a hlauh em avangin chet pawh a che thei tawh lo. Chuti h lai tak chuan hmanhmawh zetin Hmangaihzuala chu inchhungah a rawn tlan lut a. Chhuat laia thisen baw nuaih a hmuh rualin chu in chhungah chuan thil tha lo tak a thleng tih a hre nghal mai. Mi pakhat, hmel chang ret rut in Zorinsangi man beh tum niawm taka a kut a phar chhuak mek chu a hmu phe vuai a.



Zorinsangi chu a pawm kang nawlh a, kawngkhar lamah hmanhmawh takin a tlan chhuah pui ta nghal a. Kawngkhar an pel fel chiah tihin inchhungah chuan mei alh thawm hi a ri nghal hlup a. Hnunglam pawh hawi let ngam tawh lovin, a bike chu a ti nung nghal a, Zorinsangi chu a hnunglamah a chuan tir a, chak zetin an lim chhuak ta nghal puat a.



Zorinsangi chuan amah phurtu chu a hmuh hnu ang riauin a hria, tu nge a chiah erawh a hre tawh lo; mahse, he mi hian a nunna a rawn chhan him tih erawh a hria. A nu lu bung let reng kha a mitthlaah a rawn lang chuai chuai a. Kha mikhual pa khan a that a ni ngei ang. A pain a hriat hunah chuan a va thinrim nasa dawn em! Hmangaihzuala kawngah chuan nghet takin a kuah a, khawi lamah nge an tlan zel dawn pawh a hre lo. A ngaihtuah thei hek lo.



Rei lo teah khawpui daifem an thleng thuai a, an tlan chak kher mai.

“Hnunglam kha han hawi let lawk teh,” Hmangaihzuala chuan a bike khalh lai chu tlemin a han tlan muan tir deuh a. Zorinsangi chuan thei leh thei lovin hnunglam chu a han hawi let hram a. Ral khat hla vak lova, an mahni rawn umtu bike tial bei buai chu fiah lo ruaiin a va hmu a.

“Mi pakhatin min rawn um. Inchhunga mi kha ni tlatin ka hria.”

Hmangaihzuala chuan a bike chu a herh chak zual sauh a.



EXPLORER 23

King Mogun chuan a hmaa khawl mak tak tak in zam hnawk nuai chu chik takin a han enkual dan dan a.

“A la tha vek niin ka hria. Tlemin han khawih deuh ila, a hman leh theih nghal mai ang.”

“Kan enchiang hlawm ang e,” Colonel Meek chu a thu hniam a, khawl inzam hnawk nuai chu siam that tumin a bur zui ta ngar ngar a.



Darkar chanve hnu velah tui hnuai pindan zaupui chu a rawn êng ta pup a. “A tha ta e,” hlawhtling inti takin Colonel Meek chu a nui kiai suk a.



An hmaa darthlalang hmai hlai pui chu a rawn phe zawr zawr a. Fiah fel fai takin a rawn eng ta pup a.



“Lady Hexus hi kan zawng hmu thei a nih hlauh chuan, Utopia chu kan ko let leh thei ngei ang. Explorer 23 te hi tunah khaw nge an awm, eng hunah nge an khawsak mek hriat theih dan a awm ang em?” King Mogun chuan beisei nei takin Colonel Meek chu a han en a.



“Log Book atanga a lan danin, helai hi kum 500 liam ta khan an tlawh leh ngei tih chu a hriat theih. An programe duan lawk sa anga engkim tluang taka an kalpui thei a nih chuan, Lady Hexus hi an zawng ve mek mai thei a ni,” Colonel Meek chuan a hma dawkana hmehkhep chi hrang hrang in tlar tuar chu a hmet lawr dun dun a.



THE TARGET

Hmangaihzuala chuan a bike chu theihtawpa chakin a tlan tir zel a. An tlanna lai vel chu khawpui hlat deuh tak a nih avangin motor veivak hmuh tur a tam lo hle a. Mipui tamna lai deuha tlan luh vat a tul tih a hria. Zorinsangi lungphu dap dap ri chu a hre thei a, a khawngaih viau mai. Ani ang tleirawl kum 14 emaw lek tan chuan nikhat thilthu a a chunga thil thleng te chu a rapthlak lutuk mah mah a ni.



Chak lehzuala tlan tuma bike gear han thlak a tum lai takin a ke hnung lam chu a leu zawk a, mei alh lum deuh pup hian a rawn hliau hlup a. Kawngsir tuihawk luankawr zingah an thal dun ta tawp a. Zorinsangi chu a bulah a let hlawm reng a, a chal sir dinglam atang chuan thisen a chhuak ser ser bawk a. Han thawh chhuah mai a tum a; mahse, a khup veilam bäwk lai tak chu a rawn na fik ngawt ngawt a. A tho chhuak thei der lo mai.



Chutih lai tak chuan an bul lawkah Bike tial bei buai hi a rawn inhung dawt a. A chunga chuang chu zawi muangin a rawn chhuk a.



Hmangaihzuala chuan beidawng takin amah rawn pantu chu a lo en reng a. Han che sawn thei rual a ni si lo. A bul lawka nikhaw hre lova let reng Zorinsangi chu a kuah bet a. Ama chungah chuan eng thil tha lo pawh thleng se pawi a ti tawh lo, he tleirawl pawisawi lo erawh hi chu humhim hram a duh tak meuh a ni. Mahse, engtin nge ni ang? Amah ber lah a che thei tawh si lo. Mikhual pa chuan a rawn pan phei zel a. Muang changin a kut dinglam a rawn phar chhuak tual tual a.



......Vaza chuan a car khalh lai chu chak lehzualin a tlan tir a. A hma kawnglai taka mi pakhat, kut dinglam phar chhuak mek chu chiang zetin a su leng lawp a. Car chu a tlawh ding nghal hrawk a. Hmanhmawh takin car atang chuan a chhuk a, kawngsira mi pahnih inkuah rial a lo mu hlawm rengte lam chu a pan phei nghal a.



Hmangaihzuala chuan a bul lawka thil thleng chu rapthlak ti takin a thlir reng a. A mah rawn pan mek tu hmeichhia chu Zorinsangi haw rualpui tu kha a ni tih a hre thei nghal mai. An mahni pui tura a kut no thep a rawn phar chhuah chu ihe lovin a lo vuan nghal chat a. Chutih lai chuan Zorinsangi chu a rawn rum tiah tiah a.



-------------------------------------------------------------------------------------------------------------

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 22nd, 2016, 12:23 am

DIARY OF MADNESS

‘Ka chanchin hi ziak dawn ila,

I tel ve ang a phêk tinah’



THE DIARY



Sana ka han en a, tlai lam dar 4 a ri tep tawh. Zopuii te nufa pawhin min lo nghakhlel leh hle tawh ang. Eng anga tlaiah pawh haw i la, zanriah min lo eisan ngai si lo. Ka haw hun tur thlirin tukverhah an lo dâk fân leh nasa tawh ngawt ang. Office tirhkah(peon) Pu Thanga lah chu uite vawih khum ang maiin a phi riai tawh a, a ni pawhin haw thuai thuai a nghakhlel ve a ni ngat mai. Haw ka tintuah mek laiin kan thenawmpa Pa Zuala’n min rawn phone ve teh mial a.

“Rina, rawn haw hmanhmawh teh,” ka chhân ve hmain phone a dah hlum nghal daih a.

Thenawmpa fiamthu ve dan hi chu a heti tlat zel.



Office ka chhuahsan meuh chuan dar 4 a pêl fe tawh. Pate Remruatan, ‘Office hna te hi i pa ta vek emaw hi iti thin a,’ min tih kha ka hrechhuak uai uai a. Ka nuih a za deuh a. Bike ka ti nung a. In lam panin ka tlan chhuak ta nghal a. Treasury square ka tlan pelh lai chuan kawngsira Space car chhuak thar lo inhûng tlar thap chu ka hmu thuak a. Hetiang car hi kum 2025 chawhnu lam khân India ramah a rawn lut ve tawh a. Delhi leh India ram khawpui lian dangah te phei chuan an hmang uar viau tawh niin an sawi. Mizoramah erawh, space traffic tha tawk kan la neih loh avangin sawrkarin a la khap bet deuh a; mahse, mi hausa uchuak hovin a leina sum an neih miau avangin inkhapbeh reng theih a nih loh hmel!



Ka inpêng ka thlên laiin mipui tlân vel ruai hi ka hmu a. Pa Zuala min rawn phone dan kha ka ngaihtuah chhuak zawk a. Ka ngaih a tha lo thar riau mai. Ka tlan chak zual sauh a. Kan kawt ka thlêng phei thuai a, thil awmdan ka han hmu meuh chu ka bangbo map mai!



Ka nupui, ka hmangaih em em Zopuii nen neih thinglung khâwng tak meuh a kan lo din ve, he khawvel ram zaua ka IN tih tur ka neih ve chhun chu meivap vek a lo ni tawh. Hetiang thil hi engtin nge a thlen theih? Ka mumang mai em ni zawk? Ka bing mup mup a, bike ka hûng fel sawk sawk a, hlauthawng leh thlabar mangang takin Zopuii leh Bawihtei ka ko tuar tuar a. Kan in kâng bâng tlu kalh rem rum zingah chuan tlan luh ka tum a, mi thenkhatin min lo man bet, tal chhuah tumin tha tawp ka chhuah a. Ka au ruai ruai bawk a. Engtin nge ka khawsak zui tak zel ka hre tawh lo.



SAD STORYLINE

Ka harh chhuah leh chuan thenawmte thuthlêngseiah ka lo mu hlâwm reng a, “Pa-te, khaw nge an awm?” tiin ka rûm chhuak nghal hawk a. Nia, Bawihtei leh Zopuii te chu ka ngaihtuah a ni. Meialh zingah khan an kâng hlum ve ta mai em ni ang? A ni thei lo. Lalpa Pathian, chutiang chu ni lul suh se.



“Rina, a pawi khawp mai. Zopuii chu....a awm ve tawh lo,” Pa -te Remruata chu ka mutna bul lawkah thuthleng pawt hnaiin a thu a; midang, kan thenawm khawveng hote pawhin min thut hual laih bawk. Pa sehhel ve tawk tak ka ni, eng emaw hleka mittui parawl nghal kuang kuang chi ka ni hauh lo. Mahse, tun tum zet chu pachang ka mualpho a ni. ‘Zopuii a awm ve tawh lo...Zopuii a awm ve tawh lo...” Pate Remruata chu ka kuah thlawp a, Lungchhe vânkâiin ka tap chhuak ta hawm hawm a. A nä a ni. A nä em a ni.



Pate Remruata chuan nghet takin min kuah a. Engmah a sawi lo; mahse, a kut khûr hlawk hlawk chuan min tawrhpuizia a ti lang a ni.

“Pa-te, Bawihtei chu inchhan hman tihna em ni?”

“Rina, mipa i nih kha, insûm hrâm hrâm rawh.”

“Bawihtei chu engtin nge a awm ka tia lawm, a ni pawh a thi....”

“Ni lo, chutiang a ni lovang, a awmna chin kan hre hrih lo mai a ni.”



Mumang rapthlak tak atanga harh chhuak zawk ang mai ka ni. Ka tho chhuak nghal hluai a.

“Tun thlengin ka fanu awmna chin in la hre lova maw? In va lak tlak loh heng hung hlawm ve.Mi pa in awm na nge? Khaw nge keiman kan zawng ange,” tih pahin choka lam chu ka pan phei a, banglaia chemte hriam ver vawr inkhai uai zan chu ka la thla nghal a.



“Rinzual, naupang chhe awmin awm suh. Police kan hrilh tawh, an zawng mek. Nang hian engmah tih theih i nei hrih lo. Thil thlen dan chipchiar pawh i la hre hleinem. Thu hahdam phawt teh,” Pate Remruata chuan ka chemte ken lai chu min chhuhsak pahin thuthlêngseiah chuan min nawr thu hnawk a.



“Eng nge thil thlen dan chu, min han hrilh ta rêng che u,” ka ti vin hlur a.



“Kei tak chu ka rawn thlêng har deuh a, hei Pa Zuala hian a hre chipchiar deuh ber ang. A ni hian han sawi teh se,” tih pahin Pate Remruata chuan kan thenawmpa chu a han mitmei a.



“Ka hre chipchiar em em bik lo; ka hriat ang ang erawh kan sawi ang e. TV ka en laiin tukverah mei khu a rawn zam lut chuai chuai mai a. Ka tlan chhuak nghal vat a. Zorinsangi leh mi pakhat hmanhmawh zeta bike-a an tlan liam lai hi ka hmu hman vuai, mei kha a alh chak phian mai si. Fire lam ka phone lai mekin, mi pakhat, in in atanga hmanhmawh taka rawn tlan chhuak ka hmu leh thuak a. A ni pawh khan kawta bike kha a ti nung a, Zorinsangi te tlan liam na lamah khan a tlan zui ve nghal a. Ka ngaih an ti tha lo viau naa, han ngaihven zui hman kha a ni tawh tlat lo; in kha a kâng nasa lutuk tawh. Fire ho an rawn thleng chawpchilh nghal a; mahse,mei alh kha a chak em mai a, tih theih an nei zui ta vak bik lo a ni...” Pa Zuala chu a thaw huai a. A thilsawi chu sawi nuam a tih zawng a ni lo tih a hmêlah a lang.



“A nih leh Zopuii chanchin chu?”



Pate Remruata chuan, “An post mortem mek ; Zopuii a ni ngei tih chu an finfiah tawh. Thil tha vak lo pakhat erawh chu a awm a,”a lo ti bauh a.

“Eng thil tha vak lo maw awm a?”

“Doctor ten an sawi danin, a lu leh taksa kha a hrangin a awm a ni awm e!”

“A lu a bung tih na em ni?”

Tuman min chhang lo.

Ka ding hluai a, ka lungchhiatna leh hrehawm tihna zawng zawng chu thinrimna ngawltawt biling hian a rawn luahlan nghal mup mup mai.



SHE’S BACK

Chutih lai chuan varanda lamah thâwm han ri hak hi a awm a. Kan hawi chhuak nghal thap hlawm a. Bawihtei (Zorinsangi) leh mi pakhat hi an rawn inzui lut a. An thawmhnaw lah chu a tet pheng phung mai. Bawihtei chuan min rawn kuah thlawp a, chhuak em emin a tap ta nghal hliam hliam a.



“Bawihte, eng thil nge kan chunga thlêng ta mai hi le...nang pawh khaw nge i kal bo daih ni, ka mangan zia hi i hre lovem ni?” ka ti a. A sam thur bam chu ka chûl hliau hliau a.



“Mi pakhatin min thah a tum a ni apa, chu pa chuan anu pawh a that. Ka hlau lutuk, min thah ve a tum laiin, U Hmangaihzuala hian min rawn chhan hman hram a lawm,” bawihtei mittui chu ka awmah a far fap fap a. Ka va lainat tak em; mahse, tunah hian, ni e, tunah ngei hian lainatna, khawngaihna leh lungchhiatna tih vel ngaihtuah thei ka ni tawh em ni? Ka nupui chu ka inchhungah ngei rapthlak taka tihhlum a ni a. Ka fanu chu thah tuma veh mek a ni bawk. Chu mai a la ni lo, he khawvela ka in neih chhun chu meivapah chantir a ni tawh bawk. Ka nu fa ka nih a, ka pa hi ka pa a nih chuan, eng dang nge ngaihtuah se min tih. Phuba.



“Bawihte, engtin nge hetah in rawn thlen theih. Mi pakhat i tih khan a rawn umzui che u a ni lom ni, tunah amah chu khawnge a awm i hria em?” Chu mihring chu ka chan sawm barh dawn a ni ringawt mai. Engmah hian min dal lovang. Min dal lul lovang.



“Min um a, min man tep a; midangin min rawn chhan leh hman hlauh a lawm.”

“Tu midangin maw bawihte?”

“Midangin, ihmaw apa, i pa hnenah ka hming sawi miah suh a ti a.”



Bawihtei chu a Pa-te Remruata bulah ka kalsan a. Hmangaihzuala chu ka mitmei zauh a. Mawi leh mawi leh sawi theih pawh a ni tawh lo,thenawmte mut pindan lamah ka hruai lut nghal a. Titi pui ka duh a ni.



“Zuala, ka fanu i lo chhanchhuah avangin lawmthu ka sawi e. Zep hauh lovin thil awmdan min han hrilh vek teh,” tih pahin Hmangaihzuala chu ka han chibai a.

“Ka hre tam bik lo khawp mai, chanchinbu mi ka nia, Thu Ngaihnawm Huang Daily News ah hian a hmingin Editor ka ni ve a. A thiannu Mapuiin damna a chan chungchangah khan i fanu pawh hi interview ka rawn neih pui tawh nghe nghe. Kha mi hnu atang khan ka hman remchan chang apiangin i fanu hi ka chhui ru deuh a....”

“Ka fanu chanchin chu i lo chhui ru a maw?” ka thin a rim deuh thut a.

“Ka pu min hrethiam rawh. Zep lovah chuan i fanu hian danglamna riau a nei a ni, chu chu nang pawhin i hriat ve tho ka ring. Tih mualpho tuma chhui ka ni hlek lo a nia.”

“Awle, engpawh nise, han sawi zawm zel teh.”



Chanchinbu mi tih takah Hmangaihzuala chuan thil han sawi vel dan pawh a thiam khawp mai. Uluk takin ka ngaithla kar a. A sawi zawh dawn lamah chuan, “A nih leh chu hmeichhe pakhat i tih, nangmahni rawn chhanchhuaktu chu tu maw a nih chiah,” tiin ka zawt a.

“Zorinsangi kha chuan Nu Vaza tiin a ko thânin ka hria.”



Vaza tih hming chuan min ti phu zawk a.

------------------------------------------------------------------------------------------------------------

THE GIRL FROM TOMORROW



‘Van boruak zau tak khi,

Ka dawn ka dawn thin rauthlain

Chutin thim chhah puiin

A lo tuam a lo tuam zel si’

-OPA of Tribal Power



SORA’S SHIP

Commander Sora chuan a hmaa darthlalang hmai hlaipui chu mit la lo lekin a thlir tlawk tlawk a. Thihna hi a hua a, rapthlak taka thihna ngat phei chu a ngaithiam thei lo a ni.



“Ka pa, heng mite hian engvangin nge hetiang thil hi an tih? Tualthahna hian engmah a siam tha ngai lo tih an hre lovem ni le?” tiin a bula putar kum 70 vel hmelpu chu a han bia a.



“Bawihte, a chhan leh vang chu ka hre bik hauh lo; mahse, heng mite hian khawvel hi an phiarru a, tun ai nasa zawk hian chet lak an tum zel dawn tih erawh ka chiang a ni. Vaza ringawt hian a dang hneh dawn lo, chu chu i hria tiraw?” putar chuan a kut chuar sawng tep tawh chu a han hum ruh lehzual a.



“Ni e, Vaza tanpui tu tur tu emaw tirh thlak leh chu ka lo ngaihtuah mek a ni,” Sora chuan a ti sap a.



RISE UP MACHINE

Kawngsir tuihawk luankawr tawp zet atangin a rawn tho chhuak a. A kekawr khup leh malpui vel chu a tet hrup a. A T.Shirt dinglam tlangsir chu a hniar vung bawk. Mahse, chutiang thawmhnaw tet tih vel mai mai chu a tan engtihna mah a ni lo. Car in a rawn sut lai kha chiang takin a la hria, a khalhtunu pawh a hmu bawk. A hnathawh ti thuanawp thei tu reng reng chu a that nghal zel tur a ni. Chu chu thupek a ni. Thupek zawm hi he khawvela a tih tur awmchhun a ni bawk.



Kawngsir vâng tan zawnga a bike let reng chu zo taka tung dingin, a tinung nghal ham ham a. A kut dinglam chuan a mit ko bul chu a han khawih zeuh a, chutah a mitmu rawng dum chu, rawng hringah a rawn inthlak tial tial a. Minit khat hnu velah, a mit atang chuan eng zung zam, fit khat leh a chanve lek chhun thei hi a rawn inkap chhuak a. Chu engah chuan, Rinzualan a fanu Zorinsangi a pawm vawng vawng lai hi fiah takin a rawn lang ta a, a hnuaiah number chi hrang hrang hi a inchhiar vir char char a. A duh ang taka a chhinchhiah fel thlap hnuah, a mit a han khap fawk a, eng zungzam chu a chuai riai riai a. A mitmu rawng hring pawh a dumah a rawn inthlak chawpchilh a. Hmalam panin a bike chu a tlantir zui ta nghal a.





Rina leh a fanu Zorinsangi te chuan chenna in an neih tawh loh avangin Remruata chenna lamah an riak lut ve nghal a.Amah Remruata hi parawl, tlangval senior rawng kai tawh a ni. A in lah a lian tha viau mai bawk. Rina te pafa manganna pawh a chhawk zangkhai viau reng a ni.



An pathuma zanriah an kil laiin Rina chuan, “Bawihte, nangmahni rawn chhanchhuak tu che u kha Hmangaihzuala ka zawt a, min hrilh vek tawh. Tunah chuan engkim ka hre tawh a nia, nang pawhin i hriat ang ang kha chip chiar deuhin min hrilh ve tawh rawh,” a han ti a.

Zorinsangi chu tlemin a tim deuh tih a hriat theih, “A hming chu Vaza a nia, chubak engmah ka hre bik lo, ka sikul bang kha ka bulah kal ve min dil a, kan kal dun a, a hmain ka hre ngai bik lo,” Vaza laka a thutiam a han bawhchhe nghal ringawt mai chu a inthiam lo deuh a ni.

Remruat a chuan, “Zanin hi chuan engmah sawi tawh hrih lo ang u, saw, ka nu room hluiah sawn khum leh awngphah te pawh a la awm vek, va mu hahchawl phawt teh u. Naktukah, rilru tharin kan ngaihtuah tha leh zawk dawn nia, tunah chuan police lamin he buaina hi an kutah an la tawh a, kan lo inrawlh ve sek hi an lawm zawng pawh a ni lovang,” tih pahin tui dehna lamah a thleng a keng phei a. Zanriah eikhamah rei lo te TV an en tlang a, dar 10 rik hmain an mutna tur lam an pan ta hlawm a ni.



Sanain zan dar 11 a kawk fel deuh chiah. Zorinsangi mutna bula tukverh chu a rawn keh darh chuai a, hlau lutukin a zuang tho zawk a. “Pa, tukverh atangin mi lo luh an tum a nia,” tiin a te nghal chul bawk a. Chhuata mu Rina chu thawhphan pawh awm hauh lovin a rawn thu chhuak hlawl a. Tukverh darthlalang keh kar a, mi pakhat, hmai khem deuh nen nuanin rawn luh tuma a lu a rawn rawlh lai chu a hmu phe ruai a. Remruata pawh an thawm hriain mut kawr nen a rawn lang ve hlawl bawk. Tukverh lamah a tlen phei a, rawn luh ruk tumpa chu nawr chhuah ngei tumin a hnek nghal chawrh chawrh a, chutih lai chuan, Rina pawh a awm mai mai bik lo, a patea bulah tangin theihtawpin a lo tlawh ve pawp pawp bawk. Mahse, mak tak a ni, patling pahnihin theihtawp takmeuh an chhuah chung pawhin an dang zo tlat lo, kut an thlakna te lah chu na ti awm hmel a pu hek lo.



Tan a han la vak a, Rina leh Remruata te bawhthlu tawp chungin, inchhungah chuan a rawn lut ta. A kut dinglam chu a han vei kual pawp a, Remruata bek bawr ah tak a ri no chawk, che zui tur awm lovin Remruata chu a zal nghal der a. Rina nghawngah a rawn rek zui nghal chat a, a kut tha chakzia chu mak tih tham a ni. Rina chuan theihtawpin talchhuah a tum a; mahse, a hneh ngang lo. Rei lo teah a meng pual tan ta mai, a hmai a rawn duk kawih kawih a. A mit a vai ruai a... thawchhamin a thi tep a ni ta.



Zorinsangi hlau lutuk chu kilkhatah thuin a khur zawih zawih a, chu misualpain a pa a rek bet lai chu chiang takin a hmu reng, a pa chu tanpui a duh lutuk; mahse, chet han lak dan tur a hre ngang si lo. A thinphu nasa lutuk tih reh tumin a awm a han nem ngawt a, tih palh thil thu takmeuhin a thi awrh locket chu a zu khawih fuh palh zauh mai. Thil mak tak a rawn thleng chawp chilh ta nghal a ni. Thi locket chu a rawn eng chhuak pup a, zawi te hian a kiu vang vang a. Banga sana lian inkhai chu a thi nghal hmak .A bul vela thil thleng mek chu a tawp chawih a. . A pa leh a pa rekbettu pawh chu che lo chang lovin a awm dan ngai chuan a awm ta reng a. Zorinsangi chuan thil thlen dan chu hrilhhai leh mak ti takin a thlir reng a. Chet chhuah lawk nachang pawh a hre lo.



“Ka fanu, hun tlem te i nei, i tih tur chu ti vat rawh. A tukhum kha zai hawng la, a chhunga wire hring leh var kha zai chat ang che”



A phu zawk a, “Nu Vaza, khaw nge i awm, khawngaihin min pui rawh!” hlauhna avangin Zorinsangi aw chu a lawi chhe vek a.



Vaza hmuh mai inring takin a han hawi kual a. Mahse, hmuh tur a awm hauh si lo. A beng bula rawn betu kha Vaza aw ngei niin a hre bawk si. ‘Ka fanu, hun tlem te i nei, i tih tur chu ti vat rawh. A tukhum kha zai hawng la, a chhunga wire hring leh var kha zai chat ang che.’ Zorinsangi chu a harh chhuak nghal zawk mai. Hmanhmawh takin a pa chu a pan phei nghal a, mikhualpain a nghawnga reh beh na kut chu harsa ti takin a phelh sak a. Choka lamah a phei a, chemte hriam ver vawr a la a, a tih tur chu a hreh kher mai. Mahse, tih ngei a tul tlat si.



Mikhual pa tukhum chu a zai thler a, thisen a chhuak hauh lo. A tukhum chhungah chuan wire tam zet hi a lo inthlung kawkalh rum a, ‘ a hring leh a var’ chu minit khat dawn lai a zawng, a hmu ta hram. A zai chhum nghal hmawk a. A tih fel zawh hnu-ah inhnuai lamah a chhuk thla a, rumrawk dahna a han hawng a, hruizen fit 20 dawn laia sei lo inkual rum chu la chhuakin, mikhualpa kut leh ke chu nghet takin a phuar ta tlat a. Engkim a tih fel hnuah a thi locket chu a han khawih leh zauh a.



Sana a chek ri nghal tlak tlak a, Rina rawn harh chhuak chuan a awmdan chu mak tih hmel zetin a ngaihtuah vung vung a. A hriat dan kha chuan mi pakhat, ban tha chak zet maiin a nghawngah a rek bet a, a thaw a chham titih a, a khaw hmuh pawh a vai ruai tawh kha niin a hre si, tunah lah khum fel atin a lo mu reng bawk si. Heti ang hi engtin nge a nih theih? khang thil thleng kha a mumang mai mai em ni zawk dawn. A han hawi chhuak a, tukverh darthlalang keuh nuai leh mi pakhat, a kut leh ke phuar chunga let hlawm reng chu a hmu a. Chupa bul lawkah chuan Remruata pawh luhai tih hriat takin a rawn thu chhuak ve mek bawk. Khaw nge Bawihtei ve hi?



“Bawihte, Bawihte, khaw nge i awm?”



“Hetah,”Zorinsangi chuan choka lam atangin a pa chu a rawn chhang a.

“Choka ah te eng nge i va tih, lo phei teh, hei, eng nge thil awm dan hi, hepa hi tu nge?” Rina chu a tho chhuak a, Remruata chu a va kuah tho a, khumah chuan rem vak lovin a mut tir a.

“Misual a nih kha,” Zorinsangi chu coca cola bur ruaka tui sik dah vawh keng chungin a rawn lut a.

“Engti tih tia, hetia lo awm ngawt nge maw a ni chu le?” Rina chuan chu pa chu chiang lehzualin a han en a.

“Keiman ka man a ni kha.”

“Ehh, ka va awih lo e,” Rina chu a nui suk a. Police ho a phone zui nghal a.



PERCEPTION

King Mogun chuan, “He hmeichhe naupang hian a thiltihtheihna a hrechhuak hman a nih vaih chuan kan ban pha lo kumkhua tawh mai dawn nia,” tih pahin colenel Meek-an Methyl Icocynate gas hmanga bomb chi khat a siam lai chu a thlir vung vung a.

“Chet chhuah a tul tawh tih te chu ka hre reng a lawm; mahse,duhthusamin kan la inpeih tlat lo a ni,” colonel Meek chuan a ti bung nghut a. Heti anga in tur hmanhmawh ruai hi a nin zawng tak a ni.

“Eng anga tha pawhin inbuatsaih sateh mah ila, Hexus thiltihtheihna hi kan dang zo dawn chuang lo. A pawimawh ber chu, a thiltihtheihna zawng zawng a hriat chhuah hmaa kan chet khalh hi a ni mai. Hun kan nei tawh lo” King Mogun chuan Colonel Meek khawsazia chu a ngei tawk a tling kher mai.

Chutih lai chuan an hmaa khawl pakhat chu a rawn kiu vang vang a. Colonel Meek chuan, “Hei Explorer 23 ten thuchah an rawn thawn e,” tih pahin a hmaa dartlalang hmaia hawrawp mak tak tak rawn inziak chu a chhiar nghal a.



“Eng thu nge an rawn thawn a?”



“Tenawm lutuk, lak tlak loh hlawm phiangsen hian, an hlawhchham a nih hi,” Colonel Meek a lungawi lo hmel chu a chhe kher mai.



King Mogun chuan, “Engti tih tia han hlawhchham thei nge maw an nih reng reng le, hmeichhe naupang pakhat lek pawh han tih hlum theih miah loh mai chu,” a ti nung nung a.



“ A thil tih theihna pakhat chu a hmang thiam tan tawh niin a lang,” Colonel Meek chu a in ngaihtuah nasa kher mai.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)