SAZUK KI BUNG By Hriata Tea

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

Re: SAZUK KI BUNG By Hriata Tea

Unread post by Ngaia » February 18th, 2018, 10:26 pm

SAZUK KI BUNG,4

By Hriata Tea.

Thui pawh kala kal hman lo. Ka hnungah leh sir lam ah te chuan țap thawmin min zui ta reng mai a. Ka sa bawp put lai lah chu, a rawn leng leh ut țhin a. A lu lah hian ka ipte chhan ațang hian, min hliamna lai hi arawn fawp leh vung thin ni mai hian ka hria. Kan sâwi nawk nawk a, hetiang huama riak lui hi alawm ka nih tiin, Ka inti pau khauh a. Hmanhmawh em em in, ka rawn haw ta nal nal a. Kawng tluan maiin, naute a țah loh leh, nangmah ni rum ri, leh kûk thawm ten minti buai a. Ka lo hmanhmawh deuh nge ni. Kan inbilh sual pek a. Ka rawn kal sawt thei talo ani ati a.

--------------+-------------

Puia chuan i inhliam nalo hlauh chu atih zia hle mai. Ril ațam tawh bawk a. Chaw i ei phawt teh ang u. Chaw ei pahin kan ti ti dawn nia arawn ti a. Chawei kan siam a. Zawngsa leh sakhi sarep kan chhawp khu vut vut a, puar el euh in chaw kan han ei ta a. In sawn kan ngaih thu te chu sawiin, kan thil tawn te chu kan sawi tlang nak nak a.

.
Chaw te kan han eikham fel hnu chuan, Sawma sa bawp rawn hawn chu kan chan a. A kahna arei tawh vei nen, a tî te chu ala phu uih uih thei a. A râpawm lek lek zawk. Pawn ah sa rêp pahin, meilum hnungpuakin, kan țhu a. Puia chuan zan zana han chhuah nghal rum rum chi ani silo a. Zanin chu kan riah leh phawt a ngai anih hi. Eng em kan ti lo turah ngai ila, naktuk lamah kan chhuak mai aniang chu, eng pawh tawng ila, hlau chung chung pawh a. Huaisen taka hma chhawn thei turin inpuah chah ila. Chhun lama min tih buai nasat ang aiin, an reh rei daih mai ati zo chiah tih chuan, bûk chhhungah chuan, naupang huaibâk han sa rak chiam mai thawm alo ri chuak a. Kan phuchiang bawk a, kan ding rual țhawt mai. A duhlo chung hnuh luih a ang ber,

.
Puia chu a kal vut a, ka zui ve nghal a. Bûk chhung kan han lut chu a reh nghal hmak, light in kan han ên kual vel a, engmah hmuh tur a awm lo. Saza lu erawh kan dahna ah a awm ta hauhlo. Bûk chhuat ah chuan, hnuh tawlh ang maiin athi chu alo berh nguai mai a. Kan han chhui(èn) zai zai a, châr lam kawngka bulah chuan, keimahni min melh kuau in alo khap fuk fuk mai nia mawle.. Mi râp kher asin. Puia chuan mai mai tak chuan, tlanbo ilo tum a mi ngawt le tihpahin, a pan phei a, a ki ah chuan manin ala kang a. Chutih lai mek chuan, Pawnlam ațang Sawma a rawn au a. Kawngka a hi a rawn chhuak ania, arawn ti țial ruai mai.

.
Engtak ni maw ti rilru chung chuan, rang takin kan tlanchhuak zui nghal a. Mahse, engmah kan hmu lo. Sawma erawh phâwk zetin alo ding reng a. A melh ngai a melh ngùr mai lehghal a. Kan sâwi a, enge nita ka tih chuan, a inthing nawk a. Naupang kha,,, kha naupang ka hmuh tawh ngei kha ani. A rawn bâi chhuak a, meipui lampan hian arawn bâi phei auh auh a. Mei èng chin alo thlen ruala, kan hmu chiang chu, a mitmu a awm reng reng lo. A thi sùng mai leh nghal. A rîl te kha a pawm țu mai bawk si. A ke leh lam kha, a bawp ah a bal sen huam mai bawk. Chuti chung chuan, min rawn thlek a, mi rawn nuih leh nghal. In rawn chhuah pawn ala awm reng kha, i rawn kal pelh rual khan ka hmu ta lo ani a ti. A räp hle tih a hmel ațang chuan a hriat a. A râp awm hle ang tih pawh ka ring. Enge kan tawn leh ang tih ngai châng chungin, kan țhu ngawi țhap a. Puia chuan, i salu pawh ka phuarbeh kha. A kal sawn tawh lo tawp ang a rawn ti a.

.
Chutia thâwm ngai châng a kan țhut țhap lai chuan, khawpui a rawn ri dur dur a, kawl a phe nghal zuai zuai a. Ruah mal hraw pui pui a rawn tla zui nghal zat a. Hnah ro te chu a deng ri phuar phuar mai. Thli a rawn thaw ham ham a. Hnahthel ro te chu a chhem leng chum chum a. Kan meipui sî te chu a chhêm țêk chuai chuaih bawk a. Kan bul vel zawng zawng mai chu chhum lei vakin a rawn tuam a. Kâwng a chin hnuailam chu engmah hmuh theih a nilo. Thâwk leh khatah Khawpui ri leh ruah tla te chu vawm bo ang maiin a reh thut a. Thlifim eih pawh athaw tawh lo. A reh ta tlawk tlawk mai ani. Chhûm leivâk chhah tak erawh, kan vel ah chuan a zam chuâi thung. Kan ke lam hmuh theih loh ah chuan, vak vel enge maw chu a awm chiang a ni. Min hr
ût fu leh nawk țhin tlat. Enge maw vawt thler thlur hian kan ngal chu a rawn vet leh chut țhin a. Tiang ringawt zawng a dik dawn lo ti a, ka sawi rual chiah chuan bùk chhung ațang chuan saza a rawn khek ta țhat țhat mai. Ke lam ah lah min nul thuak thuak tu a awm bawk nen.

.
Chhûm leivak chu, pal darh ang mai hian a zâm darh leh chiaih țhin a. Bûk ah i lut ang u tih pahin, ka pan nghal a. Enge maw ni vawt thler thlawr tak mai hian ka ke rek ah manin min phih thlu țhuai mai a. Ka tho leh vat a, Mihring kut tih dawn chuan ani chiah silo. Rang takin bûk ah kan lut zui ta vat a. Bùk chhung chu alo veng vek thung. Tap mei ka nuna a alh êng țha thei ang ber turin, thing ka vur hluah a. Puia rawn lut chuan khawnge, ka salu țawn beh kha tih pahin, a zawng kual thur thur a. Heta hi ka hmu e. He thil hi anih hi an duh. Sawma i salu ven a hun e. Lak tir hlek suh ang che. Khawinge i han phusa tak tak teh ang, Mizo tlangval sa leh ralah kan tlan ngailo. Thian chhan nan pawh kan lu kan zuar ngam alawm.. Zâm reng reng suh u. Heng mite hian min ti na thei miah lo ania. Tumah hnung tawlh loh tur, kan inveng tawn vek dawn nia. Kan sakah ngei ngei pawh min lak sak an han tum ngam chu le, kan venghim ve ngam tur ani ati a. A hming chhalin a in hrosa kùk kûk mai.

.

A zâm lo in, a huaisen bawk a. A pawisak loh zia atih lanna chuan, min muan bawk nen. A thlamuan thlak duh kher mai. Bûk chhung mei engah chuan kan țhu țhap a. Sa lu pawh kan bulah dahin, a bulah Sawma a țhu khar mai a. A chângin a rawn thawri leh hrawih hrawih țhin hian ka hria a. Ka melh apiang lah chuan, minlo en kùr zel hian ka hre leh nghal a. Sawma chuan a hre ve em tih ngaihtuah chungin kan melh a. A hreve chiang a ni. Alo thlir ve vung vung alawm. Puia chuan, Sawma En reng suh. A zêm buai mai ang che. Ti khan ngaihsak lo la. Veng ringawt rawh a rawn ti a.

.

Kan piah mual ațang chuan, thlipui thawm ni ngei tur hi a rawn rùm phei hùm hûm mai a. A thâwm ri ringawt pawh, a huphurh awm tawh nak laiin, thingzar tliak ri leh thingkung tlu tur han auh ri tuarh tuarh te chu, a râpthlak tak a ni. A thâwm ațang ringawt phei chuan, hma tiam in a rawn mam phei a ang ber. A rawn ri hnai tial tial a. Thing tlu tur auh ri tuarh tuarh te chu a râpthlak tulh tulh a, kan bûk chu a rawn vaw dawn ngei hian a hriat a, ka awm hle hle thei lo, ka kâng âwk âwk mai. Mahse, buk chhak leh thlang ah chuan a in vawri dup dup a. Tun țum ami chuan a rawn vaw tawh ngei ngei ang tih turin, a rawn ri țuah țuah a, a tlu ri chu, a ri vung hlarh hlarh mai bawk si. Ka ding chhuak ta nge nge a ni.
.

Sawma phei chu tlan chhuah atum emaw tih turin a țang hrû mai a. Puia lah chuan țhu chungin, awm mai mai rawh u. Thawm ah hian atawp mai ang. Hlau suh u, zan dang ami ang bawk kha anih hi ati hluk a. A țhut ngaiin ațhu hmiah thung. Eng em ani ta lo Bûk kawt ah a ri dup a. A dang a ri tuarh tuarh reng bawk a. Thlamuang taka țhut erawh har tak ani. Sawma saza kah lu chuan thâwm a rawn nei hian ka hria a. Kan en chu, a lei chhuahin, kan mei chhem vâp chu liah tumin a lei in alo hâwl zuau zuau mai nia mawle,,. A khap fuk fuk a. Mihring ang maiin mi melh pelh rulh rulh a. Ka inthing sawk a. Pawn lam thlipui thawm leh thingtlu ri te chu alo reh duak tawh. Reh tak tê hian a reh tlawk tlawk a. Mahse, rei a ni lo. Kan buk hualvel chuan phun ri sur sur thawm alo chhuak a. An sawi tak hriat fuh theih siloh hian an inbe sar sar hlawm a. Thawk leh khatah patling rawl diktak hi ngaw chhung khâwk rum rum khawp in a rawn nui ta uar uarh mai. Mahse, kan tan chuan thingtlu tur auh ri, kan buk vaw mai tur thawm ai kha chuan, a muan awm zawk mah mai.

.
Bûk hual vela an phun ser ser karah chuan, lo nui khek awr awr leh țap ruah ruah ruah tawk lah bo hek suh. Mahse, hetiang thawm ringawt hi zawng kan tawn hnem tawh avangin, râp awm viau mahse, kan ngai pawimawh duh tawh lemlo a. Thinlung a fan dan erawh a nuam chuang lemlo khawp mai.

.
Chhûm lei vak hi bùk chhungah a rawn zam lut chiai chiai a. Mei kan tuah èng țha bawk a. A lang chiang khawp mai. A rawn zâm lut tam tial tial a. A thlawk delh delh ni ber hian a hriat. A in hlawm khawm zel a. Kan pitari hmel ang tak khan, hmelhmai hriat ve theih si. Mitmu leh ha awmlo in a rawn meng ang pùm mai a. A darh leh a. Bûk chhungah chuan, a zam kual ta chiai chiai a, Pakhat chauh ani ta hauh lo. Pawn lamah chuan, chhum leivak chu ala khat vek ani tih mei eng ațang chuan ka va hmu thei bawk. Bûk chhung pawh a pik sawt kher mai. Kan ding țhap tawh a. Silai kan lek far bawk. Han hman vak ngaihna awm mah suh se..min thlamuam ve tlat a ni. Kan bulah chempui kan chhawp bawk a.

.
Eng ang in nge an rawn lan zel dawn tih leh engtiang in nge, min tih ang tih chu kan sakuh sèr nghah tawp mai a ni. Nuchang mangang au țe rawng rawng leh nausen țap ngawih ngawih mai ri te chuan thling a fan a, hriat țhan mah nise.. Chutiang ri in, min han hual luih luih mai chu, ngaia neih zawng, har tak ani tho tho. A rukin ka țim sung sung mai a ni. Hlau in râp viau mah ila, țhiante hmai eng zah vang tal pawn hlau miahlo ang a lan angai miau si a. A hrehawm duh kher e,,, Khawvar hun a nghahhlel awm takzet.

.

Bûk chhunga chhûm lei vak chu a chhah tulh tulh a. Mahse, chhum lei vak satliah mai mai a nilo tih a chiang hle. ramhuai ho an ni ngei ang. An thlawk vel ni berin ka hria, an zam chiai chiai a, mihring hmel ang tak tak in, kan hmai bul lawk lawk ah an rawn inlan leh țhin a. Kan chempui chuan kalo vai țhin a, natuar țe ri in a zui nghal zat zel mawle.

.
Sawma han țe țhat ri ka hriat rual chuan a tlu lai chu ka hmu zui nghal a. A bawk khup zawnga awm in, hnûktu awm tih hriat tak hian pawn lamah chuan a tawlh chhuak zui nghal a. Buk kawngka biang vuan chuan țan a khawh ve a. Chhum leivak chhah tak karah chuan eng in nge pawt, hmuh theih heklo. Va chhan tum a, ka kal tur chu Puia chuan, salû kha veng rawh tih pahin a zuang phei dawrh a. A va vuan hman ta chuang lo. Pawn lamah um chhuak nghal in, a âu tuarh tuarh a. Êng a ken loh avangin, silai chu ka dah lawk a, Chempui leh light chu chuhin. Salu chu ka khai tel bawk a. Ka tlan chhuak zui ve ta a ni.

.
Puia'n sawma an auh apiang chuan, sawma aw ngei si hian kan bul vel ah chuan an lo chhawn tluar tluar zel a. Light êng pawh hmanna a vâng kher mai. Kan auh apiang chuan minlo chhawn thluah thluah zel bawk si. Mahse, ka hre chhuak thut kan auh veleh chuan min rawn chhawn hmasa ber tu âw lo chhuahna lam chu ka pan ta vat a.

.
Thingtuai țan chhana Sawma lo in man tang hram hram chu ka va hmu ta a ni. Ka hnung lawka min zuitu Puia chu a rawn dawk chhuak vat a. A banah manin a chem ken chuan boruak chu an vai fua fua a. An țe chel chul mai le, Sawma pawh a rawn ding chhuak ve thei ta. A hah hle tih a hriat, mahse a hmel leh mitmeng ah erawh, hlauhna alang hauh lo. Thinrim mitmeng sen râm leh hah vanga thaw halh halh chung chuan, a va tlawm thlak kher ve, khati taka min han hneh sawh mai chu le,, ka hneh lo han han hle mai. Min rawn pui hlauh a Ka lawm e. Min hmer na kher leh nghal, ti chungin a hâ chang a țhial rap rap a. Puia chuan Ti ru, Bùkah i kir leh vat teh ang, hei min zim hnai mah mah tawh ania arawn ti a. Sawma kal bai saih saih chu dawm in, buk lampan chuan kan phei sawk sawk a. Ka saza lu ken lah chu, a tâl ve deuh emaw tehreng ni. Min phih deuh ùt ut țhin in ka hre leh nghal. Bùk chhung kan han lut chu alo thim țhiap mai, kan meichhem te chu ar thai ang mai in, alo darh nuaih mai a. Kan han chhawm țha a. Kan chhem alh leh vat vat a. Kan bul lawk lawk ah te chuan, eng ber nge hriat si loh hian kan pang te chu arawn nùl thuak thuak mai a. Mei an alh țhat tak deuh ah chuan azia ve ta.

.
Kan salu mawlh mai chu, a rùm vut vut reng mai hian a hriat a, han en ila minlo en kuau zel mai bawk si. Mahse, a rùm thawm erawh hriat zui tur a awm leh ngai der silo. A mitmeng erawh a dum fim fiah kak mai thung, han en rei deuh phei chuan a râpawm in, min zèm â thei tlat hian ka hria. Mei pawh tap ah chhem tawh lo in, bùk lai lamah, kan pathum a kan țhut hual theihna laiah kan suan a. Mei èng hnungpuak in kan țhut hual a. In hnung chhawnin kan inveng țhap Mai ani.

.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:27 pm

Chhùm lei vâk te chu reh tawh mahse, mihring taksa ruangâm ang tak chhùm dum chhah zet hi bùk chhung kil thim deuh lamah chuan a ding zùn reng a.. A taksa ruang âm lang riai ruai si hian a hmel erawh a hmuhchian theih der loh. Puia thin thawk lawk chuan, a tu chu nge maw I nih a, inlan ngam mang si lo, i din zum dûk reng chu le tihpahin, an kâp thäwr mai a. Pawnlam ațanga rawn au ruai ruai tih loh ah chuan, a awmna a sawn hret a. Bang lehlam kil thim laiah chuan a ngaite bawkin alo ding leh zùn tawh. Ka light chuan kan chhun a. Mahse, hmuhchian theih loh in, A zâm darh daih zel. Sawma chuan han pan mai a tum a. Puia chuan kalsawn suh. Tumah kal sawn loh tur. Kan awmkhawm hian an tan beih kan han ber. Duh leh lo ding ngawive mai mai rawh se ati a.

.
Thâwk leh khatah țap thawm leh rùm ri te, mangang aurawl leh nui uar uarh ri te chu a reh hmuk a. A reh ta tlawk tlawk mai. Keimahni thaw ri ngei pawh chu kan inhriat sak thei hialin ka hria, a reh dan em em chu a râpawm zawk mah ani. Mahse, rei zawng an rial hauh lo. Tualchara thil han hnuh rik hrawih hrawih ang mai thawm ri hian, kan búk chu a rawn pan a. A ri hruah hruah mai a ni. Mihring tlan hah kan thawri ang deuh hian, a khât tawkin a ri leh hulh hulh țhin a. A thawm ațang chuan Rulpui thawm niin ka hre tlat. Rul hlau chi tih takah ka zam nghal em em mai ani. Kan bùk hual vel chuan a ri kual ta hrawih hrawih mai a. Puia chuan pawn lam chu a light chuan an chhun èng kual vel a. Khai aw!!. A va han lian tehreng em, a tih vawng vawng rual chuan, thil dum tle zuar mai tawlh kual zut zut chu ka va hmu ve nghal a. Mi va han räp kher em,,. A hma a kalo hmuh tawh, lêt li zet alian ni mai in ka hria, kan bûk kawngka ațanga mei èng in, a ên phak chinah chuan kan lam hawiin a lu chu arawn her phei țual țual a. A van lian kher em..A lei a chhuah zuk zuk a, amit ala khap fuk fuk zui leh nghal. Ka khur ti tih der mai. Puia pawn engtih tum lo chuan, a en ve tlawk tlawk mai a. Sawma erawh a harh chhuak hmasa ta ber. A silai chu kâu in atin ta nghal a. Mahse, a kah hman hma chuan a inher a, buk thlang lamah tawlh thla in kan buk chu a vel kual leh ta mai a. A taksa dang chu kawngka lamah chuan, tle zuar hian a tawlh zùl zûl a. Kan vai pawn min dawlh se..min kham dawn lo tih a hriat reng mai si. Ka silai te chu ka sit tak meuh ani. A taksa hmuh theih chin, a vun phuhlip ringawt pawh chu, satel kâwr ang mai niin ka hria. Chet ngaihna hrelo in ka ding khawng reng ri ngawt. Sawma lah chuan alo hlau lo nasa mai.

.

Rul pui ngei anih kha. A sa atam tham ngawt ang. Lunghlu pawh a hmuam maithei a nia, kan thah theih phawt chuan a tih chi viau ang ati ta mai a. Puia nen chuan kan en dun hau a. A lu ah ngei kah rawn ila, kan that thei em em ang, ala ti tak deuh deuh lehnghal. A phur surh surh viau lehnghal. Rul lam pang chi chu alo hlau lo nasa mai niin. A thawm an hlat tak deuh ah phei chuan a tak hmuh theih tawh hek lo. A thawm ri hruah hruah erawh beng ah a chiang ngang mai. Sawma chu light nen chhuah atum ta mai a. Buk kawngka a chhuah hma chiah chuan, kawl arawn phe zuai a. Chumi èng ah chuan, buk tuala palian leh hmel rapthlak zet pahnih lo ding khùr mai chu an lang chiang kher e. Sawma va man tum a, ka pen lai pawh ka ding chawt a. Sawma pawh man din angai hauh lo. Lungbang su ang mai in a ding chawih a, A rawn tawlh let rawk rawk mai ani.

.
Kan lo hmu vek aniang chu, Puia chuan a light in an chhun zui vat a. Mahse, hmuh tur an awm tawh lo. Rulpui thawm pawh kan hriat loh karin alo reh daih tawh. Kan mei chhem chu chhawm țha in, kan țhut hual a. Kan saza lu chu, meipui hnaih te ah kan dah a. Tuman kan en țha peih lo. Mahse, kan mitmei ru vek thung si. Thawm reh ta vung vung chu, a thawven thlak rual rualin, an lo thawh leh hun tur ngaihtuahin kan țang hrû mai a. Puia chuan, Khua a var țep tawh in ka hria, an reh hlen tawh dawn ani maithei arawn ti chhuak bauh a. Sawma chuan, la vei zui tih hriat zet hian, kha rulpui zet chu a lian țha rem rem hle mai ka ti. Ka hlau ve lek lek alawm le, rul hlau hian ka la mengphawk ngai hauh lo ania, kha zet kha chuan min barakhaih takzet ani. Rul sa hi ka tui tih zawng tak ani bawk a, a lian țha apiang hi ka that châk a, a chhan pawh a sa atam in, atui tham deuh nge nge ka ti a ni. Khatiang khawpa lian kha chu, a sa pawh atam in, a ti țha pawh a ei tham ngawt ka ring. Mahse, a len em avang khan minti mur ve sung sung hial alawm ati a. Kah te kha i rawt ngawt a, keichu kah hlum theih ah pawh ka ruat lo hial asin. Kan chhaih kawlh ting ang tih ka hlau a, i chhuak tur pawh rawn dan che kalo tum a. Kha,, pawn lamah khualchhia anlo ding hlauh zawk a. I chhuah loh phahna an nih avangin ka lawm lek lek asin, kati fiam zauh a. Ngah nge a kahhlum theih loh ang le, saphai lam chi ho hi chu kalo that ve nual tawh a. An sahuat awmna pawh ka hrechiang hle bawk. Zia hi an nei reuh a, kan vau luia ka man phei chu, thlam thleng ka kai haw asin. Thlam kawtah thingtum ka lukham tir sauh sauha, ka nu hnam hruiin a nghawng rèk laiah ka țawn a, thlam banah ka thlung leh te te a.

.
A lian em, engtin nge i kaih haw theih zawk, kalo ti zauh a. Lo chhân khalh ni awm ang hrim in, buk chhaklam ațang chuan, patling rawl, rapthlak zetin arawn nui khek uar uarh a. Hmeiche han nui hawr hawr thawm tenawm zet hian, bûk thlanglam ațang alo chhawn zui zat a. Kan in en țhap a, kan rilru a zawhna awm. An lo lang țan leh tawh dawn em ni, tih chu In zawh hranpa ngailo in kan mitmengah chuan kan inhriat tawn sak vek niin ka hria. Thawm erawh engmah a awm zui tak siloh ah chuan, Sawma chu sawi leh rawh tih melh in kan melh zoh a. Sawma țawng chhuah leh hma chuan, Puia chuan min rawn kheuh zauh pahin, mei lam chu an mitmei zauh a. A melh lam kan zuk en vat a. Kan saza lu țhutpui chuan. Kan meichhem vap chu liakin alei alo chhuah zul zul mai. A lei sei dan chu, saza lei pangngai zawng ani mawlh lo. Ka thlir reng lai chuan, Sawma chuan, ninawm sek mange tihpah chuan, thingfak in arawn hlap chawrh a, saza lei pawh chu atlum zawk a. Mahse, a ngik deuh feih feih in ka hria. Kan boruak zah daih nan leh rilru lak pen nan, Sawma chu sawi zawm turin kan ngen a.

.
Ka lo sawi chhumbul deuh ani maw, a chepakaiin ami induh tihpah chuan ațhut hmun an siam țha a. Thingfak lek uaih chung chuan, saza lu chu antin leh ur ur a. A lei arawn chhuah leh daw daw chu le..ti nuah nuah chung chuan. A sawi zawm nghal zat a. Ka sawi tak ang khan Ka vau tui chawi in, ka zuk hmu a, sawi uar thei tak țhenawmpa, Pu Thlenga te chuan hmu se, uipum tiat ah a chhuah ngei pek ang chu, malpui tiah țelh țawlh zawng ani ngei mai. Sakhi pawh a dawlh thei mahna. Luite kama alo awm chu amei ah man in ka pawt hnai a, mi rawn chuk(seh) tum a, alu a rawn tun hnai phei lai chu kalo rek chaih a. A tal ve dawn ta mai. Alian si, duhtawka atal ngat chuan, ka hneh dawn lo tih lah ka hrechiang. Kan pawihte pa sawi ang in, alu ah chuan ka chul hliau hliau a. Phaite, phaite, zahngai, ziathup ziathup tiin, ka chul hliau hliau a, a awm țha ve ta mai bawk a. Tichuan, ka be zui ta mawlh mawlh a. Tihian lo awm la, nghawng awrh ka rawn siam ang che, lo kalsawn miah suh aw tiin, ka kalsan a. Thlanglama kawihrui zam chu zuk la in, ka phel sin deuh a. A nghawng tawka ka valh hnu ah biak mawlh mawlh pahin, thlam lamah ka kai chho ta a ni. Chuan, ka sawi tak ang khan, ka thlun fel hnu ah, alu kham chu ka'n siam țha leh a, mangkhawng delh a kan hman thingtum chu la in, alu ah ka hlap chawrh chawrh a. Thlam chhungah ka tlan luh san ta nghal a, thlam kawngka ațang, atal vel chu hmuhnawm ti zetin ka thlir ta veng veng mai a ni.

.
A'n tal nasat zia chu hmuhnawm tak ani ringawt. Thlam banah kalo thlung rawk mai kha, ka inchhir hman lek lek mai. Thlam te chu a pum nghin luai luai mai a. Thlam bula kan buh zawng zawng ama dung tlin chin ami chu, a pet hian a pe hun mai a. Kan be thing zâmna te chu a ngul nen lam a sawm nuaih mai mawle.. Chumi tum a, kapa rawn chho in arawn hmuh ruala min melh rum zia kha kala mitthla thei hial ani. Ka nu lah in, hetiang tur tih hriata chawhmeh siama lo tirh chhoh lèk loh tur che, ati nang nang bawk tiin, anui deuh sung a. I kaih haw theih dan mawlh chu ani mak ka tìh leh hriat thiam theih loh kala ti țalh a. A mihringin kan ngam leh ngam loh azir te pawh ani mahna. Ai huai te chu kan zui duan duan fo alawm ati ta lek a. In awih emaw chu ka hrelo a. Kan pawihte pa phei chuan, saphai chu biak thiam chuan, kan in lek khawng tir a, thing tlawn ang in aput haw theih e ati asin. Mahse, upa te hian saphai that chu an hausa theilo. An han neive dawn țan chauh a, an phai leh duak zel antia keichu, ka hausa ve thei dawn lo aniang, Saphai ka that hnem tawh bawk si. Saphai chu sawiloh rul lian deuh ka hmuh hi chuan, chawhmeh, chawhmeh ti rilru chung hian ka that leh mai thin. Tuikuk ang mai ka nia, rul sa hi ka duh lutuk a, ka insum thei thlawt lo ani. Ka hmuh len poh leh ansa ka itna, a nasa ting mai anih hi ati a. Keichu, ka hlauhna nasat ang bawkin, ka ten na pawh ana sa. A sa eite zawng teuh hian ahnai lo. Puia nang enge i ngaihve dan kanti zui zat a. A keipawh nangmah ang tho ka nihka ring. Mahse, hlau viau e tilo chuan, ka hmuh apiang hi ka that deuh zel thung. Mahse, khawih pawh ka khawih duhlo ka ten tlat tiin min chhang a.

.
Hriatloh karin, khua pawh alo var dawn ta reng mai. Thawm ri va satliah te chu mên ah thlakin, ngaih khatah kan ngai ani der tawh. Kan tawntirh lama kùk ri ringawt pawh in, beng leh thinlung a fan tehreng nen. Kan thil tawn zozai te avang chuan, kan chaw mawlh tlang tawh ani ber ang chu. Buk huala rawn rum kual nghawr nghawr ri chu ngaithla in kan ngawi țhap a. Puia chuan kawl a éng tawh ngei ang. Ngaw chhung hi ala thim chhah mai mai aniang, Zanin chu kan tluan chhuak thei hram dawn anih hmel, Enteh u hei, kan saza lu pawh khawvar tur avanga lungngaiin amittui atlak zawih zawih hi anti zui zat a. A ni lah tak a, saza mit ațang chuan, mittui alo luang chhuak nguah nguah mai a. Lungchhe insut ri hlap hlapin, buk huala rum nghawr nghawr reng chu arawn thlak ta bawk a. Ngawireng chuan khawvar tur nghakin kan țhu ta țhap a.

.
Mut pawh a chhuak tawh takzet ani.
Thu chung chuan kalo chhing sek aniang, buk chunga naupang hlim nui ri, khêk awr awr chunga, in umkual țuk țuk thawm ah chuan ka harh zawk a. Naupang inum kual thawm chu ari kual țak țak a, an rap pawp lo zawk mange aw.,ti a ka ngaihtuah lai mek chuan, ari hrawih a, naupang ke var pèp puap hi arawn lawr thla zawk a. Thawm pawh areh nghal hmak. Rangtakin atlum chho leh zuk a, char lamah ari phei tek tek a. Han zuang thla thawm in azui nghal zat a. Thawm ngaithla a, kan ngawih țhap lai chuan, khawnge saza lu kha tiin, Sawma arawn au chhuak a. Kan bulah alo awm ta hauhlo. Mahse, kawngka sir lama keimah ni min melh kur chunga lo țhen țhaw chu va chhun fuh in, Puia chuan ava la a. Min ti buai zozai emai, Sawma a chaldam chinah hian aki hi phawk thla la, ven anuam anga, arit sak lo deuh ang, kha akâptu ini bawk a. Han sat thla teh. A nachâng kan lo hre har lutuk ani tiin, Sawma chu a pe zui zat a. Sawma chuan, ațha viau tak ang chu tiin, a chempui chuan a ki bul țhut sir tukhum lam chu an sât charh charh a.

.

Patling natuar rum ri lo chhuak chuan, beng a verh zar mai. Kan ding suau a. A la rum zui ta hluah hluah leh nghal. Puia chuan, khawinge keiman kan ti ange, ka ning zozai tawh lutuk, hetiang hrim hrim chuan minti â thei tak ngial dawn alawm, kan nih nìh chu kan ni anga ni mai, tihpah chuan Sawma sahna hnu ațanga thi duk zet lo chhuak zur zur chu pawisa lo in, ațhut chilh a, saza lu chu an kuai hnai sauh sauh a. A chem lu lam chuan a chik kual zung zung a. Kan bûk bul leh avel ah zawng zawng chuan, an chiau chel chul ta mai a. A rik hian an ri chuah chuah mai. Thli lum hek huk hi arawn thaw fur fur a. Kan buk chu arawn chhem nghing lawih lawih a. Thingkung a chhem ri sung sung a, hnahthel ro arawn leng lut chum chum bawk a, kan meichhem pawh arawn chem darh ur ur mai, mei si leng chuaih chuaih karah Sawma chuan, buk chung chu alo uai ngat ngat a. Thlah vat rawh, i dar kha a phawng hlawl mai tur asin tiin, ka khap a Buk chung hi ala ang tih ka hlau alawm ala ti țalh a. La mahse a pawilo. Puia hmanhmawh teh i sah thlak hma leh kan boruak hi areh hma ani mai tiin, thawm ri nuaih nuaih leh thli thaw hum hum karah chuan, kan inbe lawng lawng a, Puia chuan, min rawn ên rawh u, ka hmu hleithei lo ania arawn ti a. Kan meichhem alen darh avang chuan, alo thim mup tawh a. Ka light chuan kan ên vat a. Saza lu chu mihring lu ang maiin ka zuk hmu a, chuta karah sawma hmel ang chiah chiah pu in, mi rawn melh tawk tawk a, Puia lah chuan hman hmawh zetin asat tak chawrh chawrh a.

.
Thawk leh khatah arawn eng deuh huai a, thliin kan buk chung arawn la chu lo niin. Ngaw chhung la thim khung hnuaiah pawh a eng deuh huaiin a hriat tlat ani. Kawl a eng tawh tih pawh ka hreve chiah. Chhum dum chhah zet hi kan lampan in, arawn in zial let phei tup tup mai a. Chhum satliah mai zawng ani hauh lo. Hlimthla leh ruangam nei deuh roh ani tlat. Puia chu, I zo țep em kan ti a. Aw zo țep A hnarkawnah hian tan mai ang aw arawn ti a. Aw, i duhna na ah tan rawh, i zawh vat angai ania, saw thil saw a rawn hnai säwt riau mai. A rawn rum phei vung in ania ka hriat ni. Awle ka zo e, ka tan thei ta. Arawn ti chhuak a, chhum dum pawhin min rawn bawh(khuh) chiah bawk a. Kawl eng leh ngaw chhung rawn èng ve tan mek chu, arawn hliah thim leh zo ta vek a.

.
A thawpik thlakin, boruak uap leh ipik tak chuan, thawk ati harin han chetvel thleng mai chuan a harsat phah vek niin ka hria. Thli thaw areh tak avang chuan, Sawma minlo ên teh, mei kan nun leh ange tiin, kan au a. min chhâng ta hauh lo. Kan ên kual ruai ruai a. Ka hmu ta hauhlo mai. Bûk sirlam ațang chuan, min pui ruu.. tiin, arawn au ta mai a. Puia lo awm rawh kan kal ange, tih leh chhuah ka ruala. Ka rawn kal e, lo thlaphang hauh suh. Khawnge i awm tiin, ka au pah zel a, min chhâng lo a, A reh vung vung mai. Ka bul vel ah chuan thaw ri halh halh thawm hian min pel leh fua fua țhin a. Ka hmanhmawh lutuk chuan, thil engemaw ka pal a, ka tlu bawk thlawrh mai. Rang takin ka tho vat a, ka thilpal chu nem deuh niak a, ka hriat vangin, kan chhun èng a.

.
Sawma chu bawk khup zawngin alo tlu reng niin. Kan kai thal a. Karei,,!! ka tawlh hnung dawrh mai. Thisenin a alo luan huh zûih, Sawma hmel pèr sawi bui mai chu ka en tlawk tlawk a. Amah lah chu khaw hmu tawh lo tih hriat zetin ameng kuau mai a. A khabe ruh pawh abal ni ngeiin alang, a hmel per
bui mai hnuaiah chuan, a uai deuh hluai a. Rapthlak ka tihna zawng zawng chu, lungchhiatna leh thinrimna in arawn thlak a. Mittui tla zawih zawih chung chuan kan pawm vat a. Ka thinlung tawt leh hrehawm tak chu, ka mittui chuan aluan chhuah pui theilo. Ka inti pachang thei thlawt lo ani. Thiana avan pawi tak em, keimah vang ani. Ngahnge he ramah hian kalo luhpui kher kher che le. Apawi kati lutuk, min ngaidam rawh aw, i chhungte hnenah enge ka sawi tak ang. Min thlamuan tu ini asin tiin, ka țap zawih zawih a. Puia min rawn auh na ri chu hre reng mah ila, enge asawi ka hrethei tawh lo. Ka lungchhe lutuk chu, insum hram hram chungin, Sawma ruang chu, mittui tla zawih zawih in ka pawm tho a. Ka darah hlângin Bûk lampan chuan, ka pu phei ta a ni.

.

Ka mittui avanga ka khaw hmuh phe ruai mai chu, kan hui kianga. Insut hlawp hlawp chungin ka kal hmawk hmawk a. Ka thinrimna chu meipui ang maiin ka kawchhungah chuan, a alh hlup hlup ani ber mai. Tun dinhmunah hi chuan, engthil hlauhawm pawh ka hma ah ding se, ralthuam tel miahlo in, a seh a, inseh ral raih ka cho in, ka ngam takzet ani. Hah ka hrelo a. Ka thinrimna upbet turin, ka inthunun thei heklo. Savawm leh sakei pawh hmachhawn ila, a ngho tawi zawk ka nihna hriat lêk loh in, ka seh hlum tho in ka ring ani. Thinrim avanga rilrua, rum ngul ngul chung chuan, Sawma ruang chu kan sep dawrh a. A rum deuh kawk in ka hria, ka hmanhmawh zual suah a. Ka hlim deuh sawt bawk. Buk pawh ka hnaih tawh kher mai. Puia chuan mei alo chhem tawh ani ngei ang. Mei êng pawh ka hmu phak tawh a. Chumi ènga mi pahnih ruangam vei tawn sek chu kava hmu nghal bawk a. Maktih nachang hre hauhlo leh lungchhiatna avanga țah aw țuau in, Puia chu kan âu a. Min rawn chhangtu aw chu, ka rinloh leh beisei hauh loh Sawma âw ani tlat mai. Mak ti in kan ding dat a, hmanhmawh zetin buk lam chu ka panphei ta buan buan a.

.
Buk chhung kan lut chu, phawk zetin minlo en dun hau mai. An makti hmel chu, kei aiin anep bik hauh lo ang. Phâwk zet a, min en dun hau chung chuan, kha engthil nge iput kha ti a, min zawh pah chuan, an silai chu ka lam hawi zawngin an rawn lek kawh ta mai a. Mak tih vanga meng phâwk hru chung chuan, Sawma chu ka en tlawk tlawk a. Ka thil put han che deuh hrut ah chuan ka harh zawk a. Rangtakin ka keuh thla nghal țhuai a. Zawng palian ang mai a hmul dur mai, hmel rapthlak zet chuan, milo nuih vur vur mai le. Țeng pherh zeta, an nuih tak uar uarh ah chuan, silai arawn ri țhuai a. Buk pawn lamah chu thil chu, nui khek awr awr chungin avak chhuak ta zawt zawt a. Ka hamhaih lutuk ding khawng reng chu, Puia chuan, min rawn sawi harh a.

.
Tinge, i tlan chhuah daih a. Ka auh zui vak vak che kha i hrelo em ni arawn ti a. Hawi chhuak in, Sawma chu kava melh a, nichin khan khawnge i awm, i mangang au ri kha ka hria a. Buk chhungah ka hmu bawk silo che a, i aw ka hriatna lam pan in ka tlanchhuak ve rawih mai alawm. Ka van lawm tak em, hetianga himdam taka ka hmuh leh che hi ka ring phak reng reng hleinem. Khawimaw kan kuah teh ang che tiin, ka pawm chùk chùk a. A ngaihna an hrelo dun in, makti hmel zetin min en dun hru reng mai a. Sawma lah chuan han kuah vel chu duh lo in, atal ang chuat chuat a. Ka lawmna mittui tla chu, ka kawrbanin kan hui pawk pawk a. Eng iti ta nge maw ni le. Pêr pûr che chuan enge thil awmzia, i thil rawn put haw, hmelchhe zet kha engvanga rawn pu ngawt nge inih reng reng tiin, Puia chuan min melh deuh khùi khùi chung in min zawt a.

-----------+-----------
Zing khawvar eng thiang takin, ngaw chhung arawn kah en dai raih hnuaiah chuan, buk chung leh bang tlabal zet hnuaiah tuk țhuan rel pahin, ka thiltawn dan te chu ka hrilh mawlh mawlh a. An ni lah chuan, chutiang chhumdum an hmuh loh thu leh thli tleh hum hum bak kha hriat anlo nei hauh lo. Sawma lah buk kawta thingtuah la tur a, a chhuah zawk bak hmun dangah alo kal reng reng bawk silo a. Ka tlan chhuak thut kha, makti angreng takin, Puia chuan enge itih dawn tiin, minlo au zui ani awm e. Inthiar tuma chhuak ani ange tiin, minlo thlir liam ringawt a. Ka rei tak deuh avanga leh ka aù deuh lauh lauh thawm an hriat avangin, minlo au vak vak a. A bak chu ka sawi tak ang khan min hmuh leh hriat chu ani ve mai a. Keimah chauh kha tih buaiin kalo awm ani ber. Min hruaibo lo chauh ani ber e.

.
Tuk țhuan kan eikham fel chuan kan insiam a. Ka nula hmuh, țhatna zawng zawngin a abawm khah emaw tih mai tur, hmeichhe duhawmna zawng zawng nei kim vek tu, A hming pawh kala hriat hauh loh, a hmel erawh ka mitthla a châmreng si. Ngaw chhung lalnu ka tih mai awmna lam pan tur chuan, kan inpuahchah sauh sauh a. Zep theih ni heklo. Ka țhiante hnenah pawh kan intawn dan leh ama thu min hrilh zawng zawngte chu, sawi in ka hrilh ve vek tawh bawk a. Kan phùr tlang viau na a. Kan helh hawlh ang reng viaau lawi a. Sawma chuan, ngaihngam taka zankhat tal han mut ve theih mawlh ani ka thlakhlel ni arawn ti bauh a.

.
Khawinge phùr tak chuan, in thawk chhuak ang hmiang, Sawma chuan thinthi a mutthilh a thlahlelh a. Keichu, ka chanpual tur nula hmelțha leh biangno an awm ve dah lo maw., tih beiseiin ani, ka thawh chhuah dawn ni. Sawma te ang in, keini ang val hmelțha pui si, ngawi reng mai hi chu, tun min duh ve mang silo a. Lasi nula emaw khuavang lalnu pawh nise ka tawn ve apiang chu, lungsi takin ka pawm veng veng mai dawn e, Puia chuan anti a. Sawma chuan, ve khanglang che chuan, ngawirengin alawm nangte chuan, kan veng nula pawh i chhai thluk țhin. Keini kan țawng zawt zawt a. Haw paha vaihlo zial thar rawlhruk hlawh tu pawh nangmah hlir alawm le. Chuti te a, ka'n țhiana laka tlaktlum tum ang zia zânga i han insawi chuang viau le. Kan nula hmuh tur chuan, țhian aneih beiseiin țhianpa Rina hian atih pui che i beisei anih kha. Lasi nula te chu, kan nula te anga intihpui mai mai theih chi an nive lo. Mahni theihna leh huaisenna hmanga hlawhchhuah chi zawk asin anti ve salh a.

.
Puia lah duai duh biklo. I sawi anga val to ni lemlo mah ila, intihpui kher kher chu ka duh reng reng hleinem. Manilo maha thikthu chhiat sa nak alaia, han intihpui te zawng a phal pawh ka phallo hrim hrim a'nti khauh a. Nang lah hi, kan țawng engemaw lai hi, a bawplawka lak hi i ching a. Hnial hneh theih pawh ini lo. Ngawireng hian, țawngkam te lah hi, i maimawm tui thiam phian leh nghal a. Thianpa Rin, ti teh, i chhuahsan teh ang. He ram thikthu chhia leh țihbaiawm hi, kan Pui’lubuka chawp hian i kalsan vat teh ang, tihpah chuan a chhuak tharh a. kan inzui chhuak ta a ni. Puia pawh in nui pùt pùt chungin hnung arawn dawl a. Kan buk ngaihawm loh zet chu chhuahsanin, pípù te hrilhfak LASI nula ni ngeia ka hriat nen kan intawnna ramngaw chu panin, pheikhai zang takin kan in zui ta țhâm țhâm a.

---------------+-------------
A hma a ka sanghal kah, sakhi chala min thleng sakna hmun chu, panin kan kal sauh sauh a. Ka savawm hmuh in, min um dan leh ka tawnna te chu kawh hmuhin, kan ti ti bawrh bawrh a. Kan hma a, mualpawng saw kan chua'n chhuah chuan, i sakhi kahna ruam pharh țha zet kha alang thei tawh in ka ring. Tah sawn chawl ila ram hi i chuan teh ang u. Puia chuan arawn ti a. Mualpawng ka'n tih tak chu, tun a kan kalna mualdung leh kan dinglam ațanga mual tlangdung rawn inkhawh thla nen a, an insutna niin, chumi infin dun chuan, tlangdung mual pharh zawl țha dup mai asiam thla a. Mual pawng rem laia, thingluang patling pathum pawm zet tur lo awm ah chuan, lawn kaiin kan han in nghat a.Khaw hawi anuam in, kan thlanga ruam pharh rai dup mai chu alang chiang hle ani.

.

Puia vaihlo chan sa chu, ban ve pahin Sawma chuan țhianpa Rin, hei kan valto pa vaihlo hi rawn zial ve rawh, tui deuh ania. Hei chen kan châm tawh a. Ani zawng vaihlo chan sa ala nei bik tlat ania. Anu chan sa zawng ani tawh tawp lo ang. Tlangau fanu, chawn bing lin-len khan, apa vaihlo tui a rawlh ruk ani khawp ang. Kan riahluh dawn zan khan, hmeithai pi Rèngi leihka ah an in bekbawr sar sar in ka hria. Hei arim te reng reng hi, pu Sapa buhzem rim anam tel vung vung roh ania. Tiin an fiam a. Puia chuan, nang te hi, i nula theih tam te hi, țhiante hmehbel chungin, i insawi thei zaih zaih mai si a. I nihna leh theihna hi kei mi bel kher lo hian, sawi tlang ve law law țhin ta che. Vaihlo te chu hei chen riak tawh in, chan sa neih reng thu a awm hleinem. Hun awlah kan chan lawk dim diam ani ngai. I vaihlo te chu tui ngaihna awm țhuai hek lo. A zung thei teu teu tawh phawt chuan, an tham pawlh vek che alawm. Veng hrang leh in hrang rim a inpawlh neih nuaih ang chu. Tlangau fanu pawh tun ataka a chawn te in sel vei chu le, pu Tlanga sum ang mai a, chum beng buang leh tumbu thuk thawlh ang mai a, vuai dum chin chen pawh nise, i hmu changel zik var piak anga, a tlawntlai țha mange tih rilru pu in, i silai zut leh hauh hauh pek ang chu. I lasi nula beisei hian mi khak fek fek reng suh. I hmu ve thei chuang lo ang. Mi khei fek fek reng zawngin, haw hunah ka puan vek ang che nga, hmeithai pi Rengi mal vuai zet beiseiin, a zu tuitling chhuanlam hian, a leikapui i rap ri zantin mai tur ania. Anti ve sak a.

.
Sawma chuan chhân tum in a âng zuau a. Mahse, țawng zui talo chuan, kan hnunglam chu en in, a thlir ta veng veng mai. A chhân letna beiseia, lo bengkhawn reng tu Puia chuan, enge atih rualin, a en na lam chu kan hawi rual țhawt a. Kan thil va hmuh chuan, min barakhaih ngang mai. Tumah chetna chang hria reng kan awmlo. Milim ang maiin, kan en ngai en in, ngawi reng chuan kan țhu ngawt ngawt mai ani.

.
Kan chhak dinglam mual ka tih tlangdung chhuk euh euh ațang chuan, SAZUK KI BUNG ngei mai chu a rawn chhuk thla thauh thauh mai a. Alian țha in, a mam tle zar mai a. A ki hreu han ropui zia chu, a țawi buk luih ani ber mai. Hnawk sak tham khawpa mawi, aki hreu chu an zo velh velh khawp leh nghal a. A kibung anlo ti ngawt tak na a. A tur ve renga piang ani zawk in ka ring. A ki leh lam chu a țo ve lo hrim hrim zawk ani. Mahse, a ki țha lam chu arawn țo chhuahna ațang, a chhip lamah akawi phei a. A chhip zawn takah to ngil chho in, Chuta țang chuan, thingzung ang maiin, a pêng zâr buk luih mai ani. Sazuk satliah mai zawng ani hauh lo. A bik ani takzet mai. Avar paw vo mai a, a han hawivel te chu, a zahawm in, thuneihna nei leh zahawm tak hmel apu tlat. Hlauhna leh timna nei miahlo in kan lam pan chuan arawn kal bu nghat nghat a. A induh mange, tih tur khawpin aki chu chhuang ve ang hrim in, a hawi valh valh mai bawk a.

.

Mahse, chung apian phung leh nihna ropui tak chu hmu vek mah ila, chetna chang hrelo lèk a, min awmtir tu chu, a hnunga rawn zui tu, zukchal pahnih duailo zet te pawh chu anla ni mai lo. An chunga chuang, sazuk mawina zawng zawng khûm vek tu, lei leh vanah pawh an tlukpui awmlo tur khawpa hmelțha hmeichhe pathum rawn chuang te chu anni zawk. Nuih deuh sen sen pahin kan hmazawn ah tak chuan, an rawn ding ta heu mai. Tumah țawngzai rel thei rèng kan awmlo. An han in bek bawr sar sar a. Nui har har chungin pakhat chuan, țhiante u, khawilam nge inpan dawn. Kan zingah hian rawn telve ta che u, ngaw chhung hi fang in,. In ngaihtuah phak bak anuam

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:27 pm

SAZUK KI BUNG,5

By Hriata Tea

in kan siam dawn che u nia, a rawn ti a. An hmel țhatna ringawt pawh tawrh har tak anih vei nen, an taksa mawina belh chhah tur in zopa rilrem zawng taka, an sam sei hnalh mai leh an taksa ria chum bat, thianghlim leh no chek mai. An heh vam sen hiam mai leh changkha lei dek lam ang mai a, an vun ngo leh no sar mai te chu, min tibuai tur a, a tawk tawh vei nen. Thawmhnaw an inbel mumal hauhlo chuan, tlangval țhalai thaza leh chak țha țhe țhaw te chu, rilru mumal pu theilo in min siam der mai ani.

.
An sam sei hnalh chu, hmalamah an hnute khuh thei chang changin an huih liam a, kawr dang reng an ha lo. An âwmbawr lang var hai mai leh taksa ruak kang mai ti itawm zual tur a, an nau chawbawm hma theh rawn kawh pir vah mai chuan, vanram min suangtuah tir hauh lo. Hnuailamah siap suap niawm tak, chhing tei tawi buk laihin an feng a. An malno lo lang te chu, chilthli far zawih zawih a thlir tham. Rilru leh taksa sual lam hawia hruaitu ropui elkhên niin. Keini pathum min tukdawl tur hian ralthuam leh hriam dang reng reng an mamawh lo. An tâwnah dawl zawrin kan zawr a. Kan ngaih tuahna te chu a chaw hnu ruih tawh mai ani.

.
A hma a, rawn țawng bawk khan, mitmeng däva riai a kan lam rawn melh chung chuan Vala te u, lo kal ta chû le,intan a inphal leh in țâng belh chak, keini nula âwm nêm leh khawhar te hi minti hlim ve dawn lawm ni. In tan chuan engkim kan huam asin tiin, sihhnip hmel zet in, an nui zui har har a. Chu te hlei hlei chuan, an țhatna a belhchhah emaw tih mai tur in, an lam chu pan lo theilo in min siam a. Tung chho a kal zingah tunge hnial anga, hnar thei awm bik ang. Kan duh a kan hnuh leh kawih phar theiha rawn inpe, hetiang khawpa hmelțha leh duhawm hi van angel te pawn an hnar thei bik dawn em ni. Mipa diktak te rilru hmun khatna lai chu hmanrua ah hmangin, kan chak lohna ber leh kan sihhnip na chu, an ralthuam țha ber leh mipa te lungkham an robawm hma chhuanin, lei pialral chu kan tan an tawk tarh ani si a. Tumah țawngzai rel thei kan awmlo. Ngawi renga anlam pan mai loh chu tih theih kan nei heklo. Min ngaih melhna mitmeng de sar mai chuan, min han zai ralh ralh a.

Kan taksa, rilru leh ngaihtuahna te chu atui ral zota. An lam pan a, kal chu kan phùr tlang ngang aniang. Kan ding rual țhawt mai. Hei baka pheichham man na dang enge awm chuang ang. Zukchal sen buang thang mai chunga chuang, sam sei dum hlep hlawp, nuimawi zet chu panin ka hnaih phei hrauh hrauh a. A mitmeng mawi leh nalh tak chuan, a bula chuang ve tur in, min han siai sak a. Val hi ka tuiral zota.

A bula kan din takah chuan sazuk chunga lawnkai tur in, a bân min rawn pe a. Mahse, mak takin ka mit chu tihvar sak in ka awm ta tlat. Ka bengah aw nem zaidam tak hian, hmanhmawh leh mangang awkâ zet hian. Chuang suh, ramhuai sual an nih kha, a hnunglam kha han enteh ti in, min rawn bia a. Chumi rual chuan a hnungzang hmul dum chhah zetin, a bawm khah chu ka hmu ve nghal. Mahse, engtin nge ka tih tak ang. Ka țhiante pahnih lah chu, an phûr in engdang reng an ngaihtuah tawh silo. Ka ngaihtuahna chu, ka thinlungah chhan in ka awm a. Hnuk thla rawh, kha sazuk chung ațang khan i paihthlak chuan, an nihna diktak alo lang mai ang arawn ti a. Min puih tiam tu, ngaw chhung lalnu aw ngei kha niin ka hria.

.
A sawi ang ngei chuan, min rawn ban mek tu kut chu kan hmer a. Ka theihtawpa na in kan phih ta nghek mai a. A rawn tla tur mitmeng rapthlak zeta min melh chung chuan, aw thum leh țihbaiawm zet hian, thinrim awrawl rapthlak zetin arawn au țeng chuaih mai. A tlak rual rual chuan, midang te pawh chu nula reng anlo ni tawh lo. Zawnglian ang mai a, hmul dur mai leh hmel rapthlak tak pu, lian zet zet anlo ni zawk si. Ka hnung tawlh a, ka silai chu chuh turin ka tlan phei ta nghal a.

.
Zukchal ki bung hmazawna ding Puia hnung tawlh zawt zawt chu ka mitsir in kava hmu a. Ka silai ka dawm rual chuan, Sawma râk țhat ri chu ka hre zui leh a. Chu lam hawi
chuan inher in, ka silai chu ka lek kawh nghal zat a. Ka thil va hmuh chuan ka thinrim na a chawk tho chiang kher mai. Sawma chu palian zet chuan khai kang in, lei a alo paih thla lai tak hi kava hmu a ni. A chuanna sazuk chuan țum zui tum in, a ding kang ur ur a, chumi lai tak chu tin pawh tin mumal hman lo in, kava kap ta a. Ka fuh ngei aniang. Sawma nikhaw hrelo let thal reng chu, țum lo in hnung zawng chuan a inbin let a. A chunga chuang erawh, in thazo zetin a zuangthla thauh mai. Alen tehreng nen a inzo em em mai chu mak tak a ni. Puia mangang aw in, i hnung kha veng rawh ti a, min rawn auh tuarh ka hriat chuan, kun zuk pahin ka hawilet vat a. Ka kun lâwk chu ka vanneih phah ta hlauh.

.
Ka awmna thingluang lianzet chu zuankhumin zukchal ki bung ber chuan, mi rawn pel fua mai, akî hrêu chu ahmang thiam hle ang tih rin ngaihna reng kalo hrelo. Ka dar thîp sa zawr avang chuan, ka hre chiang ta hle ani. Ka hnungah palian zet pahnih leh zukchal pahnìh an awm a. A hlauhawm ber leh lian ber ka hmalamah a awm bawk si. Zukchal ki bung chu inher in, a chunga chuang nen chuan ka lam an rawn pan leh mek a. Puia pawh ka bulah alo thleng ve ta. In hnungchhawnin kan invenga. Zukchal kibung chu, a thinrim hle ni tur ani. A hawi ngeng ngalh mai, A chunga chuang hmelchhe zet chuan, he ram hi damin in chhuahsan dawn lo. Kan pawi insawi a. Kan mite pawh inti hlum a. An lu la in, in diriam zui a. Dam in kan chhuah lo ang che u ati kùk kùk mai. Puia chuan, Sawma saw a che hauh lo ania. A leh ngaiin alet reng mai. A rawn ti a. A sawi zawh rual chuan, rum ngul ngul chungin, kan lam pan chuan, kan hmelchhe ho chu an rawn thawk phei leh ta. Kan silai chu apuak rual thawt a. Mahse, awmzia a awm hauh lo. Ka kâp fuh ngeiin ka hre si. An taksa a hmul țo nen chuan an ngaih pawimawh loh dan a in ang reng. Puia han rak țhawt rual a. Ka taksa rawn thip zawr chu ka hria a. Ka awmna thingluang ațang chuan, ka tla thla thlawrh a. Lei châr a ka zuk insawhna chuan minti harh leh zawk a. Zukchal pathum leh a chunga chuang ten min rawn pan phei ka hmuh chuan, ka silai melh in ka hawi ruai ruai a Ka hmu silo. Beidawng zetin anlam chu hawiin, min hmusitna hmel ngeiawm zet leh deuhsawh taka min nuih na chu, hmachhawnin beidawng zet chuan ka ding ta ringawt mai a ni.

.
In nuam tawlna hun chu atawp ta. Hun in neih lai khan haw ula, buaina kan neilo mai tur. Hringmi ho hi ka ngaina hrep lo che u, tiin a palian ber zukchal ki bung chunga chuang chuan, ati khur khur a. Ka lam rawn hnaih pah chuan ama bawp ngei mai chu, sam lam zet hian an bal hlawk a, lek kawh pah chuan min vaw turin, an lek kang uaih a. Ka tan tih theih a awm talo. Tan lo khawh turin chakna reng ka nei tawh silo. Ka ding thei țawng țawng ani si. Ka tawrh tur chu tuar zo law law turin, ka maimit chhing ta ringawt mai a ni.

.
Hmeichhe rawl han râk tuarh ka hriat rual chuan, ka âwm chu thingtum a vuak ang maiin ari dawt, ka nghing lawih a. Ka per dawrh hial in ka hria, ka hnunga thingluang kava tauh dawt rual chuan, țek tla ang mai a ri dur leh han èng zuai hi ka hmu a, ka lum deuh pup. Huai ho chu an râk tuarh tuarh a. An käng ni ngei tur ani. Khu vung chungin, bak lengin an tlan chhe ta niin ka hria. Ka mitsulh a. Ka khaw hmuh han thim riai riai karah chuan, ka lampana rawn kal niawm tak hi ka hmu a. Engmah ka hre zui thei talo.

--------------+-------------
Muhil harh hlawl ang maiin, ka harh chhuak zawk mai. Minlo pawmtu chuan, a malchungah ka lu nghatin, min nuih var var chung chuan, ka lu chu alo zut hauh hauh a. Makti angreng takin ka'n țhu chhuak a. Min nuih sen sen chung chuan a teuh ther ther hle mai, ati ringawt a. Khawnge, ka țhiante tiin ka zawt chawt a. Ngaihtuah suh kan piah a saw, tui takin ka muthilh tir, tih pah chuan min han kawh hmuh a. An țha maw, na an nei em. Hliam antuar lo ami kan ti leh a. Neilo e, ana ber chu ini e, an ni chu awlsam taka tihdam mai theih an ni. Nang erawh sazuk ki khan a hliam tlat si che a. Tunah mai chuan, kha bak chu tih ngaihna ka hre rih biklo. Zukchal ki bung ber kher kha chu, aki ah khan he ngaw huai ho chakna leh thiltih theihna hi a awm a. A kî pawh saza ang maiin a hmangthiam a. Nghalmal țuanran na a thuam ani a. Keipui huaisenna pu in, zämphu ang mai a luhlul, keite ang a ngeng ani asin. Amah kha, he an ram chhunga an sa neih zawng zawng te țhat bikna țheuh in, an thuam tlat ani. An dawi tùr hlauhawm tak chu aki ah khan dahin, vun pilh hlek chin a, a hliam tawh reng reng chu, muangchangin an țawih ral mai țhin. Rul tur ang maiin, thilnung zingah ngam let tu an awm lo.

.
Ka thusawi hi ngun takin lo ngaithla ang che. I damdawi tur la in, kan chênna ka pan vat angai a. Ka tan pawh zankhat tal chu thang angai dawn si a. He hmun hi ramri bul lawk ani a. In awm tih an hriat chuan an rawn bei leh mai ang che u. He mualdung hi in zawh zar zar anga, atawp ah mual lungthu alo awm anga, hai rual ani lo ang. Nangni chuan, ramhuai liam kawn te pawh inti țhin in ka hria. Chu muallungthu tlâng hniam berah chuan, hmunrem țha leh tui țha tak a awm a. Tah chuan riahbuk in sual dawn nia. Ka rawn kir leh hma chu, helam ramah hian in lut rih tur ani lo. I țhiante saw kaitho la, keipawh ka kal ta nge. Hmanhmawh ang che u, huai ho khan an rawn hmu leh palh hlauh ang che u. Kalo kir leh hunah kan inkawm dawn nia ati a. Min nuih ver ver chung chuan, alang hla tial tial a. Ka hmu thei talo. Avan țha chungchuang tak em. Amah kha natna hlawm anih zawk awm kha maw. Ka ngaih zui nghal veng veng a. Khawhar riau a, ka inhriat tak chu le..

.
Ka țhiante chu kava kai tho a. Makti taka min en vung vung hnu ah, an taksa te chu, ana lai zawng ni awm takin an in en a, an dap kual vel vut vut a. Zawhna mitmenga min enna chu, thu a an bawhzui hma in ti rawh u. Kan kal vat angai. In hrilhfiahna hun a awmlo. Kan pan tur hmun kan thlen vat angai ani. Kalpahin ka hrilh dawn che u nia.
Kan thiltawn an hriat loh chin chu, ka hriat chin ațang țan in, ka țhiannu min puih vanga la dam kan nih thu leh ka damdawi tur la a, thang mek anìh dan te chu ka hrilh ta vek a. Mak anti in, vanneihna kan tawn chhan chu, keimah vang liau liau anih thu sawiin, lawmthu te min hrilh tak deuh deuh, Kan lawm tlangin, him ta riau a inhriatna kan neih phah vek niin ka hria.

.
Thiani sawina hmun chu hai rualloh in, alo lang chiang hle tak mai. A sawina hmun ah ngei chuan, in nghatin riahbuk kan sual a. Luite tui dam leh fim tha zet chu buk bul te ah aluang dam dam a. Kan inpeih fel chuan, inbual tumin luite ah chuan, kan inphelh sawt sawt a, Sawma chuan, lu sûk nan a chingal tal a awmlo chu aw, kan vut neih hmasak ber in ka thlawr khawp ang ati a. Puia chuan, tiaulung khan in nawt belkang tuarh la ni mai lawm. I thap belh chhah chuanglo ang. Hmulphurh chhe sa inih kha arawn ti a. Sawma rawn chhan hma chuan, ngawitu hei nghavawk leh nghalim an tam hmel phian mai. Kaikuang phei chu antam khawp hi tiru, chawhmeh atan i man ang u. Kan sarep te lah kan chhawm mang silo a. Luisa ei pawh a chakawm alawm le..kalo ti zauh a. Sawma chu a rawn phur khawp mai, chakai khawrh pah ang aw tíhpah chuan, lung a phawk zui nghal mawlh mawlh a. E, hei atam dawn khawp e. Tu pa mahin anla khawih loh ani bawk a, âite na nânâ zawng hmehkhawp man a har lo tawp ang ti mawlh mawlh chungin, Sawma chuan, alung phawh apiang ah chuan, aman ani deuh mai. Keiin, ka kawr chu aban leh lam lehlamah ka zen a. A nghawng chu ka seh a. Atlang lam ka kutin ka chelh tel bawk a. Kan hrut a, kaikuang leh dawntial vel chu ka man ve mai bawk a. Puia chuan, khatia tih zawng a buaithlak mai mai. I kawr kha a thâng huam mai ang. Tih dan ka hria alawm tih leh Chem nen, ngaw chhunga vah luh arual a. A eng chu ati dawn ni maw.

.
Alo kir leh chuan, thingzung kutzungpui tiat vel, hlam khat ai sei hret tur hi arawn hnuk a. Kha enge kalo ti vat a. Rùlei anih hi, avang zek mai duhaiin ka rei phah alawm le tihpah chuan, khâp khat vel lek lek in a tan chhum a. A chem zâng lam chuan an vaw sâwp a. Avai chuan, tuiah chiahin an sawr a. A rawn paw thla phàt phät mai. A vua a, asawr a, a vaw leh a, asawr leh zel a, chutianga atih sek hnu chuan, ti khan han nghak hret ila, nghavawk leh nghalim chu kan chhar mawlh mawlh mai dawn alawm ati ta a. Khatiang lek a, sangha vuak tum chu, an ruih kava ringlo e aw, ka ti deuh nang nang a. Mai mai a, Nghavawk leh nghalim vuak nan rulei tluk a awmlo. Tam a ngailo reng reng. An haw lutuk ringawt, lo ngai reng rawh ati a. Sawm chakai khawrh chuan, a kawrin arawn fun chho țûn mai. Hmeh khawp ka man der ania arawn ti lâng làng a. hei, sangha an thal phung mai atih zawm zat a. Kan bih ve vat a, nghavawk phei chu akamsirah anlo awm khawm têt tût tawh ni reng in. Phûr takin kan chhar a, khai â i thil tih dan chu ațha hle mai. Rûlei kha tiang zat lek kha chuan, sangha avuak theih kalo ring hleinem.

.
A nia sin, nghavawk leh nghalim hian an haw zual bik a, sangha vuak tak tak nan chuan, khatiang lek chu atawk bik hleinem, tihian nghavawk ho hi chu, a kamsirah an chhuak daih anga, rù tui aluan zawh hunah an lut leh mai dawn ani. Nghalim erawh an thi ang ati a. Kan duhtawk kan man hnu chuan, bukah kan bun khawm a. Atam khawp mai. Rêp țhen hial tur anih hi tihpah chuan, arêpna tur ka siam nghal a. Nghavawk phei chu rep loh chuan, ka ei duh hauh lo. Thil lah hi an ei hrawmhraw khawp leh nghal a. Pangang te anlo dawlh leh mai țhin si a. An ril ka la vek a. Ka rep dul mai ani. Puia chuan i peih mai mai mange aw..,ati nuah nuah a. Nghavawk hi an in anglo hlawm khawp a. A țhen an pawl phùt a. Dâng var pap te, tial rek ruk te, eng pêp puâp te, an ni nawk mai. Banrek tiah dawn a lian, han rep țhùt mai chu an lang mawi ve fu mai. An lu ber bur hian ati itawm lo mai pawh a.

.
Sawma chuan kha tinge, i dar chu a kak raih mai arawn ti a. Nia he hliam damdawi tur la hian alawm țhiani pawh a thang vang vang le. A sawi hlauhawm tehreng nen, na lah chu ka hre hlei lo a. A damdawi min pek hi a țha viau aniang. Tiru le, chawei ka peih e.

.
Nghalim man thar diai mai, chhum hân nen chuan, zanriah kan kil a. A ei hnem theih ngang mai. Dul hmul khât phuarin kan zî kan zî mai ani. Kan châu tlang tawh bawk a, puar taka chaw han ei meuh chuan, kan mut tlem zia alo lang a. Mut chhuakin min zêm chiai chiai mai. Minti buai turin, huai ho an awm talo bawk nen. Sawma thlakhlel ber, lungmuang leh thin thi a, Muthilh chu kan beisei ve thei ta. Kan mu thla chauh a, tumah țawng zui peih reng kan awmlo. Lungmuang taka muthilh chiah ani kan duh leh mamawh. Reilote ah keipawh, ka muhil nghal mai niin ka hria.

.
Ka mutui lai chu, tu emaw hian mi rawn sawi harh a. Kan mengchhuak chu, ka lungdamna hmelțha lalnu chuan, minlo nuih var var a. A hmelțhatna chuan, buk chhung te chu akap eng phèt hian ka hria. Ilo va let leh hma zawk ve, zankhat lâi thang tur khan i insawi sia. Kalo beisei hauh lo che asin ka ti ringawt a. Ti rawh, i chhuak ang. Ka hrilhfiah dawn che nia. I țhiante hi chu ngaihtuah suh. I let leh hma chu, tui takin anlo mu mai ang ati a. Bûk kawtah chuan dingin, ka kawngah arawn chelh a, ka mur chiaih chiaih thei nia. Nuam ka tihna leh tih loh na a inzat reng in ka hria. Khawilam chu min panpui dawn ni maw. Min thlawh kan pui ta delh delh a, thui erawh kan thlawk lo in ka hria.

.
Muallungthu tlâng sang lai berah chuan, hmun nuam zet mai ah, lungpui lian em em hi alo awm a. A chung zawl pharh dup ah chuan, țumin țhut hmun kan rem a. Thlasik rim anam țan tawh bawk a. A vawt ve var mai. Vawt ti a ka in pawm khawr deuh chial chu hmu in, vawt iti deuh ani maw, kalo kuah lum ang che tih pahin, a hmeichhia zawk chuan, min han pawm teh chial a. A vawt lem lo e ti a, han tlawmngaih pawh ka tum buai peih lo. Ka tlawmngai phal ngang lo ani. Arim tui chèk mai chuan, min zem chiai chiai a. Dam man a awm in, hetiang em em hian nula țhutpui vangin, ahlim theih ang tih ka hre ngailo. A khabe chu ka darah rawn nghatin, min han thlek deuh hâ pah chuan, ilo țha amaw. Ka ngaihtuah lutuk che a, Chuvangin ka theihtawp a hmanhmawh in ka rawn let leh nghal nal nal ani. E taka hei le, i damdawi tur chu innghal rawh aw. I in vat loh chuan, Ni chhuakin ngaw huai ho sihpui lî a chhun fuh hun ah, i taksa hi che theilo in a awm anga. Muang changin i țawih ral mai dawn ani. Ni chhuah hma ngei a, rawn thlen leh hman tumin ka rawn hmanhmawh viau asin. He tui hi, in țawng chuan damna tuifim ani mai ang chu, i in hunah chuan, sazuk ki a tùr chuan, i lakah awmzia anei ve tawh lo ang. Mahse, a that theilo che tihna erawh ani lo ania. Huai ho pawn ilakah an dawi thil an hmang theilo anga, i khawih na ve thei tawh bawk ang. Mahse, an kut thlak na che erawh a chhan thei chuang lo che ani. I fimkhur ngaiin i fimkhur a. A hma aia ngaihtuahna fim pu in, i hmachhawn tawh dawn nia ati a. A thil ken chu la in kan en vang vang a. A pawl fim riai a. Ka en veng veng lai chuan, a chhin i hawn rual khan, in nghal pawp ang che. A rawng analh tluk zet khan, arim a chhe thung ania. A rim i hriat lawk chuan, i in thei lo mai ang ati a. A sawi ang chuan, a chhin ka hawn rual rualin, kan thawk khat pawp a. Tui lo veu veu tak ani. Luak chhuak leh lo tur a, ka insûm hram hram lai chuan, ng rawh le arawn ti a. A kut pahnih chu dah si in, a khawr zum deuh a, a kut hmawr lam chu ka kâ zawnah rawn dah in, tuisik anga fim, rimtui leh thlum tui zet mai hi arawn khawh luh tir teu teu a. A ai thlum tui kha ka ei kala hrelo.

.

Ti kha chuan, ka ngaih ngam leh ta e. Khawvar hma in, hun reilote kan la nei bawk a. Thil kalo kawhhmuh ang che. Khawi maw, i mit chhing lawk teh ati a. Ka mit chu arawn zût zauh zauh a. Meng rawh le, a tih chuan ka khaw hmuh chu, khaw èn lai aiin a chiang zawk mah mai. Ka hma a thuziak pawh pharh ang maiin, a chiang em em ani. He ram hi in awmna hmasa huai ho ram chhung ani a. Inbuk awmna hlui ațanga, mual sarih na ah hian, an awmna pûk leh sihpui lî chu a awm a. An sazuk ki bung pawh in, a tlan ber ani.

.
He sazuk hi in kah hlum theih phawt chuan, sihpui lalnu leh ngaw huai ho hi chu, kan hneh nghal ani mai. Ka pui theilo che u a. Hetia, ka kawhhmuh bak che hi chu, nangmahni theihna liau liau angai ani. He sazuk hi in chân hunah tawrhchhelna leh dawh theihna a pawimawh hle dawn a. Kah theihna hun remchang ineih ve leh, a bawpah kap hmasa la, chu chuan, a țuan ranna ati țhuanawp anga, a beng kawrawngah tak i kâp leh dawn nia. Chutiang anih loh chuan, i kap hlum thei lo ang. A taksa dang chu, kah nat theih pawh ani lo. A kî hmangin, i silaimu pawh alo khak per nalh nalh thei ang tih ihre dawn nia. Hei tuna in bûk ațang hian, in chhuk lama inkalna piah mual lehlam hi zawh chho zar zar ula, tlangdung khamphei in han thlen hun ah, ngiau kung lianzet lamah hian pheiin, tlangdung khamphei chu in zawh zar zar anga. Mual thumna tlangdung rawn inkhawhthla hi zawh chho in, sihhpui lî chu, hmun zawl dam dup hmunah, hai rualloh in alo tling lì kung mai ang ati a.

.

A thil sawi te chu, ram awmdan leh kal khân chenin, ka hma ah chuan khawih phak vel lekah hian, chiang takin arawn lang zel a. Mimawl ber tan pawh bo ngaihna awmlo tluk ani. Ti khan, i chungah ka in nghat ania. Fimkhur hle ang che u. In nunna atana hlauhawm ah ka tir lut che u anih tak ber hi. Hmun dangah in vak darh hauh tur ani lo. In vak darh duh anih chuan, kan ram lamah hian in vak dawn nia. Sa awmna leh tlatna chu ka kawhhmuh thei che a. I hma ah pawh ka rawn khalh chhuak thei. Mahse, a kah hlum erawh i theihna leh thiamna angai ve thung. Sazuk hi ilo kâp anih pawh in, a kî erawh i chang thei lo ang. A sa pawh ila tur ani lo. Alu i tan anga, muangchang hauh lo in i rawn kalpui nal nal dawn nia. Ka hnenah lo chuan a him dawn silo a. Keiman ka kawl anga, a aiah a phir pui a ki leh lam neitu an tih hlum tak. Amah ngeiin asik hlum. I hawn thei ang. An ki pêng khat tih loh chu danglamna a awmlo. I lo kâp thei ta hlauh anih chuan, he ram chhunga ramsa zawng zawng leh kei thleng hian, ita kan ni tawh ang.

.

Khua avar dawn ta. Kawl pawh arawn êng țan ta e. Nakzanah kan inkawm leh dawn nia. I hriat duh leh i zawhna te pawh ka hria, buk ah kir leh phawt ila, kan inhmuh leh hunah ka hrilh leh dawn che nia. Ti rawh le tih pahin, a ding chhuak a. A sam chhawl leng phe siau siau leh arim tui zet chu chhim vang vang chungin, min thlawhpui delh delh a. He nu zet hi chu ava țha chung chuang tak em. En reng chung pawh a, ennawn țul țhin ani ber e. Ka mit tlaina leh ka thinlung lawmna ani a. A bulah chuan, eng dang mah ka ngailo. Tuiral thei nita ila, farkhat te pawh ruh tur awmlo a. Luangral mai tur ka ni si a. Ka hlimna leh lawmna hi, nunna sawm chuang pawn ka thleng phal hauh lo ang. Bûk kawt ah chuan min han nghat a. Min nuih sak pah chuan, ka biangah arawn fawp zauh a. Ka chau zo ta, ka tukhum te chu ka chhip thlengin, a pâr chiai in ka hria. Ka kalsan rih phawt ang che aw, tukțhuan hmeh atan, varihaw va kap ta che, luite hi a hnar lam zawh chho la, hmun zawlah i han hmu mai ang ati a. Nui var var chung chuan, apil bo leh ta a ni.

.

Chutia ani ber akal takah chuan, ngaiin thlahlel hle mah ila, ani ngaihtuah reng reng a, khawvar tur thlir a, lo țhut lunglen tlawk tlawk chu, awmzia awm hek lo. Intih harh nan tuk țhuan tur buatsaihin rawngbawl ka țan a. Khawvar chian rual chuan, chawbel ka her chhuak chiah. Thiante thawh hma a, țhiani min hrilhna lam pan a, varihaw kah tum chuan ka thawkchhuak ta a.

.
Zingkar boruak thiang leh nuam taka, ram han chuan vel chu anuam in, ka harh sawng sawng mai. Kan riahna hmasa, ram serh ngaw chhung nen kha chuan, a boruak a in nawm hleih kher e. Kha ramngaw zet kha chuan, danglamna leh makna riau anei tlat ani. Chhun eng ah pawh, ngaw chhung pik thim satliah ang aiin, athim dan kha ani khung mai a. A boruak leh ami deh dan kha adang tlat. Tun ami nen hi chuan danglam tak ani ringawt. Ka ngaihtuahna bing mup mai leh kan thil tawn zozai ten, min bual ât deuh thual tawhna lakah ațangin, he ram hian harh tharna min pe a. Ka rilru bakah ka ke pen chenin azâng ta haih mai.

.
Luite chu thuilo te, ka zawh chho a. Kawrhte chep a, kal reng chu ka ning deuh a. Kawrte kam veilam ah perkaiin, tlangdung chho euh euh ah chuan, ka chho ta ani. Boruak nawmzia pawh ka sawi tawh kha. Sakhi han hûk pap pap leh sazuk han euh țhat țhat ri te chuan, beng a fan in, min ti phur sauh sauh hle. Mahse, tuk țhuan hmeh tur kah tum mai ka nih avangin, han pêl chak viau mah ila, țhian hmeltha-i varihaw min kawhhmuhna hmun chu ka pan zui ta zel a.

.
Asawi ang ngeiin, ka hma lawkah ka chhohna mual chu a pharh zawl tih hriat takin alo êng bik ta uar a. Vahrit thla khawng ri hlup hlup te pawh ka hre thei. Ka'n chuang chhuak chu, hmunzawl nuam zet, țin hnih hmun zet tur hi alo thelh hun mai a. Varihaw pawhin dak fan iak iak chungin, minlo thlir țhap a. An hmul de țhat mai chu, hmuhnawm leh nalh tak an ni. Mahse, an mawina lam aia ka rilru luahtu leh ka it zawk chu, an sa ani tlat. A nu leh apa, in hnaih tak a ding țhiang chu, ka silaimu siam chawp, musep ngei mai chuan kan kap dur a, Ka beisei ang ngeiin an tâl dun phar phar mai. A dang kap zui lemlo chuan ka pan phei a. Kan khai vel chu, an thau tih hriat zetin, a rit dun nalh nalh hle. Lungawi takin buk lam pan chuan, ka chhuk ta nal nal a.

.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:28 pm

Bûk kawtah, Puia a lo hawi vual vual a, iva tho hma awm ve. I silai ri ah khan ka harh ve chiah alawm le. Enge i kah a alo ti nghal a. Varihaw chu phawrh in kan theh thla țhak a. chaw ilo chhum vek tawh sia. Hei varihaw te ila han kâp hman leh nghal. Min tlawm chiang hle mai a. Kan mengrim tlang tawh sia, a awm alawm, inthlahrunna tur a awm hleinem. Ka kai tho duhlo che u anih kha kati vat a.

.
Kha, kan Sawma pawh a thlakhlelh em em tawng in, ala mut bawrh bawrh saw, a thawh hma in lo inpeih vek teh ang. A rawn harh hunah ka ngam leh awm silo. Khawinge, kan puah ange tiin, mei a chhem nghal a. Sawma chu rawn zik uan uan pahin, engmaw kan Pu'i lubuk a chuan, ilo sawi niah niah a. Ka harh tawh reng alawm. Engtiang chiah in nge, min ngainat ka hre chak a. I thusawi ngaithla in ka chhing der vel lek anih kha. Nizanah mangpui i mang ani pek ngei ang. Min pawm chùk chùk a, min kuah cheng cheng pah a, hmangaìhthu i hlan nuah nuah kha ka nia. I mang tih bo sak che ka hlauh vangin, ka dawh hram hram anih kha. Ka menrei phah erh alawm a rawn ti ta pang mai. Puia chuan nui pùt pùt chungin min rawn melh ralh a. Kha maw, a thawh phat ațang dawtsawi arawn țan leh nghal chat mai kha. Ama mangpui man min rawn hmehbel leh anih pek kha. Engtin mah minti lo e, in thlahrung suh. Min bawhbeh leh min kuah awm reng reng ka hrelo ania tiin, Sawma inphih harh tur chhuak ta chu, an au zui läng làng a.

.

Puia varihaw rawh chu, kan pawh pui sawt sawt a. Lo tive duh suh, a vah hah leh akah i tum tawh alawm. Sawm dawheh, țawngthei, țawngkam thiam a khan, rawn puah rawhse. A khabe sep thiam leh a lei vawrh vir ran ang zat zat hian, akut leh ke hi rang se zawng. Kan hahdam ve deuh tur ati a. Sawma chuan, rawn pên luh pahin, awmlo hlek ila, mi hi ilo rel hman zawt zawt zel mai. Nag hi alawm țawng hmang thiam zawk chu. I țawngkam thiam avangin, sazu kawng sial sa, chenghnih in i hralh a. Sakuh kawng cheng sawm iti a. Mau tlawna i hawlh kuak chawp mai mai leh nghal. Pu Thlawra lah sa rawp ta reng reng a hawi hrû hrû reng mai alo ni bawk nen arawn ti lut a.

.
Sazu kawng han hralh ngawt mai tur chu, ka nuih a za ngang mai. Puia chuan, vei tak che hian, i tih dan ka hriat leh min zirtir anih kha aw. Pi Kai-i pângbâl sanghal in anawr a. Ka chang hman silo a, țhângtê pawh ka dawh vek tawh. Sawmhnih in lei la, sanghal thau țha nelh nawlh, sûm ruk vel i lei ani mai. An thau zia chu, a hniak pawh amawm hlap thei asin. A pên tinah saum a hnutchhiah ani ringawt. Thenawm ten i sanghal saum rawn suah dil in, in kawngkâ te chuan, rik rawk, rik rawk ati tûk tin mai ang tiin, pu Thlawra i zawrh a. I sawi zawnga i mengpual vel leh i bân vai ten azir bawk a. Pu Thlawra lah khan, a silai hruk fai hlarh hlarh pahin, pawisa ape che a. Dâm veng hmeithai zu min leisak anih zawk kha. I rui lungpuam in, pângbâl chawh na hnuah vawk ke tin mau hmawra hawlin a hniak i siam chawp a. A hma a, anlo chân tawhna hnu i siam țha chawp bawk ani tih i puang leh a. Sanghal sa um a awmtheilo tiin, Kan nuih thler pui duai duai anih kha. Pu Thlawra zet khi zawng, Sawma hian a bum fing zolo. An nu pawn, Sawma i pu Thlawra hi bum fo teh suh. A hah phah in, kan Lo pawn a tawrh phah ania. Hlo hnimin buh a khum zo dawn tiin, a țah awh tawp che anih kha. An ti a. An pu Thlawr-a zet chu ka hmu chak ngei mai.

.
A hlimawm viau na a. Vawin lam chu, kan kal chhan ber pêl a, kan chhuah țan leh mai loh chuan, a sih dil tlan awmna ka hria a, kan han fang vel ang chu mawle kan ti a. Puia chuan, i zawlnu nen in inhmu leh tawh ami. I țha vek tawh tihna ani ang maw anti a. Nuih deuh sak pah chuan, țha tawh mah mah ani kan ti a. Sawma chuan, rawn hawi phawk deuh hru chungin, min hmuh tir ve teh. Ka hmuve chak ania, engtiang chiah a țha nge a nih a. Kan nula te a khùm reng em tih hriat ka chak a ni. A hmu leh hmulo chenin, an hmelțhatzia mawlh an sawi vul chûk zel si a. Beng chang a tlai a, mit erawh suangtuah phak loh hmuh tumin, avan ruai mai anih hi.

.
Tlak duah lo mai teh. Lasi nula te hi, țawngkam thiamna hmanga hmuh leh zâwl theih nise. chan tur kan neive nang. I kai kawi duah duah ang chu Puia chuan arawn ti leh zauh a. Min chhân leh hma in chaw ei ang u, țhiante siamsa biang puar pûng pûngin ei leh mai rawhse. Delh hlum sa eitum in alawm a mut burh burh ni ati zui zat a. Sawma chek tlak tlak chu kha, sa hi lo țhet ve rawh aw, mahse tem zo lo hram ang che anti zui leh a. Sawma pawh ani leh nilo ang in, a ngawi reng a. Nui vur vur chungin, varihaw chhum hmin chu a țhet zui ve mai bawk a. Kan pu'i lubuk a hi chu, ngam rual anilo, a ti zui ve niah niah ringawt.

.

Kan riah tirh ata, zan engzat nge kan riah hriat theih nan a, ka hnàng ulh thleh țhin chu la chhuakin, a zan rukna chhinchhiah nan kan ulh thlep leh a. Puia hnah la, lo lut chuan tiru, ei nghal ang u tihpahin, hnah chu aphah nghal mawlh mawlh a. Chaw khawrh in a lai a hawlh kua a. Sawma'n a sa țheh chu a rawn bun rui mai . A bawp lek larh larh pahin, a țhet tu chan tiin, a keih bawrh bawrh a. Nuih suk bak chu, engdang mah ngaituah lo in, kan eizui ta mawlh mawlh hlawm a. Puar peng pawnga kan eikham fel meuh chuan, ni pawh alo chhuak sang fe tawh mai. Kan silai te hru faiin, akua te kan han hawlh fai thuak thuak a. Rilru thar leh tha thar nen, sazuk ki bung tual lenna leh a nghâwng lenna ram. Vawk lal len a, alen na hmun chu panin kan thawkchhuak zui ta a ni.

.

Thiani min hrilhna ah zel chuan kalin, sazuk ki bung lu lak tum, val lungmawl pathum te chuan, hmalam panin pheikhai zang vahin kan kâr sauh sauh a. Kan hun tawn te avanga, huaisenna thar leh tumruhna sang tak nen, an mi rik ràpna avanga chawmawlh zo tawh. Pawisak leh hlauh nei tlem tawh tak te kan ni ta ber mai. Hlauh neih miah loh erawh thil hlauhawm tak ani a. Thil engpawh hlauhna chang hretu tan ahlauhawm loh tih hriat reng atul tih chu ka ngaihtuah rauh rauh a. Hlauh loh vanga fimkhurna hlauh palh lo tur a, rilru fim put reng ka ngai ani. Thiante pawh fimkhur tur leh sazuk ki hman thiam zia te, aki a tùr hlauhawm dan chenin, țhiani min hrilh zawng zawng chu ka hrilh pah mawlh mawlh a.

.
Ngaw serh ram chhung kan han lut chiah chu Sawma chuan, hetiang em em in boruak alo danglam ani maw, kan khaw lam ațanga kan luh khan, tiang em em in, a danglam nasa tih kalo hre hleinem, a boruak a ritin ami deh alo dang zar anih hi. Ka pik chùk in ka hria, ka chawmawlh muih mai. Beng te pawh a kiu rum rum thei alawm ati mawlh mawlh a. Puia chuan i sawifiah thiam hle mai. Chutiang chiah chuan ani ka awm, arawn ti bauh a.

.
Tlangdung kan han chuang chhuak chu, țhiani sawi ang ngei khan, hai rualloh in hmun zawlah, zuk sih lî chu alo tling pum mai. Dìl lianpui pawh lo awm se, mak kati hauh lo ang. A ramin azirin, hmuhnawm tham khawpa ram mawi ani tlat. A boruak erawh ami uap ana in, engemaw riau a, thinlung dek tu a awm tlat thung. Lung muang leh thawveng taka awm chu a har tlat a ni. A bik a siam niawm takin, hmun zawl pharh dup mai chu, ngal chen lek lek phul hring leh kawng thleng dawn dawn phûl dâwng, thli thaw in a chhêm fawn, in chhawk nghawlh dial dial te chuan, a tuam chhuak dap mai a. A lai takah chuan, hlam sawmhnih bialzet tur hi, mihring âwm chen vel athuk in aruam khuar bial kalh a. Tun hma a, dil țha tak awmna hlui ni ngei in alang. A ko tlang ah chuan, mihringte kutchhuak niawm fahran in, thing a ding kual țhap a. Ngaw chhung thinghmun, ngaw dur khup hnuaiah hetiang ang hmun mawi alo biru hi mak tak ani. Dil chungzawn lam phei chu, ni eng arawn lut ut mai a. Alai taka hlamthum bial vel a, tui lo tling chu, arawn chhun tle sar sar mai a ni. Rangkachak tui hi la hmu ngailo mah ila, a ai chuan, amawilo bik hauh lo ang. Chu sih, dil tui tling ramsa ten an panna kawng chu, ruam lama an luh thlakna, a thlur sung mai a. Phûl hring dup karah chuan, rawngvara, rawng dum theh ang maiin a lang chiang hle. Sawma meuh pawh, sawi tur haihchham in a ding kâ hau reng mai. Makti a thlir chu duhtawkin, dil tlang bial ko ah chuan, sahnu bih kual pahin, kan vak darh sang sang a. Kan inhmuh phak vek tho avangin, a ko tlâng a thing ding remchang kan duh ber chu, bêl in țhut hmun kan rem mai dawn ani.

.

Ruam chhungah chuan, thing ding engmah a awm ve loh avangin, a kotlang ațang eng sa pawh lut se, chiang takin kan hmu thei ngei dawn a. Sa hnu chu chiar satliah mai pawh nilo in, a chik phut durh ani ber e. Engtia tuman lo tlân lo nge a nih mak tak ani zawk. Ruam luh thlakna thlur thla seng sung zingah chuan, fehkawng tiat vel alian, bel hnum hlarh mai, sa hniak awm ve miah loh na ka hmu a. Mak kati in, ka ngaihtuahna ringawt pawn min ti mur sung sung thei. Sawma’n a hmu ve ang tih erawh ka hlau khawp mai.

.
Kan kual chhuak kan intawh khawm leh hnu chuan, sazuk ki bung chiah kap tur leh a dang reng reng chu, kan pang ti arawn nawk nâ nâ, anih pawn kah hauh hauh loh tur. Sazuk pawh kahna tur ka sawi laiah chauh khan kah tur ani. Kah a rem loh chuan, kah loh mai tur ani bawk. Kan thil tawn tawh zozai te kha hre reng ila, a theih chhung chu pumpelh hram hram kan tum dawn nia. Cho chhuah loh hi kan tum tlat tur ani. Sa dang chu kan awmna lamah pawh khan an tam ang, aneitu pawn phal takin pek min tiam bawk. Chuvangin sa dang reng reng chu, it buai hauh lo ila, sa dang in kah duh chuan, kan awmna lam ramah khan in pêl mai dawn nia tiin, kan chah nawn leh a. Kan duhna hmun țheuh ah i țhu ang u, a peih lo hmasa apiang buk lamah kan kir leh mai dawn nia. Tak a. Sawma rulpui kha, alo kal tak hlauh in, kap miahlo turin ka ngen che ania aw.. Tehreng mai, a sa in eive duh chuang hleinem. Kalo insum țang țang dawn nia tiin, anui var var a.
Kan duhna hmun țheuh, chu dil kotlanga thing dingah chuan kan țhu ta far a. Hetiang khawp a, sahnu chiar nasa si, ramsa hmuh tur an awm hauh lo erawh thil mak tak ani.

.
Dil khuar lai ah chuan, hnim leh phul ațo ve lo a, alai taka tui tling kam sir hlam hnih huam vel chu, sihpui tih takah a var khâwn eih uaih mai a. Chi tlang pawh chhar nawlh nawlh theih khawp amawi ani. Phul hmun zawl chin bak chu, thinghmun ngaw ni in, thing a ding thelh țhuau a. A chhung lam chu athim deuh khup avangin, thui ava hmuh theih loh. Boruak lum huam huam leh thli lum rawn tleh țhin chu tawrh har ber. Ka bek a thlan rawn luang chu hui kiangin. ka lukhum ka phawk a, ka hmai zar tu thomit chhaih te chu ka’n vai kiang a. Khawifung lah chuan, ka thlan tui al bawm in min vir hut hut reng bawk nen, Mawng a kham in, a ninawm duh takzet a ni. Ka dinglama Puia țhu, kei ang tho a, hmai lo zap lauh lauh chu kava en a, a ban rawn vai lauh lauh pahin, Sawma awmna lam chu a kawk zauh zauh a. Ka hmazawn dil kam lehlama Sawma țhutna lam chu kava hawi vat a, dil lam hawi vek a, kan țhut avangin, kan hnunglam kan hmu thei lo a ni. Chuvang chu ani ngei ang, Sawma ban rawn vai zauh zauh ka hmuh ruala, a hnunglam a, sanghal lian țha zet lo phei chu a hmu hauh lo tih kava hriat ni.

.
Dil lampan chuan arawn phei chhat chhat a. Sawma hnuai zawn athlen chuan, a hmu ve ta ani ngei ang, a ban vai chu tawp in, silai a lek kawh zui zat mai. A kap mai ang tih kalo hlau khawp a. Mahse, ruam chhung aluh thleng a, silai arik tak loh ah chuan, ka thaw ta huai huai a. Chu sanghal chuan dil tui chu alo thleng phei a, hawikual vauh vauh chungin, adai lut ta a. A lian in asei țha kher mai. Nghal rul ani tih ka hre thei. Tuiah chuan bawk in a let tup tup a, a fimkhur hle aniang a dak leh uau uau țhin bawk. Dil tui pawh a tet ang aiin, athuk hle tih a hriat mai. Sanghal pawh a kam sirah abawk pil lek lek tlat.

.
Ngaw lam ațang chuan, zukchal ki hreu bum mai, hi arawn chhuak phei ve bur bur a, sir dang ațang sakhi an rawn chhuak nak nak bawk a, an rawn tlan dawn țan ani ngei ang. An hmuhnawm in, han sai thluk nghauh nghauh atan itawm tak an ni. Zukchal rawn hnai ber pawh hi, ropui bèr bêr tak chu ani. A ki pawh akaptu tana in chhuanna tham chu ani hrim mai a. Mahse, kan tum ber erawh ani silo. An rawn pung zel a, a țhenin phul hnim an pet a, țhenkhat diltui in in an ding fur bawk a. Hetiang em em a, ramsa chi hrang tam hi țumkhat ah kala hmu ngailo, ka hmuh leh pawh ka ring hek lo. Hmuhnawm ti zet a, khabe dawm meuh a, ka thlir vang vang lai chuan, ka mitsir in, Sawma ban vai ka hmu a, ka hnuailam en tur in, milo hui lauh lauh chu niin, ka'n hawithla vat a.

.
Ka hnuaiah chuan, keipui lian zet mai hi, alo vak zul zul mai. Ka hmalam hlam sawmhnih vela, sakhi hnim pet lai chu alo veh niin. Ka awmna hnuai vel phul sang deuh bik chu phen in, bawkvak hian alo tawlh hrauh hrauh a. Alian in, a sei țha zet zawt khawp, sum sarih tualleng chu ani ngei ang. Alu ațanga amei hmawr thlengin, feet kua ai tawilo tur anih ngei ka ring, min veh tur a ka duh loh ber te zinga pakhatna, ani hial ta ve ang. Min hmu ve lo ta chu, lungmuangin ka chhuk thlir ta veng veng mai ani. A chet dan vel han hmuhnawm zia chu. A hmu ve ngei t'u hnenah lo chuan, hrilhfiah thiam theih pawh ani lo ang. Thawk leh khatah, thalfang ang maiin a dawk chhuak zawk a, an inhnaih thawkhat bawk a, thui a um lo. A man ruala sakhi mangang han hùk țhat ri chu, azuai raih raih a. Ramsa dang tlanchhe chum chum te chu ngaihsak lo zetin, kan kalna lam ngaw ah chuan zawhte in, a sazu man a pu ang mai hian, awlsam zetin a pu thla ta ngawk ngawk a.

.
Tang ru deuh țeuh a, lo thlir reng ka nih avangin, ka thaw huai huai mai. Khatiang thil hlau khan anih dawn kha, fimkhur leh ți hrù a, an rawn chhuah hlawm ni. Mahse, chiai ve miahlo pakhat a awm, nghalrul kha ani. Rawn hawi chhuah vung vung bak chu, che châng hauhlo in ading ngar mai a. Keipui tan pawh zuamawm tak zawng ani lo reng a. Thiani ta ka kah sak nen khan an intluk thuak in ka ring. Muangchangin a inher a, ngùk hruih hruih pahin alo kalna lam ah chuan, ngaw chhung lampanin a kal ta ngauh ngauh a. A ngèng hmel vuau vuau khawp mai.

.

Ramsa han bo duak leh ram reh vawng mai chuan, lung ati leng hranpa lo na a. A khawharthlak vawng vawng mai thung. Chhun pachang tih takah. thingkung hlim kara awm mah ni ila, a lum duh hiam huam khawp mai. Ka ning lutuk chu chhuk lawk a, haw nal nal mai ka duh rum rum tawh. Haw phawt a, zanlama chân leh mai tur em ni aw ti a, ka ngaihtuah vang vang lai chuan, kan riahna lam ruam ațang chuan, sakei hur arawn hram ta dum dum mai a. Minti phuzawk țep alawm le, nichin ami kha chu anih ka ring chiah lo a. A nu anilo tlatin ka hria. Anu hur pawn, a au thleng rang khawpin ka ring. Mak ka tih zawk tak chu, Chhun pachanga sapel a, arawn chhuak kha a ni. Sa awm duhna leh awm hunlai alo hre țhang tawh ani mah na. Sakei hi chhun pachangah hmuh mai mai tur an awm ngailo a, tlailam leh zinglam hi an sapelh hun ani tlangpui tiin, kapu khan min hrilh țhin a. Mahse, hetiang ramreh, sa tamna ah hi zawng hmuh mai pawh thil awm lo ani lem lo. Min hmu hmasa ni se, kan hmu bik tawp nang..

.
Sawma chu a chânna hmun ațang a chhuk a. Ka awmna lam pan chuan, arawn phei ta nul nul mai. Ka hnuai a rawn thlen chuan tinge, i ning ta deuh emni kalo ti a. Ka peih zâwng ani lo. A lum ropui si, sa dang kah theih siloh, chilputa țhut tui hluam reng ka ning. An lo chhuah leh zawngin, ka insum thei tawh ngut lo ang. Bûk piahlam ramah khan kalo zuk vak teh ang. Mal no dang te pawh ka tawng fuh ve mahna. I zawlnu pawhin, minlo duh zawk thut thei asin ati a. Kalo ning sa ve tawh bawk nen, keipawh haw rih chu ka pawiti hauhlo ka ning riau mai. Duh leh zanlam ah châng ta zawk ila, ka beisei zawk mah mai tiin kalo chhang a.

.

I thikthu a chhiat hi le, ka chhuhsak che ihlauh vang ani zawk lo maw ti chungin, anui hak hak a. Kan pu'i lubuk a pawh chu, ava țhu rei peih ngel ngul ve mawle. I hmuh phak chuan han zaizir teh.. Anti zui zat a. Han in auh lung lung chu tih chi hek lo. Theih tawp tawpin, ka bân chu ka thiam dan leh alo hriatthiam theih tur awm a, ka rin dan dan chuan, ka vai lauh lauh a. A hrethiam ani tehchek ang chu, kal turin min vai ta lauh lauh a. Keipawh ka chhuk a. Sawma chu zuiin, bûk lampan chuan kan inchhawm thla dun hnak hnak a.

.
Kan kalna ngaiah bawk let thla in, kan chhuk zar zar a. Kawn khamphei kan zuk chuan chhuah leh chuan, Ramsial hnu kan hmu ta mai a. A rual hnu ngei niin, sawmrual ai tlem lo chu ni ngeiin alang. Kan vawikhat hmuhna mah nise, hetiang ram rilah, tu khaw sial mah an tla hauh lo ang. Kal lam khan kan hmuh loh dan ah, kan kal hnu a, rawn paltlang ngei anni tih an hnuhma thar dan ațang pawn a chiang em em ani. Thuilo te chu kan han chhui zui a mahse, sihpui dil lam chu an pan ni a, alan takah chuan, i kirsan mai teh ang. Hei ram serh huam chhung an lut leh tawh si a. Kan kâp ngawt thei dawn chuang lo tiin, kan let san ta a ni. Puia chuan alo hmu bik ngei ang le. Kâp lo turin insum thei tak maw kati a. A insum thei lutuk ang, pa ngawh ngawl tak mai ania, atih leh tum tawh chu, ti tlut mai chi ani. Ngaihtuah duh suh. Sele te pawh akap tawh alawm. Keichu, ni ila ka kâp duh ngei in ka ring, tihpah chuan anui vur vur a.

.

Ka hma a, kal Sawma chu a ding chut a, a enna lam kava en phei chu ding suh tihpahin, ka nem kal dawt dawt a. Hmu lo der ang che. Minla hmu ve lo hlauh anih saw. I en vaih chuan min rawn pan nghal dawn ania. Pahnih an ni leh nghal, kan che fuh hauhlo ang. Ti khan, hmulo ang hmiah in kal mawp mawp rawh kati a. Khai aw., kalo kal hmasa kher chu avan pawi tak ti nung nung chung chuan, phûr lo zetin a kalve hmawk hmawk a. An hriat tur ngei a, țawng lâwng lâwng chung chuan, Sawma chu ka be mawlh mawlh a.

.
Kan hmalam, kan kaltlang ngei ngei na tur ațanga ft50 pawh tling țha țhum lo turah chuan, thingluang sira sakei inpawl lai kan hmu ani. Thingluang chu an hmalam ah a awm avangin, an zâng pawng chu alang chiang hle a. Ka țawngri avang chuan, an lu rawn dak chhuak in, min rawn thlir vauh vauh mai. Keini lah in, an awmloh na lam chu, harsa ti zetin, kan en lui hram hram a. Mitsir ru zauh zauh chung chuan, kan kal ve zel a. An zawn kan thlen phei laia, ka rilru hah leh ka țang lutuk chu, ka thlan bawrh bawrh thei nia mawle. Kan han pelh tak ah chuan, lungmuang huai awm tak ka nìh vei nen, ka tukhum chu a hit chuai chuai mai. Ka mawngza lutuk pawh kal ti harsa tham zet a ni. Kawia kan liam takah chuan, kan dinga kan thaw hlawi hlawi mai. Zalo zetin kan han nui leh rih a.

.
Sawma chuan tinge, khatia hmulo der rawh itih a tiin, min zawt a. Sakei inpawl lai chu en hauh loh tur, an thinrimin an rawn pan ang che nga. An bei nghal mai ang che. I hmu anih pawn, insaseng na hun a awm tawhlo anih chuan, hmulo ang hmakin, kalpelh mai tur ani. Mi anti buai ngailo. I hmu tìh an hriat erawh chuan an rawn bei mai ang che. Hmu lo ang a, kal pelh mai a him ber tiin, kapu in min hrilh ani. An thikthu a chhia te pawh ani ve mahna, nangpawh i nupui nen, nupa nun in hmanlaiin, rawn bih dùk dùk che se, i duh bik dawn em ni. Uichal takngial pawh an zahawm rùm mai lo maw, kan ti a. A nih ve hmel riau tiin, anui hak hak a. Kan fimkhur viau chu angaih hmel in ka hria. Kha, se rual hnuhma te kan hmu leh nghal a. Khami beisei khan, an vir hnai mai awm si a. An aia lian zawk pawh kan la tawng maithei ania. Sapui te hi chuan mihringte hi min chung enin, min zah viau a. Keipui riltam pawn, hliam atuar emaw, atar chak tawhlo emaw anih ngawt loh chuan, mihring a seh mawh khawp. A seh tawh erawh chuan, ramsate aia man nuam zawk kan nih vang nge, kan sa hi atui viau ni. An zawng chhang ngei ngei thin. Fimkhur tluk a awm thei lo. Sahràng (sakei) kah chu, kut a chawl duh e tiin, pipu ten anlo sawi thin a. Pasalțha sakap thei deuh pawh hian, loh theih loh a, an kap anih pawhin, an kah thu hi an zep tlat țhin. Mahse, chu chuan mihringte tan hnawksak a khawsa te a huam tel lemlo anih hmel.

.
Alo nih chu mawle, keizawng ka hlauh luat avang zawk hian, kah thâwr mai hi ka duh asin ati a. Ti teh hei bûk pawh kan hnaih ta ințhen ila, nî tlak rualin bùka in hmuh kan ti ani ang chu. He ram hi, i han chuan ve teh reng ang hmiang. Lungmuangin kan vak thei alawm le. Fimkhur la, nghovar rawn hawn ang che tiin, kan inthen a. Mahni tlat tlata tla turin, kan inhnungchhawn ta ani.

.

Keichu, bûk ațanga ram lam mualah, leh luh thei turin ka kal ta a. Sawma erawh inlam pang ram ațanga buk pan zawnga kal turin, aliam ve bawk a. Tukloh ramngaw tihtakah, ngaw hnuaia han vahvel chu a dai nuamin, aram a pharh țha si. Tlangram mah nise, hmun awih bak bahai lutuk awmlo in, mual te chu lei tak sakhal, chhuk euh euh leh chho euh euh niin. Hmunzawl ram pharh chu atam zawk ani leh nghal a. Sairual pawh hmu ila, awmlo kati hauh lo ang.

.
Ka ngaihtuah ruk ang deuh tak tak in, saitluang ka pawh hlawl mai a. Sawmthum rual vel lai an nih ka ring. Mahse, an hnu erawh a thar lutuk tawh lo. Ni hnih thum vel liam ta ami ni ngeiin alang. An mau pawh sawp leh, thingzar pawh tliah te chu pui tak ani. Saitluang ah chuan thuife ka kal a. A pachal kal hrang, a awm ni ngeiin alang. A pa dang angam lo pawh ani mahna. Ka duhtawk saitluang ka zui hnu chuan, bûk pan zawngin, angil thei ang ber tur chuan ka kal pen san ta a. Varihaw, vahrit, varung, ramar, vahlah chenin, ka pal darh lo chauh ani ber e. Han man theih em zawng an ni bik lo. Mihring an hmu ngailo tih a hriat in. Min hlau hranlo khawp mai.

.

Thing hmun chu mau in, alo pawlh ta zauh zauh a. Ka veilam hlam sawmhnih velah chuan, khâm chhia a awmve ni ngei tur ani. Lunglian tak tak te kava hmu thei a. Tlang bâwk inkhawh chho anih ka ring. Chu mi hnaih zawng chuan phei zelin, ngaw chhunga nizung rawn in kâp lut ațang chuan, khua atlai tawh leh tawh loh kan thlir vang vang a. Ni chu ala hniam lutuk lo niin ka hria. Ka hma a, Sawntlung pawngah chuan țhut hmun ka’n rem a, Ka dumbur la chhuak in, ka vaihlo chan sa chu ka zial nuap nuap a. Ka meitalh chuan la kaiin, ka zial thiam ve dan ber, tawtawrawt deuh ùt mai chu ka fawp ta vang vang a. Chaw ka fun loh avangin, kalpah a thangțung ka kheh chu, țam hnem ah ka ei malh malh a.

Thil ri deuh hlup hlup thawm hi ka hre leh zauh țhin a. Vahrit thla khawng ri aniang tiin, ka ngaihsak vak lem lo. Sakhi tal kah tum ila ațha ang, a chek ei pawh a chakawm leh tawh alawm le, ti rilru reuh reuh chunga kal siamin, hmalam chu ka pan leh thauh thauh a. Pen sawm lo liam kala kal awm lo ve â, Ka hmalam mautlawn tluk thum awm vel ațang chuan, tawtawrawt ham rik ruai ruai ang mai hi arawn ri chhuak a. Ka lampan chuan arawn ri phei ta ruai ruai mai, maupui te chu apuak ri pawp pawp mai bawk. Kala hriat ngailoh thil anih avangin, ka hamhaih chu kan ding ren rawn a. Ka hre chhuak ta, a rang arangin, ka piah lawk lungpui awmna lam chu panin, chak mangkhengin ka lim phei ve ta nghal a. Ka mitsir in ka hnunglam sir deuh a, thildum lianzet rawn khat phei mup mup chu, kava hmu a, ka van mangang tak em.

.

Lungpui lian deuh melh chungin, theih palingkawha chak in ka tlan zel a. En mai aiin, manganga tlan e, tilo chuan alo hla hrep leh nghal, tlanpahin ka ruang pherh leh bung neihnuaih ka thianten, men pìr pér chunga an han hlawm tur hmel chu, ka mitthla chuai chuaih a. Ka hnunga mautlawn arawn palthluk ten min vuak thelh thuak thuak chinah phei chuan, ka mangang tawh takzet ani. Han chuan kaina mai tur, lung lian tham alo vang bawk si. Thil pakhat ka hrechhuak, rang zetin dinglamah ka tlan peng vat a, ka hnunga chawhmeh lianzet chuan, min rawn pel fua mai. Thaw khat aveng ta. Mahse, muangchang thei ka nilo. Hram ruai ruai chunga ka lam arawn pan leh lai chuan, lungpui mam per pur ah chuan, ka ding ta vang mai. engtin nge ka lawn theih pawh ka hre hman biklo. Nakina ngaihtuah ah dah ang.

.

Ka thinphù su dup dup chu, a ri aring duh ngei mai. Ka taksa ațanga, rawn zuan chhuah tum ang mai ani. Manilo mah a, chak leh huai intih ruk ve tehreng nen. Chawhmeh hlauin tiang em em a chak hian ka tlan chhia ang tih ka ring phak lo. Chaw hmeh liana chu, a nawn van vawr zawnga dahin, arawn hram phei ruai ruai a. Ka thinrim lutuk chuan, ka silai chu ka lek kang a, kah mai tum a, a cheng ka kau rual chuan sai padawp ani tih ka hmu ta ani. Mai mai chuan, kahna chhan tur ka nei talo. A sa lah keini pathum tan, atam lutuk tlat. A ngho ber a awm siloh chuan, kah man a awm dawn tlat lo. Ka bul a rawn thlen chuan, alian hle tih ka hre chiah ani. Ka awmna lungpui nen chuan, an inchen thuak a, a nawn chuan min rawn hawl phak lek lek lehnghal. Min tlan hel thut thut a. A beidawng ta niang, Hram ruai ruai chungin, alo kalna lamah alet phei ta nul nul a. Ka thaw huai huai mai. Chauh vanga, lungmuang tak a, țhuthmun ka rem chiah tih chuan arawn let leh ta tlat mai.

.

Thingtum malpui tiahzet, hlam thum vela sei tur hi, arawn lek kawh a. Chhei khaw raw. Min rawn hawl ta fua fua mai. Chu sai zet chu, rapthlak kavan ti tehreng em. Tiang em em hian afing ang tih ngaihna ka hrelo. Ka mangang ta takzet mai. Vawin zet chu, ka thihni ani dawn em ni. Hetiang hrim hrim chuan, rei ka bum reng thei hauh lo ang tih ka hria. Engvanga tiang em em a kawlh nge anih. Sai padawp hlauhawm zia ka hria a, hmanraw thawh meuh a min han beih takah chuan, ka nunna kala hlut ve si a. Țan ka khawh ve mai angai ani. ite pawn, a kawtawp ah chuan bawppui tla hlawkin ati ani lawm ni. A chunga ka zahngaihna hre duh map lo a, min hawlh thlak la tum tak fan mai chu, ka ngaithiam reng thei biklo. A huai zawk leh thei zawk din channa khawvel hi, i chungah inchhuang leh thei inti taka hman ka duh lo asin. Ka mangang tawh leh a kaw tawpa țang ka nih avangin, ka țawng mawlh mawlh ani tih pawh kalo inhre pek lo a.

.

Chutia, min rawn hawl thlak a tumna thingtum bum a, zuan leh kun reng chu, ka ning in, ka chau țan ta deuh mai si a. Ani lah tùt ruai ruai chungin, bawngnote thaza ang mai in, a lim kual reng mai bawk si. Lehlam ațanga min hawl leh tum a, akal kian leh chiah chuan, a beng chilh in nge ka kah ang, a chaldarah tiin, ka tin vang vang a. A bengchilh in kap phawt ila, atluk loh chuan a chaldam ah ka kap leh ang tih rilru pu in, ka silai chu kan kau a, kah thelh chi ani lo. Hlam hnih vel bak kan karah a tla tlat lo. Ka silai cheng ka hmetper țep tih chuan kap suh, han tih țhat ri hi ka hria a. Ka’n hawichhuak chu, ka țhian hmelțhai rawn lèng phei dalh dalh chu kava hmu a. Eng țawng nge ka hriatthiam hauh loh hian, arawn rak phei nawk nawk a. Ka hnuaia sai pawh chu, a ding ta ngur mai. Ka awmna lungpui chungah chuan rawn țum in, i țha maw tihpahin min rawn pawm vei thuak thuak a. Ka thinrimna so bulh bulh chu leih mih ang hmiah ani leh ta.. Khatiang khawpa hlau thlabar leh mangang, thinrimna sawifiah thiam rualloh in, a bawm khah ni si kha. Nula hmelțhatna chuan beng daiin, thlamuanna leh hlim veng veng na in, arawn thlak thleng leh ta ani.

Sai padâwp chu hmachhawnin, hei hi ka țhian ani a, I ti na tur a nilo. Thah che aduh loh avangin, ila dam mai mai anih zawk hi, khawihmunah pawh hmu la, iti buai tawh tur anilo tiin, an zilh hau ta a. Sai pawh chuan, hrethiam niawm takin, abeng phu hlup hlup khawpin, a bu ve nghut nghut mai. Ka lam rawn hawi leh pahin, i țha takzet maw,, arawn ti leh a. Ami ngaihsakna awka leh mangan hmel taka min han thlek vel chu, ngaih țha in kalo thlir veng veng a. A țhatzia hi sawi thiam chi ani mawlh lo. A duhawm zia lah hairual ani heklo. Mithi te pawh kaitho thei hial tur khawp a mawi ani. A sam bu chhah țha zet, dum tle siau leh ngil sang mai chu, hui khawmin, a tukhum vun no ser sawr leh a nghawng var hai mai ti lang chiang tur niawm fahran chuan, la chhum sendang angtak hian, an țawn khawm a, chuta kalam hawi a, arawn nui saih mai hmel han țhat zia leh a biangsum inhmehzia chu aw.. Thatna leh duhawmna zawng zawng beh khawmna ava ni chiang em. Ei theih nise, ka eizo rang ngawt ta ve ang. Tirawh le, lo rum țhaih tu che chungah hian chuangin, phulah ileng dun ang hmiang, khua pawh ala tlai hleinem, tun ang hun hi a ram mawi lai ber ani a. Nangnen a thlir dun hi ka duh ani tihpahin, min han ngaih melh ralh a. Ka lungphu a rang leh zo ta. Hremhmun thleng pawn ka zui mawlh ang che ti rilru chung chuan ka silai chu ak in, ka ipte chu hnunglamah kan thèn chhinga, sai padawp nghawng chum buang mai chu, tihfai tum ang hrim in, an zut kual hliau hliau a. Chuta kan han țhu ta chu alawm, sai vun thap hmel pui si chu, a thau zawng zawng a sâwk khawm emaw tìh mai turin, lapua ang mai a dup leh nelthep alo ni roh a. Ka kapkarah sir zawngin, arawn hmeichhe țhut a. A pawnfen chhingin akhuh phak bak, a malno var hai mai leh, a khûp bil mat mai hnuaia a chawn mam leh zuih nalh tak te chu ka enkham thei lo. A hnunglam ah ka ban dinglam kanla vet a, veilamin a malchung hrula dul thep zaih mai hrutin ka pawm ta chial a. Ani pawn ka kawngah kuahin, ka awmah arawn bei ti tih a. A rim tui lutuk chu, ruihtheih nise, pit dawr tiah pawn meng tur ka awm lo ang.

.
Sai kal dan zulzui a, kan buk dun ngak ngak pah chuan, ka'n chhuk thlir a. Nui sen sen chunga min rawn chhoh thlirna mitmeng paw chiai mai leh, a hnar ngul invuah mawi lutuk rem tur a, a heh sen vam hiam mai kara, aha var rual nalh zet mai, lo lang te tak chu aw... An awm hmun tur țheuh ah, a siamtu hian a thiam tawwkk bakah, tlem belhin Uluk mangkhengin arem khawm ani ngei ang. A ai țha hi asiam leh thiam tawh in ka ring heklo.
Ka mit la tu dang chu thlir thla zelin, a awmbawr var hai mai kara, thlemna puk var thim zimte chu, ka hawisan thei lo. A pang lehlam lehlam a, a pangkai bawr hmatheh, lo kawh pir vah mai. Zuanchhuah chak awm fahran a, chhing kawh lah, sen no chek mai chuan, ka mihrinna rilru kaitho in, a pangti lum ther ther min si chial tu nen chuan, ka kawngbawr hmalama ka dolung chu cho chhuakin, a zingtho hlim tui hmuam hnem țan ta țâuh mai. Heti chuan adik dawn lo. Hmeichhe robawm ka kar hawnna tulung hi thunun vat angai ani. Chuti lo zawng ka mualpho palh hlauh ange.

.
Ka rilru hruai pen nan, ka’n hawi chhuak a. Phul hring cham durh mai ah kan lo chuang chhuak tawh niin, tlailam nitla tur dul ruih hnuaia phai ruam leh tlangdung inkhawhte, luikawr ruam, chhumin a bawh chîk chêk te chu avan mawi tak em. Ni tla tur sen riai in, a kah en phul hring bu siau siau mai kar a, thlifim in min han chhem tak heuh heuh ah chuan, ka ngaihtuahna pawh adang zo ta. Rimawi ngaina lo tan pawh a, han zai vawng vawng na tham khawp a rammawi ani. Lunglen hre ngailo tan pawh ngaih tur zawn chiam na tham khawp a lungti leng, pialral kawtchhuah niawma mawi ani. Engdang tudang ngailo a, hlimtaka kan nuih har har lai chuan, khua pawh alo tlai ta. Sai chu thu pe in, kan buk lam panin akal tir leh ta ruau ruau a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:28 pm

SAZUK KI BUNG.6

By Hriata Tea

Awle, he tlangdung hi zawh phei zar zar la, inbûk awmna mual kha i pawh phei mai ang. Zanah ka rawn tlawh leh ang che. Taka, eng sa nge i kah duh anti a. Duh em em pawh ka nei hranlo sakhi te kan pel haw mai mai ang chu kati deuh kan ti a. Sakhi zawng i țhianpa in a kap alawm. Tlang dung tawpah hian kawrte alo awm anga, a kam zawl changel hmunah nghalchang alo awm mai ang. I phû bawk a, va hlawhtling mawlh ang che ati a. Nui var var chung chuan, min liamsan leh ta a ni. Khawhar ru veng veng chungin, keipawh tlangdung chu zawhin, buk lam ka pan ve ta a.

.

Kalo in ngaihtuah nasa deuh aniang, sanghal han nguk deuh hruih hruih leh changel che laih laih ka hmuh takah chuan, țhian-i sawina hmun ka thleng tawh tih ka hre chhuak a. Ngaw chhung thim deuh ruih tawh avang chuan, kawrte kam zawla changel hmun phei chu athim zual bik hle a, ka sihdet chu la chhuakin, ka silai nen kan hmehbel vat a. Changel kung chetna lai zawn chu, kan chhun èng a, engmah ka hmuh loh avangin, ka chhun kual pap pap a. Hmunzawl chu kalpelin, kopang lama akal chho mek chu ka han chhun fuh a, ka light eng avanga arawn leh hawi, mit de rial mai ka han chhun fuh rual chuan ka'n sai pawp mai a, a hawk dawt rual a, a rawn rik thlak tâk buan buan ah chuan, silai zèn khu avangin, engmah hmuh theih hek loh, fimkhur thu hlâ ah, zuan sawn dawrh pahin, ka silaimu chu kan thlak vat a. Thing phen ațang kava chhun éng leh nghal zat a. Nghalchang chu hmun zawlah alo lum thla niin, thawh tumin alo inleng uaih uaih a, a ke hmalam hmanga arawn ding kang țan mek chu, kava kap nawn leh sak a. Nguk hruih hruih chung chuan athi tur chalchang chu, aleng ta ut ut a. Ka silaimu chu ka thun leh te te a. Muangchangin ka pan phei ta a ni.

.

Nghalchang hlauhawm zia ka hrechiang tawh a, fimkhur tluk a awm thei lo. Ka’n bêl chiang chu alo chat fel der tawh. Hmun rem fai laiah ka hnûk sawn a, alian țha bawk a arit kher mai. A ngho lawr var vauh mai chuan, min ti hlim hle bawk. Mahni chauh a han put ngaihna awm hek lo. a lu ka tan a, Sapui zah atan ka chhawl chhin ve nial nual a. Bûk lam ka pan san ta ani.

.
Bûk pawh alo hla lo khawp mai. Sawma chuan, a sakhi kah alo rawh zo chiah a. Enge ikah dup dup a tiin, alo nui țhen țha a. Sanghal alawm mawle, Puia hi alo la thleng thla lo ami tihpahin, sanghal lu chu kan phawrh a. A châng tui deuh aniang, pa ngawltawt ngang hi ania. Ngaihtuahawm ani lo ang. Ekhai,,!! avan chal riu riau ve, alian awm hle mai kati tihpah chuan, a lu chu an kuai let a. A ngho kha kala chhu bil hauh lo ania, a zût chi loh ang aw kati vat a. A sakhi rawh zawh hnu chu kan chan mawlh mawlh a, eirel pahin a rèpna kan siam zui nghal a.

.
Sa te kan rêp fel a, rawngbawl te kan peih tak diam hnu chuan. Thing chu buk bul mai mai ah pawh fawm tur atam tho bawk a. Ka sanghal kah kha, iva chan dawn ang hmiang. Puia lah ala rawn thleng chuang lo bawk a. Nghah pah fawm in, a hla lem lo in ka hria, iva la teh ang ka'n ti a. Ni e le, iva kal tak ang hmiang, hetia lo țhut tlawk tlawk reng ai chuan anuam zawk ang tih pah chuan, phùr hmel takin a tho vat a. Ipte puiah chemtum leh light kan ak a. Silai chu hnawksak leh minti bawr mai mai tu anih dawn avangin, keng talo chuan, meichher kan chhi phei hluah a. A ril hai huna, light a in èn reng ngailo turin kan ti a ni.

.
Kan va thleng phei chu, ka chhawlchhin ve nate chu alo in hai let vek mai. A ril baw nuaih leh abawp hek huam bakah,alu ka tanna pawh alo hèk then nual bawk a. Khai aw, kan sapui nupa te chu, an va huangtau in, zah anva ngailo ve mawle.. Kan thâwm ah an in sa seng lek anih dawn hi.. Silai lah kan keng der silo a. Fimkhur angai deuh dawn a ni. Ti teh i chan vat vat teh ang tihpah chuan, ka phawk nghal bawrh bawrh a. Ka chan darh zo țep tih in, Sawma chuan ngawiteh hei chu, vawina kan sapui hmuh te nupa kha an-ni hauh lo ania. Sairal hnu ani tlat mai, han en chiang ve mah teh a rawn ti a. Kan piah lawk lei hnip lai, alo bih vung vung na chu panin, kan enchiang ve vat a. A nih chiah hi mawle, ke zungțang hniak panga anei kalh tak alawm.. A țha dawn hauh lo mai. Tunah pawh min thlir reng awm si a. I phei vat zawk teh ang. Keini, duh khawp zawng atam hleinem tiin, a thin phel leh alung bakah aril tlem nen, a bawp pahnih leh a dar kan la bawk a. A bak zawng hi chu, i hnutchhiah mai teh ang. Min tihbuai zui loh phah mahna tiin, kan let san ta nal nal a. An-ni khan kan che vel kha min thlir rengin ka ring.

.
Bùk kan thlen chuan, kan rêp leh nghal sawk sawk a. Puia lo nghah pah chuan, a vun chu tuiso in kan leih a. Kan pawt fai mawlh mawlh a. Ril pawh ațam ta rai'h rai'h khawp mai. Kan in singsak zawh chuan, thing kan han fawm khawm leh zung zung a. Puia chu ka rinaiin a peih rei phian mai, ril ațam tawh si a. Kan lo eisan mai dawn mi niang. Pawilo khawp ang, keipawh ka riltam viau asin. Ilo ei mai tak ang hmiang, engtikah nge alo haw dawn a hriat siloh a. Kan lo inhrek reng ringawt a, ani pawn tinge minlo nghah duh ati tho ang tihpah chuan, Changel hnah a phah nghal sawt sawt a. Varihaw kan zing ei loh zawk, kan hem hmin chu, ka țhet mawlh mawlh a. Sakhi chek tak țha ngeih ngawih nen, insút hliam hliam chungin, kan han ei dun ta tak taka, ril ațam tawh bawk nen, thlan tla hluam a, han ei meuh chuan, apuar thei pang pang khawp mai. Savun ip nge nge chu, thun hnem alo dawl khawp e. Thut a har duh deuh mai pawh a.

.
Bùk tualah sarep pahin, zial kan pak talh talh a. Sawma chuan khawinge, pumpui sawh rem nan, thing kan fawm ange ati a. Kal hla lutuk suh aw, fimkhur angaih kha, bengtawia te kha, an awm hla lo tur ania tiin, kan au zui a. Puia pawh chu, engtizia nge maw chen chen le, zing chaw bak a ei silo. A rilte pawh ațam ve tawh em em lo em maw nile tiin, Ka ngaihtuah rauh rauh a. Thian-i ka hre chhuak zawk mai, kan buai phili vel avangin, kalo hrechang hauh lo thei chu mak kati zawk hial. A hming pawh zawhna chang reng reng ka hrelo nia. A awm ve bawk tho e, abulah zawng ka kâ a chih zo a, ka sawi tur theih nghilhin, ka zam chhe der zel ani si a. Tuna ka nihna ang hi, ka ni tawh ngai tlat lo. Maimawm ril pawn min thlung se, a duhna hmun hmunah min kai dåwr dåwr thei ang chu, ka talchat zo pawn ka ring nek lo e. Han țang zo tur eih ka awm lo tawp ang. Engtikah tak rawn lang leh ang maw tiin, ka ngaihtuah veng veng a.

.

Sawma thing rawn keuh rik rùm rùm ah chuan, ka harh zawk a. Puia chu alo la haw na nge arawn ti nghal a. Haw lo, hei ka rinaiin arei ta phian mai, ka ngaihtuah riau a niii. A awmna hmun in zir se chu, ka ngaih ngam zån thei a. A awmna hmun avang khian, rilru a khing bài tlat. Ngaihtuah vak duh suh, a in enkawl thei alawm, ani hi zawng a rùm rà ve riau ania. Eng em ati lo ang ti a, țawng mawlh mawlh pah chuan, athing rawn put chu atan nghal mawlh mawlh a. Keipawn kan pui ve nghal sawk sawk a.

.
Kan thing tan sa, kan lo khawh khawm mawlh mawlh lai chuan, Puia pawh arawn thleng ve ta hlawl mai. Kha, eng sa nge ni inlo rêp teh țeuh a. Inva hlawhtling awm ve arawn ti a. Sawma’n a chhân mawlh mawlh lai a, a hmel ka'n en vang vang chuan, engemaw tak zawng, tawn anei chiang tih ka hria. I riltam tawh viau lawm ni, iva châng rei peih zawk ve ka'n ti a. Tam ve tho mai, ka duhaiin ka rei ta alawm mawle tiin, bùk chhunga luh pah chuan min chhang a. Thing tan sa ka khawh khawm zawh chuan, Sawm-a mei hi rawn chhawm țha mai rawh aw, sabel hi puia kan chawi luh sak ange tihpah chuan, bùk ah ka lut zui ve nghal a. Puia lo bawk deuh thlur chu, ngaih țhalo zetin ka va sâwi a. Iva chau awm ve, chaw te i ei dawn lawm ni, kan siam ange aw.. Châu em em hran lo e, ka kâwng kham lutuk ka bawkzal mai mai anih hi ti chungin, arawn tho țuih țuih a. Sawma rawn lut ve chuan, hmuh țha i han hmu em ni, iva țhu rei peih chen chen ve, i rawn chauh haw dan ah, humsual dai zo hlim te pawh i an kha mawle, arawn ti lut bawrh bawrh a. Puia chu anui suk ringawt a. Tap lam pan phei pah chuan, chaw kan eive ange, in sakah sa chu enge a an, Sawma sakhi chhâi thluk sa chu, atui ve ngùt ang maw tihpah chuan, chawbel chu a țhut chilha, hnah pek pah chuan a mitmeng dul raih chu, ka hmuh hmaih lo. Enge maw tak zawng a tawng ani khawp ang, asawi hun nghah phawt chu țha a ka hriat avangin, bùk kawtah mei chhawm țha turin ka chhuahsan ta rih a. Sawma’n i chauh dan em em ah hian, nimin lama kan nula pathum te zinga pakhat tal khan, anlo chhâi thlu che ani ngei ngei ang. ngêi ngûai che hian. Ngah nge i zêp duh, khatiang khawpa hmelțha leh nalh in, tuhrik pa ang mai a kap lam hre hlar mai, mitmeng nen a an chhai thlu che anih chuan, tuman an dem hauh lo ang che a tih mawlh mawlh chu, pawn lamah kalo nuihpui var var a.

.
Mi hun tawn leh, rilru hriatsak lèk lo a, țawng bawrh bawrh hi alo awl hle dawn ani tih kalo ngaihtuah neuh neuh a.

.
Mahse, anni pahnih hi chu kei aia inhrechiang zawk anni a. Sawma pawh hian ka ngaihtuah loh lam in, ațhianpa tih harh atum avanga fiam bawrh bawrh pawh alo ni zawk thei tho ani.

.
Engmah hrechiang hlei lo a, ngaihdan lo siam ve ngawt hi alo țha hauh lo zawk anih hi.

.
Puia chaw ei kham rawn chhuak chu kalo en chik viau a, a hma ai chuan a hmel pawh a harh in, a tho thâng ațha hret tawh tih ka hrethiam. Meilum hnungpuak chung chuan, vaihlo zial apak talh talh a. A țawng chhuah hun nghakin, enge a ngaihtuah ang aw kalo ti rilru mai mai a.

.

Sawma pawh arawn chhuak phei ve ta bawk a. Meipui bulah țhu in, zial kan zu vang vang a. Sawma bawk chuan, thutak zawkin, țhianpa enge i han tawn a, iva rawn ngui haw ve nang leh nanglo in, i rawn dâng haw bei mai a. A rawn ti bauh a. Kha maw,,, alo hmuh hmaih bik awzawng lo mai. Thuthmun han rem țhat mawlh mawlh pahin, Puia chuan a aw an thian khak khak a. Heti hian a sawi ta ani.

.

In bulah ka awm ta bawk a, sawilo tur a, vau leh rîkrâp mah ni ila, enge hma hun tuman kan hre lawk silo a. Kan hrilh ang che u ati bauh a. Keini pahnih chuan hriat châkin beng dawh hû chung chuan, thei hmin țha thlir takin kan lo en ngawih ngawih mai.

. ...
Khatia, in haw thlak tak hnu khan, ka awmna kha arem țeuh lo deuh in ka hria a, dil kam zawng zawng lan chian theihna ber leh hnaih theihna tur ber anih ringin, ka chhak hret a Tuaihabet kungah ka insawn chho a. Pawm deuh thaw alian anih avangin, lawn pawh ahar angreng fu mai. A kâkpui ka thlen chuan ka hah fe tawh ani. A aisang hretah ka in sawn chho leha. Nuamsa in ka țhu ta a. Lei ațang chuan, sang ve vaw tak ani a. Ka duhthusamin dil leh a kam vel zawng zawng pawh alang chiang hle. Ka awmna asang ta bawk a, thlifim a awm țhat tak avangin, thosi leh vaihmite pawn min zar buai ta vak lo a. Lungmuang takin ka țhu ta larh larh a ni. Satênau deuh ho pawh an rawn lut khawm leh țak țak tawh a.

.
Zawngrual tam fe mai hian sakhi um darh in, sihtui chu an rawn tlan a. Chu chu amak țanna lai ani. Thim dawn ah an riahbuk pan hun tawh a. Diltui an rawn tlân tlat chu mak kati viau na a. An riahna a hla lo anih karing ta zawk a. Mahse, chuti ngawt ani hauh lo. Ngaihsak lèk lo a, hmun dang kalo thlir vauh vauh lai chuan, mihring awrawl ka hre ta mai a. Ka zuk hawi thla chu a țhen, Zâwng nisi in, mihring pangngai te nen, anlo inbual nuk nuk mai a. Nu ho in an fate an au ang hian, an in au chêl chûl mai bawk a. Zawng note leh a puitling han in um nen, an ri lê lù mai a ni. Mak ka tihna piah lamah, ka hmuhnawm thlir ta mah mah zawk a. Khua pawh athim țan ta bawk a, an hmanhmawh ta viau. Mahse, thla alo de tawh ni rengin, ngaw chhung ațang hian kan lo hrelo mai mai zawk ani. A zahve dawn alo ni tawh a. Chumi éng ah chuan, kala hmu chiang thei hlawm fu a. Ka thlir reng lai chuan hlau leh thlabârin an țe ta teng tung mai a. An enna lam kava hawi chu, phùl chìm chin bak a, ngaw chhung thim phei khung mai kha,torchlight lian tak ang mai a èng țha. Mahse, rawng pawl lam deuh si hian, a rawn èng phei lung lung mai a, ka hnuailama inbual te chu, zâwng rualah changin, an tlan darh ta chum chum a. Chu thil êng chuan phul arawn thleng phei ta, kan hmu chiang chiah chu, ka mur chuaih chuaih thei. Ka țim sung sung mai a ni. Ka khur zui ti-tih der leh nghal. A rawn hnai phei zel a. Dil kuang chhunga a rawn tleng lut chu,alian kher asin, patling pathum pawm ai chuan, ate chhelo tawp ang. Dil kuang ahchuan, a inzial khat hmuk mai. A thil èng hmuam chu, lunghlu antih hi anih ngei ka ring. Lu bur aia te lo tur hi ani a. Chu chu dil a, tui tling laiah khan a chhak lut a. Amah chu dil kam lamah pheiin a in kual rui a. Che ngam tawh heklo i, hlau chung chungin ka thlir lo thei silo a. Ka en tlawk tlawk ringwt mai ani.

.
Dil (sih) tui chu, thla èng nen chuan amawi hle tih ka hria. Mahse, ka zämna avang chuan, ka hmu mawi hleithei tlat lo. A èng chu an rawn bawr ni hmiang, ramsa an rawn kal ta zut zut mai a. Tih ât in an awm anih ka ring, rulpui khan a duh duh alo hmawm hmiah hmiah mai a. Chuti chung chuan, tlanchhiat tum reng reng an awmlo. Diltui in tum chuan, an inhâwr khawm tup tup reng tho. Diltui rawn èng zual ta thut lam ka zuk en leh chu, pitar zângkul khin khen hian, lunghlu chu arawn chawi chhuak a, chu ve leh ramsa ho chu, sipai thupek ang hrim in ngaw chhung lampan chuan, an inzui ta diah a. Kha rulpuiin ramsial pahnih ngawt awlsam taka a dawlh mai thei kha mak kati tawp thei lo. Pitar rawn chhuak chuan, a lunghlu ken chu alu chungah lek kangin, rulpui chu a hmaah, ui dawih zawk ang maiin a bawk hlu hlu a. A mit khap fuk fuk reng chuan mirâp phah viau leh nghal a. Enge maw sawiin, pitar chu a phun nuah nuah a. A tiang dumtle zak chu lek kang in, rul lu ah chuan a khawng keuh keuh a. Muang chângin Chu rulpui chu mihring taksa ruangâm pu in, palian sek var vo mai ah arawn chang ta a ni.

.
Mipa hmelțha ka hmuh tawh zawng zawng belh khawm pawn an tluk lo ang. A dâwng ngo mai a. A țhatna chuan, kava ngaizawng lam ni hauh silo in min hip bet tlat ni ber in ka hria. A hma a zuk bawh khup a, a rawngbawl sak duhna rilru ka pu tlat nia mawle.. Ka chaw mawlh zo vek niin ka hria. Chhuk mai tum a. Ka rilru ka siam lai chuan,thosi leh vaihmite, atam a tam mai hian, min rawn bawr a. Ka harh phah hlauh thung. Ka che sawn ngam ta silo a. An hrehawm mai mai khawp ah, min seh theihna lai zawng zawngah min seh a, a ngap hian an ngap țhawt țhawt ani ber e.
.
Hnuai lam ka zuk thlir thla leh a. Pitar leh palian hmelțha var puak mai chuan, dil kam lam anlo thlir vang vang tih ka hmuh chuan, an thlirna lam chu ka'n en phei a. SAZUK KI BUNG ngei mai kha arawn kal phei bùr bùr mai le. Kah tum na rilru ka pu tawh lo. Ka en nawm thlir tawp ringawt tawh. Dil kuang arawn luh chuan, mipa zawk chu, arawn nâwk ta nâ-nâ a. Ani pawn alo zut ve hauh hauh bawk a. Pitar awmlai reng chuan, mipa chuan sazuk chu a pawl ta mai a

.
Ka makti lutuk chu, ka meng phar awn awn mai ani. Chutia ka thlir reng lai chuan khuai rau thawm ang mai hi, alo ri chhuak hum hum a. Tlippui rual chu lo niin, min han seh tak tak mai chu, ka insum thei ta lo a. Ka'n in vai vel thawm chu a hria aniang, pitar chu ka awmna lam hawi chuan,arawn dak chho vung vung a. Keipawn țan hmun siam țha in, ka silai chu ka lek kawha. Min hriat chhuah hma ngei a, sazuk chu kah tumin, a bawp ngei chu ka zuk tin vang vang a. Ka silai ka hmehper rual chiah chuan, ka luah enge maw hian, min rawn dèng dawt a, han râk tuarh thawm hi ka hre zui nghal bawk. Ka lu a, min rawn den na avang khan, ka silai chu kalo chawisang hret aniang. Ka tum zawk kap talo chuan, sazuk pawl tu mipa chu alu ah tak ka zuk kap ta ani. A let tawp a, zukchal pawh euh țhawt chungin a tlan sawn nghal a, ngaw chhungah apilbo ta daih a. Mipa tlu chu pitar chuan, țe ruai ruai chungin a bâwisawma, ka awmna thing che luai luai avang chuan, ka ngaihsak zui thei biklo. Tla lo turin ka in ham bet țang țang a. Ka lawn tirh khan, tuaihabet rah ka hmu hauh siloa. Mahse, tuaihabet rah in min rawn tlak țuk țuk mai si a, ka kut chuan, ka mit veng chungin, chunglam ka han en chu, hmeichhe hmel rapthlak zet, dâng belbul hian țhen țhu chungin, milo vawm nghauh nghauh mai alo nia. A hmel rapthlak chu thu hran, amah mai nilo in thingzar tin maiah chuan, chhuk zawnga rawn bawk vak thla chung chuan, min rawn pan thla zut zut hlawm a. Ka mangang leh hlau thlabar chu hnuailam hrechang lo lèk in, ka mawngtawlh thla pùr pur a.

.
Lei ka rah rual chiah chuan, sihpui pitar khan milo rek chat mai. A kut cher țhiak mai leh zùr tup tawh si chu, kah pathir ang mai a sak niin, sai sawm tha apu emaw tìh turin mi rèk kang ta vaw vaw mai a. Thei leh theilo in, ka ke ka leng awrh awrh thei hram a ni. Thinrim ha chang țhial chung chuan, kan nunkhua leh serh leh sang iti chingpen ta. Damin ka chhuah lo ang che. Ka fapa saw athi anih chuan, ka rawngbawlin ka salah i awm kumkhua ang. Kan nihna i hai lang ta si a. Hringmi zingah i haw thei tawh lo ang. I taksa erawh hi chu Ka chhuah phawt che anga. I damchhung reilote chu, i duhtawkin i chên thei ang. He i thil hmuh hi i sawi chhuak reng reng tur anilo. I țhiante kha, i hrilh anih vaih chuan, i nunna in atuar nghal ang. Ka ta ini tawh tih inhria ang che. Kal nghal rawh. Nang buaipui turin hun ka nei rihlo e, i vanneihna tawite hi, chên mawlh ang che tiin, min reh(rêk)na chu thlah in, min kalsan ta ani.

.
Min reh beh laia, ka bul vel a, thinrim ha chang țial bup bu tu, hmeichhe rapthlak tak tak te chuan an zui ve nghal a. Ka ni nghulh a, ka châu ngawih ngawih mai a ni. An rual khan, ka thlarau chu an hruaive nghal niin ka hria. A duh hun hun a, a lak mai tur ka nih theih nan, chu thil chu ati anih ka ring bawk. Khatiang khawpa thinrim hmel țihbaiawm kha, an awm theih ka ring ngailo. Ka thlîng thlengin min fan chhuak vek thei ani. Tap nuaih nuaih ri kha tlansanin, ka rawn haw san ta vang vang a. Vawite khat mah ka hawilet ngam lo. Ka bulah chuan, min venga, min bihthla zuitu a awm tlatin ka hria a. Ka hawilet rual rual a, minlo chhu hlum nghal mai tur niin ka hre tlat ani. Chu chuan, bùk bul ka rawn thlen dawn thleng khan min chenchilh tlat mai a. In bula ka rawn thlen khan, min kiansan ve ta chauh niin ka hria. Tuna ka awmdan thleng hian, keimah ah kimlo awm in, keimah kha ni tawhlo tlatin ka inhre nghe nghe asin. Huaisenna ka nei tawh lo a, mithi mai tur thlabar tak ka nita ber e. Damlo chau tak ang maiin, ka rilru leh taksa hi, a châu ngawih ngawih ani ber mai ati ta a.

.
A sawi ang tak tak in, a hmel ah pawh alang chhuak rèng a. Han hnem vak ngaihna kan hriatloh avangin, khawngaihna leh lainatna rilru nen kan en tlawk tlawk ringawt mai ani. Sawma tak ngial pawh sawitur hrelo in a melh ngai amelh ngawih ngawih mai. Thiana lungphang lutuk suh aw.. Kan țhiani khan, tihdan tur a hre em em ang ka ti ringawt a. E.. Lungphang lo e a. Ka sawi awmzia in man lo ania nge, thih hi ka hlau reng reng lo. Mihring chu thi tur vek kan ni a. Tarkun khûp bih a, dam reng mai te hi, ka hlau zawk daih. Keimah kha ni tawhlo tlat a. Ka inhriatna leh min chèn chilhtu midang awmve ni a, ka inhriatna hian min ti buai ani ber. Ka sawi fiah thiamlo zawk ania nge, min ngaihtuah reng reng suh u. Khawinge, ka châu deuh riau mai ka'n tlu zâl teh ang. In mangan phah na tur a, hrilh che u kani lo ania. Engpawh lo tawk ila, a chhan diktak in hriat ka duh vang mai ani. Sawma khatia, nupui sùn hlim ang mai a, melh ngai melh a i țhut vung vung zawngin, i kè kha i rawh hmin vat ang tih pah chuan bùk ah alut zui ta a. Sawma satî han râk țhawt chu, anuih zui hak hak a. Sawma lah a ke chu sâ atih avangin, ala per zui tlât tlât reng a.

.
Țhiani chu a hma zawng zawng aiin, ka hmu chak lehzual ta, ka hmanhmawh zèk zek tawh mai a ni. Bùk chhung ațang Puia bawk chuan, khatia âr ngui ang mai a țhu kun lup lo khan rawn mu rawh u. In khati dawn tih hriata lo sawi malék tur anih vei nen, thi tawh ang mai a, in mi tuarpuina hmel ngui lup kha ka hmu peihlo che u ania, mipa in ni lawm ni, in lungngai hmel khan min ti chau zo dawn alawm tiin, arawn nui kuk kuk a. Sawma chuan takzet che hian, i uiawm vak lèm em ni. Thian țha te damlo châu bula lo zâi vak vak chu ațhalo e, ka tih avangin ngawih ka chuh mai mai anih hi. Chuti taka min ngai leh ka bula mut thlahlel chu khawinge, ka rawn kuah lum mawlh ang che, tih pah a, athawh rual chuan a mittui rawn hnâm chu an khap per sawk a, ka hmuh hlau tih hriat zetin, a kawrban chuan an nùl zui vat a. Ka thil hmuh chuan, ka lung ati no nghulh mai, tuk zana lo inzui tawh leh chêng ho kan nih avangin, reilote mah nise, an in ngainat tawn zia ka hria a. An bula awm hlimawm zia leh nawm dan te, min thlamuantu an nih mai bakah, min duhsak zia leh unau ang mai a min ngainatna te ka chhuikir a. Katan a engkim an huam dan leh an inpekna zawngte ka hmuh hmaih heklo. Ka tan an nun hlanin, ka thih ai an thi ngam ang tih ka hria.

.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:28 pm

Kan lungngaih hlau a, min tih hlim zawk atumna rilru te, ka ngaihtuahin Puia hi, kalo tluk lo hle tih ka chiang. Thianpa, ngawitak rawh itan tihtheih ka neive chèk ang. Thiante tana thlamuan thlak leh in nghahna tlak ka nih loh in, țhian nih ka tling thei dawn em ni. I tan chuan, engpawh tih ngai raw sek sek. Mual in a daih thleng chu ka kalin, ka tlân mai tur ani. Mipa țhenkhat mah in, itan chuan si âr lak ka huam asin, ti a dawt thu ngial ngial fah a, an ngaihzawngte an bum ngam anih chuan, țhian țha chhan nan chuan, ka nunna hlanin, ka thisen pawh far kang vek dawn mahse, chu lo liama ka tan leh midang tan malsawmna a awm thei dawn em ni. Lungngai suh aw țhianpa, dam leh tlâng khat, thih leh ruam khat anti ngai e, kala thawk ve țêk țêk chhung chuan ka mit hmuh a i nunna an lak lai mek in, taksa him piala lo awm chu ka tum hauh lo ania tiin, ka in ngaihtuah thinrim a, ka inhrosa vel chu kalo phun chhuak ani ngei ang. Ege ni, mahni chauh a i phun pui tak mial mial mai tiin, țhiani hmel ngaihawm tak chuan, minlo nuih sen sen a.

.
A hmel ka hmuh rual chuan, ka zäng huai huai mai. Ani ngei hi chhemdam thlifim chu lo ni e. Ka lam pan a, arawn phei zån zàn chu, kalo en ngawih ngawih a, aw,,!! thilsiam mawi leh ropui, iva han țha chung chuang tak em. I tawnah vala hi ka tuiral leh zota, i hmel hmuh theihna tur anih phawt chuan, sim leh chuan tur ka neih loh thleng pawn ka sim zel ang. Bawiha, engtizia nge iva ngui em em ve, engpawi hai nge awm ta tiin, ka bulah chuan Min si chât in, țhuthmun arawn rem a. Ka kawnga rawn kuah pah chuan, a khabe dawh hä in min han en a. A heh sen vâm hiam mai, hleh thlak hlim ang mai a sen tai tak mai ka hmuh chuan, insum thei thlawt hek lo i. Zopa hmui châr leh rèp țan lek lek tawh chuan, kan nùl zauh a. Heih, khatin ti suh ti chunga, a han hawi sawn hmel duhawm takin, min mel danah chuan a haw tak tak lo tih ka hria. Chhunzawm erawh ka tum biklo. Min rawn pawm cheng cheng pah chuan, ka darah a khabe arawn nghat leh a. Han țhut țhat sauh sauh pah chuan, Puia chung châng chu ka hrilh ta mial mial a. Mit khap lèk lo a, minlo en vawng vawng chung chuan, ngawirengin nû-te thawnthu sawi ngaithla ang maiin, alo ngaithla dauh dauh a. Ka sawi zawh chuan, a nih tak chu mawle,, in thu hnuhnung lam tlem kha chu ka rawn hreve ri ruai a, i țhiante mut hun nghakin, kalo thlir reng che alawm. Chuvang alo nih chu, sihhuai hote zinga pahnih kha, min hmuh ve leh an tlanchhiat tak daih.

.
Chutiang alo nih chuan, Puia dinhmun chu ațha lo hle mai, ka tan pawn puih theih ngaihna a awm tlat lo. A hmuh loh tawp tur, thlir in a en ani si a. An ngaizam mai mai hauh lo ang. Ka tan tih theih a awmlo chu pawi kati takzet ani. Mahse maw., tih theih kawng khat inla nei asin. Chu chu he zukchal kah ngei hi ani. Puia chu, a thlâ man in an kawl reng tawh anih chu, chuvang chuan an rawn thlah mai mai zawk anih ka ring.

.
He zukchal hi, keima vohbik leh chuam ngei, ka zukpui fa ani a. Thil thleng khåt tak mai niin, note pahnih a hring a, nangnin phir in tih ang chiah hi an ni. Mahse, anlo puitlinga, an ki chu an in sem ta tlat mai a. Pakhat ve ve chauh nei in, an taksa țhan ang bawk in, an țhang rual zel a, an lo puitling chho zel a, he zukchal hi thunun a har in, a unaunu nen hian an in danglam hleih ta em em mai a. Ani hi chu, sazuk pachal rilru pu ang mai a, tih har arawn ni chho a. A chhan pawh, Puia hmuh tak ang khan, sihpui lal fapa nen hian an in hmel duh alo ni a. Kan tan pawh a, mibik unau an nihna hi, an hreve reng niin. An thu leh hlâ te zawm in, an zinga chèn nuam ati a, an dawi â zo ta ani. A pianpui unau ngei ngei pawh an zing ami ani tih, lan tir nan a si hlum ta ani.

.
Tichuan, an chakna te bel in an thuam țha deuh deuh a. An tan a, chi thlahtu ni turin an duang ta ani. A chhan pawh kan thil tihtheihna hi, a fa lo piang hmasa ber chuan, a chhawm tel dawn a, kan tan hneh theih an ni tawh lo anga, kan ram ațang hian, min um chhuak anga, he ram zawng zawng hi an ta alo ni tawh mai dawn a ni. An duh phawt chuan, hringmi pawh an rawn rùn thei tawh dawn che u asin. Puia thil hmuh chu kan hlauh leh ven thawn ber ani a. Chutiang alo nih chuan, ramri pelin, ka kal ve mai aniang chu. Ka sawi duh loh chu sawi in, i theihna tawp khawk i hman angai ngei ang. Puia thiltawn hi, thil mak tâwp khâwk ani zawk. Hetia, taksa him piala arawn haw pawh hi, thil mak tak ani. Sihpui lalnu khan, a fapa a ngaihtuah em avangin, duh hun hun a, a man theih tur a, a thlä aman hnu ah arawn chhuah zalen mai mai ani tihna ani. He zukchal hi tih hlum vat angai anih tak ber chu, zukchal ber a thih chuan, an chakna leh thiltih theihna ten rawih lam panin, awlsam takin kan hneh tawh mai dawn a, Puia thlâ pawh, an tan chelh beh rual ani tawh lo bawk ang. He zukchal hian, vengtu anei țhin a. Chutianga vengtu aneih lai chuan, a ngampa hle țhin. Ramâr, chêpa, thosi, tlip râng, leh tlip pui chenin, an zui a. A kalna tur enlawkin, a tlat na bulah te, hlauhawm lakah anlo veng a. Hlauhawm alo thlen hnaih chuan, hriattirna pe in, an ralkhel a. Zukchalin in saseng na hun alo neih phah țhin ani. Chung ralveng te chu, i paltlang theih chuan, awlsam takin i kap thei ngei ang. Sihpui dil chhak thingchang hmun ngaw ah khian, a tawmkùk a awm a. Khita țang hlir khian, sih tui inturin alo chhuak țhin bawk. In tan sihpui chân khi arem tawh lo. Sihpui lalnu khian a hote a ven tir vek tawh ngei ang. Ngaw chhungah lutin, in theihna hmanga in han pèl mai angai tawh tihna anih chu. Heng zawng zawng hi ka sawi loh tawp tur ani a. Zukchal chu kap in, aki min rawn hawn sak ngei ang che. In kah hunah buaina intawk a, puih i ngai anih chuan, he thil hi kawl la, a lu lam hi i pawt dawk anga, kalo kal vat mai ang. Mahse, i mangan tawp ah chauh lo chuan iti tur ani lo. Chuti lo chu, kan inzawm na zawng zawng hi an hriat phah anga, kan tan a țhalo ang. Va mu tawh rawh le, i hma ah kawng bum boh leh hun harsa takin a hmuak si che a. Hah chawlh a, intih chak i mamawh ani. Keipawn ka kalsan rih ang che, zuk chal in kâp thei hlauh anih chuan, kan lo inrin lawk angai si a. I tihtur chu i hriat kha ati a. Ka biak zui hma in, nui sen sen chungin min liamsan ta a. Zawh duh kala ngah tehreng nen, mahni chauh a, khawhar leh lungleng tak a awmturin min liamsan leh ta si. A zùnzam rit tak erawh ka thinlungah a hnutchhiah belh ziah chu, ani tak si ale. Min dãwn zui ve hian amawi mawlh silo. Ngahnge maw kalo tawn kher kher chu lee..

A mah ngaihtuah chu bansan tumin, Puia chungchang ka ngaihtuah ta zawk a. Engtin nge zukchal ka kah theih ang tih ngaihtuah in, a thil min pek chu ka hum rauh rauh a.

….

Ka mu tui lai chu, engvang nge maw ni, ka harh hlawl mai a. Puia țawngvai bual bual leh rùm thawm alo ni. Ka tho a, va hnaih phei in, han sâwi harh mai tum a ka'n khawih chu, a khawsik a sang viau ani ngei ang. A pang alo sa nasa mai. Sâwi harh talo chuan, ka puan chu ka thuah ta zawk a. Khua avar țep tawh niin alang. Mei ka nun a, sanghal kawchhûng chu ka chhuangkai a. Puia chu ka ngaihtuah viau na a, tih theih ka nei silo. Tuivawtin a chal ka deh sak ta ringawt a. A rawn mengchhuak chu, ekhai,, ava zahthlak ve aw.. Engtinnge ka awm arawn ti a. I khua asik anih ka ring. Tho suh, tho suh, mu hahdam rawh. Engmah zahthlak a awmlo. Mu chawl la, i harh leh vat mai ang tiin, atho tur chu, ka nem mu leh a, ka mangah Sih a, ka pitar ka hmuh khan min lo sawisa vak mai a, ka tlân chhuak lawk theilo alawm le ati nuah nuah a. Sawma pawh ka'n thawm ah rawn harh ve in, engtizia nge, kha țhiana i khuasik alaw, tinge, min kaihthawh vat loh aw.., MB nachhawkna ka pai alawm, tihpah chuan a rawn tho a, a ipte chu va haiin, a dumbur chhung ațang arawn phawrh a. Kha țhiana hei hi han ei teh. Tinge, i sawi vat loh le tiin, ngaihtuah tih hriat zetin a bêl hnai sat sat a.

.
Khua pawh arawn var țan ta bawk a, Puia pawh tuarchhel tih takah rawn tho chhuakin, zopa tlawmngaihna diktak pu na na-nâ chu, tih tur zawngin alo phe ve sek a, lo awm mai mai rawh tih pawn duh țhuai heklo. A tihtur tih khalh lamah kan ramțang ta ringawt mai ani. A pangngai chiahlo tih erawh kan hrethiam a, Sawma hnenah chuan, vawin chu lo awmpui mai la, ramvah a duh lui tlat a, i dang thei lo anih chuan, helam ram ah hian ilo vah pui mai dawn nia. Amah in kal hran tir hauh suh ang che. In inhrechiang in, in inkawp nasa bawk a, kei aiin i buaipui thiam zawk anga, ani pawn awmpui atan a duh zawk ngei ang che tiin, ka hrilh ru a. Ni e, ka ngaihtuah ru riau mai, biak hrelo lèk a, a ngawih vung vung țhin danah, a pangngai zân lo tih a hriat tlat. Nang pawh han fimkhur hle ang che. Ani pawh tih tawh naklaia, nang leh zel i rawn buai haw chuan, ka tan a hrehawm dawn emai, fimkhur takin i han che dawn nia. Thil râpthlak deuh leh buaina tling tur chu, Puia thil tawn ațang hian, inthiarfihlim san hram hram ang che tiin, min chah ve mawlh mawlh a.

.
Tuk țhuan chu, sakhi chek țhing leh sanghal kawchhûng nen puar takin kan tlingtla a. Puia pawn rinaiin a ei thei fu mai. Chaw ber a eitui theih chuan rilru pawh ati dam huai huai e. Ka silai te chu hrufaiin, akua pawh ka hawlh fai hâ’n a. Silaimu ka hem ța-n te chu khâwm in. Chaw nokhat vel tur chu ka bâwk bawk a. Engemaw thulh a bûk lam ka lêt hman loh palh pawh a, ka riah hmun a ka inhnawh puar ve na tur in ka inring lawk ani. Hlawhchhama haw chu ka tum lo bur. Puia chezia leh nungchang han en in, hun tam ka neilo tih ka hrechiang tlat. Sawma'n tinge, buhfai te i ken tel â rawn tih chuan, âa,,, kawngbo palh thu hlâ ah ka inveng lawk anih hi, sih châng lo in, ka ramvak zawk dawn ani. Chuvangin, kalo haw lo anih pawn, minlo ngaihtuah suh ang che u kati a. Thiana lah heti hi ani a, in ngaihtuah loh chu a har khawp ang, zân riak lo a, rawn haw itum hram dawn nia. Rawn hlawhtling mawlh ang che tiin, buk kawt ațang min thlah liam a.

.
Sihpui chu panin, ka kal ta vang vang a, ka han chûan chhuah chuan, a sirlam ațang helin, phûl leh ngaw ințhenna lai zelah sazuk hnu zawngin ka kal kual par par a, ka hmuh chhuah chu, he zukchal hian sih pan a, aluh na hi hmun thumah anei ani tih hi ani. Khân hnih chu a zawh bel hle a, pakhat erawh a hnu a țhing viau thung. A hnu thar ber chu chhuiin, a khân pui hmuh mai in beisei chuan ka chhui ta ngat ngat a, ka rin ang erawh ani ta hauh lo. A khân chu tlangdungah ka zawh zai zai a. Chu chuan, țin chanve hmun vel tur, hmun zawl. Phûl hmunah min hruai chhuak a. Chu ta țang chuan, a hnu arulchuk ta tlat mai. Phûl hmun zawl sir zawng zawng ka bih kual chhuah vek hnu ah pawh, a chuahna hnu emaw aluhna emaw ka hmu zo ta tlat lo. Kalo tum dan chuan, a khânpui ka hmuh fuh hunah, hmun remchang lai ațang ka châng ang chu kati rilru kha ani a, ka hmuh tak siloh ah chuan, țhiani sawina lam a tawm kuk chu panin ka kal leh ta thung a. Mahse, kava hmuh pawh ka ring bik hran law, beisei ru deuh si, beidawng sa deuh si in, khawinge bei tih dawn nan tal pawh tiin, beiseina tinther tiat lek chu, ka kalpui vang vang mai aniang chu.

.
Thing hmun ngaw ah pawh tlawhpawh loh leh vawikhat mah la tuk dar loh anih hmel a, thingkung te chuan, zungsam an chhuah uai hnèng hnùang mai a ni. Kalna tur kêu kuak chawp ngaih châng lo awm nen, thawm dim ngai bawk si chu, a buaithlak ang reng fu mai. Ka hlauh ruk ang ngeiin, sakhi leh sanghal ka țhawng tlan leh zauh țhin a, chu chuan ka fimkhur tawk loh zia min hriattir in, fimkhur zawk a hmalam pan zui zel chung chuan, țhiani sawina hmun pawh ka hnaih tawh viau in ka hria. Zukchal hnu pawh ka hmu leh ta zauh zauh. Mahse, han chhui zui theih tur leh chhuizui tlak, ahnu thar a awm bik tlat lo.

.

Khâmpang chhete lo awm chu, a tohlawt thui viau mai. Ka’n lut phei chu, ruah lakah pawh a him in, a hul țha viau ang tih ahriat. Ramsa tan chuan hnar phal rualloh khawpa hmun nuam leh duhawm ani tlat. Zukchal hnu pawh a chiar dep dup mai a, sakhi leh sanghal chenin an tlawh uar hle tih a hriat a ni. Zukchal hnu ber chu kan bêlchianga. A hnu chu ațhing tawh riau mai. Thiani sawina hmun chu ni ngeiin ka ring bawk si. Mahse, ani pawn a chian bik lem loh kha maw,, a tlawh ngailoh bakah aram chhung leh a thu neihna piahlam ram ani tlat si a, ka dem bik lemlo. Engmah hnuhma thar leh beisei awm ka hmuh tak loh avangin, let leh mai loh chu tih theih awm heklo. Duh loh râi ang hmâwn hmâwn a, let leh mai loh chu tih theih awm heklo.

.

Ka lêt leh ta chu, kapu thusawi țhin ka hre chhuak a, zukchal fing tawh chin hi chu, tleirawl â leh pasalțha tuaitir te hian an kâp nulh duh ania, hual chhung ațanga hual chhuah ngat phei chu, sa kâp ve ngai hleilo te hian an kâp châwk. A chhan pawh, a khân țha zawng zawng pasalțha ten an luah zo a, pasalțha te chân loh khân, alûn lo lai leh khân chhia rawn zawh in, arawn chhuak ve zaih zel si a ni. Zukchal te hi chu fing tak an nia, an kalna hnu te hi chhui a, kap tur meuh hi chuan, dawhtheih angai khawp mai. A kalna hnu hi thawm ngaithla Chungin, a hawilet leh vung vung țhin. An ram tla tawn fuh leh sih chân te anih ngawt loh chuan, kah mai mai har tak anni atih țhin te, zukchal ki hréu bem bum chin tawh ten beh bawm an ngah zia asawi, a ki kara nausen țhu tih angreng te chu, hrechhuakin, a thu min râwn țhin pawh ka hre thar leh uar uar a, nghalchang fing tawh chin, Lo a chhuak țhin chän chhuah hleihtheih loh te chu, a hnu chhuiin, a khânpui ah ka chán khalh mai țhin a, khawthim hma in ka kåp vat mai ani. Chutiang ang tur a, ka ngaih deuh avang chuan, a khånpui zawng a, chhuilet ka ni rèng a. Mahse, chu ngaihdan leh ahnu thar ringawt ka beisei na chu, ka kalsan angai ta ani. Chuvang chuan sihpui a panna khän, lùn lo ber chu pan zai ka rel ta zawk a. Ngaw chhung rampalailenga, zukchal fing, vengtu nei leh nghal han tawng pawng veh ngawt chu, vanneihna ka chhawm thahnem fe anih loh chuan, beisei abo riau si a.

.
Chutiang ngaihtuaha ka kal mawp mawp lai chuan, ka hmalama che-pa han tlak(hram) khàr khâr rì avangin ka ding chawt a. Kei min hmuh vang nge, sa dang a hmuh vang. A thil hmuh chu sakhi aite zawng anilo tawp tih, a han tlak uar dan ah chuan, ka hre mai. Amah ka hmuh mai siloh avangin, chezui ngam lo in, ka mit ka lèn kual a. A hram ta'k loh avangin, ka hmu mai thei silo, ka awm hmun siamrem tum chuan ka’n che deuh zauh a, chu veleh uar zetin a tlak ta zat zat mai le.

.
Ka hma, chhak lam hret phulräw hung sir thingtuai tlu awn ah chuan, ramar pachal nalh zet hi arawn fu kai chho zui zat a, min han hmuh rual chuan, ralkhel dar a khawng zui ve nghal zat bawk, hnuailam hnah ro a rik sat sat danah arual dang an tlan chhia niin ka ring a. Kalsan mai tum chuan, kan pen dat a, mahse tinge, khang ramar te kha, an țit bik em em. Ka hmuh tawh dangte lèm, an ngam em em si a. A rawn thlawh chhuahna lam chu, ka ngaihtuahna dik leh dikloh chian turin, ka han belchiang ta nge nge a. Kalo ring dik chiah ani. Ngahnge maw fimkhurna nei lèk lo a, kalo tawngpawng kal ngawt chu aw,, keimah leh keimah chu ka inhaw rum rum. Mahse, beiseina nei tawh lo leh hmuh mai inring lo akal ka ni miau alawm tiin, ka inthiam chawp leh ta zawk a.

.

Chu zukchal chu, ka chhuizui dawn em tih, ka inngaihtuah vang vang hnu chuan, zukchal vengtu nei leh fing si chu, amah vengtu te nen lam, ka tih rälkhel hnu a, han umzui zawng tih namai lo tak, ni dawn in ka hria a. Umzui loh chu fintlak zawka ka hriat bak ah. Ka țhawng tlan hlimhlawt ani si a. Ka um hla mai mai ang tih ka hlau ani. Thiani thusawi te ka hrechhuak a, a kawng țum hlui ber chu pan zui zel pahin, asawi lai hmel nen lam mitthla chungin ka ngaihtuah let neuh neuh a. He zukchal hi, a pa niawm tak ani si a, tinge Puia'n rulpui mihring ang a, rawn changin a pawl lai chu hmu ni a, a insawi si tia, ka zawh min chhang lai hmel ngaihawm leh duhawm no sùr mai si te kha aw,

.
Ka sawi tawh ang khan, he zukchal hi piang danglam anih na piahlamah, huai ho chakna leh an ramsa te, theihna hrang hrang pek vek ani ka tih tawh kha. Chuvangin, anu ni mahse zukchal satliah leh pangngai aiin a chak a. A nalh zawk bawk. a engkim mai hi midang chunga leng vek ani rèng asin. Ti a, min hrilh te chu ka bengah ala châm veng veng in ka hria.

.
Zukchal khân pathumna, a hnú țhing(hlui) tawh zet awmna ka thlen chuan, chân na hmun rem țhalai tur zawngin ka teikual vel a. Chhun chawfak hun pelh hret chauh ala ni bawk a. Ka hmanhmawh lutuk lemlo. Thing ding ngir khup chuan, khawthlir ati zim si, chiang taka zukchal ka hmuh lâwk theihna tur hmun ngei ka thlan angai tlat ani. Ka duhthusam ang zân hmu lo mah ila, mualdung pathum insut finna, kawnzawl cham rai țha lai chu ka thlang ta nge nge a, khawi emaw ber mual chu rawn zawh pawh nise, ka awmna hmun chu a rawn thlen phei hma in, kalo hmu lawk thei dawn in ka hria ani. Eng thing nge pawh ka hriatloh, ding awn deuh leh buk țha tak, a zâr țhuthmun rem fahran ah hian ka lawn a, ka duh ang zân a, ka cheibawl leh hnu chuan, chu hmun chu, kalsanin ruam thùk lam ka pansan ta a ni.

.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)