SAZUK KI BUNG By Hriata Tea

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

Re: SAZUK KI BUNG By Hriata Tea

Unread post by Ngaia » February 18th, 2018, 10:29 pm

Eng chen nge ka chân dawn, ka hriat loh avangin, inhnawh puarna tur thangțung leh hruizik te ka kheh khawm a, theitit rah hmin ka hmuh fuh takah phei chuan, țam hnem leh kamram mai mai tur ka chham talo e. Ka chânna tur hmun lam chu panin, ka let leh ta vat a. Thingno hmun ka kalpelh mek chu, chhinchhiahin, varung zanriak han vai vel nan ațha dawn riau in ka hria ani. Silai ka hmang ngam dawn silo a, phih awh tum a buai vel ai chuan, zopa sairawkherh han siam mai chu țha zawkin ka ring a. Rawnal bul chhah deuh hlek la in, ka sui hauh hauh a, a phan atan sairil hnang ka hmang a, sawntlung lei so nem thalai chu, kuttum tia lèngläwng ka sâwk bawk leh a. Ka chän hmunah țhu chungin, ka hlum lak chu ka hrual mai mai a, pho ro loh a, dah chan ngei mai, ipte a han ah hnùm hlarh mai hi chu, hman anuam in, a perh pawh a nã a, akal pawh adik bik riau ani. Sava veh kan uar laite ngaihtuah veng veng chunga hlum ka hrual lai mek chuan, ka sir lama thawm rawn chhuak chuan, ka beng a verh zar mai. Mahse, engdang nilo in, vahâi thawm lek alo nia, rul pakhat inchuhin, vahâi sawm rual vel hi an in um råk nasa mai. An chezia chu hmuhnawm ti zetin kalo thlir veng veng a. An in um liam tak hnu chuan, ka hlum hrual chu ka ipte puiah ka thing tawlh tawn vel ta mai mai a. Ka chânna hmun hi ka rinai in alo nuam phian zawk. A sân țhat avangin thosi leh vaihmite pawh an awmlo. Thing hmun ngaw chhah tak nilo pheise, khawthlirna nuam tak ani ngei ang. Chumi ti chiangtur chuan, ka piah ral, min rawn eptu mual ațang chuan, nutling rawl hian riii riih, riiiteh, riiteh. Tia au lauh lauh thawm hi ka hre ta ani. Naupang thawm ri nak nak leh, nutlingin an fate an ko vau vau ri te chu, thli beng dan azirin ka hrechiang in ka hrechianglo mai ani. Ramhuai thawm ani tih hre reng mah ila, engah mah ka ngai lemlo. An thawm chuan khaw lam min hriat chhuah tir in, ka lung lam lam anti leng zawk. Thianpa Siama te pathum haw ta te kha ka ngaihtuah a, engtin tak hun lo hmang ve ang maw, an haw tluang thei ém ang chu. Min rawn ngaihtuah viau anga, thivek tawh turah pawh min dah hial maithei. Damin kan inhmu tlang leh ngei ang chu maw.

.
Ka ngaihtuahna chu, naupang han nuiri ker ker hian arawn luahlan a. Ri lo chhuahna chu hriat chian tumin, che chang hauhlo hian ka beng kan dawh hà a. Chu nau țap ri ngâk ngâk chuan ka lam arawn pan niin ka hria. Hmuhchian loh hlau in, ka țhuthmun ka rem țha sauh sauh a. Engtak rawn chhuak ang maw tiin, ka in zawt rilru mawlh mawlh mai. Ka beisei loh tawp thil ka hmuh takah chuan, chetna chang reng reng ka hrelo. Ka en tlawk tlawk ringawt mai ani.

.
Chu thil chu engdang nilo in, kan țhianpa Thianga ngei kha a ni. A chêr in a dawldang hle a, a bawr chhawr viau bawk si. Zawng kalin arawn kal phei chhat chhat a, nausen țah ang tak hian arawn țap phei hlarh hlarh mai bawk si. Lo dan din tum chuan, chhuk ka'n tum zet a, mahse ka rilru ah bumna leh fiahna bak ni thei in ka hrelo a, ka țhu țha leh ta zawk ani. Ka hnuai zawn arawn thlen phei chuan, dak vual vual chungin, a hnar alèn ruai ruai mai leh nghal, amah anih loh na reng reng ka hrelo. Mahse, nithei hian ka ring lo mai nilo in, ka ring phal mawlh lo ani. Ani ni tur chuan, an haw na arei tawh bakah, hetianga pingpei mai mai tur khawp chuan a ä lo hrim hrim ang. Ngam pawh angam heklo ang. Hlauh vanga haw anih kha maw, eitur neilo leh nghal chuan, ramhnuaiah hetianga ramsa ang mai a, vak rawlai tur chuan ka ring theilo hrim hrim. Ramhuai ho min bum tum na leh ka awmna hriat an duh vang mai mai anih ka ring lui tlat tho. Puia chungchang ațang reng khan fimkhur tluk a awm thei lo.

.
Ramsa che zia ang mai chuan, a hnar lènin lei lam te chu an hnim leh thut thut țhin a. A mit chu a khawhmuh a tawi viau anih ka ring, ka awmna lam thingkung arawn hawi pawn min hmuh hmel loh tlat. Ngawirenga lo thlir tlawk tlawk bak chu, engtih zai rel talo chuan, chechang hauh lo in, akal liam tur chu ka thlir reng ringawt mai a ni. Ka rilruah erawh engdang mah ariak thei tawh lo. A tak anih ka rinna leh rinlohna chu a in zat reng. Rilru helhkham nei țeuh chung chuan ka inti paukhauh a, țhuthmun pawh ka rem țha leh sauh sauh a.

.
Khua a tlai ve zel a, ngaw chhung phei chu unuau hmelhai ang hun velin, athim ruau ruau tawh. Ka thangțung kheh zik leh theitit hmin te chu bar in, ka ei țawn țawn a, thangțung hi chu, athlum deuh avangin a hel pawn ei ahar hran lo a, hruizik erawh aduh ve pangngai tak tan lo chuan, a hmin pawn atui lutuk lemlo. Chuvangin, hruizik chu ka dah hrang a, a hmin ngei a ei atan ka khek deuh a ni. Varung perh thlak mai tur ka hmuh loh phei chuan, a bak chawhmeh dang ka nei dawn tlat silo.
Rilru helh kham nei run chung chuan kala țhu ve ngat ngat a, ngawirenga țhut tlawk tlawk bak chu, tih theih ka nei tlat lo. Mahse, tlaivar tur chuan thangțung zik leh theitit rah mai mai lo deuh inhnawh puar na tur ka mamwh ani. Kalo kap thei anih phei chuan, rang taka ka chetzui angai si, zan men pawh tih tawh naklaia, rilțama awm chu ka tan ațha dawn tlat lo a ni. Engtia rei nge he hmunah hian ka awm dawn ka hre silo. Dawrkai ang a, Min dawrtu tur nghak a, lo țhut ngawih reng ai pawn a hrehawmin anin awm tlat ani. Thut mut theihin siam tho mah ila, ka mutthluk palh loh nan, nuamsa a awm dawr dawr chu, ka tum bik lemlo.

.

Ngaw chhung reh ruih chu, keipui hâhum ri in arawn chawk harh a, kei ngei pawh ka harh phah sawng sawng mai. Khauchher leh lei hrik hram ri te rawn luahlan tu, keipui hâ hum thawm chuan, lei te chu a nghawr deuh dur dur thei hialin ka hria, ka awmna tlangdung piah lawk chu nimaiin ka hre nghe nghe ani. Chu keipui hram ri chu, ka tan inhnawh puarna hun țha ah ngaiin, ka țhuthmun chu ka thawhsan a, ka chhuk thla ta a ni.

.
Chhun lama ka chhinchhiah lawk tawh, thingno hmun chu ka pan ta vang vang a. Varung emaw vahrit leh ramar, sava lam chi hrim hrim chu zawngin, lung muanga an zal theihna hun. Zanthim duhawm chèn a hahchawl leh mutmu tuah mek te chu, kei Pathian thilsiam chungnung ber hringmi te zing ami hian veh in, ka pel chu ani tak si a. Mihring chauh lo chu zirtir kan lo ngailo rèng ani. Mahse, siamtu pawn ama anpuia asiam, a fate hian kan inhnawh puar nan a, sa dang kan man chu aphal ve ngei ang. Keipui pawn chawmtu anei hleinem. Chhum hmin loh in alawm a ei mai mai le..

.
Vazûn ka hmu hmasa ber a. Mahse, a sa ka it loh avangin a vannei phawt. Pangang ei ching hi chu kati thei țhaklo. Chhak lawk ah rung mal ka chhun fuh a, torchlight sehkawh chunga han perh chu ahar fu mai.

.
Ka light chu, leiah varung chhun èng thei tawkin ka'n tung leh te te a, varung dak fân deuh iau iau chu, ngunthluk zetin kan tin vang vang a. Ri pawp khawp in ka han perh pawm mai chu, arawn ri thla phur phur a, lei ah arawn hlawm thla nawk mai. Chhar pahin kan enchiang a, a awm kaw phùt ațang chuan, ka perhna saihlum chu kan kawm chhuak a. Zopa sairawkherh nge nge, aperh ana ngei e. Duh ang tawk a khauh a ka siam, vahrit perhthluk theih ngei nan a, ka tih ani reng ani. Ka perh thiam hma a, ka kutzungpui ka perh vung nasat țhin zia te lèk lùk kha aw... Perh chhuah ruala lek hèr zeuh kha thiam ve hek lo. A ngul ka perh fuh loh leh, ka kutzungpui kha, saihlum keh sawk khawpin kan perh ta țhin kha ania. Na duh vìt vèt tak ani.

.
Ka rung mal perh thlak chu, pawh fai mawlh mawlh pahin, ruam lamah kawrte tui awmna tur lam panin ka kal hmawk hmawk a, thlang lawk ah chuan, ka zuk hmu nghal mai bawk a, ka sa chânna ațang a hla tham bawk a, thawmdim ngai hek lo. Thing fawm pahin phulraw um ka la nghal a, luite kam zawlah mei ka chhem a, ka buhfai bäwk chu, țham hnih vel varung nen a chhum pawlh ah kan la chhuak a. varung chu rawh faiin, phulraw um ah chuan, buhfai nen ka chhum ta bawrh bawrh a, rung mal tih takah athau țha kher bawk a atui khawp ang le, mei vil pahin, a thin leh a thial ka hem a. A rîl tawite chu mau therah ka vet a, ka hem telve hram a. Zanrei tawh rilțam chu alo na phian aniang, ka sa hem bei tham zet chu, ka eizo rang kher mai. Ka thil chhum chu ka bih awl lo ta mai a. Fian ka sui nawk nawk a, atui hâng ka hawp țan leh ta zoh zoh mai.

.
Chutia, ka sa chhumna phulraw um, ka bih dùk dûk lai chuan, ka chhak lam ațang tuilian thawm arawn ri thla hùm hùm mai, engtizia a tun ang huna tui rawn lian ngawt nge maw ni le, ngaihtuah reina hun ni hek lo, sabereka khuangkaih te alo nih zawngin, ka nasa lo mai dawn si a. Ka sa chhumna chu, a sat leh sat loh lam hrechang lo lèkin ka țham a, ka tlanpui dawr dawr mai ani. Thaw hlawp hlawp chung chuan thingbul nghengin, a him china ka hriat ah chuan, dingin ka thaw hle mai.

.
Ka kut sa chu ka hre chhuak ve chiah. Chân ka hlauh em em, maubur mùt khu vung vung chung a ka tlanpui chiam chu thlah in, ka kut chu ka thing nawk nawk a, ava sa tehreng em.. Chu tah, za em em mai hian hmeichhia arawn nui ta tlawrh tlawrh mai. thinrim zeta ka’n hawi chhuak chu, mipa aw in déu sawh zet hian min han nuih zui zat a, ka kut chhêm hauh hauh pah a, thinrim inseh ruh chungin, phiangsen chuan. ka ât mu kan tlânpui chiam chu le.

.
Ka sa chhum, a tui hâng baw zo vek tawh chu chhar in, luite lam chu ka pan phei leh hnak hnak a. Luite tui nen sa hlang tawp chu, ka eita bawrh bawrh mai ani. Lung țhila min rawn vawm na te chu, ngai pawimawh duh lo in, sa tui hang aiah tuisik hâng leh varung awmti ka thial pawlh țalh țalh a. Min nuih awr awr mahse, hlauh lam aiin thinrim lamah akal tlat tawh. Theih nise, ka sairawkherha han perh vual tèt tùt chu ka chäk zek zek ani. Kan khaw pachak pu Bilha phei kha chuan, a sairawkherh khan, zawng pachal te, sazaw leh kawlhawk thleng aperh thlu thei asin, a keite perh thluk phei chu, keini a tu-te rual lek puitling ve uaih tawh si hian, a sawi tu a zirin, zantin kan la ngaithla peih nia mawle.. Ani khan han perh hlawm se zawng artui tiat tiat in, an vual tep tup ang chu..

.

Ka in eipuar ta bawk a, chung ho nuihzata awm reng chu ka peih biklo. Ka insiama ka chân hmun lam chu ka pan san leh ta zawk a, ka hnung leh sir velah chuan, min zui tih ka hria, hrelo ang hmaka kal chu, min zuam lohna tur leh kalsan hma na tur ani tih ka hriat miau avangin, min han pelh fua fua chang awm mahse, ka hrelo der lui ve tlat ani. Min zui thui talo rèng a. Ka chân hmun pawh ka thleng chawpchilh ve mai bawk a, lungmuang takin țhut hmun kan rem țha leh a, bûka ka țhiante ngaihtuah in, min ngaihtuah dan tur te ka suangtuah neuh neuh a,
zan arei tawh bakah kalo vak chau ve bawk nen, ka chhing deuh sek emaw ti a kan harh chu, khua alo var der mai.

.
Ka hnuaia safe nupa rawn in chhaih hawr hawr chuan min ti harh niin ka hria, ka sirlam a, tlumpui rawn kui dut dut chuan, leichara riak ni ila zawng, min bèng harh ngun ngawt ta ve ang. Ka mauthei chhawp a, Tui chu kan khiat khawlh khawlh a, ka zun bur chu kengin, paih paha inthiar nghal turin ka țhut na hmun chu, hla zawk lam ka pansan ta a. Luite tuiah ka inphih harh leh te te a, ka channa lam pan chuan ka phei leh ta vat a. Zingkar hi sa chhuah duh hun zawk anih avangin, rial rei chi ziazang ka nilo.

.

Tuk țhuan ei hun zèn zàwn thleng ka țhut leh hnu pawh a, kala chân chhuah tak loh avangin, ka beidawng rum rum tawh, ka rilțam tawh bawk nen. Ka awmna hmun chu chhuahsanin, sihpui lam pan zai ka rel ta zawk a. Zukchal hnu chu zui zelin a khân ah hlir kalin, sihpui chu ka pan ta nal nal a. Thui pawh alo nilo. Lo fing hnih velah sihpui hmunzawl chu kava chuang chhuak hlawl mai, tawi khawmuang zuilo in, phul seh chin ah zel kalin, zukchal hnu thar chu kan bih nawn leh a, a khànpui pahnih te pawh chiang taka ka en hnu in, a hnu thar ka hmuzo hauh lo mai. Ala kal leh lo ngei anih ka ring ta a ni.

.
Ka beiseina ling che che chu, rawn alh chhuak leh in, phùrna mak tak ka nei ta thung tlat mai. Sih chu kalsan in, luite ka hmuh hmasakna ber ah tuk țhuan ka rel a, ka buhfai kala khèk țang țang chu, chhumin, hruizik chu a hmeh atan ka siam bawk a. Tumbu pahnih rawh telin, tuk țhuan chu puar el euh in ka fak ta ani. Ka chawei kham han zik mar paha, zunram kan thiar vel chuan, luite kam pangper a, ankhapui lo zam duah hluah chu ka'n hmu leh hnuhnawh a. Lak pawh tum buai duhlo in, ka chân hmun lam panin ka kal ta nal nal a. Fehrehsän pelh hret, nau riltam hun vel ah ka chânna hmun chu thlengin, țhangte ah chuan ka țhu leh väng tawh a. Mahse, ka zun bur ka chhawp theih nghilh tlat mai. Mau dang han sah a, thawm han neih leh chu ka duh loh avangin, peihlo zetin kava la leh nal nal a.

.
Ka țhut hmunah rei pawh kala țhu hman lo. Tuibur hmuam dâ zet zawt chu ani mahna, Thawm ka hre ta. Ka lam zawngin, khuai râu thawm ang mai hi arawn ri phei hum hum mai. Puia thusawi kha ka hrechhuak zawk. Thut țhat sauh sauh pahin, ka inseh ruh lâwk hle a ni. An rawn thleng phei chu le,, tlip phâr rual hi anlo ni a, ngaw chhung chu an rawn dap chhuak ta vek emaw tih turin, A rik hian an ri mur mur mai a, a țhen min pel tu tamtak awm mahse, ka zawn ami ten min han bawr tak tak mai chu insum a harin, tawrh chhuah a huphurh awm takzet ani. Tlip phâr seh heti tak hian ana ve ang tih ngaihna ka hrelo. Min bawrtu antam tham vang ani mahna. Che châng hauhlo a thingtum țhut tawp angai tih ka hriat avangin, in sangruh țeuh in, ka sepui ruah do chawrh chawrh mai ani.

.
An duhtawk an ngah hnu a, min kiansan meuh chuan, hnar a hlit phawi ang huai an tih hi ani ngei ang. Ka hnarah hlit ala awmve silo a, ka tehkhin thiam dan ber chu, hriau zum țhut beh thawhsan ang huai niin ka hria.
Ka pang vual tèt tùt chu hiat in ka zut hauh hauh a, tlippui rualin min bawr ve ta se tih ka ngaihtuah chuan, ka chhuk lawk a hnahthial zawngin kawr ruam lamah ka lut ta vat a. Ka hmuh rual rual chuan, ka la nghal sawk sawk a, ka chân hmunah let leh in, ka hniahthial hnah lak chu arem dan danin, ka hak hnan ta mawlh mawlh mai ani. Heti chuan, tlip leh thosi lakah zawng ka him deuh tawh ngei ang.
.

Ka inpeih fel ațanga reilote ah, angaite bawkin a rawn ri phei leh ta hum hum mai. Kalo ngaihtuah ruk reng, tlippui rual ngei mai chuan min han bawh leh ta tak tak a, hnahthial khuh ve loh chin ka pangti chu, a sat hian asa zawk zawk niin ka hria. A hma ang in, a hlang tawpa tuar ni ta ila zawng, chelo in ka tuar chhuak thei lèk lo ang. Min kiansan ațanga rei pawh riallo in, vaihmite an rawn dum khup khup mai a, a ngap hian a ngap țhawt țhawt mai ani. Mahse, ka rilru ah sapui a hnaih chuan, vaihmite an tam țhin tih ka hre kar a. Ka tuar hram hram ani. Ka thawmhnaw karah lutin, hnahthial karah ka pangti an han seh tak tak mai chu, au rùah ruah mai ka nâp hial ani. Reitawk fang min seh hnu a, min han kiansan fel hnu rei fe thleng chuan, ka țhen, ka țhen ringawt mai ani. Ka inphelh te te a, ruak tangkawngin ka ding ang tei tawi a, kan inhiat tak tak mai chu, nuam leh hrehawm inpawlh diktak hi ani ringawt. In hiat rei thei ka nih loh avangin. Ka in ha leh thuai a, țhuthmun remin ka chang leh ta ngawt ngawt a.

.
Chhun chaw fak hun apel tawh a. Ka phùrna pawh arawn tho chhuak leh mek ani. Mualdung piah ber zingzum ațanga zawbuang rawn zuang sawt phei thauh thauh chu kalo enreng a, ka hnuai zawna an din vang vang hnu chuan, akal liam ta a, sa hmahruai ngei anih ring in, ka phur tulh tulh mai. A hnu reilote ah, sakhi tuai arawn phei leh ta za'n za'n mai. Kalo en reng a. A hma ang bawkin, ka zawnah tak chuan kah rem em em hian, an ding vel țhin a, hmun dang leh țum dang nise zawng. Hniak phawi hauh lo in, ka kåp thal tawp tur hi ani nä ale. A kal liam leh takah chuan, in siam rem sauh sauh chungin, ka hmalam chu ngunthlukin ka beng nen lam ka thlir leh ta vang vang a.

Chutah le,,, ka lam hawi zawng ngei mai a, mual laita ațanga rawn chuang chhuak thla, zukchal ki hreu țawi luih mai, rawn hawi phei bûr bûr chu, ka en tlawk tlawk a, hei lo liama zukchal ki hreu mawi hi an awm thei dawn em ni tihtur a ni. Muang ban charh in, ka lam pan chuan arawn phei bûr bûr mai a, ka kâp chak lutuk insum vel chuan, ka silai kâwm ka hmer khur dar dar mai. Ka hmuh tawh leh hriat tawh ah a aia ki hreu țha leh mawi chu, zukchal kibung chauh kha ani ngei ang. Ani nen khan intluk rengin ka ngai hial. Ka hnuaia an ding vung vung mai chu, kâp lo tur a insum chu har tak ani. Hawi vual vual chungin, alu chu an thing mùt mût a, amei tawite, chawmbat mai chu avei tar tar reng bawk a. Aki hreu eng fim kùk mai chu a trawi luih mai si a, Hetiang em em a sakah châk hi kala nei ngailo. Ka insum nasa lutuk chu, ka zun fep atla țhawt thei nia mawle. A mawngtam bial muih mai leh amei che ngelh ngelh reng chu, chilputin ka thlir liam ta ani. Aliam hnu thleng chuan, ka kâp ta mai lo chu aw tiin, ka ngaihtuah zui vawng vawng reng a. Mawnga hawlh ang mai hian țhu hle hle theilo in, ka zat phah cheng mai leh nghal. Ka phùrna pawh a zuai rawih tawh. Ka sa tur ngei ngei chhuah tir ta ah riak ka in ngai a, chhun en laia awlsam taka kah mai theih tur chu, thlah zalen ta ah ka in ngai ani ber.

.
Ka țhut hmunah inchhirna rilru pu a, ka insawh ka insawh lai chuan, vazar rual han țeh hak leh rak nawk nawk thawm ka'n hria a, chechâng hauh lo chuan, mualdung insuihfinna lam chu kalo en ngar ngar a. Chhei le SAZUK KI BUNG ngei mai chu ka lampanin arawn kal phei ta chhut chhut mai. A'n fimkhur em embkhawp leh nghal. Pen hnih, thum an pèn a, a ding leh a, thawm ngaithla in, che hauh lo hian an ding zui leh vang vang phawt a, chutiang zel chuan, ka lam hawiin arawn phei bek bek zel a, a ki mawl mai chu pui tak ani. Nichin ami nen khan abuk dan leh hreu nasat dan chu in ang tawk viau in ka hria. Mahse, he zukchal zet hi chu a pian leh rawng te chenin adanglam tlat ani. A kî khat chauh si, hetiang khawpa aropui thei hi amak tih loh rual ani lo. A ki bul vawng pawh alian bik hle a, a taksa var paw vo, mam zur mai leh aki hreu eng fim kulh mai chu, a in chawih mawi takzet ani. Engemaw ti takin a zahawm ru riau hle leh nghal a. Min hmuh ka hlauh avangin, amit tak chu ka en duhlo tlat a. Sa hu sual nei tawhlo leh sakah dawna thinphút eih nei ngailo kha, ka tiril ah engtin emaw mi țham tu a awm tlat pek a, ka silai chu ka dawm khur deuh ti tih ta tlat mai. Heti chuan adik dawn lo, ka taksa phurna leh engemaw ti taka zamna avanga khur deuh der der chu thunun tumin, ka maimitchhing vang vang a. A mah aimah a fimkhur zawkin ka silai chu alam hawiin kan lek riai riai a, thawk pawh thaw țha ngam manglo chungin, ka thinphu su dup dup chu, thunun tumin ka inpet ruh fan fan a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:29 pm

SAZUK KI BUNG.7

By Hriata Tea

A mah aimah a fimkhur zawkin ka silai chu alam hawiin kan lek riai riai a, thawk pawh thaw țha ngam manglo chungin, ka thinphu su dup dup chu, thunun tumin ka inpet ruh fan fan a.

………*,,,,,,
Ka hma zawn alo thlen chuan, a sahuat lai ka țhiani sawi kha hre rengin, kan tin vang vang a. Mahse, ka silai kaw hmawr sai deuh dar dar avang chuan, kah țhelh palh a hlauhawm tlat. Chuvangin, a bawp lamah ka țuan zui ta zawk a, ka hnuai zawn tak alo thlen hma, ka hmachhawn theih lai chu chuh in, ka silai cheng chu, fimkhur leh dim em em in kan kau țial țial a. Ngunthluk em em a, ka silai kawm hnunglam leh ka dara sakap thei chhinchhiahna, khuavang chhianchiah chuang kalh ka hawlh sik hnu chuan, ka hmazawn hnuailama zukchal ki hreu, mawi leh paw var vo mai chu, ngunthluk eltiangin kan tin vang vang a,

Sa kah nan pawh a, iai awm loh khawpa ka zèn sawh muk, mupui chunga musâu chhuan ngei mai chuan, khaw dawi ti khawpin kan kap dur mai a le.. Zukchal han euh țhawt ri ka hriat rual chuan, ka silaimu ka thun leh vat a. Ka piah mautlawn tluk khat vel a, zukchal zuang su phei uih uih chu, a bawp ah bawk kava kap leh a, silaimu thlak leh chhuk ka ruala, zukchal mangangin aw an chhuah zet chu ka mur sung sung mai. A mawng lam hnukin, ake hmalamin a inhai a, tlan chungin ka um phei a, ka beisei ang aia a țuan fum ran ngaihtuahin, ala chak kher mai. Ka silai ka kah ruah leh chiah chuan, a zâng ruh ka chhat ani ngei ang. A awp rup a, zukchal aw rawl amawi lo khawp in, a kiu ta ruai ruai mai, chhak leh thlanga thlipui rawn rum ri hum hum thawm chuan, min ti zam lek lek a ni. Kar loh ah thli rum chuan, kan awmna arawn thleng a, hnahthel leng ur ur kar a, zukchal rawn ding chhuak mek chu, thei leh theilo a meng lui hram hram chungin kava en a. Thli rum vut vut in, min chhem kat nawk nawk lai chuan hmalam panin ka kal lui hram hram zel a, zukchal kalsiam leh țan tir in saisira zawnga min rawn chhawn chu, a bawp lehlam ah kava kap leh ta a ni.

.
Patling natuar rum ri ang mai a, țe ruai ruai chung chuan ka lam panin arawn lim phei ta mai a, khati khawpa ka kah tawh leh a zâng ruh hial chhat tawh a, ka ngaih in, chak mang khenga mi rawn phín phei thei ta mai chu, makti in ka khup a sai dar dar mai. Ka piah hlam hnih vel a, thingdawl thlar chu inhumhim nan phèn tumin ka tlan phei a, ka thleng hman ta lo. Tlanpaha ka silaimu ka thun zawh rual chiah chuan, ka kang lawp a, zukchal chuan min phur liamin. Sang tak ațanga tla ang mai a, ka phar ruai ruai chu, ka theih vang leh tum vang ni hauh lo in, ka tla ding chat mai. Mak tihna hman ka neilo. Ka vanneihna chu umzuiin, in humhim nan a tlanchhe hman kani hek lo. Ka nih ang ang ni turin, min rawn phìn phei leh mek tu zukchal chu kalo hmachhawn ta a ni.

.
Rilru fim tak pu in, ka pu thu min chah țhin. Mihring pachang inring ren rawn chu, ramsa țuanin aphakin a tluk thei lo. Inring tawk tak leh rilru fim a, kan hmachhawn apawimawh ber" ti a, min hrilh țhin kha, ataka chian turin kalo inring ve ta tawp mai a ni. A sa huat lai te chu la hre reng mah ila, kap tur a kan in hmachhawn dan nen, rem mawlh hek lo. A chaldar taka kah tum in, kalo tin vang vang a. Hlam hnih vel a hnai, alo thlen chuan ka hmet puak ta a ni.

.
Ka silai puah rik rual deuh thaw chuan, ka dinglam hmun pik deuh zawk lamah chuan, ka theih tawkin kan zuang a. Zukchalin ka silaimu chu engah mah angailo tih hriat zet hian. Lu lei bâr in, ka lam pan chuan, nui vur vur chung hian min rawn pan zui zel ani tih, ka zuan sawn rual chuan, ka mitsir in ka hmu thei a. A ki bâwr zum leh hriam tak țawi luih mai in a, ka kekawr tlang atai țeh hawk te nen chuan, vawikhata thil thleng rual vek tluk a rang ani hial awm e.

.
Ka lum zui tawp tawp hnu chuan, rang taka inbeng thawh vat pahin, ama hmingchawi ngei hruizåm. Sazuk nghâwnghlap hrui, lo zâm buk luih lam pan chuan ka tlanchhe ta a. Chawhmeh hlau a, ka vawithum tlanchhiatna ani ta. Mahse, tlawma la thei ka ni tlat lo. Thih leh dam inkar thil ani miau si a. Sazuk nghâwnghlapin a zam hnan thing kara, kawi hrui lian leh inherh chùat mai, sazuk nghawng hlapin a veh thuah ber bur hmunah chuan, ka inpal lut nawk nawk a. Ka silai lo bat tu, hruizâm te chu ka ningin, ka thin anti rim tùk tawh mai. Ka inphih tau lut sawk sawk ani ber e. Mahse, hruizam te chu, a hnawk zual poh leh ka tan ralthuam țha leh in humhimna kulh bing anni thung. Zukchal tan erawh, a ki hrèu mawi leh ropui tak chu, tunah chuan hnawk sak leh diptu lian ber ani tih a hreve tawh ngei ang. Zukchal fing ber pawn, a thinrim meuh chuan, a ropuina leh mawina chu, buaina a hruailut tu leh a thihna hial thlentu tur ani tih ahre lawk bik lo ani mahna. Ka awmna lampan chuan, chakzetin arawn lim phei leh pur pur a, hliamtuar lo ang mai aniin ka hria. Kawihrui zam leh sazuk nghawnghlap hrui in phan kawkalh chingchivet nuaih kar a, Nghalênglutar kung, uipum tia zet chu țan chhanin, chumi kung ngei chu silai beh chhanah ka hmang nghal a.

.
Zukchal rawn lim phei pur pur chu, kava hmu nui sùng mai. A hmelah sazuk anihna engmah alang lo. Chu aia rapthlak chu, ka hma lawk hrui uai sèng sung na, a rawn tlan luh takah chuan, ka hmu zui ta a ni. Ka hma hlamkhat vel lek ah chuan, a ki hreu avangin, hruizam ah chuan a tang ta, a mangang leh thinrim han tal au ri chuan, khawsik a kaitho ar ar thei hialin ka hria. Patling natuar rùm ri leh thinrim au thawmin ngawchhung chu a khawk rum rum mai a ni. A siamtu te a âu ani mahna. Ka chan țhat lai chu chuhin, a bengchilh ngeiin, ka ngèn mu chu kava dentir ta a ni.

.
Chutah zet zawng, a lùngno alo chhuak ani ngei ang. Hmeichhe thlabar leh mangang aurawl arawn chhuah ta thung. A au dan leh awrawl chuan, min ti mur chuai chuaih a, ka khùr dar dar mai. Khawpui, arawn ri kal ruih ruih a. Chhúm chhah leh dum ngun mai rawn in bânlet tup tup chuan, ngaw chhung arawn tuam thim khup khup a. Ka chet vat angai ani. Zukchal chalchâng inleng bat bat chu ka pan phei a, ka chempui lian leh hriam hleih hlawih chu phawrh in. Zukchal lu lam kang ùr, amawnglam leia innghat ke leng ut ut chu. A ki ah man in, a nghåwng tan tur chuan a tukhum a sah tum in ka'n phar sang deuh a, ka zak kau uaih tawh chu, hmeichhe lungchhe tak insùt hliam hliam avang chuan, chet zai rello in ka ding ta veng veng a. A mit ațanga mittui lo luang chhuak nguah nguah mai te chuan, lainatna min neih tir a. Chet zai reng ka rel theilo. A mitmeng khawngaihthlak lutuk chu, ka en tlawk tlawk a. Khawngaih thlä la em em hian. Mittui luang ngiai ngiai chungin, min melh vawng vawng mai si. A hmelte chu zukchal reng ani tawhlo. Hmeichhe hmelțha leh ngaihawm em em. Thusawp nuaih chu a chhip samah țhamin, kalo kuai dâk mek a ni.

.
A kuta lei beng chung chuan, saisir deuh hian kun chungin min rawn melh chho a, insut hlap hlap chung leh mittui luang zawih zawih chung chuan, tilo hram rawh. Min that lul suh tiin, min ngen tak lawm lawm a, lainatna chhete tal pianpui tawh phawt chuan, kut an thlak bik in ka ringlo. Ka chem chu ka lek thla riai a, kaihthawh tumin, a zak thlâr a han dawm mai ka tum lai chuan, țèk a rawn tla dur a. Lei te chu a nghawr der der mai, ruah mal hraw zet zet hi arawn tla phuar phuar a. Karlo ah atam a, tam mangkhengin, ruah arawn sur ta buan buan a, țèk tla zuai zuai te chuan, thingzar adèng tliak hmawk hmawk mai bawk nen. Ngaw chhung pawh ruahthimpui vanglai aimahin athim tawh a ni. Chhak tlâng lam ațang chuan, patling thinrim thawm arawn ri thla hulh hulh mai. Sihpui lam ațang chuti bawk. Zukchal chu țêk rawn tla eng zuai ah chuan ka zuk en a, pitar habal vek tawh hian, hâhni lang țhu in minlo nuih sûng mai a. Ka ipte-a, light chu phawrh in kan chhun leh a, zukchal ngei kha nisi in, a hmel erawh rapthlak tak a ni. A țhen nùng a, a mit ațang thi duk zet hi alo luang chhuak nguah nguah mai. Ka inthing harh a, hreh leh harsa ti zetin, a ki chu kan dawm leh a, ka sah dawn meuh chuan, hmeichhe rawl khawngaih thlak zet hian, chauh hmel deuhin, zahngai tur chuan min han ngen leh a. Ka beng chhu ngawng lui chung leh amah enlo in ka sat ta a ni.

.
A natuar rak thawm chuan, min ti khur zawih zawih thei hial asin. Inthiam loh na leh hrehawmna in ka khat a. Mahse, kati lo thei silo. Bumna leh thlemna ani tiin, ka infuih mawlh mawlh reng a, ka zai laite chuan, aw thâm châl hian khawngaih minla dil tak lawm lawm a. Ka tan chhum dawn a, a au țe thawm leh rum ri chuan, min ti zia ta mah mah mai. An chhe rapthlak tak tak min lawh ruai ruai lai chuan, ka tan chhum ta a ni. A mangang au ri, zuai raih raih chuan midang thawm erawh a ko hnai chak na ngiang mai.

.
Pên hnih vel ka kal hman tih chuan, hneh sawh zet hian, ka dar ah min han kuai a, ka inher ruala, min han lèn zui lawp mai chu, ka zukchal lu ken lai pawh ka thlah țep ani. Ka light chuan kan ènkual a, ka dung aisang mah ah chuan, mitmeng alo de thleh thluah mai. Ka zâm in ka mangang let der a ni. Ka thih ni ka ban ve ta anih hi tiin, beidawnna leh manganna in ka khat a. Ka nu leh pa, ka chhungte leh țhenrual zawng zawng te ngaihtuahin ka mitthla uai uai a. Ka tawn ang ang tawng turin, ka inhlan ta tawp a.

MAHSE,

Hriat chhuah ka nei. Thiani thil min pek kha khawnge. Ka indap vat a, engtia hre chhuak lawk lo nge maw ka nih reng reng le. Ka hman hmawh luatah ka lak chhuah rualin, kan thlauh leh nghal a. Ka light chuan kan chhun kual thuak thuak a, ka bul velah chuan, ui kawlh man tum a, kan zim luih luih ang mai hian, min bial tuau tuau ni in ka hria, ruah mal hraw zet zetin min han far te chu, athîp țhawt țhawt thei nia mawle.

.
Ka thil thlauh ka hmuh rual a, chhar tum a ka kûn in, zukchal lu leia ka nghah rual chuan tlan tumin alu bung tawh si chu, a țang ta țung mai. Ka dawmbet hlei thei der lo leh nghal. Ka thil chhar chu hawng turin, ka kut leh lam chu che thei tawh heklo. Ka bul hnai a, thaw huam huam ri leh mit de rel rual chuan, min ti hmanhmawh in hlauhna nen, ka che bah nuaih mai a ni. Zukchal lu chu kan khai kang a, bur chhin hawn tum a, kan dawm chu alo tal ve sek mai leh nghal, a rùm ang ngul ngul a, a hmui in ka chawn ah a nawr a, mi dit hlawk hlawk zel mai bawk si. Ka taksa hlat taka khai kang reng tur lah in, ka tha in atlin bik silo. Ka manganna chuan, avawrtawp a thleng tak meuh a ni.

.

Tlan pah zel chungin, zukchal lu chu ka hnuk ta bawp bawp a, kalkawng èn ngai bawk. Bur chhin hawn hma a, min rawn nanchin ka hlau bawk si, ka bul lawk lawk a, thawri huam huam leh min pel fua fua tute chuan, min khawih duhlo nge, min khawih ngamlo zawk. Ka light èng rawn thlawh pel a, thildum lian zet phar dur dur mai te chu, enge an nih ngaihtuah a, enzui tur in hun ka neilo. Ka theih tawk achak a, kal hmawk hmawk pah chuan, bur chhin chu hawn ngei tumin kan seh a, chuta an thawm rawn chhuah chu, mangang leh thinrim au rawl te, thlabar țe thawm leh natuar rum ri nen, ari hulh hulh mai. Țhiani ram chhung chu ka hnaih tawh angem. Nge ahlat zawngin kalo kal ngat mai em ni. Ka kalna chu khawilai nge ka hriatloh bakah han chhui zawn tur pawn, thlamang lai, zan khawchhe thim urhsun lutuk ang mai a, thim leh dumin atuam ani si a. ngaw kar pik leh thelh te chu ka pal chhawk nawk nawk ani ber e.

.
Ruahsur lah chuan min nan zawr hneh tawh kher mai, kawlphe eng zawr zawr leh țek tla dum dum ri te chu, rapthlakin hlauhawm hle mahse, a ên zuai chhung chuan, ngawchhung chu, thui tak ka hmuh theih phah ve thung a, ka hnung leh sirlam ah te chuan, kawlphe in arawn chhun èn rual chuan, thildum lian tak tak hi, an vak zut zut mai leh nghal a. Duh se zawng, chawp leh chilh in, min pawt sawm vek thei ngei ang. Zukchal lu ka hnuh lah chu, hmeichhe rawl leh mipa rawl nen, pitar phun ri nen, a in râk chhawk chhen leh nghal. Hmeichhe sam hmawr a, man chunga lubung hnuk lir bawp bawp ang te in, ka zuk inhmu leh țhin a. Zukchal ki hreu leh ka silai dawtin, hnim leh hruizam a bah fuh chang in, ka kal chak lai chu, pawh din chaih ang maiin ka ding let leh nawlh țhin bawk a.

….
Bur chhin chu ka seh hawng thei ta. A chhin chhâk per nawlh pah chuan, minpui lul rawh tihpahin, kan lek kang sang a. Chu ve leh ka awmna leh ngaw chhung zawng zawng èn thei khawpa èng var hi a inkap chhuak ta, chumi èng ah chuan, ka bula palian tak tak, mengsen rùm te leh meng var reu ruau te chu, an lang chiang kher mai. Au khêk ruai ruai chung chuan min rawn zim tuau tuau a. ka mangang leh hlau thlabar chuan, intih huai nan inhrosa chungin, ka silai chuan ka hmuh remchan apiang kâp in ka hmetpuak dum dum a. Ka bula zukchal lu chu lak tumin an rawn ban zuau zuau mai bawk si. Ka kah apiang te chu țe ruah ruah chungin, an ral ve mai a. Mahse, kah sen an nilo. Min rawn zim hnai tulh tulh a, silaimu ka hmang zo tawh bawk si. Ka chempui phawrh in, ka theih ang ang in kalo vai fua fua a, ka sah fuh te, au țe ri leh natuar rum thawm te chu, ka hre hla tual tual na a, huai ho chuan min chìm khat vek tawh niin ka hria.

.
Silai rawn puak dup dup kar a Sawma leh Puia inhrosa thawm ka ral hriat rual chuan, țhiani awkâ, ngaihnobei leh dam dap țhin kha, ka hre vin țhak țhak bawk. Patling natuar chiau vawng vawng ri leh ngaw chhung eng leh pup țhin te, thil puak ri ulh ulh te chu ka mang hriat ruai ruai a. Ka chau zota ani ber. Zukchal lu in, hmeichhe rapthlak tak hmel pu chunga min nuih elsen vur vur lai chuan, ka theihtawkin, ka chelh nghet sauh sauh a. Mahse, tha reng ka neih ka hre tawh lo. Ka țhiante rawl leh țhiani han au țhat țhat ri te chu, ka hre hla tual tual a, ka vawn lai zukchal mangang aurawl chuan, kala chelh bet tih min hriat tir in. Ka thil hmuh leh ri hriatte, an zuih ral riai riai lai chuan, ka mit sulh a, ka khawhmuh thim riai riai chu ka hriat tawp ber ani ta a ni.

………*...............
A lo harh leh thei angem ti a, Puia țawngri chu, chiang takin ka hre hmasa ber a, min chawitu țhiani aw chuan thei ang, mangang suh u. A thi dawn hleinem, hei alo harh dawn e tiin, alo chhang a. Men chhuah pah chuan ka lu hai bùr chu, ka thing nar nar a. Inbeng kangin, țhiani malchunga ka lu innghat chu kan thawhpui țuih țuih a. Puia chuan milo chelh vat pahin, mu leh rih rawh. Ila châu anih kha tiin, min rawn kuah zui a.
.
Ngailo rawhse ka țha e. Engtin nge ka awm. Eng chen nge ka mut tiin, ka zawt zui zat a. Thiani chuan minlo chhang vat a, arei lutuk lo e. Kan rawn tlai hman țep a lawm. Kha hei hi in la, i harh hawk mai ang. Helai hmun hi kan chhuahsan vat angai ania, an rawn thawh leh chuan, ralthuam nen an rawn thawk chhuak1 tawh ngei dawn a, an ram chhungah hi chuan, kan hneh hauh lo ang. Kha le, tihpahin thil tuihnang hi min han tulh a. thlum thla riai riai hian ka hria. Ka zâng huai huai a, ka thawk thleng chuan, ati nuam suai suai thei. Zukchal lu, lo mengkal rulh rulh chu Puia chuan an khai a. A țe ruai ruai mai leh nghal, A mitmu dum fim ngun mai chu, rawngvarin arawn thlak a. A meng var ta ru mai. A rapawm duh phian. Tiru, kal vat angai a nia, hei an rawn thawk leh țan dawn anih hi, in salu kha lo venghim tlat rawh u aw tiin, țhiani chuan, min han nawr deuh pah chuan, min hmasak tir a, hnung arawn dawl a, engemaw sawiin aphun melh melh a, chutah thil var hlawm èng tak hi vanlam hawiin a vawm chhuak ta a.

...
Thli rawn rum ham ham chuan, dim baksak lo in min rawn chhem pai chawn chawn mai, thingkung lian tak tak te chu, lei phiat phak lek lek hian, tliak hauh silo in, thang ngul ang maiin an kur dual dual mai a, țhiani chuan, phun mawlh mawlh chungin, a ban chu alo vai pap pap a, chutianga atih apiang chuan, thli chuan keini chu min thlawh khum in, kan invawn behna te chu kan thlah a, chak zetin kan kal vat vat țhin a ni.

.
Thiani chuan hah aw zet hian, kha lam anilo. Chhum zinna lam zawk ah khan kal ru, kawng inbo theih nan an hliah khuh anih kha arawn ti a, kan awmna chu athim dawn apiangin. A kut ațang thil èng a vawm chhuak zel a, chu chu, chhûm dum ngen ngun hian bawh zuiin, alo tuam vat zel bawk a. Chu thil pahnih din chan zawk inchuh a, in ban let bùt bùt mai chu, a hmuhnawm rualin a rapthlak hle bawk. Kan hma a chhum zing chhah lutuk ah chuan, lutin ka arkhawthim dai nawk nawk a, engemaw min han man thlurh thlurh tu hi awm in ka hria. Ka chem chuan, țhiante vai fuh hlau tak chungin kan vai ta țhin a, min kiansan ve leh mai țhin. Rei erawh min hlat san lo. Thiani chuan, ding lawk ru, hnunglam hi lo veng ula tiin, min rawn kal pel a, chhum zing chhah mup mai chu, chhêmin an vai êng ta duak duak mai a, kan kalna tur chin chu hnim zinga chaihte kawng ang maiin alang rul mai a ni.

.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:30 pm

Kan hnunglama chhum dum rawn inlet phei tùp tùp chuan, thinrim rawl chhuah telin min rawn pan zel a, Puia silaimu min pek chu thunin kan kap ve ringawt a, fanghmir kawng dal sak ang lekin, a ding det a, sir hret ațang arawn zing phei leh mup mup zel tho. Kal ru, kal ru tiin, țhiani chuan hmanhmawh aw zet hian min nawr liam zawt zawt a, hnung dawltu ah bawk țangin, chhum dum chu, akut ațanga engvar tak thlawk chhuak țhin hmang chuan, an vawm darh leh chuai chuaih a. Patling natuar țe rawng rawng leh hmeichhe thlabar chiau vawng vawng ri te chu beng ah akhat mup mup mai. Mipa pathum ngawt zingah a hmeichhia ber chu, min humtu leh vengtu ropui ani tak si a le. Han tlawmngai viau dawn ila, atih ang chu kan ti ve thei der silo. A venhimna hnuaiah ramvachal inti pathum te chu, hmalam panin hmanhmawh leh hlau em em chungin, kan tlan dawr dawr ringawt mai a ni.

….

Thiani han țe țhat ka hriat chuan, ka hawi let vat a, a tlu tur pai khat khat chu, thei leh theilo in arawn ding chhuak a, thil dum hlawm lian tak rawn thlawk phei chuan, a rawn deng zui zat a. Ka tlan phei vat a, atlu tur chu a zakah manin ka dawm ding a. A kawnga kuah din pah chuan, chhum dum rawn inzial phei bút bùt chu, ka kut lehlam chuan, ka silai chu ka zakah chepin kan kap a, pakhat pahnih tih chhiar chhung chu han tawp ve chaih mahse, a ai chakin arawn inzial phei leh nghal tup tup tho.

.
Thiani chuan, thei leh thei lo hian tlan rawh u, ka theih chhung kalo chelh a nge. Kan ram chin kan hnaih tawh a, in thleng hman em em ang. Tanpuitu au in, ka thawn chhuak tawh a, ka țhiante pawh anlo thleng țep ang. Rinaiin an rawn lang har ta. Zukchal lu kha pe la, i laka ka intiamna zawng zawngte kha i hrilh dawn nia tiin, min nam sawn pah chuan, lungchim takin min thlir ngawih ngawih a. Kalsan ka tum hauh lo. Hnunglama silai puak ulh ulh chuan, ngaihtuahna fim min rawn pe a. Puia hnenah chuan, salu kha sawma’n keng se, nula hi kan puih angai ani. Anih loh pawn, in silaimu te kha min pe ula, tlan mai rawh u, kan thih vek kher ațul lo e tiin, ka au a.

……+........
Thil êng vawm chhuah zauh zauh paha rawn tawlh hnung pah zel țhiani chu thlirin, ka silai chu amu ka thun sawk sawk a. Teuhlo mai ti a, Puia min rawn chhanna chu, Sawma chuan arawn zawm vat bawk a. Puia chuan, țhiante tana nun hlan tur in, an nunna zawk hlan a, mahni inchhan him chu ka tum bau lo mai. Heng thil hi kei min ngaihtuah vanga thleng ani a. Hniak khat lek pawn ka tlansan lo ang che. pipu ațanga milu salu khai țhin hian, țhiante tha leh nunna ringin, inhumhim nan ka tlanchhe lèk lawng e. Lo kal tak rawh se. Hringmi ang ten inlan ngam awm ve tak che u maw tiin, a silai akap dur a, Sawma’n keiin, in hnung ka dawl ang. Thiante ruala nui ngam tur chuan, in sut ang chu su in, ka nunna pawn tuar ang hmiang. Thiante ruala ka hming dai tur chu, ka ui bik hlei lawng e. Khawinge, inbei tak tak ang hmiang tiin, arawn dawk chhuak ve zat a. Avan thlamuan thlak em. Thiante awkâ leh inpekna ril tak avang chuan, ka thinlunga zâmna leh hlauhna te chu, huaisenna leh phurna rilru nen beiseina thar neiin min rawn kaihthawh sak ta a ni.

.
Kan silai te chu kap ruallo in, a indawt zelin kan kap a. Tun ah zet chuan, kan thawm chu mitdel ten hria se, an hmu chiang viau ta ve ang. An chak tulh tulh a, kan chaklo tial tial thung. Thiani ber a chau tawh tlat, atello chuan engmah kan ni silo. Kan silaimu pawh azo tawh. Chemtum nen thiani thla phen a, lo din chu kan tih theih tawk a ni. Chhumdum chhah zet chu, hlawm khat te te a, kal darhin hmun tamtakah an insem darh a, kan inkar pawh azim ta kher mai le.

.

Ruangâm neive si, hmel hmuh tur fak awm silo. Lian tak tak te chuan, min rawn pan dùl dûl zel a. Chet ngaihna a awm tawh lo. Hnungtawlh tur pawn kan tawlh thei ta silo. Thiani chau țhu sawp niaih chu, din tumin an inbeng kang uaih uaih a, atho thei ta tlat lo. Chu chu din hualin, chemtum nen inhùm sek in, kanlo in ringve tawp mai a ni. Min rawn zim hnai zel a, thinrim rum ngul ngul thawm hian ngaw chhung chu, akhat ani ber. Thiani èng var vawm chhuah chu, a chuai telh telh si a, kan awmna pawh athim ve telh telh bawk. A thim rual rual chuan, min chîm huk dawn ani ngei ang. Dam a, chhuah in ringlo leh thi tur tho tho chu, theihtawp chhuaha lo țan bak, tih theih a awmlo.

.

Ramsa thinrim rùm thawm ang mai a, a rik hum hum rual chuan, athim riai riai a, kan zukchal lu chu, hmeiche rawl ngeiawm leh țihbaiawm zetin arawn nui chhuak uar uarh a. A ring bawk a, ngaw chhunga an thangkhawk awr awr mai chu, a rapthlak takzet a ni. Thiani chu mangang awrawl țanpui ngai, khawngaih thlala zet hian arawn au chhuak ve a, thim chhah takin min rawn tuam zui ta a ni.

.
Reh beh ang mai a. Ka thawk rawn sak tial tial chu, tih ngaihna hrelo in. Ka kut chuan ka nghawng chu, zutin ka hai vak vak a. Ka țhiante thawri hrawp hrawp pawh ka hre mumal hlei thei tawh lo.
Ngaw chhung rawn eng uau leh thil var rawn thlawk chuai chuaih ka hmuh takah chuan, boruak pawh ka hìplut leh thei ta. Kham khawp hip tumin boruak chu, ka hip kawk kawk a. Thiante khuh bawrh bawrh thawm chuan, min thlamuan sawng sawng mai. Thiani hlim awri han chiau chul ka hriat rual chuan, kan awmna chu, darthlalang ang mai a thil fim tak. Mahse, fawn deuh hluau hluau hian a rawn kual khung a. Ka harh sawng sawng mai. Thiani nui hmel chu avan mawi tehreng em. A mitmeng mawi tak, dul riai tawh kha, lo nung thar leh in, a mittui luang ngiai ngiai karah chuan, paw nalh takin a de sar sar a. A mitmeng paw riai, hlimna avanga de sar mai chuan min rawn en a. A Lawmna mittui karah, biangsum lang kalh a, min han nuih var var mai chu. Han pawm a, kuah nawk nawk mai kavan chak em. Chu erawh, amah leh țhiante ka zah avangin ka insum thei hram a ni. Mahse, amah zawk chuan, min rawn pawmin, ka äwmah arawn bei tlawp a. Lungchim taka lo pawm vawng vawng chu, ka inthlahrung bik ta lo.

…...

Thian ten mitla lo lèk a, minlo thlir ngawih ngawih tak ah chuan, ka inngaihtuah harh ve chiah. Puia leh Sawma chu, hmuh thiang lo hmu ang maiin, anlo ding kâ dun ho mai. Milim ang mai a ding khawng reng chung chuan, mitmeng bial leh phäwk zetin minlo thlir dun vawng vawng a. Kan hnunglam a hmeichhe aw in, a hrawk thak lo pui arawn then rik takah chuan, inherin țhian'i chu ka thlah a.
Kan hnung lawka lo ding, nula nalh leh hmelțha zet zet, pasarih lai chu ka hmu ve ta chiah, ka țhiante kha'n hei zawk hi ani maw anlo thlir. Ka hamhaih lutuk awm ngaihna hrelo a, ka lungpui din ngawih reng lai chuan, alaia ding. A nulian ber leh thuneih hmel tak chuan, rangtakin kan inthiarfihlim vat angai. Pahnih in, kan hnung rawn dawl ula, keini kan lo hmasa ange, nang an bùkah kalin, an bungrua i rawn ken sak dawn nia. Mualțhuamah kan lo awm ang tiin, asir ber dawt a nula tleirawlte, tituai nalh zet leh zuan zang hmel fahran, duhawm tak chu an kawk a. Rang takin ani chu, a bo pil ve nghal a. Ama sir veilam ami pahnih, midang anglo tak a, hang lam deuh, mitmeng hring nalhzet pahnih te chu hnungdawl turin, an awm hnufum thung dawn a ni.
An hmel fel veng vawng, chiangkak mai leh an piannalh zet chu, an vun hang lam deuh nen chuan, a inchawih mawi hle a. Hang han tih le'm ah, midang aia, an ngo loh na chu, an han na leh mawina zawk ani thung si. A dang zawng chuan, min kalpui han ti ila, an rual chuan, kan lèng delh delh ani ber. Indo, țan ani dawn ta. Kan mite tam zawk kan chah belh angai ani ati bauh a.

.

Mualzawl pharh dup mai leh chunglama arsi pe tuarh mai, lan ut theihna hmunah hian kan țum ta a. Awle, hetah hian in him ang. Nimbas ati niin ka hria, Ani khan in bungrua te arawn thlen hunah, sihpui ngaw saw helin, in haw dawn nia. Hei i țhiannu hian a hruai ang che u, i laka alo tiam tawh zawng zawngte pawh tih hlawhtlin ani ang. Inchungah kan lawm takzet ani. Nangni awmlo ula zawng, kan tan hneh rualloh in an chak vat ngei anga. He ram ațang hian min um chhuak mai dawn a ni. Kan tana tih theih loh leh kan harsatna min sut kian sak tute innih avangin, kan mite zawng zawng hian kan hre reng ang che u. He ramah hian, intu leh fate thlengin, engtiklai pawn lawm inhlawh reng ang. Hun dangah kan inhmu leh dawn nia. Kan inbuatsaih angai si a. Kan lawmna ang pawn, inchungah țhat kan chhuah hman talo hi min ngaidam ula, i țhiannu kutah engkim ka hlan a. A nin kawtchhuah thleng thlah cheu in, kawng tluanin aveng ang che u. Kan inhmuh leh hunah chuan, saw ngaw saw, keini leh nangni ta anih tawh ngei theih nan, ngaw chhunga huai awm zawng zawngte saw kan um chhuah tawh ngei ka beisei. In sa duhzawngte kap in, in vangkhua ah hlim takin, salu ropui tak tak hawn ula, in rùn chhungah va lawi mawlh ang che u. In salu hawn ten, in banglai mawi se, sumhmun leh archhiar thlenga inbang mawi turin, in hnena lawmthu sawi nan leh kan tih theih tawk salu pek che u kan tiam e. Kan mite zawng zawng leh he ram hian, engtik lai pawhin alo lawm reng ang che u ati a.

.
A mi tirh, Nimbas atih mai tleirawlte, hmelțha zet chuan, kan bungruate chu, abo abang awmlo in, arawn thlen a. A nih mangțha rih phawt ule, kan kalsan phawt ang che u tiin, nui var var chung chuan bân vai chungin, an liam ta diak a. An va hmuhnawm tak em, khatiang reng reng a, mittlaina kha a awm thei dawn em ni.

.

Puia leh Sawma awm ngaihna hrelo pawhin ngai an awh țan ta. Kan bungruate chu khawmin, kan silai hlo la neihchhun te chu, kan bun khawm diat diat a. A hlo chu kan lo la ngah khawp mai, mahse a mu ber kan nei mang tlat lo. Mupui pahnih leh LG mu thum chiah kan neihchhun ani si. Kan han insem diat diat a. Mahse, ala bang pahnih chu kan inhnawn kuala, chang chuang duh bik kan awm silo. Sawma chuan tiru, țiau lung chang hmang ila, kan siam belh țeuh mai dawn alawm ati a. Puia chuan, nui suk chungin a hman tlak loh, hmanah ka hmang chhin tawh alawm. A phuh keh vek zel arawn ti a. Thiani chuan a aw rawn then khak pahin a rawn țawngchhuak a. A lam hawi țhap pah chuan, a thusawi lai chu mitla lèk lo in kan lo thlir ngawi renga.

.
In pi leh pute khan, rawbul chang țha hi la in, an hmang țhin asin. Chung hmang chuan, tumpangchal leh sai ngho chhuak chenin anlo kap tawh țhin. Nangni pawn tive mai rawh u. Tiru, thlang lawkah khuan, luite kamah puk nuam tak a awm a. Hahchawlin chawte fak ila, zanin tum tawina leh riahbuk atan chuan duhthusam ani ati a. Hma ahruai zui nghal a, a hnungah zuiin, a kawngbawr nalh zet leh mawngbawr chhing vawng laih mai in then tawn vel chu hmu phak rengin kan zui dat dat a. Thiante mitmeng tur ka ngaihtuahin, ka thikthu chhiatna alo chhuak a, țhiani hnung chiahah chuan va kalin, Puia leh Sawma mittlaina ka duhlai bik bik i mawngbawr chu hliah pahin ahnu ka dawl ta thèn a.

.
Puk kan zuk thlen chuan, kan in nghat a, luite tui fim luang her her chu, chawi turin ka chhuk a, Puia chuan raw bul chang chu kan zawng ange tihpahin, a chhuak zui ve nghal a. Sawma pawh thingro fawm turin a tek chhuak ve vat a. Luite kama, mau pum lian țha deuh deuh leh chãng khât deuh panga ka sat a, a châng sawh pawpin tui ka thun khat vek a, thingțang ro tlem kala bawk a, tan sa in ka ipte puiah ka ak a, tuium chu ka phuar khawm leh a, puk lampanin ka pu chho ta a ni.

.
Thiani chuan puk ko tlangah nui sanga minlo lawm pahin, ka tuium put chu min han chhuah a. Ka ipte puia ka thingro ah chu phawrh pahin, meichhem ka țan zuive nghal a, chaw bel chhuangin, rawngbawl kan țan zui ta a ni. Ka rilțam zia ka hrechhuak ve chiah. Ka rilru hria niawm takin, țhiani chuan kan sarep hrang lian deuh pahnih chu, a hem tlawrh siah siah a, kha hei hi eila, han in hnangfâk phawt teh, i țam chhawl țep tih ka hria ania. Ka tan hian i hlu in, ka chhuang takzet che asin. Min hawsan hun chuan, ka rawn ngai ngawt ang che. Nangmah ngai em em chungin, he ngaw chhung reh takah hian, kalo nghak reng ang che nga, kan sulhnu te chhui in, kalo tei rek rek dawn chu ani si a, lo ramvak leh vat ang che aw.. Tunah chuan, intih tur leh tih tum te inti zo ta si a, he ngaw hi intan ahim rihlo bawk nen, min hawsan angai ta si. Ka lungleng lawk hle a ni. In châm chhungin inkawmna hun țha lah kan nei mang silo a. Ramsa zingah insul hnu leh inhmun hlui te fang in, kalo van ruai reng mai dawn anih tak ber hi. Ngawiteh chu, kawr kam lehllam ah sawn sakhi tuai a hùk țhat țhat mai. Iva kap dawn em niang, sarep chhum leh sakhi chek han hawp pawh i chak tawh lawm ni anti zui zat a.

.
Rangtakin, ka silai mu neihchhun nen ka inpu chhuak ve nghal a, kawrte kam ah perkaiin, thlanglam ațang ka veh chho a. Chawhnu lamah chuan, thli hi chhuk zawngin a thaw tlangpui a, chuvanga chho veh kani. Mahse, tih tlan palh hlauh thu hla ah, pawt ham a, koh mai chu țha zawkin ka hria a. Thingbul phen ațang, hnah nem chu ka kutzung karah zepin kan ham ri a. Reilote ah ka chhak lawk a sakhi tuai rawn dak thla hau chu, awlsam takin kalo kap thlu a, puk lam panin ka paw haw ta a ni.

.
Puia chuan, puk kotlang ațang kha iva hlawhtling ve, khawnge i țhiannu kha arawn ti a. Chhang lemlo chuan, ti teh minlo pui la, zanriah hmeh atan puah teh ang, a chek kan hawp hman lo palh ange. Rawh buailo in, avun lip ila, asa zawng kan rep anga alsam mai tiin, luite kam zawlah kan puah dun ta sawt sawt a. Sawma pawn a vawihnihna atan, athing fawm arawn keuh ri dap a. Kal leh nghal mai atum lai chuan, duhtawk mai rawh, thingțang ro kan kuai anga, hei buk bula hnahkhar kung hring te nen, zanin chu kan in hmang ral mai mai dawn nia, i hah lutuk ange. Sarep tur tihtham pawh a awm loh hi tirawh, minlo puive zawk teh. Tul tur lo sui la, asa țha lai lai hi kan rêp dawn nia kati a.

.
Rawn chhuk pahin, ka pawi tih loh zawng tak ani. Ka thing fawmna bul hnai leh kan puk bul velah hian, bengtawia(sakei) rim leh thawm ka hre tlat mai. Ka awm ati nuam hlek lo ania. I țhiannu kha hnawh sawn tir la ațha ang arawn ti a. Puia chuan rang zetin, kawm ngaih dan zawng ta che, venghimtu țha tak aniang chu, hei a țhiani awmna pawh a hrelo a, alungleng chevel peihlo in, kan pahnih in min pùr anih hi. Hrethiam ve ta che, ani ber a awm a, i țhian bengtawia te mai mai chu, a uipui hauh leh bawrh bawrh mai dawn alawm. A bulah zel hian awmla, i him ani mai alo ti fiam bawrh bawrh a.

.

Pui lubuk, uang uang țhin suh. Ka uang hlek lo ania, in hlauh loh vang mai a, fiamthu nan hman zel mai. Ani ai chuan, huai ho kha ka hmachhawn hrehlo zawk ati deuh hmuk a. Puia chuan nui put put chungin, duhloh zawng leh huat zawng lah hi, pe chhe thei bêi bui si. Nula rual zinga i mitmeng leh awm dan mawlh kha, kala theih nghilh theilo anti zui zat a. Kan chhak lawk hnahthial hmun velah chuan, thingțang han tliak ri hi arawn ri chhuak leh zauh țhin a. Sawma hawi țang hru țhin chu, dem lemlo mah ila, hmulo derin ka ngaihsak duhlo lui a.

.
Kan sa puah chu kan zo a. Tula kan thil bang leh aruhkawl te chu, hnut chhiahin, kan duh chin zawng chu puk lamah kan thiar chho a, puk kawt ko tlangah arêpna siamin kan rêp a. Chawhmeh atan sakhi chek kan siam zui nghal bawk a. Thiani chuan chaw minlo chhum sak diam tawh niin. Eng vanga bo ta daìh nge maw anih ti a, kalo ngaìhtuah lai chuan, Sawma chuan, chu ngaithla teh u, kan sa hnut chhiah kha, a khel ri bup bup mai tihpahin, puk kotlangah ava dak chhuak a. Ehiau.., han en ve teh u, a lena alen zia khu, ati chûl mai. Puia nen chuan kanva dak ve vat a. Kan thlang lawk kawrte kam fai laia, kan sa channa ning nawi leh ruhkawl te chu, pu sawn lemlo in, a bawh chilh a, alo khel mial mial mai. A hmuhnawm bawk a, mitla lo lêk in, kan thlir ngawi țhap mai. Thim thet thet ah chuan, a duhtawk angah ta aniang, kawrte kam lamah a insaseng ta a ni.

.
Puia chuan, sakei hi chu pasalțha ani a, ze mak tak tak neiin, zahngaihna te, dawh theihna te, kher khiap riauna te leh thil duh uluk leh fir tak ani a. Cho chi ani lo. Hlauh vanga, alak ațanga him theih ani heklo. A hùhäng ringawt pawh hi pa naran tan chuan, khurh chhiat na tham ani reng. Sawma ka sawina che anilo ania tih zauh pahin, a sawi zawm zel a. A dangdai ve khawp a, a sa seh reng reng, pianțo diklo piangsual chu a ei duh hauh lo. A sa keuh thluk pawh dinglam zawnga tlu lo chu a eilo anti hial țhin ani. Barakhaih te hian tlanchhe mahse, a fiah leh ngei ngei țhin. Chuvangin, in saseng vat tur a ni. Tin, upa in, sawng sawng, bak, bak, tih chauh lo chu asawi thei vek anlo ti mathlawn lo in, hmeichhe nuih ang te hian a nui uar uar thei a. A phun bul bul thei bawk. U ngau hram te hian ahram ve fo thin a ni. A sa seh sa chhuh sak reng rengin, e pasalțha zar kalo zo ve ange tihpahin, kan duhlai hleh a, laksak vek loh tur a ni. Alo riltam viau si a, laksak vek anih si chuan, a duh bik vaklo a, thlamuang takin a thlah thlam ngailo. A hel zankhua zak zel. Tun hma phei chuan, sakuh thangawk ru te hi, a zui zel țhin anti bawk. Mi a zuan dawn reng reng in, a awp hniam a, a zuan dawn țep ah hian, amei hi ati che ngei ngei a, chu chu hriat kar tur a ni. Ramrilah sakei ti a, lam fuk fuk te kha, kan pipu te khan an duh ngailo a. Alo hnai duh e anti a. Chuvang chuan zah takin, sapui anti kher țhin a ni. Cho chi anih loh zia chu, uBawla ațang pawn a hriat kha, lo vah riahbukah zun cheh phungin a khurh chiam mai kha. Uire inpuang duhlo te hi, atih țhaih duh hle bawk. A kawng kân bih zui leh chhawl vawithum athliah hnua palzut luite hi chuan, an awrh nawlh duh viau bawk. A inthup thiam em avang hian, di zai khat pawh a phen thei anlo ti hial țhin a. Hliam tuar leh tar chak tawhlo te chauh hi, mihring tan an hlauhawm a, ramsa an man theih chhung hi chuan, mihring tan an hlauhawmin, an hnawksak lemlo. Tin, Ramhnuaia chakâi rawh hi, țhenkhatin Ramhuai cho na anti țhin. Ka hriatve dan erawh chuan, sakei a hnai duh anti thung. Chakai leh sakei hian thawnthu an nei dun ve tlat. Țek tla nen hian, ka tehkhin ber. Hlauh loh theih loh, hlau ringawt mah ila, awmze awm silo a ni. I hmu anih pawn hmulo der la, hel mai rawh. A man a relh bosan loh vek che chuan, aveh zui ang che. Barakhaih..,, anti thut mai chu, a bula țhu, tui em em a, athusawi lo ngaithla tu Sawma chu, khaukhuap hup țhelh ang mai in, aper dawrh mai. Puia nui tlawrh tlawrh chu, nam thlek sawk pahin, vei che chuan, minva ti phu chiang kher ve, ila hreve khawp ang mawle, mi han tih dan kher kher chuh. Thian țha nilo la zawng, i thluak kha i kezungpui ațang ka hip ang, ati nang nang a. Puia lah dul dawm meuhin alo nui dir char char a. Kei ngei pawh mittui tla phungin kalo nui ngat ngat bawk a. Sawma lungawilo pawh anui tum hman hman tho mai. Chu hlei hlei chu, nuih tiza tu ala ni tak deuh deuh.

.
Kan buaina tawh zozaite ngaihtuah in, hetiang khawpa hlimawm tawng leh thei hian kan mawi mawlh lo. Mahse, kan hlimna hian hái hlim a khùm hial ang le.
Puia rawbul chang rawn lak chu, kan tan sawm a, a chang țha hlawm bawk a, chema kan han sat te chu, ari rawt rawt thei hial a ni. Mahni duh dan danin kan sui mum ta vel a. Sawma pek chuan, mu sau kan siam țeuh teh ang. Sui mum a har emai, ati vei sauh sauh a. Puia chuan an ensak a, ka naute duat hetianga mu sau i siam chuan, i silai dawt i kap keh mai dawn asin. Musau i siam chuan, a ngilin a chhuak zar zar thei tur a ni. Heti te chuan, a vang zawngin aleng lek lek a, atawt leh lawi bawk si. A dung zawng hlirin a chhuak thei ngei tur ani e. Tiin, an hrilh dap dap a. Kan siamsa te chu kan han rawh chang deuh a, hla tak ami kah nan anih ngawt loh chuan, hman tlak ve hle tur ah ka ngai. Kan silaimu chuang pahnih zinga pakhat chu ka chang leh a. Pakhat zawk chu, sawma kan bel lui thung. A țang viau na a, Puia’n nui tut tut chunga, i țhian bengtawia i hlau ani lawm ni. Keini aiin silaimu țha i mamawh tam zawk antih takah chuan, hreh tak chungin ala ve ta nge nge a.

…..
Sawma chuan, Puia hnenah țhiana pu Chhinga khian, U.T silai (pangcheh/ khangzep) hian savawm lian deuh deuh a kâp fo mai a. Nang hmuve tala, i kap ve ngam angem tiin, an zawt a. Puia chuan, ngah nge ka kah ngam loh ang. A aichang zawk, lung pawh kan kâp ngam ang chuu..,tiin, alo chhang a. A ngam hmel miah miah viau in ka hria. Savawm kher hi zawng, a ä bèng bùang si. A thikthu a chhe viau nge ni. Mi a beih lah hian, hmel hmai kher hi atum chat mai leh nghal a. A nelawm viau lo reng ani. A khuai lakna sulhnu hmuh ringawt pawhin, ramsa zuamawm tak zawng ani lo tih ahriat hliah hliah mai. A nungchang buluk tak hi zuam sual a awlna tak ani leh nghal. A vun hi, kahpathir țha mi ang mai a. Savun azawnga khauh leh fei ber pawl ani a. A luruh pawh chang tak ani reng a. Chema han sah pawhin, pachak bik tan lo chuan, khuangpui vuak ang maiin, a ting ul mai a. Chem hriamna pawhin, awmzia anei mawh khawp mai. Intawh chilh ah chuan, au vak mai tur a ni. Loh theihloh a. Chemtum nen, hmachhawn angai anih chuan, a hmui tum chat tur, savawm hian tlan pahin, mi a bawh mai lo a. Hmazawnah a ding kang deuh ngei țhin. I thi der anih chuan, i hmai hup tlat ang che. I tlanchhiat chuan, kawng chhuk ah tlan tur, an ke hma atawi zawk avangin chho aiin, chhuk tlan an harsat. A țuan muang viau emaw iti maithei, amuang lemlo. Tho thlawk aman chat chat thei tlat. A sa erawh, athau lai lo chuan, a ei tlak hran lo. A thau țha chu, atui viau lawi si.

.
Silaimu duh ang kan siam zawh chuan, kan chau tlang tawh bawk nen, mut kan tin tuah a, kan insing sak vel lai chuan, kawrte kam lehlam hmuh phak mai a, thinghmun ngaw chhung ațang chuan, sakei arawn hahum ta mai a. Alo la kalsawn aw zawng lo mai. Pûk kawngka a, rawn hâhum ang mai a, ahnaih avangin, chulam chu kan hawi țhap a. Sawma chuan, kan țhiana chu, a kalbo tawh emaw tih naklaia, kan sarep arawn beisei em maw nile, ati nuah nuah a. Puia chuan, kan ti suh. Nangma pual bik liau liau a, i țhianpa ani e. Sarep aitui imu vum thur dawn tih ahria anih chu, midang min khawih tel loh nan, kawng ka bulah mu ang che anti fiam a. Sawma’n ka duh teuhlo atih bäi bäi lai chuan, kawngka bulah Puia chuan, mutna asiam mawlh mawlh a. Kalo mu ang chu, kan ti khawmawi ve bawk a. A ngailo ve, asa tuilo ber tur ka nia. Min it lo ber ang. Sawma’n, min veng dawn leh nghal tihpahin amu thla tawp a, Ngai pawimawh lo zetin a zal ar ar mai a ni.

.
Kan chau tlang bawk aniang. Reilote ah kan muhil nghal ni tur a ni. Thiani aw in, min han koh ri ka hriat ruala, thlifim rimtui zetin, min chhèm thawh chuan, pùk kawngka ațang, țhiani hmel paw eng phét maiin, minlo hui zauh zauh chu kava hmu a.

.
Puia leh Sawma chu, anlo mutui kher mai. I țhiante kha chu, ngaihtuah duh suh. Tui takin ka muthilh tir anih kha. Ti teh, zanin chu thla eng hnuaiah, khua i chuan ang hmiang. Hun erawh kan ngah tawh silo a. Hmun nuam tak pawh kan beisei thei lo ang. Kan mite leh huai ho pawh, indo turin, an in ep ut tawh a ni. Chuvang ania vawin pawh khan ka kalsan thut che angaih tak na chhan. Kan ù i khan, hmun him leh in hawna tur kawng min hrilh a. In haw vat a duh bawk si. Ngawi rengin ka kalta mai anih kha.

.
Enge maw pawimawh inei anih kalo ring ve ngawt reng asin. Ka țhiante hi, an ngaihtuahawm lo ang maw... Keipui kha helai hnaiah hian, a awmve reng si a. Hei tunah pawh arim kala hrethei leh nghal ka'n ti a. Nangmahni veng tur a ka rawn tirh alawm. Huai ho kha'n nangni hi zawngin, khawchhung inthlen hma ngei a, thah cheu antum ngei dawn si a. Chuvangin ka uipa hi, nangni vengturin ka dah ta a ni. Huai ho a hmuh phawt chuan, kalo hre nghal mai dawn alawm. Ti rawh le, atih rual chuan ka kawngah rawn dawmin, ka kut chu, akawngah adawm bet tel bawk a. Kawrkam lehlam, hmunsang zawk panin, kan leng chho ta delh delh a.

.
Mualdung sang lai, tlak lam pangper a hmunzawl rai nuam zet lo awm ah chuan, țumin khua kan chuan ta a ni. Thla rallam êng dul raih in a chhun ên, kawr ruam țiauchhum in, a bawh inkham var zui mai leh, thinghmun ngaw, lang ruih mai te. Tlangdung inkhawh khamphei leh in san hleih seng sung te chuan, duhlo eng ang mah ila, lung ati leng vawng vawng mai. Ka ngai dawn hle mai che tihpahin, ka darah a khabe rawn nghatin, min kuah pah chuan, a rawn meng de sar sar a. Thla eng hnuaia, a sakhmel mawi leh paw veu mai chu, hmuh anuamin, ava țha chung chuang tak em. A hmelah ringawt pawh hian ka lungawi hliah hliah a ni.

.
Kei pawn ka rawn ngai ngawt ang che. Nangang hi kala tawng lo mai nilo in, ka tawng leh tawh dawn silo. Ka thawk țek țek chhung chuan, ka mitthla ah i chàm reng ang. Thla eng hian nang vanga ka hlim zia leh ka tana parmawi leh éng inih zia lantir se, i tello a ka nunram nguai tur zia chu, thla mang laia, ruah thimpui lo thawk mup mup ang mai a, belhfak awmloh ani ngei ang. Nang nena kan inkawm theih lai hun lah, chutiang ruahthimpui sur buan buan lai a, aimit thlawn ang maia thim. Ka'n arkhawthim dai nawk nawk laia, käwl rawn phe èng zuai ang maia, lawmawm leh hlimawm, hun rei daih silo ani bawk si. Hetiang hun reilote hian, nang vanga ka lunglenna leh ka ngaihna che hi, an belh chhah deuh deuh anih si hi. Kan leikapui ațang ram lam thlirin, i sakruang mawitak leh i hlim hmel duhawm fahran mai hi, ka rawn mitthla țhin anga, chung hunah chuan, nang ngaia ka lunglen khawharna chu, mipa ka nih avang ngawta dan beh theih loh, ka thinlung no rawn thawk hian, ka mit ațang, ka biangah mittui aluan tir lo ang tih ka sawi thei lo asin tiin. Ka rilru diktak phawrhin a laka ka luanliam zia chu, bah nuaihin, ka phuh chhuak ve phawng a. Ka thusawi avanga, ahmel hlim no ser mai chu, avan țha tehreng em. Min han ngheng hnai tal’h tal’h a.

.
Chutiang rilru ipu chu kavan lawm tak em.. Chutiang taka min ngaih vawng vawng hun chu inei ve anih ngai chuan, ka duhlai, ka DINGDI-I khan min ngaive tak ang maw tiin, min han dawn vawng vawng la, i mang lamah emaw, in leikapui sangah emaw, nangmah hnem tur leh ka lunglenna vanga, nangmah ngaia ka vahvaihna ngawpui hi, kalpelin, ka rawn kawm hlim țhin ang che. Tunah zawng hei khua avar țep ani tawh si a. Kan ințhen nana, kawl eng tur chu, nghakhlel lo takin, kan lo thlir mai angai ani. Eng sa nge i kah chak min han hrilh teh. I zukchal ki tur pawh ka rawn la tawh a. I kah duh ber sawi la, ngaih hrui nan che. Phal takin kape dawn che nia.

.
Chutianga duh thlang theia min siam takah chuan, min beitu sanghal kawlh zet kha ka duh a ni. A ngho mawlh khan, ka mit leh thinlung a hneh tlat. Nuih har har pahin, kha zawng ala chal lo emai, a ai ngho țha ka pe ang che. Nghalphusen pawh i phù tak meuh e. Mahse, an mang țep tawh a, vulh pun leh tumin kan bei mek ani si a. Kan neih zinga, a chal ber leh lian ber nghalrul zinga ngho nei țha awm chhun, a ngho pawh nguntang chen ka rawn khalh anga, mahse i theihna hmanga i kah ngei angai thung ang. I fimkhur viau dawn nia. A lianin a chak em em a. A fing hle bawk. Keipui leh sairal te meuh pawn, anti buai ngam ngailo. Vawihnih aitam hun remchang inei kher lo ang tih i hre dawn nia. A rim hriatna leh beng afing em em a. Keipui hliam aia fimkhur mahin i bei dawn nia ati a. Lungchim taka min han pawm vawng vawng hnu chuan, a heh sen vam hiam mai. Hleh thlak hlim ang maia sen tai hlar mai leh nelthep mai chuan, keia thingtlangpa, hmui khawro leh duk cher chur chu, min han nul thuak thuak a, ka insum thei ta biklo. Tui pipe hmanga tui fawh chhuah tum ang hrim in. Duhber te heh sen vam ham mai leh sahel tui ber chi, lem buai ngailo chu, ka'n dut vawng vawng a. Thir hipthei pawh phelh ang mai a, kan inlak hran meuh chuan, boruak mamawhna alo sang duh hrep mai. In nuih tawn sak pahin, kan hmui chu, kutin ka'n han nul zauh a.

.

Pùk a kan let leh meuh chuan, kawl èng tur pawh arawn in kap var riai ruai tawh. Kan kalkawng tur leh sanghal lo tlatna tur hmun te, kan bùk khuarna tur nen lam chuan, min hrilhin min hmuh tir leh te te a. Chumi hnuah pûk kotlanga keipui lianzet lo ui țhut vung mai chu, alu ah chulin an hrilh ru zauh a. A kalsawn lai chu, thlir vang vang pahin, ka sawi kha hre reng la, puih i ngai emaw min ngaih vanga i lunglen vawng vawng hun alo thlen chuan, ka Dingdi i kha tiin, min ngaihtuah pahin,min han lam sep sep la. Kalo kal vat zel ang. Tunah chuan chanchin ngaihvenin, ka țhiante hnenah ka kalsan leh phawt ang che. I kalna apiangah inbul hnaiah ka awm reng ang. Ka awmloh lai chuan, ka uipa kha'n aveng reng thung ang che u ati a. Nui sen sen chung chuan, min bikbo san leh ta a ni.

.
Kawrte tui chu, zuk chawi pahin, ka inphih harh a. Ka mut tlem ngaihtuaha ka chau miahlo leh, mitkham leh mutchhuak ka nei miahlo chu, mak kati dawn viau a. Mahse, ka nui ta sak a, Ka ngaihtuah zui duh ta lemlo, angai hranlo bawk. Mei ka nun a, Chaw chhuan hma in, sa țhing ka chhuanga, a rêp tlem ka thuk phum hnuah, chawbel ka chhuang kai ta chauh a.

.
Puia chu ka thawm hria in, arawn tho vat a. Khai a.,,iva tho hma awm ve, i chauh awm tehreng nen, atho hma berah ilo țang ani maw tihpahin, mautheia tui chu bun chhuakin a in khawlh khawlh a. A hmai phih zui pah chuan, ka zuk chawi leh mai ang. Mit ek paih fai zet loh chuan, tlang su tur ang mai a, ka khawhmuh a buai ka hlau tlat. Mit ekin min kam meng phuau mai si a, ati bawrh bawrh a. Thianpa Sawma chu, zantir lamah amu tlem deuh ani ngei ang. A duh chen chen mu teh se. Hlauh zawng inang heklo le. Khawinge, itui chawi sa ka hmang zo mai dawn, ka zuk chawi leh ange tiin, luite lampan chuan, achhuk thla thauh thauh a. Sawma pawh meng phak chualin, arawn țhu chhuak ve a.

.
Inva tho hma awm ve, ka tlai ber ani maw, in zahawm țhin mange tihpahin, arawn tho chhuak țuih țuih a. La mu rawh, hei chawei pawh kan la peih hleinem. Ni em pawh ala chhuah loh hi, inthlahrunna tur a awmlo ka tih lai mek chuan, tui um alo țhutchilh ve mek a. Khawnge pui-lubuka hi, azing vah chhuah em ni anti a. Chhuak lo e, khu alo chhoh mek khu. E.!!.in tuichawisa ani maw, kalo benper chuaih chuaih ni. Engmah ngaihtuah lo a, kan inphih thlak ve ngawt le anti vawng vawng a. Pawiti mah ta che, hei i ú ka awma, ka chawisak zel mai ang che tiin, Puia’n arawn chhang a. Khawinge tui te tal ka chawi ve loh te'n, hnar kan hmu lian lutuk dawn alawm ati nuah nuah a.

.

Puia chuan, ka fiamthu anih kha, chawi a ngailo. Hei ka rawn chawi hi atawk lutuk, kawr kam ah sawn, i țhianpa bengtawia kha ala awm reng ania. Nang angin, ațawng duh ve awm silo a. In inngeih vaklo tur asin anti zui a. Khaw èng ah zawng, zanlam ang em chuan, ka hlau bik hleinem, sa a zawnga luruh nem ber pawl ani a ni-lawm ni tihpahin, kal țalh a tum a. I inthlahrung anih kha, chawei khamah kan insuan chhuak leh mai dawn a, Puia rawn chawisa zawng pawh kha, kan hmang seng hlei nang. Sakei awmve reng hi chu min vengtu atana țhiani dah ani e. Kan tan a hlauhawm loh. Min ti na lo ang tiin, kan hrilhfiah a. Chawbel suanin, thuk sira ka meiling thai chhuah chungah chuan hungin, Thuk meiin, apang sir arawn hem phak vel ah si chuan, changel hnahin ka khuangtuam a.

.
Ka sarep thuk phum chu thai chhuakin. Chem zäng lam chuan, kan vaw per sawk sawk a, pawt hniarin, chi kan al leh a, sakhi chek leh sarèp up hmin nen chuan, puar pengpawng in, tuk țhuan kan ei ta a ni.. Thla amuangin, rilru ah helhkham dang a awm tawh lo bawk a, thaw aveng halh mai, chawei puar viau e, tilo chuan kan thothâng ațha khawp mai. Zial zuk paha kan han țhut muan ar ar hnu ah, ramvah pah a inlam pan zai kan rel ta a ni. Kar ah zankhat tal chu kan riah ala ngai ngei ang le.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:30 pm

SAZUK KI BUNG.8
Last episode.

By Hriata Tea

………..********............
Bawr angreng viau mah ila, kan sarèp te kan han in ah sem diat diat hnu chuan, kan in zangkhai tlang ta phian a. Thiannu Dingdi hmeltha-i min kawh hmuh na lamtluang chu zawhin, thlamuang leh ngaihngam takin, kan inzui dat dat a. Ramngaw țhat zia leh, lo atana han vah vel chakawm zia sawiin kan ti ti mawp mawp a. Chawhnu lam darhnih velah Dingdi hmelțha-i min kawh hmuh, luipui kama luite rawn chhuak hmun zawl rai dup mai chu kan thleng ta a. Tlak deng tih takah ni asa in, luipui kam na na-na zawng alo phai tawh bawk nen, alum hiam huam khawp mai. Riah buk tur chu, hmalamah ban hnih phun in, a chung awn de daw, hnunglam ban awmlo in, kan zar khawmawi ve a, dai tla leh nisa vèngah changel a chungah kan han phah(zår) ve nil nial a. A bang pawh ping lemlo in, kan in nghat ve chawm mai a ni.

.
He luipui phairuam kam. Tlangdung hniam te te in a bawh, ngaw chhah țhazet mai hi, ramvah nan chuan, duhthusam a ni. Sai tan pawh chèn theihna ngei tur hmun ani a. An rawn tla lut ve fo pawn ka ring. Thiante hnenah pawh hei, kan awmna hi a sairam reuh riau mai si a. In vah na velah pawh, sai sen lakah fimkhur hle ang che u, an lian ve em em lo na a, an kawlh bik hle ania. An awm ang tih erawh ka sawi fak ngamlo a. Mahse, fimkhur tluk a awmlo ania tiin, kan chah ve ngial a. Chhun chaw anih bakah ramvah tum vek kan ni bawk nen, ei kan rel a. Haw hun tur hriat va ni suh. Kan inpeih fel meuh chuan, ramvah nana hun nuam tawk vel, darthum pelh lam alo ni tawh a. Kan bùk hmalam sir dinglam hret, hmuh phak maiah chuan, luipui a luanga. Chu luipui chu, kan buk kawt veilam ațang lui lian ve tak hian, arawn fin a. Chu lui chu, kan haw na tur lam a ni. Puia leh Sawma te khawlam ațanga rawn luang ani a. Kan buk sakna hi, tlakdèng Ni chhawng țha tak anih avangin, ni asa kher e mai a. Bungbu zawnga, min hem reng ni phei se, ek hmahruai chu, a ro țhawt thei hial mahna. Chuvang chuan, thlantla bawrh bawrh a, kan chawei kham chu, tumah țhu chawl rei peih awm heklo. Ngaw chhung dai nuam lampanin kan liam ta diak a.

.

Sawma chu, kan bùk awmna lam mualah, bùk bul vela zukchal țiau rawn țum na hnu thar deuh zawngin, luipui fintu kan buk kawt luidung kam zawlah ngaw chhung dai leh thelh hun lam chu, panin sazuk pel turin a chhuak a. Puia chuan, kan buk kawt lui chu kân in, luipui leh luite inkar mualdung rai dup chu apan ve bawk a. Kei erawh luipui chu suar ah ka kân a, favang ani tawh bawk a, malte thleng lekin, ka dai tlang mai a. Luipui kam zawl changel hmun leh mualdung hniam te te, inkhawh finna lam chu ka pan zui ve ta a ni.

.
Thiani min kawhhmuh na lam mualdung hniam ber, sai tan pawh chet harsa hauhlo tur, dai nuam em em mai chu, ka thleng phei vat a, thawm ngaithla in, kan ding vang vang a. Kalsiam in, Dingdi hmeltha-i sawina lam, mau hmun chu ka pan chho ta zel a. Chho euh euh akalin, mautlawn tluk hnih velah mualzawl pharh dup, maupui hmun thelh hùn mai ah ka han chuang chhuak a, ramril lampana kan kal leh deuh hnu chuan, sanghal hnu alo chiar phut dèp dùp ta mai le, a ke hnu chu, bawng chal hniak ang mai a lian ani a. Ka phùr kher asin. Mau zung no alo nawr na vel chu pui tak ani. Changel te deuh te nen lam chuan, alo nawr thlu sèl sul mai a. Thawm kan ngaithla vang vang a. Thli thawtna lam belchiang chung zelin, thawm dimtakin ka pèl țan ta a.

.
A êk thochimin anlo bawm laih laih ka hmuh takah chuan, fimkhur lehzual nan ka kawr leh kekawr ka'n phelh leh te te a. Silaimu țha ber thunin, ka endik leh vek a, musau rawbul chang hmanga ka siam chu, hmuam lawk tut chung chuan, ka birthday suit diktak nen, mau hmun thelh hun maiah chuan, nghalchang vehin, Ka kal ta thauh thauh mai. Duh leh lo phe ngauh ngauh ang hmiang. Sexy kan la hrelo a, seklo si pawh kan hre heklo. Duh leh sakhi te chu lo nui mai mai rawhse, tuman min hmu awmlo emai, tihvel ka ngaihtuah lo. Ka rilruah sanghal chiah a awm. Engtin nge ka kahthluk theih ang tih leh eng ang takin lian ang maw, tih chu ka rilru a awm a ni. Hetiang mau hmun thelh ah chuan inhmuh tir miahlo a, kah hman chu, thil khirh tak ni dawnin ka hria. Mahse, a hnu chuan, hmunzawl chu kalsanin, piah lawka changel hmun thim ruih lam chu apan ta hlauh mai. Fimkhur tak leh muangchangin, ka lut pheive ta țhem țhem a.

.
Changel tlu in, ahnah avuak rik hlup thawm ka hriat rual chuan, ka ding chat a. Kan lo inhnaih tawh hle alo ni. A thil tep ri chuk chuk leh nguk deuh hruih hruih ri kan hre leh a, tlailam anih tawh avangin, hmun hniamlam ka chuh a, fimkhur zetin, amah tak hmuh tum chuan, ka veh dân dân a,
changêl bak chu phen tur awm heklo. Ka him hauhlo ang tih hre mah ila, duhthlan tur dang awm heklo le, hung khat lo bawr lian bik lai atang chuan, kava bih ta a, a changel nawrthluk in, èng alo ken zau tak deuh, fai leh èng tha bik lai takah chuan, chilphuan buah hian, changel zikno alo tep chuap chuap a, alian kher e'm lah tak a, bawngdum lo bawk ang mai niin ka hria, changel zikno a seh kawh emaw ka tih chu, angho lawr lo ni rengin, ka phur lutuk nge ni, sahu sual ka nei ngai miah silo a, mahse ka sai deuh der der mai nia. Ka hun remchang chu chuhin, changel kung behchhan meuh chung chuan, kan tin vang vang a, alu chu changel kungin ahliah deuh avangin, a zakdawh ah alung pawh ngei turin, kava kap ta a ni. Ka silai puah rual deuh thaw a, Puia kalna lam atanga silai rawn puak chuan, min hmakhalh hret avangin, ka silai puah ruala sanghal han phuzuk chu ka hmu hman a, ngek țhawt pahin, a hawk zui dawt a, abo ani zui ta mai. Silaimu kan thlak leh te te hnu chuan, a dinna hnu chu kava belchiang a, kah zawng ka kap fu ngei e, athi far pawh a lung ațanga rawn chhuak ngei niin ka hria, mahse, athim ruih avangin, thisen chu bih hniam deuh chunga chhui angai a ni.

.
Chu hmun thim rei ruai chu, ka tan vanduai theihna awlsam tak ani a. Sanghal tan lah țan hmun țha eltiang ani thung. Ka fimkhurna zawng zawng sawm khawm in, ka lungphu ri pawh ring ti em em chung chuan ka chhui phei ve zel a.

.
Nghalchang han hawk dawt leh changel hnah ri thûm hlup ka hriat rual chuan, ka sirlamah ka zuang dawrh a, ka awmna rawn èng phei suau chu, ngaihsak zui lo in, ka taksa inher ruala ka silai dawt inher in, nghalchang min rawn phin phei leh mek tu chu, la tin zawn hman heklo. Changel hmun rawn sam pheitu nghalchang chu, bum turin ka zuang sawn hman hram a ni. A changel rawn tai thluk lah chuan, ka silai min vuak per sak daih mai leh nghal, chu nghalchang zet chu, ataksa len ang angin, țuan ranna pawh a țhanpui zel ani ngei ang. Thalfang ang maiin, aving ther ther mai ani ber e. Mahse, a changel tai thluk te avanga, kan inbeihna hmun èng tulh tulh chu, ka tan hun țha ani ve țan tih reng a hrelo. Min tâi fuh loh avanga a thinrimna chuan, a finna leh fimkhurna a hlauh țhen tir ani ngei ang.

.

Ka silai chu, changel tlu in, a käwm lam a delhbet tih kava hmu a, mahse, nghalchang rawn dùk phei pur pur chu, ka mit latu leh ngaihsak ngai zawk ani rih tlat. A hmazawna changel te chuan, a tlan dan antih muan phah hauh silo. A fik zawh loh te pawh, ka hnunglamah te chuan, anla tlu ri leh dup dup ani si a, changel hung lian deuh chu țan chhanin, kalo inring ran a, min rawn phin phei mek tu, nghalchang chu zuan khùmin, ka silai awmna lamah ka lum phei a, kan pawt chhuak mai dawn a, a hmeh perna kurkum, kualkhungtu chu, hruiin alo bat tlat mai. Thinrim leh hmanhmawh zetin kan pawt vak a, a ulhbunna lai alo bat tel niin, ka pawh chhuah rual chuan, silaimu atawlh chhuak ta daih mai a. Thun leh na hman awm heklo. Ka silai dawt chuan, min rawn phin phei leh lai chu, alu ah kalo hawlh a, a tlan chakna tha ring chuan, ka theihtawpin, ka sir lamah kalo nawr kawi ta ringawt mai a ni. Min pelh rual rual chuan, ka țhingțhi rawpa, silaimu chu ka thun nghal vat a, a rawn inher rem leh der tawh mai.

.
Ka lampan a, arawn lím phei leh rual chuan, ka ding chhuak a, țanhmun țha en in, ka hawi zuaia, ka sir lawk a. Changel tlu säwp, kang sanglai ah chuan ka zuangkai zui zat a, min rawn pel nghal fua mai. Ka insiam rem zui vat a, changel bul lian țha zet mai țan chhanin, kalo inring ve ta a ni. Zuan sawn mai inpeih at chung chuan, ngunthluk leh uluk zetin, min rawn phîn phei leh mektu, nghalchang lian mangkheng chu, kalo tin vang vang a. Kan karah hlamhnih lo liam atla awmlo e tih ah chuan, ka silai chu, ka hmetpuak ta dur a, keipawh ka sirlamah rang zetin ka zuang sawn ve nghal zat a. Din chhuah pahin, ka silaimu kan thlak vat a, ka inphenna changel kung chu, ari truah truah a, atlu ta dup mai, a bul chiah a, nghalchang lianzet, ke lo lèng ut ut chu, en reng chungin, alu lam hmuh tum chuan kan helkual a, a nguk ri pawh, thi tur chalchang awrawl ngei niin ka hria, kan hnaih deuh hrat hrat a. Ngùk deuh hruih paha, arawn che leh chu, thawh tum ang maiin, arawn kang uaih a, ka kah nawn leh hma chuan, a let ta hut mai, che zui tur a awm talo. Kan tlawh nghing lawih lawih a, afawn deuh luar luar thei hial mai. Kan țhian thum tan chuan, asa hi hawn sen pawh ani dawn lo tawp mai. A ngho chhuak lawr vurh mai chu, ka thlir nui var var reng mai a ni. Ka’n chhu bil nawk nawk a, a ropui ka tih em avangin, alu chu ka tan a. A sa dang zawng chu, ka chhawl chhin hnu ah, buk lam panin ka kalsan ta a ni.

.
Luipui kam ka zuk thlen chuan, unau hmelhai hun vel ani tawh a. Lui tui chu kân pheiin, kan kùk zauh a. Sawma'n min rawn chhawn vat a. A mei chhem êng pawh ka han hmu ve nghal zat a. A thleng ve chiah ani ngei ang. Aw'kà zangkhai takin, min rawn be lauh lauh a. Buk kawt ka’n thleng chu, mei eng a zukchal ki hreu mawi leh ropui zet mai chu, ka hmu nghal a. Ka salu ah chu, khai chhuakin, abulah kan nghat a, ka light a kan chhun èng chu, amawi in a ropui danglam kher mai. Sawma zukchal kah lu chu, kan kuaileta ka'n thlek vel chu, a ropui in a turu tham kher mai. Hmu ve ta ila, kap lo chuan ka kalsan phal bik hauh lo ang. A lu duh vang ringawt pawh hian ka kâp duh ngei ang le.. Min thlèmtu te chuan-na zukchal lu ang maia hreu mawi kha ani tlat.

.
Hei i van kap ropui bêr bêr ve, khawia i kah nge ka’n ti a. Ka rawn haw thla lamin, i silai ri ka hriat avang khan ka ding khawmuanga, khi kan chhak lawk kawi ah khian, alo ding vung vung mai a, ka’n kap kha, hniak phawi hauh lo in a tlu nghal mai. Luikam țiau zawlah khian, a lu tello in ala let hut ta ve ang ati a. Nang nge nge, zukchal ki hreu mawi tak i chhuang haw vurh vurh dawn zuk ni a. A hlat loh chuan, kan han chan dawn nia. Puia hi ava rawn haw ve har ve aw, a silai ri ka hriatna arei tawh viau asin. Ka buaizui ata lângin a thawm ka hre zui talo a. E hee..!! Nangpa mai mai chuh, i sakah lu țhut hliahin ka salu hawn in dah ropui vel a, i hmui fakna a khat hian, ka mit alo tidel rei lua ani maw. Khawinge dang-awm teh, kan belchiang teh ang. A van puive aw,, Sai lu emaw tih mai pawh a awl dawn zuk nia le, hetiang reng reng a sanghal lu lian leh ngho sei kala hmu lo. An sawi pawh ka hre heklo. Nghalphusen, a ngho themtleng chen antih lah kan thawnthu hriat ani mai si a. Hetiang tiang a awm thei ang tih ka ring hleinem. A taksa pum hmuh ka chak hle mai. Ka zukchal kahna chu a hnai tho. I kah ngei hi, han chan hmasa ila ațha ang. Ka'n Pui-lubuka pawh chu, ava rei ve mawle, eng sa tak kap ve ang maw.. Ramril hi nuam ati khawp a, a khawlai len hawh hawh pek aniang kati anti zui zat a.

.
Aw rawn then kharh kharh pahin, enge ni leh ta pek, awmloh san hlek che apianga, minlo sawi nuah nuah ziah mai ni. Min ngai viau ani ngei ang chu maw... Arawn ti bauh a. Kha eng lu nge ni ngai, a ki chu ava mak reih ruih ve tih leh Sawma chuan, Puia chu pan phei aruala, Puia chuan, asa lu rawn ah(phurh) chu nghah pahin, selè ni hmiang kati mai, mahse aki erawh hi chu, a danglam thlawt ani. A chhip lam ațang, a uai thla a, arawn kawm chho leh vurh mai a, tumpang ki awrh an tih ang hi ani ngei ang. Ka vanneih asiamin, ka vawikhat kah ah ka kaptlu ti ila, atlan zui na a, kan chhuizui deuh a, alo thi tlaw der mai. In hmuh ve atan ka it em a, alu chiah ka rawn hawn anih hi, i silai ri kha kalo hria a, a rik hmasak leh hnuhnung inkar kha, a inhlat angreng sia, arikna hmun erawh a thu hmun viau lawi si. Eng sa nge i kah tiin, min zawt zui zat a.

.
Ka hliam deuh a, kan inbei buai deuh alawm mawle... Khai a..!! Hei hi maw., ava pui ber bér ve aw.. Tiin Sawma zukchal kah lu chu, an kuailet tawn vel a, Sawma chuan, kha aia turu zawk mawle, hei han enteh nghalchang hetiang reng reng a. Ngho sei kala hre ngailo alo ti vat a.

.
Kan kah loh țheuh chu in fak sakin, kan ri lè lù mai a ni. Heti chuan khawchhung luh anuamin, hmai a uang thei deuh ngei ang le.. Tlang kan tlir pui dum dum ang chu Puia chuan anti a. Ani reng a ni. Tu kah ber pawh hi, uanpui tham khawpa ropui ani vek tlat. Puia kah erawh la hriat ngai loh tih takah amawi in, amak danglam hle a. Sawma zukchal ki reng mai. Kawngka ti zahawm tu ngawìh ngawih tur ani si. Kan phur tawk tur țheuh, kan sakah te chu, kan duhlai lai kan hlep a, zanlai thlengin sarep buaipui reng rengin, kan buai a. Kan hlim hle bawk a ni. Khaw hnaih deuh na nise zawng. Khaw mite hnenah asa kan han phurh tir ve tur ani na ale.. Kan inhawn seng dawnlo nasa mai si a. A uiawm duh ngei mai. Mahse, a sa aimaha kan hlut zawk, alu kan hawn duh miau si a. A sa zawng ka'n ui buai duh ta ting lo. Puia'n kan sa țawih ral mai mai tur chu riah chilh a, ei tluk tluk mai ani ka duh anti bauh a. Sawma chuan, keizawng, In thlen mawlh ani ka chak tawh ni. Kan ina la lut ve ngai reng reng lo. Zukchal ki hreu mawi leh ropui tak ka hawn dawn si a, ati ve thung.

.
Mutna siamin kan mu zal a. Rawngbawl hman ni heklo. Sa kan ngah bawk nen, sa hrang lian zet zet kan hem tlar dul mai a. A hmin hmasa apiang kan piai thla a, kan țhial țâwlh țâwlh mai a ni. Kan phe buai nasa bawk a. Kan chau tlang ani ngei ang. Kan bawk zal mai mai chu, kan lo muhil niin, țhiani ngei khan min koh pah a, minlo zut heuh heuh takah chuan, ka harh zawk a. Ka țhu chhuak nghal vat a. Tho kang duh suh. Hun rei kan neilo. Ka'n inhmuhna hun hnuhnung tur hi, hlah phallo in ka rawn kal vang vang ani e. I sakah chu, i lungawi bawk emaw chu anti a.

.
Lungawi tehreng mai. Hei baka salu ropui a awm chuang nang. I chungah kan lawm hle a ni. E khaih, khaih lawmthu sawi tur zawk chu ka ni e. I țhiante duhzawng ka hre silo a. A hnaivai ami ka khalh sak ta mai anih kha, an lungawi em ang chu anti a. Awi tehreng mai. An lawmin, an hlim khawp e. A lawmawm anih chu. Hei kan pi in mintir a, heram hi chhuah san vat turin, a duh cheu a. A chhan chu, huai ho hi umdarh vat a duh si a, kan umdarh hunah in intawng buai ang tih ahlau a ni. Chuvangin zingkarah in sakah țheuh kha, inzawh tawk inva phur leh țheuh anga, in kawng ka tihtawi sak dawn cheu nia. Rawngbawl pahin, inrêp leh anga, ka theihna hmangin, zanhnih rep ang in ka siamsak ang che u. A hringa in hawn chuan, khaw chhung miten mak anti dawn si a. He hnah hi, in bawmrang mawngphah ah indah tel țheuh anga, tichuan inphur alo zâng anga, rit tilo takin, hahdam tein inthlen mai ang ati a. Khua avar dawn țep e. Ka kalsan leh phawt ang che. I țhiante kha kaitho la, ka thusawi hi hrilh in, sa chu inlo va la leh dawn nia. In lak bang chu, kan ui (sakei) ten anlo eive thung aniang chu, in inpeih hunah hruai tur cheu in, kalo let leh ang ati a. A kalbo zui ta nghal a.

.

Ka tho a, chaw chhuan siam in, ka chhuang kai a, kawl rawn en ri ruaiah, țhiante chu kaitho in, chanchin ka hrilh a, phur zetin sa phur tur chuan, kan chhuak darh ta sang sang a.
Kan han rep lai chuan, Sawma lungleng tawh haw chak vel chu, a phûrin atho thâng ațha kher mai. Mawngvawm ba ang maiin, aphi cheng tawh mai a, kan tan erawh ahahdam thlak phian thung. Chhiahhlawh țha mi ang maiin, tihtur apiang ati zung zung a. Kan sarep phurhna tur bawmrang kan tah zawh chuan, Sawma changel hnah rawn lak chuan, amawng leh asirah kan han dam kuala, țhiani minpek chu, semin, amawngah kan dah țheuh a, sarêp chu kan han rem muk țân mai a. A rit țha ngei mai. Pahnih tan pawh chawi tawrh tawrh tham a ni. Kan inpeih fel hnu ah, sathin leh sanghal rilphiar hmehin, chaw kan fak a, puar lutuk hlauhawm tak a ni.

.
Chaw eikham zialzuk paha kan ti-ti bawrh bawrh lai chuan, țhiani 'aw' hian ka beng bulah kal a hun e, i țhiante hian min hmu ve lo ania aw.. Min chhân kher angai lo ang. In phur hi kan siam rem ange ati a. A sâwi kual diat diat lai chuan. Ti ru le, min hruaitu tur pawh alo thleng mai ang. Chhuah lam hma ila, thlen pawh kan thleng hma mahna, tihpahin ka in singsa a. Ka ipte te chu, bawmrangah ka dah a. Chempui chu, apangah phawi mai theih turin ka thiat a. Silai erawh țhiante'n an ah loh chuan, ka ak anga. An ah tak leh ka phurah ka hlang mai aniang chu.

.
Kan ipeih fel hnu chuan, phur kan inchawi a. Mahse, a hma ang in arit ta hauh lo. Duh dan danin kan sèp lauh lauh thei ta mai a. Thiani hmahruai chu ka zui a, kawngchin hre tur ber ni a, lang ta chuan, hma ka hruai ani ta ber a. Kan kalna chu, leilam kan bih a. Leiah reng reng kan lo kal aw zawng lo.

.
Ramngaw, thing hmun leh lui te, phairuam leh tlang te chu, kan hnuai lawkah awm in. Ka chhuk thlir a. Ka rahna chu boruak ani tlat. Mahse, ka ke rah chu, lei chàr rah ang maiin, a chang tho si. Darthlalang fim tak chunga kal ang mai kan niin ka hria. Thiante chu kan en a.. Hreve awm ang pawn an awm hlei lo a. Ka hma a kal, mawngbawr nalhzet chu, rawn hawipheiin, mak iva ti awm ve tiin, min rawn nuih var var a. He nu zet hi chu, min va ti hrehawm dawn tak em. Haw lo a, abula awm reng mai ani ka duh ni. A mitmeng leh chezia engkimah. Min duhna hi a hmelțhatna tluk zet achiang hian ati lang reng mai si a. Uiin apu atlawn ang mai hi niin ka hria. Chu chuan kei val lungmawl hi, min hnehin a zùnah ka uai pil duai duai mai a ni. I țhiante hi chuan, luikam tlangdung ngaw chhung kawngfaia kalah asin an in ngaih tihpah in, ka bulah arawn ding hnaia, ka ruala kalpah zel chung chuan,

.
Ih e, inkhaw ramah khan, chènna hmun kan nei ve asin. He lai hi chu, itan arawn hla em si a. Ilo kal leh vat theih loh pawn. In khaw tlak lam ram, lung tamna thing hmun ngaw. Zobawm ngawdur intih ah kha'n ilo kal dawn nia. In hrelo mai mai a. Kha ram kha, lung hmun paltlang chuan ram nuam tak ani asin. Sa pawh ala tamin, an tlân khawmna ber ani bawk. Hmun rem laia, zobawm lungpui intih chungah kha'n chuangin. Min han ngaihtuah vang vang la, ka rawn lang vat mai ang. Chuan kal khân ka hrilh dawn che nia. Ilo kal vat angai ang. I tello chuan ka tleizo dawn silo a. Min thlah thlam rei suh ang che aw..,ati vawng vawng a. Tehreng mai kalo kal ngei ngei ang. Ka hmuh leh theih dawn che avangin ka lawm e. I bula awm tluka thlakhlel ka nei bik lo asin, tiin ka chhang a. Zaninah khawpui ri leh țek tla thawm ri ut ut i hriat hunah, ngaw huai ho kan umchhuak thawm ani tih ilo hre dawn nia. Khù ta saw le, tihpahin, kan awmna leh kan thil hmuh dan, remin an sawi a.

.
Buh hmun lo lang iar mai leh thlam lo bawk fir fer te chu, chiang takin a hmuh theih a. I țhiante khua, Lo anih saw. Saw hmun thleng sawn ka chakna hmangin ka thlah ang cheu nga, zanriah man hmanin, khaw chhung in lut ngei ang. An fehkawng tui tlan saw panin, heta țang hian tlangdungah zel kalin, Lo lu a, ngaw ah sawn inkal zar zar anga, kawngchhak ațang inpawh thla mai ang. Inkalna tur chu, i mit nen ka thlun zawma, buaina awm hauhlo in, in thleng mai ang. Kei erawh chuan heta țang hian ka kirsan tawh mai ang che u. Min han hre reng la, nangmah ngai em em in, ilo kal hun tur kalo thlir reng dawn ania. Min han hreve reng la, kan inhmuh leh thuai ringin, kalo beisei reng ang che. Mangțha rih phawt aw duhlai, min rawn hre reng la aw, ti lawm lawm chung chuan, a mittui a khap per sak a, lehlam hawi riai riai pah chuan, min ngai leh thla hlel em em mai hmel leh mitmeng lungrun zeta, min en ngawih ngawih chungin, apil bo ta riai riai a.

.
Kavan ngai tak emm.. Ka nghilh dup a. Ka khawhar in, ka lungleng nghal vawng vawng mai. A bo na lam thlir a, ka din vang vang lai chuan, țhiana khawilam nge zawh tur, engtizia nge nita veng veng tiin Puia chuan, min rawn au a. Phu deuh zuk chungin, ka en hau a. Ka lam hawiin, minlo thlir dun reng chu niin, i zung emaw tia, i phun ang bul bula, i lungleng ani maw.. An la ti zui. Kiai sak pahin, helamah tíin hma ka hruaia, ngaw chhunga kawngruh bel tak, fai han maiah hlir chuan, ka kalta pur pur a.

.
Tui awmna kan han chuang chhuak chu, e he!! Hei chu, fehkawng a kan tui tlan kha zuk ni reng a. Ava mak ve, kan kalna kha, helai hnaiah ka kal awm reng reng kala hrelo. Khatiang kawng a awm tih ka hre hleinem tiin. Sawma chu aräk chul a. A hlim takzet ani. Puia chuan ka hre ngai bik hleinem. Thianpa țhiannu hmeltha-i khan, min pui ani tih hria la, maktih avanga kam tam chi pawh anih lem loh kha. Kan hmuh leh hriat zawng zawngte kha, sawi vek chi ani lo ang bawkin, a ngaithla tu pawn a awih vek kher lo ang tih hriat a țha. Chuvangin sawi awm chi chauh sawiin, kan inthliar fel dawn nia, atì a.

.
Sawma chuan ni tuk e a, kalo â leh țhin a, min hrethiam teh u. Ka rilrua lo lut ang ang hian, ka puak leh phawng thin alawm lee..,anti a. Taka, khawnge i zukchal ki hreu var vuh mai kha, a tlukpui in an thleng sak dawn che ni khan i sawi si a. Tun thlengin ka'n hmu ta silo a. Ka enchiang chak asin le ati zui zat a. Puia pawn zawt mitmeng zetin min thlek a. Kei lah hamhaih bawk. Mak kati ve tho si. Chhan ngaihna hrelo a, ka ngawih vung vung lai chuan, Țhiani aw hian, i phur ah khan, sarep karah ka dah a. Phawrh tawh rawh arawn tih ri ka hriat takah chuan, ka insil laklawh lai chu, ka tho a, ka bawmrang phurh kava en chu, zukchal ki hreu var pup mai. Mawi em em chu ka hmu ta a ni. Kan chawi a, awlsam te in sa rep kar ațang chuan ka chawi chhuak a, bawmrang chhung, sarêp kara awm atan chuan, alian in asei deuh tih ka hria. Mahse, bawmrang chu alian em a, lengve thei mai awm amawi ani ve tho. Puia leh Sawma pawh makti in, an rawn ding zawk a, rawn chul pahin, an chek tlawk tlawk a. Kei ngei pawn hei ai chiang chuan kala hmu bik tlat lo. Ka rilru kaptu chu, aveng ta. Thiani ringawt ka ngaihtuah avang khan, kalo mangnghilh mai mai a ni. Nghalchang lu nen kan thlek vela, ropui kati bâng thei lo. Sakhi chalzet ki hreu ngei mai te nen, salu danglam tak pathum ngawt ka hawn dawn ani tak si a le,,

.
Kan insil thlan dai zota bawk a, kan inphur bwr leh ta lùk mai a ni. Feh kawng fai ah darkar khat zet kal turin, kan in zui leh ta dat dat a. Muang marin, kan kal zel a, ti ti pah chung zelin, tlailam nitlak dawn. Nî, suk chen vela ala tla lo tih ah chuan, an khaw kawtchhuah, tlang bâwk theng thaw nuam zet chu, kan chuang chhuak ta hlawl a. Kan phurte nghatin, mauthei lo in hùng far mai a tuite chu, kan han in a. Khaw nuam tak zawng anih mawlh dawn hi. Kawt chhuaha tuium an hun danah. Anti țha kati takzet a ni. Puia leh Sawma hlado chham tur, in hnawn fiam vel lai chuan, kan ram chhuahna lam ngawdur hring dup mai leh tlaini tla tur hnim ruih maiin a chhun, tlangdung tle sùt mai leh ruam lang thim raih te chu, thlirin țhiani hmel nu zèm mai, no leh zahawm tak biangsum lang kalha, nui ver ver lai hmel kha, ka mitthla vang vang a. Engtak ti ve ang maw, huai ho nen an innawr buai mek em niang. Min han hre zui ve tak ang maw tiin, ka ngaihtuah a. A mitmeng mawi leh nalhzetin, min ngaìhmelh chunga min han zai leh ralh ralh hun tur chu, engtik ah tak tawng leh ang maw tiin ka dawn vawng vawng a. Thiante silai puak ri ah chuan, harh chhuakin kan lãwn ve ulh ulh a.

.
Naupang leh țhiante chhungte bakah, țhianpa Siama an lo lang a. An rawn ri nak nak hlawm a. In chibai lawp lawp pahin, țhianpa Siama chuan, min kuah vawng vawng a. Hlimtakin khawlam pan chuan, kan inzui ta diah diah a.

**********+***********

Atawp nan, Țhiani sakruang mawi tak ka tawnna ram lam chu, thlir letin, engtikah nge ka fan leh anga, chengrang chawiin, luiruam leh phaizawl te chu, kawitin ruamtin hrutin, ka fan leh ang le, țhat lai leh vanglaini te a chuai hma hian, fang leh thei tak ang mawle..

Suihlung ruala, lungduh valrual te nen, vanglai chen a chèngrâng kan chawina ngawpui, fang leh thei hian ka mawi ang maw,

Țhat lai, vul lai ni arei silo. Chhawrthlapui arkai dengin, diar a khim ang mai a, Sakruang leh kimtlang duhawm DINGDI hmelțha i kha, piallei thuahriat a, ka zal hma chuan a hlui tawh lawng ka thinlungah.

Tawnni her mah suhse, min han dawn ve țhin rawh aw valrianga. I chênna ngawpui thlirin ka van ruai e Dingdi hmelțha.

Aw tukloh ramdaia ka di hmeltha kha, in thlazar hnuaiah nemten lo chhem dai ula, tawn leh hma zawng tawnloh kar sei tur hi, Mangțha ngawpui duhawm ti-in ka thlah nang che ti a, rilru leh thinlung rum chungin, ka thlir vawng vawng a. Muangchanga hnung chhawnin, khaw lampan chuan, ka hawisan ta a ni.

.
NGaih ban ni awmlo, lairil fan tu.
Hringmi zingah piang nila.
I anka leh sakhmel ka tan vul se
Laichhuat rem zai kan rel ve tur
Lairil thinlai ti riang tur in maw
Oh, Hring chang lo ten i vul le.
Hai ang tar hma leh vullai ni hian
Duatten pawm ve che ka nuam asin.
I sakhmel leh kimtlang kha
NGhilhni ka nei dawn silo.
Damten leng zel la tukloh ramdai ah
I tello in hringnun ka chhiar ta nge.

.
Awle, SAZUK KI BUNG chu alo tawp ta. Chhiartu zawng zawngte inchungah lawmthu ka sawi mawlh mawlh nise, hlimna zawng zawng neiin, hriselna țha tak nen, damreng mawlh ang che u. KA LAWM E....

Link:
BBcode:
HTML:
Hide post links
Show post links

Jagaj
Posts: 1
Joined: March 27th, 2019, 10:29 pm

Unread post by Jagaj » April 6th, 2019, 8:23 am

Ava han bawn eem! Ka chhiar tawh zawng zawng ah ka rilru la tu ber ani. A tak a, a fuh a, mahni tawn ang mai in ka ngaihtuah thei alawm le. Mumang ang mai ani. Midang ziah tam zawk za a sawmkua pakua te hi chu phhuahchawp ah pawh a lem thei bik lutuk a. A tak a tawnhriat nei ve nual tawh tan phei chuan a lem thei lutuk a. Ziak zel teh.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)