SAZUK KI BUNG By Hriata Tea

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

SAZUK KI BUNG By Hriata Tea

Unread post by Ngaia » February 18th, 2018, 10:24 pm

sazuk kibung.jpg
sazuk kibung.jpg (13.32 KiB) Viewed 9896 times

SAZUK KI BUNG
By. Hriata Tea

Zan lam a salu lawmna, zu tui tling ka lo lem hnem deuh nge ni. Ka harh chu ka lu, a la hai chhulh mai. Hmaite phihfaiin kan inthing harh a. Thianpa Siama thil sawi hrechhuakin, ka ngaihtuah zui mai mai a. Kan khua te hi chu alo lian tham ve ta deuh a. Kum khata kan ram bawh pawh, a zau tham in, mì kan indaih bawk nen. Kan khaw ram chhungah ringawt chuan sa han kah tur lian tham deuh pawh a vang ta. Sanghal leh sakhi ani deuh mai si a. Ramvah hrat leh salùng vei laklawh tan chuan, ramsa chungchang leh ramvahna chanchin te Sa hnu thar leh ram chhuah chungchang bak, ti ti ah leng hek lo. Zanlama țhianpa Siama thusawi mawlh chu ngaihtuahin ka vei zui ta a ni. Pawnah chhuakin kan khaw piah lam ram chu ka thlir vawng vawnga. Ka ngaihtuahna leh mitthla pawhin, ramhnuai mawlh mai chu âwn a.
*

Lalrin, iva ngaihtuah ding awm ve.. Zingkar kar a, i lung lêntu chu enge mawni le..Ram lam thlir a i ngawih vung vung mai. Lasi te hi ilo zawl reng ani lo maw.. Nang hi, naupangte si hian, sa i kap ta fo mai a. Sa lian kah tur te la awm phei se..tlangval țhat laiin, ram lamah thäng i chhuah ngei dawn nih hi. Lo phei teh, hei i sakhi kah chek hi han hawp ve teh, enge a an ka siam tui emaw chu..i țhiante pawh an lo thleng țep ang. I lasi bialnu chu dahțha rih la, i kah dan chanchin te min han hrilh ve teh. nizan lamah lah, i țhiante nen in hlim tlang si a. Kan kawm ve hman hleinem che. I zarah ramsa kan ei reng mai a. A man hla țhin ngei mai tiin, țhenawmpa, Pa Zika chuan mi rawn ko a. A sachek bel lo vil lai chu suakin mi han tem tir a. E.. atui khawp hi, nang hi zawng i siam tui thei țhin reng a ni. Han sawi em em tur pawh awmlo. Ka ramvak haw lam, hlawhchham a in ngai tawh zawkin ka tawng fuh a. Ka a rawn kap ve hlauh anih hi. In mi țawng malsawmna zar ka zo mai mai alawm. Lasi te chu awm pawh an awm tak tak dawn em ni..? lo awm țhin pawh nise..tun ang laiah zawng, an awm pawh ka ring tawh hleinem. Zawl tur te han awm se zawng, salian tham deuh Tumpang leh sele, bakah sazuk te, kah ka dil ang mawle.. Zukchal tak ngial pawh kan hmu phak tawh lo ani si a. Salian tham deuh han kah chu ka chak ve khawp mai.

*

..saw i țhiante pawh anlo thleng tawh alawm. Chawei pawh kan peih ta bawk a. Khawinge bel hi kan suan lut ange, Lo inkawm rawh u. Chawei siam te pawh angai ang, hnathawk leh nghal duh te an awm takin a ti a. Thianpa Siama pawh alo thleng phei ve nghal a. Hei kan ù nizana ka sawi kha ania, u Mawia anih hi tiin, a mikhual rawn kalpui chu min hmelhriat tir a. Kan inchibai a, michhe sawi chu koh aiin an hnai tih zawng zawng anei zo a. Nizan khan alo thleng ve chiah tih, ka haw khan ka hre ve chauh a. Ka rawn inbengvar e katia, ka rawn hruaive tawp anih hi. Amah ngei hian han sawi sela, an khaw ram țhatzia leh sa la tamzia chu a hrechiang ber ang. U Mawi han hrilh teh, lo inkawm teh u. Keichu, inchhug lam ami te hi kan chawk phùl lawk teh ang tiin, in chhuglamah min luh san ta nghal a. U Mawia nen chuan vawikhat inhmuhna mah nise..kan tuina zawng a lo inang kher bawk a. Inkawm țhang sa ang mai in kan inpawh a. An khaw ram a, sa a la tam zia leh a ram la ngâw țhatzia te chu a sawi bawrh bawrh a.

*

Tun hnai mai ațang khan sazuk chal zet mai. A ki bung hi kan khaw ram chheh velah an hmu fo mai a. Ka la tawng fuh ve lem lo a. Kan Lo lam hna kan țul țhin avagin ka ramvak hman vak lo bawk nen, kan han awl deuh lai chuh in ka rawn zin leh bawk si a. A hmu tute sawi dan chuan, a ki a bung a ni tih pawh a lu lam nen a, enkawp loh phei chuan a hriat loh hial e an tia, a ki hreu han pui zia mawlh mai chu hahìpin an sawi țhin ani. A lenlam pawh bawngchal lian țha tak ai pawha lian leh mam tle zuk mai ani a, han en mai phei chuan a paw vo thei ani awm e. Ka hre tam vak hmanlo a. Ka rawn zin san ta mai si a. Anlo kap tawh pawh ani maithei. An sawi nasat em avangin, atu pawh mai in an pel mai a. Kah erawh an kap lem hleilo a. Ka silai a tlawlh antih loh leh ka kap hmanlo a. Ka silaiah musep kalo thun lai ania tihte, ka ti tlan a tih vel ani zel. I duh phawt chuan lo zin rawh. Ka lo mikhual dawn che nia. Sazuk kherlo pawh kah tur antam alawm. I sakah theih zia, ka nau Siama hian min hrilh a. Min sawm teh tlata zah pawh dâwn lo in, ka rawn zui ve râwih anih hi. Lo zin duh la ka ti khawp mai. Salu leh sarep zawng i duhtawk i hawn thei ngei ang. Siama lah hi ka sawm reng a, nangmah hi a sawi tel zel che a. Nang nen chuan a duh sa reng bawk. In pahnih hian rawn zin ula, ramvak tur nilo in, kan ramchhuak dawn nia. In duh hun hun ah ani mai a ti a. Inchhung lam pawh, pa țawng duh leh khabe sèp thiam tih takah, țhianpa Siama thusawi nuih in thawm ațha ham ham khawp mai. Chhungte chawei a kan sawm ho pawh an rawn thleng kim thawkhat tawh bawk a. Chawei turin min rawn ko lutve ta a.

*
Chawei lai chuan, țhianpa Siama (ani hi țhianpa tiin ka sawi zel tawh ang) chuan zin chu i duh dawn ta em..Sa kahve te ka châk ania, kan khuaah hi chuan ka kap ve thei dèr silo a. I sakah hlir kan ei a. Ka ha pwh ka kèr chhe zo dawn..nula ho pawn i nui kua min ti zel ania. Lasi nula malno han lukham te ka chakve a. Zawl tur te ka hmuh fuh ve vaih chuan, ka rù haw ngei ngei ang. Thian sa beng lah hi tuilo ropui si..a zâng ti lah tlem thei si.. Ramvahna a ka zui loh che chuan, a bawp lah ka chang ngai silo. Feh kawngah nise, i ngawireng chung pawn nula ho hian an melh relh relh che a, an nuih seih zel che si.. Ka bulah lèm, an nui uar uarh a. An țhiante min kawh hmuh zaih thung. I zial pai reng mai a țawn na in ang a awm ngai heklo. Vuak thluk daih che hi ka chak leh thut țhin. Mahse, ka luck phah na ber ini ve tum hrang si a. Ka la ui der mai mai che anih hi. Ngawi ngùl lo khan aw ti vat la. I han zin vat teh ang, ka biang no i takngial pawn, kawngvawn tur i țhianpa sakhi kah vun tal min dilsak rawh ati reng mai leh nghal. Ka kah ngei ani pek ve ka duh ni. I hman hun hun kan kal hun ani mai.

*
Ni e. Keipawh ka chak khawp mai, ka chhungte kalo râwn ve phawt anga, an remtih chuan kan kal ngei dawn nia. Remtih lohna chhan vak tur pawh a awm hranlo a. Lo lam lah kan zo tawh a. Buh lak hma chu thawh tur pawh a awm tawh hleinem. Hetah pawh ramvah bak tih tur awm chuanglo a. Ka lo sawipui ve reng reng ange ka ti ve ta a. Thianpa pawh alawm ngang mai. Chaw hmuam țun chung chuan tih chi mange. Thiana nge nge lasi note ka hâwn ngei ngei ang. Ka biangnoi pawh sazuk kap vun ngei mai, a kawngvawn atan ka hawn sak anga. A hnungzang ringawt ka chul tawh biklo ang. A tukhum sam hnim in a biang ringawt ka nawkbik hlei lawng e. A heh sen hiam mai, sahel țha mi ka pet ve thei tawh dawn ani tiin, a phur thiam khawp mai. Chawte kan eikham chuan țhianpa te pahnih chu ka thlah a. Thingpu turin ka chhuak zui ve ta a.

*

Zanriah eilai chuan ka pa hnenah, U Mawia te khawlam a, ramchuaka zin chu ka dilin, sa lian kah ka châk zia te ka sawi a. Ka pa chuan i châk miau si chuan le...keichu, kan ram chhung mai mai ah pawh, sa min barh hnem a. Ka lungawi viau asin. Mahse, tlangvalte in la ni bawk a. I châk miau si chuan han kal ta poh che. Ma'rawh chu mikhualna ah zingthawh tlai te, chawei a nghah ngai khawp a lenrei te, an mit ti kham tur zawngin awmloh hram i tum dawn nia. Zing tui chawi leh thing han eh sak te hi, thil har leh hahthlak ani lo a. A țul ang ang chu thawhpui bawrh bawrh tur ani ngai, thlenin ten a ngailo e, lo ti duh suh pawh tise...tlawmngaihna hi khawi hmun pawh eng hunah pawh vawn tlat tur ani. Mizo nunzia chu duh ngawih ngawih chung pawn ka duh lo e, tih a ngai a. Na ti a țhen ru tlawk tlawk chung pawhin a na lo e kan ti a. It tak leh chil lem ri khawlh chung pawhin ka châklo e, tihte hi kan nunphung ani a. That loh na lai awm mahse, min ti huaisentu leh min ti chheltu, tlawmngaihna thinlung hmahruai tu pawimwh tak ani. Hetiang kawngah zawng ngaihtuah ngai i ni lo tih ka hria a. Mahse, ka han hrilh thar mai mai che ani e. Aia upa te hi keini aia chaklo zawk leh kan hneh tur sa ngawih ngawih pawh nise..an thu awih in zahthiam tur a ni. Upa zawk na na-na chuan an thu a pawm awm zel ania. In han kal anga, salu ropui tak in rawn hawn dawn nia ati charh charh a.

*

Thianpa te inlam pan in, pheikhai zang vah in ka kal a. Thianpa te pawh chaw an lo eikham ve chiah a. Thut pah chuan kapa in rem a tih thu chu ka hrilh a. A phur kher mai, a phul zui hlut a. A pa chuan, Rina chu hei i zar kan zo a. I sakah sa eiin kan puar reng mai, i țhianpa hi a â bêng bûang si a, nang in i kawp hlauh a, ka ngaih angam phah hle a nia. Sa lah i rawn hleh țeuh zel mai si a. A lawmawm tak tak a ni, a lo ti luam a. U Mawia chuan anih leh engtik nge inlo kal theih ang.. Naktip mai hi haw leh ka lo tum a. Ka rualten lo kalve nghal thei mai ula ka ti mange, enge tih tur țul te in nei em.. . Lo lamah fa suar leh buhin tur te, kan sak pui lawk anga, kar leh ah kan rawn kal zawk ang e kati a.

********+**********

U Mawia hnena ka lo tiam tawh ang in, tunkar chu zin chhuak tur in ka inpuah chah agai a ni. ti rilru neuh neuh chung chuan, ka buh in sak zawh chiah chu ka thlir vung vung a. Thlamah lutin thingpui ka siam a. Kapa, fasuar leihlawn tur pu pawh alo thleng zui ve nghala. Thut chawlh pahin thingpui kan dawm a. Pa, hei kan siam zo ta bawk a. Naktuk chu Siama nen u Mawia te khawlam a kal chu ka duh nghal deuh mai ka ti. Buh lak hma a rawn haw leh vat thei tur in kal lam hma ila ka ti deuh a. Enge țul dangte a la awm em.. A ni tak maw..țul dang awm lah lo e..hei min pui ta hram a. Kan zawh hma phah anih hi, i duh dan dan ani mai. Naktuk te chu han awm chawl ve em la ni zawk tur alwm. Mahse, i thu thu a ni e ati a. A rawnal put chu pakhat ve ve in kan rek a, țawng mawlh mawlh pah chuan leihlawn chu kan siam zo thuai a. Ala hma bawk a. Sava zanriak kah turte ka rawn zawng haw teh ang. Lo han haw mai rawh ka ti a. Silai nen ka torchlight cell3 chu ak in vau lam ka pasan ta ani.

*

In ka thlen leh meuh chuan, zan dar sarih alo ri der tawh a. Ka vahrit kah pahnih chu ka phawrh a. Ka nu in chawei minlo siam a. Ka rilțam deuh tawh bawk a. Ka bar zui ve ta nghal a. Ka chawei lai chuan țhianpa Siama alo lut hlawl mai. Kan ramvachal pa chu a rawn ramvak haw leh pek ani maw...kha ava tui dawn ve, naktuk chu vahrit sa kan ei leh dawn ni maw, tih pah chuan kapa vahrit puah lai chu a pui ve nghal sawt sawt a.
*
I lo lan teh hlawl a. Zanin chu ka rawn leng ang ka lo ti rilru mek asin. I lo lang hlauh chu tih zia hle mai.. Zin chhuah te chu i hman tawh leh tawhloh ka rawn ngaichang e ka tia, enge in hnate lak lawh inla nei em..puih in ngaihtakin ka hman tho bawk a. Zin vat vat ka châk tawh sia. Ka rawn pui dawn cheu mi kati deuh a. ..lo țhu phawt teh kan inbual ve phawt ange, kapa kha lo zawt vel la.. Kan sawi dun leh dawn nia tiin, ka inbual san a. Kan han sawi tlan hnu chuan naktuk chu mamwh tur chak khai lam khawm nan hmang ila,tuk leh ah kan chhuak dawn nia tiin, kan relthlu ta ani. Zingchaw rawn ei la, kan mamwh te pawh kan lam khawm dun ang chu tiin, kan inthlah a.

*

Kan zin chhuah ni tur ani bawk a. Ka phur angreng kher mai. Mahse, mi khaw ram, ramchin châng hriat loh na hmun a, ramchhuak tur kan nih avangin ka pa chuan min ngaihtuah khawp mai. Aia upate thu leh ramchin hre zawk te thu ngaichag turin min chah lawm lawm a. I pu kha, pasalțha hming chher tham khawp a huaisen ani a. A damlaia athu hrilh țhin che kha hre reng la, fimkhur takin che țhin ang che. Huaisen leh tlawmngai ber ah țan tum la. Mahse, midang lakah chuh helh zawngin che ngai suh ang che tiin, thu țha tinreng fah in min thlah liam a. Thianpa siam-a pawh a phûr tûrh tûrh kher mai. Ani chu a hma a, lo han zin zauh tawh ani a. Mahse, ramvak tur zawng chuan a la zin biklo thung.

**********************-------***************


Tluang takin khawthim hma hret in kan thleng a. U Mawia pawn minlo lawm thiam kher mai. Khual țha thlen tak meuhin min lo chiau au a. Artui lai minlo talh sak ngat a ni. Naktuk chu han awm chawl ula, duh leh daihnai vel ațangin ram kan chuan dawn nia...sawi tur pawh ka nei nual asin. Ka rawn zin hlan leh inlo thlen hma a thil thar sawi tur a awm nual ania. Chawte han eikham te te ula, muang marin kan inkawm dawn nia a ti a.

.
Chaw kan han eikham fel meuh chuan, leihkapui ah țhuthmun remin, titi khawchang kan sawi a. Salung vei lak lawh zingah zawng ramvah leh sa chungchang bak titi ah leng hek lo. U Mawia chuan ka rawn zin laia ka sazuk sawi kha, tuman an la kap thei lo a. Sawi a hlawhin chanchin angah hman khawp mai. Ka la tawng ve lemlo a. Mahse, a hnu erawh ka zuk hmuve tawh a. A hniak ațang ringawt chuan a len hmel rem rem khawp mai. Kan sechal hniak te nen a in ang thâw-thâng ani. A tawng tu te ho sawi dan chuan, a var deuh vau mai ani awm e. A ki pawh a bung tur sa reng a piang ni awm takin a lu pangsirah țo ve ve mahse, lehlam erawh a țhang ve lo aniang. Lehlam zawk chauh chu, a chhip zawn tak ațang a ding țawi chho luih mai ani an ti. A buk hian a buk luih ani awm asin. A lu a zawh zia leh a mawi zia mawlh mai an sawi uar a. A hmachhawn tawh tute pawn a ki hreu mawi lutuk leh ropui si khan a zêm â a. Kah nachang hrelo in an thlir veng veng tawh mai țhin a ni. Han kah dawn meuh chuan hmuh tur a awm tawh ngailo an ti tlat. Vengtu a nei ni ngeiin an hria a. Kah hman leh kah rem hian an tawng thei tlat lo a. A pêl tu an tam tehreng nen hian a hmutu pawh an tam lo khawp mai. Zan riaka thawk chhuak te meuh pawh, hlawhchham bawkin anlo haw leh țhin. He kan khaw ramchhung ni si. Mahse, țuan leh mang a ta tawh, ram la dai dar miah loh hmun a awm a. Kan khua a upa deuh chin chuan sawi tur pawh an hre viau mai. Chu ram chu tuman an la luh chhuak lo mai nilo in. A ram chhung a, luh hrim hrim hi upa ten an phallo a. An serh bur mai ani. Sa um lut tu, rawn haw leh thei pawh an vang khawp mai. A rawn haw leh chhun te pawh an pangngai thei tawh ngailo. Eng thil nge an tawn a. Eng in nge ti buai țhin hriat a ni lo.
.
Chu ram chhung ațang ngei chuan he sazuk pawh hi alo chhuak a, a lut leh țhin a ni. A hnu an chhui tawp na pawh he ram ah chiah hian ani a. Chhui zui duh awm mahse, a tam zawkin an ngam tlat lo a. Upa duhloh leh serh leh sang a, he khua in alo neih tawh avangin chhuizui lo in, an kir san leh nge nge țhin. A lo chhuahna kawng țum ah châng ang tih dawn in, he sazuk hi a fimkhur em em mai a. Kawng țum bik a nei duh hauh silo a. Mi tam zawk chu an beidawng tawh a ni. Lasi ho ranvulh ani ange tiin, an peih loh san ta nual mai.

.
Chung chu an sawi dan tlangpui a ni a. A zawng a za phei chu sawi tlak ah pawh ka ruat lem lo. Engtin nge niang, kan pathum in kan ramchhuak ang nge. Midang kan sawm belh dawn a ti ta a. I duh dan dan ani mai, ramchin hre deuh pakhat tal hruai ve pawh chu a sual hauh lo ang. I duh duh sawm la, i thu thu ni mai tiin, kan ti ti pawh kan titawp a. In chhunglamah mu turin kan lut ta dial a.

*********+********
Zing chaw kan eikham hnu chuan, ram chuân pahin, i vak kual mai mai teh ang tiin, silai nen kan thawk chhuak a. An khaw ram zet zawng a ngaw ala chhah țha in, aram a pharh țha si. Han vah vel pawh nuam tak ani, ngaw chhung thelh hun mai a han vahkual vel hi zawng a nuam hranpa ve reng reng. Varungte phei chu, kan țhawng thlawk awl hek lo. Thianpa Siama lah chuan, kah a chak thu a sawi sek mai, musepa han phuh ka va chak e..ka kap mai dawn ati sek mai a. A la hma em hi hetiang ramah te zawng kah tur i chham lo tawp ang. Tirawh, sa chânna tur i zawng teh ang.
U Mawi i duh leh min loh haw san mai rawh. Thianpa nen hian sachanna zawn pahin ram hi kan han thlirkual ang e ka ti a, kan ințhen ta a ni.

**************+*************
Sakhi rahtlan, bânphar kung kan hmu fuh a. A hnu pawh a thar țha ngang mai. Thing kung remchang deuh laiah țhangte kan han dawh chawp nawk nawk a. Kan inpeih fel meuh chuan ni pawh alo tla țep tawh a. Thianpa chuan hmun dang pan lo in, i chang dun mai ang. Khua pawh a tlai tawh hi. Nula lamah hi chuan englo hû sual hi nei lemlo mah ila, sahû sual erawh ka nei tlat pek a. Ka khurh chhiat tak hlauh pawn nangman i kap mai dawn nia a ti a.

.
Kan chân chhuah dawn leh dawn loh pawh i hre lawk ngawt em maw nile..țawng zung zung țhin teh suh. In țawng pachhiat te awmthei a nia... Nangnen te chuan atih lai mekin, kan chung zawn leh kan bul vel thinglerah chuan changkâk an rawn thlawk ta nak nak a. Ngawi rawh, bengchheng tawh suh. A rawn chhuak țep e. Kan vannei dawn aniang, sa a rawn hnai tih entirna anih hi. Ni pawh a tlak mek hi kâp thei mai turin inring la, thawm ngaithla kar rawh ka ti vat a. Ngawireng chuan kan țhu dun ta khâr mai ani..

.
Thingțang han tliak ri deuh rap ri chu a hria nge hrelo tiin, kan kheuh zauh a. A phu ang durh a. Thawm awmna lam chu ka kawh hmuh a, ri pawh alo hnai tawh khawp mai, țhianpa chu kan en a. A sawi ang tak tak chuan, a khur nghal ti tih der mai. A kah țhelh palh pawh a kap nghal thei mai turin kalo inring ve nghal a. A rawn lang sen ta zoh zoh mai. Kah nghal mai a tum ni a, ka hriat avang chuan mitmei in kan khap leh rih a. A rawn lang chiang ta. Sakhi ngei ani e. A fimkhur ve khawp mai. A pumin alang thei tawh a. Chunglama changkak han rak(hram)thawm ah chuan an ding dat a. Thawm ngaithla in an hawikual vel a. Thianpa chu mit meiin kan buk khum nghat a, khur dat dat chungin A thal a thlah ta.

.
Silai a ri dur a, hûk țhawt pahin a zuang zawk a. Thui a tlan lo, a tlu der mai. Thianpa chu kan en a. Alo khur nasa mai. Tawng khur dar dar chung chuan, a tlan leh ange kap rawh, kap rawh, a rawn ti a. Tlan lo ang, a hûk țhawt ri ah khan a fuh chiang tìh a hriat alawm. I kap tlu der a nia. Kan hlawhtling... Thusawi pawh a ngaihsak tawh lo. A chhuk sawk sawk a. A pan phei ruak ruak mai ani. A lawm lutuk chu a khêk chêl chul mai lehnghal a. A lawm lutuk che vel chu ka tan zawng a hmuh nawmin, a lawmawm zawk daih mai. A patuai mam țha zer zawr tak mai ani a. A chul deuh reng mai a ni.

.
Ka la khur dawn chauh in ania ka hriat arawn ti khur dar dar a. A âwm alawm, ti khan, min han zui la sakhi hi kan pu anga i ziaawm ve vat mai ang, tlai chhiat hma in i haw teh ang. Kan hlawhtling bawk a, inthlen vat pawh a phur awm alawm le..i pasalțha dawn khawp mai, ka pu khan vawikhatna a, a pachal leh sahrâng kah hi chu kut a chawl zui duh a. Therhlo leh atuai han kah erawh chu, kut a hmui zui ngai e ati țhin. Nangpawh a patuai ațangin i țan a. I kut zawng a hmui zui mawlh ang. Sa hû sual te chu han kap ngun deuh ila, areh ve mai ania. Ti rawh, i kal ang le tih leh kal ka rual a.

.
Vahrit ka kah ve tum pawh khan ka khur vak tawh mawle..tun ang chiah hian ani in ka hria, ka zia tawh e. Kalo put chhawk ve thung ang che chu... Han pu ve teh tak, a rit ve phian mai. A kaptu ini bawk a, rit pawh I hrechang lo ang. Kawngruh chinah duh leh kan zawn dawn nia kati a.

.
In kan thlen meuh chuan khua pawh alo tlai tawh khawp mai. Chawei ah minlo nghak a. Sa kap nilo phei ila, inthlahrun awm khawp ang. Chawte kan han ei sawk sawk a. Sakhi chu kan rawh a. A lu kan tan a. Ui pum rawhin kan rawh mai a. Kan chan zawh hnu ah kan han inbual fai a. A chek bel pawna kan chhuan chu vil pahin kan inkawm tlang a. U Mawia țhiante pathum lai an rawn telve bawk a. Ramchhuah chungchang rel pahin, zan kan tum tawi ta ani. Thianpa Siama pawh a kâptu ani bawk a. Nuam ati kher mai, nula rim lam pawh sawi ri miahlo in, salu lawmna zu tui tling a kai deuh nge ni. A țawng duh zual bawrh bawrh khawp mai. Tichuan, U Mawia țhiante pathum, keini țhiandun leh U Mawia nen, mi paruk chu ramchhuak turin kan intiam rual ta ani. Naktuk chawei kham ah chhuak ila, zan sawm vel tal riak tur hisap in kan kal ang chu. Zukchal ber chu kan pel tur leh tin zawn ber ani bawk ang. Zingah hetah chaw in rawn ei nghal vek dawn nia tiin, U Mawia chuan a chah a. Kan in mangțha ta hlawm a.

********+***********
A tûk ah chuan chaw te kan han eikham a. Zukchal ki bung pel tur chuan, mi parukte chu kan thawkchhuak ta a. Keini țhiandun chu a naupang ber kan ni. Mahse, min endan erawh a naupang lem lo. Tlai lam darthum vel bawrah kan tum ram chu kan thlenga. Luite tui țhatna lai, ni kang țha si, hmun rem rai dup maiah riahbuk kan sual a. Mahse, kan sahnu hmuh dan a zirin kan insuan țha leh mai dawn nia kan tia. Buk pawh a satliah deuhin zar vel mai mai ila, naktuk lamah te hmundang remchang kan hmu ta lo anih chuan kan la siam țha chhawm zel mai dawn nia. Ti khan chawhmeh zawngin nang leh thianga kal ula a bak chuan a țul țul kan lo thawk tlang ange tia, u ten ro an han rel takah chuan keichu, silai nen therhlo mai mai pawh zanriah atan kah tur zawngin ka chhuak ta a ni.

.
Kan piahlam mualdung chu ka pan a. Kawrte kam, tui ti deuh chîp chiap ah hian sakhi hnu thar zet mai kava hmu fuh a. Kan chhui zui deuh chu, Chhak lampanin a kal ani tih ka hria, A pachal anih loh vek pawn țhankin tawh chin chu ani ngei ang. Khawinge, ala thar bawk a. Chhuizui vak zawng tih tlan palh a hlauhawm zawk tlat tiin,awmhmun ka rem a. Pâwt ham in, ka ko ta ani.

.
Reilo te ah, Chhaklam ațang chuan thawm arawn nei a. Sakhi pachal ngei mai chu ka chhak lawkah hian a rawn ding ta to mai. Uluk takin kalo tin a. A zak dawh ah tak chuan kan kap dur mai a. Penthum vel apen a. A awp ta rawp a. A chalchang ani zui nghal mai. Silai mu kan thun leh te te phawt a. Ka han bêlchiang chu, A lian țha kher asin. Hetiang em a lian hi kala kap ngailo. Sakhi ka hmuh len ber ala ni bawk. A rih tham deuh avang leh kalkhan remlo nen. Ka ipte hruiah chuan, a ke hnung leh hma chu phuarbet in, ka ipte hrui chuan ka phur ta a. A zangkhaiin chet a ti sam sawt.

.
Bûk ka thlen phei chuan anlo lawm khawp mai a. Ka thang rei loh ngaihtuah chuan ka hawn țha em bawk a ni. Kan han puah sawk sawk a. Thimchhiat hma chuan kan peihfel der a. Thianga pawh a rawn thleng a, vahrit pakhat leh varihaw arawn kap a. Kan khaw lamah varihaw hi a tam lo aniang ka la kah loh bak ah ka la hmu ngai tlat lo. Mawi ka ti in, ka hmu duh khawp a. Kei ang bawk in țhianpa Siama phei chuan a khai let sek mai a. Kan han puah leh sawk sawk a. Varihaw zawk chu kan siam nghal a. Vahrit erawh a ke ah a letlingin kan khai a. Sakhi chek nen, varihaw sa nen, sa lamah chuan kan hnianghnar ta khawp mai. Duhtawkin kan lim a. Puar theih liah liah tak ani.

.
Bûk tualah meipui ai pahin, a tuka kan chet vel dan tur kan rel a. Mi pahnihin buk sualna tur țha leh remchang zawk lo zawn nise, chumi tur chuan u Mawia țhiante pahnih Sawma leh Puia te pahnih chu nise kan ti a. A bak chu zukchal hnuthar deuh zawn pahin kan vak kual anga tiin, kan han rel a. Mahse, a fuh ber dawn amaw nile..bûk sualna tur, lo zawn ngawt chu adik thei lo ang. Keini avak chhuak ho in a hnu kan hmuh na hmun leh chân khân kan hmuh na hnaih deuh ah insuan ațha zawk dawn si a. Vak darh vek ila, a hnu thar hmu tu hmuhna lamah kan insuan hnai zawk mai dawn lawmni… A ni teh tak e a. Chuti chuan iti mai tak ila ațha ang. Zante pawh a rei mai dawn, kan kal hah si a. Mut lam i hnaih ang u kan ti a. Kan sakhi sarep chu mei kan han chhawm țha a, Kan mutsan ta ani.

**********+***********

Ka mu tui lai chu, țe țhawt ri hian mi ti harh zawk a. Kan țhianpa Sawma țe ri a lo ni a. Midang pawh an rawn harh ve vek a. Enge nita tiin ka tho a. Silai nena ding ur chung chuan, sapui alawm mawle.. Kan sarep a rawn beisei tlat mai. Ka harh hlawl in meipui rem tawh bula alo țhu hi ka hmu a. Ka țe țhawt ri a, azuan sawn khan. Sapui ani tih ka hre chauh alawm. Chu ngaithla teh u, a la awm hla lo tawp ania ati a. Kan han ngaithla a, athing țang rah tliah ri, han ri leh rap țhin chu, zanrei tawh lamah chuan a chiang khawp mai.

.
U Mawia chuan, meipui kha chhawm țha rawh u arawn ti a. Ka va chhawm țha ta vat a, a alh țhat deuh hnu chuan ka mutsan leh mai a. Kalo muhil tui deuh nge ni, țhianpa Siama’n mi rawn sawi harh a. Midang pawh anlo tho vek tawh niin, silai nen meipui bulah anlo ding khawm tal mai a. Enge nita tìhpah chuan rang takin ka tho ve nghal a. U Mawia chuan, kan țhian bengtawia alawm mawle.. A kiang duh reng reng lo mai, kan sarep rim hian alung alen ngang aniang, meipui ên phak loh chinah sawn a ri reng mai. Engtia han tih chi nge maw ni dawn le alo ti a. Kan ngaithla țhap a, thigțang han tliak ri leh rap țhin te chu kan hriat ani mai a. Light in kan han chhun a, a hmuh theih der si loh. Thingțang an rah tliah rap chuan a awmna lai ahriat a, a hlauhwm lo deuh. Mahse, an reh vung vung chuan, khawiah nge a awm hriat ni heklo, a hlauhawm duh zawk tlat mai.

.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:24 pm

Ngawi teh u, tiang hrim hrim zawng, khawvar hma chuan akiang duh chuang lo ang. Khawinge, kan sa hi kan hleh ve ange kati ta a. Kapu, minlo hrilh țhin tawh angin ka ti ve dawn a ni. Kan sa channa ruhkawl lian deuh deuh te chu khawm in, kan rèp lai tùl hnih chu ka la bawk a. Mau thing tuah tur a kan tan sa chu ka vaw keh sawk sawk a. Malpui tiah vel țelh țawlhin ka têl khawm a. Ka depkai ta nghal a. Ka sarep lak leh a ruh chu changel hnahin ka fun lawih a. Ka chempui chu kengin kan țhianpa bengtawia awmna lam, a thawm rik tawpna ber lam chu ka pan phei ta a. Thiante ho chuan min rawn zui an tum a. A ngailo e, kan ti phawk lek zawk ang, tikhan silai nen minlo veng zawk rawh u tiin, Ka va hnaih phei zel a. Ka meichher chuan kan ên țhin. Ka hmu mai thei bawk silo. Ka chhak lawk hnahthial hung khat lek phen ațang chuan thawm alo chhuak ta. Ka en vat a, A mit de rual mai chu ka meichher éng ah chuan alang chiang kher mai. Kan hnaih leh hret a. A rawn rùm ta chhur chhur mai a. Thiana, hei sa ka rawn hleh dawn che anih hi, I țam hnem zawng a tling ngei ang. Keini chu min kiansan hram dawn nia tih pahin, ka funna chu ka phelh a, ka bulah chuan kan nghat a. Muang changin ka tawlh hnung san hret hret a. Kan tawlh hnun tak ah chuan muangchang leh fimkhur tak hian a rawn chhuak ta zan zan mai.

.
Kalo rin aiin a lian daih, a sei kher leh nghal, kalo ngaihtuah leh mitthla aiin alian a. A hûhâng pawh ana kher e, a mi melh te chu sapui tih takah zâm ram ram na tham ani. A rilțam hle a ni tih hriat zet hian a dul pawh athep zai mai a. A nakruh pawh alang lek lek a ni. A rawn hnai zel a. Ka thilpek chu bawhchilhin a ei nghal bawrh bawrh a. Mi rawn melh leh zoh zoh țhin a. A ke hma dinglamah chuan sakuh hling a tang ni in ka hria. Ka tawlh hnung san hret hret a. Tichuan inher in ka phei san ta a ni.

.
Thiante chuan a va len hmel ve, i hmu chiang em anlo ti nak nak a. A lian khawp mai sûm ruk țha zet zawt chu ani hrim hrim ang, a ai pawn alian mai thei aril a țam em mai a. A ke ah sakuh hling a tang niin ka hria. seh chhuah tum ni awm takin a seh leh zauh țhin tlat. Ti kha chuan minti buai tawh lo ang. A puar khawp zawng a hmu em em ang, meipui hi chhawm țha deuh ila, i mu ang u ka ti ta a. Sawma chuan, a mutsan chi ngawt dawn em ni, ka muhil thei tawp lo ang e. Mu rawh u, ka lo veng ang che u a ti a. E..hlauthawng duh suh, kapu pawh in keipui te chu pasalțha an ni a. Zahngaihna pawh an ngah. A pawng apuiin mi an tawng ngawt ngailo. A tar chaklo leh hliampui tuar te an nih ngawt loh chuan, tawng hmasa lo ila, mihring chu an zah khawp ania ati țhin. A nih hmel khop mai, nichin mai pawh khan a hriat kha, ti ru...rawn mu rawh u, naktuk ramvah tur nen kan châu lutuk ange ka ti a ka mu ta nghal a.
.
Thianga chuan keichu, kah mai asin ka duh, a ruh leh vun reng an sawi to mai, a lo tive bawk a. Kap lah lo e, sahrâng kah zawng kut a chawl duh ngai e anti asin. Loh theih loh avanga kâp pasalțha te pawh hian, an kah thu hi an zêp tlat țhin. Tin, sakuh hling hi, a nâl avangin, taksa ah hian alut duh em em a. Sakeiin, sakuh a ben hian, a hling(a kuh/a hmul) hi a kutah a tang a. Pawt phawi ve thei heklo. A seh chhuah leh seh chhum bak kha chu, muangchangin, a chet zawng khan, ataksa ah alut zel a. An dâr lamah te thleng a tawlh lut chho thei țhin ani. Chuvang chuan, sakei chaklo leh ramsa dang man theilo niin, a țuan alo fûm a. Ramsa aia, man nuam leh beih awlsam zawk mihringte lakah an țuan phah ta țhin ani tiin, ka chhang leh hram a.

***********+***********

Zing ka thawh chuan an lo tho vek tawh a. Ka thawh hma ve tehreng nen, a tlai ber ka ni ta tho mai. Rawngbawl pawh anlo peih țep tawh. In va tho hma awm ve a,,, thawh kalo hai ani maw.. A zialo hle mai. Upa zawk te rawngbawl sa han ei ngawt mai tur chu ava zahthlak dawn ve aw...
.
E khai,, chuti zawngin ngai reng reng suh. Thin thi in kan muhil ve thei hlawm lo a tin ni. I lo sawi dik chiah ani e. Ka tlaivar țhak in ka hria, min rawn tih buai leh hlau reng rengin ka inring ru reng a. Mahse, areh hlen hmak mai. Tunah zawng i upa ber tawh a nia. Kan tih ngam loh mai bakah, a nachang pawh kan hriat loh iti a. Kan tluk lo hle mai che. Min muan khawp mai pasalțha zawng ilo nih takzet hi tiin, min han fak zek a. Ni mai mai nang le. Nangni min thlamuan vang leh in zara ti ngam chauh alawm ka nih. Silaiin minlo veng reng lo ula chuan ka ngam bik tawp nang. Chulam zawng i duhtawk ang u. Kan inphih harh ve ange tiin, luite tui chu ka pan phei a. Chawte kan han ei a. Ramvak tur chuan kan insem darh ta a ni.

.
Siama erawh min zui duh viau mahse, a inthlahrung deuh nge. Ka sawm lui duh bik lo bawk nen. Umawia a zui ta zawk a. Ka sakhi kahna ep kawrkam lehlam zawk chu ka pan a. An ram serh ngaw lam hnaih niin min hrilh a. Ral thlir ngang kha kan nih avangin a hmunah zawng khawi lai nge tih leh khawilam ber nge tih pawh hriat a har tawh a ni.

.
Ka vah kual hrep hnu pawh chuan sazuk hnuhma awm reng reng ka hmu lo, chawhnu thlang her vel ah zawngrual thawm ka hre ta a. Ka veh hnai a. Lei lam a awmlo in, thing hmun ngaw chhah zet mai ah ka va hmu ta ani. Kawr kam leh lam anih avangin ka hmu chiang thei vaklo a. Fimkhur leh hmanhmawh tak si chuan Ka pan phei zel a. Thingkung lianzet mai, chhura rual ni awm a mawi, eng thing nge pawh ka hriatloh kungah chuan anlo awm niin, a sang tham si. Lei lam, akung bul ațang chuan han kah dawn pawn hmuh theih anni tlat lo. Mualdung chuzawh chho in kham pangper toh lawt ațang chuan kan thlir thla a. A kak pui ber, ka awmna lam zawnga rawn zar khamphei chho deuh ah chuan zawng lian zet zet mai, kala hmuh ngai reng reng loh dum deuh ren run hi inhrik en in anlo țhu fur mai a. Sawmhnih, sawmthum țha zet chu an ni ngei ang. Ka lam rawn hnaih tu zing a, alian țha ber chu tin zawn in ka kap ta a ni. Ka fuh ngei aniang a phar thla dawrh mai a. Mahse, ka hmulthi ti ding ur ur thei khawpa, thawm rathlak alo chhuak ta tlat mai.

.
Patling natuar mangang awrawl lianzet mai hi a au thla ta ruah ruah mai a. Nu-nau leh patling dang mangang rawl hi, an rak chûl chûl mai bawk a. An ri têngtung ta mai. Ka makti leh hamhaih lutuk chu chet nachâng pawh ka hrelo. Ka harh chhuah meuh chuan zawng dang chu hmuh tur reng reng an lo awm tawh lo. Hnim hnah han che eih pawh hmuh tur awmlo in a reh tlawk tlawk ringawt mai ni. Mak ka tih em avang leh ka thil la tawn ngailoh anih avangin, ka bengchhe ri leh mitvai mai mai emaw tiin, ka ngaihtuah a. Mahse, silai ka kap ruak ngei bawk si. Ka tho a, ka zâwng kah chu ka zuk chian ang nge, ka haw ang tiin, ka in ngaihtuah a. Zuk chian ngei tum chuan ka chhuk thla ta a ni. A tlakna awm ang vel kan zawn ngial pawn ka hmu zo hauh lo. Hnu hma leh thisen far eih pawh hmuh tur reng reng a awm ta silo a. Makti leh beidawng takin hawsan mai tuma ka inher chiah chu, ka chhak lam ațanga thawm lo chhuak avang chuan ka ding chawt a. Ka han hawi chho chu le, an SAZUK KI BUNG sawi ngei mai chuan mi lo thlir vung vung mai.
.
Kah nachang reng reng ka hrelo ti ila, tumna pawh ka nei miahlo ani ber. ngawireng in ka thlir reng a. A mit chu ramsa mit ni pawn ka hrelo. Thuneih hmel zet a, min hnuai en ni mai hian ka hria. Chu tah mi siai zuk a. Mit khap kar lek in alo bo daih mai. Minute khat ai rei chu ani kher lo maithei kan in en chhung kha. Mahse, amah zawk khan mi aikaih tlat niin ka hria.Heti ringawt zawng a dik dawn lo tlat, keimah hi ka chianglo zo tawh aniang tiin, kal sawn mai ka tum a. Mahse, ka mit vai mai mai nge atak chian tur in, a hnuhma entur chuan ka chho ta ani. A ke hniak zawng alo awm na meuh mai, ram ril lam panin a hnu chu ka chhui ta a. Mahse, khua a tlai tawh si, naktuk lamah tha thar a, chhunzawm chi anih hi tiin, a hnu chu ka chhuilet leh ta zawk a. Mak ka ti ngei mai, a hnu chuan ka kalna hnu te alo kal chhilh a. Min zui char char niawm takin, kan buk thlen hma mual dung thleng chu ka chhui let a ni.

.
Bûk ka thlen chuan khua pawh a thim thet thet tawh a. Thiante pawh anlo thleng kim țhap tawh. U Mawia leh țhianpa Siama chuan, ngau pakhat ve ve kap in, anlo puah mek chu ka pui ve nghal sawk sawk a. Kan puah zawh chuan, Thianga te pawn zanriah an lo peih fel tawh a. Sakhi sarêp hmeh in puar takin chaw kan ei a. Chawei kham ah, Meipui hnung puakin zial kan zu a, chhunlama kan vahna chanchin te kan sawi tlang a. Tumah sazuk hnuhma thar hmu an awm tak loh ah chuan, ka hmuh dan leh ka thiltawn te, sawi tello in a hnu thar ka hmuh thu chu ka sawi ta a. A tûk lama bawhzui pahin, bûk pawh insuan hnaih kan ti tlu ta ani. Zante alo reive ta bawk a. Chhunlam ah kan vak hah bawk nen, mut tum in kan in tintuah a, chutih lai chuan, ral leh lam mual ah chuan an rawn kùk ta chuah chuah mai. U Mawia chuan, tuman chhawn suh u, rammi an nih chu ati a, ngaihsak lemlo chuan kan mutsan ve mai a. Thawm dang engmah hriat zui tur pawh a awm chuang hlei lo a.

*
Zing chaw kan eikham chuan, kan ken theih ang tawk tawk chu kan in ah sem a. Nimin lama ka kalna lam pan chuan bawr zetin kan inzui chhuak ta ani. Kan bawr bawk nen, kal khan rem a zawn loh theih si loh. Kan kal sawt lo ngei mai. Enge maw ti tiin, ka zâwng kahna chhak chu kan chhuak phei ve ta hram a. U Mawia chuan ngawiteh u..helai hi chu ram serh mual tawntirh ava ang ve.. Han thlir ve teh u.. Hei kawr kam lehlam hi chu thing leh mau ani a, tuna kan awmna hi chu thinghmun ngaw, la tuk loh ram ngaw a ang riau mai kati. Sazuk hnu chu khawilai vel ah maw i chhui tawp tiin, min zawt nghal a. Kan piah mual ah sawn ania. Hetiang laiah hian tui țhatna deuh zawng ila, riahbuk sualna tur hmun rem kan zawn vat loh chuan kan inpeih hmanlo palh ange. Ti ru, innghat ila ram serh anih leh nih loh chu kan la hre chhawm mai ang kati vat a. Bûk sualna tur hmunrem țha leh tui țhatna deuh zawng chuan kan vak darh ta ani.

*

Țhianpa Siama chuan min zui a, ka sazuk chhui tawp na mualdung chunglam kan thlen phei chuan, hmunrem țha zet mai alo awm a. Tui erawh a hnai lutuk lo, a hla hranlo bawk. Kawr kam bul chêt a awm zawng, tho an thak duh bakah, a hnawng bawk nen, duh leh tui chu mau in kan la anga ni mai tiin, perhte te chu kan han sat fai thuak thuak a. Thiante koh nan an vah hlat hma in țhianpa han kùk vak teh nang aw țha deuh kati a. Thianpa Siama chu, ngaw chhung khawk rum rum khawp chuan an kùk liah liah mai a.

*
A zâwn a, vawithum ngawt a kûk hnu chuan țhiante thawm ngaichângin kan ngawi kar a. Rinloh deuhin hmun tin mai ațang chuan an rawn chhawn ta chuah chuah mai. Khai a,, tih chi loh tawp mai. Ti teh, i kir phei vat zawk teh ang, kan lo nghak mai dawn nia. Hetiang chuan kan inchhâwn fuh thei chuang lovang tiin, kan phei ta nghal a. Kan in nghahna kan thlen phei chuan, Puia chauh alo la awm a. Ani hi chu ngawi reng mai, sawi leh rel ang ang pawm tawp chi. Pa țha tak hi ani a. Kan thlen phei pawn minlo be lem hlei lo a. Zawn nei ang mai in kan bungrua vel chu ala thlek kual dû dû reng a. Enge zawn nei iva ang ve..theihngilh te a awm em ni, ka’n tih chuan, ngau sarêp kan dahna pate kha..ka hmu hauh lo mai ati a. Kan han zawn ngial pawn kan hmu ta silo. A Mak mange, kan theih nghilh ani lo maw… Theih ngilh lo e. Keimah ngeiin ka ak phei alawm, ka bag bulah hian ka dah ngei a ni ati bawk si. Kan zawng beidawng chu khawinge, lo țhu chawl ula, kawrhte tui khu ka zuk chawi ange. Chhâwl a hâl alawm le, tihpah chuan chempui nen luikawr lam panin ka chhuk san a.

*

Rawthlâ lian leh châng khât deuh pahnih ka sat a. a châng hawlh pawpin, tui ka dah khat a, ka phuar belhbawm hnu a, Ka chho leh chu thui pawh kala chho lo, ka chhuk lam a ka kalna ah tho chho leh ka ni a. Ka chhuk lam khan ka hmu hauh silo. Kan sarêp na bawm zawn ngei mai chu, fel tak hian perhte kung ngheng in, a lo awm fel at mai. Changel hnah a, kan bilh dan ang ang chuan, alo la awm thlap mai lehnghal, kan khai kang a. Ka hawikual vel a. Engmah dang hmuh tur a awm lemlo. Mahse, hetiang thil hi chu Lo vah laiin ka hre ngun tawh a, eng vakah ka ngai tawh lo. Kan Lo vah lai a. Kan chawfun leh ka nu èm, kan hmabak a kan chhawp, lo bo daih țhin leh ka nu èm..mau lera lo in khai țhin te kha ka hrechhuak a. Chhun chaw fak lo a, tlai thleng kan bun hnu a. Kawnglaia kan chawfun kan chhar leh țhin te. Ka pa in hlauh miah loh tur, min fiah anih hi, ramhuai fiamthu thawh ve dan ania ati mai țhin a. Engah mah kan ngaih duh loh avangin kâr khat bak minti buai peih lo reng bawk ani tih te ka hrechhuak a. Khatiang ah khan ka ngai nghet hmiah mai ani.

*
Ka țhiante bul ka han thlen chhoh chuan midang pawh anlo thleng ve chiah a. U Mawia chuan kha chu tinge, kha lam lam ațanga i rawn khai chhoh ngawt a,, ti in ka sarep bawm (pate)khai chu milo zawt a. ,, hei alo lum thla alawm mawle...Enge in kalna lam chanchin, kan zawn phei ram lampang mual ah sawn, riahbuk sualna rem zet chu Siama nen kan hmu asin. Tui erawh chawi angai ang. Mahse, mau tlawn hnih vel chuan buk kawtah a lak theih tho bawk ang tiin, min zawh dil chhut hma chuan ka sawi zung zung a. Diktak chuan kan sarep bawm chu, lum ngaihna a awmlo hrim hrim. Ka chharna ang thleng te phei kha chuan, a theih loh hul hual ang. Thianpa Siama ngaihțha lo lah chuan mi rawn en hû a, a âng deuh zuau chu, ka mitmei in kan khap a. Puia erawh mi en deuh ho chung chuan a ngawi reng thung.

*

Midang ten, ka kalna lamah a țha ti tu awm heklo. Kan hriat lam pan chuan kan in ak phei ta ani. Kan thlen phei rualin, bûk sak hna kan țan nghal mawlh mawlh a. A țhenin tui lakna an buaipui a, thing ro te, fawmkhawm in, ațul ang ang chu tumah inphut hauhlo in, thawk tam lo bik nih hlau em em in, mawng vawm ba ni awm fahran chuan kan che sauh sauh a. Tan rual na na’na chuan, kan indaih bawk a, kan zo ta thuai a. U Mawia chuan, ti khan a duh leh peih apiang chu ramvak rawh u. Bûk nghah pahin, sarêp na te kalo siam anga, ka lo ùr mai mai ang e. Thingro te, in peih leh in rawn hawl haw mai mai dawn nia ati a.

.
Nih chuan khawinge, ram chuan vel pahin sava zanriak te tal pawh, kah tur kan zawng ange. Sakhi sa rêp ringawt zawng a ninawm tawh alawm le tiin, ka insiam a. Thianga leh Puia pawh chhuah ve an tum bawk a. Sawma erawh u Mawia kalo awmpui ange tiin, bûk nghah ve a tum thung, țhianpa Siama chuan ka rawn zuive dawn che alo tivat a. Tichuan, țhianpa siama nen ram ril lam pan chuan kan inzui chhuak ta a. Thianga leh Puia pawh kan chhak lam ah mualdung zawh chho turin an chhuak ve bawk a.

***********+***********
Thianpa chuan, engtin nge kan thil zawn kha i tui chawina lam daih ațanga i rawn ken chhoh theih. U Mawia hnenah lah khan, a lum aniang iti ve ringawt a, ngaihtuah chiang se chu lum ngaihna a awmlo tih an hre ve ngei awm sia, mak kalo ti kher asin. Sawi zui kha i duhloh hmel em a, ka ngawi ta mai zawk a ni, arawn ti ta nge nge a.

.
A nia lawm, thil ho lam mai mai ah midang tih phâwk lêk ka duhloh vang anih kha, khatiang thil te kha chu hetiang khawp a, ramril leh ngaw dur țha ah hi chuan, a awm ngei ngei turah ngai hmiah rawh. Kum in a, kan lo kan vah lai khan hetiang ang hi ka lo hre tawh țhin alawm tiin, kan thiltawn te chu ka hrilh ve a. Khai aw...chutiang thil te chu kei, ka duh loh zawng tak ani. UMawia pawh khan ram serh mual tawn tirh a ang kha ati reng a. Kan lut thuk deuh deuh leh nghal, thil tih chi ani dawn em ni. Ka hre biklo le,, thing hmun kan luh țan tirh ațang khan, a ram boruak pawh hi a in ang chiah lo chu ani alawm. Mahse, ngaih țhat lohna tur engmah a awmlo. Mau hmun leh thing hmun chu a dang ve ang chu. Ti rawh ințhen ila, nang thlanglam ațang hian kan buk pawh tur khan i vak phei anga, keiin chhak lam tlangdung ațang hian ka rawn pawh phei ang e. Thawm ri leh i hmuh chian ngei thil ah lo chuan silai hmet per suh ang che. A beng leh mei thên i hmuh chian chin chauh ikap dawn nia, in râl palh hi thil pawi tak ani a. Fimkhur hle ang che tiin ka chah a. Kan inthen ta nghal a.

*

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:24 pm

Tlangdungah chho in mualdung khamphei zal lai zel zawhin, bûk lampan zawng chuan ka kal a. Ni pawh suk chen velin ala tla lo. Thing hmun ngaw tih takah, lei lam erawh athim deuh khung tawh a. Mahse, a thelh nawm em avangin, khaw hmuh pawh ala tawi em em hran lo. Ka tlang dung zawh chu kawrhtê in alo zai chat a,kawrtê kân tur a, ka’n chhuk thla chu ka tawlh thlu a le,, ka duhai chak leh rangin kawrtê ka thleng thla puat mai. Hnahthel ro atam hlauh a. Pem leh na engmah ka nei lemlo, thâwm ngaithla in kan țhu vang vang phawt a. Mahse, a reh tlawk tlawk mai si, vahrit thla khawng ri tak ngial pawh hriat tur awm heklo. Ka tho a, kal ka siam țan chiah tih chuan, ka chhaklam kawrhtê kam, ka kai chhohna tur lam zawk ațang chuan thawm ka hre ta. Ka’n hawi chho a, kawrte thuk ni lemlo mahse, ngawchhug thim deuh khungah chuan, ka hmuchiang thei hauh lo. A rawn thim thla map map mai, a perhte tâwn chet pawh ka hmu thei, sanghal ani maw, ti rilru chung chuan van var zawn alo thlen hun nghakin kalo tin ran mai a. Ka rim a hria nge ni, a ding ta chut mai. Mahse, ka rim zawng a hre lul lo ang, chawhnu tlailam tawh ah kawr ruamah leh nghal chuan, thlifim pawh chhuk zawng hlirin ani a thawt ni. Engtizia nge maw a din tak reng le, ti a ka ngaihtuah rauh rauh lai chuan, ka chhak lawk ka tleng thlakna ațanga hlam sawmhnih vel bawr a. Thingluang in kham zuar mai chu a rawn tleng thla ta mai a. A rang arang in, ka tleng thlakna lamah bawk chuan ka perkai a, hmanhmawh zetin ka lawn chho zawt zawt mai ani. Min rawn delh ang tih hlau em em a, chho ka ni bawk a, ka chho chak ngei mai. Thinphu zawih zawih khawp a ka hlauh awm chhun ala ni hial ang. Mahse, chu mai alo la ni awzawng lo. Sanghal han ngùk hawk dawt ka hriat rual chuan thingluang chuan mi pel thla fua mai a. A lêr lam chuan mi rawn hem dawn emaw tiin, ka lo bawk a. Mahse, kalam a rawn thlen hma chuan, hrui vai kawi ang mai hian, lehlamah a kawi phei zawka, a ri thla hum hum mai. Hnahthel ro alêng chúm chûm a, Mak ka tih em avang chuan, thinphu dup dup chungin, ka torchlight ka phawrh a, ka zuk ên ta a ni.

.

Karei,,!!! Thing luang emw ka tih kha, thing luang awzawng a lo nilo. Ka phu chiang lutuk chuan ka light leh silai pawh ka thlauh lo chauh.

*

Rulpui lian em em mai hian, sanghal chu alo hmuam tut mai a. Sanghal chuan, a ke hnung lam a lo la leng ut ut mai lehnghal. Tiang reng reng a rul lian ka la hmu ngai lo. Ka thâu ah mi man a, ka khûr ti tih nghal der mai, ka ên lo ngam bawk silo. Ka ên ngam chiah bawk silo. Mak ti leh rapthlak ti tak chuan ka thlir reng a. A len zia mawlh mai chu ka awih theilo hial ani. Ka hamhaih lutuk ka harhchhuah meuh chuan, alo dawlh zo țep tawh, a mawng leh ke chiah alo lo lang tawh a. A dawlh zawh hian mi rawn beisei mai angem, han kah hlum rual ni pawn ka hrelo. Ka silai te chu ka sit ngawih ngawih mai ani. A dawlh zo ta. A hrawk a, an dawlh kal phei rulh rulh mai te chuan, mi râp kher asin.

.
Kut khûr der der chung chuan kan tin a. Mahse, duh aiin ka kut chu a khur nasa mah mah ani. Rul hlau chi kalo ni bawk nen, ka thidang lo chu mak ka inti hial zawk. Muangchangin ka lam a rawn hawi a, a thep deuh suai suai ni hian ka hmu a, ka rilru pawh a harfim tawh viau ani. Kan inti pachang lui a, ka hmuh tirh ang em kha chuan a lian tawh lo na a, lian tak a la ni. Tui țin ai chuan ala lian ngei ang. A sanghal dawlh awmna zawn phei chu sanghal pumraw thla lang kulh in a puar bik luah mai a, kalam pan zawnga a rawn in her chu asei tham bawk a, a thil dawlh awmna chin lu lam zawng chauh pawh chu ka bul a rawn thleng thuak niin ka hria. A puar vang nge, a duh ang chuan a che hlei thei biklo ani ngei ang. A rawn tleng chho tur chu atawlh let leh a, a rawn hnai chho leh țual țual a, uluk em em a lo tin in, ka silai chu ka hmet per ta a ni. A lu ah tak chuan ka kap a, thawm a chhuah ve ta tlat mai, a hram ruai ruai ni mai hian ka hria, an tal tak tak ale, thingtuai te mai mai chu hnim kan rap thlu ang mai hian a mam pûk pûk mai ani. Hram deuh ruai ruai chung chuan thlang lam zawngin a tleng thla ta a, ka thaw huai huai mai, mahse, ka tha khur erawh a reh hleithei der lo. Muang changin ka chhuk thla a, tha khur zawih zawih chung chuan kawrte kam lehlam chu ka perkai a. Bûk lampan chuan engdang mah ngaihsak lo in ka chhuk ta ani.

.

Bûk ka zuk thlen chuan chawei ah minlo nghak reng tawh niin, min lo en phâwk hrû hlawm a. Enge maw thil diklo chu a awm ani. An lo țit hrê hrû danah. Enge i kah a, i silai ri kha kan lo hria asin. Mihring mangang natuar țe tuarh tuarh ri kha kan hre zui mai bawk si a. Kan ngaih thalo in rawn zawn che kan lo tum mek asin tiin, țhianpa Siama chuan mi lo chiau au vat a. Eng nilo e, ka țha e. In rilțam tawh viau ang a, khua in min thim hnan ta sia, ka rawn kal chak thei lo lawm le, chaw eipah in kan sawi dawn nia kati a, țhianpa Siama lah chuan i țha takzet maw..nang leh nag lo in, i hmelte kha a dâng vek ania ala ti hram a. Min ngaihtuah zia pawh a hmelah alang vek ani. Chaw te, ei phawt ila ka hrilh dawn che u nia, ka tih tak tlat avang chuan, chawei kan siam a, Thianga leh Puia chuan vahrit pahnih ve ve an lo kap a. Thianpa Siama pawn hleikapsen lian țha zet alo kap ve bawk a. Sakhi sa rêp leh vahrit sa bakah hleikapsen hem hmin nen, chawei atui duh ngei mai.

.
U Mawia chuan han sawi phawng mai ila, kan riahna hi ka duhzawng ani lo tawp mai, a rawn ti chhuak ta a. Enge nichin chuan i tawn reng reng, khatiang khawp a, patling mangang aurawl kha kala hre ngailo. Na tak tuar, thi tur țe ri ah ka ngai nghet hmiah ani. Nangmah ni tur ah riak ka lo ngai tawh che a.
Sawma nen min kalsan hnu a, kan thil tawn nen..ngaih țhat lohna hlir in kalo khat asin ati charh charh a. Ka thil tawn te chu kimchang in kan hrilh ve hlawm a, rapthlak ti chung leh awihlo mitmeng inpawlh in min thlir ani ber, mahse Puia ațawng tlem ber chu arawn țawng chhuak ta thung.

.
Keichu ka ngaihdan leh hriat ruk a dik niin ka hria a rawn ti bauh a, zawhna mitmeng nen kan en țhap a, u Mawia chuan Puia ngaihdan chu ka țawmpui e.. Chuvang a nia, ka ngaih ațhat theih loh, vawiin a min kalsan tak ațang khan ka awm a nuam thei reng reng lo maia. Sarêp na tur siam a, ka buai em em laiin ka hminga min rawn ko tu hi an awm tlat mai a, Sawma lah thingfawm a akal lai ani a, ani rawn haw hian, min ko emaw kati zawk a.I va fawm ngah hma ve ti a, kan hawi chhuak chu..tumah hmuh tur rêng an awm bawk silo. Mak ti tak chung chuan ka bengchhe ri ani ange ka ti ta ringawt a, mahse țum li ngawt min rawn ko nawn leh a ni. Chumi lai chuan sawma hi a rawn thleg chiah a, tinge min koh vak vak a...a rawn ti ta mai si a. Kan han sawi dun chu min lo ko ve ve ni in. Kan ngaihtuah let a, i tuichawi kawng ațanga sarep bawm i rawn khai chho ngawt pawh kha, a lum aniang I ti tak nâ a, lum ngaihna a awmlo reng reng. A hmun awih loh chu thuhran, Puia pawn ka dahna ațang kha chuan a zuang chhuak anih ngawt loh chuan, hmun danga awm san ngaihna a awmlo hrim hrim, khawih sawn tu an awm tih a chiang a ti bawk. Mahse, Siama hian a sawi fiah ta a, chumi lai vel tak chuan ania, mangang au țe thawm kha kan hriat tak. He ngaw hi ka la hre ngai tlat lo. Kan khaw ram sèrh chhungah kan lut niin ka hria... Thianga, Puia nen a in thiltawn kha han sawi ve leh teh a ti ta a.

*

Thianga chuan khatia, Puia nen kan in zui chhuak ta kha, kan piah mualdung saw tlânglam zawngin kan zawh chho a.mualdung insut khawmna hmun kâwn zawl kan han chuang chhuak chu, Hmunzawl pharh țha zet alo ni a. Mahse, mihring thawm kan hre ta ani. Ramriak ve dang an awm anih ringin kan pan phei a. An tam hmelin nûnâu te nen anni emaw hial ni. An sawi ber hre fak theilo mahila, an ri nuaih nuaih mai a. Ramriak chu anni theilo. Naupang aw nen an ri lêlû si a. Makti takin kan in en dun leh ringawt țhin a. Kan pan hnai zel a, thawm lah chu kan hriat tirh ang a hla ah kan hreve zel mai a. Kan hriat loh hlanin nì pawh alo tla der mai. Ti ringawt zawng a dik dawn hauh lo, min hruaibo thei mai dawn tiin, kan rawn haw san ta ringawt mai ani.

.
Kan rawn chhuk lamin vahrit rual riahna kan rawn hmu fuha, kan rawn kap ta anih hi. Puia hian musep in a kap a. Pahnih an tla nghal a. Keive chu ka mupui thun lai phawrh buai tawh lo in ka kap a. An thlâwh darh vek hma in pakhat ka kap thla leh hlauh a, Mualzawl kan chuan chhuahna hnuai lawk ah ania, an riak ngun hle nitur ani. Ar chhiara ar êk tling khawm ang maiin, an êk pawh atam kher mai. A duh tan chuan, a lei hâng pawh. A chek siam nana rih hlawih hlawih tham ani ngei ang ati a.

*
Chawte kan eikham tlang ta bawk a. Kan han in singsa fel a, buk tualah meipui aiin zial kan zu a. Vahrit puahsa pakhat chu i hem hmin ag u tiin, meipui ah chuan kan hem a. U Mawia chuan, kan sawi tak angin keichu ka ngaih reng a țha thei lo. Tunah te hian min thlir reng tu an awm tlatin ka hria arawn ti leh bauh a. Puia chuan, Kan khaw ram serh chhungah alawm kan awm. Kei Chuan ka hre tawh. Val upa ho nen kan vah reng reng in, kan buk hma sa chin bak kha kan la thleng ngailo. Riahbuk pawh khatiang ah kan sa ngai heklo. He ram hi kal ka châkna a rei tawh a. Mahni chauh chuan ka duh bik silo a. Nimin ațang khan he ram hian țum dang zawng aiin min hip leh zual ani. Kan lut ta rau rau bawk a, a tawp thlenga vah chhuah vek ka duh ani a rawn ti ta a.

*

Tawng ve tuma ka ân zuau lai chuan, lung țhril in min rawn vawm ta mai a.Buk chung te phei chu a ri țuk tuk mai. Kan in en hau hlawm a. Chutah chhak leh thlang ațang chuan an kùk ta chuah chuah mai ani. kan chhaklam ațang chuan lungpui rawn lum dur dur thawm alo chhuak a. Thianpa Siama tho thut chu tlanchhiat a tum hma in ka man vat a. Puia chuan tumah tlan sawn suh u, a rawn lum thleng lo ang, thawm ringawt bak ani dawn lo a rawn ti a. A rawn ri thla rùm rum mai si a, tlanchhiat mai chu chakawm tak a ni. Mahse, kan bul a rawn thlen hma chuan, thawkleh khatah areh hmuk a. Thawm dang ngaithla in kan ngawi țhap a. A reh hian a reh tlawk tlawk ta mai ani.

*

Puia chuan eng thawm pawh lo chhuak in rawn ri mahse, tumah chiâi loh tur. Rammi te thawm siam leh min tih țhaihna ani tih in hre dawn nia arawn ti a. Ka lo rin ruk dan chiah a ni. Puia hi Ngawi chawi hle mahse, a huaisen ka ring tlat rêng a. Tawng tam lo leh uang mai mai lo tak, pa luhlul leh deh khirh, tih tawh chu ti tlut mi. Duh loh zawng leh tih tawh loh chin pawh tilo bur mai, anih kalo ring ru sa tawh reng ani. Midang an phâwk hrû lai pawn zâm hmel leh chiâi hmel apu chhin eih lo. Ka tawn țhan tawh a ni a, areh ve leh mai ang ati sam êt a. Kan vahrit hem lai bawp chu bal thla ina ei ta vel mai mai a. Eive tum a, kan ban chiah chu, lung hi a rawn thlawk ta fur fur mai. Kâwi tiah zet zet tur lungin min han deng thawi thuak thuak mai chu hlauhawm duh tak ani. A hlauhawm em avang chuan buk chhungah kan tlan lut vat a, bûk bang chhak lam te chu a rawn deng ri dawt dawt mai a, kan ngawi țhiap mai. Lunga min vawm na chua reh fel chiah tih in, za em em mai hian nu chang aw an nui khek awr awr mai chu, țhianpa Siama chuan a râp ngang a niang, ka ban ah mi rawn vuan a, mi hmer na kher asin.Bûk kawta kan mei pui chheh bulah chuan eng tak ni maw, a rawn phun ri sur sur mai. u Mawia chuan an bih a, a rawn tawlh let leh rang kher asin. Kan mei chhem khi, tu in emaw a âi a nia, a țhu dum run mai a rawn ti khur dat dat a.

*
Rang takin Puia chu silai nen a zuang chhuak nghal a. Silai ka chuh ve hman loh avangin chempui nen ka umchuak ve vat a. Bûk kawtah chuan kan ding dun chawih mai. Kan meilum aitu chu min hnung chhawn zawng hian alo țhu a. Mei eng ah chuan a lang chiang khawp mai, a lian hauh lo. Thiante ho pawh silai nen an rawn chhuak zui ve nghal a. Puia chuan tunge I nih, enge I duh tiin, an ko a. Ngawireng in muang châng hian a rawn ding chhuak a, kan lam ah a rawn inher țial țial a, pitar hmelchhe zet, zangkùl khin khen hi, kan lam hawiin, hâ bal siu seu hian a rawn țhen țha mai, a hmel chu râpwm tak ani. A sam thur hrêu bum mai leh, a hmel ruh hlang, vun in a tuam ang mai a, a biang ki rût mai te chu rapthlak duh tak ani, thinrim hmelzet a kan lam rawn en pah chuan a mitmeng pawng hlit hlet chu a khap rang ruai ruai a.

*
Thinrim zet hian, Engah nge ka ar inlo talh a rawn ti ta mai.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:25 pm

SAZUK KI BUNG 2.

By, Hriata Tea

Puia chuan i ar anih kan hre lo, ramvâk kan ni a, kan rilțam in, asa kan ei duh ani mai tiin, alo chhang a. Ka archhiar a mi ka thu lo in pali ngawt inlo talh a, in chak lo ang. He ram hi chhuahsan rang rawh u. Chuti anih loh chuan damin in haw leh tawh lo ang ti a, a sawi zawh rual chiah chuan silai a ri dawt a, țe ruai ruai chung chuan a tlu ta riai riai mai. Mahse, lei a deh thlen hma in a bo hmak. Thianga in hrosa ri ka hriat rual chuan ama kah ani tih ka hrethiam nghal. A hmel mawlh mai kha ka mitthla ah a châm a, mi râp takzet ani.

*
Ruah mal lian zet zet hi arawn tla phuar phuar a. Thli arawn tleh vûk vûk bawk a. Kan mei chhêmte chu a sî, a chhêm darh chum chum mai. Khawpui ri dur dûr leh țêk tla zuai zuai karah chuan kan in au lawng lâwng a, kan sarêp te chu Bûk chhugah kan suan lut a, thingzar han tliak ri leh thing tlu tur han auh ri țuah țuah maite chu râp awm tak ani. Kan bûk a rawn vaw ngei dawn anih hi kalo tih rilruk lai in, kan bûk chhak ah chuan a invaw ri dup a. Tun țum chu arawn vaw tawh ngei dawn nih hi, ti rilru reng in ka awm a. Mahse, rawn vuak tak tak erawh a awmlo hlauh.

.
Kawngka bula awm Thianga chu arawn țe tuarh mai. Enge kan lo ti vat a, pawnlam kawh pah chuan en teh u ati a, a khur nghal hlawk hlawk a. Pawn lam chu kan thlir țhap a. Mahse, athim em avangin engmah a hmuh theih loh.Kawl arawn phe zuai zuai a. Chumi êng ah chiah chuan bûk kawt a, kan meichhem na ah chuan, kha Pitar ngei mai kha kan lam hawiin alo țhen thi sûng mai. A bulah chuan, ka rulpui hmuh aia lian fe mai hi alo dak ûr mai bawk a. Rapthlak tak ani. Kan pitari chu, a kâ ațanga chuak atan a mawi lo khawp, a ring hian anui khek ta awr awr mai. Kâwlphêt chhung zawka hmu mah ni ila a rapthlak em ani. A nui ri ringawt pawh mur sung sung na tham ani tlat. Kawl a rawn phêt êng leh zuai zuai chuan hmuh tur a awm leh tawh lo.

.

A kap tu ber Thianga lah a khur dut dut tawh mai si a, a mitmeng te chu hlauhna avangin, a meng â ruai a. Thli leh ruah te chu fel fai em em in, thâwk leh khatah a hân duak a. Mahse, kan bûk hual vel chuan, sakawr tlan ri ang maiin a ri kual țuk țuk reng ta mai a. Kan țhianpa Thianga mangang au țe ri chu rapthlak duh tak a ni. Min chhan rû,,, min pui rawh u tiin, a au ruai ruai ta mai a. A meng â vek mai bawk si. Kan han sâwi țhin, meng râng ruai chung hian min melh run run a. Kha..alo kal leh tawh a nia, a rapthlak lutuk tiin, a tâl leh buan buan țhin a. Pahnih pawn kan chelh hneh lo lam ani.

.

Eng maw, enge i hlauh tiin, kan han sâwi a, bang lam leh kawngka lam te melh run run chung chuan kha, in hnunga kha a awm, hnawt chhuak rawh u. A rapthlak lutuk, ti ringawt chuan a sa râk chiam chiam reng mai a. Tih ngaihna dang awm hek lo. Kan din hual a, kan veng ta tawp mai ani. Kawt lamah lah an phun sur sur reng mai bawk si. Enge anih pawh hriat loh hi, bûk hualin an in um ri țuk țuk reng bawk a. Thawm awmna lam apiang chu light in kan han chhun țhin a, engmah hmuh tur awm heklo. Kan chhun êng loh na lam apiang ah a insawn zel mai a ni. Han hlat san deuh hlek lah chuan Thianga chu mangang in a țe têng tung zel mai a. Mangan thlak duh kher asin.

.
Thawm te chu a reh fel chiah a. Nausen rawl diktak mai hi, lungchhe lutuk tak maiin a rawn țap ve ta thung a. Beng a khawrh in, ti ril zawng a fan hneh kher mai. Thianpa Siama chu ka’n melh a, a hlau hle tih ka hre mai. Meng phâwk hrû chungin alo khur zawih zawih mai a. E țhianpa hlau reng reng suh. Engtin mah minti na thei hleinem. Khua avar anga a reh vek mai ang tiin, ka thlamuan a. Kei a hnemtu ber pawh eng ruai kani biklo. Ka aw te chu a khûr lo chauh ani.

.
Puia zawng, a pawisa lo hle tih hriat zet hian, zial a lo zu hlat hlat mai. U Mawia leh Sawma pawh an hlau tih a hriat hle na a, an la intipachang thei khawp thung. Nausen țap pawh a zuai țan ta. Mahse, patling rùm riin arawn thlak ve ta thung a. Bûk hual vel chuan, a rum nghur nghur mai. Tikhan lo awm ula, khawinge, heti tak maia thlabar mangang a, kan țhianpa an han siam vei chu le, kan hel ve thung ange tiin, Puia chu tho lawk a, pawn lama chhuah a rual ta mai a. Tunge I nih phiangsen chu le..rawn inlan ve ta che ngam leh ngam ngam chu ilo in hmachhawn teh ang. pasalțha min ti ngai e tiin, Puia chu a in hrosa kûk kûk a. Bûk chu a hel kual ve ta thung a. In hro sak pah reng chung chuan a vawihnihna a hel chhuak țep tih chuan ari dawp a, Puia han rum nghut ri chu kan hre zui nghal zat mai. Kan ko a, min chhâng hauh lo. Rang takin ka tlan chhuak a, a rùm ri ka hriatna lai chu kava chhun èng a, bawk khup zawnga alo mu reng chu ka va hmu ta ani.

.

Ka pan hnai vat a. Auh mawlh mawlh pah chuan ka pawm a, a mar kan dek a. A la thi lo tih ka hriat ve leh bûk chhungah ka pawm lut a, kâwl pawh a rawn êng țan tawh ani ngei ang, thawm leh phunri te nausen țap leh nutling leh pachang räwl nen, mangang au țe ri leh nui ri uarh uarh te chu a ri nuaih mai. Thianga erawh a mangang țe ri leh hlau thlabar te chuan a kian san tawh a. Ngaihtuah awm leh buaipui ngai em em ani ta lo. Puia rawn harh hun chu kan nghak ta țhap a. Chutah a tawp nan ti niawm fahran hian kan buk chu hneh sawh zet hian a rawn sawi ta lâwp lâwp mai a. A chim mai dawn emaw kan tih hnu chuan a reh ve ta hram a.

.
Khua pawh alo var chiang ta. Sava hram nak nak ri te kan han hriat leh takah chuan, thla pawh amuang in ka thaw veng huai huai mai. Puia pawh a rawn rùm deuh țuah țuah a. Kan han ko vat a, a rawn mengchhuak ve ta nghal a. Rawn țhut chhuah pah chuan a tukhum chu a tuai nauh nauh a. Ka lu chu ava han na kher ve...engtin nge ka awm a ti a. Ka hmuh dan te chu kan hrilh a. Ni tak maw...ka hnunglam ațang min vawthlu anih ber chu, ka tukhum rawn hit mup kha ka hriat chhun chu ani mai. Thianga enge a an, khua a var tawh em ati zui nghal a. A țhat thu ka lo hrilh vat a. Khua pawh a var chiang tawh e. Ngaw chhung hi ala thim mai mai chauh ani ka ti a.

.
Zanlam kan hun tawn in zir hek lo, che châng peih leh tho thâng țha tak kan vang khawp mai. Kan kimki deuh țham ni mai in ka hria, rawng bawl ka țan a, Puia chuan mi rawn puih a tum a, lo awm mai mai rawh, thil harsa anih loh hi ka ti a, midang lah che chãng țha ngam awm hek lo. Haw mai an duh thu an sawi ta hlawm a. U Mawia chuan hetiang reng reng zawng, thil țha ani lo tawp mai, upa duh loh leh serh ani a. He ram hi kan chhuahsan vat a țha ber ang ati a. Thianga pawh in riah leh a tum tawh loh thu leh, haw nghal vang vang a duhthu a sawi mawlh mawlh reng a. Thianpa Siama leh Sawma erawh an ngawi reng thung, an mitmeng leh hmelah erawh riah leh an châk lo tih a lang thei a. Chawei lai chuan u Mawia chu a rawn țawng chhuak ta a.

.
Engtia awm nge kan tum dawn. Riah leh chu kan châk tawh lo tlâng vek in ka ring a. He ram hi chhuahsan ila, hmun dangah i insuan zawk mai ang u. He hmun hi zawng ka duh zawng a ni hauh lo mai tih pah chuan, min melh kual a. Thianga chuan keizawng, hmun danga in suan pawh ka duh tawh lo, haw nal nal ka duh ani. Kha pitar kha ka mitthla ah a chamreng mai, in hmu ve thei lo mai mai anih kha, min insiam chhiat khum nasat dan te kha, dam in i haw tawh lo ang te min ti leh nghal a, ka la haw theih lai hian haw vat vat ka duh ani. Ka lo kap kher kher kha aw...pawi ka ti takzet a ni a ti vawng vawng mai, a la hlau hle ani tih hriat takin ala țawng khur der der bawk. A mah pawh ala chiang lutuk lo tih a melh ngai a melh leh ngur ngur țhin dân ah a hriat. A meng dul raih mai a, eng emaw ri hlek ah pawh a phu dûrh zel a, a meng dawih dui mai bawk si, a khawgaih thlak takzet a ni.

.

In tih dan dan ani mai, mahse, kei chu la riah ngei ka duh a ni. Kan ramvah chhan ber pawh a hnu kan hmu ve chauh ani si a, sa kah mumal kan la nei bawk silo. Haw in duh anih pawn ka dem reng reng lo che u. Riah la duh pakhat tal in awm chuan ka la riak leh zel duh ani ka ti ta a. Puia chuan kei pawh riah leh ka la duh e. Kei aia dawih zawk hlau in ka haw dawn lo reng reng, hnunglam ațang ka bei e, te min ti khang langa, ka tlawmngai takzet a ni. He ram a, han vah hi ka châkna a rei tawh bawk nen, Thu rualpui tur ka nei ta bawk a, ka chawlhsan dawn reng reng lo a rawn ti a. Sawma leh țhianpa Siama pawh in riah leh an la huam thu an sawi ve ve a. An hlauh thu erawh an zêp lem lo.

.
Sawma chuan nizan thil kha ka vawikhat tawnna ani a. Ka zâm em em a. Ka hlauhzia kha zêp ka tum lo. Mahse, min tlãwm hneh dan em em kha, ka tlawmngai tlat mai, ka pa hnenah hlauh vanga haw ka nih thu sawi ai chuan, a khampheia haw ka thlang zawk. Chuvangin nizan ang mai mai a, hmachhawn tawh lo tur in ka intiam nghal bawk ani ati a. Thianpa Siama erawh keiman haw ngei turin ka nawrlui ta tlat a. Ni ruk chhunga kan rawn haw ta lo anih chuan, kapa hnenah kan chanchin hi hrilh tur in ka duh che ani ka tihtak tlat ah chuan, hreh chung chung in, a remti thei hram a. U Mawia, Thianga leh țhianpa Siama chu chawei kham chuan haw tur in an insiam ta ani.

.
Siama chuan țhiante phatsan ah riak ani ka in ngaih. Ka riak ve leh zawk ange. Ka sawm chhuah I ni bawk si. Ka hawsan leh daih che chuan, I chhungte ka hmu ngamlo ang tiin, haw a duh leh ta lo tlat mai. Thianpa chutin ngai mah ta che, ka lo haw leh em em ang. I chugah thil țhalo a thleng ang tih ka hlau ani. Ti hian u Mawia te nen induh leh in ramvak haw anga, khua ah min lo nghak mai dawn alawm. Pawiti reng reng suh. Damtakin kan in hmu leh em em ang. Ka tan min haw sak zawk dawn alawm. In lamah i awm tih ka hriat chuan, thlamuang takin he ram ah hian ka vak vel thei dawn asin kati a. A tawp ah zawng, a lungsi zat lo chung chu ka tir liam thei ta hram a. In hmu tawh ngailo tur leh thi tur ang mai in kan inthlah hi a ang ber, an liam dawn thleng chuan minla rawn thlir vawng vawng mai ani.

.
Keini pawh kan insiam ve nghal a. Pathum kan la ni bawk a, tumruh tak leh engkim huam a, awm kan nih avangin tumah thlamuan leh venthawn ngai kan awm talo bawk nen, a thawven thlak huai mai. Sazuk hnu ka hmuhna kan thlen chuan, kan han chhui țan ta a. Nihnih na anih tawh avangin amah chu tawn kan inbeisei lemlo, a chet tlat na bik leh ahnu thar hmuh beiseia chhui mai kan ni. Mahse, lo fing hnih vel kan chhui thlen chuan, a hnu a rul chuk ta tlat mai, a thlawk thei emaw tih mai turin atawp hmuk mai a. Kan han zawn ngial pawn a hnu-hma hmuh tur reng reng a awm ta silo a. kan in țhen hran mai angai ta ani. A lai ah sawma kan kaltir a, Puia chhaklam tlangdung rawn hrut phei turin a kal bawk a. Kei in a mawng ber ațang ruam leh mualdung hrutin ka pêl ve thung dawn ani. Thawm leh hmuhchian ngei loh chu kah loh tur. Puihna mamawh chuan silai vawihnih hmeh puah nise tiin, kan inthen a, mahni seh seh mual lam kan pan ta ani.

.
Ka lut thuk tulh tulh a, he ram țhatzia leh a ngaw chhah țhat zia pawh ka hre telh telh mai, sakhi hi a rualin an awm ang tih ngaihna reng reng ka hrelo. Mahse, mualzawl phul champùt mai hi kava chuang chhuak hlawl mai a. Chuta ka thil hmuh chu ani. Sakhi rual sawmthum vel lai tur hi anlo tla sup sup mai a. Mak ka ti kher mai, hmuhnawm kati in ka la hmuh ngai loh leh hriat ngai loh thil ani a, hmuhnawm ti em em in ka thlir ta reng a. Kah ka tum lemlo a, ka hmuhnawm thlir ngawih ngawih ringawt mai ani.

.
Chutia hmuhnawm ti em em a kalo thlir reng lai chuan ka hnunglam ațanga thawm lo chhuak chu, ka hriat rual rual in ka inher nghal zawk a, nghalchang lian țha em em mai leh ngho chhuak vurh mai chuan mi rawn su țep tawh ni in, a rawn hawk phei dut dut mai a. Rang takin ka zuang kang dawrh a, min tlanpel fua mai, teuh ther ther tak ani. Ka insiam rem rual chuan, a rawn let phei ve leh nghal zat mai. Mai mai chuan ka hnunglam ațang te a, min han phin thut chu le..Kap duhlo mah ila ka kah tho tho angai anih hi tiin, ka silai ka lêk kawh nghal zat a.

.
Tlan chhiat san ngaihna awm heklo. Phûlah phei chuan, sakei aia hlauhawm zawk mah an ni si a, min rawn phin phei leh chu a rawn tawn kaw phei pur pur mai. Kah țhelh thiang ka nilo. Chuvangin a fuh ngei theih nan ka lo nghak a, ka silai hawlh phak deuh thaw chin alo thlen chuan, a chal dar ah tak ka kap ta ani. A tawm châwih mai. Hmun leh hmunah silaimu hnawhna lang hûng khawp a kap ka ni bawk a. Che leh tur eih pawh a awm lo. Silai zên phuhna pawh a ut thual mai, ka sanghal kah tawh a zawngah ala lian ber ani. A chal țha in a ngho pawh kutphah chen zet mai hi a lawr kuai vùn mai a. Sum sarih ai chuan ate lo tawp ang. A ngho hriam zet mai chu ka chem hnung lamin kan khawng bil nawk nawk a. Chutah chuan ani, an lo sawi thin sanghal bengverh ngei mai chu, ka kap ani tih ka hmuh tak, keimah chauh chuan hawn ngaihna awm heklo. Ka țhiante koh nan a, silai kap turin tlangdung lam chu ka pan chho a. Silai vawihnih ka hmeh puah zâwn hnu chuan, zialzuk pahin ka lo nghak ta a.

.

A rei duh vang vang kher mai. Ka silai ri an hrelo emaw ni aw tiin, ka ngaihtuah a. Ni pawh a hniam tawh ang reng viau bawk si. Ka kâp puak leh mai dawn emaw nile ti a, ka inngaihtuah lai chuan ka thlanglam a. Chepa han chek/tlak (hram) ri chuan ka beng averh ta tlat mai. Keimah min hmu nge. Sa dang zawk tiin, ka ngai changa che miahlo chuan kan melh kual a. Kei chu kani lo ani ngei ang. A hram uar dan ah chuan sate nau mai zawng ani lo tawp ang le.. Muangchang leh thawm dim takin ka tho a. Thingbul phen ațang chuan ka thlanglam chu ka zuk thlir thla a. Hmeichhe han nui ri har har thawm chuan ka beng a verh leh zual kher mai, ka zawn thlang lamah chuan a nuiri chu a rawn hnai zel a. Thingțang han rah tliah ri te pawh ka hre thei tawh hial ani. Sa nge, rammi ni ang aw tiin, ka ngaihtuah a, a lo lan hun nghakin ka silai chuan kalo tin lawk ran bawk a.

.

Hmeichhe âw in, kal rawh kal rawh, atih ri kan hre leh chu mak kati kher e, sanghal han ngùk hruih hrûih ri ka hre zui leh a. Makti rilru em em chung chuan kalo thlir reng a. A rawn lang ta ruau ruau mai. Ka sanghal kah kha ani chiang mai le, mahse, karei, karei,!! Sanghal ai chuan, sanghal hnunga rawn nam tu chuan ka mit ala zawk daih. Hetiang khawp a hmelțha hi an awm thei dawn em ni..? Ngote kherh ni awm tak mahse, ani hauh lo. chhing tei tawiin a feng a, chumi khuh chin bak a malte, lo lang var țhiang rial mai chuan, mit khap na chang min hriattir thei lo. A awmbawr kawh lah chu, a kawr hak chhan ațang pawn a nalh tawk ang tih hriat fahran hian a kawh phir țhâih mai bawk. A nghawng no nalhzia chuan, a hmelțhatna chu a chawih mawi kher bawk, ahnar ngul nalh chungchuang lutuk nen chuan, thingpui no a, tui a in thei dawn em ni tih tur a ni. A heh vâm sen hiam mai chu, tan chhum hlim ang mai in, a ling sen hlar mai bawk a. A taksa khawilai mai pawh, hmuh theih chin zawngte chu mahni a nunna nei hrang, țha chung chuang bik țhiau ang mai an ni. Ka hmuh thuak ațanga ka hmuh chin țhat dan, ka sawi fiah thiam dan ber, fiah hauh silo ani.

.

Sanghal han hawk dawt ri chuan min ti harh zawk a. Nula chuan sanghal chu thunun tum in an zut hauh hauh a. Min rawn phin tum mek tu sanghal pawh a awp hniam ta suai suai a. Ka rim alo hria ani ngei ang. Kan in hlat loh bakah chhaklam zawk a awm ka ni miau si a. Nula chuan ka lam a rawn hawi a, a mitmeng mawi zia mawlh mai kha, ka vawikhat hmuhna a. Min melh zam tu awm chhun ala ni. Te chem chem in ka inhria a, a lakah chuan ka inhmu hniam ngawih ngawih ani ber mai. Mitmeng mawi leh zahawm taka min melh chung chuan, engtia rei nge minlo thlir tawh a rawn ti a. Ka hamhaih si, a țawng lah chu ka hre chiang ropui si. Mahse, mak tak maiin hlauhna erawh ka nei miah silo. Ka lo fimkhur tawk lo deuh ani. Ka ran vulh lai hi a luhlul tawh lutuk a, ka buai phah ta fo mai a rawn ti leh a. Kha chu nichina ka sanghal kah kha ani maw..ka’n ti a.

.

Nangma kah maw lo ni a. Hei chu kah ka phal hleinem keima vulh lai bik ani a. A dang ka dahsak che kha min pawm sak mai dawn nia ati leh a. Kah tum leh duh reng vanga kap pawh ka ni lo, Amah khan ka hnunglam ațang mi rawn phin thut a tin nih kha, tlema tlem ah miti hlum lo chauh lawm.. A pawi hle mai, tun țum chauh zawng ngaidam la, a aia ka dahsak che khu min pawm sak hram rawh. Engtin nge i kah theih zawk reng reng. Keipui pawh pathum ngawt ati hlum tawh asin. Engtia hêng lai thleng thleng lo kal nge inih. Ramvak dang reng reng he ramah hian an la rawn lut thleng ngai silo a. Engvanga rawn lut nge I nih ati a. Chhan tuma ka ân zuau lai chuan kan chhaklam lo fing khat vel ațang chuan silai a rawn puak dur mai. Thian I nei a ni maw arawn ti leh a. Nei e..sanghal min chan pui tura ka kohte anlo thleng tawh anih chu ka tia. An lawm lo maithei ani, tih pah chuan a nui seih a. Sanghal chungah chuan chuangin, kan inhmu leh dawn nia tih pah chuan sanghal chu kal rawh le..ati a. Sanghal han hawk dawt rual chuan an bo ve nghal der mai.

.

Ka silai chu kan hmetpuak ve leh a. Mak tihna hlirin ka khat a. Ka mitvai leh mumang mai mai ani bawk silo. Enge an lungawi lo maithei a ni tih pah a a nuih kher na chhan kha. Zawhna hlirin ka khat a. Chhanna erawh ka inpe thei silo. Kha ngei kha em ni an sawi Lasi nula chu ni ang. Ka hmu ve tihna em ni. A hmel mawlh mai kha, a pian nalhzia leh a nui hmel mawizia te tak kha aw..mitthla ah a cham a, ka vei zui ngawih ngawih ta ani e.. Hmuh leh mawlh ka chak ta et et mai. Ka in ngaihtuah nasat luatah, Sawma leh Puia thawm pawh kalo hrechang tawh lo, ka bul lawkah chuan an rawn kùk a. Ka ngaihtuahna ata ka harh zawk mai,ka âw kan thian kharh a.
.
Puia chuan i inhliam nge, sa i kap, I țha em a rawn ti sawk sawk a. Ka țha e, tum loh deuhin sanghal ka kap a lawm mawle.. Mahse, ka kah ber pawh a awm tawh lo ang. Ka rawn ko hman tawh laklawh si che u a. I zuk en phawt teh ang u, ka la hmu biklo a nia tih pah chuan hma ka hruai a, Sawma chuan enge i sawi awmzia, ila chian lo a mi ti dawn ila, a thi ngei tih i hre bawk si, ka va hrethiam lo ve, nui pùt pût lo khan han sawi țha hle hle teh, kan zâwn pui lo tawp mai ang che ati a. Kalpah chuan ka thil tawn chu sawi chi ani ang em tih ka ngaihtuah a. Ka sawifiah si loh chuan, min nuihzat ang tih ka hlau bawk si. Egpawh nise, engtiat nge anih a, eng ang nge anih chian phawt ila, duh leh kala sawifiah leh zawk ang chu ka ti ta a.
.

A hmun kan zuk thleng thla chu, ka sanghal kah na ah chuan, sakhi chal zet, ki hreu bùm mai hi alo let ngât mai a. Mak ka ti viau na a. Ka thil hmuh leh hriat avang khan mak ka tihna lam aiin, a mawi zia leh chutiang khawp a sakhi chal ki hreu tham khawp chu ka la hmuh ngai loh bak ah, a awm theih ka ring hek lo. Puia leh Sawma pawh chuan mawi anti ngang aniang. Sanghal hmuh tum a kal si, engmah sawi lo in an thut chilh a. A ki chu an chul hauh hauh reng mai ani. Hetiang khawp a, sakhi chal hi hmuh chu sawi loh, an sawi pawh kala hre ngailo an ti ve ve a. Sawma chuan sanghal te kha iti vel a. Min barakhaih I duh vang a ni maw ilo sawi țhat duh hlek loh ni" ati a. Ka thil hmuh leh tawnte chu sawi châk viau mah ila, an awih loh ka hlauh bak ah, in sawifiah a ngai ta lo tih ka hriat tak avang chuan, ka aw ve ta zawk a. Puia erawh a lung fing deuh tih takah,zawhna nei mitmeng in, min en tih ka hria. Mahse, ka bengkhawn duhlo lui ve tlat a. Tawngka chuan min zawt bik lem hlei lo a. Sakhi lo tluk dan leh sanghal hnu hma erawh a bih ngun ngang mai. Sawlai phûl ah sawn sakhi rual an tla a sin, kan silai ri te avang khan an tlan darh zo tawh ani ngei ang. Ti ru, khua pawh a tlai mai dawn, thim chhiat hma in bùk kan thleng hman lo palh ange tiin, kan in ak a, buk lam kan pan ta ani.

.
In thlahrun awm duh viau mai. Sakhi pum khat kah avanga țhiante pun ang hrim ka ni ta si a. Mahse, ka lungawi em em si a ni. Ka thinrim phal ngang lo. Kha nu hmel kha ka mitthla ah a cham tlat a. Thiante țawng pawh ngaihsak lo lèk in, ka lo ngaihtuah leh veng țhin. Puia’n, a lu hi a chal chinah nge ka lak ang a lu pum hian I duh kher em, enge i ngaihtuah veng veng a rawn tih chuan, â lam hla ani bawk si. A ki chauh pawh kha a tawk lutuk, hawn a hautak mai mai kati a. Sawma pawhin chawei alo peih tawh a. Ka sarep chu mei ka chhawm țha a. Zan pawh alo rei lek lek tawh zawk ani. Sakhi chek nen duhtawkin chaw kan han ei puar peng pawng a. Zialzuk pahin kan țhiante haw ta chu an ngaihawm mange aw tiin, kan ti-ti bawrh bawrh a. Puia chuan nizan lama kan unaute chu an va reh teh diak ve mawle.. Ka beisei ru viau asin le, a rawn ti chhuak bauh a. Ni ngawt mai ti teh u, nizan kan mu țha bawk silo. Min rawn chimbuai leh hma hian i mu vat ang u, Min rawn chimbuai leh anih chuan, mutmu kan tuah thei leh tawp lo ang. Thil engpawh thleng se, in kaih thawh hreh reng reng loh tur, mahni mai chuan engpawh pawng tawngtaw bawh ngawt lo bawk ila tiin, mutna kan siam a, titi pahin kan tluzal ta ani.

**********+**********
Ka mutui lai chu, thil ri danglam deuh hian min ti harh a. Ka meng a, kan hawi chhuah chuan, Puia leh Sawma chu anlo mu tawh reng reng lo. Mahse, buk kawtah meipui an ai a ni ngei ang an țawng pawh ka hrethei, Ka mutbu leh lukham kar te bakah, bûk chhung hmun tin mai ah chuan 'Râwt' anlo hram chuah chuah mai chu niin, han mutthilh leh theih ngaihna awm heklo. An mahni hmuh theih bawk siloh. Râwt râwt tiin, hmuntin mai ah chuan ari chuah chuah mai si, ka chhuak ve ta nge nge a. Sawma chuan ilo harh ve ta maw...kan thawh hnu ah pawh ka rinaiin I mu rei thei daih mai alo ti a. Ti nge min kaihthawh ve mai loh a.. Puia hian a muthilh theih chhung chu muhil rawh se, hetiang hi chu an hlauhawm hran lo, an ninawma ani mai ati a, i mut rei theih pawh kan rin loh nen, kan rinaiin i harh har zawk ngawt mai.

.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:25 pm

An rawn bengchhen na a rei tawh em?. Kan harh ațang chuan a rei ve tawh khawp mai. Pawnlam hi chu a zia deuh anih hi ka ti hman chiah a, kan bul velah te chuan an rawn ri ta chuah chuah mai a. Kan thawmhnaw karah te an lut aniang chu, râwt râwt tih ringawt mai chu bengah ari mur mur mai ani. Sawma ning lutuk chuan, thingthunung in an vai vel a, a zia ve deuh chuan a hriat a. Mahse, vai reng peih hek lo. A ngai te bawk a ni leh nghal zel mai. Puia lah chu, ari hrelo niawm takin, zial a pak tulh tulh a. A țhu ngawi muah muah thung. Muang changin a rawn tho a. Bûk chhungah a lut ta daih a. Beng hup pawn awm mah ila, awmzia a awm thei tak tak lo. Puia lah a rawn chhuak leh mai silo a, thosi leh vaihmite lah chu antam em em mai leh nghal a. Mak tak ani, ti teh i lutve mai teh ang kati ta nge nge a. Bûk kan han lut chu Puia zawng tui em em in alo muhil siai siai mai. Mut ve mai tuma kan han mu chiah chu, min zui lut ni ngei tur ani. A ngaite bawkin räwt bawk chu an rawn hram leh ta chuah chuah mai. Mut theih heklo. Sawma chuan ninawm lutuk, thingpui kan lum ange a tia, bûk chhung tapah chuan, mei a nuna, thingpui a chhuang ta a,meivil pahin,a light chuan buk chhung chu a chhun kual pup pup reng a. Hmuh theih hlawm der silo. An ninawm ngei mai tiin, a phun nuah nuah reng bawk a. Puia pawh a rawn tho chhuak ve leh a, nui deuh chung hian, ngahnge maw pawnah khan in awm reng loh le..ka tawktarh ber in ni a sin le a rawn ti a. Chuvang ani maw ngawi reng a i luhbo thawrh ni.

.
Sawma chuan khi le..khi ngei khi an lalpa ani ngei ngei ang. Pawnah khan ka hmu tawh a. Kan chhuah hma khan ka hmu tawh bawk. Kan awmna apiangah a rawn awm ve ziah mai, khawinge kan man ange ati a. Thingțang pakhat hian bang kil sang laia khauchher ni silo, uifawm pawh ni chiah silo hi, a hawlh bet a. A man ta a. Râwt hram ho pawh an bei uar sauh sauh emaw tih mai tur a ni. Puia nen chuan awih awm loh emai, paih daih rawh kan ti a. Ani lah chuan, ka rawh anga kan ei daih ang e. A reh hmak mai ang ati teh tlat a. Meiah chuan an vawm lut a, chutah le..râwt râwt tiin, rangtak tak hian an ri chuah chuah a. A hnu reilote ah chuan, mak tak maiin, an reh ta hmak mai a. Sawma lah chuan, kha maw...ka sawi reng kha, in awihlo ngawt a. Kan thlamah țumkhat chu, râwt ho hi an rawn hram vak tawh a, kan naupang ber, la â deuh phêng phuang hian ka tih ang chiah khan ati a, an reh hmak mai mawle. Chu chu ka hrechhuaka ka zawngve anih kha ati ta a. Thingpui kan in zo chu mu turin kan intin tuah mek a, chutih lai chuan, kan buk chhak lawk ațang chuan an rawn kùk ta mai a. Kan ngawi țhap a, mahse, a reh zui vang vang mai. Ral leh lam erawh ari hum a. Thlipui rawn thawk te pawh a ang kher mai. Mahse, thin ti țhawng tham khawp a, danglam engmah a awm zui lo bawk a, kan mutsan ta ani. Kan chau tlangin kan meng rim tawh bawk nen, reilote ah kan muhil thuai a.

.

Ka mu-tui lai chu enge maw hian min hiat a, min seh leh thin niin ka hria, ka’n harh chu, Sawma hian min sawi pahin min lo sik leh țhin alo ni a. Tap lamah chuan thawm ka hreve nghal a, Sawma min vawn na kut chu a khur dar dar a ni tih ka hrethei. Tap lama rî lo chhuak chu ka han melh a, thim viau mahse, kawngkhar awmlo ani bawk a, pawn lam eng rî ruai thlar ah chuan, tap sir deuh a mipakhat, bang chhak lam hawi a țhu thim map mai chu ka han hmu a. Kan sachek chu a hawp ni ngei tur ani, a ri thlurh thlurh mai. Puia lah chu a mu tui viau mai bawk si. Kan thlir reng lai chuan, muangchang hian a tho ta țual țual a. An din chhuah meuh chuan a palian hle tih a hriat, kan buk chung tawng lo tur chuan a kun deuh dû niin ka hria, châr lam kawngka chu a pan phei a, thawh chhuah pah chuan ka light chuan kan chhun zui a. Kawngka a,a chhuak rawn hawilet chiah chu ka va chhun fuh a, kan țhianpa Thianga hmel chiah chiah kha ani. A meng bial kul mai a, ka lam hawi a a rawn țhen țhu mai chu mirâp kher mai, ka phu zawk nghe nghe ani. Sawma țe țhawt ri ah Puia pawh alo harh ve nghal a, kawngka lam pan chuan ka phei zui nghal a, kan èn kual pap pap a. Mahse, engmah hmuh zui tur a awm der lo. Kawrte ruamah chuan za em em mai hian a nui ta khiah khiah mai a. Thianga âw ngei ani tiin, Sawma chu a rawn țawng chhuak a. Puia chuan engnge nita a rawn ti vat a. Keipawh mut hmunah ka țhu phei ve leh nghal a.

.
Sawma chuan,ka mu-tui lai ka harh hlawl mai a. Buk chhak ațang khian a rawn ri thla țuk țuk a, nghalrual hlau rawn tlan ang mai ani. Ka ngaithla reng a mahse, kawtah sawn a tawp ta daih si a, muthilh san leh mai ka tum lai chuan kan meipui chheh saw.. A chil darh ni ngei tur ani. Mei si a per chuai chuai mai a, a phun deuh bul bul reng bawk a. Buk chhung lam panin pen thawm ka hre zui leh a, ka rawn sâwi ta che a, i harh thei mai silo a, buk kawngka a rawn thim hmuk, kan han en chho chu mitmu lian kel kul tle rù mai hian mi lo melh kuau mai a, ka au chhuak țep ani. Ka maimitchhing ta tawp a, chhing chungin ka rawn sik ta ringawt che anih kha, a bak chu i hriat ang kha ani mai ati a.

.
Puia chu ka hriat chin zawng ka hrilh ve leh a. Khua pawh a var țep tawh ang, thingpui kan lum ang e, ti khan in duh leh muhil leh rawh u. tih pah chuan Puia chu a tho a, mei a nun hnu chuan thingpui a chhuang a. Zial zuk pahin tap ah chuan mei a vil a. Chutih lai chuan buk thlang lam ațang chuan patling aw hi a rawn hèi ha, chho dap dap mai a, kan lo ngaithla țhap a, a rawn hnai zel a. Mahse, a rawn thleng thei der lo. Ngawi renga kan ngaihthlak țhap lai chuan mangang thlabar țe vawn vawn thawm in a rawn thlak ta thut mai chu, Ka țhianpa siama aw ni ngeiin ka hre leh nghal, ka țhuchhuak vat a, kawrte dung khawk rum rum chuan a rawn țe leh vawn vawn mai chu, ka ding chhuak vat a. Puia chuan țhu mai mai rawh. Ramhuai ho lemchan mai mai anih chu alo ti nghut a. Patling leh hmeichhe aw hi, za em em hian an rawn nui ta awr awr a. kan buk chu an rawn hnaih zel a, char lam kawngka ațang chuan thildum lianzet mai hi a rawn thlawk tlang fua a, Kan tho rual zawk mai, mipui tam tak phun mur mur ri chuan kan bûk chu an rawn pan a, bûk bang chhak lam chu an rawn nek puar pawp pawp mai, chu ve leh puia chu light leh chempui nen a tlan chhuak nghal a, char lam kawngka ah chuan ka tlan chhuak zui ve nghal bawk a, light a ka han èn chu engmah hmuh tur a awm lo. Kan in chhun êng tawn chiah tih chuan Puia hnunga thildum lianzet mai, meng rang ruai mai chu ka va hmu a. I hnung a kha..ka tih rual chiah chuan a ni pawn i hnunglam a kha a rawn ti ve a, rangzet in ka inher a. Mahse, ka tlai hret a ni. Ka bing mup a, ka mit deuh sulh in ka hria. Engmah ka hrezui ta lo.

************+************

Ka harh chhuah leh meuh chuan, khua pawh alo var fel der tawh mai. Sawma chuan min lo țhutchilh ran a. I lo harh tawh maw..ka mangang hman lutuk alawm le alo ti a. Ka țhuchhuak ve nghal mai bawk a, na leh hliam engmah ka nei lem lo. Khawnge Puia tiin, kan zawt a. A inthiar lawk aniang. Mu chawl rih rawh a ti a. A ngailo e. Na engmah ka neilo, enge thil thleng ka ti zui nghal zat a. In in âu tuarh ri ka hriat khan ka rawn tlan chhuak a. Mahse, ilo tlu der tawh. Puia nen kan zawn lut che a, i rim chhe em em mai bawk si, lu te pawh i ti hai chum chum thei hial asin. Kan mut țha che a, ngaihtuah viau che mah ila, eng em iti lo ang chu tiin, tap lam ah kan hlatsan tawp mai che ani. Mahse, chu chu an duhthusam ber alo ni niang chu, thlanglam ațang khan palian dum lianzet mai hian a rawn ban ta dû dû mai che a. I kerek ah a rawn man a. A pawt chhuak dawn ta mai si che a. Puia nen i banah kan chelh a, kan i pawt ta țiang țiang mai a ni. A chak ropui si, kan chelh hneh dawn ta silo che a, Pui'an chempuiin a kut lian chumbut leh hmuldur mai kha a sat ta a. A thlah ta hram che ani. A mitmeng bial kelkul rangruai mai leh a kut kha chu ka hmu chiang khawp mai. Puia’n chema an vai lai pawh kha ka hmu reng a. Mahse, sah fuh tur a awm miahlo. A vai tlang zawk zawk lai pawh ka hmu thei, boruak a vai ang mai ani. Mahse, au ruai ruai chung khan a thlawk thla ta luap luap ni in ka hria, buk hual vel hian an ri hùt hut mai a. Kan han hlatsan deuh che chuan, an rawn ban huang huang mai si che a. I rimchhe bawk si, kan pitari mawlh mai kha, buk chhungah a rawn dak lut a, a khabe uai duai chung khan, a rawn dak lut teh sek leh nghal a. Kei phei chu hlauh vangin ka kimki chawih chawih reng mai a ni. Puia erawh zâm hauh loin a vei kual zak zak reng a. Nangmah veng reng in kan tlaivar țhak a ni mai. Zan arei duh teh asin ati a. Puia pawh alo thleng ve tawh bawk a. Chawei pahin ramvah dan tur kan rel zui ta ani.


********+**********

Ka vâk hah deuh chu lungpui chungah țhut chawlh pahin zial ka zu hlat hlat a. Sakhi leh saza, sanghal tih angreng vel chu ka hmu in, ka kap thei ngei mai mahse, kan tum ber sazuk hnu erawh kala hmu si lo. Nimin lama ka hmeichhe hmuh kha ka mitthla ah a cham reng a. Hmuh leh ka châkna chuan pân hnâi la tur ang maiin, mi tur ut ut ani ber e. Mahse, areh veng veng mai bawk si. A zûnah khan uaiin ka lungleng ta mai em ni ang. Amah ngaihtuah a ka țhut veng lai chuan, ka sirlam a sanghal han hawk dawt ri chuan miti harh zawk a. Ka inher vat a. Nimin lama ka kah hnu ngei mai kha lo ni in. A thinrim hmelin mi tawng chak hle ni tur ani. Ngùk hruih hruih pah chuan, lei te chu a nawr khawk tawn tawn mai a. Lungpui chungah lo țhu lo phei ila, mi phin nghal duh ngei ang. A len zia mawlh mai chu mak ka ti ngei mai. Nimin khan ka belchiang lutuk hman lo a, a nunglai ngei mai kan thlir vang vang mai chu, a hmuh nawm in a ropui dangdai kher asin. A kawlh in a ngêng hle tih a hriat a, ka ram chhung anih hi ti ni awm fahran in, mi hel vel thur thur mai a ni. Phuba lak a chak hle ni hmiang.

*
Thiana I tlawmngai hle mai maw.. Min tihbuai avanga kap chauh che ka nih kha, tih hlum che hii ka duhlo ania, min kiansan zawk mai teh ka tih pawh chuan, kian mai zawng a tum hmel loh kher mai. Ka banphak lawk a, thingzar pakhat chu kan sat a, ka thel fai hnu chuan, ngûntang chen lek lek in ka tan bung leh a. Ka tân lah, leia han chhuk thlak ngam ni hek lo. Ka chhuk rual rualin mi phin let tawp dawn tih ka hrechiang si.. Kâp kher lo a hnawh kian theih beiseiin, ka thing tan chuan kan vawm țhin. A lo khak per nalh nalh mai!! Min kiansan mai zawng atum lo tawp, Ka chhaih kawlh ting ni mai hian ka hria, ka tih ngaihna hrelo chuan ka kap mai dawn che emawni le, i pi khan a ui viau awm si che a. Min kiansan mai teh, tih pah chuan a in ringlo lai chu ka thing bung neih tawp ber chuan kan vawm leh a, a thinrim ngang aniang chu a tèr at mai a. Mi rawn phin phei ta ani.

.

Ka awmna lungpui chu arawn zuangkai zawk a. Mahse, țan hmun nei heklo. A tla ri chawrh mai. A kiang tawh mai dawn emaw tih naklaiin, ala thinrim tulh tulh zawk tlat. A thawm pawh a ring sawt hle. Ka thinrim ve tawh bawk nen, hei leh chen ka dawh hram hram che a, mi nawr lui tlat si a. Ka ngén mu zawng i dawng mawlh ang tih pah chuan, ka țhu rem țha sauh sauh a. Uluk zetin, a zak dawh ah, a lûng pawh ngei turin kan kâp dur mai a. Mahse, engtin mah a awm hauh lo. Khai aw..a phaw keng maw I nih a. Hei vang anih hi ilo ngèng viau ni. I chaldar ah ngei khan kan kap leh teh ang che ti rilru chung chuan, Ka silai chu mupui ka chher chhuan a. Uluk em em in a chaldar chu kan tin vang vang a. A lo che ve sek bawk nen, ka hmet per țep tih chuan, Kâp lul suh... Han ti tuarh ri hi ka hria a.

.
Aw lo chhuahna lam kan hawi chu, nimin a ka hmeichhe hmuh ngei mai khan milo nuih var var mai. A nui hmel mawi lutuk chuan, ka thinrimna zawng zawng te chu a chhêm dai suai suai niin ka hria. Sanghal chu an ko a, ngèng ngalh hian hreh hmel zetin a kal ve ta hram a, a neitu ber awm ta chu, ka thlamuang phêng in, ka awmna lungpui ațang chuan ka chhuk ngawt mai a, lei ka thlen rual rualin, min rawn phîn phei leh nghal zat mai. A rang arang in ka tlan lawn leh nghal a. Hmeichhe rawn au țhat ri ka hriat rual chuan, ka lawnkai fel der tawh. Lei lam kan en chu, sanghal chuan milo en chho vung vung tawh mai a. Hmeltha-i pawh a thinrim ngang ni tur ani. Sanghal chu an bêng a, a hau mawll mawlh bawk a. A tir liam zui ta a ni. Mihring luhlul ang mai in,a liam dawn thleng chuan mi la rawn enzui tak hram hram a. Ka thin ati rim ve ngang mai, min zuam bawk a. Min ti buai leh anih vaih chuan, ka kap tawh chiang khawp ang. Ka zah che avangin ka kap duhlo mai mai anih kha. aa.. hrethiam hram rawh. Keima thiam loh liau liau ani e. Heng lai hi ramri ani a, a veng turin ka dah țhin ani. A chak țha in a huai em em a. Engmah hlauh a nei hek lo. Kei ngei pawh hi min hlau ta lo lek lek mai anih hi. I lo dawh hram hram avangin ka lawm takzet e. Niminah lah ka lo thleng sak daih si che a. Min hrethiam dawn nia. Mahse, kha sakhi ang a, ki hreêu țha kha chu i hmu leh tawh kher lo ang. He ramah hian awm pawh a awm tawh hek lo. Eng vanga helai thleng thleng lo kal nge I nih reng reng. Heng lai hmun ah hian Hringmi an la rawn kal thleng ngailo asin.

.
Kan awmna lai hi ramri ani a. Kan piah lam i hmazawn ram lam zawng hi keini LASI te tual lenna leh kan ram ani. A lehlam chin hi SIH PUI HUAI ho ram ani thung. An ni hi hringmi te nen kan inkarah an awm avang hian kan zalên in, kan ramsa te pawh an him viau ani. He ram hi tuman anla rawn paltlang ngai heklo. An ram chhungah hian kan lut thiang lo a. An rawn lut thiang heklo. Nimina ka sanghal ilo kah na phul rai ațang khan mualdung zai zai ah tuna kan awmna ațanga kan chhak kawr ruam ah khian kal chho zelin, ramri kan siam ani. He hmun hi kan luahna ala reilo a. Nangni hringmi te hian ram ngaw te in țhiat darh zel si a, kan awm hmun sawn in, tlawh pawh loh ram kan bêl zel anih hi. He ram kan luh dawn pawh hian, he sih pui huai ho nen hian kan Indo hrep asin. Kan inrem hnu ah ramri siamfel in kan ințhenawm ta anih hi. Mahse, tun hnai ațang khan kan ram chhungah an rawn lut ta fo mai a. An rulpui pahnih te hi a chimawm zual an ni a. Kan ran vulh te an rawn ei tak fo avangin, he ramri enkawl tur hian tirh ka ni ta a ni. Sawi tur a tam viau mai. Eng vanga helai thleng thleng lo kal nge I nih min han hrilh ve teh. Kan sanghal lah kha i kâp duh hranlo niin I sawi bawk si. Puih theihna che ka nei em ati ta a.

.
A hmelțhatna leh duh awmna chuan min zêm â a ni ber mai, a thusawi te chu ngaihnawm ti em em in ka lo ngaithla a. Tawngna châng rêng ka hrelo. Ka kâ te a chih zo a. Ka hamhaih ani ber mai. Ka kal chhan pawh ka lo hre chang tawh lo zawk a ni. Ka awmna hmun pawh ka theihngilh zo vek niin ka hria. Mâwh..han sawi ve teh, tihpah a min han nghawk tak salh ah chuan ka harh zawk a. Ka mùr țek chuaih niin ka hria, min la rawn hnaih tak sauh sauh leh nghal. Ka zâm em avang leh a húhang na tak mai chu pawisa lo thei ang ber tur in, ka țawng khur tur chu ka insum hram hram a. Theihtawp a pangngai in SAZUK KI BUNG pel a, ramchhuak kan nih thu leh kan hun tawn tawh dan leh kan chanchin te chu ka hrilh ve ta vek a.
.
Chuvang a nia, sanghal pawh kha ka kah duh loh. A ngho ringawt pawh kha kah duhna tham ani a. A ropui ka ti in ka kâp chak lutuk. Mahse, ka kah chuan asa rêp ringawt pawh hawpui tham ani dawn si a. Kan tum loh zawk han kah ngawt lah chu dik in ka hrelo a ni. Thiante hmai êng zah vangin, Ka insûm hram hram a nih kha tiin, ka thusawi chu kan tlip a.

.
A ni maw,, a nih leh khawiah nge in riahbuk chu in khuar reng reng ati a. Sanghal ka kah sakna ațanga țanin mualdung leh kawr ruam awmdan ațang chuan kan hrilh a, makti taka min en heu chung chuan, ava mak zawk ve, Sih pui huai lalnu hi a thikthu a chhiat tehreng nen, him pial leh dam a, inla awm hi a mak ka ti hle mai. In huaisen tlang hle a nih dawn chu. Ka sanghal ilo kah theih ngawt danah nang hi chu ka ring thiam mai che a. Nangmah ang hlir in nih dawn chu. Mahse, in bûk chu chhuahsan vat rawh u. A rulpui te a rawn chhuah vaih zawngin, him damin in chhuak hauh lo ang. Tunah haw nghal nal nal la, i țhiante pawh i ko haw nghal dawn nia, vawiin la la hian helamah rawn insuan ang che u. An ram chhungah hi chuan ka pui thei miahlo che u a nia. Kei aiin thil an ti thei zawk daih dawn ani. Kan ram chhungah erawh ka hum thei ngei ang che u..a ti ta mai a.

.
Ka rulpui hmuh leh ka kah dan te kha ka hrilh ve ta a. Mak ati hle tih ka hrethei. Chuvang anih chu ka hmuh ngai tak loh. A te zawk kha, a sual zawk leh nghal zawk ani a. A thi anih dawn chu. Mahse, ka sawi tak ang khan, haw phawt la, in sazuk ki bung chanchin te chu, in rawn insuan luh hunah kala hrilh dawn che nia. Kan inpui tawn thei ngei ang. Nangni ngei hi kan lo nghah chu in ni e.

.
Ti rawh, tawite tal chu ka thlah ang che ati a. Kalpah chuan, an ram chhungah hi chuan thiltih theihna ka nei silo a. Nangmah ngeiin i țhiante chu i zawn hmuh vat a ngai ani. An hmunpui ber sih pui ațang in inbûk chu a hla miahlo ania. I țhian ten an va hmuh chhuah hma ngei a, i koh haw vat an ngai. Silai pawh hmet puak mai mai suh ang che. Silai i hmeh puah tawh chuan, ramhuai pakhat talin a thlir zui zel dawn che ani tih hria la, koh khawmna țha tak ani ringawt mai dawn a ni. Helai thleng hi ni rawh se. Ka rawn luh thuk lutuk chuan, huai ho in min hmu palh ang e. I țhiante nen chuan, hmun him in rawn pan vat dawn nia, an rial rei tawh hauhlo ang ati a. Min nuih sen sen chung chuan, aral ta riai riai a. Kei pawh ka kalve ta nghal a.

.

Ram palai leng a han pâwng-tawng taw zawn ngawt mai chu, a beidawn thlak duh kher mai. Mitdel khaw hmu lo nen kan in ang reng in ka hria. Hah chawlh tum in, ka chhaka thingluang lianzet mai chungah chuan thei leh theilo in kan perkai a. Hetiang ang em em a thingluang lian la hmu ngailo ta chu, zai atan ka it bawk nen, tum engzat tak daih ang maw tiin, a bul lamah ka zawh phei zai zai a. Kan per deuh zawng chuan a ri deuh kung kungin ka hria. A kawrawng emaw nile ti rilru chung chuan kan țum deuh awlh awlh a. Ari thum deuh kung kung mai. Ka phei zel a, thingluang chu a kawrawng chiang a ni. A chhung lamah pawh thawm a awm tlatin ka hre pek a. A bul hmawr ka zawh thleng phei a, en chian tumin ka țum thla auh a. Ka inher ruala kan hawi phei chiah chu, Savawm lianzet mai hian milo țhen khum țhu mai. A lian țha kher asin, a kawlh hle tih pawh a hriat theih, a ding kar ùr ur a. Ringzetin an hram ruai ruai mai a. Thing kawrawng chhungah chuan a note pahnih anlo awmve reng chu niin, a pui chuan mi rawn bei phei ta mai a. Silai hmeh puah loh hram ka duh bakah, a no hruai lai ani kher bawk si. Han kah hlum ngawt chu ka duh chiah lo ani.

.
Mi rawn hnaih hle tawh a, alam pan chuan pên khat in kan tawlh hma hret a. Ka silai chuan lo chhun tum ang in kalo tin uaih uaih a. Ka hma ah chuan a ding chuta, a ke hnung pahnih chauh hmang chuan a ding kang leh ur ur a, hram ruai ruai chungin mi rawn pan hrut a, ka lo tin uaih uaih avang chuan, a tawlh let ve leh hrut hrut țhin a. Mahse, min kiansan erawh atum hmel loh kher mai, heti ringawt chuan, rei kan in dang thei dawn lo tih ka hria, a ke hma lam chuan, mi rawn ban zuau zuai țhin a. A bu zawlah zawng tawlh kian a tum dawn hauh lo. Ka tlan anih chuan mi man rang viau dawn bawk si. Ka kah si loh chuan, ka tlanchhiat mai chu angai ani.

.

Savawm chu kawngchho tlan an chak zawk a, chhuk zawng erawh chuan an tlanchak thei lo tih ka pu min hrilh chu kala hre reng. Muangchangin ka tawlh hnung hret hret a, savawm thinrim lah chuan mi zuam tulh tulh mai bawk si. Rang zetin ka inher thut a, ka piah hmun awih lampan chuan ka tlanphei ta ani. Mi rawn bawhzui rang khawp mai. Mi man thawi thuak thuak ni in ka hria, hmun awih ah chuan chak zetin ka tlan thla a, ka hnungah chuan a rawn ri thla rùm rum mai bawk. A khamphei zawngin thingtuai vawn tur lo awm hmasa ber chu ka man a, ka intheh phei lawp a, min rawn pel thla fua mai, a lum ri thla sut sut mai a ni. Hnahthel leh vaivut khu nen, a khu thla rum rum mai a. Ka inher a, Hman hmawh zetin ka kal ta nal nal a, ka hah hman hle ani tih pawh ka hreve chiah. Khatiang em em a, chak leh hmanhmawh khan, chawhmeh hlau in kala tlanchhe ngailo. No hruai lai ni kher lo se chuan ka kâp em em ang.

.
Ni pawh alo her bâwih tawh a. Ti ringawt chuan engtin mah inhmuh ngaihna a awmlo hrim hrim. Khawinge silai kahpuah mai angai anih hi tiin, ka ngaihtuah a. Mahse, ka hma a ka thil hmuh chuan ka mit ala kher mai. Sazuk hnu chiardup mai chu ka bih vang vang a. Ala thar țha hle leh nghal, phûr zetin ka chhuizui ta nghal a. Mahse, ka rin ang ngawt ani ta hauhlo. Hmuh zui mai ka inbeiseina pawh a kiam țan ta. Ka țhiante zawng tur ka ni tih hrechang lo lêk in kalo chhuizui ve ringawt a, thawk leh khatah ka mur ta uai uai mai. engin nge, mi mawlh tehreng ni, hlauhna in mi man a, ka hmulthi a ding sung sung mai. Thil enge maw tak ka hriatthiam si loh hian min uap tlat, min thlir țhup ni maiin ka hria, ka inti pachang hlei thei ta tlat lo. Hmalam pên a ka kal apiang in a zual tulh tulh leh nghal, thli vawt hik var mai hian mi chhem mur seng seng a, ka khur ti tih dawn ta mai. A nilo heti ringawt zawng tiin, ka inher a Ka kir san ta ringawt mai ani.

.
Ka hnungah chuan min zuitu an awm chiang ani. Hnahthel arawn rah rik pawh ka hrethei tlat, kan hawi leta engmah lah chu hmuh tur a awm hlei lo a. Muangchangin hlau lo leh pawisa lo thei ang ber chuan ka kal zel a, silai han ri thuai ri ka hriat rual chuan, ka ding chat a, ka hnung a kalve kha ni ngei tur ani, mi rawn nam(su) chawrh mai, ka phuchiang kher asin, Hma lamah ka pên dawrh nghe nghe. Kan hawi kuala engmah lah chu hmuh tur awm heklo. Ka ding thut kha, min zuitu khan min su ni mai ah ka ngai a, nuam zawng kati hran lo khawp mai. Silai ri lo chhuahna lam ni a, ka hriat chu tin zawnin ka kal zui ta mawp mawp a.

.

Ka hnungna min zuitu thawm pawh pakhat mai zawng ani ta hauhlo. Ka kal chak leh min zui chaka ka kal muan leh mi zui muang ni maiin ka hria. Hman hmawh ru viau mah ila, ka kal chak lutuk chuan, ka hlauh vang ah an ngai ang tih ka hlau bawk si. Kan tawi muang deuh chu, ka tukhumah mi rawn beng bu chawn mai a, ka tlu lo chauh ani. Ka hawilet vat a, Thing phena pil lut zuk ni awm tak hi hmu in ka inhria, hlam sawm lo liam anilo ang. Chu thing lian tak chu thlir reng chungin, tunge inih, enge i duh kan ti țhat a. Kut phah var pip pep, cher thiak mai hi arawn phar chuak a, a tin sei zet chuan thing pang chu a man țu mai a, mi râp takzet ani. Chutah mi rawn hui ta zoh zoh a. Tunge i nih, rawn inlan ta che tiin, kan au leh a, Mi hui zoh zoh chung chuan apil leh ta daih a. Ka silai chu kau in kava pan phei ta ani.

.
A sir deuh ațang chuan kan hel kual a mahse, tumah hmuh tur an awmlo. Hmeichhe aw hi ngeiawm zetin an nui khek ta awr awr mai a, thinglian deuh deuh phen ațang chuan, ka kut hmuh ang hlir mai chuan min hui ta sup sup mai, tih ngaihna awm heklo. Hmanhmawh zetin, silai rikna lampan chuan ka kal ta nal nal a.

.
Ka thleng vel tawh ang tih chuan, khawilai hmun ber nge ka hriat si loh avangin, ka theih tawpa ring in ka kùk vak a. A rang arang in, ka bul hnai lawk lawk ah chuan an rawn kùk ve ta sup sup mai. A dik dawn lo tlat, silai ri hmanga in zawn mai angai a ni tih chu ka ngaihdan ani ta. Ka silai chu van vawr zawngin kan kap dur a. Chumi rual deuh thaw chuan Sawma aw.. Na tuar țe rawng rawng hian arawn zui nghal a, ka bul vel chu natuar chau tak rum ri in ari nghal chuah chuah a. Mahse, ka piahlam mual ațang chuan silai a rawn ri ve ta. Ka zâwn phei mai ni in ka hria.
Ka pan phei ta vat a, silai a rawn ri nawn leh dawt a. Ka bul vela rum ri pawh in an uar ve sauh bawk a. Sawma aw ah hlir ka chan a, a inhliam em ni ang, a thlarum ri hian min zui ta mai em ni, khaw ên lai mah nise. Engmah hmuh tur awm silo a, natuar rum ri han hriat reng mai chu, a râpawm duh hrim hrim,

.
Ka silai chu kan kap ve leh a. Ka chhak lawk ațang chuan, puia aw ngei chu a rawn kùk ta râih a, hman hmawh zetin ka pan chho a, mahse engmah an hmel leh thawm hriat tur a awm leh ta silo. Kan kùk ve lah chuan, ka bul hnai lawk ațang min chhawn chuah chuah zel bawk si.. Ka bei dawng ta takzet. Ramhuai ho hian, min chhaih kual vel mai mai lek anih hi, bûk lam pan phawt zawk ila ni mai tiin, Bûk lampan chuan ka kal ta ringawt mai a ni.

.
Kawng lah chu ka bo ti tih der leh nghal. A mual te hi a in ang tlang si, khawchuan tur a, thingkung han lawn dawn pawh in, thing hmun ngaw chhah țha tak, thing te lah chhura rual ni awm khawp a, lian leh sang an ni vek bawk si a. Ni her zawng leh awmdan ațang chuan, ka rin kal ve mawp mawp mai ani. E nge maw ti ti in, kan hnuhma hlui ka pawh ta hlauh a. Ka thaw huai huai mai, kawngbo hi chu an hmanhmawh tulh tulh țhin tih takah, kalo kal hman hmawh viau ni tur a ni. Ngaw chhung dai raih mai hnuaiah pawh, thlan tui far zawih zawih khawp in alawm kalo kal le.

.
Ka thlamuang ta deuh bawk a, țhut chawlh pahin zialzuk kan siam a, ni pawh a hniam viau tawh ani tih, thing hnah kara a eng dul danah a hriat theih. Kal leh mai tumin kan dingchhuak a, ka mit sir in thil han phe zawk hi ka hmu vuai a, kan enchian ngial pawn hmuh zui tur awm heklo. Min la zui reng ani maw..ti rilru chung chuan ka kal leh ta zel a, thui pawh kal

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 18th, 2018, 10:26 pm

SAZUK KI BUNG. 3

By Hriata Tea

kal lo. Ka hming ngei in min rawn ko ta lawl mai, eih nghal mai lo in ka ngaithla a. A reh zui leh ta mai bawk si. Huai ho mai mai hi ka intih buai tir tawh tur ani lo ti rilru chungin. Pawisak nei miahlo leh eng mah bengkhawn duh tawh lo chuan ka kal ta mawp mawp a.

.
Ka hmalam mualdung ah chuan silai han puak ri khak hi ka hria, kan ngaithla chiang a, a rawn puak leh dur a, zawngrual râk thawm leh mangang țe chêl chûl ka hre zui nghal a, ka lam an rawn pan ani tih pawh an thawm ațang chuan ka hre thei. Puia nge Sawma ni ang aw, ti rilru chung chuan ka pan phei ve nghal buan buan a, silai a rawn puak leh dawt a, a hma aiin arawn hnai leh sauh ani. Zawngrual rak thawm pawh a ring sawt kher mai. Hmunrem laiah kalo chang ta a. Thawm ri ngai chang chungin ka lo thlir reng a. An rawn ri phei nuaih nuaih mai le. An tam hmel kher leh nghal a. Silai a puak leh a, arawn umzui zel ni hmiang.. A kap hliam nge, kah hnem atum ve hrim hrim zawk.

.
Ka chân hmun ațang chuan kalo thlir reng a. Mahse, ka beisei loh dan deuh in, thingkung lamah zawk chuan, an la rawn ri phei nuaih nuaih mai. A sang hlawm si a, kan thlir chho a, thing zar te chu a che luai luai na a, an mahni ber erawh ka hmu thei reng reng lo. Ka beisei angin lei lamah lah chuan rawn tlan an awm bawk silo. Ka lo thal țeuh ang chu tih rilruk rauh rauh laiin, an hmel tak ngial pawh ka hmu ta silo a. Mak ka ti ang reng viau a ni. Ka piah lawkah chuan, silai a rawn ri leh dur a. Kan hawi phei chu. Sawma lo niin, a hmai te chu a thi deuh hnuang hian ka hmu a, dinchhuah pahin kava au a, ka pan phei ta nghal a ni. Ka lam arawn hawi chiah chu, hmel alawi alo nei reng reng lo mai, a hmai te chu savawm hih ang maiin a thler pawrh têrh tûrh a. A mitmu lehlam phei chu a uai deuh hnuang leh nghal, khai aw..a van zialo kher em. Engin nge maw han hliam ni dawn le,,ti rilru chung chuan ka pan phei chak sauh a, ka lam hawia rawn nuih sung pah chuan a inher a, a kal leh ta daih mai. Hmanhmawh zetin ka tlanphei a, lo ding teh..minlo nghak rawh..engtizia nge tiin, ka au zui lawm lawm a mahse, ka hmu zui ta hauh lo.

.
A hliam ringawt pawh kha râpawm tak anih vei nen, a nuih dan khan mi râp zual leh nghal a. Khatiang khawpa hliamna tuar chung kha chuan, kei ai chak chuan a kal hauh lo ang. Mahse, hmuh zui chu sawi loh, a hnuhma leh thisen far tak ngial pawh hmuh tur a awm bawk silo. Ka ngaih reng a țha thei ta lo. Hlauhna in min tuam a, ka thling thlengin a fan vek niin ka hria. Ngaih țhalo em em in, Hmanhmawh leh chak zetin buk lam ka pan leh ta nal nal a.

.
Ka chhak lawk thingbul phenah chuan thawm ka hre leh ta. Kan ding dat a, ka aw kan thian kharh kharh a, ka silai pawh a cheng kau sa a kengin, ka inring kher mai. Han khuh kharh ri hian milo chhâwn vat a, a rawn lang zui ta nghal a. Puia ani Mahse, ka thil tawn te avangin ka ring mai ngam tawh lo. Lo chho la minlo pui teh. A rawn tih pawh chuan, ka la che châng lo a, engtizia nge.. I țha em..tih pah chuan a zial an pak khu talh talh a, i silai kha dah sawn teh. A cheng i kau sa rùn mai bawk sia, ka awm I ti nuamlo a nia, a rawn tih tak ah chuan ka ngaih ngam ta chauh a, ka silai cheng chu sût in, Ka pan chho ta a ni.
.

Khawnge Sawma hi, a awmna awm deuh te hriat I nei em. Ka ngaih a ti țhalo riau, enge puih i ngaih tak na chu..ka ti nghal a. Mi nuih var var ringawt a, kan hawi kual chuan, zawng lian țha zet mai pahnih, a lo mut dun ral chu kava hmu a, pan hnai in, kan kuai let vel chhin chu, apa chal ve ve an ni leh nghal, an rit țha dun nelh nawlh khawp mai. Nui vur vur chung chuan, nang pawn sakhi zâwn pui ah min koh ve tho kha maw.. Sawma awmna chu enge i ngaihven viau nachhan, a awmna leh a thawm engmah ka hre hauh lo mai a ti a. Ka thiltawn leh hriat zawng zawng chu ka hrilh ve vek a.

.
Ani maw..hmanhmawh thlak viau mahse, eng han tih theih ni heklo. Ani pawh eng em ati lo ang. Kei pawhin, i thawm hriat ang kha chu ka hre ve alawm. Mahse, nangma thawm ani ka hriat ve thung ni. Sawma pawh ațha ang. Ngaihtuah duh suh. Bûk lam pan phawt ila, han in zawn vak ngaihna a awmlo. Khua pawh a tlai tawh a. Bûk ah pawh alo haw reng tawh zawk mai thei asin a ti a. pakhat chu a paw nawlh a. Kan paw ve nghal a. Buk lam pan chuan kan in zui ta a ni.

.
Puia chuan lo ding lawk teh, hei ka hnunga kal hian mi phih loh leh mi su det det reng mai a. Ka ning riau mai, kal hmasak tir teh ang, kawng lo kian ve teh a rawn ti a. Han din sir sawn hret pah chuan ka ding ve nghal a. Puia chuan i hmanhmawh hmel zawk bawk a, han kal hmasa ta poh che ati a. Kan nghah deuh hret hnu chuan, kan kalve leh mai a. Puia chuan a zia ta huai e..a rawn tih rual chuan, ka hma a hnim tawn chet leh. Hnahthel han pal darh vel chu ka hmu ta mai a. Makti em em in ka thlir reng a. Ka zuive zel a. Puia chuan tinge, bûk hlat zawng a ikal tak nul nul mai arawn ti a. Ka hrechhuak ve chiah. Khai aw..hmalamah i rawn kaltir rawk a. Min hruai bo mai dawn alawm le.ngaihtuah miahlo a, kalo zui char char chu, .awmlo phei la mi hruai bo thei mai awm asin tihpah chuan, kal kan siam țha leh a. Puia chu khai aw tiin, an râk deuh hlut a. A zâwng puak lai chu a keuh ta țhuai mai.

.
Mai mai chuan le, minva ti phu em em ve ati a. A zâwng paih thlak chu chempuiin, a tin deuh uaih uaih a. Enge nita kati vat a. He zawng reuh hi lawm mawle ati a, zawng chu a chawikang a puak leh a tum mek chu a paih leh thlawrh a. Engtizia nge ti chungin kava hnaih a. Ka ti thei der lo mai, Thuife chu ka tuar lui hram hram a. A tal leh deuh tlat țhin in ka hria, min kuah ve deuh mah mah in ka hre leh nghal a, kan enchian nak chuan ka hriat ngai pawh nilo. Mithi ruang dang var vek tawh, vawt ngêk ngûak, ka lo paw reng niin. Milo melh run leh nghal a. Kan hmu thut kha mirâp lutuk in ka paih thlawrh anih kha. Kan paih thlak takah chuan, zâwng tho ani leh bawk si. Han put leh mai ka tuma, a hma ang bawkin mi rawn kuah leh thlur pek alawm le.. Khawinge kan pu leh ange tih pah chuan, an la kang a a paw leh ta a. Kalo chhawm ve thung ang che, han kal hmasa ve thung teh khai tiin, hnungdawl ve thung tur chuan kalna kan kian a. A ngai hranlo asin.mahse, i tih tak tlatah chuan han dawl ve chhin teh. A zia deuh mahna ati a. A kal chu ka zuive ta thung a. Bûk pawh kan hlat tawh lo viau in ka hria, thim hma chuan kan thleng hman mai ang a rawn ti a.

.
Tawng mawlh mawlh pah chuan, kan kal zel a. Ka hnunga min zuitu thawm chu hre reng mah ila, hmuh theih ani leh dawn chuanglo tih ka hria a. Chuvangin thawm ringawt zawng ka ngaih thah mai angai a ni. Mahse, a thawm chu thlakin, min rawn chil tur ramsa thawm ang mai in a rawn ri țak țak țhin a, sanghal in min rawn phin phei ang thawm te, sakei mi seh tum ang mai ten, an rum leh chhur chhur țhin a. Mawng a za in, tukhum a hik țha duh chuaih chuaih kher mai. Ka hlauhna chu theih tawpin ka upbet hram hram a ni. Ka zâwng puaklai chu a che deuh hrut a ka hriat avangin kan ding deuh dat a, mahse, atthlak ti rilru deuh chung chuan, ka kal leh ta zawk a, mahse reilote ah chuan, a lu lam chu che-in, a hmai chuan ka dar, han nawr nawk nawk ang mai hian ka hria, min bawh tu vawt thler thlur zet chu, zawng pachal ani tawh lo tawp mai. ka vawn lai leh ka puak mek chu, mihring taksa ni tlatin ka hria ani. Kan hawi let chu, hmaiduk hring nghulh tawh mitmu dum fim ngun mai hian ka dara, a khabe nghatin ka hmai si thelh hian milo melh kuau mai. Ka phu chiang kher bawk a, ka keuh thla rang kher asin. Ka êh, țhawt mai a ni. Mahse, lei a kan keuh takah chuan zawng ani leh reng tawh si. Puia sawi dan ang chiah ani. Puia chu kan en a, a puak lai mek chu zawng ani tawh hauh lo. Mihring ruang ngei mai hi alo paw zawi hnuang mai niin, a taksa kut leh ke te chu zawi hnuang e tilo chuan, puia dar chung zawn ațang chuan mi rawn bih deuh kawr hian ka hria. Makti leh râp em em a, ka thlir reng lai chuan, a khap fuk hian ka hre leh nghal a. En pawh enrei ngam talo chuan ka zâwng keuh thlak tak chu ka zuk en leh a, zawng pachal diktak ani. Muangchangin kan la kang a. Zawng ngei zawng ala ni e. Hmelhriat loh ruang rapawm tak pawh ni leh mahse, Puia pawn pawisa hauhlo in a paw ngam a, ngahnge ka puak ngam loh bik ang, tih ngaihtuahna chuan ka huaisenna zawng zawng sawm khawm in, hlau leh khur ru zawih zawih in, kan paw ve leh ta ani. Ka paw tur in, ka lak kan rual chuan, Puia han chek tlawk tlawk ri chu ka hria a. Dah mai teh, mi râp riau mai, khatiang chung chung kha chuan hawn lo mai ang, a rawn ti a. Eng aiah nge ka dah bik ngawt ang. Nang pawn i dah chuang hleinem, ti teh i kal vat vat zawk teh ang ka ti a. I puaklai kha zâwng ni hek lo mawle,,. Hawn chi pawh va ni suh a ti a. enge nita hei, zâwng pachal ngei ani tawh alawm. i puak lai zawk kha nih kha. Kal mai mai teh ka tih tak tlat ah chuan, chek tlawk tlawk chungin a kal ta a ni.

.

A hnunga zuitu tan chuan, a thilpuak chu en loh leh hmuh loh ngawt theih ni hek lo. A miruang puaklai chu ka hmulo thei silo a. En loh ka tum ngial pawn, ka mitsir ru lo thei lo. Mi rawn thlek ni tlata ka mitsir in ahmuh avang chuan, kava en chianga. A lu chu rem zetin ruh neilo ang mai hian, hnung lamah a rawn hawi vung mai a, minlo nuih vûn vûn leh nghal a. Ka tuar thei ta thlawt lo. Hnung han dawl ve thung teh tih pah chuan ka kal pel phei puat a. Mi rawn zui nghal mai ta lo chuan, a ding veng veng a. Kava hawi let zuai a, a ruang puak lai nen chuan, minlo thlir dun veng veng mai. Ka hlauhna leh râpna te chu ka kal chakpui sauh sauh mai ani. Ka khuate chu, sik mai dawn in ka hre tlat. Puia pawh ngaihtuah chang thei tawh heklo. Ka zawng puaklai chu chakzetin ka kalpui ta dawr dawr a. Puia lam chu a hawi ngam tawh heklo. Bûk thlen hlan mawlh ka nghakhlelh tawh. Ka zâwng puaklai chu ka mitsir zauh zauh renga mahse, a danglam ve tawh lo. Kan buk kan thleng țep tawh ani tih ka hriat rual chuan, ka hawilet a, ka hnung deuh fe a, Puia rawn kal chu ka va en a, a hma ang tho in, ruang zawi hneng hnuang bawk chu ala rawn paw țhen țhaw mai. Rei pawh ka en duhlo. Huaisen ka ti in, ka tluk loh zia, mawlh chu ka ngaihtuah a, a lak ah zawng ka te chem chem in ka inhria.

.
Bûk kawt tui khawhna bulah chuan, zawng chu ka dah a. Ka luhsan ta daih a, Bûk chhung ka luh rual chiah chuan, châr lam kawngka a, chhuak ni awm tak, phe deuh vuai hi, hmu in ka inhria. ka zui chhuak nghal vat a, mahse engmah hmuh zui ka nei lem lo. Ka luh leh rual chuan, kawta Puia rawn thleng thawm pawh ka hre zui nghal a. Mahse kan bûk chhung chu, tu tak ni maw..a tal bel hneh in a chinglet hneh kher mai. Kan mut bu tel țhat vek te chu alo inchap darh neih nuaih mai a, kan lungthu, phun te thleng chuan, alo kuai phawk vek mai bawk. Puia rawn lut chuan, engti zia a, heti taka min han chin zan mai chu aw..tiin, a hachang a țhial rap rap a. Kan han ti fel thuak thuak a. Lungthu te chu phun țha in, mei kan nun a, thingpui kan han chhuangkai a.

.

Thingpuite kan in zawh hnu chuan, Puia zâwng kah te chu, phur zat lo leh râp ru zet chungin kan han puah a. Mahse, eng em ani ta lo. Puia chuan, ka lo rindan che leh ngaihdan mai mai aiin, ilo huai zawk daih mai. Keichu, ni ila khatiang mihring ruang ang mai a, a awm chung kha chuan, ka paw ve ngam hauh lo ang. I huaisen hle a ni. Buk thleng țhakin i paw leh nghal. Paih mai kha ka duh tawh mai asin ati a. A eng chu nge maw i sawi le.. Keia puak te chu, ka keuh thlak hnu kha chuan, zâwng char char ani tawh alawm..i ruang puak khan, min melh run chungin, min nuih leh țhin a. Ka en lo thei silo a. Ka hlauh avangin, ka kalpel ta ringawt che anih kha.. Nang ang em chuan ka huai ve lo tawp ani tih ka hria tiin, ka hmuh dan engkim chu kan hrilh a. Makti zeta min en hau chung chuan, kei tak asin hlau ni. Khatia miruang dâng bel bul, zawi hniang mai bawk si. Tar zur ang mai a, cher țhiak mai, vun zur tup mai leh nghal, in la kang a inpaw chiah kha chu, ka au chhuak lo chauh asin. Dah mai rawh ka tih lah khan, i sèp rem tak ang sauh sauh a. I dah duh tak si loh avang kha nge ni. I ruang puaklai lah khan, hmusit mitmeng zet a, min en chung khan, min nuih tak ang vur vur a. Ka hma a i kal hnu phei kha chuan, zui pawh ka zui hnai ngam tawh lo che nih kha, min chhiatkhum loh leh min siai suk suk reng mai a. Nangmah thleng khan ka ring hlel zo vek tawh mai che a sin. Rapthlak ka ti takzet ani ati a. Kan han sawi dun takah chuan, mahni puak loh ve ve hlau in kan lo khur dun reng chu ani si a.

.

Kan rawh zawh vek hnu chuan, rawngbawl pahin, kan chan leh zung zunga. Sawma pawh alo haw ve țep tawh ang. Ni pawh a tla der tawh anih dawn hi. Ka rin aiin a rawn haw har phian mai, a vak hla deuh nge mawni dawn le..thingpuite hi ka lo hûn lum sak ange tiin, meiling vam țha deuh te chu thai chhuakin, thuk sirah Puia chuan an hung a. Zawngsa chu tùlah thilin kawta kan sarep na siam ah chuan kan han rem zung zung a. Meipui nun in kan ur zui ta nghal a. Puia chuan zawngsa hi zawng a tui ka ti bawk a, ka kâp lo phal țhin lo. A kut leh ke țang thleng hian, ka ei duh vek ati a. Keichu, a kut kher kher hi zawng ka ei thei ngang lo a ni. Mihring kutah riak ka chan a. Buh chiar ngat phei hi chuan, buhte hi alo țham sa tùn, mai bawk si a, a sa thleng hian ka eitui loh phah ziah. Chuvangin, a sa țha hlang lo hi chu ka ei țha duh tawh hlei nem. Mahse, zâwng thau țha nelh nawlh sa hi chu, a tui zawng kati ve thlawt ani.

.

Puia chuan, i duhloh țha țha kha ka duh zawng ani thung, a buhchiar ngei mai, a kut in alo hum sa țun mai a, han fawp fai deuh ila, a kutphah chunglam tî ațang, a zungțang nen lam han khel filh ral mai ila, chaw bar tur min lo hum sak sa ngei mai kha, a hâng bik riau ten ka hre țhin asin ati ve thung a. Kan ti ti bawrh bawrh lai chuan, Sawma han khuh kharh kharh ri chu kan han hria a. A lo haw ve mai alawm chu... tih pahin, sarêp na mei chhawm țhat pahin ka chhuak ta nghal a, Sawma hmel reng reng ka hmu hauh lo mai. Makti angreng viau chung chuan, meipui chu kan chhawm țha a. Kan rêp hmasak sakhi sa chu kan piai thla a. Thial chap chap pah chuan kan hawi kual ngial a. Sawma hmel chu sawi loh a thawm pawh hriat zui tur a awm ta silo a. Sakhi sarep chu kan lak belh leh a. Buk ah chuan ka luhsan ta a. Puia hei sakhi sarep pawh mei ana bawka, a hmin der tawh mai. Han eive chhin teh a hâng tui khawp asin tih pahin, kan theh phei a. A dang hi al thak ah kan thliar ange ka ti a. Kawt lamah chuan Sawma thawm bawk chu, a rawn hêi-ha leh dap dap a. Puia chuan min rawn en hû pahin, Sawma pawh chu, nichin khan alo haw tawh emaw tia a rawn ti a. Haw nang, ka va chhuah khan ka hmu reng reng hleinem tihpah chuan ka chhuak leh ta nghal a. Engmah lah chu ka va hmu leh ta chuang hlei lo a. Khua pawh atlai tawh bawk a. Ngaw chhung lam phei chu, ahmuh thui theih tawh lo hrim hrim bawk nen. Ngaih țha lo zetin ka luhsan leh ta mai a.

.

Ala ni chuang lo...ka ngaihte pawh ati țhalo lek lek tawh mai… Puia chuan a vawithum na ah tal chuan alo haw ve tawh mai ang. Hrilh lawkna ah ngaila, i ngaih ti țhalo duh suh. A lo thleng țep tawh aniang ati mai a. Chawbel her pahin, ka sakhi sarep țheh darh chu mau burah chi nen kan sawh sawk sawk a. Hmarcha tlem telhin, ka hnawh phui a. Thukah chuan ka hem lum ta a. Kawt thlanglam ațang chuan Sawma aw..ngei mai chu a rawn hei ha chho leh dap dap a.Chu zawng ani ve tawh ngei ang tiin, kan lo ngai chang ran a. Kawta thil han nghat dawp thawm pawh a hriat khawp mai. Buk lam panin a rawn pên phei Mahse, rawn lut ta lo chuan a reh ta vang vang mai. A ngaite bawk maw..a va mak zozai ve mawle ka ti chhuak leh hram a. Ka sawi zo vel deuh chiah tih chuan, pen thawm a rawn hnai tial tial a. Sawma chu a rawn lut ta hlawl mai. Sa bawp lianzet a rawn pu lut a. A kal bâi deuh uih uih mai leh nghal a.

.
I țha maw,,, Kha,, eng sa nge i rawn kah a. I va hlawhtling awm ve, i in hliam em ni tiin, ka zawt nghal chung chung a. A sa bawp put a nghah hnu chuan, a ipte chu dah thla in, a chhung ațang chuan saza lu, chal țha zet mai a ki pawh ngûntang chen laia sei tur hi a rawn phawrh a. Khai aw..tih pahin, Puia nen chuan kan han bel hnai vata.

.
Sawma chuan a chal țha em mai a, hetiang khawp a saza ki țha hi chu hmuh mai mai tura awm hek lo, ka awt em a ka kah phah anih hi, kawng ka rawn bo deuh bawk nen,min hliam ve khang lang bawk si a, ka duh angin ka rawn haw hma thei ta lo lawm le. In lo țha chu ka lawm hle mai, ka ngaih a țha thei thlawt lo a, kawngtluan maiin in thawm ka hriat chhawk zak zak reng mai che u asin. In na tuar rum ri te phei chu ka hre awl lo mai bawk si a. Ka saza kah lu lah khan, ipte chhan ațang, ka hnunglam hliam hi,a rawn dùt(fawp) leh vawng vawng țhin in ka hre leh nghal a. Ka lâwmna aiin ka hlauhna a nasa zawk daih a ti nghal bawrh bawrh a. Saza ki țhatzia mawlh mai chu kan lo ngaihtuah avangin, a ki bak chu kan lo enchiang hlei lo a.

.

Kan han belchiang deuh a, a chal leh chhip chu hmul var uk deuh hian a tuam bika, a mit chu a dum fim țha ngang mai, mak tak a ni. Min melh ni tlata in hriat na ka nei a, min hmu thei ni awm khawpa mawi ani. A hmui thi sùng mai nen phei chuan a râpawm deuh tlat hian ka hria. Puia lah chuan, a mit han en hian, min hmu thei melh in, min en tlatin ka hria ati a, a lek kual vut vuta mahse, a ki hi zawng a țha takzet a ni. Saza pawh a anglo mah mah zawk alawm le ati a. A ni lah taka, aki han țhatzia re'ng mai, hlauhawm tham khawp a zum fim ral mai hi a ni a. A ki bêr te pawh a In thuah hraw tap mai nia. A rinawm hmel tlet tlawt kher asin. Mahse, han en vang vang chuan hlauhawm rùkna a nei deuh tlat. A eng ber nge hlauhawm erawh han sawi fak tur ka hre chuang hauh lo na a. Ka țih ru tlat si ani. Puia chuan hetiang kap thei chu i pasalțha bik hle mai. Salu ropui tak a ni. Enge i hliam te chu a na em, engtin nge i kah dan te han sawi ve reng reng teh a ti a.

.

Ka țha e. Mi hliam na hi chu engmah tham ani lo. Ka tluk na vang zawk hian ka bai deuh mai mai anih hi, sawi tur teh vak a awm lemlo na a. Mak tih deuh erawh ka nei tih pah chuan, thingpui leh sarep ka pek chu an tep chak chak a, ti hian a sawi ta ani.

**********+*********
Ka kalna a chhuk chho deuh avangin, ka tuipai ka inzo tawh si a, ka tuihal velin tui in tur zawng in, kawrte ka zawh a, tui lah alo vang phian bawk si. Ka zawh zela, kawrte dang nen an infinna ka pawh hlawl mai a, chutah chuan tui pawh alo tam khawp mai, duh tawka ka in hnu chuan, kan hawi vela lui kam chu, sanghal changpat zawng nge, chakâi khawrh zawk ni. A nawr phut derh durh hlawm a. A thar țha em kher bawk a, lui hnar lam pan zawnga a hnu kal chu ka chhui chho ta a ni. Mahse, ka rin ang ngawt in ka tawng thei ta reng reng lo. Ka chhui chho zel a, lengkir sang zet mai hi ka han hmachhawn ta run mai a ni. Sanghal hnu lah chu lengkir bul ret thleng chuan ka chhui chho thei si a,amah hmuh tur a awm bawk silo. Luikam han per kai mai na tur chi a awm hauh silo a, kawrkam lehlam lehlam chu, a hnu ka chhui țan na chhak lawk ațang khan, lungbang sang tak ve ve in, lengkir thleng chuan, a in khawh chho zui mai kha ani a, rawn let nise kan intawk ngei ngei ang, khatiang khawpa hnu thar țha kha chu ka chhui hma khan alo lêt hman tawh aniang a tih theih loh hrim hrim, bakah a rawn lêt thla lam hnu hmuh tur a awm bawk silo. Kan zawn kual fe pawh in, ka hmuzo lo a ni. Saza hnu erawh ka hmu a, a țum khan aniang tih theih khawpin, a hnu a chiar țha thung. Kan chhuizui a, lengkir lam hlir chu a pan ve tho mai. Lengkir lah chu ka lawn chhuak thei ang em tihtur khawpin, a ding ngil chho purh mai bawk si. Han hêlna tur a awm eih silo a, lêt thlak leh ka peìh tawh bawk silo. Kan bêl chiang a, saza hnu chu lengkir pangah chuan alawn tlat mai, mak ka ti lutuk a, ka enchian ngial pawn lungbang a rah khem leh räng vel bak ah, a bel bik han mai bawk si a, mihring tan pawha a huphurh awm teh reng nen, saza mah nise, chutiang lengkir ding ngil ut mai ah chuan lawn ngaihna a awmthei lo reng reng. Mahse, chu a kawng ah ngei chuan, thei leh theilo in, hah thiphûl kaiin ka lawn chho ta a ni.

.
A lai vel ka thlen chuan, kan thlir thla a, ka hnuailam ațanga min rawn chhoh thlir tu hi ka zuk hmu tlat hian ka hria a. Kan insiam rem deuh a, ka zuk en țha leh chu, engmah ka hmu lem hlei lo a. Chutia, ka in ham tân lai tak chuan, ka hnuailam ațang Puia aw in min rawn ko ri hi ka hre leh a, ka hmu chuang silo che a, ka bengchhe ri mai mai aniang kati ta zawk a ni., Harsa ti tak chuan ka in hai chho ve zel a, saza hnu ka tih ah zel khan ka chho kha ani a, vawn tur leh rah tur chu a awm chho thlap thlap ta mai si a, mak ka ti tulh tulh mai. Mahse, khâm lawn lam hi chu ka harsat ve hrim hrim bakah, tlak hlauhna nen ka chho sawt lo kher mai, ka hnuailam ațanga min thlir tu awm ang a, ka hriatna lah chu a rawn nasa tulh tulh mai leh nghal, min rawn um thawm ni awm tak te ka hriat leh tak zel avang chuan, theih tawp a chakin ka chho ve zel a, a sang tawh si, ka hawi thla ngam tawh bawk silo. Min rawn ban zuau zuau tawh ni hian ka hria, chutih lai tak chuan, chunglam ațangin nangman mi rawn ko ve ta thunga. ka thlamuang huai huai asin.

.
Hman hmawh theih tawpa chakin ka lawn chhuak ta hram a, hmuh mai che inring in kan hawi vel a, ka hmu ta silo che a. Ka hah em avang chuan, ka bawk hle hle reng a. Mahse, ka hnunglama rawn lawn chhuak ve chiah niawm tak, thawm ka hriat chuan, ka inbeng kang zawk mai. Ka hawilet vat bawk a. Enge maw tak tlum leh zuk hi ka hmu zuau in ka hria, rang zetin ka tho nghal a. Ka mur sung sung leh nghal, Lengkir hmawr lam en reng chung chuan, hlau ru em em chungin ka va dak dêk dêk a. A hma a ka dinna lungpher chungah ngei chuan, in pahniha ruang, dâng bei mai, var puap hian, min lo en dun kawr mai a. Ka âu chhuak lo chauh ani. A sân tehreng nen khan, ka hma zawn a mù ang chiah a chiangin ka zuk hmu ani. Hlauh vanga khur der der chung chuan ka tawlh let vat a. Ka lâwn chhuah chiahna ațanga saza hnu chiar chho dup mai kan hmuh leh takah phei chuan, ka khur chhelo chauh tawh a ni. Ka inti pachang lui a, kawrh tê chu ka kân phei a. Chutah chuan, ka sanghal hnu chhui lai. A hnu phut chho durh mai chu ka va hmu ve leh nia mawle...

.
Lui dung pawh ka zawh ngam ta lo a. Khâm chhia ni tawh lo in, lengkir chunglam chu ram pharh țha tak alo ni tawh a. Khawmual lamah ka per kaia, hmanhmawh zetin ngaw chhungah chuan ka kal ta hlawk hlawk a. Ngaw chhung chu a thelh nuam viau na a, perhte leh thinglian tak tak ding ngir khup te avang chuan, thui tak erawh a hmuh theih bik loh. Ka hnungah lah chuan, min zuitu awm tlat hian ka hria mahse, ka kal thui tak deuh hnu chuan, a reh ve ta mai a. Ka thlamuan deuh takah chuan, sawntlung pawng sanglai ah țhut hmun remin meizuk chawlh ka nei a, rei pawh ka la țhu hman lo. Ka chhak lam ațanga thawm lo chhuak chu, ka en vat a. Thing phenah chuan a mawnglam chiah ka han hmu theih avangin, sazuk nge saza ni ang ka ti rilru nauh nauh a. A rawn hnai zel a, Thing karah chuan a rawn lang sen zauh zauh a, ka hmazawn thing khât na lai a rawn chuang thla ta chiah tih chuan, ka zial rim a hria nge ni. A rawn hawi chhuak a, a hnar a len vut vut a. A hawi hru hru ta mai a.

.

A ki sei leh mawi lutuk chuan ka mit ala zar mai. Hetiang reng reng a saza kì, sei leh nalh hi ka la hmuh ngai loh avangin ka awt ngang mai. Ka silai chuan kan tin a. A lu a lan țhat tak loh avangin, a zak dawh chu ka tin a. Ka hmet per țep tih chuan, naute han nui hek hek ri hi ka hre ta mai a. Kan ngaithla chianga ka hriatzui leh tak siloh avang leh a kì ka hmuh zuai kha hre rengin, ka awhna chuan, hlauhna min hriat tir theilo ani.

.
Ka silai chu kan hmetpuak chu A rawn zuang zawk mai a, a kî ațanga naute han zuangthla zauh lai hi ka hmu a ni. Țap țe rawng rawng ri in azui nghal a. Ram reh tak mai a, naute a han țap rawng rawng mai chu beng a fan hneh in, thinphu ati rang duh kher asin. Hlauhna in min tuama, ka hmulthi a ding ur ur mai. Hlau leh khur chungin, va fin fiah tur chuan ka pan phei a, ka silaimu han thun tur te chu, ka kut a khurh nasat em avangin, ka thun țhelh nawk mai a ni.

.
Ka hnaih phei zel a. Naute țap ri hriat tur a awm tawh lo a. A reh tlawk tlawk tawh mai, ka kahna ațanga a zuan zawk bak kha chu, a thawm ka hriat zui tak loh avangin, chulai chu ka pan hnai hriau hriau a. Perh te buk han che laih laih chu ka hmu thei a, lei lam chu en in kan thlêk chiang a, karei !!,, ka thil hmuh in mi râp zia mai chu, perhte kung vuan chung chuan, naute kum hnih mi vel hi alo thaw țek țek mai chu niin. Ka lam a rawn hawi chiah chu, a mitmu reng reng a lo awm lo. Thisen in a bual nguai mai bawk si a, mi râp lutuk chu, ka khawng vek in ka hria, ka khabe pawh a inkhawng dawt dawt hial ani. Mahse, mit khap kar lek ah alo bo daih.

.
Ka sirlam ațanga rawn ri phei buan buan chuan mi ti harh zawk a. Ka inher rual chiah chuan ka kâwng hnunglam pawh a thip nghal zawk bawk. Ka per nawk rualin, ka hawichuak leh nghal vat a, kalam rawn pan leh mek tu saza chu ka va hmu ta a ni. A rawn chak phei nasa mai si a. Ka sira thing ding awn lian vaklo ah chuan ka tlan lawn vat a, mi rawn pel fua mai. Ka hnuaiah chuan a lim kual puat puat mai a. A kâk rem laiah țhu in ka insiam rem a. Ka hmuh tak mai loh avangin. Ka hawikual a. Ka sir lam ațang chuan, mit khap lêk lo hian milo chhoh thlir vung vung mai chu niin, amit dum fim lutuk chuan mi râp ber a. Ka khur chhe lo chauh ani. Mahse, a ki ka hmuh apiang chuan, ka itna a zual a, min aikaih tlat ni berin ka hria. Ka silai chuan a dar ah ka zuk kap leh a, a awp rup a mahse, thawh leh a la tum nasa mai. Kan kap nawn leh sak a. A tlu ta ruah mai le, a kê leng uih uih chungin mi en kuau mai a. A mi melh ana khawp mai. Naute mit ah riak ka chan a Ka en țha ngam tlat lo.

.
Ka chhuk a, a lu lak tumin a nghawng ah kan zai chiah chu, naute țahin ațap ta ngawk ngawk mai a ni. Ka phù chiangin mirâp kher asin. Kalsan mai ka tum a. Mahse, a kì kan hmuh leh takah chuan, ka awt thlu ngang bawk a. Kan țhut chilh leh ta nge nge a. Naute hmel ang mai a. Ka hmuh avangin alu lam chu en duhlo in, lehlam hawi chungin a lu chu ka tan lui ta ani. Ka tan chhum meuh chuan, ka bul vel zawng zawng ah khan, an țap chuah chuah mai a. Ka mur uaih uaih mai. Ka tho a, kal nghal mai tumin a lu chu ka ipte puiah kan ak a. Mahse, țap thawm te alo reh tak avangin, hlauh vanga a sa ber han hawn loh tawp chu, ka tlawm la deuh a. A bawp la leng ùt ut thei chu kan phawk a. Bûk ka rawn panpui ta a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)