HMANGAIHNA AVANGA NUNRAWNNA NGE HMANGAIHNA VANDUAI by Lalthantluanga Chawngthu

Kan group pawn lam a mi, thuziak tha tak tak lak khawm...
LtCt
Posts: 2
Joined: July 3rd, 2018, 10:51 pm

HMANGAIHNA AVANGA NUNRAWNNA NGE HMANGAIHNA VANDUAI by Lalthantluanga Chawngthu

Unread post by LtCt » July 4th, 2018, 4:33 pm

Chu Chawlhna in (Waiting Shed)-ah chuan thlifim dawn pahin keimah chauhvin ka thu a. Chuta tanga lang thei hmun hrang hrangte chu ka thlir kual a. Ka naupan lai hunte ka ngaituah a, ka lung a lêng thar hle mai a:

“Zohmingliani saw i ngaizawng chiang tiraw?”

“Aih”

“Engati nge niminah khan i theihâi pai pakhat i pêk si?”

“Min dil miau si alawm”

Remruata chuan, “Kei paw’n ka dil che khan min pe phal si lo va,” a ti leh a.

“Nang chu mipa i nia, chu bakah, i nei ve tho alawm,” tiin ka chhâng a.

Chuti ang chuan kan naupan lai huna kan awm dan thenkhatte chu ka ngaihtuah chhuak a, ka lung pawh a lêng zual hle a. Ka thianpa Remruata’n Zohmingliani ngaizawng anga min ngaih tlat lai khan, dik chiah chuan a rukin ka ngaizawng êm êm a, mahse, ka ngaizawng tih kha a hriat ka hlau hle thung si. Chuti chung chuan ka duhsakna erawh ka thup thei lo va, a thil min dil tawh phawt chu phál takin ka pe zel thin a nih kha!

Kum sawmpahnih lai a liam hnuah chuan Zohmingliani chuan pasal a nei ta daih a. Ka ngaizawng êm êm tih kha a pasal neih thlengin a hre miah lo va; hrilh pawh ka tum chuang lo. Kei erawh chu he Chawlhna Inah hian thlifim dawngin nun hlui ka ngaihtuahkir mek thung si.

Remruata kha sipaiah tangin Jammu & Kashmir-ah a awm daih a, chawlh a lâk(chhuti) chângin a sen chi min lo hawn ngei ngei thin a. Zu khapna hmuna awm tan chuan khatia chawltui ningzu châka ka tuihal dangchâr lai rawn nantu van ruahtui sen chi ngat kha chu a hlu thin êm a ni!

Ka kekawr hma lama ka phone ah chu a rawn ri der der a, ka han phawrh chuan message a lo thleng a, ka han chhiar a: “Hei, kan thianpa John-a a chesual a, Falkawn Referral Hospital-ah a awm mek. I hman chuan lo kal ve la,” tiin Ruatkima chuan min lo thawn a. Naupan lai nun hlui atangin ka ngaihtuahna chu Damdawi in lamah a insawn ta a.

“Awle, ka lo kal nghal e,” tia ka chhân lêt rualin ka Bike chu ka han tinung a, hmanhmawh takin ka tlan ta nghal a.

Damdawi in panna pêng ka thleng a, ka han kual tur chiah chu hmeichhe pakhat, kawng tantlang(cross) tura kal ka hmu thut a. Ka Bike chu ka tiding chawt a; chuti chung chuan ka la tâi hman hram a. Inthiamlohna nasa tak ka nei a, ka Bike chu ka hûng tha a. Chu hmeichhia chu ka kai tho a, a na vak lo nain a khûp chu a thi ser ser a.

Inthiamlo rilru tak chungin, “Ka hmanhmawh luatah ka lo fimkhur tawk lo a ni. Damdawi inah kal nghal mai ang aw?” ka ti a.

Kal a han tum chu a bai deuh salh salh a, Bike-a phurh chu a nih loh avangin Taxi lo tlan mek chu ka phar ding a, Damdawi in lam chu kan pan ta nghal a.

Damdawi in kan thlen chuan Casualty-ah ka hmelhriat Doctor Lalengzauva a lo awm hlauh mai a. Ani’n a buaipui nghal zung zung a, “Eng mah pawi a awm lo ve, a vun a pilh mai chauh a ni; a ruh a khawih tel lo,” a tih chuan ka lawm hle mai a. Chutah, min han kheuh hrang a, “I bialnu em ni? A va hmeltha ve?” a ti zauh a.

Ka bialnu a nih loh thu leh ka hriat ngai pawh a ni lo tih thu hrilh ta ila, he Bairabi khaw chhuak Dr.Lalengzauva hian a awih dawn lo hlein ka ring si; hman atang tawh khan min ngai ler ve bawk si a, “I ngaih dan dan a ni mai,” nui chungin ka ti ta ngawt a.

Dr. Lalengzauva chuan, “Duat hle ang che,” nui ruh ruhin a ti a. Damlo dang en tur an awm avangin min kalsan ta a.

Chumi hnu chuan ka thianpa Ruatkima chu ka han phone a, hmeichhe pakhat ka tihpalh thu leh Falkawn Referral Hospital Casualty-a kan awm thu ka hrilh chuan rang takin a lo kal nghal a. John-a pawh ngaihtuahawm lutuk a nih loh avangin tlawh rih lo turin min ti a, chu hmeichhia chu buaipui turin min ti a ni tih ka hre thiam a, ka tum rûk reng a rawn hria chu mak ka ti lem lo.

Hmeichhe hmeltha leh duhawm tak mai a ni a, a sam chu a dar thleng vela sei ni mah se, a tukkhumah a tâwn a; han thlah se’ng a lan that lehzual ka ring a. Ka rilru te tein chu hmeichhe hmeltha tak mai, ka Bike-a ka tâi palh chu fate nu atan ka awt hle mai a!

Eng êm tilo chuan Damdawi in atangin Taxi bawkin kan chhuak a. Chu hmeichhe bulah chuan Tluanga ka nih thu leh Mualkhawpuia chêng ka nih thute chu ka hrilh a. Chumi pah chuan, “Bike-ah i chuang thei tawh ang em? I chenna hmun thlengin ka thlah dawn che nia,” ka ti a. Chutia ka han tih chhan pawh a chhûngte lakah ka inthiamloh thu hrilha thupha châwi nghal ka duh a ni.

“Ka na vak chuang hlei nem, keimahin ka haw thei mai ang,” a ti a.

“Bike-a i chuan theih tho dawn chuan ka thlah ang che, khawi hmunah nge in awm?” tiin ka zawt a.

“Khawchung Street-ah sâwn kan awm a,” a tih chuan ka Bike hûnna hmun chu kan thleng a, Taxi chuan man ka pêk fel hnu chuan kan chhuk ta a.

“Pawi ka ti takzet a ni, ka inthiamlo takzet,” ka han ti leh a.

“Keimah zawk alawm, kawng ka lo en chiang lo êm a ni, Taka, Mawii ka nia,” tiin a hming chu a sawi nghal a.

“Ka thlah ang che,” tih pahin ka Bike chu ka tinung a. A rawn lâwn a, Khawchung Street lam pan chuan fimkhur takin ka tlanpui ta a.

In pakhat, chhâwng hniha sang awmna kan thlen chuan, “Hei hi a nia kan in chu,” a ti a. In chhûngah chuan luh tumin ka zui ve nghal a. In chu Tala-in a lo inkalh a, a ipte(bag) atangin chahbi a phawrh a. A chhûngte hnena thupha châwi ka tum tehreng nen mi dang an awm lo chu pawi ka ti ru viau mai a.

“Thingpui in ang aw?” kan thut fel hnu chuan a ti a.

Ka riltam tawh deuh avangin ka inthlahrung duh lo va, “I tih dan dan,” ka ti a. Thingpui chu a han siam a. A siam fel hnu chuan chhang tuihnai tak nen a rawn chawi phei a. Thingpui in pah chuan ngawih reng thu awm hek lo, “Hemi hmuna cheng hlun hi em ni in nih?” tiin ka zawt a.

“Ni lo ve, kumin atangin kan rawn awm ve chauh a, hmelhriat pawh ka la nei tlem khawp mai,” a ti a.

Zirlai nge hnathawh mek nei zawk ni ang aw ka ti rilru a, han zawh ngawt lah chu ka hreh deuh si a, “Pazawna University College-ah khian Asst.Professor-in ka awm ve a, literature subject ka zirtir thin,” tiin ka hna thawh chu ka han hrilh a.

“I va ropui bik ve,” ti chauhvin min chhâng a, thil dang chu a sawi belh chuang lo.

Thingpui kan in zawh chuan lehkhathema ka hming leh address, hna thawh leh phone number inziahna chu ka pe a, “Ka tihpalh che avangin ka inthiamlo takzet a, i inenkawlna hi chu ka lo tum vek ang,” ka ti a.

“I inthiamlo lutuk a, awm dan min inti hre dawn lo hial alawm. Eng tin mah ka awm loh hi; insen tih lam phei kha chu a tul lo reng reng,” a ti a.

“Ka tan a nuam lo êm alawm. Taka i phone number min pe thei em?” ka ti a.

“Ka rawn miss-call ang che,” tih pahin lehkhathema ka pêk chu a en a, ka phone number chu a hmet a, ka phone chu a lo ri ral ral a.

“Ka lo ‘save’ nghal ang e,” ka ti a, ka save ta nghal a. Chutih lai chuan kan thianpa John-a chu ka hre chhuak thut a. Chu hmeichhe hmeltha tak kianga la awm rih chu duh viau mah ila, huangtâu hma lutuka min ngaih ka hlauh bawk si avangin, “Ka haw tawh mai ang e, i dam chian hun min lo hrilh dawn nia,” ka ti a. Kawngkapui thlengin min thlah a, ka Bike tinunga ka han tlan chhuak turin ka en lêt leh chuan min lo nuih seih a, chu ringawt pawh chu ka lawmna pakhat a ni tlat mai.

Damdawi in lam panin ka inkhalh chhuak ta a.

Damdawi in ka thlen chuan John-a awmna pindanah chuan ka lût a, rin aiin a lo na ang reng viau mai a, fiamthu titihin, “I huaisen reng reng ka ti; kawng thlang lama han thlawh thlâk reng reng chu!” ka ti a, a nui khi suk a.

A mutna bula khum pakhatah chuan tlangval pakhat hi a awm ve a. A bulah chuan police uniform ha pakhat hi a lo thu bawk a. A hnu deuhvah police pa chuan, “Tluanga i ni em?” tiin min rawn zawt a.

“Aw, ni e, eng tin nge min hriat theih zawk a?”

“I lehkhabu ziah pakhat ‘Zahna Zakzehin’ tih atang khan”

Ka lehkhabu ziah chungchang a rawn sawi takah chuan ka tuina záwng tak a lo ni bawk nen; amah chu ka han bel bul nghal a. Tui takin ka lehkhabu chungchang chu kan sawi dun a, chuti taka min lo ngaisang der ve chu ka lawm ru angreng khawp mai a.

A hnu deuhah chuan, “Hei, i damlo awmpui hi i chhûngte em ni?” tiin ka han zawt a.
“Ni lo ve. Convict (Misual hrem tuar, lung ina tâng mek) a ni a, thla leh mai khi a chhuah hun tur a ni a. A damlo thut alawm le,” a ti a.

Chu tlangval chu ka han en a, zah hmel takin min melh ve niin ka hria a. Lainatna ka nei nghal ringawt a. A hmai bulah kûn hniamin, “Khawi hmuna awm nge i nih, thianpa,” ka han ti a.

“Kawnral vengah khian kan awm,” a ti a.

“A nih tak chu maw le. I chhuah hunah i lo la lêng dawn nia,” ka han ti thla ngawt pek a.

“I awmna hmun pawh ka hre hlei nem,” a ti a.

Ka chenna hmunte chu ka hrilh a. A hmingte chu ka zawt a, Ramliana a nih thute a sawi a. Chutia dânin misuala a ngaih, thiam loh a chantir chu eng vanga han kâwm ta luam nge ka nih pawh ka inhre lo. Chhûngkaw harsa tak kara awm a nih ka rin vanga khawngaihna ka neih vang ni berin a lang.

John-a bulah rei lote ka thut leh hnuin a lo tlai deuh ruih tawh bawk a, kan in lam panin ka haw ta a.

Ni hnih lai a liam hnuin ka class la zo ka pindan(room)-a ka thutmuan laiin Mawii chu eng nge a an zel tih hre châkin ka han phone a.

Mawii chuan, “Ka na vak hlei nem, a dam nghal vek alawm!” a ti a.

“A va lawmawm ve, tlaiah ka lo lêng thei ang em?” ka han ti nghal zat a. Ka thinlungah ka vei êm tawh avangin amah biak leh hmuh chu ka thlahlel êm êm si a ni.

“Ngaihtuahawm ka ni hlei nem”

Lên a phal lo tihna em ni aw ka ti rilru a, “I dam var hmel ka hmu chak a!” nui chungin ka ti a.

“I thu thu le,” a ti a, lawmthu hrilh pahin min lo beisei reng turin ka chah a, phone chu ka dah ta a.

Tlai lam dar 2:30 vel a ni a, office atangin ka chhuak hma a, Khawchung Street lam panin chak takin ka inkhalh a. Mawii te in ka thlen chuan Doorbell chu ka hmet nghal a. In chhûng lam atanga Mawii min lo chhàwnna awka “Lo lût rawh” tih ka hriat veleh phur takin kawngka chu ka nam hawng a, in chhûngah chuan ka lût ta a.

Amaherawhchu, ka thil hmuh chuan ka thinlung a deng dawt mai. |hutthlengseiah insi rialin Mawii leh mipa pakhat hi an lo thu a, TV an lo en dun mek a.

An ep chiahah ka thut hnuin Mawii chuan, “Hei hi ka pasal a nia, Zuala a nih hi,” tiin min hmel hriattir a. Ka rilru a na zawk mai a, nula ni tura ka ngaih, ka lo duh ve êm êm mai chu mi nupui duhlai a ni tih ka han hria chu hrehawm ka ti kher mai. Hei kher hi chu ka mumang lama ka hmuh pawh ni se, ka thin tirimtu a nih phak dawn tho avangin, a tak ngeia han hriat chiah phei chuan min dêng na khawp mai.

Mawii chu ka duh êm avangin a pasal Zuala chu ka thikin ka haw nghal êm êm a, han tihlan chi lah a ni der si lo, “A ni maw,” tih pahin Zuala nen chuan kan inchibai a. Chumi hnu chuan Mawii ka tihpalh dan chu ka’n sawi thuak thuak a.

Dam thlupin Zuala chuan, “Nia, Mawii hian min lo hrilh a. I ngaihsakzui a, a lawm viau asin,” a ti a. Chutah, a kawr hmaa a sikret ah chu lachhuakin a tan a, “Khatih lai khan ka hna avangin Mumbai-a ka zin lai a ni a, nimin khan ka lo thleng chiah,” a tih chhunzawm a.

Kei chu ka lo bu deuh nghat a. Eng hna nge a thawh ang tih chu hre châk viau mah ila, ka zawt ngam chiah si lo, “Mawii nen hian in inneihna a la rei lo em ni?” tiin ka zawt ta ringawt a.

“Kum khat a la tling lo deuh, fa pawh kan la nei lo a nih hi. Heta kan awmna pawh a la rei hlei nem. Mawii hi Department of Agriculture-ah khuan Demonstrator-in a thawk a, an sawn avangin kumin kum tir vel khan he lai hmunah hian kan rawn awm ve chauh a ni,” a ti a.

Mi invawngfel mi tak leh inla zahawm thiam tak niin ka hria a. A han tawng dan hmangah chuan zêp tit tet nei lem lo, mi lang tlang tak niin ka hmu a. Amaherawhchu, Mawii pasal a nih avang ringawt chuan ka haw nghal êm êm si.

Mawii chu a tho va, thingpuii aiah Coffee min rawn pe a. Chumi kan in chhûng chuan ti ti phunglêng mai mai kan sawi a. Ka hna thawh velte ka sawi chuan min lo phurpui phian a. Zirna lam leh literature chungchangte chu min sawipui hlut a. Chumi pah chuan Aryabhatta Investment Company-a Consultant hna a thawh thu leh a zin kual deuh reng thute a sawi a. Kei chuan a zinna hmun velah thil nuihzatthlak deuh a tawng em tihte ka zawt ve thung a; a lo tawng nual a, ngaihnawm takin a sawi bawrh bawrh a. Chutih chhûng zawng chuan Mawii chu ka mitsir ralh ralh reng a, a duhawm tulh tulhin ka hria a.

Rin ai takin ka awm rei ta a, haw ka tum thu ka sawi chuan zanriah ei ve nghal mai turin min sâwm a. Mahse, tih tur dang neia insawiin ka chhuahsan ta zawk a.

Ka haw kawngah chuan Mawii chu ka ngaihtuah nasa mai a. Eng vangin nge ka lo tawn kher le? Nula zawng la ni se, ka theihna zawng zawng hmangin ka chhài tur hi a ni a. Mahse, mi duh lai a nih tawh tlat avangin ka theihnghilh zawk tur a ni ka ti a.

Mawii chu theihnghilh ka tum poh leh ka rilruah a lût nasa ting mai a. Mi dangte’n mi nupui zûnah ka uai tih hi hria se, eng tin tak min ngai ang maw?

Ni a liam a, thla hnih lai a vei ta. Mawii chu ka theihnghilh thei chuang lo. Class ka lâk lai ngei ngei pawhin ka rilruah a lo lang tlat thin a. Zirlaiho bula han puan chhuah chi lah a ni der si lo. Engah nge maw kan lo intawn kher kher le?

College atanga ka haw chu kawngpui sir(footpath)-a Mawii kal ka hmu thut a, ka insûm hman lo; a lam panin ka Bike chu ka kuaiher nghal lawp a, koh tuar pahin a bulah chuan ding ta a.

“Khawiah nge i kal a?” tiin ka be nghal a.

“Kan office báng ka teikual pah lawk alawm le,” a ti a.

Kei chuan, “Lo chuang rawh, ka lo thlah ang che,” ka ti a. A hnial ka rin viau laiin a rawn chuang a.

An in lam pana kan tlan laiin, “I pasal a awm em?” tiin ka zawt a.

“Awm lo, a hna thilah a zin chhuak leh tawh a”

“A va khawharthlâk duh dawn ve?”

“Nia, khawharthlâk thin khawp mai”

“Eng tikah nge a lo haw leh ang?”

“Tun thla tawp lamah hian a ni ang”

An in kan thleng a, ka Bike chu ka hûng tha a, in chhûngah kan lût ta nghal a. Theitui a rawn lachhuak a, kan in dun laiin, “Mawii, tun lai chu ka nun hi hrehawm ka ti ngawih ngawih thin asin!” ka ti phawng mai a.

Mawii chuan chiang taka min en pahin, “Eng vangin maw?” a ti sap a.

Amah melh ve reng chungin, “Nangmah vang hian!” ka ti a.

Mak a ti hle tih a hmelah a lang a, “Keimah vangin maw? Engati nge keimah vanga hrehawm i tih?” a ti a.

A bulah chuan tawlh hnaiin a kut no tak chu ka vuan a, “Ih e, pasal i nei tih ka hriat atang chiah khan ka thinlung hi a na ngawih ngawih reng a. I pasal hi ka thik êm êm a ni,” ka ti ta rawih a.

Mawii chu a ngawi reng a, chutah, “Ka hmuh hmasak ber ni atang che khan ka thinlungah hian i châm reng a, ka nupui la ni tura ka duh êm êm lai chein pasal i nei tawh tih ka hre leh si a, ka rilru na lutuk hi ka puak kehlo chauh a ni,” ka tih chhunzawm a.

“A va pawi ve. Min theihnghilh chu i tan a tha ber ang,” a ti a.

“Ka theihnghilh thei tawh si lo che a nih hi!”

“Min theihnghilh loh chuan i na reng dawn asin”

A kut ka vawn chu ka la thlah chuang lo va, inhawi tawna kan inen avangin ka duhna chu a zual tulh tulh a. Ka insûm hman lo, “Mawii, ka duh che a ni, ka hmangaih che. I pasal hi then la, min nei mai rawh. Maw...h, min duh ve mai rawh”

Ka vawnna ata a kut chu a lasawn a, ka kokiah a nghat a, chiang taka min en pahin, “Tluanga, ka thil hmuh hian ka thinlung a khawih lo a ni bik lo. Mahse, kan intawn hun hi a dik lo a ni. Haw la, mi dang zawng mai rawh,” a ti a.

“Ka thei lo, ka thei ngai lo vang. I pasal hi then la, ka nei mai ang che”

“A theih loh! Thihna chauhlo chuan min then hrang thei lo vang!”

“Mawii, vawi khat chauh!” tih pahin ka kuah a, a hmuiah chuan ka fâwp a, a lo dawh ve mai a, mahse, min fâwp lêt ve hauh lo va.

“Haw rawh, min theihnghilh nghal la; ka rilru i tiphir zo dawn,” a ti a, a kut chu a hmaah a suih a, a ding nghal a.

“Mawii, ka haw ang. Mahse, ka lo nghâk reng ang che aw,” ka ti a. A hmuiah bawk chuan ka fâwp leh a, min fâwp lêt ve chuang lo va. A hnu deuhvah min nam kiang ta a.

“Min theihnghilh chu tum hram ang che aw... I tan ka rem thei chuang lo vang,” a ti sap a.

Mawii te in atanga ka chhuah hnu chuan rilru buai takin ka tlan a, kawng pawh en mumal lovin thil tam tak ka ngaihtuah a. Vawilehkhatah ka hmaa Truck lian pui chu ka su bur mai a, ka han harh chhuah leh meuh chuan Damdawi in khumah ka lo mu reng tawh mai a. Ka bulah chuan John-a leh hmana Damdawi ina Ramliana kha an lo thu dun a. Ka lu chu a lo intuam bür a, ka taksa dangte pawh chu a na deuh thum mai bawk a.

John-a hnenah chuan, Eng tin nge hetah hian in lo awm theih mai?” ka han ti a.

John-a chuan, “I huaisen êm alawm, khati ang Truck lian lutuk kha i su búr ngam a nia,” a ti a, a nui hawk hawk a, chutah, “Hei, Ramliana hi i chetsualna bul lawka a kal lai a lo ni hlauh a, i phone atangin ka number a lo zawng a, min rawn bia a, a fel khawp mai,” a ti a.

Ramliana chu ka han en a, pangngai takin a inchei a, a thawmhnaw hak chu man to tak ni lo mah se, a fai hle thung a. A hnenah chuan, “I tilawmawm hle mai, min lo la hre reng chu. Ka lawm takzet a ni,” ka ti a.

Ramliana chuan, “I chungah hian ka lawm fê zawk alawm! Khati anga ka puih theih che avang khan vannei ka inti khawp zawk asin!” a ti a.

“I lakah thil eng mah ka tih pawh ka hre si lo va,” ka ti a.

Ramliana chuan, “Hmanah Damdawi ina ka awm laia min rawn biak kha i la hre reng em? Khami tum khan khawvelah hian tu mah min khawngaiha min lainattu an awm lo niin ka hria a, dam chhuah leh châkna pawh ka nei lo. Mite’n misuala an ngaih, damdawi in khumah ngei pawh ka mut laia ka tlan chhuah hlauva vêngtu hial nei ka nih avangin ka nun hi a beidawng êm êm a. Jail atanga ka chhuah hnuah pawh chhûng khat laina hnai belh tur ka neih lo va, chenna tur in ka nei tawh bawk si lo. Ka pa thih hnuin kan in neih chhun lah ka hralh daih tawh bawk si a. Ka thian thenkhatte bulah te ka tâl kual vel mai mai a. Chuvang chuan Jail hi ka in neih ve chhunah ka ngai hmiah a, chhuah châkna pawh ka nei lem lo. Amaherawhchu, ka dam loh laia ka bula i lo kal khan lainat tak maia min tawng thlamuan dante kha ka hria a, khatih lai khan kei chuan dawt ka la hrilh che asin! Kawnral vengah ka awm reng reng hlei nem,” a ti a.

“A pawi lo, i din hmun angah khan ding ila, i sawi ang tho kha ka sawi ve tho ang,” ka lo ti a.

Chutah, “Tihsak theih che ka nei em, eng thil pawh? A tha lam emaw a chhe lam pawh ni se, i tana thil tih chu ka ba ve reng reng,” a ti leh a.

“Hei ka tan thil tam tak i ti tawh alawm. Hliam tuara ka awm laiin min ngaihsak a, damdawi in thlengin min buaipui chho zel bawk a,” ka ti a.

“Hei te chu eng tham mah a ni hlei nem. Min mamawh hunah chuan min lo ko tawp la, ka lo kal ang,” a ti a. Chutah, lehkhathemah hian eng nge maw hi a ziak a, chu chu min pek pahin, “Hei hi ka phone number a nih hi. A hretu an tlem teh asin! Min mamawh hunah chuan min lo be mai dawn nia. Hei, ka inhlawhna pawisa lam ka ngai si a, ka chhuahsan phawt mai ang che,” a ti a.

A tawngkam leh chezia atang chuan Jail hiala tâng tur chi a ni tlat lovin ka hria. A kal chhuah hnuin John-a chuan engtia chesual thei mai nge ka nih chu min zawt a.

Kei chuan, “Ngaihtuah ka ngah lutuk vang a ni ang!” nui chungin ka ti a, thiante mah ni se, Mawii vang a ni tih chu ka hrilh duh chuang lem lo va.

Kan nui dun hak hak a.

“Ka awih chiah lem lo, nang tluka lirthei khalh fimkhur hi an awm miah lo ang,” John-a chuan a ti leh a.

“An awm a ni ang, hei damdawi in hial ka thleng alawm,” ka ti a. Chutih lai chuan Doctor a lo lut a, min han endik zung zung a, “Damdawi ina riah êm chu a ngaih loh hi. Ti hian in chhuak thei mai ang, ni hnih ni thum vel chu i sil thum mai thei a nia. X.Ray-naah i ruh vel eng mah pawi a awm lo ve,” a ti a, ka thaw a veng huai a.

Damdawi in kawtah Taxi kan ko va, ka bike kha tlema a chhiat ve deuh avangin John-a’n Workshop-ah a lo dah daih bawk si a.

In kan thlen chuan ka chhûngte’n ka lu intuam búr mai an hmuhin mak an lo ti hle mai a, John-a chuan ka chetsual thute chu a dam thei ang berin a hrilh a, ka nu chuan ka fimkhur loh vangah puhin min lo hâu hman pek a!

Chumi zan chuan sil ûr chungin thutthlengseiah TV en pahin ka mu reng a, dar 8 bawr velah Mawii message ka hmu a, ka chesual tih chu tu tawngkam atangin nge a hriat ang aw ka ti rilru nauh nauh a, ka nat leh nat loh vel min lo zawt a. Kei chuan, ka taksaah pawi tham nâ ka neih loh thu leh, vun chhia vel tlem chu a pilh ve e tiin ka chhâng lêt a, chuta Mawii min chhân lêtna chu alawm mak ka tih êm êm:

“Keimah vanga chesual i ni tih ka hria asin! Khawngaihin i rilru tal chu dam rawh se. Kan intawn hun hi a fuhlo a ni. Hmanah khan lo intawng tawh ila chuan ka rilru zawng zawng hi ka pe ngei ang che, mahse, tunah zawng a rem thei tlat lo; min hre thiam hram rawh aw... pasal ka lo nei tawh si...”

Ka hriat thiam duh loh hi ka hre thiam a, ka hriat thiam hi ka hre thiam lo mai mai zawk a ni. Eng vangin nge mi nupa inkarah ka inrawlh buai? Mawii lo hi hmeichhia an tam a, dik chiah chuan makpa a tana min beiseitu pawh an awm nual asin! Eng vang kherin nge mi nupui ni tawh lehnghal hi ka beisei reng ang ni?

Mahse..., he thumal ‘Mahse’ tih ka hringnuna a lo awm kher kher hi chu a va’n pawi êm! Ka hmangaihna hian ramri min khamsak se chuan Mawii hi ka theihnghilh mai tur. Khawiah nge ramri chu kham a nih? Mi nupui a nih tawhna chu khuavang ramri kham sa em ni? Ni lo, a ni thei lo. Ka hmangaih a, ka duh a ni. Mi nupui ni tawh mah se, ka nupui atan ka duh a ni. Eng pawh lo thleng se, ka nupui ni tura ka beisei hi a thiang tho love’m ni?

Ni thum ngawt mai chu ka taksa a sil deuh thum avangin chawlh ka la a, class pawh ka kal thei lo va. Ni linaa class ka han la leh chu ka zirlaite chuan, “Sir, engtia chesual thei mai nge maw i nih le?” min lo ti sap sap a. A chhan dik tak hrilh ila chuan mak an ti hle ang.

“Vawi khat tal chetsual hi chu a awm ve a nia,” tiin ka chhâng hlawm a, an nuih a za viau a. Chutih lai tak chuan ka phone chu a lo ri ret ret a, ka han en chuan kha tlangval, Ramliana kha a lo ni reng mai a! “Ve teh hlawl chuan, eng nge ni ta?” ka han ti a.

“Hmelma i nei em?”

“Neih pawh ka hre lo. Engati nge?”

“I neih chuan min hrilh rawh, ka dahthatsak ang che”

Class-room atang chuan ka chhuak a, tu mahin ka tawng an hriat phâk lohna turah ka kal sawn a. “Eng vang nge chu thu chu min zawh tak mai?” ka ti a.

“Nangmah vengtu Angel nih ka duh a, mite’n Angel angin min ngai dawn chuang si lo. Chuvang chuan, nangmah venghimtu nih chauh hi ka duh a, i tana tha lote thenfaisak che hi ka duh a ni”

“Ka tana i inhuamna hrim hrimah chuan ka lawm tawk e. Hmelma ka neih awm reng reng ka hre lo a ni”

“Eng tik hunah pawh min hrilh la, ka hna chu ka thawk mai ang,” a ti a, kan inbiakna chu kan duh tawk ta a.

Mak ka tiin kha tlangvalin ka tana thil tih a châk chhan êm êm kha vawi khat chauh lainat taka ka biak vang kha a ni mai si a. Anka nêmin thinur a tikiang thin tih hi a va dik tehlul êm ka ti rilru a.

Office chawlh a ni a, seminar paper tur buatsaihin in lamah ka buai hle a; chu ka paper present tur ka chhutluh mawlh mawlh lai takin Mawii ka ngaihtuahna chuan ka rilru a rawn chawk buai leh ta thut a. Ka phone ka la a, Mawii chu ka be ta ringawt a:

“Mawii, ka hmangaih che”

“Chuti ang sawi tawh suh, min hmangaih chuan”

“Ka hmangaihna che hian sawi lo turin min khap dai thei si lo alawm”

“Ka rilruah i awm lo a ni bik lo, mahse, kan pahniha kan inzawm hi a rem lo a ni”

“Rem theih dan a awm alawm. Mawii, i pasal nen hian inthen ta ula, min nei duh ang em?”

“Lo inthen ta ila, i zawhna hi ka zawhna zawk tur che a ni ang. Mahse, tun dinhmunah hi chuan kan inthen ka ring lo”

Ka thil chhut chu ka han en a, “Mawii, hei seminar-a ka paper present tur ka inbuatsaih mek a, mahse, ka rilruah nang chauh i lan reng avangin harsa ka tikhawp mai. Ka bulah chuan awm la, min tihpui ang a, tha takin ka tithei mai tur hi a nia,” ka ti a.

“A va’n pawi ve aw... Tunah tihchhunzawm leh tawh rawh, kan inbiak reng chuan i tizo har lutuk ang,” a ti a. Phone chu kan dah ta a.

Ka rilruin thil tam tak ka ngaihtuah a, khawvela ka thil tih duh loh ber chu tih hial duh khawpin ka awm ta thut a; hmangaihna chuan min tikhawlo zo ta!

Ramliana chu ka be ta ringawt a, “Khawiah nge i awm? I buai em?” ka han ti a.

“Buai lo ve, eng nge ni ta?”

“Thil min tihsak turin ka duh che a”

“Eng thil?”

“Phone-a sawi mai chi a ni tlat lo, khawiah emaw inhmu ila. Mr.X.Sailo Hotel-ah khan min lo nghâk thei ang em?”

“Tehreng mai, ka lo awm nghal a ni mai”

Mr.X.Sailo Hotel lam pan chuan ka chhuak nghal a. Ka va thlen chuan a kawtah Ramliana chu a lo awm reng tawh a. Darkar chanve chhûng atan inkawmna pindan(room) lian vak lo ka hauh(book) a, chu hmun chu nula leh tlangval inngaizawngte inhmuhna hmun ang chi hi a ni. Chutah chuan kan lût dun nghal a.

“Ramlian, thil min tihsak tur hi khawvel hian a hriat a thiang lo a ni,” ka han ti a.

“Chuti ang tak chu alawm ka tih duh chu”

Ka kawrhma iptea thlalak ka ah chu ka phawrh a, “He pa hi i hmu tawh em?” tih pahin ka han pe a.

Uluk takin a han thlêk a, “Aw, ka hmu tawhin ka hria,” a ti a.

“I dahtha thei ang maw?”

“Thei êm êm ang, lungngai mah ta che”

“I chet lâk dan tur chu hril che ngai lovin kei aiin i thiam daih ka ring a; he pa address chu hei hi a ni,” tih pahin Mawii te chenna address chu ka pe nghal a.

“I duh ang ngeiin ka lo ti ang, ka tih tur ka hlen hunah phone-in ka rawn hrilh mai ang che,” a ti leh a.

Chu pa chu eng vanga dahtha tura ti nge ka ni tih min zawt hauh lo mai chu mak ka ti hle mai a, min ring tawk a, ka tana thil tih chu a duh ber niin ka hria a. Ka kekawr atangin Rs.10,000/-(Sing khat) intelkhâwm chu ka phawrh a, “Hei hi la phawt la, i tih zawh hunah heti ang zat bawk hi ka pe leh ang che,” ka ti a.

“A ngai lo, i tan sum phûtin thil tih ka duh lo,” a ti a.

“Ni lo ve, a thlâwnin tu mah ka chhawr duh lo,” ka ti ve tlat a, a ipte-ah chuan ka hnawhluh luih sak a.

“A tam hle mai, hei chuan rei tak min daih ngei ang. Ka lawm e, ka lawm khawp mai. Mahse, hei bak hi chu a ngai tawh lo ang. Sum ka nei lo êm mai a, ka la phawt mai ang,” a ti a.

Chu Hotel atang chuan ngâwi rengin kan chhuak a, inhre ngai lo angin kan kal hrang nghal hmak a.

Kar khat a liam a, Ramliana hnen atangin eng thu mah ka la dawng lo. Amah biak ka han tum a, ka phone tlang thei reng reng lo mai a. Eng nge a chhan ni ang aw ka ti nasa mai a. Ka thil tihtir tum chu ti leh lo mai tura hrilhte pawh ka duh leh a. Mihring nunna êm inlaksak chu ka hreh leh hnuhnawh a. Keima kut ngeia la ni dawn lo mah ila, keimah kal tlanga ti tur a nih tlat si avangin ka dam chhûngin ka inthiam theih ka ring lo a ni. Mawii chu duh teh mah ila, a pasal lak atanga la bo tur chuan kawng dang pawh zawn mai thain ka hria a, mahse, Ramliana chu ka be tlang thei tlat si lo.

Hlawhtlinglo hram se, eng thil emaw talin a thil tum chu thulhtir hlauh se aw... Amaherawhchu, amahin a tuar theihna tur erawhin hlawhchham lo se; him dam taka chhuakin a thil tum chu tlawlh se ka ti a ni.

Eng vanga he thil hi tihtir tum reng reng maw ka nih le? Eng ngaihtuahna sualin nge ka thinlung hi rawn suasama, mi nunrawng berte chêt duh dan kawng zawh tura ka inthunun theih tlat loh mai le aw.

Ka phone chu ka han lek chhuak a, vawi tam tak Ramliana chu biak ka han tum a. Mahse, a tlang thei reng reng si lo. Ka thuthlûkna lo siam tawh chu a dik lo tih ka hriat avangin thulhtir leh ka duh a ni. A rûk tak chuan ka mangang ru ve ngawih ngawih a. Amah chu man chhuah ni ta se, eng vanga thil ti nge a nih an dâwp hunah tang zo lovin ka hming hi sawi chhuak ta se, kei hi Jail bang zut thei dinhmunah ka ding reng si. Sual hi a thûp hlen tak tak theih lo va, hai lan hun a awm tho tho thin tihte hi ka zirlaite ka hrilh thin a ni lo’m ni? A zirtirtu berin sual chu tih ka tum leh ta tho si.

Ka hlauthawng hnuhnawh khawp mai a, hlauhthawn avangin tih theih erawh ka nei tlem si. Ka thil tihtir tur chhuanawm loh zet chuan min tihah ngawih ngawih a. Dawhkana kiu nghatin ka indawmkun ta tlawk tlawk a.

Ka phone chu a lo ri ral ral a, ka han en chuan number ringawt hi a lo lang a. Ka han la a.

“Hello, Tluanga a ni em?”

“Aw, ni e. Khawi atangin nge aw?”

“Ramliana ka nia, min hre thei mai ang em?”

Ka thin a phu nghal dut dut a, ti tura ka tih kha a lo ti hman mai ang tih ka hlau hle a, “Hria e, ka rawn phone tlang thei miah lo che a,” ka han ti a.

“Nia, ka phone ka tibo daih a!”

Kei chuan, “Eng tin nge i tih tâk?” ka han ti a.

“Ka hlen tawh e!”

Chu thu chuan min dëng na kher mai. Ka phone chu chhuatah ka thlauh chawrh a, a darh chhûai a. Mu leh mal pawh nei lovin chhuatah chuan ka vei a, ka thu a, ka tho chhuak leh thül. Ka âwm chu ka han dawm a, ka lungphu chu a rawn chhuak dawn ta emaw tih mai turin a phu dut dut mai a. Chutih lai tak chuan kawngkhar a rawn ri a. Ka rilru hahna chu thupin kawngkhar chu ka hawng a, Ramliana a lo ni a. A rawn nui lut deuh var var a.

Ka inthiamlohna chu thup hram hramin, “Ka duh ang ngei chuan i chêt ka ring a. Tu mahin an hmu lo tak tak che em? Man chhuah mai theih turin kuthnute i hnutchhiah em?” tiin ka han zawt a.

Ramliana chuan dawhkana ka sikret dah chu a han ban a, muang changin a han tan te te a, chutah, “Ka chet dan zawng zawng chu a tir atangin sawi vek pawh a tul lo mai thei. A tawp dan hi a pawimawh ber zawk alawm. I duh ang ngeiin ka chingfel thei e,” a han ti phawt a.

“A hnu i khàr dan chu han sawi la,” ka lo ti a.

“...ka han luh chuan thutthlengah a lo thu a. A hnung lam atangin a tukkhumah ka pistol ri thupna vuah sa chuan ka kâp nghal a, a thi ngei tih ka chian hnuin pindanah ka hnûk lût a, an pawhdawh ka hawng a, a pistol ka hmu a, amah leh amah inkaphlum anga a lan theih nan ka hûmtir a,” a ti a.

“Kut kawr i bun em?” tiin ka lo zawt vat a.

Ani chuan, “Bun dawn lo’m ni? Ka kutthla a lan ka hlau ve tho alawm,” a ti a. Engthawl takin sikret chu a han hip vang vang a.

Tu mahin an hmu lo tak tak che maw?” ka han ti a.

Ramliana chuan ngaih ngam takin, “Hmu lo ti ila, min hmutu pakhat chu a awm a, mahse, han sawi chhuak turin khawvelah a awm tawh lo. Chumi awmzia chu maw, pindan atanga ka han chhuah chiah khan an bathroom(bual in) kawngkhar chu a inhawng a, nu pakhat inbual zo hi a lo chhuak thut mai a, insasengna hman ka nei tawh bawk si lo; chu nu pawh chu ka kaphlum ve nghal a...!”

July 2013

Thu lâkna lehkhabu: KHAMI ZAN KHA KA HRE RENG ASIN by Lalthantluanga Chawngthu. P.111-132



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)