SANGHAL BENGVERH By - Hriata Tea

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

SANGHAL BENGVERH By - Hriata Tea

Unread post by Ngaia » March 7th, 2019, 8:58 pm

(Nui la, hlau la. I duh leh i țap thei ang.)
He thil hi atak, atak a thleng leh awm ngei ani a. Mahse, angaihnawm zawk nan, tlem azawng belhin, ka rawn thai lang ve mai mai ange. Alo reive ta fû mai a, ka hrechiang em em tawh lo bawk nen, apawm dan minlo thiam sak mai aniang chu.

A kum tak hriatloh kal ta ah khan, rawlthar nun tem chho tantir, harhvang leh zuanzang tak nun nei a, thaza em em reng mai ka nih lai hun kha ani a. Hunawl apianga ramvah leh luikal ringawt ngawl kan vei lai kha ani tih erawh kawmthlangpa zurui âng thawm aiin kala hrechiang. Tun thleng hian kha sanghal chiau thawm leh aruangâm sei tak kha kala mitthla thei bawk.
.
Ka feh haw, khawlai dunga ka thingput ka kô ka thlãk zo chiah chu, ka hnunglam ațang ka thingput rawn pawt bet tlat tu chu en a, kava hawi phei nak chuan, țhianpa zâwn-a, lo nui keh so chu kava hmu a, manilo maha rit katih tehreng nen, ka hlothlo kâwng kham bawk nen, a hâ sen tak, zirlai leh office hnathawk te tana calendar țhami atana duhawm fahran chu, chhawn let a, han thup mawisak turin, kaha var rual nalhzet chuan ka dêt let peih vel lo a. Inthlahrung leh hnuhnawh ang hrimin, min han nuih tlawn hauh hauh phawt a. kuhva ro khawr khat min han țheh zui takah chuan, keipawh ka mihlim lam rûi nuih ve ta var var a.
Lo lam chanchin te sawi a, inlampana kan inchhawm haw pah chuan, ka thingput lai pawh min chhawk zui ta zel a. In thlenga min zui haw hnuah, zanriah eiturin min țin san ve ta ani.

Kalpaha athu min hrilh chuan, ka rilru aluah khat vek tawh a. Zanriah eilaiin, ka chhungte hnenah athu phunga ka sawi zuai zuai hnu chuan, thianpa zawn-a te lo lama sa chan chu ka dil zui puat a. Tuman pip e, pup e, ti ta lemlo chu, an remti ni hmiang kati mai. Remti lo mahse, zingkarah ka chhuak ru leh dâw daw dawn tih an hriatsa vang pawh ani maithei.

Zing chaw eikham a, kawtkai atanga thianpa in min rawn koh dûar duar chuan, kalo inpeih at tawh a. Mahse ka eih duh lêmlo, rawn lut tur tho si hian, min rawn ko hmasa duar duar ziah mai a, ka hrilh ngun viau nachungin, asim duh reng renglo. thingpui hâng te kan in zawh leh te te hnuah, silai nen kan in ak chhuak ta zan zan a. A'ni LOneihna ve hi chu, a bing a, aneih avangin, kawngpui dung zawh char char angai a. An thingzai thinna lam ramril takah, thingzai pah fâwmin țin khat hmun vel aneive mai mai lek ani.
A hlat chu thuhran, fehkawng pangngai ni mawlh heklo, ngahnge maw hetiang tur tih hriatlawk nachang kalo hriatloh chu âw,,kati rilru vang vang mai. Zuhrêi kawng ang mai a, tawn kuak chawp ngai lo awm thin nen, chaihte kawng ang mai a, kawngfai leh zau tha kalo beisei chu ka â hlum lo chauh alo ni. Ramvah kawng ang maia kan inpal hrep hnuah, a thlawh lai fai chu, kan vâu chhuah hlawl mai a, ka chau hman ngei mai, thlawhlai erawh ka rinaiin alo bei fai ve phian. Buh pawh atha in, nghawng an thleng hmawk mai. Thlam kan han thleng chu le,, duhthusam vawithum aipawn a hnawk zawk, hah ava han ti damlo tehlul em. Pamal thlam hetiang hian a hnawk thei ang tih ngaihna ka hrephak lo.

Khawiah hian nge i mut thin, kan ti ngawt a. Nuih suk pahin, mipa fa chu khawiah pawh amut theih zel mai ati lek a. Thlam hnuaiah khuan in nghat zawk ila athalo maw kan ti êl a. Namthlak chu ka hawng e, kati rawk a atla tlang daih leh nghal, thlam kawngka awmlo kha chu kala hrethiam thei hram hram a. Bathlar thlawk thla daih pawh kala pawm zam thei. Mahse thlam chung, azahve chauh mau hnah leh hnahthial chih pawlh, chu pawh la langtlang thei rêi rûai leh nghal, van hahthlak zozai tak em. Hepa tak hi chu aw,, bang erawh a chep thlap a, perek ngatin, leihka nen, a kilh vei thlap thung si. Rapchung aneilo a, kawngkaah hnahkhar leh fah tuai ro, thlam chhunglamah a hawlh lut lawr fur mai a, chu chu tuah chawpin atan mai thin niin alang. Hmunphiah ka hmuzo heklo. Hmu ngat ila akunga la țo ang mai anni ngei ang, a thlam chhuat chu, han en mai chuan, enge aphah ahriatloh, lei aring ti dawn ila, kan lawn kang ve ngei bawk si, rah zawnga ari atang leh su deuh atang chuan, dâp ani tih erawh ka hrethei a. Mahse, eng mau nge tih hre turin, atak a hmuh theih loh. Aw,, thlâm khawngaih thlak ava ni tehlul em. A neitu hian a phûr dan azirin athen asiam țha a, ațhen erawh asiam phûr em emlo ani ngei ang, sawisel sak a, phun khum dawn chuan, ka hmui hi, ar mawng ang mai a, a fit țhat angai ngei ang. Lo kal lo tawp ila, hêi hâ, hûi ha ka tawng lo tur.
riahbuk thar sak mai nge tha anga, thlam tihfai beihpui hi thlak tha ang. Asak țan atang a hnuhma leh hnawmhnawk reng reng amah ti nâ emaw ti buaitu lo chu, a thianin apaih lo hrim hrim aniang. Sanghal chang tu tur te hi, sanghal bu ah kan riak dawn ani ber e, favang ruah asur loh hram beisei ila, țawngțaina in bawhzui bawk ila. Mutna tur chu, vâu a mau pû ila, bangkil ring hian, dawhkang mai ila, chênna hmun azira ka insiam rem ve mai angai ani tiin, ka in ngaihtuah thawveng chawp ve ta hram hram a.Engkim mai hi a awlsam thei ang berin a duh niin ka hria, tui pawh thlâm chhungah ala lut a, kawngka thlanglam tlem rek âwngin akhawh chhuahna asiam leh mai a, abul velah chuan, buhtlei sawmhnih vel tur leh fian pariat vel hi, an let pheng phunga. Silfai zel ai chuan, athar sui mai chu, nuam tih chang anei ani ngei ang. Khai aw!!!, kalo hmuh hmaih țep alwm, a buh tlei hi asil ngai awzawng lo mai, tap sir kangka chhaklam bangah chuan, buhtlei paruk lai pawn lamah alo la in hawlh lawr alawm le, hei hian buhtlei chu, dâp karah hawlh chhuakin a pawt dawk tawn vel mai thin tih, bang dâp a buh mal kai tuarh chuan ati lang chiang leh zual ani. A thlâm sak dan han en vang vang hian, hetiang ang chu sawi loh, a ang leklek thei tur hi sa dawn pawh ni ila, beih fe angai ang.

E,,khai!!!, thlâm ringawt kalo buaipui a, sanghal kalo theihnghilh țep alawm le, min sawm chhan kha, he a lo a chhuak thin nghalmal hi a chân chhuah theih loh thu leh thawm mak tak a chhuah thin dan te, a hnû(hniak) len zia te min hrilh kha ani a, ani ang pa ngaihsam, thu uar silo takin, asawi danah ka chang ve chak tum hrangin, ka zui lutve kha ani a. Mau phel bân chen vel hmanga thlam chhuat ka hui fai thuak thuak hnu ah, lungthlu zân lo leh rilru chhungril tûm vuau chungin, a thingpui lum chu, ka'n dawm sak ve a. Hei a bêl te i silfai meuh maw, kan ti hram a, fai ve lim liam e tihpah chuan anui huk huk a, ka chetdan hi i lawm vaklo tih ka hria alawm, tun min hmuhpui ngai heklo, ka thingzai puipa lah keiaia che țawp alo ni bawk nen, ka tal vel ta mai mai anih hi, nang nen chuan, ahma angin ka che bik hauhlo ang, ati ve duam duam a. Nia hetiang em em tur hi chuan ka ring biklo reng ani, burma mi aruai ve fo bawk nen, an tâl talin atal tir ani ngei ang.

Thingpui inpaha ram vel kan thlir pah chuan, a buh tlim hmur mai leh, êng țan uau uau tawh chu ka thlir vang vang a, thlifimin an chhem fawn chhawk nghawlh dial dial mai te chuan, kei rawlthar tuaitir thawveng tak rilru pawh, ati lungleng veng veng thei hial mai, lui ruam leh tlangdung lang ruih mai, romei zam la chhah lo takin, abawm pawt chiai te chu ka thlir vang vang a, chawhnu lam ni dûl rîai maiin, tlangdung pangper a, thing leh mau hnah an chhun tle ser ser mai chuan minti lungno zo a. Lung di ngaia kiu ruai ruai rual lek mah ni ila, ngaih veng veng tur neive talo chu, heram mawina hian, khawtlang lunglenna lamah min hruai lut in, min vel lo chauh ani tak si ale, sava han hram lauh lauh leh, lalruanga se hnawt thlawk duai duai te chu, ka mit ti tlai tu anni. Ramril leh reh tlawk tlawk tur chu, sava hram leh mau puak ri ten an áwi nung a, ka bengah chuan woofer thum nalh takin, rimawi apek chhuah aiin amawi lo biklo, ka thinlung leh rilru hlimna bakah, thlamuanna minla pe tel lehzel bawk si, tum loh deuh a, țah hluam hluam mai pawh ka mawh lo e.

Engtizia veng veng nge, ti a, thianpa min rawn biak na chuan, min ti phuzawk a, enge ni tih hau pah chuan, kan melh phâwk hrû a, chhuah vah itum lo emni, kawr ral lehlama sakhi hûk chu i hreve lo emni, i duh leh va pel ta che, thlâm hi kalo singsa ange, sava zanriak kah tur pawh, saw tlangdung pangper chhuahchhawng thingno hmunah sawn anan tam ang, i peih leh zanah i rawn zawng haw dawn nia, mahse dâm mual saw chu va hrût hauh suh ati a, ti nge kan ti vat a, ti lêm mah, ram chhia anih saw, engmah kah tur a awmlo ati hmuk a. Hei ka lo mawng tlangdung thla ah hian, thingzai kawng ka sial thla a, chu chu zawh thla la, luite i zuk pawh anga, luite chu chhuk zawngin zawh thla zel la, herhse ril lui vâng zawnga lo inkham i zuk hmu anga, perkaiin, aler lam i zawh anga, saw tlangdung mawng ah sawn i lawn chho chiah anga, tlangdung zelah chho char char la, hmun zawl i han thlen hunah, i dinglamah thingkhawilu lian tak alo ding anga chulama i phei chuan, a pangperah, tawtaw kung a awm a, saza leh sakhi in an tlân viau thin, chulama i kal duh loh chuan, hmun zawl veilamah chhoh hretin, sunhlu kung a awm ve bawk a, mahse, kung li lai anhlat tak takin a ding roh a, chân a buai duh viau, țhangtê pawh ka dawh sa thlap ve ve tho a, i duhna zawk zawk ani mai, hei khua atlai lam tawh a, hmun dang chu vak lo mai rawh. I bo reu reu ange, ka rawn zawng peih hauhlo che ania ati zui zat a. Min hrilh chiang fek fawk bawk a, ka bo lo turah ngai ang kati vat a. I rawn haw pah duh chuan, sunhlu kung awmna mualdung zingzum kha rawn zawh thla la, dâm mual saw, dinglamah zel kal helin kawng tlangpui ka sat thuak thuak a, thingtuai kawngdung zawnga tlu zel zawhin, thingno hmun saw i rawn lut anga, vahrit leh ramar kah tur chu, kawr ruam lampan thlak pahin, i zawng thla tawh mai dawn ani, i luite zawhthlak i zuk pawh anga, i rawn haw ve thei mai ang ati leh a.

A chiang tawk viau e, ramchin hrelo tan pawh bo na tur a awmloh chu kati a, phurzetin ka thawkchhuak ta a, thlâm nam thlak atanga mi rawn auh pah chuan, dâm mual saw lut lo turin fimkhur viau ang che, eng thawm pawh hria la, engahmah ngai suh aw, ka kawngsial kha, a bel lemlo nâ a, i enchian chuan i hre thei tho ang, bawng note ang mai a, zuang lim thet thet lo in, i kalna tur enchiang ang che, ka thing sahin a tlukna lam zel zawh tur anih kha arawn ti zui lawm lawma,

A sawi ang leh sawina zel zawh chuan tlangdung hmunzawl chu ka han chuang chhuak a, thingkhawilu kung lam chu ka pan phei a, mihring hnuhma awm ang zel chu ka rap phei ve zel a, hnuailam bih a ka kal mawlh mawlh lai chuan, saza han khek tuarh ri chuan, minti ding chawt a, tawitaw kung hnuaiah kalo awm reng tawh niin, ka khaw hawi loh luatah, saza kati tlan chu ani der mai. Hnuhma dang kan bih kual vel a, sakhi hnu chu ațhing tawh hlawm viau mai si a, a hnuthar neitu saza lah kati tlan tawh bawk nen, sunhlu awmna lam pan zai ka rel ta thung a.

Tlailam darthum ai chuan a hma tawh hauhlo ang le, sunhlu awmna lam chu, ka pan chho zel a, ram chang tha tih takah, mâu te chu chawnpuar tiat tiat anni hial awm e, kan khaw țhenawm ram ani a, khawte tih takah an bawh hneh lo in, an daidar lo bawk a, ngaw tha tak anih phah reng ani.

Fimkhur takin ka kal ve zel a, ngaw chhung dâi ruih leh thim deuh khung chu, areh tlawk tlawk kher bawk a, ka hnahro rahrik te chu, ka hrechiang kher mai, chunglama ni zung rawn lut pawh a dul raih tawh mai a, nî atla trep ani tih ka hriat phah a. Ka rinaia sunhlu kung ka hmuh har avangin, fimkhur angai zuala kati tlan leh ang tih mawlh ka hlau ani. Ni tlak rual hian sakhi te hi chu, an chhuak mai țhin si a, nitlak hmain ka țhu hmanlo ang tih ka hlau bawk nen, ka hmanhmawh ru et et tawh ani.

Kung khat chu ka hmu ta, mahse țhangte ka hmu zolo, hnuhma kan bih lawr a, hei chu, atlan ngai lemlo tlat, akalpah zeuh zeuh chauh niin alang. Khua lah atlai tawh angreng si, kûng dang zawngin ka kal leh zel a. Khawi berah nge asiama, akhawing atlan ber kalo zawt lo chu pawi tak ani.Rinloh takin ka hmu ta hlawl mai, khua atlai tawh nen, hnuhma pawh bih zui ta lemlo chuan, țhangte dawhna lam chu ka pan phei a, nî pawh atla felfai viau tawh tih hriat takin, ngaw chhung chu athim deuh khup tawh a, chunglam erawh, vanvar chhanah ala êng tha viau thung, țhangte a dawhna chu, lûngkhûp kung thum ding thiang ah ani a, alawn nawm nan rahbi ah thingtuau khamin, a țawnbet chho thliah thliah a, rahbi chu vuanin chunglam ka han enchho zai zai a, khai aw!!! Țhangte ah chuan palian zet, dum ren run, hmul dur mai hian, mitmeng bial kulin mirawn chhuk bih vung vung mai chu niin, ka phu nasa bawk a, ka tawlh let rang kher mai, ka âu chhuak lo chu mak tak ani. Ka tawlh let dawrh chu, ka inpal tlu țep a, ka pai deuh khat khat, kan din ngil leh hnu a, ka han en leh chuan, ka hmu ta hauh lo. Nichin khan ka hmu chiang hle si, ka pang mûr uaih uaih leh, ka tiril khur pawh ala reh hauhlo. Kan hawikual vel pawn engmah ka hmulo, thawm takngial pawh hriatzui tur a awm heklo. Mitkhap kar lek chhunga lo bo leh ta mai si chu, ka mitvai anih ka ring ta ber a. Ka hmuh sual mai mai ani ange tiin, ka hnaih phei leh a, ka lawn chho zui ta nghal a, a hla atang pawn engmah ka hmu silo a, ka lawn dawn veleh a, ka han hmuh tak thut avangin, ka hmuh sual anih karing ta ber a, ka awm erawh anuam hran hauhlo, ka phûrna leh thatho na te pawh azuai rawih mai. Kan lawn thlen takah chuan, ka ngaihbel vang nge, țhutna hnu ang mai a, lum deuh ther ther hian ka hre tlat leh nghal a. Ka bul velah chuan enge maw tak awmve dang hi, an awm tlat hian ka hre leh nghal, ka thla amuang thei tawhlo, ka mawng lah chu hlauh vangin, aza ang chuaih chuaih a, chhuk vat a, haw nal nal ka duh rualin, ka chhuk hreh viau lawi si, ka mawnglam atang min rawn dâwm chho tur awm ang hian ka hre tlat mai a. Ka țhu țha ngamlo a, ka chhuk hreh bawk. Mahse, nuam tilo leh hlau hlau chung chunga țhut reng ai chuan, hrehzetin mawngtam za chuaih chuaihin ka chhuk ta a, hmanhmawh zetin chu hmun chu ka kal hlatsan ta vang vang mai ani.

Hlauh vanga khur deuh dar dar chung chuan, ka kal hlawk hlawk a, khua pawh ngawchhungah chuan, athim khup tawh mai. Ka hmehên chu phawrhin thianpa zawn-a sawi lam kawng chu ka zawng kual zung zunga. Khawthim tawh nen, light êng hmang ringawt chuan, zawn hmuh aharin, mihring sulhnu leh hnûlo thliar hran ahar duh kher mai. Hlauh nen hmanhmawh nen ka fâwm a, ka chi'ai zo tawh ani ber. Hlauh tawh sa naklaiin ka thlang lawk kawrte ruamah atang chuan, patling râwl diktak hi arawn kûk ruah ruah mai a, ngawchhung thinghnah te chu an ri sung sung a, thli erawh a thaw hauh silo. Ka hnunglam chu hawlet ka chak viau na a, ka duhloh zawng tak kava chhun êng fuh ang tih ka hlau bawk si, ka thlang deuh atang chuan, thianpa zawn'an mi rawn ko ta lauh lauh a. Ka thlamuang nghal huai huai mai, phûr leh thatho takin ka pan thla nghal buan buan a, ka rin ang a ka zuk hmuh lawk siloh avangin, khawnge maw a awm roh chu aw,, min tih țhaih atum emmi zawk le, ti a ka ngaihtuah rauh rauh lai chuan, ka sirlam atang mi rawn ko leh lauh a, rangzeta lo êih loh pah chuan, ka pan phei zui nghal a, phun ri mawlh mawlh ka hriat zui takah chuan, tunge maw lo kalve le, zualko an rawn kal ta mai emni dawn. Ka chhungte damlo hnaivai an awm ka hre bawk silo. Mahse, phunri chu ka pawh thei ta hauhlo mai, ka hma lawkah chuan, ka hnaih dan zulzuiin an phun hlave zel si, ka mangang țan leh ta. Ka thianpa chu kan au vak a, ka hnunglam, ka kalsan hnu lam atang chuan arawn eih loh a, khawnge i awm kan ti zui hram a, areh ta vang vang mai. Ehe,,hê,, rammi lek ani maw,, minlo hruai kual fe tawh zuk ni a, thianpa khan min chah mawlh mawlh kha ani si a, ka dawihzep luatah ka bo thui phahin, ka hah phah hrep anih tak ber hi.
Ka kalna hnu chu chhuiletin, rilru fimtak nen thianpa sawi lam kawng zawng tur chuan ka let leh ta a, ka rinaiin kalo kal thui hman hrep leh nghal, hlauna avanga hmanhmawh phelenga kal kha kani bawk a, a awm viau e. Ka hnuhma erawh a pêt hen hûn avangin, chhuilet anuam viau thung. Thianpa min nuihzat tur dâwn ngam heklo le. Ka huaisenna sawmkhawmin, sunhlu kung bul thleng chu ka han let leh a. Chuta țang chuan thianpa kawng ruh hlui chu ka zawnga, ka hmuh fuh takag chuan, thlamuang takin ka zawh ta ani. A hma a ka hlauhna leh manganna te khan, engtiklaiin nge min kiansan ka hre hauhlo. Ka han let leh atang khan hlauhna reng reng ka nei ta hauhlo niin ka hre ber.

Thiankawng lo zawn sa chu zawh zelin, thingno hmun chu ka chuang chhuaka, kawr ruam lam pan thlak pah chuan, sava zanriak chu ka zawng thla zui ta ani. A nuam duh kher asin, daihnaia tuak khat lek lek a, riak dun ka kah thin ang kha ni heklo. Sawm rual vel lai te anlo fu khawm thin a, an riahna hlun tih hriat zetin, hnuailama an êk te chu, a chek siam nana rih hlawih hlawih theih tur ani hlawm. Vawili kah ah, pasarih ngawt ka hawn thei hial ani. Ka duhtawk hnuah pawh kala hmu thla nual mai. Mahse hlawhtling thawkhata ka inhriat avangin, ka kap duh ta hlawm lo ani. Ramar pahnih leh vahrit panga chu, arit ve phian mai, sakhi pumkhat ai chuan, asa pawh atam zawk hial maithei ani. Sa chhiah anneive silo a.
Thlam ka'n thleng chu, alo thim reh țhap mai a, tapah thingthunung alo in mût khu ling vât vât a, kan thâi dûr a, thingdang rawlh belhin, kan chhawm nunga, mei engah thlâm chhung kan hmu chiang chu, ka mit ka nuai rang kher mai, mahse ka mitvai ani hauhlo, ka thianpa zawn-a leh a thlâm hi an piangthar chiang hle mai. Heti chuan hah pawh adam sawng sawng mai alawm. Chunglam pawh changel hnah alo chih thlap mai. Ani ang palian leh chak tan chuan, hetiang han tih hi thil har anilo reng ani.

Thingpui hâng dawm a, kalo țhut veng veng lai chuan, thlam châr lam atang thianpa zawn-a chu, arawn hêihá dap dap a. Leihka arawn rahrik rual chuan, ilo haw tawh maw, enge i rawn an a,, arawn ti lut a. Thlâm chhuata vahrit leh ramar kalo dah thal phung chu, an hmu a. Ekhai!!! kha,, iva rawn hlawhtling ve, hei keipawh keimaha lo țhut sen reng ka peih silo a, vâu sir luite saw kava chhit e katia, mahse chakai inhai vur a hun țan tawh bawk a, an vang phian mai, hmeh khawp chang chang chu ka man hram ani. Khâwinge, zinglamah sa hmeh tur a awm tawh tho bawk a, chakai hi kan siam nghal ange, an thau hlawm ngawt ang ati a, a che nghal seuh seuh a. Khai aw,, chaw ilo la ei na nge kan ti hû a. Ei nang ka ril pawh ala țam hleinem keichu, man tur an vang sia, ka khawrh pah e katia, âite ho chu a helin ka ei nghal zel a, i rițam tawh zawk ngawt lawmni, chhun chaw kan ei mang silo a, antih takah chuan, ka pum arawn ri ruih ruih a, chhan angai hranlo. Keipawn ka rilțam zia ka hre chiah. Nuih kur kur pahin, i țam tawh hle mai maw, lungngai suh a hmin vat ang, bai chu ka siam tho na a, chakai hi, han khawi vel abuaithlak sia, ilo tuar hram hram aniang chu, keichu âite puarin ka puar ati zui mawlh mawlh a.

Ani reng tak ang hepa hi zawng, âite leh balung hi khawrhpui chi anilo hrim hrim, a puar khawp a ei hma chuan, khawl thei țhak heklo. Aite phei chu, kawi tiah dawn thleng hian, a hel ei hmiah hmiah zel mai a, balung phei chu, ka khawrhpui duh tawhlo hrim hrim, ka eive duhlo na a, khawrh hmasak apiang alo bâr ru a, an vak chhuak aniang ati theuh zel bawk si. Rul te hi ka hmuh pawn ka hrilh duhlo reng reng, alen leh tet asawi lo. Nawalh aneih a, mei a chhem theih phawt chuan, a hem hmin hman lo reng reng, arawh lum puat puat a, a ei mai zel ani. A vun lih nan chem a mamawh heklo, a kuhva țhial lai leh lai lo asawi heklo, a hâ ngatin, aseh thler a, apawt lip zur zur a, mau phel emaw thing țang ahmuh hmasak sakah avet ang nawk nawk a, arawh hmingpu tawkin a hliau zuai zuai a, apet zui chawt châwt mai ani. A hel hian a eilo chauh ani ber e. Kei lah hian kan ten laileng khawpa, athi tawh hnu pawh hi ka khawih duhlo hrim hrim. Mahse, pațha tih takah, ka duhlo tih ahriat avang hian, amah zawk hi, a inthiarfihlim mai țhin.

E,, taka. Enge sanghal chu, alo chhuak leh tawh em, i thlithlai hman emaw chu,, kan ti a. Vau ah chuan kan hrût kual thuak thuak a, hmun hnih laiah chhuahna dang alo hreuh leh tawh alawm, saw chârlam mualmawnga ka pangbal chin phei saw chu, amam lo chauh tawh mawle, tlawhlai bal pawh a nawr nual in karing. Lo lu lam pangbal erawh khi chu ala him pial thung. A chet dan hi amakin, a chimawm teh ania, a chânna erawh ka siam hman talo. Ka siam sa lamah khian, vawikhat chu alo chhuak leh tawh anih hmel a, naktuk lamah kan siam belh mai aniang chu, khawchhungahah ka thlâm chanchin i sawi ka hlau sia, chawhnu pumpui mai kha, thlam singsa reng rengin ka buai tluan zak alawm. A chung pawh dai in min far itih loh nan, changel ka chih thlap ania, khua ah kamtam awihloh kan ti aniang chu, anti zui zat a. Chu zawng ka thu i awih leh awihloh ah a in nghat ang kan ti ve salh a.

Chakai chhum a hmin rualin chawei kan siama. zopa chawthleng kan han phah a, chaw kan ham khawrh thûr mai a, alai chawk kua in, bawkbawn no leh samtawk, chingit, satinrem hnahno leh bepui, behlawi rah leh chi dangte, hmarchapui zaibun hmawk hmawk nen a, bai pawlh chu kan han bun a, chakai hrawl fe fe, thianpa hel ei ngamloh chin țhah chuan kan han hual zui leh a, zokhaw tlangval dangchar leh pumpui thep in, duhtawka kan han lim tak tak mai chu, chawei mawi lam kan ngaihtuahlo. Kan kut kan ti muke an țe țaw a, kâ lama bar luh rualin, ei leh tur chawhmeh lam kan melh pah a, kan bar luh zawng pawh atam vei nen, chawbarna kut awl kan ngaithei lo, tinreng bai pawlh chu kan han sawk zui zat a kâ lamah bawk kan thawn lut leh a, chakai tui hâng kan han hawp ri zui thlurh thlurh a. Chakai te mai mai hi zawng ksn han ei hnehsawh khawp a, kan chaw bar hi ati buai phalo hrim hrim, a kawmkawraw kan zuh fai lêu tawh hnu pawh, chaw kan han hnawh lut leh, kan kawm fai leh kelh țhin ani. Chakai kawmkawraw kan tâl ani ber ang chu. Ka puar kan tih hnuah pawh chaw hmuam țunin kan tho a, kutsil pahin kan țhial nuau nuau a. Tuisik kan han in zui leh țeuh a, zokhawpa dul hi, kiar linlen lo rual alo ni hleinem, kã in aduh apiang leh duh chhung chu kan maih lut miah miah zel tlat. Mahse, keichu a kiarve lo hlauh mai pawh a. keini mirethei chaw heh hi zawng, hmeh apiang puar pui thei mah ila, pumpui lamin zawh loh chang alo nei bawk nen. Pawi țhin ber erawh chu, harsat lai leh chaw heh lai a in nang țhin hi ani.

Ka sava kah te chu puah pahin, ka kal dan chanchin leh ka thiltawn te chu, ka hrilh mawlh mawlh a. Nuih rûh rûh pah chuan, ka hrilh lawk reng che alawm. Chânna ka siam thu ka hrilh ringawt che a, ka kah tawh thu ka sawitel reng reng hleinem. Keiaiin i huai zawk anih chu, keichu țhangte ka siam hnu atang khian kala lawn leh reng reng hleinem, chân tum a ka han kal apiangin, milo țhut khalh ziah asin. Ka han vak kual a, kah tur ka hmuh loh chuan ka haw leh mai zel, dâm mual phei khi chu, anasa bik leh nghal a, zana kawngbo chuan, tlaivara bo ani mai. In zawn ngaihna a awmlo. I lut thuk hmanlo hlauha i vannei anih chu, ka thingzai pu a, ka chhawr pakhat pawh ka ramvak chak ati reng a, ka silai nen a han inhawl chhuak ve a, a bo ta mai a, arawn au vau vau ri chu, kan ral hriat ruai ruai a, a light engin van lam arawn chhun chang chuan a awmna kan hrethei a, a kual akual mai ani. A țhianten han hruai an tum a, ka hriatchian tawh avangin, kal duh suh u, in inhmu thei chuanglo ang, zingah arawn haw thei mai ang katih pawn an kal lui țalh a, anni pawh an han bo zuive ta mai réng a, bathlar atang hian ka thlir reng a, an in ko thawm leh, an light êng te pawh ka hmu in, ka hre thei, an êng atang phei chuan, an awm ho emaw tihtur ani thin a, mahse zankhuain, an in zawng tlaivar zak mai asin. Zingah an in hmu thei hram a, an rawn hawpui ta a, a khua asik nasa mai a, an hawpui zui ta ani. Ka sawm leh pawh aduh tawhlo reng reng, khawlaiah te thleng hian, min hel phah nia mawle, asim chiang ve khawp mai ati ta a. Kan ti ti mawlh mawlh lai chuan, leimin nasa tak ang mai hian, arawn ri hum hum mai a, chuu,, dâm mual anih chu, tiang sawn zanlamah hi chuan, thawm chi hrang hrang a chhuah reng mai ania, a changin an in au leh lung lung țhin a, kuk luah luah tawk te phei hi chu, an awm reng. In riak rei deuh anga ngaiah inei vat mai ang atih zawm zat a. Puah zawh hmasak kan chhum pawh, kan inpeih meuh chuan, alo hmin țhelh tawh a. Zan alo rei(tlai) viau tawh mai. Sabel chu Tui leih belhin kan thuk riah a, kan mutsan zui ve ta nghal a.

Zing nichhuah hnu in, thianpa thawmah phak fe in ka harh ve chauh a. Zanlam kan mengrei nen, hnathawk tura riak kan ni lêm silo a, thawh hai pawh awl tak ani. Hetianga ramriah pui hi, thianpa hi zawng anuam țhin reng ani. zinglamah hi chuan min awl tluan parh reng țhin. Tlailam erawh ka chanah ka dahve thunga, chawhmeh siam te hi athiam roh a, changel zikno te hi, tuizetin a kang thiama. Mahse, hlothlawh laia bawkbawn chhum ha'n ringawt min hmehpui țhin kha chu, kei thawhhlawt chawei tuiloh nei ngai miahlo pawh hian, ei har chu kati ve deuh țhin. pum chhum si, atui te kha, ahãng thei phian leh nghal a. A changel zik kan ka eitui em avanga, kalo kan ve kha, atui ta reng renglo mai a, mak katih thu ka sawi lai a, nui vur vur chunga, a hmeh han ken ruk a rawn phawrh lai hmel ka ngei zia kha aw,, bawkbawn pum thlenga alo chhum han thiamna thuruk kha, ka duh hauh loh hmeh han alo ni sia. Kartluana, rawng ka bawl zui phah takna pawh, hmeh han vang tho.

Tukțhuan kan eikham fel chuan, sa channa siam turin kan thawkchhuak ta a, ngawihteh țhianpa hetiang khawpa sanghal fing si chu, kan thawm leh mei rim te avang hian, arawn chhuah duhloh phah mai lawng maw,,.. Duhloh phah lo tawp ang, a fin vang hian angam viau zawk asin. Vengtu anei alawm. Chuvang chu anis, kan pahniha chãn ka duh nachhan. Kan bum theih hlauh chuan, tu emaw zawk zawk chuan kan kap thei em em ang ati a. A lo, chu kan fang kual vel a, a buh țhat dan atang chuan, khamkhawp deuhthaw chu, ținkhat hmun țha vel lekah chuan, athar mai awm e, a hmin țan lek lek tawh leh nghal a, engtia sanghal hian, khawih miahlo nge maw anih zawk aw, kati rilru vang vang a.

A lo chhuahna khân, kan duhlai tak ve ve ah, țhangtê kan dawh a, mau hmanga siam zawng, chetvel zawngin thawm a chhuah duh emai tiin, thingtuai kher satin, ka lâ a, lo chhûngah pawh ka siam duh bawk heklo. Vau hrula zairum kung chawr buk thazet chu țan chhanin, a kâkpuiah țhuthmun rem zet ka dawh a, zun bur tur nen ka chhawp sa thlap a, țhianpa lah chuan riahchilh i tum emni, alo ti hmanhmawh a. Tum lêm nang, lungmuanga țhut theih ka duh alawm, pa thianga ang mai a, sachangtu zawk zâwn haw ngaia ka awmloh nan kati ani. Nangpawh i thilsiam kha uluk viau ang che, i tlâk vaih chuan ka paw haw peih miahlo che ania kan ti zui zat a.

Chhûn chaw kan fâk zawh chuan, thingtuah tur kan fawm khawl a. Sava te chu kan ur tha sauh sauh a, tlailamah chuan, thâwm chhuah tamlo thei ang ber turin kan che vel thei ta ani. Hetia kan chân chhuah theih loh chuan, a khânpui zawnga a hnu chhuiletin, a khânpui ah ngei chân ka rilruk rauh rauh ani. Nghalmal fing tak tak hi chuan, an chhuahna tur 'lo' hi ralkhat atang an thlir lawk țhin a. vau bul lawkah te awmin, thawm an ngaithla a, khawthim dawn thlenga mihring thawm an hriat chuan an chhuak duh țhin lo ani. Hetiang nghalmal fing hi chu, a khânpuiah chân khalh atha tih ka hreve tawh tlat. hma taka chân angai thunga, khawthim hma pawn a kah theih hial țhin ani.

Zanriah chu, vahrit chhum hân nen kan han ei a, kan sakah sa te hi, anih ngawt loh chuan, chawlhni tuka sa hmeh tihvel hi, kan tan chuan thil thleng zen zen lo. A thlen chang pawh kan hriat fumfe tawhloh kha ani a. Țhenawmte sa rim nena sunday tuk lo hmang liam ve mai mai țhin tan chuan, vahrit sâ chu, satui ni lemlo mahse, râwp ana ve hrim hrim hi chu thuhran, mâian bai nen pawh thlán hluama chawei țhin tan chuan, a man hla in chawei atui takzet ani. Mi hausa te angin, tuktin zantin mai sa han hmeh ve phei ila, kawpuar a kan vial ngawl ngawl loh vêk pawn, pumpui chaklo buai in kan buai kumtluan thei ang chu mawle. Duhtawk tak meuha chaw kan han eipuar meuh chuan, țhut har mut har khawpin pum apuar pung tawh mai. Țhut har khawpa puar si chuan thingpui hâng kan la han in zui leh a. zial kan han zuk leh vang vang hnu chuan, khua pawh a thim țep tawh a. Tichuan mahni chân hmun tur ve ve panin kan inpu chhuak ta ani.Keiin lo mawng lam vau hrulah ka châng a, thianpa erawh ka chhaklam vau sirah, buh tuh lohna chin, vau sir mâi tuhna chin fai laiah, ama dawh chawp țhangtë ah a țhu thim map chu ka han hmu thei a, ani erawh chuan ka awmna zairum kung buk tak bak chu arawn hmu thei hauhlo ang. a kung hi vau chhung daih a awm ani a, lawn tur chuan, vau chhungah pênsawm vel lai luh thlak angai a, ka țhuthmun chuan lo mawng chung hretah ahan zawl chiah thunga, ka awmna ațang chuan lo mawnglam pumpui chu, alang thei vek deuhthaw ani.

Khua pawh athim chiang viau tawh a, thianpa pawh ka hmu thei tawhlo. A awmna lai awm ang vel erawh ka hre thei rêirûai a, zan dar sarih vel ani tawh awm e, areh tlawk tlawk kher bawk a, lei hrik leh perhpawng hram ri te chu, aring duh vawl vawl hle mai, ka awmna ralah chuan sakhi a hûk țhat țhat reng a, kawrdungah luiruama tuitu hram dût dût te chu, ka hrechiang thei hle ani. Tuitu hram phei chu, lo hresa lo phei ila, hlauhawm chan chang thei hial khawp amawi ani. Ka rim hriatna chhawrve lemlo mah ila, ka țhutna hnuaia fanghmir vak ri te em an nih loh chuan, sanghal thawm chu ka hrechiang thei hle ang tih ka hria.
Lo lu a, ûngau rawn hram chuan, ka mut rawn chhuak țan riai riai tawh chu, min rawnti harh sawng sawng a. A chhan pawh engdang nilo in, sanghar satliah ûngau thawm ani tlat lo, kêl râl chin tal alian chu ani ngei ang. Keite pangngai pawh ani zawk maithei, ka țhut hmun chu kan siamrem a, ka awmna kung rawn insâwi dar dar avang chuan che zui ngamlo in ka ngaichang a, sa in a pangthak arawn nawt emni aw, tiin ka ngaihtuah vang vang a, hnuailam chu zuk hmuh theih hekloh, light pawn zuk chhun(ên) ila, ka hmu thei dawn chuanglo tih ka hria, ka awmna chu, a nghing nasa tulh tulh a, mak kati ve tulh tulh bawk a, hmeh beh ang mai a, atawp tak chat rual chuan, hmeichhe han phun ser ser ri ka hriat zawm zat a. Reilote ah, insum tih hriat zet hian anui kêr ker bawk a. Ka awm zawng anuam chiahlo deuh tawh a, mahse ka chhak lawkah thianpa a awm tih ka hriatna chuan min muan thlamuan viau. Pakhat chuan hnûk thla ang ti mai hian ka hria a, pakhat in lo țhuve mai mai rawhse, engmah ati thei chuang hleinem tiin ka hre tlat bawk. mahse, ka ngaihruatna bengchhe ri ah ka puh ta zawk a. Ka awm erawh anuam lo tulh tulh thung. Dumdê lah chu, engtiklai atanga lo awm nge pawh ka hriatloh laiin, an han tam em em khawp a. Min zâwn ang tih hlauhawm khawp ani. Khawhawina tur leh hmun dang hmuh theihloh hial khawpin an zi nuaih nuaih mai a, min ên eng thei lek lekin ka hria.

Nuamtilo zeta țhut reng ai chuan ka chhuk mai dawn mi aw,, kati rilru vang vanga, han chhuk thlak pawh chu, ka hreh viau tho. Ka hnuaiah chuan, awm a awm tih hrechiang hle si a. Thianpa hian min rawn ko angem le, nge, a chhuk tawh zawk. Chutiang ringawt ngaihtuaha ka țhut tlawk tlawk lai chuan, min zar tu dumdê vaikianga ka hawi chho chuan, thianpa light ëng ka han hmu a, silai ari nghal țhuai bawk a, chutah ka hnuai ațang chuan, awi kanu, tih thawm hi,chiang em emin arawn ri chhuak a, ka mur nghal chuaih mai. Ka awmna kung chu thlipuiin anuai ta emaw tihturin an sawi zui ta mai ale,hlauhawm tak ani. Kalo siam rinawm hlauha ka tla lo mai mai niin ka hria, kan ral ah chuan, mangan hmel zet zetin, an rawn kuk tak chuah chuah leh nghal a. Ka mangang chu ka au chhuak ve lek lek ani. Chhaklam atanga thianpa in min rawn koh takah chuan, ka eih rangin, ka thlamuang huai huai kher mai.I kap tlu emm,, arawn tih takah chuan, i kap amii,, kan ti ve leh ringawt a. Ka phur viau na a, ka chhuk hreh angreng hle thung, muangchanga chhuk pah chuan, thawm ngaichangin ka beng ka chhi kar a. Eng em thleng lo chuan, vau atang chuan ka chhuak chho a, ka mawnglam erawh aza viau mai. Thlam pawh ka thleng chho rang viau reng ani. Luh pahin i kap ami, a tlu em kan ti lut nghal a, eng a,,?? tih hu pah chuan, i kap ani lawm ni, i light eng ka rawn hmuh khan, i chhuk dawn emaw kati hman a, silai kha ari ta sia, ka hnuailam vau chhung ami te pawh an țe viau asin. I kap ngeiah kalo ngai asin, i țhelh nge atlu lo ami zawk ati he haw a. Kan han sawi dun hnu chuan, a nui hauh hauh mai a, he thil hi amak reuh khawp ania, thil han sawi hi, i awih hreh țhin si a, atak ngeia tawng ve tur che hian ka sawm che ani. Ti teh mutna siam ila, mut chawlh pahin, he hmun a, ka tawn hriat ho ka hrilh dawn che nia, atak ngeiin, vawihnih i tawng ve ta bawk a, ka sawi tur hi, i awih tawh ngei ang ati ta a. Kan thil hriat lo in ang reng si te chu, makti taka ngaihtuah neuh neuh chungin, mutna ka siampui a, sarep vil pahin, kan bawk zal ar ar a. Enge i sawitur hriat chu min han hrilh tawh la, ka ngaithla chak nasa ania kan ti a, chuti maw,, min nuihzat em lo ang chu anti leh hram a, nuihzat lah lo e a,,, kei te chu i hnungzuia, i thlaphêna thlamuang leh inti huai ve mai mai alawm ka nih, arukin ka el ru khiau che ania. Tiin ka rilru diktak kan hrilh a. Nuih kak kak pah chuan, mai mai țhin a, anti hluk a, heti hian asawi zawm ta a.

Thingzaia kan luh kar tir atang tawh khan thawm neuh neuh hi chu kan hre reng a. Lo hi kan vat zui a, anasa ta tulh tulh mai a. Ka thingzaipui pa phei chuan chhuanlam siamin min zuzi san ta vat reng a, midang sawmin, venglaia pa ruata nen khian kan zai dun leh a. Lo ka hal hnu chuan, pa ruata silpaulin (țhelretpuan) zarin, kangvarah buk kan siam a, tuna thlamchar zawlah sawn ani nghe nghe. Chuta țang chuan ania, kan thingzai loh kar lakah thlam pawh hi ka sak ni. Zan thla engah te ban ka phun a, meipui engah mau ka chik bawk țhin. Ban ka phun ațang chuan an rawn huaisar țan hle mai a, zing ka thawh hian, ka ban phun sa te hi, alo inphawi leh vek țhin a, thawm lah engmah kan hre ngai bawk silo. Ka phun lui leh zel a, an peih rei ta biklo aniang, kan buk lamah an rawn țuan zui zela, buk chung leh bang te an rawn zut a, thla en zan phei chuan, țhelretpuan chhanah te hian min rawn bih țhin a. Han chhuak ila, hmuh tur an awm ngai hlei law, pawnlamah hian an phun ang ser ser a. Nuam zawng kan ti lo ve ve tih ka hria, mahse kan inmuan tawna ngaiah kan nei deuh roh tawh a, thlam bang tura ka mau chik sa te hi, thlawh laiah min paih darh sak a, vau chhung a chhar nawlh nawlh chang lah ka ngah. Engemaw ti tî in thlam bang pawh ka pingve ta zel a, mahse zingah abang tah țhiat miah silo hian, thlam chungah te, lo lu ah te, lo mawngah te minlo dahsak țhin a. Zankhat chu ka chau deuh bawk nen, ka thinrim deuh thut chuan ka tâwng ta a, silai nen ka ri lêlû mai ani. Tlam bang chu perek a kilhin ka chep ta thlap a, min țhiah sak talo. Mahse, leihka leh kawngkhar lamah an rawn țuan ve ta thung a. Leika a ka mau phah ho zawng zawng saw anlo tel fel leh ut țhin a, kan phah țha tuktin ringawt mai ani. Zanlaiah te hian, an rawn khâwm ri leh rum rum thin a, mut theih hek loh va en ila, alo ngai thlap lawi si, an khawm rik rum rum hi chuan, an khawih lo a, ri miahlo a anlo khawm vek hi chuan, kan zing tho hi, chhuah fimkhur angai khawp mai, pa ruata zingtho pawh atla hman țep a, a in vuan hman hlauh zawk ani. chuvang chuan leika pawh ka kilhbet leh vek a. Thlam kawngka erawh ka neilo hlen ta anih hi, zana kan chawei lai te, kanlo ti ti mawlh mawlh lai te hian, thlam kawngka an rawn phih khar rawp a, kan lo khâr leh an rawn hawng leh rawp țhin bawk si, min phihthlak sak ngun lutuk a, ka vuah duh talo law law ani. Kawngka awm talo chu, leihka ah hian rawn lawnin, an rawn rap ri phei țek țek a, palian zet zet hi, kawngka ah an rawn dak leh phut mai țhin a, pa ruata ning deuh chuan, an ninawm riau mai, min zuam lutuk dawn, zanin chu, ka chang anga kalo kap khawp ang ati a. Ka mutsan mai a, zanlaiah silai ri in min ti harh hlawl mai a, kan inbeng kang a, thlam thlanga paruata inhrosa thawm ka hriat rual chuan ka tho vat a, rapchunga ka silai dah chu ka ban vat a, kawngka ka chhuah hma chiah chuan, silai ari leh țhuai a, thlawhlai atanga hmeichhe thlabar țe thla vawn vawn ri chuan azui nghal a, thli ro zet hi arawn thaw nghal sung sung a, lei nawi leh hnahtel leng chum chum karah chuan, pa ruata thawm ngaichangin ka chhuak zui ta tho a, areh tak vang vang si avang chuan kan au a, min chhang hauhlo mai, thla rallam la eng riruai ah chuan, thli thaw avanga men har bawk nen, khaw hmuh atawi viau mai, lo mawng lam pana hmeichhe râwl țe thla vawn vawn khan min ti hlau in, ka hmulthi ati ding ar ar mai a, chuvang chuan, lut lehin, ka hmehên kava la a, paruata chu ko lauh lauh chungin ka zawng thla ve ringawt a. Thlam thlanga thingse kung lianpui azar ka thlak vek khu, khûmi ngheng khuan, alo muhil bawrh bawrh mai chu niin, athi emaw kati hman a, ka hlauh a ka hlauhthawn hman zia mai chu, ka thinphu in, ka chhip arawn do pawng zawt zawt maiin ka hria, ka âwm insep nasa lutk khan, min pawt kal thei ni hialin ka hre bawk. kan belchianga alo thaw sâk sák mai chu niin, ka lawmna khan, hremhmun tlak pawh min zuam tir hial ang chu. Kan kaitho a, phâwk zetin arawn harh a, thlam lam apan nghal nul nul a, enge ikah ti a, ka zawh chuan, min chhâng tha duh hauh lo. Mu ang ka mut a chhuak ati vut a, amu ta daih mai, keilah mu tha ngam tawh heklo. Amitmeng leh chezia ah khan hlauh anei tih ka hria a, a khûr deuh dar dar ani tih pawh ka hmu tlat ani. Ani kha kalo thlamuan phahin, ka huaipui hle tih ka hriat phah a, a zâm hmel kan hmuh chiah khan, chu chu ka hrechiang hle ani.Zing rawng ka bawl zawh thleng chuan, ala rawn tho ta reng renglo mai a, kava kai harh chu, a khua alo sik nasa mai niin, damdawi awm ang angte pe in, chaw ka bar sawk sawk a, ka paw haw ta ringawt mai ani. Kawngtluanin, a țawngvai char char a, min rêk leh ang chut chut țhin a, ka hah bawk nen, ka thinrim chuan ka keuh lo chauh thin ani. Damlo na â, ani a, ama rilru anilo tiin, ka insum tluan thei hram a, kar khat zet hnuah arawn harh ve thei chauh ani. Enge a hmuh chu, tun thlengin minla hrilh duhlo. Kumin bak chu, saw ram saw lo ah nei tawh suh minti ringawt a, kan thingzai sa pawh, ama sum leh pai vekin, burma ho kan ruai a, kan put chhuah tir ta vek a, kan zaizawm ta rihlo chu anih hi. Ka burma chhawr hmasak te chu, an han dawih hlawm khawp a, zanlaia an țe ri in min tih harh a, kan hawi chhuah meuh hi chuan, patling țhiau si hi, thlâm bangkilah, mengphâwk zet hian anlo inhnawh khawm leh tût thin a, enge ni, han ti ila, kapu, min lîklâp(rîkrãp)nasa lutuk, tlâm suat atang min lawn sun so anti țial ruai zel mai a, an hlau hmel leh an țawng pai chuan ka nuih ati za ta si a, insum hman lêklo in ka nui nghek mai a, chu chuan ramhuai ho chu, ati thinrim ani teh chêk ang chu, thlãm hnuai atang min rawn nam kang lawp mai a, chumi rual deuhthaw chuan, kutzungțang sei selsâwl hian, thlam chhuat chu, an rawn hlip tawm tâwk mai ah, ka hmuchiang kher bawka, ka dingchhuak rang teh asin, burma ho hlau leh thlabar an han țe tak tak mai chu, hlauhna anti zual hle in ka hria, an țe thawm ang deuh chiahin, vau atang leh thlâm hnuai atang an rawn chhâwn zuivzat a. Țe ngam tawh heklo, an hlau mitmeng leh hmel chuan, ka țah ati chhuak thei hial ani, ka khawngaih hlawm lutuk kha, țahbelh viau ila zawng ka țah phah ngei ngei ang. An men puau a, an țah aw țuau mai ani. A tuk a, kan harh chu, tumah anlo awm tawhlo. khawvar rual rualin anlo haw vek alo nia. Engemaw ti tiin, midang pali ka hmu leh hlauh mai a, chung ho erawh an huai phian mai. An mahni atang khan, dâm mual pawh khi ka hriatchian phah a. An zinga upa ber kha dawi lam thiam ve deuh leh ramhuai chanchin hre tak ani a. A hnen atang khan, thil tamtak la hria in ka zir phah ani. Thingzai pawh anmahni khan, min put zawh sak vek a, dâm muala ka bo vawhnihna ah ani khan thil awmzia min hrilh hre ta a, chuvangin, ka lut leh ngai ta miahlo ani. A thu min râwn te avangin, tun thleng hian he hmunah hian him damin, kala cheng thei niin ka hria, ahnua ka thingzaipui siama kha, pawisak neilo leh, tladah zet mai anive thung a. a awmdan ka zawm avangin, ka thlam pawh i hmuh ang kha ani ta ani. Ti teh zan arei lutuk dawn, mu phawt teh ang, nakzan lamah chuan, kan vannei tawh mahna. Zanin chu min tibuai dawnlo aniang, kan sachang min tibuai tawh a, an duhtawk ani mahna, imu mai teh ang ati ta a.A tûk khua alo var chuan, muangmar in tûkțhuan kan rel a, tihtur dang vak awm heklo. Ti teh, kan sanghal hnu hi, vau ah chhui lut ila, a khânpui i zawng teh ang. Chutah chuan chân khalh ila, atha ang. Pu zika khan, nghalmal fing leh vengtu neite hi chu, finkhalh ve mai tur ti a, asawi dan ang khan tive chhin teh ang, ațhat ka ring tlat tiin kan rawt a. A tha tak ang chu, anachang kalo hre hauh hleinem tiin phûr takin a insiam a. A hnungzuiin vauah kan lut dun ta thân thân a. Thianpa hi zawng hrât khawkhêng ta ngang hi ani a, amah atanga ramvah leh luikal pawh nuam ti a, hratlak ve chhawm chauh ka ni. Ani hi zawng buhfai no hnih nen chauh pawh a, karhnih chuang chuang ramvaka riak bo thei ani tlat. Buhfai awm leh awmloh in, a ramriah ati buai lo a, zialzuk tur aneih loh erawh chuan, thlun beh ruallohin a haw nghal vang vang thung. Palian tak e, tilo hian ramhnuai pik karah pawh a dûk pur pur mai a, zâwng ûm ah phei chuan tluklo han han tak kani.

Vau chhunga a hnu chu, kan han chhui kual zel a, a hnû(hniak) han len dan em em chu, daihnaiah hmu ta ila, bawng hniak emaw kati ngei ngei ang, han bihchian erawh chuan, ake tin atang a hriat viau tho na a, hetiang em em a, sanghal hnu hma lian kala hmu ngai silo a, mak kati lo theilo. A ke pen kar hlat dan atang reng pawh aseiin, alian tih ahriat ngawih ngawih mai. A khânpui erawh kan hmu mai thei hauh lo. Kan kalna ngaiah kan inchhui let tuak ta zak zak mai a, thianpa chuan, tih dan thlak ang, heti chuan ngai leh ngaiah kan inchhui lut zel dawn, tirawh min rawn zui rawh ati a, vau mawnglam zawng chuan, hlam samhnih vel khan han chhuk par par a, tichuan hlam sawm vela in hlatah awm in, vau pumpui chu, lo pianhmang zulzuiin kan fang ta thung a, hun a duhin, ahahthlak phian mai.

Nî avan laizawl vel chiah tihin, kan ințhen hran hnu atanga țhianpa thawm ka hriat leh hmasak ber chu, 'lo' lû atanga rawn kûk lauh lauh chu ani. ka fang chhuak fel chiah ani a. Ka thawveng huai huai mai, mahse a khânpui chu ka hmu ta chuanglo. Beidawng takin, thlâm ka pan a, thianpa chuan thingpui alo lum mek a, i hmuchhuak emaw chu alo ti bauh a, teh suh ei, khati taka sahnu chiar si, a khanpui chhui fuh theih hauhlo kha, mak kati hle tih chiah ka hmuchhuak. Nang enge i an zawk ka tih zawm zat a. A beidawn thlak khawp mai, pheikhawk dûp a bun emaw kati rum asin, chutiang ang chuan ka ngai lui a, kan chhui zau leh deuh a, kan kawngdung hi alawm maw alo zawh țhin le, enchian loh chuan, a hnu pawh hmuh mai mai theih alo ni hauhlo, kan chhaklam, lo lu, zingzum tlangdung bâwk atang khian, kan fehkawng hrulah char char rawn kalve zelin, kawrte tui awmlohna atang khian, lung pher atang kawng pangngaiah, arawn țum lut chat mai a, ramsa thluak pawh a ang lo. Mi hringah pawh, râl rel thiam tak thluak ang mai in ani, achet nî, mahse ka hmuchhuak ta bawk a, kan finkhalh thei dawn khawp e, nimin a, kan chevel zawng zawng te kha, bawk chungin, minlo thlir reng ani maithei. Chhun chaw buatsaih ila, kan haw der dawn nia, thuife kan haw phawt anga, khua atlai hmain kan let leh nal nal anga kan chang hmak dawn nia, a chânna tur pawh ka hualsa diam tawh, ati ta sauh sauh a, ka phûr ve ta kher mai, a țhat nasat chu khawinge rawngbawl chu kan buaipui ange, tihpah chuan, chaw chhum ka siam a, ramar sarep chu, tûl hnih kan pawt dawk a, chhum atan ka siamsa diam a, thingpui inpahin, chawbel ka vil a, thianpa chuan, hei ka rinai takin kan ram neitute pawh an thawm azawi phian mai, an thâ azawive tawh aniang, hetiang arei min thlahthlam ngailo asin le, kar hmasa atang khan nizan kha min rawn tlawh ani ta chauh mai a, mut țhatin min mut tir reive ta phian mai, engemaw zawng tak chuan, lung lam lam anti leng zawk alawm le, tiin bathlar atang chuan, kan piah lam ral chu a thlir vung vung a. Khaia !!!, ramhuai thawmin i lung ati leng amaw,, sawi tawh reng reng suh, manilo mah a, ka duhai tam tawng tawh ka intih nâklaia. Nang pui roh hi, ramhuai nula in an rim țhin che anilo maw, kan ti zui zauh a, nuih ruh ruh pahin, rîm chiahlo na a, thlâmkawtah khan, ka tui lak hi, ka khawh tir lai chuan,zanah, an rawn inbual țhin. Chu,,, i hmu țhin tihna emni kan ti hu a, hmu țhin lem lo e, zankhat erawh chu, rawn inbual zinga pakhat hian, chiang deuhin, khawnge kan mikhual mawng hlui pa chu, a muhil tawh em kan enchhin ange tiin ka hria a, ka chaw eikham ka mu fel hlim hlawl ala ni a, ka hrechiang si a, mak kati in ka bengkhawn zual hle nghe nghe, zan dangah lem an nui ri leh phun ser ser te, an inchhaih awr awr ri te chu, hre țhin mah ila, an mahni leh, an thusawi tak erawh ka hmu in ka hre ngai silo. Chutia asawi zawh hnu lawk chuan, leihka arawn rap ri a, kawngka lam pan hian, arawn ri phei țak țak a. inbeng kang meuhin kawngka lam chu, kalo thlir reng a, ka mei tuah chu, arawn alh eng leh thut a, chumi rual deuh chiah chuan, kawngka biangah, samsei hniang mai, mit tung ru hi, arawn dak var vo mai a, kan inhmuchiang dun bawk a, kan phuzawk ve ve in ka hria, a țe țhawt a, a bo zui hmak bawk a, kawtah erawh an țe teng tung mai a, an rawn kalna vau lam pan chuan an ri phei le lu mai ani. A mak khawp mai, ka hmuchiang viau na a, a hmel awmdan kha, ka mitthla thiam miahlo a, ka sawichhuak thiam tlat lo.

Kalo nui deuh tet tet chu, tinge i nuih, i awih meuh nange anti hmuk a, awih teh reng mai. Ka nuih chhan zawk chu, engtin nge i mawng ahlui dum uluk hle tih an hriat le, haha,, dum uluk tih kha belh kher angailo ang, tlaiah hian ka hnathawk bang hi, ruakin ka inbual mai țhin a, chu chu minlo hmu fuh pek aniang chu, a kuk ruih ruih mai a, lo lu lam leh sir atang tebuh kar ațang te chuan, min thlir țhap ni hmiang, an nui awr awr hlawm mai a. Ka inthlahrung lek lek thei alawm. tlai dangah chuan, kekawrte nen ka inbual ta ziah a, chuti chung chuan, tuia ka inleih apiang hian, rawn pawh thlak zuk tum ziah amawle. i mawnghlui hi chu i lar phah vet vet hle mai, ramlamah pawh anlo hreve tho chu ani si ale, taka pi ruali te chhungkaw hma a, i in show dan kha mi sawi thawm bak kala hreve pek lo a, i tawih(bialnu) tût il'el deuh pawh khan a bân phah che niawm in ansawi a, a uar deuh phei chuan, pi ruali te chhungkua leh a bialnu hma ah mawng lang ain, kawngka luchungah a in uisa lehlin anti che asin. Nuih huah huah pah chuan, azialo teh asin, pi ruali khi lawm, min hmuh apiangin zawnte i mawng upa deuh kha, i hlim ngam chuan, kuhva khawr chengnga man ka khilai ang che ati ziah a, chawlhni tlai kan leng haw lam chu, ka twih a khan, tuibur lei lawk ang tiin, piruali te inah min luh pui a, chaw anlo eilai tak ani sia, chawei kham hun lo nghah nge, i mawngtam hlim a, kuhva hlawh pah a, tuibur lei nghal. I duh thlang rawh minlo ti leh tlat pek a, kuhva hlawh pah a, thiani tuibur tur lei theih nghalna chu, thlahlelin. A sawi ngun tawh bawk alawm mawle kati a, an kawngka bulah ka ding ang tei tawi a, ka kekawr phelhin, an chawei na lam hawizaqng chuan, kawngka biang țan chhan meuhin, kan bungbu vuah mai a, anțe chêl chûl mai a, an chawei te chu, an tho phak phak mai mawle.Chuan, i țhiannu chu, engtin nge ni ta, aa,, kha, ka hriatchhuah meuh kha chuan, alo awm tawh miahlo mai a, ka mawng azahpuia alo haw tau nghawng nghawng mai ani awm e, zan lamah ka mawngtam hmanga ka hlawhchhuah kuhva khawr leh a tuibur tur nen, kava rim leh a, min ti zak lutuk alo ti teh fahran a, atana ka hlîm huai lam min hriatsak duh ûk silo in, awm hmunah alo inti zak ve em em ringawt a, ka lungawi ta biklo khan,i duh leh mawngtam thar chu zawng ta che,, tiin ka thlah ve ta anih kha. Kan khua ah te zawng, mawngtam thar ver vur avang awm emai, nausen laia mawngtawlh vek selian kan nih hi, tu mawng mah hi, han ngo no ser sur tur ka hrelo. Kalo nei hlui uchuak bik anih pawn, ka pawitilo, ek in compoun huam chhung țheuh țheuh ati a, anui vur vur a.

Duhtawka ka nuihsawh hnu chuan, nui chung zelin, chawei ka siam a. Ramar sarêp chhum hân nen, zo buh liam kawnah, vai buh kan thawn lut hawng hawng a. Savun ip nge nge, buh chang rum, sarep mai tawn keh zawh rual alo nilo. Thianpa phei hi chu, alen ang ang hian, a bar lian leh nghal a, rialno/norial(glass no) arh zau lam pawh hmuam hal hal thei khawpin, a ka reh pawh azau na ngiang mai, duhtawka chaw an bar tak tak hi chu, a kuttum te hi, a dawlh tel ang tih kalo hlau thin. Mirethei chaw heh tih takah, hnap sut hruih hruih chunga thlan hluamin, kan eipuar liah liah kher mai. Țhutmut ar ar pahin, zozial rû khek khawk, vawikhat fawh a, englo li tawt thei khawpa rû chu, kan han pak tual tual a, rual awhna leh lungkham dang reng kan nei biklo.

Kan inak chhuak ta chu, han ngaihtuah chet chet chuan anuihzat thlak rum rum mai. Sanghal bum tum a, han haw der ngawt mai chu, minlo hmu kher angem tih pawh a hriat silo a. Mahse, a awm hla lo anih ngat chuan, min hmulo mahse kan thâwm zawng a hre ngeiang le. A chhan pawh, thianpa in anasa lua awm lo in, thâwm kan nei haw tur ani ati tlat. Luhka kan chuan chhuah atangin, kan kûk nghal râih a. Thianpa pawh ka rin loh leh beisei hauh loh in, a rawn zâi ta liah liah mai a, a âw han chhiatzia chûû,,, fairêl bêlvuak rik chu nêpte. a sâng laiah phei chuan, âr khuang lai reh beh ang țuak ani. Mak ka tih ber chu, a zai thiam loh tehreng nen, min hmaizah map lo mai chu ani. A âw ang hi nei ila, hetiang ram reh leh rilah hian, ka zâi luah luah ngam teuhlo. A âw leh a hlasak inremlo chu thuhran, a ki inzir bawk silo. A mah nen lah inhmeh lo ropui bawk si,, bâwng hi âr khuan in khuang ta ûl ûl se, chutiang chiah chu niinka ring.

A zâi bê ruah ruah lai chu, atawp chut a, rawn hawilet hrû pah chuan, zai ve rawh, pahnih âw kan chhuah angai ania, khi khilai khi, arawn luh thlakna anih khi, anti zui zat a, kan han thleng chhoa. Asawi ang tak takin, kal lama ka hmuh hauh loh,pialtlepni silo, lungpher hlai tha tak, hmunzawl ve deuh laia lo inphah chuan, kawngchhak atangin, a hmawr zûm hlamkhat vel zeta la hlai turchuan,kawnglai takah arawn hawlh tlang a. Chu chu, rawn zawhthla in kawngțumah arawn chuag thla a, tichuan kawng tlangpui chu azawh ve ta zel alo ni. Thianpa chuan, hetahvhian pakhatin kan châng anga, saw sawlai dawidim thing, buk laih saw arem khawp mai, a kâkpenghuam vel saw țhutna rem leh nuam tak ani nghal a, a kung asan loh avang sawn, tho chu athak duh deuh maithei, mahse, he lungpher arawn zawh thla lai hi, chiangtakin a hmuh theih a, phei zawngin, nuamsa takin a kah theih dawn ani. Ti rawh i kal zel teh ang, zâi ve lûng lûng rawh, ka hla hriat chhun pawh ka sa zo der tawh ania, thawm kan neih haw ngei angai bawk si ati nuah nuah a.

A nih leh aw, i thiam lai laiah minlo zawm dawn nia tihpahin, ka aw kan chhuah ve ta a, tu zawk tak zaithiam ang maw, ka theihpalingkawh aringin, kan zai țial chhuak ruah a, țingțang(guiter) chu sawi loh khuang takngial pawn avuak rem thei dawn emni tihtur anih ka ring. Keima lunglenna ngei ngei pawh a um darh chum chumin ka hria. Mahse ka ngaihdan chu adiklo ani maithei, țhianpa hian a aiin kalo zaithiam fê tih a hrechhuak ani ngei ngei ang, nichinah lêm aw lai rûtin azai chhîng ve dûar duar kha ani si a. Kan zaive takah chuan, a inthlahrungani ngei ang, chutiang ngaihtuah neuh neuh chung chuan, ka zâi phûr tulh tulh a, ka bei uar sauh sauh kher mai, enge ni vei, thawm chhuah angai miau si a, aring apiang amawi ani mai. Ka phur phêng chuan, phuahchawp pahin, a thluk ka siam nghal a, ka sa chhuak nghal zel bawk a. Turu tak ka ni. Thianpa lah chuan, thiam ve tawh heklo. Ka phuah paha sak nghal zel agai bawk si a, ka hrilh hman tawh tlat lo. Kawngchho ulh deuh leh, pik deuh ah chuan, hlathu a khât deuh a, kawng nuamvlai leh hahdam laiah a kî asang leh mai a. Pui tak ani.

Thiana chu adinga. Ngawi lawk teh, hei henglaiah chuan, kawngchhak lawk lawk ah hian akalve zel a. Khilai kawn zawlah khian, di hmun tlem tlem a awm a. Khi khi ațan chhan deuh anih ka ring. Khi khilai hnahkiah kungah khian țhu in, di hmunin, arawn țhut chin leh thinghmun chin inri na hi, alang thei a. chulai chu, di hmun atanga arawn luh thlakna ani. Tirawh chho zel phawt teh ang. Helai hmun atanga, kan aw arik zuai raih raih hun thleng tur awm, kan kal leh angai ani. Chuan eng hla nge i sak kha, kala hre ngailo reng reng. A mawilo dangdai ve chiang khawp mai. Ka sakve tur mintheihnghilh tir vek alawm arawn ti ta roh. Ka zakve lek lek, mahse keiaia a thiam biklo zia ka hrechiang, mawl teh tuh emai, ka chhang buai peih vel lo. I duh leh sermon vak la ti nia, tihpahin ka zai san leh ûl ûl a.
Umm,, tah hian chawl ang, kan herliam tawh bawk a. Thawm ahriatphak tawh lo ang, ka beng a hah lutuk tihpahin, a țhusawp vei nuaih a, khawmaw inkual rui lo khan țhu țha teh, ka tui a hal ania,zaithiam dang aro zo tawh. I tui ah kha rawn phawrh vat mai rawh, kan ti hmuk a. Tui te in in, zialzuk pah chuan, kan țhu thlandai a. Kal dawn aruaiah kan chawfun chu, insem abuaithlak tiin, kan țhet a, kan han ei leh rih a. Nge ni vei, pu biaka pawn, a feh dawnin, a chawfun a ah peih loh avangin, azing chaw eikham hlimin, ah ah abuai ei lawk mai ang ati a, a eizo leh vek tho alawm le. Ani ang bawkin, nichin lawka kan chawei theihnghilh țhakin kan han ei leh a, kan kham lo mah niin ka hria, thianpa phei chuan, țhusawp nuaihin, kan chaw ningnawi chu ala thlir ang vung vung a, changel hnah chawp chuan, a ei mai ang tih kalo hlau hman khawpa, mahse tha te a, khawmin kawngthlangah ui hmelzetin atheh liam thla ve ta mai bawk a.

Theihtawp chhuaha kan zâi bê chhoh rawng rawng na kawng chu, thawmdim zetin kan zawh let leh ta thunga. Chhuklama lo hnai zawk khanpui chu changin,hnahkiah kungah ka țhu vang tawh a. Thianpa erawh thlâm hnaih lam zawkah a chhuk thla a, tunah chuan, a chân hmunah ațhuve tawh ngei ang le. Ka awmna atang chuan, di hmun cham phei pût chu alang chiang kher mai, dî hnah ro tan tawh leh la hrang duah hluah te chu, an inpawlh nuaih a, thlifimin a chhem zawnga thle dial dial țhin chu, a hmuhnawm dangdai kher mai. beisei angerawh chuan, sanghalsanghal erawh hmuh tur leh athawm hriat tur a awm hauhlo. Nî a tla a, khua pawh athim dawn hnai ta. Ka beidawng țan der tawh mai. Mahse țhianpa khan, darkua vel bawr thleng tal kan chang dawn nia atih avangin, huphurh leh betlo zetin ka țhu lui ve hram hram a. Ka chhukthlak mai chuan, ani pui roh kha, a â bêngbuang si a, sanghal men hian alo meng anga, minlo kap thawrang tih ka hlau deuh ani. A vawi lina atan, ka zun bur khat țep tawh ah chuan kan zung leh tur tur a. Ka hung fel vel chiah tih chuan,thlifim vawt var mai hi, khauh leh na angreng tak hian arawn thaw fua fua a, vawt kati deuh sung sung mai, kan inkuangkuah tawm châih châi'h a. A reh leh duk a, di hmun chu, thlichhem rik ang chiahin, arawn ri phei sung sung a, thli erawh athaw hauh lo. Di hnah pawh chu, an che chuang bawk lo a, boruak engemaw tak hian min rawn uap tih ka hria, hlauh vang ni miahlo in, ka mur sung sung a, ka tiril a khûr der der mai, mak kati viau na a, sa hu sual ani ange tiin ka inhnem a, sahu sual erawh ka nei hauhlo tih ka hria, ka zam nge, ka hlau pawh ka inhrelo. Khua ala thim lo a, ka khaw hmuh pawh ala fiahin, kala hmu thui thei khawp mai, di hmun rrawn ri phei sung sung chu alo hnai zel a, sanghal tawn rik ni turin, an che eih bawk silo a. Mahse thawm alo chhuak ta. Hmeichhe nui har har thawm ani. Ka mur sung sung mai. Hlauhna erawh ka nei emem lo. Ka hlau lo chuang heklo. A rawn hnai phei zel a. Di pawh arawn tawn che ta laih laih mai. Mihring ani dawn lo tih chu, kan khua tlukin ka hrechiang. Mihring nise, di hnah chungah, arawn lawr zauh zauh dawn tlat. Ka silai chu, lek kawhin kalo tin lawk pân pâna. Mahse ka khur ta tlat mai. Kan inti pachang lui hram hram a. Mahse ka silai kaw hmawr erawh ka dawmbet zolo. Thingțang behchhanin kalo tin ta tawp a. Nui har har e, tilo chuan, a han phun leh ang sar sar țhin bawk a. Mit khap lo lekin kalo thlir reng a, engthawm pawh chhuah raw sek sek, sanghal anih phawt chuan, ka kap tho tho ang kati rilru ran a.

Di hmun chu, rawn pelin, ka hmazawn ah tak, thinghmun ințanna,bfai zau lai chu, arawn chuang chhuak ta hlawl mai a. Mahse kalo beisei loh tawp, sakhi chal ani daih. Ka hmazawnah chuan, dingin ahawi valh valh mai a. Kah rem em hian a han in siamrem vel ta țhin a, ka kap chak lutuk chuan,ka silai chu ka hmer ngawt ngawt mai ani. Mahse, sa hmahruai anih ka rinna chuan, min insum tir thei hram hram ani ber. Ka awmna lam chu, arawn thlir phei vung vunga, anui ta hawr hawr mai a. Mi rap lutuk chu, ka mur uaih uaih mai. Ka hmulthi ding ur ur te chu ka hrechiang hle ani.Chu sakhi ringawt melh a, ka an phuau lai chuan, ka hnuailam sirah thaem ka hreta thut mai, ka zuk hawi thlak nak chuan, sanghal lian em em mai leh sei ruang mai hi, alo tawlh hrut hrut a. An fimkhur em em khawp a. Pen hnih vel apen a, ading leh a, ahnar lenkualin, atum deuh ut ut a. alianin, asei bawk a, hmuhnawm tak ani. Ka thlir renga, chutah ka thlang lawk êng fai zau lai arawn luh chiah chuan, alu an thing deuh nur nur a, abenga rawngsen awm chu ka zuk hmu vuai a, kan enchiang lehzuala, thilsen satliah ngawt zawng alo ni hauhlo. A beng chu verh niin, la chhum sen a beh tlat mai. Mak kavan ti tehreng em. Ka hnuaia arawn luh phei te chuan, ka hmuchiang leh zual. Min pel țan tih chuan, ka harh zawk a, ka silai chu lek kawhin, kan tin vang vang a. Chhuk zawng deuha kap tur ka nih avangin, kah san palh ka hlau khawp mai, a lung pawh theilo pawh nise, adar ruh tal kap tliak ngei turin, sanghal kah nan liau liau a, ka zen sawhmuk elh awlh chunga, mupui leh musau ka chherchhuan ngei mai chu, ka hmetpuak ta ani. Chu veleh țe thawm rapthlak zet alo ri chhuak a, thli arawn rum vung vung a, athaw zui ham ham bawk a. Sanghal zuang zawk kha ka hmuh tawp ani a. A țe thawm leh rum ri erawh kha chuan, minti hlau tkzet ani. Thawm ngaithla chungin, silaimu kan thun leh te te a, thli thaw vuk vuk karah chuan, hrehzetin ka chhuk thla ta nge nge ani.

Hmuhzui tur leh athawm hriatzui tur awm talo chu, ka kahna lai chu, belchiangin, ka fuh leh fuhloh chian nan, athisen atlak leh tlak loh kan bih vel a. Thisen far engmah ka hmu hauhlo. Ka kap fuh ngeiin ka hre bawk si, kan bihkual ngial pawn thisen pakhatmah ka hmulo. Mahse, ka silaimu pahnih chu, ka chhar ta tlat mai, mupuo mum zawk chu, aper bui a, musau pawh a ber nung tho mai. Fuh zawng ka fuh ngei e, pu thianga tar tawh takin asawi țhin, vengtu nei sanghal ngei ani e, vengtu aneih loh laia a phaw keng țhin chu, hei ngei hi, sanghal phaw keng, a bengverh chin ngat chu alo ni maw, kah mi alo nih loh tawp hi, tiin thlâm lam ka pan san ta a. Thianpa chuan, rawng alo bawl mek a, i silai ri kha ka hria a, ka chhuk ta mai. I kapthlu em anti zui zat a. Thil awmdan kan sawi hnu chuan, adik ang. Hnuh kawih hnuhnung zawk khan, lo lu ah khian ka hmu a, ka kap a, i sawi ang chiah hian, a dinna ah, ka silaimu ka chhar ve tawh. Ka silai zen athalo anih kalo ring asin ati ta a. Upa te sawi danah kah mi anilo ani ange tiin. atukah, khaw țhenawm ram lamah chuan, haw pahin, kan vah haw san ta a. Zawng meisei chi pathum kan kap a. Kan hlawhtling viau tho mai. A hnuah ka thianpa mumangah chuan, hmeichhe pakhat hian, ka ran duhlai hi, lo pel tawh suh u, i buh eilo turin ka hrilh tawh a. Nangni pawn kah intum tawh tur anilo, chutilo chu, inchungah thil thalo tak ka thlentir ve ang tiin alo hrilh a. Kan bawhzui ta biklo a.
Thiana pawn abuh chu, chân țhen hauh lo in, khamkhawp athar nghe nghe a. Kha sanghal erawh kha chu, a hnu takngial pawh kan hmu zui leh ta lo reng reng ani.

Keia thu tehlul hi, abo pel he mai loh nan. whatshapp leh group dangah, ka remtihna tello chuan,min post chhawn saklo hram turin ka ngen mawlh mawlh che u ani. Chhiartu duhtak, hlimna leh hriselna țha neiin damreng ang che.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)