CHUL RAM FAN By Hriata Tea

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

CHUL RAM FAN By Hriata Tea

Unread post by Ngaia » March 7th, 2019, 9:05 pm

Zanin chu kumthar lawm nan ka rawn tukchawp ve tawp mai. Ka edit hman lo bawk. Ka ziah hah sa a bo daih sia, intih phûr nan ka rawn thlasik mau puah ve phawng mai. A pawm dân in lo thiam hram dawn nia.
.
CHUL RAM FAN
.
By. Hriata Tea
.

Kumtin khêl lo a kan nghahfak, krismass chu hmang zo in, kumthar ruaiin kan kahchilh zo leh chiah a ni a. Lêngkhawm Zâi khuangri te pawh a chuai ta raih mai. Kan hun hman dân te ngaihtuah ru neuh neuh chung chuan nikum lama kan thlawhhma chu tlawh tumin ka insiam malh malh a.
.
Chul bawkbawn no lawr pahin, hmarcha hring te kan tlachham tawh bawk nen. Bepui lawh turte a lo awm tam leh tawh ringin chulram fan zâi ka rêl a. Behlawi chawrno leh bawkbawn no te tlân tu, sakhi ka tawn fuh tak hlauhin ka ulhbun mal ka hawlchhuak tel bawk a.
.
Rilrua krismass boruak te la châm veng veng chung chuan, kumthar ruai rim la hre deuh rum rumin ka teichhuak ta a ni.
.
Tumah vak anla chhuak peih lo bawk a. Ram lam chu reh vawng vawng kher mai. Khua chu thiang vawl vawl kher bawk a. Dâm ruam deuh lai tih chauh lo chu khawvawt pawh ka hre lêm hlei lo a. Fehkawng sira zing buh phur te buh tih buak te chu sazu leh sava ten an lo tlân chiar dip dep a. Vaithang han hawlh phunna atana it ru zet hian, bih deuh dâk dâk chungin ka kalpel ve zel a.
.
Râl leh lam romei zâm paw chûk mai te chuan lung a ti leng kher mai. Ralkhatah thingphur an awm ve ni ngei tur a ni. Thing ek ri a ri kauh kauh bawk a. Thlasik mâu puak ri kherh kherh te chuan rilru an la riau thei nia.
.
Kan zâu lan theihna hmun ka’n thleng a. Buh lakna hnu pâwl tlu sawp tawh te chu ralkhatah aṭang pawn an la lang var veu vo a. Rilruah ngaihzawngte ngaihna tel miah lo khawharna a lo thawk a. Hei ngei hi anih dawn hi khawtlang lunglen chu tiin, ka suangtuahna chuan Lo kan zawh lai te, buh kan lak lai te, a chhuikir vawng vawng a.
.
Thlâm ka thlen hmain, ka thâwm hria thlâm kawt fasuar hnuai aṭang ṭhumi an rawn thlawk chhuak ri phur phur a. Kan thlâm thlang khiang thing ler ṭang ro ah an fu kai larh larh a. Thlâm leika kan chuangkai a. Rah rik riap riap pahin, thlâm kawngkhar tlengrel kan pawt tawlh a. Ka pen lut zui ta nghal a. Rapchunga fairel bel aṭang sazu a rawn ṭum thla tharh a. sut âwng aṭang rangzetin thlâmhnuaiah a put thlazui zat a.
.
Ka silai tungin, Bathlâr(Namthlâk) kan hawng a. Thlâm thlang ka’n pâwl thlawhfai china bawkbawn kung no hlip hlep te chuan rah an lo khai uai fir fer a. Tap lam bêlin thingpui bêl kan chhuangkaia, tap vaivut leh vut durah te chuan sazu hnu a chiar dip dep roh a. Thlâm mangkhawng zuk kam chi viau dawn hi ti rilru chung chuan mei ka nun a. Thingpui sen hâng ka chhuangkai zui nghal a.
.
Bathlar ah ṭhu âwn diai chungin thingpui ka dût ri khulh khulh a. Pît rual hram nak nak leh han ṭeh leh hak ṭhin te chu thlirin, romei zâm paw chiai mai te chu ka thlir pah vang vang a. Râl leh lam lo mawnga meihawl rawh khu chiai chiai te chu ka hmuh hmaih hek lo. Thingpui inpaha duhtawk ka ṭhutchawlh hnu chuan, iptepui nen chul chawhmeh vai turin ka chhuak zui ta a.
.
Hmarcha ṭhatna lai kan thlawhfai bikah te chuan Bawkbawn a lo rah ṭha nasa mai a. Bengul kan zuah a. Bepui zâm te chuan rah an chhuah uai hnêp hnûp bawk a. Duhtawk aitam mah tur ka inlawh khawl hnu chuan, thlâm chhuatah bunin, ka hmarcha mal te chu ka thian nil nual a. Silai nen vâu hrut turin ka chhuahsan zui leh ta a ni.
.
Kan behlawi hmun ro riap tawh chu ka hrût hmasa ber a. Behlawi chawrno pawh hmeh khawp zet chu sih tur a awm dawn hi tiin, ka thlêk kual dâk dâk a. Ka beisei ang ngeiin, sakhi hnu ka hmu ta hlauh mai le. A bawkbawn no eina hnu te chu ala thar ṭha nasa mai a. Behlawi erawh ala pet miah lo a. Chu te hlei hlei chuan minti phûr zual a. A lo chuan chhuahna hriat tumin vau lam chu ka hrût kual ta zung zung a. Vawihnih vel bak a lo la lut lo anih hmel kher mai. Ka beisei loh leh rin lohna lai ber kawrte ruam, hlo chheh kan vawm luh ṭhinna pangsirah chuan a khân rem ṭha lai tak thlangin arawn lut chu niin. A hnû a thar si a. A awm hlat vak pawh ka ring lo hial a ni.
.
Vâu chhung khawi emaw laiah a tawm bo rih anih ka ring ber a. Chuvangin hnu hma hnutchhiah lo thei ang ber leh thawm chhuah tam lo chiin, a chânna siam zâi ka rel ta a ni. Thlâm lam panin ka chho leh a. Kan fasuar siamna bâng thingtuai chu ka han tan a. Hnâng hlaisa rapchung ami chu tuiah ka chiah nel leh te te a. Chhûn chawhmeh tur ka siam san ta daih a.
.
Baibel ûng khekkhawk chu chhuangin, chingal ngei mai chu tuisik nen kan leih lut a. Bai bêl aia vâr hretin kan chhîn a. Ka bawkbawn lawh thar no tliang hlarh mai chu ka chansan ta daih a. Bepui tlang(zung)te chu hikin, hmarchapuibun hmawk hmawk te nen ka chan pawlh rum mai a. Thlâm chara hmarcha hnah chawr no duah hluah mai te chu thliakin bahkhawr nen kan bai pawlh ta vel a.
.
Ka chawfun lian ṭha telh tawlh chu kan pharh a. Chingal hmanga bai kawi deuh niaih nen chuan, tribal kutphah hmang ngeiin, ka’n lâwk lut tak tak mai chuh. Lungchhiat vang ni hauh si lo in ka insût tak hliam hliam a. Ka biangpuar te chu, bathlara mi dang ṭhu emaw tiin, ka melh leh zuk ṭhin a. Chaw ei huaina tuisik upa nena krismass ruai kil aiin ka puar zawk fê mai. Lâihrui inbilh luhna bo mam ṭhak khawpa ka in eipuar hnuah thingpuisen hâng in bathlara ṭhutsawp nuaih pah chuan kan kahchilh zui sak a.
.
Ka chaw eipuar phêng chuan, ka mut te lam lam ati chhuak ruih mai a. Zozial pak tulh tulh chungin kuhva hring ka sehchilh sak sak a. Dul zût hauh hauh chung chuan ka tho ṭual ṭual a. Khua pawh a lo chawhnu ruih tawh mai. Ka duhaiin ka lo ṭhu rei mah mah ṭep alawm le ti rilruchung chuan ka insiam zui malh malh a. Ka hnâng chiah chu phawrhin ka thingfai phaweh phawrh a. Ka kual khirh hnuah ka ak hmak a. Ka thing tan sa nen vau lam ka pan thla ta a ni.
.
Behlawi hmun mawng vaû chhunga zairum kung buk chu ṭanchhan chi berin ka hria a. Ka lawn chho zui ta a. A kâk rem laiah chuan ṭhutna rem thei ang ber turin kathingtuai tan sa chu ka phuarbet ta nghal a. Kan ṭhut fel hnu chuan ka thlang fuh viau tih ka hrechiang hnuhnawh a. A lo chhuahna tur vâu thleng chuan ka hmu vek thei a. A lo chhuak anih ngat chuan, nuamsa takin a khampei zawngin a zakdawhah ka kâp thei ngei ang. Chu chu behlawi hmun arawn pan chhoh beiseina vanga ka suangtuahna a ni. Lo mawng lam hrûla a phei anih vaih chuan, a mawngtam min chhawn hlauh thung ang. Chutiang ngaihtuah roh roh chung chuan beiseina sàng tak nen ka ṭhu ta vang vang a.
.
Tlai lam darthum vel a ni awm e. Ka awmna ruam chu nî in a chhun pel ṭan tawh a. Kei pawh ka mawng kham viau e ti lo chuan ka phûr tulh tulh mai. Thâwm erawh ka hre lem lo. Ka awmna aṭang hi chuan vâu chhunga sakhi thâwm chu zuk hriat phak a ni lo bawk nen. Mahse, màu puak ri leh kherh ṭhin te chuan kan beng an verh hle tho.
.
Chhuk zawngin, tlailam thlifim a thaw heuh heuh a.ka chaw eipuar bawk nen,mutchhuakin min rawn zêm chiai chiai a. Ka bu leh lâwp ṭhin a. Ka’n inthing harh deuh a. Nî pawh ka awmna ah chuan alo liam fel vek tawh a. kâwlah pawh suk chen lo liam a ni tawh kher lo ang. Vâu lamah chuan ka mitsirin thil hmuh ka nei vuai mai. Chiang zawkin ka’n thlir thla a. Pângbal kung chu che tlat hian ka zuk hmu a. Sanghal zawk hi a lo chhuak ta mai emni dâwn,,, ti a ka ngaihtuah lai mek chuan Sakhi chal a rawn chuang chhuak ta heu mai le. ka va han phur kher êm…
.
Muangchangin ka silai chu kan lek kawh a. A cheng kâu in, ka zawn a lo thlen hun chu ka lo nghak ta rih a. A fimkhur ve ngang mai. A hawikual a. A beng leh ati kum kual vel a. A hnâr atideuh suk suk bawk a. Ka rim chu a hre dawn lo chiang a. Ka hlauthawng hauh lo. Ka lama arawn chhoh loh mawlh chu ka hlâu ber zawk.
.
Lei lam hnimin kal arawn siam ta. Ka lo zuk dâiphûl lo chu ka lawm kher mai. A ding leh dat ṭhin a. A rawn chho zel a. Min rawn hnaih tawh khawp mai, A taksapumin alang thei tawh. A mei tawite chu a hem ve tar tar a. A hmuhnawmin a phûrawm kher mai. Ka hmazawn tak mautlawn tluk velah chuan a ding leh dat a. Chu tak chu ka lo nghah ani ve thung.
.

Kawrdung khawk tawi tak chuan kan kap ri dur mai a. Silaimu thlawkchhuak chu ka hmu vuai a. A bâk chu zên khû in a hliah zui nghal a. Ka hnuai sirlamah chuan a ri thla khut khut a. Vaivut a khu thla chem chem bawk a. Vâu chhungah chuan a lum lut thla ta hram mai. Mahse, a rik zui suat suat na chu a ngaiah hlir anih tak avangin, a thi tur chàlchâng anih ka ring a. Ka silaimu chu ka’n thun leh te te a. Ka chhuk thla ta a ni.
.
Vâu chhungah chuan a lo thi mengkuau tawh a. Kan hnuk tawlh a. Hmun ren laiah chuan, a ke hma leh a hnung chu, ka ipte hrui leh lam lehlamah kan phuar a. Rilru hlim leh zângkhai takin thlâm lam pan chuan ka ak chho ta ngâk ngâk a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)