THLÄM VUAK LEH PAWLTUAM. By, Hriata Tea

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

THLÄM VUAK LEH PAWLTUAM. By, Hriata Tea

Unread post by Ngaia » March 7th, 2019, 9:21 pm

A ho viau nanga, a hunlaia nuam ka tih țhin zia kha ka ngai bang theilo. Lo tive tawh țhin te in awm tak hlauhin, Nunhlui hriat thar leh nan aw..
thlam.jpg
thlam.jpg (13.33 KiB) Viewed 4707 times

Chhiar peih te tan liau liau..

THLÄM VUAK LEH PAWLTUAM.

By, Hriata Tea
.
Khawvawh vanglai mah nise, Krismass leh Kumthar vuakvetin, mimir rilru ah hmun ala chang sangin, ram lama han tek chhuak peih an vang khawp a. Chu hun remchang chu chuh in, kumdanga kalo tih fo dan ang bawkin, Țhianpa hruaia nen krismass leh kumthar inkar ah, pawltuam leh thlâm vua a, zupawl (pawl zu) man zai kan rel a. Zanhnih riak buhfai nen kan in ak chhuak ve ta pâr pâr a. Ramhnuai reh ruih mai leh romei zam paw chùk mai te chuan, lung ati lengin, huau huau boruak chhim zo hlim nen mipa rilru pawh ati no nghulh thei hial mai.

Chul ram kan han thleng a, kumtluana kan hnathawhna hmun lo reh țhap mai leh buh kung lo tlu kawi niaih mai te chuan rilru ah nunhlui min ngaih tir a.

Thlâm kan han lut a, namthlak hawngin, kan han țhu thlandai a, talhkhûang khâwngin, kan han kùk râih râih a. Chhâwntu tur reng kan tawng lo. Hnuchhawn ram ang mai in areh tlawk tlawk mai. Thli thâw in, mau kua a chhem rik hawr hawr te leh, puak ri kheuh kheuh te chu min chhawn tu mai an ni.

Chunglam vansangah, muvanlai dî tawng lo ve bawk arawn hram kawlêk lauh lauh a. Nunhlui ngailo awm hian ka ring nem maw,, lêng zawng zingah. Pan lai leh rawllai niten mual an liam zel a. Upatna rilru hian, nunhlui min ngaih tir deuh deuh dawn ani tak si ale.. Dî tawng lo val tan pawh heti taka hun leh ni ten lung atih len theih si chuan, kawplai dî chân ta te thinlung hi engtiang takin awm ang maw le.

Tlai nî tla tur kâwl bulah asen phùt a, sava zanriak tur chiar nak nak te chuan, beng averh in, Lungti leng zualtu niawm fahran in, Riakmaw alo hram zui a. Tlainî kawla a herliam rual chuan, thinlung pawh a ngui ruai mai.
.


Ka hrilthiam nem maw..
Ankâ leh zâi tuahremin.
Lungdi tawnglo âr ang ka vai.
Uanpui changlo se valrianga'n.
NGaih lai di ka vai bik lawng e.

Anka nem leh thlum hlantu tur,

Lanu lengin, pheilai vawrin.
Eng dâwn lo ten laitual an mawi.
Ngaih lung dî kalo nghak che.
.
Lunglenna thinlung dah țha in, kan lèn ken te chu, apawp lai lai kan thawm țha a. Țhianpa Hruaia nen chuan, kan in nghahna thlâm neitu, pu Bela vaithang sawmhnih lek chu, sawm ve ve in thlam bul velah chuan, kan inkam sem a.

Zanriah hmeh atan, chul bawkbawn no leh hmarcha hnah no te, behlawi chang chawr leh bepui te nen, kan han bai pawlh nuaih mai a. Thingtlang tlangval chawheh tih takah, hnap dawk pur in, kan han ei tak tak a. Masi ruai sa bak sa dang ei hauh silo khan, sa aia atui zia leh vawksa kan hnê thu in kan han kah chilh a, diktak chuan kan sa râwp vanga riak kan ni reng si. Pawlzu thau tak hmui mawm hluam a ei châkin, huau huau kan kalsan a. Thlasik khawvawt kan tâwn ani si a.

Mahse, rilru hi alo pawimawh ber mai. Duhzawng leh châk zawng tih dawn hi chuan, eng hrehawm mah hian, minlo ngam tak tak hauhlo. Duhtawk mai a. Zo buh, thar hlim nen a, chul bawkbawn no leh hmarcha hnah chawr tir te, samțawk leh behlei châng chawr te nen, tinrêng bai pawlh ei a, han sî hliam hliam mai chu, chawbel ruak thlir vung vung a awl duh kher mai.

Thlâm mangkhâwng arawn per khat a, a delh chik țawt țawt rual chuan, kan tek chhuak vut a. Kan han țum chawrh chawrh hnu ah kan han en a, te reuhte mai hi, alu sawp vekin kan lo țum per thlawm mai a. Thla de tir eng hnuaiah nui chungin, kan khek tuarh tuarh a. Vawt pawh kan ti phallo.

Thlâm chhunga kan meilum ai chu, hreh zetin darriat velah kan thawhsan țuih țuih a. Midang riakve thawm hriat tur a awmlo bawk a, muangmarin kan thawkchhuak ta ani.

Meilum thawh san hlim tih takah kan kal khur dar dar a. Hmun dâm lai bikah phei chuan, dai tawn tur a lo awm der tawh mai. Thlam hmasa ber chu, thawmdim takin kan pan a, thlam sira, buhpawl chu, kan han tuam hmasa a. Sawmpanga lai kan man nghal pang mai. Thlam chu bel hnaiin, mangkhawng kawngka te chu, changel hnah leh pawnchhia te phelsep leh buhpawl te bakah, kan hmuh remchan ang ang in, kan han hnawh phui a. Thlam hnuaiah lutin, sazu kua kan zawng leh a. Bawlhhlawh bawm bula akua chu ka hnawh leh hnuah, țhianpa Hruaia chu, khai le...ka inpeih e tiin kan âu a. Anin thlâm bang chhak ațang țanin, thlâm chu, arawn hlap ta țhuai țhuai a.

Sazu rawn tlan thla apiang chu, ațhen ka chum hlum a. Ka man a, ka vawm hlum bawk a, chem phek zawng ten ka hlap thul, ka indaih lo kher mai. An rem meuh chuan, sawmhnih lai mai kan man der.. Kan phûr phêng chuan, vawt pawh kan hre tawh lo reng reng. Țhianpa Hruaia lah chuan, ka châng ve thung dawn ati nghal pang mai a. Thlâm indawtin kan bei phei zel a, kan inchân chhawk zak zak reng a,

Țianpa Hruaia chân hun ani leh ta. Ka phâwk ka chhuah a, arukin sadai ek châr chang reu ro, panga vel ka chhar khawm a, kan pawltuam tur chu, a inpeih hun nghakin kalo ngaichang a. Awle, ka inpeih e, arawn tih takah chuan, chunglam atang kan chil thla tan ta a. Atih dan ngaite te in, akut tum lianzet chum nat zawng hriat tum ang hrim chuan, lên zuk Zuk su pawngtu apiang chu, alo chûm dup dup zel a, chu chu ka thlil nghah leh beisei ani.

Ka sadai ek chhar chu, phawrhin kan theh lum thla ta ale, lèn zuk su pawngtu chu, alo chum nghal chat mai a, aiah, aiah tihpah chuan, ka sadaiek lum thlak ho chu, alo chum keh chat chat mai a. Na ati si, na ti a, han chawlh vung vung hman ani bawk silo. A inseh ruh hle tih ka hria, ka sawi duh bik lo. Ana ti thinrim hian, min chùm ve mai ang tih a hlauhawm tlat..

A phun nuah nuah danah min ringhlel deuh tih ka hria a, ka nuihza ka insum hleithei tawh lo. Chhuanlamah pu Țhuama kekawrte tih vak pahin, ka nui ta hawk hawk a. Atan zawng nuih tur avang khawp ang le. Akut la tuai vut vut pah chuan, hei sawmthum vel lai chu ka chum hlum ania anti a. Ka nuihna chhan hreve heklo. I â thut ami, enge pu Țhuama kekawrte chu inuih pui vak vak arawn ti a. Keilah aza tulh tulh, engtin nge a awm fakau a, chutia inuihpui reng chu le anti bùi bùi a. Ama hmel leh țawngka te chuan, min dèk zel ani ber e. Thlâm vuak pah te chuan, kala nui suk suk reng a.

Kawn zal lam thlam kan zawh hnu in, tlâng chungzawl lam kan pan chho leh a, kan tuamna hnu lam ațanga ûngau rawn hram chu, alo chhâwn vat pek a. Khap pahin, keite an ni duh teh ania. Chhâwn ngawt ngawt loh tur, keite alo nih chuan, arawn hnai vat mai ang tih mawlh mawlh pah chuan, tlâng chungzawl thlâm hmasa ber kan thleng chho a.

Kan han tuam leh a, antam ngang mai, zan arei tulh tulh a, antamin anlian telh telh leh nghal. Tuam pah zel chungin, dâm mual ațanga kan riahna tur thlam chu, panthlak kan rel a. Kal zelin, tlângsang laia, lo bing bik thlam chu, antam zual ringin, kan pan chho leh rih a. Buh kung atha in, an pawl pawh a chhah țha kher mai. Ka chân hun anih avangin, phurtak leh thawmdim takin, ka lèn chu kan zâr a. Ka inpeih fel hnuah Hruaia'n arawn chil thla a, antam bawk a, an chik nuk nuk mai, lèn lah chu, an su pawng zawt zawt mai a. Hruaia chuan min rawn pui vat a. Vawihnih ngawt kan chil nawn hnu chuan, thlâm chu vuak tumin, kan pan phei a. Thawm dim takin, mangkhawng kawngka leh thlam hnuaia sazu kua te chu ka hnawh mawlh mawlh a, chutih lai chuan, țhianpa Hruaia chu ka koh hun nghakin, thingtuai kezungpui tiat vel nen thlâm chhakah alo ding vang a. Ka inpeih hnu chuan, kan au zauh a,

Chutah ani pati phelh phawlh, phûnglûng leh tho thâng țha zet chuan, a țantir ang phat a thathô leh zângkhai chuan, thlâm bang chhak lam chu an hlap nghal țhuai țhuai mai a, chutih lai tak chuan thlam chhûngah thâwm ka hrezui nghal a. Sazu lian tak han trum thla ni mai hian ka hria, ka chem chu aphêk zawnga lek in, kalo inring pân pân a. Rin ang leh beisei ang chuan, sazu rawn tlanchhuak an awm lemlo. Hruaia chu leihka ah perkaiin, thlâm kawngka tlengrel chu an namtawlh a. A chhunga apen lut thawm pawh ka hrezui ve nghal, thlâm bang chhunglam chu an vaw pawp pawp a, bungbel atla ri rum rum a. Chutah chiah chuan, patling awrawl pawr zet mai hian, tunge ni arawn ti ta mai a. Ka phuchiang lutuk chu, thlam chhuat han tawng dawtin, ka ding zawt a. Keiai turû ala awm.

Thlâm chhûnga țhianpa Hruaia chu, mangang aw trial zet a, rak ruai rûai chung hian, arawn tlanchhuak a. Leihkâ ațang rawn zuangthla in, lo mawng lampan chuan, tlan chungin a au țial thla nasa mai a.

Enge ahmuh hre heklo. A aw țial zet leh mangang thlabar aw ri chuan, ka thin ati phu dup dup mai a, fiah tur a han luh te chu hnailo nasa mai. Amah thlâwp thuak achak in, a hnungah ka tlanthla ve nghal a. Ka hawilet ngamlo. Țhianpa chu umphak loh ka hlau ber. Zanthim hnuaiah, chhungkaw thum thlawh lai chu, theih palingkawhin kan tlan tlang thla ani. Engtin nge maubul pal miahlo a, kawng thleng kan tlanthlak theih zawk ni.

Feh kawngpuiah chuan, alo ding thaw hliam hliam mai a. Kei lah hah bawk. Chhuk zawnga ka tlan tawh zawng zawngah kala hah ber ang. Ngawirenga kan thawk halh halh hnu chuan, engtizia nge, enge i hmuh a, tunge lo țawng khâ. Ramhuai i hmu mi tiin, thaw halh halh chung chuan ka'n zawt a.

A ngawi vung vung a. Min melh run chung chuan, min chhang dawn lo emaw katih hnuah. E lê i pu Țhuam kekawrte â tih leh, nuih arual a. Anui ta țiah țiah mai a. Hrethiam ve hek lo i, ka beng ngawng nuih ve vur vur ringawt a. Ka zawh chian apiang lah chuan, min chhâng theilo in, anui zui nghek nghek zel mai bawk si. Ka tih ngaihna hrelo chu, kan riahna tur lampanin ka kal ta nul nul a. Ka hnungah min rawn zui pah chuan, ala rawn nui phei hawk hawk a, kan riahna tur thlam kan thlen chuan, mei ka nun a. Kan sazu man zinga athau țha țha chu, ka thlang chhuaka, arîl la in ka rawh ta mawlh mawlh a.

Țhianpa Hruaia lah thlam namthlakah țhu chungin, ala nui dir char char thung. Amah zawk chu ka hlau lek lek tawh mai. Ka biak chuan anuih aza zual leh ang tih ka hlau sia, sazu chu paruk ka chhum a. Zialzuk pah a, țhu tùm vuau chung chuan, anuih reh hun kalo nghak ta ani.

Mittui tlakuang khawpa, anui chu areh ve ta. In hruk fai mawlh mawlh pah chuan, thlâm chhûngah khan, pu Țhuama alo awm a., an nu a hisap nge, a zan zung tur zawk. A sazu vuan run chung khan, tunge,, tih pahin min rawn chho melh lai kha, ka hmehen in ka zuk chhun fuh chiah mai a. Akut ala zuk leh nghal. A tirah kha chuan, ka phu nasa lutuk kha, ngaihtuah chiang hman heklo, hlauin ka tlanchhe vak anih kha. Mahse, kawngpui irawn thlen khan, ka'n ngaihtuah chianga, pu Țhuama kekawrte ti a i nui kha ka hrechhuaka, ka thil hmuh leh ka awmdan te ka ngaihtuaha ka nui tawp thei tlat lo ani ati ta a.

Pu Țhuama kekawrte ka sawi chhan kha hria se, nichin ang khan nui tak maw, ka ngaihtuahna leh athusawi belhbawm chuan, ka nuihpui ve thei ta. Pu Țhuama khan, kan hnunglam ațang khan min nuihzui ve tak ang maw.

******************+*****************

Thlam vuak velah hian, hetiang lampang deuh, phut zawkna chi. A hunlaia nuihzat thlak hauh siloh. A hnu a, nuih tiza chi hi, tawng fuh an awm ve fo in ka ring.

(Pic hi ka siam ve liau liau ani e.)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)