SANGHA TLANG VUAK. By Hriata Tea

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

SANGHA TLANG VUAK. By Hriata Tea

Unread post by Ngaia » March 7th, 2019, 9:22 pm

SANGHA TLANG VUAK.

By Hriata Tea
.
Chhungkaw kima, zanriah kan kil lai chuan, Khaih khaih, khäih.. lo ngaithla țheuh rawhu khai, khawtlang pa ho in, nghatlang vuak an rel a, aduh apiang tan tel theih ani e. Tel duh chuan, rù uipum tiat aite lo intum țheuh tur ani a, zankhat riak buhfai nen inrin lawk tur a ni. Naktuk tukleh zingah, kawtchhuah ah in nghah khawm tur ani ang. Hrechiang duh tan, upa Rozinga inah kalkhawm tur ani e. Tiin, tlangâu arawn âu vau vau a, i hi le, telve ngei tur anih chu tiin, ka rilru ka siam nghet nghal hmak a. Khawilui nge vuak tur tih vel, hrechiang tur leh chinchang ngaihvenin, ka tek chhuak zui nghal a. Țhianpa sawmin pu Rozinga te in kan pan ve ta a ni.

.
Mi anlo tam viau tawh a. Patling leh rawlthar, val upa leh tlangval kan zi huai huai a. Nghatlang vuak hi an rawt ngai zen zen lo a. Keini rawlthar ho phei chuan, an sawi thawm bak kan hreve phak tawh lo. Kumin chu, khua a kheng rei bawk a. Nghatun luipui vuak an rel ta a ni. Kan hming pe in, kan rù lak tur minlo sem zel a. Keini țhiandun pawh khangngo la turin minlo tuk a. Phurtakin, țhianpa bialnu rim turin, thih leh thih tiin kan thawkchhuak zui leh nghal a. An sum hmun kan thlen chuan, inchhungah thawm alo țha viau tawh a. Rawlthar zakzum ve ve ta chu, kan tawi leh țan ta hrut hrut mai. Ka inti huai lui a, țhiante tan chuan savawm pawh ka pawngsual mai ta lawng.

.
Kawngka ațang tute nge leng kan bih ange, minlo nam miah suh ang che. Thawmdim takin minlo zui rawh ka ti a. Rukru thiam leh hratkhawkheng tak ang maiin, ke artui hmang tel hauhlo in, kawngka lampan chuan, ka kalphei at at a, țhianpa’n ka hnungah min rawn zui bawk a. Kan bih thlak hmasak chhan pawh, kan ngamloh misual Thansuala kan tìh mai a awm leh awmloh kan hriat duh vang a ni. Naupanlai ațanga kan sakei hlauh kha ani a. Bialnu te hmaah beng min suk tir ang tih a hlauhawm em atin ni. Bang awng lian deuh bèlin, inchhunglam kava bih a. Rin ang ngei ngeiin, naupang râl antih huai huai, kan u Thansuala(thanzuala)chu, a ha där lang vû in alo nui khi vûn vûn mai. Ka hnual nghal rawih a, ka bula bangawng la bih mek, țhianpa Hruaia chu, arúm deuh nghat a, rawn hawichhuah pahin, ka'n ha dâr liana lellul chu, alo țhut tlêt leh vût hman chu le, tirawh i bialnu rim mai ang ati nuah nuah a.

.
Bialnu ka neive reng renglo. Tun nge maw keiang hmel invuah pherh lutuk, hnar phek, biangki, chal lawk lellul te duh se itih reng reng, i farnu te zinga i ui loh ber minla puichhuah dawn nia. Tirawh, pi Rêngin, zutuitling anei ang. Cheng sawm ka nei, ka khilai ang che, i bialnu rimna min dal ziah tu, Thansual hadârliana hi tih dan rèl angai ani tiin, ka'n rawt a, pi Rèngi inlampan chuan kan inzui leh ta duan duan a,

.
Țhianpa Hruaia chu, phurtawk leka a in hnu ah, fuihpawrha Thansuala chu, velh tir ka rilruk deuh a. A ngam ngei pawh ka ring. Ani hi chu alian thér thùr si a, u Thansuala te ang, pa dawrawm leh chawrche zet, inla pa em em ringawt, upatna hmanga naupang zawkte sawi sak ching, thatchhe zawrkawi lutuk, zawi em em leh nghal, kal hnelh hnelh mai, silipar keartui hrut hek huam reng mai te zawng, a bawhbeh rual rualin, a thaw țawih țawih ngei ang le. Ai upa anih avang hian, thinrim pawn kan sual duhlo mai mai zawk a ni. Ai u te chu, hneh tur ngei ngei pawh nise, sualpui leh chungtlak kan duh ngailo. Chuvang chuan, țhianpa pawh fuihpawrh leh talo mai chauh ka ni.

.
A tukah chuan, țhianpa Hruaia nen, khangngo kan la a.. Mipakhat kèpna khawp zet atam, kan lak hnu ah kan haw a. Atuk leh nichhuak tur urlawkin, a bialnu te inah ngei, Thansual hadärliana tello in, zan kan tumtawi a. Țhianpa zarah, thingpui sen hang leh kurtai ka ei in, ka in phah leh ta.. Melhno tu leh nuih ver vertu hmuzo ve lo ta chu, țhiante bialnu, nu leh pa kawmin, tapchhak lamah vawkchawbel urna meipui hnungpuakin, thlantla phùngin, kalo ti ti zuah zuah a. Vawkchaw rim leh a so ri bawrh bawrh thawm chu, ka țawng ti nuamtu an ni hran law, țhiante tan a, ka inpekna hi, lum hèm hùam viau mahse, thingpui sen leh kurtai thlum tuitak ka liah theihna ani ve tho si a, nu tar leh pa tar te chu, ka chantawk ni mahse, hrehawm ka tih phah lèmlo. Chhangban chhum hmin thar, la lum vat vat nen a, kurtai kan ei țum phei chuan, țhianpa ngaihzawng nei hi chu, ka lawm a, ka bialnu nive lemlo mahse, ka hmangaihpui hliah hliah, an ințhen mawlh ka hlau țhin a ni.

.
Atuk zingah kan rulei lak te nen, mipa rual sawmthum zet mai chu, nghatun lui lampan in kan in zui duah duah a, pa ti ti thiam deuhte zahmawh sawi nuih in, kan ri lê lû mai. Zankhat riak tur ang a, puan kha, mi kan tam lemloh avangin, tum dan thlakin, zanhnih kan riak dawn a ni. Luipui kan han thleng a, țiau zawl kan han țum rual rualin, rawlthar rual ho chu, kan kùk ràwih räwih a, val upa in, ro an han rel a, ațhenin thing kan fawm a, riahbuk sual pawl an awm bawk a, rawngbawl an awm bawk a, khår pinna tur buaipui tu an awm bawk a, kan chanpual țheuh kan zawh hnu ah, khar ping pawl kan pui leh a. nitlak rualin kan inpeih hman hram a ni. Zanriah hmeh atana sangha man zingah lèn dèng ka zui leh a, kan inhlim chhuah bawk nen, nuam haih haìh tak a ni. Tu dang engdang ka awt lo a, rilruah sualna aleng lo. Rilru a zangkhai a, hlimna tluantling ava ni tehlul em..

.
Zanriah ei laiin valupa in, tumah hauh ngai leh ven ngaiin awmloh tur, tuithiam lo chu, li thukah luh ve miahloh tur a ni. Sangha lian inhmuh avanga, in rilru chi ai in, lithuk lam inlut palh hlauh ange. In nunna kha, sangha duh luatah in chän palh hlauh ange, fimkhur hle ang che u ati dap dap a.

.
Zingka'rah lui hnar lam panin kan in ak chhuak diah diah a. Kan rù in a hneh phak tawk tur awm ațang chuan, ru sum kan han thlak a, kan ru lakkhawm, chi hrang hrang. Khangngo, khangsen, rulei, ngaihhih leh adang dang te chu, kan han vaw ta tak tak a, apaw thla nguih nguih mai a, val upa in, lungpui chung atang minlo fuih lauh lauh reng bawk a. Sangha rui an rawn lâng țan ta phauh phauh a, naupang lam chu, kan awm hle hle thei tawh lo. Kan rù chhut lai chu, kan thawhsan uaih uaìh reng tawh mai. Val upa in, khaih khaih, rawlthar ho kha, țan lak hun lai tak ani e, han țang sauh sauh teh u, anti a, haw haw chungin, kan phu suau suau mai a ni.

.
Kan rusum thlak chu, chawhma zet kan buaipui hnuah, sangha kan han dap țan ta ale, luidungah an thal var tuarh mai si a. Rawlthar ho chu, kan zuang lawr zung zung a, kan khèk chèlchùl mai. Nghatun lui tìhtakah, nghatun ban chen chen hi, luikamah kan theh thal phung mai a, nghahrah, ngharul, nghasen, vaingha, nghakhing, aaa,, ka sawi seng lo. Ban chen hlir mai kan mut dul mai ani. Thlang deuh ah, thaichhawninu, sumthum, sumnga vel tur rual hi, tlangval ho in, anlo hnuk chhuak mek a, avan hmuhnawm tehreng em.. Kan khar pinna kan han thleng thla chu, limawngah an thal var tuarh mai a, arui lungpuam an leu zuai zuai bawk a, sangha rual mangang chu, an inpel zut zut mai a ni, antam kher bawk a, kan khär pin chu, an su chim lo chauh ani ber e. Val upa in an do belh tir zui a, sangha rui inperh pup pup mai chu thlirin kan en dauh dauh a, tuithiam ho pawn, li mawng ami chu, la chhar ngam heklo. Kan thlir țhup ringawt mai a. Valupa in, talhtum sui rawh u le, an han ti a. Vaukama thingtuai satin, kan han sui nawk nawk a, kan khar pinna ah chuan, lutin, sangha rui leu suau suau mai te chu, kan han vaw ta tak tak a, vaukamah thehchhuakin, athenin anlo silfaia, aril la in, an rep nghal zel bawk a. Thim thak thlengin, sangha chhar reng rengin kan buai a, kan kap thak pawh kan lo hrechang reng reng lo.

.
Thim hnu thleng chuan, sangha thiar pawl leh arep pawl kan phu suau suau mai a ni. Hah kan hrelo a, hrehawm tihna kan nei heklo. Rilruah engdang mah aleng lo. Sangha tih chauh lo chu, ngaihtuah kan nei tlat lo. Zanriah atana nghatun chhum rim chu, riltamna chawktho lo chi ziazang ani hleinem. Thaichhawninu, sumruk vel zet tur te chu, kan sat sawm a, hrang lian tak takin kan rep a. Kan han thrutchawlh meuh chuan, hnuailamah min kamtu a awm tih ka hreve chiah ani. Kan zuk dap a. Mak kati ngei mai. Ka sawi ngam silo a, hmun thim lam deuh ah, ka phei puia, kuai thle tawn velin, kan belchianga, a awmzia ka hrelo. Engvanga rawn lian teh thut nge maw anih reng reng le, kan hmeh vel lah chuan, ațang khawng eih silo a, zu rui chatthla ang maiin, azawi tual tho bawk si. Tihvak ngaihna hre heklo, țhiante zingah nuam ti zän lo chungin, ka bengngawng nuih ta vel mai mai a.

.
Mahse haider rualloh in, arawn țhanglian zel si a, athak hiar hiar mai leh nghal a, ka hiah apiang lah chuan, alian tulh tulh in ka hre leh nghal. Mangang ru tak chunga ka țhutpui rauh rauh lai chuan, țhianpa Hruaia’n min rawn bekbawr sùr sur a. Peihlo ru tak chungchuan, engtak sawi dawn ni maw tiin, thimtham lamah ka zui phei a. Kan hrechiang chu, keiang bawkin alo buai ve ni rengin, min hmuh tir a, kei aiin alian daih mai. Ritsak tham zet alo paipawn reng tawh niin, a mangang chu, min hrilh zawng te chuan, ațap lek lek niin ka hria. Kekawrte pawh ka ha thei tawh lo. Hak loh leh min uai nulh nulh mai si a, hak dawn leh aleng tawh bawk silo. Kan mangang viau e tilo chuan, kan han innuih leh rih a. Chawei peih anih thu an aupui lauh lauh takah chuan, kan pheive țuang țuang a. Kap lam tawt miau hek, posi mawitaka kal chu har tak a ni.

.
Upa lam hlir mai chuan, chawei siamin anlo buaipui a. Khaile, rawlthar ho kha, zak hauh lo in, in kekawr phelh ula, chawei turin rawn țhu rawh u, ruaka ințhut loh chuan, in thil khan, akam buai ang che u, arawn ti ta lauh lauh mai. Zak duh reng reng suh u, hlauhawm pawh ani lo. Kan rù lak zinga ngaihhih tel kha, in huat vang ani a. Ngaihhih tui hnathawh anih kha, hiat pilh lo turin, in fimkhur dawn nia. An han tih leh tak zelah chuan, țhianpa hruaia chuan, a kekawr a phelh sawt sawt a, ruakin chaw a kil ta mai. Chutah zet zawng aruka lo mangang ho chu, kan phu suau a, kan kekawr phelhin, chaw kan kil a, kan enkual vel a, mahni phutawk ailian tțhah mai chu, kan khai tung vu hlawm mai ani. Mahni ta lo nuihin, kan han nui leh rih țhin. A hrehawmna pawh hlimnaah kan chantir leh thei ta. Val upa lam chaw sem lah chu, an țhen ang țhu a. Nui huah huah chungin, lian hlawm ngei mai, anti deuh reng leh nghal, upa lam afing tawh deuh chin chuan, rù tui luan lai khan, anlo indai huh duh miahlo niin, rawlthar thawveng ho lah kan in dai pùrh pùrh mai kha ani si a.

.
Chaw chu, nghatun chhum nen, kan han ei tak tak ale, ril ațam tawh bawk nen, hnap dawk hman lek lo a, insut tluar tluar chungchuan, kan ei mawlh mawlh mai ani. Chaw eina hnah rawn vak lut lek lek khawp a, khai uai ho kha chu, an hmazawn hnah kotlangah an thil chu, an rawn bawk dak vung tawh a. Ngaihsak loh dawn pawn, sahrang hlawm, taltum ianga bawk tlar dul mai chu, hmuh loh theih hek loh. Kan nui leh tet tet țhin a. Kan chawei kham kutsil tur, luilam pan posi chu, amawi hlawm fahran lo kher mai. Mahni ta țheuh buaipui chuan, chawei kham zialzuk pahin, lungchungah kan bawhtir ang vengvawng a, hnahthial leh changel in, kan zap ang hliau hliau a. Mipa rual kan ni hlauh a, avanneihthlak hlauh a ni. Zan kan han mu te chu, han inlet ila, alo che ve tual zel a, thunun theih hauh loin azawi nawn mai si a, rannung laka ven nan, ka kekawrin ka tuam lùk a. Ka mutsan ve ta a ni.

.
Zing kan han tho chu le, zanthim hnuaia mei eng ang ngawt kha ni tawh heklo. Kan han zak thar leh a, thup bo a tuam mawi sen rual ani bawk silo. Upa ho in, khai le, chawei a hun e, in thil țheuh kha, in hmazawnah bawhtir leh ula, mahse, hnahthial emaw changel emaw talin, in khuh dawn nia, khaweng ah zawng, chawei ati tui lo palh thei a. Hmelmawi lo tak tak atam viau awm si a. Tuamtu kawr awmlo a, sen vul chùk tur kha, inthup mawi hram hram dawn nia an han ti a. Kal ti harsa tham khawpa, mipatna han țhang ta thut chu, buaipui awm tak alo ni. Mahni chawnpuar tiah dawn mai, han khai tak zuar ah chuan, amangan thlak takzet ani. Chawei laia, eive thei mai tur hmelpu, hmazawna bawk zuar mai chu, hnahthial leh changel hnah te bakah mahni thawmhnaw hmang ten kan han thuammawi a. Mipa țheuh țheuh chu, rei tak zawng kan inzah buai bik lo. Huphurhawm ta ber chu, haw kawng ani. In thlenpui hlan a nghahhlelawm mawlh lo.

.
Chawei khamah kan phur turte kan han siam zawh hnu chuan, val upa min, pu Rothuaman khawinge kan endik ang che u, lungchungah khan lo hung rem ula anti a. Mahni hmazawnah changel hnah phahin, kan hung far mai a. Chu chu, rawn endik in, a hmawlh ken chuan, min han thai leh sak ta vel a. Zak thei dinhmunah kan ding lo a. Kan thil roh em em, a hma zawnga midang hmuh hlau a, kan zun apianga kan hup bo țawng țawng țhin kha ni mahse, hupbo sen ni tawh heklo. Kan chhuan ber niawm ang ziazang in, kan lek lawrh lawrh mai chu ani tak si ale.

.
Hmawlhte nen meuh a, min han hawlh thlek kual sak kim hnu ah, awle, tumah la na em em in awmlo hlauh a, atha e. Tikhan hiat vak vak lo ula, changel hnah te khan zap dai ula, apangngai ve leh vat mai ang anti a. Pu Mawia'n vaiza hrui hih thar arawn sem diat diat a. Kha khan alu lamah hling ula, in nghawngah in awrh dawn nia, kawngkal ati buai lo ber ang anti zui a. Kan han hling a, hmalam kawk vahin, an țhen sen tuarh mai a ni.

.
Phur kan han inchawi a, kalsiamin, khawlam pan chuan kan han inzui țan ta ale, tumah kekawr ha awm hek suh, mahni ta țheuh bih chunga kawngchho kan han kal chu, lungawi ahar duh kher mai. Hmalam han hawi ila, zopa mawng hlui zet zet, upa lam mawngtam vuai leh dum chìn chèn ka hmu tlep chho tuarh mai bawk si, hnuailam han hawi lahin, lungawi pui har tak, vaiza hrui hmanga hlin, lian leh zawi nen nawn chuan, hmui lip vun in, minlo chhoh thlir a, ala äng ang phiau leh nghal. Ka hnunglam kan hawi a, keiang bawka țawn kawh ho chuan, min rawn kawk fur mai si. Ka hmuh nin tawh avangin, kawngsira hnahthial thliakin, kan tuam a. Khawchhung luh huna thupmawi dan tur ngaihtuah chungin, ka kal ve bauh bauh a.

..............
Awle, ti thleng hi nise, zahmawh lam zawnga in ngaihloh hram ka beisei. Thilthleng tak tak thin ani a. Thangthar ten kan hriat ve atan, a hlimawm thei zawngin, kan ti ve thawr mai ani a. Apawm dan minlo thiam sak dawn nia. Ka lawm e.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)