KHAWNGE KA HA HMAI BY Hriata Tea‎

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

KHAWNGE KA HA HMAI BY Hriata Tea‎

Unread post by Ngaia » March 7th, 2019, 9:23 pm

KHAWNGE KA HA HMAI.
*************************
By, Hriata Tea
.
Tlei dang țang bel an ka phallo
Ui ten ka au che, val nunnem an.
NGaihlai lungrun lo kir leh la e
Eng dawn lo ten i leng dun ang

Mim ang ka pianna kan run hi
I tello chuan, a zau lua ka tâwnah
Nau ang nuar lul suh mi u.

Duhlai nanglo chu, kei ka tan
Uanpui chang hian an mawilo
Hrilh hai riangval mai ka ni e

******
Khatiang hla te, khawia i hriat nge,? Ka phuah ve liau liau mawle, chhimveng nula Rikhumi khi, ka thinlai em a. Atan ka phuah alawm. Hmanni kan feh haw chawlhhmunah kan inti tâu râu a, ka lung han len zia mai chu… ka sawi ngam silo. Letter han fly ngawt dawn ila, thin ter tek khi anei roh a. A duhlo hmelhmang pe chhe vel hian, khawlai lûn laiah min tar sak ka hlau bawk si.
***
Aw,,, ni maw,, hei midang i zawng tihna emni. Chungte chu țhianpa Zâua hma lak tir chi nih chu,,, ani zawng zahna pianpui lo leh hre phak miahlo ania, itan te chuan, pu Luaia Bawng pawh a kherh thlu duh ang chu.. hawh teh i guiter hrui thum lek kha dah la. Țhianpa Zâua chu i zawng nghal teh ang. Pi Rêngi te luhka ah, a to leh vung tawh ang chu tiin, țhianpa Hruaia chu ka sawm chhuak a.
********
Zâu hahmai liana zawng a, kan chhuak ta chu, sawi ang ngei ngei in, pi Réngi luhka ah, zozial tawtawrawt ut mai pak bial khu luih luih chungin, alo nui vûn vûn a. A sikûtar (scooter) țâwng leh hmelchhe bim bem zet mai. A mitbul ngei mai chu, kawngko nghengin alo din awn tir bui bawk a. Mahse, he a sikûtar hi sawichhiat sak thei rual ka ni nem le, vengtin hrûta min phur kualtu leh ramvah, luikal kawng zawng zawng, min chhawk zangkhaitu ani tlat.

Mahse,, khalh ve miahlo mah ila, zan tlan angaih țum a, ka bân han kham țhin zia kha âw,,, a mit a bûl miau sia, hnunglam ațanga, torchlight cell thuma kawng lo ên sak kha angai tlat țhin si ani. A thawm te hi, ngaihtuahna tisa châkna âwmkhauh deuh țum chuan, a sexy riau hian a hriat a. Pastor leh kohhran upa bulah phei chuan, khalh rik chi pawh va ni suh. An sitât (start) chiah hi, thluk thluk thluk,,,,,,, atia, an rest chiah mai hi chu, chhuvuunn,, vuunnn,,, ati ta țhin a. Ropui thei khâwppp maiiii….
**********
Nangni pahnih chu, inva rawn thleng har em em ve,, mikhual nula rimtur ka hual asin. Hei kan tlai țep tawh alawm tiru i kal ang u, alo ti nghal bawrh bawrh a. A kuhva eina chil per leng ur ur a, min biak zawh hnu chuan, a sikûtar zurui hmel pu reng. Kawngko tello a, ding theilo chu, hneh sawh zetin an phih tho a. Tilmu sawh keh hlauhawm khawpa nâ in, an khick nung ta ale,,, arî chu in hriat tawh kha um..

kan pathum chuan, torchlight êng ringin, kan in phûr ta ani. Mikhual nula awmna in kawtah chhuduk tiin min dinpui chut a. Kawngko awm nghallo. Thingfak kan han zawng leh te te a, thingfak pali ngawt hmanga enge maw ti ti a, kan kam din hnu chuan, kan inzui lut ta țham țham a.
**********
Ani ang pa titi thiam, thawveng helh hawlh tak mai leh țawngkam thiam pherh êrh bulah hi chuan, kan nui vur vur loh pawn, kan zak vawng vawng fo. Hemi zan erawh hi chuan, zahna tawng lo in kan nui tluan ani ber e.
*******************************
Zanlama kan sawi hawt leh rawt phur ang ngeiin, luikal tur chuan kan in phur chhuak duh leh ta nge nge a. Țhianpa hruaia erawh Lo lamah tihtur aneih vangin, atel thei talo ani.
*******
Fur ruahtui hul țan tir anih avangin, metal road kan han pensan ta chu, kawng zawng anal ngei mai. Kawngkhuara tuihawk lo tling nen, tharum nen meuh, sikutar tlan theih tawk, kan tlan hnu chuan, ke in lui chu kan pan leh ta thung a.
********
Sangha anlo lut țha bawk a, kal hmasa kan ni hlauh bawk nen, sangha chu, rawthla lian leh châng khât zet mai paruk ngawt khata, kan man hnu ah kan haw ta ani.
********
Sikûtar kan han chuang leh tur chu ka huphurh ru khawpa, kawng a chhia in anal si,,, kallam aiin kan rit tawh bawk nen. Mahse le, a khalhtu hi, hetiang lirthei khalh tur hi chuan, ka mi rin ber ani thung. Ke a kal bik ngawt thu awm hek suh, kan inphur chhuak leh ta ani.
**********
Țhianpa hi zawng, mi mak danglam chungchuang zofa te mai nilo. Hringmi zinga amah ang, awm eihlo tur. A zia ang phei hi chu, kawlkil thleng pawn dap ruk ruk mah ila, tinther tiat pawh kan dap chhuak hlei lawng e.
*************
Sikutar kawngchhe ngam leh apu ang bawka hmelchhia pawn. Lei nem leh nal a, keini pahnih zahmawh thawm chhuah vin tuk chunga min han tlanpui chu a harsat ve ngang mai. A khalhtu in a thunun hneh hrim ale, kan la tlu lo mai mai ani. A hmelchhiat avanga tharum lama malsawmna a dawng hnem bik deuh pawh hi, kei katan malsawmna alo nive zel a. khua athim chhulh tawh avangin, destboard ațang torchlight cell thum arawn phawrh a. (Hei hi englai pawh a, a sikutar hmun nghak tu ani) Kei in hnunglam ațang kawng kalo chhun êng leh țan ta ani.
************
Kan tlan ve zel a. Kawng chhia leh nal vang erawh chuan, kan tlan chak thei lo thung. Kawngchhe laia kan han tan deuh țum pawn, a hnunga chuang zawk chhuk talo chuan, a khaltu zawkin, min chhuk khalh a. A nawrkai leh mai țhin. Enge ni vei, sikutar headlight kani tlat. Awfisar (officer) driver nei ang mai niin ka in hre țep.

*******6****
Țhianpa hah thaw huam huam leh thlanrim chu, a tak tûr țha tawh kher mai. Hah thiphul kai-a a beih fe hnu chuan, kawng chhuk euh euh kan thleng ta hlawl mai. Heta țang hi chuan, chhuk euh euh hlirin kawngpui metal road kan pawh tawh dawn avangin, chawlh arawt a. Zial te zu in, kan țhu khawmuang ta ani.

**************
Engtiklaia alo lak hman nge tih pawh ka hriatloh. Buh țawih tui plastic bottle um khat zet hi arawn rêk chhuak ta mai alee.. chhei khawraw, in thlen huaina ava ni dawn em. Phûrzetin, kawngthlang ah ka lut thla a, mau zuk satin, mauthei pahnih nen ka chhuak chho leh rang kher mai. Nui vûn vûn chungin mei alo chhem a. Mei engah ti-ti pahin kan han dawm ta anih chu.

*****-**********
Nokhat na chu kan tlak pawp dawn a. Lem hnih bak ka lem hman lo. Ka phuh țhawt mai. Karei, karei, luak a pawt. Luak chang nilo in, ek thlengin a pawt chho ang tih hlauhawm tak ani. Ka uak zui tuarh tuarh lai chuan tinge, atak iti ami arawn ti thûm hlût a.

*******
Uak,,,uakkk.. Hmm,, teh suh ei, adal lutuk zawk. Khawilam zurim nge, tui nen i chawhpawlh â… a uih ang hmuk leh nghal a. Tuisik hmuam chunga, zubel thlir nen in ang reng. Khatiang ka in peihlo reng reng ka ti nang nang a.
*****
Nui vûn vûn chungin, ka nihlawh dawn zuk ni-a,, ka invek anga ni mai lawm. Kan kham loh kalo hlauh ruk naklaia. Nizana Pi Rêngi min pek anih hi, han dahna mai tur ka hre silo a, an êkin tui kenna burah ka ruak alawm. A uih pawh ka hrelo e a. Zu tui i hrelo anih kha. vaihlo tui rim pawh a uih hmek zel tih hre ta che minla ti zui erh a.

********
Duhtawka a in hnu chuan, akai ve thei tho ni hmiang. Zu in miahlo chung pawh a. Nileng zankhua a, rui der peih leh thiam ani tlat. Kal ang tih leh thawh arual a. A sikutar thirchhe bawkvak thiam ah chuan kan han țhu ri leh ta rût rût chu ania. Kawngchhuk euh euh ah chuan, a nunglo in, kan lir ri thla bup bup a. A sikutar hi, a nung lai ri leh nunglo ri hi, a rik dan a inang deuh reng. An thawm chhuah ri erawh a in anglo mai chauh ani. Burchhe lira te pahnih burchhe lir chungah kan chuang ani ber e.

**********
Kawngpui thlen dawn ah ka running e atia, metal road rap pha chiahin anung ta. Thluk thluk, thluk,, atia, ani lah kai phûr tawh, a thih leh mai hlau a, an fullrest mai chu le,,, chhu vunnn, vunnn,, vunnnn,,,,, atia, a clutch a thlah rualin, kawngko kan thleng der mai. Sikutar in, chhuduk atih rualin, luikawrah kan indelh lut nghal rawih mai a. Ava na kher em…

************
Ka bawhbeh mek ka țhianpa chu, arawn rûm țuah țuah a. To teh, to teh ka taw-tei lo ania, arawn ti țawk țawk mai. Chal tuai vut vut in ka tho a. Kaitho tange tilo chuan, ka sikutar headlight ken torchlight lo la êng vu vu chu kava chhar a. Țhianpa rawn tho nen chuan, a thirchhe bawkvak thiam, zahmawh awrawl pu chu, kan han tung dun a. Kawngpuia kan chawi chhuah hnu chuan, stand awm heklo. Kan midum ruang mut thawr mai a. Keini pahnih chu, kan na lai te in dap in, Na kan tih apiang kan inhrilh tawn ta vel a.

**********
Sikutar petrol over avanga nung theilo, nghah pahin mei ka chhem a. Engvanga khatia tlan lut ta mai nge anih ka zawt a. Min en run run a. Hrechhuak thut aniang chu, a hmui hup chut pahin, KHAWNGE KA HA HMAI arawn ti ta mai a. A mengphawk si,, a invuahlo ami kan ti ngawt pek a. Hei a awmlo tih paha arawn țhen chu, karei,,!!! Pawi lutuk, a hlai țhat hlawm tehreng nen khan maw,,, a pathum thumin alo bo vek.
*******
A țhen kaw hiau mai kan hmuh chuan, ka lung te lam lam ati chhia, amah lah chu, ka hmu tar bawih mai. An țhenawm putar zangkul ni lum ai, hâhni hlanga nui țhin nen khan, an in ang lutuk. Zawng ang tih leh thawh arual a. Mak ta ber chu, a hâhni a thi miahlo kha ani.

**********
Reife kan zawn hnu ah, kan hmu ta hram a. Teh maw,,, ha lem alo nia,, keipawn ka hreve chiah alawm. Halem avuah tih kalo hre ngai biklo reng reng.

Mahse,,,, ava pawi leh zel em. A hâ lem pathum zinga, alai ber chu, alo bal ta tho. A faifûk țha thei tawh miahlo ang.

*************************
Pic hi tute nge ka hrelo a. Ka hmuh ruala he post hi lo piang ani. Min hrethiam thei em ang chu maw... An mahni chungchang nilo in, ka suangtuahna mai mai ani tih min hriatsak dawn nia.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)