SAVAWM NENA INBEIHNA. By, Hriata Tea

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

SAVAWM NENA INBEIHNA. By, Hriata Tea

Unread post by Ngaia » March 7th, 2019, 9:25 pm

SAVAWM NENA INBEIHNA.

By, Hriata Tea
.
Kum sawm tam liam lo mahse, khuarei alo chang ve ta reng mai. Awm khawhar chang a, nunhlui leh sulhnu han dâwn kir châng hian, thinlaiah nimin ang mai a alo thar leh tak chu. Khai mah aw,, itan chuan eng khâw khâ chang mah suh se, ka mutthilh theihloh aiah, khawvar ar khuan hma hian, kan chhu chhuak boh boh teh ang.
.
A hmun hma hi, Sanghal bengverh ah khan ka thai lang tawh a. Chiang zawkin in sawi leh teh ang.
.
Kum Sawmli 40 chuang zet luahloh khawram chang tawh hnu, an luah leh ațanga kum sawmhnih lo liam atla awm lo e tihtur, chu khaw chuan hnuailam thinghmun ngaw dur, kawr kam lehlam chuan hnuaiah ka țhianpa nen hlothlo in kan in lâwm a. Ani hi zawng thingzai hnam nilo mahse, a eizawnna ber ani thunga. A kah paha Lo nei ve mai mai chauh ani lek fang awm e.
.

Hemi kum hian a û a boral avangin kan in lâwm dun a. Țhenawm khua nen kan inri na dep. Kan khaw lam tualchai lohna ruam mawngah, an thingzaina beh chhanin Lo anei ve a. Țin hmun țha êrh âwrh ani awm e. Kar khat tawp ka Lo a kan riah hnu ah, a Lo lam kan pan ve ta thung a.
.
A feh kawng pawh a nuam hnai lo khawp mai. Thingzai kawng tih takah tlangdung di hmunzawl te chu tâwn kuak chawp angai a. Hmalam ah kiu thlep in, bân kan dah a. Di zâiin kan hmai a âh(ât) loh nan kan in veng a. Kan su kua hi ani ber e. Thinghmun chin erawh ngaw tih takah a thelh nuam fu thung. Vangvat erawh duhthusam in atam a. Vaihlo zial tiat dawn chin, vangvat saițial bak chu a then pawh kan inthian buai peihlo.
.

Thlâm kan thlena ka vangvat tan chhum zat kha. Ka kai ringawt pawh sawmnga vel nita in ka hria. Bai thak ta ila, a kai ve nen khan sa thi thun tui tham tak ani ngei ta ve ang. Mahse, mihring sa thithun hi ei tin ah ka en lem lo.
.
ȚAN DAWN TEH ANG.

Hemi chawlhkara kan riak hi chu, a ma silai siam chawp ve ve khangzêp kan ti mai țhin a. Țhenkhat chuan, UT silai te antia, Pangcheh ti an awm bawk a. Eng pawh chu nise, a dâwt lam ațanga a zên leh amu thun ngai chi kha a ni. A zên kan han thun a. Kan hawlh muk fe hnu ah, pawnchhia in kan zuk hnawh leh a. Chumi chungah chuan, a mu kan lum lut a. Chu chu pawnchhia (puanchhia) in kan hnawh leh a. A cheng ah, nawalh(nawhalh) a zên alh ber a hi) kan sik thla a. Chu chu a man kai chaktu atan kan han bel a, Tho kêp zaibial in kan zuk bel (khuh) leh a. Tichuan sa kah nan kan hmang țhin a ni. Vawikhat kah ah na na-na chuan a tluk a nâ leh țha kan hre biklo.
.
Chutiang silai ve ve chu keng kan ni a. A dâwt pawh P.H.E tui dâwt te ber chi.(conection pipe te chi) hi a ni nghe nghe. Sawi leh lawk teh ang. P.H.E tui dâwt (PU KIMA’N ZOȚAWNG IN DAH ZEL TUR A TI. KA THIAM VE ZAWNG TAK.Sapțawng thiam velo katan lawmna )

Kha a zên awmna lamah a chhîn tawk in kan thuah a. A mawng lam kha, Rawt(iron rod) in kan hnawh a. Rawt leh kan dâwt hman chu a kawkalh (X) in kan verh tlanga. Thir in kan hawlh kalh leh hnu ah kan châr(welding) leh thlap a. A rinawm em em tur hi ani ringawt. Kan siam zawh ah, kan hman hma in. Silai zên tam em em mai hi, a muk thei ang ber in kan sawh a. A enchhin nan, țawnbetin kan pawt per țhin a ni. (Umm,, duhtawk ang)

THUPUI AH EM NIANG.
.

Ka sawi tawh ang in, hemi chawlhkar kan riak hi chu khitiang silai ve ve khi kan keng ka tih tawh kha. Nilenga kan hlo thlo hi, tlailam darthum pelh zet zawt ah kan bâng a. A vâu luiah lên deng turin kan chhuk a. Mau meichher kan phel a. Têl nga vel pu thla in, a kha’t tawkin kan chhawp thla a. Kan duhtawk hnu ah zan lênden kan bei chho ta țhin a. A mawng lamah nghata’n a awm avangin sangha lian awm hek lo. Nghalim, nghadawl, nghahmursâwp(nghlim hnarchat) nghasârba, kaikuang tih vel hi, kg2 vel tur hi, kan man chho țhin a. Nghate kg2 chin chu Tam tak a ni tam tak. chung chu chaw no nga5 nen zankhatah kan eizo dun țhin kha ani a. Tun hnu hian ka awih thei tawh lo reng reng ti ila, ka dâw ang. Ka chaw heh zia kala inhre kur.
.
Kan chaw eikham kha, kan țhu tung thei lo a, kan mu thei heklo. E tur khan kan inkal chhawk chhen a. Kan e hleithei chuang der silo. Vâu ah mawng kan va sil a ni ber e. Sangha nilo ta se, pumpuar vangin kan tlaivar thei hial awm e. Chaw chhun (Chhun chaw) ei hnu a, zan darriat, darkua vela sangha man thar diai mai han ei kha chu, ka chil erawh ala ti pût fo mai. Kha hun kha, ka damchhung hian ka tawng leh tawh ngai dawn tak silo a le.. kava han ngai țhin tehlul em.. A mah ka țhianpa ngei pawh kha, He khawvelah hian ka tawng leh angem le, min ngaih châng neiin min han hrechhuak ve hian ka ring țhin. A ni nen a, mi tukloh ram leh fan ngailoh ram kan daidar zozai te kha, rawn dâwn kir ve țhin tak ang maw. Țhianpa kava ngai țhin che em… min han dâwn ve hian ka ring silo. Nang nena kan sulhnu te kha e. Tunah zawng tuallai thâwthâng an chang zo ta asin. Nghilh har nunhlui min liamsan lul teh.
.

ȚAN TAK THEI HIAN KA MAWI LO.
.

Kan hun hman dan chu, tlai lama luikal, zingah erawh a inchhâwk in kan ramvak thung a. Ramvak lo zawk zawk Rawngbawl leh thingtuah lak ani tawp mai. Savawm mît to zia kan hria a. Kan ral kawrkam leh lam chu, atira ka sawi khawram, thingchang hmun ani a. Chu chu kan ramvahna ber pawh ani bawk. Thinghmun thelh hu’n mai ani a. Fah,khiang, thingsia, â,, thing hi chu a kim vek hial awm e. Mau tak a awmlo tluk ani a. Phulraw hung leh rawnal hung erawh atam ve fu tho. Vahrit leh ramar hi chu kan kâp tuktin atih theih awm e. Sa lian kan beisei avanga kan kah loh țum erawh a awm ve tho.
.
Țhingchang hmun tih takah fah rah lai ani a. Savawm fah rah ei na leh a zâr a thliahna pawh atam mai. Tawng fuh ta ila ka țan hmun azirin ka kâp ngei anga. Mahse, ka silai in zir mawlh heklo. A hnuthar zet mai ka hmuh fuh châng pawn chhui zui lo in ka hlatsan(tlanchhiatsan) phah zawk țhin. Ka țhianpa lah alo chuti ve tho bawk a. A ni meuh pawh in a hlatsan chuan, ka in dem hauh lo. chumi kar chu savawm kâp châk em em si in, kan chhui ngam tlat lo pek a. t huai hi kan duhlo nge, kan huai tawk lo tih erawh chhiartu ngaihdan ni teh se. Tawng fuh ta ila, a mît, a mît ti mawlh mawlh chungin, ka kâp tho in ka ring a. Chhuizui leh veh erawh ka tum bau lo. A fah kung zâr ulh tliah leh a hnuhma ah, khangzêp nen a veh atan chuan ka silai ka sit lulai em a ni.
.
Chumi kâr tluan chuan, hlo thlo in hun kan hmanga, zan lên den leh zingkar a inramvah chhawk ani leh tawp mai. Kârkhat zet țhian duna bung ta chu, alo pawh kan zo ani titih dêr a. Buh hmun chin chu kan zo vek a. Ba hmun zimte leh behlawi hmun chiah hmabak awm in kan hawsan ta a ni.
.

SAVAWM BEIHNA KÂR CHU.
.

A kâr leh chu, Thawhlehni ah kan lut ta thunga. A chhan pawh. Khangzep ringawt kenglo a. Ulhbun hawh tur ka zawn duh vang a ni. A mu erawh kartût ruak khawn khawm in, ka siamchawp hlir ka pai thung a. Savawm kah ngei tum rilru chungin kan riak lut ta a ni.
.
A ni Lo chu zawh vek law law hnu a, kan lo lama insawrbing tuma riak mah ni ila. Keia rilru ah erawh Savawm kah dan tur chiah a awm thung. Ka kah vaih chuan, a mît ka hralh anga, ka awh em em ulhbun mal ka nei thei ve mai dawn si a. Savawm lah an thinrim poh leh an mît alian duh anti leh nghal a. Mahse, engtin nge ka chhaih thinrim tak ang.
.
Țhianpa hi chu fuih pawrh thei viau mah ila, savawm nena inkawm hnaih tir vak erawh ka duh bik lo. A chan chhe zawka a țan hlauh chuan, a palian si a. Puak haw ka huphurh deuh tlat.
.
(Nakinah bomb vawm ngamlo țhah bomb kenga kan luikal dan leh țhianpa ka fuihpawrh avanga a vawm huai tak zia kala hrilh ang che u)
.
Chutiang hlir suangtuah leh duhthusamna nen chuan, țhianpa thlâm kan thleng leh ta reng mai. Riah luh ni te ani bawk a. Lam hla tih takah kan kal chau bawk nen, rilru lam tih thawven nan, a vâu lui a lenden tum in, Lên țet te kan țhui țha a. Silaimu kan pho țang bawk a. Thingtuah te kan lak ngah hnu chuan, lui lam kan pan thla ta a.

.
He lui hian, Tuirial a fin a. A finna erawh zuk hla veu veu tak a ni. Nilengin tuirial chhuah chu kan ban hman lo ang. Nghatân erawh a hla lutuk lo atih avangin, ka hmu ve châk khawp a. A sawi dan ah kurung turu leh ropui tak ani awm e. Remchanga kal ngei tumin kan tiam a. Tun thlengin kala kal talo. Ka ui khawp mai. Engtik khawtikah mah ka kal tawh awm silo a.
.
Luiah chhuk zawngin lên ka deng thla a. a nin meichher tur a phel a. A khât tawkin arawn hnutchhiah thla zel a. Tlai danga kan thlen ai thui mah kan in chhawp thla ta a ni. Ala hma si a. Darthum vel awrh chauh ala nih ka ring. Chhuk zawnga ka man zawng chu, Mauburah chhum in, kan chawfun nen kan han ei fai rât a. Inlama chawbel a ngaihawm duh ngei mai. Chaw in daih heklo. Nghatê chu a hlangin kan nauh zo ta vel mai mai a.
.
Țhianpa chuan ti teh, khua ala tlai lo bawk a. Thim hma in kan let leh hman zân ang. Khulai lawk ah khuan, bîl kung a awm a. Zawng meisei ho in an tlân maithei asin i zuk en teh ang atih tak chuan, phûrzetin ka zui ta vat a.
.

Luikawi thum vel kan chhuk thlak hnu chuan an hawi vang vang a, khi han enve teh. A zâr khi a che deuh in ka hre tlat tiin, bil kung sang angreng zet chu min han kawh hmuh a. Luikam lungpui chung ațanga kan chhoh thlir vang vang chu, a che ngei tih ka hmu chiang khawp mai. Chet chu a che ngei mai. Mahse, Hmunkhat lai chiah khi a chê tlat. Zawngrual chu an nih hmel loh mange aw kati vang vang.
.
Chho phawt ang. Fimkhur deuhin min rawn zui rawh. Hnuailamah sakhi te pawh tawn fuh a awm thei tho ania. Silai țha zawk keng mah ni la, Hma kan hruai ange. Ka vawikhat kah chhungin vawithum, vawili, i kap hman anga. Savawm alo nih tak hlauh pawn, nangin i nawn zel anga. Kan inveng tawn thei mai ang ati a, hma a hruai zui ta nghal a.

.
Hmun awih deuh anih avangin, kal fimkhur angai khawp a. Khâm chhia leh awi’h bung vut erawh ani lo thung. Thawm dim tak leh fimkhur em em in kan inzui chho a. Hmun awih tih takah, bungbu deuh roh a, chhoh angaih avangin, ka hma a kal țhianpa chu, a vawih palh ka hlau ru khawp a. Chaw a ei hnem zia ka hre kur bawk si. Thli lah chawhnu lam tih tak ah chhuk zawngin, a thaw bawk nen. Ka chan tur chu, tunlai gas bur lik (leak) ang mai mai ai turu ani dawn tih ka hrechiang em a ni.
.
Fimkhur takin, kan thleng chho ve ta mai bawk a. Bil kung awmna chu, kan chhohna anga hmun awih nilo in, alo zawl ve ta deuh a. Vânvadâk chung pawn a kal theih tawh. Patling pawm ai lian hret tur hi, a bul vâwng lai chu ani ngei ang. A sâng fu leh nghal a. A lêr lama che sut sut chu ka han hmu thim map mai. Savawm ngei niin ka hre ta nghe nghe a. Țhianpa chuan mi rawn hui zoh a. Chhak hret fah kungah chuan a lâwn zui ta nghal a. Keipawh a bul lawk hlam khat lek a, zairum kung chu bêl in ka lawn zui ve zat a.
.

A kak pui ah țhuthmun kan rem fel a. Chunglam ami lah in thawm ala chhuah reng bawk nen. Muangmara ka’n enchiang chu, ka duhthusam alian Savawm ngei mai chu ka han hmu ta a ni. Țhianpa lah chu a phûr hmel nasa mai a. Rawn hawi â deuh hau chung hian, phawk zetin arawn meng a. Savawm a nih khiii,, lo nghak ang a rawn chhuk dawn e. Kan hmazawn alo tawlh thlak thlen hunah ka kâp hmasa anga. ka silaimu thun leh chhungin ilo nawn dawn nia. A rawn ti sar sar a.

.

Țhianpa phúr lutuk awki chu a hria emaw teh reng ni. A thingzar kawih lai chu chawlin, arawn hawi thla vung vung a. A rawn tawlh chhuk ta mai a. A hmuhnawm bawk a. Kah nachang hrelo in kan lo thlir tui hle aniang chu. Kan zawn arawn thlen pawn kah nachang reng reng kan hre pek lo a. Bil kung bulțhut ațanga ft sawm panga vel a thlen thlak hnu chuan, țhianpa silai chu a puak ta chauh reng a.
.
A țe ring ngang mai. A tla thla thûm dup mai a. Kahve na hun ka nei ta tlat lo. Rang zetin, ka tilmu ui nachang hre hman lêk lo in, ka lâwn na thing ah chuan ka tawlh thla a. lei ka thlen rualin, ka silai lek kawh chungin, a tlakna chu ka veh thla zui ta a ni.
.

Chunglam ațang chuan, țhianpa lahin fimkhur rawh. Minlo nghak ta che. Ka silaimu kan thun ve phawt ang. Pawng tawngtaw umzui chi anilo ania, arawn ti lawm lawm bawk a. Bil kung awmna hmunzawl kalo thleng thla der tawh thung. Ka’n hawikual a. Hmuh chu sawiloh thawm riva engmah ka hre hauhlo. Țhianpa rawn chhuk mek chu han en pahin, i kap fuh lo nge. Engmah hriat zui tur a awmlo tiin ka han au a. Ka sawi zo hman awrh tih chuan, khâ,, arawn ti vak a. Savawm thinrim rûm thawm ka hre zui nghal zat mai. Ka hawi let ruain min rawn panphei mek tu, hmul buk țha zet. Dum ther thur rawn thim phei map map chu kava hmu zui ta nghal a.
.
Ka silai cheng ka kâu rualin kan tin a. Ka hmetper zui ta a ni. A ding chut a. A bawk deuh rup bawk. Ka kap thlu emaw tiin, ka lawm phêng chuan, silaimu thun leh lam ngaihsak talo chuan, ka pan phei rawk a le. A lo la thi awzawng lo mai. Arawn ding chhuak a. A thinrim dan zia kha, sawi thei nita se chuan, ipte pui thum vel chu sawi tur aneih ka ring.
.

Kei lah ka hamhaih nasa mai. Ka dinchilh hnai tawh si, tlanchhiat hman ni tawh heklo. Posi han lak leh na hun takngial pawh min siam lo in, min rawn pawngsual ta mai ale.. tharum kan in neih hleih si, min bawh thlu a min seh arawn tum chu, ka silai kalo barh a. A thir lai ani hlauh a. A seh ri râwt mai. A hâ a ziau ve nge ni. Lu thing nur nur in, a tawlh hnung vei hrut a. Chu chu remchangah la in, ka tho ve vat a.
.

Savawm hnungtawlh emaw ka tih kha, ka țhianpa in alo pawt chu niin, a silaimu alo la thun biklo aniang. Savawm chu a silai dâwt in, a lo hawlh zuau zuau a. Savawm lah in tih vak ngaihna hrebik hek suh. Kei lah ka silaimu ka dap fuh lawk thei lo lehnghal. Savawmin min bawh thluk rual khan, ka silaimu ip chu alo per chhuak daih ni in, Mangan nâklaiin thin arim țul mai.
.
Țhianpa chu, thingse kung phên chungin, a la in chhanhim hram hram a. Țhianpa kalo han haw mai ang aw han ti thut mai ila chuan, a thinrim lutuk hian, Savawm kha a pawngsual duh hialin ka ring. Chutiang thil a thleng anih vaih chuan, ka țhianpa chuan, hmêl tih a sawi tur a nei dawn lo tih ka hrechiang nasa mai si a. Mai mai a, a hunlaiin khitiang thleng thleng ka ngaihtuah hman leh lo e a.

.

Ka silaimu ip ka hmuh rual chuan, ka thun nghal sawk sawk a. Țhianpa chu tlanchhe rawh ka rawn kâp ang tiin kan âu a. A ngaihdan alo nilo nasa mai. Tlanchhiat chi anih tawh loh hi,, min bawhthlu nghal dawn asin. Ka lam hawizawng te khan i rawn kâp reu reu ange arawn ti vin hlur mai a. Mahse, chutih lai chuan ka âw hria in, savawm beidawng chuan, ka lam arawn hawi ta hlauh a. Inher in, min rawn pan ta chhur chhur mai.

.

Ka kâp dawn ania, silai kaw zawn ah lo awm suh tiin, ka țhianpa bawk chu kan âu leh a. Savawm nena kan inkar chu, hlamthum bak ani tawh hauhlo ang. Savawm hnungzâng hrulah ka țhianpa âwm zawn a in chhawng vuh mai bawk si. Tinge ila din ka kâp dawn ania kan ti leh a. Ka iptepui a tang anih hi. Tin chilh lo chuan kap hlek suh ala rawn ti ta cheu mai. Savawm hliamtuar chu, a țuanfum hlauh zawk a. Chuti nilo se, min rawn bawh chilh tawh ngei ang. Ka țan hmun chu keimah zawkin ka siamrem mai a ngai ta a ni.

.
Savawm hlat zawng si in, sirlamah ka tlan ta a. Ka piah raw hung chu tlan hêl in, ka inzep lut a. Savawm pawh arawn thleng chawpchilh ve nghal zat a. Mahse, raw hûng chêp karah chuan arawn vak lut ve thei lo hlauh. Chu chu ka beisei ber ani reng a. Kah tuma ka silai kan lek kawh tur chu, raw hûng chêp kar ațang chuan, ka silai ka tin zawn theih bik ta hauhloh mai. Silai lek kawh theihna zawn ah. Savawm a awm fuh leh thei tawh silo a. Manga’n thlak tak a ni.
.
Rawpui châng bâwk, zung sam uai chu rahbi ah hmangin, chunglamah ka dung chen zet ka lawn chho a., Raw kung pahnih tlawh chhan in, ka ding kâk ang tei tawi a. Chhuk zawngin silai ka lek kawh thei ta hram a. Savawm thinrim min vel thur thur tu leh âng sen bûi bûi reng chu, ka zuk kap ta a ni.

.
A dâr ah tak ka silaimu chuan, a zuk dêng niin ka hria, a awp rup a. Thei leh theilo hian, thlanglam zawngin, a vak thla ta mai a. Chutah zet zawng, ka hlauhna a reh a. A mît hlutzia ka hrechhuak ta thung. Ka silaimu kan thun leh a. A vâk liam tur chu ka zuk kâp leh a. Zawi zet hian, âwiah a tawlh liam thla ta tho mai.
.
Ka’n chhuk thla leh, raw hung kan chhuahsan tur chu ka luh ran tehlul nen khan, ka chhuahsan hleithei der lo. Ipte puiah min bat thul, silai ahna hruia abah loh leh, a kâwm leh a dâwt in thil dang an khak a. Engmaw ti-ti in ka chhuahsan ve ta hram a. Ka thip sup sup in ka hria.
.
Ka țhianpa chuan i kâpthlu em tiin, mi rawn âu dût dût a. ka hrelo.. a tawlh liam daih a. Ka zuk chian ange. Tinge khatah ila awm reng a, i rawn kalve dawn lo ami tiin ka’n zawt a. Bung deuh nghut hian, “ka e tâng” ti ringawt in min chhâng a. Keilah chuan, ngaihtuah chiang hlei lo hian, Tun ang ah êk na hun emni. Tikhan lo e rawh, chaw ei tlem ve deuh tawh ang che. Ka zuk chian ange tiin ka chhâng liam puat a.

.
Kal mai tuma ka inher chu, ka ‘E’ katilo zâwng a. KA TÂNG anih hi… mi rawn pui vat rawh. Mahni te a kal itum rawk rawk. A lo lip mai tur che sin a rawn ti pawr hlar mai. karei,,, kava hresual chiang em. Ka e tâng ti mai khan ka’n hre pek anih kha.
.

Rangtakin ka pan ta vat a. Ka han hmu chu, Hruizik hnah zu'ng thlak, hlingkawm hian alo bat ther fur mai. Chechâng ngam tawh heklo. Min han hmu chu, an tûm kawh nasa vuau vuau khawp ah. Rum zet a. Mi melh chungin heti hian a ek theih dawn emni. Țhut pawh ka țhut theihloh hi, nanga beng ek ngah thusawi hrechiang thei hleilo khan, mi rawn chhuah vat rawh ati hmuk a. Ka nuih aza si, Nuih chi ani bawk silo. Ava’n hrehawm duh tak.
.
Nichin lawka hlau phelenga tlanchhia kha, Nuih insûm in ka puak keh lo chauh ani tak si ale, Ka nuih insûm lutuk chu ka khûr chur chur mai si a. Hling ka pawh sak zawng chuan, anah, anah, alo ti ve sek bawk nen. Nuih a kal lak lawh a. Ka insum thei tawh lo. Ngawiteh țhianpa ka zun a chhuak emai, zun ka cheh dawn tih leh nuih ka rual a. Min han melh rum mai mai khawp ah. Che thei nita se, savawm ai khan a hlauhawm zawk mah ang. A silai dâwt in mi rawn hawlh zuau zuau țhin a. Keilah nuihza bawk siin ka tawlh hnunga. Bil kung phên ah kan nui tak tak anih kha, savawm reng reng ka hrechang tawh lo.
………+........

Khatia, Savawmin min bawh thlu an hmuh khan, a silai zên leh amu chu a thun hman tawh a. Mahse, a kêp ala bel hman silo a. Keia mangang lah khan, kalo âu chul mai ani awm e. Rawn tlan thla in, savawm bengah khan a rawn hnûk ta a ni. Savawm in alam a rawn hawi ve ta si a. Insaseng tuma an hnungtawlh chu, hruizik hling thlak uai sung mai ah chuan a tawlh lut ta si a. savawm lah in a bawhzui zel bawk si nen, thingse mim(Thingsia)kung phên deuh chungin, a silai kaw hmawr in alo chhun țhin kha a nia. Tlema tlem ah, kan in chân lo chauh alo ni.
.
Tlanchhia in, savawm kha hruaipeng talo ila emaw, min beilo in, țhianpa kha va bei leh nita se, kan chan chuan vawkchaw pawh a tluk lo ang.
.

Engtin tin emaw khawthim dawn thlenga kan beih hnu ah, ka chhuah thei ta hram kha ania. Thimthama savawm hliam chin hriatloh han chhuizui lah chu, thiltih chi ni heklo. Chhuizui dawn pawh ni tehreng ila, țhianpa ber a ti tâu a. Lên den lam pawh alang tawh lo hrim hrim. A chhuah rual rualin, a haw nul nul mai si a. Nui tut tut chunga zui ve mai loh chu tih theih a awm tlat lo a ni.
.
Thlâm thlen hnu ah, mei ênga, țhianpa hnungzang kan enkawl sak chu, ka nuih a za tawh bik hauhlo. A tawrhchhel zia ka hriat belh leh ani ber. A hnungzang chu, tereuhte te a sih thlak hi ka chân ber. Zanah pawh a khua asik hlat hlat reng a.
.
A tuk zingah erawh kei aiin a tho hmasa a. Savawm chhuizui rawt leh hmasa tu ani tlat. Chawțhing awm heklo. Thingpui kan in a. chin hriat ni heklo le, țâmchhawl thut atan, chini kan bâwk a. Nimin lama kan Savawm kah chu kan zuk chhui zui ta a ni.
.
Vanneihthlak takin, ka kah tawp ber na ațanga a lum kha, alo thi zui hlauh a. Savawm sarep nen, kârtawp ah hlawhtling takin, kan haw ta a nih kha. A ni ang pa zaidam leh huaisen zara la dam ve chauh ka nih avangin, a kaptu chan min chan tir țâlh mahse, kan hlut ber Savawm mît chu, ka awh ngawih ngawih ulhbun thleng nan ka pumbilh duh ta biklo a. A hralhna sum fai chu zat leh zatin, alaiah inbun lo in kan insem ta a ni.

ATAK TAK, ANI LEH LO A NIA AW….



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)