KHA SAKHI KHA BY Hriata Tea.

Kan group pawn lam a mi, thuziak tha tak tak lak khawm...
Ngaia
Site Admin
Posts: 25813
Joined: April 30th, 2016, 4:07 pm

KHA SAKHI KHA BY Hriata Tea.

Unread post by Ngaia » March 7th, 2019, 9:26 pm

KHA SAKHI KHA.

Hriata Tea.
.

Kha kum liamta a, ka sakhi chang tur in ak chhuak kha, hman hmawh lo zetin, ka in siam melh melh a, ipte puiah chem ka thawlh a. Ka ulbun mal, upa tawh zet chu, tèl chulhin ka hru tle hlarh a. Silaimu ip chu, ka kawngah hreng in, ka ulhbun chu a dawt hnuailam hawi zawngin, ka iptepui chungah kan ah chilh leh zän a. Ka bike neihchhun, rimtawng tih hriat zet. A pitar tawh anih hi, min tihsak luai luai chu, kan thrut hniam sut a. Running turin, ke a inrahkal ka rual a. Kawngchhuka ka tihnun hnu ah, pi tlangi dawrah, chhangthawp kan la ba leh te te a. Ka fak kùr duah hnu ah, kuhva ro cheng hnih man ka bat sak leh thei hlauh a. Tichuan, phurtakin ka tum ram bellei kawn lampanin ka inkhalh khu chhuak ta vut vut a.

.
Kawngpui dung(metal road) ah km 6 zet ka tlan hnu in, jeep road metal loh, jeep te pawh tlan tawh ngailohna ah ka peng ta a. Km2 lai kala hmabak na a, thangte dawh chawp ngailo leh a hmun kalkhan rem ani bawk a, khaw nghah tlai pahin, fimkhur leh muangchangin ka tlan det det a.
.

Kawngchhuk chin ka thlen takah chuan, ding chawlin, zunram ka thiar a, ka vaihlo chan dip sa chu kan zial tawtawrawt åt a. Pak tulh tulh pahin, kawngchhukah chuan, swichoff in ka tlan tan leh ta a.

.
Ta trang hi chuan, thui ani tawh lo bawk a. Ka hmanhmawh lo kher mai. Ne ne in ka zai thla mai mai a. Kawihnih chiahin, ka innghahna tur hmun kala thleng lo ang tih ah chuan, kawngchhak lama sakhi han hùk thut chuan min ti ding chawt a. Ka chhak lawk maiah chuan, arawn hùk nawn leh that a.

.
Thawmdim takin ka inhung sawk sawk a. Ka silai lek chhuakin amu ka thun a. Kawngkam chhak lam panin ka phei vat a. Sakhi kawng rawn kan tum niin ka ring a. Phurtakin kawngchhak lam ko hniam lai chu alo chhukna tur ber anih ringing kalo en uluk khawp a. A rawn hùk nawn leh chiah chuan, ka chan hmun chu a fuh ngei tih ka hrechiang ta. Chawhnu darthum vel ani a. Thli pawh chhuk zawngin a thaw a. Kawnga arawn trum thlak hma chuan, min hmu dawn hauh silo a. Ka rinloh lamah hlawhtling dawnin ka inhria a. Ka lawm hle ani. A thawm pawh ka hrethei
ta. Arawn ri thla zel a, ka awmna lai chu,ko sanglai ber ani a. Ka dung ban vel aniang, mualrem lai niin, a zingzum laitakah kawngdung chuan atan tlang a. Ka awmna atang chuan, thlanglam zawngin, a hniam thla tial tial a. Mau tluk khat velah phei chuan, kobang chu, khùp aiin asang tawhlo hial ang. Ka chungzawn atang chuan, ahniamlam chu pan thla zel ani tih athawm atang chuan ka hrethei a. ka rinaiin athawm ana tlat mai. Mahse ka phúrna avangin chu lam chu ka ngaihtuah zui lo.
.
Ka silai cheng chu kau in, a kawm pawh ka darah kalo chhuang lawk diam a. Arawn lan ruala kap nghal thei tur chuan, kalo inpeih at a.
.

Kawng thleng lo deuh tur atang chuan, ake hma arawn lang a, alu lam erawh ka hmu thei hauh lo. Asang ala ti nge ni, atlum leh a, ari thla zui leh sat sat a. Thing khawihlu kung bula, fah kung tliak chawr buk kar atang chuan, a ke hmalam ria thal chu arawn lang leh hmasa ber a. Chunglam erawh fah kung chawr thar hnah buk chuan ala hliah a. A din vang vang takah chuan, tin ran chungin kalo nghak ve thung a.
.
Mahse thawm rawn chhuak chuan, ka beng averh kher mai. Hmeichhia lungchhe taka han insut hlap hlap ri ani tlat. Makti a, ka an phuau lai chuan, ake hmalam chu a che sen zoh a. Kawngah chuan, nula chawn nalh zet hi arawn trum thla ta chhak mai. Ka makti chu chetna chang reng reng ka hrelo. Kawngpui chu, muangchangin atan tlang phei a. Nula nalh tak niin ka hria. Khup khuh chang changin, puan a bih nge a feng kan ti dawn. Arawng erawh atrial lam niin mawitak a ni. Avar sar ang mai niin ka hria. Asam asei hnalh a, amawngbawr chung chiah ah, akawng hliah tawk chiah siin akal zawng chuan, an tle siau siau a. A hmai veilam chiah ka zuk hmuh a, apaw pheu mai, mak katih zia kha ka sawifiah thiam lo.

.
Hlauh lam pawh ka hrechang lo reng reng. Ka hmel awmdan tur kha ka mitthla pawn ka suangtuah thiam lo.
Kawngthlanga aluh bo hma chiah chuan, ka lam arawn hawi chho a. A hmel han thrat dan kha aw.. Tu hmui leh thinlung mah hian, midang lèi hawh belh pawh nise, an sawi fiah thiamlo ang. A hmel ngui
raih leh mitmeng dul riai mai chu, ka hmu chiang hle a. Athatna belchhah tu ni zawk hial in ka hria. Mahse atawrhna hmel erawh kha chuan, min fan hneh hle thung.
.
Tichuan, kawngsir di hmun ah chuan, alut zui ta a ni. Apil bo tur mawnglam chu, sakhi thau tak mawnglam ani leh lawi si a. Maktih avanga chetna chang pawh hrelo a, ka din vang vang hnu chuan, ka inthing harh a. Aluh thlakna lai chu ka zuk belchiang a. Sawntlung lei nem tha laiah chuan, sakhi hnu ka zuk hmu a., kawnglai vaivut zinga a kawng kanna chu, ka bih chho leh zai zai a, sakhi hnu hlir alang tlat mai. Mihring ke hniak awm ang ka hmu ta hauh lo. Vaivut atam viau a. Hniak chu chiang taka lang thei ngei tur a ni. Mahse sakhi hnu chiah alang thung si.
.
Mak tih avanga ngaihtuah zui rauh rauh chung chuan, ka bike ah chuangin, ka chan tumna lam pan chuan, ka inkhalh thla leh a, rilru a helhkham nei reng chung chuan, ka chän tumna hmun, tawitaw kung lianzet chu ka zuk thleng thla a. Kan fang lawr a, sakhi hnu lo hniak dèp dùp mai leh a mu, a chhahchhuahna te kan hmuh takah chuan, ka phùr thar leh ta hle a, thangte ah lawn in, ka thu ta vang vang a.
.

Ni pawh kawlkilah suk chen lo liam ani tawh awm lo e, ka chan hmun ah phei chuan, ni alang tawh lo. Tlailam nitla tur, hnim ruih mai leh khaw dul raih mai chuan, lung ati leng vawng vawng mai. Ngaih tur em em nei mah suh ila, boruak leh khaw awmdan chuan, thinlung a hneh em a. Lung ati no nghulh mai.
Chän chhuah inring em em a, ka thrut ngawih reng lai chuan, ka chunglama changkak(thlanthla) rawn vir vat vat chu ka hmu a, inrinna hun ani tih ka hria. Sa hmahruai anih avanga inhmuh tir hlau tak chungchuan, chet pawh che ngamlo in, ka thu tlawk tlawk a.
.

Thlanthlä ringawt ka ngaihtuah lai chuan, ka hnuailam ah thawm alo chhuak a. Ka zuk bih thla vat a, ka awmna hnahkiah kung tiah vel, zairum kung hrulah chuan, arawn lang sen zoh zoh a. A tawitaw chhar chevel anih ngei ringin ka phur khawp a. Ka chunglawk a, thlanthla fu reng kha ka han en a, alo awm tawh lo. Fimkhur thu hla ah kan zawngkual leh te
te a, ka hmuh tak loh ah chuan, ngaihtha takin, sakhi lam chu ka ngaihven zui leh ta a.
.

Tawitaw kung hnuailam ah alo insawn tawh a. A failai a alo lan hun nghakin, ka silai chu kan lek rem a, kalo nghak ta ani. A taksa pum pawh ka hmu thei zeuh zeuh, amam tha in, a lian hle a, amei tawi te chu, a hèm tar tar reng a, tawitaw kùng sira arawn chhuak phei chu, ataksa pum pui alang thei ta, a ding chawl dat a, alu rawn tun chhuakin, a hawi valh valh a. Ka silai chu lek kawhin, a zakdawk ah ngei kah tum chuan, ka hmetper ta a ni. A zuang zawk a, atrum leh chu, pen hnih vel a kal a. A ding khur zawih zawih a, bwihtee.... Ati ta vawng vawng mai a. Ka hmulthi a ding ur ur mai. A awp rup a, a tal khur chawr chawr a, a ke aleng auh auh a. A zuai ta raih raih a. Kala chechang theilo bwihtee,, atih vawng vawng ri kha, ka hrechiang em a ni. Ka thàu ah mi man a, ka tiril a khùr der der leh nghal.
.

Mahse chechäng zui hauhlo a, aleh reng takah chuan, mahni saruang pawh han hlawm ngamloh ngawt chu tiin, ka inthing harh a, ka chänna chu ka chhuksan ta a. Kan khawih tur chu, ka tim viau na a. Kan kaihleh vel pawh a, eng em atih tak loh ah chuan, ka muang ta huai huai a. Alian tha reuh kher bawk a. A rit phian mai. Ka iptepui hruiah chuan, ake hma leh hnung chu, lehlam lehlamah, hnängin kan phuarbet a, ka phur chho ta ani. Ka bike ah chuan, trawnbetin ka inkhalh haw zui ta nghal a, khua pawh athim lek lek tawh a. Mahse, light erawh hman ala ngai lemlo. Kawng chhia nen atlan chak theih loh bawk a, muangchangin ka inkhalh dat dat a. Kal lama ka thil hmuhna kawn ka han chuang chhuak chu, kawnglaia sakhi lo ding zan mai chuan, min ti ding chiang ngei mai. Ka silai kan chuh vat a. Chu sakhi chu, ka lamhawiin vawithum ngawt arawn hùk zawn a. A mittui luang nguah nguah chu, ka hmuchiang ngang mai. Kah pawh ka tum buailo. Min ti lungno nghulh mai a. Kawngsirlama aliam tur han insut ri hlap hlap te chu, ka hlau lo reng reng, ka tah ati chhuak em em ringawt mai a ni.
.
Mak kati in, hlauh ngaihna reng reng ka hrelo. Ka chawmawlh vek niin ka hria, nuam tilo zet chungchuan, ka chhuk a, sakhi kal liamta chu, enzui tumin ka pan chho a. Ka hmehen pawh ka lek chhuak tel nghe nghe a, hmeichhe insut hlap hlap awmna chu, mau hmun chhung kawngthlang mai ani a, a thim ruih avangin, ka light chuan, ka zuk en a. Engmah ka hmu lo. Mau hmun thelh hun mai chu, kan chhun kual ngial a, hmuh tur a awm chuang lo. Ka light in a, a èn loh lamah hlir chuan, a insùt thawm chu a insawn zel a. Uhu.. Zawn hmuh chi pawh va ni suh tiin, ka let a, ka inkhalh haw ta vang vang mai a ni. Kawngtluan mai khan, sakhi mittui tla lai hmel kha ka hmu reng mai a. Ka nula hmuh nen khan, ka mitthla ah an inlan chhawk reng mai ani. Nuam ka tih loh bakah, ka sakhi kah te thleng chuan, ka rilru ati nuam thei lo. Ka kah angei pawh chu. Asa kan han chan a, tul a, kan thil vek tawh rapchunga kan rèp te thleng chuan, an phu uih uih mai leh nghal a. Mak tak a ni. A sa pawh a hmin har in, a fei em em a. Ka kah tak leh kawnga ka hmuh khan in zawmna an nei ani ngei ang. A hnuah te pawh ka chang leh fo a, trum nga lai ka kap leh nghe nghe a, kha thil ang kha chu, ka tawng leh tawh hauh silo a ni.
.

Awle,, keia thuziak tehlul hi, mite tluk ve mah suh ila, ka remtihna tello chuan, copy past, group danga suan ka remtilo tih hi, kan rawlh tel hram teh ang. Chhiartute in chungah lawmthu ka sawi e.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)