"MITTUI LUANGIN KIR AN REL LO" BY Dwm Pachuau 3

Episode kal lai dah luhna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

"MITTUI LUANGIN KIR AN REL LO" BY Dwm Pachuau 3

Unread post by Ngaia » May 28th, 2016, 10:56 am

episode-71

An kal chak vak lem lo bawk a, behliang mun hun velah khua an lut a. Rothuama te inah chuan vawk talhin thenrual tha te an lo ri laih laih a. An sawm angin Liankima chhungte leh Chhiari chhungte pawh an lo awm kim thap a. Anni pawh tumah kaltlang bik lovin an lut ve nghal vek a. Rothuama nu chuan hawnghar hi a lo ti em em tawh khawp mai hi a lo ni a. An rawn thlen chuan a thaw huai mai.

An hahdam fel chuan Rothuama nu chu a rawn ding chhuak a. A duhzawng thui lo tea a sawi hnuin thla hualna vawk talh chu puar leh hlim tlang takin an kilho ta a. Thenawm khawveng hnaivai leh thenrual tha te sawm an ni bawk a an ri ve laih laih mai. Chawei kham thut muan leh a kuang te an awm hnu chuan Liankima leh Chhiari pawh an hawng ve ta a.

Zan lamah chuan boruak a nuamin khua a thiang hle mai a. Arsi pe ut mai te chua lang chiang hle a. Rothuama chu leikapuiah chuang chhuakin a ding vang vang a. A rilruah mak deuh maiin nupui neih lam a rawn lang ve nawlh mai a. Mahse, nupui nei tur pawhin han kawm deuh bik leh lawmnu pakhat pawh a nei a ni lah hek lo. Chutia nupui neih rilrua a rawn lang mauh mai chu amah pawhin mak a inti kher mai.

A nu lah hian a khat tawk hian "Taia, ka dampui lai ngei hian nupui te hi i nei lo ang tih ka va hlau em, a ngaih lah hi i ngaihsak reng reng hek lo. Thil thui tak ngaihtuah la, nupui nei lova bantlang te hi ilo tum ngawt ang e." a tih thin te chu a ngaihtuah chhuak uaih uiah a.

Chutia a rilru a lo kawm melh melh lai chuan a thianpa Liankima tawng thawm a hriat avangin a ngaihtuahna chu a dahtha ta rih a. Rothuama chuan "Hetah ka awm, lo kal rawh hei zanin chu thla pawh a eng nuam dawn khawpin ka hria." a lo ti a.

Rothuama awmna lam pan pah chuan "Nang hi val lunglenga kan la ti lovang che tih pawh a hriat tak loh hi a. Lal fanu em han rim chu keini hnamchawm tlangval tan chuan van a arsi lak tum ang hlauh a ni mai si a leh..." tiin a fiam nghal zauh a.

Rothuama chuan ngawi teh, zanin chu lal fanu lo zawk a ni ka lo ngaihtuah mek chu." a lo tih chuan Liankima chuan "Chhiari hi a fel reng asin, lal fanu em te chu a tluk lo deuh anih pawhin anni aia han iaina tur hi ka hre tam lo teh a nia. I tan nana na zawng ka inhuam thui khawp ang." a lo ti leh zung zung a.

Rothuama chuan nui rah rah chung hian "Ngawi teh thiana, i duh duh khatia min dembel i tum te chuan nupui pawh ka nei seng nawng maw, thih huama kan kir leh ngatna chhan nula zawk kha a nia ka lo ngaihtuah mek ni." a han ti a.

Liankima chuan hriat loh hmel tak hian "Tu chu nge maw i sawi le?" a lo ti bauh a. Rothuama chuan "Kan mikhual zan khan a hmel ka lo enchiang lem law, vawikhat hmuhnaa khati tak maia a zunin a lo zem nghet hman che kha ka lo ngaihtuah mai mai a nia." a ti a.

Liankima chuan chung lam a thlir dauh dauh a. A hmelah chuan eng chiah nge a ngaihtuah hriat ni lo mahse eng emaw tak zawng a thianpa thusawi avang khan a ngaihtuah chhuak a ni tih chu a rin zawn theih tlat.

Thawk a han la deuh hak a, Rothuama chuan a chezia chu a lo mitmei ru reng a. "Kan rim leh ngat dawn emni ang?" a tih chuan Liankima chu a rawn hawi rang kher mai. "A hmel kha i lo hmuchiang ve lo tak tak em ni?" a rawn tichhuak ta nge nge a.

Rothuama chuan alu a lo bu nghauh nghauh a. Liankima chuan "Ka sawi fiah thiam lo, min hlau em em kha a ni a tiraw? A melh pawh min melh tha ngam lo anih kha. Khati chunga amit leh ka mit a intawn khan chhunglamah hian ka buai chhe der zel zu nia." a han ti a.

Rothuama chuan "A mak hle mai. An khua te chu kan la halsak ta rawl chu a ni si a tiraw? A hmel ka lo hmu chiang ve lo chu a vanneih thlak teh e." a tih chuan Liankima chuan "Eng aiah chuan maw?" a lo ti he haw a. Rothuama chuan "Thian tha kan inhmuh sakhi phah ngei dawn asin." a tih chuan an nui dun hawk hawk a.

Tichuan zawlbuk lam pan chuan an inzui chhuak ta a. Liankima chuan zawi sap hian "Vawina i sakhi patuai kah thelh thu kha min han hrilh ve thung teh le." a han ti a. Rothuama chuan engkim zep lovin a hrilh nghal vek a. A taawpah Liankima chuan "Tichuan engvang ber khera a ke a kap maw i nih a?" tiin a zawt leh a.

Rothuama chuan "Ka sawi mai thei bik chuang lo. Mahse, kha sakei kha a hran ve ve a nang leh keiina kan hmuh kha ani thei ang em tih ka ngaihtuah deuh a ni. Tikhan, khawiah pawh hmu ila kha sakei kha chu hriat hran a awl dawn a ka ti mai." a tih chuan Liankima chuan a hriatthiam loh hmel kher mai.

Mahse, han zawt nawn leh turin zawlbuk an thleng a ni chawpchilh tawh si a, remchang danga zawh lehah tiin zawlbuk chhungah chuan an inzui lut ta a. Zawlbukah chuan an lo titi mam mam a. A then an lo inbuan bawk a, Rothuama te thian dun erawh chu kil khatah thuthmun remin an thiante chetla vel chu an lo thlir dun a....

episode-72

Chuatia an rik laih laih lai chuan an val upa pakhat hi zawlbukah chuan a lo lut a, thut muan pawh nei lem lo hian "Kai le, tlangvalte u min lo ngaithla lawk teh u." a han ti a. A tawng tawp rual chuan zawlbuk thawm awm zawng zawng chu a reh nghal duk a.

Val upa chuan a aw a han thian kharh kharh a. Chuath muang ban chap hian "Kan lal leh upa te remruat angin Sihnuam khaw lal chuan kan lal te duhdan a remti thei ta lova. Chuvangin tunah chuan keini Mualthuam khua leh Sihnuam khua chu khaw inhal leh raldo khua kan lo ni ve ve ta." a han ti a.

Tlangvalho chu an ngawi thap hlawm a, tumah tawng chhuak an awm lo. Val upa bawk chu rawn tawng chhuakin "Kan lal leh upate remruatna leh inrem tuma an hmalakna chu Sihnuam lal chuan a lo remtihpui thei ta lova, chuvangin remna saui kan tan thei ta lo a ni. Tunah chuan kan hmelma khua chu Sihnuam khua anih ang bawkin an hmelma khua chu keini Mualthuam khua hi kan lo ni ta. Kan zam em ni?" tiin a thu hmawr bawkna chu a han nei a.

Chutah zawlbuka tlangval awmho zawng zawng chuan "Kan zam lo, kan hlau lo." an lo ti rual tuarh tuarh a. Val upa bawk chu rawn tawng lehin "Kan khaw tlangval huaisen pahnih Rothuama leh Liankima ten an khua an lo zu halsak avang pawh a ni ang e, keini khua nena remna saui tan chu an duh bau lo niawm tak a ni. Keinin kha leh chena ngamsaa kan lo ngaih khua in min han cho ve ta mai hi tawrh thiam pawh a har ngang mai. Chuvangin an lakah zah kan ngai tur ani lovang." a han ri leh chiah mai chu tlangval awmho zawng zawng chu an au rual thup thup a.

Rothuama chuan thutak fe mai hian, "Thiana, he thil zet chu itan lawm tur nge lungngaih tur ka hre ta hauh lo mai." a han ti a. Liankima chuan "Kan khaw hnih inkar chu engpawh lo ni rawh se, amah ka hmuh leh kha ka tan chuan a pawimawh ber." a tih chuan a thianpa chuan a hriatthiampui hle a.

Val upa bawk chuan "Zanin atangin ral veng kan indah tan ang a, kan khawtlang venhim hi keini damchhan a ni. Khawi khaah pawh kal ila, kan fimkhur hle tur a ni ang, chu chu kan chhungte theuh hnenah pawh sawi darh ila atha ang e." tiin a thu ve ta a.

Val upa dang chu muangchangin a rawn ding chhuak ve a. "Hmelma tana rawn luh rem deuh zualna hmun li ah vengtu kan indah ang a, hmun khatah tlangval pathum zel kan indah dawn nia." tiin chumi zana ralveng tur te chu a han ko chhuak zat zat a.

Koh zingah erawh Lianthuama te thian dun chu an tel lo, an hliam tawrh vang te pawh ani mahna. Val upa chuan "Tikhan zanina ral veng tur te khan leng len ar khuan rualin in awmna tur hmun theuhah awm hman in tum dawn nia. Midang zawng pawh tul thuta che nghal vat thei tura inrin ruk reng a tha ang." a ti leh a.

Tichuan ralveng turho chu an chhuak nghal diak a. Midang erawh chu eng eng emaw sawiin an la thu muang hlawm a. Nakinah chuan leng len ar a rawn khuan tak avangin nula rim tur chuan an chhuak ta diah diah a.

Rothuama te thiandun pawh lenna tur nei hranpa lo mahse an zawlbuk atang chuan an chhuak ve ta tho a. Rothuama chuan "I hliam kha eng e a an tawh reng reng? Hei kei chu ka zia tawh viau mai." a han ti a.

Liankima chuan "Chawei titui tawk te chu a tling ve mial mahna. Hei vang hi a ni ngei ang min ruat ve lohna chhan kha. Ka'n huphurh loh tehreng nen, kan thudang alai chuan engtia hma han lak tur nge mawni dawn le?" a han ti a.

Rothuama chuan "Kawng a ping tulh tulh nimai hian ka hre lehnghal. A haw lo che ni chuan i hre ve tho em ni?" tiin a han zawt a. Liankima chuan "E khai, chulam reng reng chu rin ngaihna pawh ka hre lo. Khati khawpa an khua kan suasam hnuah pawh min la pui duh fo anih kha chuan min haw lo nihmiang ka ti mai." a lo ti ve a.

"A ni viau mai, a hming te tal chu i hre turah ka'n ngai ngawt a." a tih chuan Liankima chuan "Zawhna chang hria ila zawng min hrilh ngei ang ka ring." a lo ti daih a. A thianpa chuan "Chungte em em chu anachang i hriat ka ring a sin maw le..." a lo ti ve leh.

Liankima chuan "Ngawi teh, khatih lai khan e, thi leh dam kara leng kan nih kha i theihnghilh ta mai elaw? Chutih lai karin engtin nge hmel hriat loh nula hming te ka lo zawh theih bik ang le?" pawr fahran hian a han ti a.

Rothuama chuan nuih rah rah pah hian "Khatih lai tho khan ani lawmni le ilo melh kawih sawih hman tho." a tih chuan Liankima chuan "I thih ka hlauh tluk kha chuan ka vei tawk lo anih ka ring ta." a han ti a, an nui dun hawk hawk a.

Rothuama chuan "Titeh, i ni te in lamah leng teh ang. Zanin chu khawi lam nula mah kawm chak ka neih pawh ka hre lo." a ti a. Liankima chuan "Chhiari bawk kan rim leh dawn emaw tihnak laia..." a lo ti a. Tichuan Liankima ni te in lam chu an pan ta a.

A ni chuan a dan pangngai tein vawkchaw chhum a lo chawk barh barh a. Ani chuan a lo hmuh veleh "Awi nangni pahnih kha ka lo ngaihtuah lai tak cheua in lo lan le, lo kal teh u. Tlemah tlemah kan chan lo chauh cheu ani bawk a, hei artui leh zu tuitling hi in rawh u. Ka lo dah ve ngar ngar cheu a nihkha." a lo ti sawt sawt a.......

episode-73

Rothuama te thian dun chuan zo artui leh zu tuitling chu an han thiat dun ta tak tak mai a, a tawp lamah phei chuan an rui ta lutuk a Liankima phei chu chhuatah a mu ta der mai. Rorthuama pawh bang nghengin a thu mu der der mai a. Men pawh a meng hlei thei tawh lo chu a ni ber e.

Liankima ni rawn lutin anni pahnih a rawn hmuh chuan mak ti tak hian a ka hau mai a. "Aw haw haw! Chumite pahnih mai mai chuleh, engti in in chuan an in nge mawni ngai le? A tam teh lul nen an in zo vek nia maw le...." a rawn ti lut chul a. A tawng chu Rothuama chuan a mang hriat rei ruai a. Mahse, a inti harh peih tawh ngang si lo.

Ani chuan Lankima chu kaihthawh a han tum a. Mahse, a kaitho zo tawh awzawng lo mai. Rothuama lah che peih tawh der si lo. Liankima ni tihngaihna hre lo chu chhuatah chuan a tei a tei mai a.

Chutih lai tak chuan an kawmchhak nula sangkhumi chu saum dil tumin a rawn lut nawlh mai a. Liankima ni chuan "E khai Khumi i rawn kal hlauh chu ava tihzia em, hei naua te pahnih hi an thla hual nan artui leh zu tuitling ka lo hlui ve e ka tia, ka vawkchaw mei vil hlanin a awm zawng zawng an lo in zo anih pek hi. Ka mang an tiang lutuk. Engtin nge ka tih dawn?" a lo ti chul a.

Sangkhumi chuan chhuata let reng Liankima leh banglai nghenga hnar deuh burh burh Rothuama chu a han en a, a nui chhuak ruh ruh a. Liankima ni hnenah chuan "Ava zia lo thin ve maw le, an chhawl a hal ngang a ni ang e. Liankima hi chu puan phahsak ila hetah riak mai rawh se. Rothuama erawh hi chu a chhungte pawhin an ngaihtuah a hlauhawm avangin ka hruai hawng thei mai ang." a ti a.

Chutia Sangkhumi a rawn tawng chhuah takah chuan Liankima ni chu a thawveng huai a. "Mutbu te chu han nei tha ve deuh ni ila an pahnih pawh hian riak nghal mai se ka tih nen. Kan nei tha ve lo em mai a, ni e i sawi anga Rothuama i hruai haw thei dawn anih chuan a lawmawm khawp ang." a lo ti a.

Sangkhumi chuan "Ani hi chu a ruih chhiat lem loh hi ka hruai haw thei mai ang. Duh leh ka nau Sangvuani pawh ka pun mai dawn nia." a lo ti zung zung a. A saum dil tum theihnghilh thak chuan Rothuama leh Liankima chu a buaipui ta a.

Dik tak chuan, Rothuama hi a lo vei rukna a rei tawh bawk a, hetia han awm dun falna hun remchang a hmu chu a lawm hliah hliah zawk a. Rothuama nula mi loh zia leh pasaltha huaisen, khawtlang chhuanvawr anih hi hai bik hek lo. Kherh thlukna hun remchang lutuk rawn inher chhuak chu pumpelh a tum bau lo.

Ani, nula upa lam tawh leh lungfing tawh chin a ni a. A duhna kawngah chuan zah leh pawisak vak nei tam hek lo. Engtinnge chu zan hun hlu tak mai chu a hman tangkai theih ang tih chauh a lo ngaihtuah mek lai chuan Liankima nu chuan "Awi, ka va'n lawm tak em, nang kher i lo kal hlauh chu." a lo ti mawlh mawlh a.

Sangkhumi hi nula lian leh hleitling tak mai. Mahse, hmeltha han tih tur chi chu a ni bik miah lova, tlema a kumte a lo upat deuh tawh avang hian tlangval tamtak chuan an iai phah a ni mai a. Mahse, thil dangah chuan a fel lohna sawi tur a vang khawp mai.

Liankima mutna tur an phah zawh chuan Sangkhumi chuan Rothuama chu a zak pahnihah a han kuah a, tichuan harsa lutuk lovin a din pui thei mai a. Rothuama lah dah ang anga awm mai anih tawh miau avangin Sangkhumi chuan pawnah a pai chhuah pui ta khat khat a.

Khawilam nge a panpui ang tih chu a inngaihtuah buai nasa hle mai a. A tawpah chuan an kawmthlanga in ram tawh chu a hrechhuak zawk a. Chuta hruai ngei chu tha a ti ta a.

Engtin tin emaw chu in ruak chu a hruai thleng thei ta hlauh a. A chhungah chuan luhpuiin tunhma zawnga a lo duhthusam thin te chu tihhlawhtlin a tum ruh hle mai. Rothuama lah nikhaw hre lo ang chauh anih avangin dah ang ang chuan a awm tawp mai a.

Zan a rei tial tial a, Rothuama a mutui telh telh a, chutih laiin Sangkhumi erawh a phur tulh tulh thung a. Zing khua a rawn vara Rothuama a rawn harh meuh chuan saruak ngal ngat hian a lo mu bam a. A sirah ruak vek bawk hian Sangkhumi chu a lo muhil bawk a.

Rothuama chu a phu nasa ngei mai. A mumang emaw a ti hial hman a. Mahse, a harh chiang deuh deuh a, a mumang mai a ni lo tih a chiang tulh tulh bawk a. Chutia thawh tuma a chet velnaah chuan Sangkhumi chu a rawn che ve ta tulh tulh a.

Chu veleh Rothuama chu a muhil der leh nghal vat a. Chutia rei tawk fang a muthilh der chhung chuan engtia chulaia lo awm ngawt thei nge a nih tih chu a ngaihtuah nasa hle a. Mahse, Liankima nena an zu tuitling in bak kha ngaihtuah chhuah a nei thei der lo mai.

Chutia a ngaihtuah chhuah theih bawk siloh avang chuan thawm dim thei ang bera thawha haw thuai thuai chu a tha ber ani tih hriaiin a han tho ta them them mai a, a tho chhuak hman tep tih chuan Saikhumi chuan a banah a rawn vuan ta chat mai le...

"Uthuam, hetiang hian min awmpui te te a, min kalsan leh si dawn em ni?" a rawn tih chuan Rothuama chu a bo nasa ngei mai. Chhan ngaihna reng reng a hre ta lo. Sangkhumi lah chu rei lo teah a tap a ni titih ta mai bawk nen, Rothuama chu a buai nasa ta mai le....

episode-74

Rothuama tihngaihna hre lo chuan "Ka haw dawn." tih leh kal a rual ta mai a. Pakhatin man beh a tum a, a man hman si lo. Rothuama chu a han ko vak vak thin a. Ani lah ui puar koh ang vang vangin a kal nal nal mai si.

In a thlen chuan a chhungte tumah an lo la tho lova, a zan lama an hun hman dan leh an zuin dan chu a han ngaihtuah kir sateh thin a. Mahse, engmah chiang kuang taka hriat a nei si lo. A awm lah chu a nuam thei reng reng lo mai a. Chhuatah chuan a vei tawn sek reng mai.

A nu zing tho chuan "Taia, tukin chu i zia a va dang ve, eng emaw lungkham lian tak nei te pawh ang che a." a rawn ti lehnghal a. Rothuama chuan "Lungkham ren run ka neih ka hre love, Liankima te inah ka va kal lawk teh ang." tiin a kalsan ta daih a.

Liankima te in a thlen chuan ani pawh a lo hawng ve tawh a. A ruk deuh hian "Nizan kha kan va han rui awm em em ve a, kan awmdan ka han ngaihtuah kir a. Engmah chiangkuang ka hre hlek lo mai nia. Nang i hre deuh em?" a han ti a.

Liankima chuan "Zu kan in tih kha chu ka hria a. Min hawnsan lai pawh ka hre lo, ka riak nghal tih lah zing ka harhin ka hre chauh." a lo ti a. Rothuama chuan engmah hriat bik a nei lo tih a hriat chuan a rilru a buai tulh tulh mai.

"Ava mak bawk ve mawle, nang talin i hria ang chu tiin ka rawn leng asin mawle." a tih chuan Liankima chuan "Hre bik ikhaw lo mai, a reng thuah kan lo rui dun ve anih pawhin kan rui ani ve mai a. Pawipang kan khawih lah ni hek lo." a lo ti sam leh et mai si a.

Rothuama chuan a hmeichhe riahpui chu a hre miah lo tih a hriat chuan a lawm ru angreng viau a. Mahse, a rilru erawh a nuam thei chuang lo. A thianpa chu hrilh mai nge tha ang a hriat loh rau rau chuan hrilh loh law law mai tih a han ngaihtuah vang vang a. Hrilh rih loh mai chu a tithlu ta a.

"Ani teh tak e a, titeh tul dang i neih lem loh chuan sava i veh mai mai teh ang. Ka hliam hi hetia awm mai mai chuan a dam chak dawn lo riau, nangpawh ini ve tho ang." a han ti a. Liankima chuan "A pawi hleinem mawle, khawi lamah nge kan veh ang a?" a lo ti thuai a.

Rothuama chuan kawlliana bawk lamah bawk ni rawh se, sava an awm deuh berin ka hria." a ti a. Tichuan Liankima chuan a sahmin leh sairawkher chu ala a, Rothuama te in lam an pan dun ta a. Rothuama'n a sahmin leh sairawkher ala chhuak ve bawk a. Tichuan kawlliana bawk lam pan chuan an inzui chhuak ta a.

Feh hawn hun zet tawhah hian Rothuama te pahnih chu an rawn inzui hawng hnak hnak a. Sava pawh an perh thla hnem dun ngiang mai. Rothuama nuin a lo hmuh chuan "Nangni zing sava veh dun mai mai chuh, in ril te pawh a tam ve em em lo em ni? A at hi chu in a dun mang tak e aw!" a lo ti hlaih hlaih a.

Rothuama chuan "A tama hei kan rawn hawng alawm." a lo ti bauh a. Liankima chu engmah sawi lovin a haw tlang nghal a. Rothuama chuan in a luh rualin a sahmin chu chhuatah thehthla tawpin chaw bel a luhchilh nghal miah miah a.

A chawei kham chuan a sava hawnho chu a hmul pawtin a rawh malh malh a. A rawh zawh meuh chuan tul ngaah khaiin a rep tlar dal a, chhung tlem tan phei chuan rin fe tham hi a ni awm e.

Khua pawh a tlai zel a, chutia Rothuama tapchhaka thlantla phanga a tul em em lai chuan khua a thim ani titih der tawh a. Chutih lai tak chuan tlangau a rawn au lang lang a. Tlangau thusawi chuan Rothuama beng a verh nghal zar mai.

Tlangau chuan "Khaih khaih khaih, lo ngaithla theuh rawh u khai. Kan mualkil upa thiannu pi Kapthiangi feh chu tun thlenga ala rawn haw loh avangin tlangval zawng zawng te a zawng tura chhuah khawm nghal tur a ni e." a rawn ti a. Chu chuan a ni Rothuama beng verh em em chu ni.

Tin, Rothuama chang lo pawh a ni vek tho mai. Tumdang ang chu nise tunah khua a thim tan chauh a ni a. Fehhawng tlai deuh leh eng emaw laklawh vanga thleng tlai deuh satliahah ngaiin tlang an au lek dawn lova. Mahse, an khawtlang fimkhur a ngaih lai leh an ralmuan loh lai tak anih miau avangin chutia au tir chu an ni reng a.

Bakah, michhia leh hnamchawm mai mai chu nise an au lo a nih pawhin a mawh lova. Mahse, mualkil upa nupui meuh a lo ni bawk nen, khawtlang ralmuang lo leh leido an han nei thar nen an demawm hauh lo mai.

Rothuama'n tlangau thu a hriat rual chuan a sahminah chemtum a thun a, bang laia a silai leh a mu ala chhuak nghal bawk a. Hrukfai pahin a han endik nghal thuak thuak bawk a. Chutih lai chuan anu chuan "Taia, kal ve i tum em ni pek? I hliam te kha zan zana chhuahpui chi pawh ala nih lul loh kha maw le, mipa dang pawh an tam a kal lo pawh nila an hrethiam em em ang che." a lo ti a

Rothuama chuan a chhang lo. Anu bawk chuan "Dam tha nila ka sawisel dawn reng reng lo che. Mahse, i tana tha tur te em em hi chu hre ve la. I dam anga khawikipah pawh a tulna apiangah i kalin i chechhuak leh thei hma zawk ang. Ka thu hi awih hram teh." a tih ngawih ngawih pawh chuan Rothuama insiam chu a thulh eih lo. "Ka nu, mipa ka ni a, ka tih tur chu ka ti ang, min ngaihtuah suh." tiin biak pawh biak leh hman loh chuan a kal nghal ta nal nal a.......

episode-75

Rothuama chhuak ta chu a en zui vang vang a. "Taia tak hi chu aw, mual hi min la liam khalh nge nge dawn zawng anih hi. I pa i lo chhun fuh lutuk hi chu a pawi ngawt mai." a ti vawng vawng a. Rothuama nau nula chuan "Ka nu i ngaihtuah leh lutuk anih kha, mipa a ni a, eng em a ti bik nang." tiin a nu chu a lo tawng thlamuan ve a.

Lal kawt tual zawlah chuan tlangval puanthuah khai chin chu an kim hle a. An hmanraw neih ang ang rawn thawhchhuahpuiin lal thu sawi chu an ngaithla thup a. An lal chuan "Khai le, ka khua leh tui duhtakte u, hei leido khua kan neih atanga tuibur hmuamda lekah kan boruak chu heti hi a ni nghal pang ta mai a." a han ti a.

Chutah a tuibur hmuam chu a han pik puat a. "Engpawh nise, hetiang kan lo nih takah chuan rin thuin hmelma kut tuar anih rin loh theih a ni lova, sapui vang zawk alo ni palh anih pawhin nangni ka khaw tlangval huaisen leh pasalthate hian in ngawihbopui mai chu ka ring hauh lo. Mahni intipalh leh tluk bah sual vang pawh lo ni sela nangni in awm chhung chuan ka thla a muang a ni." tiin a khaw tlangvalte chu a han fuih phur hmasa te te a.

"Kan leidote thiltih anih meuh erawh zawngin a leta nain kan chhang let tur a ni ang. Min cho tak zet anih chuan hetia rawl rala che lo hian min rawn bei sela ka ti hle mai. Mahse, an thiam ang hi kan thiam lo bik lo tih lantirna hun tha min siamsakah pawh ngai ila, ka lalna hnuaiah hian ka khua leh tuite thlabara in awm hi ka remti ngai lovang. Kal ta ula, engkim in chian hunah ro hran kan rel leh a ni ang chu." tiin a thusawi tlang chu a kawm a.

Tlangvalho leh val upa, pasaltha te nen chuan an mual kil upa nupui feh hawng ve ta lo zawng tur chuan an liam ta mup mup mai a. Chung zingah chuan Rothuama pawh a tel ve a.

Rothuama chuan a thianpa Liankima a hmu ve hauh lo mai chu mak a ti deuh hle mai a. Mahse, chihchang hre tura han zawhna hman a awm tawh si lo. Vawin an sava veh a chau deuh anih a ring ta deuh ber a.

Tichuan meichher nen ram lam chu an pan ta sung sung a. Val upa te chuan hmahruaiin pasalthain an dawt a. Kawng peng awm thei leh hnuhma thar deuh nia an hriatna apiang chu an en thlithlai nghal zel bawk a.

Kapthiangi hi amah maia feh a nih avangin tlangval tamtak chuan ahmaa fimkhur tur an tih leh mahni maia hmeichhia ram kal loh tur an tih te chu a hre ve lo em ni tiin an inzawt ru deuh ha ha hlawm a. Mahse, chutiang boruak duhawm lo a lo thlen takah chuan tumah phunnawi hauh lovin an tih tur theuhah an ngai a ni.

Kapthiangi te lo hi a hlat tham deuh avangin an thleng har phian mai a. Lo an thlen chuan val upateho chuan ro an han rel leh mam mam a. Hmun khat maia zawng lovin pawl hrang hrangah an han in then phawt a, hmatiam neia an lo pumpui dap chhuak dap tur chuan an inbuatsaih ta a.

Tichuan thlawhlaiah chuan an hmatiam thla ta nguah nguah mai a. Thlam zawn an thlen chuan a then an lut a. Mahse, chhun lama a kalsan dan ngai ngai chuan engkim alo la awm fel thlam lawi si. Tichuan lo mawng lam pan chuan meichher nen an tawlh thla ta zel a.

Lo mawng an thlen thleng chuan a ruang emaw, a hmanrua, em emaw chemkawm emmaw leh a sulhnu engmah an hmu ta hauh lo mai. Val upa te chuan a aia uluk zawka lo chu chhoh zawn an rel leh ta a.

Tichuan a chho zawng chuan an hrut chho leh ta a. Mahse, lo lu, vau thleng raka an zawn pawhin engmah hnuhma thar an hmu ta chuang lo. Chutah chuan val upate hrilh a hai ta mam mam mai. Tichuan ro hran an han rel leh ta a. Thlawhlai chhunga zawng tawh lovin vau pika luha zawn an ti leh ta. Pawl hnihah inthenin vau lehlam lehlamah chuan a zau thei ang ber an su eng thla leh ta buan buan mai a.

Chutah pawh chuan engmah an la ang ta chuang lo fo mai. Val upate chu an bei a dawng ru angreng tawh viau mai a. Chutia hawn mai tur nge engtia zawn leh chi nge tih an ngaihtuah mek lai chuan lui mawng hla fe atanga Rothuama aw in "Helamah hian lo chhuk rawh u." a rawn tih ri an hre ta a.

Rothuama chu engtik laia lui lo zuk zawh hman bik nge tih tumah chuan an hre lo reng reng. Mahse, chutia a rawn au takah chuan lo mawng lui lam pan chuan an inzui thla ta nguah nguah mai a. Thui fe an kal hnu chuan Rothuama, amah leh Kapthiangi ruang, lu nei tawh lo chu an zuk hmu ta mai a.

Chutah chuan engdang ni lovin Kapthiangi chu ral beih tawk ngei a ni tih a chiang ta uar mai. A lu chu an hawn ani tih hai rual a awm ta lo. Pasaltha leh tlangvalho chu an inhrosa nasa hle a. Mahse, val upa te chuan an khap a vangin an in bengdai hram hram a.

Tichuan Kapthiangi ruang, lu nei tawh lo chu a zawnna tur hlang an buatsaih nghal a, an siam zawh chuan an zawn hawng ta a. An lo an pel fel tep tih chuan Kapthiangi aw ngei mai chu lo mawngah a rawn khek ta uar uar mai. Hlau thlabar tih hriat tak hian a te ruai ruai mai a, tlangval kei ka ni intiho meuh pawh an kimki chawih chawih mai. Ding meuhin an han ngaithla chiang a, thawm lah chu a ring tulh tulh mai si a, ramhnuaiah chuan a khawk rawih rawih mai le, Rothuama chuan....

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 31st, 2016, 6:55 pm

episode-76

Rothuama chuan "Ka zuk en fiah ang e." tih leh meichher nena kal chu a rual ta mai. Tlangval dang tumah chuan "Ka'n zui ang e" tih tum an awm si lo. Rothuama chu lo mawng lam pan chuan a liam thla ta nal nal mai si. An ruang zawn ber Kapthiangi lah chu a lu awm si lovin lo mawnglamah a khek nasa mai bawk nen, val upa te lu a hai leh ta.

Thenkhatin "Zawn haw ila a reh mai ang" an ti a. Then lahin "Hetiang ngawt chuan a dik lovang" an ti bawk a. A thenin "Rothuama chu "Kal lo se" an ti nuai nuai bawk a.

A tawpah chuan val upa pakhat chu rawn tawng chhuakin "Rothuama kha tu emawin zuk umzui teh u, amah maia kal chu a dik love. Bakah hetiang ringawta hawsan chi a ni hleinem. Fiah theih anih loh pawhin amah tal kha zuk ko ula a tha ang." a tih chuan tlangval huaisen deuh deuh pathum chu an lo penchhuak nghal a.

Chungho chuan Rothuama chu an umzui ve ta nghal a. Kapthiangi ruang an zawn pawh chu nghatin Rothuamate chu an ngaichang leh rih a. Chutih chhung chuan Kapthiang thla chu lo mawng thim zingah chuan a ai ruai ruai mai a. Ngaihthlak a nuam fahran lo kher mai.

Rothuama umtute chuan Rothuaman lo mawng a thlen rual chuan an umphak ve chiah a. Lo mawng an thlen chuan Kapthiangi thla ai chu a insawn leh ta daih mai. Rothuama chuan "In rawn kal ve duh kher anih kha mawle, kan pitar khawngaihthlaki thla chu keiman ka han ko ang e." a lo ti a.

Mahse, amah rawn umphatute chuan "Val upa ten rawn hawnsan tura an tih thu an hrilh chuan Rothuama chuan "Lo han chho ula ka rawn um ang che u." tih leh lo mawng lama chhuk thlak a rual leh ta mai a. A umtuteho chu an hawihai nasa ngei mai.

Zui zel tur nge chhohsan mai tur tih an han sawiho nak nak a, chutia han hawnsan leh ngawt chu nitheiin an hre si lo. Lo mawng luia han zui thlak leh lah chu an chak tawh lo nasa mai si, an rilru chu a insual nasa ngei mai.

Chutia rilru buai taka an inhnial bap bap lai chuan silai puak ri thuai thawm chuan a tiphu nasa kher hlawm mai. Eng thil nge nita ang tia an in en he haw lai chuan Rothuama chu a rawn lang leh ta hlawl mai a. "Tirawh u, i haw tawh ang u khai, hahdam takin a chawl thei tawh ang." a tih chuan rang tak mai hian an haw chho ta a, Rothuama chuan a hnung berah hnung a rawn dawl zel bawk a.

Lo lu an thlen chhoh leh chuan val upa te chuan an lo zawt sap sap a. Rothuama chuan eng danga chhang ta lo chuan "Thlamuang takin a haw theih tawh ang. Hmanhmawh lo khan hma han hruai ula hnung ka rawn dawl ang e." a han ti a.

Tichuan engmah zawt zui duh tawh lem lovin "Anih chuan i hawng ang u aw, hei kan tum loh dan ang tak maiin kan hawn a ngai ta si a. Pasalthate khan hnung han dawl teh u khai." an ti a, tichuan Kapthiangi ruang chu an zawn hawng ta a.

Khua an luh chuan Kaptluangi pasal leh a fate chuan tap chungin an lo hmuak a. Tin, khawtlang mipuiho chuan an lo hmuak bawk a. A ruang an in an han luhpui chuan a fate chuan namen lohin an tah a, a lu hmuh tur awm lo chuan a ti hrilhhai ngei hlawm mai.

A tuk zing khua a lo var chuan tlangvalhoin thlan thuk takin an lai a, an phum hnu chuan lal leh khawnbawl upaho chuan rorel pawimawh tawpkhawk an nei nghal a. Hetia an khaw ramchhung ngeia hmelma rawn lutin pawi an rawn khawih ta mai chu hriatthiam har an ti ngei mai. Chuvangin an leido khua laka phuba lak dan tur chu an ngaihtuah urhsun ngei mai.

Tlai lamah chuan lal leh upaho thurel pawh an hre hman ta. A na thei ang bera thungrulh tur tih chu an thutlukna a ni bur ta mai. Chaet dan tur chu tlangvalho leh pasalthate nena ngaihtuahho atan an dah bawk a. Ch thu an hriat chuan Mualchuan khaw tlangvalho chu an phur ngei mai.

Rothuama pawh a phur kher mai. A thianpa Liankima chanchin ngaichang tur leh a vei em em hmuh leh theihna hun inhawng chu sawipui a chak takzet tawh a ni.

A thianpa te in a thlen chuan zan lama a hmel a hmuh ve loh chhan te a han zawt hmasa a. Mahse, Liankima sawi pawh ngai loin a awmdanah chuan a rin hriat theih mai tlat. A thianpa chu khumah hian a lo mu bam mai a, a chhungte chuan a awmdan leh a na achhuah dan te chu an lo sawi zung zung a.

Liankima chuan a na thup tum tih hriat tak mai hian a chhungte hnenah chuan "Lo phul ve hlut thin lo teh u, engmah chutianga na chhia ka ni reng reng lo. Ka han mu hahchawl deuh mai mai a ni. Kan boruak tawn te ka lo hria a, a zia lo hle mai thianpa." a lo ti a.

Rothuama chuan an lal leh upa te thu rel zawng zawngte chu hrilh pahin a thinlung luahtu hmuh lehna remchang inhawnga a hriat thu te a han sawi chuan Liankima chu a phur kher mai. Mahse, intihharh a tum ngial pawhin ana chu ana hle ani tih a hmelah chuan hai rual a awm lo.

Rothuama chuan "Ni e, tlangval tan heng mai mai chawei titui tawk lek anih hi. Nula rim titui tawk pawh a ni lo, zanin han hahdam se naktuk zan lamah chuan nula lakai bulah a bawk han han peih tawh ang. Chaw te hi han ei nghek nghek mai ila, a nat reng theih ngai loh." tiin a thianpa chu a hnem ve malh malh a..

episode-77

Mahse, Rothuama ngei pawh chuan a thianpa hmel a hmuh chuan a na hle ani tih a hrethiam mai a. Khawi kha danga lensan lovin a thianpa bulah chuan a awm ve ta reng a. Liankima nu leh pate nen chuan titi phung leng te sawiin Liankima chuan a khat tawkin a rawn inrawlh ve leh zauh thin bawk a.

Leng hawn ar a khuan tak thliai thliai hnu chuan Rothuama pawh tin zai a rel ve ta a. An inmangtha hnu chuan a riahna tur lam zawlbuk panin a kal ta nghal a. Naupang pawnto pawh an tin zawh tawh avangin khua chu a reh hle mai a. Hmanhmawh lova kalin a thianpa hliam leh a nat dan te chu a ngaihtuah neuh neuh a. A thianpa chuan a peih loh san mai ang tih te pawh a hlau hlel lo a ni.

Chutia ngawi renga a kal lai chuan lal in zawn a thleng dawn hnai tawh a. Rothuama chu eng emaw hian a mawlh ta tlat mai. A ding deuh dat a, hnunglam a han hawi a, tumah phei chu a hmu lo. Mahse, a rilruah mawlhtu a awm tlat a vangin a hawi kual ruai ruai a. Eng nge a zawn tih pawh a inhre chuang nahek lo.

Chutah lalin lam chu a hawi chho a, zan ala rei lem loh avangin lal leh khawnbawl upaho chuan zu an la khawng ani tih a hriat mai a. Rothuama chuan va kal hnaih a an thawm va ngaihthlak chu a chak ta et et mai. Mahse, mi bihruk te, an thawm ngaihthlak te chu thiang lo ani tih a chhia leh tha hriatna chuan a hre reng mai si a.

Mahse, chumi titur chuan emni a mawlhtu chuan a mawlh tlat bawk si. Mahse, mi naran pawh ni lo, lal meuh lehnghal an thawm han ngaihtlak ruk chu manchhuah anih vaih chuan a dam dawn lo tih chu a kutzungpui tluk lekin a hrechiang a.

Mahse, a rilrua mawlhtu lam chuan a mawlh nasa ngiang mai bawk si a, Rothuama chu a tawi a tawi ta mai. Engti tiha chutia mi thawm ngaithla tura mawlhtu a han nei ringawt mai chu mak a tiin a hrethiam lo ngei mai. Mi ang leh mipangngai tih rual a ni si lo. Ngaithla tehreng pawh nise eng nge a tana hlawkna tur awm? Chu chu a ngaihtuah ngial pawhin a hre ikhaw si lo.

Mahse, a kalsan thei chuang si lo. A tawp a tawpah chuan le, thih leh thih, dam leh dam tih rilru puin, tlawm leh zah pawh dawn lovin lal in lam chu a pan ta nge nge a. Muangchang leh fimkhur taka kalin lal in hnuaiah chuan a put lut ta zauh a.

Lal leh mual kil upaho chuan zuin pahin titi phung leng an sawi a. A chang leh zahmawh rawng kai lek lek fiamthu rawlhin an nui huau huau a. Rothuama chuan ho a tih deuh em avang leh miin an rawn hmu mualpho palh ang tih hlauin kalsawn zai a rel ta a.

Chutia a ruka kalsawn leh mai a tum lai tak chuan thil ri danglam deuh hlek a hre ta tlat mai. Rothuama chuan che miah lo hian a han ngaithla chiang a, chu a thil hriat chu hmeichhe tap ri niin a hria. Lal leh upateho tawng lawng lawng thawm kar hria anih avangin a hrechiang thei lutuk lo a ni.

A thawm lo chhuahna lam nia a hriat lal khum lamah chuan thawm dim tak hian a tawlh hnai ta hriau hriau a. Chutah chuan tlemin hriat a awl ta deuh e. Hmeichhe pakhat, an lalnu ningeia a hriat chu thawm dim tak hian a lo tap keuh keuh a.

"Aw! Chemte, ka fanu neih chhun. Ka enchim loh, ka va hrethiam lo ngai tak em. Engati nge hetiang tura khuavang pawh hian a lo duan bik che le aw! Hriatthiam harsa ka va ti em..." tiin a tap zawih zawih a. A tah hla zawng zawng phei chu upaho tawng avangin Rothuama chuan a hre kim thei lo zawk a.

Rothuama chuan mak a ti ngang mai. A fanu chu eng vanga tah ta mai nge anih ang tih reng a hrethiam lo. A damlo em ni ang? Tap ri bawk chuan a ngaihtuahna a rawn luahlan leh nghal a.

"Chemte, hetiang tur hi em ni dawn le, i nu hi min ngai ve lo em ni lo haw tawh rawh. Aw! Ava mak ngai em, ka hrethiam thei ngai dawn lo a ni i chan hi. Tunah te hian khawiah tak awm ang che maw?" tia a tah zawih zawih chuan Rothuama rilru a tibuai zual kher mai.

Upaho chu an rui tulh tulh a, an tawng ring telh telh mai si. Rothuama chuan tap ri pawh a hriat that theih tak loh avang chuan kalsawn zai a rel ta a. Tichuan fimkhur leh thawm dim taka a tawmna atanga chhuakin zawlbuk lam chu a pan leh ta a.

Tuman an hmu lo hlauh chu a lawm ngei mai. Lo hmu palh awmin lal beng han thleng ngat se chuan a chanin maian chan pawh a tluk kher lovang le. Zawlbuk a thlen thleng chuan a thil hriat chu a ngaihtuah ngut ngut a. A mut hmunah lah thildang reng reng a ngaihtuah thei nahek lo.

Engvanga Chhingmami nu kha tap nge a nih anga? Chhingmami kha engtia tah vak mai nge anih ang tih a han ngaihtuah thin a. A chhan awm ang a hre thei der lo mai. A damlo nge tuma hriat loh hian a lo thi tawh reng zawk? Ni lo, thi lo ang. Thi nise khawtlang hriat loh thu a awm lo. Natna tihbaiawm tak veiin khawiah emaw an khung hrang a ni mai lawng maw? A ngaihtuah thui tulh tulh a Rothuama rilru chu a buai tulh tulh mai. Khawvar thleng raka a ngaihtuah pawhin a chhan niber tur pawh a ngaihtuah chhuak thei thlawt lo. Mahse, engpawh nise an lal te chhungkua, a bik takin Chhingmami chungah hian thil danglam eng emaw tak chu a awm a ni phawt mai. Rothuama chuan hriatchhuah ngei a tum ruh ta tlat a.....

episode-78

A hriat loh karin khua a rawn var chu a ni ta der mai. A thil ngaihtuah a vang chuan chhin khat mah Rothuama chu a chhing ta lova. Hma takah thoin a thianpa Liankima te in lam chu a pan nghal nal nal a.

Liankima te in a thlen chuan anni pawh an lo tho ve tawh a. Liankima pawh mutmu a tuah tha lem lo a ni tih a hmel atang chuan a hriat theih mai a. Amah Liankima zawk chuan "Nizan i mu tha lo hle a ni maw?" a lo tih khalh a.

Rothuama chuan "Mai mai a, ka mu hlum lo chauh a lawm le. Nangmah zawk anih ber bur kha mutmu tuah tha lo chu. Kha i hmelah a lang reng alawm. Tukin lam te eng nge i an ka rawn ti mai mai." tiin a lo chhang a.

Liankima chuan "Ka la tlan pur pur thei lo deuha tih a ni mai e. Tih lohah chuan ka ngaihtuahawm hauh lo." a lo ti ve bawk a. Rothuama chuan "E khai, Khawzing Pathian zarah i dam leh thuai ang." tiin zial a tan a, a pak khu tual tual a.

Liankima nu chuan "Kha a tlangval viau a nia. Thian tha neih hi zawng a manhla teh e maw, zing thang thangah rawn kalin i ngaihtuah em em mai si a. A rulh pawh hi a rul let ve thiam ngut lovang che." a lo ti ve luam a.

Tukthuan ei hun thlenga a thut hnu chuan Rothuama chu a hawng ve ta a. Ani pawh malpui hliam nei ve tho anih avangin engkimah ala khawr deuh tut mai a. Mahse, ani erawh chu a ziaawm viau tawh thung a.

Tukthuan ei kham chuan Rothuama chu feh turin a insiam mawlh mawlh a. A nau hnenah chuan chawfun kha duham deuh turin a han hrilh a. A nu chuan "Taia, feh i tum em ni? Chuti takin lo lam kan la tul chuang lova, i hliam te kha dim deuh teh." a lo ti ve vat a.

Rothuama chuan "Hetia pal mai mai hian a dam mah zawkin ania ka hriat ni. Ka zuk feh mai mai ang e, nangni pahnih erawh chu ramchhuah in tum pawhin kal hlla lo ula atha ang. Tin, kawp nei lo phei chuan chhuah loh a tha zawk a nia kan tunlai boruakah." a ti a.

Anu chuan "I nau te hi thingphurh an tum a, kei phei chu ka puanbu hi tah zawh law law ka duh." a lo ti a. Rothuama chuan a nau hnenah chuan "Fimkhur ula, hnunglama mitnei ang rana khawsak tur. Kei chu ka rawn hma lovang, kan vaua tawitaw kha rawn chan haw ka duh." a ti a.

Tichuan Rothuama chu feh turin a liam ta vang vang a. Nilenga hlo a thlawh hnu chuan an vau sira tawitaw kung chang tur chuan a kal ta a. A channa tur hmun te a duh ang tawka a siam zawh hnu chuan ngawi rengin a thu ta ran mai a.

Thosi leh vaihmite lah chu duhthusama tam an awm a. Zial lah zuk chi a ni si lo, Rothuama chuan a sepui ruah tuar nget nget mai a. Khua a thim lek lek tawh tih chuan sakhi pachal zet mai hi a rawn lang ta zan zan mai a.

Rothuama chuan kah ngei tumin a han tin vang vang a. Mahse, ala hlat deuh avang leh thing leh thing inkar taka a awm avangin a lo kal hnaih a han nghak leh rih a.

Rei vak loah sakhi riltam chu a rawn hnai ta mai reng a. Lan pawh alang chiang ta, kah nuam tawk leka hla anih tawh bawk avangin Rothuama chuan a silai chu a han lek kang leh raih raih a. Mahse, a silai a hmehper dawn lai tak chuan a chhaklam atang hian a sakhi kah tum chu eng thawm emawni hian a rawn hnawhsak ta daih mai le.

Rothuama chu a hrilhhai ngei mai. A chhaka thawm rawn chhuahna lam chu a han hawi chho a, engmah lah hmuh tur a awm mang si lo. Sakhi lah chu hlate khua a thleng tawh si. Rothuama thinrim chu a insawh a insawh a.

Tihngaihna dang awm ta hek lo le, a sachanna atanga chhukin a sachan rawn hnawttu awmna lam chu a pan chho ta a. Mahse, thawm leh a rim a ra hriat tur pawh a awm lo. A thawm atang kha chuan sa lian tak anih loh a rinawm si lova, Rothuama chuan mak a ti viau mai.

Tichuan hawn mai zai a rel ta a. A hlawhtling ngei dawna a inhriat tawh vei nen, chutia kutbenga han hawn leh si chu a hrilhhai thlakin a thinrim thlak tak reng a. Rothuama lung pawh a awi thei zan lo chu a ni.

Mahse, chutia a inngaihtuah thinrim teuh lai chuan a hma lawka sanghal kawngkan tum, phit dut dut chu thlaeng deuh riai hnuaiah chuan a hmu ta hlauh mai le. Rothuama chu a ding chawt a, tin pawh tin mumal hman lo hian a han kap ta thuai mai a. A kap fuh kher em bawk a, chu sanghal chu hniak phawi eih lovin a let nghal tawp a. Rothuama chu a lawm ngei mai.

A hmuna a'n belh chian chuan sum ruk zet tur hi a lo ni lehnghal a. Tichuan vannei inti takin a pu haw ta hnuang hnuang a. In a thlen chuan thenawm khawveng paho punin an chan nghal a. A thianpa Liankima chu thian sabeng a hleh bawk a. Liankima chhungte chu an lo lawm thiam ngei mai.

Hun te a liam zel a, Liankima pawh zawi zawiin a dam ve hret hret bawk a. Rothuama leh midang pathum te ralven zan a rawn inherchhuak ta a. Liankima a la dam chian loh em avangin Rothuama leh midang pahnih chu hmun khata awmho turin an ti a.

Rothuama chu a phur kher mai a. A thiante pahnih lah chuan Rothuama an awmpui dawn avang ringawt chuan an thla a muang ve em em ringawt bawk a. Tichuan an ralvenna tur hmun pan chuan an inzui chhuak ta dam dam a....

episode-79

Rothuama ten an ralvenna tur hmun an thlen chuan titi pahin fiamthu te an thawh a, hlim takin an nuiho dar dar a. Mahse, a tlai hnuah erawh chuan tumah tawng tawh lovin fimkhur takin an mit leh beng an chhi ta zawk a.

Mahse, an rin ang hehu chuan ral leh sa thawm pawh an hre chuang lova, fimkhur tak leh inralring rengin an awm ngawt ngawt mai a ni. Rothuama chuan chutia engmah thawm hlauhawm leh hmelma thawm pawh hre chuang si lova zankhua maia han awm chu a ninawm dawn hlein a hria a.

Mahse, tih theih dang vak erawh a nei si lo. A khat tawkin an inbe leh zauh thin tih mai loh chu an ngawi tlawk tlawk mai a. Chu chu Rothuama nin zawng tak mai leh a tih theih loh zawng tak mai a ni tlat mai. A tawpah phei chuan "Hawh u, mei te i zu ang u. Hetia ralkhel taka awm ngawt ngawt mai zawng ka tlin lo tawp mai. An duh leh lo kal se la, kan innuai hrep anga a ni mai." a ti ta nge nge a.

Chu chu a thiante remtih zawng tak mai anih avangin mei te an zu ta hlat hlat a. Tawng erawh an tawng ring ngam lova, zawite tea inbiain eng eng emaw an sawi hlut a. Chuatia an titi tui viau lai chuan leng hawn ar pawh a rawn khuang ta al al a.

Rothuama ralvenpui pakhat chuan "Kan ralven zan ni lo se aw, nizan lama kan nula rim bulah khan thlamuang taka bawkin a samzai ngei maia meizial min tawnsak kha han pak khuk liai liai mai ka va chak em." a rawn ti chhuak phawng mai a.

A thianpa chuan "Ngawi teh thianpa, i huatthu sawi tum zawng ka ni hauh lo nain vengchhak mualkil upa fapa min khian a rim ngawrh ve viau an ti a nia. Hmanniah pawh an pahnih chauha an thingphur tur kal lam an hmu a ni awm e. Chutia ngaih tihthat viau ngawt chu a sual thei ve tho ania." a lo ti a.

A thianpa chuan "Uai, chuti elaw lo maw? Chutiang thu te chu i hriat veleha min hrilh turah ka ngai che sin." a lo tih chuan a thianpa chuan "A dik khawp mai. Marawh chu itan hriat nuam a ni dawn lova, sawi leh hrilh kher ngai lova i lo hriat ve mai ka lo ring atinni." a han ti a.

Chutah chuan an ngawi tlang ta diak mai. Engnge an ngaihtuah tih erawh tuma hriat va ni suh. Mahni ngaihtuah zawng zawng ngaihtuahin an reh ta thiap a. Chutia an ngawih tlan thap lai chuan veng mawng lam atang chuan "Sa a tla e!" tih thawm an hre ta tlat mai...

Rothuama chuan "Engtinnge kan tih ang le, ral veng tura ruat kan ni si a. Sa tlakna lamah chuan kan kal vek mai dawn nge kan hrelo der mai dawn?" tiin a thiante chu a han rawn a. Anni lah chuan "Nang upa ber i ni a. I tih dan dan a ni mai." an lo ti sam et mai si.

Rothuama chu a han inngaihtuah vang vang a. Hetah hlauhawm leh ral thawm an hria azeng pawh a ni lova, sa tlakna lamah chuan tlan ve mai ila a sual lovang tih a ngaihtuhah a. Tichuan "Kal ang u le," til leh amah chu tlan a rual ta mai a.

Chu veleh a thiante pahnih chuan a biling a balingin an rawn umzui nghal a. Mahse, Rothuama meuh chu zanthim hnuaiah chuan an umpha lo kher mai. Tichuan mahni tlan tlanin veng mawnglamah chuan an tlan ta ngar ngar a. A thiante pahnihin veng mawmga sa tlakna hmun an thlen chuan Rothuama chu ramhnuai lamah a lo tlan lut leh daih hman tawh mai.

Rothuama chuan meichher nen sa tlakna lam chu a chhui nghal char char a. Alo kal hmasa leh hmahruaituho chu rei lo teah a um phak nghal a. Chunghoin Rothuama hmel an hmuh chuan sawi kher lo mahse an thlamuan phah hliah hliah a ni tih hai rual a awm lo.

Tichuan Rothuama ho chuan sapui hnu chu an chhui ta ngat ngat a. A tawpah chuan kawr chhengchhe zet maiah hian a hnu chu an chhui tawp ta a. Rothuama chuan fimkhur a ngaih zia hriaiin tuman tawngpawng bawh ngawt loh tur a han ti a.

Rothuama chu an aia naupang zawk nimahse a thusawi chu tumah zawm tum lo an awm lo. Kawr chhengchhe zet maiah chuan a lui mawng lam panin sapui hnu chu an chhui thla ta a. Rei ngial an chhui hnu chuan puk pakhatah hian sahnu leh thisen far chu a lut ta tlat mai.

Rothuama chuan "Kan sahuai chu hetah ngei hian a lut tih a chiang mai a. A salak pawh a pu lut ngei ang tih a rinawm bawk a. Tuinnge han luh chhuah tak ang le? Kan luh chhuah loh zawngin chhuhsak emaw amah han thah ngaihna a awm miau si lova." a han ti a.

A thiante chuan tumahin an chhang lo. An ngawi thap hlawm a, Rothuama chuan a han en kual dan dan a. Tumahin a zawhna chu an chhang dawn lo a ni tih a hriat hnu chuan "Aw le, keimah ka lut ang. Nangnin hetah hian min lo nghak ula, rawn hual chhuah ka tum ang e. Ka rawn hual chhuak thei ta lova ka vanduai ta anih chuan ka silai hi ka hmet puak tho ang a, chuta tanga tuibur hmuamda hnuah pawh ka rawn chhuak lo a nih chuan ka thi taah in ngai dawn nia." a han ti a.

Rothuama thusawi chu tumahin an chhang lo. Rothuama chuan an chhan pawh a ring lova, a beisei hek lo. Tichuan sakei luhna puka luhchhuah tur chuan mipakhat meichher ken eng ber chu a laksak a. Tichuan meichher eng nen sakei luhna pukah chuan a lut ve ta a. A fimkhurin a hmanhmawh lo kher mai. A kalna leh meichher en chin chu pakhat mah hmuh hmaih lo turin a en ngun bawk a......

episode-80

Thui a kal hmain Rothuama chuan sakeiin a saseh a lo thutchilh ran mai chu a hmu ta a. Sakei chuan Rothuama a hmuh ve leh a inhrosa nasa nghal hle a. Rothuama chuan a hlau eih lo, mahse hnaih lutuk erawh a tha ber lo tih hriain hla deuh tak atang chuan sakei chu ngun takin a en reng a.

Sakei chuan a saseh chu chhuhsak a hlauh hmelin a huamhauh a tihnat hmel kher mai. Rothuama chu bei em lo mahse a saseh rapbet chung chuan Rothuama chu a vau chher chher mai a. Pa naran tan chuan khurh zawih zawihna tham a ni.

Rothuaman chutia ngun taka sakei a en reng lai chuan sakei chu ahma daiha a lo kah hliam tawh ngei mai kha a ni tih a ke hliam a hmuh rual rual chuan a hre thei nghal a. Rothuama chuan mak pawh a ti angreng viau mai.

Rothuama chuan kah nghal mai tur nge ni ang tih a ngaihtuah nasa hle a. Chutih lai chuan puk pawn lamah chuan a lut ve ngamloho chuan Rothuama chu huaisen an tih zia leh an tluk loh zia hahipin an lo sawi ve bawk a.

Chutia an tawng mawlh mawlh lai chuan an saum ngei mai chu puk chhung atang chuan a rawn dawk chhuak ta zawk mai a. An hlauin an phu chiang hlawm ngei mai. A then phei chu an han tlanchhe hman dawn a. Mahse, a sakei bera zawk chu lo kah hman ngaihna pawh awm loin a tlanchhe tlang nghal buan buan a.

Silai ri an hre bawk si lova, Rothuama pawh chu alo seh hlum ve ta mai anih an ring a. Sakei awm tawh lo mahse puk chhunga luh chu a huphurhawm an ti tlang hle mai a. Chutih lai chuan a nawlpui pawh an rawn thleng khawm ve mek bawk a. Thil awmzia an sawi nak nak lai tak mai chuan Rothuama chu vawk hnuk chungin a rawn chhuak ta luau a.

A thiante chuan "E khai a, i silai ri kan hre si lova, a sapui ber kha rin loh ber maiin a rawn lim chhuak thut ta mai si a kan ngaihtuah hman nasa che asin. Eng nge maw thil awmzia le?" an lo ti a. Rothuama chuan "Ka silai ka han hmet puak dawn a, a ri ka kerh mai si a. Ka han chhut nawn tir ngial pawhin a tlawlh zel mai a. Silaimu dang ka lakchhuah chhungin a rawn tlanchhuak ta mai anih kha." tiin a chhang a.

A sakei ber that ta chiah lo mahse a saseh ber an chhuhsak leh avang chuan an lawm hle tho a. An zinga val upa chuan "Khuavangin ala hum a ni ang e, alo kal leh hunah zawng kan that tawh em em ang. Sa leh ral lakah hian kan fimkhur zual a ngai viau anih hi tunlai chu." a ti a. Tichuan vawk chu an zawn hawng ta a. Rothuama te erawh an ralvenna lamah bawk an kir leh ta thung a.

Zan pawh a rei thawkhat viau tawh a. Ral chu rawn lang dawn ni sela chuan an rawn lan pawh a hun thawkhat viauin a lang. Mahse, zan dang ang bawkin an rawn lang dawn lo pawh a ni maithei. Khawvar lam hnaih thuak tawhah chuan Rothuama chuan "Ral hi an rawn lang dawn lo ani ang e, a lawmawm lamah ngai ila. Tirawh u tlaivar kher a ngai loh hi i tinsan ang u." a ti a.

Rothuama sawi ang chuan tun ang hunah pawh an la rawn kal loh chuan an rawn kal dawn lo anih an ring ve mai a. Tichuan an inzui hawng ta a. Rothuama chuan "Tikhan zawlbukah pawh riak duh tawh lo ting tang mai rawh u. Thiante mutui lai tihharh a hlauhawm mai mai e, mahni in lamah theuh kan mu mai dawn nia." a tih pawh chu an pawm hle.

Chutia an pen darh tak hnu chuan Rothuama chu an in lam pan ta mai lo chuan lal mual lam a pan chho a. An lal in bul a thlen chuan an lal thenawm chiah te kawm thlanga thingkung buk hniamte ah chuan a lawn nghal that a. Thutna tur a han siam rem hnu chuan an lal in chu a lang chiang ngang mai. Chutah chuan Rothuama chuan beisei nei takin a thu ta ngar ngar a.

Dik taka sawi chuan chutia thil dang tih a duh vanga a ralvenpuite pawh hruai hawng chu a ni pakhat a. Tin, tun ang hun thleng pawha ral an la rawn lan loh chuan tlaivar pawhin thu se an rawn kal chu a rinawm vak tawh chuang tlat lo a ni.

Chulai hmunah chuan Rothuama chuan eng thil nge a chan tak ang? Eng nge lo kal se a tih a tunge hmuh a inbeisei tih chu hriat har tak a ni. Mahse, khawvar hma hret chuan a thil beisei chu a chang chhuak ta nge nge a. An lal in kawmchar pik kar atang chuan sakei chu a rawn chhuak ta le. Thawm nei miah lovin lal inah chuan a zuangkai nghal thauh a.

Chu veleh Rothuama chu a tawmna atangin rang takin a chhuk nghal a, tlawm leh zah pawh dawn lovin lal in chu a bihthla nghal a, chhingmami mu tur, a kamsir vela thisen la kai lei luai chu a zuk hmu ta a. Rothuama chu rang takin a kalsawn nghal nal nal a.

Aw le, tunah chuan engkim a chiang ta. An lal fanu fel leh hmeltha, an chhuan tlan em em hi Keimi ngei a lo ni tih Rothuama chuan a chian ta. Amah Rothuama ngei pawh chuan mak a ti em em a. A ngaihtuah chian poh leh mak a ti tulh tulh mai. Sawi chhuah chi a ni ang em? A sawi chhuah vaih chuan an lal chuan a that ngei ang le, a sawi chhuah loh lahin mihring leh ran an mang chak lutuk dawn si. Engtia tih tur nge tih a hrethiam ta lo ngei mai. Mahse, a thianpa leh a sangawi zawnpui Liankima erawh hrilh ve vat thain a hria a. Ani pawhin a hriat hunah chuan mak a ti ve teh ang chu le..

next

http://storyfb.com/viewtopic.php?f=15&t=599

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)