A KIN TA.. BY Toni Râlte

Ngaia
Site Admin
Posts: 8829
Joined: April 30th, 2016, 4:07 pm

A KIN TA.. BY Toni Râlte

Unread post by Ngaia » March 29th, 2017, 5:12 pm

A KIN TA..
.
_ Toni Râlte
.
Chu mipa ruang inkhai zar mai thlir chung chuan nula pakhat hi a ţap zawih zawih a. Police lo thlen hmaa khawihsan chu nia an hriat loh avangin chulai bulhnaia awm te chuan an la lathla duh lo va. Mipa kum 21 awm vel tur, hang lam leh sa ţha ve angreng fu, hmelchhe lem lo tak ani a. Amaherawhchu, a thih dan runthlak tak avang chuan a hmel hmai chu anih tur ang a ni pha lo tih erawh a hriat. Police an rawn thlen hnu chuan an la thla a. Ruang hmu hmasa bertu an inchung nu chu ko hrangin thu an zawt fiah a.
.
"Tlai lamah kan pa kaisan lawm nan ui kan talh dawn a. Phuihnam kan mamawh si avangin, Rina (mitthi) hi va bazar lawk tura tirh ka tum a. Kan fate lah tirh tham an la ni chiah lo nen. Kawngka a lo inkhar ţhiap a. Ka ko va. A reh vung vung sia. A muhil anih ringin kawngka chu ka pawt hawng a. Kan tih fô dan ania. Tichuan, a roomah luh ka tum a. A lo inkalh sia, 'Rina..Rina' ka ti vak vak a. Min chhang bawk si lo. Kawngka ka sawi vak vak a, a kalhna a chhia nge ni. A inhawng thut a. Rina lo inkhai chu ka hmu ta mai a ni.
.
Ka hamhaih lutuk a. Chet lak nachang pawh ka hre lawk lo. Chutah kan pa ka ko tuar tuar a. A ni a rawn chhuk . Rang takin kan pa chuan a chawikang a. Mahse, kan tlai tawh lutuk a ni. A lo khawng vek tawh. Mak ka ti tawp thei lo. Rina'n hetiang thil a ti thei hi..awih harsa ka ti lutuk" a mittui hru chawt chawt chung chuan a ti a. A bula a pasal lo ding ve reng pawh chuan a lo kamhnih ve bawk a.
.
Mitthi hming chu Rinawma a ni a. Lianpui khua atanga lehkhazira a farnu nena rawn awm an ni a. Rina hian M.A (Eco) zir in, a farnu erawh chuan M.A (Geo) a zir thung. Lehkhathiam thei tak an ni a. Thingtlang atanga rawn awm tih takah thawh hreh engmah an nei lo va. Inhlawhfa chunga zir an ni bawk nen. Class pawh an kal tha lutuk lo va. Mahse, a thiam thei pawl tak chu an ni ve zel.mai.
.
Amah leh amah a intihlum mai chu mite mak tih a tling lo thei lo va. Amah hrechiang tu te tan hlei hlei chuan a mak a ni. Mahse, mi tha leh fel tak nia kan ngaih te pawh hian chak lohna an nei ve vek a. Rina thih chhan chu tuman hre lo mah se..engemaw tak beidawnna a nei ang tih chu mi rin dan a ni. A farnu lahin chutianga a û a awm leh ngaihbel tura a danglam a hre hauh si lo. An khaw lamah an hawnpui a. Lianpui khua ten tlumtea thlir taka an lo thlir ve an khaw tlangval chhuanvawr ve berin a zirna zo hman lo va a khamphei zawnga an khua a lut chu an tuarin, hrilhhai thlak an ti kher mai. A nu leh pa ten beiseina sang tak nena an lo thlir, a hlawhtlin hunah nuamsa ve deuh hleka an awm theih beiseina nena an lo nghah an fapa chu khawvelah hmuh tur a awm ngai dawn si lo a.
.
MZU Boy's Hostel chu a reh vawng vawng mai. Thil mak tak a ni. Dar 12 a pelh tawh chuan tumah zun zunga room chhuahsan duh pawh an awm tawh lo. He thil thleng hi kar khat liamta atanga thleng a ni. A zankhatnaah chuan, An Hostela tuai awmchhun, Ventea an tih mai chu tui thun turin a kal a. Chhawng chung lama cooler a chhiat avangin hnuailam a pan a. Dining room bul cheta cooler ami tui chu a thun a. Dining Hall bul chiahah an Warden Room a awm a. Mahse, tun hnaiah an warden chu a chhungte thihna avangin an khaw lamah a haw mek a ni. Ventea chu tuai tih takah chulai hmun thim deuh rek ruk chu a nel fahran lo va. Tui lah a haw muang si. Chhawng hnuai ber anih bakah a chung chiaha room ho lah chu a reh thap bawk si a. Roomah tawm khawmin titi vawrh mam mam an hrat ve bawk a. Han vei kual vel an awm mang ngai lo.
.
Chitia tui thuna a din reng lai chua, Warden room atang chuan thawm a lo awm a. Thirtianga chhuat khawng bal bal ri ni maiin a hria. A tirah chuan a hlau viau a. Mahse , an warden a rawn haw tawh aniang tiin a inhnem a. A thlamuang ta phian a.
.
Mahse, vawilehkhatah Dining Hall kawngkhar chu a rawn intheh hawng ţhuai mai le..ventea ţe thawm chu a ring kher mai. A bottle pawh la hman loin inchung lamah a tlan chho a. Room lo hmasa berah chuan tlan lutin a thaw hlawp hlawp a. Mi pathumin an zuk fiah a. A lo inkhar leh diam tawh thung. Engahmah an ngai hlawm lo. Ventea chu an chhaih an chhaih zawmah a. Ani lah chuan a la hlau nasa si.
.
Tichuan, zantin maiin thawm danglam an hre ta fô a! Zing dar 3 bawr velah ke pen ri thlep thlep thawm te, hmeichhe nui hak hak ri leh ţap thawm te an hre ta nuk mai! Zan hnih khat vel chu an han fiah ve a. Pen ri a lo awm veleh an tlanchhuak.huk a. Mahse, tumah hmuh tur a awm lo. Ţap thawm awmna zawn nia an hriat lah a inang lo nuaih zel bawk si. An warden lo haw chu an han hrilh ta sap sap hlawm a. A lo awi sak lo naa zan hnih a riah hnuah a insawn ta daih! Tlangval rual ţhah chhaih.buaia ţi taka siamtu chu eng tak ni ang maw...
.
Remsanga chu nizan lama a mut that tawh loh avangin chau zetin a mu bal a. Reilote a chhing sek a. A chhan pawh sawi tur awm loin a harh leh hlawl mai. Sana a en vat a. Dar 3:27 a.m a lo ni va tawh a. A roommate Mapuia lah a û te inneih hmangin a haw daih si. A hlau chuang lo naa..a awm chu a nuam fahran lo. A phone a han hmet eng a. A bialnu Masangi thlalak chu a lo nui sang a. Masangi hmel a hmuh rual chuan a inthlahdul a. A awm anuam huai mai. Ni e, a bialnu nen hian thla 3 vel chu an inzui ve ta a. Mi ten lerh leh easy ve tak angin sawi thin mah se,a mitah chuan nula thianghlim leh duhawm tak a ni tlat si! An hausa a. Thian pawh a ngah. A incheina a nalhin a class thei khawp mai. Chung a ngaihtuahna te vang chuan Remsanga chu a nui sak a. Mahse, a nui rei lo. An room kawngka chu an rawn kik a. Hawn tur nge hawn loh tur tia a inngaihtuah lai chuan a hma aia nasa in an lo kik leh a. A thiante tuemaw tak an nih ringin a va hawnsak ta nge nge a. A beisei loh lutuk thil a hmuh rual chuan a auchhuak hman ţhelh a! A ka a romola rawn hup tu chu tha tawpa ţang anih avangin reiloteah mutchhuakin a rawn zem ta chiai chiai a. A tlu ta thlawrh mai.
.
Dingliana chu Remsanga'n a note a hawhsak la turin Remsanga te room kawngka chu kik tumin a han tin a. Mahse, kawngka chu a lo inhawng deuh a. "Tho hma ve teh mial ani maw" ti rilru chungin a nam a. A lut nghal a. Khum nghenga lo ţhu sawp niah Remsanga chu a meng kur a. A mitmengah chuan hlauhna nasa tak a inphum tih hairual a ni lo. A hrawk chu zai ani tih hriat takin thisen a far tluk tluk a. A thisen a la khang loh danah a thihna a la rei lutuk lo anih hmel. Dingliana chu a khur nasa ta mai a. Rang takin a thiante a ko khawm a. Room chu thisen a vangin a thang huam huam a. Mahse, ruang entu te chu rooomah an khat hmur tho.
.
Police te pawhin chhui ngaihna an hre vak lo hle mai. Thu an han zawhfiah hlawm lah chuan, Thlahrang aniang tih thu an dawng chamchi a. A hma kar atanga thawm an hriat tawh te an han sawi phei chuan, "Ani mai awm tak e" tih rilru te pawh put a awl viau dawn mai. A roomamate lah a hrilhhai rualin a awm loh lai khera hetiang thil a thleng hi mak a ti a. A tiril a khur der der fô! An room bul chiah ami te chuan Remsanga te room kawngka kik thawm chu an hria a! Mahse, vanduaithlak takin kha thlahrang bawk kha anih an rin vang leh an manghriat deuh avangin fiah turin an chhuak ta lo a ni.
.
Remsanga thihna chu a bialnu Masangi chuan a tuar ve viau a. A ngui bur reng mai. A hma lawkin Remsanga thianpa ber Rinawma ainawkhlum tawh a. Tunah Remsanga a ni leh a! He thihna phenah hian thil engemaw chu a awm ni ngeiin a lang.
.
"Zampui, eng maw i ei dawn?" Tia a thiannu Sentei'n a tih chuan a harh zawk a. " chow a ni mai" a ti sap a. A û Rinawma a inawhhlum hnu atang khan a hlim hmel hmuh tur a vangin, a ngaihtuahna a kawm nasa hle thin a. A thianthaber Senteii pawh hian tihngaihna vak a hre bik lo. Mahse, Zampuii tawrhna chu awm a tih puiin a hrethiam hle. Unau inngeih leh infiam nasa thei tak, thil engkim inhrilhtawn thlap thin leh lungrual em em an ni a. An inluaha leng thin te hian an unau inhmangaih thiam zia chu an hrechiang khawp mai.
.
Khatia a û in a thihsan takah chuan amahin khawhar takin an in chu a luah leh a. Inneitu te chuan an khawngaihin engkimah chhawmdawl a. A û khan a hmangaih em vangin a A\c ah a pawisa thawh chhuah ang ang te a lo dah sak a. Chungte leh zan part timea a inhlawhna te avang chuan harsa lutuk loin a tal chho ve naw naw zel a ni.
.
"Sente, enteh..u masangi saw..hmanni lawkah Uremsanga a thi a. Tisawn mipa dang bulah a nui leh har har thei ania. Hmeichhe mak tak zawng a ni" a ti nghat nghat a. Senteii pawh chuan a thiannu rilru chu a hriatthiampui khawp mai. Ani zawngin a û thihna chu thla engemawzat liam tawh mah se, vawiin thlengin a la sûn a ni si a!
.
Lisa class bang chu bazarah a pengkawi a. Perfume manto zet mai a lei hnuin phur sarhin inlam panin a haw ta a. An thianpa Remsanga thih dan chu a ngaihtuah zui neuh neuh bawk a. In a thleng a, a inbual fai a. Chaw a ei peih hrih loh avangin a room lamah laptop chhawpin a online mai mai a.A phone rawn ri ral ral chu la in, "Hello" a tih rual chuan, a reh leh daih a. 5 minutes hnu velah text message a dawng a. "I thianpa Remsanga that tu i hriat duh chuan zanin dar 8 ah inveng UPC Biak in bulah lo awm rawh..nangmah chauhin" tih thu a ni tlat! A phu zawk a. A chiâi kher mai. Chu number chu a call a. A inswitch off hmak bawk si. A chhungte a hrilh dawn nge..Remsanga chhungte a hrilh zawk ang tih a ngaihtuah buai hle. A chhungte a hrilh chuan kal chhuah an phal sak a ring si lo va. Tichuan, Remsanga nu a call a, engkim a hrilh ta vek a. A thianpa thattu zawnchhuah chu a mawhphurhnaah a ngai hmak a. A hrechhuak anih chuan a hmingthain a lar hat dawn tih a hre ve kar a. Chuvang chuan a pheikhai pawh a zang kher mai.
.
Chhuanlam siamin an in a chhuahsan a. UPC Biak in bul chu a thleng ta thuai a. Inkhawm zan a ni lo bawk a, a reh ţhuap mai. A vawt deuh sûk tawh bawk nen. A khur lek lek a ni.
.
Rei tawk fang a din hnu chuan text a dawng leh a. "I dinna hmun atang khan hmalam panin kal leh la. Dinglamah peng la . ka lo nghak ang che" a hlau tan riau tawh nain a ti tawh ta sa sa..a kal leh ta a.
.
A kawng peng sawiah chuan in a awm pheuh pheuh chauh a. Street light an chhi bawk si lo. Kir leh mai a duh rum rum mai. Mahse, a hma pen sawmhnih vela mihring hlimthla ding chuan a tiphur leh ta deuh a.
.
"Tu nge ka thianpa chu that?"
.
"Keimah hian mawle" a tih ruala chemte tle zawk chu a hmu fuai a! A hrawk lum pup pup chu a hre awrh a ni. A mit sulh sulh a. A tlu ta hnawk mai. A chhing ta riai riai a. A thim ta vek mai
.
Lisa ruang hmuh a nih thu chuan zoram khawvel a deng chhuak leh ta. Kar hnih liam ta maiah mipakhat thah a lo ni tawh bawk nen. Mipuite chu an ralţi sawt viau a. Police ho lu pawh a hai ve hle a ni.
.
"A thiannu Masangi nen an project pakhat chhunzawm a ngaih avangin chhuah min dil a. Kan lo phalsak ve mai a. Zan dangah pawh a zirlai avangin a chhuak fô a. Ngaihthat lohna tur kan hre lem lo. Mahse,...tikhan a ruang an hmuh thu an rawn sawi leh ta mai bawk sia...aw...ka fanu..bawihte" tiin Lisa nu chuan ţap chungin Police ho bulah a lo sawi ve mek bawk a. Lisa ruang hi zing dar 4 velah Taxi Driver pakhatin a hmu a ni. He pa hian Saitualah passenger a drop a. A haw lamin a hmu a ni. A tirah chuan nula zurui satliahah ngaiin a tlanpel a. Mahse, ngaihthat lohna riau a neih avangin a va pan tha leh ngat a. A thisen pawh a lo khang vek tawh a ni. A thihna hmun leh a ruang awmna hi inhlat lutuk lo mahse..a ruang awmna hmun hi fianrial angreng tak, biru lek lek a ni a. Tin, ruah a sur cherh cherh avangin khawlai chhuak an awm tam lem lo a ni.
.
"Hmanni lawka kan tlangval thihna nen khan a inzawm tlata hriatna ka nei" Inspector Lalrinnunga chuan a ti charh charh a.
.
"Nia keipawh ka lo ngaihtuah mek a. Remsanga nen khan thiantha ve tak an ni a niawm e. Remsanga bialnu leh Lisa hi best friend an nia" a bula thu chuan a lo tuihnih a.
.
"E..lawkin..hmanni deuha inawkhlum ta leh Remsanga pawh hi thiantha lutuk nia sawi a ni ve tlat! Um..kan pawh dawn ţan e..a rang thei ang berin Remsanga bialnu chu kan hmuh a ngai a ni"
.



Link:
BBcode:
HTML:
Hide post links
Show post links

Ngaia
Site Admin
Posts: 8829
Joined: April 30th, 2016, 4:07 pm

Unread post by Ngaia » March 29th, 2017, 5:12 pm

Masangi hi nula chhe lo leh khal zet mai a ni a. A thiannu thihna chuan a nghawng na in tawrh harsa a ti ve khawp mai. Chutianga a bulhnaia awm thin te an thih tak pheuh pheuh hnu phei chuan a awm a nuam lo viau a. Rinawma kha chu mi thah ni lo mah se, Remsanga leh Lisa chu thah ngei tih a chiang si!
.
"Nula, inthianho hian hmelma in neiin i hria em?" Pu Rinnunga chuan a ti a. Masangi mitah chuan a melh kar bawk a.
.
"Neih pawh ka hre lo. Han sawi tur ka hre miah lo" a aw chu a khur deuh a.
.
"Remsanga kha i bialpa a ni a, in pahnih inkarah khan tlakzep tum an awm lo i tihna em ni?"
.
"Awm miah lo. Ka pu..kan pahnih khan kan inhmangaih em em a, tihbuai enah pawh min en lo niin ka hria" dawt a sawi tih Pu Rinnunga chuan a hmuthiam tlat. Mahse, a zawh belh duh hauh lo.
.
"Lisa khan a thih zan khan nangmah nen lehkha zir tur angin a insawi a..in inhmu tiraw?"
.
"Aih, tlaiah kha chuan kan inbe ngei a. Mahse, chutiang thu engmah kan sawi lo. Engvangin nge chhuanlam siama a chhuah tih ka hre lo bawk" thudik a sawi niin a lang.
.
Lisa phone lah kha a bo daih bawk si. Tualthattu hian a la bo a ni ngei ang. He tualthattu mi rothap tak hian engtia chet lak zel nge a tum dawn tih tuman an hre lo. Mitin te chu an ţi hru vek mai.
.
"Sente, masangi ka khawngaih leh tawh zawk. A thianthaber a chân leh sia. Amak ee tiraw..Lisa thihna leh ka û thihna pawh kha a inzawm ka ring tlat mawle.." zampuii chuan a ti sar sar a.
.
"Awii..kei pawh ka rin dan chiah. I û pawh kha mahni intihlum a nih ka ring lo lek lek tawh . URina kha mahni intihlum chi niin ka hre lo. "
.
"Ni e, ka û kha amah intihlum ni loin thah a ni" A mitmeng chu a tak ngal mai a. A û thihna zunzam chuan hei chen a tibuai ta chu a ni a. Nula vanduai tak chu a ni.
.
Zampuii hi nula ngo vir ver, lian em em lo a ni a. A sam kir lek lek chu a tihkir chawp a ni lo a. A mawipui hle reng a. A class bang chu inchungah a peng kawi a. Inchungnu nen an titi luam a.
.
"Nu sang, tunlai chu tualthahna a tam sia, ka û thiante an ni vek lehnghal. Ka ngaih hi a tha thei lo reng reng" a ti charh charh a.
.
"Dik chiah. I pa Hnuna nen pawh kan lo sawi kan lo sawi asin. Zanin atang chuan lo riak chho tawh la a tha ang"
Pi sangi chuan hmarcha mal chung chuan a lo ti ve a. Inngaihtuah niawm takin a ngawi veng veng a.
.
"Mahse, Nu Sang, ka û thattu ka hriat theih nan tawktarh ni ta zawk i la te ka ti mai mai" a nui deuh a. A biangsum chu a khuar kek a.
.
"Awii..i tihlauhawm
e mai. I û thih dan te chu i hriat vek kha. Thah anih chu kei chuan ka ring vak lo"
.
"Mahse, a thiante hi an thi zel sia lawm"
.
"Umm..ngaihtuah ngun chu a ngai ve khawp mai"
.
Zampuii chu a chhuk a. A inthlak a. A inbual zawhah zai rat rat chungin eirawng a bawl a. A û damlai kha chuan an pahnihin an bawl dun a. Infiam pahin an nui uar uar zel kha a ni si a. A û a ngaihtuah chhuah chuan a mittui a rawn hnâm zel si a. A inthing nawk nnawk a.
.
Zanah chuan chhum a zing phui leh mup tawh a. Ruah phingphisiau a tla sep sep a. Boruak a rit kher mai. Masangi inbual zo pawh roomah kalin, novel a chhiar mai mai a. Anu in a rawn koh chuan inhnuai lamah a chhuk a. Tun ang huna inleng neih chu a phur tehchiam lo khawp mai.
.
A inleng a hmuh chuan a phu deuh zawk a. Mak ti hmel thup hram hramin, "Teh hlawl che chuan. Eng nge ni ta?" A ti dam dap a. A bulah chuan a thu ve nghal a.
.
"Remsanga nuin ko tur chein min rawn tir a. I number an lo tibo daih sia. Hmuh duhna che leh sawipui duh che pawimawh tak a nei ani awm e"
.
"A va mak awm ve aw..engtak ni ang maw"
.
"Ka hre bik lo. Min rawn bia a, chutiang chuan a rawn sawi teh tawp a. Keipawh kal ve turin min duh bawk a"
.
"Anih chuan ka han inthlak lawk ange. Lo thu rawh aw" tih pahin a tho a.
.
"Thingpui i duh ve em?" An awmpuinu chuan a ti a..a lu a lo thing a. Masangi nu chuan , "Englam nge ni ang le aw..Remsanga thattu kha an hrechhuak tawh amwni le" zawh bik pawh nei loin a ti satliah a.
.
"Ani maithei. A hmanhmawh hmel angreng bawk sia" a lo ti ve mai a.
.
"Ka hmuh tawh hnu i ang riau. Mami te nen in inkawm thin em ni?"
.
"Kawm lutuk lo. Mahse, kan inhria a" a ti tawi tak a. An ngawi ta vang vang a.
.
Masangi scooty chuan Ramhlun lamah an inkhalh phei a. Masangi chuan a hnunga thu phone hmang mek thusawi chu a ngaithla a.
.
"Aw..ummm awle..kan lo kal nghal e aw" a tih zawh rual chuan, "Masang, Ngaizel Road lamah kan kal a ngai. K.S Thanga chawlhbukah min lo nghak a nih chu"
.
Masangi chu angaih a tha vak tawh lo nachungin thuawih takin a inkhalh let leh a. Remsanga nu nen chuan vawikhat an inhmu tawh a. Nu fel leh zaidam tak ani tih pawh a hria.
.
An tlan zel a. Chawlhbuk an thleng ta. A lo reh ţhap a.
.
"Lawk aw..ka'n be leh lawk ange" tih pahin a phone a phawrh a. Masangi rilru nuam chiah tawh lo chuan, thil angaihtuah nasa mai a. He mihring ber kher nena helai hmun fianrial lutuka awm chu hlauhthawnna lian tak a nei ţan a. Ruah a sur sep sep avang leh khua a nawm loh em vang chuan motor veivak a tam lo hle lehnghal a. Sana a en a. Dar 8 a lo pel tawh a.
.
"Hawh..thu hrih ang. Kan lo nghah a ngai dawn nih chu"
.
"Kei chu ka ngaih a tha lo. Let leh mai ka duh. I duh leh lo nghak mai rawh" a scooty ah chuan a chuang sawt sawt a. Mahse..
.
"Khawi hmunah mah i kal dawn lo" aw fiah fel leh hlauhawm ru takin a rawn tih rual chuan a tawp thut a. A chhip samah chuan a rawn phih thut a. A let tawp mai. Tlanchhiat tumin rang takin a tho a. Mahse, a banah chuan na zetin a rawn hmer leh a.
.
"Min thlah rawh. Engvangin nge hetia min tih? I eng pawi nge ka sawi?" Masangi chuan a ti tuar tuar a. Motor rawn tlan se a tih tehlul nen a reh thiap bawk si. Chutah a inrin hmain thil tle var mai a rawn lang zawk a. A hrawk chu a lum ta pup mai. Chutah zet chuan a thiannu Lisa hnungzuiin thih hnu piahramah a kal tawh dawn tih a hrechiang ta. A hlau takzet a ni.
.
A mah thattu a han melh ţawk ţawk lai chuan chiang kek kawk hian, "PHUBA A NIH KHA" a lo ti a! A zal ta riai riai mai.
.
Zampuii chu kawngki kik ri chuan a tiharh zawk a. Rang taka thoin kawngka lam chu a pan a. Kawngka a han hawn chuan, " Tualthat thubuai avangin man i ni e" Police hmel zahawm tak chuan a ti ta a.
.
ZAMPUII
.
"Engvangin nge khang mi te kha i thah" a aw chu a chang mah mah a ni.
.
" An phutawk an hmu anih kha.." A hmela tumruhna leh nuamti hmel chu mak an ti kher mai.
.
"Man ta lo che i la. Tu nge thah leh i tum?"
.
"Tumah. Midang thah tur la awm nise awlsam takin ka inmantir hauh lo vang che u. Tikhan a kin chiah e" a nui hmel phenah tawrhna a lo lang a.
.
"Thil thlen dan min han hrilh teh le"
.
A chil a lem khawlh a. Chunglam melh pahin a kut a elh neuh neuh a. Hun liam tawh ngaihtuah niawm takin a chhing leh vang vang a. Chutah, " Ka û tana ka tih a ni a. Ka û kha inbulah ngei pawh amah intihlum ni loin thah ani tih ka sawi tawh kha..hriamhrei tel lo va a nunna chhahsak tute chu thi ta te kha an ni.
.
Ka û bialnu chu Masangi a ni thin a. Ni e, nasa taka a hmangaih awmchhun chu Masangi kha a ni. Thla 5 chhung zet an inzui ve hnuah ka û chu retheihna avanga hnawl a ni a! Thingtlang tlangval, inhlawhfa thin kha masangi te ang mi hausa chuan a iai ta aniang e, phatsanna azawnga tenawm ber ka û thiantha em em Remsanga lakah a phatsan ta anih kha..
.
A retheih leh sum leh pai a neih loh vanga hnawl ani pawh na a tih tawh tehlul nen..a thianpa laka a phatsan lehzel kha ka û chuan a tuar thei ta thlawt lo va. Remsanga lahin ka û bialnu ani tih hrereng chungin a lo pawm a. Mi hausa ve ve an ni bawk a. An inhmeh khawp mai. Chutianga an inkawp theihna tura kawng sial sak tu chu kha mi verther Lisa kha a ni bawk. Ka û chu an thlim a. Hnunglam atangin an nuihsawh a. A tawrhna leh mittui te chu fiamthu thawh nan an hmang a. An hlimpui a. Ka û kha vawitam ka malchunga bawk chungin a ţap thin asin. Hnem dan ka hre lo va. Khang mite kha ka haw ve em em tawp a. Tihtheih neiin ka inhre lo a ni.
.
A thih ni khan message min lo thawn a. "Ka nau, Hmangaihna hi infiam nan lo hmang ce suh ang che aw. Thinlung kehsawmin tumah siam ve ngai suh. A chhan chu thihna hi tumahin kan thunun thei si lo va. Nangmah vangin tuemaw ten hruihrual an mitthla ve dah ange" tih thu hi. Ngaihthat loh na nen ka haw nghal a. Vanduaithlak takin ka chuan Bus a lo chhe zui . Aizawl kan rawn luh hnu pawhin Traffic Jamin rei fe min dang bawk nen. Ka û kha ka chhan hman ta lo a ni. Chu chuan ka thinlung a tina tawp thei lo va. Ka û tana ka tihtheih awmchhun hmangin phuba ka la ve ta mai a ni"
.
"I thah dan kha.."
.
"Remsanga ka thah hma khan thlahrang angin chet ka la phawt a. Thlahrang thiltih ani tih an rin theih nan. Zan rei tak takah ka kal thin a. Tlaiah haw lo in hmun pakhatah ka biru mai thin. Ka phone ah thlahrang nui ri leh ţap thawm niawm tak ka record a. Ka û phone ah ka record bawk a. Khatiang khan ka play tawn ta thin a ni. Ke pen thawm kha chu keimah ka ni. Zan khat phei chu min man tep a nih kha..
.
Remsanga thih dan chu inhriat kha. Lisa kha chu text message hmangin ka bum chhuak a. A awlsam phian. Masangi pawh ka bumchhuah dan inhriat tawh kha."
.
"Lisa ruang kha engvangin nge i hnuhsawn kher?"
.
"A ualau deuh ka tia. Bakah hmu vat lose ka duh a. Inah ka haw angai si a. Ka duh dan ang takin tui taka ka mutthilh hlanin an lo hmu anih kha"
.
Chu nula te fel kher khawr mitmeng chu a nung sârh a. A tihtur a tih zawh tak avanga thawveng hawk hmel a pu a ni.
.
"Zampui, mak ka va ti em..ka ring thei thlawt lo" senteii chuab mittui parawl kuangin a thiannu chu a en a
.
"Sente, ka thianthaber i ni a. Nang chuan min dem lo tiraw?"
.
Senteii chuan a lu a bu nghat a. Miten hmeichhe rapthlak leh pawisak nei lo a an sawi chu reitak a lo hre tawh a. Hmeichhe nunnem leh midangte puih nuam ti em em a ni tih a hria. Zampuii chu a dem hauh lo.
.
Central jaila an phurhthlak hma chuan mipui thinrim authawm a tha kher mai. Mahse, venhimna a khauh ta bawk a. A him hram e.
.
"Zampui, mangtha le..kei chu i lamţang ka ni e"tiin Senteii chu a phun sep a.
.
THE END

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply
  • Similar Topics
    Replies
    Views
    Last post

Who is online

Users browsing this forum: No registered users and 2 guests