A TAWP EM NI? BY Toni Râlte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

A TAWP EM NI? BY Toni Râlte

Unread post by Ngaia » March 29th, 2017, 4:53 pm

A TAWP EM NI?
.
_ Toni Râlte
.
Chhum dum chhah zet kal zut zut te chuan ka tawrhna leh ippikna te chu a rawn belhchhah a. Ka en ngai ena ka mittui luang pawh hrechang lêk lo va ka ţhut reng lai chuan ka dar chu kut nel thep hian a rawn chûl a. Ka hawi chhuah chuan, Kan ţhenawm nula Ahriati a lo ni a. Nui lui tih hriat zet hian a lo nui sang a.
.
"Meg, tuar hram hram rawh aw. Engkim a tha leh vek mai ang" a ti dam dap a. Ka lo maimichhing ngawt a. Engkim chu tha leh se ka duh a lawm. Mahse, ka beiseina chaurau tak hian vawn chhan tur erawh a zawng ruai chu a nih hi.
.
"Hawh..va hmu leh i la..heta awm reng pawh a fuh lo" a rawn tih leh takah chuan phur lo zetin ka ding a.
.
Cabin No. 09 kawngka bulah chuan boruak hip in thaw ka han la vang vang a. Ahriati chuan min luhsan a. Thih hreh takin chu rooma luh leh chu ka hreh a ni. Mahse, ka intihchak a ngai si a. Ka lut chu lo awm ve dangte chuan min lo en thap a. An hmel hmuh a nuam fahran lo hle. Tuma mitmeng pawh en ngam lo in khuma mu lam chu ka pan ding nghal a. Ka kal hmasak tuma ka thil tawn tehhrep khan min la nghawng takzet a ni. Fiamthu nise ka duh a. Fiamthu nihtir tumin tunah hian ka hmachhawn leh mek a ni. A lo muhil sak sak a. A va hmelţha chiang tak. A lu an tuam bur chung leh a mitko vel khem nin nian chung pawh chuan, ka mitah amah aia duhawm an awm chuang lo. Khum bula thutna awlah chuan ka thu a. Dimte in a lu an tuamna chu ka chul a. Rilru kap ţûn chung leh mahni ngaihtuahna kawma kan ngawih ţhap lai chuan nurse a rawn lut a. Nelawm zetin haw ţhen turin min rawn hrilh a. Ka nu chuan, "Maggie, nang pawh lo haw mai rawh. Ahriati hian riahpui mai rawh se. I taksa a chak lo si a, awm hahdam zawk rawh" a ti a. Mahse, heta awm hi ka duh a sin. Inah pawh ka muhil dawn si lo a. A bula tlaivar ngawt pawh ka thlahlel zawk.
.
"Nia, ka lo awmpui ang. Lo ngaihtuah suh u. Va mu hahdam rawh u" Ahriati chuan a lo ti bawk a. Ka nu thu ka hnial hreh vangin ka chhuahsan ve ta a.
.
Khuma ka thut lai chuan ka nu leh pate an lo lut a.
.
"I tawrh thiam hram hram a ngai a ni. Doctor thusawi te kha i hria anga, fimkhur a ngai sia, chuvang chuan inlamah hian awm tam zawk la, nang chu. Bakah amah i hmuh chuan i na zual zel zawk dawn a. A thachhuak leh em em ang, i rilru tihah lutuk suh" ka nu a ni. Ţah hawm hawm ka chak a, ka hul hlauh thung si. Ka pa pawh chuan, "Ni e, lunglohah la lo la, a dam chian hmaa bawh buai lutuk kha Doctor khan a phal chiah si lo va. Ahriati a awm tho a, ani mi tlawmngai a ni a, a lawmawm khawp mai. Nang chu i inenkawlthat a ngai, nau pai lai i ni si a" a lo ti ve a.
.
"Ka pa, a tha leh ang tiraw? A hma ang khan engkim a awm leh vek ang tiraw?" Hnukul zetin ka ti ţiau a. Min lainat hmel zet hian ka lu a chul a. A bu nghat nghat a.
.
Kar khat a liam mai dawn. Kei lah inah ka tawm chawt mai si a! A dam leh theihna tur atan chimbuai lo tura thupek ka hmu miau a! Harsa hle mah se, hmalam hun a vangin ka ti ve thei zel a. Zanah ber hian ka khua a har thin. Ka dul chu ka chul ka chul thin a. A chang leh ka naute chu ka be mawlh mawlh a. Ka mal a. Ka rethei tlawk tlawk a ni ber e.
.
Vanneihthlak takin in lamah enkawl an phalsak ta hlauh a. A taksa hliam te a lo dam deuh tawh bawk nen. Ka hlim ru kher mai. Tunah chuan kemah ngeiin ka enkawl ve thei tawh anga. Engkim a pangngai leh dawn alawm tiin ka inhnem a. An rawn chhuah dawn zingah chuan, tukthuan ei laiin ka nuin, "Maggie, mikhual room saw i luah hrih mai a ngai ang. Sawi tawh ang khan a natna hi zawi zawia dam tur a ni si a, in awmdun zawngin kan virpilh palh ange" a ti a. Ka chaw bar ka ţhulh hmak. Ngawi rengin ka tho a. Engmah ka sawi thei lo. Ka hrawkah hnawhtu a awm tlat.
.
"I thinrim mi? Chutia lung loha lak tur a ni hleinem" ka pa in a tih chuan, ka nu chuan mitmeng thip fe hian min lo melh a. "A damna tur a ni a. I zawm thei lo anih chuan hetah i awm thei lo a ni mai" a ti ta a. Ka nu thusawi chu thutawp a ni tih ka hria. Ka pa chu ka nu uite anih miau vangin eng thutlukna mah a siam ve ngam ngai lo.
.
Ahriati'n ka pasal a rawn kuah luh lai chuan ka mita mittui tling khat vek chungin ka lo thlir ngawih ngawih a.A taksa cher kuam leh a kal bai saih saih te chu duat taka kuaha vawn ka chak ve asin. Min hmuh chuan a ner sak a. A mitmenga hmuhsitna pawh ka hmuhhmaih lo. A chhan erawh ka hre hauh lo. Kan room ni thin, tuna ka pasal room bik lo nitaah chuan an lut ta a. Kei chu a tui tihber thin chawhmeh siamin ka lo buai thung. Inleng neuh neuh kan nei a, hlim hmel pu lui chunga midang hmachhawn chu a khirhin a awlsam fahran lo hle mai. Zanriah pawh an bulah ka kil ve lo va. Ka nu thupek angin.
.
Ka lung chu a awi tawh lo takzet. Mahse, han zualkona tur lamţang pakhatmah ka nei lo va, chutih a hnekin ka pasal nen kan inkar chu midangte hriat loh tura thup a lo ngai rawl nen. Mikhual rooma ka thawmhnaw ka thleh that lai chuan Ahriati a lo lut a. A shampoo rim chuan ka hnar a verh hle. Ka shampoo ang chiah a nih vangin.
.
"Meg, a hrehawm ngawt ang tiraw? "
.
Ka lo bu nghat ringawt a. Ka rilruah thildang a rawn lut zawk. Ahriati hi nula fel leh rilru tha tak niin ka hria a, chuvang chuan ka pasal bula hun ka hman theih nan min puih theih ka ring tlat.
.
"Ahriat, min pui duh angem? Enteh..ka nu hian ka hmuh a phal tlat si lo va. Reilote chauh nakinah min hmuhtir rawh. Umm..khawngaihin" ka pasal ngei hmu tura midang puihna ka dil chu tlawm ka inti a, na ka ti ngawih ngawih a ni.
.
"Nia, ka lo ngaihtuah ang aw..mahse, nu Marami'n a hriatchhuah chuan a nuam miah dawn lo ania"
.
"Umm..a hre chhuak lo vang..an mut tawh hnuah a ni mai" ka lo ti vat a.
.
Tunah hian ka pasal nen kan inhmachhawn mek a ni. Ahriati'n min lo text hnuah thawm dim takin ka pasal room ka pan a. A lo la muhil lo va. Khum bula sofa ah chuan Ahriati a lo mu a. Mak ka ti! Inah lehzel pawh ka nuin a ka chhawr chu..Ahriati hi private Nurse a ni a. Hetia kan pa a enkawl zui pawh hi thil mak chu a ni hran lo. Mahse, a nupui ka awm tawh a. Room danga ka riah laia nula dang nena room khata an riahdun tir thei chu ka rilru tur te an dawn ve lo em ni le..mahse, Ahriati thikna rilru ka nei ringawt pawh chu tha ka ti lo. Min khawngaiha min lainat ve em em tu kha a ni si a.
.
"Sangpui, eng eng i an?" Mihrang daih anga ka han bia chu mak ka ti.
.
"Tu nge i nih? Engvangin nge ka hmaah i lo inlan ziah? " a la danglam lo anih hi..
.
"I nupui ka ni asin. I hriatna thenkhat i hloh avangin min hre lo anih kha..mahse, Doctor sawi dan chuan.." Ka tih lai mek chuan, "Doctor chuan ka dam tawh thu a sawi alawm . ka hriatna ka hmu let leh tawh. Nangmah chiah hi ka hriat ngai loh awmchhun i ni e" a aw chu a chang kher mai.
.
Ka thu hriatin min den nat zia leh ka thinphu ran zia chu..ka tawlhhnung dawrh thei hial mai. Ahriati chuan min rawn dawm vat a. Ka mit sulh mai. Sangpuia hmel tak ran leh thim mak mai chu ka melh tlawk tlawk a.A na ka ti.
.
"Ni lo, i nupui ka ni asin. I fa thla 3 mi pawh ka pai mek asin. Engtin nge hetiang hian i sawi theih zawk? Engtin nge min hriat loh theih? Kum 1 chhung zet i nupui ka lo ni tawh a, he room hi kan room a ni thin asin. Hetiang hian ti suh. I la dam zo lo tih sawi rawh..mawh.." Ka ţap hlawp hlawp a. Khum atang chuan thei leh thei loin a rawn ding chhuak a. Ka mita melh chungin, "Tu nge i nih ka hre ngai lo che a. Hriat che pawh ka duh hek lo. I fa pai pawh chu ka faa puh tum hlek suh. Chuan, ka room atang mai ni lo kan in atang hian chhuak nghal ang che. I hmel ka hmu duh tawh lo" a tawngkam tinte chu rapthlak ti zetin ka lo ngaithla a. Ka kehchhe zo ta.
.
Ahriati'n mikhual rooma min kuah luh lai chuan ka nu a rawn lut thut mai! A mitmeng thip zet chuan min melh rum ul mai. Mahse, ka hlau hran lo. Ka pasal hmu tur hian tu phalna mah ka lak a ngai lo. Ka pasal a ni miau a lawm. Mahse, ka pasal nupui ka ni ve tawh lo chuan chhun angin min tina a ni.
.
"Hmu lo tur chein ka ti che ani lawm ni? Engvangin nge i va hmuh ţâlh a? I pasal hian a hre tawh lo che. A hua che. A chhan kan hre bik lo. Chuvang chuan ania Doctor paw'n hmuh che a phalsak hrih loh. Tikhan a rilru i tibuai leh anga, a na a belhchhah leh dawn anih kha.." A ti tawn tawn a. Khumah ka thu hnawk a. Ţap tur pawh ka awm tawh lo.
.
"Midang zawng a hre vek a. Engvanga kei chauh min hre lo bik nge anih tih hi min hrilhfiah rawh u" ka ti hrâwk a. Ni e, a mak êm a ni.
.
"Chutak chu lawm kan buaina. Chuvang chuan ania hmu hrih lo tura kan hrilh che"
.
Ka nuten min chhuahsan hnu chuan khumah ka mu thlawrh a. Ka chau em em. Mahse, ka muhil thei lo. Ka muhil phal lo ani mah zawk ang chu..! A chhan chu Sangpuia nen kan sulhnute kha hmaih awm hauh lo va chhuikir dap ka duh a ni.
.
Ka nu leh pa hre hauh lo va fahrah ina kum 14 thleng ka awm hnuah Sangpuia niteii (hmeithai) hian fa a tan min la a. Ka nu (ti zel tawh ang) chu fa pahnih zet a sûn tawh vang leh a pasalin hmeichhe dang a umsan bawk si avangin kei a neihchhun ta chu min duat em em a. Amah hi Primary School Teacher a ni a. Kan nufa chuan kan khawsa thei ve hle. School tha tak takah min luhtirin, hlawhtling turin min chher a. Chutihlai chuan Sangpuia te nen hian kan inpawh ngai miah lo. Inchhungkhat hnaite nisi kha kan inlenpawh ngai mang tlat lo. Mak ka ti thei viau mai a. Mahse, ka nu chuan thil awmdan min hrilh ta a. Sangpuia pa leh ka nu chu pa hmun, nu hrang an lo nih bakah ka nu chiah hi nu hrang a lo nih avang a unau dangte enhran a lo hlawh bik a lo ni a. A unaute pawh khawsa thei tak tak vek an nih vangin inpur buai tih vel a awm hran lo. Tin, Sangpuia nu hi nu tha leh fel tak ani chiah lo a niawm e. Ka nu chu a ngaithei vak lo aniang. Chuvang pakhat pawh chu a ni.
.
Sangpuia phei chu phaiah lehkhazira a awm char char avangin hriat pawh ka hre ngai lo. College te ka zawha ka graduate ve takah chuan ka nu chuan phai lama min dah a tum a. Kalsan ka hreh ngang mai. Mahse, a thutlukna ka zah sak tho bawk si a. Tichuan, Phaiah chuan ka awm ve ta phawt a. Chutah chuan ani Sangpuia nen kan intawn tak. A zawng zawng chuan sawi vek sen a ni dawn lo a.
.
Kan inngaihzawn hnuah tu nge kan nih tih ve ve kan inhre chhuak hnuhnawh a. A ni falâk (adopted) ka ni tih a hriat chuan, min lakchhuah tirha an ina chaw kan ei tum chiah kha min la hmuh thu a sawi nghe nghe. Kei phei chuan ka lo phek en vek mai sia. Ka hre ve lo. Chhungkhat ni mah i la, thisena hrang ta na na na chu kan chhungkhat nihna chuan min then hrang thei chuang lo. Ka inluahah a rawn insawn a. Kan la naupang bawk nen. Zahthlak leh mitmei ven lam pawh kan ngaihtuah lo ani ber e. Ka nu erawh ka han hrilh a. Sangpuia a duh loh lam aimahin a chhungte lamin an tibuai zawk a. Kei erawh chu Sangpuia a vangin helhkam ka nei hran lo. Sangpuia chhungte beng a lo thleng a. Kum khat zet nupa anga kan lo khawsak tawh avangin kei chuan Ka pasal ang chiahin ka cheibawl tawh a. Ani pawhin nupui angin. A chhungte tan pawh tihtheih dang awm hek lo. Min tha en ve tawp mai.
.
Thla thum liam ta khan nau ka pai tih kan hrechhuak a. A chhungten haw tura min tih avangin kan haw a. Tlan koh ang deuhin a mualpho zau lo zawngin kan inkutsuih tha hnuhnawh anih kha..thla thum liam ta kha kan inneih hun ni mah se..kum khat chuang nupa kan ni tawh tih erawh kan hrechiang.
.
Kei aiin a sang viau a, a ngo a. A pa hrâk mai. A ruhrel a lian a.a thau lo naa a lian tho mai. Kei aiin kum 2 chauhin a upa a. A zirna pawh a zawh lek lek tawh avangin a chhunzawm leh dawn a ni. Min duat a. Min duh a. Min hmangaih hle tih bak ka hre lo.
.
Ka hlim lo deuh nia a hriat chang chuan a kekawr a phelh sauh sauh a. Underpant nen min lam khum miah miah zel a. zel. Tichuan, kei hi ka lo nui thin a.
.
Ka nui ri hi mawi a ti a. A ngaithla kham ngai lo. Ka nui hmel lah ka hriat loh hlanin ka thla a lo la hman ziah thin. Rai no ka huat lutuk loh avangin ka naupai te chu kan hlimpui dun em em a. A chhuah apiangin thei chi hrang hrang a rawn lei ţun zel. Kei lahin Apple bak ka ei duh der si lo. Vawikhat pawh chakai ka ei chak tlat mai si a. Ka nuten " Nautein chilthli an ngah duh" an tih avangin ei an phal meuh si lo. Min lainat bawk si khan a rukin a va lei a. Kan inhnuaiah a zuk chhum a. Puanin a rawn fun ţát a! A ruk takmeuhin roomah kan han khel nupa dun anih kha..
.
Accident a tawh ni kha a zirna chhunzawm tura a chhuk leh ni a ni a. A hma zan atangin kan lo urlawk tawh a. Naupai e ti loin infit zak zak tak ka ni. Keipawh kha...hehe.
.
Ka nu bulah kan va riak a. Ka nu lah Bible chhiarin a mengrei phian si. Kan thawm a hriat kan hlau bawk nen..a chang leh ka han nui leh rih. Mahse, kha zana kan hlim dunna kha vawiinah chuan keimah chauhin ka ngaihtuah chhuak ta anih hi..
.
"Thil i lo eithat loh vaih chuan ka rawn haw leh ang. Naa...lo chhuk ve mai rawh. Lehkha ka zir thei dawn tlat lo",a ti leh rih thul a. Min pawm thuak thuak pahin, "Ka va kuah leh khat tawh dawn che. Ka ngai zo thei lo che. " tih pahin min fawp a. Min fawp kham thei thlawt lo te kha aw...a bula kal ve mai kha a pawina vak tur ka hre miah lo. Mahse, ka pain, "Nupaa awm zawng ngaihtuah tur a tam a. Duh angin a exam tha thei lo palh ang. Nghak hram hram rawh u. Inhmalam hun atan vek anih hi" a tih tlat si avangin a thu chu kan zah lo thei lo a. Bakah thla Hnih bak a zuk awm dawn chuang lo va. Chuvanga zui ve lo mai chauh ka ni.
.
An tlanliam thlengin ban kan invai a. Airpot thleng thlah ka duh em em laiin ka nu thawhah a zual a. Keiman ka enkawl loh chuan tumah awm hek lo. Sangpuia te liam rualin kan inlamah ka phei nghal a. Ka nu pawh ngaihtuahawm lutuk chu a ni hran lo. Chaw ei nghal tura min tih avangin chawhmeh te ka va lei a. Ka nu nen hian kan pahnih chauha awm tih takah kan inngai em em a. Khatia Lehkhazir tura min chawm hahna zawng zawng rul hman lo va hmangaihna ka buaipui tak avang te khan ka inthiam lo ru viau thin. Mahse, Sangpuia hian min hmangaih tih a hriatchian em vangin ka nu pawh in ngaihngam takin min kaltir tih ka hria.
.
Airpot an thlen leh thlen loh zawh tuma call ka tum lai tak chuan ka nuin min lo call a. Lungchhe aw deuh hian Sangpuia te chuanna taxi leh Truck an insut thu leh Taxi chu kawngthlanga a nawrliam thu a rawn sawi ta mai. Ka bing mup mup a. Ka thaw a tawp lek lek hial. Rang takin ka nu nen Hospital kan pan a. OT ah an lo dah lut tawh a. Sangpuia leh Driver chu an na hle bik a. Ka pa (ka pa hian a thlah) erawh mak takin a him pial thung! A pilh nin nen tih chauh a ni.
.
Nikhaw hre loin ni 3 zet a awm a. A rawn harh chhuah ni tak hian ka awm lo a. In lamah eitur siama ka buai lai a ni. A harh chhuah thu min rawn hrilh rualin ka tlan chho nghal a. Mahse, ka hmangaih, ka pasal chuan tu nge ka nih a lo hre tawh lo. Doctorin min ko hrangin a thluak a buai deuh thu leh a hriatna thazam thenkhat a khawih chhiat tel avanga nghah hlek a ngaih tur thu te nen min hrilh a. Na viau mah i la..tawrh a la ziaawm tal e. Mahse, hei zaninah chuan a dam ta a. Kei erawh min tina thung anih hi. Ka nu lah chu Sangpuia a harhchhuah ni tak khan Thingtlang lama a thawhnaah a liam a. A chhan pawh sawrkarin aikal rawih an phal tawh loh vang a ni.
.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 29th, 2017, 4:54 pm

KA KAL ANGE..
.
Tukthuan an kil lai chuan ka mu meng reng a. Tumahin min rawn ko lo. Ahriati pawhin chaw a ei ve nghal a. Ahriati hi kan thenawm hnaite ami ani a. Kei ai chuan a nau hlek maithei. Nurse a ni ka tih tawh kha. Sangpuia te nen hian lehkha an lo zir ho tawh thin a. Sangpuia hi an senior a ni thin. Kan inneih pawh khan thian mumal tak ka neih loh avangin Ahriati hi ka dinpui nghe nghe. A felin a zaidam a. Ruaitu pawh a haihchham ngai meuh lo. Sangpuia hian nau ang tak takin a en ve bawk a. A nat hma pawh hian kan in hi a rawn lenluh ngunna a ni ve pakhat bawk. Sangpuia u hmeichhia hian vai sumdawng hausa zet pasalah a nei a. Delhi ah an awm.mek a. Rawn haw an tum hnai aniawm e. Tin, sangpuia nau mipa erawh chu Champhaiah sumdawnna bul a han tan ve a. Nupui erawh a la nei lo. Kan inah hian ka nu leh pa leh sangpuia leh kei kan ni deuh tlawng a. Awmpui ti ila ka pa Driver hi a rawn awm ve zeuh zeuh bawk a. Chu zawng chu kan ni mai.
.
An titi chu ka ngaithla kar a. Ka chanchin erawh an sawi lo. An eikham hnuah ka ei ve chauh a. Ahriati chuan min lainat hmel takzet a ni. Sangpuia lah ka hmu ngam tawh der si lo. Chawhnu lamah inchunga ka puan pho seng turin ka chho a. Khua a thiang nuam hle. Ka nu ka ngai ngawih ngawih mai. Kan inbe reng naa engkim ka hrilh duh lo. Min ngaihtuah leh dawn lutuk tih ka hriat vangin.
.
Ka chhuk thla inchhung ka lut leh chiah chu kan room atangin Sangpuia a rawn bai chhuak a. A hnungah Ahriati'n a rawn zui bawk. A mitmeng dum leh lian kel kawl chuan min melh run a. Thinrim tih hriat zet hian, "I la awm e lo? Chhuak thuai rawh ka tih kha..ka hmu peih lo che. Ka natna i tizual. Ka luak o tichhuak" a ti ta bawrh bawrh a.
.
Ka intihuaisen lui a " I dam tawha min hre tawh anih si chuan, engvanga ka laka thinrim nge i nih? Eng nge tihsual ka neih?" Ka ti ve ta ngat a.
.
"Ka dam tawh. Mahse, tu nge i nih ka hre lo che ka tih kha..tunah chhuak nghal rawh" a ti tawng a. A hma aiin ka nat belh lo a..ka thinrim tawh zawk. Chuti fakaua min hmu peih lova min haw ngawih ngawih tu chu engvangin nge ka chhuahsan loh ang? A hriatna chu a lo hloh anih pawhin midang a hria a. Kei chauh min hre lo. Thil engemaw chu a awm a ni. Rinhlelhna mak tak ka nei tan ta a.
.
"Awle..ka chhuak ang. I nupui hi i hre duh tawh lo va..i hmu peih tawh lo bawk..chuvanga chhuahsan che ka ni tih i hre dawn nia. Chuan, i fa hi rawn ngaihtuah hlek suh. Ka ta liau liau ka nihtir ang" ka ti ta a. Ka tap miah lo va. Ka khur thung. Kha leh chen a nata nikhua a hriat loh chhung zawng pawhin amah vangin ka lo tuar tawh. A dam tak hnua hetiang lehzela intih chu ka ngaithiam thei thlawt lo a ni.
.
"Meg, insum rawh u" Ahriati chuan a lo ti sap a. A inthlahrun hmel hle.
.
"Nanga fa lubawk mai mai, tu fa nge tih pawh hriat loh kha ka rawn ngaihtuah awzawng lo vang e. Kalbo rang la a ni mai" a thisen zam pawng ţawlh ţawlh atang chuan a thinrim hle tih a hriat. Hetiang taka a thinrim hi vawikhat chiah ka la hria. Phaia kan awm laiin vai pakhat nen kan lam dun a. Beer ka lo in bawk nen. Chumi tum chuan min chhuahpui a khawlaiah kan han inhau tak tak mai anih kha. Kut erawh min thlak lo.
.
"Sangpui, ka hmangaih che a. I nupui ka ni thin a. I fa nu tur ka ni. Mahse, min duh tawh lo va kalbo turin min ti a. Ka kal bo ang. Mahse, ka hmangaih che tih i lo hre thin dawn nia. I awmdan hi ka hrethiam lo va. Mahse, ka zawt lo vang che. Engtikah emaw ka hmangaih zia che i hriatchhuah hunah leh tu nge ka nih tih i hriat hunah pawh min rawn zawng chhuak duh tawh lem suh. I cho chhuah ani tih i pawm dawn nia" tiin thutawp chu ka sawi ta a. Hul takin roomah ka lut a. Ka bungrua ka la chhuak a. Ka pasalte in chu ka hnungchhawn ta. Ahriati khan min rawn au a. Ka nui lui sak a. Mahse, ka mittui a rawn luang. Hmalam panin ngil takin ka kal a. Inchhuih lo turin mittui karah kawng chu ka bih ţâwk ţâwk a.
.
Ka nu in thil thlen dan a hriat chuan a rawn haw nghal a. Mittui nen ka lo hmuak a. Min lainat ngei mai. Ka nu tak ni lo mah se..nu dang ka nei lo.ka nu tak zawk pawh lo awm nise amah hi ka thlang zawk ang. Tichuan, kan nufain a thawhna hmunah chuan inluahin ka han awm ve ta rak rak a. Transfer te a han dil ve bawk a. A la harsa hrih aniang e. Naute ka neih thlengin kan awm. Ka tan a tha zawk. Sangpuia hlat thei ang bera awm kha. Bakah Thingtlangah chuan ka thla a muangin ka zalen zawk a. Mite an thain an rilru a thianghlim a. Ka fa seilen nan pawh ka duh rum rum hial. Mahse, Mampuia ka neih atanga thla 5naah ka nu chu Aizawlah an sawn ve leh ta a. Aizawla kan inah kan insawn leh ta a ni.
.
Ka nu lungawi loin ka pa a va ankhum chiam aniawm a. Kei chuan engmah ka hre lo .A hnuah ka nu bawkin a sawi chhuak. "I pasal chhungte nen kan inzawmna a chat tawh. Ka vahpa saw mi tha tak emaw ka lo ti a. Nang pawh ka ngaihtuah loh phah che a. Mahse, saw a hriatna a hloh reng reng lo. Tupawh a hre vek. Nang ber kher a hre lo der che kha thil awm a awm ani mai. A nu remruat vek a ni lehpek ang. A tirah khan a iai sa deuh che tih ka hre vek alawm. Chuvangin an pa thluak saw a su anga..i pasal nen in inthen theih nan hma an la a ni mai chubak thil dang a awm thei lo. Chuvang chuan nang pawh kir leh tawh lo turin intichak ang che" a ti a ni. Ka nu thusawi anih vang ni loin ka lo rinsa anih avangin ka pawm thlap. Mahse, sangpuia hmuha sawidun pui erawh ka la chak fan a!
.
Mampuia pawh a duhawm chhoin a chak chho ve zel a. A pa a chhun viau chu ka duh lo ru hle. Apa hriatchhuah theihna a ni tlat zel si a. Sangpuia te nen veng khat kan ni lo bawk nen. Chanchin ka hre tam lo khawp mai. Ka chhuak ngai bawk si lo. Kan in kan hralh a. In thar nuam zawk kan lei a. Kan pathum chuan kan hlim tawk ve khawp mai. Rilru erawh a nuam famkim ngai lo.
.
"Engvangin nge khatiang taka a danglam theih?" Tih thu hi ka chhan theih ni si loah chuan ka inzawh tam ber a ni. A chhan hriat chakna hian ka khat nitin a. Ngaihven ka ngam si lo. Ka hmangaihna hi chutimaiin a bo thei si lo a, kan fapa a vang pawh hian kiam a hnehin a pung deuh deuh zel si. A hhriatna kha a lo hloh tak tak anga, min hre lo tak tak aniang a..tia ka ngaihtuah chang chuan ka indema, ka inhaw thin. Mahse, ka nu thusawi te kha dik ka ti bawk si. Amah hmuha engkim zawh fiah lah chu ka hreh ve tumhrang tawh a. Tlawm taka va kun leh dûk dûk kha ka mihrinna hian harsa a ti. Ka la nalh a. Ka la chak tha bawk. Mampuia nen ni mah i la kan pahniha min chawm duh tur hi ka haihchham bik lo ang. Mahse, thudik ka hriat hma chuan hetiang lam hawi turin ka inpeih thei ngai lo vang.
.
"Maggie, i nu a lungphu vangin nikhaw hre loin damdawiinah a awm" kan kawmchhak tlangval chuan thaw hlawp hlawpin a rawn ti a. Ka virbuai vat. Ka fapa a muhil si. Mahse, kan inhnuai nulain a lo awm thei dawn a. A zia. Ka phi chung ani ber mai. Ka nu chungah mawlh chuan ka hlauthawng a ni.
.
Hospital ka thlen chuan ka nu ka va hmu nghal a. Oxygen hmanga thawk tir hram hram ani tih ka hmuh rual chuan hman ang bawk khan ka mittui a rawn luang leh a. Na ka ti. Ka nu min hmangaihtu awmchhun a ni si a.
.
Ka nu kut vuana ka thut reng lai chuan, "A tha leh mai ang. Lungngai lutuk suh" ka hriat hnu aw hian a rawn ti sup a. Amah a ni.
.
"Engvanga rawn kal nge i nih a?"
.
"Ani hi ka ni a lawm.."
.
"In chhungkua nen inzawmna in nei tawh lo"
.
"Mahse, ka ni a ni tlat"
.
Thut ngawt ngawt chu a ni ber si lo a. Doctorin a check dawn chuan kan chhuak a. Bathlarah coffee kan in dun a.
.
"Nupui ka neih dawn kha i hre ve tawh em?" Room chhunga awki nen chuan dang leh tawh tak a ni. Elsen lam a pawl lek lek.
.
"Tu nge a?" Ka ti thei ţâwk..ka lo la hmangaih zia ka hre nawn awn awn mai.
.
"Ahriati" ka phu zawk mai. Dawt anih ringin amah ka va melh a. A thutak phian si. Ahriati ber kher maw?
.
"Min hmangaihtu diktak ania, bakah ani kha chuan min enkawl thiam dawn a. Min phatsan lo bawk ang"
.
"Awle" ka lo ti teh tawp a! A tawngkam kha chhan let dan tur ka hre tlat lo. Phatsan te kha a sawi a. A awmzia ka bo vek.
.
"Sawi tur i hre vak na nge? Heheh..ka hrethiam a lawm. Ani saw awm lo se chuan midang fa kha ka fa emaw tiin ka lo duat ve viau awm sia"
.
"Zoliansang" ka ding hluai a. Makti zetin ka melh a. A mak alawm. A mak tlat!
.
"A ţhawng viau che law..ka hrechhuak tih i hriat chuan..ka hriatna a rei tawh. Ka dam lo kha Pathian malsawmna a ni. I nihna diktak ka hriatchhuah phah ta si a!"
.
"Tenawmpa leh" engmah sawi tur ka hre lo tawp mai. Sawi tur ka ngah lutuk a. Sawi ber tur ka hre lo a ni zawk.
.
"I sawi awmzia pakhatmah ka hre lo. Nupui chu nei la. Hlim ang che. " ka ti hmawk hmawk a. Ka kalsan ta a.
.
Ka nu kut vuanin ka ţap zawih zawih a. Dawt hmanga puh ka nihna te, ka mi rin em em Ahriati'n min bum kual dan leh ka hmangaihber ka pasalin fiahna awm lo va min kal tir thei te chu ka tan tawrh na nasa tak a ni. Ka dam lo. Ni e, ka thi lo a. Mahse, ka dam lo miau si a.
.
Mi vanduai tak ka nihna chu ka nu in kir leh tawh lo tura khawvel a chhuahsan chuan a rawn nemnghet leh chiah a ni.
.
"Nuu...i tel lo chuan ka fapa nen kan damkhawchhuak thei dawn em ni?"
.
Mi â ang maiin ka khawsa a. Natna ka tawng hnem em a tin ni. Kan inluah tute an fel hlauh a. Engkimah min buaipuiin rem an ruat zung zung a. Ka leh awl phian mai . ka hah erawh a dam si lo. Sangpuia te chhung pawh an rawn lang ve a. A nupui tur nen.
.
Min chiu mu tawp a. Engmah ka hre tawh lo. Ka harh chuan khua a thim vek tawh a. Khuang ri tlak tlak karah zai thawm ka hria. Ka riltam zia nen. Inhnuaite khumah ka lo mu a. Ka tho chhuak chu ka sil ţhem ţhum mai. Room kawngkhar a rawn inhawng a. Ka fapa hmel ka hmuh rual chuan ka khi sak a. Mahse, rawn pawmtu hmel ka.hmuh chiah chuan ka rak thawt. Rang zetin ka va bawh rawk rawk a. Ka fapa tap riin a zui nghal. Ka awi hliau hliau a. Hei chauh hi ka neihchhun a ni ta.
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 29th, 2017, 4:55 pm

"Meg, sawi duh ka nei a" a zawldawh khawp mai.
.
"Ka nei ve lo" ka lo ti thung.
.
"Ih..englo ania. Naute hi..tu nge a pa?"
.
"I hria ani lawmni? Kei chuan tu nge apa ka hre ve lo"
.
"Thinrim loin sawi teh ang"
.
"A ţul tawh lo. Ka fapa hi keima fa a nih hi..ka ta liau liau"
.
"Ka sawi tum chu..he naute hi ka fa..." A tih lai chuan, Ahriati a rawn lut a. Verther takin min melh tawn a. Hman kha a ang tawh lo.
.
"Eng nge in lo sawi dun a? Haw tawh i la. Duat" a rawn ti hawm hawm a. Ka ten lek lek.
.
"Aih, Maggie hi thil zawh duh ka nei"
.
"Eng maw?"
.
"Tu nge naute pa tih hi?"
.
"Ni e, Ahriat, ka fa pa hi i hria nilawm ni? Hrilh rawh" ka lo ti hmak a.
.
"Nakinah ka hrilh ang che..haw phawt ang" a ti bah nak a. Hei hian Ahriati chet dan tenawm chu a rawn tichiang ta.
.
Ka kut a rawn vuan. Ahriati hmuhah ka thingthla dawn lo. Ka ta tur ni tawh lo mah se..a tawp nan min hliamtu chu hliam let ve ka duh tlat! Thiantha anga lemchan thiam, bumhmang leh hnunglam atanga min vita kehsawma min siamtu hmeichhia chuan ka tawrh leh paltlang tawh natna te kha a pumpelh bik ka phal lo.
.
"Sangpui, tupawn kan pahnih inkarah inremlohna thlentir tum mah se..fiahna i zawng turah ka lo ngai a. Ka fapa hian maw pa dang a nei lo asin. Ka pasal fa ngei a ni e' ka ti a. A mitmeng chu chhiar thiam loh khawpin a buai a ni. Ahriati hmel lo danglam deuh pawh ka hmuh hmaih lo.
.
Min pawt a. Min kai a. Ka fapa ka pawm bawk si. Min chhuahpui zel a, kan hnungah Ahriati a lo kal bawk. Motorah min nawrlut. Chak zetin min phur chhuak ta a. Ka fapa chu hnute ka pe a. A muhil ta sak sak mai. Ngawi renga kan thut dun mawp mawp hnuah..
.
"Ka va tisual nasa em.." Tiin a chal a dawm vang vang a.
.
"Ni e, i tisual a ni" tih bak ka sawi thei lo. A tihsual a hriatchhuah hun a tlai tawh tih ka hria.
.
"Thil awmdan dik tak ka sawi anga. Ngaihdan i lo siam dawn nia.
.
Khatia ka nata..ka harhchhuah hmasak ber khan nang chu i awm lo va. Ka nu leh Ahriati hi ka khum hnungchhawn zawng hian an titi a. I chungchang an sawi tih ka hria.
.
"Mak ka ti ngawt mai. Maggie chu..hetiang anih hi ka lo ring bik lo. Mahse, ka cousin hian a lo hrechiang nasa sia. Sangpuia nen in khata an chendun lai reng pawh khan pasal angreng tho a nei reng a! Chupa chu vai tha chi ti mai ang, hausa ve tawk tak a ni awm e. Khatia kha pa fa a pai takah khan nei turin vaipa bulah a va kal a. Mahse, vaipa kha nupui nei lai a lo ni sia! Tichuan, Sangpuia fa angin a chhal ta ringawt anih awm chu!! Hetiang thil ka hriat chhan pawh Sangpuia nen kan inkawm ve thin tih ka cousin in a hriat khan Maggie nen an chanchin min zawt a. Ka sawi a. Chuan a thianpa vaipa nen an inkawp dan zawng zawng chu a sawi ta vek mai a ni. Inbula sawi chhuah kher hi tul ka ti lo viau naa..sangpuia hi ka thianthatak, u anga ka en a nia. Ka sawi lo thei ta lo a ni" tiin Ahriati chuan ka nu a lo hrilh malh malh a. A tirah chuan ka awih miah lo. Mahse, ka nuin a rinhlelh ve tho avanga Ahriati cousin a biak takah khan ka awih tan a. Mahse, ka la ringhlel fan tho. Vaipa ngei mai ka nuin a biak takah khan awih loh chi niin ka hre ta lo va. Ka na ngawih ngawih mai a ni. Ka hua che a. Che thei ni i la chuan thah daih che ka chak.
.
Tichuan ka hnawtchhuak ta che a. Ka rilru a nat em vangin Ahriati kha ka kawp ta ngawt ni. Lo hriatthiam awm tak ka nia, Ahriati'n min duh dn leh min riahchilh pawi a tih loh zia te atang pawh khan. A remruat vek a ni tih te lo rinthiam awm tak.
.
Nizan ka haw hnu khan ka nu leh Ahriati inbe lai ka ngaithla fuh a. Ka nuin, "Kan remruatna chu a kaltluang khawp mai. Zaninah pawh an inhau hrep mai" a tih takah khan ka ngaih a tha lo ta a. I nu vuinaa Ahriati nen kan lo kal khan, 'Vaipa kha a no min lo pe teh. Nizanah a tang na ve lutuk a hmaichhan ngeia hrilhfiah ka duh tlat' tiin ka sawi a. Tah khan Ahriati kha a che buai ta tih ka hre ta a. Vaipa no a neih tawh loh thu leh a cousin no erawh a neih thu a sawi a. Ka sawi hmaih lawk chu..khatia ka damloh laia an thusawi te kha ka hria tih hre lo niawm takin an awm a. A tukah khan ka zawt tha leh ta a. Ka nu nen an sawi ta vek a ni. Tikhan nitin maiin an pahnih khan i chanchin tuitang lo tak tak min hrilh chanchi a. Ka dam loh lai a lo ni bawk nen. Ka lo awih hmiah hmiah zel a. Fiah ngaiah ka lo ngai miah lo kha kha a nepna a ni...chuan, i fapa hmel ka hmuh khan ka nu leh Ahriati ka rinhlelhna chu a dik tih ka hre nghal a..ka zak khawp mai"
.
"A liam tawh a. Engmah a ni tawh lo. Nupui nei tur i nih kha..ka fapa nen hian min rawn tibuai tawh lo la..chu chu ka ngaihdam theihna che awmchhun a ni e" ka thinlung pindan kil khatah erawh chuan ngaihdam chak em emtu hmangaihna a la chambang a. Mahse, chu pindan chu ka khar a tul tlat si a ni.
.
"Ka nei dawn lo. Ka duh lo"
.
"I thu thu alawm..min hruai haw tawh rawh"
.
"Meg, min ngaidam thei thlawt lo mi?"
.
"Ka ngaidam che lawm. "
.
"Mahse, nupui nei turin min ti bawk sia"
.
"Ka ngaihdam che avang khan ka pawm leh dawn che tihna a ni lo. Min lo tihnat tawhna zawng zawngte avang khan phuba ka la lo mai chauh zawk dawn a ni. Chu chu ka ngaihdamna che a ni. Ka fapa nen kan khawvelah hian midang an chen ka remti lo" ka mittui chu zahpuiawm takin a rawn luang a. Mahse, ka mittui angin ka thinlung erawh a nem ve thei tawh lo.
.
Kan dinna bulah chuan car a rawn inhung dawt a. Ahriati leh ka nu leh pate an lo chhuak a. Kei pawh ka chhuak ve.
.
"Helai thleng thlenga ka fapa hmuh vel hi a tul tawh lo. Nupui nei tur anih hi" ka nu chuan a ti nghal bawrh bawrh a.
.
"Ka pi, i fapa hian nupui atan min lo sawm zo chiah a. Mahse, ka hnar ta mai. Pitar lemchanthiam.leh dawheh deuh bula ka fapa seilentir ka phal lo va" ka ti. Ka zah buai duh tawh lo. Zah a phu hleinem.
.
"Khanglang a che.." Tih pahin min rawn ben a tum a. A fapa in a kut chu a lo nem per a. " duhtawk rawh ka nu, in tenawm lutuk hian ka nun a tichhe ta a nih hi. Nupui ka nei dawn lo. A chhan chu nupui nei lai ka nih hi" a ti thliam a. Ka lo ner sawk. Ahriati erawh na tuar tih hriat zetin a meng hnual rawih a. Kei chuan, "Kha kha chunglam phuba a nih kha" ka lo ti rilru thung.
.
Engkim chu a thleng mawlh mawlh a. Insawithiamna leh ngenna te, tahna leh inankhumna te pawh. Kei erawh chuan ka fapa chauh kuah ka duh a. Ani chauh hi hmangaih ka duh a ni .
.
Ka fapa tan nu ka ni a. Sangpuia tan nupui ka ni leh thei angem tih erawh chunglamin a chingfel ang chu..."Hmangaihtuin a tawk e a tih chinah erawh...chunglamin a tanpui anih loh chuan..mihring hi chuan hawilet tawh loh a tum thin si a!"

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)