DR HMUIHMULA BY Toni DA Ralte Ahmangaihi

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

DR HMUIHMULA BY Toni DA Ralte Ahmangaihi

Unread post by Ngaia » May 25th, 2016, 10:44 pm

DR HMUIHMULA
.

Boruak chu a thiang nuam kher mai. Mipui zi nuaih nuaih pawh chu ngaihven awm pawhin a lang lova. A mitmeng de sar sar chuan a phur zia a rawn phochhuak chiang hle. Ni e, vawiinah hian kum 3 zet a haw tawh lohna a seilenna hmun, Mizoramah ngei a haw tawh dawn a lawm. A chhungte a ngaihtuah a, anu duhtak, englaipawha ngaihven em em rengtu, thau liang luang, nelawm zet a ngaihtuah chhuah rual chuan a nui sak a. A farnu Kimkimi, sa nghet tlet tlawt, nuih heh zet nena infiam leh chu a chak tawh kher mai. A pa erawh a ngaihtuah mang lo, ni e, a tan hun a nei hman ngai mang lo anih kha…hman ang kha ala nih reng chuan…!
.

Thlawhna chhungah chuan a lut a. Hahdam taka thut pahin a ruk deuh titihin, a phone camera chuan pawnlam thla chu a la kual a. A kokia zawitea rawn khawihtu lam chu a han hawi chho a, Hostess hmeltha leh pawisawilo zet hian, nui chungin, “Sir, please..switch off your mobile” a rawn ti puam talh a. A mobile lek vu chung chuan, chu hostess chu mitmu pawng zawrh zawrh khawpin a melh ta ngut ngut a! hostess chu angaihna hriat loh hmel zetin a lo ding ve reng bawk a. He nu ngei hian a ni lawmni a mobile off tura lo hrilh tawh kha..tichuan chumi hnu lawkah an thlawhna chu chesualin,,mangang takin a mumang atanga harhchhuah tumin a lo insangmar anih kha mawle..hlauhna namen lo hian a rawn tuam nghal a.Ti nge a mumanga a hmuh nu hmel chiah chiah a lo put??!
.

Minute tam a liam lo tihah a hlauhthawn ang ngeiin, an thlawhna chu a rawn nghing ta lawih lawih mai le! Hostess awpuam nalh takin chi-ai lo tura passenger te a rawn ngenna pawh chu a ngaihven tha hman tawh lo. A tawm thei ang berin a thu kawm ngal a. Tawngtai a han tum ngial a; a hlawhchham chiang hle. Thawm bengchheng tak karah chuan mizo tawng ngeia “LALPA, misual ka ni, min ngaidam rawh” tih chu chiang takin a hria a. Vai tawng nen, sap tawng nen, tawngtai thawm chu a ri nuai nuai a. Chutah a ri bur a, aimitthlawn tluk zeta thim in a rawn tuam ta nghal a.
.

“Ramdin, Ramdin” tia tawng mawlh mawlh thawm avang chuan a hriatna thazam thi mek tawh chu a rawn che leh tan a. A rilru a buai thut! Mahse, thlawhna accident kha a hrechhuak leh thut a, a lu chu a rawn na ngut ngut nghal a. A che thei der silo. Ring taka “Ramdin” tia au thawm chuan a beng a rawn verh leh ngut ngut a. A mizopui Ramdina a tel ve ani ngei ang. “Keipawh heta hi ka awm e” tia auchhuah a duh hle. A hrawk chu a phui tlat ni berin a hria. Mutchhuakin a rawn zem chiai chiai a. Chetsualna rapthlak tak theihnghilhin a chhing leh ta siar siar a.
.

“I lo harh tawh maw? “ tia kut chum buangin a rawn dehna chu a lum hat hat a. A mit chu a han mengkual a, ceiling var tak hnuaia bulb var tak chauh lo chu hmuh a nei lo. A eng lutuk chuan a mit a tivai thei hial mai. A taksa chu a na miah lova, a han indapkual vel dawn a, a ban chu a chethei ta miah lo. Makti taka a ban a han en chuan phuarbeh ani tih a hmu a, chesawn thei ziazang a lo nilo. A ngaihna hrelo zetin a hawi a ruai a. Nu pakhat, kum 50 vel awm , samkir chhur mai, lian zet hian intih nelawm tum takin a lo nuih a. A bulah chuan pate lam, hmuihmul ki van mai, mitmeng hriam deuh hi a lo ding bawk a. A kawr hak atang chuan doctor anih hmel.
.

“Eng nge a awmzia? Khaw nge ka awm?” a aw chu a ri chang chang a ni.
.
“Tunah chuan I tha ve tawh dawn ani maithei. Thluak natna chikhat I vei a, Doctor te pawh an beidawng tawh tihin, hei Germany return Doctor James Lianruala hian ni tamtak chhung a enkawl che a, tunah mumal takin I rawn harhchhuak ve ta anih hi. I chhungte k’n hrilh ange” tiin nu thaui chuan a lo chhang a. Dawt a sawi anih ringin reife chhung chunu chu a melh a. Mahse, chunu chu a chhuak ta daih a. Hmuihmula nen chuan an in melh leh ta ran mai. Hlauhna mak tak hian a rawn tuam leh nghal a, a chhan chu Mumbai atanga a hawn dawn zan hmasaah khan, chupa chuan a hmai vun zawng zawng a lo hihsak vek tawh alawm..a mumang avanga a hlauhna chu a thunun hleitheilo a ni. Engkim chiang takin a la hria, Thlawhna atanga an tlak hnu thil thleng kha a hriat a ngai a ni.
.

“Bawiha, ka va lawm em! I lo harhchhuak ta chu..” nu valai, hmelchhelo tak, mitmeng dam thlap hian tap feih feih chungin a rawn kuah a. A lo melh ngawt ngawt ringawt! Hmuihmula chu a chhuak a, nuthaui kha a rawn lut veleh chiah bawk a.
.
“Thil awmzia hi ka hrethiam lo. Ka pi, tu nge I nih ka hre hauh lo mai” a ti ta tawp a.
.
“I hriatna te kha zawi zawiin a la chak chho zel mai ang, hahdam tum rawh, thil ngaihtuah vak vak lo la” Nuthaui chuan a lo ti var a. A ban chu a thip zawk a, mutchhuakin a rawn zem leh ta chiai chiai mai.
.

“Ramdin, enteh an mawi asin” pangpar var sar mai chu a hmai bulah a rawn lekkang a. Pangpar rim chu nge tui ang, a bula thu nula rim zawk chu tih a lo ngaihtuah a. He nula duhawm lutuk nen hian engtitiha inhria a, intawng nge an nih pawh a hrechhuak zo tawh lo. Mahse, a fate nu niin, chawlhni zinga fate thawhlawm semtu atan chuan a duhthusam a tling tih a hria. A hmui vam hiam leh kau tiar chu duhthawh zetin a zuk fawp dek dek a, a lo chhanglet tha kher mai. A hnute kawh lah, a kawng fek rat leh a bawp sei thlarh te chuan a mipatna chu sawngbawl chiam ngai lovin a titho rang kher mai. Mahse, chetlak a tum apiangin, ngaihngam lohna lian tak leh pawikhawih nia inhriatna anei tlat zel a! a nula a inpeih hnuah pawh a mipa zawk chu a inpeih ngam ve tlat lo! A thinrim ru teuh mai. A kut sei sal chuan a chal chu a rawn zut kual a, a chalsam chu a tuai pawr a, an nuidun a. Vawilehkhatah chu nula a bo leh daih! Teh nuai chuan..nula zawn tuma thawh a han tum chiah chuan, a mumang atang chuan a harhchhuak ta nghal a. Chau zet leh fim Karin khumah chuan a awnthla leh ta riai riai a.
.

“Tlai lamah chuan kan haw thei tawh ang “ a nu nia inchhal khan a lo ti a. A aw chu a nemin, a zahawm ru riau bawk. A chauh em avangin engmah a sawi peih lo. Thil chu anih dan danin thleng phawt se, tichuan a duhdan angin a la chechhuak ve ang chu tiin a rilru a siam a. Chawhnu dar 2 velah chuan, anu (ti tawh mai ang) chu rawn lutin, eitur a rawn kensak a. A riltam zia a hrechhuak nghal. Eitur ei tuma a va ban chuan a huat em em arsa a ni tih a hmu a, a kut chu a la let leh ta daih a!
.
“Arsa kha I duh ber thin si a” titau awka deuh hian a ti sap a. A chhang lo. Soup erawh a hawpsak a. Tlem chuan a harh ta deuh e. Thil thlen dan chu engmah a hriatthiam loh a vangin ngaihtuah pawh a tumbuai peih tawh lo. A tir kha chuan thlawhna accident avang khan a hriatna a hloh niin a ring a, mahse, accident kha chiang takin a la hre vek bawk si! Engkim a chhungte, anu leh a farnu te pawh an hmelhmai thlengin a la mitthla thei vek bawk. A awmna hmun hi khawvel dang daih pawh ani maithei. Accident-ah khan a thi anga, a thlarau chu khawvel hranah a kal ta nia ngaih mai te a duh rum rum hial mai.
.

“Mama, U zodini pawh a lo phei dawn anih chu..tukinah a lo thleng chiah a, Champhai-ah a han zin kha..” a nau niawm tak, mipa tlangval ve ur tawh, hmai fai ving veng chuan a ti a. damdawiin atanga chhuakin a nu chuan ala hmuh ngai reng reng loh inchhungah a hruailut a; Aizawl veng lar tak Zarkawt ani tih erawh a hre ve. Hmanah secondary School a kal laiin Zarkawt-a a patea te inah a lo awm ve tawh alawm. Anu te in chu a nuamin a changkang kher mai. Bungraw manto fe fe a inhung khup a, a room nia an sawi pawh chu hmeithai in tiah zet tur a ni a. “An hausa hle maw” a ti rilru a. mahse, chung in leh lo nuam tak tak te chuan a chhungril nun a tihlim pha hauh lo. A buaina chu a zual zel zawk niin a lang. Thil mak tak erawh chu chu chhugkaw zinga afarnu kimkimi a hmu tel ve chu a ni!! An inhmuh tirh chuan a va pawm chawt a, tah hawm hawm a chak kher mai. Kimkimi pawh chuan a lo ngai ve ngang a niang, a mittui a tling pam a..
.

“Kimkim, he hmun hi kan chhuahsan a ngai a ni. Ka nu bula kan let vat a ngai; hemite hi kan chhungte an nilo” tiin a hrilh ru a.
.
“U, Remremi a lawm ka nih..i la dam chiang lo anih hi..mahse, I tha vat mai ang. Nangmah enkawltu Doctor kha mithiam turu lutuk ania” a ti sar sar a. A mak!! A tawng dan leh a nui hmelte chu kimkimi vek a ni si..mahse, Remremi ka ni a ti tlat bawk si..a roomah chuan a tei nghut nghut a. A nu number hriatchhuah a tum a ni. A farnu leh amah chu engthil emawin a zial a niberin a lang. vanduaithlak tak maiin a nu number chu a hrechhuak zo tawh lo. Zanriah ei turin an rawn ko a. Thuawih takin inhnuai lamah a chhuk thla a. Chutihlai mek chuan, door bell a rawn ri tlang tlang a. Remremi (atan chuan Kimkimi) chuan a va hawnsak a. An ri hlut a. Kekawr dum mar nalh tak a ha a, a sam chu thlahdah deuhin a zial chho tawp a, kawr dum tial loose hek hawk a ha bawk a. Mahse, a lang duhawmin, a nalh kher mai.
.
“Awii, Ramdin, I tha tawh chu ka va lawm tak..Kelkangah khan I tan nasa takin ka tawngtai a, Pathianin min chhang a nih hi” a ti sap a. A mit fim kakah chuan mittui a tling pam a; a kut chu a rawn vawnsak nghal a. Hlauhna in a rawn tuam leh ta tlat! He nu hi ani lawmni, khumpui kaipui a tum ngial pawha thulhtirtu a awm zel avanga mangang taka a insehruh chhan kha..a mumang a khanu hmel leh tuna a hmaa ding nula hmel hi danglamna pakhatmah a awm lo. Nuihluih a duh. A hlawhchham chiang hle. He nula hi hmelthain duhawm teh mahsela; a bialnu Seni ai chuan a thlang lo. Seni kha a hmangaih a, nupuia neih ngei pawh a tum anih kha..
.
“Min lo hrethiam la, thiannu, ka hre ngai tlat lo che” a ti ta tawl a! zodini chu a tawlhkir dawrh a. Na tih hmel zetin a rawn melh kawk a. A nu chuan “zodin, hrethiam hram rawh. A thluak hi a la chak tawk lova, zawi zawiin engkim a rawn hrechhuak mai ang” a lo ti vat a. Zanriah chu ngawi rengin an kil ta hlawm a. A ei hnem khawp mai. An melh hrek hrek tih chu a haider hmiah. Zodini chuan a rawn melh zauh zauh thin a. A ruktak chuan a khawngaih hle, mahse, seni chauh a hmangaih si a. Zanriah eikhamah chuan anu leh pate chuan roomah an kolut a. Thuawih zel chu tha maiin a hria.
.
“bawiha, I hriatna I hloh fe tawh tih chu kan hria, Zodini meuh kha chu I theihnghilh kan ring lo a sin. Kum chanve dawn chu mu leh mal neilo in I khawsa tawh a, I thluak natna avangin keini ngei pawh min theihnghilh a, midang emaw I intih chang pawh a awm. A chang chuan khawvel dang daiha awm ang ten I tawng thul! Khatih chhung zawng khan Zodini hian a phatsan ngai lo che a, I kiangah a awm reng thin a sin. Keini pawhin mo atana kan duhber a ni a, Damlohna in tlakbuak lo che sela chuan innei tawh tur in ni a sin:” pa ber chuan a ti dap dap a.
.
“In fapa Ramdina emaw min ti tlat hi ka hrethiam lo a ni. Ka hming chu Jeffrey a ni a, Jeff tiin min ko thin. Champhai khua kan nia, ka nu pawh Remliani a ni. Ka pa chu Nuntluanga a ni bawk. Mumbai-ah ka thianpa company –ah hnathawkin ka awm vang vang a, hmanni khan ka rawn haw a, mahse, thlawhna accident avangin engmah ka hre mumal tawh lova . ka harh chuan tihian ka awm ta mai a ni. Ka buai takzet a ni, min puih dan te inhre mial zawk lo maw?” a ti ta hmiah hmiah a. A puakkeh ve ta a nimahna. A nu leh pa (?) te chuan mangan hmel zetin an melh a. An ngaihtuah hmel takzet a ni.
.
“bawiha, chutiang thu chu vawitam tak I sawi thin a lawm. Kan bulah I taksa chu awm mahse, mumbai-ah min chensan fo a, I sawi thlawhna chesual tih velte chu a tak takah a thleng hleinem. Khumah I mu char char zawk a ni” a nu chuan a ti a. A rilru a buai thar leh ta. An thusawi chu a diklo a tihsak ngawt thei tawh lo. Thlawhna chesual a awm leh awm loh hriat phawt chu a duh a ni. Chumizan chuan mumang bo thak khawpin a muhil ve ta.
.

Ni 3 aliam ta. Thlawhna chesual a awm leh awm loh chu a zawt kual tawh. A lo awm miah lo lah tak a! a hawn nia a chuanna thlawhna kha tluang takin Lengpui Airport-ah a tum thlap tih a fiah vek tawh bawk. Anih chuan amah hi a diklo zawk a ni angem? A buai leh zo ta. Champhai lam biakpawh tumin a han bei ngial a. A nu number leh anau number a hrechhuak zo tawh lo chu pawi a ti takzet. A han zin mai angai a ni tiin a ngaihtuah a. Mahse, tuna a chhungkaw tharte hian an phalsak a ring lem lo. Anu chuan englaipawhin a vil chawt niin a hria; a chungah a tha em em a, a lem tel miah lovin a ngaihtuah niin a hria. A farnu Remremi lahin trihhlim tumin theihtawp a chhuah ve reng a. Kimkimi a an em avangin a ngaina ve reng bawk. A awm tinuam lo tu pakhat erawh apa nia inchhal , chhungkaw pa ber chetphung chu a ni. A chang chuan hmelhriatloh ang maiin a melh thin a, a mitmenga huatna lo langte chu a hmuh hmaih ngai bik lo. A chang erawh chuan a tha duam duam hle a, a nui hmel nelawm tak phena a mitmeng nunrawng ru zet erawh a thunun pumhlum theilo fo! Zodini nen pawh vawi hnih lai an inhmu leh tawh a, he nu laka a rilru put dan hi a hrethiam tawh chiah lo. A khawngaih piahlamah engemaw chu awmin a hria.
.

Mumbai a awm laia a hawn dawn hma kar khat vela zantin a mumang mak tak tak te kha chiang takin la hre vek. Thil thleng tur a hmulawk nia a ngaih laiin thlawhna chetsualte, Doctor in a hmai vun a hihsak te kha a thleng ta bawk silo. A thluak natna hnathawh a nih a ring ve ta rum rum mai. Mumbai lama a thianpa biakpawh a tum a, a thawhna Company neitu a thianpa aw a hriat rual chuan a nui hawk a, a chhan chu engmah hriatsual a neilo niin a inngai hman a ni. Mahse, “ I sawi Ramdina leh Jeffrey tih hmingpu thian ka la neilo, mizo thian ka la nei ngailo hrim hrim, ka hming chu Gamesh Chopra a ni” a lo tih takah chuan, a dang a ro vek a, a thaw a chham mai dawnin a hre hial mai. A thianpa chuan a lo hre tawh lo nge a tak takah engmah a thleng lo zawk? A thianpa hming chu Sanjay Gupta a ni.
.

“Ramdin, I hna I zawm leh dawn tih ka lo hria a, duhsakna ka hlan a che “ Zodini aw nalh tak chuan phone kaltlangin a rawn ti dam dap a. Ni e, kar 3 chhung a buaina tamtak chinfel tuma a beih tawh hnuah anihna diktak chu pawm mai tha zawka hriatna a nei a. A hnathawh thin nia an sawi, apa company hnuaia thawh leh chu tha a ti a. A chhungte pawh chuan chutia rilru thar a han pu chu an lawm kher mai. Anu phei chu a mittui a tla hial! A nu, nu thau chum buang kha a mitthlaah a lo lang leh thin. Apa nen office lam panin an tlan dun a.
.
“Bawiha, ka fapa diktak I ni leh hi ka lawm khawp mai”
.
“Kawng dang ka nei hleinem” a ti sup a. A hnathawh chu Mumbai lamah hnehsawh taka a thawh thin avangin buaina a nei lo. Darthlalanga a inen apiangin phirpui a nei anih a ring thut thin. Amah tak tak zawk chu heta awm tur niloin Champhai lama awm tur zawk niin a inhre fo thin. He buaina mak tak lak atang hian engtikah tak tal chhuak ang maw?
.
Remremi meng a ruai chu makti zetin a thlir a. A sam kir chiat kha a nuai thur bum a; a mitmeng chu a sen rum bawk. A rak tuar tuar a, amah chu rawn kawkin “ Ka u I nilo. Ramhuai I ni” a rawn ti cheu cheu mai. A tawlh dawrh a, anau chetdan mak tak avang chuan a tim sung sung thei hial a ni. A kut cher thik thiak chuan a rawn ban a, a nghawngah rawn rekin a hrawk bawk chu na zetin a hmet a, a thaw a chham lek lek a ni. Theihtawp in Remremi chu a nam let a, a kang chho dawrh a, ceilingah chuan vawmbei ang maiin a han bet thlawrh a, a rawn chhuk melh kul mai! Rang zetin a tho a, room atanga chhuah tumin kawngka chu a nek hawng thuai a, stepah chuan a lum thla nawk nawk a. A kheimit na vawt vawt avang chuan a meng ta hlawl mai. Mangchhia leh bawk maw?!! Thaw hlawi hlawi chungin thawh kan a han tum a . Khumah a lo awm awzawng lo mai le! Chhuat chu a vawt thlur lehnghal. Makti leh hlau zetin a hawikual a, a thim deuh riai a, a awmna hmun chu living room a ni daih!
.

A mumang kha atak tak ani tihna em ni le..a kheimit lah chu a na zual zel si, thei leh theiloin a inbengkang a, thawm reh dan em em chuan angaih a titha lo. Ti nge stepa a lum laite chuan tumah an harh loh? Step vawnban zut chho chungin a kal bai saih saih a. A room-a luh chu a hreh kher mai. Remremi kha a lo awm angem? Remremi room chu a lo inhawng deuh hiai a. tahzet chuan a ngaih angam ta lo. Mahse, intipa ve tak a nih avangin a chhungte punbuai chu tum bik lo a, hlau chung chungin Remremi room kawngka chu a nam a, kawngka bula Switch chu ahan on nghal a, a eng pup a, khumah chuan Tui em emin anau chu a lo muhil si! A thaw huai mai. A room lam chu a pan leh ta a. Mutthilh harsa a ti ngang mai.
.

A ke nat chhan chu engtin tin emaw chhuanlam a siam kual a, an awih ve mai. Apa erawh a ngawi run a, a mitmeng thip takah chuan engemaw inphum chu a awm chiang mai. Office pawh a kal peih lova. Chawhnu dar 3 bawr velah Remremi accident thu a hre ta! Hospital lam panin ke na chungin a nu nen an kal a. An va thlen chuan ICU ah an lo dahlut hman tawh a. A class bang chu truck bang sang nen insuin kawngthlangah a nawr thla a lo ni. Tuman a damchhuah an ring lo; mita hmutute sawi dan chuan Remremi zawk hian a va su lui nia ngaih theih a ni. A scooty pawh a chhe hneh khawp mai . Eng han tih vak theih a ni hrih lo a, Hospital veranda thutthlengah chuan an thu a. Anu chuan Doctor a be mek a, a rilru a kal thui kher mai. Nizan lama a mumang kha a ngaihtuah chhuak a, Remremi chu a thi ngei dawn niin a ngai. Kimkimi anga angaih vangin a chhung hnai ber a ni a, ani lehzel a awm loh chuan a tan nun a harsa leh sawt dawn tih a hailo.
.

Dar 12 a ri dawn hnai tawh a, ataksa pawn mut a mamawh tawh khawp mai. A zunchhuak chuan a mutchhuak chu a rawn tiharh ta deuh a. zung turin a kal bai auh auh a. Toilet luh dawna darthlalang lian lem lo intarah chuan a inmelh thuak a, a va zung zo rawn let leh chuan a han inbih leh thuak a. A tawlhkir tawrh mai! A thla lo lang hnungah chuan amah ang chiah hmel dang lip lep hian a lo melh kur mai le!! A rak thawt a, mahse, mi veivak an awm silo. Khur hlawk hlawk chungin a nu awmna lam chu a pan ta a. A thlan fim bawl tawk tawk chu a hru pawk a, a nu in ngaihthat loh hmel fahrana a lo en chu amnul tum takin a nui der vel a. A chhungril erawh khur nasa tak a ni.
.

Khamizan atang khan a nun chu a thlamuang ta ngailo. Remremi pawh zan hnihnaah a thi ta nge nge a. Remremi ruangte chu a hlau tlat! A awmdan chu hrehawm a ti a, a inhaw hial thin. Amah zui rengtu hlimthla awmin a hria a, Remremi anih a ring a, amhse, he hlimthla hian Remremi thih hma pawh khan a lo zui tawh tlat! Tlangvala pumpa e tiloin a dawihzep em em a. Amaha mut ringawt pawh chu a hlau tawh. Thi dawn hnaia inhriatna angah tial tial a. A thluak natna chu a lo chhuak leh ta mai aniang tiin Doctor Hmuihmula pawh a pan tawh. Mahse, “Tun hun hi I paltlang chuan nunphung panggai tak I nei thei tawh ang” tiin a lo hrilh anih kha..apa lah hian a muhil laite hi a rawn thlir niin a hre thin. A hnaah pawh a kal thei lo.
.

Nikhat chu Zodini’n a awmpui a. Pangngai takin an titi dun a. Zodini chu nidang zawng aiin a hmeltha a, a insum zo ta lo. A tawng siam siam lai chuana va fawp ta thut a! Zodini pawh a hamhaih rei bik lo. A lo duh leh thlakhlelh ngawih ngawih hmu ta niawm takin duhthawh zetin a lo keih let ve bawrh bawrh a. Khumah chuan an tlu dun a. An thawmhnaw te chu engtik laiin nge an inphlehsak tawn pawh hriat hman loh khawpin an che rang a ni. Saruak vekin an inpawm chial a, atak ram erawh an la thleng lo. Inmamawh em em in an inmelh ngwt ngawt a. Zodini bawp chu a khupin a’n nawr kau a. A mumanga a tih hlawhtlin theih ngai loh kha a tipuitling dawn ta. Thil tla darh chuaih avang chuan a tawp thut a..Zodini chu a rak thawt bawk. Rang zetin an tho dun a. Khum bul dawhkan chunga an pahnih thlalak dun, frame mawi tak a an tar chu chhuatah a tla darh nuaih a! an inmelh haw ringawt.
.
“Ramdin, ka hlau lutuk, room atangin tuemaw kal chhuak fua ka hmu ania” a khur der der a. a kawr chu a ha nghal mawlh mawlh bawk a.
.
“Kawngka a inkalh vek alawm. Tumah an lo lut theilo”

“Mahse, ka hmu a lawm” kawngka lam chu an va en a, a lo la inkhar thap bawk si . A mumang ang bawkin Zodini chu a khawih leh thei ta lo anih hi..a thin chu a rim ru teuh mai. Frame tlakeh ringawt pawh chu thil mak a ni. Engemaw hi chu a awm chiang a lawm..
.

“Dr, thudik ani ka sawi ni. Min zuitu chu a awm ngei alawm” a ti khur dat dat a. Hmuihmula chuan fim zet hian a rawn melh vang vang a. “Ka awihlo hran hleinem, mahse, I thluak hi a la tha ziktluak lo tih erawh pawm rawh”
.
“Heti reng reng chuan ka damrei lovang”
.
Hlauhna in a tuam apiangin amah zuitu a nei tih a hrethiam tawh a, hlauhna chuan a tuam ngun tial tial lehnghal. An chhungkaw awmdan lah maktih deuh a nei lehnghal. Remremi thih hnu lawkah anau mipa kha a bo zui ve daih! A nu leh pa a zawh chuan, “zirna chhunzawm turin Bangalore lamah a kal leh ta anih kha” an ti mai a. Mahse, mak a tih zawk chu Remremi ngaia sun hle awm si hi a nu leh pate hmelah chuan lusun an nihna a lang tehchiam lo tlat! Thenawm khawveng lo lengte pawh an tin tan tawh a. Zodini bulah mak a tih thu a sawi ta tawp a.
.
“Nia, I natna avang hian engmah I hrethei tawh lo alawm..Remremi hi I unau tak tak a nilo a; Thingtlang atanga lehkha zira rawn awm a nia, I nu chhungte lam an niin ka hria. Mi bulah erawh I pa fabik anga sawi a ni thung. I nu leh pate hi an fel ka ti ngawt a sin. “ a ti a. Kimkimi hming a hrechhuak ta zawk mai! A rilru mang lai chuan engmah a ngaihtuah thei tak tak ngailo. Nitin injection a la ziah a, chu chuan a hriatna hmanna kawngaha pui dawn niin an sawi. Pawn a chhuak ngai lova, diktak chuan khawi hmunah pawh a mikhual tlat a tin ni..Zodini chu a thian neihchhun a ni mai a; a ngaina tawh hle. Mahse, sex erawh hmanpui a tum leh tawh ngai lo. Amahah hian kimlo awmin a hre thin a; eng nge kimlo tih erawh a hre hek lo.
.
Zodini sawm angin bazar lam panin an inkhalhchhuak a. Pheikhawk dawrah an lut a, Zodini’n pheikhawka en mawlh mawlh lai chuan, tlangval sa tha lam hian ngam tlak fe hian a banbulah a rawn hnek fiam zuah a. A hmuh tawh hnu chu niin a hria a, tu nge anih tih erawh a hrechhuak zo lo.
.
“Nupui I nei tawh em?” a ti luam a. Nui chungin a lu a thing a.
.
“Seni chu min lo biak rawh aw” a ti leh a. A lua vuak chawrh ang maiin chu thu chuan a nghawng a ni. Seni..seni kha..ni e, a hmangaihber kha. Hepa hian a hriatpui chiang lutuk. Mahse, tu nge anih le?
.
“Thianpa, accident vangin ka hriatna thenkhat ka hloh a, tu nge I nih ka hrechhuak zo tawh miah lo mai. Kan la inkawm leh theih nan I number min pe phal angem?” a ti a. Chupa chuan a phone aphawrh a. Chutihlai tak chuan Dr Hmuihmula leh nula pakhat hi an lo lut mek a, Hmuihmula chuan a thian thar chu a rawn nek sawk a, a phone chu a thlauh nghe nghe..Hmuihmula nen chuan an kun rual a, phone chu an zuk ban rual chiah a. Hmuihmula phun sep ri chu a hre pha a, a thian chhar thar bulah chuan eng nge a sawi tih erawh a hre lo. An rawn hawichhuah leh chuan, tlangval chuan, “Kalna tur hmanhmawh deuh ka nei a, kan inhmu leh dawn nia” a ti a, auh zui hman loha chakin a chhuak ta daih a!
.
“Ramdin, I thian hluite avanga rilru buai taka I awm hi ka duh lo. Khapa kha ka hrechiang, I damloh lai pawn a rawn kal tawh. I hriatna hloh kha remchanga hman a tum niin ka hria; chuvangin ka hnar bo anih kha” a ti chang fak a. A mitmeng chu a hlauhawm ru kher mai. Mahse, Hmuihmula hi a ring zo tawh lo. Thil diklo inphum chu a awm chiang a lawm..Seni kha engtin nge a hriat? A hming diktak hi Ramdina nilovin Jeffrey ngei kha a lo ni reng zawk lo maw? An khua pawh Champhai anih kha..Khapa kha hmuh leh a engkim zawh a duh takzet a ni. Mahse, Aizawl khawpui zau lutukah hian a tawng leh kher angem? Hmuihmula chu rum zeta melh chungin zodini pawh ngaihsak tawh lovin thudik hre turin a chhuak ve ta nghal a. Khaw thim dawn thlenga a zawn pawhin a hmu zo tawh silo. A tah a chhuak hluah hluah mai.
.

“Seni, nangmah I ni tiraw? Ka hmangaih, ka lo kir leh tawh asin” tiin Seni hmui sen hiam chu a lo fawp a. A hmel chu a that ngaiin a la tha reng mai. Mahse, a kuahna a tanga talpitin amah hlat zawngin a hnungtawlh riai riai a, a au zui lawm lawm naa a kal zel si..man gang takin a va ban tawk tawk a, mahse, “ Ramdin, Ramdin” tia rawn kotu aw avang chuan a mumang chu a bo leh ta. A nu chuan lainat hmel zetin a lo melh reng a.
.
“Ka nu, Seni ka hmu duh” a ti a. A nu chu a bangbo kher mai. Chumikar chhung zawng chuan Zodini nen an awmdun a ni mai e. Eitur a siamsak a, a barh a, a bualfai bawk a. A nu ang mai ani. He hmeichhia hian a hmangaih tih chu mi mawl ber tan pawh hai rual a nilo. Ani pawh chuan tihtakzetin angaina tawh a. A hmuh loh hlek chuan a lam chung thin. Zirtawpzan ani a, ruah a sur bur bur a; tek a tla bawk a. Zodini chu haw lo mai turin a ngen a. A chhungte a va phone sak a; an lo remti mial mai! Engvanga ani thluak lam thalo hi lo duha lo ngaina ve viau nge maw an nih chu le? Ele..sum mawle..Zodini hi chuan a sum leh pai tello pawhin a hmangaih ang tih a ring, a nu leh pate erawh chuan a rokhawm tur tam tham tak an it vang ani pah fawm ang tih a ringthiam ve tlat! Chumizan chuan puan inzawn rialin an mudun a. An thawri chu a ring tial tial a, namen loa chhungril inmamawh tawnna chuan zah na bosalin a chet dun tir a. A tawp thleng tura an inpuahchah laiin a room tukverh darthlalang chu a rawn keh leh ta chhuai mai le!! Hei em em zwng..Ramhuai thiltih a ni tawh ang.
.

“Thli a tleh nasa em alawm..” tiin a pa chuan a ngaihthat lohna nuaibo sak a tum a. Mahse, a thei tawh lo. Tuemaw mah zui rengtu thiltih anih a ring tlat a ni. Inah a mah chauhin a awm a. Phone directory chu a bih ngur ngur a. Champhai khua hming list chu a zut thla zai zai a. A biak duh hming a hmu mai silo. A keu let a keu let a. A vawithumna ah a hmu ta hlauh mai le..
.
“Hello” aw tham chhil chhel hian a lo chhang a. Hmeichhia a ni.
,
“Hello, Ramdina ka nia, Aizawl atangin..tu nge ka biak aw” a han ti a.
.
A rawn chhan leh hma chuan phone chu a thi ta bul mai. A dial leh a, vawi tamtak, a tlang thei ta hauh lo. Chungte chuan a ngaihthat lohna atizual sauh a. Tlaiah chuan a nu bulah Champhaia zin a chak thu a sawi ta a. Anu chuan a pa mitmei veng tak chungin “ Dam chiang phawt rawh” a lo ti a. A hmel chu a ngui riauin a lang. Anu hian tunnhma ai khan a ngaihsak tawh lo niin a hria a; mahse, a mut tawh hnuah a khum bula rawn kalin a biang te chu a rawn chul thin tih a hria. Apa erawh a ngaina tak tak thei hlawllo a ni.
.
Zing dar 4 a ri dawn tep tihah a room kawngka chu an lo kik dawt dawt a, a va hawn chuan a nu thlabar hmel a hmu nghal a. “Dr Jamesa a thi” a rawn ti a.
.
Lehkhaphek engemaw zat, chilhkhawm chu a lek a lek a. A chhiar tura Dr jAmesa hnutchhiah chu a ni ngei si a. A ngaihna ahrelo viau! Dr James kha ani chuan HMUIHMULA tiin a rilruin a ko mai thin a. Mi fel tak nilo mahse, amah enkawltu ber anih vangin a thi thut chu pawi a ti ve hle. A thih dan mak tak avang hian amahah nghawng awm dawn tlata hriatna a nei lehnghal. Khamizan khan damlo serious deuh an rawn dahlut a, Dr Jamesa koh tuma nurse kal chuan a ofiice-ah a nghawnga syringe invuah chunga thiin a va hmu kha ani a. A lo mengpual hru a, hlau hmel te pawh a pu e a. Engvanga ama nunna la ta mai nge anih tih tuman an hrelo. A dawhkan pawhdawha envelope uk kawmah chuan “RAMDINA TAN” tih a lo inziak kuau a. Chuvanga chu lehkha chu a kuta awm ani. A chhiar duh lo lui a. Mahse, a chhiar a la ngai dawn tho tho tih a hria..
.

“JEFFREY, tuna RAMDINA lo nita hnena ka sawi tur hi ka thih hnua a chhiar dawn avangin a phuba chu ka tuar hman dawn lo a. Ka la lawm tal e. Ka sawi turte hi thudik tak vek an ni a. Ka thiltih tenawm tak avanga hremna chu thih hnu khawvelah ka tuar dawn tih ka hre bawk.
.
Kum 7 liamtaah khan Germany ramah Doctor zir turin ka kal a. Ka thiamna sang tak avang chuan Mizoram sawrkar te nghahhlelh leh innghahna ka ni. Ka zirna hmunah chuan mitdawivaih thiam pakhat a awm ve a. Canadian a ni a, Doctor thiam leh kan entawn ruk a ni thin. Ani nen chuan engtin tin emaw kan inkawm chho a, kan kalbing ta deuh a. Mitdawivaih lam thil te chu a rukin min hrilh thin. Mahse, ka uksak tehchiam ngailo. Mak ka tih ruk erawh thlarau a kochhuak thei chu a ni. Ka hmuhlai ngeiin mitthi tawh taksa chhungah thlarau a kolut a, mitthi chu a lo nung leh ta mai a ! a tir chuan ka rap viau a, tuma hnena sawichhuah a phallo. Amah ka hlauh em avangin ka sawi chhuak ngailo bawk. Reitak chhung kan awmdun takah chuan a thiam thilte chu ka hre chho ve zel a. Setanist ani tih pawh ka hre chho a, mak ka tilo. A thlarau chu setana hnenah a hlan tawh tih te min hrilh thlap a. Doctor lar leh hlawhtling tak anih theih nan a thlarau chu a dahkham ta hial mai! A hlawhtling reng bawk a. Khawvela Doctor thiam ber ber te pawhin an rawn tamber a lo ni ta a. Keipawh hlawhtling inti takin Zoramah ka lo haw a. Theihtawp chhuahin tihdamna hna chu ka thawk a ni. Vanlaitla an tih ang hi ka ni a. Unaupa pakhat chiah ka nei a, ka nu leh pate ka hre lo a. Ka unaupa nen chuan hnuchham in atangin nupa khawsak harsa ve takten min la chhuak a ni. Mahse, ka nu leh pate khan kan unau in min hmangaih em em a, lehkha thiam thei tak kan nih avangin kan zirna senso chu scholarship kan lakin a phuhru ve thei deuh a. Harsa taka inzirchhuak ka nih avangin mi retheite chunga ngilneihna lantir hi ka mize pakhat pawha ni ve reng a.

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 25th, 2016, 10:44 pm

Ka unaupa erawh sumdawnna lam a buaipui a, a hlawhtling hle. Germany a ka awm hma kum 2 ah ka nu leh pate chuan a kum zawnin min thihsan a, ka nau phei chuan a tuarthiamlo hle. Mahse, kan puitling hmanin, kan inenkawlna khawp sum chu kan thawk chhuak ve ve tawh a ni. Mizorama ka rawn chhuah chhoh pawh chuan ka nau lo chu belh tur ka nei lo a. Ani pawhin min ngai em em thin. Nupui neih ka tum ve tawh a, mahse, ka bialnu chhungte chuan kei fahrah mai mai chu makpa atan min lo duh awzawng lo a; pasal dang an neihtir a, chutihlai chuan ka fa thla 2 mi a pai mek a ni. Ka rilru na mangang lutukin lehkhazir lamah ka in pe pumhlum ta a. Tihian Doctor ka lo ni ve ta hial a ni.
.
Ka nau chuan fapa pakhat chiah a nei a. A hming chu Ramdina a ni. Min ngaina hle a; keipawn fa ang tak takin ka en a, ka duat takzet. Mizorama ka lo chhuah chhoh hnu kum 3 a liam tihah ka fapa anga ka en Ramdina chuan natna khirh tak a tawk ta tlat mai! Thluak cancer ani tih ka hriat tirh chuan ka mittui hi a dir zung zung hial a ni. Fapa mal, a pa rokhawmtu tur, kan thlah kalzel tur anih avangin theihtawpin a nunna chu pawhseisak ka tum a. Operation pawh vawi engemaw zat ka ti tawh a, rei vaklo chhung chu a tha a, a rawn chhuak leh zel si. Zan khat phei chu a buai zual a, an in atanga chhuakin an thenawm te vawkchaw chhumna bulah a va thu ta reng a. A rei tak em avangin kan va en a, kareii!! Ramdina chuan vawkchaw chhumso hlimah a hmai chu lo phumin a lo chalchang mek a lo ni. Thenwmten an hrelo pawh chu a mak hran lo, hetianga awm fo avang hian ngaiah kan lo nei deuh tawh a; eng em tilo hian amahin a lo haw veleh zel mai thin a, kan lo ngaihthah ve bawk a ni.
.

Rang takin Hospitalah kan hruai a, a chatthla dawn ruai a ni. Chutih hunlai chuan Mumbai thlawhna accident avanga hliam tuarte leh mitthi te chu an mu dul bawk a. Tlangval pakhat chu a chatthla ruai tawh a, a taksa langthei lamah hliam a tuar lova, a kawchhunga thisen put nasa tak avangin a thi mek a ni. Hospital chu manganna hlir hian a khat a ni ber e.Tlangval chatthla mek bulah chuan ka ding a, a hmel chu ka melh tlawk tlawk a, Ka fapa Ramdina hmel nen danglamna awmin ka hre lo. An kum pawh a inrual khat viauin ka ring. Chutia na tuar thi mek ka en lai chuan ngaihtuahna thalo takin min rawn luah a, Operation theatre ah rang takin ka nawrluh tir a, Ramdina pawh ka nawrlut nghal a. Midang ka hnawtchhuak vek a Ka thianpa min hrilh angin chemtein ka ban ka zai thi a, chhampual tur chu chham in ka rilru chu ka sawrbing a, tlangval thi mek taksa atang chuan a thlarau ko chhuakin, Ramdina thlarau chu chu tlangval kawchhungah chuan nawrluh ka tum a..mahse, ka hlawhchham, Ramdina thlarau chu a kalbo tawh.. Tlangval hmaivun chu hik in, Ramdina hmai kang so luai ah chuan ka bel ta a. Tlangval hmai erawh ka tuam a, chutia ka tih zawh meuh chuan a lo thi fel der tawh a ni. Tichuan, Ramdina taksa, nunna nei tawh lo chhungah chuan tlangval thlarau chu kolet in ka nawrlut ta!! Awih harsa I ti ang tih ka ring. Mahse, setana tanpuina zarah ka tithei tlat! Ka fapa chu mi nung a lo ni leh ta a. A hmai kang pawh vun thara thlak a ni ta bawk. Ramdina taksaa awm kha nangmah Jeffrey kha I ni a, kha taksa kha I taksa a ni tawh lo.
.

Chu chu hmanni lawka thleng angin I hre maithei. Mahse, kum 1 a liam tawh. Khang kum khat chhung khan nasa takin I thlarau hriatrengna chu thaibo ka tum a. Ramdina anga I inpawm theih nan hian thil tam tak ka hmang a, ka hlawhtling nual bawk. Amaherawh chu I thisen zawmpui, I chhungte erawh I theihnghilh thei lo. Tu nge I nih tih pawh a changin I hrechhuak leh thin. Ka thawhrimna chuan rahtha a chhuah ve zel a. Ka naute nupa bulah chuan I natna avangin chhuanlam tha tak ka nei, ka sawi zawng zawng an awih zel bawk. I nihna diktak hmanga zawhna I neih huna an chhan dan tur che pawh ka hrilh lawk thlap tawh a ni. Amaherawhchu, ka nau hi mi fing tak a ni a, a rukin I chanchin nia I sawite kha a lo chhui a, a lo dik zel si avangin a ringhlel a, min zawt ta a. Keipawn tha takin ka lo hrilh a; hriatchhuah hun a la awm dawn tho avangin.
.

An fapa ka hmangaih em vanga ka ti nia a hriat vang chauhin min ngaidam a ni. A nupui pawh engmah a hrilh ta lo reng bawk a. Tichuan, in inlama I hawn dawn khan buaina awm palh ang tih hlauin, I chhungte diktak kan zawng chhuak a. Ka nunah a vawikhat nan ka thiltihah chuan ka inchhir ta a ni. A chhan chu I nu kha ka bialnu, ka fa thla hnih mi anih laia a chhungten pasal nei tura an nawrliam kha a nih vangin. Ramdina nen inhmel a lo inan em em chhan pawh kha nang hi ka fapa, ka thisen I nih vang a lo ni. Min ngaidam ang che aw.Mahse, anih tur ang a ni tawh a, huaisen taka ka hmachhawn angai a ni. I farnu Kimkimi I hriatrengna hmang khan I nihna chu rinhlelh tir che ka tum ta a. Remremi kha hmeichhe awmtha duhlo,ks ang deuh chi hi a ni a. A hmel landan thlak sak a, mi hausa fapa farnu lema tana sum thahnem tak hlawh chu a lo chak sakhai a. I nau niawm tak, mipa erawh kha chu ka spy ani, I awmdan thlithlai tura ka rawih a nih kha..mahse, chungte chu ka naute nupa bulah chuan, I natna vangin a ngai hrih tih thu hmangin ka hneh a. Hnialna min nei ngai lo. Ka experiment chu a hlawhtlin leh tlinloh ka ngaihtuah reng thin.
.

I tha chho zel dawn emaw ka tih laiin Ramdina thlarau kha rawn let lehin min rawn tibuai ta tlat mai. A taksa chu a duh thu leh midang chen ve a rem loh thu a sawi chamchi thin a. Remremi kawchhungah lutin, a tihthaih thul che. Remremi khan hlauhna a neih tak avangin bansan a duh a, keiin ka remti silo. Ramdina thlarau bulah Remremi tibuai tur leh a dahbo thei anih chuan a taksa ka pekkir theih thu ka hrilh a . Tichuan, Remremi taksa thununin, accident a tawh phah ta anih kha..Ka mirawih pakhat khan Remremi a thi tih a hriat khan hlauhna neiin min bansan a tum ve leh a. Kha pa kha chu keimah ngeiin ka phumbo ta a ni. Ka a vek tawh. Ramdina thlarauin min chimbuai chhen avangin ngaihtuahna mumal ka seng thei lo a tin ni. Ka thuruk hi hailan anih ka hlauber a, ka nau ngei pawh hi ka rinhlelh chang leh ka enthlak chang a tam ta. Ka thlamuang ngailo a, Pathian ka au ngam lo bawk.
.

Ramdina chuan min vau tan ta a, a taksa ka pekir lo anih chuan, nangmah kaltlanga ka thuruk puandarhah min vau a. Ka hlau a ni, a taksa ka peklet dawn chuan ka thah che angai dawn a. A vawihnih nana thah che chu ka ngam tawh thlawt lo a ni. Ngun taka ka ngaihtuah hnuah keimah hi kalbo ila, nang chuan anih nih in khawvel hi hmachhawn ta mai la tiin..”
.

Hmuihmula thuziah a chhiar zawh chuan a thaw hawk a, engthawlna mak tak hian a tuam a. Ni e, a hriat duhber a hre tawh. Amah chu a dik a, thildang chu a lem ani tih hi. A nu leh a naute angaihtuah a, a pa in angainat loh chhan pawh a hre ta. Tuna a pa lem lemin a ngainat loh chhan te nen. Engtia chetlak chi nge tih erawh a hre lo. A taksa chu a tawih ral tawh a, kir lehna tur a neilo. A hmel erawh Jeffrey ang tho kha ani. He chhungkaw hausa tak rokhawmtu anihna hi tlansanin, kum kaltaa amah lo sun tawhtu a chhungte bulah thuruk mak tak puangin a kir leh dawn?
.
“Ka u thuruk avang khan min chhuahsan lo hram rawh aw. Ka fapa ni mai rawh. I chhungte pawh ka tanpui ang, kir leh mahla mitthi I ni tawh an tan chuan..an lo pawm thei tawh kher lo thei che asin” a pa lem lem chuan a ti sap a. A hmel chu a va en a, a mitmenga amah thlakhlelhna leh chelh duhna chu a hmu chiang hle. Ngawi rengin a chhuak a.
.

Ni 4 aliam tawh. Thutlukna a la siam thei lo. A rilru thawpik lutuk tihkian nan a inkhalhchhuak a. LIANDALA park-ah thlifim a va dawng heuh heuh a. A chau a ni. Ramdina thlarau reh ta hmak erawh mak a ti a, a ngaih a tha lo hial zawk.
.
“Jeff” a hnunglam a tanga rawn kotu aw ri chuan a thinlung a chhun zawk mai. A lehhawi a. A hmaah chuan nula te lam, ngo vir ver, sam dum hlap, mitmeng vai riai mai chu a lo ding a. Hman ai khan a cher a, a hmai a dang bawk.Thli thawin a mit fim tak a tanga mittui luang chu a chhem thle set set a.
.
“Seni!!”
“I thilo tih hi ka hria ani, ni e, I thih ka phal ngailo; ka telloa mitthi khuaa kal chu I duh lovang tih hi ka hria asin” a ti sep sep a. Va pawm lawp mai tuma a ke a pen dawn lai chuan, sir lam atangin , “Ramdin” a rawn ti puam talh a. Zodini lam chu a va hawi vat a, Seni a en leh a. Awmngaihna a hre ta lo. Nula pahnihte inkarah chuan a ding a. Nula pahnihte chu chechanglo lekin an inmelhdun ta ngawt ngawt a…
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 17th, 2016, 6:16 pm

ti hiana tawp a nia aw, min zawt ve ziah....

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)