TIHPALH AW ! BY Toni DA Ralte Ahmangaihi

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

TIHPALH AW ! BY Toni DA Ralte Ahmangaihi

Unread post by Ngaia » May 31st, 2016, 4:48 pm

TIHPALH AW !





“Khawngaihin min call sak thei ngem le” tia ngenngawl zeta min ngenna chu tih hlawhtlin sak loh a har khawp mai. Ka thiannu Lapuii number chu ka hmet chhuak ta nge nge a. A ring quit thak thak mai si! A beidawn hmel em em a, ka lo khawngaih kher mai. A ding hluai a, a kekawr ipte zen tut chungin, “Arem, diktakin Lapuii hian midang a nei tiraw?” a ti tham tiak a. A chal arh phak chu a chuar nang nang a.



“Engmah ka hre lo tak tak” tiin ka chhang a. A awih loh hmel kher mai.



“Umm, engpawhnise, ka va haw ve phawt ange, zanah lo biak tum hram ta che, khawngaihin” a ti leh a. Ka lo bu nghut ringawt a. Lunghnur taka a chhuak chu ka thlir zui vawng vawng a. Zanah chuan Lapuii chu ka be thei ta hram a, “I ti khawngaihthlak e mai, tiang khawp hian a duh che a, tinge I chhaih kual reng a?” ka ti hlak hlak a. Ka ngei ve deuh hrim hrim, Lawmzuala anga hmangaihtu hi a damchhung in a tawn ka ring tawh lo.



“Awiii ha! Chutiang pawh ni lo; diktak chuan ka hne lawm, engtiklai pawn min zui a tum a, ka zalen thlawt lo; I hrethiam ve lovang”



“Chupawh nise laklawh deuhin awmtir reng lo la; I ti khawtlai a lawm”



“then em em chu ka phal chiah bawk si lo lawm”



“Hmph..ka huat zawng tak, Lum chuan lum, vawh chuan vawh tur” .



Lapuii hi a hmeltha em em a, a nalh bawk; model a la ni lehzel a, FB ah pawh a lar viau! Likers a ngah thei rap mawle. An hausa lehzel a, a luck pawh chu thilmak a ni hran lo. Tette atanga inkawm, class khata thu ho thin kan ni a, kan thianho hi pa 5 kan ni a; kei hi ka danglam lawtlak! Kan hausa ve lem lova; ka nalhin ka hmeltha fahran lo bawk, tin, ka mizia hi “boring” min tihsak thin, ka tawng tam lova, ka zaidam chuang lo bawk! Mahse kan la inkawm ho ve zel a, an thuruk erawh ka hnenah an bunruak thin. Ngaihzawng ka la nei ve lova, kum 19 lai chu ka tling ve tawh, min ngaizawngtu pawh chhiar tham lek an ni. Ka zei lova, mipa hi ka ngaisang a, ka zah bawk, mahse ngaihzawng nei tur chuan inpeih ka la inti lo a ni.



Lawmzuala leh Lapuii te hi thla 3 liamta ah khan an in ‘date’ tan ve a, an hmeltha dun a, an inhmeh takzet! Lawmzuala hi kan college Principal fapa neihchhun a ni a, ngo lutuk lo, lian fahran, chum lek lek, tawngtam lem lo leh ngeng ve fahran hi a ni a. Lapuii nen an nih hnu chuan mipa ka kawm tam ve pawl tak a ni awm e.





“A rem, I thiannu hi ka ring zo tawh lo, Nizanah pawh Peka ten Bike a an inphur an hmu” Canteen-ah keimah chauha ka thut laiin a rawn thu ve a.



“Eng nge sawi se min duh” ka ti tawp! Dawt sawi kual vel hi ka thiam ve lo a, ka thiannu chu dawt hmanga phatmar dan tur lah ka hre hek lo.



“Engtinnge ka tih ang”



“Ka hre bik hauh lo mai” hnem chu ka duh em em, ka thiam ngang si lo a ni. Chawhnuah Lapuii chu class a rawn kal ve chiah a, “Nizanah tunge phur che?” ka lo ti nghal tawng a. Hahthlak tih hmel zet hian, “Ninawmmm, Johny nen kan leng a lawm”



“Lawmzuala’n a hria” ka tih mek laiin Lawmzuala rawn kal phei ka hmu a, rang zetin class room ah ka luhsan ta a. Engtinnge an inbiak tak tih erawh ka hre lo a, mahse ka ngaihtuah nasa hle tih zawng ka hria.



Khumah chuan ka let tawn chhen a, ka hui leh pap pap thin. Ka thu chhuak ta hlawl a, ka khum bula tukverh chu ka hawng a, thla chu a eng lutuk lo na in, lung tileng tawk lekin a eng riai a! ka thlir reng a. Ka awmdan mak tak avang chuan ka in hua a, mahni intihnat chakin hriamhrei ka melh awl lo thin, Kar 2 lai a ni ta. Chaw ka ei hlei thei lova, mutmu ka tuah tha thei hek lo. Hetiang em em a ka mihringpui ka atchilh hi ka damchhungin ka tawn leh ka ring tawh lova; tawn leh pawh ka duh hek lo. Mi vanduai tak niin ka inhria a, ka tette atangin thil sual liantham em em ka khawih ka hre ngai lo, nungchang zawiawi, mi pawisawi lo tak niin ka lo inhre thin, anih chuan tihsual nei ang maia keimah leh keimah ka inhrem tak mai chu le?!! ka rilru hi ka duhdan a ni hlawl lova, paihthlak dan ka hre si lo.



Ngaihzawng lo nei ve zeuh zeuh tawh ni ila chuan engtin tin emaw inkhaichhuah dan pawh ka hre mahna. Mahse ka ngaihzawn hmasak ber chu ka tana harsa lutuk tak maiin LAWMZUALA ni tlat si a lawm!!



Ni e, ka mawl a ni. Ka chak lo a ni. Ka thiannu bialpa chu khumlaizawlah ka lo suangtuah a, a hmel hmuh chakin leh hmu tha ngam chuang si lovin ni ka vuiliam thin. Min hrechhuak ang tih hlau reng rengin engkimah ka fimkhur a, venthawn nei reng chunga midang zinga awm hi a hrehawm zia hrethiam in awm ka ring! Dawihzep takin ka pumpelh lui a, huaisen takin ka duhthu erawh ka sam fo thin. Thiante bialpa han ngaihzawn tawp chu tumah hian an duh bik ka ring lo, keipawn duhthlang thei ni ila, ka hnawl chiang ngawt ang. Mahse ka inhriatchhuah meuh chuan ka lo tlai tawh a, Lawmzuala zun chuan min phuar nghet tawh lutuk tlat! Hmeichhe naran leh satliah ve tak ka ni chu pawi ka ti, na ka ti bawk. Mite angin hmeltha tak leh nalh tak ni ve ila chuan Lapuii’n a kawp na chhuanlam paw’n kua ka hreuh ngam ve mahna. Mahse ka nuna ka chhuan ve theih tur awmchhun chu ka lehkhathiam theihna chu a ni mai awm e. A tir chuan hmeltha ka tih vang in hmuh nuam ka ti ringawt chauh a, a lehpekah chuan a mizia duhawm leh pa hrak chuan min hip leh a; a tawpah Lapuii a hmangaihna thinlung nem tak chu ka thik a, ka awt ngawih ngawih a, neih daih ka duh a, rukbo ka chak hliah hliah thin. Tichuan, Lawmzuala aia pawimawh chu ka nunah an awm ta lo a ni ta ber e.





“Nang hi I danglam” Duati {kan thiannu} chuan min ti a, ka lo nuih ringawt. Lapuii’n ngaihdam a dil vangin Lawmzuala pawh a nui hmel ka hmu leh thei ta a, thikna thinlung kha zet nen pawnlang takin ka lo nuihpui a sin!



“I va rei em em ve, I theihnghilh tawh mi a?” Lapuii chuan phone tangin min rawn vin hluk hluk a.



“eng nge”



“hmeli, zanin ka b’day party khaaa” titau titih hian a ti a. Ka hrechhuak thut, ka inthiam lo hle.



“Ka insiam anga, lo phei nghal ang”



“Lawmzuala’n a lo hruai ang che” ka chhan hmain a dah daih. Ka khur titih nghal ringawt a nih chu!!





“I ang lo tawp, I chhe lo” nui hak hak paha min titu Lawmzuala chuan ka rilru a rawn hria ang tih hlauin ka lo kimki chawih chawih a, Nia, ka u in min leisak kawrfual chhing nalh zet kha ka ha ve ngei a lawm! Ka ha ngam ngai lova, mahse zanin chu tuemaw mit lak ka duh ve a ni mai! Vawi1 chauh tal pawh!



“ka inti chhe lo ve tawh dawn” ka aw khur chu a hre em lovang chu maw.



“einch! A tha lawm, tinge a?’



“bialpa ka nei ve dawn a”



“huh! Tunge?”



“ka la hre lo” a nui hawk hawk a, ava’n pa tak em! Min rawn thlek haw a, “ka lo zawnpui ang che aw” hmuhsitna zawng tel hauh lo mah se, ka lo ngaihzawn ruk em em tawngkam chhuak atan chuan na ka lo ti em em a, ka dawngsawng nuam mang hauh lo.



“a ngai lo, hmangaih chu ka nei lawm” ka thutak kher mai. A mitmenga mak tihna lo lang zawk chuan min tinuam riau a!



“min hrilh dawn lo maw?”



“aw”





Lapuii room-ah chuan ka thu ran a, ka pum sa hut hut chu ka dawm reng a, nia, zu ka in ve tlat alawm! Tam deuh.

Mi zawng zawng maktih khawpin ka mizia ka pensan a, zu ka in a, ka lam a, ka tawngduh em em a, a changin ka mittui a tla bawk, mumal ka nei miah lo, keipawn ka awmdan chu a tha lo tih ka hre ve e..mahse e..KA PUAKKEH tawh. Ka thinlung chu hahdam se ka duh ve ngawih ngawih a sin; puakdarh se thawl hawk ila ka duh.



“Zanin hi enge awmzia?” Lapuii leh Lawmzuala ten ngaihtuah hmel taka min melh reng chu ka ngaithei lo ru hle, mahse, “ih..ih..ka hre bik lo” ka ti niah niah a. Khumah chuan min nem mu a, ka pheikhawk min phelhsak a, puan min sintir leh thlap bawk a, chutiang khawpa thian min ngaihtuahtu chuan a bialpa ka ngaizawng ve tih a hre hauh si lo! Engtinnge ka tih nat ngam tehlul ang le?! ka va vanduai tak em!





Ka dangro lutuk chu ka harh hlawl a, a lo thim deuh riai a, ka tuihal lutuk chu hremhmunah ka awm ta emaw ka inti hial a lawm le! inhnuai lamah tui lak tumin ka tho chhuak a, mahse ka thu leh rang kher mai. Rizai ka hmer ta ngawt ngawt a.



“Duat, ka zo dawn a nia, ummm..” tia ka thiannu Lapuii ngik feih feih leh Lawmzuala rum nghut nghut chu ka ngaithla ngam thlawt lo. Ka beng ka hup a; ka mittui chu hruk sen rual lohin a rawn luang zawih zawih mai ! a na..a na lutuk. Ka thaw ngam tawh lova, ka thidang mai dawnin ka hria, ka mutna khum epa sofa ah chuan ka mipa hmangaihber leh ka thiannu duhtak te chuan hmangaihna an chendun mek a ni. Kei hi khawnge ka awm? Anmahni ka hmu lova, mahse ka mitthlaah erawh chiang takin Lapuii taksa ruak kang leh nal hen mai te, nuam ti taka a hmel hmaia a han siam lerh vel tur te, a heh a pet fan fan tur te, Lawmzuala’n duhtawh zeta a fawp tur leh hlim leh phur fahrana a han che vel tur te chu ka hmu si a! hrehawm na hi engtiang chiaha tawrhhlelhawm nge a lo nih tih ka hre ve ta e. Ka ta ni miah lo tur ka lo hmangaih ve ringawt hi ka thiamloh a mi? mawh? Ka lo hmangaih ve a ni mai a, tih dik loh ka nei em ni? Hmangaih na hi duhthlan theih ni se chuan maw..kei hian Lawmzuala tih hmingpu hrim hrim pawh ka pumpelh zel duh ang..mahse kawng dang ka nei miau si lova, he tawrhna rapthlak zet paltlang tur hian “tawnhriat” pakhatmah ka la nei ve lova, hmangaih neih dan pawh ka hriat loh laiin hmangaih neih loh dan tur phei chu engtinnge maw ka hriat ang le!??



Ka khawsik hluah hluah avang chuan Lapuii te chu ka kaitho ta nge nge a, a nu leh pa an zin lai a nih vangin ka thian dangte pawh room dangah an lo riak fur hlawm a, kei chu a ngaitein ka chuang leh ta bik a nih chu! Damdawi ka ei a, ka muhil der ta ngawt a, mahse chhin khat pawh chhing lovin ka hmangaih ber te chetla dun ngaithla chungin mittui nen ka tal tlaivar ta thak a nih kha!





“A rem, dam vat rawh aw” ni 2 hnua min lo kan in Lawmzuala’n chutiang chuan min thlah. Ka dam ang. Kar 3 naah chuan ka dam tha tawh viau a, class pawh ka kaltha thawkhat e. Lehkhazir lamah ka tawrhna chu ka hrithla a, ka hlawk tho e..i ti tawh mai ang. Zan1 chu Lawmzuala a rawn lut a, hmanhmawh zetin.



“Arem, hawh sawtah min lo kalpui lawk teh, khawngaihin” a ti a. A rui lo tih ka hria, a mangan hmel hle bawk. Ka pa a awm lova, ka nu hnenah chuan a dil ta chawt a, ka nu pawh chuan a hmel mangang tak avang chuan kalpui min phalsak a, kan chhuak dun ta a.



“Enge thleng a?”



“A rem, Lapuii kan zawng dawn”



“tinge?”



“Johny nen an lengdun a, an in hau a, johny chuan kut a lo thlak a niang; tap pur chungin min lo call a”



“khawnge a awm”



“ka call tlang leh thei tawh lo a, kan zawng dawn lawm”





Tiang khawpa hmangaihtu a nei chung paw’n a la fawr san thei chu nia aw! Kan va inang lo hlawm tak em! Ngawi rengin kan tlan zel a, kawng peng bulah a ding a, kan chhuk a., a thim deuh a, min rawn kai a, ka lo insangmar teuh ringawt. Kawng pengah chuan kan kal zel a, thlam a lo awm a, thawm chu a reh vung vung thung. Thlamah chuan kan lut a, a phone a hmet eng a, tumah an lo awm lo, a lo hnawk niah tih mai loh chu! Thlam chhaka dil awmna lamah chuan kan kal leh a, mihring thawm reng reng hriat tur a awm lo. Beidawn hmel zetin lungpui chungah a thu hnawk a, keichuan Lapuii call ka tum char char a, a tlang thei der si lo.



“Lawmzual, I chiang maw? Hetah hian an kal tih”



“A sawi dan kha chu ania, hei hi Johny-a patea te huan a nia”



“Hun a liam leh nual tawh sia, an lo kalbo leh hman tawh a nih dawn hi”



“Lapuii hi chuan min tibuai ve ngawt mai tiraw?’



“Ka hrethiam che lawm” Ka thinlung takin ka lo ti sap a.



“Kan inthen tawh tih a la hrilh lo che em?” ka phu zawk mai.



“Hrilh nang, ka damloh buai nen kan inhmu khat em a, class a kaltha bawk si lova, tinge in in then a?”



“Ka duh tawh lo a”



“Maw?!!”



“Ka rilru a let tawh ni ber, ka hriat lohin ka fa a lo titla a, bakah midang min kawp san reng a, ka give up ta mai”



“mahse tunah I la ngaihven tho sia”



“Min rawn ngen nasa em a lawm, bakah ex te annih vangin ka haw ngai hran lo, puih a mamawh chuan ka pui thei tho lawm” A va duhawm tak.





Sawi tur ka hre tawh si lo, “Hawh, haw mai ang” a rawn ti ta hlauh a. Min rawn kai leh a, kan kal dun leh ta a.



“Lawmzual, tinge Lapuii chungchangah hian keimah zel hi min pur thin a” ka zawh chak em vang a ni.



“I rinawm ber a lawm” ka lawm ru kher mai.





Carah kan lut a, kan tlan dawn chiah tihin ka phone a lo ri ta a, Lapuii a ni.



“Khawnge I awm?”



“Awii, mate, johny nen kan inru a, hei an inah kan la lut ngam lo, an mut kan nghak a” a aw tang chuan a rui tih ka hria.





“Lawmzual”



“An inru tiraw?”



“aw”



“Hmm..a tha, pasal nei se a nun pawh a pangngai mai ang” a ti ram hmak a, biak zui zel a chakawm loh khawp mai. A mitmeng chu a rum em em a, na tuar hmel pawh a pu.



“Sawi theih chu ka nei lo na a, pawi ka ti, I hmangaih tih ka hria, I tawrh nat dan tur pawh, mahse I paltlang em em ang, ka beisei” ka ti a, englaiin nge ka mittui chu a lo hnam leh hman ka hre lo, ka men leh pur a! a lo hawi a, nui sang chungin, “hmangaih loh tur hmangaih hi chu kan tuar tlawk tlawk a nih hi, mahse pasal nei lo mah se engtikahmah ka kir tawh dawn lo” a ti a. Min sawichhan niin ka lo hria a, ka rilru hria se min khawngaih ve ngem le.

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 31st, 2016, 4:48 pm

Kan in hmu khat angreng a, keipawh kan senior pakhatin tih tak zeta min bem a vangin Lawmzuala lak atanga talchhuah theihna a ni mial ang tih beiseina nen ka ngaizawng ve ta a. Min duh hluam hluam thin khawp mai. Keipawn min duattu leh min zah der thiam tak chu satliah takin ka enliam thei bik lo a, a ni telin ka ngaina ve tial tial a, Mahse Lawmzuala chu ka theihnghilh ngai lo. Ni 1 chu canteena kan awmlaiin a rawn lut a, ka bulah a rawn thu chat a, “Nang hi I van reh em em, I ngaihawm” a ti liam puat puat a.



“Awihawm loh e mai”



“Hawh, dawr min lo nghah pui, plizz” a rui mawni le.



“Class ka la nei lawm”



“I thiam em kha; tun chiah min awmpui leh rawh” ‘awmpui’ a tih chuan min hneh riau! Ka bialpa chu chumini chuan a rawn kal lo hlauh bawk a, hmeichhe tlawm tak angin min sawmna chu ka hnar thei ta lo, ka zui leh ta nge nge a, diktak chuan kan thian ziangah min ngaina ve ber a nih ka ring. An dawr chu mipa pheikhawk zawrhna a ni a, a lun tehchiam lo. A laptop a mi thlalak kan en dun a.



“Ti daih ila, I bialpa kha”



“enge ka bialpa chu”



“I hmangaih a mi?”



“hmangaih dawn e” ka huaisen ve ta hle mai.



“A tha”



“Nang sas I nei leh tawh em?”



“Aih”



“tinge”



“Ka sas hualin midang a nei daih a”



“luck lo thei” tui ka in a, min lo en reng a, a mitmeng chu a thutak thut vangin ka lo hlauthawng ve ringawt.



“Arem”



“eih”



“Hmana I hmangaih kha I la hmangaih reng em?”



“Zawhna atthlak a nih chu”



“va mak e aw..MIN LA HMANGAIH RENG EM?’ a ti ta hrawk a! maktiin ka lo phu zawk! Ka hmel chu a dang lawp lawpin ka ring, ka kha a chih a, ka ngawi tlawk tlawk ringawt.



“Mawh..sawi rawh, I bialpa hi I hmangaih tawh em?’ min vin tuar tuar a nih chu!



“ka..ih..aih” ak ti nawk nawk a, ka ding a, tlanchhuah ka tum tih a hriatin min manbet a, dawr hnunglama bungraw dahna ah chuan min nawr lut a, bang nghengin min nembet tlat a, mitmeng hlauhawm fahranin min melh run bawk a! ka khur zawih zawih amai.



“sawi ta che, sawi rawh”



“ka hmangaih lo che”



“dawt a nih chu, mawli, Lapuii b’day zana mittui tla pur chunga sex kan hmanglai min lo thlir tu leh benghup chunga tap kha tunge? Maw? Tunge ka tih chuuuu?”



“Lawmzual, min ti hlauthawng a nia, khawngaihin duhtawk teh”



“Dawihzepnu, zep hlen I tum a mi? vawi tam tak sawichhuah na hun ka pe che a, mahse I hel zel a nih khaa, tawrh tlawk tlawk kha I duh a lawm tiraw?”



Ka tap ta a. Rang zetin min rawn pawmbet a, a rimtui chek chuan ka lungchhiat a tizual a, ka ippikna leh ka ngaih rukna zawng zawng chu mittui hmanga luanchhuahtir ka tum a ni ber e. Min kuah nghet sauh sauh a, ka hnungzang a chul hliau hliau a, “tap rawh, a pawi lo” a ti sap a. Zaidam taka min han duat thar leh ta vel si chuan min ti no zo leh ta vek mai. Ka tah zawh a lo nghak a, rei iak kan intahkhum ta chu a nih kha!



“lem..sawi tawh rawh le”



“eng chu”



“min la hmangaih em tih hi”



“ka hmangaih che”



“I bialpa I then angai nih chu”



“aih, a fair lo, nang pawn keimah vangin Lapuii I then lo”



“I hria mi? Khami zan atang khan ka rilruah I awm reng zel a, ka khawngaih lutuk che kha ka in haw thei lutuk, mahse Lapuii thenna chhuanlam ka hmu mai si lova, reitak chhung chu ka rilru ka zep a ni, tichuan remchang a awm a, ka then ta nghal a, khami hnu khan rawn belh mai che ka tum a, mahse I mizia I hloh leh daih a, bakah huana kan kal zana I tawngkam te khan min tina a lawm”



“Keipawh ka bialap thenna tur chhuanlam ka hmu bik lo tlat” ngawhngawl ka chhuah ve a ni amai.



“Hetia I tih hi ka ring reng a, bialpa I lo nei thawt thawt a, pawi eee, ummm; ka lo nghak ang che”



“Lawmzual”



“Min ko bawl bawl zel suh, ka lo nghak ang che, ka hmangaih che ka ti lo, mahse nangang hmeichhia hi ka nun kaihruaitu atan ka mamawh a ni, min hmangaih tih ka hria, ka lo nghak reng dawn tho tho che”



“kan en ang chu” ka ring lo, nia, rinngam tur khawpin ka la belchiang hman lo tlat, ka inrin hmain min rawn fawp a, mipa ka fawh hmasak ber a ni lo, mahse fawh ka dawn tawhah chuan a la thlum ber!!



{Ka hman tawh ngang lo, bakah tih tawp dan tur ka hre tawh lo, a sei dawn lutuk..phuah belh ve tawh mai teh u..TIHPALH AW..hihi..}

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)