HLIMTHLA.. BY Toni Da Râlte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

HLIMTHLA.. BY Toni Da Râlte

Unread post by Ngaia » July 10th, 2016, 6:19 pm

HLIMTHLA..
.
- Toni Da Râlte
.
Min rawn kalpel thuak a, a hma ang bawkin, "Min pui ngei tur a ni" ka beng bulah chuan a rawn ti thawp leh sat a. Ka lehhawi duh tingtang lo,amah hmuh tur a awm leh dawn lo tih ka hriat avangin. Engtianga rei nge he thlarau rethei tak hian min chenchilh a tum ni ang? Mi a zawnga mi dâwihzep ber mai hian thlahrang chu sawi loh, thlarau pawh ka hlau a nia. Mahse,kar khat liamta atang kha chuan, ka hlauhna chu ngaia neihna in a rawn thlak tawh a. Chu hmeichhe aw tham chhil chhel chu puih chakna in ka lo khat ta hial anih hi! Kan intawn hmasak berna ah chuan, khuma ka mu lai hi ka hminga min kotu avangin ka harh hlawl a! Keimaha in luaha khawsa ka nih avangin zana ka mut hian light ka on vek thin. Dawihzep hle e ti lo hian mahnia inluah angaihna hmuna ka khawsak a ngai si a.
.
Inchung nu in min ko emaw tiin ka han Eih ve ngawt a! A reh hmak si . Sana ka han en a, zing lam dar 2:48 chiah a lo ni a! Ka phawk kher mai. Thawm dang hriat tur a awm tawh loh avangin ka inlukhup a. Mutthilh tumin ka maimichhing a. Mahse,.
.
"Ngaihzual" a rawn ti leh ta tlat! A chiangin a fiah ngang mai si. Ka inhaihawng a. Tumah hmuh tur awm lo mahse, ka roomah chuan keimah chauhin ka awm lo tih ka hria! Ka thosilen chu a che der der a. Rak chhuak lo tura ka inthunun nasat zia kha..nula kum 26 lai ve tawh zanlaia han auțial ruan mai chu ka zak ve si.
.
"Ka rawn lang leh ang, ka ţinsan phawt ang che" zawi tak leh fiah tak si hian a rawn ti leh a. Zun ka cheh lo kha a mak!!
.
Khamizan atang khan tibuaitu ka nei ta fô a! Engmah sawi si lo hian ngawi rengin min uap rûn zel a! A tawp a tawpah chuan, " I sawi duh sawi la,min kalsan hlen tawh rawh" ka ti ve ngam ta a. A thaw hawk ri te chu hriat theih nisi in amah hmuh theih si loha awm chu khawvela thil hrehawm ber te zing ami ani ngei ang le..
.
KA BIALPA..
.
"Thil awihawm loh lutuk anih chu i sawi' tiin uluk zetin min melh rûn a.Thlarau vakvai ka hnena inlar thin ka hrilh țum chuan a awih lo hmel chu pe chhe ve tak a ni. A hming chu Fredy a ni a. Apa hi Department pakhata Director ni lai a ni. Higher Secondary zirtirtu ka ni a. Ka thawhna pawh a la rei lem lo. Kan School opposite-ah hian Computer zirna dawr a nei a. Chuta tanga inhmelhriat a, inkawm zuia inngaizawng zui ta kan ni. Palian tawk tak, hnar ngul sang vah leh khabe hmul zuah chhur a ni a. A ngo a, a mithmul a sei nalh hle. A țawng duh a,kawm anuamin kan sawi duhzawng a lo inang ta bawk nen. Thla tam rial loin kan inngainatna chu kan phawrh chhuak a. Inrem takin kan inngaizawng a. An inah pawh ka leng tawh nghe nghe. Sex erawh kan la hmang lo tih kan sawi tel hram ange. Thingtlang khaw pakhat atanga khawpui a hnathawk ka ni a, kan khuaah ka awm tam lem lo a. Khawpui nun pawh hre tawk tura awm chilh țhang ka ni bawk.
.
"Tak tak alawm le"
.
"Anih ti nge nang kher?"chu zawhna chu nizanah kha thlarau kha ka lo zawt tawh a. "Nang leh kei hian inzawmna kan nei a tin ni" a ti anih kha..! Mak a la ti tho a, a la awih chiah lo tih pawh ka hria.
.
Ani nen hian vawikhat chu buaina chhete kan tawk ve tawh a. A bialnu hlui pakhat hian ninawm khawpin min rawn be thin a. Ka bialpa duhlai chu a la thlah phal lo tih ka hria. Khin vak tlak nia ka hriat loh avangin ka enliam mai mai a. Mahse, hmeichhe nasa zet a lo ni reuh a! Fredy pa bulah zualkoin, "Ngaihzuali hi call girl anga an sawi thawm ka hre tlat" a lo ti ani awm e. Fred-a pa leh chu nu pa te chu thawk ho an nih vangin an inpawh viau si a. Freda pa chuan a fapa chu a ko hrang nghal a. Kei min țhen tur in order a lo pe a. Mipa sehhel ve tak Fredy chuan apa thusawi chu a awih therte lo a. Ka bulah lo kalin, an inah min hruai a. Call girl ka ni lo tih sawifiah turin. Tichuan, a ex kha be nghalin "Ngaihzuali hi ka hmangaih a. Call girl a ni lo bawk. Lo ni tehreng pawh nise ka hmangaih tho. Nang hi kan inkarah rawn inrawlhbuai tawh lo la, ani hi nang ai chuan ka thlang a. Kan ințhen anih pawhin i hnenah ka rawn let dawn chuang lo" tiin. Pa hi ka han ti khawp ah!Apa pawh chuan thil awmzia a han hriat takah chuan call girl tur êm chuan min ring ta bik lo a. Kan inrem leh ta a ni.
.
"Fawh nuam nu, inneih ka chak tawh..fapa tam tawk min hrinsak ang che..i hria em?" A ti sar sar a. Duhthawh zetin min rawn fawp uluk leh a. Kei ka lo ang hiam hiam thung. "Ka insum zo lo dawn tlat, tun țum chu ti ve mai ang" a ti thawp sat a. Ka lu ka lo thing nar nar a. Nui chungin a inlahrang ta a. Hepa hi ka nei lo anih chuan ka hlimna a beitham ngawt ang tiin ka lo ngaihtuah a.
.
SASA..
.
"Zanin Dar 11:30 ah Kan inhmu dawn nia" thlarau chuan a ti sap a.
.
Khua chu a vawt deuh suk tawh a. Sydney Sheldon chhiarin khumah ka bawk a. Fredy a haw na a la rei lo. Thlarau khan kan inhmuh tur thu kha tumah hrilh lo tura min tih avangin ka hrilh lo a. Ka helhhawlh nge ni ka zun a chhuak sek lehnghal. Chutah ka room kawngka a ri rek a. Ka va hawi phei chuan, Keimah aia kum hnih vela naupang tur, sam sen thar leh sei tak, hmai dang em em, mitmeng ngui tak hi a lo ding ta a! Hlauhna namen lo in min tuam a. A tak tak ka hmuh tak avang chuan ka râp a ni. Chet pawh ka chesawn ngam lo a. A rawn kal phei a,ka khum bula inchungte sofa chuang ka hunah chuan a thu hnawk a. A kun tlawk tlawk a. A thaw leh hak thin. Ka hamhaih êm vangin țawng tur ka haihchham a. Ka rilruin ka țawngțai mawlh mawlh mai.
.
"Ka hming chu Sangthanpari a ni a. Sang sang tia min koh thin chu kan țhenawm naupangin a lam thiam lo a, Sasa min ti thin a. Chutiang chuan min ko hlen ta a ni. I hriat angin kei chu thlarau ka ni a. Thlarau rethei tak ka ni. Ka dikna chanvo hmuhlet leh tumin ka rawn pan che a, Rorelna dik chu ka phú ve in ka hria.
.
Ka tibuai tam tawh lo ang che. Nang hian ka mi duhte i hnaih theih beiseiin ka thlang che a ni. Kum 2 liam taah khan ni 7 chhung ka bo a vangin, mizo danin kei chu min vui a. Min vui atanga ni 3-naah ka nunna pawh lakin a awmzui ta nghal a. Ka ruang chu Aizawl atanga km 13 a hla, Huan mawi leh nuam tak, nunrawng leh mi hurherhte tualchaina ni siah a awm a. Tunah chuan hmuh tlak ani tawh meuh lo ang. Kuang tel loin min phum a. Min hal an tum zet a, mahse, thawm an hriat avangin min phum ta zawk a ni."
.
"Tu te nge nangmah thattu che chu?" Ahmaa ka lo rindan sa a ni a, tuteemaw kut tuarin a boral anga, chung tualthattu te zawng chhuak tura min duh vang ani ang tih hi ka rindan sa anih vangin mak ka ti hran lo. Ka hlauhna te kha a reh țan tawh a, mahse, chhungril erawh a khur der der thung.
.
"Min thattu te kha chu hlawhfa leh hmanrua mai an nia, a kaikuang ber hi hremna pek ka duh a ni"
.
"Tu nge?" Ka aw chu a zawi hle. A rawn hawi chhuak a, ka mitah a melh kiau a, ka lo zâm hle.
.
"I tan awih a harsa hle ang tih ka ring..mahse, ka sawi tur hi thudik a ni.." a han ti te te a. Chutah a bul tumtu hming chu a sawi ta a. Kei chu ka lo dâng sâwp sâwp thung.
.
Min chhuahsan hnu chuan khumah rei tak ka inngaihtuah a. Thil ni thei tura ka ngaih miah loh thil thleng chuan min țhâwng lutuk tlat! Ka thlan fimin min bual a. Awmngaihna tak pawh ka hre lo. Engtianga hmalak tur nge tih ka hre lo a. Ka buai nuaih nuaih a ni ber mai.
.
"Fred, zanin chu min rawn riahpui mai teh, ka buai tlat" tiin ka bialpa chu ka call ta nge nge a. Zan dangah pawh min riahpui zeuh zeuh chang a nei a, khum khatah erawh kan mudun ngai lem lo. Engkim ka hrilh ve vek mai dawn em mawni aww...ka ti a, mahse, " Thuruk vawngtu i ni a, i puanchhuah rualin i nunna a tan thil pawi tak a thleng thei" tia Sasa aw vawt raih leh mitmeng thúk zet kha ka hrechhuak a. Ka lu chu ka thing nar nar a.
.
"Thlahrang te pawh i ang alawm, i va dâng em em ve" Fredy chuan a ti lung lung a. Ngaihțhat loh hmel zetin min thlek a. Ka lo melh vawng vawng thung. Chumizan chuan khum khatah muin, kan insumtheihna daidanna bang pawh țhiah a ni. Ka rilru mang lutuk leh chiâi avang chuan pawisak ka nei ta lo pawh ani maithei. Thil inthup erawh a awm khiau thung a!
.

HNA HAUTAK..
.
Chu in kawtah chuan pangpar enkawl țhat lem lo hi an lo khawi ve chûk a! An chul deuh riap avangin a mawi tur ang a mawi zo lo. Chhungkaw khasak sang tak an ni lo tih pawh a hriat. Kawngka chu ka kik dat dat a, lut tura min lo chhawntu thu chu zawmin kawngka chu ka hawng ta a. Țhutthleng seiah hian pa, kum 50-60 inkar vel tur hian chanchinbu a lo bih a, choka leh sitting room chu a inzawm nghal titih a, choka dawhkanah chuan Nu, kum 53 bawr vel tur hian bawkban a lo chan mek a. A sam chu a zial a, a hmel chu zur lam lek lek hi a ni a, hna a thawk nasa tih a hriat. TV chu on sa in an dah a, tumah chuan an en lem hlei lo a.
.
"Lo leng rawh. Eng nge i duh tak?" Tiin nu zawk chuan min lo be siam siam a. A aw chu a chher lek lek. Pa pawh chu a rawn hawi chhuak ve a. Chutihlai tak chuan an Bed room atang chuan Tlangval hang lam, sa nghet tlet tlawt hi kawr ruakin a lo chhuak ve mek bawk a.
.
"Țhu rawh" nu chuan a rawn tih zawm nghal a, sawi mai tur ka haihchham viau!
.
"Âa..ka rawn len chhan chu kum hnih liam taa in fanu bo ta chungchang kha ania" ka han ti phawt a. Min rawn en tak țhap avang chuan ka zâm ru hle.
.
"Englo ania..in fanu thlarau kha ka hnenah a lo kal a" ka ti ta hrâwk a! Pa ber mitmeng atang chuan a awih loh hmel kher mai.
.
"Sasai i hmu maw?" An tlangval chuan a rawn ti a. "Aw..mahse, a thlarau ania"
.
Nu ber chuan a thil chan lai chu dahin ka bulah a rawn țhu a, " ka fanu chuan eng nge a sawi? Aww..ka hnenah te rawn inlar zawk se ka va ti êm" a ti vawng vawng a. "Chawtak khúka khuk pui tlak anih ka va ring chiah lo êm" pa ber țawng dan chu ka ngei ru hle.
.
"A bo hma zanah khan top up thunin dawrah a kal a, a rei tak deuh avangin in hau nghe nghe ani lawmni?" Ka ti ve hmak a. Chutah zet chuan maktih hmel zet hian min en țhap a. Ka thusawi chu an bengkhawn țan ta niin a lang.
.
"A bialpa pawh Hlimpuia ani nghe nghe a, ka pi, a bialpa kha i duhpui chiah lo tiraw? A chhan pawh ka hria,mahse, sawi kher țul ka ti lo. In fanu kha ni 10 a bo hnuah râwng taka thah a ni a, thah anih chhan chu Hmangaih a neih vang leh chu a hmangaih nena an kara daidantu thil mak tak a awm vang ani. Sasa kha hmeichhe luhlul leh ngeng tak a ni a, a duh lohnaah chuan kaihphar theih a ni hauh lo. Thuruk pakhat a hriat tak hnuah erawh a mangang a, a chak lo a. A beidawng em em bawk. Kawng pakhat tal a awm beiseiin a kawng chu a zawh lui zel a, theihtawp chhuaha chinfel a tum a. Mahse, chutiang thil ngaithei lotu leh Sasa a țawngchhuah ruala mualpho tur mihring chuan in fanu chu a thah tir ta a ni...khai aw! Ka pi.." Sasa nu tlu tur chu ka dawm vat a. A thidang ta mai chu mak ka ti hauh lo. Ka thusawi awmzia hrethiam tur awmchhun anih vangin. A pasal leh tlangval chuan an buaipui a. Ka thusawiin a țhâwn êm avang chuan, hrehawm ka ti deuh a. Mahse, sasa in ti turin min duh si.
.
"Nula, Sasa thattu chu tu nge min han hrilh teh" pa ber chuan a ti khur dat dat a. Amita na taka melh chungin, "Aih, Sasa in rorelna dik a hmuh hunah in la hre mai ang. Tunah chuan khami chin chauh kha ka sawi thei. Police ruai lo ula, he thil hi fimkhur taka tih angaih avangin khawiahmah sawichhuak hek suh u. Ka kutah dah ula, Sasa dikna chanvo chu kan hmuhsak ngei ang tih ka tiam a che u. Chuan, thil pakhat Sasa chuan 'Ka pa hmingin A/c ka hawng a. Chutah chuan pawisa cheng 50000 a awm a. Engtia ka neih nge tih ngaihtuah buai loin Bankah kalin han la chhuak vat rawh se..ka thlanah khan Ka hmangaihber Hlimpuia pangpar mawi tih ber Rose sendang lo dah bawk rawh se'a ti a..chu chu in lo tifel dawn nia. Passbook chu a thingrem awmkhauh, a puan dahna hnuaiah a awm bawk" ka ti zung zung a.
.
Thil thleng te chu ka chhut neuh neuh thin a. Sasa hringnun kikawi kual vel chu ka chauhpui thin. Zantin a rawn kal anga, kan titi a, a changin ka țahpui bawk a. Thlarau ani tih pawh hi ka hrechhuak ngai ta meuh lo. Mihring damlai ang maiah ngaiin ka ngaina em em tawh a. Țhian kawm tam chi ka lo ni lo bawk nen, kan inkawmngeih hle a ni.
.
"In țhenawm leh inchungten a â an tih che kha..amahin a țawng mial mial a, biak nei niawm takin a awm a. A chang leh a nui a, a chang leh a țap a..an tia. I awmdan hi a dik tawh lo. Keipawh hi min ngaihsak lo lutuk" vui hmuipuin ka bialpa chuan a ti nuah nuah a. Ni e, Sasa vangin mite min endan chu a dik tawh lo tih ka hria. Mahse, zan khat lek a lo kal loh pawn ka khua a har em em tawh si. Fredy ka ngaihsak loh chhan pawh ani reng a.
.
"Denis, Sasa-i kha i khawngaih em?" Tiin Fredy țhianpa chu ka zawt a. Phâwk zeta min melh chungin " I hria law? " a lo ti hû a! Ka lo bu nghat a. Nui sang chungin, " I hriat aia tam mah mawle" ka ti a. Thudang ka sawi ta daih a. Zanah chuan ka rin ang ngeiin, " Sasa kha i hre ve mi?" Inthlahrung takin Fredy chuan a ti a. Nelawm taka nuiin, "Ka hriat chu a pawi viau ami?" Ka lo ti daih a!
.
Sasa nu leh pa te pawh chuan ka hrilh ang khan Bankah kalin pawisa chu an lachhuak a, Sasa duh ang ngeiin Eichawp dawr an siam ve a. Tunah chuan hnarim lutuk thawk loin an awm ve thei tawh ang chu. Vawi hnih lai ka tlawh leh a. Thil ka sawi thui teuh thin hle. Ka vau deuh reuh avangin engmah an sawi chhuak lo tih erawh ka hria. Anu erawh chuan engkim a hriat tawh vangin Sasa min hrilh loh thu te min hrilh a, a chunga thil thlen dan mak a tih thu leh rapthlak a tih thu te a sawi fô thin. Engtin nge chet ka lak dawn tih erawh min zawt ngai hauh lo !!
.
"I va rei ve..hmanhmawh ta che" tiin min lo tur leh sek tawh a. Fredy dawhtheih loh zia hi chu aww..Sex kan hman hnu atang phei kha chuan a thikthu hi a chhe zual a. Hahthlak tak a ni. Vawiinah hian kan țhianho kan picnic dawn a. Fredy țhianpa Sanga te huanah a ni nghe nghe. An huan chu a nuam kher mai. Thei te chu an lo ding țhuau a, kuhva leh Coconut lah a rah ter tuar bawk nen. An dil lah chu a thianghlim phian a. An thlam chu a lian lem lo naa...a phuisui viau. Sanga te hi mi hausa, thlahtute atanga an inrochun hausakna avanga nun nuam tak hmang thei an ni a. Anihna takah chuan Fredy pa leh Sanga pa hi unau pianghmun an ni. Cousin anga inen em em loin țhian rinawm tak an ni a. Fredy leh Sanga chu.
.
"Huan hi k'n fang kual lawk" ka ti a. Mipa ho chu eirawngbawlin an phe char char a. Hmeichhe ho erawh Dila sangha chu nghakuai hmanga man tumin an rak chul a. Huan mawng lamah chuan ka chhuk a. Tlema awih tlan deuh lai ka thlen lai chuan, " I dinglam a Theitat kung bulah sawn" ka bengah a rawn ri a. Theitàt kung chu ka pan a. A zawl duai a. Hmanni lawkah an thlawh avangin a fai hun mai. "I dinna atang khan pen nga pen la, ka ruang chungah i ding tihna" a rawn ti leh a. Ka han pen a. Sasa thlanah chuan ka ding vang vang a. Thlifim rawn thaw heuh heuh chuan ka thlan sa te chu a chhem dai a. Ka mitthlaah chuan Sasa, vawi tam tak pawngsual tawk, a țah nasat avanga mit bui lâk tawh, a kaa puanchhia hnawh leh kawr țet phung te chu ka hmu a. Misual pahnihin a duh lo chung an kaihluih a, an pawngsual ve ve hnuah chemte hriam leh zum tak hmanga a dula vih te, a thisen chhuah nasat zia te leh mangang taka a mah vittu a melh țâwk țâwk lai te chu chiang takin ka hmu a. Ka hui pap a. Ka biangah chuan mittui a luang a. Pawi hi ka ti lo êm êm, ka thian tana ka tihtheih tawk ti tur chuan thlam lam chu ka pan leh ta phawt a.
.
Chhungril na vawng vawng chungin a derin ka nui a. Chaw pawh ka ei puar hrep lo e. Fredy chuan zu a in vangin phur zet zetin min hrâwm a. Chungte chu ka ning lek lek.
.
A TAWPNA CHU..
.
Lehkhathawn chu ka thlek leh vang vang a. Envelopeah chuan thunin, a dawngtu ni tura ka duh hnen a thlen theih nan ka chhuahpui ta a. Ni 2 chhung chu enthlak hna ka thawk char char a. A hautakin thla a phâng thin hle. Ni 3 hnuah chuan ka beisei ang ngeiin, Office dawr tura ka luh pah chuan mi pahnih leh pa pakhat mûk taka titi te chu ka va hmu a. Zanin hi chet hun ani tih ka hai lo.
.
Hre tura ka duh ho chu ka phone kual a. An rawn thlen chuan an motor chuan kan phit chhuak nghal a. Kan ngawi reng a. Police ho bula Sasa thlarau chungchang ka sawi nia min nuihzat zia leh mi â mi â dahna lama min thawn phei hmaa kalbo tura min tih lai te kha ka hre chhuak a. Mahse , mi tumruh Sasa avangin tunah chuan ka thu pawmin min zui ta anih hi. Huan kan thlen chuan a thim țhiap a. Thawm nei hauh loin thlam chu kan pan țhem ţhem a. Thlam chu a en avangin ka lawm kher mai. Zawi te tea țawngri kan hre nghal a. Zu no niawm tak inkhak ri nen. Rei tawkfang kan nghah hnu chuan, kawngka a lo inhawng a. A hmasa zawka lo kal chuan bawngtuthlawh leh suahdur a keng a. Pakhat chua galon bur a khai a. Huan mawng lam chu an pan zel a, ka mawng chu a za zek zek ni mai hian ka hria. Kan la zui mai lo a. Chutah lei lai thawm kan hriat hnu chuan kan pan thla ve ta hriau hriau a.
.
An chhak Khiang liam zet phenah chuan kan ding țaih a. Torchlight nen chauh an awm avangin min rawn hmu thei lo. Thlan khur ringawt chu an ên ani bawk a.
.
Rei an laih hmain thil rim na tak, mitthi ruang țawih rim chu a rawn nam ta a. Mi pahnih te pawh chu an uak țhat țhat a. Keini ho pawhin Rawmawlin kan hnar kan hup far mai. Chutah ruhro an lai chhuak ta a. Galon a khawnvartui chuan an leih a..chuveleh ka bula police chuan, " In ban phar nghal rawh u" tiin a pistol chuan a tin a. An hawi phawk kher mai. Tlanchhiat an tum a. Mahse, police pali lai chu an paltlang zo ta lo. Vawi hnih khat an han beng nawk nawk a.
.
"In damchhungin jailah in hun inhman a ngai tawh ang" tiin hanfcuff an buntir a. Thlan chu chhilh tha lehin a tuka Sasa ruang vui țhat leh turin huan khawhar tak chu kan chhuahsan ta a.
.
Zan dar 10 a ri hnai tawh a. Chu in lianpui leh nghet zet kawtah chuan Police pakhat nen kan ding ran a. Door bell chu a hmet a, rei vak loah kawngka chu a rawn inhawng a.
.
"Khawnge i pa?" Tih zawhna chhanna a pek hmain Apa chu a rawn lang a.
.
"Pu Rimawi, Sasa-i thahna kawnga a bultumtu i nih avangin man i ni e" a ti ro halh a.
.
"Ngaihzual, eng nge thleng hi? Eng nge a awmzia?" Fredy aw a manganna leh chiâina chuan ka mittui a tihnâm sawk thei hial a ni.
.
"Fred, i pa hi i bialnu i hmangaih êm êm Sasa-i thattu a ni" ka ti ta a!! Fredy tawlhkir dawrh chu melh pahin " Bawiha, dawt vek ani. Lo lungngai suh u" Pu Rimawia chuan a ti hul hak a. Fredy nu,mutkawr nena inchung kailawn atanga rawn chhuk mek chu hmachhawn ngam loin kei chuan chu in chu ka hnungchhawn a. A chhan chu nu fel leh zaidam, a pasal leh fate hmangaih em em tu anih avangin.
.
Fredy Lalhlimpuia chu ngaihtuah loh luih ka tum a. Mahse, a bula awm a duat taka hnem erawh ka chak em em thung. Ka khawngaih lutuk chu, chumizan chuan ka țap taivar ve țhak a ni.
.
"Hlimpuia nen chuan kan hlimin kan khawvel chuan kan lungawina tur tawkin min kalpui a. Ka hmangaih a, ani pawhin min hmangaih. Chutia hlim taka kan awm lai chuan, tlai khat chu chaw eiah min sawm a. Ka zak viau naa, a nu leh paten sawm tura min duh vang ani tih a sawi chuan hnial ka tum bik lo a. Tichuan, kan in let tam taka lian leh ropuiah chuan min hruailut a. A nu leh pa leh a farnu te chu an nelawmin min lo be siam siam a. Ka zahna te pawh a bo țan a. Zanriah kan ei lai chuan apa chuan kan chhungkaw chanchin te, ka nu leh pa hming te min zawt a.
.
Kei chuan Sialsuk a tanga nikum lawka kan lo pem thu te ka sawi a. Ka nu hming chu vawi hnih min zawt nghe nghe. Chumai niloin ka nu pa hming leh ka nu û ka putea hming pawh min zawt a. Min zawh chík viau avang chuan mak ka ti deuh a.." I nu chu ka hria alawm" a tih takah chuan ka ngaih a țha a. Ka tlangnel sawt mai. Ka pian kum te min zawtin , "Kan lo zin lai chuan i la piang lo anih dawn chu" a ti a.
.
Khamizan atang khan mak tak maiin Hlimpuia nen kan inkar chu a buai ta riau mai! Ka ngaihbel vang pawh ani maithei. Chutihnak alaiin kar khat hnuah ka nu chuan Hlimpuia chu țhen turin min nawr țan ta a. Ka pa erawh chuan engmah a sawi ve lo. A hmaa engmah sawi buai ngai silo, chutia a ti thut chu ka ngaih a tha lo a. Hlimpuia lah chuan, " Ka pa in nang leh kei hi ințhen turin min ti reng a. Mahse, ka țhen dawn chuang lo che" a lo ti ve bawk a. Apa khan min lo duh vak lo anih ka ring ta a. Ka nu te kha a lo hre bawk nen. Kan khawsak a harsa tih hriain a mô a tan chuan min duh lo anih ka ring.
.
Mahse,ni khat chu ka kua a țha lo a, vawi tam ka tlan hnuah ka mu kawm ta chal a. Ka muhil emaw tia ka nu leh pa pakhat titi chuan min țhâwng kher mai.
.
"In ina rawn lenluh hi ka chak tehchiam lo naa..kan fate chungchang hi sawi a ngai si a. Heti ringawt chuan kan kalpui rei thei lovang. Thudik chu hrilh mai rawh" a ti a. Hlimpuia pa aw a ang hle. Chau chung chungin ka va bih thla a. A lo ni chiang mai.
.
"Ka hrilh ngam thlawt lo ani. Apa hi a hmangaih a. Apa pawn a duat ve em em bawk. A pa diktak ani lo tih leh nang hi apa diktak i ni tih ka hrilh chuan na a ti dawn lutuk" ka nu țawngkam tinte chuan min chhun vâwt vâwt ni hian ka hria a. Mak ka ti lutuk chu ka auchhuak teuh hle. Ka pa hi ka pa diktak a lo nilo a maw?!! Chu aia mak zawk chu Hlimpuia pa hi ka pa diktak a lo ni chu a ni!!
.
"Zaninah lo hrilh ngei ngei ang che. In nufa intunnunna khawp sum pawh ka pe ang che u" ka pa oh! Pu Rimawia chuan a ti a. Ka nu chu a ngawi reng thung.
.
Chumini atang chuan ka nunkhua chu a danglam țan ta a. Ka nu chuan min hrilh duh si leh ka rilru tihnat hlau siin a awm a. Ka khawngaih rualin a hmaa engmah min lo hrilh lo chu ka ngei rilru ve deuh a. A tawpah chuan ka insum thei ta ngang lo a. Ka nu chu ka bia a, thudik ka zawt ta a.
.
"Ka nulat lai chuan ka nalhin, ka hmelțha ve hle a. Mahse, ngaihzawng neih hi ka zak tlat a. Ka nei ngai lo. Vawikhat chu mikhual kan nei a. Kan khaw kawng enfel tura rawn kal te an ni a. An faiin an zahawm kher mai. Ka pa chu VCP anih avangin kan inah an lo thleng a. A hminga nula ve nafam chu mikhual ho chuan min fiam zauh zauh a. An zingah chuan danglam deuh bik, țawng tam lo tak, mahse, hotu ena an en pa zahawm tak a awm ve a. Min biak pawhin nula tlangval inbiak angin min be ve ngai lo.
.
An cham rei thawkhat viau a..nikhat chu ka chhungte huan lamah an kal vek a. Keimahin ka awm a. Rin loh takin mikhualpa kha a rawn haw thut a! Midang erawh an kawg laih tur an la enfel thu a sawi a. A inbual zawh chuan ka bulah a lo kal a. Nidang ang lo takin hmeltha min tih thu leh khawpuah awm phei ila chuan ka nalh dan tur te min hrilh luam a. A nupui nen an inthen thu leh fa an neih hman loh thu te min hrilh a.
.
"Min nei mai ta che. Aizawlah nuamsa takin i awm anga" a ti ta thut a! Ka hamhaih hle. A ruk a ka lo vei ve deuh leh hmeltha ka tih kha a ni bawk a. Ka lawm ru viau! Mahse, engtinmah ka chhang lo.
.
An haw hnuah pawh lehkha te min rawn thaw fô thin a. An lo zin leh hunah engkim sawifel a duh thu te. Keipawh chuan a hausakna lam pawh niloin ka duh ruk ve êm vangin tha taka dawnsawn ka tum a. An lo zin leh ta ngei a. A motorin kan khua te chu ka fanpui a, tlangah ka lenpui a. Chutah chuan ka ngaihzawn ve thu ka hrilh ve ta a. Min fawp a. A zei khawp mai. Ngaihzawng ka neih ngai loh vangin ka zak em em a. Chhan let dan pawh ka thiam ve lo.
.
In khata khawsa dun na na na chu fimkhur sen ani ta lo a. Kan chesual ta fô mai! Ka nu chuan kan awmdan chu a hrechhuak a. Mahse, min hau lo. A chhan chu an fanu neihchhun ka ni a. Khawpui tlangval ngei neih tir min tumruh ve hle a ni. Thla khat hnua palai rawn tir intiamin min hawnsan leh ta a. Thla khat a liam a. A reh ta vung vung si! Ka mangang țan ta khawp mai. Thla hnihnaah ka ruak lo tih ka hrechhuak a! Ka nu ka hrilh a.Ka pa te erawh kan hrilh ngam lo. A rukin ka tuar tlawk tlawk a. Inthupsen chi ni hek lo. Ka chhungte chuan an hre ve ta vek a. Ka pa leh ka û chuan na takin min zilh a. Kut erawh min thlak lo. Sâwn man țhing tura ka patea te Aizawl kal chuan, "A zahthlakin a mualphothlak hle mai. Nupui nei lai a lawm a lo nih reng. Sâwn man pawh kan rawn țhing ta lo mai, chhungkaw innghirngho ai chuan tiin tlawm zawk chan changin kan rawn let leh ta mai ani" tih thu an rawn hawnpui a. Khatihlaia ka nat zia leh ka zah zia kha aw..khawtlang hmuhsit leh nuihzat ka hlawh a. Mahse, ka vawikhat hmangaih tawn ve naah ka vanduai a.Bumin ka awm a. Ka thiam loh em em ni pawhin ka hre lo. Ka pa chuan rei tak min be duh lo a. Chungte chu ka tuarchhuak vek a ni. Tichuan, nang hi i lo piang ta a. Kum khat leh thla hnih i nihin tuna ka pasal nen hian kan innei ta a. Ani hi tihtakzeta min hmangaihtu a ni a, nang pawh a fa nilo mahla, i naute aimahin a hmangaih zawk che ani. Chuvang chuan, i pa diktak pawh chu engmah hrilh hriat ka tum ta lo a, nang pawn i hriat ka duh hek lo. Mahse, kan khawmi tuteemawin i pa chu an lo hrilh a. Chutichung pawhin ngaihsakna a lantir chuang lo.
.
A fapa Hlimpuia nen in lo inngaihzawn tak siah chuan kei hi min rawn hmu a. Unau in nih avang leh nakinah mualphona te la thleng thei anih avangin in pahniha pawt țhen tur chein ruahmanna min rawn siampui a. Mi hausa leh mite zah kai anih avangin, keini ang mi rethei tan chuan lo hnial thlak kha a har em em a. Bakah unaua inneih chu rem ka ti bik lo a. Rimawia fapa anih vang pawhin i neih hi ka remti lo a ni" tiin ka nu chuan min hrilh a.
.
Ka thuhriat te avang chuan ka rilru a na a. Ka bialpa pa pawh nise, ka pa chu ka hua ani. Ka nu chunga a chetdan rapthlak tak avang chuan, engemaw tal tih ve ka duh a. Hlimpuia neih luih chu ka tum tawh lem lo. Thil rem lo, rem tir țâlh tum chi ka ni ve lo a, ka thunun theih piahlam thil chu pawm tawp mai chi ka ni. Tichuan, ka pa Pu Rimawia Office ah chuan ka va leng ta a. Thudik ka hriat tawh thu leh a fapa țhen ka tum thu te, mahse, ka nu chunga thupha chawi tur leh zângnadawmna pe turin ka va hrilh ta a.
.
Kan inhnial nasa hle. Ka zah duh bik hauh lo. A hlauhber chu kei hi a fa ka ni tih Hlimpuia leh a nu in an hriat chu a ni tih ka hriat avangin ka thil phût chu a ti lo anih chuan, Hlimpuia te chu ka hrilh vek ang tiin ka vau a. Tichuan, cheng nuaikhat pek min tiam ta a. Chutiang zat kan nei anih chuan ka nu te pawh hna rim thawk loin dawr te kan siam ve anga tiin ka ngaihtuah a. Ka pa hmingin A/c ka hawng a. Pawisa chu dahlut turin ka ti ta a.
.
"Cheng 50000 ka dah phawt anga, Ka fapa i țhen chiang bal tih ka hriat hunah a chanve dang chu ka dah ang" a ti a. Keipawhin rem ka ti a ni. A rilarah a fanu ngei chu ka ni ve si a..chhete pawha min hmangaih miah lo chuan min tina hle mahse, ka sawi chhuak duh lo. Ka pa tia koh pawh ka tum lem lo. Chutiang mihring nunrawng leh bumhmang mô nih chu ka chak hlawl bik lo tih erawh ka hrilh a ni.
.
Buaithlak tak erawh chu Hlimpuia țhen harsa em em chu a ni. Min hmangaih em em si a. Keipawhin ka ngai a, tih takzetin ka hmangaih a ni. Pa hmun, nu hrang kan ni tih chu hria nise, a tan pawh a harsa em em lo tur. Ka hrilh thei si lo. Min biakpawh theihna tur ka titawp vek a. Sialsukah ka zinsan ta daih a. Pawisa chungchang kha chu ka nu leh pa ka la hrilh duh lo a. An ngaih a that loh ka hlauh avangin. Mak takin Sialsukah chuan Hlimpuia chu a rawn zin ve ta hlawl mai anih chu! Amah ngaia țap keuh keuh thin ka nih avangin ka lo hnar thei ta ngang bik lo a. Inru ang deuh titihin kan awm ta tawp a. Ka putea te bulah erawh dawt ka sawi thung a. Pu Rimawia fapa tih an hriat chuan apa an huat avangin an hnawtchhuak nghal dawn tih ka hriat avangin. Ka putea chuan min duat a, min hrethiam em em vek thin.
.
Kan chanchin chu Pu Rimawia beng a thleng ta a, engtia hria nge anih ka hre lo. Min rawn be ta chhên a. Sialsukah chuan a rawn kal ngam dawn lo tih ka hriat avangin, ka chhang țha duh lo. Ka nu ngeiin min rawn lam ta a. Kan zui haw lo thei si lo, aww...khatihlai khan kan va hreh dun tak êm! Hlimpuia chu apa in a lo hmuak a. Keini nufa chu rum em emin min melh a. Ka hlau ru khawp mai.
.
Thla hnih chhung zet chu Hlimpuia nen kan inhmu ta lo. A chhan chu Shimla-ah an zinbopui vang a ni. Ka nu atanga vanduaina ka chhawm ni maw..Ka ruak ta tlat lo mai! Ka nu chuan ka awmdan atangin a lo hrethiam nghal a. Kan pahnihin kan țap zawih zawih a ni. Ka pa pawn a hria, mahse, min hau miah lo. Ka pa khan ka nu aimahin min hmangaih zawk ni hian ka hre thin. Hlimpuia chu hrilh loh theih a ni ta lo a. Chumihmain Pu Rimawia chu ka nuin a lo hrilh a. Kha kha a pawi ta ani. Ka nu in Hlimpuia pa a hrilh tlaiah chuan, ka phone hi a bo ta daih mai! Ka insuk ka pho tih loh chu pawn ka chhuak miah si lo. Pu Rimawia thiltih vek ani tih tun hnuah hian ka hria. Zanah chuan kan thenawm naupang, Tetea hian lehkha them hi min rawn pe zauh a.
.
"Lo chhuak lawk rawh. Ka rawn lut ngam lo. I nu ka hlau. -Hlimpuia" tih hi a lo nia. Ka hlim ru kher mai. Ka thiannu Te-i te ina kal chhuanlamin ka chhuak ta nghal a. Kan thenawm te in ka kalpel tih hian current a rawn thim thut a, Tlema kan in awmna chu a fal deuh avangin ka hlau ru deuh a.mahse, ka kal tho a. Pen 10 pawh ka pen tling lo tihah ka hmui hupin, tuemaw hian ka luah hian a rawn hlap ta chawrh a. Ka khawhmuh chu a thim ta vek mai. Ka harh leh chuan pindan thim takah hian ka lo awm a. A vawt in a hnâwng churh bawk si, a reh hian a reh vawng vawng a. Auchhuah ka tum a. Ka ka chu palsterin an lo bel hnan vek a, ka kut lah chu nghet tawka phuarin min hnungkhirh a.
.
Ka rilțam kher mai. Mangang taka ka kun reng lai chuan pindan chu a rawn eng ta pup a. Hmaituam mi pahnih hi an lo lut a. An sang țha hle. Ka mit chu a vai chum chum a. Chumi te chuan kei leh ka naupai ngaihtuah chang lek loin min pawngsual rawn ta anih chu!! Min that law law se ka ti.
.
Chumi chawlhkar chhung zawng chuan an duh hun hunah min pawngsual a, eitur tui lo tak min pe ve zeuh zeuh bawk a. Ka nun kha mumang ang ruaiin ka hria. Ka thih lej dam pawh ka hre fumfe lo. Chhun leh zan hian ka tan danglamna an nei lo. Ka chhungte mangan dan tur leh Hlimpuia mangang leh hrilhhai tur ka mitthla chang chuan ka țap zawih zawih thin. Tlanchhuah tumin vawi 2 ka bei tawh a. Ka sim tawh. Tlanchhuah ngaihna a awm lo. Min manchhuah a piangin ka taksa an vaw duk cher chur thin a. Ka pum chhunga naute pawh chu a dam ka ring tawh lo.
.
"Vawiinah an vui che" tiin misual cher zawk chuan a ti a. Ka bo atangin ni 7 a liam tih ka hre thei. Dama chhuah leh ka inbeisei tawh lo a. Ka rilru hi a mang vek tawp a ni mai e. Tichuan, zan khat chu min kai tho a. Pawnah min hruai chhuakin, huan mawng lamah min chhukpui a. Zawl laiah chuan min pawngsual ve ve leh a. Tichuan ka dulah chemte a vitin na tuara ka vial ngawih ngawih laite chuan, meizial an zu khu luih luih a. An hmel chu ka chhinchhiah a. Anchhe lawh chungin ka thlarau chu ka thlah ta a ni" Sasa thusawi mal tin te kha ka bengah a cham thin.
.
"Nang ka thlan chhan che chu ka hmangaih ber, Hlimpuia bialnu i nih vang a ni.." a ti anih kha..Fredy hi mi tam zawk chuan, Hlimpui tiin an ko fô reng a ni.
.
Pi Zuali (Sasa nu) khan, " Bawihi a bo a tang khan ngaihthat lohna lian takin min hual a. Rimawia thiltih ngei anih ka rin avangin keimah ngeiin ka va hmu a. Mahse,mangan hmel takin 'Ka fanu ve tho ania. Pawi ka tih loh i ring bik em ni? Ka kutah dah rawh. Ka fanu chu kan hmu leh em em ang" a lo tih avang leh min ngaihtuah awm fahrana kan inah te a rawn len fô avangte, pawisa min pek a tum thin avang te chuan ani ka rinhlelhna pawh kha a bo ta a ni" a ti thung a.
.
"Ka fapa in a farnu lakah sâwn a thlak tih ka hriat rual khan tum nghet tak ka nei tawh. He hmeichhia ka fanu ni bawk si hian ka zahawmna, ka nupui fanaute zahawmna thlengin a la tichhe thei dawn tih ka hria. Bawiha ziah anga lehkha ziakin naupang ka va pektir a. Ka mi rawih te hi Rei tak ka lo hriat tawh, burma a tanga rawn chhuk, pawisa avanga engmah tih hreh lo an ni a. Ka ruahman dan chuan khami zan khan vau tur leh a fa chu titla tura hrilh turin ka ti a. A luhlul viau chuah thaha vau tur pawhin ka hrilh a ni. Mahse, khang mi khaw lo pahnihte khan zu an rui a. Ka fanu chu an lo it si a. An pawngsual a. Ka ruahman dan anga an chet loh avangin ka thinrim hle nghe nghe. Anmahni chuan min vau letin, ka fanu chu an kawl dawn thu leh an duh duh dana an tih theih dawn loh chuan min tih hmingchhiatah min vau a. Kawng dang ka nei ta lo a ni. Tichuan, boruak a reh a. Kum 2 lai a liam tawh hnuah hian lehkha maksak tak ka dawng ta a "Sasa Ruang awmna ka hria" tih te hi. Ka hlauthawng ta a. Ka mi rawihte chu biaiin a rang thei ang bera che turin ka hrilh ta a ni" Pu Rimawia chu chil chhak țhawt ka va han chak tak êm!!
.
Fredy nen kan inhmachhawn laia boruak rih zia kha aw..Sasa thlarau chuan min uap tlat ni hian ka hria a. "Nang chauh tal chuan kalsan tawh suh. A pa avang hian hnualsuat lo hram rawh." Tia min ngenna te kha ka ngaihtuah let a. Ka hmaa mi â ang maia ding chu lainat zetin ka melh vawng vawng a.
.
Sasa bo hnu kum khat chhung chu mi â ang maiin a khawsa a. Tumah a mamawh lo a. A roomah a inkhung ngat ngat thin. Tunah Sasa thattu a han hrechhuak a, a paltlang zo tawh in ka ring lo. Tih theih neih ka va duh êm..
.
"Ngaihzual, Sasa chuan a thik miah lo ang che" a rawn tichhuak hlawl a!
.
"I sawi dik" ka lo ti nghat a.
.
"Min nei duh tho em? Sasa ka nei thei tawh lo a. Ka hmangaih dam chhun hi ka chân phal tawh lo"
.
Ka maimichhing a...eng chhanna nge ka pek ang ka hre lo..chutihlai chuan, thli a rawn thaw heuh heuh a. Sasa chu nui sen sen chungin a rawn lut a...
.
The End.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)