PHATSANNA RUNTHLAK BY Toni Da Rãlte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

PHATSANNA RUNTHLAK BY Toni Da Rãlte

Unread post by Ngaia » July 24th, 2016, 7:23 pm

PHATSANNA RUNTHLAK..
.
-Toni Da Rãlte
.
"I nalh hle mai" boss chuan a ti nghut a. Ka mitko ka lo san ak ringawt a. File chu a dawhkanah ka mut a. Thudang min zawh leh hmain ka chhuak ta daih a.
.
Kan Company pawh in ţhan lam a pan chho ve mek chu a ni a. Ka thawhpuite an felin ka ngaina em em vek a. Ka țhianțhaber erawh Lucy a ni. Heta ka thawh tirha min lo welcome hmasa ber tu leh min titlangnel tu kha ani a. Hmeichhe lian lam, hang ngaihnobei kan tih ang chi, Sam buang thar mai leh mitmeng zahawm ru zet nei hi ani a. Kan thawhpui pakhat Sawmtea hian a ngaizawng tih chu kan hre vek. Mahse, Lucy hian chhete mahin a ngaihven lo. Sawmtea chu apa pawh First class Contractor leh anu pawh College Lecturer ani a. Fapa mal ala ni zui. A nawmsak dawn tehlul nen. Mipa a ngaihsak ngai miah loh chhan chu vawikhat ka zawt tawh a.
.
"Hmangaih pakhat chiah ka nei a. Ka duhtawk" a ti tawp. A bak zawh ngam chi niin ka hre lo.
.
"Angaih, zanin chu dine out i la" Lucy text ka dawn chu, fiamthuin " Nia,chaw ka ei phawt ang aw" tiin ka reply a. Min rawn en a. Za zet hian a nui a. Kei aiin a upa hlek a, û ang leh țhian angin ka en ani ber. Keima chungchang hi k'n sawi ve lawk anga. Farkawn khua ka ni a, ka nu leh ka pate hi kum 13 ka nih laiin an inţhen a. A chhan pawh ka pa in kawngka sula ka nu a mãk vang ani. A hmeichhe rawn hruailuh lah chu a la naupangin a hmeltha viau mai a! Ka pa ang, pa hang nil nel zu in ve thin a lo duh ve mai chu mak ka ti hle reng a. Ka pi leh puten ka nu chu ui hle mahse, nupui a rawn hruailut miau tawh si. Ka nu nen chuan kan chhuak ta hna hna a. Ka pa chuan kaltir min phal lo naa nuhrawn hrawn ka duh bik teuh si lo. Ka nu ka zui a. Ka nu nen Aizawlah ka putea te inah chhukin, kum khat hnuah kan indang ve a. Ka nu chuan hna chhete a hmu ve hlauh bawk a. Kei fa pakhat lek chu min chawm hneh ve viau. Lehkha pawh ka thiam thei bawk a, ka kal chho zawt zawt ani ber. Ka nu hi nu valai tak, kei chiah min la hring ani bawk a. Aizawl kan awmtirh chuan beiseitu neuh neuh a nei fô thin. Mahse, keimah vang nge phei zawng ka hre lo naa..a lo hnar zel thin.
.

Keiin hna te ka lo hmu ta bawk a. Ka nu nen chuan kan awm nuam ve ta khawp mai. Pasal nei leh mahse pawi ka ti lem lo. Nufa inpawh tak kan ni a. Ka ngaihzawng chungchang engkim pawh sawi dun thin kan ni.
.
Lucy nen Dinner kan kil dun lai chuan,kan piah lawka nupa tuak thar niawm tak te chu an inhau deuh niawm tak a ni. Nu zawk chu a țap deuh pur a.
.
"Nang hmeichhe tenawm leh bawlhhlawh lutuk ka lo nei che hi ka inchhir hluah hluah. I uirena pa chu va pawm rawh. Kal thuai teh" Pa chuan thinrim engphiarin a ti tuar tuar a. Ka lo ip chawih mai. Ka pa ka ngaihtuah chhuak a, ka nu a hnawhchhuah dawna "Nang hi engahmah tlaktlai lo i ni. Ka lakah zep tamtak i nei bawk. Neih che hi ka duh tawh lo" a tih te kha...ka nu chuan eng nge a zep ang le?
.
"Uiresan nih chu a na ngawt ta ve ang" Lucy chuan a ti sap a. A mitmeng nung sar chu a dul raih a. Chaw ei pawh a tui nek tawh lo e. Dar 9ah chuan Barah kan thu leh ran tawh a. Teachers kan dawm dun ran a. Ka meng phelh țan tawh viau. Hawn a rawt a. A flatah kan inkuah lut hnup hnup a. Ani chu a kai ve vak lo. Kei erawh ka in ngai loh vang ani pakhat. Khumah chuan kan let dun tawp a. Thlak pawh inthlak loin kan muhil ta bawrh bawrh a.
.
Ka phone ri bengchheng zet chu ner nung chungin ka ban a, mit siaiin ka han bih a. Ka nu a lo ni. Min hau dawn chuang lo naa ka vawikhat riahchhuahna a nih avangin nuam lo ka tiru hle. Lucy bulah ka riak tih ka hrilh chuan a thaw huai a. Lucy hi kan inah vawihnih a lo leng tawh a, ka nu chuan fel a ti viau nghe nghe. Ka bulah Lucy chu a hnar barh barh a. Zing dar 2:23 chiah a ni.
.
Towela intuam that mawlh mawlh pahin dawhkana chanchinbu lo let chu en turin min ti a. Coffee inpahin ka bih kual a. Headlines chuan min ti phu zawk mai.
.
TUALTHAHNA THLENG
.
Nizan Dar 12 leh dar 1 inkar velah Thanpari, Lianchungnunga nupui chu an gate bulah rawng taka thah a ni. A ruang hi An kawmthlangpa Pu Nuntluanga, A fapa a zual deuh avanga damdawiin lama a kal turin a hmu a. Police phone nghalin, tunah hian a ruang chu postmortem tura lak phei a ni tawh a. Thanpari hi a nghawngah hrui hmanga reh hlum nia rin a ni. Rinhlelh thuah a pasal chu Police in an la a, a chhan chu nizan zantir lamah Hotel pakhatah an nupa hi nasa taka an inhau lai hmutu an awm vangin rinhlelh awm ber anih vang a ni. Thanpari hian a fanu kum 9 mi leh a pasal a thihsan a ni.
.
A thlalak an rawn tarlan chuan ania ka thin tiphu chu! Nizana kan piah lawka inhaute kha an ni tlat alawm..a pasal khan a that anih ka ring nghet hmiah ringawt.
.
"A pasal hian a that ani ngei ngei ang" ka ti chhuak hlawl a.
.
"Keipawh ka rindan" a lo ti ve a. Inbual turin bathroomah min luhsan ta a..
.
Lucy thuamhnaw hain office ka kal a. Boss chuan min lo melh no leh viau! Ka ning tlat. A nupui hmeltha lutuk hi a khamkhawp lo em mawni le..fa duhawm zet zet pahnih an nei bawk si. A mitmeng lepler zet chu hmuh loh der hram ka duh thin. Nilengin hnaah ka buai a. Thanpari thihna kha ka ngaihtuah chhuak leh zauh thin. Uire mahse rawng taka thah kher chu țul ka ti lo. A lo uire miah lo thei ve tho bawk.
.
Ka ui duhtak Huntera chuan min lo lawm cheng cheng a. Zankhat lek ka hmuh loh vang pawh chuan ka ngai hman hle. Ka nu eisiam rimtui zet chu ka han hip vang vang a. Roomah inthlak turin ka luhsan leh ta a.
.
"Nu, zawh duh che ka nei a" zanriah kan ei lai chuan ka ti sap a. Sawi turin min mitmei a.
.
"Ka pa khan alaka zep nei angin a puh che a. Zep chu i lo nei tak tak em ni?"
.
"Zep ka neih awm pawh ka hre lo. I ti duh,uire ang te pawn min puh fô alawm. I pa kha chu zu khan a tibuai hneh em a tin ni" a ti dam diai a. Ka pa nen chuan kan inbe zeuh zeuh tho naa pa nei lo ang maiin ka khawsa tho. Ka nu laka a chetdan kha ka theihnghilh thei bik lo a ni.
.
Tv en paha Huntera nen kan infiam lai chuan Door bell a rawn ri tlang tlang a. Ka nu chuan a va hawnsak a. Lucy a lo ni. Kan thenawma a kal thu leh a lo penkawi thu a sawi luam a. Riak ve nghal turin ka sawm a. A lo pawm ve mai. Naktuk weekend a ni tho bawk a tiin.
.
Thanpari thihna chungchang chu an rawn puang lauh lauh a. An rinhlelh ber a pasal lah chu an sezawl chhuah leh tawp!! Khamizan khan Hotel atanga an chhuah hnuin a pasal chu a thianpa te inlamah a inkhalh nghal a. Ina a haw hma ngeia lo chhuak fel turin a chah a. A thianpa te ina a awm lai chuan, Pco a tanga phone call a dawn thu a sawi a. "I nupui hian a thiltih man a hmu ngei ang" tih thu chu. A sawitu chu mipa aw deuh si, hmeichhe aw rawng pawl deuh si tiin a sawi a. A ngaihtha lo chu inah a haw a. In a thlen hmain hmeichhe pakhatin a lo phar ding a. Chunu chu a rawn thulut nghal a. A hmeltha hle tih bak a hre lo. A pasalin a hnawhchhuah vanga a mangan thu leh puitura a ngen thu a sawi luam a. Ani lah inlam pan tum ani bawk si. Mahse, chunu chu a ţap vak vak a. Tihngaihna a hriat loh avangin Hotel pakhatah luhpuiin, zu a leisak a. Pu Lianchungnunga hi mioa fair ve tak a lo ni aniawm e. Chunu pawh chu zu intira mut hahdam tir a tum thu tlang takin a sawi a.
.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 24th, 2016, 7:23 pm

"Ka zu lei chu in ve tura min tih tlat vangin no khat chu ka insak ve a. Mahse, no ka dawm lai reng chuan ka luhai muai muai leh no ka thlauh a. Ka tlu riai riai tih chiah ka hre thei. Chu nu hmel chu chiang takin ka la hria. Ka harh chuan khumah keimahin ka lo mu a. Ka pawisa a bo lo a. Ka thawmhnaw pawh ka la ha vek. Zing dar 6 vel ani awm e. Haw tumin ka insiam a. Mahse, ka car a lo awm tawh lo. Kan nu phone ka tum lai takin kan Branch YMA presidentin a thih thu min rawn hrilh ta zawk a ni" a ti. A thusawi chu hriatpuitu an awm thlap, Hotel manager leh a thianpa te kha. Tin, a nupui ruang an hmuh lai khan inah a awm lo tih an hre bawk. Hetihlai hian a fanu chu a farnu bulah a riak a ni. A chhan pawh Pu Chungnunga hian a nupui uire thu a hriat veleh khan a farnu call nghalin a fanu chu lo awmpui turin a lo chah lawk diam tawh a ni.
.
Mizorama thil thleng khât tak anih avangin an chanchin hian beng a verh lo thei lo a. Zoram titi a tling hial a ni. Pu Chungnunga chu a ruk takin ka la ringhlel tho a. Mahse, a hmeichhe phurh pawh chu a ni thei tiin ka ngaihtuah a.
.
"A fanu te kha ka lainat ber mai" Lucy chuan a rawn ti chhuak hlawl a. Ka nu chuan, " Ni e, a la naupang si. A lainatawm reuh ê mai" a lo ti ve a. Ka nu mitmeng chu a dul raih a.
.
"Tu nge a phurh nu kha ni ang le?" Ka lo ti thung a.
.
"An hrechhuak thuai ang. Pu Chungnunga khan a hmel a hriatchian hmel sia" Lucy.
.
Mu turin kan intintuah ţan a. Lucy nen chuan inngheng rialin kan mu a. A bialpa nen an chanchin a sawi a. Kan nui leh hak hak thin. A nu leh pate chanchin a sawi ngai miah lo chu mak ka ti deuh a. Ka zawt leh ta tawp a..
.
"Ka pa chu nikum hmasa khan a thi tawh a. Ka nu erawh kum 3 lek ka nih laiin a thi tawh a ni. Pianpui unau tumah ka nei lo a. Nang hi ka pianpui unau ang chiaha ka en i ni mai" a ti a. A sawi lai chuan a insangruh țeuh a. A chhungrilah a na hle tih ka hre thei mai. Vanduai ber emaw ka intih laiin kei aia vanduai leh vanlaia tla a lo awm a. Engemawti zawngin ka thawl huai mai. Lucy ka khawngaih lo tihna erawh a ni lo.
.
Tiharhtu nei ang maiin ka harh hlawl mai! Thla eng chu ka room tukverhah chuan a rawn zam lut reih a. Ka bula mu Lucy chu a awm ta hauh lo mai. A zung aniang tia ka ngaihtuah lai chuan, ka nu room dep balcony lama ri deuh bak bak awm chuan ka beng a rawn luh a. Ka nu chu room thlang lama awm ani a. Tunang zanrei tawha pawna a chhuah ka ring chiah si lo. Thawm lah chu a ring sawt viau mai lehnghal. Thil chhu kauh kauh thawm ni mai hian ka hria a. Ka ngaih a tha ta lo. Ka tho a. Light ka on a. Thawm chu a reh daih! Ka han ngaichang leh ren rawn a. A reh tlawk tlawk mai si. An awmna atang chuan ka thawm te chu hriat awm loh tak hi ania. Light ka on vang anih ka ring. Kawngka ka hawng dawn tihin Lucy a rawn lut thut a!! Ka va phu chiang tak..
.
A hmel chu hlauh vang nimaw a dâng var pap mai a. A rapawm lek lek hial.
.

"Thawm kha i hria em? Ka pum a nuam lo lutuk a. Ka inthiar a. Thawm kha ka hre ta sia. Ventilation atangin ka va bihthla a. Thawmhnaw dum ha mi pahnih niin ka hria, i nu rooma luh tum niawm deuhin an tukverh vel kha an bih an bih a..awii ka hlauh zia chu..i room a rawn en chiah khan rang tawkin lei lamah an tawlh thla zawt zawt a. Ka rawn chhuak nghal a ni" a ti khur dat dat a. Keipawh ka tiril a khur der der.
.
Chutianga a ruka min lo thlithlaitu te chu tute nge ni ang? Rosum tam tham.kan kawl lo a. Rawk tham kan niin ka hre si lo.Zingah ka nu hrilh chu kan titlu a. Bet lo zetin kan mu leh ta a..
.
Zingah ka nu ka han hrilh chuan a mengphar nasa ta mai a. A hlau ve hle ni hian a lang.
.

"Ka in lamah pawh in lo riak reng thei ania" Lucy chuan a lo ti var a. Ka thlamuang sawt.
.

Chumizan chuan kan veng pa hausa nupui, Pi Nguri thah ani leh ta tlat!! Kan in atanga hla vak lo, an in lianpui hmuh phak renga hnaiah an awm a. Zep thu a cheng lo, Pi Nguri hi anpa nen vawitam an inthen tawh a. Nu hmeltha leh lian zet mai, chhungkaw hausa tak atanga seilian a ni. An fa naupangber pawh a tleirawl țan tihah an Dawra thawk tlangval hmelchhe lo tak lakah a UIRE A!! Hei vanh hian an pa nen an inthen deuh reng a. An pa hi tar lam tawh anih vangin a nupui chu a then ngam chiah lo ni tur ani. A dawh zel zawk a. Tuna Pi Nguri thihchhanah hian rinhlelh a kai ve leh ta chat mai. Pi Nguri ruang hi an garage ah hmuh ani a. A dulah chemtea vih a ni. Ka nu nen pawh mitthi in lam chu rang takin kan pan nghal a.
.

Titi lengvak a tam nak nak hle. A pasal an rinhlelh laiin,a bialpa pawh a kangkai ve zel a. A thih hma ni khan an dawrah an inhauh thu sawi te a lo awm a. Police in an chhuichhuah hun nghah phawt a tha ber mai. Kan thenawmpa hi Inspector ani a. Thlan nghah tukah chuan kan inah thingpui hang in in a lo lut a. A tih țhan ve dan ani a. Tualthah chungchangte chu ka lo zawt ve luam a.
.

"Pu Thakima ( Pi Nguri pasal) saw chu rinhlelh awmah ka ngai lem lo. Nguri thah a nih tlai khan a makpa te inah an nupain zanriah an ei a. A nu awmdan avangin a fanu chuan anu chu a lo khak deuh aniawm e. Pi Nguri chuan a haw tauh san a. Car pawh a khalh haw daih nghe nghe. A fanu chuan riak ve mai turin a sawm a. In hriat angin khamizan khan khua a nuam lo hle anih kha..ani pawh inlama an nu ang thawm ngaihthlak ai chuan tiin a makpa te inah a riak daih alawm. Zantin muthilhna damdawi a ei thin pawh ei lehin dar 9 a tang kha chuan a muhil nghal mai niawm tak ani. Ani upa lam tawh kha chu zanreia vak chhuak a, a nupui that tur chi niin ka hre tlat lo. Mahse, ka ngaihdan mai a nia.
.
Pi Nguri bialpa kan va reh chhuah chuan thu mak tak a sawi ta a. Khatia Pi Nguri haw tau khan a call nghal a. Ani lah a farnu leh anu lo zin lai tak a lo ni si. Chhuanlam a siam a. Nguri chu a thinrim ta a. A hnu dar 10 velah a rawn be leh a. An inbula a awm thu a rawn sawi a. Ani pawh a va chhuak ve mai a. Carah chuan kan Nguri châkna sosang chu a va chetpui leh ani awm e. Ama sawi dan chuan, " Khatia sex kan hmandun lai khan car atanga pen 20 awm velah hmeichhe pakhat hian min lo thlir reng mai a. Kan in hi a fal a. Motor veivak a awm tawh mang loh avanga ngampa taka che kan ni reng a. Khua a nawm loh vangin mihring veivak pawh an awm lo. Mahse,khanu kha chu ka hmuchiang lutuk, a lu chu puan dumin a tuam a. Kawrfual dum a ha bawk a. Chiang taka ka hmuh theih chhan chu kan dinna bul lawka veranda light engin a chhun phak chiah chiah vang ani. Tichuan, kan zo a. Ka haw san a. Kan inbe tawh lo. Zingah a ruang an hmuh thu ka hria a..chuzawng chu" a ti a.
.

Pu Chungnunga nupui thih danah lah hmeichhia inrawlh niin a lang a. Tunah hmeichhia bawk..he hmeichhia hi zawn chhuah ngei chu a țul dawn ani" A ti charh charh a. Ka nu nen chuan ngaihnawm ti deuhin kan lo ngaithla a.
.

Remchangah tiin a hma zana kan balcony a thil thleng chu ka hrilh ve a. Fimkhur tur leh hlau hauh loa hmachhawn turin min fuih a. A fanuin a lo koh avangin min chhuahsan ta a. Ka nu hmel chu ngun takin ka en a. A mitmenga hlimna inphumru chu ka hmuh lohna a rei hle tawh tih ka hrechhuak a. Ka lo lawmpui ve em em ringawt mai ani. Ka chetzia a lo man deuh nge "Naute, mipakhat ka tawng a. Mak tak maiin min tihlim riau a ni" a ti ta a. Ka lo rinlawk deuh anih avangin mak ka ti lem lo. Phone a hman nasat bakah a office kal tur darthlalang hmaa a din rei tawh thin zia te ka lo hriat tawh vangin. Ka nu chu ka lawmpui em em. Diktak chuan pasal chhia ţha te pawh lo hmu ve mahila, ka nu hian kawppui a neih phawt loh chuan ka kalsan duh dawn hauh lo a. Tin, tar a lo nih hunah te pawh kei a fanu hian enkawl mahila, kawppui te ngaih vanga khawharna chuan a la chimbuai dawn tho tho tih ka hria. Pahrawn hrawn chu ka hreh hran lo a. Ka nu mipa duhzawng chu misual tak anih lah ka ring thei hek lo.
.
Min inhmelhriattir hun tur a sawi chuan ka nui sak a. A lai hmel chu hmuh a nuam kher mai.
.
Ka maimichhing diar diar a. Ka hmui chuan bawhthuahtu a nei tih hriat takin a nem thlep a. A tukhum sam chu na zetin ka țham nawk nawk a. Ka hnute hmur khaltu kut nel thep chu ka hup a. Ka inleng deuh bat bat a. A mitmenga min ngenngawl hmel chu hmuh nuam ka tih rualin, ka hnar a ngai tih ka hai der si lo. Hepa hi ka hmangaih em em, mahse, a hun hmaa nuam lo chen lawk ngawt chu ka thinlung hian a pawm hlei thei meuh lo.
.
" A theih loh, Jeff, nghak rih rawh" ka ti tham chhal a. Rum nghut chungin a insaseng ve ta mai a. Ni e, min nawrlui ngai lo hi ka ngaihsan chhan pawh a ni reng a. Kum 2 zet kan inngaizawng tawh a. Doctor anih avangin kan inhmu zen zen thei lo. Kan inhmuh ve chhunah kan ãm reng bawk a. Kan inkarah tlazep a awm ngai lo a, kan pelhe ngai hek lo.
.
"Vawiin chu ka dam sam lo, ka hritlang viau mai" Lucy message chu. Banah ka tlawh kual zuai a. A lo inkhuh hlun a.
.
"Naktuk tlai chu dam tha la ka ti ee..ka nu leh a bialpa te nen chaw ei ho kan lo rawt a" ka ti sap a. A nui sak a. "I nu chu ka va lawmpui ve aw..naktuk tlaiah maw? Hman hram ka lo tum ange" a ti a. Coffee ka lumsak a.
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 24th, 2016, 7:23 pm

A Laptop chu ka email check nan ka hmansak lawk a. A inbual hlanin ka lo khawih a. A nu niawm tak thlalak hi wall paperah a hmang a. A hmelchhe lo kher mai.
.

Thlalak dang pawh ka hmu nual, a inbual zawh hmain ka dah a. A lehkhabu ho chu ka la chhiar loh a awm takin ka enlawr dan dan a.
.
"Nu, zanin chu chhuah lawk ka ngai a" ka ti a. A chhan min zawt niawm takin min en ha a. "Kan hna thilah ania" ka ti ringawt. Car ah chuan ngawi rengin ka thu ngawt ngawt a. Hmalam ka bih ngur a. Ka thinlung chu nasa takin a insual mek a ni. Thil ni thei awma ka ngaih loh thleng thlengin ka rilru chuan hmun hrang hrang a fangkual a ni. Thawm chu a reh țhuap a. Ka beisei leh ka nghah chu chumizan chuan a thleng ta lo.
.
Dar 1 velah in ka thleng a. Kawngka chu ka hawng a. A lo thim țhap mai.Ka nu chu a mu tawh tih ka hria. Bathroomah lutin ka intiharh a. Ka room pana ka kal lai chuan thawm danglam tak ka hre ta! Ka nu room atanga lo chhuak a ni.
.
Thei leh thei loa thaw hrawih hrawih thawm a ni a, rang takin ka va pan a. Kawngka pawh a lo inkalh hauh lo. Light k'n on chu ka thil hmuh avang chuan ka tawlhsawn dawrh mai. Ka nu chu chhuatah thisen nena inchiahpiah nuaih hian a lo mu a. A hmai pawh thisenin a bual hneh kher mai. Ka hamhaih chhung a rei lo hlauh a. Ka va pawm tho a. A nakah vih ani tih leh a lu pawh chu chhut ani tih a lang, mitmeng dul takin min rawn melh a, sawi duh a nei tih ka hrethiam. Mahse, a phun sep sep ri chu hriat hleih theih a ni lo. Kan ţhenawmte ka call a, police nen. Țhenawm te an rawn lut chiah tihin, khawvela ka neihchhun leh ka innghahna ka nu chuan min chahthlaksan ta a ni.Awmdan tur ka hre lo a, ka tei ka tei ringawt mai. Ka nu kha rawng taka thah ani a, thah anih chhan lah ka hre hek lo. A thattu phei chu ka hre lo lehzual. Engvang tehhrepin nge ka nu chhuahsana khalai hmunah khan ka va thut reng chu le...ka inchhir na chuan ka ban a chen takzet a ni. Tualthattu zawnchhuah tumin ka kuang lo ka nawr a. Ka nu in a tawrh phah ta si! Lucy leh ka thawhpui dangte, ka bialpa te chuan min hnem tum takin min awmpui reng a. Ka bialpa chuan ka nu vui dan tur leh zualko dan turte a rel fel vek a. Kei chuan ka nu chu ka kuah tlat a, khawiahmah ka kalsan phal lo. Post mortem anih hnuah vuina hunserh kan hmang a. Ka pa hmel ka hmuh chuan mak ka tiin ka huatna a pung sawt a. Ka nu ka khawngaihna leh ka pa ka huatna chu ka chhungrilah an indo ani ber mai.
.
"Angaih, thihna hi chu tumah hian kan hneh thei lo a ni. Pawmthiam hram tum rawh aw..a thattu hi tupawhnise kan zawngchhuak anga, i nu hian rorelna dik a hmu ngei tur a ni" Ka thianthaber Lucy chuan sehchilh deuh hian a ti a. Ka thla a timuang kher mai. Ka nu thih atanga thla khat deuhthaw chu mumal in ka khawsa lo a. Jeffa leh Lucy ten min awmpui deuh chawt ani ber mai. Ka tan chuan an hlu takzet a ni. Ka nu bialpa ve deuh roh pawh kha a lo leng fô thin a. A chang chuan ka nu thattu anih te hi ka ring thut thin. Nu pathum te, rawng taka thah an nih tak avangin zoram titi tam ber a ni ta a. Police te pawh an thawkrim hle. Zankhat chu thli a thaw vuk vuk a, kawl a phe zuai zuai bawk a. Jeffa a zin daih si a..ka khuaharin ka hlau deuh a. Lucy ka va call a, ani chuan riak turin min lo sawm a. Ka inkhalh phei ta a.
.
"Khamizan i nu thih zan khan khaw nge i kal tih min la chhang miah lo" a ti a. Ni e, tumah ka la hrilh thiang lo a tin ni.
.
"Jeff nen Hotelah kan inhmu a lawm"
.
"Dawt sawi hi chu i thiam lo ve chiang a lawm..ka zawt nawn tawh lovang che. Karleh chu chawlh la i la, Shillongah i zu zin mai mai ang hmiang, intihharh pah ani mai a" a ti a.
.
"Nia , ka chak zawng tak a ni..kan tum dawn nia. Boruak thar hip pawh a tha a lawm"
.
A khum zau puiah chuan kan mudun a. Min kuah hlu hlu a. Ka nu ka hrechhuak zawk..ka ngai a ni.
.
Zing dar 2 a pel tawh a. Dim te in ka tho a. Lucy chu khumah a mu lo a,khawiah nge a kal tih erawh ka hre lo. Ka hriat chhun erawh naktukah ruang an chhar leh dawn tih chauh lo chu!!
.
Ke pen thawm ka hriat vangin ka mu leh vat a. Dim tea pen ri chu thinphu dawt dawt chungin ka lo ngaithla a. Thawmhnaw phelh thawm niawm tak hi a ri leh san san a. Ka hnar fing tak chuan thisen thang rim chu ka hai lo chiang hle. Bathroomah lutin a va inbual a ni maithei. A rawn mut leh hun chu a tlai tawh hle. Kei chu tuitaka muhil niawm takin ka lo hnar der vel a. Ka chhungril khur der der chu hnawksak ka ti takzet a ni.
.
"Ruang an chhar leh tawh kha i hria em?" Artui kan pah chuan a ti satliah a. Ka lu ka lo thing nar nar a.
.
"I nu te ang rual tho ania, i hrechiang viauin ka ring..i nu thih zana i kalna kha" a ti ta a!! Minute khat chhung chu engmah sawi loin kan inmelh tlawk tlawk a. A mitmenga zam hmel awm map lo chuan min tizam zawk ani ber e.
.
"Lucy"
.
"I hria tih ka hria a lawm. A chhan chu hmannia i lo lena ka laptop i khawih khan thlalak i hmu nual a. An hrawkhrui ka zai chah ho tur te kha..tichuan, ka target hmasa ber kha i hre dik, mahse, plan ka thlak a. Ka hun remchang neih hun chu bawhpelh tum hauh loin i chhuah bo hlanin i nu kha ka va that ta anih kha.."
.
"A chhan ka hre duh a ni"
.
Thawnthu sei tak a ni. Ka mi thah te hi chhut la, uirenu an ni zel.i hrethiam em? "
.
"Ka nu kha a uire lo"
.
"Ni e,ka pa lakah a uire thung a lawm..i nu kha ka nu a ni ve tho asin. I pa nen an inneih hma khan ka pa nupui a lo ni tawh a. Ka pa chu sipai ani a, ral do a a rammut hlanin nula anga lemchangin i pa a bum thlu a. Kei min hnutchhiahin a zui ta a. I nu in a uiresan ka pa chu a thinlung natna a vangin kum 6 mi lek ka nih laiin kumkhua atan thlan khur thuka zalh a lo ni tawh asin. Tichuan,ka ni in min enkawl a. Ka tum tihlawhtling tura ka beihna leh thawhrimna chuan vawiinah par a chhuang ve ta anih hi"
.
Lucy chu ka melh ngawt ngawt a. Ka țawng dawn a, ka hrawkah hnawhtu a awm tlat si!
.
"Midang ka thah tel ve chhan min zawh i duh tih ka hria, ni e, uirena hi ka hua a. Chu ka huatna chu ka thunun zo tawh lo. Thah chimih vek ka duh a, ka tum bawk"
.
"Ka tihtir thei tawh lo che. Nangmah hringtu i nu ngei pawh that duh khawpa mi rapthlak i lo nih hi" tih pahin ka phone ka ban a. 100 dial ka tum mek lai chuan nui ver ver chungin min lo pan a. A hlauhawm ru kher mai. Ka chhipsamah a tham lawk a, ka lu chuan dawhkan kil zumah min han tauh mai chu'h!!!
.
THE END

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)