ROSEMARY BEACH -Season 2 BY Noah Hringngen (Complete)

Ngaia
Site Admin
Posts: 25813
Joined: April 30th, 2016, 4:07 pm

Re: ROSEMARY BEACH -Season 2 BY Noah Hringngen (Complete)

Unread post by Ngaia » July 23rd, 2017, 2:26 pm

ROSEMARY BEACH

Chapter -20

> BLAIR'S P.O.V <

Rush-a phone thar min lei sak chu choka dawhkanah chuan a lo inhung fel ran a, lehkha them a lo inzep tel a.

'Hei hi i mamawh. Naute tan leh rikrum thilah' tih zawngte hi a lo inziak a.

Nui suk chungin phone chu ka la a. La duh lo pawh ni mah ila ka lak duh hma chu min hnawn tho tho ang tih ka hria. Vawiin hi doctor ka hmuh vawihnihna tur a ni a, thawhtan zan kan chhuah dun pawh khan Rush-a chu ka hrilh tak e.

Zantin hmun nuam tak tak fangin kan chhuak dun thin a, thawhtan zanah chuan movie en ka duh avangin theater ah min hruai a. Mi zawng zawng chuan kan ingaizawng tih an hria a, mak tih hmel taka min thlir vung vung tawk pawh an awm nawk zel. Chung vel ka ngaihtuah chhuah chuan ka nui ver ver a.

Doctor hmuh ni a ni tih remind nan Rush-a chu ka va call a. Vawi thum a ring naah a lo la nghal vata. "Hey...,nakin deuhah ka lo call back mai dawn che em ni?"

"Aw..mahse-" ka ti hman chauh tihah chuan min rawn chhang lehnghal a.

"Nangnah i tha reng reng em?"

"Aw tha e. Mahse ka-"

"Aw le. A nih chuan nakin deuhah ka rawn call back ang che" tih leh phone dah a rual nghal a.

Ka nghak vang vanga, minutes 10 hnuah pawh min rawn la call lo. Doctor hmu turin ka lo va insiam lawka.

Darkar khat hnuah pawh a min lo la call loh takah chuan va call leh mai tur em ni ang tiin ka rilru a insual nasa hlemai. A nih loh pawhin Bethy car pawh ka hawh sak thei tho a. Mahse Thawhtan zana ka hrilh kha chuan amah zawk kha a phur em a, mahni a lo kal daih chu ka hreh ve deuh bawk si a.

Ka va call nawn leh a, vawi li a ring naah a rawn pick up nghala.

"Eng nge?" Nan-i aw a ni tlat mai.

"Uhh...ummm" sawi mai tur ka hre lo. Ka appointment chungchang lah sawi chhuah chi a ni si lo. "Rush-a a awm hnai em?"

Nan-i chu a nui chhuak hak a. "Awihawm loh zawk hian. Ka rawn call back ang che a tih mawlh mawlh kha. Thawk lakna hun takngial pawh i pe thei lo em ni? A chhungkaw tlawh turin a rawn kal a ni a, ka nu leh pa pawh an awm a, chaw chhun kan ei dawn mek. A hman hunah chuan a lo call mai ang che".

A nu leh pa te a lo va hmuh dawn vang a ni maw a kalna tur min hrilh miah loh? Kei leh a fa mai tur ai pawhin anni chu a dah pawi zawk tihna em ni? Nan-i aw chu ka ngaithla peih tawh lo. Ka phone pawh chu khumah ka dah a, Bethy car ka hawh sak mai aniang chu.

Office ah ka va kal vang vanga, ka thlen chuan ka thlan tuiin min bual huh hlup a. Counter ah Darla-i a lo thu a, min rawn hmu vata. "Vawiinte chu chawlh i lak kha" a lo ti a.

"Nia ka hria alawm. Bethy car rawn hawh sak ka tum deuh a. Vawiin hi doctor ka hmuh ni a nia, mahse ummm...aahh ka sawi peih vel lo". Dawt sawi ka duh lova, thu dik sawi ka duh bawk si lo.

Darla-i chuan min en vang vang a, a ipte a dap ruk ruk a, chahbi a rawn phawrh chhuaka. "Kha, ka car va hmang rawh. Nilengin hetah ka awm dawna, ka mamawh rih hleinem"

Ka lawm lutuk chu va kuah nghal chuk chuk mai ka duh. "Ka lawm lutuk aw Darla. Petrol ka rawn thun nghal ang" tih pahin ka tlan chhuak nghala.

Minutes 15 vel lekah Destin ka thleng a, nurse ho chuan nui sang chungin doctor room ah min luhpui a.

"Tunah thla 3 i paina a lo ni ta a naute dinhmun kan en a ngai tawh dawn a.. Ultrasound in kan en anga, naute awm dan leh a lungphu kan en fiah dawn nia"

Ka mumang ni mai hian ka hria. Ka fa ngei ka hmu dawn a, a lungphu nen. Hetiang hunah hi chuan keimah chauha ka awm ka beisei ngai lova, ka kiangah tu emaw a awm ve ka lo beisei thin. Naute lungphu chu lo hmu lo in fel lo lo awm palh ta se? Mahni a awm ka zuam hlawl lo.

Khumah min mut tir a, naute lungphu enna turin ka serh ah eng emaw hi an hawl lut a, nat phei chu a na lo. Ka hma zawn a TV chu ka en rana, doctor in ka dulah ultrasound khawl a rawn dah a.

Rei lo teah naute lungphu ri chuan pindan chhung chu a rawn luah khat nghala. Keima thinphu ang chiahin ka hria.

"Chu chu em ni...?" ringhlel titih deuh chung hian ka han zawt a.

"Aw ni e. A lungphu a thain a chak tha khawp mai"

Nurse chuan TV screen chu a rawn kawk a. "Heti laia bean mu ang deuh hi naute chu a nih hi"

Ka mittui a rawn luang ringawt a, mahse ka zak hran lo. Ka pum chhunga thil mak tak awm chuan sawi thiam phak loh hlimna min pe a ni.

"Naute a tha a,nang pawh i tha e" Doctor chuan min ti a. A thil vuah luh chu phawi chhuakin khum atang chuan min kaitho a.

"Thisen chhuak tam vak lo a awm a nih pawhin a ve tur reng a ni a, buai loh tur aw. Tun atang a kar 4 naah i lo kal leh dawn nia" Doctor chuan min ti a.

"Kha le. .?" Ultrasound a ka naute thlalak chu print sa vekin nurse chuan min rawn pe a.

"Ti hian ka ta tur em ni..?"tih pahin ka kawchhung a nunna nei, ka naute, bean mu tiat lek chu ka en a.

"Ni chiang e. Tha deuhin i inenkawl dawn nia"

Ka lu ka bu nghata, ka mittui erawh a hnam pur reng a.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

WEbsite link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

> RUSH'S P.O.V <

"Khawiah nge Blair-i?" Bethy chu Blair-i pindan kawngkhar bulah a ding rana, Blair-i phone a hum bawka. A kalnaah a phone a keng lo a nih leh pek hi.

Bethy chuan min chhang lo kher mai. Eng nge maw dik lo awm ni?

Vawiin khan ka chhungte bulah Blair-i nena inneih ka dil a, kan inhnial nasa khawp mai. Blair-i pa chuan a phal mai a, a buaithlak ber erawh ka nu leh Nan-i an hmin ve thei lo chu a ni. Kar thar atangin Nan-i te pawh school an lut leh tawh anga, thlasik chawlh hma chu a rawn let leh tawh lovang. A phal lo talh a nih chuan ka nu pawh ka inah sawn a awm ka remti lo mai aniang chu.

Chutih lai chuan nuisang chungin Blair-i a rawn lut hlawl a, mahse min hmu chiah chu a hmel a inthlak nghal hlawka. Amah pawh chuan min haw ve tihna em ni?

"Blair.." ka va pan hnai a.

"Rawn kal suh" tihpahin a kut pahnih a rawn phar chhuaka.

Thlalak eng emaw hi a keng a, min ti hlauthawng kher mai. Chu thlalak vang chu em ni a thinrim? Ka hun liam tawh a mi, tu nula emaw nena kan awm dun lai em ni ang?

"Hei hi alawm ka hmuh chak chu" tiin Bethy chu a va phei a, thlalak chu a la a.

"Ui lehh...." Lawm takin a ka a hup a. "A thinphu te i ngaithla em?"

Thinphu a..?? Karei lehh...vawiin hi nilaithawhtan. Chumi awmzia chu Blair-i'n doctor a hmuh ni. Chuvang a ni maw min lo call a, ka lo dah daih ni?

"Khai aa bawite. Ka lo theihngilh daih alawm. A pawi ka ti lutuk. Eng lo ania, ihh-"

"Ka hria. I chhungte i hmuh thu Nan i'n min hrilh alawm. I insawithiamna kha ka ngaithla peih lo ania. Kal bo rawh"

An pahnih chuan ka fa thlalak chu an en dun a, a lungphu a ngaithla amaw? Amah chauhin. Ka tel lovin.

"Ka lo en ve thei angem?" inthlahrung angreng tak hian ka han ti a.

Phal angreng takin min rawn pe ve maia. "Helaia bean mu ang deuh hi kan naute chu ania" a rawn ti a.

"A nih a tha em? A lungphu te, engkim a tha em?"

"Aw tha vek e. Copy thum ngawt min pe a, duh leh kha kha chu ti khan nei mai rawh. Tunah rih chuan min chhuahsan tawh rawh"

Mahse chuti maia kal chu ka tum bik hauh lo. "Vawiin khan ka nu leh i pa nen kan tum lawk lutuk lovin kan inhmu a. College a zawm leh angai tawh dawn avangin Nan-i pawh hmun dangah a awm tawh dawn a, kei pawh hmun danga awm ve tawh tur ka ni a. Mahse ka nu bulah chuan khawiah mah ka kal dawn loh thu leh nangman i duh a nih ngawt loh chuan ka kalsan dawn loh che thu ka hrilh a. A tul a nih chuan ka nu pawh in dang zawng mai turin ka ti a. A chhan chu nang hi nupui a neih che ka duh avangin". Blair-i hmel chu a dâng lap a, engmah a sawi lo. A sawi ka phut hek lo.

"Kan invin a, kan inhau hi a ni ringawt mai. I lo call lai khan nang nena inneih ka duh thu ka sawi lai vel mek a ni a. I hriat angin anni hmin tum chu a har vet vet khawp mai. Nan-i erawh vawiin tlai hian a college kalna tur lam panin min chhuah san tawh ang a, tu tan mah hnawksakin a awm tawh lovang". Ka chawl a, thawk ka han la haka.

"Vawiin appointment ka lo mang nghilh avang khan pawi ka ti takzet a, ngaihdam dil thei dinhmun a ding tlak pawh ka ni lo tih ka inhria. A thleng leh tawh lovang ti a tiam che mai loh chu"

Blair-i chu a ngawi vang vanga. "Ka lo call back che khan Nan i'n min lo chhanga, ka tan hun i neih loh thu leh in chhungkua a chaw chhun in kil ho thuin min rawn chhang a. Naute ai pawha i chhungte ngai pawimawh zawk che angah ka ngai che a. Chu pawh engmah min hrilh lovin".

Ka farnu dawt heh lutuk hi chu sawi deuh nawk nawk hi ka duh tawh.

Blair-i chu ka pan phei a, a banah vuanin ka lamah ka pawt phei a, ka pawm vawng vawng a. "Nang leh kan naute hi ka chhungkua chu in ni. Vawiin khan thil hlu tak ka chan a, ka inthiam thei lo a ni. A lungphu i ngaihthlak lai khan i kiang a awm ve ka duh a, ka fapa i hmuh hmasak ber laia i kut lo vawn kha ka duh takzet a ni"

Blair-i chu a nui seih a. "Hmeichhia zawk pawh a ni maithei a nia"

"Ni e, ka hria alawm"


*********************************************

> BLAIR'S P.O.V <

Nipui chawlh a zo a, chawlh hmang tam zawk an haw leh tawn tawh avangin khaw chhung pawh a reh ta duk mai hian a hriat a, club lam pawh a lun dan a ngai reng tawh lo va, tips pawh a tlahniam leh viau tawh mai.

A pawimawh ber zawk erawh kha mi zan kan Condo a Rush-a'n inneih chungchang a sawi tih loh kha chu vawikhat mah a sawi nawn leh tawh lo hi a ni. A chang hi chuan ka ngaihte a tha lo deuh rum rum a, a sut leh ta daih emawni ka ti hial thin. A nih loh pawhin in pahnih atang naute kan enkawl dun dawnte pawh a ni mahna.

Tips a tlem tak avangin ka hlawh ka kham khawp lo dawn hle mai a, hna dang zawn belh ka ngai a ni. Chutih rualin helai velah hian hna a vang phian lehnghal a.

Ka room a ka han lut chu ka khumah chuan rose par a lo in chap darh niah maia, alaiah tak chuan envelope ka hmin chuanna hi a lo awm a. Rang taka la in ka hawnga.

'Tuipui kamah min rawn hmu rawh'

I hmangaih
Rush

A handwriting mawi tak mai ka hmuh chuan ka nui seih a. Rang takin ka thawmhnaw hak lai chu nipui thawmhnaw in ka thlak vata, ka sam khuih thain makeup tlem ka inhnawih zuai zuai a, tuipui kam lamah chuan ka chhuk thla nghala.

Rush-a pawh chu ka zuk hmu thuai a. Khaki kekawrbul a ha a, kamis ban bul, a hma kilhna awm a ha bawka. Tuipui lam hawiin ipte zen chungin a dinga. Awm hmun nen tawpa ka kal lo chu ka inchhir lo viau mai.

Va pawh phei tawp chu ka tim ve deuh bawk si, mahse hmuh ngei ka duh bawk si. Muangchangin tiau vut chu daiin ka phei a, tuipui sava an thlawk neuh neuh a, tuipui atang chuan thlifim a rawn thaw heuh heuh a.

Ka thleng phei tep tihah tiau vut chung a eng emaw inziak chu ka hmu a. Inher remin thil in ziak chu a riin ka han chhiar a. "Blair Wynn, min nei duh angem?" Ka chhiar ri a hriat chuan Rush-a chu a rawn inher a. Ka lamah rawn pheiin ka hma zawnah tak a rawn thingthi a.

A kutah chuan bawm te a kenga, ka hma zawnah a rawn hawnga, a chhungah chuan lunghlu zungbun mawi tak mai a lo awm a. Ni zung chuan a rawn chhun tle vet vet a. Hei hi ka duh chiah em? Aw—. Amah hi ka zawng zawngin ka ring tawk em? Aw—.

Amah lam a inpeih tawh reng em ni? Ka hre bik lo. A unaunu leh a nu rem ti lo chung a ni awm si a. Zungbun chu laiin ka bun a. "Enga tinge hetiang thil hi i tih?"

Rush-a chuanca lu a thing a. "Engmah ka ti hleinem. Ka nun zawng zawng hi i kianga hman ka duh mai chauh a ni. Chu zawng chu"

A la naupang a, a hausa in a chhelo hle bawk. Engmah pek let tur ka nei ve lo chu sawi loh, ka phu hlawl lo a ni. Kun hniamin ka kuah ringawt a.

A rawn ding chhuak a, min kuah let ve nghala. "Nang ka hmangaih ang che hian he khawvel a mipa dang pawh hian tumah an hmangaih chuang bik kher lovang"

Sawi ngaihna vak pawh ka hre lo. Zungbun chu phelhin a bawm ngaihah chuan ka dah let leh a. "Han en teh, a mawi zia hi"

"I kut a awm tur chuan a la mawi lo mah mah zawk a ni" tih pahin zungbun chu a la a, leiah bawk chuan a thingthi tha leh a.

"Blair Wynn, khawngaihin ka nupui ni ta che?"

Engtin mah ka hnar thei lovang.

"Aw". Ka kutah chuan zungbun chu a rawn rawlh lut nghala.

"Ka lawm e" a ti sap a. Rawn dingin duhthaw takin min fawp nghal tawn tawn a. Tunah zet chuan he khawvel a hmeichhe hlim ber ka nih lohna chhan tur engmah a awm tawh lo. A chhan chu ka hmangaih ber a ni tlat a tin ni.

"Ka bulah rawn insawn lut tawh ta che" tiin min ngen a.

"Ngawi rawh, chu zawng ka thei lovang. I hre lo em ni kum chanve lai luah man ka pe lawk tawh si a"

"A bang zawng chu Woods-a hnenah i account a dah tha turin ka hrilh tawh alawm" a ti a.

Tih lung nih loh chu ka duh hauh lo, mahse ka thei lo a ni. A hmuiah ka va fawp zeuh ringawt a.

"Chuan i hna atang bang bawk la"

"Aih, chu zawng ka thei lovang" tiin ka lo chhang let a.

"Ka nupui hual i ni tawh a, ka nupui ni mai tur nen. Engvangin nge country club a thawh chu i la duh tal a? Thil dang tih duh zawkte i nei lovem ni? College lam te? Degree eng emaw i duh a nih pawhin a pawi lo. Tun aia chungnung zawk hi".

A nupui ka ni thuai dawn. Chu chu ka bengah chuan a ri nawn nghal awn awn a. Sawi ngaina pawh ka hre lo. Nghet takin ka kuah ringawt a.

chhiar zawhah clck pawh kha tih theuh ang u aww


END OF CHAPTER -20



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 23rd, 2017, 2:27 pm

ROSEMARY BEACH

Chapter -21

> RUSH'S P.O.V <

Blair-i hna bang nghah pahin Car a thu chungin coffee ka lo dawm a. Blair-i pawh Car lam panin a rawn phei mek a. A ke chheh engkim, a ruangam zawng zawng hian ka lung a dum hliah hliah hi a ni ringawt. Hmuhnawm ka ti em em reng mai.

Rawn thu lutin ka nghawngah a rawn fawpa, ka hmuiin ka beng a rawn nawr deuh ti tih a.

"Hetiang a a awm reng dawn a nih chuan ka nupui hual lai pawh nise ka khuaikhem deuh mai ang" ka han ti a.

"Chungte chu sawi lova a tih a tih zawk tur alawm" tiin ka kap a rawn dap a, a rawn hum nghal chata.

Ka thaw haka. "Khatiang te chuan motor ka khalh thei nang le"

"Kei chuan eng pawh lo ti ila i motor khal laiah i rilru pe ang che" tih pahin ka jeans kilhna chu a pawt phelh nghala.

Ka boxer chhungah a zen lut a, a kut lum hiam mai chuan a tak chu a vuan run tawha. Ka phone a nghawr der der renga, mahse a hma a ka nuin min rawn phone chhen avangin amah tho a nih ringin ka ngaihsak duh lem lo. Phone chu laiin kan en a, a number lah chu ram dang phone number daih a ni.

"Tunge a?" Blair-i chuan a rawn ti a.

"Ka hre bik lo. Mahse a rawn ti ngun tawh khawp mai"

"A nih chuan la rawh. Nakinah kan chhunzawm leh mai dawn nia"

Phone call chu ka la ta nge nge a. Mi laklawh lai laiin. Hello pawh ka tih hmain ka nu aw ka hre nghal a, a thusawi chuan ka awmdan zawng zawng chu thawklehkhatah a thlak danglam nghal vek. Ka ke ler atanga ka chhip thlengin.


> BLAIR'S P.O.V <

Rush-a hmel chu hmuh theih khawpin a dâng nghal bawiha. A kut ka va vuana, hria ang pawhin a awm lo. Ngawi rengin phone a rawn be tu tawng chu a ngaithla a, min ti hlauthawng hlemai. Thil eng emaw tha lo tak thleng a awm a ni chiang mai.

"Ka lo kal nghal ang" a aw chu a lawi tuau a, a phone chu dahin steering wheel a vuan nghala.

"Eng nge dik lo awm a Rush?" Hlauthawng ru tak chungin ka han ti a.

"Car atang hian chhuak la inah lo va awm rawh Blair. Nan-i te chuanna lawng a accident a". A mit a chhing a, thawk a la khur der der a. "Tunah rih chuan inah lo va awm phawt rawh. Ka kal vat angai. Ka theih veleh ka lo bia ang che".

"A na em? I rualin ka lo kal ve thei love'm ni?"

"THEI LO". A aw chu a chang kher mai. "In ah lo va awm rawh. Ka farnu thi chhawngin ICU ah a awm mek. Car atang hian chhuak la, inah lo va awm rawh".

A rilru a na a, a hlauthawng bawk. Ka hrethiam lutuk. Mahse amah chauh a chutiang a tawrh chu ka duh lo. Ka hmangaih a, a bula awm ka duh a ni. "Rush, ka lo-"

"CAR ATANG HIAN CHHUAK RAWHH.." a awki a sang kher mai. Rang takin ka purse ka la a, Car atang chuan ka chhuak nghala.

Ka chhuak chiah tihah engine a ti nung a, hawi pawh rawn hawi let lovin chak mangkhengin a ving nghala. Tih ngaihna reng ka hre lo. A rilru a na a, chutiang bawkin kei pawh. Ka biangah mittui a rawn luang thla riai riai a, ka ngaihtuah a ni. Chutih rualin min vinna aw ka erawh ka bengah a ri nawn ut ut renga.

Rush-a in chu a lianin a thim mup a, a tello chuan a ruak vek maiin ka hria. Mahni chauha lo awm chu ka duh lo. Bethy bulah ka riak mai ang ti dawn ila Car ka nei ve bawk si lo.

Mahse heta tang Club chu mel-3 leka hla a ni a, ke pawhin ka thleng har lovang.

Darkar khat leh minutes 15 ke a ka kal hnu chuan Bethy condo chu ka va thleng thei hram a. Parking lot ah a Car a awm lova, Jace-a bulah a riak a nih ka ring. A tih zia daih zawk. Ketahna hnuaia a chahbi spare dah chu laiin Condo chu la hawng a, ka inthlak sawk sawk a, inbual turin shower ka pan nghala.

Lo awm se chu thu khuh taka thil awmdan in hrilhfiah leh kil kelh angai anga, chumi a ngai lo ringawt pawh chu a lawmawm viau mai. Rush-a ka ngaihtuah hle a, ka va call mai chiah ngam si lo.

Ka inbual zo a, ka inthlak fel a, mu turin bedroom pakhat zawk lam chu ka pan a. Ka chau deuh a ni ang, ka muhil har lem lo.

Zing a lo ni a, eitur ka siam vel mek lai chuan Woods-a a rawn lang hlawl a. "I mu tha em?" a rawn ti a. A mitmengah thil thleng engkim a hre vek a ni tih ka hre nghal mai.

Ka lu ka lo bu ringawta.

"Tukin khan Grant a'n min rawn phone a, damdawiinah ani pawh a awm mek a. Nan-i ala harhchhuah loh thu leh Rush-a pawh tuman an biak tawng zawh lo thu min lo hrilh a. Chutih rualin nang i kal tel ve si lo va, chuvang chuan ka rawn ngaihven che a"

Rush-a rilru nat tur zia ka ngaihtuah chuan ka thinlung hi a rum vawng vawng a.Keiin engmah tih theih ka nei ve der si lo. Min rawn phone miah lo a, a chhan pawh min be duh rih lo aniang. A unaunu a hlat chhan pawh keimah ka ni a, keimah vang bawkin rei tak a be duh lo kha a ni a. Min van haw dawn tehreng em.

Ka mittui a rawn luang a, hei vang hian alawm Rush-a nen hi chuan kan khawvel a in ang ve lo a ni. Lasi thawnthu chu a taka thleng turin kan bei a, mahse a taka thleng thei chi ziazang a ni si lo. A chhungkua a mamawh a ni. Kei chu a chhungkua ka ni ve si lo.

"Eng nge tih tur ber pawh ka hre tawh lo" tih pahin ka tap chhuak hawka. Woods-a hma em a han tah chu ka duh miah lo. Mahse ka insum zo tawh bik lo a ni.


> RUSH'S P.O.V <

Engtik lai pawhin Nan-i khum kiangah ka thu reng a, mut pawh ka muthilh san thei lo. Grant-a'n Woods-a a lo va phone a, Blair-i pawh a that thu leh Bethy bula a awm thute, Woods-a an a tulna ang ang a a lo buaipui tur thute min hrilh a, thla erawh a muang viau mai.



Ni hnih a liam a, engmah hmasawnna hmuh tur ala awm lo. Nan-i pawh a mut dan ngaiin ala mu reng a, keiman ka awmpui chawt a. Ka nu in min rawn chhawk zeuh zeuh a, mahse ani erawh hotel lamah kan mut hahdam tir thung.

Grant-a a rawn kal a, vawiin chu min awmpui ang. "Blair-i nen kan inbia a" a rawn ti a. A hming ka hriat zawng ringawt pawh chuan ka ngai nghal veng veng mai. Hetah awm ve se ka duh hle a, mahse thil tih chi a ni si lo. Nan-i a that chhuah vat ka duh a, Blair-i a awm ve tih a hriat chuan a hriselna in a tuar zual leh ka hlau bawk si.

"Vawiin hi a doctor hmuh hun a nih leh tawh thu leh Woods-a'n a lo va hruai mai tur thu a sawi a. Nangmah leh Nan-i a ngaihtuah viau a ni awm e"

Tun tum hi amah leh kan naute aia ka chhungte ka dah hmasak zawk tum hnihna a ni ta. A doctor appointment vawi hnihna turah pawh ka telpui thei ta si lo.


> BLAIR'S P.O.V <

Waiting room ah doctor nghakin ka thu rana, ka bulah chuan raipuar inentir tur pathum ngawt an thu ve a. Pakhat chu a pasalin a thutpui a, eng emaw hi a beng bulah a zuk hrilh ru ser ser a, an nu chu hlim deuh hian a nui hak hak a. An nu dul chu duat takin a chul saka, a kut a lasawn eih lo.

Midang ho pawh chu an pasal ten an thutpui vek a, an nupui leh an fa turte chu pa berin a uap bet tlat a, an tan chuan a tlamuan thlak viau ka ring.

Woods-a'n min kalpui a, dan ka tum ngial na a keimaha ka kal a phal tlat si lo. Mahse exam room ah erawh a luh ve ka remti dawn lo va. A chhan chu inphelh neuh neuhte a ngai ve thin si a.

"Blair Wynn" tiin nurse chuan ka hming a rawn lam a. Ka thutna atang chuan dingin Woods-a chu ka en a. "Ka rei lovang" ka ti sapa.

"Ka hmanhmawh lo ania" tiin min lo chhang let a.

"Pasalte luh ve kan remti vek a nia" nurse nuin a a rawn tih chuan ka hmai a sa nghal ap ap a, ka nuih a za deuh rum rum mai.

"Ani hi chu ka thian zawk ania" tiin ka chhang let a.

Nurse chuan nui sen sen chungin thupha a chawi a, exam room lamah kan inzui lut dun nghal a.

Chutin kan rei em em hran lo. Naute lungphu kan en leh a, a hma ai khan a ringin a duhawm zawkin ka hria. Naute a tha a, kei pawhin insawiselna em em ka nei lo. Appointment neih leh hun turte kam tihfel hnuah room atang chuan ka chhuak a.

Pawnah Woods-a'n min lo nghak reng a, inzui chhuakin pawn lam kan pan duna.

"Rush-a nen in inbe tawh em?" tiim Woods-a chuan min zawta.

Chu chu ka tan chuan zawhna pawh a ni lo. Chhan chiam pawh a ngai lo bawk. Ka lu ka thing a, chu zawng chu. Sawifiah buai ka tum hran lo. Zan hnih liam ta khan ka va call a, mahse ala lo. Voice mail ka hnutchhiah a, chu pawh tun thlengin min la chhang lo. Hetiang hian a theih chen chen awm a, min hnar bo daih a tum zawk emaw ni? Eng chen nge a inah te hian ka la chen ve reng dawn ni?

"A la buai deuh a ni ang. A rawn biak thuai che ka ring" a han ti ve tak na bawka, a aw rik danah a thusawi chu amah pawhin a ring chiah lo a ni tih ka hre reng mai si. Ka mit ka chhing a, muthilh siai siai ma chak. A chanchin sawi ka duh rih lo. Eng thil mah sawi ka duh rih lo.

Woods-a chuan radio a on a, ngawi rengin Rosemary lam panin kan tlan a. Car a ding data. Ka han meng chu Rush-a in kawt kan lo thleng leh diam tawh a.

"Ka lawm lutuk e" tih pahin Car atang chuan ka chhuk a, Woods-a hmel erawh a serious kher mai. Thil eng emaw sawichhuah a duh si loh ngaihtuah a nei tih ka hria a, zawh kher lah ka tum bik lo. Ani pawhin hetia Rush-a in a ka chen reng hi min rinpui tawh lo niin ka hria. Rush-a call erawh la ngaichang reng ila. Ka nghak chhuak zo ta lo a nih leh a in a ka chen ve reng a rem tawh lo a ni angah ka ngai tawh mai ang.

"Mamawh i neih chuan engtik hunah pawh min rawn call dawn nia" Woods-a chuan a ti a.

Ka bu zeuh a, Car atang chuan ka chhuak nghala. Mamawh pawh nei ila ani hi chu engti kawng mahin ka tibuai tawh lovang. Rilru khingbai zetin Rush-a in lam pan chuan ka phei chhat chhat a


END OF CHAPTER -21

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 23rd, 2017, 2:27 pm

ROSEMARY BEACH

Chapter -22

> RUSH'S P.O.V <

Nan-i accident atang khan ni sarih lai a liam ta. Mahse a la harhchhuak chuang lo. Engtik lai pawhin a bulah ka awm reng a, midang an haw lai pawn khawiah mah ka kalsan ngai lo.

Grant-a ka bulah a rawn phei a, ka kiangah a rawn ding a. "Va phone ve tawh em em la" min rawn ti a. Phone tur a min tih chu tudang ni lovin Blair-i a ni tih zawh leh chuan a ngai lo. Nan-i hmel chu ka en renga, mahse ka rilruah erawh Blair-i a thi reng reng lo.

"Ka thei rih lo a ni" amah pawh en lo chuan ka chhanga.

"Heti ringawt hi chuan a tha lo a nia. Woods a'n min rawn bia a, ni thum ngawt hnaah a kal tawh lova, call a la duh bawk si lo. Bethy a zawt ta ringawt a. Bethy chuan chhuah a tum hnai ni bera a hriat thu a sawi a"

Min kal san daih chu atan chuan tih tur tha ber pawh a ni ngei ang. Engtik lai pawha venghim tura ka intiam Nan-i ngei pawh ka venhim zawh loh chuan engtin nge ani leh naute chu ka venhim zawh tehlul ang ni?

Ka duh a, khawiah mah kalbo turin ka duh lo. Chutiang bawkin kan naute pawh. Mahse engtin nge ka farnu pawh ala harhchhuah loh laia a hming ringawt pawh a huat em em chu ka lo va biak theih ang ni?

"Ka thei lo a ni"

Grant-a chu a thaw halh a. A hrethiam lo hlemai. Tumahin an hrethiam lovang. Sawi tur chuang a awm tawh lo. Ngawi rengin pindan atang chuan min chhuahsan ta ringawt a.

A hnu rei loteah kawngka a rawn inhawng leh a, Grant-a tho a ni ang chu tiin ka hawi leta, beisei loh deuhin Abe-a (Blair-i pa) a rawn lut hlawl a. Ani nena inbiak chu ka peihlo takzet.

"Eng nge hetahte i rawn tih dawn a?" ka lo ti rum hmuk a.

Min chhan pawh tum em em lo chuan a rawn phei tlanga, Grant-a thutnaah chuan a rawn thu a. Ani hi awm lo se, mahni chauhin awm ila ka duh zawk. A lak atang eng thumah ngaihthlak ka duh lova, ngawi rengin ka thu ringawt a.

"Nan-i hi ka fanu a ni lo. Chu chu i nu pawh hian a hria. Mahse Nan-i hi ka fa nih tir a tum tlat a, i nu i'n Nan-i a pai khan ka fa a ni lo tih chu ani leh kei khan kan chiang ber ang. Thla 8 zet kan inthen hnuah ni khat chu min rawn phone hlawl mai a,a rai thu leh a mangan thu min rawn hrilh a. Chutih rual chuan i pa kha a hmangaih bawk si. Chu chu kan inthen nachhan ber pawh a nia. Khatih laia milar Dean Finlay te lo el pha tur kha ka ni lo hrim hrim bawka. Mahse i nu kha ka hmangaih em a, chutia mipa dang fa a paia a mangan takah chuan kei lah tlangval rilru mawl lai lo ni bawk nen, inneih chungchang eng emaw kan ruahman dun ta ringawt a". A chawl dat a, min rawn en a. Kei erawh Nan-i pa a lo ni lo reng reng lo tih ka han hria chu ka phawk hru a.

"Tichuan i nu hmu tur chuan ka va kal a. I nu chu nang leh i pa Dean-a kalsanin a thianute inah a rawn kal a. Tunge a fa paina pa chu a nih tih engmah ka hre lo va, chumi niah chiah chuan Blair-i nu Rebecca-i hi i nu thiannu te inah chuan a rawn zin ve chiah bawk a". A mitmeng a dul ruih a, a mit a chhing vang vanga, a rawn meng leh a. Chutiang renga patling hmel hmuh hrehawm chu ka la hmu lo.

"Ani chu hmeltha tak a ni a, a nungchang a thain hmeichhe mitmu hring nalh ber a ni hial ang. Ani chuan a ngaihtuah em em che a, i nuin a kalsan si che a, nangmah chauh a rockstar bawraw ve tak bula i awm tur chu ngaingam lovin a awmpui che a, khang pancakes i tet laia i ei thinte pawh kha ama siam sak che a nia. Kei pawhin Becca-i chu ka ngaizawng em em a, ka kalsan thei bik lo". Chu thawnthu chu ka nu min hrilh dan nen a in ang lo hlemai.

"Zan khat chu i nu hi rui zetin a lo haw a, a fa paina pa chu Dean-a tho hi a nih thu a rawn sawia. Thil fello eng emaw awm tlata ka hriat avangin i pa Dean-a chu ka be ta a. Kan han inbia chu boruak a rit khawp mai. Ani chuan a fa a nih loh thu a lo sawi a, khatih chhung khan i nu leh i pa te band Slacker Demon a an zaipa ber Kiro kha an lo mudun ziah thin hi a lo ni a, Nan-i pa chu tudang ni lovin Kiro-a a ni tihna a nih chu. Kiro-a chu i tet lai khan in inah a lo kal fo thin tih i hria anga, mahse Nan-i pa a ni tih reng i hre lovang"

Kiro-a kha Nan-i pa maw lo ni a? Ka kutin ka hmai ka hup a, ka mitthlaah eng eng emaw a rawn lang nghal chuai chuai a. Zan laiah Kiro chu kan inah a lo kal a, ka nu a rawn an khum phiar phiar a, fanu ruk sak tuah a rawn puh thin a, ka lo theihngilh hman vek tawh emaw ka lo inti zawk asin.

"Becca-i nen chuan kan inngaizawng a, chutih lai chuan i pa Dean a'n a rawn la che a, a fa i ni a, tha takin a enkawl che pawh ka ring. Zan khat chu Becca-i nena kan infawp lai i nuin min rawn hmu hlauh maia, Becca-i chu anchhia a rawn hlawh ta phiar phiar mai a. Becca-i kha a tap fo thin a, a chhan chu nangmah a ngaihtuah vang em che khan a ni. I nu lah ti mai kha a ni a, i pa nise rockstar bawraw ve tak a lo ni bawk nen"

Becca-i chungchang a sawi lai chuan ka mitthlaah Blair-i, nungchang mawi leh rilru tha em em, mi pawisawi hlau tak mai chu a rawn lang chuai chuai a.

"Becca-i nen chuan kan innei a, honeymoon kan hman kar khat naah phir a pai thu kan hre ta a. Ka fanu pahnihte chu ka tan ka khawvel thar an ni a, an rahna lei chu ka tan malsawmna a ni thin. An lawmna tur erawh ka thlen sak ve thei ta si lo" tih pahin a rawn tap chhuak hawka.

"Nikhat chu Blair-i phir pui Valerie nen a pheikhawk tur leia kan chhuak kan haw lam chu kan hlim dun hle a, boy band ho hla kan play a, kan zai dun vak vaka. Chutah chuan tihsual ka nei ta a. Red light rawn eng chu ka lo hmuh hmaih peka. Tichuan truck lian zet, tlan chak tak hian Valerie thutna lam side atang chuan min rawn su ta pawp mai a". A kutin a hmai a hup a, a mittui a hruk hul rual chuan a rawn tap chhuak leh hawka.

"Ka fanu duhlai chu ka chan ta a ni. Ka fiamkhur loh lutuk avangin. Ka nupuiin ka hmelah min en thei tawh lova, ka fanu neih chhun pawh dan beh ang tlat a ni ta. Chutih lai chuan nang nen kan intawng hlawl a, Nanette-i thlalak min rawn hmuh a nih kha. Nan-i chan chhiat zia ka hria a, chitih rualin ka nupui te bula ka kir chuan an rilru tina zualtu, a fanu thah saktu ka ni ta mai bawk si. Chuvang chuan ka kalsan ta a ni. Kha thil avang khan ka inngaidam leh thei tawh ngai lovang. Mipa chak lo tak ka ni a, ka in haw em em reng ta a nih hi.
Becca-i a damlo tih ka hriat phei kha chu zu ah nasa takin ka tlan phah a, ka nupui leh ka hmangaih em emin a khawvel min chhuahsan lai takngial pawh khan ka hmachhawn ngam ta si lo. Eng ang mipa nge maw ka nih a, mahni fanu ten a nu a sun lai mek pawha hnem thei lo ka nih tak mai le..? Ka inngaidam thei mawlh lo a ni". Min rawn en a.

"I mi hmuh dan chu mipa hmasial tak, mahni tanghma chiah hai a nih ka ring. I ti dik e. Tumah hmangaihna leh ngaihdamna hi ka phu lo reng a ni. He thil hi thla 3 kalta khan Nan-i pawh ka hrilh tawh a, ani pawhin a hre tawh e. Tunah hi chuan thlamuang taka ka nupui thlan a va kal a, thupha va chawi hi ka tih tur a ni tawh. Blair-i tan a pa ni tlak ka ni lo. Amaherawh chu nang hian i hmangaih takzet a ni tih ka hmu thei a,ani hi ka tan chuan ka Becca-i a ni a, tu tan mah ka phal lo. Mipa chak leh a tana engkim tawn ngam tan chauh lo chuan. Tunah hian atan chuan nang hi ka thlang che a, a bula kal tur chein ka duh che a ni" tih pahin a ding chhuaka. Tawng ngaihna reng ka hre lo.

"Kei ang kha chu ni ve suh ang che. A beiseina tih hlawhchham sak ngai suh ang che. Kei anga mipa nep tak kha rawn ni ve suh ang che" tiin Abe-a chu a ding chhuak a, engmah sawi tawh lovin pindan atang chuan min chhuah san a.



★★★ ★★★ ★★★

Inchhung ka han lut chu a lo reh thiap a, Blair-i a la awm nge awm lo tih pawh ka chiang lo. Ka hmuh leh anih ngai chuan ka pawm anga, ka fawp ang a, ka hmangaih thu ka hrilh ang. Engkim a danglam tawh thu leh a nu pawh kha ka hriat thu ka hrilh anga, a nu min siam sak pancakes ka ei thin thu pawh la hrilh ang. A tana mipa tha ber ka nih tur thu leh khawvel a pa tha ber ka nih tur thu pawh ka hrilh ang.


Pindan lam ka pana, khawngaihin Lalpa, lo la chhuah tir lo hram teh ka rilruin ka ti mawlh mawlh a. Khum a lo reh thiap a, Blair-i thil reng reng a awm tawh lo. A ni thei lo, min kalsan thei lovang. Min kalsan erawh ka la ring phal chuang lo. A bulah thingthiin a hlimthla chauh tal pawh hmu ila, ngaihdam ka dil mai tur.

"Rush...?" Chu boruak reh thiap hnuaiah chuan ama aw ngei a ni ka hriat ni. Rang takin ka hawi leta, sofa ah thuin ka lam a lo hawi a. A sam chu a hnawk niah a, a mut kham lo hmel erawh a duhawm phian lawi si.


"I la awm a ni maw" tih pahin ka pan phei a, a bulah chuan thingthiin a mal chungah ka lu ka nghat ringawta.

Dimtein ka samah a rawn chul a, "Aw, ka la awm e" tiin min lo chhang sapa.

"Ka hmangaih che" engtin vaka han awm ka tum chuang lo. Chu thu chu sawi lo thei lo ka nih tawh zawk vang a ni.

Tawitein a rawn nui a. "Ka hria alawm. Chuan engkimah hian ka hrethiam vek che ania. I hlim hi ka duh a, chu chu i phu reng vang zawk a ni. Hmeichhe chak tak ka ni a, keimah pawhin ka ti thei em em ang"

A sawi awmzia chu ka hrethiam ta lo tawp mai. Eng chu maw amaha a tih theih tur chu? "Eng nge i sawi awmzia chu?"

"Vawiin chhun khan ka pa a lo kal a, engkim min rawn hrilh vek a, engkim ka hre vek tawh e. Hriatthiam har viau mahse chu chuan chakna leh ngaihtuahna thar tha tak min pe a ni"

Abe-a a lo va kal a maw? A nih chuan a nu kha a lo hriat dan ang ngei a nu tha leh fel a nih thute chu dawt thu mai mai a nih lo tih a hre leh vek tawh dawn a nih chu.

Tunah chuan dawt thu leh thuruk engmah a awm tawh lo va, ka nu pawh ka chhungkaw zing a mi a ni ta lo. Tunah chuan ka farnu rilru chhe tak pawhin min tibuai pha tawh lovang. Blair Wynn-i chu ka nupui ni mai tur leh ka khawvel bul min tan sak tu tur a ni ta.

Kan hmui leh hmui a insi chial a, ka kawr awmah nghet takin a tham a. Tun atang chuan ani chu ka khawvel thar a ni tawh anga, a tel lo chuan he khawvelah hian ka dam khawchhuak zo tawh kher lo maithei a ni.

Blair-i chuan a dul puar lang mai chu min khawih tir a, chutih lai tak chuan chhung lam atang ka fa ni mai tur chuan a rawn do pawng kal raih raih a.

"Doctor i'n min hrilh a. Mipa a ni e"

"Mipa maw..?" tiin ka zawt nawn leh a.

"Aw ni e. Mipa ngei a ni e"

Blair-i dul chu duat takin ka chul a, tun atanga rei loteah chuan pa ka lo ni ve tawh anga, fapa ka la nei dawn zui. Ka tap mai dawnin ka hria.

www.storyfb.com mizo story thar englai pawhin chhiar tur a awm reng
★ A TAWP TA ★
(ROSEMARY BEACH lo chhiar thin zawng zawngte, min chhiar chhuah sak avangin lawmthu ka sawi e)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)