※ RED & WHITE ※ BY Noah Hringngen

Ngaia
Site Admin
Posts: 25813
Joined: April 30th, 2016, 4:07 pm

Re: ※ RED & WHITE ※ BY Noah Hringngen

Unread post by Ngaia » October 30th, 2016, 12:42 pm

"I-..i tha em?"
.
A lu a lo bu vata. Hetianga thinrim deuha a awm chang hi chuan luhai a nei thin tih ka hria.
.
"Tirawh...,ka hruai haw ang che. I pem kha enkawl vat a ngai a nih kha"
.
A ni pawh chuan a lu a lo bu ve mai a,ka Car lamah ka kuah phei a.
.
Campus a tang chuan kan awmna a hlat loh a vangin kan thleng rang ngei mai. Ka room lamah kan tih fo thin dan angin ka kuah lut a, tih fo thin mah nise a tak a ang ta lo riauin ka hria.
.
Khumah chuan ka mut a, kei erawh khum tlangah thuin a darah ka vuana. Ka zuk kun hniam a,ka mitmenga thil danglam awm chu a hriatthiam ka ring. A hrethiam ziah thin kha a nia, mahse tunah rih hi chuan chutiang chu lan tir hun pawh a ni lo.
.
A kut chu rawn ti kangin ka biangah a rawn dawm a,ka tah a chhuak lek lek zawk mai.
.
"Cameron, hetah hian eng nge ka rawn tih a?" a aw chu a nemin a zawi hle a.
.
Min la haw reng a ni. Ka thil lo tih takte zawng zawng a vang khan min haw ngawih ngawih se ka duh. A duh leh elhsen thei ang ber pawhin min tawngkhum rawh se. Thiam thu sawi tur engmah ka nei lo. Kei chu sa thi tawih ang mai chauh ka ni.
.
"Cameron"
.
A mitah chuan ka en a,ka mita mittui tling pam mai pawh chu a hmu ngei ang. Mahse pawi tihna ka nei lo. Helai hmunah ngei hian nunhlui tam tak ngaihtuah chhuah tur ka nei a,mahse a tel lo hi chuan...., a kut nem taka min khawihna tel lo hi chuan engmah reng hi a famkim si lo.
.
Chiang takin min en vang vang a, theih nise lungchim taka fawh vawng vawng mai ka van chak tehreng em. Mahse chu chu ka tih tur a nilo. Chu chu kei aia mipa tha leh fel zawkin ti rawh se. Ka phu ve hlawl lo.
.
"Khai lehh....Cammie, ka tihpalh lutuk aw"
.
A ngawi reng a, a malpuiah a kut a nghat a,a mit erawh a la sawn lo.
.
"Engah chuan maw...?" a aw chu a dam diai a,mahse rilru erawh a tawk zar thung si.
.
Ka kut ka hum ruh a,keimah leh keimah chu ka inhua a ni.
.
"Engkimah khan..." ka zuk kun hniam a,a hmuiah chuan ka fawp nghala.
.
A tukhumah dawmin a sam chu ka tham a,a lehpek awm leh tawh chuang lo tur ang maiin ka fawp a.
.
Kan inthen hnu khan hmeichhe hrang hrang ka mutpui a, amah ka theihnghilh phahna tur a ni dah lawng maw tiin. Mahse thil pakhat bak mamawh ka nei si lo.
.
"Cammie.." ka rum hak a. Ka tung tho a, chuveleh a bawpin ka kawngah min rawn kherh a,a nghawngah min rawn kuah nghal a.
.
"Ka ngai lutuk che Cammie" chutianga min kuah leh ringawt pawh chu ka tah pui lo chauh a ni.
.
Bangah ka nawr bet a,a nghawng,a dar,a hmui....ka fawp nghal mawlh mawlh a. A banrekah manin chunglamah ka phar chhoh tira,a khawilai mai pawh chu ka fawp mawlh mawlh a.
.
Ka nunna boruak a ni a,ka chaw tui ber leh ka lungngawina awm chhun a ni.
.
"Cameron" a rawn thaw hak a. "Min fawp rawh"
.
A nghawngah ka fawp thla a,a dar ka seh ner ner lai chuan a rawn tap chhuak hak a.
.
"Cameron" a thaw haka,ka biangah a rawn dawm a. "Cameron"
.
Mahse hmanhmawh lutuk zawng a chi lovang. Helaiah ka hruai a ni a, nakin lawkah min huatna a zual mai mai zawk palh ang.
.
"Cammie, hmanhmawh lovin. Bawihte....tunah hian-" a biangah dawmin a chal chu ka chal chuan ka zuk nawr si rat a,kan thaw dun halh halh a.
.
Engmah sawi lovin kan ngawi dun vang vanga,tunah chuan kan thawk pawh a pangai leh tan e.
.
"Ka......kal tawh mai ang e" a aw chu a khur deuh dar dara,mahse a che sawn chuang lo.
.
Ka thinlung chuan sawi duh tam tak nei mahse ka ka in a sawi chhuak thei si lo. Tunah tak hian ka thinlung a kehsawm mek a ni. A mit a tang chuan ka awm ang chiahin a ni pawh a awm ve tih ka hria.
.
A rawn thaw chhuak halh a. "In ah min va thlah thei a ngem? Victoria i'n min lo ngaihtuah tawh lutuk palh ang"
.
Ka hrawk kan thian kharh a. "Caleb-a ka text tawh a,i thiannu chu a ngaihtuah awm loh"
.
Nidang kha chuan a duh a hmuh lawk loh chuan min nawr tet tet thin kha a ni a, tunah erawh chutiang tih chu a tan lah thil ngamawm a ni tawh bik si lo.
.
A rawn ngik feih feihah chuan ka harh chhuak zawk a.
.
"Cammie?"
.
"Eng ngati nge a chhan chiang taka min hrilh mai loh? Engvanga khatianga atthlak taka min kalsan nge i nih? Nang hian min bum a ni Zawng-a" ka awmah min rawn nam dawrh a,mahse ka lo inrin lawk sa a vangin ka che sawn eih lo.
.
A hmela rilru na hmel lang ka hmuh chuan keimah leh keimah ka inhuatna a ti zual sauh a
.
"Ka bum lo che. Chutiang zawng chuan min ngai tawh suh. Chutiang thil engmah tih ka nei lo. Kan inthen mai zawk a ni". A darah ka va vuan a,ka tangnem a pawm beh thlawp mai ka duh.
.
"Carla-i nen a kan infawp min hmuh hma karah pawh chawlh rih phawt kan mamawh thu ka hrilh che kha"
.
"Carla-i a ni reng reng lo misualpa. Sabrina-i a nih kha i fawh"
.
"Tunge Sabrina-i chu? Chu hming chu eng a tan mah ka ti lo a,ka tan engmah a ni hek lo"
.
"Ka tan chuan a nia lawm" a rawn ti a. "Ka thinlung i ti kehsawm a ni"
.
"Ohh....bawihte" ka aw ah chuan ka rilru natzia a hre thei ang. A banah vuanin chhuatah ka thingthi a, ka mittui chu ka biangah a rawn luang a.
.
"Engtikah mah...." sawifiah ka tuma,mahse ka sawi thei lo. Engtia sawi tur nge ka hre lo. Ka hrawkah chuan hnawh tu a awm tlat.
.
Dik tak chuan min kalsan rawh se. Ka phu lo a ni. Heti khawp a a rilru hliam sak tu mipa hian ka phu hlawl lo. Kei chuan a rilru ka hliam belh leh mai mai zawk ang.
.
.
END OF CHAPTER -11



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:43 pm

※ RED & WHITE ※ . Chapter -12


Postby Noah Hringngen » Mon Sep 19, 2016 10:51 pm
.
CAMERON'S P.O.V
www.storyfb.com
Cammie hma zawnah tak chuan ka thingthi a,mipa mah ni ila ka mittui ka dang zo tawh lo. Inchhirna leh mahni inhuatna in ka khat a ,khawvelah hian kei aia laktlak loh hi an awm leh tawh chuang lovang.
.
A ni pawh chu ka hma zawnah chuan rawn thingthiin ka nghawngah min rawn kuah a,a khabe ka lu ah a rawn nghat a."Shh.....Cameron, engkim a tha leh vek dawn a lawm"
.
Ka dar a khur dar dar a, ri chhuak si lo chuan ka tap zawih zawih a. Ka mittui chu ka hmaiah luangin Cammie nghawngah a luang thla a. Ni lo, engkim hi a tha tawh lo vel vek zawk a ni.
.
> PAST <
.
Ka hming pum chu Cameron Michael St. Laurent a ni a, kan ram a Law firm lian ber National Managing Partner a an CEO, Cameron Gabriel St. Laurent Jr-a fapa ka ni.
.
Chhungkaw harsa lo tak a piang leh seilian ka ni.
.
Tu pawh mai hian min tlawn huam huam vek a, campus chhungah nana phei hi chuan a nuam thei ang ber a chet ka duh. Zirtirtu zawng zawng ka tham theih vekte an nih a vangin ka tan lehkhazir hah vak a ngai lo bawk a. Cammilla Hawthorne -i ka nuna a rawn luh ve hma kha chuan chutiang chuan ka then vel mai mai hi a ni ber. He nu ang hian tuman min la ti danglam ngai lo. A ni hi chuan hlauhthawnna min pe thei tlat nia.
.
Rei loteah a hming ka hre vat a,a chanchin hriat pawh ka tan thil harsa tehchiam a ni lo. Hmeichhe thian duh duha tirh phar turte chu ka ngah a lawm.
.
A class neih dan zawng zawng bakah tunge a thiante? Cafeteria ah khawilaiah nge a thut thin? A grades leh a san zawng,a rih zawng nen lamin.
.
An classroom kawtah ka lo ding a, room a tanga a rawn chhuak min han hmu chiah mai chu Sangha mit tia lawih hian a rawn meng zau kawk a.
.
"Ka call i pick up leh mang si lo va bawih-i" a chhip a tanga a ke ler thleng chuan ka en chhuak dap a.
.
Hlauhthawn hmel zet hian a chil a lem ri khalh a.
.
"Ka rawn phone hunah che i lo la dawn nia ka ti che sia"
.
Chuveleh a mitmeng leh a hmel zawng zawng chu thinrimna in a rawn khata.
.
"Eng nge maw ni a i inhriat le?" a hmel chu chem chu keng se min zai duh mai ang tih hmel hi a pu a.
.
Ka phur ru nghal at a,.chutih rualin ka zam ve lek lek mai. Chutianga min ti ngam chu ka vawikhat tawnna a ni bawk.
.
"Nangni ang mimawl hian hetiang ang hian hmeichhia fiamin in nawm in makah in hmang fo thin tihna a ni maw?" tihpahin ka awmah min rawn chum dawp a
.
A kut chu ka lo man saka,a la let duh thak lo lehnghal.
.
"Tu chu maw mimawl ti a i koh a?" a mitah tak chuan ka en a, he nute hi a nghal reuh phian mai.
.
"Tunge mimawl ti a ka koh i hre duh a maw? Zawhna tha tak a ni. Tunge i hming tlangval?"
.
A van tha tak.
Ka ngaina tan riau
Ni lo...,ka ngaina der tawh zawk mawle.
.
Mize in ang lo lutuk kan nih laiin amah ngainat dan min zirtir tel tlat si. Nitin kan inhmu a, kan inhnial fo takah chuan zawi zawiin kan inngaina chho a, ka ngai a, hmangaihna ah ka lo tlu lut thuk ta hlemai.
.
Mahse ka pa in man a tawk ta hlauh mai a, chu chuan engkim a ti buai zo ta a ni.
.
A clients te a tang maktaduaih chuang a ru tih hriat a ni a, chu chu ramchhung chanchinthar lar ber a rawn ni ta.
.
Engkim mai chu a buai chuar ta vel vek mai. Ka thian ten min kalsan a,tu pawh mai chuan ka pa chu an hua a, ka nu in a tang a chhuah phah a,chu buaina chuan beiseibo na bak engmah thlen a nei lo. Kan in kan hralh a,engkim chu ba rulhna a tan kan inhralh kawt ta vek a.
.
Kan campus a tanga hla lo teah apartment pakhat a awm a, chu lai chu ka nu nen chuan kan luah ve ta rawih a.
.
A hma a tlangval duh duh dana khawsa thei,duh duh nei thei ni thin kha tunah chuan engmah neih reng ka nei ta lo. Mahse Cammie ka la nei a lawm.
.
A ni chu ka chakna lungpui nghet a ni a, kan anniversary ka lo theihnghilh palh ta a nih pawhin a ni chuan min hrethiam em em ang. Mahse chumi a vang chuan theihnghilh ka duh e ka tihna erawh a ni lo.
.
Ka pa chu dan bawhchhe tu leh rukruk hmang angin ram pumah a chanchin a thang a, kan inthen tih pawh an vai chuan hre kher lo mahse a tam zawk chuan an hre fur a. Dik tak chuan keimah leh keimah chu ka inzahpui a ni.
.
Ka pa ka hua a,kan chhungkua ka hua a,keimah leh keimah ka inhaw bawk. Cammie chuan reiloteah eng ka nih tawh loh zia a hrechhuak ang a, min la kalsan dawn tho tho.
.
Ka hmangaih takzet kei chuan. Mahse min kalsan tur erawh ka hmu ngam lovang. Ka pa kha kawng engkimah ka ring em em reng a,mahse ka laka a thu lo tiam ve tawh zawng zawngte a bawhchhiat ni khan ka rilru a hiam takzet a, chutiang chu tawn nawn leh ka inzuam tawh thlawt lo a ni.
.
Chuvang chuan keimah zawkin Cammie chu ka kalsan ta ani. A call leh text engmah ka chhang duh tawh lova, school ah lah a hmuh turin ka awm duh hek lo.
.
Cafeteria a Caleb-a nena kan thut dun laiin Cammie leh a thiante chu an rawn lut a,min rawn hmuh veleh min rawn pana,ka bulah a rawn thu ve nghal a. Chu chu thil thar a ni lo. Hmeichhe dang kawp ang a lan pawh ka tum fo thin. Mahse chu erawh tih har ka ti a,mahni inhuatna in ka khat thin. Mahse keimah leh keimah ka inthunun lui a, a tawp a tawpah chuan ka hlawhtling ta ngei reng a.
.
Min star thin tih ka hriat em em hmeichhe pakhat chu Cammie-i hmuh lai ngei chuan ka fawp a,khami tuma a rilru na leh a hrilhhai hmel mawlh mai kha.
.
Cammie chuan min rawn kuai a,ka hnar rukah tak mai min rawn hnek chawk a, a thi nghal zawih zawih a. Hmeichhe ho chu an rak tuar a, ka beng a kiu nghal vawng vawnga,ka hmuh chu ka hma a mittui tla zawih zawiha ding Cammie chu a ni.
.
"Kan inkar thu a tawp tawh" a rawn ti that a.
.
Ka hmangaih ber chu a rilru ka hliam a ni. A rilru ka ti na a ni. Ka taksa...ka rilru leh ka thinlung thleng a kawltu a ni a sin.
.
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:50 pm

※ RED & WHITE ※ . Chapter -13


Postby Noah Hringngen » Sat Sep 24, 2016 10:25 pm
.
VERONICA'S P.O.V
.
Cammie duh ang ngeiin thenawmte party siamna lamah chuan zan hun kan va hmang a, mahse duh aiin kan va che na ta mah mah. Zu lah in chin tawk a hre si lo, vawi engzat nge a luah tih pawh ka hre seng tawh lo.
.
Cammie phone rawn ri nghawr dar dar chuan min ti harh a, kan hawi chu ni a lo chhuak ut tawh chu niin. Cammie chuan thinrim hmel zet hian phone chu a ban a, a awmdanah a pentawng nasa tih a hriat reng mai si.
.
"Hello.....tungee? .....Ka ni lo, engtin nge ka number i neihh?.......Eng a?..E, lo vuan lawk rawh aw" phone chu la thla in min rawn en a. "Caleb-a...."
.
"Maw...?" rang takin ka tho a,a phone chu ka va chhuhsak nghal a. "Hello...?"
.
Cammie chuan min lo en kar a.
.
"Hey Red..." a aw chu zingkar sava hram ri ang mai a mawi a ni. Ka mitthla ah a mit hring nalh deuh de vet vet turte, ka hming a lam zawng a a nui sak hmel turte chu a rawn lang nghal a. A sam chu a inbualna a vangin a la hnawng deuh chap ang a,a tukhum lamah a khuih pial ngei bawk ang a.
.
"Hey...Caleb" ka nui a.
.
"Thlah i ngai a ngem?"
.
"Eng aa....?" ka au deuh hluaia
.
"Nizanah vawiin chawhnu a exam i neih tur thu i sawi kha". Khai...chutiangte ka sawi em ni? Ka rui lutuk a,kan inbia tih pawh ka hre reng reng hleinem.
.
Ka rum nghat a. "Khai lehh.....kan lo theihnghilh pek chu a"
.
"Tah khan lo awm la, ka rawn thleng vat ang. Kan inhmu vat dawn nia Red"
.
"Caleb-"
.
Engmah ka sawi belh hma chuan phone chu a dah daih a.
.
"A rawn lam dawn che em ni?" Cammie chuan a lo ti a.
.
Lukham chu bawhthlawpin ka hmai hup nan ka hmang a. "Aww....". Chutiang a awm mai mai hman pawh ka ni tawh lo.
.
Rang takin ka inperh tho vat a, almira a thawmhnaw lian ber chu ka inbual hmain kan lachhuak hmasa te te a. Cammie i'n toothbrush spare a lo nei bawk si lo,ka kut hmangin ka ha te chu ka nawt nawk nawk a. Ka thawmhnaw hak lah chu an nalh lem lo khawp mai lehnghal.
.
Chutih lai chuan pawnlam a tang kawngka an rawn kik a,ka phu nasa lutuk.
.
"Red...., hei i thawmhnaw tur bakah i toothbrush tur leh i breakfast tur ka lo ken che a, green tea pawh ka rawn keng tel"
.
Khai lehh.....he pa hian eng nge ti a a inhriat thin le....tunah chawhnu pawh a la ni lo a,a ni erawh a inpeih leh at tawh mai si a.
.
"Red...?"
.
Ka hrawk kan thian a. "Aw le..,i fel lutuk e. Kawngka pawnlam sirah khan lo dah mai ta che. Ka lawm lutuk"
.
"Eng tik hunah pawhh"....Caleb-a chu ka van hmu chak tehreng em. Ka ngai a ni,ka ngai takzet. Tunah chuan a kal tawh ang. Towel chuan ka intuam a, kawngkhar chu hawngin ka chhuak a.
.
A kal tawh emaw tih nak laiin kawngka bulah chuan a lo la ding renga. Ka taksa chu a rawn en a, ka hmel a rawn en chho a.
.
"Ui leh Caleb. A sirah lo dah mai rawh ka tih che kha"
.
"Aw, hei ka dah a lawm"
.
"A nihte chuan pawn a min nghah thu talte rawn sawi ve ta che"
.
Mipa naupang chhang lak ruk hrat deuh hmel hi a pu a. Kawr vutbuak rawng a ha a, jeans a ha a, lukhum dum pawl a khum bawk a. A mah ka hmuh rual rual chuan ka thinphu a inrawn nghal dup dup a.
.
Chutah a rawn la nui zui. Ka lung hi ka pumpuiah a tla ta em ni....?
.
"I lang sexy hlemai Red"
.
Min rawn pan hnai a,thawk pawh ka thaw ngam tawh lo. Ka bul chetah a rawn ding a,a pangtilum sa ham ham pawh ka hre thei. Ka towel ven chu ka vuan nghet sauh a.
.
A hnar hmawr chuan ka beng a rawn si a, boruak an hip lut vang vang a.
.
"I rimtui lutuk"...a aw chu a pangai aiin a vawt a. "Choka ah Cammie ka va pui ve ang nge. Kan inhmu leh vat dawn nia Red"
.
.
*** ***
.
CAMMIE'S P.O.V
.
"Hey Cammie, i dam maw?"
.
Ka coffee chhuan khu hlat hlat kar a tang chuan ka lampana rawn phei Caleb-a lam chu ka va hawi a. Veronica-i hi hmeichhe mawl tak a lo nih hi. Engtin nge hetiang mipa te a ngaihzawn loh theih zawk ni?
.
"Aw dam e, nang zawk?" tihpahin ka lo nuih a, coffee chu thlit sakin ka pe nghal a.
.
"Nizan chu kan in ah Cameron-a a lo kal a"
.
Ka nui hmel chu a bo nghal hmak a. "Nia..., ka hria a lawm. Ver i'n min hrilh a"
.
"A that loh hmel khawp mai. Engmah a sawipui theih bawk si loh. Nangmah chauh hi amah be thei tu tur chu i ni in ka hria"
.
Ka chil ka lem ri khawlh a. "Ni tawh lo ve. Tunah chuan ka pan lam lam ka pan ve tawh ang"
.
"A la hmangaih reng che a lawm"
.
"Chutiangin awmzia a nei tawh lo. Chu thu chu a man a hrilh che em ni?"
.
"Aih, mahse nimin a ka hmuh dan a tang kha chuan, a awmdan hi a pangai tawh lo takzet ani"
.
Ka nui hak a "A tha a nih chu". Ka coffee no chu ka dawm a, a la sat a vangin kutphah a thak nghal neuh neuh a. "Caleb, tunah chuan rilru thar ka put a hun ve tawh. Hetiang anga kumkhua a nghah ngai mihringte chu tunge maw nghak reng thei ang ni"
.
"Tunah hian a bula awm tur tu emaw a mamawh a ni. Kei chu ka ni lo" a thaw haka. "Nangmah chauh hi a duh awm chhun chu i ni Cammie"
.
Ka lu ka lo thing vat a. "Enteh Caleb-"
.
"Cammie, a awmdan hi a tha lo takzet"
.
Ka maimitchhinga,ka mittui chu ka biangah a rawn luang thla riai riai a.
.
"Hetiang a a mamawh lai che hian kalsan lul suh"
.
Vawi engzat chiah nge rilru na a min siam dawn? Vawi engzat chiah nge ka mittui hi a tih tlak dawn le? Mahse Cameron-a a ni miau si a.
.
"Cammie?"
.
Ka darah chuan Ver-i'n min rawn vuana, ka lung a chhe zual sauh a. Cameron a'n vawi tam min tah tir lai pawha min dawm a,min kuahtu awm chhun a ni"
.
.
CALEB'S P.O.V
.
"I thingpui kha i in dawn lovem ni?" ka ti a. Red-i chu school lampan in ka hruai mek a.
.
Kan awmdan chu a nuam veng veng hian ka hria. Nupa, thil tih tur duan lawk thlap nei a ti thlap thlap thin ang mai kan ni. Ka thiante kan ngaihtuah kual a,keimah ang tho...,tuman ngaihzawng nghet nei an la awm lova, nih pawh an nih rei pui ngai lo. Red-i erawh hi chu ka ta ni tlata hriatna ka nei tlat thung.
.
Ka thil tihdan zawng zawng leh ka awmdan zawng zawngte hi hrethiam tak chunga min pawm thiam ka beisei a,a chhan chu keimah ka ni miau si a.
.
Mahse ka hmangaih tak tak em? Chu erawh ka hre bik lo. Sawi mai nan chuan a la hma mah mah te pawh a ni maithei. A kut no chek mai chu ka zuk en a, vawn a hmer vawng vawng ka chak. Mahse motor ka khalh mek a,a ni lahin a thingpui no chu a kut pahnihin a dawm bawk si.
.
"Red...?" a lam chu ka hawi leh a,a ni erawh tukverhah a dak vauh vauh a. Ka aw a hriat chuan ka lam hawiin a rawn inher a. "Thingpui kha i in dawn lo a mi?"
.
Mi pawh en lo chuan a bu nghat ringawt a. A thingpui no chu laksakin ka dah that sak a, mak tih hmel deuh hian min lo en haw a. A kut no chek mai chu zuk vuanin ka hmer vang vang a,a lam hawi chuan ka nui sak a.
.
Kha zawng kha a ni mai.
.
Caleb-a khawvelah hi chuan engmah theihloh a awm tur a ni lo. Lungawi hmel takin ka nui ver ver a.
.
School ah ka drop a, an class lam ka pan pui laite chuan mi ho chuan min en zui vawng vawng tih ka hria. Campus chhungah nanana hi chuan kan chhe lar ve a,ka tan chuan engmah pawina a awm lo. Mahse Red-i hian ka palzam ang mai mai hian a palzam ve thei lovang tih erawh ka hlau ru hle.
.
"In exam zawhah canteen ah ka lo nghak ang che aw?" kan ti thla ringawt a. "Umm....,i duh zawk a nih leh hmun dangah thil eitur in kan chhuak lawk ang a, hna a i kal leh hma"
.
"Caleb?"
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:51 pm

"Aw...?"
.
"Ka lawm takzet i mi puihna ah-"
.
"Engtik hunah pawh nise mamawhna min neih phawt chuan ka awm reng a nia Red"
.
An exam chhung chu darkar 2 vel a nih tur thu min hrilh a,chuti a nih chuan keipawh multipurpose room lamah pool te lo va khelh mai mai ka rilruk a. Ka kal tur chiah chu ka hnunglam a tang hian tu emaw hian min rawn ko a,a mah chu Bea-Rose Townsende a ni a,sam buang,mitmu pawl a ni.
.
"Hey Caleb" a rawn tlan phei a,min rawn kuah a.
.
"Hey Bae, i dam maw? I va chhe lo ve" ka lo nuih let a.
.
Min kuahna chu la thlain ka ban puamah a rawn vuan a, a hmer ti tiha. Mipa banpuam lian deuh hi a lawm tih pawh ka hria.
.
"Oh Caleb, ka thinlung luah reng tu. Nang a lawm le chhelo le"
.
Kan inhmu leh thei chu ka lawm kher mai. Tette a tanga inkawm kan ni a, kum hmasa vel a tang khan thian ringawt ang chuan kan in en ta lo deuh. A zirna a vangin Paris lamah a awm a,a kal hma a a thu min chah kha hriatchhuah hram ka tum a.
.
"Paris ah chuan i kawppui tur tha tak i han tawng lo maw...?"
.
Chu zawhna chu a beisei vak lo a ni maithei,a mitmeng chu a danglam deuh tep a,mahse rei erawh a ni lo.
.
"Ohh Caleb, i van ngaihawm tak em. Tinge zaninte chu kan chhuah dun lovang? Zanriah kil dun ila"
.
Lungawi hmel zan loh hmel ka pu tih ka hria. Chu chu ka awmdan dik tak pawh a ni reng a.
.
Engtin nge heng thilte hi ka sawifiah tak ang? Thian kan ni a,thil tam tak kan lo ti dun tawh. Mahse thutiam erawh kan nei lo. Kan innel em em a, bialnu tih theih khawpin kan innel a,mahse inngaizawng erawh kan ni lo. Red-i ka tawn hnu a tang phei hi chuan tumah hi duh dang ka nei thei tawh rih lo a ni.
.
A hma pawhin vawi tam tak chhuah puiah min sawm fo a, ka chhanna chu 'Aw' tih a ni ziah. Date lai ka nei reng chung pawhin. Mahse ka insiam rem a, inthiantha tak nih reng ka duh vang zawkin keipawhin chhan let dan ka thiam ve ta.
.
.
"Ngaihzawng ka nei a"
.
Ka ban a vawnna chu a la thla a.
.
"A nih chu mawle Caleb. I sawi awmzia chu date lai mek i nei tihna a ni maw? A pawi hleinem. Kar leh lawkah i then leh dawn tho a"
.
Ka lu ka lo thing a. "Aih, chutiang a ni lo. Tun a mi hi chu a danglam a ni"
.
Mak tih hmel deuh hian nui hmel pu hauh si lovin a mithmul a kan ak a. Min rap lek lek hial zawk.
.
"Ekhai....ngawiteh,thawk kan la lawk" a awm a dawm a,thawk halh pahin a rawn nui a. "Caleb lehh...chu thu chuan min va ti lawm ve. Chanchinthar pui tak a nih chu"
.
Bea-i hi zawng mi hausa fanu dang ang a ni ve lo. A zau a, a dawhtheiin mi a dawm thiam em em a, chu chu a ni ka ngainat em em nachhan.
.
"A tawp a tawpah chuan i hmu ve ta chu a nia. Nang hrawn che chu hrehawm a ti ve viau ang a" tihpahin a rawn nui a.
.
"Ohh....min ring ve lutuk a sin. A ni hi chu a danglam ka tih kha"
.
A ngawi vang vanga,min en reng a. "A nih chu....ka hrethiam e. A nih chuan ka la hmuh ve ngei erawh a ngai ang"
.
"Tehreng mai....ka la inhmelhriat tir dawn che u nia".
.
Kan inchibai a, nidanga coffee in dun turin kan inthlah a.
.
.
Ka sana ka en a, a rawn chhuah nan minutes 20 chu la awm mahse canteen lamah ka phei a. A mah chauhin riang takin a lo thu ang tih ka hlau a ni. A duh ber chi green tea leh cinnamon chhang ka lei sak a,mahse min lo thlen khalh dim diam tawh. A sir kilah chuan a mah te in a lo thu a.
.
"Hey, Red. Ka tihpalh lutuk aw,ka rawn tlai a-" ka sana chu kan en zuai a. "Minutes 10 lai a la awm sia. Min lo nghak rei tawh em?'
.
A lu a lo thing a "Ka thleng deuh chiah"
.
"Eng nge in exam chu?"
.
A lo nui suk a,a hmel hlim hmel tak a tang chuan a ti tha turah ka ngai. A ep chiahah chuan ka thu a,kan ke leh ke chu a insi lek lek a.
.
"Hei, eitur ka lo ken che a" tihpahin ka tray ken chu dawhkanah chuan ka daha.
.
Min endik dawn emaw tih mai tur hian chiang kelh kawlhin min rawn en a, he nu hi chuan ka thinlung hi a van hmer na thin tehreng em. Amah leh amah a inven dan em emah hian tu emawni in a thinlung an lo hliam hrep tawh a nih ka ring.
.
"Eng nga ti nge hetiang thil hi i tih a? Engvanga min ngaihtuah em em nge maw i nih le?"
.
A tawng dan engkimah chuan a mahah mal ngawih ngawihna leh khawhar rukna a awm tih ka hria. Red, i tan hetah ka awm a sin.
.
"Hethil ka sawi zawh hi chuan min rin leh theih tawh pawh ka ring lo". A kun hnap a,a thingpui chu a melh a, mi pawh a rawn en ngam lo. "Cammie leh Cameron-a te inkarah hian eng emaw kan tih ve a ngaiin ka hria"
.
Ka lu ka lo bu a. "A tha a lawm. Tun nipui te hi eng nge ang ang? Semester a zo tep tawh tho a, ka nu in tuipuikamah in a nei a,chulai hmunah chuan kan kal dawn em ni ang? Kan rualin kan hruai tel ve ang a"
.
"Chu chu a tha khawp ang" tihpahin a lu a lo bu a. Min rawn en a,sawi tur nei hmel hi a rawn pu zawk a,mahse a ngawi leh ta zawk a.
.
"Pancakes...? "
.
A lu a thing nghal vata "Hna ah ka kal a ngai a,ka hman rih lovang Caleb"
.
"Ka thlah dawn che a lawm"
.
"Aih..."
.
"Chutin ti zel suh"
.
"Aih.."
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:51 pm

He nu hi zawng a hahthlak thin. Hritthiam hi a har thin e. A kut chu ka vuan a,a kutzungpui chu ka hmuam thut a. A rawn meng zau kawk a,mahse a kut erawh a la sawn chuang lo. A kutzungpui hmawr a cream kai chu ka fawh fai saka.
.
"Caleb..!" A thaw ham ham a. "Eng nge maw i tih le?"
.
Ni e...eng nge maw ka tih tak mai le? Ka kut chu ka lasawn vat a. "Ka tihpalh lutuk Red. Eng lo...ka-" chakna a lo chhuak hman a ni.
.
Mipa i nih chuan sawi tawp rawh. I rin ang aiin a awlsam ang.
.
"Ka mamawh che a ni". A rawn meng zau nghal kawk a.
.
Ni lo...,i hrethiam lo ani. Kal sawn lo hram teh. Ka thin a phu dup dup a,ka chalah thlan fim a rawn bawl nghal tuam tuam a.
.
Ka hma zawnah chuan thuin Sazuk tla lai va nan thut ang mai,min melh char char ringawt a.
.
"Ka mamawh tak meuh meuh che a ni. Thil dang reng hi ka ngaihtuah hleithei tawh lo. Ka a zo tawh te pawh a ni mahna"
.
Ka thutna chu nawr hnungin ka tho chhuak a, a biangah ka va dawm chawt a. Chaw chhun ei hunlai a nih a vangin mi dang an awm treuh a,min en thup a ni tih pawh ka hria. Mahse pawi tihna ka nei lo.
.
"An ni saw chu ngaihtuah suh. Nang leh kei hi kan pawimawh ber Red"
.
"Caleb, canteen ah kan awm-"
.
A tawng chhunzawm tawh loh nan a hmui chu ka kutin ka hup vat a.
.
"Pawi ka ti lo. Min han en teh". A thaw kawk kawk a, intlansiakna a tel ang maiin.
.
"Min ring em?"
.
Zawite in a lu a bu a.
.
"A tha e. A nih chuan helai hmun a tang hian chhuak ang. Hna i tan hma in hun kan la nei"
.
A banah ka chelh a, "Pancakes " ka han ti leh a,mahse engtin mah min chhang lo.
.
"Pancakes " ka ti nawn leh a.
.
A mitmeng ngaihno bei tak leh mawi em em mai chuan min rawn melh chho a. "Pancakes" a rawn ti ve a.
.
.
.
VERONICA'S P.O.V
.
Caleb-a chuan vaukam lamah bawk min kal pui leh a,helai hmun hian a lung a len ber a ni ngei ang. A pawi lo ve, keipawn vaukamte chu ka ngaina a lawm,amah a tel ve lek phei chuan.
.
A hma ang bawkin ka kutah min kai leh a, mi erawh an tam lutuk lo. Tuifawn rim chu boruakah chuan ka hre thei a, Caleb-a min vawnna kut nen phei chuan Universe dang daia awm ni mai hian ka inhria.
.
Tiau vutah chuan puan a phah a,saisir zawngin kan mu dun a. Min rawn kuah a,a lam hawi zawnga mu turin min rawn kuai her a. A mitmu hring mawi takah chuan ka en a,ka kut chu a rawn vuan bawk a. A nuam ka van ti tehreng em. Ka pa min ti hrechhuak zawk mai. Ka kut rawn za mem mem te chuan amah min ti hrechhuak a.
.
"Ka pa kha khawvela ka mipa hmangaih awm chhun a ni a,ka thinlung ti na ber tu pawh a mah a ni. A chhan chu mi danglam tak a nih a vangin.
.
Mahse a ni khan mi laktlang loh.....ni a inngaihna min pe a,engtik lai mai pawh hian hmangaihna dawn hi ka phu ve lo a ni tih min hriat chhuah tira, a chunga thil tha lo thleng engpawhah keimah vek min mawh a. Eng emaw chang hi chuan a aw kha ka la hre thei thin. Bakah a chang hi chuan a thusawi kha a dik a ni tih hriatna ka nei thin bawk."
.
Ka lu ka thing a, chung ka hriatrengna te chu thai bo vek ka duh a ni. Raidon-a chuan min rawn kuah nghet sauh a. "A pawi lo ve. A chungchang lo sawi ve vak vak tur pawh ka ni hleinem"
.
"A ti....na che em?"
.
Ka mit chu muangchangin ka dahthla a, chu zawhna chu chhan ka duh lo.
.
"Red...?"
.
Ka hawi chho a, mahse engtinmah ka chhang lo.
.
Ka rilru hrethiam tih hriat takin a lu a lo bu nghat a
.
Ka nun chu hria se ka duh a,mahse a chhelai zawng zawng nena a hriat vek chuan min thinhrik ang tih ka hlau bawk si. Mahse Caleb-a hi chu rinna riau hi ka nei a, chuvang a niang hetiang thilte hi ka sawi tak ni.
.
"Tlai khat ka school bang chu phur takin in lam panin ka tlan hawng a,a chhan pawh ka nu in movie enpui min tiam a vangin" ka ngawi deuh det a. Ka sawi zawm lehnghal vat a.
.
"Eitur eng eng emaw kan keng a, phur takin ka nu nen chuan kan chhuk a, mahse Car chhungah hian ka pa a lo awm a. Eng nge Car ah chuan a tih le..? Car kan nei der si lo va tih hi ka rilruah a rawn awm nghal a.
.
Car chhungah chuan ka pa in hmeichhe dang a lo tawmpui chu niin,an lo infawp ngawng ngawng mai a. Ka nu chu-". Ka aw chu a rawn lawi a,ka tah a chhuak takzet. Ka sawi zawm lehnghal a.
.
"Ka nu pawh chuan a hmu ve renga,mahse engthil mah a ti lo. Mahse a rilru natzia erawh a hmelah ka hmu. Hetiang hian a awmah a kut a daha" tihpahin a dah ang chiah khan ka kut chu ka awmah ka dah ve a. "A maimitchhing a,a thaw halh a, ka pa chu engtin tak va ti ang maw tiin kan thlir reng a,.....mahse engtinmah a ti lo. Chutah min rawn nuih a,kan kal vat vat loh chuan show kan nang hman loh tur thu min hrilh a"
.
Nghet takin min rawn kuah a, a tangah chuan ka tuiral thei mai dawnin ka inhria.
.
Ka tap tur a ni lo. Caleb-a chu a rimtui takzet.
.
"Ka nu chu tunah chuan a thi tawh. An fa lak ka nia. Tunge ka nu leh pa dik tak ka hre lo va,chu chu a pawimawh hek lo. Ka mamawh ber chu ka nu kha a ni. Nu tha ber chu a ni lo,mahse a theihtawp erawh a chhuah tih ka hria. Ka pa kha a kalsan ngai lo a,chu erawh ka hrethiam thei lo. Tun thlengin"
.
Ka hnungah chuan zawi te te in a lo chul a,ka thaw hak a, ka nuam huaiin ka hria.
.
"Ka hrethiam lutuk" zawite hian a lo ti sap a. "Keipawhin engvangin nge ka nu hian ka pa hi a kalsan theih loh tih hi ka hre bik hleinem" tihpahin ka darah a rawn vuana,a awm a tang chuan min pawt hla deuh a,ka mitah tak a rawn en thung a.
.
"Kan inneih hunah chuan kan inthen ve miah lovang. Ka ta i ni reng ang,ka thih ni thleng pawhin"
.
.
END OF CHAPTER -13

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:52 pm

※ RED & WHITE ※ . Chapter -14

Unread postby Noah Hringngen » Thu Sep 29, 2016 11:22 pm
.
VERONICA'S P.O.V
.
"Lawkin, engtin maw i tih a?" Cammie chu a meng zau kawk a,mak tihna in a khat a.
.
Caleba'n inneih chungchangte,fa neih chungchang leh thil eng eng emaw a sawi a tang khan kar khat a liam tawh a,mahse chung thilte chu hriat reng ka duh lo. A lo fiamthu mai mai te pawh a ni thei a. Mahse Cammie erawhin hre ve se ka tih a vangin ka hrilh ve mai zawk chauh a ni.
.
"I hriat reng kha"
.
"Chuan engtin nge i chhan? Ka luak a chhuak deuh tlata kan hriat chu le"
.
"Engmah ka sawi lo" ka lu ka lo thing a. "A reng reng thuah kan inhriatna pawh thla hnih khat bak a la ni lo va, engtin nge a sawi zawng zawngte ka awih sak vek lem ang a? "
.
A lo nui suk a. "Chungte chu tunge hria ang a? Kei pawh kan inhriat a tanga thla 6 lekah Cameron-a pawhin min hmangaih thu min hrilh tho a lawm. A lerh kawh vang mai mai a nih chu. A lo duh ve tak tak che pawh a ni thei a,mahse chutiang a nih loh chuan mipa te hi chu an hur tel tih hriat tur"
.
Ka khabe chu a tla ta emaw tih mai tur a ni. "Enga...?"
.
Ka thutna hnunga pawhdawh chu rawn hawngin compact a la chhuak a,a inhnawih mawlh mawlh a. "Cameron-a pawh khan ka lakah beisei a neih chang chuan vawi 100 chuang min hmangaih thu a sawi thin a lawm".
.
Ka lo nui hak a. "Chutiang chu ka lakah a beisei ve kher ka ring lo kei chuan"
.
Mithmul san va chungin min rawn melh a. "A van hahthlak tak. Hei hi a lawm hmeichhia kan mawl em em na chhan chu. I nihna leh i rilru no tak khan ramri pawh a kham tir hleithei tawh lo che chu a nih kha. Mi dang thurawn tha tak tak pek hi thil har a ni lo. Mahse mahni chunga a thlen ve chiah erawh chuan eng hi nge tha ber ang tih thlanthiam erawh har tak a ni. Ka ti tak tak Ver, ngaihtuah rawh. Kha pa, helai hmuna lo kal a i theihnghilh tak i exam na hmun a thlah tu che, i thawmhnaw leh i eitur rawn ken sak che a a in a a thlawn a chen tir tu che hi. Eng fako nge i chung a a tih i la beisei a? I tan a tilmu donate se i ti a mi?"
.
Ka maimitchhing a, Cammie thusawi chu ngaihtuah ka duh. Min duh ve tak tak chuan ka hria a,mahse a rilru a pe ve tak tak a ngem? Min duh tak tak a ngem?
.
"A serious tak tak lovang tih i hlau tiraw" rawn tih pahin a hmuiah chuan lipstick senno a hnawih a.
.
"I inhmeh hlemai a Cam"
.
"Ka hria a lawm Ver. Mahse min han en la, hmeichhia ve tho ka nih hi. Hmeichhe nihna ang nei, hmeichhe rilru ang tho pu ka nih hi"
.
A thutna a tang chuan thoin ka lampanin a rawn phei a,ka tukhumah tak mai chuan min rawn beng treng chhawk a.
.
"Ouchhh....!!" chu chu ka beisei loh lam daih a ni.
.
"I ngaihtuahna kha ti zau ve deuh hlek rawh mimawlnu. I nu ang mai mai kha i ni lo. A ni ai chuan huaisenna i ngah daih zawk. Dr Hrekima chu ka ni lo. Mahse thil tlanchhiat san kan duhte hi chu hnunglam a tanga na taka min rawn seh thei tute hi an ni. I tlanchhe thei mai ang,mahse a rawn um che ang a, na takin a rawn seh tho ang che"
.
Cam-i chuan a sawi dik a ni. Ka chhaw tak zet. Caleb-a zuna uai lo turin ka bei ve tang tang a,a harsa lai ber chu amah kalsan emaw hnawh kian emaw lai chu a ni. A chhan chu ka lut thuk lutuk tawh tlat. Ka hnial lo..., engthil pawh ti se ka pha hleithei tawh lo a nih hi.
.
Ka nu ang kha nih ve ka duh ngai lo. Mahse tunah zawng a mah ka ang tan ta hle mai. Ka nihna dik tak pawh ka hmachhawn ngam ta lo chu a nih hi.
.
Caleb-a hi ka duh ani. Ka duh satliah mai pawh ni lovin ka duh takzet.
.
Kan inhriat hnu a tang hian hmeichhe dang a mutpui tawh a ngem le? Mahse nimin a a thu min hrilhte kha.....khang thil ka ngaihtuah kha chuan chutiang em a tih chu ka ring bik si lo.
.
A nih chuan engkim hi a fiamthu na lek a lo ni zawk a ngem? Ni lo, chutiang em em a chimawm tur a tan chuan Caleb-a chu ka ngaingam bawk si lo.
.
Ka rilru min hliam sak tu tur mai mai em ni ang? Mahse kei chu ka nu ang kha ka ni dawn lo. Rilru na tak pawhin min siam mahse ka nu ang kher kha chuan ka awm lovang.
.
Ka hna a min drop hnu khan Caleb-a chu basketball practice turin a kal nghal daih a, a rawn la haw har viau ngei ang. A nih chuan zanriah tui tak ka lo siam sak hman zan zan ngei ang. Bawngsa kan leh alu lo siam ila.....tu mipa in nge bawngsa kan leh alu chu duh lo tehlul ang le...?
.
Bakah ka siam a nih phawt chuan engthil pawh nise a ei duh leh dawn sa. Salad erawh a ngaina lo tih ka hria.
.
In ka thlen veleh hla ngaithlak pahin ka tih tur ang ang chu ka ti sawk sawk a, eng nge a rawn haw hunah ka lo sawi ang? Engtin nge lo bia ila tha ang? Eng nge ka duh....?
.
Caleb-a, ka duh chu Caleb-a a ni. Mahse vawikhatmah mipa hnenah ka duh thu ka la sawi hmasa ngai lo.
.
Fridge ka hawng a, Caleb-a beer dah that chu pahnih ka la chhuak a, ka sawi hmain tawng huaina ka in phawt a ngai. Mahse engmah hre lo khawp a ruih ang kha chu ka duh tawh lo.
.
A eitur a ka tih chu plate ah chhawp sakin dawhkanah ka daha,chutih lai tak chuan kawngka hawng ri ka hre zui nghal a.
.
Ka thin a phu nghal dup dup mai.
.
"Red....?"
.
"Caleb" ka hrawk kan thian kharh a. Mahse a hmel ka hmuh chuan rei vak lo chu che mang lovin ka ding reng a. A inbualna a la reilo tih a hriat hlemai. A sam a tukhum lama a khuih pial hlap mai chuan a hmel a ti lang chiang hle a.
.
"Eng nge in practice chu a an a?"
.
Ka zawhna chhang lawk lo chuan a hawi kual a, a hnar an let a. "A va rimtui ve a" tihpahin a kekawr ipte a zen a.
.
Ka bulah chuan rawn phei se ka tih tih nen a dinna ah chuan a ding reng a,a mitmu hring nalh em em mai chuan min en reng ringawt a.
.
"I ril a tam tawh em?"
.
A hrawk bawk chet ralh ralh danah a zam ve deuh tih ka hrethiam mai.
.
"Aw.." a aw chu a thawp sat a.
.
A lampan chuan zawimuangin ka phei a, mak a tih vang nge,a lo meng zau deuh kawk a.
.
Min han en teh Caleb
Ka duh che ani.
Mahse ka la inpeih si lo.
.
A but chetah chuan ka ding a, a taksa lum ham ham mai leh a rim hiar deuh chem chem mai pawh chu ka hre thei a.
.
"Thil eng emaw pek tur che ka nei a Caleb". A nghawngah ka vuan a, ka lamah ka pawt hnai a,a ni erawh hlim hmel tak chung si hian a lo khi deuh sak a.
.
"Engthil nge min pek i tum a Red?" A aw thawp sat mai chu a sexy vawng vawng ngei mai.
.
"Infawh a nia"
.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)