※ RED & WHITE ※ BY Noah Hringngen

Ngaia
Site Admin
Posts: 25813
Joined: April 30th, 2016, 4:07 pm

Re: ※ RED & WHITE ※ BY Noah Hringngen

Unread post by Ngaia » October 30th, 2016, 12:56 pm

Ka lu ka lo thing nghal vat a.
.
"A nih tunge i hming mami?"
.
"Hming ka nei lo"
.
"A nih chuan Chhelote-i ni mai rawh". Pizza chu a zei a, hrang hnih min rawn chhawp sak a. "Ei rawh le"
.
Pizza chu kan ei dun a, hmun danga ka ei thin aiin a tui dan a dang bik hlemai.
.
"Min han hrilh teh Chhelote, nihlawh bik ni a i inhriatna eng emaw tal"
.
Ka ngawi vang vanga,chhan mai dan tur pawh ka hre lo. "Kei chu min duat deuh tu mipakhat ka nei a. School ah min thlah a, green tea te min lei sak a...., chuan pancakes te min siam sak thin a"
.
A ngawi vang vang a,a hmelah chuan a nuih a za tih ka hre thei. Pizza chu la in an keih hmawk a. "Allergy te i nei mial em?"
.
"Nei lo, ka fihlimna lam tak". Ka ngawi deuh dat a. "Nang?"
.
Nui chungin a lu a bu a. "Peanut butter"
.
Hlauthawng takin ka meng kawk a. "Ui lehh....Caleb, ka tihpalh lutuk aw. Ka lo hre miah lo va-". Ka eitur duh ber chu Peanut butter a ni a, a fridge ah lah khan ka dah teuh mai bawk si a.
.
A ni erawh a nui mai mai a. "A ho lutuk Red, in a awm mai maite chu a pawina a awm hleinem,ka ei chuan lohte chuan. Mahse i ei zawhin min fawp miah suh ang che"
.
Rang takin ka lu ka lo bu vata, min hrilh har lutuk erawh ka lung ni lo tep a ni. Tlem a tlemah kan inti hlum lo chauh a lawm.
.
Kan ei zawh meuh chuan kan puar ngei mai. A thutna nghenchhan ngheng chung chuan a thu awn a. "Ka puar lutuk, hippopotamus in sai lian pui dawlh se, chutiang ang vel chu ka ni" tihpahin a dul a chul a.
.
Ka lo nui hak a. "Hippo te chu hnim hring ei a lawm an nih" ka lo ti a. Chutianga a puar lai tak chuan a dul sexy tak kha a la sexy reng tho a ngem le?
.
"Ka Red duhlai-i tak hi chu aw...., thluak sexy tak hi a nei bik a" min rawn ti a,kan nui dun hak hak a.
.
.
Mawi takin van lamah chuan arsi an pe un a, phul chungah kan mu duna, ngawi rengin van lam kan thlir duna. Hnim rim leh zan boruak rim inpawlh chuan hnar a zem chiai chiai a, thli vawt a rawn thaw heuh heuh bawka.
.
"Zan hun nuam tak min hmanpui a vang hian ka lawm e aw Caleb". A lam hawi chuan ka thle phei a. A ni pawh chu ka lam hawiin a rawn thle phei ve a, a mitmu hring nalh tak mai chu a eng phet ni mai hian ka hria. Engmah a rawn sawi ve hmain a biang ka va vuana, a hnar chu khawihin a hmui lamah ka chul thla a, a khabe kual lamah ka chul thla zela. A mit a chhing a, chuveleh a mithmul chu ka chul a, a rawn nui seih a, a lamah va thle hnaiin a hmuiah ka va fawp zui nghala.
.
Chuveleh ka hnungzangah min rawn kuaha, a lama min pawh hnaih pahin uar fahran hian min lo chhanglet nghal a.
.
Rei tawk fang kan infawh hnu chuan a hmui a la sawn a, ka chal chu a chalin a rawn nawk a, tiang chuan minutes rei vak lo chu kan awm vang vanga. Phul chungah saisirin inhmatawnin kan mu dun a. A mit chu a kutin a hup a.
.
"Caleb...?" ka lo ti vat a, tihsual ka nei emaw ni...!!
.
"Lawkin aw.....hun reilote ka mamawh" a rawn ti a. "I rilru i thlak leh hma, hmangaihna chen dun tura i inpeih tawh a nih chuan i awmdan ngaiah khan, che miah loin awm ang che"
.
Infawh ringawt pawhin ka thluak a buai zo a, ka taksa tin mai chu a za chuai chuai kha a ni a. Hmangaihna chendun tih a han sawi chiah chu ka khawng nghal vek mai.
.
"Lungngai suh....,ka nghak thei che a ni tih ka hrilh tawh che kha. Ka hrethiam lutuk che. A chang hi chuan infawh ringawt hi chu ka lo duhkhawp lo thin a tin ni". A kut chu la thlain min rawn en a. "Ka sawi awmzia chu i hrethiam tiraw?"
.
Ka lu ka lo bu ringawt a, engtinmah ka chhang lo. A thawk chu thunun hram hram a tum a.
.
"Helai hmunah hian kan la kal dun leh ang chu tiraw..?" a rawn ti a.
.
"Tehreng mai Caleb" ka lo ti vat a.
.
A taksa si chelh chuan min kuah a, a awmah ka bei a, ka hnungzangah zawimuangin a chula. "Ka nghak zel ang che Red..., khawvelah hian hun tam tak kan la nei a lawm. 'Aw' ti a min chhan ve hunah phei chuan...." a rawn kun hniam a, zan thla eng hnuaiah chuan kan infawp vawng vawnga
.
.
END OF CHAPTER -17



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:57 pm

※ RED & WHITE ※ . Chapter -18


Postby Noah Hringngen » Sat Oct 08, 2016 10:35 pm
.
VERONICA'S P.O.V
.
Kan let leh meuh chuan zanlai a pel tawha, zanin hian thil tam tak a inthlak thlenga, keimahah phei chuan zan chhinchhiah tlak tak a ni tawh ang.
.
Kan inkar chu engtiang chiah nge a nih tih ka sawi thei bik lo. Mahse heti ringawt lo deuh hian,ka sawi awmzia chu hei aia thui deuh hreta kal hi ka duh. Ka nuna a vawikhatna a tan risk la turin ka rilru ka buatsaih ve tan a nih chu.
.
Kan let leh chhung zawng chuan kan tawng mang lo. A kut pakhatin steering wheel a vuana, lehlamin ka kut a rawn vuan thunga. Kan tlanna chin bak chu a thim chhah mup mai bawka. Thla a eng ut a, arsi an de neuh neih bawka, thil eng dang vak hmuh tur a awm lo nen, a mawi bik hle mai.
.
Kan inher a, hnunglamte ka han hawi let a, motor tlan ve dang hmuh tur reng reng a awm lo. Keimahni chauh chu chu kawnga tlan awmchhun chu kan ni. Kan vela thingkung ding thelh sung maite chu kan tlanpel phe zawk zawka, kawngpui lai takin a eng(yellow) a inrin phei diat diat chu Car hma eng chuan a chhun tle sut mai bawka.
.
"Kan awm dan hi Jeepers Creepers kha min ti hre chhuak" ka ti a, ka sawi zawng pawh chuan ka trim mur mur mai. Caleb-a chuan min rawn en a.
.
"Film hlauhawm lam en i hrat a mi?"
.
Ka lu ka thing a. "Aih, mahse en te chu nei ve nel nual e"
.
"Nakinah thlahrang film kan la en dun dawn nia. A nuam danglam bik teh mai a nia. Chu chu kan tih tur list ah dah nghal ang"
.
Nuih kan tum ngial a,mahse ka hlawhchham. "Kan list aa...?"
.
"Yup..., tih tur list te chu ka duang teuh tawh zawk mawle. I inpeih ve tak tak huna tihah ka khek a. Insidious movie kha i en tawh em? Evil Dead pawh ?"
.
Ka hmulthi a ding nghal sung sung thei nia. "Aih, thlahrang lam chu kan tlan lai hi chuan sawi vak rih lo teh ang. Car chungah khian tu emaw awm ve tlat a hriatna ka nei lehnghal. Kan hma zawnah tak hian a rawn ding thut dawn tlata hriatnate ka nei a nia"
.
"I suangtuah dan chu ka duh zawng tak a ni....SHITT! "
.
Car chu dinglamah a kawi dawrh a, Sakhi in kawng a rawn kan chu niin. Hlauh luatah ka au tuar a, car tukverh darthlalang chu ka su dawt a,ka lu ka la sawh teuh em em mai lehnghal.
.
Motor ke chu a inhrut ri tuar a, plastic kang rim a nam nghal vung vung a. Car chu kawngsir chirhah chuan a intheh lut a, Caleb-a chuan ka lam a rawn hawi nghal vat a. Tlem a tlemah kan inti na hrep lo chauh a lawm. Ka chal a tang ka hmaiah thisen a rawn luangthla ngiai ngiai a.
.
Ka kutphah a huh dup a, ka chalah chuan thlan fim a rawn hnam nghal triam triam a, ka thlarau a dawk zawk ni ber hian ka hria. Caleb-a ka va en a, nghet takin steering chu a chelh a, a tang bawk a niang a ban a a thisenzam te chu an rawn puar laha, Car chu a berh titih nghal vek bawka.
.
Car ri chu a tawp hmuk a. Thui tak tlan ang maiin ka thaw hlawp hlawpa, ka taksa a vawt veka,ka khurh nasat zia mai chu. Ka seat belt ka phelh a, Caleb-a ban ka va vuana, ka hlauthawng a ni tih hriain nghet takin min lo kuah nghal vata.
.
"Ka naute, i tha em?" A aw chu a khur deuh dar dar a, ka lu chungah a biang a rawn nghat a, a rim chuan min zem nghal chem chem a. Tawng pawh ka tawng thei lo,ka lu ka lo bu ringawt a. A thinphu dawt dawt ri chu ka hria a, nge ni a keima thinphu ri zawk? Rei tawk fang chutiang ang chuan kan inkuah a, zawi zawiin kan lungphu pawh a pangai leh a.
.
"I tha chiah a maw?" min rawn zawt nawn leha. Ka hnung a rawn chul a.
.
"Aw...Caleb, ka ngaihtuahawm lo ve" ka kuah nget sauha. "Kan pahnihin min chhanhim ve ve e"
.
"I tha hlauh chu ka lawm hlemai. I insawh lo maw?" a mit chuan ka taksa pumpui, ka chhip a tanga ka ke ler thleng chuan insawhna hnuhma zawngin a en chhuak veka.
.
"Ka tha ka tih kha Caleb. Nangmah zawk hi....?" min tih ang chiah chuan ka en ve nghal a.
.
A ni pawh na hmel a pu lo. Eng emaw a chungah thleng ta se chu.....chu erawh ngaihtuah loh law law ka duh zawk.
.
Nuih a tum lui hle tih ka hmu thei. "Ka kal tak lohna kha a rei tawh em a lawm le. A lehpekah chuan hotel ah kan thleng anga,zan kan riak nghal daih tawh dawn nia"
.
Ka lu ka lo bu a. Ka chauin ka chhawl a hal takzet. Seat ah chuan ka thu hle hle a.
.
"Ti khan lo thu rawh. A ke hi a that leh that loh ka va chian ang e" tih leh thawh a rual nghal a.
.
Tun ang zan thim hnuaia ramhnuaia tan chu ka hlauin ka hreh takzet. Rei vak lo hnuah a rawn let leh a, engmah chhia a awm loh thu min rawn hrilh a,ka lawm ngei mai. Chubakah Car hnunglama a dah that serthlum tui min rawn lak nghal bawk a.
.
Muangchangin kan tlan a, kan tlanna kawng chu a en uluk tawh hlemai. Caleb-a flat kan thlen meuh chuan kan chau dun tawh hlemai. Elevator a kan luh veleh ka lam a rawn hawi a,min rawn pawm kang thut a. Ka lo mengphawk nasa ngei mai.
.
"Caleb, eng nge tih i tum a?"
.
Elevator chu a inkhar a, chhawng chunglam panin kan inkhai chho nghal a.
.
"Tuna hetia ka tih loh chuan kan chhuah hunah chuan engtinmah ka tawk leh thei dawn si lo che a"
.
"Ka tha a lawm. Khawi maw...,min dahthla teh"
.
"Dah thla dawn lo"
.
Elevator chu a dinga, kawngkhar chu inhawngin nu upa tawh lam hi a rawn lut a,a mitmeng a tang chuan kan awm dan chu mak a ti tih hai rual a ni lo. Kan piah deuh hlekah chuan a ding fal nalh a, min rawn en leh zauh thin a.
.
"Tunlai thangthar ho hi chu a" tihpahin a thaw hak a. "Ai a upate hmaizahna chang pawh hi an hre tawh lo"
.
Caleb-a banah chuan ka chum chawrh a,a ni lah chu a lo nui mai mai a, mi dahthlak pawh a tum chuang lo. A banah te chuan na deuh hlekin ka piai a, min dahthlak a hnekin min pawm kang sauh a, min fawh tumin a rawn kun hniam a.
.
Pitar lah chu a lo phun ring sauh lehnghal.
.
"Eng nge zanin khan tih dun kan tum khah ka duhlai?" Zam miah lo hian a rawn ti a, min rawn fawp zui nghal a. Chutiang ang kher kher chuan a vawikhat min kohna a ni.
.
"Invuakna leh chain tih vel kha kan hmang tel dawn em khah..? I duh tawkin min phuar bet dawn nia". Ka rum deuh nghut a.
.
Caleb-a pawh a lo nui suk a. Kawngkhar a inhawng a, rang lutuk tak maiin pitar chu a kal chhuak nghal a, hawi pawh a rawn hawilet eih lo.
.
"I van mawl tak" ka ti nghut a.
.
"Upa pawh nise khatiang anga tawng ching kha ka ngei zawng tak an nia" Caleb-a chuan a lo ti a.
.
Elevator a tang chuan min pawm chhuak a, a kawngkhar lock na code chu a chhu mual mual a. Chhuatah min dah thla mai se la tha tur hi a nia. Hmu hleithei lo chungin a chhu a, a rawn thle a rawn thle tho si a.
.
Ka hrawk ka thian kharh a. "Min dah thla mai ta la aw...."

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:57 pm

"A ngai rih lo"
.
"Caleb...." ka nui a, tla lo turin a banah chuan ka invuan bet tang tanga. Kan pahnih chuan kan nui dawn a, pad a number a type dawn lai tak chuan a ka chhungah ka sam chu a lut lehnghal.
.
"Kan awmdan hi a nuihzathlak emai......Awi karei...!!" A balance a hloh a, hnunglamah kan pei phei nawk nawk a, chhuat charah chuan zangthalin kan thal huang a.
.
"Ouch...!!"
.
"Thenawmte kan ti harh vek ang e". Keimah zawk chuan ka bawh runa, a awm chungah ka lu ka nghat a.
.
Ka inbeng kang a, ka tho nghal vat a. "Khawimaw..,min lo kai tho teh" tih pahin a ban a rawn phar chhuak a
.
Ka kai tho a, chuveleh ka taksa si chelh chuan a rawn ding a. "Caleb..."
.
Ka taksa si chel chung chuan a nui suk a.
.
"Caleb, inchhungah i lut ang"
.
"Lut ila eng nge kan tih ang?"
.
Engtinmah ka chhang lo. Ka hmui chu a kutzungpui hmangin dimte hian a rawn chul a, zau lo tein ka lo ang nghal a.
.
"Ka zawhna chu chhang rawh" a awm a thawp sat a.
.
"Eng.....zawhna maw?"
.
"Inchhungah chuan lut ta ila eng nge kan tih ang?"
.
Caleb-a hi zawng ka dawl zo thlawt lo a nih hi. A ni level 10 ni se.....kei chu level 0 bak ka ni lovang. Tui ka mamawh, ka ka chhung zawng zawngte chu an ro zo vek tawh.
.
Kawngka chu a hawng a, min luhpui nghal a. Ka bedroom kawngkhar bulah kan ding duna,ka lam rawn hawiin ka kut a rawn vuana. Ka kut chu a en vang vang a, a thusawi tur chu ka ngaichang reng a. A hnu deuh fe ah chuan "Hetah hian ka mangtha mai ang che" tih pahin min rawn en a.
.
"Ka rawn luh chak zia erawh ka sawi kher lo mai ang" a tih laite chuan ka thin a lo phu dawp dawp a. "Ka ti na ngai lo ang che Red, mahse ka mipa nihna erawh a bo chuang lo". Hnuai lam a en vang vang a, chutah rawn hawichhuakin min rawn nuih a. "Zanin a vang khan ka lawm e". Min rawn hnaih sawt a,kan hnar ve ve chu a insi chat a."Tui deuhin i mu dawn nia"
.
A sawi zawh veleh a inher a, a kal nghal a.
.
www.storyfb.com
END OF CHAPTER -18

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:58 pm

※ RED & WHITE ※ . Chapter -19


Postby Noah Hringngen » Tue Oct 11, 2016 9:59 pm
.
VERONICA'S P.O.V
.
Zing ka tho chu ka mutna sir a ka light dah a lo la in on eng vu a, ka lo off theihnghilh daih chu niin. Hetianga light ka off theihnghilh a piang hian eng emaw thil tha lo deuh a thleng ziah zel lehnghal. Caleb-a khan light off lo va ka mut thin thu a sawi kha a sawi dik chiah. Mahse engtin nge light off lovin ka mu tih a hriat theih le? Zantin ka pindan kawngka ka kalh ziaha, ka mut hlan chuan engtinmah a rawn lut thei tawp lovang. Chahbi a neite a nih ngawt loh chuan.
.
Chahbi chu a nei khawp ang. A nih chuan ka muthilh hlanin a rawn lut ru thin tihna em ni ang? Ka harhvang a, rawn lut chu ni se ka hre em em ang. Nge ni a kawngkhar phen a tang hian min rawn bihthla thin zawk?
.
Sana ka han en chuan 3AM chauh a lo la ni a, zing dar 3 a thawh kher kher hi chu thil nuam tak a ni lem lo. Thlarau sual inlar duh hunlai an ti lehnghal. Chutih rualin ka tui in lah a hal em em mai bawk si.
.
Meng diar diar chungin choka lam ka pan a, light on mai ka tum a,mahse a hmehna chu ka dap fuh lawk lo lehnghal.
.
Fridge ka hawng a, Caleb-a serthlumtui dah chu ka la a, coconut tui ka in tel bawka. Hawn zawng lah chuan a reh tha bawk a a ring tha duh em em mai lehnghal. He pa serthlum tui heh dan em em hi chu.
.
Chutih lai chuan ka hawi kual a, a thim chinah chuan tu emaw hi dinga, min rawn en tlat anga hriatna ka nei ta tlat a.
.
Min lo en reng tu an awm em tiin kan hawi kual a, mahse engmah hmuh tur a awm lo. Ka ngaihtuahna chuan min bum mai mai a ni. Fridge lam chu ka hawi leh a, ka khar phui chiah tihah chuan hnunglam a tang eng emaw thawm ka hre leh a. Chu veleh ka hmul thi a ding sung sung a, ka hnungzangah a rawn za chho mem mem bawk a.
.
An reh deuh vang vanga, a hnu deuhah chhuat char a Can ruak thlauh ri ka hre leh a, chu veleh rang lutukin ka theihpatawp a chakin ka tlan nghal a. Thim zingah chuan tunge awm tih ka hmu thei der mai bawk si lo.
.
Awp tu awm ang mai hian boruak awmdan chu a rawn inthlak thut a, ka hmanhmawh luatah chhuat vawt takah chuan ka tlu thlawrh lehnghal.
.
Ka hnunglam a tang bawk chuan mi tihnat chak ngawih ngawih nui thawm hi ka hre bawk a, thim lal rawn ken tel thlarau sual ni awm tak a ni. A aw erawh ka hriat hnu a ni tlat. Ka hawi let lehngat a, min rawn um tu chu ka hmu ta e. Theihpatawpin ka au a, a ni lah chuan min rawn pan hnai zel mai bawk si. Chhuat a tanga innem thawh chu ka tum a, mahse chutin ka tho thei der mai si lo.
.
"Tlan ta che bawih-i....tlan rawh" a rawn ti chhur chhura. A aw chu Rul tur nei ang mai a ni.
.
Ka zuang tho vat a, hnunglam chu kan hawi let leh a,mahse thim mup bak engmah hmuh tur a awm lo.
.
"Ka duh lo...!!" Au chhuah tuar ka tum a,mahse ka thei thak lo. Eng emaw hian ka hrawk a dang bet tlat. Ka hlauh luat vang a ni tih ka hria.
.
"Ka rawn zawn hmuh loh che i ring em ni?"
Ni lo ni lo.....khawngaihin
.
A aia chak chuan ka tlan a,mahse chhuat charah chuan ka bawkkhup leh thlawp a.
.
"Red, engthil nge ni a?"
Caleb...!
.
Ka kut a rawn vuan a, uluk deuh hian min rawn en a. Kei erawh hlauh luatna a vangin ka meng kawk a, eng thil nge thleng tih chu hrilh ka tuma. Mahse engmah ka aw a chhuak thei lo. Ka lu ka thing a, a kutah vuanin tlan turin ka pawt a. Khawngaihin tlan hram teh.
.
"Red...inbengdai rawh. Eng nge dik lo awm?" Ka biangah rawn dawmin a mah en turin min rawn kuai sawk a. "Engkim a tha vek e. Hlauhna in a man che a nih kha. Muangchangin thaw rawh le. I hnarin thaw lut la....,i ka in thaw chhuak leh rawh. Ka sawi chu ngaihtuah rawh".
.
A sawi ang chuan muangchangin ka thaw lut a,ka thaw chhuak leha.
.
"Eng nge thleng a? Eng ngati nge i tlan chiam chiam a?" min zawt nawn leh a. Nelawm takin min melh a,a awki ah chuan min thlamuan a tum hle tih a hriat a.
.
Ka a dawn emawni le? Hetianga hlauhthawnna hi ka la nei ngai lo.
.
"Engthil emaw ni, tu emaw ni.....choka ah sawn a awm" ka aw chu a khur dar dar a.
.
Chuveleh Caleb-a chu chhuatah a thingthi hnawk a, ring takin ka au tuar a,mahse ka aw ri erawh chhuak tur a awm lo. Mak tih hmel em em mai hian Caleb-a chuan min rawn melh a,a mitmeng chu hai rual lovin hlauhna leh manganna in a khat a. A pum chu a kutin a dawm a, a kawr chhan a tang chuan thisen a rawn chhuak tih ka hmu thuai a.
.
"Tlan rawh Red...!!"
.
Ka kutin ka hmui ka hup a, ka hmuh lai rengin Caleb-a chu chhuatah a bawk thlawp a, che zui tur a awm lo.
.
A thi em ni...? Ni lo, a ni thei lo !!
.
Ka tlan sawn hmain thim zing a tang chuan chu thlarau sual chu hmuh theih turin a rawn pen chhuak a, hlim hmel zet a nui vur vur chung hian min rawn melh run a.
.
"Hello...Ka fanu"
.
Au thawm ring leh hriam em em mai ri in a rawn zui a, ka beng dar a na nghal vawng vawng mai. Chhum leivak a rawn zing chum chum a, chumi kar a tang chuan Caleb-a aw ka hre zui a.
.
.
"Red, harh teh. Engkim a tha vek e ka naute. Keiman ka kuah che a lawm. Shhhh......heta hi ka awm e. Engkim a tha vek e"
.
Ka khur dur dur a,ka ruh a za a, ka thawk a pik a, boruak tlachham ang mai hian ka awm a. Caleb a'n min lo kuah bet tlat a, ka hnunga chul chungin min lo thlamuan mawlh mawlh a. Ka beng bulah zawite in eng emaw hi a sawi mawlh mawlh a, mahse eng nge a sawi erawh ka hre lo. Sawi a nei tih chiah ka hria. Caleb-a chu a tha,a thi lo ve. Tunah ka bulah a awm mek.
.
Ka kuah let a, a awmah ka hmai phumin ka inhnit hlawp hlawp a. Ka mittui chuan a kawr hma chu a ti huh dup a,mahse ka bang thei mai si lo. Chutiang chuan engtia rei nge kan awm tih pawh ka hre lo.
.
Caleb-a chuan ka hnung a chul pah reng a, zawitein hla a sa ret ret a, ka lo maimitchhinga.
.
"Eng emaw sawi duhte i nei em?" zawite hian a rawn ti a.
.
Ka lu ka lo thing vat a. A bu nghauh a,ka lu ah a rawn fawp a. Ka mangchhia chu vaivut ang maiin hun chuan a len dal ve tial tial a.
.
"Caleb...?"
.
"Eih...?"
.
"Khawngaihin zanin chu min riahpui mai rawh"
.
Thawk an la vang vang a, "Aw le.." a rawn ti nghal mai a. Min rawn kuah a, ka lu chungah a khabe a rawn nghat a.
.
Ka nu tih lovah chuan hetiang em em a mihring thlamuanpui hi ka neih pawh ka inhre lo.
.
"Ruah i ngaina em?" a rawn ti a.
.
Kuah ngheh zual sauh pahin "Aw" ka ti a.
.
"I ngainatna chhan min han hrilh teh"
.
"Nang i ngaina em Caleb?"
.
A nui tih ka hre thei. "Aw, ngaina e. Ka naupan lai chuan ruah a sur chang a piang hian pawnah tlan chhuakin ka infiam thin a, huh zawr hnapin ka do thin. Ruah rim chuan ka hnar a ti tlei em em a, ka vun a rawn tawh hian a nuam ka ti"
.
Ka ban a rawn vuan a, maimitchhingin min rawn khawihna chu ka feel veng veng a. "Pathianin a khawvel bal a rawn silfaina angah ka ngai thin a, nangpawh i hlim lohna te, i hlauhnate leh i mangchhiate nen lam a tlenfai sak vek ang che"
.
"Mahse thil thenkhat engti kawng maha silfai theih loh hi chu a awm a lawm Caleb"
.
"A dik chiah. Mahse chung thilte chu kan nuna bet tel ve tlat pakhat a ni miau si a. Chuvang chuan pawm thiam zir la,mahse i nun vaw chhe tu a tan erawh hmang ngai suh". A aw chu a thutak hle mai.
.
Ka chil ka lem ri khalh a. "Thawnthu min han hrilh teh Caleb?"
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 12:59 pm

A han ngawi vang vang a. Pangtilum a ngah viau a ni ngei ang, a lum ther ther mai.
.
"A nih leh thawnthu pakhat ka hrilh ang che" tihpahin min rawn kuah nghet sauh a. "Hmanlai hian buhchi-um hmeltha zet mai hi a awm a"
.
"Buhchi-um hmeltha a...?!!" Ka lo nui a.
.
"Shhh.....chu buhchi-um hmeltha zet mai chuan a duh ang a piang chu a nei thei zel a, nilengin hnim hring leh thing tang hring a ei a, chhuat hringah a kal a, van hring nalh tak leh thian hring tha tak tak a nei bawk a. Mahse engkim a hmuh theih chu a hring vek a ni tih a hre chhuak ta a"
.
"Nun chu a ning em em a, rawng hring chu a hua a, a tan chuan rawng hring chu lungin ang mai a mi. Lei hringah chuan a zawn ber pawh hre lo in a vak a vak a"
.
A sawi lai chuan a hmel en in ka hawi chho a, "Eng nge a zawn a?" ka ti a.
.
"Rawng"...a rawn hawi thla a, ka mit tak a rawn en chung chuan "Ka rawng chu nangmah hi i ni Red" a rawn ti a.
.
Ka thinglung chu a tuiral ni ber hian ka hria. A hawi sawn leh vat a, min kuah nghet sauh pahin ka lu chungah a khabe a rawn nghat a. "Chuanin...Chu buhchi-um chuan phengphehlep mawi deuh mai hi a va hmu a, a rawng lah chu a mawi em em a, a hlim hmel em em mai lehnghal a. A hmel thatnana leh a thinglung thatna chuan buhchi-um pa thinlung chu hlimna in a rawn luahlan sak a, tichuan an pahnih chuan hlim takin an awm dun ta a ni"
.
Min kuahnaah chuan thlamuang takin ka bei hle hle a. "Tuman an tihnat che ka phal ngai lovang. Mu tawh rawh le" a rawn ti a, mangchhia pawh hlau tawh lo lek chuang ka muhil siai siai a
.
.
.
END OF CHAPTER -19

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 30th, 2016, 1:00 pm

※ RED & WHITE ※ . Chapter -20


Unread postby Noah Hringngen » Fri Oct 14, 2016 9:49 pm
.
CALEB'S P.O.V
.
Engthil nge ka ngaihtuah tak mai le? Ka mitthlaah chuan Red-i pian nalh tak, mipa tana siam bik ni reng a mawi chu a awm reng a, ka ngaihtuah satliah pawh a ni lo, ka suangtuah a ni.
.
Bathroom bang tile chu ka kut pahnihin ka nem a, hnuai lamah ka kuna. Tui vawt chu ka hnungzang lamah chuan a inphu thla seng seng a, ka thluakah erawh a hmel leh a ruangam hlir chu a lang thung si. A nui ri mawi tak, sexy tak maite chuan min zem a mai dawn.
.
Hrep tak hian..., thil ngaihtuah loh tawp tur ka ngaihtuah a ni. Tui chu a vawt hle a, a rimtui veng veng mai chu ka hnarah a cham a, a bawp mam tak, tlawn zaih mai te......tui vawt pawh chuan ka ngaihtuahna chu min lak kian sak thei chuang lo.
.
Shower chu ka herh tawp a, towel la in ka inhru hul nghal a. Darkar hnih chhung ka work out a, tui vawtin ka inbual bawk a, ka ngaihtuahna kal kawi lutuk tur pawh tlem chuan a zia ta deuh e.
.
Tih loh tur tur ka tih hmaa ka chhuah vat angai a ni. Bangah nawr bet i la, a nih loh pawhin choka dawhkanah emaw bathroom ah emaw hian ti dun ila. Ni lo, ka khumah zawk nise. Khawilai pawh nise a pawi lo.
.
Dimte in, muangchang leh dimte in a duh ngei ang. Hmanhmawh lo deuh a tih a duh a nih pawhin a pawi lo. Ka nghak thei a lawm. Ka nghak dawn ka tih a vang khan thawm chhuah miah lo in ka lo thuthluang dawn ka tihna erawh a ni lo.
.
Tunah chuan hmeichhia ka mutpui lohna chin pawh a rei ve ta hlemai. A chhan chu he nu hi ka duh em a, midang lakah ka rilru ka pek san thei lo. A ni nena hmangaihna chen dun chauh lo chu.
.
Ka private gym bathroom a inbual ka ni a, thawmhnaw fai engmah ken luh ka nei lo tih ka inhrechhuak deuh thut a. Ka towel chu ka kawngah ka veng a, ka phone kan en chu Justin-a text a lo awm a. Zan party tura min sawmna hi a lo ni a. Chhan pawh chhang let lovin ka room lam ka pan nghal a.
.
Ka room kawngkhar bulah chuan ka bathrobe (inbual zawh kawr) ha in Red-i chu a lo ding a, ka thawm ngaihthlak ruk a lo tum ni ngei tur a ni kawngkhar biangah chuan a beng a lo dawh ran a. Nuih rik loh tum chuan ka hmui ka pet fan fan a. Ka bathrobe chu a tan chuan a lian lam mah mah a ni. A chhip a tanga a ke ler thlengin a khuh pil vek thei ang.
.
Ka dinna a tang chuan ka thlir reng a. A ding ngil deuh a,a kut chu hum ruhin thawk a la hak a, kawngkhar chu kik a tum ni ngei tur a ni. Che lo in an awm vang vanga, chutah a lu a bu zauh a, a beng chu an dawh tha leh a.
.
"A va nuam awm ve a..!"
.
Au tuar pahin a zuang kang zawk a, ka lam hawiin a rawn inher a,a kut chuan a awm a dawm nghal a.
.
"Caleb...!"
.
Ka nui hak a, ka va phawk vang a nui ni lovin a tih ang chiah hian a room kawngkhar a tanga ka ngaithla ru lai Cameron a'n min rawn phawk kha ka ngaihtuah chhuak a. A meng kawk a, kawr ka ha lo nen ka awm zawn chu a rawn melh vang vanga.
.
Duhtawkin ka taksa chu han chul kual vel se....., chutiang ringawt chu ka ngaihtuah leh dawn ta. Justin-a party ah chuan ka kal daih mai zawk dawn em ni ang? Helaia ka awm reng chuan a tha dawn lo tlat mai.
.
"Enteh..." ka sam chu ka kutin kan tuai a. "Darkar rei lo te kal chhuah lawkna tur ka nei a" tihpahin ka din hnaih sauh a. A khabeah chuan dawmin ka lamah ka kuai kang a, a hmai bulah nanana chuan ka kut a lang lian hlemai.
.
"Red, i bula awm reng hi ka tan a tha lo. A chhan chu i bula awm hi ka duh lo ani,...chutih rualin i bula awm erawh ka chak ber lawi si"
.
Hriatthiam loh hmel zet hian min rawn en a, fawh nghal mai chu ka duh,mahse a tana harsatna siam zawng a khawsak ka duh bik si lo.
.
Ka kalsawn vat a, rang takin ka inthlak nghal sawk sawk a. Cameron-a chu Justin-a party na a kal turin ka sawm nghal bawk a. Ka chhuah leh chuan choka stool ah Red-i chu ka bathrobe ha in a lo la thu reng a. Ka thawmhnaw ngei an ha chu a hmuhnawm dangdai bik tlat. Khabe dawm chungin tukverh lam a lo thlir dauh dauh a. Ka va kuah mai loh nan ka in hmuh ruh nghal vata.
.
Ka thawmah chuan a rawn hawi a, a mitmengah chuan nuam lo tihna a nei tih ka hmu thei. Kal chhuah san chu ka duh bik reng reng lo.....,mahse ka intiamna kha ka ti hlawhchham ang tih ka hlau si. Ka ngaihtuahna ti thiang turin ka chhuah harh a ngai a ni.
.
"Nawmsam lohna i nei em lo maw...?"
.
A mitmengah chuan ka zawhna chu a hrethiam lo tih ka hria. "Nizanah khan mangchhiate i mang sia. Sawi dunte i duh em?"
.
A lu a lo thing a. "Ka tha e, hriat pawh ka hre leh tawh mang lo" tihpahin a thutna a tang chuan tlem a inher a, a bathrobe hak chu a kau deuh a, a mal no tak mai chu tlem a rawn lang a. Lalpa leh...,chhuah vat ka ngai.
.
"Zanah i lo haw a ngem?" a aw chu a zawi lutuk a,ka hre thei tawk tawk a ni.
.
"Aw...."
.
A bu zeuh a. "Caleb...."
.
Ka kekawr ipte a ka ah ka car chahbi chu ka khawih ri rek rek a, a thusawi tur chu a sawi zawh hun nghakin ka la ding a. Min en reng a, a hmui hnuailam chu a seh a.
.
Va pan phei a, va seh sak mai ka duh.
.
Ka nuih zeuh a, ka inher a,ka chhuak nghal a. Ka chhuah hnu chuan Cameron-a te in lam panin ka va lam a, party na lam chu kan pan ding nghal a.
.
Khaw pawn a an chhungkaw cabin ah an buatsaih a, a fal that a vangin music pawh duh tawk a tih rin na ngam a ni a. Cameron-a nena kan va thlen pawh chuan thawm a tha hat hat kher mai.
.
.
> DARKAR 4 HNUAH CHUAN..... <
.
Um engzat nge ka in zawh tak tih pawh ka hre lo. Rui chhe viau mah ila ka rilru luahtu ber erawh a la ngai reng. Mi hrang hrang kan thutnaah an rawn kal a,an hmeichhe theih dan chanchin mak pui pui eng eng emaw an rawn sawi chamchi a, intihtheih nan an hmang emaw ni...?
.
"Hey.., bawihte, rawn let leh vat rawh aw" amah kal pel chiah tu nula mawngah chuan Justin-a chuan a han beng ri thlawrh a, ahma daih tawh khan an inzui an inzui tak e
.
Ka beer ken lai chu min rawn chhuh a, an lem nghal pawp a. "Kha nu khan min duh chiang a lawm" tihpahin a rawn nui vur vur a.
.
"Hey....Caleb"
.
Ka hming rawn rikna lam chu ka hawi chho a......Red?
.
Eng nge hetah a rawn tiha? A hmel pawh chu ka hmu tha thei lo, a phe ruai mai.
.
"Kan ride mai mai dawn em ni? Pawnlam boruak hi chhuah vel nan chuan a nuam teh a nia"
.
A aw chu a dik lo, Red-i aw chutiangin a sin lo. Ka lu chu kan thing nawk nawk a, Claire-i zawk a lo ni. A mithmul sei sang mai chu ka lam hawi zawngin a itawm thei ang ber turin a rawn khap no vela.
.
"A ni hi chu che thei chi zia zang a ni lo bawih-i. A aih ka lo awh mai dawn em ni?" Justin-a chuan a lo ti vata.
.
"I mawng a nih chu Justin"
.
"Hit me, baby, one more time."
.
Claire-i chu a tum hmuk a,a kal sawn nghal hmak a.
.
Okay bye bye..., ka tan chuan a tihzia phian. Hmeichhe pakhat chauh tih loh chuan ka rilru an la hleithei tawh lo. Mahse Claire-i chu Justin-a tan chuan ka ui ru ve reng. He pa hi chu lerh tih piah lam a ni. Engtin nge ngaihzawng nei reng chung hian a dang pahnih pathum a la kawp kual peih le..?
.
Bottle engzat nge ka in leh tawh tih pawh ka hre chuang lo. Ka bulah chuan Cameron-a chu ngenchhan nghengin a thu awn dar dar a.
.
"Cam-i nen khan nangni hi eng nge in chanchin ni ta zel?" tiin ka zawta, a rui tawh em a, mumal a min chhan pawh ka beisei em em lo.
.
"Min that hi a ni ringawt" tihpahin a chemte hum chu a thinhnun zawnah a tin a.
.
A chungchang ka sawi chuan a rilru a na thar a ni tih ka hriat a vangin sawi pawh ka sawi zawm ta lo va.
.
.
Hun a ral zela,kan inbelh zel bawk a. Zan lai a ni tawha, haw a hun ta viau mai. Red i'n min lo nghah leh nghah loh tur phei chu ka hre lo nangin ka lo haw ang tiin ka lo hrilh ve tawh si a.
.
Mahse motor han khalh thei chi ziazang ka ni lo. Taxi ko ringawt dawn ila an number ka hre bawk si lo.
.
"Caleb, ka lo thlah hawng ang che". Chu chu tunge? Claire-i tho em ni? A aw chu a sin rat a, sazu chik ri hi a ang berin ka hria.
Lawkin..., min thlah hawng ang maw? Ni lo, a ni chu ni lul lo ve.
.
"Kal kiang nghal rawh" tu emaw hian a rawn ti a.
.
Lalpa, ka van lawm tak em.
.
Ka hriat leh awm chhun chu Justin a'n Cameron-a a drop tih leh kan in lam kan pan mek tih chu a ni. Building kan luh laite chu ka hre rei ruai a, elevator chhungah kan zai dun nghek bawk.
.
A darah ka kuah a,a nin ka tlu tur min veng thung. Ni dang chuan a trawng zawkah a tang ziah thin kha a nia,zanin erawh min buaipui ve khiah mai.
.
.
Ka hriat leh chu kawngka ah kan lut a, mak tih hmel zetin Red-i chu kan hmaah a lo ding a. A van hmeltha tak em,ka hmu chu ka hlim nghal veng veng mai. Ka nui a, ka nui hmel chu ka hmaiah chuan a bet hlen dawn emaw tih mai tur a ni.
.
"Caleb....!" A mitmengah chuan ka awmdan chu mak a ti tih hai rual a ni lo. Min rawn buaipui nghal vat a.
.
"Ka bawihte, ka lo haw ang tih ka tiam che kha"
.
Ka hriat leh awm chhun chu eng thil emaw Justin-a nen chuan an sawi dun mawlh mawlh a. "Eng tin aa...?" Red-i chu a au tuar a.
.
.
END OF CHAPTER -20

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)