▨ FIFTY SHADES OF GRAY ▨ (18+) BY Noah Hringngen

Ngaia
Site Admin
Posts: 25813
Joined: April 30th, 2016, 4:07 pm

▨ FIFTY SHADES OF GRAY ▨ (18+) BY Noah Hringngen

Unread post by Ngaia » February 26th, 2017, 11:16 am

Chapter -1
OST: I Put a Spell on You - Annie Lennox
www.storyfb.com
.
Ka samkhuihna chuan ka sam chu a ngam mawlh lo. A tang zel...huihammm. Darthlalangah chuan ka in en a,hmeichhe sam uk,mitmu dumpawl leh lian zet mai chauh a ni ka hmuh ni. Pawi lo...tihngaihna a awm lo. Tawn tawp ila a tha ani mai. Katherine Kavanagh-i damlo kher kher chu aw....a tih ai ka tih a ngaih phah ta a nih hi. Kar leh lawkah exam kan tan tawh dawn a sin le.
.
Kate-i chu ka roomate a ni a, vawiin ni kher kher a a damlo chu a hun lo takzet. Kan college chanchinbu a chhuah tur Businessman lar leh hlawhtling tak interview a lakni tur a ni a, a tih ai ka tih mai a ngai dawn ta a ni. Grey Enterprise CEO hmu tur chuan Seattle lam pana 165km zet ka kal a la ngai zui.
.
Kate-i chu thutthlengah a lo thu hlun a. "Ana...pawi ka ti lutuk aw. He interview nei tur hian thla 9 zet ka nghak a sin le. Tun tum hi kan hmai a nih leh ngat chuan thla 6 dang kan nghah leh angai dawn si a. Chutih hunah lah kan graduate daih tawh dawn bawk sia" a aw chu a chhang tuam a,peih lo viau mah ila ka tilang tur a ni lo.
.
"A ho lutuk Kate,keimah ka va kal mai dawn a lawm. Khumah lo va mu ang che. Nyquil nge Tylenol zawk i ei ang?"
.
"Nyquil zawk kha ka lo ei ang. Hei hi i zawhna tur a ka ziah ho a nia,chuan hei hi recorder. I record vek ang a,kinah keiman ka lo siam rem tawh mai ang"
.
"A chungchang engmah hriat ka nei miah lo a nia aw...!" Ka hlauhthawnna chu tih lan loh hram hram ka tum a.
.
"Zawhna ho kha ti khan zawt tawp la a ni mai. Kal vat rawh....i tlai ange"
.
"Aw le...kan kal ange. Lo va mu ang che. Chuan ka rawn haw hunah soup ka siam dawn che nia" Kate-i a nih vang chauha he thil hi ti ka ni. Ka school bag te chu laiin ka chhuak nghal a.
.
Ka car te kha chuan kal ilang chuan Seattle chu ka thleng har viau ang. Mahse Kate-i chuan a Mercedes CLK min hawh tira
.
Grey Enterprise kawt chu ka thleng ta. A building a lianin darthlalang chhah chi leh steel hlang a sak a ni a, tunlai architect thiam tak design tih hriat reng reng. A kawngkhar pawh glass vek ani a,a chungah chuan GREY HOUSE tih a inziak kulh a. Chawhnu dar 2 bawr vel a ri tawh a,ka tlai lutuk lo chuan ka inhria.
.
Building chhungah chuan ka lut a,reception counter ah chuan hmeichhe hmeltha tak,sam buang hi a lo ding a,min hmuh veleh nelawm tak hian min rawn nuih sang a. Suit jacket dum leh T-shirt var a ha a,a inhmeh hlemai.
.
"Mr Grey-a hmu tura lo kal ka nia. Anastasia Steele ka ni e. Katherine Kavanagh-i thiannu"
.
"Min lo nghak lawk aw...Miss Steele" A hma zawna computer chu an hmet nuap nuap a. "Miss Kavanagh-i chu kan lo beisei reng a lawm Miss Steele. Ding lam elevator ah sawn phei la,chhawng 20 naah i chho dawn nia"
.
Security ka paltlang theih nan 'VISITOR' tih stamp ka kawrhmaah min bel sak a. Elevator ah chuan chhawng 20 na lam ka pan chho a,kan chhuak leh chiah chu pindan hrang hrang kalpawhna a lo awm zui a, a nalhin a chhuatte chu sandstone var a phah chhuah dap a ni a. Counter ah chuan hmeichhe sambuang bawk hi a lo ding a.
.
"Miss Steele, tah khan lo nghak lawk ta che" tihpahin leather thutthleng chu min kawhhmuh a.
.
Thutna hnung lam chu meeting room ni awm tak a ni. A bang darthlalang vek a nih a vangin a langtlang vek a. Thing tha chi a siam dawhkan sei,min 20 vel thut theihna hi a inhung zui a,a piah bang darthlalang a tang chuan Seattle khawpui chu a lang chiang hle a. A nawm hmel zia mai chuhh.....WOW
.
Ka ipte a ka dah zawhna tur chu ka la chhuak a,a chanchin tlem a zawng ziahna tal lo keng ni ila...engmah hre lo tawp ai chuan a tihzia deuh tur. Putar kum 90 vel tawh nge aniang a pavalai kum 30 mi vel? Mr. Grey-a chu kum 40 bawr vel,vun uk deuh kharh leh hmul zuah deuh chhap a nih ka ring. Group discussion te hi chu kan nei fo a,mahse mimal interview ang hi chu ka la tihngai loh a nih a vangin ka huphurhin ka zam ngei mai.
.
Building chhung reng reng chu a faiin a changkang hle a, kum 40 bawr vel,mi chimlim zet a nih ka ring ringawt a.
.
A piah deuh a tang chuan hmeichhe sambuang pakhat hi a rawn chhuak veleh a, ngah nge maw sam buang hlir kher a chhawr le aw..? tih zawhna rilruah a rawn awm nghal a. "Miss Steele..?"
.
"Aw..." ka hrawk kan thian kharh a,ka confi loh hmel tlat. "Aw...."
.
"Mr Grey-a chu reilote lo nghak lawk rawh aw. I jacket kha ka lo la daih dawn em ni ang?"
.
"Aw le...ka lawm khawp ang"
.
"Refreshments order in nei em?"
.
"Um..-aih" Sambuang pakhat zawk chu a buai hmel hlemai.
.
Sambuang pahnihna chuan an melh phei a "Coffee emaw..tui emaw i in duh a ngem?'
.
"Tuisik ka lo in ang e"
.
"Olivia, Miss Steele-i hi tui va lak lawk ta che..?" A aw chu a vin deuh tep a. Chuveleh sambuang pakhat zawk chu a kal sawn nghal a.
.
"I hriatthiamna ka dil e Miss Steele. Olivia -i kha intern rawn ti hlim a la nia. Tikhan lo thu lawk rawh aw....minutes 5 hnuah Mr Grey chu i hmu thei tawh ang"
.
Olivia-i chu tui keng chungin a rawn let leh a,min pek hnu chuan an buai leh map map hlemai. Min be hman meuh lo.
.
A hnu deuhah chuan kawngkhar chu a rawn inhawng a,African American pakhat,smart zaih a inchei leh chhelo zet mai hi a rawn chhuak a,ka inchei dan chu ka inen let a,ka insit ta vang vang khawp mai.
.
Room chhung lam chu a hawi let leh a "Tun kar chu golf khelh tum ila Grey.? "
.
Mahse chhanna ri engmah ka hre lo. Chu pa chu ka lamah chuan a rawn phei a,min rawn nuih suk a,elevator lam a pan tlang nghal a.
.
"I lut thei tawh e Miss Steele, ti khan i lut tlang mai dawn nia"....Ka thutna atang chuan ka ding a,khur deuh dar dar chung chuan ka bag chu ka la a. "Kik kher a ngai lo. Ti khan lut tlang tawp rawh" nelawm tak hian min han nuih a.
.
Kawngkhar chu ka nam hawng a,mahse ka ke ka chhep sual ta. Chhutah chuan ka tlu bawk thlawp a,ka lu chuan room chhung a thleng hmasa ta ber mai.
.
Chhuatah chuan thingthiin ka inbengkang a, chutih lai chuan kut pakhat ka hma zawnah chuan min kai tho turin a rawn inphar a,ka van zak tehreng em. Chu pa lam chu ka hawi chho a.....Kareii..!! Upa deuh a nih ka lo rin vei nen.
.
"Miss Kavanagh." A kut zungtang sei sang mai chu vuanin min kai tho a. "Christian Grey ka ni e. Rawn thu lut ta che"
.
A hmel kan hmu chiah mai chu ..A la tlangvalin a chhelo lutuk.....chhelo tak ani. A sang a,suit vutbuak rawng leh kamis var a ha a,tie dum,a ruk a tial a awrh bawk. A office chu mipakhat chauh tan chuan a zau mah mah lam chu a ni......
.
A kut ka vawn zawngte chuan ka hmulthi a ding sung sung mai.
.
"Miss Kavanagh-i chu a damloh a vangin a ai ka rawn kal a. I hriatthiam ngei ka beisei Mr Grey"
.
"A nih chuan i hmingte...?" A aw chu a lum ham ham ka ti dawn nge...? A zahawmin a hawihhawm ru viau ang lawi bawk si.
.
"Anastasia Steele...English literature zirlai ka ni e"
.
"Ka hria e" . A nui nia....a nui hmel chu....awikarei...ka luangliam. "Helamah hian rawn thu ta che" a dawhkan hmaa L-shape thutthleng chu min kawhhmuh a.
.
A office chhung nawmzia mai chu....a fel faiin a thianghlim hlarh a,engkim mai chu man to tak vek a ni tih a hmel en reng reng pawh chuan a hriat theih a. Bangah chuan painting nalh tak tak a intar bawk a. A bang darthlalang vek a nih a vangin Seattle khawpui thlir nan chuan duhthusam ani.
.
Thil ka ngaihtuah tam hmain ka bag a tang chuan Kate-i min ken tir lehkha leh recorder chu ka phawrh chhuak vat a. Ka la che buai angreng zui viau lehnghal...ka zam em vang a ni. Mr Grey-a chuan phun miah lo leh dawhthei takin min lo nghak reng a,kan melh zauh a,min lo en reng lehnghal. Nui lek lek hmel hi a pu a.
.
"Ka tihpalh lutuk" kan ti a. "Pawi lo...hei hi chu ka hmang kher lo mai ang"
.
"Hmanhmawh reng reng suh Miss Steele" a rawn ti a.
.
"Ihh....Kate-i..,ka tih..Miss Kavanagh-i chuan interview chhan vel hi a hrilh tawh tho ang che tiraw..?"
.
"Aw hrilh tawh e. Students chanchinbu tur a mi a nia,bakah in graduation day ceremony ah sawm ka ni bawk a"
.
Ohh..!! Chu erawh ka lo hre ve lo reng reng. Kei aia kum 5 vel leka upa hian ceremony min rawn hmanpui ang maw...!..a pawi lo e,a ni te zawng mi hlawhtling tak a ni tawh a lawm.
.
Thawk lak hak pahin recorded chu kan on zeuh a. "Tiang dinhmuh luah thei tur hian i la naupang hle a,eng nge i hlawhtlinna thuruk hi ni reng reng?" intihuaisen lui chungin a mitah tak chuan ka en a. Nuiza hmel hi a pu deuh tlat reng a.
.
"Sumdawnna hi chu mipui a innghat ania, mipui sukthlek zawng ka thlir thiam deuh bikte pawh aniang e. Chumi lo enfiah tur chuan team hran ka ruat a,chu chu tha takin ka enkawl bawk" An ngawi deuh dat a. "Thil lut leh chhuak engkim chiang taka hriat a ngai a,bakah thil uluk taka ngaihtuah a nih hnuah chauh thuthlukna ka siam thin. Bakah ka thawkrim hle bawk. Mi tha leh taima thliar thiamna talent tha tak ka nei a,mi thate hi chu an kang awk awk mai"
.
"I vanneite pawh a ni maithei a" chu chu Kate-i zawhna ah chuan a tel hauh lo nangin a chapo ru riau a hriatna ka nei a.
.
"Vanneih tih vel hi ka rin zawk a ni ve vak lova Miss Steele. Mi a thawhrim phawt chuan vanneihna chuan a um zui mai a ni. Harvey Firestone pawhin tian a tih kha 'Mipuite hlawhtlinna leh hmasawnna hi chu hruaitu tha an neih leh neih lovah a innghat' a tih kha"
.
"I sawi danah i Lal hmel khawp mai" ka lei ka veng hman thlawt lo.
.
"Ohh....nia,thil engkim hi thunun thiam a ngai miau sia lawm Miss Steele". Ka han melh chho a,mit khap miah lo hian min lo en ngar ngar mai si. Ka thinphu a inrawn lehnghal dup dup a. "Tunah hian mi sing li chuang chhawr lai ka nei mek a,chungte chuan thla tin hian hlawh an lak theih nan rim takin hna an thawk thin"
.
"A nih i hna piah lamah hian engthil nge nuam i tih?"
.
"Nuam tih chu ka ngah mai Miss Steele" an nui deuh suk a. "Mahse mi naran tan a tih theih loh...thil hautak takte an ni hlawm"
.
Kate-i zawhna min ken tir chu kan en vang vang a.
.
"Thil siam lamah hian i thawk nasa viau niin ka lo hria a, tinge hetiang lam kher kher?". A tawng dan hi ka ngei zawk tak a ni tlat.
.
"Thil siam leh sak hi nuam ka ti a,ka duhdan hi a tha theiin mite duh zawng leh hip thei tak tura thil siam hi ka chem kalna zawng tak ania"
.
"Chuti chu i thinlung a sial lawr lak a nih dawn chu a"

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



ENG A TI NGE FB AH DAH MAI LO A, WEBSITE-AH STORY KAL LAI A LAST EPISODE KAN DAH THIN?

Kan writer te hi an thuziah avanga hlawh siamsak kan duh si a, mimal pawisa chuan kan in chawm zo dawn si lo a, member ten website a story in chhiar a, fakna lam thil milem lo lang in hmeh ve zeuh khan website hnenah fakna ti tu company lam in pawisa min pe ve zel a, chung pawisa chu writer te an topup man atan te an lo hmang ve thin a ni.
.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2017, 11:16 am

Chiang zet hian min rawn en a. "Nihte pawh a niang. Mahse mite hi chuan thinlung ka neih ve pawh hi an ring meuh lo"
.
"Tinge tiang a an tih che?"
.
"A chhan chu min hrechiang lutukte pawh a ni mahna" a nui a.
.
"Farming technology lamah pawh hian i inhmang niin ka hria a, tinge hetiang lam dah daihte?"
.
"Pawisa hi a ei theih si loh a lawm Miss Steele. He khawvelah hian eitur nei lo mi tam tak an awm mek chu a nih si hi"
.
.
"Fa lak i ni a, chu chuan eng ang takin nge i thinlungah nghawng a neih?" Ohh....tiangte hi chu a mimal thil lutuk. Ka va melh vat a,a haw em lo ang chu maw...!
.
"Tiang zawng chuan thil ka ngaihtuah ngai lo"
.
.
"Gay i ni em ni?".... khai leh...Chutiangte zawh chi em ni? Ka zawh hma khan chiang takin ka lo en hmasa lo a ni. A ziah ang angin ka chhiar tawp mai sia.
.
Thawk an la vang vang a. "Ni lo ve Anastasia" a mithmul an kan ak a.
.
"I hritthiamna ka dil e. Ka-...ummm, tah hian a lo inziak a" chu chu ka hming pangai a min vawikhat kohna a ni. Ka thinphu a rangin ka biang a rawn sa ap ap a. Ka sam chu ka bengah kan zep a.
.
"Nangma zawhna an ni hlawm nange?"
.
Ui lehh....engtin nge ka chhan ang?
.
"Err....aih. Kate- Miss Kavanagh-i siam sa vek a nia"
.
"College chanchinbu a i thawhpui a niang maw...?"
.
"Aih...ka roomate zawk"
.
"A nih chuan a aiah i rawn inpe tihna em ni?" A aw chu a zawi raih a.
.
"Aw....ni deuh mai. A mah a damlo a" ka inthiamlo ru kher mai.
.
Chutih lai chuan kawngka an rawn kik a, hmeichhe sambuang pakhat kha a rawn dak a. "Ka tihbuai che u a vangin min lo hrethiam dawn nia. Mahse Mr Grey....meeting dawt leh tan nan hian minutes 2 chiah a awm tawh a"
.
"Kan la zo lo a,meeting dawt leh chu lo cancel mai ta che Andre"
.
"Aw le...Mr Grey" chu nu chu a chhuak leh nghal a.
.
"Eng nge kan sawi lai khah Miss Steele" Christian-a chuan a rawn ti a.
.
"Khawngaihin....kei chu ka kal tawh mai ang"
.
"I chanchin hriat ve ka duh a lawm. Ti lote chuan a fair nang" . A mit paw ram mai chuan min rawn melh a,dawhkanah a kiu nghatin a khabe a dawm a. A hmui chu......ka chil ka lem khawlh a. Sawi lo law law zawk ang.
.
"Sawi tur vak pawh a awm lo" ka van lai tehreng em. Min en reng mai bawk si.
.
"I graduate hnuah eng nge tih i tum?"
.
"Ruahmanna pawh ka la nei lo Mr Grey. Final exam hi kan hmachhawn ve phawt ang a"
.
"Hetah pawh hian internship chu a tih theih reng a" ka meng phawk nghal hru a. Hna min offer tihna em ni?
.
"Kan fan kual pui dawn che em ni ang?" a rawn ti a.
.
"I buai em kha Mr. Grey. Bakah ka hawna tur a la hla si a"
.
Pawn lam chu kan en a,ruah lah chu a tla cher cher reng a. "A nih fimkhur takin i khalh dawn nia"
.
"Interview neih min phalsak a vangin ka lawm e"
.
.
Pawn thleng min rawn thlah chu mak ka ti hlemai. Kei aiin pawna lo awm Andre leh Olivia-i te chuan mak an la tih hmel zawk.
.
Olivia-i chuan ka coat min rawn laisak a,Grey-a chuan ka darah min rawn kuah a,Elevator lam min pan pui a,button chu min hmeh sak thlap bawk a.
.
Kawngka a rawn inhawn chuan rang takin ka lut a,he hmun hi ka chhuahsan vat a ngai. Christian a chu bangah a kut pakhatin a innam khalh a,min rawn en reng a. A chhelo in a van hmeltha tehreng em. A mitmeng mawlh mai chu....min kang ral vek thei dawn hial hian ka hria.
.
"Anastasia" a aw chu a dam diai a.
.
"Christian".....elevator kawngkhar chu a inkhar nghal a.
.
www.storyfb.com
END OF CHAPTER -1

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2017, 11:18 am

▨ FIFTY SHADES OF GRAY ▨ Chapter -2


Postby Noah Hringngen » Tue Nov 08, 2016 10:01 pm
.
.
Elevator chuan building hnuai ber lam ka pan a,ka thin phu ran zia mai chu. Kawngkhar a inhawn veleh rang takin ka chhuak a, darthlalang kawngkhar lampan chuan ka tlan a, pawn lam Seattle boruak thiang kak mai chu ka hip nghal vang vang a. Ruah vawt var mai a lo tla seng seng a,van lam hawiin ka maimitchhing a,thawk kan la vang vang a.
.
Christian Grey-a ang reng khan mipa dangin ka thinphu an la ti rang ngai lo. Enge a chhan tih pawh ka hre bik lo.
.
Ka lu chu kan thing nawk nawk a,.tunah chuan ka thawk pawh a pangai leh tan e. Ka car awmna lam pan chuan ka kal ta nghal a.
.
Khawpui chu ka chhuah san a, ka mitthlaah erawh interview ka neih lai ringawt kha a awm reng a, mawl ka intiin ka awm dan chu atthlak ka ti hnuhnawh hlemai. Bakah ka over deuh mah mah chu a ni. A tha e, a chhe lo a, mi hipna a ngah a, a inringtawk hle bawk. Mahse kawng leh lama thlir chuan a chapo ve deuh arh a, mi a thuhnuaia dah tum ran mi a nih ka ring. A thu a duh ngawt ang.
.
Ka ngaihtuah zawng chuan ka hnungzang hi a hit thla mem mem reng a, lo chapo deuh pawh nise a nihna en chuan a in mawi lo chuang hauh lo. Ka kalsan tawh chung pawhin min la chenchilh reng chu a nih hi maw...! A chanchin tlemte tal min hrilh lawk loh a vang khan Kate-i chu ka la haw ru tho mai. Inrinlawk dan ka lo thiam tal tur hi a nia.
.
Zawhna a chhanna thenkhatah kha chuan sawi chhuah duh vak loh thil, thup deuh chu a nei chiang a lawm. Kate-i zawhna ho lah kha..urhhh. Fa lak a nih chungchang leh mawngkawhur a nih leh nih loh chungchang te kha...! Uii...ka zak lutuk, engtin nge maw kei pawh khan ka zawh mai theih zawk le..? Lal Katherine Kavanagh-i tak chu awww......!! Mawl leh lutuk.
.
Grey-a mitmeng mawi lutuk tak kha........A va ninawm teivet ee..! Ana, theihnghilh rawh. Ka lu chu kan thing nawk nawk a. Hun dang dai leh hriat zui vawng vawng tlak chu a ni teh meuh mai. Mahse chu mi a vang chuan ka ngaihtuah reng tur tihna a ni lo. Ring deuh leng lawngin hla ka play a, a hma aia chak mah chuan ka tlan vung nghal a.
.
Kate-i nen hian kan college Vancouver bul deuh lawkah apartment khatah kan khawsa dun a, khawsa dun tih lemah Kate-i nu leh pa ten apartment chu an lei sak a, keiin tlem a zawng luah man ka lo kawn ve thin. Kum 4 zet chu kan cheng dun ve ta.
.
.
"I lo let leh tawh a ni maw Ana...?" Kate-i chu sitting room ah a lo thu a, lehkhabu a lo inchhawp hnawk nuaih a. A rawn tho a, min rawn kuah a.
.
"Ka lo ngaihtuah hman tep che a lawm. I lo let leh vat chu ka lawm ngei mai"
.
"Ohh..... inkawmna hun tha tak kan va hman kha" tih pahin ka recorder ken chu ka pe let a
.
"Ana, ka van lawm tak em. I lakah ba lian tak ka nei ta a nih hi. Chuan...han sawi teh. Eng ang mipa nge a nih?" Ohh....a dil chhut leh tan dawn e.
.
Chhan chu ka duh a...mahse engtin nge ka sawi ang?
.
"Kan inhmu nawn leh tawh dawn chuang lo va, ka va zo thei chu ka thaw huai mai. Invau behna hnuai a va thu ni hian ka inchan ber". Rap hmel deuh hian ka dar kan san ak a. "Thil reng reng a chik em em a, bakah thil a ti mai mai ngai lo tih a hriat theih mai. Chuan a la naupang....., ka rin ai daihin ka hmu naupang a"
.
Kate-i chuan min lo en kar a, a lam chu ka hawi a.
.
"A reng reng thuah i va mawl ve. A chanchin ziahna emaw talte min ken tel tir tur che hi ania. Khatianga research va nei ve si ah chuan mawl min ti ru ngawt ang". Kate-i chuan a hmui a lo hup a.
.
"Awi lehh....Ui, Ana..a pawi lutuk. Ka lo ngaihtuah miah lo va, a nachang ka lo hre lo a ni"
.
Ka thaw hak a.
.
"Mahse mi hawihhawm tak a lo ni hlauh a. Bakah a tawngkam reng rengte kha a puitling thlup mai. Kum 20 bawr vel tawngkam chu a ang lo. A reng reng thuin kum engzat nge a nih reng reng a?"
.
"Kum 27. A nachang ka lo hre lo chu a van pawi. I fel hrim hrim e. Hei i rawn record thlap bawk a, kan buaipui a nge"
.
"I va that tawh hmel ve. Soup kha i lo hawp em?" Kan thusawi lai chu thlak daih ka duh.
.
"Hawp e....nidang ang bawkin a tui. Ka dam sawng sawng mai". A rawn nui sen sen a. Ka sana chu kan en a.
.
"Ka kal a ngai. Dawr lamah tih tur ka ngah"
.
"Ana, i chau lutuk a nge"
.
"Chau lo ve. Nakinah kan inhmu leh dawn nia"
.
College ka kal tirh a tang hian Clayton hardware dawrah ka thawk a, kan awmna lamah hi chuan hardware dawr lian ber a ni nghe nghe. Tunlai tak phei hi chu mi inchhung chei tha an tam a, chakkhai rawn lam an awm reng a vangin kan buai thei laih laih thin hle. Dawr nei tunu Pi Clayton-i chu ka va hmu a.
.
"Ana, vawiin chu ka rawn kal hman lovang i ti emaw ka tia"
.
"Ka thil va tih kha rin ai takin ka va zo leh hma a"
.
"I lo kal hram a, i fel e"
.
Chhekin lamah lut pheiin bungraw remfel ngai ho chu ka khawih zui nghal char chara. Kan buai a, thil dang hian ngaihtuahna a luah hman meuh lo.
.
.
In a ka haw chuan Kate-i chu thutthlengah lo thu thluangin earphone a lo vuah a, laptop nen a lo inchhawp rap a. A hnar a la sen hlar a, mahse a thil ziah lai erawh a ziah tui hmel hle. Kan final exam a ni thep tawh a, kei pawh vawiinah engmah ka la zir lo.
.
"Rin ai daihin i va ti tha e Ana. Mahse a office fan pui che a tum laia i hnar kha chu i ti uihawm khawp mai. Nang nen a hun hman dun a duh tihna a nia. Rei lote pawh nise"
.
Ka thin a phu nghal dup dup a, chutiang a nih pawh ka ring nek lo. Min fanpui kha chu a tum ngei a lawm. A lal ram min en kual pui a duhte pawh a ni mahna.
.
"A nih a chhelo em?" a rawn ti leh a.
.
"Aw...chutiang vel chu a ni mai" ka lo ti ringawt a.
.
"Ti teh Ana, sawi tha ve mai la. I hmuh dan hrim hrimte pawh ka hre chak ve a"....hrilh hma chu a dilchhut leh ching cheng dawn e.
.
"Hnathawh nuam a tih hmel. A inthunun thei a,mi chaldelh riauna erawh a nei. Mahse a ruka nelawm riauna a nei tel a, mi a aikaih theih hial ka ring"...ka hmuh dan ang chu ka sawi tawp a. Thu dang daih sawi ka duh.
.
"Mipa..., mi aikaih thei ka hriat vawi khatna" a nui haka
.
Ka sandwich siam lai chu ka phuah khawm mawlh mawlha.
.
"A reng reng thuah eng vanga mawngkawhur a nih leh nih loh kha hre chak nge i nih a? Khatiangte inzawh chi pawh a nia mawni le...! Min ti zak tak tak a ni. A lungawi lovang tih ka hlauh hman zia mai chu" ka mitthlaah a hmel a rawn lang nghal uar uar a.
.
"Khawchhung chanchinbu velah hian hmeichhia ngaihzawng a neih thawm hi sawi a awm ngai lo va"
.
"Ka zak tak tak a ni. Engkimah khan ka zak vek. Inhmu leh tawh ngai lo tur kan ni erawh ka lawm khawp mai"
.
"Amak vak vak thin emai Ana, a lan danah a ni pawhin rilru nuam lo turin engtinmah a chhan loh che kha"
.
Mi a han tlawn vel hmel chu a hmuhnawm letling phian mai.
.
"Kha Sandwich i duh ve em?"
.
"Ui... i van fel"
.
Chumi tlai chuan Christian Grey-a chungchang engmah kan sawi zui tawh lo. Zanriah kan ei a, chumi zawhah Kate-i'n a article ziah a buai pui zuia, keiin ka essay ziah tur ka buaipui bawka.
.
Ka zawh meuh chuan zanlai a ni der tawh. Kate-i pawh a mutna a rei tawh. Ti kha chuan thawhtanni pawh thatho takin ka hmuak thei tawh ang.
.
.
.
Kar tluan mai chuan kan buai em em reng mai a, ka lehkhazirna lamah ka rilru ka sawrbinga, Clayton dawrah ka thawk pah bawk a. Kate-i pawh magazine editor anih tawpna tawh tur a nih a vangin engkim mai chu a uluk em em a, a kutchuak hnuhnung ber ni tawh tur chu tih mai mai a tum bik hauh lo.
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2017, 11:18 am

Zirtawp zan a ni a, Kate-i nen kartawp chawlh hman dan tur vel kan sawi dun lai chuan doorbell a rawn ri a, kan thianpa Jose-a, champagne um nen a rawn lut nawlh mai.
.
Jose-a hi Washington a college ka kal atanga ka mi tawn hmasak ber leh ka ngainat hmasak ber a ni.
.
Chubakah ka nu pasal pahnihna Ray leh Jose-a pa te hi sipaiah an lo tang ho tawh thin a ni awm e.
.
Jose-a hian engineer a zir meka, tlangval bright tak a ni. Mahse a tuina erawh thlalak lam a ni daih thung. Thlalak chu thiam tak a ni ringawt.
.
"Chanchinthar tha tawk ka rawn nei ania" tihpahin a rawn nui sen sen a. "Thla leh khian Portland Place Gallery in ka thlalak ho an phochhuak ve dawna"
.
"Ekhai a....a va ropui ve. Ka lawmpui lutuk che" tihpahin ka va kuaha, Kate-i pawh chuan a rawn kuah ve nghala.
.
Jose-a hi ka thian tha tak a ni a, mahse a ruk tak chuan thian ang ringawt lovin min en deuh tih ka hria. A fel a, a bula awm a nuam em em a, mahse ka duh chi a ni lo. Kate-i hian ngaihzawng nei tur hian mi hi a ti thla zen a, mahse ka duh ang tak hi ka la tawng lo a niang. Ka hmuh zawng ringawt pawha min ti trim sung sung thei tu, ka ngaihtuahna luah chem chem thei tu leh zan mut hmuna suangtuah veng veng theih tur mipa ka la tawng lo.
.
A chang phei hi chuan dik lohna ka nei deuh a nihte hi ka ring thin. Hmangaihna kawng ka zawh ve tak tak hmain ka senior hman maite a nia ka rin ni. Mahse hmuh miau si loh chuan indem ngawt theih pawh a ni bik chuang lo.
.
Chumi chungchang ka ngaihtuah lai chuan zawite a ka beng a min rawn hrilh ru ser ser tu hi a awm tlat. Mr Grey-a kha......zantin ka ngaihtuah thin a ni lawm ni? Khai aa....chutiangte ngaihtuah. A atthlak emai.
.
Jose-a Champaign bottle hawng lai chu ka thlir renga. A sang a, a t-shirt hak leh a jeans hak chhanah phei chuan a pian chu nalh tawk tak a ni. A dar a hlai tha a, a tihrawl pawh a nalh tawk khawp mai. A vun a ngo vur lo va, a sam a dum hlap a, a mitmu pawh a dum. Jose-a chu a hmelchhe lo reng reng, mahse kan ngaihtuah thin a, thian bak kan ni thei lo. Bottle chhin a hawn zawng chuan a ri pawp a,kan vai chuan kan phu dual a. Jose-a chu rawn hawi chhuakin a rawn nui ver ver a.
.
.
Inrinni hi chu dawr chhung hi mangchia ang mai a ninawm a ni ringawt. Customer ho hian min zar buai renga, bungraw tleng thar rem fel ngai nen. Midang ho lah chu part time a thawk an ni deuh vek bawk si. Mawng pawh ka hung hman lo.
.
Chaw chhun ei lai chuan Pi Clayton-i chuan list ho lo check tura min tih a vangin order lak ngai leh rawn thleng thar ho kan ziahna list chu endikin computer hmaah chuan ka thu ran a. Kan thil neih loh order lak ngaite chu ka enfel zung zunga.
.
Keima tawkah ka buai hlemai. Ka mit chu la sawnin ka hma lamah chuan ka hawi chho zauh a, ka phu chiang lutuk. Christian Grey-a chu counter hmaah chuan a lo ding run a, chik zet hian min lo en a.
.
Ka lungphu a tawp dawn.....
.
"Miss Steele, rawn thawn thut che chu a nuam dangdai hlemai". Min melh dan chu ka hrethiam lo. Mi a chik hmel angreng bawk si.
.
Eng nge hetahte a rawn tih dawn reng reng le...? A sam a thur deuh chhup a, bakah a inchei nalh tehchiam lo. Kawrlum phiar leh jeans a ha a, awm hmun pheikhawk pangai nen. Ka khabe chu a thlawn dawnin ka hria. Ka ka awmna pawh ka hre tawh lo.
.
"Mr Grey..." ka aw chu a zawi hle a, chu bak sawi theih ka nei lo. A hmuiah chuan nui hmel tlem a langa, a mitmengah a nuih a za tih a hmuh theih. Hetiang a fiamthu hi a nuam tih zawng a ni ve te pawh a ni mahna.
.
.
END OF CHAPTER -2

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2017, 11:19 am

▨ FIFTY SHADES OF GRAY ▨ . Chapter -3



Postby Noah Hringngen » Wed Nov 09, 2016 10:42 pm
.
.
"Mr Grey..." ka aw chu a zawi hle a, chu bak sawi theih ka nei lo. A hmuiah chuan nui hmel tlem a langa, a mitmengah a nuih a za tih a hmuh theih. Hetiang a fiamthu hi a nuam tih zawng a ni ve te pawh a ni mahna.
.
"Helai velah hian ka rawn kal a" tiin a rawn luh ngawtna chhan chu a sawifiaha. "Mamawh thenkhat lei ka lo ngai bawk nen. Kan inhmu nawn leh ta chu a lawmawm hlemai Miss Steele" a aw chu a zangkhai vaha.
.
Ka awmdan zawng zawng chu a buai vek. A hmeltha ringawt a ni lova, mipa mawina zawng zawng hi a nei vek pawh ti ila sawi sual ka inti lo. Thawk chena tibuai vek thei mipa chu hetah Clayton's Hardware store ah hian ka hmaah a ding ve reng mai si.
.
"Ana..., ka hming chu Ana a ni e" ka phun sap a. "Engah nge ka puih ang che Mr Grey?"
.
A nui leh ta. Thuruk, tuma hriat ve chi ni lo pai ru hi a ang deuh reuha. Thawk kan la vang vanga, professional taka ka awm a ngai. He dawrah hian kum 5 zet ka thawk tawh a ni lawmni? Ka ti thei tur a ni.
.
"Thil thenkhat mamawh ka nei a. A hmasa berah cable hrui ka mamawh a" a phun sep a. A mit meng chu a vawt raiha, mahse nuihza hmel erawh a pu deuh tlat lawia.
.
Cable hrui aa...?
.
"Size chi hrang hrang kan nei a. Ka va enpui dawn che em ni ang?" Ka aw ri chuan ngai a la awh thei chiah lo.
.
"Ka lawm ngawt ang. Min va en pui la Miss Steele.." Counter a tang chuan ka chhuak a, pangai taka awm ka tum viau nangin dik tak chuan ka ke a khur nasa lutuk a, ka tlu thlawrh ang tih ka hlau ber zawk.
.
"Helai hi electric lam bungrua kan dah khawmna chu a nia" ka aw ki pawh a pangai ta deuh e. A lam chu ka hawi chho a, mahse ka inchhir lutuk. A hmeltha lutuk a, ka sen nghal trawn trawn mai.
.
Electric bungrua lam tura Portland ah daih daih a lo kal chu ka hrethiam lo. Khawpui zawka awm an ni a, an awmna lamah lah dawr lian tak tak a tam vei nen. Min hmuh a chak vangin a lo kalte hi a ni mai lo maw...? Awih awmloh lutuk. A ni ang hmeltha, hausa leh khawpui mi lehnghal hian eng vangin nge maw min hmuh chak tehlul ang ni. Chutiang ngaihdan thing lutuk chu ngaihtuah pawh ngaihtuah chhin tur ka ni lo.
.
"Sumdawnna lam vang em ni Portland ah hian i lo kal?" Ka aw ki chu a ring mah mah. Kawngkhar kara kutzungtang tang pawh chhuah ang mai a lawm a nih le...Ana, cool deuhin.
.
"Washington University a farming division ka rawn tlawh a. Lei an leh kual vel dan leh soil science lam ka rawn en puia".
.
Kan cable neih ho chu uluk takin a en phei diat diat a, a kutzungtang sei sang mai chuan a khawih phei dan dan a. Sarang a in pack pakhat chu a la nalh a.
.
"Hei hi kan la ang e" . Nui teuh deuh hmel hi a pu reng a, kei lah ka lo lai zel mai si.
.
"Mamawh dang i la nei em?"
.
"Masking tape ka duh tel bawk"
.
Masking tape aa...?
.
"In inchei tha em ni?" Ka inngaihtuah hmain ka sawi. In chei tha ni se tinge a staff te emaw hlawhfa emaw a chhawr mai loh le?
.
"Aih, chei tha lo ve" min rawn nuih sak a. Min nuih zat deuh tlat a hriatna ka nei.
.
"Helamah hian" tiin hmun dang lam chu ka pan leh a. "Masking tape chu thil chei thatna lam dahna hmunah hian kan dah a"
.
"Helai hmunah hian i thawhna a rei tawh em?" A aw chu a zawi hle a. Ka hnung lama min zui chung chuan chiang zet mai hian min rawn en a. Enga tinge mawni min melh a piang chuan ka laih em em ziah mai le..? Tleirawl kum 14 mi lek ang maiin a lawm le ka awm le.
.
"Kum li". Kan kalna tur pawh chu ka thleng ta e. Masking tape kan neih ho chu ka phawrh a.
.
"Kha mi kha ka lo duh ange". A kawh tak chu phawrhin ka pe nghala.
.
Kan kut leh kut a intawh zawng chuan current man ang mai hian ka hit chhuak veka, ka kawchhung zawng zawng nen lam zuk fan nghal thei a mawle.
.
"Eng nge thil dang?" Ka sawi pah chuan ka thaw haka. A lo meng zau deuh kawk a.
.
"Hrui....ka la mamawh"
.
"Helamah hian" ka biang sen tawn tawn chu thup ka duh pah bawk nen, chhuar dang awmna lam chu ka pan vata.
.
"Hrui chu rubber a tanga siamte, natural leh hrui hrual ang chi te hi kan neih chu a ni deuh mai a"
.
"Natural kha 5yard a sei ka lo la ang e"
.
Hrui chu pawt chhuakin a duh chen 5yard chu ruler in ka teh a, ka tan a, tha takin ka tel nghal a. A mitmeng paw ram mai chuan min melh char char tih ka hria. Va hmu kher lo mah ila ka hre thei.
.
"Girl scouts tih velah i tel ve em?" A hmui chu en loh hram hram ka duh.
.
"Pawl anga thil tih ho tih vel hi ka rilru awn zawng a ni ve vak lo va Mr Grey"
.
A chal chu an chhuar ak a.
.
"A nih eng nge i ngainat Anastasia?" A tawngkam chu a dam diai a, nuihza inthukru hmel bawk kha a pu leh tawh.
.
"Lehkhabu" tiin ka chhang a. Mahse ka thinlung chhungril tak chuan nangmah....nangmah hi ka thil ngainat chu a ni tiin a chhang daih thung.
.
"Eng lehkhabu nge i ngainat a?" Sir lamah a thle deuha. Engah nge maw chutiang mai mai te a hriat chak le...?
.
"Umm...., lehkhabu tlanglawn ang ho hi a ni mai. Classic lamte, British thu leh hla lamte hi a ni deuh ber"
.
A kutin a khabe a tuai rauh rauha, ka chhanna chu ngun taka lo ngaihtuah chhunzawm hmel hi a pu a.
.
"Mamawh dang i la nei em?"
.
"Ka hre tawh bik lo. Min han kawhhmuh turte i hre mial em?"
.
"Nangma thil tur bik em ni?"
.
A lu a lo bu nghauha.
.
"Hnathawh thawmhnaw lamte...?"
.
A mit ko a lo san ak a. Ngati nge maw nuihza hmel a put reng mai le..?
.
"I thawmhnaw hak lai nen a hnathawhte chu i ui ve deuh ka ring" tihpahin a jeans hak lam chu ka melh a.
.
"Hengte hi chu ka phelh vek zel a lawm" a nui suk a.
.
"Umm...." ka biang bawk chu a sen leh ta tawn tawn e. Tawng tam tawh loh ka mamawh a ni. A duh la zo se, kal vat teh se.
.
"Hnathawh thawmhnaw chu ka lo la tel ang"
.
Hnathawh kawr pawl kan hai chu la in ka pe a. "Mamawh dang i la nei em?"
.
Ka zawhna reng a ngaithla lo. "I article ziah chu eng tika chhuah tur nge a?"
.
A tawp a tawpah chuan zawhna pangai tak min zawt ve ta e. "Keima khawih a ni lo. Ka thiannu Katherine-i ziah a nia, writer a nia. A lawm khawp mai. Kan college megazine editor a nia, interview kha a chang ve hman dawn ta lo emaw a lo ti hmana". Chutia titi pangai ve deuh hlek kan han sawi takah chuan kei pawh ka pangai chho tan e. "Mahse tuna a la buaina ber chu i thlalak original engmah a nei lo va"
.
Grey-a chuan a mithmul an san ak a. "Engtikah nge thlalak chu a mamawh dawn a?"
.
Chu kher chu ka lo hriat pui miah lo. Ka hre lo tih nan ka lu ka thing ringawta.
.
"A nih chuan naktukah hian ka hman ka ring"
.
"Thla la tur chuan i lo kal thei dawn tihna em ni?" Ka aw ki chu a ring leh ta chiam e. Kate-i lawmna chu a van thuah hnih dawn tehreng em. Bakah kei pawhin naktukah a hmel ka hmu leh thei dawn tihna a nia.
.
"Kate-i chu a lawm viau ang. A thla la tu tur lam kha chu keimahni lamin kan lo ngaihtuah vek mai ang". Ka lawm lutuk bawk si nen ka nui lo thei lo. An thaw hak a, eng emaw ngaihtuah, engto nei hmel hi a pu lek lek a.
.
"Naktuk lamah kan inhriat tir leh dawn nia". A kekawr hnung ipte a tang chuan a wallet a rawn phawrh chhuak a. "Hei hi ka card a nia, ka number pawh a awm ang. Naktukah zing dar 10 hmain min rawn be dawn nia"
.
"Awle..." ka nuih seih a, Kate-i chu a a lo chauh ngei ang le
.
.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 26th, 2017, 11:20 am

"ANA"
.
Paul-a chuan bungraw dahkhawmna a tang chuan min rawn au a, a ni hi Pi Clayton-i nau a ni a. Princeton lamah a haw daih sia, vawiin angah kher kher chuan hmuh ka inbeisei lem lo a sin.
.
"Min lo hrethiam lawk mai aw Mr Grey" ka inher a, ka kal san nghal a.
.
Kan han inhmu chu Paul-a chuan min lo kuah cheng chunga. "Ana, Hi...Kan inhmu leh thei chu a lawmawm hlemai aa"
.
"I tha maw Paul..? I unaupa birthday hmangin i haw daih emaw ka lo tia?"
.
"Nia..., i va lang tha ve. I lang tha tawp" ka darah chuan min rawn kuah a. A ni nen hi chuan kan innel angrenga, a over chi a ni bawk nen.
.
Grey-a lam chu ka va hawi a, mupui ang mai hian min lo en renga. "Paul, customer kan nei mek ania". Grey-a mitmeng a tang chuan kan lo awm dan vel chu a ngaihdan a nih vak hmel loh.
.
A thil lei ho chu ka enfiah sak nghal mawlh mawlh a. Hrui, hnathawh kawr, masking tape leh cable wire. "A vawiin $43 man a ni e" tihpahin ka han melh chho a, a ni lah chuan min lo en sa runa.
.
"Bag i duh tel em?" A credit card lak pah chuan ka ti a.
.
"Ka lawm khawp ang Anastasia". A hmui mawi takina ka hming a lam zawng chuan ka mur nghal sung sung mai. Ka thinphu a rang nghal ringawt nia.
.
"Thlalak chu in duh hunah min rawk call mai rawh aw...?" Chhan pawh ka chhang thei tawh lo. A credit card pek let pah chuan ka bu nghat a.
.
"E lehlawk Anastasia, Miss Kavanagh i zawkin a interview a rawn nei thei lo kha ka lawm hnuhnuh leh zawk ngawt mai" min nuih suk a, dawr a tang chuan a chhuak nghala. Engtin nge ka awm? Khawiah nge ka awm? A chhuah hnu pawh chuan kawngkhar a tang ka thlir zui vawng vawng a.
.
Aw le..., zep thu a cheng lo, ka duh a ni. Chu chu engti kawng maha thup rual a ni lo va, hetiang feeling hi a hmain ka la nei ngai lo. Min hneh satliah a ni lo, min hneh vawng vawng. Chutih rualin ka phu loh dan erawh namai lo tak a ni.
.
Ka tih tur chu photographer tur zawn. Naktukah ka hmu leh dawn ngal bawk si. Kate-i call vat ila, thla la tura inbuatsaih vat a ngai.
.
.
END OF CHAPTER -3

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)