◆ THE OTHER CEO ◆ Season 1 BY Noah Hmar

Ngaia
Site Admin
Posts: 25813
Joined: April 30th, 2016, 4:07 pm

◆ THE OTHER CEO ◆ Season 1 BY Noah Hmar

Unread post by Ngaia » May 4th, 2016, 9:30 pm

Olivia Bailey-i chu kum 23,mahni a cheng leh Alexander Corporation a an CEO Wilson Alexander -a hnuai a thawk lai mek ani.
.
Kum 3 ngawt an thawh dun hnu chuan Wilson Alexander -a chu Lung thalo avangin a boral ta hlauh mai. A company chu a fapa Pierce Alexander an a enkawl angai ta. A pa dinhmun chu arawn luahkhat zo meuh angem?
.

.
CHAPTER -1
http://storyfb.com
.
New York City a khaw awmdan chu a nuam tawk hle mai. Thing a siam thutthlengah ka thu a,thingkung kar atanga nizung rawn lut chuan ka vun chu arawn chhun tle ser ser a. Keimahin chu lai Park ah chuan ka thu a,ka apartment atanga block hla lo te a awm ani. Thing kung hnah te pawh a til tan a,thlasik rawn thleng mai tur tan an inbuatsaih tan mek ta.
.
Kar kal ta mai a thilthleng kha ngaihtuah loh hram chu ka tum nang in,kha tiang khawp a mi tha leh fel Wilson Alexander -a chung a thleng tur atan chuan a pamhmai deuh chu ani. Ani chu ka boss ani a,chumai bakah ka pa angchiah pawh nimai lovin ka pa ang tak tak ani. A personal assistant niin kum thum ngawt chu kan lo inzui ve a,khatih chhung zawng khan a kiang a thawh hrehawm tih lai reng ka nei lo. Eng emaw chang a han thinchhiat deuh chang te chu a nei teh meuh mai..mahse a hnu a ngaihdam dil a thulh ngai lo. Bakah ka dem lo hrim hrim.....Alexander Corporation a kan CEO ani miau a,a mawhphurhna kha a sang em atin ni.
.
Alexander Corporation chu khawvel pumpui a Hotel Company lian ber te zing ami ani a,ram hrang hrangah Hotel changkang leh ropui tak tak an ngah hle. New York ah erawh hi chuan building pakhat chauh an sa a,chu chu ka hmuh ve chhun chu ani mai. Mahse han en mai pawh hian a ropui tih piah lam ani.
.
Ka nunah hi chuan nawmsakna leh nuam tawlna lam chi hian hmun a khuar ve tehchiam lo. Kum 16 mi lek ka nih laiin ka nu leh pa in min thih san a,ka naupan lai hun zawng pawh in mi naran khawsak ang in ka tal ve naw naw a.
.
High School ka graduate hma zawngin ka pi bulah ka khawsa a,kum 23 ka tlin chuan keimah a in ngaihtuah ve tur in New York ah hian awmhmun ka khuar ve ta ani.
.
New York ah chuan hna zawngin ka buai ve hle a,chutih rual in ka pi erawh ka theihnghilh ngai lo. Holiday apiangin ka tlawh ziah a,ani chauh chu ka chhungkaw neih chhun ani. Chutih rual erawh chuan a bulah ka nun pum erawh ka hmang thei bik si lo.
.
Wilson Alexander -a nen hian kum 3 kal ta khan kan in tawng a,chu chu New York a ka awm atanga kum khat leh a chanve na chiah ani. Zing lamah chuan ka dan pangai te in hna zawng tur a insiam in ka chhuak leh a,Company hrang hrangah hna dilna ka thehlut ve zel a,chu mi ni pawh chuan Alexander Corporation chu hmun panga ka kalna chiah ani.
.
Ka pheikhawk bun a sang bawk si nen ka ke chu a kham ut ut tawh a,midang tan a nelawm tak a ka lan reng theih nan nui hmel ka put reng angai a,ka biang te chu a kham thum tawh. Mahse chu chu a pawimawh tlat si.
.
Alexander Corporation building chhungah chuan ka lut ve ta rawih a. Ka khaw hawilo lutuk a leiah tu emaw hi ka la su chawrh lehnghal.
.
Ka kat nghal dawrh a,chhuat a ka tlu tur chu ban tha chak tak hian min rawn chelh hman a. "Awii.....lalpa. Ka tihpalh lutuk" ka hlauthawng bawk nen chuan ka rak chul a.
.
Ka meng nghal kawk a,ka tawlh hnung nghal vat a. Chupa lah chuan hmuhnawm thlir tak hian min lo thlir a. Min rawn nuih a "Woah....kawng en ngun deuh i ngai anih kha. Anih loh pawn chawl hahdam phawt rawh...kha i chauh hmel lutuk alawm le"
.
"Ka tihpalh lutuk ka pu. Ka kalna tur ka lo en tawk lo ani" zam ru tak chung chuan ka han ti a.
.
Ani erawh alo nui mai mai thung. "Anih chuan.....helai a ding hmeichhe hmeltha tak hian eng nge ka building ah hian tih arawn tum tih hi ka hre thei angem?"
.
Enga...? Tunah khan ka building ati em ni? Hei hi ama ta maw..? "Min lo hrethiam lahh....?"
.
"Engti turin nge i lo kal?"
.
"Ka...ka,ihh...Human Resources a ka hna dilna rawn thehluh ka tum a"
.
Hrethiam hmel tak hian a lu a bu nghauh a,a tawng leh hma chuan second reilo te min han en vang vang a. "Tunge ka nih tih i ring thiam mai em?" Ka chhanna chu a han nghak vang vang a,ka chhan tak mai loh avang chuan ahan nui deuh suk a. "Wilson Alexander, he building nei tu leh CEO ka nia. Mak i ti viau lo maw? Miss" tihpah chuan a kut chu arawn phar chhuak a.
.
Mak ka tihzia mai chu....chutiang ni si min hau hrep zawk awm tak. Chuta karah min chibai tum in kut arawn la phar chhuak zui.
.
Ka khur ti tih dawn alawm mawle. "O-oh...um..." za lo deuh chuan ka han nui lui a,hetiangah hi chuan ka chi-ai tlat zel. "Olivia....ka hming chu Olivia Bailey ania" tihpah chuan ka han chibai a. Ka kut lah chu a thlan nasa ropui lehnghal.....Alexander Corporation nei tupa hma meuh a han din chu a zamawm duh hlemai. Inhmuh hmasak ber na atan chuan duhthu asam lo ngei mai.
.
"Hming mawi tak anih chu" tihpah chuan nelawm tak hian ahan nui a. "Chawchhun ei tur in ka chhuak dawn chiah a,lo kal ve ta che. Kawm i nuam dawn riau in ka hria"
.
Awii lehh.....ka awih theilo. Vawikhat chiah kan la inhmu a,kan la inhriat chian loh tehlul nen,chawchhun eipui ah min sawm mai chu aniah. Chubakah kawm ka nawm hmel ala ti zui. Mahse mahni pa te rual nen a chhuah dun hi chu ka hreh ve deuh asin le...Mahse ama kum angah chuan la lang tha tak ani. A suit hak chu a inhmeh hle a,a mit chu rangkachak rawng ang mai ani. A sam tuak ve pheuh pheuh tawh erawh a hmuh hmaih theih loh. Kum 50 bawr vel,la valai tak ani.
.
Rei vaklo chu ka ngawi reng a,a tih chi meuh angem?. Mahse hei hi ka tan hun tha tak zawk ani ngei ang. Chawchhun eipuiah min sawm ani a,chu chu hna zawng a vak hmeichhe pakhat ve mai tan chuan a hlu lutuk.
.
A aw chu arawn thian kharh a,ka hawi chho vat a. "Chawchhun ei dun a in date ang type a kal ka duh ni a i rin chuan i ring dik lo ani. Ka han en mai che hian mi tha tak leh theihna ropui tak nei ini tih ka hria. Hna pawh ka pe thei ngei ang che. Chu chu i duh em?"
.
A ti tak tak angem le? Chutia awlsam deuh a hna han inpek tawp mai chu....
.
"I ti tak tak ami...?" Ka phur lutuk chu ka puak chhuak lo chauh. Tiang ang em em a vanneihna hi ka tawng ang tih ka ngaihtuah pha ngailo reng reng. Zuan tawr tawr mai ka duh. .
.
Min rawn nuih leh a "Ti tak tak e. Hei hi kan tihdan ani ngai miahlo nangin danglam bikna nangmah ah ka hmu ani. Chawchhun ei tur chuan min rawn zui dawn em?"
.
Ngawi reng in ka lu ka lo bu a. "Anih chuan kal i la?" tihpah chuan min kal hmasak tir a,ka hnungah min rawn zui ve nghal a. Ka han hawi let a,nuih seih pah hian "Ka lawm e Mr. Alexander" ka han ti sep a.
.
"Khawngaihin Wilson tiin min ko rawh"
.
▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒
.
.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2016, 8:59 pm

CHAPTER -2
.
.
Kum thum tal tap chu Wilson-a bulah chuan hun ka hmang a,a Personal Assistant ve mai ka ni a,ani erawh chuan a chhungte tak tak ang in min en thung. An inah ka hun tam zawk chu ka hmang a,a mamawh leh duh te ka ngaihtuah sak thin. A chang chuan amah zawk hi a inthlahrung thin a,Nurse a kawl reng tho avang hian chawl hahdam tur in mi ti fo thin. Mahse a sawi ngai hauh lo nangin ka awm ve hian nuam a ti tih ka hria.
.
Hetiang dinhmun a min hlangkai tu ani a,ka theih ang tawk a puih chu ka tih tur ni in ka hria. A hriselna a pan telh telh a,a chhungte be tur in vawi tam ka hrilh a,mahse a duh ngailo. A chhungte lam ka sawi deuh hi chuan thil dang a sawi thuai zel. Chutiang lam reng sawi pui a duh lova,a kum a kum an inhmuh tawh loh thu pawh min hrilh thin. Fapa pakhat anei a,England ah a nupui hlui bulah a awm daih thung.
.
A nupui hlui chu Deborah Alexander ani a,kum 20 kal ta khan a chhuah san ani. A chhan ber pawh Wilson-a hi mahni hna a bur chawt chi ani a,thildang reng a ngaihtuah thei thin lo. Chumi avang pawh chu a niang,a chhungte aiin a hna a dah pawimawh zawk fo a,chhungkua a han inkawm khawm leh chawlh han hman ho te an nei ngai meuh lo.
.
Rei vak loah chuan Deborah-i chuan tiang reng zawng tiin a fapa Pierce Alexander -a nen Wilson-a chu an chhuahsan ta ani.
.
"Ngaihtuah rawh Wilson...ti ngawt tur ani lo. I chhungte chu bia ang. An hriat a tul ani" tiin ka han kar leh hram a.
.
"Ka hrilh tawh che kha...min ngaihtuah anih chuan sawi tawh suh"
.
"Ka hrethiam thlawt lo che" ka han ti a. "Hrilh chu ni ilang chuan an rawn ngaihtuah khawp ang che. Tha deuh in an rawn let leh duh ngei ngei ang. Nangmah hian i tum lo ve hrim hrim bawk alawm"
.
"Tunah rih chuan a buaithlak rih emai. Han dam tha deuh phawt ila ka la be dawn nia. A tha em?".
.
Ka lu ka thing a,dik tak chuan a tha lo tawh takzet ani. "Anih leh le.....Mahse he thil hi chu ka la sawi fo ang"
.
Chau tih hriat zet hian min rawn nuih a,ka sawi zawm ta bik lova.
.
"Hei mut a hun tawh ania...mu tawh rawh. Naktukah ka rawn kal leh ang" tihpah chuan a chalah ka fawp a.
.
Wilson-a chu kum kalta mai khan Lung thalo anei tih hmuhchhuah ani a,a awm bawr na thin a tih chu inentir tur in ka ti fo a,a duh tlat thin lova,a tawp a tawpah chuan ka nawr chhuak thei ta hram kha ania.
.
A lung chu alo chak tawh lo hle a,a hnathawh nasat a tuar lo ani ber mai. Doctor te chuan tiang a a thawhrim zel chuan a nunna in a daihrei loh mai a hlauhawm thu an sawi a. Ka hlauthawng hlemai....hlauhthawn tih piah lamin.
.
Tlem a a han that leh deuh chuan a ngai te bawk in a thawk leh a,vawi tam ka hau thin.Mahse hnathawk lo a awm mai mai chu a thei thlawt lo. Achang phei chuan a office atang min chhuah tir hial thin.
.
"Olivia...ka tha alawm" tih hi nikhatah hian vawi za vel a sawi ziah ang. Damdawi a ei leh ei loh ka zawt reng a,a that leh that loh ka zawt reng bawk. Tih theih ka neilo tih ka hria. Mahse ka ngaihtuah em em a,ka pa ang mai a ka en ani a,chan ka duh lo ani.
.
"I fanu tak tak ka ni lo tih chu ka hria. Mahse chan che hi ka duh lo ani" ka ti a,amah ngaihtuah em em an awm ani tih hi hria se,amah chauh in a tuar lo ani tih hi hria se ka duh ani.
.
Room chhung chu a reh vawng vawng a,ka mittui tla tur chu ka dang hram hram a,office chhungah hi chuan a chi loh.
.
A chhungte ang in minlo en ve kherlo anih pawh in a pawilo. A personal assistant ka ni a,amah ngaihtuah chu ka tih tur ani.
.
"Olivia....." arawn ti thawp sat a. Ahan ngawi leh vang vang a "Ngati nge tiang tak a min ngaihtuah a?"
.
"A chhan chu i phu alawm. Mi chung a i ngilneihna leh i thatna zawng zawng te hian chu chu a phu ani" ka han ti a.
.
A lu a thing a "Mahse keimah erawh ka inpui thei si lo anih hi" ahan ti a. "Ka chhung ten a min kalsan chhan pawh kha...keimah vang vek. ani" tihpah chuan tukverh chu a melh a.
.
"Mahse i la la let leh thei alawm. I lehkhabu chhiar lai chu a tawp chhiar thleng lovin i khup ngawt thei lovang"
.
"Enteh...a pawi ka ti lutuk. Mahse chutin min chan mai dawn hleinem. Rei tak ka la dam dawn alawm. Chu chu ka tiam a che" ahan ti a,mahse dawt a sawi tih erawh ka hria ani.
.
A thu min tiam chu nitin mai hian ka bengah a ri nawn tluk tluk thin a,mahse a thleng dik dawnlo tih erawh ka hre reng tho si. Chuti chung chung chuan Alexander Corporation pawh chu pangai tak in a kal chhunzawm ve zel a.
.
Mahse amah ngei in a thu min tiam chu a bawhchhe ta.
.
A office a kan inhmuh atanga kar 2 hnuah kum 64 mi lek niin Lungphu chawl in a boral ta ani. 'Mangtha' ti a thlah na hun takngial pawh ka nei ta lo.
.
Kan chhuah dun hnuhnung ber chu China a kan zin tum in ani a,chutah chuan a duh ber Kung Pao Chicken pawh kan ei nghe nghe. Living room ah thu in chanchinthar puan a ngaithla a.
.
"Zanriah ei a hun e" tihpah in a thutna lamah chuan ka inchawi phei a,ka thil ken zo zai chu mak tih hmel deuh hian alo en a.
.
"Tun hi hetiang ka leisak hnuhnung ber na tur che pawh ani mai thei ania" tihpah chuan ka han nui a.
.
"Anih chuan ka vankai chaw tur hi thlamuang deuh in ka han ei ange" tihpah chuan min rawn nuih a. A thil ei lai chu ka en reng a,tui a tih hmel tuam tuam hlemai.
.
"Oh....tikhan min en reng suh. Ka uang mai mai anih kha" tih pah chuan arawn nui a
.
"A nuihzathlak loh ania" ka lo ti a.
.
Ka eitur lei ho chu tui ti tak in a ei bawrh bawrh a.
.
Ngawi reng chuan kan ei dun a,ka va en leh zeuh zeuh thin a,a hmelah chuan khawharna ka hmu thei in ka hria. Ka rilruah a chhungte bawk arawn lang leh a. Engtin nge kum kha leh chen a hmaikawr hi alo vuah theih zawk le? Mi te chuan mi hlim thei tak niin an hmu thin si a.
.
"Eng ang mi nge i fapa chu?" tihpah chuan chopstick chuan ka thil ei tur chu ka ka ah ka hnawh lut a.
.
A han ngawi vang vang a,a hmel atang chuan a fapa a ngaihtuah ani tih a hriat a. "Ka hre bik lo...ka hmuh tawp ber chuan kum 6 mi chauh ala ni. Tunah chuan a lian tawh ngawt ang. Oxford University atang Bachelor of Arts in Economics and Management ah degree anei ani awm e. Tunah chuan kum 26 ani tawh ang"
.
"Chuan tunah eng nge a thawh a?"
.
"Ka hriat dan chuan England a financial firm ah a thawk ani awm e"
.
"Chuan in inbe ngai lo ami?"
.
"Kan inthen atang khan vawikhatmah kan la inbe leh lo"
.
Wilson-a chu ka khawngaih hlemai. Ama fa ngei thanglian lai takngial pawh a hmu lo chu ani si a. A reng rengah tinge amah pawh chuan a biak mai loh le..?
.
Khua alo tlai a,kan ti ti pawh kan ti tawp ta. Kawng hrang hrangah fuihna thu min hrilh a,Alexander Corporation ka chhuahsan duh anih pawh in ka career atan a pawimawh tur thil chi hrang hrang min hrilh bawk a,ka pa diktak hnen atanga fuihna thu dawng ang mai ka ni.
.
Tetlai atang a nu leh pa bul a seilian lo ka ni a,chutiang a mi tha ka tawng chu vannei ka inti hlemai. Thenkhat chuan an haw thin a,a chhan chu upa ve tawh ni a an inngaih tlat thin vang ani.
.
Mahse tun hi hetiang a kan inkawm tawpna ber tur ani ang tih erawh ka ring pha reng reng lo.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2016, 9:00 pm

CHAPTER -3


.
Park a thutthlengah chuan ka la thu reng a,ka thu rei ta hlemai. Ka hnunglamah chuan ke pen ri ka hria a,min rawn pan tih pawh ka hria. Hawi let kher lo mah ila tunge anih tih chu ka hre nghal mai.
.
"Hey babe..." tihpah chuan ka darah arawn vuan a,ka thla a muang nghal sawng sawng mai. Amah chu tudang ni lovin ka Best friend ai pawh a ka best zawk Hugh-a ani. Ka bulah chuan rawn thu in ka kut arawn vuan a,ka hlim loh chang leh ka rilru nat chang te pawh a min hnem thin tu ber ani.
.
Hugh Lawson-a nen hian High school kan kal lai atang kan inhre tan a,chutih lai chuan thian ka la nei lo hle. English class apiangin ka piah lawkah hian a rawn thu ziah thin a,chuti chung pawh chuan ka lo hre em em chuang lo a. Vawikhat chu ka mit mu rawng chu nalh a tih thu a sawi a,ka mitmu rawng hi tlem in a dang deuh a. Nisa ah chuan vutbuak rawng deuh hian alang a,daihlim ah erawh tuipui dumpawl rawng lam a pawl thung.
.
Min star deuh anih ngei kha ka ring a,ka nui chhuak deuh hawk a.
.
A mithmul chu arawn kan a, "Tinge khatia i nuih vak a?"
.
A hnu deuhah Gay alo ni tih ka hre leh a,ka ngaihdan chu alo diklo hlemai.
.
Mipa hmeltha tak ani a,a sam dum hlap leh tle siau mai te,a mitmu hring nghal mai te chu a inhmeh hle a,keipawh chuan ka lo hmel duh hman tep ani.
.
"Olivia ka nia" tihpah chuan ka kut ka phar chhuak a.
.
"Hugh ka ni e. I zia hi a danglam deuh bik in ka hria. Ka ngainat zawng tak ini"
.
"Uh...a va lawmawm ve! "
.
Chumi ni atang chuan kan inkawm deuh chawt reng a,ani pawn kei lo chu midang a kawm vak bik lo. Unau ang mai in kan inzui a,ka nu leh pa in a min boral san hnu phei chuan engkim a min dawm tu leh min thlamuan tu ani.
.
Chutia Hugh-a ka ngaihtuah chhuah a leiah chuan ka nui chhuak hial a,amah ka tawng chu vannei ka inti thar hlemai. Ka hmai zawnah chuan a kut arawn vai a, "Oh....tihpalh. Thil eng emaw....."
.
"Ka hrethiam che alawm. Hei ka rawn ken che,i duh ka ring a" tihpah chuan Coffee la khu hlat hlat hi min rawn pe a.
.
Ka han lak pawh chuan a la lum tha ham ham hlemai. Tlem chu ka in nghal a,chulai thutthlengah chuan ngawi reng in kan thu dun reng a.
.
"Eng nge i an tawh reng reng a?" ahnu deuh fe ah chuan Hugh-a chu arawn tawngchhuak a.
.
"Ka tha e" tihpah chuan ka Coffee ken chu ka en a. Vawiin hi Wilson Alexander-a an vui ni ani a,chawhma lamah kan vui a,chumi zawhah chuan Apartment lam a haw mai lovin helai hmunah hian ka kal ta ani.
.
Ka apartment a hla chuang lova,tunah rih chuan boruak tha hip phawt ka mamawh rih in ka hria. Tunah chuan a ni chu a kalbo ta.....Kumkhua atan.
.
A chhungte pawh hian kei in a ka hriatchian ang hi chuan an hre kher lovang. Sumdawnna khawvelah chuan mi chal lang ani a,mahse a vuinna ah erawh mi tlem te bak sawm an ni lo. A thawhpui te,a thian te leh amah ui tu tlem a zawng tih loh chu.
.
A ukil George Brent pawh alo kal ve a,hunserh zawhah rei vaklo kan titi dun nghe nghe. Kum 40 bawr vel,hmuihmul nei ani a,naktuk zing dar 8 ah inhmuh a duh thu a sawi a,Wilson Alexander-a thu rochhiah chungchangah.
.
Mumal tak a ruahmanna alo siam lawk loh phei chuan Company chu kan talbuai viau ang le. Tunah chuan ka taksa pawh a lum ve tan ta,Hugh-a chuan ka bul a thu chung chuan min kuah a,a awm ah chuan thlamuang tak in ka bei a,eng em em sawi lovin kan ngawi dun reng a.
.
Kan ngawih reng hnu chuan Hugh-a chu arawn tawngchhuak a "Hei..khua a thim tawh dawn ania. Kan haw tawh deuh em niang Vee? Vawiin chu i tan ni hrehawm tak ani ang tih chu ka hria alawm"
.
Haw tur chuan ka la inpeih tawk lo ani,mahse ka pum ri ruk ruk chuan ka riltam tawh zia a tichiang hlemai.
.
Tunah chuan mittui tla leh tur chuang pawh ka nei tawh lo. Khawvel chu a ngai ang ang in....Wilson-a tel lova ka hmachhawn angai dawn ta.
.
"Nia...awle" tihpah chuan ka tho a,ka kawrlum dum chu ka han pawt tight a,vawt chuan min tham er er a.
.
"Pasta ei ava chakawm ve"
.
"Kan siam dawn nia"
.
Hugh-a chu en in ka han nuih a,Ni e....Pasta chu min siam sak ngei ang.
.
In ah chuan kan haw a,kei chu stool ah thu in Hugh-a che vel chu ka thlir reng a,apron senno duhawm deuh hi a hreng a,choka ah chuan rawngbawl in a buai hlemai. A hnu deuhah chuan bel khu vat vat chawi in arawn phei a,carbonara bakah bacon arawn ti tel bawk. Ka mood off deuh pawh chu a pasta siam rim ka hriat chuan ka harh nghal kawk mai. Fork chu la in ka plate ah chuan noodles khu vat vat mai chu ka han suak chhuak a.
.
"Hugh...nang hi chu i va han fel tak em. Gay nilo phei lang chuan pasal ah ka nei hrim hrim ang che" tihpah chuan ka ka khat dawn chuan pasta chu ka han ei a. A tui hlemai
.
"Chu chiah.....eitur ka siam sak che hi chuan chu thu chu i sawi ve ziah" ahan ti a.
.
"Mahse a tui tho thoooo....." tihpah chuan ka han rum ham ham a
.
"Ti khan rum ham ham suh. Inti zo hlim ang mai...."
.
Ka nui chhuak hak a. Ka thil ei chu a tui lutuk a,thawk nachang pawh ka hre dawn hleinem le. Hugh-a pawh chu alo nui ve a,hetiang lam tawngkam hi ka sawi ngailoh zia pawh a hria.
.
"Kha..tui" tihpah chuan tui min rawn pe a,ka in nghal a..min lo nuih sen sen a.
.
"Ka thih ve hunah chuan khatia i nui hmel kha hmuh tur avang tawh awm"
.
A mitmu hring nghal chuan min rawn melh deuh hrawk a "Chutin min sawi thaih vel tum suh aw...."
.
"Ka sawithaih hleinem che"
.
"Min ngaina tih ka hria a,chutiang thil chu i ti lovang"
.
"Nia tiraw....mahse i muthilh hunah ka inngaihtuah tha leh ang". A meng nur nasa mai. A hmel awmdan chu ka en reng a,nui chhuak lo turin ka insum hram hram a.
.
"I hmel awmdan kha hmu ve la ka van ti" ka tih chhunzawm lehnghal a.
.
"I ninawm emai....ka mut san dawn che" tihpah chuan a tho thut a,bedroom lam apan nghal a. A thinrim der tih erawh ka hre reng tho.
.
"Mangtha..." arawn ti a.
.
Nuih pahin ka lu ka lo bu a. A kal hnu chuan thleng chu seng in ka sil nghal a,tunah chuan mahni chauh in ka rilru ka kawm leh ta neuh neuh mai. Wilson-a bawk ka ngaihtuah chhuak a,naktuk atang chuan a tello in hun ka hman angai tawh ang a,avan huphurh awm dawn veleh...
.
.
▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒
.
.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2016, 9:00 pm

CHAPTER -4
.
Nizung rawn lut chuan ka hmai chu arawn chhun tle ser ser a,thawh a hun tawh e arawn ti ni ngei tur ani. Ka khum bul a ka dah ka Alarm clock chu ka han en a,a rik nan minutes tam alo ngai tawh bik lo...ka off nghal a. Zing boruak chu ka han hip vang vang a,ka tho chhuak nghal a.
.
6:30㏘ arik chuan hna a kal tur in ka inpeih ta at e. Kekawr tlawn dum zuih ka ha a,kawr plain thawl lam ka ha bawk. Choka lamah ka phei a,Hugh-a pawh in pancake alo siam mek a.
.
"Good morning " phur hmel tak hian alo ti a.
.
Kei erawh ka phur lo kher mai. Peihloh hmel deuh hian ka lo nuih suk a. Tukin zet chu Hugh-a a phur hlemai. A chhan pawh vawiinah Celebrity a ngaihsan deuh pakhat nen an inhmu dawn a,chu nu chuan Red Carpet a a thawmhnaw hak design tur in alo ruai a. Hugh-a hi Swedish designer pakhat,kum 40 bawr vel Madame Verina hnuaiah a zir a,he nu hian a hun pum chu Designer zir mek te chhawr puitlin nan a hmang a,a zirtir zawhah pawh an mamawh dan a zir in a pui nasa thin hle.
.
A bik takin Hugh-a phei hi chu a duhsak hle a,a chhan pawh Hugh-a ah hian danglamna bik tak a awm tih a hriat vang ani.
.
A kut chu a awmah ahan dah a "Hey.....tunah hian ka nun a thil pawimawh tak tur ka ti dawn a,khatiang a i ngui hmel kha ka lawm vak lo ania"
.
"Ka tihpalh" tihpah chuan a hma aia hlim hmel deuh zawk in ka han nui a,kan chaw ei dawhkan te rin ren tak kil chuan ka han thu a. Inbe lo chuan kan ngawi vang vang a,a hnu deuhah chuan "Hugh....." ka han ti a,sawi mai lo chuan ka han ngawi leh vang vang a. "Vawiinah Wilson-a lawyer ka hmuh angai dawn si a,ka huphurh takzet"
.
"Hey....nervous lutuk duh suh. Engkim a fel vek mai ang". Hugh-a thusawi chuan tlem in min ti hlim deuh. Ka mood pawh tlem chuan a zia tan deuh e.
.
"Kha le...i tukthuan tur. Lo ei mawp mawp rawh" tihpah chuan ka thlengah chuan pancake arawn dah a,a chungah butter leh maple syrup arawn leih bawk a. Tukthuan kan ei zawh chuan mahni hna ve ve a kal tur in apartment chu kan chhuahsan dun ta a.
.
.
Ani hi Car a min thlah thin tu awmchhun chu ani mai a,ka hlawh erawh thil dang pawimawh a kan hman zel avangin Car lei tih vel chu ngaihtuah thei pawh ka la ni lo. Bus leh Taxi emaw ten a chang chuan ka kal mai zel.
.
Building a ka luh chuan Security guard Bob leh Receptionist Brenda te chuan "Ni hman nuam le" an lo ti ve ve a. An hna anih avangin a thuphung in an sawi ve mai mai tih chu ka hria. Mahse vawiin hi chuan chu wish chu ka mamawh takzet zet ani.
.
Elevator ah chuang in Wilson-a office lam ka pan chho nghal a. A office chu chhawng sawmli na ah a awm a,chuta tang chuan New York khawpum chu a langchiang hle a,in nalh pui pui hi a cham put mai ani.
.
Wilson-a office ka thlen chuan a lawyer George Brent-a chu thutthleng ah a lo thu a,minlo nghak reng tawh chu ni in. Min hmuh veleh chuan polite tak in alo ding a.
.
"Ka hmu leh che chu ka lawm hlemai Miss Bailey"
.
"Hi Mr.Brent" tihpah chuan ka han chibai a. "Ti rawh....conference room lamah i va titi ang hmiang" tihpah chuan conference room lam ka pan pui nghal a.
.
"Coffee emaw kan chah dawn em niang?" tihpah chuan ka purse chu ka han dah lut a.
.
"Ka chak rih lo,ka lawm e. Chuan...kan sawi tan nghal mai dawn em niang?"
.
.
Ka zam zia lah chu a hre ve awm der si lova. Tun meeting zet zawng a dan a dang khawp mai. Hei hi Wilson-a thuchhuak hnuhnung ber tawh tur tak meuh meuh ani si a.
.
"Tehreng mai" tihpah chuan nui pah in ka han bu zeuh a.
.
George Brent-a chuan Wilson an a company chungchang a a thurochhiah te chu min han hrilh tan nghal mawp mawp a,thil pawimawh tak tak,helai a thawk ho te tan a pawimawh tak tak leh a bik takin Board of Director te tan phei chuan pawimawh tak tak vek tur ani.
.
"Mr. Alexander an thil eng emaw a hnutchhiah che a" tihpah chuan envelope pakhat hi min rawn pe a,eng tak ni ang maw?. Envelope ah chuan ka hming chiang tak in a inziak a,ka kut in chu thuziak chu ka han khawih a,Wilson-a kutziak ngei ani.
.
Mr Brent-a chuan a sawi chhunzawm nghal a "Eng nge tah khan awm tih chu ka hre lo a,mahse kan sawi zawh fel hnuah chiah i hawng dawn nia"
.
Ka lu chu ka lo bu a,a thusawi leh tur chu ka ngaithla nghal a.
.
"Hetiang thil alo thlen takah chuan Alexander Corporation chuan enkawl tu thar a mamawh dawn ta a,tun atang chuan he company hi Mr. Pierce Alexander-a kutah a awm tawh dawn ani"
.
Ka khabe chu a thlawn ta mai emaw tih mai tur ani. Min thawng hlemai. Wilson-a chuan he company hi a fapa hnenah a hlan amaw? Chupa chuan he company kalphung pawh engmah a hre awm si lova..! A pa hna zawng zawng a kut a a awm phei chuan engtia kal tur nge tih a hre tawp lovang.
.
Zawh tur ka ngah hlemai. "Umm.....a fapa chuan company kal dan hi engmah a hre awm si lova. Va biak an ni tawh reng reng em?"
.
Brent-a chuan a hrawk ahan thian kharh a "Aw...nimin khan a chhungte chu ka va bia a. Thu thar chuan a thawng ve khawp mai,mahse entin tin emaw kan sawi kaw thei ta hram a. Mr. Pierce Alexander-a chu kar leh hian arawn thlawk haw ang. Wilson an rochung tur in ati miau si a. Chuan alo thlen hunah Company chungchang hi nangman lo hrilh la ka duh ani"
.
"Chuan ka theihnghilh hma in....hei hi Mr.Alexander an a hnutchhiah bawk a" tihpah chuan envelope lian rit nelh nawlh tak hi min rawn pe a,a landanah chuan file tam tak ni mai awm hi ani. A fapa tan a a thil hlan chu ka hrechak hlemai.
.
"Mr.Alexander-a chuan he thil hi Pierce-a bulah chuan a hun diktak a pe tur che in a ti che ani. Chumi chungchang chu a lehkha pek che ah khan a ziah ka ring"
.
Mr.Brent-a chu hriatthiam loh hmel deuh hian ka han en a "A hun dik tak atih chu engtik hun nge ni ang le?"
.
Engmah hrelo tih hriat tak hian a lu ahan thing a "Miss Bailey,tunah chuan i duh leh envelope kha hawng tawh la a tha ang. Kei chu ka lo va kalsawn ange. Tunah chuan Coffee in pawh ka chak ta hlemai"
.
Nui pah chuan ka lu ka lo bu a "Eitur dahna pindan lamah sawn va kal rawh. Fridge ah khan eitur a awm ang"
.
A lu a bu a,a chhuak ta nghal a. Tunah chuan Wilson an ka tan a a lehkha ziah chu ka chhiar thei ta. Ka zam hlemai. Uluk tak in envelope chu ka hawng a,ka kut chu a khur deuh dar dar a. Thawk ka han la kawk a
.
.
.
' Duhtak Olivia,
.
A pawi ka va han ti tak em. Ka lakah hian thinrim lo hram ang che. Tunah chuan hun tam ka nei ta lo tih ka inhre ta,chuti chung chung chuan engmah thleng lo ang mai a awm luih ka tum tang tang a,a chhan chu nat hi ka duh lo ani. Tunah erawh ka thi mek tih ka inhre thei ani.
.
Ka chhungte ka biak duh loh chhan vawi tam min zawt thin a,a chhan chu ka hlauthawng atin ni. Duh ni ilang chuan ka ko kir thei teh meuh mai,mahse kokir tehreng pawh ni ila hetiang dinhmun a ka din vang a ko angah an in ngai ngei ang a,chu chu ka duhlo ani.
.
Pierce-a hnen a pek tur ka hnutchhiah che kha a hun takah ilo pe dawn nia. Tha tak in lo enkawl la ka duh a,kei putar chaklo tak tan a i thawh thin ang khan thahnem ngai tak in i thawk leh ngei ang tih hi ka beisei tlat ani.
.
Ka chung a i thil tih zawng zawngah khan ka lawm em em a,ka fanu ang mai a i awm avang khan ka lawm a,ka chhungte ang mai a i awm avang khan lawmthu ka hrilh tak meuh meuh a che.
.
Khawngaihin kan company hi tha tak in lo enkawl chhunzawm zel la,eng emaw thil ropui tak ila ti ang tih hi ka ring nghet tlat a,chutiang theihna chu i nei ani tih ka hre bawk.'
.
Chu thil ka chhiar lai chuan ka mittui arawn baw zawih a,tunah chuan engkim mai chu a tawpna vek tur ani ta. Ka thinlung chu ana tak meuh meuh a,amah hmuh tur a awm tawh bawk si lo.
.
Thawk la in ka inti hahdam hram hram a,ka chhiar chhunzawm lehnghal a.
.
'A tawp ber atan thil eng emaw pek che ka duh a,i la hreh viau ang tih chu ka hre nangin min pawm sak ngei ang che. He pawisa hi University i kal na tur atan ilo hmang dawn nia.
—W.A'.
.
.
Eng a??
.
Envelope chhung chu ka han bih tha leh a,a chhungah chuan cheque alo awm a. Half million dollar maw??... Ka ka hau a.
.
Hei chu a tam mah mah ani,ka la ngawt thei lovang. Ka pi kha pangpar dawr a thawk ve mai anih avangin ka University kalna tur fee kha engti kawng mahin kan nei lo hrim hrim a,ka kal theih pawh ka inbeisei ngailo.
.
New York ah Hugh-a nen kan pem dun a,kum khat zet chu part time in hmun hrang hrangah kan thawk kual thin. Vanneihthlak takin Madame Verina hnuai ah a thawk thei ta hlauh a,a ni hian Alexander Corporation a ka thawh hma kha chu min buaipui ani ber mai.
.
A hnuah Mr.Wilson-a hnuaiah ka thawk ve leh a,ka hna chu nuam ka ti in school kal leh chu ngaihtuah pawh ka ngaihtuah leh chhin ngailo.
.
He ti tawp a lakah chuan a tam lutuk. Mr.Brent-a pawh arawn let leh chiah a. "Engkim a tha maw?"
.
Kawngka atang chuan rawn lut in ka hma thutthlengah chuan arawn thu a.
.
"Hei hi chu ka la thei lovang" tihpah chuan cheque chu ka pe let leh a. A han en a,chutah mak tih hmel tak hian min rawn melh a,mawl min ti viau ngei ang le.
.
"Ka tih awmzia chu.....a thlawn a dawn atan chuan a tam lutuk"
.
A lu alo thing a "Hei hi chu thu rochhiah ani a,i lak ngei angai. A kir leh theih tawh hleinem"
.
"Oh....-" Ka a vek dawn in ka hria.
.
"Eng nge maw zawh chian duh te ila nei em?"
.
Mr.Brent-a chu ka han en a,ka lu thin pah chuan "Aih" ka ti sap a.
.
"Anih chuan hemi case bik hi chu ti khan kan zo chuan ka hria" tihpah chuan a ding a,min rawn chibai a. "Harsatna i neih chuan min rawn be hreh miah suh ang che"
.
A calling card chu ka la a,lawmthu ka sawi hnu chuan min chhuahsan ta a. A chhuah hnu pawh chuan ka din na ngaiah chuan ka ding reng a,ka cheque ken...half million dollar zet lakchhuak theihna chu ka melh ngawih ngawih a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2016, 9:01 pm

CHAPTER -5
.
Zanah chuan keimah in kan apartment ah ka haw a,a ruak huai mai. Hugh an hna chungchang avanga arawn haw tlai dawn thu min rawn hrilh a.
.
Choka ah chuan phei in eitur ka zawng nghal a,vawiin lamah engvakmah ka ei loh avangin ka pum ruak lutuk chu hnawh khah vat angai ani. Mahse rawngbawl hi ka zei loh na lam tak alo ni bawk si. Fridge ah chuan nimin a kan Pasta siam thing chu alo la awm a,Oven a ka tih lum zawh chuan bowl ah dah in living room lamah ka keng phei a,TV chu ka on nghal a.
.
Wilson-a thih thu chuan Chanchinthar lam pawh ala luah reng a,hetia ka han hmuh leh hi chuan rilru ah arawn thar leh a,a thih ni ang mai kha ala ni. Nurse in a hlauhthawn awm thu min rawn hrilh atang phei kha chuan zantin mai hian ka khumah ka tap ziah a tih theih ang. Tunah lah min tihlim tur leh min hnem tur in Hugh-a a awm bawk si lo.
.
Ka ei zawh chuan tuilum in ka inbual a,chu mi zawhah mu tur in khum lam ka pan nghal a. Tun kar kha chu ka pian a hnu lam a phone call ka dawn nasat ber tum ani hial ang. A tam zawk chu company chungchang...engtin nge kan tih ang? tih ang chi vel ani ber. Mahse ka thu thu in engmah ka lo ti ngawt theilo.Thawhtan a England atanga Pierce Alexander-a arawn thlawh thlen hma chuan.
.
Kar leh chu Pierce-a ho a meetings neih tur a awm nual mai. Engkim chu tha tak leh pangai tak a ka kalpui angai ani.
.
.
Kartawp chawlh chu a reilo kher mai. Ka taksa pawh duh ang in ka hahchawlh tir hmanlo. Thawhtanni rapthlak tak chu kar lovah arawn thleng leh ta.
.
Peihlo tak chung chuan ka tho chhuak a,vawiin hian a vawikhatna atan Pierce Alexander-a nen kan inhmu dawn ani. George Brent an meeting aneih pui phawt ang a,chumi zawh lamah keimah nen inhmu veleh in building ka fankual pui ang a,chuan Alexander Corporation kalphung engkim ka kawhhmuh ang.
.
Hugh-a a buai avangin Bus in ka kal a,tunah chuan Alexander Corporation building hmaah ka ding ta ran mai. Tlem chuan ka zam ve deuh, mahse ka hma a awm chu ka paltlang ngei angai. Elevator chuan chhawng chung ber ka pan nghal a,office chhung a ka luh chuan thutthlengah Brent-a chu lungawi hmel tak hian alo thu dimdiam tawh a.
.
"Good morning Mr. Brent." Nelawm tak a nui sang chung chuan ka han ti a.
.
"Good morning Miss......Mr.Pierce-a pawh rei lo te ah arawn thleng thuai ang"
.
Pierce-a nghah pah chuan titi khawchang kan lo sawi dun luam a,kan company nihphung leh kal zel dan tur lam ani ber.
.
Elevator hnungchhawn zawng in ka thu a,Elevator arawn rik teng chuan tu emaw arawn thleng tih ka hre nghal mai. Chu veleh ka taksa chu a hit nghal chuai chuai a,sawithiam theihlo boruak maktak hian min rawn chhungkhat vek ni ber hian ka hria.
.
Brent-a chu a tho chhuak nghal vat a "Mr.Alexander....... New York ah ka lo lawm a che. Phone ah kan inbiak tawh kha. George Brent ka nia,i pa lawyer"
.
Keipawh chu ding in ka inher nghal a. 'Ui kareiii.....!!'. Awih avan harsa veleh....Wilson-a leh Deborah-i te khan tiang tak a fapa hmeltha hi an lo neih ka ring theih lo. A pa ang mai in a mitmeng chu a buang thak a,a sam dum tle siau mai chu awmze nei tak a khuih ani bawk. A sang tha in a inkhai thli zaih a. A khabe ruh chu a kual nalh hle a,Mr.Brent an a aw arawn thian kharh chuan khawdang hawi lek lovin ka lo melh ani tih ka inhre chiah.
.
An pahnih chuan min lo en dun reng chu niin,ka van zak em. "Um...A tawp a tawpah kan inhmu thei ta hlawl ani maw. Ka hmu che chu ka lawm e Mr.Pierce" tihpah chuan ka han chibai a
.
"Keipawh le..." a aw chu a British awphawi raih mai. Bakah mumang ram lam ami ang mai ani.
.
Mahse a pa mizia ang kha chu a chhawm ve chiah hmel loh. A hmelah chuan tuiloh rukna riau ka hmu thei ani. A ko ah thil lian tak a innghat dawn ani a,rilru pe tak a a thawklo anih ngat chuan kan hmabak chu tlakchhiat ani.
.
"Ms Bailey.....i conference room kan hman hawh sak lawk che angaih hmel" Brent-a chuan arawn ti a,ka lu ka lo bu a.
.
"Eng emaw in tur....coffee emaw induh angem? Cookies nen"
.
"A lawmawm khawp ang chu" tihpah chuan Mr.Brent-a chu tawi te hian arawn nui a. Pantry lamah phei in an eitur chu ka siam sak nghal a,ka pek zawhah ka hna thawk tan tur in ka kir leh a.
.
Chawhma chhung zawng chu thurochhiah chungchang a titi nan hman zawh vek an tum emaw ni?
.
A hnu fe ah chuan conference room atang an rawn chhuak dun ve hlawl mai. An rawn titi phei nghal mawlh mawlh a,Pierce-a hmelah erawh phurna tehchiam alang lo. He company khaipa tur chu ani sia lehh...
.
"Chawchhun ei tur in kan chhuak lawk dawn a,kan rawn let veleh Mr.Alexander-a hi building i fan pui dawn nia" Mr.Brent an arawn tih chuan ka lu ka lo bu a,elevator lam an pan nghal a.
.
Chhun chawlhah pawh kei chu ka chhuak lo. Pantry ah phei in ka eitur in Butter sandwich ka siam a,a hnu rei vak loah Mr.Brent-a te pawh an rawn kir leh thuai a. An rawn kal pah pawh chuan an la titi char char a. Mr.Brent-a chuan a call card a pe a,min chhuahsan ta. Ekhai leh......kei leh amah chauh. Hun rapthlak tak ani..!!
.
.
.
Ka han inthing harh a,Pierce-a chu ka hmachhawn ta. "Um....a hmasa in i office tur en phawt ila" tihpah chuan Wilson-a office thin chu ka han hawng a. "I duh zawng anih loh pawhin i duh dan ang takin kan thlak danglam sak thei ang che" tihpah chuan ka han nuisang a. Nelawm tak leh pangai tak a awm chu ka tum tlat a....zam avanga ka thinphu erawh a ri a hre pha ang tih hlauhawm tak ani.
.
A lu a bu nghut a,a bak engtin mah a awm lo. A nui lova,a tawng hek lo. A inla ve deuh nge ni a,a tawng tamlo ve hrim hrim zawk?.
.
Building chu kan fang nghal a,floor dang dangah kalpui in department hrang hrang ka enpui a,chutih chhung zawng chuan min zui ve mai mai ni ber hian ka hria. A rilru a pe lova,a phone atang tu emaw a text chhen bawk.
.
A rilru pe lo lutuk chuan dawhtheihna min tlakchham tir tan hlemai. Ngaithla tha peih lo hnen a thusawi reng tur chuan ka chil per zozai pawh kha a uihawm alawm le. Ka kal lai chu ka ding chawt a,amah hmachhawn zawng chuan ka han inher a. Min rawn su tep lehnghal...min rawn en hu a.
.
"Thawnthu ngaihnawm tak chu ani lo maithei. Mahse i rilru i pe lo mah mah ani...nileng leng in hun ka neilo ania" ka han ti hmuk a.
.
"Enteh Olive"
.
"Olivia zawk mawle..." chutia ka hming alam chu ka awih theilo zawk. A hma aia chiang zawk chuan min han en a
.
"Keipawh in hun ka nei bik hleinem. Tih tur dang ka nei tlat" tihpah chuan min kal pel nghal a.
.
Ka han au leh ngial nangin rawn let leh chu sawi loh. Hawi takngial pawh arawn hawi let lo. Eng anga pian zei leh hmeltha pawh ani mahna....a mizia erawh tawrh a har dawn kher mai.
.
Ka office ah ka let leh a. Ka hun pum chu khapa bul a hnathawk khan ka hmang ral awm si a. Dam thlakhleh na reng ava awm awm lo ve
.
.
▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒▒
.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2016, 9:01 pm

CHAPTER -6
.
.
Thawhlehni ani a,conference room ah board director te nen meeting kan nei mek. Hei hi Pierce-a ni hnih na ani a,emergency meeting kan la nei nghal zui. Pierce-a chuan board ho hma ah chuan he operation a hruaitu arawn nih ngawt dan te chu ahan hrilhfiah zung zung a,amah mai chuan engmah anih loh thu leh staff te chu kawng engkimah amah pui tur in a sawm nghal bawk a,Alexander Corporation tan a theihtawp chhuah tur in min fuih bawk.
.
A pawimawh zual leh bawhzui nghal ngai tur thil te chu ka lo note zung zung a,Wilson-a ho a meeting kan neih nen chuan a in anglo hlemai. Ani kha chuan a boring lutuk loh nan a karah fiamthu te a zep zeuh a,kan nui leh dar dar thin kha ani a,tun tum erawh mut a chhuak duh kher mai.
.
"Olive...!'
.
Ka thil ngaihtuah lai chu ka tawp nghal chawt a. Olive-i maw......a pawilo e. A mitah tak chuan ka en a,engtinmah ka chhang lem lo.
.
" I lo ziak zel em?". Ka lu ka bu nghut ringawt a.
.
"A tha e. Naktuk zingah meeting tlangpui report ka duh dawn ania"
.
Ka mit chu la sawn in "Awle.." ka ti sap a.
.
Kar tluan mai chuan inbiak that kan nei meuh lo. Files pawimawh thenkhat ka pe a,a duh changin a coffee tur ka siam sak bawk a,chu zawng chu ani mai.
.
A office pawnlam nun chu engpawh lo nise kan sawiphak a awmlo. Mahse hnathawhna a a mizia nelawm loh lutuk hi chu ka ti thei thaklo.
.
.
Ka haw chuan Hugh-a a lo awm tawh a,a zia ngei mai. Zanriah tur alo siam mek a,nidang ang tho.....hnar a verh zar mai.
.
Thutthlengah chuan ka thu hnawk a. "I chakna zawng zawng i hmang zo vek ani maw? Ta tang pawh hian ka hrethei ania" Hugh-a chuan choka atang min rawn au a.
.
Chau hmel deuh chuan ka han nui a,tho in choka lamah chuan ka phei a. Stool ah chuan thu in ka han indawm a.
.
"Hugh, Alexander Corporation saw hremhmun ah a chang zo ta anih hi" tiin vawiin a thil thleng chu ka han sawi nghal zung zung a.
.
"Tinge? In boss thar chu a tha vak nange?" tihpah chuan min rawn en a.
.
"Aw" ka lo tinghal vat a.
.
"Tinge a? Tar phunchiar ang type hi ami?". Hugh-a chuan a hriat chak hmel hlemai. Mahse Pierce-a awmdan zawng zawng chu sawi vek sen ani si lo.
.
"Ni lo....mithi tawh rawn tho leh ang vel ani" tihpah chuan ka han en a. "Wilson-a khan amah chauh hi fapa a nei bawk si a,a pa nen chuan chhim leh hmar ang vel an ni. Ruang tawng thei...thu tlem te te bak sawi thiamlo ang hi ka chan ber. Olive ti a koh te kha ka duh lo reng reng" tihpah chuan ka biang chu ka han beng a.
.
Hugh-a erawh alo nui chhuak hawk hawk thung. Chu pa chhiat leh chhiat loh dan tur vel chu a hre chak tih ka hre reng.
.
"Vee...." a nuih chu ala za viau nangin a landan chu ahan thlak deuh a. "A chhiatloh te chuan a tawk mai alawm. Kekawr tight deuh leh kawr awmbawr lang zau thei deuh han ha la...a dang nghal zar mai ang"
.
Ka thusawi awmzia reng a hrelo. Ka best friend ve hi engmahlo mai alo nih hi. Hei vang hi alawm mipa chungchang hi chu ka sawipui that peih vak loh chhan.
.
Bialpa nei tur hian min ti ve ziah a,mahse ka duh miau loh te chuan duh rawh intih ngawt theih lah ani lo. Bakah Wilson-a bul a ka thawh lai khan ka buai thei em a,han lerh na hman hi ka neilo hrim hrim a.
.
Hugh-a pawh hian Club ah te min hruai a,mipa min zawn pui nasa ve thei hle. Mahse Club a mipa tawn chu relationship siam pui tur atan tak tak chuan tlak in ka hre lo. Kawp mai mai tur leh CK pui tur atan bak.
.
"Ka ti tak tak Hugh. Sawi tawh lovang". Chupa chungchang chu sawi tam loh hram ka duh. "Thil eng emaw tha deuh sawipui tur che ka nei ania" tiin a thil ngaihtuah chu sawh sawn sak ka han tum chhunzawm nghal a.
.
Ka la hrilh loh chu Wilson an a pawisa min pek kha ani. Bank ah ka deposit nghal vek a,la khawih chet loh rih ka duh ani. Hrilh ilang chuan a au chhuak chiam duh ngei ang.
.
"Han sawi la" tihpah chuan noodles chu a plate ah ahan suak a.
.
"Mr.Brent an envelope pakhat min pe a......tah chuan Wilson a lehkha a awm a,chuan pawisa min pe tel nghal bawk a"
.
"Cheng engzat vel nge a?"
.
"Umm......" kan ngawi leh te te a,a mitah chuan ka han en a
.
"Vee.....engzat nge?"
.
A mitmengah chuan a phur zia leh a nghahhleh zia a langchiang hlemai. "Dollar nuai nga"
.
"Ka rei lehh.....!!" A ka reh arawn zau nghal kawk a,arawn nui ker ker bawk a. "Avan tam em em veleh......ti kha chuan i hna atang bang nghal hmak la,University ah kal rawh. I duh ber anih thin kha"
.
"A tha viau a,mahse....ka thei lo ani"
.
"Tinge ka theilo i tih? Pawisa lah nise...i senso zawng zawng phuhruk na tur i nei a". Hugh-a chu a thutak hlemai.
.
Ka han nui seih a "Wilson-a khan tha tak a company leh Pierce-a lo enkawl tur in min chah a,chu chu ka ti hlawhtling lo theilo ani"
.
Hugh-a chuan ka kut chu arawn vuan a,a titak zet ani. "Kha leh chen kha Wilson-a chu tha tak in ilo enkawl tawh a,tunah chuan nangmah in ngaihtuah ve tawh teh. Pierce-a te chu puitling ani tawh a,pangai takin company pawh a kalpui thei em em ang"
.
Hugh-a chuan a sawi dik khawp mai. Mahse Wilson-a min ngenna kha ka ti hlawhchham thei si lo. Ka chhuahsan dawn anih pawh in a lo berah kum khat vel tal chu ka la thawh phawt angai ang.
.
"Ka lawm e Hugh. Mahse tunah chuan ka la thei rih lo. Min la mamawh rih ani. Nakinah kan la ngaihtuah leh zawk dawn nia" tihpah chuan Hugh-a chu ka en a.
.
"I tih miau te chuan le"
.
Zanriah kil pah chuan kan titi a,kan kar hman dan te chu kan sawi dun a,kan buai thin em avang hian duh ang thal a titi na hun hi kan nei thin lo.
.
Zirtawp zan ani a,Hugh-a chuan zan chhuak tur in a nalh thei ang ber in min chei a. Kawr dum,a hnung V ka ha a,ka khup thleng a khuh bawk.
.
"Ohh....ti kha chuan i lang nalh lutuk. Lipstick sen han inhnawih leh chiah la"
.
Sawi tawh angin Hugh-a hian date nei ve tawh tur in min nawr reng thin a,Club a kal tur pawh hian min sawm zing thei hle.
.
Make up hi ka hmang lo hle a,powder tlem leh lipstick senno tih vel mai mai hi ka hman chhun ani. Hemi zan hi chuan a tum khat nan mascara leh eyeliner hmang in ka mit chu ka chei ve a,ka sam hmawr chu tlem ka ti kir bawk.
.
Tunah chuan chhuak turin kan in peih ta. Hugh-a chuan jacket pawl rawng eng lampang leh kawr pawl a ha a,khaki kekawr leh pheikhawk uk nen.
.
"Urh....tinge i chhiat loh em em mai le? Ka bialpa ni zawk mai la? Nanglo hi chuan tu dang mahin ka mit hi an la thei mawlh lo" tihpah chuan a awm ah ka va vuan a.
.
"A ve lutuk a che" tihpah in ka kut chu a la thla a. "Vee....tiang hian i kawppui tur han zawng ve tak tak tawh teh. Ti te hi chuan i senior vat mai ang"
.
"Hey.." A awm ah chuan ka han beng fiam a.
.
Hugh-a chu alo nui a. "Ti teh Virgin...zanin chu han parh chhuak hak teh ang"

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)