QUEEN OF TARN TARAN

Tochhong Ruata
Posts: 45
Joined: October 2nd, 2016, 1:46 pm

QUEEN OF TARN TARAN

Unread post by Tochhong Ruata » April 9th, 2019, 8:30 pm

RÄNÎ DË TÁRN TÁRÁN
(Queen of Tarn Taran)

@ON THE BUS.

Ka hriat leh hmuh theih zingah tuna kan chuanna bus aia tawt hian Passenger kan la chuang awmlo e...Driver lah pa upa lam tawh Kum 60 aia naupang lo tur a ni...Shik pa lian zeh zuah nui huah huah reng mai a ni a, kan kalkawnga lo phartu apiang a phur zel bawk a, kan tawt tha hmek hmawk tawh hle...Km 60 zet tlan kan la ngai zui....hahthlak ve tawh tak a ni...Ka bula thu kum 40 mi vel lah chuan eng eng emaw min zawt sek lehnghal, Khawlum nen vai rim nen, ka nguai bur thei hial....Ka thianpa hi ngaipawimawh viau lo i la chuan hetiang tehhrep hian ka zin awm chai silo a...

Nia, Ka College kalpui Anoop Tajender, Hindu university Delhi a ka class mate, Kum 3 chhung zet room khata ka mutpui, Khawilo kal nikhua pawh a inzui reng mai, Vun, pian phung, Chi danglam, Sakhaw lam rindan pawh danglam tak, inpawh em em mai kan ni a...Degree course kan bei dun mek a, chutihlai chuan a pa nu in a damlai ngeia Nupui nei tura a tur sek vangin Nupui a nei dawn a..Chumi hmanpui tur chuan min sawm ve miau si a..Kal lo thei niheklo...Delhi atangin Rel in ka tlan tluk tluk hnuah Jalandar ah chhukin Hmarlam zelah Tarn Taran khawpui ah thleng lehin, Fatehabad thingtlang khua, Anoopa pa awmna khua panin Km 120 zet a thui Bus chep zetah Kawng nuam fahranlo, khu zetah ka kal ta vung vung a nih hi..." Ka nupui neih hunah hrehawm ti takin ka kaltir ve dawn khawp" ti rilru chungin Kan hmalam a kawng ngil zui mai sir tawn tawn a, Thingbuk lo ding thelh sung mai kara lo lang leh zauh zauh thin, Leilet phai tui tha hmel zet zet leh Khawro hmel zet zet te chu ka thlir phei zel a..

Kawng lakah mi kan lak belh ngun ang bawkin, mi chhuk tur a vangin kan ding ngun bawk a...Mak em em mai chu he Bus driver Putar hi a ni...Kei helai hmunah hian Driver nive ngat ila, Ka thinrim theih viau ang, Km 3/4 lek lek ah an lawn a, an chhuk a, Kel an kai a, ui an rawn pawm luta an duh duh hunah an ti ding a, nui vur vur chungin "Ka motor ah in chuan avangin ka lawm e, Lo dam zel ang che u" tiin tupawh a thlah thei zel a...Chhuanawm tak a ni..Mizo City bus Conductor te nen chuan danglam tak an ni...Aizawl khawpui chep tak karah Bus conductorah tangin Passengerte an khak vei hlak hlak reng ang a ni hauhlo...Kan tawt tawh emai, i kalna tur a hnai em kha, tih a awmlo an lut chhuak deuh reng mai a ni....

Tlai dar 2:45 ah Fatehabad thingtlang khaw lian ve tak chu kan thleng ta hlawl mai a, Bus station ah chuan mi an lo zi ve nak nak a, Bus chung leh bus chhung atang chuan kan chhuak sup sup a, a chhuk hmasa apiangin " Ka lawm e, damreng ang che" tiin Driver chu an wish ziah lehnghal a...a ni lah chuan alo chhang let zel a...." Hey, Robin....he lam ah" tiin Anoop a aw chuan minlo ko lauh lauh a...a lo nui thaw lehnghal, a bul ka va thlen chuan kut thing meuhin kan inchibai phawt a..." Kalo kal ta kha ka inchhir lek lek a ni" ka ti zui zat a..." Ah...I lo kal peih tak tak pawh ka ringlo a.." awlsam zet chuan a tive mai a..." Bus 1 choh em ni service?" ka ti leh ngawt a..." Ni e mawle...Kan motor a hruai i duhlo vel a nih kha..." nui huk huk pah chuan a ti a...

Anoopa te In chu ka thleng a, Ka rin aiin a lo ropui daih a...an gate luhdawn ah chuan " Tajender Family " tih Lianpuiin an ziak kulh a, , a chhawng chung leh hnuai nei nimahse, a bul velah chuan Thlam tiat lek lek in a awm thluah bawk a, an Kawt zawl nawm hmel takah chuan Lehkhamawi an lo zam tuar a, an tual zawlah chuan naupang an zi nuaih nuaih a, An inchhawng chung zawk chu varanda ang takin a hual chhuak ve thung.. Var vo mai a, Vai temple chung mum pelpul ang tak hian hmun 4 laiah an dah a, chung thil mum pul maiah chuan Eng sep sep thei an uai tir sung a, a mum chhungah chuan Bulb lian leh eng hmel zet vir tual tual thei a awm vek bawk a....An inchung zawk chung chu Lei atanga siam inchung khuhna chi hian Mizo Inchung ang ve tho hian an khuh ve a, a tluanin Tuidawn tha zet mai a awm a, chu tuidawn chuan An in tual a, tuichhunchhuah niawm tak bula Cement concrete a siam tanky ah a inkhawh lut a, Ruahtui an hervest that hmel hle, an inchung chu a sen vul mai a. An in rawng varvo nen chuan a inhmeh khup a...Khawchhung atang pawn a langsar lurh nghe nghe..


Anoopa Pa Pu Tandoor Tajender hi Helai khua a Grampanchayat a lo nih mai bakah Landlord niin Khaw mite chuan an zah em em mai a lo ni a, An Thakur a nih ber chu...Anoop-a nen An in tual kan thleng chu a pa chuan nui vur vur chungin " Ka fapa i kal thei chu kan lawm hle mai, Fatehabad ah kan lawm a che, Hei hi i In a ni a, heng mite hi i mite niin i chhungkua te vek an nih hi..." tiin Min kuah a, min beng,thuk thuk a..Midangte pawh chuan min chibai sap sap a, Anoopa nu chu Nu hmelchhelo tak a ni tih a hriat mai...Tichuan ka thianpa te Khua Punjab State Tran Taran District a Fatehabad ah chuan ka hawi thur ve ta a...

@QUEEN OF TARN TARAN

Zan lamah Inchung veranda ah kan dawm dun a, kan mengrei deuh nge ka tho tlai viau a, Anoop pawh a room a a lo awmtawh hauhlo a, Bathroom ah lutin ka inbual sawk sawk a, Zing thingpui in turin ka chhuk thla vat a, " Robin, i mu tui maw? Hei Sooji leh Thingpui hi in rawh.." a nu chuan a lo ti luam a, " Khawng Anoop-a" thingpui no lak pah chuan ka ti a...Anu chuan " Jeenath hruai turin an kal lawk a nih kha...hei ei teuh rawh" tiin min be sawt sawt a, An chhiahhlawh ni tur awm tak hi a ko a, thil eng eng emaw a kawhmuh kual a...a awmdan velah chuan Nu namailo ve tak chu a nih a rinawm...An ina khawsa chu an tam viau nangin Anoopa nu leh pa chuan thu an neih hmel viau..Mahse an ni aimah a thunei hmel chu Pitar sam var vek tawh, thuthleng awn deuh a thu chunga lo kawk kual sek tu chu a ni..Chu pitar chu Anoopa pa nu, niin Kum 80 zet a upa a ni tawh nghe nghe...Mahse a hrisel in a invawng tih hriat takin a fai veng reng a...A phunchiar pherhnek lehnghal...

Inchung lamah ka chho leh a, ka chhungte ka bia a, Chawlh ka hman loh chhan leh thil awmdan chu ka hrilh thuak thuak a, Ka mutna room tukverh atang chuan Anoopa te in hnunglam chu ka thlir a...Zan lamah ka lo hmu thui theilo mai mai a lo ni a, Ka hmuh phak chin zawng chu an ram ni mai awm hi a ni a, Thei leh thlai chi hrang hrang an awm sung a, chung thei leh thlai bakah chuan buh hmun zau,tawk tak a pharh duai mai bawk a, Bawng lah an ngah narawh chung enkawltu atan chuan mi engemaw zah an ruai a, chung an mi chhawrte awmna ni ngei tur a ni, an in bul vela Inte awm thluah kha...Anoopa chu an zah em em vek a, Mizoten "Mama" kan tihna ang deuh hian an ko vek a... Anoopa lah hi Pa dam thlup mai, huat neilo tak, Pa nui vur vur reng a ni bawk nen an nel hlawm khawp mai...Hetiang khawpa Leilung huan leh ram ngah si tinge lehkha a zir vak peih zawk le?" ka ti hial...Mahse, Vai zia hi a mak ve khawp a, Degree neih hi an ngaisang em em a, Anoopa pawh Degree a neih ngei a ngai tlat a ni....Motor ding thawm ka hria a, Ka room tukverh pakhat zawk tuazawl lan theihna lamah ka phei vat a, Tukverh atang chuan Anoopa leh a pa motor atanga rawn chhuak dun lai ka zuk hmu a...

Ka en reng lai chuan Safari var kawngka hnung lam chu in hawngin hmeichhe pakhat Anoopa rual vel Hmelchhelo tak mai, Sam sei kir lek lek, Panjabi nula ho inthuam a inthuam, vun rawng nalh zet mai hi a rawn chhuk ve a, Anoopa nu leh a pi bulah chuan tlan pheiin a va kuah chuk chuk a, an nui dar dar a, A hmel hmuh a nuamin, a hawiher a zang vah mai, Anoopa chuan min rawn hmu a, nui vur vur chungin min rawn kawk a, chu vai nula chuan min rawn en chho ve a, a nui sen sen a, Ka lai lek lek a, Anoopa chuan a kutah kaiin Inchhung lamah an lut ta daih a...."Kha chu Anoopa nupui tur a nih ngai chuan he Anoopa hi pa vannei tak zuk ni dawn a" tiin Ka thianpa Anoopa chu ka lo thik hman pek a...


" Kan lo lut thei a ngem?" Anoopa aw chuan a rawn ti a, " Boss, i thu vek a lawm" ka lo ti a, Kawngka chu a inhawng a, Anoopa leh kha nula kha an lo nui tha a..." Awh...sorry, ka tih palh, In pahnih in elaw...?" tiin ka lo welcome vat a, Anoopa chu thawveng zet hian a rawn lut a, Ka darah chuan rawn su her lawihin Min kal pel a, Ka mutna khumah chuan a pheikhawk bunlai nen chuan a let nghal tawp a..." Hei, Vawi engzat nge ka sawi dawn awwww....Ka khumah khatiangin lawn tawhsuh ka tih kha" tiin A kawr awmah ka zuk tham a..." Hei......Hei hi Hostel a nih loh hi...Kan In a nih hi, khatiangte a min tih vel, Khulai a Bawngpu Sureja bulah khuan i mu mai ang" in ti thei deuh hian a ti a, a then sawng lehnghal...

He Vaipa hi ka nel na em em chu Mizo ang maiin a rilru a zau a, Midang kan fiam ngamlohna hian kan fiam fo a, a rul tawk hian min chhang ve mai a, a thinrim duh malek lehnghal..." Eeee....chutiang chuan kan tu ang maw..?""" Ka Nu bulah ka sawi vek tawh, Zan In ah i hre mai ang, Court chu i hmachhawn hmel khawp mai"tiin a bulah chhan kan let ve nghal ngawt pek a..." Ah....Sawitur engmah i neilo, Court engvang a hawn ngai nge ni ang" inti thei zet chuan min tih khum a..." Bihar lam kha" ka ti chiah chu a thu ngil awt a, " Hei,Boss Ka nu bulah i sawilo tiraw" a ti ta chung a...." Engtin maw...Bihar lam chu " tiin Hmeichhia lo ding ve reng, kan infiam lai min lo thlir rengtu chuan a lo ti vat a...

" Oh...I awm ve tih ka lo hrelo a lawm le,I pasal tur hian engmah Bihar lam sawi tur a neilo" tiin zahzel ka siam vat a...." Pasal a???" an ti rual thawt a....An nui dun ta kiah kiah mai a, Panjabi tawngin an riat nawk nawk bawk a...Kei ka hawihai nasa mai si, an ni 2 lah an nui nasa dun ropui si...." Hei, Enge thil awmzia" ka ti vak a, " Bhaia...hrilh fiah teh" hmeichhia zawk chuan a ti a...Ka harh zawk...Chhe hei Hei hi em ni Anoopa'n ka phirpui a tih ve ziah kha ni ang...? Ka ti rilru ta a..

Anoop chuan " Hei hi Robin a nih hi, ka hrilh thin tawh che kha, India ram Mipa zinga ka rin ber leh ka innghahna ber a nih hi, NE India a Mizoram lam mi a nih hi"tiin ka chanchin chu Nula bulah chuan a sawi a, " Tin, Robin hei hi Ka phirpui Jeenath Tejander a nih hi, Lucknow ah MBBS zirin a awm a, hei tunah Ka nupui neih a rawn hmang dawn a nih hi maw" tiin Nula nen chuan min inhmelhriat tir ve ta nghal a..Nula chuan a kut phar chhuakin " Ka hmu che chu ka lawm khawp mai, Ka unaupa hian a sawi fo che a, kan lo ngaina sa tawh khawp mai che" a mit meng fiah dum kal maia min en pah chuan a ti a...Kan In dawm rual chiah khan a hik deuh chuai niin ka hria, A mit meng fiah danglam tak chuan min em tui zawih niberin ka hria..." Keipawh ka lawm e" ka ti tham tuak a...

Vai Nula, Negro, English Nula, Thailand Nula, Mizo Nula, Gorkha Nula, te pawh ka lo hmaichhan fo tawh, kan intawk tawn fo tawh, Mahse he Nula ang hi zuk awm tlat lo a...Thirin a hip tu thirhipthei a hmu a, a pan a, a bei thlawp ang maiin Ka mit, Ka kut leh Ka thinlung engkim chu a bet nghal thlap a ni ber....A nui var var a..." Lunch ei hunah kan inhmu dawn nia" tiin min chhuahsan a....Ka thaw a lo chham hmalo chauh niberin ka hria..Vai flima Vaipa in Vainu laka a luangliam ang mai kha niin ka inhria a, Flim chu nise Music a ri ang a, Leilet bial tlangah Hlumbel chhip chhuanin a kal zauh zauh ang a, Keiin Gamchha hrengin ka um ngei bawk ang a, Ka zai luah luah bawk ang..Mahe flim a ni silo a, Ka ang hauh tih mai loh chu..." I thidang em ni....I kut hmawr pawn dek suh ang che..I khawih keh ang" ka dara beng thuk pah chuan Anoopa chuan a ti a..." Saaaala..." tiin ka khumah chuan ka theh tlu tawp a, Rak ruai ruai chungin kan inchei ta tial tial a...

@THE RAIN COME DOWN N WASH AWAY MAY SIN…

Lunch eikhamah Anoopa chu a nupui turte chhung hmuak turin a kal chhuak dawn a, Kal ve a phal thaklo a, kal luih ngial ka tum pawn a phal hauhlo mai..Ka lungawilo lek lek hman a..Mahse,,Jeenath chuan min siai zauh a, " amahin kal tir rawh, hmuh tlak a ni vaklo a, a zak a niang" a lo ti sap a, Chumi thu a hre leh si chu a nuih a za vaklo..." Phuba ka la ang" tiin motorah a lut a, a tlan chhuak a...Jeenath chuan " Ka pa i phal chuan Thei huanah kan kal lawk teh ang chu?" a pa kuah chial chung chuan a ti a, Min siai zauh a,,A pa chu nui vur vur pah chuan " Bawihi, I u hian a thianpa hi a lenkualpui hman meuh silo a, kan fang ho dawn nia" a ti ta a...An huanpu chu a ko luah luah a, a rawn dawk vat a, engemaw punjabi in a sawi zung zunga chumi hnuah Palian deuh deuh 2 chu engemaw a hrilh a, " Kal ru le" tih pahin an In hnunglamh chuan kan zui dun nghal a..

An huan chhung kan lut chu rinaiin an lo ropui, hna an thawk nasa tih a hriat, Nimbu kung tawi lihleih an awm fur a, chungte chu an rah thliah thliah hlawm bawk a, Pangpar an vul chuk hlawm bawk a, chung pangpar te chu khuai in an vir nak nak hlawm a, Kan piah deuh ah chuan khuai bu a awm thluah a, chung khuai bu chu 20 vel zet tur a ni hlawm a lun hmel lat lat khawp lehnghal a...Kan kal pelh chin zel chu min hrilhfiah zel a ni ber....Thui pawh kan kal hma chuan hotupa phone chu a rawn ri a, ding meuha an inbiak hnuah " Bawihte ka kir leh a ngai tlat mai, Robin hi lo va fanpui mai teh, taka Apple hmun kha thleng hram ang che u, a hla deuh nanga a hmun thlen chuan a nuam phian a nia" tiin inthiamlo tak chuan min kir san ta rih a...


Jeenath chuan kal pahin thingtang a lek vat vat a, a ti ti barh barh a, kan hma ah chuan Huanpu kha a kal vei dad dad bawk a, Jeenath hi a hmeltha satliah mailo a, a hmel tha takzet a ni. A bulah hi chuan hmeichhe dangte chu an dang lep lep tave ang, MBBS zirlai a ni nanga a zia chu a nelawm sarh a, Khawkhat pa hausa fanu a nihna reng a langlo, a che a zang vah mai a, a salwar hak phena a pian fuh zet mai chu mipa mit in a hmuh hmaih hauhlo ang le...Hmun pakhat kan thleng leh a, chu hmun chu Apple hmun an tih chu a lo ni a, Apple Kung za chuang zet hi Luite kamah an lo ding thelh sung mai a, Chu luite chu a fim vei viau lehnghal. " Ka Pu pa hian helai hmun hi Rs. 80,000 in a lei mauh mai pek a, vannei tak a ni, He Apple hmun hi Km 3 leh achanve bial zuk ni a...." tiin min hruai tupa chuan a sawi siam siam a....

" Pua tikhan min kalsan la, Robin hi Apple kan lawhpui ang e, chuan kan haw leh mai ang" tiin Jeenath chuaan a ti a..thuawih takin Huanpu pawh chu a kal ve mai a...Jeenath chu Apple kung awi deuh luite chunga inzar phei a Pipu an suih ah chuan a uai nalh nalh a, Apple hmin a keih hmarh hmarh bawk a..." Robin Ka unaupa i lo duat thin viau avangin ka lawm khawp a sin" tiin nui ver ver chuan min bia a.." Ekhai, Anoopa ka chhar hi vannei ka inti khawp mai" ka ti let ve mai a..Ka pheikhawk ka phelh a, Ka kekawr tlang thlep chhingin ka ngalrek chin chu Luite luang heuh heuh ah chuan ka chiah a, a dai sawng sawng a, ka ke kham ut ut pawh chu a ti nuam sang sang khawp mai..

Eng eng emaw sawiin kan titi tui phian a, thawk leh khatah ruah a rawn sur ta huk mai a, Jeenath chu rak chul chung chuan a rawn tlanchhia a, " Helamah helamah" tih leh Kawngtum zim angreng tak lo awm chu zawhin a tlan ta daih a...ka pheikhawk chu ka khai lawka a tlanna lamah chuan ka tlan ve ta zel a, thui pawh kan tlan hma chuan Bawng tawlailir chhia a tanga siam hulhliap lo awm chhungah chuan kan thu huh hliam a..a nui deuh hak hak reng a, a rimtu chek chek hle lehnghal...A kawr hak pan tak huh chu a taksa ah a bet thlar mai a, chu chuan a vun nalh zetmai a tilang thei a, a awm zawn chu a phir pawng laih ve ve a, a sam huh hliam mai a hui pawk pawk a, a chhawl leng vel a tham tawm nawk nawkte chu hmuhnawm tak a ni..Hetiang ang em em a hnai hian ka la hmulo bawk a, a rimtui zia leh ami hip natzia lam kalo hrelo tawp a lo ni...


" Hey, tinge min en reng a?" tia min nem pahin a nui har har a, " i hmuhnawm em a lawm" ka tive ngawt a..." Engmaw...?" a ti ha a.."..iiiiiih i hmuh...aaa...i huh nasa viau a nih kha" ka ti deuh ta nuaih a..." Nia, a sur tehphut em a lawm le...He hulhliap hi, Anoop nen kan siam ve ngat a nih hi...Apple huana kan luh ruk apiang in tah hian kan bibo daih zel.." nui hak hak pah chuan a ti a..." Ka duh lutuk che, Ka lo fawp lawk mai teh ang che" tia pawm thlawp ka chak kher mai, Mahse, Vai nula a nih bakah ka thianpa phirpui a ni si a, A ni pawn "Unaupa" ang tak takin min en ngei ang a, Keipawn farnu angin ka en tur a ni" tih rilru siam vat in, amah en reng chu ka duh talo a...ka en reng chuan ka insum zolo mai ang tih ka hlau pek a ni...


Ruah lah chu a tla duh vei phian bawk si a, Khawpui a ri dur dur reng a, Ka phone a ri ral ral a, ka en vat a, Anoop lo niin, kan chanchin min rawn zawt a, Ngaihtuahawm,kan nih loh thu leh Jeenath sawi angin an bukte ah kan biruk thu ka sawi a, Chhiahhlawh ka rawn lam tir ang che u" tiin kan inbiakna kan ti tawp a...Chhiahhlawh kan ngah chhung chuan kan ti ti dun zel a, An chhungkaw chanchin leh an unau chanchin min share bawrh bawrh a, A pa pa pa chhawng emaw zah atanga helai ram Landloard an lo ni tawh a, an unau hi phir an ni a, A nu chuan an nau mipa tur apai chu thisa in a piang a, nau a ken leh chuan a nunna tan a hlauhawm dawn vangin unau an neih loh phah ta a nih thu te a sawi zel a...

A pa in MBBS a zir zawhah Pasal nei tura a nawr mai tawh a rinthu leh Mo an neih tawh chuan a tan awm a nuam tawh dawn silo a, Pasal neih an tih ngei a rin thu te a sawi siam siam a...a ti ti lai hmel chu ngun takin ka lo en kar a, a hlim hmel sar reng a, a khabe dawh lek lek anga lang, a ir no chek mai te leh a nghawng no tak maite chu chil a ti put ngei mai le..Punjabi Nula nalh nalaileng chu...an lo ti mahthlawnlo a, Henu zet hi chu ka tive lo theilo a ni...Zeploah chuan Vai hmeichhia reng reng melh pawh ka melh peih ngailo a ni a, Mahse tunah chuan Mit tlalo lekin ka en dauh dauh a nih hi..Uiin a pu saruh khel it hmel taka a thlir dauh dauh ang hi ka inchan ber...

@LOVE OF MY LOVE

Khuang ri tlawr tlawr ri in min ti harh zawk a, Mo lawm lawkna zan a ni tih ka hrechhuak thut a, Chhun lama kan ruahdo vangin ka sil deuh them a, Ka inbual zawhah ka lo chhing hlek emaw ka tih kha khua pawh a lo thim vek tawh hi a lo ni a, Ka meng thut a, ka phu zawk thei hial....Ka hmai bul set ah chuan Jeenath chuan minlo bih lek a lo ni a, chutia ka men thut a vang chuan a ni pawh a phu zawk a, a ding hluai a..," Engthil nge ni ngai" ka ti ngawt a, Table lamp chu ka on nghal bawk a..a sen ap ap a, zawi sep hian " I khua a sik emaw ka ti a" a ti niah niah a...min en ngam meuhlo..." Ka lawm e...ka tha a lawm..." ka ti mai a..." eeerrr....Min ngaidam dawn nia, Mo a rawn thleng tep tawh ang..in silfai la Inhnuaiah rawn chhuk ve vat ang che" tiin kal mai a tum a...Mihring hi engemaw ti tak hian Boruak man hi kan awlsam viau, chutiang hun a thlen chuan serh leh sang awm maploa chet mai awl tak a ni, A thusawi zo ding tur chu a kutah manin ka pawt salh a, " auch" ti pahin ka awm ah a rawn bawk thlawp a....kan hnar leh hnar a insi deuh thaw a, a thaw lum ham ham chu ka hre thei, kan mit leh mit chu a in en kar a, a hmui chu fawh chakawm zet hian a kau deuh pham a, a mitmeng atang chuan engmah a hnial lo tih ka man thiam nghal mai bawk a.


Ka lu chu tlem tikangin a hmui sen vam ham mai leh Adama thla zawng zawngte fawh chak em em tur khawpa nalh chu ka fawp ta thuai a....a phu miahlo...min chhang heklo..a dawh tawp a, A kut ka vawnna ka thlah a, a dar ah dawmin ka lamah ka pawt hnai tial tial a, a ni pawh a rawn hniam tial tial a, a mit a chhing siar siar a, duhthawh takin min chhang let ta bawrh bawrh a....Kawngka an rawn kik thut a, an awmpui nu aw chuan "Ka pu i tho em?" a rawn ti a, kan thil tih lai chu kan tawp chawt a, Jeenath chu a meng buai nghal hle..Ka kut chuan a hmui chu hup vatin " Awle...Ka insiam mek e..." ka ti ve nghal a....A kal sawn tih hriat takin a pen ri khap khap a..." Rei suh.." tih leh thawh a rual a, kawngka chu zawite a hawngin a bih dek dek a, a chhuak ru ta zal zal a...


Mo an rawn thleng a, khuang nen kan ri bung bung a, Mipa lam chhungten Pawisa nen an lo hmuak a, Mo chhungte rawn kal zawnah chuan Rs 10 note leh Rs 5 note thar tak tak an lo vawr deuh zauh zauh bawk a, Monu chu a nalh kher mai, Inneih pangngai a nilo mai mai pawh a, tlereuh a inbel nasa hle....Hungchhung an rawn lut a, Eng emaw serh leh sang an tih zawh hnuah Mo leh Mopa Nu chu inkaiin Inchhung lamah an inzui lut hnak hnak a...Midang zawng chu pawnah kan awm vek a, Khuang tang tawk ri zawt zawt karah chuan Naupang leh Mipa thenkhat an lam zuk zuk reng bawk a, a then anlo inbe mawlh mawlh bawk a, an inkuah lawp lawp bawk a, Anoopa chu ka va en a, an lo bawr deuh laih laih reng a, Chibai tu a pui a ngah viau, ka en reng tih a hriat chuan min rawn en a, a nui vur vur a, ka lo bu nghat a...Anoop chu hawi sawnin tunge a biak ni, min rawn melh leh zawk a...Chumi hnu lawkah an din hual thap karah chuan Jeenath a rawn chhuak ta zan zan a.....A nui sen sen a, awwww....Avan nalh uchuak tak emmmmm.....

A sam chu a hnung lamah a thlah siau a, a chhip a tang chuan Rangkachak a cheimawi thil a rawn bawk chhuak zar a, a chal arh phak maiah chuan a rawn bawk a, a hnar ah chuan a engmah a inbeh lehlo, a kawr hak chu a sen dal deuh niin, sari pan lam deuh a veng a, a kut a rang nuau a, Mendi a hnawih tih hriat takin, a kut rek lehlam lehlam ah chuan ngun a inthil tlep tuar a, a mit meng fiah kak mai chuan min en kiau nangin, a lai ve deuh tih ka hmu thiam a...ka bul chu rawn thlengin " Anoopan buaipui tur chein min tir a.." a rawn ti a, " Buaipui ka ngai hlei nem" ka lo ti mai a..." Nia, Kapa atanga kan zir chu Hetiang nikhua hian Min hlutsaktu hmun hla tak atanga rawn kal vang vang chu ngaihven ber tur tih hi kan thupui a nia" a ti ve mai a..." a that chu, Chuvang em ni zanin kha" mei nei deuhin ka ti a...A sen ap ap...." I zaklo em a lawm" nui seih pah chuan a ti ta a....Kan lo nuij dun ver ver lai chuan a thiante niawm tak hmeichhe dang an rawn kal a, an inpawm chuk chuk a, an kai sawn ta daih a....

Banian Tree buk hnuaiah thuin Anoopa chetla vel leh Midang zi nak nak chu ka en reng a, An khaw siam Zu ( Local) bawng hnute ang maia var sur mai, thlum leh tak tha deuh mai chu No 3 lai ka in tawh a, a no 4-na tur ka dawm leh mek a. Ka lu a hai deuh chuai chuai tawh a, Mualpho mai ka hlau deuh a..Khuang rah chu khawl hmanga tih rik ang mai a ri tluk tluk reng mai bawk nen, Ka awmdan nen chuan a in mil viau lo..." Thianpa, eng thilin nge mawlh che a?" tiin ka bulah chuan Jeenath chu a lo thu a...." Ka awm a nuamlo..He thil hi a lawm?" kan ti ngawt a...." awww...A ni maw..?" a ti a, a kut chuan tuemaw a hui lauh lauh a...Anoop a lo ni a..."Unaupa, enteh, kan khual tha hi hei hian a tlawm a nih hmel a, ka tei harhpui a ngai a nih hnmel..." tiin an unau chuan min nuih hak hak a..."Dil kamah khan va hruai rawh" a lo tive mai bawk a...Motor-ah min nawr lut a, nui nghek nghek pahin " Dil kam" an tih lam pang niawm takah chuan min kalpui ta a...Motor khalh a thiam nek lehnghal...

Dil hmun chu kan thleng ta a...Vai flimah chauh hian hetiang hmun hi a awm emaw kalo ti thin a, Mahse a lo ni hauhlo...Helai hmunah pawh a lo awm reng a lo ni a...Dil lian lutuk chu nilo mahse, Leihlawn kul pep tawite a indawh kai , pangpar dil kama awm thin chu an lo par vul chek bawk a, Water Lili an zam hnawk niaih bawk a...Dil kam ah chuan dumde an thlawk sep sep a, Dil chhung leh pawnahte chuan Uchang an tlak ri karh karh reng bawk a, khauchher leh khuangbai chenin rawl an chhuah a, Thla de tir lam chu a eng ve va va bawk a...chu kawngin a pawh tur leihlawn tawpah chuan In hmanlai hmel deuh hi a lo awm thim khap bawk a...Motor atang chuan Jeenath chu chhukin A tlan phei a, a au vak vak bawk a...Zan thla eng deuh uau hnuaiah chuan a hmel paw phak mai chu a lang nalh lehzual kher mai....

" Hey, Lo kal ta che...Hei aia hmun nalh leh nuam hi a awm hauhlo a nia" tiin a lei dawh lamah chuan a vir phei zar zar reng a....Ka lo suangtuah dan leh ka tawn fo tawh atang chuan Vai nu hi an induh deuh larh thin a, Mipa zawk hian an tlawn duan duan thin a ni a..Mahse tuna ka Vai nu hmuh zet hi zawng....a danglam daih a ni.. Chu a ze hlimawm tak chuan a hmelthatna chu a kap eng phet phet niberin ka hria...Inte chu hawngin light chu a on eng pap pap a....

" Hei, Lokal hnai teh helai hmun hi Ka u nen kan lehkhazirna hmun a nih hi..Rilru ipik lutuk leh nawmsam loh deuh chuan kan pan vat zel a nia" tiin a nui hak hak reng a..Inchhung chu ka rinaiin a lo phuisui vei viau a...thlalak maksak pui pui, an naupanlai leh an unau chezia hrang hrang a lo intar khat dul vek a, Ka enkual thuak thuak a, Chung thlalak zingah chuan a u nen Agra kan kal tuma kan uangthuang thlalakte, Mizoram kan zin dun tuma Rih dil kan kal dunna te an lo tar ve ngei bawk a..." Hei, keichuan ka hriatna che a rei tawh a sin.." tiin Anoop nen a kan thlalak ho chu a kawk kual dan dan a..." Hetiang a lo tih " kan ti ngawt a...

" Pawnah thu ang" tih leh chhuah a rual a, rang takin ka zui ve mai bawk a, Beer a keng tat tat a, In kawt pawng deuh laia phul cham deuh darh ah chuan a thu hnawk a, " Zanin chu ti ti tak tak ang aw.." tiin min nuih sen sen a...a bulah chuan ka thu a...He vai nu hian min zem a tawh takzet a ni..Naktip mai hi a unaupa nupui neih hun tur a ni tawh a...a lungngai lawk deuh em ni dawn ni..? Nge keimah min chawh hlim a tum mai mai zawk niang?...Ka rilru ang a pu ve zawk nge..? a ni lah zanin tlaia thil thleng kha hrelo ang maiin a awm hmiah hmiah bawk si a...A che zia leh hawiher, ti ti pah chu ka en reng a, Thli a thaw heuh heuh reng bawk a, kan awmdan chu Flim siamtu in duhtawka a duan ang mai niin ka hria...

" Enteh, I chanchin sawi teh, In khua, in ram, in life, i nu leh pa, i chhungte....I bial nu...engkim sawi vek rawh" tiin min tur sek a...Sawitur ka hrelo...engmah sawi tur ka neilo...Nu leh pa ka nei a, Unau pianpui ka neilo tih bak sawi tur ka nei lo e" ka tih pawn..." i nei lutuk ang, Anoop a bula i share thin zawng zawng kha"...a la ti zel a...." Anoopa hnenah zirlai bak share ka nei ngailo" ka ti leh hram a....a nui hak hak a...a nui ri chu a mawi takzet tawh a ni...Ka bengah a la cham reng thei hial..tuna he thu ka ziah lai pawh hian a ri chu ka hre tel ve hialin ka hria....a mimeng de sar sar in min en ha laite, Beer no lei bara keng chunga a ti ti par parte pawh a la lang zut zut thei hial bawk a ni...

Min nawr nasat em avang chuan ka chanchin tlem leh a u nena kan chanchin ka share ta ringawt a, Bihar a kan zin dun tuma tawhsual kan tawh dante, Police Custody a zan kan riah dante ka sawi ta vek a, kan nui dun hak hak reng a...chutih laia kan boruak chu ka hrechhuak uai uai a, Anoopa pa hriat kan hlauh ziate...Anoopa in ren em em ziate, Hetiang taka hausa leh chhungkaw nuam an nih ka rinloh ziate..Phirpui a neih ka hriat hauhloh thu leh Bus tawt zeta ka chuan dante ka hrilh ta vek a...." Ohhh...Sardarji maw...?...pa fel deuh a sin a nih...Tupawn kan ngaina a, mi hlim thei tak a nihna hian a bula awm a tinuam tak zet a ni" a lo ti a...A hmel ka en kham theihloh chu ka en leh ta tlawk tlawk a...

" Enteh...Kei chu Hmangaih ka nei a sin" a rawn tita phawng mai a...Ka lo sen ap ap thei...Mi ngaihzawng nei lai engmah zawt buai hleiloin ka lo fawp ve ngawt kha a ni si a...." Ka hmuh tirh phat atangin ka duh nghal em em a, engtik lai mahin ka theinghil tawhlo...Anoopa pawn min hriatthiampui khawp, Mahse ka pa in a duh dawn hauh silo a...chuvang chuan kan sawi lang ngailo" tiin lungrun hmel tak chuan a kun deuh ngaih a..." Awww...avapawi ve....I pa chuan a duh dawnlo tih engtin nge i hriat theih zawk a..?" ka ti hram a...Thla eng deuh ruau ruau atang chuan a hnar tliang hlarh chu ka hmuh hmaih hauhlo, chuchuan a tap a ni tih min hrilh kher ngailoin ka hre thei mai..." Nia, Engkim hi kan tan a inmillo vek a lawm le, Sakhuana, Society, engkim" a ti tham tiau a....Ka khawngaih kher mai....Hetiang ang nula hmeltha, Vainu zawng zawng pawn an khum zawhloh khawpa hmeltha hian a duh ber a nei thei dawnlo a nih si chuan an culture leh sakhua inzawm lutuk chu pawi ka lo tive em wm ringawf a...

" Enteh..engkim hi a thim zawng niloin, a eng zawngin thlir zel tum tur, Kan tana tha tur zawk hi kan hrelo fo a nia...Nu leh pa hian an fate kan retheih an phal ngailo a, kan chunga an rilru put hmang hi a chhe ngai miahlo a nia" tiin inthiamlo tak chuan a kut vawt thlar mai chu ka khawih sak da da a..." A dik a lawm....Chuvang tak chuan a nia, a ni bulah pawh ka duh zia leh ka hmangaih ziate, ka hrilh ngamloh ni...ka pa bulah lek pheichuan Duh ang zawng pawn ka melh ngamlo hrim hrim" a ti leh tiau a...Ka leinat kher mai..Sawitur pawh ka hrelo...A luah chulin ka en reng ringawt a...Dil kama nungcha te lah chuan an pi lungngaiin a tap tih reng an hre silo....an ze ngai rengin an ri sep sep reng a...

" Khatia ka hmuh phat atang khan ka rilru a luah em em a, Anoooa hnenah ka sawi a, a ni pawn min pawmpui viau nangin kan inkar fel theihloh dan tur engkim a hre lawk vek si a...kawng awlsam zawh thei kan nilo tih min hrilhin, hlim taka hun hmang zel a, midang ka pa remtih ngei tur ka hmuh mai a beisei viau a..Mahse, hei tun thleng hian tumah ani anga ka rilrua bet Anoopa tihloh chu Mipa dang reng reng an la awmlo" a ti a..a tap ta hawk hawk a....tihngaihna vak hre heklo...ka en reng a..ka khawngaih em em ringawt mai a ni...Achang leh ka zak veng veng thung a, enge Anoopa khan min hrilh hauhloh....Tehhrep chuan, Hepa hian min va tiduhdah tak em....ka insehruh teuh tawh a...

" Ka tan i hlut zia i hrelo a ni" a rawn ti ringawt a...Mak ka ti hle..." nia, a hrelo mai mai a lawm...hrilh heklo che.." ka lo tive mai a..." Nilo, nangmah kha..Nangmah ngei kha...i ni a sin Robin" tiin min rawn en ta kiau mai.....Dil kama rannung ri chiah chiah te, Thli thaw heuh heuh te, Dil hara tui luang ri ker ker te.....uchang tlak ri karh karhte, Ka thaw te hial tiamin engkim an chawl vek niin ka hria...Ka thin phu dup dup ri chauh ri a awm nimaiin ka hria....

" I awih hauhlo ang....Kha In tour thlalak kha, Agra in tlawh tum a mi kha ka en a, chutah chuan ka mit i la nghal a, ka mit mai la loin ka thinlung i la chho ta zel a...a tawp a tawpah,chuan a puak keh ta phawk a ni" tiin min la thlek ha reng a...a hmel a thutak ropui si a, awihlo dawn a awihloh ngawt theih siloh, awih dawn a, awihawm chiah bawk silo a ni deuh ber...Min rawn hnaih zel a, A tawpah chuan duhthawh takin kan invawp ta a...

@THE WEDDING NIGHT

Ar khuang chiah chiah leh Kel be rawng rawng ten min ti harh zawk a, ka room khumah chuan muin Nimin leh nizan lama thil thleng chu ka chhut let nauh nauh a, Lawm tur nge lawmloh tur pawh ka hrelo...Engkim a ni ththut lutuk khan minti hamhaih a ni ber..Hmeichhia hmeltha satliah nilo, tha uchuak tak mai ka tawng a, kan inhmu satliah mai a nilo, kan mu dawn ngei a ni si a, Ka awmdan chuan min ti hamhaih thei hial a ni...Kawngka tuemaw hian a rawn kik dat dat a, "lo lut rawh" tiin ka chhang a, Kawngka chu inhawngin chhiahhlawh nu a rawn lut a, Thuamhnaw eng emaw hi a rawn fun tat tat a, Hei hi ha la, Brekfast ei turin Pi Jeenathi'n a nghak reng che a nia"' tiin dawhkanah chuan a thil rawn pawm luh chu a dah a, a chhuak leh nal nal a..

Inhnuai a ka chhuk thlak chuan an lo kim thap tawh a, In neitupa ber chu a ze ngai bawkin a lo tawng leh lung lung tawh a, Jeeneth leh Anoop chuan Naupang an lo chhaih a, an nui har har a, Nu ber chuan minlo hmu vat a " Robin i chauh deuh em ni?, In ram leh kan awmna a inang silo a, kan hrethiam lutuk che a nia?" inthiamlo hmel tak chuan a lo ti a, Anoop leh Jeeneth chu an rawn hawi vat a, "oh…I nalh hle mai..” tiin min lo nuih sang a..Tukthuan kan ei zawh chuan naktuk in neih ni a nih tawh vangin Inneih thil eng eng emaw buatsaihin kan tul viau a, rem leh remlo in Jeenath nen chuan kan in melh leh zauh zauh thin a. Chutiang karah chuan kan nileng ve ta mai bawk a. Anoopa te khua ka zin hnua ka ni hman nawm ber ni a ni hial ang.

Inneih hunserh hman a hun dawn tawh si, kei ka la in hambuai nasa mai si, a dik tak chuan hetiang vai kekawr ti hnehnuk hak hi ka thiamlo mai niloin ka tui viau lo, tunah pawh harsatna ka tawk pang a ni si a…Ka phone chuan sms ka thawn a “Ann….tuemaw min pui turin han ti mai the, diar ka khum thiamlo a, kekawr ka ha thei heklo” ka ti ngawt a…reilo te-ah Jeenath a rawn lut a..”Wow….i lo la inchai buai hle a ni maw?” nui hak hak pah chuan a ti a. A van nalh uchuak thei tak em…Sari senduk a vun rawng nena in chawih zet mai, a kaih hnalh a, A sam chu hnunglamah a zial mum tel bawk a, thi manto tih hriat ngawih ngawih a awrh bei thlur mai bawk a, a chal-ah chuan vainu tlereuh vuah ang chi hi a vuah bawk a, a mit hmul chu a mitmeng ti rum lek lek turin a dum kalh bawk a. a land an-ah chuan a zahawm vung tawh mai. Ka Kekawr min hak tira, min tuai vir nawk nawk a, Anoopa nu a lo lut a, nui chungin..”woo Bawiha I lo va talbuai ve…” tiin Jeenath chu a rawnpui nghal a. Reilote ah chuan diar lawk tawk ka khim a, Chikan thui nalh zet ka ha bawk a, Vai chem kual zet mai rangkachak rawnga cheimawi ka kawnga puan veh ah ka zep a, Darthlalang hma ah chuan dingin ka in en a.. “ Rawn chhuk har tawh su aw..? Mikhual an thleng nual tawh a nia” tiin Anoopa nu chuan min chhuahsan nghal a…“I nalh lutuk, Dear” Jeenath chuan min rawn ti a…Ka lo nui mai a…a rawn kal hnai a, ka zakhnuai-ah a kut rawn zen lutin.. “Ka duh takzet che a ni” tiin min rawn kuah a…a kut nem thep chu ka lo chul sak hauh hauh a… Kei hian a lawm duh che….Khawvel hmeichhia ah I nalh ber” ka ti ve sak a…


An inneih chhung zawngin rem leh remlo in kan inmelh zeuh zeuh a, kan mit leh mit a intawn chang apiangin, a sen ap ap zel bawk a. He vai nula rothap ru zet hi ka ta tur ni mai turin ka ruat a, a kal, che vel, nui hmel, hawi her engkim chu a nalh em em ve. Mikhual zi nuaih nuaih karah chuan ka lo thlir leh reng thin a. “Ka u…hei hi minlo siam sak teh” tiin Anoopa nutei fapa mipa naupang kum 10 mi chuan a lehkhachaih chu min rawn hmuh a. an lehkhachaih hi siam dan danglam zet mai a ni a. Mizo in kan siam dan nen a inanglo viau. Sawl deuh peuh poh in, a mei leh beng uai duah duah a ni a. Ka thiam ang tawkin ka siam that sak hnu-ah inching zawlah kan inzui chho a, Lehkhachaih chu kan han chaih dun a..

“Robin, lo kal teh” Jeeneth chuan a rawn ti a, kan piah a nula ho awmkhawm na ah chuan ka va pan ta a.. “heng mite hi ka thiante an nih hi, Hei hi Robin Hmar a nih hi, Mizoram State atanga lo kal, Anoopa best friend a nih hi” tiin min introduce-a, an zinga hang leh hmelfel karh chuan “Oh…Ka hria che….a dik tiraw, unau nu” tiin Jeeneth chu an en deuh hau a. “Hmmm…” tih bakin a chhanglo… midang lo awmvete chuan “engthil maw?” alo ti rual thap a, “Ka sawi dawn” “Hei Goree, “ tih leh um a rual nghal a, a ni a lo tlanchhia a, an in um ta zak zak a..an thian dangte chu an lo nui bawk bawk a…


Dinner kan eizo a, an tual-ah meipui chhep in Punjabi nula leh tlangval an lam mup mup a, naupang hmel reng reng a lang tawhlo…Mizo te chu naupang an zi leh luih luih ang chu… “Bawiha local the” tiin Anoopa pa chuan min kheuh zauh a…Inchhung lamah kan inzui lut a, a room chhungah min hruailut zelin, an almeirah chu hawngin Chemte nalh zet mai hi a rawn phawrh a. “Hei hi, Sultan of Ranchi IX in knighthood te tan a pek thin a ni a. Ka fapa I ngai pawimawh a, helai hmun thleng thleng I rawn tawiawm hi kan chhungkua I chawimawi in, min ti zahawm ka tie m vangin min hriatreng nan leh lawmthu kan sawina ni pahfawm in ka pe ang che” a ti ta mai…Ka hamhaih lek lek zawk a.. “min pawmsak hram dawn nia” a la tit a deuh deuh a… “US dollar Nuaih 2 man hu vel a ni e, an ti si a” ka ti ban deuh chalh a.. “I tan chutiang ka ui hauhlo a sin, Bihari ho laka Anoopa I chhan dante, engpawh harsatna a tawh a pianga thih ngama I tan dante…Dubai in zin tuma intawhsual tawh a Anoopa damkhawchhuah dante engkim ka hre vek a sin….” Tiin a mittui a tling puau a… “Kapa, engmah a nihloh chu…Ka tan a hlu a, ka tan engkim a nih vanga ti mai ka ni a. Lawmthu sawina a nih chuan ka dawng theilo” ka ti ve tat lat a.. kan in nawr fe hnu-ah “a nih order takin ka pe ang che” min tih tak avangin ka pawm thei ta hram a.


Anoopa te 2 Honey moon Airport lam-ah kan thlah a, kan hawnlam chuan Jeenth nen chauh kan ni tawh a, Ford dum a khal-a, a bul ah ngawi rengin ka thu a, ka rilru a kal bing viau, a chhan chu, a pa in tikhawp khan ka chungah rinna nghatin, a fapa ang main min en a, Khawvel Mi hauhsa tak tak ten an aw hem em Chemte hlu tak min pe a. chutiang a nih lai chuan, engtin nge keiin an fanu duat em em hi ka lo ngaihzawn theih ang ni” tih vangin ka buai hle… “Rob, I rilru a buai hmel hle mai, enge harsatna I tawh a…? Ka pa nen rooma in luh hnu-ah I awmdan a danglam daih a nia” tiin Jeeneth chuan min zawt a…Thil awmdan zawng zawng ka hrilh a, kan 2 inkar thlenga ka rilru put dan nen ka hrilh ta vek a…Kawngsir-ah Motor ti dingin, an in lantheihna lai a ni bawk a, an in eng de chuah chuah chu thlir dunin Motor bang nghengin kan ding dun a. Tumah mah kan tawng lo, kan thlir ngai kan thlir dun ngat ngat a ni ber. Minute 20 dawn chutianga kan din hnu-ah “I rilru chu ka hria a lawm..mahse engtin nge ka awm ang?” a rawn tichhuak ta phawng a.. Chutak chu ka chhan huphurh ber a ni… “Engkim theihnghil la, ka awm ve anga ngailo tawp la, a fel vek mai ang” ka ti a.. “Chu chu thil theih a ni silo a lawm” tiin a meng sen ram tawh…a tap lo chauh a ni tawh…Ka pan hnai a, a hmazawn-ah tak ka ding a..minlo en kar bawk a..Chu Punjab zan boruak lum tak thli thawh heuh heuh in a rawn chhem leh heuh heuh thin, thla bial tur in mung vel mek-ah chuan a hmelthatna chu a ropui zual sauh emaw tih tur a ni a.

A tahchhuak insum hmel, a hmui pet a, insum tih hriat tak a, a hnar nalh zet mai kau hak hak chu en kham a har hle…a hmelthatna a tizual a ni. Hmeichhiaten an mittui an hmang thiam a, Hmeichhe tap par mai bul-ah mipa an nem duai duai zel an tih hi, thil dik a ni chiang a lawm..He nu ngat phei hi chu “min ti a zo thei tak ngial dawn a lawm” tih pah a kuah vawng vawng lo tur mipa an awm hauhlo ang… “Ka tih palh a ni” tiin ka kuah tan gen gen a..Ka awm nghengin a tap hlawp hlawp a..a duhtawk a tah hnu-ah fiamthu in ka chhaih zauh a…ka awm-ah chuan min chum taih taih a…

Ka inbual zo bathroom atanga ka chhuak chu, ka khum-ah chuan Jeeneth a lo mu kak mai..ka phu zawk a, : “ Hei..enge I tih ni” tiin tawng ri ngam silo chuan ka ti a.... “ Naktuk I hawng dawn si a lawm” a lo sam et a…A room lamah kal turin ka tih ngial pawn a duh tak siloh ah chuan, a sir-ah chuan ka inthawlh ve ta nge nge a..a pangti lum ham ham chuan mipa ka nih zia a lantir a..Mipa chu a hun-ah pa takin a awm tur a ni a. Hmeichhe awmnem zawkte khian uaih uaih chu mipate mipatna a ni heklo, a hun tak-ah mipate mipatna chu hmeichhiate lawmna ah chantir hi mipa zia a ni. Engkim a kaltluang thlup a, zan a tawi tak mai..Ka harh hlawl a, ka bulah a lo mu tawhlo a, a mutna zawn chu a lo la lum thar thar a, awngphah pawh a chuar nian a, a rim a nam chem chem a.

@ AFTER A YEAR PAST….

“Rob, I tha maw..?” tiin Anoop-a aw chuan min rawn bia a. Ka damthu ka hrilh a..Naute an pai tak thu leh an chhungkaw hlim zia sawiin a ri bawrh bawrh a, chumi hnu-ah Sangeeta ( a nupui ) nen kan inbe leh zawk a. “Rob, Jeeneth I be ngai em?” a ti a..E hiau Sangeeta chuan kan karthu a hre vek em ni ang ?....ka lum pup a.. “ahhh…aaw…aih be tam lemlo” ka ti bah nuaih a..A dik tak chuan biak ka duh tawhlo, khami ni, an in ka chhuahsan ni a, ka rilru a thil awm kha paih kian tumin ka bei ngat ngat a, ka paih kiang thei hauh silo a nih kha..Tun thlengin ka hnarah a rim tui tak kha a cham a, hmeichhe sam kir lam deuh khawlaia ka hmuhin ka buai zel zawng a nih hi..Vai rama zin ka chakloh phah a, hmuh chak si, hmuh hlau bawksi in ka awm a ni ber… “ Tinge, be vat rawh..engmah a la hrilhlo che a mi?” a rawn ti leh a…engmah min hrilh ngailo, min be ngai heklo…biak ka tum bik heklo..kan reh dun veng veng a ni mai…


Ka rilru a nuam thei ta hauhlo…Sangeeta in “engmah a la hrilh n ache nge” min tih ri khan min hneh tlat.. Hnamdang hmangaih ka nei ka inzahpui em em a, ka thlah thei hauh silo…Hnamdang nupui pasal nei ka haw em em a, keiin ka vei a ni ve ta rengsi.. Hnamdang mai mai tiin hnawlna tur ka zawng ngat ngat a. Mahse engemaw tit akin chu thu chu ka la na leh viau lawi si… ka awm a nuam thei hauhlo.. Office kal a nuam heklo.. ka awmdan a piang chu ka kham a ni.. Ka thawk lawk a, Mumbai ticket ka la a, Sunday ni a Mumbai kal turin ka in ring ta ut mai a. Engpawh nise…Amah ka zawt ang a, Pasal a nei dawn a nih chuan, lawm takin ka thlah ngei ngei tur ani..a nihloh chuan Ka mualpho nasa mai dawn si a…tiin ka rilru ka siam fel a… Mumbai Hospital a Neurologists Doctor Jeeneth Tajender hmu tur chuan Pathian ni pawh serh hlei theilo in ka thlawk chhuak ta luah luah a…


“Hei hi Dr.Jeeneth I flat a ni em” tiin kawngka a ding hmeichhe upa lam tawh, thau ve deuh tak chu ka zawt a.. “Ni e, ka pi a awm lo a. eng thil nge? Massage I hnutchhiah mai dawn em ni?” tiin pangngai deuhin min chhang a… “Engtik-ah nge a lo kir dawn”? ka ti a…” Ka pi chu a lo hawng tep taw hang… naute a damsamlo a..” a tit a mai…ka bing mup mup a…”naute a?” ka ti tuar a… “ Aw ni e…Ka fapa mawle” tiin ka hnunglam atang chuan ka aw hriatchak em em thin, ka hriat ngam siloh chuan a rawn tit a a…

“Lo lut rawh, Pi Sunnita cold dring rawn thli t ache, Khawnge bawihte-a” tiin Jeeneth chuan inchhung luh pah chuan a ti zung zung a… Inthlahrung deuhin ka zui lut a. “ A mu hil” tiin a chhang a, choka lamah min luh san daih a.. Jeeneth pawh room pakhat-ah a lut a, rei vakloah chuan casual dress nen a rawn chhuak a… “ I reh thei vang vang hle mai.. I no I thlak a, min hrilh bawk silo a…” tiin hmel hlim sang si, rum deuh al a min en chung chuan a ti a… “ Nia…ih englo” tiin dawt ka sawikual ta vel mai mai a…Cold dring kan dawm dun a. Minute 30 vel zet a ni tawh..Jeeneth chu a hma aiin a upa hmel deuh tih mail oh chu a hmelthat dan a la ngai reng..Vai nula hian Pasal an neih chuan an thau kawng kawng zel a ni ngai a, a ni ve zawng a la nalh zak mai si a…A hmel chu tunhma ai khan a muk deuh zawk em aw..tih tur a ni a. a vun pawh a nalh ngai rengin a la nalh…


“Naute pa hi engtik-ah nge a lo hawn dawn a?’” inthiamlo chung chung chuan ka ti a… “A lo hawng dawn hlei nem…..Engmah inkungkaihna kan nei tawh lo..” bung deuh chuan min ti a.. “Oops..pawi ka ti hle mai” ka ti ve ngawt a.. “Engahmah ngai duhsuh, eng atanmah ka ti hlei nem” tiin a thutna atang chuan a tho a… Ka inbual dawn a, chaw I ei dawn nge I hawng dawn?” min tit a tlat mai…chhan ngaihna ka hrelo “eh…Jeeneth englo….ka be lawk duh che a..” ka tit ham tuak a.. “Oh,…enge sawi dun tur kan neih a” a ti hmak a… “Englo a ni a..” tiin An in ka chhuahsan atanga ka rilru leh ka khawsak dan zawng zawngte, kan hma dan leh an hnam dan chung change, engkim ka hrilh vek a, Sangeeta nen kan inbiak dan thlengin ka hrilh vek hnu-ah “ Chuan engthil nge min hrilh tur I neih a?” ka tit a nge nge a…


Cane Chair bial ah chuan a thu a…a en ngai a en reng a…min melh chin eih duhlo…. “Engmah I hnena sawitur ka neih ka hre hleinem” a la ti talh a…Min hnung chhawn a… a che dat dat a..a tap tih ka hre reng… He nu nen hian kan induh…kan inhmangaih,mahse ka zeiloh vang in kan kar thu engmah harsatna awm uk siloin ka ti tawp a, ka chan tawk a ni…zawi muangin ka pan phei a, a tap kun lai chu a darah zuk khawih ka tum lai tak chuan “Ka pi hei note a tho” tiin a awmpui nu chuan a rawn bia a…A tho vat a, naute tap ngak ngak chu a pawm vat a, a awi ta hlah hlah a…

“Ka fapa, a nih hi..Arjun Hmar” a ti a…”Enga..” ka ti hu a…A mittui tling pam chung chuan “ I fapa kan fapa a nih hi” tiin min pawm tir ta a…Ka en a, ka fawp a, ka pawm ta hle hle a…Khang thla zawng zawng khan tinge ka hriat si loh… “I nu leh pa leh Anoopa’n engtin nge an tih” tiin ka zawt a.. “An hrethiam khawp, mahse Inneih lam ka sawiloh avangin an sawi biklo” tiin a hunt awn khirh tak leh a u Anoopa rilru zauziate, kei min hmangaih ziate, engkim a sawi vek a…a sawi chhung zawng chuan a mittui a hru fap fap reng bawk a… “ Ka kalsan tawhlo ang che u, I bulah ka awm reng ang” tiin an nufa chuan ka kuah ta hle hle a…Ka phone ka phawrh a ka call a, “Hello, Rob, engthil nge nita a?” aw zang vahin Anoopa aw ngei chuan a rawn ti a “Dinner I chawi a ngai, i makpa ka nita si a” tiin ka chhang a…A kuk raih raih thawmte, an nu a au chul thawmte…phone atang chuan a ri nak nak a….Jeeneth chu ka va en a..Mittui tling pam hian a lo nui a, a Van tha tak em…a heh sen vam ham te chu a pet a, ka hnaih a..” Hello….Hello…” tia Anoopa aw in phone atanga a rawn ti pawh chhang chuanglo chuan Ka Queen of Tarn Taran Jeeneth Tejender chu ka fawp ta veng veng a….

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply
  • Similar Topics
    Replies
    Views
    Last post

Who is online

Users browsing this forum: No registered users and 2 guests