THE DEPENDANT BY Tochhong Ruata

Ngaia
Site Admin
Posts: 25813
Joined: April 30th, 2016, 4:07 pm

Re: THE DEPENDANT BY Tochhong Ruata

Unread post by Ngaia » September 28th, 2016, 10:45 pm

Ka tum em a vangin Sanju leh midang puihna in mithi dahna lamah chuan min kalpui ta a.. Ruang an lo tlar put maia, puan varin an khuh vek bawka, Zuava, Zotea, Jima leh Bena te chu an lo indawt thliah thliah a...Zauva ruang bulah chuan kan dinga ka en renga, Esi, Miriami leh Sanju te chu an țap hawk hawk a.. Ka țap ri miah lova, mahse ka mittui chu dan rual lohvin a dir zung zung thung.. Chutiang ang reng renga ka rilru na leh ka insum theihloh na chu ka la tawng ngailo... Tinge a hreh chung chung ka nawr luih tlat le, Engvanga A.Vunga chhimbu dawia ka awm tak mai le, Ka thin a rim lutuk.. "Kalloh a rawt chung chung ka hnial tlata, Nidang reng reng ah chuan kan sawiduna pakhat zawkin nilo se a tih in kan inpawmpui thlap țhin ani sia, tun ataka ka hnial tlat chule" ka ti chhuak phawng maia...."Ka lainat lutuk" Esi chuan ati sapa... Kan inkar hrechiangtu vek an nia, Ka tel lovin khawiah mah a kal ngailo, Engkimah kan inzui tlata, unau ang mai kan ni țhin.... Ui fingin apu a zuia, apu tan arinawm ang maiin tu ve ve zawk pawh nise kan inphatsan ngailo...

An ruang an postmortem zawh ah an awmna veng ah țheuh an thawn chhuak sap sapa... Keini veng lam pawh an rawn thawk țha hle.. Anihna takah chuan tuna kan awmna vengah hian kan awm achinah eng buaina leh harsatna engmah an tawk ngailo, kan chingfel rang em em țhin.. Drug addict rual awmkhawm ni mah i la ruk kan ru ngai bawk silo, chu vang chuan min ngaina der vein kan pawl min zuitu pawh an awm ve nual bawk... Veng hran hrana kan pawl member an rawn pung khawma, kan inphek sual dawna kan pawl tihdan țhin angin scarf senduk an rawn hreng vek bawka..."Rulling party uicho duham lutuk A.Vunga vangin kan țhiante an boral hi kan lung a awi theilo, zangna dawmna țhahnem tak rulling sawrkar hian an pe ngei tur a ni" an ti lauh lauh reng bawka.. Beisei aiin min țantu an tam zek maia, A.Vunga eilo tam tak an awm tihna ani.. Zauva ruang chu ui tak chungin an haw puia, A nu in a lak avangin kan in lamah an hawpuilo..

Khawhar zetin Damdawiin ah ka hun ka hmanga.. Chu zan zet chu zan rei leh zan huatthlala ber ani ngei ang.. Khua avara Zauva ruang thlah lovin ka awm dawn bawk si, mi hriat lohin ka insehruh țeuh reng maia..Chutah Police lamin statement an rawn la ve sek bawka, Pawnah min veng turin mi an dah reng bawka.. VVIP damdawiin awm ang hlauh ka ni awm e..Ka malpui ruh a tliah vangin Thir an phuma, an statement an lak zawh hnuah phei chuan min chiu muhil ta daiha...

Kar khat dawn ka awm hnuah In lama enkawl zui turin min chuah tira, Zauva thlan kan tlawh hmasa bera, Zote chu Zohmun lam daih anih avangin kan tan kal mai aharsa si a, Midang Jima leh Bena te veng pawh a hlat em avangin kan tlawh rihlo...Zauva thlan ah chuan rei tawk kan awm hnuah in lamah kan haw ve ta chauha.. ka naute hoin minlo nghak țhapa, Nidang boruak nen a in anglo kher mai.... Kan inchhungte chu a reh ruih ni maiin ka hria, Zauva inchhunga avei thuak thuak laite chu ka mithla ah alang chuai chuai reng bawka..Engkim mai chu a tawp vek ni maiin ka hria.. Khami zan kan kal hmaa ka roomah a rawn luta kal loh mai arawn rawta beer kan dawm duna kan sulhnu te chu a ngai ngaiin alo la awma.. Hrilh ahai duh khawp mai, Kan chhuak duna kan kir dun tawh silo chu awih harsa tak ani.. Ka thi ve nghal law law lo chu ka ti rilru hial nghe nghe..

Ka hliam pawn ziaawm lam apan chho hret hret zela, Miriami'n min awmpui chawta, Mut reng ka peihloh avangin ,Wheel chairah min țhut tir țhin..Esi lah class kal pahin nitin min rawn awm ziaha, A țhiannu Nurse kan venga awm chuan dressing min tih sak ziah bawka, min buaipui nasa kher mai..... Kar aliam leh meuh chuan ka awm pawh a hil duak tawha.. chet pawh ka che nasa thei deuh tawha, mahse min kalh leh relh relh țhin... Ka malpui erawh ala dam chianglo hle thung.. A țhuina hmuamhma a dam hunah pawh thla 8 chhung vel chu zakdawh tiang nen emaw ka kal bai sawih sawih thei chauh ang an ti a, a peihawm loh hle....

Saturday ani a, Ka malpui min dressing sakna chu Esi chuan a tuam țha leh malh malha,...ache vel chu ka en renga, a zei thlarh thlarh hle bawk "Es min ngaidam rawh aw?" ka tia, min en chuanglo chuan "engvang chuan maw?" a ti maia,... "erhh englo ka dang zo thlawt lo ani.. a pawi tak tak" ka tia, "Eng chunge sawi i tuma, tu chanchin nge maw i sawi le?" a tia.."i țhianpa A.Vunga mawle, dang thei tur ka nia, hetiang hi nih tirlo thei ka nih tehlul nen" ka ti a.. a ding tharha, a kawng a dawma, min en kara.. khawlum vanga a hmai awm hlarh maite leh a biang tai deuh chek te chu a sam hnawk niaia ațawn khawm te nen chuan a inhmeh vel veka, a hmui sexy takte chu ka en kham theilo ani ber... "ka hrilh ang che, kha zawngchhepa hming kha ka beng hriatah min dem zawngin sawi tawh reng reng suh, i malpui hi ka ti pun vak mai ang" a ti bak hlara.. "Hey, i va sual ve, mi damloh nin tawh nak Laia, tih huaisual te i sawi le" ka tia, a nuihza insumte hlei hlei chu a hmuhnawm... Ka malpui țha zawk ah chuan arawn țhua "Auch" ka tia, a tho zawka... "tinge?" a ti a.. "a rem lo lutuk a, heti hian dah teh"tiin ka malpui na zawk chu ka siam rema, min pui vata.. "le" ka tia, a rawn țhu leh taa... a kut 2 chu ka darah ve ve nghatin hnai setsawtah chuan min ena, "Kha A.Vunga khan kei hi akut hmawr pawn min khawihlo, min hel nasa lutuk, Judy leh Maia pawh khan min hriatpui, Chubakah Ka hmangaih ber nunna laksak atumna rilru ringawt pawh kha ka haw takzet ani, nang aia duh leh thlan ka nei chuanglo asin" a ti a.... A chal leh ka chal chu kan insik tira, "tak tak maw?" ka ti sapa, "mmm..ka hmangaih lutuk che alawm" a tia,.. "i hneh thei ngei ang tiraw?" a tia " eng chu maw?" ka ti vata.. "I kawng zawh țhin kha, i zawh sawn thei tih ka hrechiang tlat ani, I tan ka awm reng bawk ang" a ti sap sapa.. "Min pui duh tak tak ang maw?" ka ti a.. "mmm...nanglo tunge ka puih chuan ang" tiin a hmui sexy tak mai chuan min rawn fawp ta nge ngea..

Kan Boruak pawh thil țulang kalpui zel a nia,.. Kan vanneihna em em chu Pa Raja fimkhurna vanga kan dikna hmuh let theiha awm chu ani,,Evidence țha tawk tak kan neih avangin kei chu court in min chhuah zalen ta daiha.. Pu Raja chuan Chu Firdaus bar room ah chuan Security Camera alo fit chu a ni.. Voice engkim a lo record vek bawka.. Chu Video hmang ngei chuan thiam ka chang taa.. Ka request angin kan nau vakal chu Pu Raj chuan video chu min rawn thawn vea... ka room chhungah keimah chauhin ka en ta a..

A.Vunga'n min kah rual khan Silai dang pawh a puak dawt zut maia, Zauva chuan A.Vunga chalah tak a verh dak awrha, Zauva pawh midang chuan an lo kap ve nghal zawt bawka, dawh kan sir bawh deuh in silai mu chuan a hnawl pai dat data.. Zotea, Jima leh Bena te pawh Second tlemte chhung lekin an tlu phak phaka..An ni 6 an nia, keini 5 kan ni a, Keiin Silai ka kenglo lehzel bawk nen.. Zau kaptupa chu ala tlu velo, Mahse a silai a zam a, a pawt chat chata, Zauva chuan a silai chu a tina, Chupa nen chuan an silai a de rual zawka, an dak awrh bawka.. Zauva chu dawhkan bulah chuan țhuthleng nek tlu chungin a tlu ta riai riaia... An inkap chiang hlawm hle, alan dan chuan Zauva kaptu khan zauva kha a zak hnuai deuhah akap phawta, Zaua nen an ikah khan Zaua khabe zawnah a kapa, Zauan a hrawk hrui pherh nuaih khawpin a kap bawka, a tlu tur chalchangin a silai ken lai chu awmze nei lovin a kap chhuak zawt zawta chu mi chuan ka malpui arawn deng fuh alo nia... An vaiin an luah vek an inkal hlawma, ka chhuan tawlawl, Bena chuan kah hnih a kap hmana, mi 2 a thala pakhat zawk nen in thihchilh ve ve a ni..Ka en zo chu ka chau hnawk thei, ka kuna ka țap ngawt ngawta.. Esi rawn kal tur arawn thleng chiah bawka, Video chu a off sawk sawka, min kuah ta hle hlea.. Chu tape chu ka en nawn leh tawhlo..... ka pek let tir leh nghal vang vang ani..

Nitin Miriamin min awmpah In Bible a chhiar țhina, ka bulah kher lokalin "i peih chuan lo ngaithla ve mai mai ta che" a tia, Hriat loh pawh tum mah ila a hriat loh theih țhin loh, Ngaia ka nei deuh roha, a bazar hlanin ka lo bih ve ta zauh zauha.. Bible chhiar chu sawiloh khawih pawh la khawih ngailo chuan Bible ka chhiar ve phah fo ta maia.. Achang leh Bible ralchhan a ti maia, Paperah Bible chang zawn tur an rawn dah chu min zawn tirin min chhan tir veta fo maia, ka tuipui ta viau.. Hunawl ka neih chuan ka room ah bible ka chhiar ta ngat ngata.. Esi'n alo hria Bible Ralchhan an kohhran siam min rawn chhan tir zui ve zat bawka... Ka chhanna chu a thehluta Bible ka la dawn phah zui bawka.. ka thawh hah vang liau liaua ka thil dawn hmasak ber ani bawka ka hlimpui hle..

Kan Sumdawnna lamah kan che sual ngun ta viau, kan naute an OD a, an vui malh malh deng bawk nen kan sum hman chawp a zo ti tih der tawh mai, Hna kan thawhna bill atang fur bawksi.. lu a hai duh map map khawp mai, Mahse Esi hnenah ka intiam tawh avangin ka sumdawnna chu kan bansan ta diaka, Contract hna bak thawh kan tum tawhlo.. Chhim lama kan kawngsialna atan JCB kan mamawh avangin kan neihsa kan hmang zo duak duak maia, Bunrup motor second hand 3 leh a thar hlak 2 kan lei bakah Hitachi bansei chi 2 Pu Gulshan sum interest awm hauh lovin kan puk sak in kan lei bawka, kan hautak hem hem hle.. Kum kha lehchen khawih chet lova, ka lo dah khawl țang țang leh Zauva lo dahkhawl te chu atam tham ve thawkhat bawka, Chung leina te chu neilo kan ni biklo, ka beisei aiin kan nei hnem mah zawk.. Kan pawl sum atan liau liaua kan dah pawn Truck lian 2 a lei thei ve tawh hrim hrim bawk..Ka dah khawlsa kan rut fai ani der tawh, kan Bill nuaih 200 lak tur Central lam ațanagin kan la neih bakah Mizoram Sawrkar hnuaia department 4 ah Nuaih 20 chunglam țhah lak tur kan la nei bawk... Mahse engtik ah nge kan lak chhuah ang tih a hriat siloh, chutih laiin hmanchawp tur kan nei tawh manglo... Miriami phei chuan a nu pawisa puk dil mai turin min nawr chhen tawha.. ka tuang ka la ti chhah lui tlat thung...

Tv en in Sitting room ah ka lo țhu a, Pu Gulshana arawn lut a.. "Hello Boss, i lo dam zel maw?" nui chungin a rawn ti a, "Ka dam alawm, engtik nge i rawn hawn" ka ti vata.. "Nizan khan ka rawn haw, Hei Pu Manoj an Damlo kanna present a pe che a?" tiin lehkha ip pakhat hi min pea, achhungah chuan hmeichhia leh mipa bun tur tih hriat tak Zungbun a bawm phek thlem mai hi a lo nia,.. lehkha themah "Nupui neih huna i pek tur" tih alo inziaka... ka then suka, "avan tițha ve" ka tia, sawitur vak ka neilo... "In Bill nuaih 150 ka rawn hawn bawk asin" tiin a wallet ațangin Cheque slip a rawn phawrha... ka lawm kher mai... lawmthu ka hrilh mawlh mawlha.. "Hitachi man pawh ka pe thei dawn ta che anih hi" ka tia.. "Nilo, kha kha chu sawi ngai rihlo, tikhan awm phawt rawh se" a ti ta tlata... Rei deuh a lenga kan ti ti luama.. ka sumdawnna țhenkhat bansan a Contract hna thawh chhoha, Firm ang deuha kalpui ka tum dante ka sawia, Chuvang chuan In hmun ka lei tawhsa veng pakhat hulum lai taka mi dawr atana an luah mek concrete building lian vaklo chu sak țhat ka duh thute ka hrilha min phurpui khawp mai, an firm kalphung leh anlo experience tawh te min share a, an dawra bungrua chu ka duh tawk hmang turin min ti bawka.. A hawn hnuah chuan ka nui var vara.. Miriami ka kova, Ruatfela Account a dah tur zat te ka hrilha ka account a lut tur leh Kan pawl Account a lutur zat te ka hrilh dap dap hnuah "Rs 10,000 khan Bazarah chawhmeh eng ilo vel rawn lei la, I kawr tur leh Ka nu kawr tur rawn lei sak bawkla, Zanin ah Ruatfela a rawn haw phei dawna, Zanriah kan kil khawm dawn nia, Esi leh i nu kan sawm bawk ang" ka ti zung zunga..Lawm em em a min kuah pah chuan "U i van hausa Nuaih 150 maw?" a ti a.. "2nd Installment nuaih 50 dang lak tur ka la nei, Mizoram ah ngawt pawh Nuaih 400 dawn lak tur ka la nei bawk mawle" ka tia.. a nui hawk hawka..

Ka hun hman dan a danglam chak khawp mai, Kan In pawh ahmaa rik luih luihna, insual deuh rup rup awm deuh reng țhin kha, a reh duka,, Mahni chauha Bible chhiar nilen chang ka nei ta fo mai..Kan hna kan thawh mawlh mawlh laiin kan building thar tur pawh kan buatsaih ve mek bawka, Kan Inhmun hi kawng thlang lam a awm niin kawngpui rual hnuailam ah chhawng 2 awmin chhungkaw 4 luah theh tura siam ani bawka.. Kawngpui an chu kan motor dahna Carriage atan kan daha, kan motor dahna tur leh kan inluah tu motor nei an awm taka an luah atan kan tia, Chumi chung chiah chu kan chenna chu a nia, Kitchen, Dining Hall, Common room leh Meeting roomte an awma, Chubakah kan nula awmpui Lawmtei room tur leh mikhual kan neih changa an riahna tur room lian țha hem hawm deuh mai a awma, Tlak lam veranda ah Store room lian tak kan dah bawka..Chu mi floor chung chiah chu kan room awmna ani.. Common room leh Dining hall inkarah L shape in kailawn kan siam bawka, chuta lawn chhuah chiahah chuan Lobby cm Gym room atan kan hmanga, Treadmill leh thildang kan daha, Sofa set 2 leh Center table pakhat kan dah bawka.. Bang-ah chuan kan vanglai thlalak hrang hrang kan lak khawm kan tar nual bawk, Chumi piah chiah ah chuan Țawngțai room siam Miriamin a rawt tlat vangin kan siam bawka, duh chang changa Bethel na tur atan ani ber.. Chumi pindan bang ah chuan Show case sei ut mai kan hunga, Kan sual laia kan thil neih Thil hlu leh maksak tak tak kan dah nual bawk.. lehkhabu chihrang hrang kan lei khawm Kan dah tel bawka.. Corridor dinglam pang side ah chuan ka room a awma.. Veilan side ah Ruatfela room a awm leh bawka, Ruatfela room dawtah chiah chuan Miriami rawn riah duh changa aroom tur kan dah bawk....

Kan In kan luah fel meuh hi chuan kan Bill tang zawng zawng kan lachhuak deuh vek tawha, Kei pawh Tiang hawlin ka kal thei tawha, Kum engemaw ti hma chu ka kal bai rih ngei dawn ani..Ka naupan laia Junior Department kan nih laia kan inhlei min chhuah tir ațang kha chuan ka Inkhawm ngai talo hrim hrima, In thar kan luah hnuah Ka Inkhawm țan ve ta chauha.. Ka inkhawm hmasakna ber chu Sunday chawhma a nia.. Biak In chhung chu zauin mipui pawh tam viau mahse tumah chiang taka hmuh ka neilo hrim hrim.. Inkhawm banah Ka la hmelhriat ngai miahloh, ka hmuh ve zauh zauh tawhte leh ahman a piangin min chibai nak nak hlawma " Lalpan malsawm che rawhse" "Lo inkhawm ziah țhin rawh aw..." " i fel hle mai kan chibai teh ang che" tihte chu ka dawng nawk bawka, Rin ai tak chuan an felin an nelawm hlawm hle mai... Kohhran mi ho inkawm țhinte ka ngaihdan an dang ta zar mai... Chuta țang chuan hun ka neih phawt chuan ka inkhawm ve ziah țhina, Kawngka hnaih ber ah ka țhu ve țhin...



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 28th, 2016, 10:46 pm

Ni leh thla aral zela, Kan hnathawhna lamah kan beisei aia țam malsawmna kan dawnga, Kan hnathawhna kawngah dik leh țha takin hna kan thawk țhina, Kan hnathawktu tam zawk chu Ruih hlo bawih atanga chhuak an ni hlawma, an rilru a thianghlim in an tlawmngai thei viau bawk... Khatia kan Inkah vak ațang khan kan pawl khan tlakhniam lam kan pan char chara, kan sumdawnna kan thlauh thla țhen zel bawka, Chenna tur nei leh belh tur nei deuh kan sum leh kan sumdawnna it vanga min zuitu te chu an thlawn hlawl hlawl hlawm a..Kan tlem rekrawh tawh viau...Mahse kan harsat bakberh lai taka thlemna kan do luih tlatna vangin malsawmna kan dawnglet niin Miriamin a sawia dik turah ka ngai ve mai.. Kan in tungding chho leh zela, kan hnathawh rah chuan kan hming hliau hnu a kang fai malh malh reng a, "Heng mite hi Vai chawmhlawm a inchhek hausa mai mai kha an ni lawm ni? an va fel tawh ve" tihte kan hlawh hial tawha, kan sual laia thil kan lo khawih pawi tawh te kha chuan min la vaw let dawn chauh-ah kan ngaia kan dawh hram hram țhin..

Esi pawh a graduate ve tawha, M.A zirzawm a duh viau laiin min ngaihtuah ve bawk si, Tunah chuan Mi inngaizawng angin kan inngaihzawng ve thei tawha, hunawl ka neih changin ka lenchilh ngam ve tawh bawka. "Palai rawn tir tawhla" min ti min ti bawka tiin kan kawmthlangpa, kan in sak lai a țanga kan chhawr ngar ngar kan pa ber ang maia kan ngaih Mistiri Pu Chhunvela leh Miriamite ina ka awm lai a țanga fa anga min ziltu Zu zuar țhin, pa țawngduh leh ti ti thiam tak mai Pa Daduha kan tih țhin chu Palai turin ka ngen ve chawt maia.. An rawn haw hun nghakin Miriami te nufa nen, Ruatfela nen kan lo nghak țhapa... zan rei ber zan ani hial awm e..

Dar 9:30 pelh hretah an rawn hawnga.. Thingpui in pah chuan Pu Daduha chuan "Bei a dawng duh hle mai, In inbe chiang chiah maw?" a ti te te a, "Eng tia inbiak maw?" ka ti a, Esi chuan chhuanlam alo siam leh a mawnle"? ka ti rilru hial hmana... Nuk huk huk chung chuan "i hlauthawng hman hle mai..." a ti zui vata.. Pu Vela chuan "Kan beisei aiin an lo fel khawpa, kan fanu an duh anih chuan kan hnawl thei bik hleinem.. Amah Mosesa pawh hi kan mi hriatchian, a tunhma nun nen zawng zawnga kan hriat, Hun rei tak lo inzui tawh an ni a.. Amah mosesa pawh hian kan fanu hi a hmangaih tak tak niin kan hria, a ngaihsak em em a, a rilru tihnat te a nei ngai bawk lova, chuvangin lo sak viau pawh ani chuang love' an tia.. Man leh mual te Inneih hun tur nen lam kan sawi fel nghal ta vek mai..?" a ti dap dapa.. "Nangni hi ani in lo duang lawk ,dun em ni?" Pa Daduha chuan a tia, "Sawi dun love, tinge a?" ka tia.. "Amah Esi khan October ni 10 nise a tia, thla 1 dawn nghah i la ngai anih chu?" a tia.... Ahnua ka zawh danin kan Intawn hmasakna ber ni kha a dairy alo ziak thlap alo ni a, chuvanga thlang chu ani awm e..

"Man chung chang pawh kan sawi fel nghal bawka.." Pu Vela chuan a tia kei chuan "Eee Engzat man nge anih ve reng renga?" kalo ti vei vuta,... Pu Vela, Pa Daduha leh Miriami te nufa chu an in enkual hrek hreka.. Chuatah Pa Duha chuan "An ti to vaklo, Rs 10,000 man chu ni awm ve reng ani" a ti chuar chuara, "ava to reuh ve mawle, Mahse kan nei ve thei turah ngai i la" ka tia, "nia, An duh khirh em em mai khawpa, Chengkhat thir hlir nise an ti leh zela" Pa Daduha chuan a ti a.. "Ehe.. an va bei mak ve, Rs Khat thir Singkhat chu tam tham deuh a sin a nih, Fela Bank ah kan thleng thei ang em?" ka ti vata.. "Theih loh tur a awmlo, Bank ah an nei ngei ngei ang" Fela chuan confi deuh chuan alo tive bawka.. Kan ti ti kan zova, Miriami te nufa leh Pa Daduha chu Ruatfelan azuk thlah a, Chutia keimah a ka awm lai chuan Pu Vela fapa kum 15 mi vel chu a rawn luta "U Moses, hei apa in Inneih lehkhabu Lo chhiar rawh a ti a" a tia, Lehkhabu lian vaklo hi min pea 'Mizo Inneih dan' tih alo nia..

Pu Manoja'n Mo lawmnan nuaih 1 min rawn thawna, Pu Gushana'n Inneih senso tum vek a tum bawka ka zangkhai phah dawn hle... Miriami nu (Ka nuhrawn) in Esi man a tum ve bawka... Inneih ni boruak leh Kan Member la awm zawng zawngte Suit dum kan inthuam tir vek te, Joint Reception kan neiha Pu Vela'n Esi man chung chang kan sawi ho dante a sawi chhuah chungchang te sawi duah lo mai ila, Biak In chhunga 'Lutuk e' ka tih te pawh sawi lang duhlo mai ang.. Sial 2 leh Vawk 3 bakah Ar leh kel thlenga ran kan talh te chu nuam ve tak ani.. Chung zawng zawng aia miin an sawi lar zawk chu "Mopa hian Baptisma alo la changlo a, an hrechhuak tlai sia, Inneih hma zingkarah Baptisma achang chawp" tih chu ani...

Khawvela hmeichhe duhawm ber leh Min hmangaih em em tu, ka hmangaih ni bawk, engkima ka hun hman dan hre tlang veka, min iai chuanglotu nen Pathian leh Kohhran hma-ah Biak In hawng ngeia nupui ka nei tih hi mi mak tih a nia, Kan Inneih ni ah pawh Police an rawn duty hial renga, Rui buai, Pawl leh pawl engemaw boruak irh chhuak thei tur lakah min enthla pah ani ber.. Mahse chutiang engmah buaina awmlo chuan kan tlingtla fel theia.. Nuam ti leh ropui takin kan hmang liam ve thei teh tlat ani..

Lawithat zan ah Midang tumah an awm tawhlo, kan 2 in room ah kan awm duna, "Tawngtai lawk ang aw?" Esi chuan atia "Engvang chuan maw? mut huaina ka lem duh asin?" ka lo ti nghuta, "Tawngtai zawh hunah" ala ti hrama.. Ka zu um ken lai chu ka dahțha leh riha.. "Țhingțhi ang" a ti leh zela, ka zawm ve zela.. Esi chuan nupa inngeih tak kan nih theihnan te, Fa țha tak kan neih nante ațawngțai dawn emaw ka tih laiin "Lalpa, Pasal țha tak min hmangaihtu min pek avangin ka lawm e.. Hun rei tak i hnena ka lo dil tawh țhin min tih hlawhtlin sak theih avangin ka lawm e,..Ka Pasal hmangaiha enkawl zuia rawngbawl sak ka thiam theihnan mal minsawmin finna min pe ang che.. Ka pasal pawh a hma hun i sialsakna kawngah engpawh thlengin tawk pawh nise tuar thiam tu anih theih nan i thlarauin kai hruai zella, A naute leh kei anupui ngei mai min enkawl thiam theih nan dawhtheihna leh finna pe ang che, Amen" a ti dap dapa.. A țawngțai zawh chuan Toiletah kan luta, Kan inbual duna, Kan nui hak hak renga..

Inbual zawhah Sofa ah ka țhua, light chu dim light a dahin Inthlakna tura siam bik ațang chuan mutkawr var sar mai nen a rawn chhuak zan zan a.. A nalh uchuak ti ila a tuman a diklo an tih ka ringlo... Min rawn hnaih zela.. ka hmaah chuan a rawn țhing țhia, Min rawn thawk khum lum ham hama "Ka hmangaih lutuk che" tih pahin min rawn fawp taa.. Kan awm hle hle lo, kan duhthawh dunin kan thuam inbel thehlep tak pawh chu hnawksak tak ani tawh..ka pawm nawlha khumah ka zalh riai riaia, duhthawk takin ka fawp bawka, "Kum engzat nge he hun thleng tur hi ka ngah i hria em?" ka ti sapa.. a rum haka " i nghak chhuak ta anih hi.." a ti sar sara.. Chu aw sexy lutuk chuan min ti zauthau chiang kher mai... Chawl miah lovin Vanram tlafual lei eden parzu kan chen dun chho taa...

"Enge a an?"...

"A thim deuh nangin a ziaawm viau e...Ka hmangaih lutuk che..."

"Kei pawn ka hmangaih che.." tiin kan inkuah ta hle hle a...

A tawp ta tak tak e.......

Dawhtheihna hian Hringnunah atawpa hlimna a thlen chawk țhin... Ka lawm e..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 28th, 2016, 10:47 pm

A tawp vawi hnihna a nih hmel e, a tawp tawh hnu ah khan chapter 1 a ziah belh leh a

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)