CHHUNGKHAT A PABER KA NI VE A... BY Tochhong Ruata

Ngaia
Site Admin
Posts: 25813
Joined: April 30th, 2016, 4:07 pm

CHHUNGKHAT A PABER KA NI VE A... BY Tochhong Ruata

Unread post by Ngaia » October 16th, 2016, 4:23 pm

CHHUNGKHAT A PABER KA NI VE A...

Chawlhni zan ah Kawmthlangpa Pu Rinsanga In-ah Indo flim mit thial urh khawpa kan en hnuah, naupang chumchiap muthilh vek hnuab ' Zanlai Thlifim' kan en leh nghawng chu na ve duh tiktek tak a ni. "Sual-ah pawh kan sual a zual bik ang a?" ti tur khawpa Zanlai Thlifim mahni khumpui ah ngei naupang harh hlau tak si a, Kan han replay vel a. Thlan tla hluam a kan chan zawhah Tui takin kan muhil dawn chauh emaw tih laiin, a naupang ber Thla 8 lek a upa hnute ngenin Khawvar det det ah min thawng tho leh nghal zui phei chu, Patling kan rum chhur chhur mai thin a. Hriat loh der tumin rizai in kan inlukhup tha vei sauh sauh a.

Zan lamah kha chuan Nicole Kidman ang maia kan hmuhtaih, Britney Spears, Catherin Zeta Jones, Shakira leh Beyonce te aia kan thlan, chung ho hrechang lo leka kan kawih kak vel. Nau hnutepe chunga tep chuap chuap. Rs 420/- a ka payment thlap lehnghal chuan " Duhtak, Naupang ho chuan meichhem an tum leh tawh a nih chu, va thawhpui lawk mai teh" tiin phak chuap leh aw hnawk tham tuak chuan a rawn ti zui lehnghal. " Lo chhem vel mai mai tehse" tia mut luih tum ngawt chi lah a ni bik silo. Kangmei vanga In chan ngawt ka duh bik der silo... Peihlo zet chuan ka tho thum a. Zan lam boruak vanga ka hnawmhne Tara tih inchhu kalh chhuata Pawnchhe hnangkhai ang maia hlawm reng chu chharin ka inha tha sawt sawt a.

Kan In pindan Burma Play naupang ball pet per nasat luat vanga kual puar deuh tung leh khi deuh ruak tawh a ka kerkaw tluan ban chu ka phihthla leh a. Chumi hnuah kan pindan kawngka a ka nupui puanzar engemaw rawng nive awmtak, khak deuh tlur, World Map niawm tak thil val kai thluah tawh chu ka keu ta a..

Ka va hmuh hmasak ber chu ka fate 3 a upa ber Rozama ( 6 ) Sangzuali (4) Ropuii (2) te Tapchhak-ah thu kual thamin Mei chhem tumin nawalh an lo nawt ri pharh pharh lai chu a ni. Khawnvartui rim chu a lo nam chum chum mai bawk a. " Lalrozam enge i tih?" kan ti nghal thawng a, " a pa nei sem an chum a?" Ropuiin a lo ti nghal vat a, " ngailo in intikang ang, khawnge kiang teh u" ti pahin Tapchhakah ka thu ve nghal a. Thukah chuan khawnvartui an lo leih li lung mai a, Thing tang an lo dah ve tliah bawk a, Rapchunga thing chu la in a hawng ka phih khawk hlawk hlawk a, Nawalh chu nawtin Thukah chuan ka vawm lut a.

Mei chu a alh ta hluai a, Rapchunga In ting uai deuh fur tawh te chu a hliau ling sep sep a, Thing chu ka tuah tha nghal vat a, " apa a nawi chi law" Ropuii chuan a lo ti ve leh khauh a. Kan In dan hlima kan lei Ketli te Thingpui lum bela kan hman, Ung ve khek khawk tak, a khaina chhiat tawh vanga Baltin khaina ka vuah ve mai mai, a chhin atan pawh alumminium phek, ka cheh bial, a dawmna tura Thing ka kilh beh ve mai mai chu ka chhuang a, Tui hmuna baltin ami tui, Kelbuh tuikhur a ka zuk chawi chu ka chhung lut a, Bangrel a thingphaw ka dawh kan, Chi, Dumbur, chini bur leh bur dang ung kheng khawng tak mahse khalh ngun tih hriat taka khak tle hnum hlup si zinga Thingpuife bur ' Dalda' tih intar lang mang tawhlo, bur sawl kiar deuh lingleng, A rawng eng hlar mai pawh hriat tawh manglo chu lain, Thum khat dawn chu Ka thil chhuanah chuan ka thlak bawrh a. Meichu ka tuah vung hluah a, " tikhan mei lo vil ula, Lamhnai tui ka zuk kawt lawk a nge" ka ti a.

Ka tui chawi zo, In ka thleng leh chu Rozama'n Leika-ah ka Chempui thar chu hmangin engemaw hi a lo sat chat chat a, Tuizem bulah Ropuiin kan thuthleng hniam chawhtawlhah a lo hnim barh barh a. Ropuii phirpui Ropuia chuan ar chaw pe niawm takin Kan kawtlaiah chuan buhfai a lo theh darh nuaih bawk a. Ka tuichawi hah bawk nen thin a ur duh hle. Mahse, insum hram hram a ngai bawk si a.

" Rozam, engnge i sah? Chempui kha khawilo turin ka ti che a ni lawm ni?" ka ti a, Min ngaihsak map lo chuan a thil suih lai chu a suih zawm zel a, " Lalrozam, chempui kha dah nghal rawh, enge i suih" ka ti leh a, en pawh min en chuanglo chuan " englo....kan Zirtirtu Sir Pu Kima'n Bumbel ( dumbel) suih tur a ti a, ka suih a nih hi" a ti awlsam et a, " Dah rawh dah rawh, nakinah ka rawn suih sak ang che, Puipui enge thuthlengte Chawhtawlhah i chiah vak vak mai, Puia nangpawh ar chaw kha pe tawh suh, buhfai i tibaw hnem lutuk?" ka ti nghal zung zung a, " Apa, naute ha buai a?" Puipuii chuan a lo ti a. " heipawh apa heima alpui ha man dawn" a phirpui Puipuia chuan a lo tive bawk a.

Inchhung ka lut chu Sangzuali chuan an thingpui inna no leh an chawthing ei bang lo tla nuaih maite chu a lo buaipui ve nak nak a " a pa Zamzama ten min pui ve duh lo" a lo tive nauh nauh a. Tui chu Tuidehna ah ka dah sauh sauh a " Awww a van hahthlak thin tak em?, I nu a la tho nange?" ka ti nghal bawrh bawrh a. " Pa ber hi nupui fanaute buaipui hian ka buai em em reng ringawt mai a" ka ti hlawih hlawih dawn tep a, " ka" ka ti hman chiah tih ah, " Ninawm, ang duai duai zel ringawt mai, zan rei tak tak in leng a, min rawn ti harh sauh sauh a, in muhil zui leh daih a. Keini nau hnute ngen kan buaipui a, An zun kan thlak sak a, mutmu kan tuah hman meuhlo a nih hi" Khum atang chuan Sakeibakbuk hahum aia rapthlak zawk nihial turin a rawn ti tun tun a. Paber tan ngawih hmak a tha tih ka hriatsa avangin...
" Lalpa Thlipui a tleh chiam a...... .....
" Bang rawh.. Hmm hmmm hmmmm...
Ka ti daih a...

Buhfai thapsa in daih heklo a thap thiam zawk la a tawmim tlat bawk si, Thleisa No 2 leh Theliloh No.3 ngawt ka chawh pawlh a, Tui so dawt dawt tawh chuan ka sil thuak a, Baktawng Kukar ah ka chhum leh ta nge nge a.. Chaw hmin hun nghak pahin ' Mai hnah' ( Maian) ka hik pah a. Pawn lamah thum deuh kawng ri ka hriat rualin " apa, u u lota'n, u u Tatua a bei" Ropuii chuan a rawn ti nghal lang lang a, a sawi zawh rual rual chuan Sangzuali tap ri bai bai ka hrezui nghal zat a. " Lalrozam, i naute kha vel ziah suh" ka maian hih pah chuan ka ti lawng lawng a.. " Ih aman enge ka thil englo a lak teh ei" Rozama chuan a rawn ti nghal zat bawk a. " Chupawh nise, velh kher a ngai hleinem?" ka ti leh a.. Chutah enge a sawi pawh hriat siloh chuan Sangzuali chuan ' enge amah khan amah bala a ti a.... Heh heh...ka ti a ni a?" a ti teh nuai a.. " Dawt sawi sauh" Rozama chuan a ti bal bal a.. "lo lut teh u" ka ti zo chiah tih ah, Ropuia tap rang rang thawm leh Ar thlazap ri phur phur, Arpui truk ri kuk kuk ka hre zui nghal a.. Rozama lah arak lelu mai bawk nen " Zama, i nau chu ngati nge?" ka ti tuar a.. " Puisenin a lim a nih kha" a lo ti awlsam et a..

" a van mak tak" ti chungin ka tho a, Ropuia tap ra ra lam chu ka pan ta nghal a.. Puiseni chuan Ropuia chu a lo vel thut thut a.. " ti suh ka tih ka tih kha, In vaiin lo lut rawh u, Puipui nangpawh thuthleng tuiah hnim tawh suh, Zuali, Zama rawn lut rawh u" ka ti nghal mawlh mawlh a.. " Enge in inchuh a, i nau i velh ni?" Rozama melh run chung chuan ka ti a. " Ange, aman ka baloon a lo lak ve ngawt teh ei" Rozama chuan a kut tuai nauh nauh chung chuan a ti a.. " a ni lo, keima chhar a sin, pindanah" Zuali chuan a lo tive nuah nuah a.. " Tuta mah a nilo ang, khawi baloon chu, " ka ti a.. Laksak daih loh chuan an intibuai zel dawn si a.. " mi fate an in hau ve ngailo, in zahpuiawm lutuk" ka ti khur khur a, Rozama chuan a kekawr ipte atang chuan Baloon tia an inchuh thil fanghei pan herhawr tak mai chu a rawn khai chhuan dar dar a...

Chhe hei leh, Lalpa leh, Zanlam pang ka ruang hlawm ka theinghilh tih ka hrechhuak zawk a. Nizan khan kan haw dawn khan Kawmtlangpa khan " chhang khatna" tiin min rawlruk, Zanlai thlifima lukawlh pa hman ang ngei kha a nih vanga hmang ve ngawt, hah luat vanga ka ruang hlawm ka theh tlak tawp ngei mai kha a ni a. Naupang tan chuan Balloon te pawh a ang ve deiduai roh reng a. " khawi" tih leh pawhthlak ka rual a, inchhungah ka luhsan nghal a. An hmuh hmain meiah ka rawh nghal hmak a... " Mipa nge hmeichhia kang hlum ang le" ti rilru chungin Maian ka hih san leh ta nghal a.

Maian bai so liam vil a ngai, Ropuia tap a bang thei silo, Puipui lah in a thuthleng naute lem puak tir a lo duh ve sek bawk a. Chutah Sangzuali lahin " apa khawnge baloon kha? Minlo pe" a lo ti chhen a, Vawkpui naunei riltam chaw rawp a lo nguk ri ruai ruai bawk a. A fate ho lahin a nu hnute hnek duh vang nge, a nu nguk ri an hriat vanga tive mai mai nge tihpawh hriat loh chuan an lo rak ve chuah chuah bawk a. Puiseni lah nghal ta reng reng a naute te hruaiin Inchhungah an rawn lut deuh sek lehnghal, a la e luarh zui bawk a.

Maian chu a hmin tawh bawk a, Dal firelhrulh nimin tlai lama kan ei nawi, li liau khawp tui ka leih chu ka chhuang a. A nu a rawn tho tuih tuih a, a nu hmel an hmuh chuan a vui thei an lo vui nghal tliar tliar a. Sam puk luih chung leh hnute pawh khuh kim manglo chunga nau puak puan leh naute rawn pawm bawr luk chung chuan " in hau reng suh u" a ti bul nghut a, chutah dam deuh zawk hian " Duhlai, kha lo paw lawk maiteh ka zun a chhuak lutuk" ti zui nghal zat pah chuan Rorelliana ( nausen hming) chu ka mal chungah a rawn nghat thawr a. Tlak lam luhkapui a kan bualin zar chhete ah chuan a va zung ri sur sur a.

" Vawk chaw pek a hun tawh hi, awii nizan vang kha emniang ka kawng a khamin ka khel zawng zawng hi a khawng thum mai, min kalh deuh tung bawk si" a zung zo rawn lut pah chuan a rawn ti lut bui bui a. Engmah sawi a ngailo, ka tho a, Rorelliana ka paw nawlh a, Ketli lian a tui ka chhuan so hlawk hlawk chu ka khai a, Tui hmuna Chawnawi khawlna bel ah ka zuk leih a, Tapchhak bula kan hun Baktawng chhun bel khap nga bel ung khir luai mai a vawkchaw chu, Ropui chang Fianpui atana ka suih khat lawng chuan ka suak a. Fianpui 3 lai ka lawk a, Einawi belah ka chawh fin nawk nawk hnuah ' hmm hmm' rat rat chungin..." Engkim hi i thu nise" tih hla chu hmm hmm vang vang pahin Vawk chaw suah turin ka inkhai chhuak nghal vat a..

" I va buai awm ve?" tiin Hmeichhe pakhat a aw ka lo hriat than em em thin ka Bial hlui nen kan intawk chiah a, " Buai lo e" ka ti liam puat a. Kan nu min hmuh hma a kalsawn vat a ngaih zia hre reng chungin ka chhang liam puat a. " In nu a awm em?, biak ka duh a?" a tih ri chu ka hria a, ka chhan ngailo in ka fanu Ropuiin " awm e" minlo tih khalh hlauh chu ka lawm hle. Vawk chaw ka suah lai lai in Rorelliana a lo zung dur dur zui, ka mawng zawnah a lum lut pap pap a, pa zawk ka ding dir tluk tluk a, Kan In leng nu hriat hlau tak si chuan " chhe der dur lutuk mai" tiin kan sawi nawk a, naupang engmah hrelo chuan " a gung" a lo ti ve ngawt a.

Zing hmeh tur Dailuah, Maian bai, Antram tlak a awm tawh a, Enge kan siam leh ang aw? Ka tih rikruk lai takin " a pa nghathu rawt let la?" Sangzualin a rawn ti khauh a. " awle" tiin Ramchung bur ung khek khawk tak chu lathla in achhunga Eng thlai chi chi emaw ni fun thluah zinga Nghathu fun chu ka la a, Pum 5 ka rawh nam cham cham a. Naupang nghathu rawh rim hria an lo hnai talh talh hlawm a.
" Apa buh telhloh in aw?" " Eichu buh teih ha duh" " a tak lo in aw" " a thak lo chu a tui lo" " aih a tak lo in" " a thakin" " taklo in" a ri dawt a, pakhat a tap bai bai a. Ka nghathu rawt lai chawl meuh chuan ka en kual dan dan a... " in mak zo zai lutuk, Vawk chaw tur a nih hi, i nu insukna ah zuk kal vek teh u" ka ti a. An tho sang sang a. Tumah a nu inzukna Lamhnai tuikhur lam pan chu an awm chuang hleilo a. Nghathu pum 5 lek kan rawt a, athenin buh telh an duh a, a thenin an duhlo a, a thak duh an awm a, duhlo an awm a. Engtin tak chu nghathu pum 5 lek chu sem zo dawn i maw? Chhung khata Paber lu a hai duh ve map map thin hle..

Tukin a mi kha a hmel chu a chhe zawk a, mahse a felin inchhung sekrek khawih a peih zawk a, A fate pawh a buaipui peih deuh zawk a, chhangchhe pa theuh theuh a pasal chu a duh duh tiin zingkar atangin a lengkual vel mai mai thei a nih laiin kei erawh hei ka heti teh nuaih a nih hi. Hmel ngawr ngawr thliar lo khan kha nu kha lo nei zawk i la, Chhungkhat a paber ka nih dan a danglam deuh mahna..

" Chaw ei ang, a tlai mai dawn, i nu uadi ( anganwadi principal a ni ve tlat) kal a tlai ang, Sangzuali leh Rozama pawh sikul inkal dawn kha?" ka ti a, Dawhkan hniam hunzawm mai theih chu Tapchhak bulah ka hung sauh sauh a, Thleng ka dah leh a, Chaw ka khawrh khu luai luai a, Naupang leh a nu ten chawei dawhkan an rawn bial tak tak a, ka hlauh ang nge nge in " Buhtelh loh ka duh a sin" tih leh tah rual deuh thaw an awm nghal reng a. Chutah Nu ber lahin " chawhmeh siam tur hi i hrelo ve ngawt mai, ninawm chawei tui loh tehlul nen" a ti bui bui zui bawk nen, Rorelliana hnute a hnek tir duai duai bawk a. A nulat laia tu hmuh mah a phalloh Khual valte lamin an hmuh chak ve em em thin a hnute chu a duh duh hmuh theih turin a phawrh ta duai duai mai chu a ni a, zialo lam deuh chu a ni...

" I pa te Fu huan ah ka feh dawn a, Kan rawn thim mai thei, Her zawh vek kan duh tawh si" tiin ka ippuia chawfun leh chempui thun pahchuan ka ti a... A reh vung vung a, " aapa mawngtaw ( Hmawngsawi) ninlo awn lawh" Ropuia chuan a rawn ti a.. " kei pawh" an lo ti tliar tliar a. "Chuti chu Zanriah kapa te inah kan ei mai dawn nia" nu berin a lo ti bawk a.. Engmah ka sawilo, ka insiam sawk sawk a, Chu In paber ka nihna In nisi ka thu ve lohna em em In chu ka chhuahsan nghal thuai thuai a. Kal pah chuan ka in ngaihtuah leh neuh neuh a...

" Heti ngawt chu a ni theilo, Chhungkhata Paber ka nive si a, Nu rorelna hnuaiah kan kun reng ringawt mai. Vawiin tlai pawh a pate in ah chawei a ngailo, ka ei puar leh ngam dawn der silo. Ngawiteh, Mahse, kan eiloh chuan ka hna ngai tho Eirawngbawl ka tih leh vek a ngai dawn si a.." ka ti a.. Ka hma lawka Pu Zinga leh Pu Saia feh kal tur Nula sep vel chu um phak tumin ka kal chak zual ta sauh a.

END OF PART



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)