FROM THE DEEP BLUE SEA. BY Tochhong Ruata

[Ngaia]

FROM THE DEEP BLUE SEA.
( 2015 Valentines Day Special...).
" Khawvelah enge i nin ber?" tiin min zawt se, " Nghah neih hi ka ning ber" tiin ka chhang ngei ang. Hei tunah pawh " chawhma dar 10 velah chuan an rawn thleng mai lawngmaw?" tia min hrilh avangin zing dar 9:30 atang tawhin Kim Kim Thingpui dawr ah ka thu tawh a, thlen tih reng a awm silo, ka ning tak zet tawh a ni. Ka nghah ber lah ka hrelo, nghak tura min rawn tih avangin ka lo nghak ve tawp mai a ni.

" Ka nau inkhua ah Kar 1 chhung chamin a rawn zin dawn a, i lo ngaihven a ngai ang, naktuk zing dar 4 velah an rawn chhuak dawn a, Ka Pa Zawna hnathawhna a kal tur motorin a rawn kal ve dawn, a rawn kal vawikhatna a ni si a, %&*₹#%&*@ Khua ah lo i lo zuk hmuak thei a ngem?" tia ka thiannu in min requestna ka lo yes ve ngawt, ka tih hlawhtlin ngei ngaih tak vang a helai hmuna thu tum bur ta ka ni. Amah biak nawn ka tum lahin ka sim ah network a awm thei tawh bawk silo a. Mipa nge hmeichhia a nih ka zawt lo khanglang bawk si, Kha ka thiannu khan nau hmeichhia a neih awm ka hrengai bawk silo, Mahse Mipa han ti dawn i la hmuah a ngaih danah mipa nilo turah ka ngai ve bawk si, engmi nge ka nghah chiah pawh hrelo chuan motor rawn tlan apiang chu ka lo uipui tuilian thlir ve voh voh ringawt mai a ni.

Kum 1 leh thla 8 zet chu Mizoram khawchhak lama khua 1 ah High School a Mathematic subject zirtirtu ah ka thawk veta tawh a. Ka awmna khua hi khawlian taka sawi nilo mahse khaw nuam tawk ve thawkhat, khaw hlun ve pawl tak a ni a. Kawngpui pangngai in a kalpawhlo a, Sawrkar in PMGSY sum hmangin a laih sak ve ngei nangin, kalkawng nuam tak chu a ni lemlo. Fur lai phei chuan two wheeler in mudgurd a nei ngailo tawp thin, achhan pawh chirhdiak kha mudgurd leh a ke inkarah a tang hung thin a, bike ke a vir thei tawh thinlo a. Chuvangin hmawlh khawng taka hawlh thlak phawt a ngai leh zel thin a. Hun a heh theih em avangin Vuahloh mai a fin thlak zawk a ni.

Kawngpui lian in a pal tlang lohna khua a nih vangin chi seh engilo fahran lamna tur khua km 15 zeta hla ah a awm a, chumi thleng chu sumo in a kal theih a, abak chu mahni remchan dan anga kal mai tawh tur a nih avangin tunah pawh ka thiannu nau ( mipa nge hmeichhia ) hmuak turin ka awm a ngai tareng a nih hi. Tunah dar 3:00 a ri der tawh a, Kawng a that tawkloh vangin kan tlan chak thei dawn der silo a, ka duhai chuan an rawn thleng har deuh hlek tawh a, mikhual ka neih dawn avangin sekrek eichawp eng ilo fahran pawh ka lei sa thlap tawh a. Chu mi lo thleng tur nghak chuan thingpui dawr nghaktu Nl.Zatei te nen kan ti ti ho pah vel mai mai tawh a ni.

Toilet ah ka awm laiin Motor pakhat rawn ding thawm ka hria a, rei vaklo hnuah Zatei'n " Khawnge maw a awm hmanle, nangmah hi a ni ngei ang a lo nghah ve reng kha?" a ti lang lang ka hria a. Ka Inthiar zo a, Toilet atang chuan ka chhuak a. Ka thiannu nau a ni bawk a, hmeichhia a nih chuan hmeltha lo ve tak chawn tawi kual tite, mawng fual par kareh zau lam deuh tawi hmenhmawn tak a ni ang a, Mipa a nih chuan a nau mipa te zinga berh ve hmel tak takte zing amikha an ni maithei bawk. Chutiang ang hmuh tum ran chuan ka chhuak ta a.

" Khawnge ka mi nghah chu, a rawn thleng tawh em ni?" tiin Mikhual 4 vel dawhkan kil a, lo thu tham lam chu en pahin Zatei hnenah chuan ka zawt a. " kha ta mi kha a ni awm e?" Zatei chuan a lo ti liam puat a, " Keimah hi ka nia?" tia hmeichhe aw lo rik ve mek bawkna lam chu ka hawi nghal vat a. Ka phu deuh zawk thei hial, ka hamhaih lek lek zawk. Ka hmuh tumloh dan daihin ka hmuh vangte pawh a ni awm e, amah pawh in chutianga ka makti hmel a hmuh vang emni ang, a nui vei sang lehnghal.

Ka thiannu nau ( ka ti rih mai ang ) chu Sam boys Cut kan tih ang lek lek a sam nei, ( tawi lutuk silo a sam met tihna a ni ) hmel inhmeh zet mai, khabe dawh deuh lek lek hmui nalh tawk leka pawrh leh hnar nalh zet mai, meng fiah kalh mai bawk a ni a. A nuih zawng chuan a ka chhung thianghlim tak leh a ha var rual sang mai bawk chu a lang that bawk a. Kekawr tluan ( cotton jeans hmeichhe hak chi ) zuih lam deuh, mar tawt tung ni hauh silo buang dal lam deuh rawng hi a ha zaih a, pheichhawk keartui sang lo chi ( flat an ti emmawni) rawlh thawt rawng laklawh deuh mai, a kekawr tluan nen a in mil tak mai chu a bun thlep bawk a. Kamis hring dal pan lam deuh puan tha chi, a ban tlawn, kiu thleng a thleh tawm a ha bawk a. A kekawr ah a bilh lut vei zaih bawk a, Scarf ( pan leh zang tak ) a kawr ang rawng lek lek chu a bat bawk a. A hmel leh pian engkim mai chuan ka nin ruk em em ka vawiin hun hman dan chu min tih bo sak nghal vek niberin ka hria.

A hming chu Puipuii a ni a, Ka thiannu nen 1st Cousin an lo ni a, ( ka thiannu ni fanu ) MSC Botany zo tawhin Phd bei mek a ni a, Ramhnuai a lungsam kan tih leh lung thi kan tih ang chite zirchianna a neih duh vanga he khua lo kal hi a lo ni a. A hmel leh a thil zir chu a inhmeh viau lo. A mah a nonal a, a dik vei thlep thlawp tehlul nen ramhnuai pilril deuh deuh ah a kal vel tur chu ka mithla a, inhmeh ka tilo takzet a ni.

Khawkar kawnga kan tlan dante, A bungrua airbag khat tlat pawm tang chung a, a buk lawp lawp dante, thlasik khaw ro lutuk in kawnga vaivut a chhek hnur kan pal khuk chum chum dante kan khua ( timai ang ) kan luh laia khua in min thim hnan hman tak avanga khawlai bumboh deuha ka in luahna lam kan pan boh boh dante chu sawi vek lo mah i la, kan khaw kawng that tawkloh zia ka tarlan tawh dan atangin in ngaihtuah thiam ve tawh mai turah ka ngai.

Kum 20 a pel fel awrh chauh a ni a, a hmel en aiin a zam a tha a, a tawng tam lemlo nangin a tawngkam chhuak a fel thlap zel thung, A Sim card rawn ken kan khua ah network a neih veloh avangin harsatna a tawk hmasa phawt a. In kan thlen hnu ah a chhungte a be duh ngei a, ka phone a hawh phawt a. Ka phone a hman zawh hnuah a inthiamloh thu leh lo zawh hmasak nachang a hriat loh thu a sawi nauh nauh a. Kan tum aia kan thlen tlai deuh a vangin Eirawngbawlna tur gas nei ve heklo, tapchhak a mei tuah hluai mai loh chu tihtur dang ka neilo , Parawl in ah chhung rual bungbel awm hek suh ka bel neih len ber lah Cooker a ni mai si a, Cookera inbualna / in silna tur tuilum chhuan remchang hek suh ka hnar a lian lawrh lawrh tan a ni der. Ka hmai a uang lo tan tawh khawp mai. Mei ka nun hluai a, thingpui bel ka chhuang hmasa ngawt a.

" Kha kha ka room ve a ni a, abak room dang a awm silo a,,ka room ah khan khum 2 lai chu a awm ve kha, Pakhat zawk ah khan i mu ve mai dawn nia, i duh leh i bag vel kha lo dah tha phawt rawh" tiin rem ka ruat thuak thuak a, min chhan let hmain kawngka ah ka dawk chhuak zawk a. Ka tlan nal nal a, ka In luah chhak dawr kawn bula kan Headmaster in ah ka tlan lut rawk a,," Sir,,ka beisei loh deuh thil a thleng tlat mai, vawiin a naupang zuk hmuah ka tum thu ka hrilh che kha, ,Mipa a lo ni awzawng hlei nem mawle" ka zuk ti deuh ngawt a. An chhungkua chuan zanriah ei turin an lo inbuatsaih dawn vel tawh ni berin ka hria. Minlo en he haw hlawm a.

" Mipa a nih loh chuan i vannei hlauh tihna zuk ni mai a, enge a tha zawk daih lawmni?" nui hak hak chung chuan Headmaster nupui chuan minlo fiam zauh a. An nui dar dar a, " Nilo. Ka sawi tum zawk tak chu Tui lum chhuan na tur bel lian ka nei hauhlo mai a, Bel tui lum nana hman mai theih tur hawh tur in nei khiah lo maw? Ka ti deuh mawle" tiin nui deuh sun sun pah chuan ka ti a. " Aw a ni maw?, Rote i u #₹%&@as chu School bel dar kha han hman tir mei tache, Nikum a sport lawmman kan dawn a nih kha" Head Master in a tih hnuah ka thaw huai a, Rotei a fanu nula ve lek lek tawh kan school a pawl 10 zirlai mek in bel dar Vawkchaw chhum nan a an hman thin ang Tinpui 2 dawng zet tura lian a rawn ken chu la in ka in luah lamah ka tlan thlak pui leh ta hlawk hlawk a. Thui ka kal hma chuan ka ding chawt a, Dawr ve deuh an mahni in ni nghal Primary School Head te in ah chuan ka lut a, " Sahbawn rimtui in nei em?" ka ti lut nghal a. An neih zinga rimtui ve ber Lotus tih inziak Khawchhak chhuak ngei mai keng chung chuan ka in luah ah chuan ka lut ta a.

Zan dar 9;30 a nih meuh chuan kan 2 in tapchhak a thuthleng hniam thing a tuk chawp hnum dum tle hlurh tawh ah thu chungin inbe manglo in Laptop kan khal dun malh malh a. Earphone a vuah daih avangin biak tum teh mah i la biak thei a nilo a ni ber. Tuilo zetin ka file ka hawng kual dun dun a, ka close leh vek a. Ka refresh ngat ngat a, Drive G. Drive E etc ka hawng leh kual vel mai mai a. Chutiang chuan ka ti kual vel a ni deuh ber mai. Ka hma chiah ah a thu a, a rim tui tak chuan hnar a verh duh kher mai. "Tlangval Mathematic subject la chin ho chu an chut duh tlangpui, nula lamah an zeilo thei hle bawk" an tih thin hi a dik hle a niang ka hriat phak chinah Middle School kan kal laia Hmingpuii nen min dembel ve deuh vanga ka velh tak daih bak hmeichhia ngaihzawng anga dembel ka hlawh leh ka hre talo hrim hrim. Chuvangin engtia hmeichhe bula awm tur nge tih ka hrelo a ni deuh ber mai.

" U. .... .... Engtik ah maw hetah hian i awm ve tan a?" tiin min rawn be hmasa ve tlat mai a, ka phu zawk a. " erh..ih ...englo nikum tlemlai deuh atang khan" ka ti teh nuaih a. " Engmaw. .. nikum tlemlai deuh chu enge a awm zia?" nui hak hak pah chuan a ti a. " Nia, Nikum hmasa June thla khan niin ka hria" ka tive leh mai a, ka sen ap ap ni berin ka hria " thingpui i in ve duh em?" tih pahin ketli te tui no 5 vel lek leng a thingpui ka chhuan so berh berh suan pah chuan ka ti a. " duhve tho mai, engtin maw kan mut dawn a?" a ti zui nghal zat a. Ka khum ah sawn i mu a nga, kei a piah a khum awl ah sawn ka mu thung dawn a nia, achhan chu mutbu ka nei tam vaklo a, ka khum saw a dup deuh zawk ang" ka ti ve mai a. A ngailo a ti ve nangin ka tihluih tlat avangin a ngawi ve ta mai bawk a. Thingpui kan in zo a, ka sana ka en a, dar 10 a lo ni der tawh a. Kan awmna khua ang khawte ah hi chuan zan a rei hma em em a, dar 9:00 a rik dek dek hichuan a reh duk tawh zel si a. Ral a ui u rawng rawng leh Vabak thla eng lawm hram khur khur bak hriat tur a awm meuh tawh thinlo.

Mu chungin mahni tul dan ang angin kan tul dun leh mawp mawp a, a niin ear phone vuah chungin khumah a bang nghengin a vaipa thut at a, laptop ah thil a type mawlh mawlh bawk a. Keiin phone sik nep nep in ka tul ve em em bawk a. Ka thiante mengrei thei deuh deuh zinga thawh nachang hre leh silo hote nen kan in text vel mai mai a. Chutiang chuan kan zan khatna chu kan hmang tlingtla ve mai a. Rizai ka neih tam tawkloh avanga Puannuam pakhat lek ka sin vanga vawt titaka ka kawm chal mai chu ka inkhawngaih hle. A ni lah a in lukhupa tui takin a muhil sak sak mai bawk si. He nula hmeltha leh nalh uchuak tak hi nilose ka kian phal hauhlo ang. He nula hian ngaihzawng a nei a ngemle?, a neilo a ni maithei tumah a biak awm ka hrelo. A be thei tawplo ang a sim a nung ve tlat silo a. A nei a nih chuan ka phone hawh min dil maithei a sin. Ka in luah chu nuam a ti ang nge? Tilo ang?, naktuk zingah enge chawhmeh ka siam ang, Sa lei mai tur a awm ve ngai silo a. artui kan ngawt hmeh pui ka hreh ve tumhrang bawk si a. Sanghatin ka hmehpui zo chiah bawk si a, tih te ka ngaihtuah kual vel mai mai lai chuan ka lo muhil ve ta nge nge a.

Zingah ka vanneih a siam in Vahrit an rawn zuar hlauh a, ka lei a, zo buh no chanve nen ka chhum a, tui ti takin kan ei dun a nih kha. Kei school lamah ka kal a, Ka biak hmin sak tawh sa Pu Rokhuma leh Tv. Zaikunga YMA president leh Secretary te nen a ni Herse Ngaw lam ah lung sam en turin an chhuak a, Kei school ah kalin naupang khirh leh ngawhngawl ve tak tak kar ah " A is egual to B such as blah blah blah" ka ti nileng thak thung.kha mi ni tluk a ni rei ka tih ni kha a awm leh tawh kherlo ang, Naupang ho khan min chik deuh se chuan ka zirtirna ah ka rilru a awmlo tawp tih an hrethiam ngei ngei ang. A dik chiah a ni, khami ni khan ka rilru ah engdang mah a lut theilo, ka mikhual nula lehkhathiam leh hmeltha kha ka hmu leh chakin a bula awm leh mawlh kha ka nghak hlel ngawih ngawih a ni ber. Achang leh chawlh lain ka lo kalpui ve mailo a ni, ka ti leh thin a. Achang leh Pu Khuma leh Zaia khan an lo pawngsual reu reu ang a?" tiin a chhe ber kan dawn vei thut thut thin.,ka awm a nuam fahranlo a ni ber.

Tlai school kan bang a, nidanga hawn chak em em lo, hmelhriat ve deuhte in a lut kawi zut thin kha, haw thuai thuai a, Herhse ngaw an tih mai, kan piah ral a tlang hring dup mai lam pana Air gun pu chunga kal ve vang vang tum ranin ka pen hlawk hlawk a ni ber. Ka hmel hmu pawh nise Silai ka put vauh dawn avangin Sava veh satliah ang lekah min ngai dawn a, an hrethiam dawn chuanglo, ti rilru pu ran chung chuan ka In luah chhungah chuan ka lut sawk sawk a. Ka thuamhnaw ka thlak zung zung a, Iptepui leh ka chemte lian hrehraw pai leh ak chungin Ka Air Gun thar var mai pu ngauh chung chuan Herhse ngaw lam ringawt mithla chungin ka in atang chuan ka inpu chhuak ve ta ngei a. Kawngka ka kalh rak rak lai tak chuan " eh...Khawnge i kal dawn a? I va in ak nasa teh hluai ve?" tiin Puipuii aw ngei mai chuan ka hnung lamah min rawn bia a, " a ni zawng pasaltha sa kap thei ngang a ni a, Daihnai vate a veh leh dawn a niang" tia nui hak hak chunga Zaian min fiam zui lai hmel chu ka hmu nghal bawk a.

" aw..h in lo hawng ta der elaw. In va lo haw hma leh roh sive, ka lo hm.. Awh ka lo chhuak dawn chiah a.." ka ti bah nuaih a " Minlo hmuah i tum zawk a maw? Sava i veh turah ka ngai hman a sin?" Zaia chuan nui sun sun pah chuan a ti zui a. " Nia, Puipui kan haw tlang nghal mai ang, Zan ah a tul leh kanlo kal leh mai dawn nia" tiin Pu Khuma chu a lo inrawlh vat a, an in thlah fel hnuah chuan " khawiah maw i kal dawn a?" Chiang deuha min en kal chung chuan Puipuii chuan a ti a. Ka lo tum lak lawh tawh si, ka kal tum chhan ber lah a lo hawng der tawh bawk si, tihngaihna ka hrelo rilru hle mai, chutah bah nuaih in Sava ka veh lawk tur thu ka sawi thei hram a. Phurlo deuhin Herhse ngaw lam nilo, Pu Hmuaka Puk an tihmai awmna dai lam pan chuan ka kal liam ta nul nul a. Thulh leh thut chi niheklo le.

Zan riah kan ei hmain ka inbual zo a, a chawhmeh siam chu ka en a, Bai a thiam hmel zek a, " eirawng i bawl ve ngai em ni?" ka ti deuh teh tawl a. " Mizo nula ka nia lawm le" tiin min chhang mai a. " Vawiin khan i school tluang thei maw?, naupang i hau vak vak thin em?" tiin min be chhunzawm ta daih a. " Nia...ka mood a off deuh nge ka hrelo, ka phur teh fahranlo in ka hria. School naupang hrawk vak vak hian an nun a siamtha chuanglo a. Ka hrawk ngai miahlo" ka ti nuah nuah a." keipawh ka ngah dan chiah a ni. Enteh hei vawiin kan triping chu ka vannei khawp mai, i chungah lawmthu ka sawi duh, i mi zawn sakte 2 kha an felin an polite dun bawk si a. An bula awm a nuam tak zet a ni" tiin ka bul hnaia rawn thut pahin a Camera ( NiKkON SLR ) min en tir ve a. Bek insi deuh thawh chuan kan en dun a. A sawi fiah pah zel a, amah tak a lang tamlo. Mahse a thlalak hmeh dan ah a professonal ru riau tih ka hmu thiam thei mai thung. Amah a lan ve chhun apiang chuan a lang nalh thei em em vek zel bawk a. A sam suk hlim fai rim nam chak leh a taksa a rimtui a kah rim nam chem chem chuan hnar a verhin mipa min tibuai map a ni ber.

Chutia ka mi zawn sakte vanga ka chunga lawmthu a sawi pah a, a kalpuite fel zia leh kawm an nawm zia a sawi lai tak chuan ka bing deuh mup a, ka lum deuh pup bawk in ka hria. Ka rilru ah thil dang a lut daih bawk a, Khatia a fak luam takah khan Zaia hmel nui sawng leh nuam tihmel zet kha ka hmu nghal chuai chuai a, Chu chuan thikna min a rawn ti puak a ni deuh ber mai.engmah sawi set set lo chuan ka tho a, Bed room ah ka lut ta daih a. Ahnu rei vaklo ah chaw ei siam turin ka chhuak leh a, Min melh zak zak pah chuan a camera chu a bawmah a khung nap nap a, bangah a khai a, Ka chaw ei siam lai mek chu min rawn pui ve nghal a. Kan eikham dawn tep tawh a, ka lungnilo thut pawh a kiam leh duak tawh, a bulah ka awm a, ka hmazawn ah chiah dawhkan hniam ah a thu a, chaw tui ti takin a ei hmel ka melh zauh zauh avang chuan ka thinlunga meialh de zuaih zuaih, tek chhawk chhawk hman tawh chu, a leih mit fai vek niberin ka hria.

Pu Khuma leh Zaitea chu an rawn lang hlawl bawk a " awh khai inva ei tlai ve, Kan lo kal hma deuh zawk em ni dawn le?" tia Pu Khuman a rawn tih hlut tak bawk avang chuan ka tho vat a, kan ei thleng kan seng dun nghal mawlh mawlh a. Mak em em mai chu Zaia hmel chu ka hmu peih tawh maplo chu a ni. A ni lahin ka rilru engmah hre map silo chuan ka sava veh chanchin, rahtlan tha deuh awmna a hriat thute, Sava veh nuam a tih thin ziate a sawi tak siam siam a. Ka chezia chu mak ti rilru hmel deuhin Puipuii chuan minlo en ru reng tih ka hmu a, ka tho a " Naupang kan tlawh kual zuaih a nge, lo inkawm ula, ka lo haw leh vat dawn nia" tiin chhuanlam siamin ka chhuah san leh ta daih a.,naupang kan ta lemlo chuan Kan Hindi teacher te nupa rek Keimah ang tho a awmna la reilo te in ah thingpui hang no 2 ngawt ka in ta vel mai mai a.

Dar 9 a pel leh der tawh, ka in luah pawh a lo la eng ve pap a, Inchhung ka lut chu Puipuii leh Zaia chuan bek insi deuh thaw in Thlalak an lo en dun a, an lo nui dun hak hak a, ka hawng thawm an hriat pawhin engtin mah min chhawnlo.,ka lum pup pup a ni ber. Pu Khuma hmel lah hmuh tur a lo awm tawh bawk silo a. Engtia rei nge an 2 chauh a an awm ni ang?" ka ngahtuah ngamlo. Ka thik em em nghal ringawt a. Ka room ah lut tlangin Ka Laptop ka on a. Woofer ah zai ka ngaithla ta ngawt a. Rei vaklo hnuah Zaia pawh a hawng tawh a. " U.... .... Thingpui i duh ve em?" a rawn ti a, engtinmah ka chhanglo dawn deuh a, ka inthiam chiahlo deuh a, " duh ve e" ka ti thei hram a. Ka rawn chawi phei mai ang mei ka chhem peih tawhlo, ka in hem dum vek palh ang" ti chung chuan room lam panin a rawn kal ve ta daih a.

Zan dar 11:45 lai a ni tawh, kan la titi tui dun hle mai. Ka khumah ka thu a, a ni a khumah eng eng emaw kan sawi dun a, a u ka thiannu chanchin te, lehkha a thiam theih ziate, Law college ah Bachore degree a neih leh mai tur thute. Ama zirlai chanchin te kan sawi dun vel mai mai a.mak em em mai chu he nula hi ka vawi khat hmuhna ah khan ka bei nghal thlawp a, Ka ta niah ka ngai nghal hmak a, midang ta niturin ka phallo nghal em em ringawt. Enge amah pawh ka hrengai a ni silo a, chuti taka ka intih tatu em em chhan ka hre bik map lo. Mak ka inti in zaklo ka inti em em bawk a. Mahse ka chan phal hauh bawk silo. Chutiang vela hun kan hman dun hnuah kan in mangtha a, Dar 12 pelh ah kan mu ve thei ta hram a. Ka leng hawn tirha ka thinrim vei nen rooma a rawn luh a. Thingpui min rawn pek hnu ah meuh chuan ka mei nun sa chu a rawn leih mit leh hneh rem rem hle mai.

Inrinni ah Khuai Kham an tih maia Lung thi la turin Pu Khuma kei leh Puipuii kan kal ho a, Kan beisei aiin kan hmu tha a. Zirchian atan a sample a lak hnuah hlim takin kan hawng leh a. Hawn kawngah Khuai Lui an tih maiah Nghate kan dap hawng a, Vahrit leh Bullut 2 ka kap tlu a, Sangha ngun tang tia zet tawh 5 lai kan man bawk a. Pu Khuma fu huan ah chawl in Fu kan fep a, kan hawl haw bawk a. Chutiang chuan nilengin kan khawsa ho a, A nuam in a hlimawm ve hle mai. Thla kan la nasa tlang hle. Kei pawhin ka SLR Cannon ka keng ve bawk a. Kan hmet dun deuh sek mai a. In kan thlen meuh chuan unau hmelhai a ni der tawh. Tui ka lum sawk sawk a, ka sava kah tluk ka puah laiin Puipuii a inbual a. Zaia Inkhawmpuiin khual khua ah a zin daih bawk si a. Ngah ngam takin ka awm a ni ber. Zan riah kan ei tawh a. ka thawhpui SS subject teacher hemi khua a awm nghet tawh VCP makpa ni mek Davida a rawn leng a, Puipuii te nen Veng inhnai tak hmel inhre ve deuh an lo ni bawk nen kan ti ti tui phian a.. Pu Khuma Inkhawm bang a rawn kawi a, thingpui hangte in ho in A hlawh tur leh Zaia hlawh turte an inpe fel vek a. Tichuan Sunday a inkhawm ngei ngei tura In sawm chungin kan in mangtha tlang ta hlawm a. Chhun lama kan tei hah deuh vang emni dawn ni, kan mu zal a kan tawng peih meuhlo, tui takin kan muhil ta daih a.

Sunday School ah kan Inkhawm tlang a, Banah Pu Khuma In ah Chhangban leh kurtai kan ei a, Chawhnu kan Inkhawm leh a, Thalai fellowshipna lamah kan kal dun leh a. Pu Khuman a sawm tlat avangin Arpui tui lai chhim turin min ei bo san a. Phurlo zetin Sanghal sa thing ka chhuanglum a. Ka thu tum bur a ni ber. Khua a la thim chiahlo, Kawngka an rawn kik dat dat a, ka va hawn sak nak chuan Kan School naupang Kham Zaneih Pau paihte naupang pawl 10 zirlai a lo ni a, Bag hring lian lam a ak par a " Sir, hei Zupui chu ka rawn hawn sak che a" tiin a bag ah atang chuan Mizopa um buhfai kg 4 vel deuhthaw leng tur hnum dum hlap mai 2 a rawn phawrh a. Lawmthu kan inhrilh mawlh mawlh a. Zanriah chu phurlo zetin keimah chauhin ka ei a. Naktul ah a hawng tawh dawn a. Motor chanpui a ngai dawnlo a. Kan Headmaster te Aizawl zin tum an Bolero ah a bei thla ve thei dawn hlauh mai a. Ka huphurh lawk hle mai. Rokhawlhna eng emaw awm thut se ka ti rilru hle mai. Zan ah kan Inkhawm leh dial a. Thu lawmawm tak ka hre haw nghe nghe Zaia ka lo thik ve ngawt a, ka tisual kher mai, Pu Khuma fanu Lalzuali nen Kohhran dan thianghlimin in Thla thar Ni 20 ah an innei dawn tih thi a ni. Thik a ngai tawh dawnlo tihna. Ka lawm haw vun vun hle mai.

Tapchhak ah mei alh kan en dun ngat ngat a, kan ngawi reng, Keiin chhemthei ka let ka let a, a niin Chaicheh in meihawl a thai let a thai let thung. Tumah inleng an awmlo. Kan tawng bawk heklo. A rilru zuk hmu chiahlo mah i la,a hawng dawn tawh bawk a, a lawm hle niberin ka hria. Kei erawh chuan thih hreh takin ka hreh roh thung, Naktul zan alo thleng a nga, Khawhar takin he tapchhakah hian mei alh ka en ngur ngur mai tur ka suangtuah a, ka huhphurh takzet a ni. " tinge i ngawi reng a?" a rawn ti phawng mai a. " eh nangpawh" ka ti let ve mai bawk a. " sawi tur a vang em a" tiin a nui hak hak a. A van nalhin siamtu hian avan duang fuh ngeih ngeih tak em..." kan in ang a nih chu" ka ti leh mai a.

" Hei hi enge?" Tapchhak kila ka Zupui dawn thar um 2 ka hun dun ral chu kawk pahin a ti a." Zu pui a nih kha, Mizopa Zupui ang chiah nilo mahse a inang deuh viau an ti" ka ti a. " a ruih theih a mi?" " ka hre biklo, " ka awihlo, a ruih theih khawp ang" " nia...a ruih ve theih mai thei, Mahse no a in chi a nilo a, Frooty ang deuha straw a dawt chi a ni ve tho a. A tlem tham dawn si a. A ruih theih pawh ka ringlo" ka tih hnuah chuan kan ngawi dun leh ngail a. " hawh dawt chhin ang" a tih takah chuan ui rilru tak chuan ka phawrh ta hnu hnu a.

Rinai tak chuan a lo tui a, a thlum dam dap mai bawk a, Mau tlawn tereuhte 2 kan,hawlh lut a, a tui kan dawt dun a, rei vaklo ah lan dawt zo a. tui kan leih leh a, Minute 5 hnu velah kan dawt leh thin a. A dal mawh em em mai lehnghal. Ka ui rilruk ang a ni hauhlo mai. Vawi 5 lai tui kan leih leh tawh hnuah pawh a la thlum tui em em tho mai..

Kan tawng dun bawrh bawrh ta mai a. Kan nui dun hak hak reng bawk a. Ahma a sawitur hrelo dun tak mai kha kan ka akal dunin kan ti ti suam suam ta mai a. Kan rui em k hrethiamlo, engkim a ni deuh thlup tho si a Vir muai muai a awm chuang bawk silo. Ka hrethiam chiahlo niberin ka hria. Mu turin kan in tintuah a. Awlsam takin ka tho a, mahse ka lo rui deuh a ni maithei ka pai deuh khut a. Ani pawh a rawn tho ve mai a, keimah ang bawk chuan a pai ve khat khat a, a tlu dawn lek lek a, ka lo dawm ding vat a, ka awmah ka pawm bet ta thlawp a, kan nui dun nghal hawk hawk a. " hei, ka rui a nih dawn hi" a ti pawr chhar chhar a, min chhoh melh ha mai a, engmah ka sawilo, ka kuah reng a, ka thin a phu dut dut thung.

"I kal thei a ngem?" zawi sup in ka ti a, " ka hrelo, hetia awm hi ka duh rih" a ti ta tlat a, Ka in luah bang thlang lam pang ka ngheng a, ka awm ah a bei thlap a, a thaw sek sek a, current a rawn thim a, Thla a eng paw ruih mai thung a. Engmah kan sawilo ka awmah a bei hle hle a ni ringawt mai. A kut a thlak zawi hniang a, ka kut in ka hum lum sak vang vang a. Engemaw hi a sawi nuah nuah a. " engmaw?" tiin ka bia a. " ka sawi leh dawnlo" a ti hmuk a. Ka ngawi mai a. A hnu rei vaklo ah " I thik, ti raw?" a ti ta hlawl mai a. " tumaw ka thik ang" ka ti he haw a. " Zaia kha mawle, ka hre vek" a ti a, a rawn dak ar a, thla eng paw ruih hnuaiah chuan a mitmeng de sawr sawr chu ka hmu thei a.

" Ka thik pawn ka hrelo" ka ti deuh dui ni berin ka hria. Ka tumloh thil lutukin min deng tlat si a. " ka hre vek a lawm, zan ah i tawngvai ah pawh i sawi" a ti a, ka awmah a hmai a phum a, ka awm vun ah na vaklo in a seh a. " Ka dub lutuk che, ka hmuh hmasakna ber atang che khan ka thinlungah i bei nghal thlawp a, Mahse ka sawi zak si a, engmah sawilo a hawn ka tum viau nangin ka insum zo thei ngang lo a ni" a ti niah niah a. Ka then sak a, ka nui vun vun a. Hetilai tak hian ka thla lo la se a hmuhnawm dan a danglam ngawt ang. Ka lawm lutuk nui vun mai chu a hlauhawm zawmah maithei. " i fiamthu e mai, Commedian Search pawh a nihloh hi" ka ti hram a. " nia, ka sawi tawhlo ang, Ka duh em em che a, Mahse a theihloh, Mita ka ni tawh?" a ti leh ta daih a. " Enge, enge a awm zia" thin phu dut dut chung chuan ka ti tham tuak a.

Ka hlim hmel a kiam duak a, la meng rum ul tawh zawk maithei. " Min duh thu leh min hmangaih thu i sawi a, tunah mita ka ni i ti leh bawk si a, enge thil awmzia" ka ti a. " ka sawi tawh, ka tawng har mah mah che a ni, Mi lakah ka intiam tawh tlat si a" a ti a, a tap nge a nui ka hrelo a nghawr det det a. A khabe ah ka dawm kang a, a hmui vam ham mai leh a mitmeng fiah kak mai chu en reng chung chuan " keipawn ka hmuh phat atang che kha ka rilru i luah khat nghal vek a, ka awm dan ka theihnghil vek a, Zaia pawh kha ka thik reng a sin" zawi sap in ka ti a. A nui seih a, " Ka hre thiam reng a sin...kha" a tih lai tak chuan a hmui no chek mai leh fawh chakawm fawka sexy ah chuan ka fawp ta ngat ngat a.

Khumah kan insawn phei a, Hmangaih biahthu kan inhlan a, Kan awllo a ni ber. A ruh langin engkim kan sawi dun a. Lenlai a rual lo chu a pawi thu kan sawi a, a sawi rem theih dan leh rinawmlo nih a that loh thuten kan in hnial a. Kan thin a rim a, a rim lehlo a, kan lung a awilo a, a awi leh a, kan in fawp a, kan in nuih a. A tap leh a, ka thlem a, ka chul heuh heuh a, ka khum dik takah hmai chhanah in en kar chungin saisirin in hawi tawn zawnga mu in kan tul dun mawlh mawlh a ni ber. Fan ngailoh ram kan fang a, Chenna ngailoh hmunah cheng dunin Hmangaihna par kan thliak dun a, a par rimtui mawina kan chen dun a. Awmze nei takin hmalam kan sawn dun beuh beuh a, " I tan ka theih tawk, ka neih zinga ka rohlu ber, ka hlan mai loh che chuan ka hmangaihna che hian awmzia a awm dawn silo, Ka taksa damchhungin pawm dawnlo mahla, Ka thinlung phek a i hming a chuan reng theihnan Lalpan ka thil hlan ah che hian min ngaidam mawlh rawh se" a tih miau avangin kan Pil dun ta veng veng a.
********
AFTER A YEAR PAST.
Kum a liam leh tawh a, Vawiin hi Khami zan Kan hman dun zan champhak chiah kha a ni tih ka hre reng, ka vanneih a siam in, khami kum khan MPS ah ka inziak tling hlauh a, Training ka zo leh der tawh a. Ka post thar tur zawmin Aizawl Thana ah ka awm mek a. Khami zan a kan hun hman dun tluka kan hlim ziate kha a thlaktu ka la tawng chuang hauhlo mai. Ka kuta rangkachak thi sin seng mai min pek ka hum ran chu ka en dauh dauh a. Mak deuh maia khami zinga kan kawta Bolero var thar sur mai rawn ding ringawt leh a lo sawi lawk tawh keimah aia a tawn hmasak zawk leh a hmangaih hauh siloh, mahse kawppui atan hiala a lo tiam hman tawh si, Aizawl sumdawng hausa fapa mal duat fel hmel tak, lo lang hlawl kha a ni. Engmah kan sawi ngam tawh silo, mit mei in ven ru nei chung si a kan in biak bak engmah kan sawi theilo. An kal dawn a ka kutah he a thi min pek ruk zauh laite kha ka hre thar lh uarh uarh a.Kan khua an herliam san vuah vuah laite, Khami ni tluka khawhar thlak leh lunglen thlak, Rilru nat bawksi kha ka tawng leh tawh lo ang. Chumi hnu-ah amah ka zawn ruk nasat zia leh ka thian nu USA a kal ta daih hnena kan chanchin ka hrilh tak dante. Engmah hrelo ang maia min ngawih san hmak dante ka chhut let neuh neuh a.,ka lung a awilo takzet a ni.

" Hmmm. Khawnge Vawiin hi khami zan kan hman dun champha kha a ni miau a, “kan hun hman dun hlimawm tawite si hi, ka theihnghilh tawh ngai dawnlo a nih hi, chumi hriat reng theihna atan chuan he Feb 14 Valentines Day a lo thlen apiang hian kan awmna bulhnai a thisen pek theihna hmunah chuan thisen kan pe ziah mai dawn nia " tia kan thutiam ka hrechhuak thut a. Thisen pek ve ngei tum chuan ka inbuatsaih a. ka pen leh dairy ka phawrh a, he thu hi ka ziak ta phawt a.
“Ka hmangaihna che hian a zui reng che a, I lo kir leh hun tur chu beiseina nen a nghak reng che a che. Hmangihna tuipui thuk tak ah cheng dun leh turin" - I tan Hmangaihna tuipui thuktak atanga lo chhuak hian ka lo nghak reng che a sin. ( From the deep blue sea ) tiin .,ka tho a, Driver ka ko a, Civil Hospital lamah kan inzui chhuak dun ta nghal a.

" Hei, Pulit ( Lam uang vel ) Lal kha , engtik ah nge i lo haw a?" tia nui hawr hawr chunga hmeichhe pakhat tawng lo chhuahna lam chu ka hawi vat a. Ka thiannu USA a awm nia ka ngaih a lo ni reng a, " oh...A la reilo, vawiin hi Ka Joint hnua ka ni 3 hmanna chiah a ni, Engtik nge i lo hawn a?" ka ti a, kan inchibai lawp lawp a. " Krismas ka rawn hmang mawle, biak tur i awm bawk silo" a ti khar khar a. Eng emaw kan sawi dun hnuah ka thisen pek chhante kan sawi kai a. Puipuii hming kan sawi kai dawn tep ah thil dang a sawi daih zel a. Chutia kan ti ti mek lai chuan Feli Thangluah chuan a Fanu niawm tak hmeichhe naupang Kal pawh la kal theilo, hmeltha virver deuh mai pawm chung hian mouthpiece kengin a rawn tawng phei zat zat a, Camera man chuan a rawn zui zel bawk a.

Chutiang zel a midang dang thil zawt pah chuan kan bul a rawn thleng a, " Sir, oh... Naute hi lo pawm teh" tih pahin Naute vak thei rual awm vel lek chu ka mal chungah a rawn dah nawlh a. Hnial pawh ka hnial hman meuhlo. Chunglai hmuna awm thalai Mizoram huap a lar leh langsar tak tak hmeltha leh nalh ve tak tak awm ho chuan kut an beng dar dar a " Ka Pu MPS ₹&#&@fsgdg i ni tih hei I kawr hma atang hian ka hre thei mai a, I naute pawm kha a mitah tak en chungin he hmangaihna ni ah hian " Bawihte, ka hmangaih che, Rosalina ka hmangai lutuk che" i ti thei a ngem" a rawn ti a. Ka nui a, kut an beng dar dar a. " i thei lo dawn em ni?" a ti leh a, a nui hak hak bawk a. Enge thil awmzia ka hre lo tak zet a ni. Ka hmel atang chuan ka bangbo hle tih a hria a niang. .

He Valentines day Feb 14 puala thisen pek runpui neih mekah hian Red Rose Society Pvt.Ltd. Managing Director of NE India Pi &^*** ( ka thian nu hming ) leh a thawhpuite huaihawtin Dawrpui Multipurpose center ah Live programme neih a ni a. Tunah hian Mizoram mipui mai bakah Khawvel hmun hrang hrang a Mizo hnahthlak unauten Zonet kal tlangin an en mek a ni. Tihian he centre ah hian thisen pe zo leh pe turte lut khawmin hlimawm takin hun kan hmang a. Eitur tuihnai tal tak an sem reng bawk a nih hi. Chu hun-ah chuan I lo tel ve avangin kan lawm em em a. Kan thil phut erawh min tihsak ve ngei a ngai ang” tiin min hrilh fiah a. Ka thiannu ka en a, a lo bu nghat nghat a. a nui sawng bawk a.

Ka thaw huai a, ka zam lehling zawk mah a. chutah sawi dan tur a tih chu ka zawt leh a, min hrilh leh hnuah " Bawihte, Ka hmangaih che, Rosalina, ka hmangaih lutuk che " tiin naute chu ka lek kang a, a biang ah ka fawp zauh a. Kut an beng dar dar a, " Ka pu hmalam saw en rawh le" tiin Dawrpui Multipupose Hall chhung a Screen lianpui mai intar kulh lam chu min kawh hmuh a. Screen chu a rawn eng pup a. music muang fan raih in a rawn ri a, Nikum lama ka hnathawhna bul khua a Thingpui dawr kawtah Nula pakhat ( Zaitei ) nen ka inbe lai thla a rawn lang ta kulh mai a. ka phu zawk a, chutah kha mi hun chho a ka in luah chep zet a ka zing muhil laite, kan ram vahho laite, hlim taka kan ding dun laite, Puk kawta kan thu dub laite chu a rawn lang ta zut zut a. Makti zet in ka hawi a, ka thiani leh Feli chu an lo nui sen sen bawk a.

Chutah aw ka hriat hran em em ka hriat nawn chak leh fo thin ngei mai chuan " Kha mi ni hmasa ber a, i hmel ka hmuh khan ka hmangiahna min laksak a, i kawl nghal hmak a, Khami ni atang khan i ta niturin engkim ka inpeih nghal a sin. Hun harsa tak ka paltlang a, I bula ka awm reilote chhung khan khawvela ka neih theih ngaioh, nitura ka lo ngaih thin hlimna ka tawng a. Ka inchhir ngailo a, ka lawm em em thin zawk. Hun harsa tak ka paltlang a ngaih avangin i lakah lak hran ang hial in ka awm a tul a, I tana ka inpekna rah a lang zel ta bawk si, ka hma huna thil thleng tur 2 ka nghah hleh em em chu harsa takin ka pal tlang ta a nih hi.

“Tunah chuan Ka damchhunga neih ngei ngei ka duh, ka banphak lo a awm tura ka phal ngai hauhloh tur Khawvel mipa zawng zawng zinga ka hmangaih ber Nang ( ka hming kohna a sawi a) tawn che hi a ni tawh a sin. Kan inkara hmangaihna par lo rah chhuak, Hmangaihna tuipui thuk tak atanga lo par chhuak, Kan thisen in a siam Fanu i pawm lai ngei nen khan, Hlim taka kan intawn hun a thleng tur hi ka hlim a. he Hmangaihna ni a hetianga ka thawng thut mai che hi min ngaidam hram bawk ang che....Ka hmangaih che.Tin, hetiang hun remchang min buatsaih sak tu theih tawpa min fuih rengtu ka hmangaih, min hmangaihtu ka u ( ka thian nu hming a sawi a ) nangmah vang liau liau a ni. " a rawn ti a.

A reh duk a, chang tum rawih thawm a rawn ri a. Focus light in screen sira puanzar a chhun chu a rawn kau a, Ka hmangaih ka zawn nasat em em chu a rawn lang ta heu mai a. Ka nui tawp a. Ka naute pawm chu ka en a, Ka bula za deuh a mittui tla pur chunga mawilo zeta then sung mai ka thiannu chu ka en a. A chalah ka tuk zauh . “Ka lawm e.” ka ti ngawt a. Feli tawngrinna min pek chu la in " Rosalina- i nu, Rosalinai pa hian ka hmangih lutuk che a sin" ka ti thawp sup a. Ka zak miahlo, Karlo ah kan indin chilh a, a mittui a tling pam a., " Ka vel dawn che. Sual lutuk mai" tiin a chalah dim tein ka tuk sak zauh a, a nui sak a. Kain inpawm ta vang vang a. Naute ka pawmlai chu a hawi kual valh valh a, hlim hmel takin a nui ver ver bawk a. Midang awmve te chuan kut an beng a chang an tum raih raih a. Kan fanu chuan " a gig-gig-gig " a ti a. Kan in en a kan nui dun ta hawk hawk a.
The End ...
( V-Day Pualin Ka rawn phuahchawp leh tavak a nih hi.. a hmun leh hming lang engkim tiamin ka zeldin kal vel mai mai thil tih a ni e.)