UNLUCKY DAY. BY Tochhong Ruata

[Ngaia]

UNLUCKY DAY.
Mumang phelh phung khawpa ka mut laiin kan thenawmte naute tapin min ti harh zawk a, ka sana ka en a, Dar 2:31 am a lo la ni dek dek chauh a. Muthilh leh mai theih takin tiin ka mului ngial a, ka mut hilh mai theihloh avangin duhaisam kawng ka zawh kual vel a, halin " ka di aia hmeltha an lo awm lo' a ti ang deuha ka tan chuan Vana Lallukhum chhetheilo channa pawh nidawn se, kawlthei kungah pawh lawn thei der silo khan ' i tan arsi lak ka huam a sin' ti meuh a ka lo tawngkhum ve bal bal tawh nena kan intawn dan atang a nimin thleng ka thlir kir a, ka let ka let a, thlasik thawt tir mai la ni mahse zing dar 2 velah chuan panglum delh loh lam awngphah chu a lo hik leh thlur hman tawh thin a.
Ar a khuang a, ka harh tulh tulh nimaiin ka hria, Rambo lemah te ka inchan vel a, achang leh Officer motor mamawh tawk aia tam mah nei ang hial ten ka inchan vei thul, ka mut a chhuah phahlo nasa mai si, ka khum mawnga tukver parda chu ka keu duk duk a, Khua a lo eng pup a, ka rizai tlawh hlim in " Khawnge mi fapa te tih dungthulin Nula khal deuh Insawizawi ka tawn hlauh takin, khawlai dungah ka traksut nen kan kal kual ve tehang" tiin ka tho chhuak ve ta tuih tuih a. Tuidehna hmun ka thlen phei meuh chuan ka tho ta chu ka inchhir hman kher mai, boruak a lo vawt nasa mai si a. Ka hmai phih tur chuan ka inbuatsaih a, Belpui a tui awm lung mai thal in kan khawih chhin a, a lo vawt tiktik kher mai, ka phu zawk a. Ka hmai ka phihlo tawp mai dawn em ni aw" ka ti hman hial. Mahse ema tiin ka hmai chu ka phih sur sur a, han tih tak pawp chuan a lo zia phian, ka ha pawh nawt leh law law mai ang tiin ka ha pawh ka nawt leh nghal a. Ka ha nawt zo chuan ka kam ka thuah puat puat a, a tawpnan tiin nopui khat hmuk mai tui ka suak a, ka in ta khulh khulh a. Ka inzo tep tihah chuan ka tuiin mekah chuan engemaw dum nawi niawm tak hi ka hmu a, ka enchiang a, Sam tawite hlawm deuh niin ka hria, ka bun chhuak a, ka ten angreng hle. Chiang deuh zawka ka bih hnaih hnu chuan " ka va ngei mai mai tak" tiin Bel chu ka bih nghal vat a, Sazu patiltawlh hi a lo phar lang luap luap roh a. Ka irh uk a, ka luak chhuak leh nghal puat a. Ka thui thal dawna ka enchiang hmasa lo chu ka inchhir kher mai. Mahse a sawt tawh silo..
Ka chil a put deuh tlat a, ka tuisik in mawlh kha a ni, kawngkapui ka hawng a, a lo engpup tawh avangin kawtkai ah chuan ka zuang thauh thauh a, mi tlan an la awmlo chu mak ti rilru deuh chung chuan Kawngpui lama chuan chhuah tum chuan ka tkan ve thauh thauh a, Step kal na awm kawngpui pawhnan a hnai zawk, mahse chho ve tak ah chuan ka tlan chho thauh thauh a, Step Chanve vel ka thleng ve mai, mahse ka thaw ka kaah a leng tawhlo, ka khup dawm meuhin ka hahchawl a. Chutia ka bungbut kuk kuk lai chuan ka dinna bula in kawt atang chuan ui pa lian hmul puk luih mai, dum deuh ther thur hian minlo en kur roh a, a rum ngul ngul mai bawk a. An gate an kalh tih ka hriat avangin ka hlaulo, ka nuih sak a, " Ve beibui a che" ka ti a, ka chhiatkhum vel a, a ngur chhur chhur a, a tho thurh a, ka lam pan chuan a tuang tichhah chung chuan minrawn pan ngul ngul a, " Ka hlau chuanglo che" tiin ka mawng ka sek khum ngawt pek a, ( a hung daih vangin a rawn chhuah theihloh ka ring ringawt a) gate chu a bawh a, a inhawng ta tual tual a, chutah bak lengin step chho lutuk mai ah chuan ka lim chho ta fia fia mai a. Min rawn um emaw ka ti a, Mahse thuilote min um a lo ni a. Kawngpui ka thlen lai ka hrelo, ka thaw huam huam a, ka khup nemin ka khuh bawrh bawrh a, ka thinphu chuan " thlu duk, thlu duk" a ti nimaiin ka hria. " Kha ui mai mai kha ka hlau ve em em a, min um ngam der silo" ka ti sup a, Kawngpui phei zui maiah chuan ka kal zawi hnuk hnuk a.
Ka kalthui viau tawh nangin mi tumah ka la tawklo, a eng kulh mai bawk si a, enge awmzia ni aw" ka ti rilru a. Ka ngaih thalo chu ka ding a, ka sana chu ka en a, dar 2:31 a lo la ni tho a, ka enchiang deuh hnuah ka sana chu a thi lek a lo ni a. " ehe ka theihnghilh daih mai, Nimin pawh khan a thi daih tawh tak e, chuti dar engzat nge ri tawh angle?" tiin ka mangang rilru ta khawp mai. Ka ngaih thalo chuan van lam ka en a, Thla ral lam hek deuh bui chunga khawtlang lam pan mek hniam ve tawh tak chu ka hmu a, " Kei hi hun ka hai lek a ni ang a?" ka ti rilru a. "ka tilaklawh tawh, khua a varlo a nih pawn a var tep tawh ang" ti rilru chungin bazarpui lam pan chuan ka kal leh ta zel a. Traffic Point pakhat ah Police 3 velin Sikri aiin an lo thu bial ka va hmu a, ka kal deuh khap khap thawm an hriat chuan an rawn hawi vat a. Ka pan phei zel a, mak tihmek deuh hian minlo en a, an zinga pakhat chu a la muthlu luk luk a. " Tunge i nih a, khawnge i kal dawn?" pakhat chuan awki no vaklo chuan a lo ti hmuk a. " Dar engzat nge? Ka sana a thi daih a?" ka ti nuah nuah a. ui min umna vanga ka thlantla leh ka kawngkal thlantlak vangin hmai vel chu a huh deuh hluam tawh bawk nen, min melh hrek hrek a.
" Dar 2:45, tumaw i nih a, hei mipakhat Dawr rawk kan um a, kan chang mek a nih hi, nangmah hi i nilo maw?" tiin Pakhat zawk chu a rawn ding thut a, ka kutah chuan a man nghal chat a. " ekhai, ka nilo tawp mai, keichu ka nilo" ka ti nghal nawk nawk a. " aw sir, tak kekawr dum suit a ha, aw a sam pawh a buk, aw..a thlan a tla hluam bawk.." tiin Pakhat zawk chuan phone a a biakpa chu a chhang mawlh mawlh mai bawk a. " Ngawi teh u, thiante u, min hai a ni ngei ngei ang" tiin ka lo be sek bawk a. " i ni awm e mai, kan chang rei che ka rin vei nen i mawl man i hmu dawn a nih hi" tiin Kawl min bun tir nghal mawlh mawlh a. Min phuar zawh hnuah ka taksa vel chu an dap kual dan dan a, ka ipte te zenin an phawrh lip tuar tawh bawk a..ka nih loh thu leh, ka sana thih avanga thawh ka hai thute, sawlai lawkah sawn ka hriat chiah thute ka sawi ngial pawn barah an khawn duh derlo mai bawk si a. Ka beidawng kher mai.
Ka phone in ah ka dah a, Ka wallet ka ak lo kher kher bawk si a, keimah identity tih chianna tur engmah ka nei bawk silo. Ka insawifiah ngial thin nangin " court hmaah i la sawi zawk dawn nia" tiin min chhang bul hmuk zel mai bawk si, ka mangang tawh hle. Minute 20 dawn hnuah Motor pakhat kan lam panin a rawn tlan ta a. A rawn din hnuah Police Officer a kawrawm a Lal.......... MPS, an ni tih ka hre nghal mai a. Min melh run run a, in titha e, Bike inkeng bawka Post ah rawn kal mai ula" tiin Gipsy ah min hlang nawk nawk a, min tlan pui ta nghal a. " Ka pu ka nilo takzet a nia" tiin thilawmdan ka sawi ngial pawn " Zep zep lo la a ni mai, Bazar ah pheikhawk dawr rawk i tum a, i kar chhia a nih kha, an hmuh hman tak che avangin i tlan chhia a, i thuamhnaw hak leh i pianzia an hre hman vek tho, inzep duh suh" tiin an hotupa chuan min hau ta zek a. Ka ngawi mai a ngai a. Police Station kan thleng a, Police min mantute pawh anlo awm leh tawh a, Inchhungah min kai lut a, Banga Sanapui intar chu ka en a, Dar 3:19 a lo la ni chauh a. " Hei zing exer ka la a ti a, a tlanchhe chak viau bawk a, a hah ngawt ang Cell ah khan va dah rih rawh u, S....a thingpui han chhuang la, khua avar har tawhlo ang, kan meng tlang law law mai dawn nia." an hotupa chuan a ti lung lung a. " Kal rawh, i hah awm bawk si a, chawl hahdam daih rawh" tia nui then thu chungin office a lo awm pa upa lam zu thing rim nam rum rum chuan min Cell lam pan chuan min kai kal ta duan duan a. Ka sawi vel peih tawhlo, an tih ang ang chuan ka awm vel ta mai mai a.
A chhung thim khup maiah chuan min kalh hnan a, ka pheikhawk min phelh tir avangin chhuat hit thlur maiah chuan kawngin ka ding to mai a. Kawngka a kalh zawh hnuah kal a tum lai tak chuan " khawngaih takin ka chhungte min phone sak teh u" ka ti leh hram a " nia khawvar hunah" a lo ti liam puat a. " khawvar hun nghah ka peih hlei nem, helaia min khung ve ngawt na tur a awmlo," ka ti nghal tawn tawn a, " Hmela ngawi hmak rawh, kan khung theihna che a awm a, kan khung che a nih kha" tiin a tiang ken chuan min kawk ngur mai a. " Nia, bengchheng teh suh ka mutlem lutuk a ka mut a chhuak a nia" tiin bangkil lam thim deuh atang chuan mipa khat aw thum deuh hian a lo ti bul bul a. " Hei i kawmawl tur pawh ka si, thuah a, vawt i tih chuan pakhat zawk hi i la mai dawn nia" dam duai chuan a rawn ti leh a. Ka bei dawng ta hle mai. Ka sana chhe lutuk leh ka phone kenglo chu pawi ka ti ta em em a.
Kawngka inhawng rirak chuan ka thutna chhuat hik thlur a ka thu muhil lai chu min ti harh leh ta zawk a, " Hei nangkha lo chhuak rawh" tiin Police pakhat nizana min mantu zinga lo muthlu ver khan min rawn ti a. A nui deuh tut tut bawk a, ka thutna ngai rengah chuan ka la thu a, ka bula kawi zet a mu kawm ngul, sam hreu bum mai chu ka en doh doh a, a thaw ri tuah tuah a, phak chuap a meng chung chuan " Lal......, ka tui in a hal tawh khawp mai, tui min pe thei a ngem" tiin a rawn thu chuak ve tuih tuih a, Police chuan " awle, kapu lo chhuak rawh le" a ti zui zat a. Ka bula awm chuan hnapkhir kheuh nuap nuap pah chuan a ham bui bui a, a rawn meng a, min melh kur a, " enge i ruk a, Lal.....dar engzat nge nitawh thingpui kan va dawng har ve" a ti leh nghal lung lung a. Ka tho vat a, kawngka te inhawngah chuan ka chhuak vat a, ka pheikhawk min khai tir a,,chu cell chhung thang hing uih hmun mai leh, ka bula awm thaw uih rimchhe zet mai, zu thing rim nam huam huam pa nen chuan ka kal san ta dawr dawr a.
" Kan tihpalh takzet a ni, hei han en ve mahla in thuam a in ang in, i lu um leh sam inan zia hi mak hial zawk a ni" tiin MPS pa chu a nui deuh suk suk a. Ka lungawilo hle nangin an misual man chu ka enin an thiamawm ka ti ve deuh tho mai, amah emaw tia min manpa chu ka ang tak bawk a, ka lu buk dan leh kawih dan vel te, kan traksut hak rawng leh dar avara tial dan te nen lam a in ang vek bawk si. Lungawilo ru deuh chuan " nia, ka hrethiam khawp mai, mahse rinthu mai mai ah khatianhin keilo midang pawh khung tawh reng reng suh u" ka ti ve hmuk a, an thiamloh a nih viau laiin an information hmuh nen ka thuam a in an miau avang a, an tihsualna chu hrethiam hram turin min ngen ve liam liam hlawm a. Banga sanapui inkhai chu ka en zauh a, Zing Dar 6:45 lai. lo ni tawh a. Kan inhriatchian tak hnuah chuan Police motora min thlah tum viau mahse ka duhlo lui ve ngat a. Inthlahrung le thiamlo inti tak chuan min thlahliam ta a.
******
Kawngpui ah motor leh mihring anlo zi nak nak tawh a, sana dawr inhawng hma deuh an awm mial takin tih thu ah Bazar chu ka thleng ta tho a, ka sana chu dawr inhawng hmasa berah ka luhpui nghal a, sana chu ka entir a, Battery a lo down in a lo chhe tawh a lo ni a, chu chuan a khawl pakhat a lo tikhir deuh lak hman tawh bawk a, engmah sawilo chuan a siam mawlh mawlh a, Thingpui khai hmeichhe pakhat lo kal hnenah chuan " chhang nen khan han chhawp la, kha kapu pawh kha lo thlit kep mai rawh" tiin dawr neitupa chuan a ti a. Zanlam boruak ka thil tawn chuan ka mood a ti off kher mai.. Thingpui ka in zo a, chutih lai tak chuan ka office thawhpui pakhat lokal nen kan inhmu a, chutiang khatiang chu ka lei duh a, a zawrhna i hre mial lo maw?" tiin kalpui atan min sawm ta tlat mai a, keichuan " kan kalpui lawk a nge" tiin ka kalpui ve mai bawk a, ka thianpa thil leitur chu kan lei zo a, kan chho dun leh a, Sana dawrah ka kawi a ngai a vangin a ni pawh a kaltlang nghal a, Taxi rawntlan a hmu a, a chuang zui nghal daih a. Sana chu a lo siam fel diam tawh a, lawmthu ka sawi nghal mawlh mawlh a, " Rs 150 man a ni a, Mahse vawiin a min dawr hmasa bertu i ni bawk a, Ka lucky day a nih phah mahna Rs 100 in ka siamsak mai ang che" tiin a nui var var a. " Ekhai, ka va lawm dawn ve, Battery man tiamin maw?" ka ti ve mai a.aw tih nan a bu nghat a. Ka ipte ka zen a, chhe hei, ka wallet ka kenglo tih te chu tukin ah Police min man tirh khan ka hre tawh si a, tinge ka theihnghilh leh mai aw...ka sen ap ap a, nui sanga min thlirtu kha a nui tawh hauhlo..." Pawisa i ak nange" a ti bung nghut a. " ka wallet ka ak emaw ka ti pek a, a zialo hle mai" ka ti tham deuh tuak a. " a nih chuan i sana kha i dah mai a ngai dawn a nih kha, zingkar ah aba a hralha bul tan chu unlucky day a ni duh viau a sin " ti bui bui chung chuan lehlam a hawi daih a, sana siam tur dangte chu a khawih leh ta daih a.
Ka tihngaihna hrelo chu ka ngawi reng tawh mai a, banga sana intar thup chu ka melh ka melh lai chuan " Enge i tih a, kha?" tia tawng thawm ka hria a, ka hawichhuak vat a, K'u ........... A lo ni a. " ehe khawnge i kal a, hei minpui maiteh" tiin ka sana siam tir leh ka wallet ka ken theinghilh thute, ka phone ka ken loh thute ka hrilh ta vek a, nui vur vur chung chuan " A van zialo tak ve mawle, ka ak a lawm, kan pek sak ang che" tiin min pek sak ta hlauh a. Ka thaw huai a. Lawmthu ka hrilh mawlh mawlh hnu ah Kan veng lam pan chuan ka kal ta nghal a. Ka cell awmna rim chu nam deuh vung vungin ka inhria a, ka ngaihbel lek emaw ni tiin ka kal ngauh ngauh zel a. Dawrpui kawngpui phei ka kal lai chuan School naupang uniform ha ka tawk ta zauh zauh a, ka zawn an thlen chuan an ner nang nang zel mai takah chuan ding meuhin ka jacket hak chu ka hnim a, a lo hing hum hum mai lahtak a, ka enchian deuh hnu phei chuan ka kekawr tlang te chu a lo hnawm deuh chuap hi a lo ni a. Cell chhung rimchhe deuh kha ka hrechhuak zawk a. Mahse khami a mi ka kai nise police ho khan min hrilh ngei ang mawle, tin sana dawrah pawh a neitupa in hriat awm tak a ni a, engmah a sawi bawk silo a, ka sana chu ka en zauh a, dar 8:30 lai a lo nitawh a, motor pawh a tam chak tawhin a kawngkal tawh tur pawh an awm sup sup tawh a. Ka thil kai dan chu ka chhut neuh neuh a, ka hmuh tak vang emawni ka rinchu a hma aiin a chhe zawk tawh hial in ka hria. Ka mi tawhte chuan min enzui kher zel a, a then tenchhe deuh phei chu an uak uk uk kher zel bawk a, ka huattawk a tling kher mai.
Ka hrechhuak ta, ka thianpa nen kan inthen dawn khan ka zunchhuak zunin chep zetah ka zung a nih kha, khatah khan bang a sik loh theih silo a, ka bang sik velah khan heng thil uih hmun mai hi ka kai a ni ngei ang. Taxi han hman mai ka duh rum rum hman hial thin a, Kan In kea kal ngai a la nih zel avangin pawisa ka aklo tih ka hre kur lawi bawk si a, chak deuh tak chuan ka kal hlawk hlawk a, ka morning walk chu ka hlawkpui nge ka chhiatpui pawh ka hrelo, ka kal uih vung vung a, ka thlan a tla hluam mai bawk a. " Hei, Lal...... I va hma awm ve. Khawnge i kal a??? Awiii i rimchhiat zia chu, ngatinge?" tia ka hnung lam atanga hmeichhe aw in a rawn tih thawm leh ka dara min khawih a, rang taka kut lasawn leh ka lehhawi rual a ner nawng nawng chunga Ma.....engloi office kal tur nalh zaih maia inthuam chu ka hmu ta heu mai a.
" Khawnge i scooty?, ka hawn a nga ka rawn keng leh nghal mai ang, nakinah ka hrilh ang che" ka ti zung zung a, " aw...ka hmang ve duh a lawm, engrim nge i ngam chum chum chu?" a la ti zui zat a. Ka sawi dawn zuau hman tihah a thian nu ka englo ve ber chu a rawn lang ve hlawl a, a ner nghal nang nang a, a hmelah chuan min ringhlel tih ka hrethiam nghal a " i mi ngaihdan ang kha ka ni miahlo a nia" ka ti ngawt a. " i ni ka ti hleinem, deuh ngawt che chuan, Thiani kal ang" a ti deuh hmak a. " Hei, Ka piangthar tawh ka tih kha, office ka thlen hunah ka hrilh vek ang che u" tiin a thiannu scooty ken va va chu ka laksak a, a scooty vai vang maia a lo hun lai chu ka la lawk a, ka tlan chhuak nghal thuai thuai a. Min ko tuar tuar a, Motor horn a ri tuar tuar bawk a, School bus thawm ring deuh engine ri a ri vung vung bawk a, "ka rawn tlailo ang" tiin ka chhang let ve tawp a. Ka tlan lai chuan " enge maw khalai a an din reng reng le" ka ti rilru a.
Zodin square ka thleng a, traffic whisle a ri tuar tuar a, min lo hui sawk sawk a, a phar buailo zawk pakhat chuan ka scooty hunna tur minlo kawh hmuh pahin rum deuhin min melh zuk zuk a. Ka dinfel a chuan a ner ve deuh nang nang a " ka hmanhmawh viau a sin enge nita?" tiin ka din rual chuan ka zawt nghal zat a. " Hmanhmawh vaklo a nih dawn kha, hei kan bula din i duh zawk a lawm" ngeiawm zet chuan min tihkhum a. Ka sa phat mai, ka rawl ka rin dawn zuau hman a, mahse ka insum leh vat a, " ka hmanhmawh tak zet a lawm ka pu" ka ti deuh charh a. A kiai suk a, Walkitalki chuan " Hei tlangval nge pa pawh ka hrelo, kan lo ti ding e?" tiin a be zui nghal a. Ka thin a sa ta phat mai, khamite thian dun khan min hek a ni chiang, chuvang a ni maw min koh tuar tuar ni" ka ti rilru a, ka lum pup pup a ni ber..chutah " Enge thil awmzia ka pu, office ka tlai hlauh a nge, ka thian nu te ka thawhpuite an nia lawm, an ni pawh ka scooty an duh hun hunah min hmansak tawp tawp zel a lawm" ka ti bui bui a..." I thian nute an nih leh nihloh lam ka sawilo, ka hre bawk heklo, Helmet khumlo a two wheeler khalh danin a phal reng reng lo a sin, ka pu, Office a hnathawk i nih phei chuan chung dante chu hriat ve tur che a lawm" chang khalh chuan min ti ta a. Ka lu ka khawih vat a. Ekhai Helmet ka khum hauhlo...ka ti sup a...zalo deuh chuan ka nui lui a " awww ka hmanhmawh luat vang a nih nek hi" ka ti ta ngawt a. Engmah sawi tur ka nei tawhlo, Overbridge step ah ka thu ngawi reng a, Traffice phar vel chu ka melh zuk zuk a, Motor tlanvel atang chuan min en deuh ha ha tu ka hmu fo lehnghal. Ka ril pawh a tam tawhlo, ka thin a rim hlur tawh zawk..
Kan thenawmte nau huaibak zet vang vek a ni, nilo ka fimkhurloh vang zawk a ni, ani chuanglo ka sana vang vek a lawm..a dik ka sana kha thi bul lo se khatiang anga hmaah ka chhuaklo tawp ang, thla en kelh kulh lutuk vang a ni..mawhpuh tur ka dap kual chiam hnuah pawh keima thiamloh leh haihawt luat vang vek zawk a ni. Ka sana chhiat ka hriat kha nimin zing office ka kal dawnah daih a ni tawh a, ka siamtir mailo atin ni. Tinge kan sanapui tar emaw ka phone emaw pawh en hmasalo a ka tawngpawng teichhuah ve ngawt ni..Ka teichhuak a nih pawn ting khawvar kawl eng leh thla eng ka thliar hran theih mailoh le...Kha ui pawh kha chhaih lo emaw tal ni ila, Police bulah pawh ka insawi fihlim thei ngei ang mawle....tiin mi kawngkal thlir doh doh chung chuan ka thu tum vuau a..." i thiante chu an lo la thlenglo a mi, an lo thlen hunah min rawn hrilh mai dawn nia" tiin Police chuan Lammual gate lam min pansan ta daih a...
Kawng a kan zo chiah tih chuan ka thiani te 2 chu taxi ah nui thaw chungin an rawn chuang a, an kalman an inhlan zawh hnu ah tikhan hei hi hmang hawng nghal mai la, Kan Pu in a lucky day a nilo a nih chu, vawiin chu chawl mai rawh se, nui huk huk chungin a tih che kha" an ti a..ngawi rengjn taxi chhungaj ka thu lut a..." Ka hman e" ka ti sup a, ka tlan ta nal nal a....
"Huisss Tukin zet zawng ka che a ropui chiamlo a ni e" tiin ka hriat tawk lekin ka phun sup a.
A Tawp Ta