KILLER INSTINCT. BY Tochhong Ruata

Ngaia
Site Admin
Posts: 25813
Joined: April 30th, 2016, 4:07 pm

KILLER INSTINCT. BY Tochhong Ruata

Unread post by Ngaia » May 14th, 2016, 11:03 pm

KILLER INSTINCT.
" I dahthat hnuah i sulhnu langlo thei angberin i tihfel hnuah kawngpui ah i chhuk thla ang a, Step a lo awm anga chutah chuan i chhuk leh ang a, Fiat car var a khalhtu tur nen nangmah nghakin an lo awm ang, tahchuan ngawi rengin i lawn ang a, airport ah a dah nghal ang che" tia min tir tupa thusawi chu ka ngaihtuah nauh nauh a,, Hetiang titur dinhmun a ka awm hi ka sual vang hrim hrim lam pawh a nilo, Ka nu cancer zai sak a nih theihna tur sum ka mamawh vang chauh a ni si a. Ka thutna atang chuan ka awmna atanga Feet 500 emaw vel a Building var vo mai, tualzawl nawmhmel zet nei a dawhkan awm chu ka thlir vang vang a, ka Silai chu ka load a, a lens atang chuan ka bih leh a, ka target awmna tura an sawi chu ka tin vang vanga " ka thelh dawn hauhlo e" tikhawp a ka siamrem hnuah ka sapel lo chhuak tur chu ka nghak leh ta vang vang a, Dar 11:30 a ri tawh a, Tual zawl ah pawh mi an rawn chhuak ta pheuh pheuh a.
Sipai ka tan laia sikai kahthiam vangin medal ka dawng ve nual a nih kha, India sipai sniper tura an trian 50 zet zinga pakhat ka nive nghe nghe. Ka pa rawng taka thah a nih khan ka rilru a na em em a, Sipai atang pawn ka ban phah hial a, ka nu awmpui chu ka hna a ni ber tawh. Kan ram inrelbawlna tenawm tak avangin sawrkar mumallo tak chuan mirethei leh hausa an thliar hrang em em a, ei leh bar lamah harsatna nasa tak kan tawk ta zel a, Keini inhlawhfa mai mai thingtlang mi tan phei chuan engkim a awlailo vel vek. Chutih mek laiin ka nu ka duat em em mai chu cancer natna in a tlakbuak a, zai a ngai dawn a, a zai man ringawt pawh nuaih chuang a nih avangin kei inhlawhfa tan tih theih a awmlo a ni ber. Chutianga mangang taka ka awmlai chuan ka sipai tanpui Medical penson tawh Hruaia hmelhriat hna ka thawhsak a ngai ta a ni.
Ka hnathawh tur tuna ka hmabak mek chu Mizoram Police Officer rothap leh huaisen zet mai chawl tawh, chumi hnua Politic luhchilh a Home Department chang chho leh a Sawrkar phalloh a sumdawng tute chungah nasa taka chet chhuahtu Pu David Kapthuama chu ka pawh chhawnlo tura kah tluk tawp a ni. Mihring nunna em lak chu ka duh hauhlo nangin ka nu damna tur a nih tak si avangin ka tih ngei a ngai tasi a ni. Ka nih nih ka ni maiang tia rilru siam chungin minute reilote hnuah Tualthattu ni mai turin ka bawk phek thlar a nih tak hi.
Tualzawlah chuan mi an zi nak nak tawh a, officer leh milian hmel tak tak chu an ti ti a, an ding khawm tel tel hlawm a, Naupang thenkhat chu nuam ti takin an tlankual vel bawk a, Ka silai chu ka lek kual dan dan a, chung naupang Kum 10 mi vel tlan kuala inum kual zingah chuan vawiin ni a an thenrual thate kokhawm a nihna chhan a kum 10 tlin lawmna an neih mek Pu David a fanu neihchhun a duat em em a nu boral san tawh pawh a tel ve nghe nghe. Chutia uluk taka ka thlir reng lai chuan hmeichhe naupang chu a hnunglam a hawi vat a, a nui ver ver a, a hawina lam chu en turin ka silai ka hawisawn tir vat a, Ka target chu nui vur vur in a kutah engemaw keng chungin a fanu leh midang awmte lam chu a pan mek a. Ka silai chu uluk leh zualin ka tin leh a, ka target a ka point tur tak chu ka chian ta vengvawng hle mai, ka load ri rap a, chutia a fanu nen a in tawng tura pan mektu Mizoram Sawrkar hnuaia tangkai leh hmantlak tak mai chu thal tawp tur chuan ka silai hmehpuahna chu ka hmet ta riai riai a. Ka silai chu a puak thak a, ka target chu a euzawk a, leichar ah chuan a let zawi hnawk a, engmah tithei a nei tawhlo tih hriat takin a kuta a thil ken pawh a bulah a let ngat bawk a. Ka silai hmawrah Silencer ka vuah avangin ka silai puak ri chu keimah bakin an hrelo. Chutia a lam pana lokal mek a pa tlu ta tawp chu makti hmel zet a en chungin a bul lawkah chuan a ding reng a, midang awmvete chu an tlankhawm sap sap a, Hmeichhe thau lam Jeans kekawr ha chuan hmeichhe naupang makti taka apa tlusawp nuaih mai en chunga ding chu a kuah vat a...Ka silai chu ka thiatsawm nghal nawk nawk a, ka remfel vek hnuah Guiter bawmah khungin kawt thler lam lo zawka chhuahna tura an siam lam pan chuan inchung atang chuan ka chhuk vat a. An ruahman lawk ang ngei chuan Step ka chhukna tawpah chuan car var a lo ding a, ka luh rual rual chuan a tlan nghal a, ka phone a ri a, ka chhang vat a.
" a fel thlap maw?" " aw fel thlap e" " a thilo a, boruak dang a awm a nih chuan i chan tur i hailo turah ka ngai" " Ka nu khawiah nge?" " Lengpui airport ah" " ka lawm e, pawisa chu " " car khaltupa khan a pe ang che" " awle, inbumna ka duhlo a nia" " ha2..Driver hriat turin loud speeker ah dah teh" a sawi dan ang chuan ka ti a. " Driver bag kha pe rawh, chabi nen" driver chuan a hnung seat lam chu melh zauh pahin motor hma a box chu a kawk zauh a " tahkhan chabi a awm" a ti zawi sup a, Air bag chu ka chawi phei a, a rit tha nelh nawlh hle mai, chabi chu lachhuak lehin bag tala chu ka hawng a, zipper ka unzip leh a, Airbag khat tlat chuan India Pawisa 1000/- note hlir mai chu a lo inrem tun a, ka khar leh hnuah " a kim maw?" tiin driver chu ka melh kawk a " Nuaih 10 leh Bonus Nuaih 2 " a ti sup a..ka ngawi reng a, Mi nunna laksakin ka nu nunna ka chhan dawn niberah ka inruat a...ka hlim chuang lem lo....
Loyala Cancer Hospital Kolkata cabin 102 na ah ka nu chau taka muhil sek sek chu ka en tlawk tlawk a, Banga TV intarah chuan NBC news ah " Mizoram sawrkar mi pawimawh Mr.David Kapthuama IPS ( Rtd) kah hlum a nih atanga kar a liam hnuah pawh a thattu hi hriat a la nilo a, police te sawi dan chuan he tualthattu hi pawisa hlawh a mi that thin niin an ring ber, Silai mu bawm ruak, kut zia, pheikhawk hniak engmah Pu Davida In hual veltu building hrang hrangte ah hmuh tur a awm miahlo chuan an thil rin dan hi a ti chiang lehzual niin an sawi. He tualthat tu hi silai kap thiam tak anih avangin khawilam side atanga silai rawn puak nge a nih hriat a ni theilo bawk a, a silai mu luhdan ngun taka an zir hnuah Hmarchhak lam dep atanga kah niberin an ring, engpawh nise, an thil chhui mek hian hmasawnna an neih ngei theih an la beisei hle" a rawn ti zat zat a, ka nu kut vuai nem nek mai ruh vunin a tuam lek nimai awm chu ka hum sak a. Ka beisei lawk ang ngeiin Hmarchhak lam side an ring chu ka lawm rilru hle..Kei chu Khawchhak lam side ah ka awm daih a ni si a..ka nu thaw sek sek chu ka en reng a " ka nu min ngaidam rawh, duhthlan tur dang ka neilo em a ni" tiin ka hriatphak lekin ka phun sep a...
*********
Ka tualthah atangin Kum 12 zet a liam lehtawh a. Ka pawisa hlawhchhuah atanga chuan Ka hmel, ka hming engkim ka tihdanglam hret avangin tuman sipai bang Duhzuala ka ni tih reng an hre tawhlo. An hriat Duhzuala chu Kum 9 zet liam tawhah khan New Delhi ah hmel pawh hriat theihlohin a ruang tawih chhe tawh tak an chhar daih tawh a, tunah chuan identity thar nen Mizoram lama let leh turin ka inbuatsaih ve ta mek a, Airport ah ka thuamhnaw awmna ka zin bag lianlo tak mai nen chuan ka thu khar tawh a, " Aizawl kal tur tan flight ah luh tur a ni e, Minutes 10 hnuah kan chhuak ang, In thuamhnaw engkim in hloh lohnan fimkhur hle tur a ni" tiin hmeichhe pakhat aw tliang fiah kak mai chuan a rawn ti puam talh talh a, ka sana ka bih a, TOI ka chhiar lai chu ka thlep thawk a, Ka bula ka zin bag chu khaiin Aizawl lam pana chhuak tur thlawhna Air India lam pan chuan ka kal ve ta a.
" Hei hi ka seat tur a nih hmel" tiin hmeichhe pakhat hian minrawn bia a, " keipawh ka seat a ni a" tiin chu hmeichhe lam chu ka hawi a, a lo nui sen sen a, " englo a nia, khami zawk kha a nia ka tih" tiin ka thutna piah tukverh bul seat ruak chu a kawk a. A kalna tur ka dal tih ka hrechhuak vat a, inthiamlo ru tak chuan a kalna tur ka kian ta sawk sawk a, " Ka lawm e" a ti fel et a. A seat ah chuan a thu a, a earphone a la chhuak a, Ipod ah hla a ngaithla ta daih a, Engmah sawi chuanglo chuan keipawn ka lehkhabu chhiar mek Sidney Sheldon Novel 'The Other Side of Midnight' tih chu ka bih san veta a.
Kan thlawkchhuak dawn tan tihah chuan a earphone chu a hlip a, min rawn en ha ha chung chuan " Meggy ka nia, Aizawl ah i awm vetho a mi?" tih pah chuan a kut a rawn pharchhuak a, Ka lehkhabu bihlai chu ka khup a, ka tarmit bunlai chu lathla in a hmel chu ka en kiau a " Duha" tiin ka chhang a, a nui sen sen a. " Englo i lehkhabu chhiar lai kha ka duh thei lutuk a, khawia mi nge i lei a?" a rawn ti leh a, " Airport bula vai pa zawrh ka lei sak," ka ti leh hmuk a. " Sidney Sheldon lehkhabu hi ka ngaisang khawp mai, ka chhiar hnem ve tawh viau bawk, ' Master of The Game" tih te Bloodline tihte kha ka chhiar nasa ve thei khawp mai" a ti siam siam a.,ka lehkhabu chhiarlai chu ka bih san leh tawh tihpawh hre reng chung chuan engmah pawisa lo hmel zet chuan a ti ti zel a. Chutia a ti ti mek lai chuan Anouncement a lo ri a " Lengpui Airport ah chhum leivak a tam em avangin kan tum thei rihlo a, Imphal ah kan chawlh lawk a ngai dawn a, reilote ah kan landing dawn tawh avangin Seatbelt hren vek tur a ni e" hmeichhe aw puam talh mai chuan a rawn ti a.
" Ka van haw tak, Ka pa Pian champha a nia sin mawle, thlan tlawh ka la ngai bawk si a" ka bula thu nula chuan a ti nang nang a, ka ngawi reng a, " i hlau elaw?" nui hak hak chung chuan a rawn ti a. Thlawhna chuan hi ka huaisenlohna lam tak a ni, a landing dawn apiangin ka ip chawih chawih thin a, chutianga ka awmlai chu minlo hmu a ni ngei ang, " Hlau lo e, " ka ti ve mai a " i hlau chiang ka hre vek, i tang fun fun a lawm" a la ti lehnghal a, thlawhna ke in track a rah rual chuan thlawhna chu a nghing lawih thei hial a, chutah a tum felta tih hriat takin a reh duk a, " Reilote kan chawlh lawm dawn avangin khawiah mah kalsan rih loh tur, Information hre thei turin awm vek tur a ni e" an ti leh a, ka bula nula tiam chuan an tho sanh sang hlawm a. Kei erawh ka thutna ngaiah ka la thu ta reng a " i chhuak ve dawnlo em ni? A rei hmel bawk si a, hawi khawthawn ka duh kei chu" tiin nula chuan min bia a, ka ngawi reng a, kan tum laia ka rilru a la dik zanlo avangin ka chhang theilo tih a hre lemlo a niang " i peihloh chuan ka chhuak ve lawk a nge" tiin thlawhna seat chu a thawhsan ta a.
"Khawiah nge i kal dawn?, lo chawl ve rawh" tia ka bula thu nula chuan min rawn hui lauh lauh a, Hall chhungah chuan zin chhuak tur leh rawn thleng thar an in sulpel zut zut laiin keini tangkhang ho pawh kan thu ve thap hlawm a. " I va tawng duhlo bik ve? " tiin minlo be sat sat a, " Nia, Mizoram hi ka chhuahsanna a rei ta deuh a, hmelhriat ka nei meuh silo a, ka ngawi vel mai mai a ni e" tiin ka chhang a, " ehe chu engtik nge Mizoram i kal tawpna ber?" a ti ha a, " Kum 10 chuang zet a ni tawh awm e" ka ti a. A nui hak hak a " chu chhemthei i hrelo ang a?" a ti a, kan bula nu upa lam deuh tawh 2 chu an lo nui ve bawk a " enge chu chu?" ka ti fiam ve ngat a " kha maw ka tih reng kha, Ni enteh kan pua hian chhemthei a hrelo" tiin a nui sen sen a, Khawlum lutuk lo vawt ni bawk silo boruak hnuaiah chuan chu nula nui mawi tak chu ka hmuh hmaih hauhlo mai " a nih eng tawngkawlawng?" ka ti let ta thut a, " chutiang a awmlo" " a awm a lawm tiraw ka pi?" tiin a ni te niawm tak nu 2 chu ka zawt a, " ka awihlo a awmlo chiang ang" a tive vat bawk a " a awm a lawm, mahse a chhanna chu i kutah ka dah" tiin nu upa hmel zawk chuan a ti a, a nui hak hak a, " in va sual tak" a ti bai bai a, " Tawngkawlawng pawh i hrelo a nia, kan in ang ka pi chhemthei" ka ti a, a nui hawk hawk a " i van sual tak ka pu Kawlawng" a ti ve bawk a, an 3 chuan a nui hak hak a. " Air India 7271 Mizoram kal tura passengerte in thlawhna ah lut khawm rawh u, a thlawh chhuah theih tawh e" a rawn ti takah chuan kan tho sang sang a, nui hak hak chungin kan inzui lut ve ta a.
Lengpui boruak chu a uap churh mai a, ka chhuahsan tirh aiin a letin a lo danglam tawh a, Ka airbag rawn thlen hun nghaka ka din reng lai chun " Pu Kawlawng khawi vengah nge i innghah dawn a?" nula bawk chuan a rawn ti leh a, " ka hre mailo, hotel ah ka indah phawt ang" ka ti a, ka bag chu a rawn thleng a, ka khai a, " i number min pe la, ka hman remchan hunah Aizawl ka fanpui dawn che nia" a ti sauh sauh a. Ka ngawi reng a, engemaw ah mamawhna ka neih ka rin avangin ka number chu ka hrilh a, " Zanriah eikhamah ka rawn bia ang che, a nih phawt aw, nuam deuhin aw" a ti a, kan piah deuha car sen nalh zet mai bula tlangval sang thlerh thlawrh tak mai lo nui ver ver chu a banin a vai lauh lauh a, chu tlangval pawh chuan a rawn vai let ve bawk a. Kan in chibai tliar tliar a mipa awmna lam chu min pan san ta hlawm a.
Taxi ka zawng rilru deuh a, chutihlai chuan nula te chu an tlanchhuak ve mek bawk a, Thingpui dawr ah ka lut a, mi an lo awm nak nak a, Reception counter ah ka phei a tlangval hmel hlui ve tak mai bulah chuan " Taxi khawnge ka hmuh theih ang? Pawna ah an awm bawk silo a" ka va ti teh tawl a. " Hei Kawlawng kan bulah rawn kal ve mai rawh, taxi a van em hi" tia Thingpuidawr kawngka a nula rawn dak chuan a rawn ti a, ka nui suk a " ka lawm e, hei taxi lak ka tum deuh a, an rawn thleng tep tawh ang" ka ti a " Ka pu Taxi chu an rawn kal ka ringlo, vawiin hi 'No Taxi, Pay Tax' an hmang a tumah an service lo ang" counter nghaktu chuan a lo ti a, Nula chu a nui sen sen a, " chuvang chu a lawm helai a kan rawn lam lehna chhan che chu" a lo ti vat a " Ka lawm e, ka tihbuai che avangin min ngaidam rawh" tiin mipa bulah chuan ka ti a, " ka hna ve ber a lawm, engmah a nihloh kha" a lo ti ve mai a. Nula nen chuan inzui chhuakin an mahni hmuaktu car ah chuan kan thulut ve ta a. Bag seat ah an 3 in an thu a, kei front min thut tir thung a. Aizawl lam pan chuan kan tlan ta vang vang a.
He nula hi a hmeltha han tih em em tur chu a nilo, Mahse amahah engemaw riau a nei reuh a, a tawng duhin a bula awm a nuam hle mai, fiamthu a duh em em bawk a, kan motor chuanna khaltupa chu a bialpa ve deuh a ni a, an ti ti hmang ah chuan mi awmthei tak leh chhungkaw hlun tak an ni awm e. Zarkawt nula mah nise a ti ti duhzawng a mizo em em mai a, intih changkan tum vanga sap zia lak a tum kherlo, chutia a awm tawp a, Mizo nula a ni tih miin an hriat bawk chuang changkanna chi 1 a ni tih a hria ni berin ka hria. A bula thute pawh chu a pa farnu leh a thiannu anlo ni awm a, a pa farnu chu Officer penson hlim a nih thu ka hre tel bawk a, Mumbai ah engemaw tiin an zin mai mai thu an sawi bawk a. Mumbai chanchinte, Aizawl chanchin leh Mizoram boruak Inthlan pui boruak in lumlet mek an sawi ho ber a, chu motor khaltupa pa chu Mizoram Bial pakhat a candidate niawm tak a ni bawk. A dinna tur bial boruak leh inthlan chung changa an ngaihdan an sep tui ve hle bawk. " Pu Kawlawng vote i thlak ve dawn em ni Mizoram a i rawn haw chhan hi " Meggy chuan a ti siam siam a " Aih ni lemlo, Inthlan vang lam a nilo, ka nu thlan ka tlawh dawn a" ka ti ve mai a " oh i nu a boral tawh elaw, ka van khawngaih, keipawh ka pa a boral tawh a, ka nu boral phei chu ka hre hmanlo kum 2 emaw lek ka la ni awm e" a ti a. Ka ngawi reng a, ka pa min boral san laite ka nu boral hnua ka nun khawhar tak ziate, khawi hmun mah ka tan nuam a awmloh ziate ka ngaihtuah a, Mahse keichu mipa ka ni a, mipa ah pawh puitling ka ni lehnghal, tunah Kum 40 ka tling ve tawh a ni a, ka tuar thiam vaklo a ni a, a ni hmeichhe naupang in a nu leh pa a sun tawh tih ka hriat chuan ka khawngaih rilru hle mai.
" a nih tak chu mawle, i pa chu engvanga boral nge a nih a?" ka ti hram a. An ngawi thap a, ka zawhna siam chuan boruak a ti danglam ta daih tih ka hre thiam nghal a. " ka tihpalh, ka zawhloh tur ka zawt che a ni maw?" ka ti chuai raih a " a pawilo, a ho lutuk, englo ka pa chu Miin an kap hlum a lawmle" a ti dul raih a. Ka tim sung sung thei hial, ka taksa lum vung vung chu a sa hut hut ni berin ka hria, "he nula hi em ni ang khatih hunlai a Hmeichhe naupang a piancham an lawmsak kha?" zawhna chhan theih siloh chhanna tur lang deuh ruak si chu ka inzawt rilru mawlh mawlh a. " Ka u kha a vanduai dan em em kha mak ka ti hial zawk, Mamtei nu boral laiin a awmlo a, a nghahlelh em em a fanu kum 10 tlinna champha ah tak a boral ve leh kha a ni a, ka lainat tak tak a ni. Theihtawpin ram leh hnam tan a thawk a, a thihna pawh chhui chhuah a ni ta hauhlo hi ka ngaihtuah chang chuan ka thin a rim thei khawp mai. Ani chu nise a chhui chhuak ngei ang mawle" Meggy ni chuan a ti bai bai a. Ka ngawi reng a, kan hmalam a kawngpui dum hlup kan tlan zawnga kanlam pana rawn tlan ang tak a awm chu ka thlir reng a, sawitur ka neilo, amah ngei kha emni lo ni a?" ka ti rilru a, " I nu chu engtia boral nge nive?" a rawn tih takah chuan ka harh zawk a ni ber " englo...Cancer a ni an tialawm" ka ti thei hram a. " a ziaawm deuh chu, i enkawl hman hle ang chu maw? Mahni pate bawihsawm miahlo a boral hmuh chu rilru a na tawp theilo a ni ber" a la ti ta deuh deuh a.
Ka chuanna motor chu ka chuan lohna tur a ni khawp mai, tinge he motor ah kher hian ka chuan a, tinge hemite nen kher hian kan inhmelhriat thar le?, engtia tihvak dan awm bawk silo, ka nun a chau nghulh a ni deuh ber.." Ka pa Vid-a kha chu kan ngaisang thei a sin aw..a thi tih kan hriat khan mak kan ti rap mawle, Inchhungah milembu kan en lai a ni a, kan tap ve vak vak ringawt a" Motor khaltupa chuan a rawn tive boh boh a. " Police Officer ram tan theihtawp chhuah a nunna hlantu a ni tih sawrkarin a hrelo der tlat mai chu mak ka ti khawp mai" a tih zawm zat bawk a. " Sawi tawhlo ang u, boruak a ti cool vek Samu i tlanchak deuh thei em? Thlen vat a tuivawt a inleih bawrh bawrh ka chak tawh e mai" tiin Meggy chuan chu boruak lum leh thawven thlakloh zet chu a rawn tidanglam ta a. Mahse kan subject kan thlak ve nangin kan boruak a muk laklawh tawh si a, kan boruak hmasa kan tluk thei tak tak tawhlo. A bik takin keimah ka mood a off leh zual, Engvanga Aizawl kal leh kher nge ka nih...Ka nu kan vui zawh hnua ka lunglen tehlul nen vawiin zet zawng ka lung a van lenglo chiang tak em...
" Room 143 ah single room a la ruak e, ka pu" Reception counter nghaktu chuan a ti a, " ka lo awm a nge, ei leh in lam enge?" ka ti leh a, " i duh chuan room ah kan service thei a, a nihloh pawn dining hall helam a kal ah hian a awm bawk" tiin kan dinna veilam corridor chu a kawk a, Nalh taka intar Dinner hall tih chu ka hmu nghal a. " ka lawm e. Ka duhdan chu a tuldan ang zelin ka rawn order mai dawn nia, tunah vodka ka duh nghal ang, chabi chu" ka ti a, chabi min rawn pek hnuah kan inbia ngun taka minlo thlir kar tu mipa naupang hnenah chuan " ka pu hi a room turah han dah ta che" a ti nghal a. " Ngailo, keimahin ka kal thei mai ang?" ka ti vat a " a nih leh aw ka pu 3rd floor a nih kha aw, nilen nuam le" a ti nghal zung zung a. Lift ah ka lut a, 3rd floor ka hmet a, chung lamah ka tawlh chho ta dalh dalh a.
Ka room tur chu ka thleng a, he hotel hi ka awmloh hnua siam a ni a, Aizawl Hotel tih a ni a, Mizoram ah chuan Hotel lar leh changtlung ber pawl a ni hial awm e. A building hrim hrim hi a zau thain A hmun a rem em em bawk a, Kawngpui lun lai taka awm nimahse hmun nuamlo a ni lem chuanglo, a building sakdan type chu USA sipai ralthuam engkin control nana an hman Pentagon ang deuh a sak, Chhawng thum a sang a ni a, Ground floor ah pawh Room engemaw zah a awm thei bawk a, chu hotel building in an sak kual pup ah chuan Swimming Pool zau tha tak leh a bul vela hawi khawthawnna tur In te a ding duh nial bawk a. A lum viau nangin Vairam khawlum dan nen a danglamin a nuam zawk daih bawk a, boruak thiang tak chu hip in thawk ka la deuh vang vang a. Ka room chhung chu ka enkual dan dan hnuah khumah chuan ka mu a, kha nula pa ka khahhlum ni a thil thleng kha ka ngaihtuah let a ka mitthla ah Pu Davida dak awrh leh tlu tawp lai hmelte a fanu naupang makti hmel deuha ding lai hmel te chu a lang uaih uaih a, ka bing mup mup a, ka nu dam ka duh luat vangin hmeichhe naupang a pa pawh bawih sawm miahlo a ka thah sak tak, naupang khawhar taka ka siam tak, tuna nula hlim tak nita Meggy chu ka khawngaih em avang chuan ka tap ta hawk hawk a " Ka nu min ngaidam rawh ka hmangaih luat vang chein khawhmulo lekin ka chet avangin mi ka ti lungngai a sin, i fapa hi kava chhuanawmlo tak em" tiin ka inhnip hlawp hlawp a.
Nunna hlut zia hrechiangtu ber, Nu leh pa neihloh hrehawm zia hrechiang tu ber, Pa awpna hnuaia awm chak ve em em thin khan mipa ka thah sak si avangin ka inchhir tawp theilo. Bathroom a bathtub ah chuan ka thu mu a, Bathroom banga Shower hmawr atanga tui rawn far fap fap chu ka en reng a, ka suangtuahna khawvelah ka cheng a ni ber. Enge ka tih ang a? Engtia hmalak chi nge nita ang, ka inchhir luat a vangin ka che buai eih tur a nilo, ka chet chhuah silo chuan ka rilru a nuam thei dawn bawk silo, engtin nge ka tih ang? Enge ka tih tak ang. Ka hrethiamlo a ka buai nak a ni ber. Ka phone ri in ka suangtuahna khawvel atang chuan min ti harh zawk a, phone banphak maia ka dah chu ka ban a number lawng chauh a lo ni a, Mizoram number ka neih chhun 2 Ka patea Zu ngawl vei nuthlawi zu zuar luhkhung Lianthuama bakah Mumbai a ka hmelhriat taxi khala rawn awm ve reng tawh Richarda a ni a, chumite 2 pawh number lah a ni bawk silova, tutak ni ang maw ti rilru chung chuan ka chhang a " Hello " " aw hello, Pu Kawlawnga a ni em?" nui hak hak chungin Meggy aw chuan a rawn ti a, a hlim tih a hriat theih a aw a zan vah danah chuan " ni e ka pi enge nita?" tiin ka chhang ve a, ka aw chu thunun tum viau mah i la, ka rilru kaptu ka enghelh zet chu ka thup zo meuhlo a ni mahna ka tawng bung deuh hmuk a ni maithei " i lung ava awiloh hmel hmuk hmuk ve" a rawn ti leh a, " nilove ka inbual laklawh a lawm le" ka ti ve mai a. " Oh ka tibuai che a ni maw?" a rawn ti leh a, " tibuai lo e, ka zo chiah a lawm" ka tive leh a, " Englo, enge zanah i tih dawn a, Lo leng phei ve la, thian kawm tur pawh i nei awm silo" nui hak hak pah chuan a rawn ti a, " nia kan ngaihtuah dawn nia, Inleng ka nei maithei a, ka rawn kal dawn chuan ka rawn bia ang che" ka ti a, tichuan kan inbiakna chu kan ti tawp zui nghal a. Ka thuamhnaw ka thlak a, ka inpeih fel at hnuah kal ka tumna hmasa ber ka nu thlan a kal tur chuan ka chhuak ta a.
Ka nu thlan chu a lo awm mawng dehdawh tawh kher mai, thlan hungna chain pawh a lo bo then nual tawh a, kungrem pawh a inhniam hleih deuh bui tawh bawk a, a bul vel chu hnimlo mahse eng eng emaw hnawm hnawk a tling deuh tun thung, chung hnawmte chu ka hai fai a, ka paih vek hnuah thlan ah chuan ka thu a, khawthlang lam a ni liam mai tur sen deuh phut chu ka thlir a, kan nufa a kan hlim theih ziate, ka sipai tlin hlima kan lawm ziate, Ka pa a boral tak a vanga Sipai ka zawm duh takloh vanga a lungawiloh ziate ka suangtuah a, khami ni kha ka hrechhuak leh uarh uarh bawk a. Kum 5 zet ka theih nghilh theilo aa, chumi hnuah kum 5 tha ka hriat mumal takloh vawiin a min thawng leh tu chu ka lung ngaihna tizualtu a ni kher mai. Mizoram hawn chak taka ka suangtuahna vak vel heti tehhrepa ka thleng leh si chu ka thinur lek lek zawk a. Kan piah mual a nitla eng sen phut pawh a thim tak ruai ruai avang chuan taxi min nghahna lam kawngpui pan chuan ka chho ta hnak hnak a. Taxi driver chu pawisa ka pe hnawk a, min tanpui tur leh naktuka ka nu thlan min cheihnum sak turin leh a tul ang ang a a hman atan Rs 10,000/- ka pe bawk a, a ni pawh chuan ka beisei ang taka tihsak min tiam bawk a. Rilru nuam zan chuanglo chuan hotel chhungah chuan ka lut ta a.
Aizawlah Ni 3 ka cham a, chumi hnuah Lunglei lamah ka phei leh a, Champhaiah kar 1 dawn ka cham tawh a, Champhai vengthlang ah restaurant pakhata ka chawlh mek lai chuan nupa niawm tak 2 hi an rawn lut a, ka ngaihsak vaklo dawn a, mahse ka hmelhriat tawh nitlat a hriatna ka neih avangin a mipa zawk chu ka en nawn leh ngat a, ka hrechhuak ta, Pu Davida that tura min ruaitu Sumdawngpa ngei kha a ni tih ka hrechhuak a, ka thinrim em em a, thawh lawka a chaldarah tak silai mu thawnluh darh chuai ka chak ngei mai. Ka insum tang tang a, a chetla en ruk a, Zan lama engemaw taka thawn ka tum ta zawk a. Hetia Champhaia ka cham chhungte, Lunglei lama ka zin chhungte hian Meggy chuan a khat tawk aia zing mahin min rawn be thin a, kan ti ti hlut thin nangin he nula hi ka zah tlat, a pa thattu ka ni miau avangin ka pawh tak tak ngamlo tlat a ni, an ina tlawh turin min sawm ziah bawk si, chhuanlam ka siam zel a, mahse a thulh duh chuanglo. Vawi engemaw zah min sawm hnuah Champhai atanga ka hawn hnuah ka tlawh tur thu ka hrilh ta nge nge a. Naktuk mai hi chhuk tura ka inbuatsaih tawh na ni a ni a, Chutia rinloh taka kan mihringa hmel ka hmuh takah chuan engrilru dang mah ka pu thei tawhlo. Tual min thah tir tupa chu ka haw ngawih ngawih ringawt tawh mai a ni.
An kalna ka chhui zui zel a, Motor ah an chuan thleng chuan ka enzui a, an motor number ka chhin chhiah hnuah ka in nghahna hotel lam ka pan a. Champhai khawpui zau zet maia Motor number hmang ringawt a mi zawn chu a hautak dan tur chu in hrethiam mai awm e. Mahse, kei misual hi engin nge minpui ka hrelo, ka zan khat vahchhuahna hmasa berah Bethle veng mawng lamah In ropui zet mai kawtah ngei ka zawn mek motor ding ka hmu ta hlauh mai a. Tum nei ranin ka khawsa zui ta bawk a. Ka huntiam chu thleng thuai thuai se ka ti hle mai.
Zan dar 10 a ri dawn hnai tawh ka thiana in lam pan chuan ka kal ta dan dan a, an in chu room 2 khat a la eng tih mailoh chu a thim vek tawh a, a, mu deuh vek tawh a nih ngei ka ring, Hmanhmawh lo zet chuan ka hnaih phei zel a, an kawtkai ka thlen dawn lai tak chuan kawngka inhawng ri rak rak ka hria a, rang takin an kawtkai maia an hun Gipsy upa tawh takmai phenah chuan ka biru vat a. Kawngkapui chu a inhawng tial tial a, ka beiseiloh deuh maiin in neitupa ngei mai chu thuamhnaw lum nen hmunphiah tel saiip var a khung niawm tak hi a rawn pu lak lak bawk a, a motor bul a thlen chuan a hawi kual zak zak a. A chezia ka hmuh chuan engemaw dan phalloh thil a ti tih a hriat mai, ka en reng lai chuan kawngka atang bawk chuan chhuna a kalpui hmeichhia ngei mai chu ipte khai chungin a rawn chhuak ve bawk a. Ka awmna atanga an awmna chu pen thum emaw lek tur a ni tawh car chu an hawnga a back seat an kuai kau a, chung an thil rawn put chhuahte chu ip atang chuan rawn phawrhchhuakin motor seat hnuai ah chuan an dah ta zel a. Ka chiang ta hle mai, hepa hian a thil tih ala bansan hauhlo a nih hi, Silai tawlh a tum tih ka hrechiang ta kher mai. Bag chu an hawng leh a, Motor hmalam chu hawngin bag chu khawimaw laiah chuan an khungbo leh ta daih a, engkim an enfel vek hnuah dimte a kawng kharin an pilbo dun leh ta daih a..
Ka rilru ka thlak a, thawm dim tak chuan an in chu ka kalsan leh ta vat a. Ka kal hma chuan an kawngka chung a thil intar chu ka enchiang deuh a, President Gr.YMA tih a lo intar kuau a, ka kiai sek a, Hlim rilru tak chuan ka thlenna hotel lam chu ka pan ta vang vang a. Hotel a ka room ah chuan ka thu leh ta vang a, khawchhak lam zu tui vaklo tak chu dawm pahin Directory ka keu niap niap a, ka zawn tak ka hmuh hnuah ka phone ah ka type nghal a. Champhai SP number ka neita ngei a. Toiletah ka inphih fai leh a chumi hnuah chuan ka tlawh leh tura ka dah Richarda Aizawl Zohnuai venga khawsa chu ka be zui ta bawk a..

Travel agency rental car bazar Champhai kahrawt atanga ka bolero hire chuan kan hma a tlan mek Car sen chu Kanan veng ah pawh kan la zui zel a, an hmanhmawhlo in an thlamuan hmel hle, kan tlan zel a, Petrol pump kan thleng a oil an lo thun avangin keini pawh thun tum ang takin kan tlanlut ve a, reipawh kan awmlo an tlan leh tak mai avangin an hnungah kan zui ve leh ta vat a. Beat Post kan thlen chuan an lo tiding dawn emaw tiin ka phur hman khawp mai. Mahse ka beiseiloh thil a thleng ta hlauh a, police duty te nen chuan an in au lauh lauh a, an tlan tlang ta daih a, eheu keini hi kan chesual mai dawn em ni ang? Kan SP nen a thawk dun an ni hiallo maw? Ka hrilh vek tawh si a, tinge an lo man mai loh le?. Ka sa phat a, ka phone ka lachhuak leh a, " hello SP Runremluaia ka ni e" polite zet chuan a rawn ti tal tal a " Tinge i man loh, engvanga chhuah nge i nih?" ka ti nghal tawng a, " englo a nia, kan chhui ruk mek an ni a, an thurualpui nia kan hriatte Tuipui leh Khawzawl inkarah an awm niin kan CID ten an hria a, chumi chu chian kan duh a lawm le, Chhumliamkawnah Khawzawl Police leh Assam Rifle in an lo nghak lawk reng tho a, an tlan chhuak hauhlo ang" tiin an plan chu mi rawn hrilh ve ta zawk a, ngaihdam ka dil luam a, kan hma a tlan kan umphak mai takloh Car chu chaktaka um turin driver chu ka hrilh nghal a. Karlo ah kan hmu phak leh ta reng a.
Tuipui kan pel a, Monsoon Fall kan thleng tep tawh tihah Bolero var sar mai bulah car chu a lo ding ta tlat mai, tlantlang loh theih a ni silo a, phurlo zet chuan kan tlanpel a, a side glass atang chuan ka thlir zui reng bawk a, car kawngka an khar a, an rawn tlanchhuak ve tih ka hmuh chuan ka thaw huai tawh a, Kan hma lawkah chuan Van Gipsy var pakhat hi a lo ding vang a, a bulah chuan Mipakhat silai keng chunga sava veh niawm tak a lo awm a, kan tlanpelh lai chuan minlo thlir dauh dauh a. Ka driver chuan chupa chu SP a ni tih min hrilh hnuah phei chuan ka thawveng leh zual sauh a. Khawzawl kan lut a, Chhumliam kawn kan thleng a, Police leh Assam Rifle an lo awm khap khap a, minlo tiding a, kan document vel an enfiah lai mek chuan kan hnunga car sen leh bolero var chu an rawn lang ve nghal bawk a. An ni pawh chu an lo tiding ve bawk a.
Car chhunga chuang ka hit list pa chu nui sang chungin motor atang chuan a chhuk a, kawna dawrte velah chuan engemaw lei tum niawm takin a lut vel a. An motor document an ensak mek lai chuan SP Gipsy chu a rawn thleng ve chawpchilh nghal a. Eng eng emaw an inzawt a, kan thianate hmel pawh a thlamuang zan tawhlo, Assam sipai comander niawm tak bel 3 nel vang tawh chuan a sipaite chu ka information pek dap tur chuan a ti ta a, karlo ah AK 47 4 leh Silaimu engemaw zah an hmuchhuak ta rup a, chumai a la nilo Bolero var chhung atang chuan AK 47 4 bawk leh Rifle 5 zet mai, Pistol 6 lai an man ta bawk a. Champhai North Group YMA president thawveng hmel taka kal vel hmel chu thinrimna, zahna ten a kap dum deuh khup khup tan a. A bul ka va hnaih phei hnuah, " Ka pu sawlai a mipakhat kawrpawl ha sawn hei hi va perawh a ti a" tiin dawt var sawiin lehkha envelope a thun thlap chu ka va pe a, a hawng nuap nuap a, lehkha a bih chiah chu a meng phar awn a, a hawi vel ruai a...
Chu lehkha ah chuan " I sualman i hmuh a ngai ta a ni e - David IPS ( Late ) tih zawng a ni.. A awmdan a dikzan lo tih an hriat chuan Police chuan a lehkha hmeh khawr nawk nawk chu an en sak vat a " Ekhai...enge thil awmzia kan Pu Davida thihna ah khan i inhnamhnawih a va nih hmel ve" tiin a nur nang nang a " Tunge he lehkha hi rawn pe?" a ti lauh lauh a, keichuan ka pek a nih thu ka sawi a, ka hmelhriat ngailoh pakhatin peksak tura min ngen a vanga pe mai chauh ka nih thu te ka sawi luam a, Min pektir tupa chu tunlawk khan a kalbo lehnghal thu sawiin dawt varin ka tlip ta vek a " Hmm Khapa ngei kha a nih dawn chu he kan mimante hian enge an tihsual tih engkim hre vektu a ni ngei ang, Engpawh nise Court lamah kan kalpui vat a ngai a nih hi" tiin Sipai officer nen chuan an inbek bawr leh hnuah an vai chuan chung motor 2 a chuangte leh an motorte nen chuan Champhai lamah rorelna sang hmachhawn turin an tlan liam ta a.. Ka thaw huai a, Thawveng huai e tilo chuan eng emaw tak ka hriat siloh fiah deuh kuar nibawk si nei nitlat in ka hria a. Phurlo zet chuan Aizawl lam panin kan chhuak ve leh zui nghal a.
Aizawl Hotel a ka room ah chuan no dawm pahin Tv ka en mek a, Dar 7:30 ah Richarda'n min rawn lam dawn avangin inpeih sa diamin ka lo nghak mek a, Chanchinthar ka thlir a " Vawiin khan Khawzawl ah Champhai Gr.YMA President Hmarthangvunga leh a thurualpui Tahan lam mi 2 bakah Mizo Republic People Party Thalai president Dr.Rualthana Sailo ate chu man an ni, heng mite hian Silai an tawlh tih hriat a ni a, hethu bawhzui hian Khawzawl Chhumkiamkawnah Assam Rifle leh Champhai SP tangkawp chuan an lo man a ni. Heng mite hi thuzawhfiah turin police ten an la nghal a, Nimin vek khan Distric jail ah thawnluh nghal an ni" tiin detail ve takin an rawn puang a, Chutia MRPP thalai hruaitu nena an in link a nih chuan ka hna min thawh tir tute zingah pawh a mah chauhlo pawh inhnamhnawih an awm ka ring ta tlat a. Engtin nge ka hriat chhuah tak ang? Hmalak dan tur ka suangtuah neuh neuh a, Zan khawchhe hnuaia eng awm miahlo hnuaia Pawisa thlauh zawn ang maia harsa niin ka hria. Chutia ka suangtuahna khawvel a ka chen mek lai chuan ka room kawngka kik karh karh ri ka hria a, Kawngka chu ka va hawn sak a, Ka hmazawnah chuan Meggy a lo ding reng mai a.
"Surprise!!!! Ha2 mak i va tih hmel ve? Khawnge i kal dawn a?" tiin a nui sang a " a mak tehthut em a lawm, ka hmelhriat pakhatin min rawn hruai a tum a, ka lo nghak a lawm" tiin room a lut tur chuan kawngka chu ka hawn zau sak a. Room chhung a rawn luh rual chuan a rimtui inkah rim chuan room a luah nghal vek a, " khawi vengah nge?" a ti a " Thakthing ah mawle" " hey enge i tih dawn a?" " ka leng dawn mawle". Kawngka a rawn kik leh kerh kerh a, ka va hawng leh vat a Richarda a lo ni thung tawh a, " ehiua i va thau ve" min ti hlut a, a rinloh taka hmeichhia ka room a awm a hmuh avangin a phawk zetin min en leh hru a " Meggy a nih hi, Ka rawn chhoh tumin min buaipui a kan inhmelhriat phah ta a nih hi" ka ti nghal vat a, an inchibai a, an infiam nghal bawrh bawrh a.
" I nupui emaw ka ti hman dawn a lawmle, mahse hetiang ang hi i hmuhzawh ka ring silo a, " a ti nang nang a, " ekhai kei hian a lawm phulo, a man ropui si, thir hlir a ngaihtuah" Meggy chuan a lo ti zui zat a, tichuan innel tak chuan kan awm ho a, Richarda nen kan chhuah dun dawn avangin Meggy chu a tuka inhmuh tiam chungin kan mangtha ta rih a. A kal hnuah chuan Richarda chuan min melh rulh rulh pahin " a chhelo hle mai, Milian fanu a ni ngei ang maw?" a ti a " Ka hre biklo, a nu leh pa an boral tawh thu erawh ka hria" ka ti ve mai a, a khawngaih thu sawiin a phul hlut a, Motor chuan an In lam panin kan tlan ta vang vang a.

An in chu a tha thawkhat hle mai, a nupui leh fate 2 nen a nu leh pa an chenpui bawk a, a pa chu Zirtirtu pension tawh a lo ni a, a u mipa in dang tawh leh a farnu hmeichhie 2 pasal neitawh te an ni bawk a. Chhunhkaw nun hlim tak an nih ngei a beisei awm, Richarda chuan Rental Bazar lun vaklo a din ve , amah chu Driver a ni nghal deuh mai a, motot 5 lai chu a kawl ve a, a tul hunah Driver dang te pawh a chhawr ve lawp lawp Mai thin. Chutiang chuan a chhungteva chawm ve a, a pa pension chu a nu leh pate hman atan a dah hmak thung, a ngaihsan awm fe reuh chuan ka hria.
Kei Mahni nute damdawiin kalpui na tur a sum mahmawh luat vanga Tual hial that tawhtu tan zawng zah luat vanga khuk ral chem chem ka chak zawk hial. A ni lah chuan ka chhungril nun leh ka hunkal tawh lam reng reng hrelo chuan a chhungte bulah ka nih phakbak bak in min fak sek mai bawk si a. Sawitur mang ka hrelo tawi te te in ka nui tet tet ringawt a, Zanriah tuihnai tak a nupui fel leh hmelchhelo tak mai chuan min siam sak bawk a, ka puar hle mai...Kum engemaw zat chhung kalo suangtuah thin chhungkaw din a, nupui fanaute nen hlim taka awm ka chak ve em em thin chu zanin hian a takinbka tawng niberin ka hria. Ka chaweina chhungte chuan min hmuh hlau takin ka kham vat a, lawmthu ka sawi mawlh mawlh bawk a. An chhungkaw zinga awm chu nuam ka tilo takzet a ni, ka boruak tawn tawh nen a inpersan em em mai si a, mahse ka thlak hlelh ber a ni bawk si, ka buai takzet a ni.
Chaweikham a thutmuan pah a thingpui sensa hang ngei mai kan dawm far pah chuan inthlan lo awm mai tur chungchangah ti ti kan vawrh chho ta a, kan ti ti zel a, kan sawi thui sawt viau mai Richarda pa chuan " Pu Davida kah hlum kum Inthlanna boruak rih zia tak kha aw" a ti vang vang a, ka beng a verh zar mai, ka mitthla ah khami ni thil thleng kha a lang nghal uaih uaih a. " Nia, keipawh kan tleirawl chhuah chhoh tirh lai vel kha a ni a, ka hlau ve em em ringawt a, a ho tak tak a ni, keichu Pu Davida kha ka hrechiang ve miahlo nangin a that tute chet dan kha a ropuiin sawi a hlawh khawp mai" Richarda chuan a ti ve vat a " Khami tum khan kan dutyna tur kha Aizawl West -II ah a ni a, Inthlan boruak rit tak hnuaiah Inthlan buaipuitu nih chu a nuam fahran lo" tiin a thingpui hang chu a dawt ri leh khulh a.
" kan thian pakhat Inspector in min hrilh dan chuan Pu Davida khan Smugglin lam a khawkh ber a, chung bungraw tawlh lut tu te chu a dang chep hman tawh khawp a, mahse tikhan a boral ta mai si a, a uihawm khawp mai. A boral hnuah amah ngeiin a rinhlelh ber zinga mi Zionlalliana pawh a tling ta nawlh a nih kha. Taka vawiin chhung chanchinbu ah khan Pu Hmarthangvunga silai tawlh tu man a nih thu an sawi tak kha mawle, A tha khawp mai, Hemite unau tluka kan ram ti,bawrhbang an awm chuang awmlo e. Kan sawrkar hrawn mekah an challang dun si a, a man tu SP chan pawh a chau viau tave ang" a tih zawm leh a. Chu a thusawi rik chuan ka thin a khei zar mai, An unau politics lut duh in an tana hnawksak tak ni thei tur Pu Davida thah an plan ni ngeiin ka hria a, Ka nupui man a sawisa a, Police Custody a pawngsualtu a nih avangin engzat pawh sen ka hrelo, ka nupji rilru dam theihna a nih dawn phawt chuan engmah ka ti hrehlo" tia min hrilh lai hmel ka hmu a, ka thu hle hle thei lo tep a ni. Ka mawng a hawlh zawr zawr niberin ka inhria..
" Taka Richard i motor zingami pakhat Driver telloa hawh ka van duhve, Ka chhuk dawn thleng ka hmang ang a, i chhiar zat zat ka chawi ve mai ang" tiin motor hawh ka dil ta chawm a. A lo phal nasa kher mai, Thingpui kan inzo a, kan ti ti fe hnuah Motor dahna ah chuan kan inzui lut a, " Hei hi a nalh ber Chevrolet Beat diseal engine a nih hi" tiin car var lam dum lek lek si hi min kawhhmuh a, chabi te kan inhlan fel hnuah Ka thlenna hotel lam pan chuan ka tlan ta par par a, Khapa leh a unaupa tia an sawi hmel chu ka hmu uaih uiah a, Helai hmunah hian ka nu thlan tlawhtum chauha kal ka nih laia hetiang thinrimna ka nei ta mai chu Meggy hlim hmel, ha fai var thiau mai vang vek a ni. Ramhuai speed in ka duk phei zur zur a.
Ka room ah thuin Meizial ka pak khu laih laih a, ka dawhkan ah chuan Zu lem khat vel lek glass no, cigaret bawm, lighter leh Automatic pistol tharlam tak a inchhawp rap a. Silai hi tun maia ka lei a ni a, ka hman zawh velleh paih bo nghal tur a ni, ka maimitchhing siar siar a, Banga sana intar second kal ri chek chek bak thawmdang a awmlo ka rilru ka siamfel vek hnuah chuan ka zin bag chu ak in bualin tukverh darthlalang lakthlak sa diam ah chuan ka chhuak ru ta zal zal a, Tui kakna pipe inkham thla zur mai vuan chung chuan ka tawlh thla zel a, Thawm ka chhuah emaw a nih vaih chuan ka chan a chau khawp ang, ka vanneih a siamin engmah harsatna thlenglo chuan lei ka thleng veta mai a, Zanlai dar 1 a riklohna minute 12 emaw lek a ni tawh, Kawngpui dung chu a reh tlawk tlawk kher mai, ke chuan ka kal zel a, Zodin cinema hall hlui bula Richarda motor ka hawh sak, number plate ka thlawsa diam bul chu karlo ah ka thleng ta vat a, Tichuan Health Minister Ziona bangla lam pan chuan ka thlan ta vang vang a.
Zing dar 3:30 a ni tawh awm e, Pu Ziona chuan hlau hmel takin min melh zuk zuk a, engkim ka hrilh fiah vek tawh a vangin a zam hle tih a hriat, a piah lawkah chuan a nupui leh an fapa te ber kum 4 mi emaw lek chu thlabar hmel takin an thu bawk a " Ka tel velo ka tih chu mawle, Hmara chuan a lo tive pawh a ni mai thei mahse engmah keichuan ka ti suallo" a ti khur dut dut a, " Engmah i hrelo tak tak a nih chuan i fapa hi i chan ngei ang, Mahse Engkim i hriat ang i puang a ni erawh chuan i tuar thung ang a, i fapa leh i nupui an him thung ang" ka ti ve ngal mai si a, a hmel a zam hmel ka hmuh atang chuan ka rindan chu a dik tih ka hre thei. " Enge i duh a, kan pa hian i pawi enge a sawi?" a nupui chuan aw khur dar dar chung chuan a ti a. " Hmmm, ka sawi leh ang, Kum 10 zet liamta a i pasal nau Hmara a leh i pasal Ziona hian India Police officer chhuanvawr ber Pu Davida an that a ni" ka ti leh chuar chuar a.
" Enge chumi chuan ka pasal nen inzawmna an neih ang? A ni zawng a nivelo ang, ka pu min chhuah hram rawh" tiin a nuipui chuan tahaw tuau chuan min ngen a. An mutna room hi sound proof an vuah avangin pawnlam thil engmah a hriat loh ang bawkin inchhunglam thawm pawh pawnlamin an hretheilo. Ka silai chu ka lek kang a, Silencer ka vuah sa vang tawh avang in a lang sei deuh dan mai bawk a, " Awle, ka thu ka kal tlangpui tawh ang, engmah i sawi duhloh avangin i fapa hi i hmu leh tawh ngailo ang" tiin ka load ri rap a....Naupang chaldarah chuan ka chuktuah ta vung a...." Engmah ka hrelo, tak zet" " One" " Sawi mai rawh, ka hrelo a tih chu" a nupui chuan a lo ti bawrh bawrh a, " Two" a reh vang vang a...." Three" tih rualin a fapa thutna thuthleng chu ka kap pawr chhawk a, an te nghal tuar a " awle...awle..ka sawi ang ka sawi dawn, ka sawi ang ka sawi ang" Pu Ziona chuan a rawn ti ta bawrh bawrh a. Naupang leh a nu chu an khur hlawk hlawk a..Video camera chu ka ti ngun a, "sawi nghal bawrh bawrh ang che" tiin ka hrilh nghal a...
" Burma a tangin Rs Nuaih 10 man zet mai silai kan tawlh chu Pu Davida khan a lo hre ru pek a, kan mi tirhte chu an man a, kan silai te nen lam an la veka. Keimahni min hre chuanglo bawk a tiin ka nau Hmara nen chuan huntha kan zawng reng a, boruak a daih deuh hnuah kan naute an man takchu midang ruaiin kan bail chhuah tir te te hnuah Manipur lam thleng thlengin hak kan zauh leh ta bawk a. Karloah kan sumdawnna chuan hlawkna min pe a, mite mak tihkhawpin kan kang chak a. Kei hetihlai hian MZP ah President ka ni nghe nghe.
Tichuan kan sumdawnna chu a huang kan zauh leh zel a, Silai mai duhtawklo in No.4 hial kan tawlh lut ta zel a, Keipawh ka sum neih hmang chuan Politics ah kan zuanglut ve a, a hminga MZP Gen.Hqtr President meuh lo nive chu Party hrang hrangin min hel lat lat reng a Mahse ka thianpa awmna sa tuna ka, party hi ka thlang ta zawk a. Thalai atanga bul tanin reipawh rialloah chuan Hqtr ah president ka ni chho ta vat a. Kan party tan sum ka thawh tawk tawk avangin Hotute mit ka tling viau a niang Candidate ah min dah ta reng a nih kha. Hetia ka in candidate dawn lai vel hian Manipur a kan thawn luh chu Pu Davida leh a hote bawk hian an zuk man leh hlauh pek a, chumi tum chuan campagin atan sum ka mamawh em em mai si a, chutianga Nuaih tam tham tak min dal saktu Pu Davida chu huat namenlo in ka haw ta hlur a. Ka hlauhthawn ruk ang ngeiin ka dinna bial ah chuan ka tling zo talo a.
Ka thinrim a ka rilru nat zia chu in hrethiam mai awm e. Kum 5 dang ngha a ngai leh tak avangin Pu Davida chu tihchhiat vek tuminbkan sumdawnna chu kan bei leh ta char char a, he kum 5 chhung hian Rs Nuaih 800 vel a ni hial ang kan la lut hman a. Ka nau nen Bawng tawlh angin kan lang a, Miin hlawk min tihpuiin kan vannei an tih zia an sawi chamchi a. Kan theihtawpa fimkhura kan in hriat laiin Pu Davida pawlte chuan kan Supply pakhat an man leh ta tlat mai. Hemi tum hi chu ka ngawi mai mai thei talo tawp a. Kan unau chuan hmalak dan tur kan duang ta a. Mahse kan che a fuh thei lawklo a, kan tlawlh kan tlawh ta mai a.
Inthlan a hnai leh ta a, keipawh ka lo vil ngun em em thin Champhai North ah ka ding ve lehta rup mai, hetah hian chetna kan tum em em a, kan vanduai vang nge ka hrelo campagin vawrtawp a thlen dawn tepah Kan thuruk chu Pu Davidan a hria tih kan hre ta tlat mai. Chu mai a nilo Pu Davida chuan keimah ngei min rawn bia a, A office ah leng turin min sawm a, a hma pawha lo inzui ve zauh zauh kan nih tawh avangin leng satliah ang lekin ka va kal ta a. Hemi tum hian Pu Davida chuan kan sumdawnna titawp tur in leh Candidate atanga in withdraw turin minlo ti ta tlat mai. Ka tih laklawh tawh thu ka sawi ngial pawn " Kan ramin nangni ang misual hi rorelna in ah thu ve turin a duhlo, ka sugest ang che i tilo a nih chuan ni 3 hnuah i nihna tak ka evidence neih nen ka puangzar vek ang." tiin min vo ta tlat mai.
Thinrim takin ka hawng a, ka nau champhai a awm ka ko thla nghal a, thilawmzia ka hrilh hnuah chuan Pu Davida chu dahthat hmak kan tum ta a, a mah thlak turin ka nau nuipui U kan hual sa nghal bawk a. Tichuan fimkhur leh thiam takin kan thil tum tihlawhtlin theih dan tur kan duang bek bek a, langlo taka dahthat dan tur kan ruahman a tlawlh zel avangin, Ka nau driver hmelhriat an inhnuai luahtu Sipai sniper hial ni tawh, a nu cancer zaina tura engpawh tih huama awm thu kan hria a. Chupa chu kan be ta ngei a. Mahse kan beisei aiin pawisa a lo phut sang a, kan inrem lawk theihloh hnuah kan in laitan a, Rs nuaih 10 pek kan intiam ta a. Chupa chuan kan target chu ka pawh chhawnlo in a thal ta tawp a. Tichuan inthlan chu sum tamtham tak nen tangkawpin chakna ka chang ve ta a ni..." tiin mittui tla purin a sawi a. A nupui chu a lo tap tlawk tlawk bawk a, aw tial ruan leh zawi deuh fiah tak si chuan " tenawmpa i vanlo tenawm tak em" a ti a. A fapa chu a kuah a, a inhnit hlawp hlawp a. Ka camera ka sengfel hnuah An 3 chuan muthilhna damdawi chak zet mai ka pe a, Minute 10 a liam leh meuh cbuan thlamuang takin ka chhuahsan ta a....
*******
Ka mu nileng thak a, zanriah ei hun dawn hnaiah chuan ka harh hlawl a, Ka lu a na ngut ngut a, tuisik ka lem pawp hnuah chaw ka chah a, Ka inbual harh a, tui ti zetin chaw ka ei mawlh mawlh a...Ka phone ka en a, Miss call 20 zet a lo awm hman a, tunge ni tehchek ni tiin ka en a, Meggy call vek a lo ni a...He nu zet hi chu ka ti sup a...Tv ka on a, Aizawl News ah chuan Breaking News ah nizan lam thil thleng kha an lo puang mek a, ka kiai suk a. " Ziona hian damdawi tawlh leh tualthat tura mi ruaiin Pu Davida a thah tir avangin an unauin case rip tak an awrh ngei a rinawm, hetih lai hian an party chuan candidate a nihna an hlih sak nghal bawk a ni. Kan thudawnna in a sawi danin he thil hi a nupui ngeiin FIR a thehluh vang niin an sawi chu hmaituam mi pakhatin video record a thawn atanga hria an nih zawk thu a sawi" tih te an tarlang a. Ka zanriah ei lai chu ka dah a...Ka phone chu hmetin Meggy ka be ta nghal a.
Thla 2 dawn ka awmta reng mai, Meggy nen chuan kan innel in kan inpawh sawt khawp mai, kan intawn hmasak ber nia a rilru ka lak tawh thu leh min duh ngawih ngawih thute min hrilh fo thin a, engtin mah ka chhang hauhlo nangin ka phulo takzet a, kei mi bawlhlawh tak mai chanchin hi hre chhuak ta se a rilru nautuk tur ka ngaihtuah ringawt pawn ka awm a nuamlo nghal hulh mai si a. Ka mang ang takzet tawh a ni. Zanriah vawi engemaw zat kan kil dun tawh a, Inkhel kan en dun a, Kan bazar dun a, kan inzui deuh chawt a ni ber, kan hmel lah chu a in upat hleih bakah hmelah pawh ka phulo hle tih ka hria..Mahse a mah zawk chuan min zem a zo niberin ka hria..Vawi tam tak huntha ka hmu thin a, Pasal atana min duh ziate a sawi sarh sarh zel a. Neih tlak ka nihloh ziate kei thing lubul ang maia bul chhung lehkhat belh tur pawh neilo belh tlak ka nihloh ziate ka hrilh ve thin a, chutiang ka nih vang tak chuan min duh sauh zawk thu a la sawi ta zel thin a. A beidawng duh hauh thinlo.
Ka hawn hun a thleng dawn ta reng mai, ka hawn hma zan chu a birthday a ni chiah bawk a, engmah ka hrelo ah ngaiin ka chhuk hun tur ringawt a helh mai si a, a piancham a theihnghilh hmak tihna a ni ber. Keiin engvangin nge kha mi ni kha ka theihnghilh theih tehlul ang. Zanriah eipui turin ka sawm a, Tlailam dar 6:30 ah Jimmy's Cafe ah inhmu turin kan intiam a. Chhun lamah ka order sa thlap avangin suit nalh zet maiin ka inthuam a, ka sam uluk takin ka khuih a, ka inchei ngailoh viau nen chumi zan kher kher chu ka inchei nalh ve hle niin ka hria. Lift atanga ka chhuak chu Hotel Waitress Nutei leh Ajeny te chuan min nuih ver ver chungin minlo en dauh dauh a " Pa Duh i nalh tawp, i chhelo, in inhmeh khwp ang" tiin minlo fiam hlut a, Central india lam mikhual thleng hmeichhe thenkhat pawn minlo melh hrek hrek a.
Jimmys cafe ka thlen chuan kawtah motor a lo ding khap a, He Cafe hi Dawrpui phei Mana International awmna thin building ah khan a awm a, Khawpui nula leh tlangval indate na hmun lar ber leh hman uar ber, thianghlim tak mai a enkawl, fai vuk reng mai a ni. He cafe nawmna em em hi chu a boruak awmdan mil zelin cafe a lengte chu an inohurpui in an tang ho tlangpui thin. Inpawh takin an awm ho a ni ber. House band party The Jam's an tih an nei bawk a, cool zetin instrumental leh love song an lo sa in an lo play riai riai reng thin bawk a. Engemaw surprise thlen duhtan biaklawk a hauhlawk a nih chuan he cafe a chawl zawng zawngte hriat ruk tir vek an ni thin.
" Table 12 na " tiin ka card ka hmuh zauh a, " kapu nula Meggy inti in a nghak reng tawh che" a lo ti a. Tips ka pe zauh a, dawhkan awl bar a awm tawhlo tumah an inuksak hlawm lemlo. Kan thutna tura ka hauh lawk chu tukver bul a awm van thiangkuk mai lan theihna lai a ni a, Meggy chu min hnungchhawn zawngin a lo thu reng tawh a. A sam nithlar zawnga en a senuk anga lang lek lek, uluk taka cheibawl chuan a hnung lam atang pawn a nalh zia a tilang nghal reng tawh a. Kawrsen lar duk lek lek rose senduk aia eng deuh si dar bah ringawt a ha a, a nghawng hnunglam a sam zialin a khuh phak loh a lang chin chu chhumloa ei tlak a ni ber mai, a var no chek mai a. " i va hma aawm ve, ka lo thleng ve chiah a sin" tiin ka bia a, a kal hma bik vakloh thu te a sawi a, tichuan Jimmy's Cafe chhung eng dul deuh ruih mai hnuaiah music ri riai riai ngaithla chung chuan dinner kan ei dun ta melh melh a..Ka hmazawn ah chiah a thut avangin a hmel fai leh hnarngul nalh zet mai chu ka en leh ralh ralh thin. Kan duhtawk kan ei hnuah chuan wiater ka hui zauh a, " La Valentina Spelt" tiin ka lo hrilh a, rang takin bar ami chu a rawn la vat a, kan bulah chuan kan mamawh a pianga min thlit sak turin "La Valentina Spelt' Italy ram wine siam zinga tui ber pawl keng chung chuan a ding nghal zan bawk a.
" awle zanin a mikhual lo kal zahawm tak tak te u, in vaiin chibai ka buk a che u" tiin Stage a zai thin chuan a rawn ti a, Ri deuh mar mar pawh a rehnghal duak a. " Zanin hi Kum 12 liamta khan mipakhat chuan hrehawm tak leh nun ngui takin a hmang a, a tan kha hun baka hrehawm a awm leh ngai tawhlo mai thei, chu hun chu a tan hun pawimawh leh hun hrehawm tak a nih a ngai ta si a, Darkar tlemte hmalam a hlim em em a awm kha, darkar a liam leh meuh chuan khawvela hmeichhe naupang khawngaih thlak ber a lo nileh ta si. Zanin hi khami hun ang chiah kha a lo ni lehta reng mai, Meggy Table 12 na kher hauhsak a, a birthday lawmsaktu kan thianpa Mr.Duha bula thu Meggy piacham phak a ni a, chuvangin he zan special tak hlim takin kan hmang dawn nia, Happy Birthday Meggy" tiin a rawn puang a, Meggy chu ka va melh a, a mittui a lo tling pam a, a hnar a vang hek hek a, a nui a, a tap tel bawk a ni ber, Cafe chhunga awm zawng zawng chuan kut an beng dar dar a. A rualin Happy Birthday,to you" tih hla chu an sa dual dual a.
Meggy hmel pawh a danglam hret hret a, a nui ta sen sen a, hla kan sak mek lai chuan Waiter pakhat hian cake niawm tak thlengkum a khuh chu a rawn chawi phei la la a, kan sak zawh rual chuan kan dawhkan ah chuan a rawn hung a " Miss i hawng thei e" a ti sap a " Enge?" a ti tuar a, a nui nghal hawk hawk bawk a " En rawh i ta a nih kha" tiin ka lo be sap a, kut khur dar dar chuan a hawng ta dek dek a, a khuhna thleng a chawikan meuh chuan a chhunga thil awm chu a hmuh theih ta a. A chhungah chuan Swiss siam Gucci hmeichhe sana gold a laminated vek manto hmel tak chu a lo let ngat a, plate chhin chu a dah rawk a, min rawn kuah nghal chuk chuk a " ka lawm lutuk, ka lawm takzet a ni" tiin min hrilh mawlh mawlh a, chang lo tum raih raih tawk an awm bawk a, kut an beng dar dar bawk a. Chutah music a rawn ri riai riai a " Engmah rengin min then lawng " tih hla chu mawi leh nalh em em in a rawn sa ta hlerh hler a...Min en kar a, a kut seisal nalh zet ah chuan dawm sakin sana chu ka bun tir ta a...a hmui a phun sep a " i love you" a ti sap a.
Airport ka lut tawh a, Ka flight hun tur chu minute 5 in a la rilo, ka phone ka switch off avangin engmah ri ka la dawnglo...Ka mithla ah chuan Nizan a thil thleng chu a cham reng a, Meggy vun nalh leh mam han mai te, a nui hmel mawi tak mai te, a thawk lum ham ham te, a inpet fan fan hmelte, engkim mai chu ka hmu let leh uaih uaih a ni ber, ka taksa ah chuan a rintui tak chu a bet tlat niin ka hria, ka hnar ka len deuh zauh zauh reng a, Ka tih ngei a ngai a ni, ka kalsanlo a nih chuan hriatchhuah hun a la awm ngei dawn si a, chumi hun a thlen vaih chuan kan kehdarh vek dawn tih ka hre chiang ropui si. " Min kalsan talh i tum chhan hi ka hre duh takzet a ni, Kawplai nei i lo nireng em ni zawk, engmah chian hauh silo chein ka inpumpek a ni a, hmeicbhe mak tak zawng ka nih hi" a tih sep sep lai te ka hre uarh uarh a. " Meggy i tan ka rem velo a ni e, khawvela nun ngui taka hman tira tah tirtu che ka ni si a, i laka ta bikbo na ka zawn mai a ngai tasi a nih hi, Lenlai a ruallo a pawi ngei mai, chuai mah chuan kan dinhmun inanglo lutuk hi pawi ka tizual zawk mah awm e" tiin ka rilru chu ka kawm mawlh mawlh a, ka sana ah kan chhuah huntur a kawk chiah a, ka bag ka khai a, Thlawhna chhunglam ka pan ta hnak hnak a.
Chhun dar 12 a rik meuh chuan Mumbai a ka flat ah ngei mai lunch ka ei mawlh mawlh a, Banga sanapui intar chu ka thlek zawk a, Zing dar 10 ah ka thlenna hotel ah kalin a tana ka dah Voice recorder leh Envelope a ngaihdam ka dilna card a hmu tawh ngei ang a. Nizan lama kan 2 a kan lak dun a mah zawk ka pawhthlak a ka kawl tak daih lehlam keimah chauh lang pawh a hmu tel ngei ang...Tichuan engkim a hre chhuak tawh ang a, engkim mai chu a thin tirima tilawmlotu a ni tawh ngei ang. Ka lunch eizawh hnua ka chawchhumtu Pu Ganesha sim card thar min leisak chu ka phone ah ka vuah nap nap a. " Hello Richard tukin zing khan ka chhuak a, hei ka flatah ka awm leh tawh e" tiin msg ka type a, Khawlai a motor tlan zut zut lang ut mai ka tukverh ah chuan ka ding a...Ka voice record pek chuan eng hna nge a thawh angle...? tiin ka ngaihtuah niap niap a, ka paijama kekawr ipte chu ka zen a, Meggy nui sang lai hmel ka hmu nghal a...ka bih reng lai chuan " ka pu Mail a raqn thleng e" tia Ganesha min kohna chuan ka suangtuahna khawvel ata min kaitho a, Ganesha Mail dawn percel uk khak mai a hma pawha ka lo dawn fo tawh thin ang chu la in ka room lamah ka luhpui ta zawk a...Percel chu ka hawng a, a chhungah chuan File cover pawl a lo awm a, ka phawrh chhuaka ka hawn hnuah Pa Pakhat hmuihmul buk zet mai vai kawr var ha chal hnawih sen nuau mai thlalak a lo awm a, a hnuaia envelope a lehkha chu ka phawrh a...
Name : Sanjay Kapoor. Owner Ranbir Garment Pvt Ltd.
Target : A ...
Tih a lo awm a, a address leh a mah thah a nih theihna tur chhan point 20 chuang zet a inziak thla put a...Ka thil en chu dawhkan ah ka dah thlawp a...Ka khum tlangah chuan thuin ka lu ka kun ngaih a, " A hmu tawh ngei ang" Ka ti sap a. Ka voice record chu ka ngaihtuah chhuak zawk a..
" I bula ka hun hman takte khan nangmah a ka inthiamlohna namen lovin min siamsak thin a, ka lan dan ang ngawt hi ka nih dan a ni hauh silo, kei min duhder ve tu ka hmuh awmchhun i nih ringawt pawh ka tan chuan ka rilru nat luat vanga ka beidawn rum rum hun a thlen huna min tiharh thar leha chakna min siam lehtu a nih ngei ka ring tlat a ni...Ka nihna ang takin min pawm thei nila ka khawvel nun nawm dan tur hi ka suangtuah phaklo a ni ber. Engpawh nise kei mi chhungkua tah tir a, khawhar taka siam thin hi nang nen a inkawp turin ka zahawmna hian a tlin nanglo a ni..
Kalsanlo tura min sawm lai khan i hmela vantrihkoh hmel ka hmuh tel tlat thin khan nangmah ka zahna che a ti zual em em zawk si a.,i mj ngenna ang chu ti hlawhtling ta pawh ni i la, khumlai zawla damchhung hun kan hmang dun reng thei dawn silo. Engkim mai i hriat hunah i rilru na tur ka dawn ngam hlawl lo a ni ber.
Hman zan a Pu Ziona inpuanna video kha ka tih a nih kha, Hmaituam an tih kha keimah ngei hi ka ni. Pu Hmara leh a thiante Police in an man chhan pawh kha keimah vang a ni bawk. Engvanga i birthday kha hre em em ka nih? I hrelo pawh a ni mai thei, Khami ni i pa i hmuhlai renga kah hlum a nih lai khan kei hi a fawng vuantu niin ka thlir reng,che u a sin...Khami ni Thlawhna a kan chuan ho hnua Lengpui kawnga kan haw khan kami fanu kha i ni,tih ka hreve chauh a ni.
Min hua la min ngei la, anchhia min hlawh mahla keichuan i laka ka pawikhawih avangin engmah ka sawi sel miahlo ang. I tan chuan kei hi hmella lian ber ka ni si a. Khatih hunlaia ka retheih em avanga khaw eng hmulo khawpa ka awm thei kha tun hnuah hian mak ka ti thin. Ka nu damlo enkawlna tur senso nei theilo khawpa ka awm avangin duhthlang theilo khawpin ka awm si a. I tan hmelma ah ma insiam ta mai chauh a ni. Ka tawng leh che hi Pathianin ka dilna tlawm tak min pek awmchhun niin ka hria. I laka ka inpuan theih phah tak avangin ka thinlung a hmun luah a min kam tlattu lak kianin a awm ta huai a nih hi. Engpawh nise ka pawikhawi avang khan min ngaidam theilo a nih pawn hei chauh hi ka ngen ve duh che Ka hmangaihna che hi dawt leh thu lawilo a nilo tih hi min hriatsak ve hram dawn nia.."
Ka khum tlangah chuan ka thu a, Banga ka nu thlalak ka tar chu ka en vang vang a...." Ka Nu i fapa hian ka va tizak dawn tak che em" ka ti sup a...Mumbai khawlum uap churh hnuaih ah chuan Meggy hlim taka nui lai hmel leh a heh sen vam ham mai au deuh pham chunga min melh kar lai leh a bula a pa an bawihsawm lai mak tihmel zeta a thir renglai chu ka hmu uaih uaih a..Ka tho lawk a, Ka dawhkan pawhdawh chu ka hawng a, Automatic Pistol .45 tle hlarh mai chu ka la chhuak a. Ka Kekawr kawng hnung lamah ka zep a, Ka room atang chuan ka chuak a, " Ganesh naktukah ka rawn ang" tiin ka chhuak hnghal a...Ganesha mak tihmel zet a min entu ngaihsak hauhlo chuan ka kal ta vang vang a....
FINS....
( Hming, nihna leh thil engkim tiamin ka zeldin thu mai mai ka rawn chhawp chhuak a ni e, tuman thutak khuk a khuk pui hluai loh turin ke ngen a che u...)



Link:
BBcode:
HTML:
Hide post links
Show post links

nutei
Posts: 2
Joined: May 9th, 2016, 9:08 pm

Unread post by nutei » May 29th, 2016, 2:06 pm

chhiar a manhla hle mai, a ngaihnawm thlawt

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)