THE SEPTEMBER END BY Tochhong Ruata

[Ngaia]

THE SEPTEMBER END - Tochhong Ruata

"Sawma, I pi leh Zampuii te Lunglei ah hruai a ngai dawn a, workshop ah motor va enfel tir lawk ta che, tichuan Chawhnu her lamah in chhuak mai dawn nia, Nangpawh i motor entir zaw hunah I rawn inthlak nghal dawn nia" tiin ka pu Office kal tura ka va sawm chuan a lo ti a. "Enge kan tih dawn? Kan awm rei a ngem?" tiin phurlo zet chuan ka chhang a. A tarmit chung atanga min chhoh melh kur pah chuan " i va phur awmlo ve?, zan 2 bak in riaklo ang, Inneih in hmang dawn a, Inkhawmte i ngai ve dawn si a, Thuamhnaw nalh ve deuh Inkhawmna a hak zahpuiawmlo te keng tel ve ta che" nui suk chung chuan min ti a. "a! huphurh hranlo e. Mahse." "Hlauthawng suh, Mimi-i bulah chuan ka lo phat sak mai dawn che nia" tia nui tuh tuh chung chuan a thutna atang chuan a tho a, an room lamah min luhsan ta daih a.

Ka motor entir zawh hnuah ka inthlakna tur tlem ka zinbag ah ka hnawh tawm ve luklak a, Kan pute in lam panin ka tlanphei leh ta a. Kal kawngah chuan Mimi-in lungawilo hmel taka min biak dante ngaihtuah zui pahin Lunglei kal ka phurloh chhan te ka ngaihtuah chhuak uaih uaih a. Kha nu phiangsen kha ka hmu ang tih mawlh ka hlau. Amah vang khan engkim ka chan a, Officer nih ka tum ve em avanga ka zirna Politechnic ah pawh ka zawh tak loh phah a, Ka eizawnna tlawm tak hi ka tih a ngai phah zui bawk nen, ka haw rilru viau. Mahse, Kha nu tluka duh leh hmangaih tun thleng pawn ka la nei leh ta reng reng lo...Kan kalna turte nen hian an inhmelhriat emaw, an pa te chhung leh lamhnai emaw an lo nih vaih chuan ka che a fuh viaulo maithei...Chutiang em thlenglo tur leh Kha nu kha a hmel hmulo hram tura rilru tawngtaina hial ka hmang ta a nih hi.

Haulawng kan tleng a, Kawn ah kan tlan lai chuan Motor ke a thep sut a, ka ding vat a, kan Bolero ke hnung lam chu driver side lo lam a lo per bui mai a. Ka pi chu a rawn chhuk ve vat a "Masawm, A ke a chhia elo, avan zialo ve? a spare i keng ang chu maw?" tiin a muthluk a vanga a sam thur bam mai leh hmel phak chuap mai chuan ka bula rawnkalh pahin a rawn ti a..A spare ka pai thu te, thlak a harsat ka rinloh thute ka hrilh hnuah an nufa chuan Thingpui dawr pakhatah an lo va chawl hahdam ta zawk a. Relote ah ka inpeih leh ta mai a, Kan chhuah tlai avangin kan thim lut dawn chiang mai si a, Hmanhmawh rilru tak chuan Haulawng chhuahsanin kan tlan leh ta vang vang a. Lunglei kan hnaih tial tial a, ka huphurh tial tial. Ka tum deuh hmuk reng avang chuan Zampuii chuan nidang anglo takin min titi pui lemlo, year phone a vuah a, ngawi rengin zai a ngaithla mai mai a. Ka bula thu Pi ber pah chu a harh hlekin kuhva a hmawm a, a kuhva thial zawh hnuah a kun lup lup a, a muthlu leh nge nge thin bawk nen khua ahar lehling zawk mah a. Tlai nitla tur kawl mawng eng sen phut mai chuan min ti khawhar zual hle bawk nen. Kha nu ka hmangaih em em thin, ka duh hlum loh chauh, awmna khua Lunglei kal ka phurlohna a tizual zel a ni ber, kan hun liamtawh ka thlir kir a, ka tawt up up reng mai a, chhuanlam siamlo a ka kal ta chu ka inchhir tial tial bawk.

Lunglei kan thlen chuan Khua athim tawh a, chawhmeh neih vang a chaw ei tlai ni chuanglo a, Chet muan ve vang hrim hrima chaw ei tlai ve ngawt chhungkua te tihloh chuan zanriah an kil vek tawh ang tih hun velah kan lut a, Engkim mai chuan ka lung min len a, Kan sul i hnu nunhlui a lang tel uar uar vek mai bawk si a, Ka tawp up up mai chu tuman min thiamlo thei ngawt lo ang...I tawn nivese a ka tawn ang hi i tawn a nive tho ngei ang le. Chanmary lam pan chuan kan tlan ta zel a. Kan kalna chhan ber, ka pi Laizawnnu fapa duat Doctor Saingura Sailo te in kawt chu kan thleng ta reng mai a. Kan thawm hria in an rawn chhuak sap sap a. Kan ri ta chelchul a. Zanriah eikham ah ka tel vena tur thil a awm ve loh avangin an inhnuai ber ka riahna tura an tih lam chu ka pan a, Ka inbual fai hnuah Ka Bial nu ve deuhroh Mimi-i chu ka phone ta nghal a. Kum engemaw zah inhmutawhlo ang maiin titi tur a lo ngah hman a. Vawiin chhuna ka zin tur ka hrilh tuma a tihtauh nasa vei nen, tunah zet zawng a hapui phawisak pawh ni i la, atawng barh barh reng tho ang tih awm tur vel a ni leh ta si. He nau hi zawng ka tan a special ve riau a ni, Kei zu in ve vak vak Department Pakhat Officer hotupa, a thawhna a anpu nibawk Driver ve mai mai hetia min duh der ve thei chu amak in a ropui ve riau a ni...Phone sa vur a kan inbiak hnuah ka zin chau deuh bawk a, Kan inbiakna titawpin Light ka off a tui zetin ka muhil ta suk suk a.

Tualzawl lamah thawm a that vei nen ka riahna chu a biru tha bawk a tui takin ka la mu sek sek a, " U Sawm, U Sawm, i la tho nange?, Motor sil kan ngaih kha" Zampuii aw ngaihnobei zet mai chuan a rawn ti a...Ka tho tuih tuih a, ka payjama chu ka inthawlh thawt a, kawngka kava hawn sak nghal a. A lo nui ver ver a, " kan motor abal bik lutuk ang" a lo ti ringawt a, "Thingpui minlo siam sak la, Ka rawn in dawn nia." tiin ka chhang a, "Rei suh aw..." tih pahin stepah chuan a kal chho tak tak a...A mawngbawr vawng laih mai leh a mal mum zuih zaih mai, Kekawrbul in a khuhloh chin pawh Maipawl chhung ang maia var, pianfuh zet chu chilthli tlalo chauhin ka thlir zui vung vung a..."He naupang hian min rawn kaitho fo maise ka mualpho fo ang mawle" ka ti rilru hman a, Mahse Mimi-in ka rilru hi hriase min melh dantur ka hrechhuak zawk a, Nui suk chungin bualin ah ha ka nawt ri ta suah suah a...Kum 18 nula tituai pu tan mek tawh a ni...A pasal tur chu mi vanneih tak an va nidawn chiang tak em. Vantirhkoh bula zantin han mut mai chu a nuam dawn em a ni.

Inkhawm turin ka neih ang tawk a nalh leh mawi chuan ka induang ve uih a, High School kan kal laia ka necktie awrh bak necktie hrim hrim ka nghawngah a la insuih bet lehtangailo..Mahse, Zampuii tih tlat vang leh Mimiin " i thing bik lutuk ang" tia min nawr luih tlat avanga necktie ka awrh ve chuan minti confi lo zo vek thung...Zampuii chuan minlo en dauh dauh a, a kutzungpui a chhawng zauh a " I nalh tawp" a lo ti a, a ha var rual that mai chuan min thlem tlu leh ruai ruai a ni ber, Davida kha ka thiamlo hran miahlo, Zampuii thuamhnaw inbel chung pawh hetiang khawpa kan melh tai a nih ngai chuan nutling pian mam pul mai inbual kung kung hmuh meuh chuan Mipa tan insum a harsa dawn em a sin..." Min bawl suh" tiin kan motor dahna lam ka pan nghal a...Ka hnungah rawn kal dat dat in "U Sawm ka rinaiin inchei i inhmeh daih" a rawn ti hram a..." Hets....khawnge i nu?" kan ti zui zat a...Nui hak hak pah chuan Akimi nen kan rawn chuang dawn, ka Nutei nen an motorah an kal dun dawn a.." a ti siam siam a..Akimi a rawn luh ve takah chuan Biak In lam pan chuan kan tlan ta nghal a...

"Sawma, Masawm...lok...hei Camera hi keng teh, Thlalak a hmu ve duh ang i pu in" tiin ka pi chuan a bag atang chuan Nikkon SLR dum a rawn lek chhuak a. E khai! Nula bulah ka thu dawn emaw ka ti ngawt a, Mi zawng zawng mit hmuhin ka necktie awrh hne zia ka tilang dawn lek a ni zawk a maw.. ka van phurlo. mahse Phurlo anga lan a rem teh teuh silo a. Ka ban du du a. "a theih anga tam kha hmet ang che, Aizawl tlangval luck mipui hmaah zah miahloh tur" nui suk pah chuan a ti a, Ka nui ve tawp a...Ka Pi leh Pu leh an fate ho hian Driver satliah angin min enlo, an chhungkaw zinga pakhat nive ang maiin min en thin a, nuam pawh ka ti a, An harsatna siam sak emaw, an lung tihawiloh emaw ka hreh hlur mai a ni. Min dawr mihrang viau se zawng ka en mihrang ve viau ngei ang, Mahse a ni ngawt silo a lawm le.

Biak In chhungah chuan kan thu thap tawh a, Dr.Sailoa pawh a thu nui deuh suih reng a, Keipawh Kum 34 zet ka ni tawh a, Senior ka intih ve tehlul nen Mo neitupa hi ka u rual a la nizui a, Nupui neih chak ve tawh tak a nih bawk avangin a hlim viau pawh chu ka hrethiam ru viau tho mai..Keipawn ka chak ve tawh tho a ni si a..Mahse ka hmuzolo pawh nilo in Nupui nei tur khawpin ka la fit tawklo niin ka inhre bawk si a, ka hawi ve lawl lawl rih a nih hi maw, Zanin zawng min lawn san khalh dawnta a nih hi...Pavalai tlar lamah Kan thu a, Kawngkapui bula maiah ka thu a, Mo a rawn thleng a ni chek a niang mipui an ding sung sung a, Ka camera chu ka on sawk sawk a, Mo biak in chhunga a pa in a rawn kai lut dalh dalh mai, hlim hmel zeta rawn kal chu thlalak sak ve ngei tum chuan ka thutna atang chuan ka ding a. Kan ep chiah a thu Zampuii chuan min lo melh reng chu niin ka nuih seih a. Kawngka lam chu ka hawi ve ta a. Chhe hei! Engthil nge nita ngai le....

Ka camera ka lek kang zo ta hauhlo mai, ka ang phuau a, ka ding khawng ut bawk a, ka thutna hmalam a thute lu in min hliah hlauh avangin tuman chiang takin min hmulo ang, Zampuii tih loh chuan tuman min notice lo bawk a. Khatih laia ka awmdan kha Milem chhe zeta ker ka ang ber in la ring. Ka thil tum chu ka thulh ta ngawt a, Mo leh a pa chu an rawn hnai zel a, Mo chuan hmalam a en ngar mai a, a hmelah chuan helh nei niawm tak hmel a pu leh nghal. A hnar ngul, a khabe, a hmel hmai engkim mai chu a fuh dan ngai rengin a fuh, A lang upa ve deuh tawh tih mai loh chu, A mitmeng fiah kuk mai chuan mi a hneh theih dan a la ngai reng a, Ka thinlung a hmutlang vek thei niawm mai a ka hriat thin dan chiah kha a la ni a. An thutna hmun an thleng a, Inneih tirtu tur Pastorin thu tura a tih hnuah midang zawng an thut hnuah pawh ka la ding reng a. Mak tihmel takin ka la ka hau mai bawk a....Mi an thum deuh hak ri ka hriat chuan ka harh zawk a, Ka thutna ah chuan rang takin ka thu vat a...Ka taksa chu a lum pup pup a, thlanfim a tla bawrh bawrh a, ka khawhmuh a fiahlo zo vek a ni ber. Ka tho lawk a, Pawnah ka chhuak ta vat a. Mi awmlohna lam Zunin awmna lam chu chak takin ka pan nghal vat a..

"Rosalyni chuan Pasal a nei dawn an tih ka hria, tinge in inngaizawng tawhlo em ni?" Lalengin min hrilh kha a ni si a, tunah tinge pasal nei tura hetia a rawn lan leh tak thut si. " I tan ka tling zo nganglo a, i lakah ka rinawm zo ta ngang bawk silo a, i kawppui nitur atan ka tling talo a nih hi" tia e-mail min rawn thawntu kha amah ngei hi a ni lawm ni...? Khawnge a fate? Nge fa nei hmanlo in keima laka a rinawm loh ang bawkin a pasal laka a rinawm zo ta lo zawk? A bum ve em ni ang? Ka thin ava rim tak em. Engtia han tih dan ka hre silo. Ka insawh ka insawh a ni ber. Enge thil awmzia ni a. Lunglei kal ka hreh chhan ber chu Rosalyni leh a fate inkai lai emaw, a pasal nen motora an chuang dunlai emaw, an dawr lianpui ah thuin Mutria te a kawk kual zung zung lai hmuh emaw ka hlauh em em kha, tunah kan kal chhan ber kan thlenin te chhungkaw member ni tura Biak In chhungah Pastor hma ngeiah lawmluh a ni ta si a. A va mak em em ve.

"Ka Pu ihhh.. ka pi khan an tan dawn, lo chho vat rawh se a ti a nia" tia mipa naupang fel tawh takin min rawn biak takah chuan ka harh zawk a, Ka hmel chu darthlalangah chuan ka en thuak a, Ka kut bal hleilo chu kut silna tura an siamah chuan ka sil ve ngawt a. Phurlo leh ta za lo zetin Biak In lam ah chuan ka chho leh ta vat a. Min hmu ngei ngei dawn a, Mak a ti ve khawp ang, “Enge ka dik loh a nilo a, amah zawk a diklo hmasa a, Eng vanga keiin ka zah vena ngawt tur a awm hlei nem, Mipa ka ni a, a thiam zawk pawh ka ni, Hetiang hmeichhia mi bum hmang mai mai lakah ka zam hauh tur a ni lo" ti rilru sauh sauh chungin Biak In ah chuan ka thu lut tha leh a, Pastor chuan In neih tir tura chhiar tur pawimawh Bible chang a lo chhiar mek a, Ka thutna atang chuan kan hmet de ve chuai chuai ngawt a. A din tir a, Pan hnai a ngai ta le. Midang thlalatu te pawn an pan hnai vek si a, Pan lo tu nih bik zawng a chi loh ve thei tlat. Ka phei ve zel a, Maicham awmna bula mipakhat thlalatu lo ding bulah chuan ka va ding ve a, ka camera chu ka tin vang vang a. Mo chuan min rawn melh zauh in ka hria, a meng phawk a, hawi sawn meuhin min rawn en a. A hmelah chuan thinurna leh mak tihna a khat niberin ka hria. Ka intipa laklawh ve tawh a, Hrelo ang hmaka awm derin ka hmet de zuaih zuaih reng a. Mo leh Mo neitu nu leh pa te thla pawh ka hmet de zuai zuai. "Mami nen hian thianghlim takin inkawp tlat ula, Nupa hlim tak in la ni mai ang, Kan fa neih chhun a ni a, kan duat ve viau a nia, kan in leh lo engkim mai hi ama ta vek tur ala ni dawn a, Kan bulah in awm mai pawh a ngai mai thei, fapa ang takin kan en dawn che nia" tia min thut chilha min titi pui siam siam tu te nupa pawh chuan mak tihna mitmengin min melh a ni ber. An fanu rinawmloh zia an hriatpui vek si a, mak tia keimah min thiamlo hmel ang taka an lang vel chu ka eilo ve khawp mai. Ka duhtawk ka hmet a, a zualpui a zawh hnuah ka thutna lam panin ka kal leh ta nal nal a. Zampuii chuan chik em em in min lo la en kar reng a, ka lai zawk lek lek a, Ka nuih sak a, a lo nui ve mai bawk a. Mahse a hmel a dik zanlo tih ka hre thei. Engvanga saw tiang a min en reng nge a nih le.

Inkhawm banah thla kan lak sak zuaih zuaih reng a, Rosalyni pawh a hmel a danglam tawh, kan inhmuh phut lai aiin a pangngai tawh zawk a, Nuam tihmel takin ka hmet de zuai zuai reng a. a hmuh theih tur chiah chiah ah Zampuii bulah ka va ding vel thul, a rawn melh zauh thin tih pawh ka hria. Ka rilru nat zia kha hre ve se min lainat ang nge min diriam ve ang, keimah ang hian min diriam ngei ang le. A zual pui Biak In programme an hman hnuah Kohhran Hall ah Mo lawmna hun an hman leh dawn avangin ka Pi hnenah ka haw duh thu leh Chabi chu Zampuii kutah ka dah mai tur leh aman rawn khalh haw mai tura hrilh chungin hawn ka dil a, a lo phal ve mai bawk a. tichuan Chanmari Biak In ropui zet atang chuan chhuakin Kawngpui a motor lo vei sup sup sirah chuan kal zelin Zebra crossing bulah ka ding ta ran a. Ka nghawngawrh chu hnawk ka ti leh zual tawh a. Ka pawt dul nawk nawk a, kal lama Tlangval lian thelh thawlh leh smart taka inthuam kha ka ni leh ta hauhlo a. In ka thlen lai ka hrelo, Ka mutna room chu a lo inhawlhkalh a, kawngka hawngin ka thuamhnaw pawh hlip chuanglo chuan khumah chuan ka mu zal ar ar a, Kha Rosalyin i nen kan inngaihzawnlai chu ka ngaihtuah let ta neuh neuh a...Ka thinrimna leh mak ka tihna chuan min kuai her sawk sawk niberin ka hria.

Ka lo chhing sek emaw ka ti a, Khua a lo thim deuh khup tawh a. ka tho a, September Ni 30 a nih tawh vangin Lunglei boruak chu a ni deuh vur tawh avangin ka thuahnaw thlak in, lum lutuk lemlo chuan ka inthlak a. Ka inphih harh hnuah inchung lamah chaw ei ve tumin ka chho a, Mi an lo la awm nual a, an lo hlimin thawm pawh a tha ham ham hle mai, Mo leh Mo neitu hmel ka hmu mailo, ka en kual hrek hrek a, hmuh chak si, hmuh hreh bawk si chuan ka awm a. Fatu te an fel a, ka eitur min siamsak a thuai a, ka eitui hauhlo mai. ka kham vat a, Kuhva lei turin ka chhuak ta daih a.

Gate ka chhuak tur chiah chu an rawn inzui dal dal a, an hmelah chuan an hlim hmel hle mai, Kan intawh a ngai ngei dawn si a, han kir leh ngawt dawnin min hmu hman tawh bawk si a, Phurlo zet chuan ka kal ve ta zel a. "Mam, hei hi Masawma a nih hi, ka nu u Aizawl ami te driver a nih hi, an fapa ang maiin an en a, an duat khawp a nia" tiin Dr.Sailoa chuan min hmelhriat tir a. Kan kut a insik rual chuan ka tek deuh chhuai ni maiin ka hria. Min melh kal a, A tak ngal mai bawk a, Kei pawn ka melh ve kal mai bawk a "Ka hria a lawm, amah hian min hre duhlo a niang, Poly ah a rawn awm ve reng tawh a lawm" tiin min nuih elsen ang deuh a nui chung chuan a ti ngat a. "I va zaklo tak em! nangmah kha a nih kha min hre duhlo der tu zawk chu" tia vin nek ka chak viau nangin ka insum thei hram a "Ka hria che a lawm" ka ti thawp sup a.. Engemaw an sawi a, an kal kiang leh nghal a, ka dinna ngaiah ka ding reng a, a kut ka dawmna chu ka kut za deuh mem mem in ka hria. A rawn lehhawi a, ka lo en reng avang chuan a hawi sawn leh vat a. "Nia... Nuam i tihna a nih phawt chuan pasal chu nei hmiah hmiah mai ta che" ka ti sap a. Kuhva dawr lam pan chuan ka kal ta zel a.

Inchhung lamah mi an zi nak nak a, Kei chu Zampuii leh a thiante ho inkawmkhawm ngaithla in ka thu vel mai mai a. Ka rilru a bet hlawl lo. He nu hi ka lo la duh hle a lo nih hi. vawiin ni ka lo tel ve kher kher chu pawi ka ti kher mai. Pawn ah an rawn thu chhuak ve a, kan awmna piah lamah thuin Min rawn melh leh zauh zauh thin a, Chutiang chuan kan in hmu leh hlawl thin. Nakinah chuan ka awmna lam panin a rawn kal ta nge nge a. Ka lo en reng a, a thiante chuan ngaihsak pawh an ngaihsak lemlo. Ka bulah chuan rawn thu in "Ka nu be rawh" a rawn ti teh tawl a. "Engvang chuan maw?" ka ti let ve hmuk a "Hei hi a number" tih pahin ka kutah lehkhathem a rawn hmeh bel a, a tho a, a thiante bulah chuan a zuk thu leh ta daih a. Ka luhlul ka chhuah a, Ka be duhlo lui ngat a. A no chu ka byhearth hman tho avangin a hmuh lai ngei chuan an meilum ai ah chuan ka theh lut ta hmak a. Min haw hmel zetin min melh khai khai a. Saw tiang taka min melh sawn ka tuar thinlo a nih kha mawle. Ka tho a, Ka mutna lam panin ka kal ta daih a.

"Hello, Sawma ka nia, min be duh em ni?" tiin ka be deuh teh tawl a. "Nia, i dam thin maw?, eng i thawh tak zel a?" nem dam diai hian a rawn ti a, Hmm a ze ngai te te maw, He nu hi a bula awm a nuam a, Mi hneh theihna riau a nei a, a zaidam em em mai bawk a. Mahse, a fanu vang chuan ka lungawi theilo. "Ka tha a lawm, hei Mi chhiahhlawh ka ni ta vel mai mai a nih hi" ka ti let ve ngat a. "I fate an lian tawh bawk ang chu maw?" ka nuih a van za tak em! Dam dap si a chutia min rawn ti elhsen vel chu ka ngaitheilo kher mai "ah...chutiang engmah ka neilo, hmana Sawma ka nih dan ang tho kha ka la ni e" ka ti ve mai a. "Engmaw? nupui i la neilo nge in inthen leh tawh zawk?" "Nupui neih lam ka la ngaihtuah ngailo hrim hrim, Phatsan ka nih hnuah phei chuan ka neih duh pawh ka ring talo e" ka ti bul deuh hmak a "Engmaw? Phatsan i tia mi? Tunge phatsan che a?" Ka ngawi vang vang a, Lalengi hmel ka hmu uar uar a. "Pasal a nei dawn a sin" a ti lai hmelte a lo lang a, Engtia keimah zawk min puh daih nge maw an nih le? Ka sa up up a. "Kan hriat danah chuan Nupui i ruk thute, nau a pai vanga in ru in nih thute a sin, i la neilo tak tak maw?" a rawn ti leh a. Ka nui chhuak ta hawk hawk a "Chutiang chu ka nihdan a la ni ngailo hrim hrim, tinge keimah min hmehbel luih tlat le" ka ti leh mai a. "hmehbel a..? Enge thil awmzia hi ka van hrethiamlo nasa tak em?" a ti ta bai bai a. "Khatia Semester End kan hawn hnu khan Lalengin Pasal a neih tur thu leh an inruk thu min hrilh kha thil diklo em ni dawn? Tinge i hai der tlat le?" ka ti ta tawl mai a. "Ehe. Lalengin maw..? enteh sawmte, thil fello, thil hriatsual a awm niin ka hria, Hmaichhan ah inbiak a tul a nih chu, lo leng lawk ta che?" min ti ta mai, "eng maw? Thil hriatsual a..?" ka ti deuh hlur a " Aw... engkim ka hrilh ang che?" a ti a, phone a dah ta daih a. Ka thut dan ngaiin ka thu khawng reng a. Enge thil awmzia ni ang?, Keiin min phatsan ni ah ngaiin Lunglei lama let ka duh tawhlo a ni a, An niin ka phei duh tawh loh chhan chu Nupui ka neih vangah an lo ngai lek a ni si a. thil fello engemaw tak chu a awm a ni ngei ang le. Ka tho lawk a, ka inthuam lum deuh a, Motor chabi lachhuak in ka chhuak ve ta tawp a. Zampuii te thian ho lo thu bial laih chu bia in Ka thiante tlawh lawk ka ngaih thu leh ka rei dawn loh thu ka sawi a. Tichuan hmanhmawh takin Motor chuan ka tlanchhuak ta nal nal a.

Ramzotlang boruak dai raih mai chu ka thleng chho ta vat a, Engkim mai a la chiang em em vek mai si a, ka tlan zel a, an kawt ah an lo awm laih laih a, Motor ka ti ding a, ka,chhuak vat a, Kawngka ah Rosalyni nu lo chhuak chiah nen kan inhmu ta hlawl a "Mami room ah kal ang" a ti a, Ka zui ve mai bawk a, A room chu a awmna ngaiah a lo la awm a, a kawngka lu chungah "Ka tan engkim a nih avangin ka thu hmu hmasalo chuan lut lo hram ang che" tih chu a lo la intar kalh mai bawk a. room chhungah chuan kan lut a, a room awmdan chu a lo ti danglam tawh a, A lehkha zirna dawhkan chu tukverh bulah hung tawhlo in bang kil lam hawiin a hung tawh zawk a, A dawhkan chunga chhuarte ah chuan Thlalak frame thlap in a lo in hung far hlawm a. Lalengi leh keimah leh amah City park a kan lak ho chu lo nem len tirin "Ka thian ka ngaih em em te" tih a lo tar kalh mai bawk a. Lalengi hmel chu ka hmu peihlo tak zet a ni. Khum pawh a danglam tawh a, Steel almera leh chhuar dang engmah a awm tawhlo, a room ah chuan Pemanent in chhuar an lo siam tawh a. Engkim mai chuan lung a tileng em em vek mai a. Mahse a sawt tawh bawk silo.

"Hei hi chhiar la engkim a fiah kuarh mai ang, Inleng ka nei bawk si a, Ka chhuahsan leh rih ang che" tiin khumah Dairy kawm pawl chhah lel lawl tak mai bu 2 hi a rawn theh chhuak a. Ngawi rengin a chhuak zui nghal daih a. Khumah chuan ka thu a, dairy chu ka khal niap niap a, 2001 tih zawk chu keuin ka en ta nge nge a.
"Mipa rinawmna hi a der vek a lo nih hi, Lalengi thil sawi kha thu dik a nih si chuan kumin chu ka tan kum chhia a van ni dawn tak em!" tiin bul a intan a. ka chhiar zel a, Keimah min duh zia leh Nupui ka neih san vanga a thinrim ziate, A nu leh pa in Mizoram lama awmlo mai tura an hrilh thute, keimah min dem hauhlo thu leh Engvanga keimah min lo ring ve em em ngawt nge a nih thu te, Ama thiamloh a nih ziate a tarlang deuh ber. Mizoram a chhuahsan dawn a a lunglen ziate, Aizawl ah a rawn phei a, Ka hmel hmuh a chak ziate, Mahse min hmuh a hreh ziate a tarlang kur dep dup a...Delhi a awm thute ka laka a vui thute engkim a tarlang zel a. Doctor Sailoa nen a inchhar dante, Mahse a hnar zel dante ka laka a lunglen thu leh keimah vanga mipa a ring thei tawhlo a nih thute a tarlang zel a. Inseh ruh teuhin ka chhiar zel a. "A fapa chuan a van ang tak em, an nupa pawh an inhmeh hle mai" tiin Khami ni a Ka couin te nufa ka bazar pui ni khan minlo hmuh reng thu te a tarlang a. ngkim a kalsual vel vek a lo ni a. Ka thin a rim em em a, A dairy pahnih ka chhiar zo vek a, Phek tinah a ni hman dan tarlang chei chuai mahse ka hming lang silo in keimah min ngaih ziate, engkim keimah vanga hrehawm a tih thute, Mipa a rin tak tak ngam tawh loh thute, a tarlang chei chuai bawk a. Doctor Sailoa'n nupui atan a sawm thute, mahse a theih loh thu leh a hnar zel thute a tarlang bawk a. Dr.Sailoan a inpeih hun hun a nghah theih tur thute pawh a sawi zel a. Keimah ni zawk se a tih thu leh hetiang taka duhtu zawk hi keimah kha lo nizawk se a tih thute a tarlang bawk a. Ka engkim mai chu a vir but but a ni ber. Ka chhiar zo chu tukverhah kalin ka dak ta ngawt a. Mihring hi a van lo sual theih tehlul em, engvanga dawt min hrilh nge a nih a, Engvanga ring em em tu a thian nu chu dawt hrilh nge a nih?Ka van hre chak tak em. Amah Lalengi hrim hrim pawh khawnge a awm tak daih le?

Room kawngka a inhawng a, Rosalyni nu a rawn lut a, ka hmel a hmuh chuan engkim a hrethiam nghal a ni chek a niang chu "Dawt vek tihna em ni?" a rawn ti tham tiak a. Nu a zawng a nu nunnem leh hmangaihna ngah, a thihpui lo chauh a fanu rilru nat luat vanga khawhar taka awm a khawngaih tur ziate, Kan 2 chanchin engkim min hriatpui a, Thinlung taka min pawmtu ngei mai hmel chu ka hmu theilo, Mipa si ka hnuk a ulh teuh a ni ber. A ni pawh a bang chuanglo, a mittui a hru fap fap a. "In inkawp kha a remlo a ni ang e" a ti tuau a. "Khawnge amah hi?" kan ti ngawt a "Tu amah maw? Aww.. Pasal a neih kha?" a lo ti let vat a " Lalengi maw?" ka ti deuh hu a " Ni nang, Mami mawle" "Lalengi mawle ka sawi, khawnge a awm, Hetiang taka thil pawi a ti duh hi amak a ni" ka ti khur khur a "A boral tawh, Nikum khan Motor,Accident vangin a boral daih tawh a lawm. Engmah hrelo khan Mami lah khan a tuar em em a, a tap tak hawm hawm a" tiin a inhnit faih faih a " Ehe.. a boral tawh a maw?" ka thin a van rim tak em. hetia min nghaisak duhna chhan hi ka hriat ngei a tul si, engvanga hetia kal thut nge a nih si, a fairlo tak zet a ni. "Nia, khatia Semester End a Mass hmanga in hawn phei hnu khan Kumthar tir te khan a rawn leng a, Sawn i thlak thu leh In inruk thu a rawn sawi a. Mami chuan a tuar ta em em a...I rawn kal leh hunah lo finfiah a duh em em a, Mahse a thil hriat tinghet turin engmah thawm i rawn nei zui ta bawk silo a. Tikhan hrehawm takin a nulat hun a hmang chho ta reng a. A rapthlak a sin, Nizan maite khan "Ka nu a hmel vawi 1 tal hmu leh thei i la, Pasal chu hlim takin ka nei mai tur" a la ti fan a. Nimina Biak In a kan hmu thut che kha mithi hmu ang maiin kan awm a. Mahse engkim a nih tur ang a ni zo tawh a. Nanglah Nupui i nei daih tawhah kan ngai hmak a ni" a ti ta siap siap a. Ka van thinrim tak em! Amah vanga ka tuarna te, beisei taka ka lo thlir laia min bum nia ka ngaih ziate, Kumthar Lunglei phei tura ka inbuatsaih laia Lalengi nen kan inbiak dante ka sawi vek a. Ka rilru na lutuk ka rawn phei duh tawh loh thu leh Khami kum kha Ka patea awmna thingtlang khua ah ka patea ai zirtirtu hna ka thawh bo daih thute ka hrilh a. Ka nupui leh Fa nia a hriat ka bazarpui chu ka farnu ( Ka patea fanu) a nih thute, A pasal thihsan a nih thute ka sawi ta vek a.

Engkim mai chuan min mawlh run vek a, ka che chang peih tawhlo, Khum bula sofa ah chuan ka thu kun lup a. Lalengi hmel, Rosalyni hmel, Kan hlimlai ni engkim a lang uarh uarh a. "Ngatinge Phone tala min rawn biak loh le" ka tichhuak phawng mai a "Vawi tam biak a tum che a, a be thei ngailo che a lawm?" a ti khauh a. Kan harsat em em hunlai, Ka lane line phone bill kan pek theih loh vanga disconected kan nih lai a lo ni leh zel a nih kha maw. Ka van vanduai tak em. "Mami nu, hei inleng an haw duh tawh ang, rawn thlah liam lawk tawh, Masawm, tikhan lo awm mai ta che?" tiin Rosalyni pa chuan min rawn bia a. Engmah ka sawilo, an nupa inzui chhuak thawm chu ka hre reng, mahse ka chhang theilo, Ka tawng chhuak thei tlatlo. Ka let tawp a, Sofa chungah chuan ka mu tawp a. Ka inngaihtuah lungpuam a. Room atang chuan chhuak in Hmanhmawh takin motor chuan ka tlanchhuak ta nghal a. Zan dar 9:30 a pel tawh September Thla ral lam pawh a rawn de ru tawh a. chak zeta tlanin Bazar veng a kan Zu lamna thin Pi Nu-i hnenah kalin Royal Stag um 1 ka lam a, Lunglawn lam panin ka tlan ta vang vang a.

Lalengi te in chu a lo thim khap tawh a, a thing deuh thiap ni berin ka hria...An in kawtah ka din reng lai chuan tlangval 3 inkhawm bang emaw thil ti hnufual emaw niawm tak hi an rawn kal tham tham a "Thiante u, Lalengi te hian an luah tawhlo em ni?" ka lo ti ve ngawt a "Aw... A nau mipa khan a hralh daih tawh a lawm, Champhai ah nupui a nei a, an pem daih tawh" an ti a. "U Maengi phei chu nikum khan a boral a, a nu leh pa pawh an boralna a rei ve tawh" an ti a. Lawmthu ka hrilh luam a. Lunglawn thlanmual lam panin ka inkhalh leh ta bub bub a...
A reh ruih mai a, thlan chu ka fang kual a, Ka en kual dan dan hnuah thlang deuh hlekah chuan "Lalengzuali Kum 27 " tih intar kalh chu ka hmu a, a thlan chu hnimin a lo bawh deuh lak tawh a, Lung tha deuha indawh ve nangin a hlui hmel bam tawh a. Ka zu ken chu ka in a, Ngawi rengin Thlan a hming intar chu ka en reng a. Eng chen nge ka ngawih a, engtia rei nge ka thut ka hrelo. "Laleng, kan hmangaih em em che a, i tan engkim kan huam a. Kan thatna tur duhtu i ni ah kan ngai a, engvanga khatiang thil tenawm kha ti nge i nih a, A va mak ngai ve" ka ti chhuak ta phawng mai a. Ka zu um a ruak a, Ka tap bang thei heklo, Ka ang bawrh bawrh a, ka lainat thu ka chham thul "mi khawngaihthlak tak i van ni em, i thiantha te i phatsan a, an karah hem i thlak a, dawt puarpawleng i theh darh a. Kan dinhmun i ti chhia a, I nun a tawi phah ta a nih hi. I ruang chunga rilru na taka tap hawm hawm khan he chanchin hi hria se i lakah a rilru a nat dan tur hi i hrelo em ni?. Hremhmunah i kal phah ngei dawn si a, ka van khawngaih tak che" ka ti bawrh bawrh reng a.Vanlai zawl a thalsik kawng lang ruih leh September Thla mang lam kal he tlui tlui mai chu ka en reng a, kan thian nu min hmangaih a kan thatna duhtu emaw kan tih Lalengi thlan kross inphun chu ka ngheng a. Ka tap pur reng a. Ka thawk lawk a, a thlan bawh a hnim awm nuaih chu ka pawt faih bawrh bawrh a, ka ang pah bawrh bawrh bawk a. Thlan chu a lang chiang viau ta bawk a. Phun bul bul chungin ka motor dahna lam chu ka pan ta chhur chhur a.

Motor ka ti ding dawt a, kawngka a inhawng vat a, Rosalyni nu a rawn lang nghal vat a. Motor bulah rawn pheiin "kan phone nasa lutuk che, tinge i chhan theih loh" a rawn ti a, Motor atang chuan ka chhuak a, ka pai tuang tuang a, an driver leh a pa bakah an farnu fapa an awmpui tleirawl tan ek ek chuan min buaipui a, "Room ah" ka ti chhur chhur a, min hruai a, Khumah min mut tir tawp a. Engmah sawilo chuan light an off a an chhuak leh ta dial a. Ka phun ka phun a, enge ka sawi a, tunge ka biak ka hre heklo. Ka lo muhil ta a ni ngei ang, ka zun chhuak lutuk leh tuihal in min kaitho a, bualin ah lutin ka zung a, Tuisik ka in bawrh bawrh a. Kawl a eng ut tawh a, Motor horn ri tuar tuar leh ralkhata Motor lian nung ri vut vut pawh a hriat tawh, Sava hram chiar nak nak ka hre bawk a. Ka hmai ka phih a, ka muthilh hlana min sin tir ni ngei a lang blanket min sin tir chu ka thlep tha a. Ka kekawr lei kai nual mai chu ka en vung vung a. Ngawi rengin ka chhuak a, an driver in thingpui a lo chhuang mek a "chabi khatah khan ka khai e aw, thingpui in ang aw" a lo ti a. "ka chaklo e, ka hawng dawn" tiin chabi la chhuak in ka tlan liam ta nal nal a...

Khami ni Lunglei lama Inneih kan hman atanga kum 3 a liam leh tawh a Vawiin hi Khami ni amg chiah September Ni 30 a ni a, Bazarpui a kan dawr nghakin ka thu vauh vauh a, Ka nupui Zampuii chuan Bungrua vel a rem fel malh malh a. A chetla vel chu ka en reng a "An driver nen an in ru daih a lawm" an tih huai huai M.A zirlai ka nupui rai lian ve tawh tak Zampuii chuan min tilawm takzet a ni. Ka hmangaih ka ti hauhlo, mahse ka hmangaih chhawm ve zel ang. A ni erawh chuan Kei daikil kara lungphur phur a phur ve em em, Tlangval senior motor khalh leh sil bak ti ngailo min hmangaih a, tlang rel leh sawi engmah dawnlo tawp in, nuamsa taka in tha taka awmthei tur keini In upa ve tawh, thalo ve tak mai a awm huam a min duhtu chu ka hnar phal mawlh silo. Ka duat em em a, Ka hmangaih lemlo. mahse tihnat ka duh tawhlo, Hmeichhe dang ka lo tihnat tawh avangin ka tina nawn phal tawh lo. Min hmangaih em avangin ka lainat a, Min duh em avangin Hmangaih let ve turin ka insiam rem chho mek a ni si a.

"USawm, naute kan neih hma in ka pa in Kolkota ah zuk bazar leh phawt rawh u, Hongkong lam chu kal rihlo mai rawh u" min ti a, enge i ngaih dan, nangmah a kal i hreh em?" nui sen sen pah chuan min ti a. "i tello a kal ka duh hauhlo mai, Thla 7 lai ni tawh mahse thlawhna chuanpui a pawi dawn em ni?" ka ti let ve ngat a, a nui san san a. "A'u Saia chuan ‘Naute thlawhpui a pawina ka hrelo, mahse fimkhur tluk a awmlo, indim deuhla, i naute a hram tawh viau a nia’ min ti a" “a nih chuan i zin thei tihna" ka ti a. A nui hak hak a. "Zampuii, I lo che ve leh vak tawh a ni maw." Ka nu in dawr luh pah a a rawn tih rual chuan a ding vat a "chelo e ka nu, ka thut mai mai chuan ka sil thum zel a lawm le" a lo ti vat a. "Mama, i pa in In sakna lamah kal a duh a, in zuk en dun lawk dawn em ni" a ti nghal a. "Ka kal ve duh, ka nu dawr i ngak thei mai em?" Zampuii chuan a lo ti vat a "Hmm.. a mak teh zawng a nih hi, Nupa nilo in pafa hi in ang a, nia tih tur ka neilo e, ka lo nghak mai dawn nia, traffic a zam hmain hawng vat ula, Bta kha min pui turin lo kal mai se, motor chu in hawn mai dawn nia" tiin ka nu chuan min fiam pahin a ti zung zung a....

Dawr atang a kan chhuak chiah chu Dr.Sailoa leh a nupui hmeltha no surh mai leh an fanu duhawm tak Kum 1 hmel hmu tep tawh pawm chungin kan intawk hlawl mai a.. an hnungah chuan Zampuii nu leh pa an lo nui sung bawk a. Kan ding reng a, kan kal tumna te sawiin kan phul hlut a. "Ka nu bulah khuan lo zuk awm ula, Luangmual a kan in sak ka pa in tlawh a duh a, kal kan lo tum chiah a sin" ka ti a. "Kan lo kal ve ang e, hei i pa pui hian Mambawihi ka ngai a ti pek a, I u Saia te rawn zin lai a ni hlauh bawk a, kan rawn tlawh lawk che u a nia, Saitea te chu Bazar an kal dawn tho a lawm" tiin ka pi chuan ro a rel zung zung a. Rosalyni kut vawt thlar mai chu inchibai nan ka dawm sak a. "In cham rih dawn bawk a, kan la inhmu leh dawn nia" tiin Millenium centre a motor kan dahna lam chu kan pan ta a...