1 LOVE 1 HEART. BY Tochhong Ruata

[Ngaia]

1 LOVE 1 HEART.

"I la hre ve khawp ang, ahun a lo la thleng ve dawn a lawm, i chak biklo ang?" a rawn ti hlak hlak a, ka hre ngai pawh a ni silo a, chutianga min rawn hau bawrh bawrh chu mak ka ti hle. " eng maw ka hriat ang?" ka ti nghut a, " Hmm i hre duhlo vel a maw? zamlo ve kher mai" a la ti ta deuh deuh, " Ngawiteh ka pi i hresual a nilo maw?" ka ti ta nge nge a..." Engvangin nge ka hriatloh ang che Zothanpui" a rawn ti leh a, " Zothanpuia ka ni lo" ka lo ti leh mai a, " khawge a awm?" a ti ban ta chat a..." Ka hre hauhlo, ka lamhnaiah Zothanpuia ka va hrelo ve?" ka ti leh a..."9856237144 a nilo em ni?" a ti a, a aw a nem ta deuh a..." Nilo 44 nilo in 45 zawk a ni e" ka ti leh a.." ka tih palh" nui hak hak pah chuan a ti a...ka chhan leh hmachuan a phone hangup ri ka hre ta nghal a...

" A tunge maw i biak a? Number te i sawi tak a?" tiin ka nu chuan min lo zawt vat a.." ka hre biklo, ka number hmachiah ami biak a tum anga a hmet sual a ni ngei ang, min hai a nih hmel, min vin chiam chiam lehnghal" ka ti ve mai a...Engmah sawi chhunzawm talo chuan kan ngawi dun leh ta daih a...Ka inphih harh hnuah ka Lemziahna room lam pan chuan ka chho leh ta daih a, ka IPod chu ti ngunin Woofer ah ka ngaihthlak tawk vel lekin Neil Young hla ka ngaithla a, chumi pah chuan ka lemziah chu ka chhunzawm leh ta a..Ka lemziahna room ka ti takna a, ka mutna a ni zawk mah, Khum ni chiahlo, cane a tanga siam tluk zalna a ni zawk mah awm e, chutah chuan ka riak chawt thin..Ka room tak zawk chu ka lemziahna room piah daih a awm a ni thung...
Kan In hi In lian naran ve tak a ni a, Aizawl atanga KM 5 lai a hla, khawpui lang ut a sak a ni a,A hmun a nuam in a thengthaw ru riau bawk a, Ka pu ( Kapa pa ) hunlai chuan Bording School atan hman thin a ni a, Kan In thlang lawkah chuan Hostel leh School building hlui ka nu in puantahna hmun atan a hman tak a awm a, nula 10 rual zet kan chhawr bakah kan colony ah chuan ka pa farnute an awm ve bawk a, ka sawi thiam dan ber chu vai chhungkaw hung deuh ang hi kan ni ber awm e..Kan In chu Tlang pang hmun remlai taka sak a ni a, School building hlui chhaklam ah a awm a, Kawtzawl (Lawn) zau thawkhat ve tak a nei a, Lawn ah chuan Japan grass ‘Golden Japanese Forest Grass ( Hakonechloa macra)' an tih sin sang mai a awm hring dap a, awmze nei taka ka nu rose hmun siam chuan a ti lang nalh hle.
Chumi Lawn sirah chuan khawilai lung mam nge an lakkhawm ni dawn ni Lung mam nalh tak tak Feet 3 bial a hlai an phah thlawp thlawp a, chu Lung makna em em chu fur ruahtui tlak nasat lai pawn a nal eih ngailo hi a ni, a mam nalhin pawng rualremlo lai awm hauhlo in a inrem thlap mai bawk a, chu chuan kan In kawt kan in lawiluhna tual hulhliap nei chu a pawh ruih a, kan In chu en thuak chuan brick satliah remkhawm a sak nimai awm hi a ni a, mahse en chian deuh chuan brick satliah a nilo tih a hriat theih, a mam nalh em em a, awmze nei takin line siam a ni a, chung line siamte chu hnim zamchi ang tak rawng hnawih niin enthuak a brick rem ang chiah in a lang ta mai zawk a ni...
Verandah ah chuan ka nu leh pa ten khual tha inleng an neih changa an hawi khawthawnna tur thutna, Myanmar lam thing tha “Thingkha” atanga nalh taka siam thutna an dah a. dawhkan hniam cheichawi, thingbung (log) tan bulh hmawk hmawk chunga thingphel phah thlawp dawhkan an hung bawk a...chu verandah hual vel chuan flower pot-ah Pangpar chi hrang hrang a inkhawi bawk a..Ka nu hi Dr.Rev. Siamzapara fanu a ni a, Taiwan a piang leh seilian a ni a, Ka pa nen hian Love marriage an nilo nangin Nupa hlim tak an ni chho a, Ka u nen kan 2 chiah fa min nei a, ka u hi Royal Academy of Music London ah Master degree final semester a zir mek a, Ka pa hi Mizoram University collage ah a thawk thung. Kei hi Bachelor of Fine Arts ka zawh hnuah heti hian In ah awmin Online shoping hmangin ka lemziah hrang hrang ka zuar chhuak ve thin a ni..
Ka naupan laiin Khawsikpui vangin ka damlo vak a, ka thi a ni deuh thaw, chuvang chuan ka pian a dik zanlo a, ka kut veilam a kual a, ka ke dinglam ka bai saih saih a, Tiang hawl lo chuan khawlai dungah ka kal ngai meuhlo. Ka taksa chu piannalh tak tia sawitur a ni lo a, Mahse kan thlah hi te chhelo tak vek an nih avangin ka sang vei tlar tho. Ka rualpui mipa fa te anglo takin ka ngawichawiin ka zakzum em em a, ka ke bail eh ka kut kawi chuan keimah ah inferiority complex min neih tir deuh thin avangin, khawlai ah pawh ka chhuak ngai meuhlo. Ka nu Dawr Zo-Land Loom ah ka leng zauh zauh tih bak chu ka chhuak vak peih meuhlo bawk...Lemziah, lehkhabu chhiar leh music play bak thil dang ka thawk ngai heklo a. Ka thlan tihtlak nan GYM room min siam sakah ka tawlh leh tawp a, ka khawvel chu zim hle mahse ka nun a bet tlatah ka ngai tawh a, Ka tan chuan a khawhar thlak em em hranlo. Ngaia neih chuan khawlai chhuak lo pawhin a lo awm thei khawp mai..Chutiang nun khawhar ru riau si a, kalna tur dang hre chuang silo chuan ka khawvel thar turin min hmuak tih reng ka hrelo. Chu ka Khawvel zim tak atanga lakchhuah ka nih a, ka nun thlak danglam hlawktu ka tawng ve ta hlauh mai..
Nileng in lemziah ringawt a ka buai a, chutia ka buai em em lai chuan Ka phone a rawn vibrate chur chur a, Phur fahranlo chuan ka en a, tukin zing lama rawn call tu bawk kha a lo nih avangin ka la duh lemlo a, ka thil tih lamah ka bur san lehta zawk a.. Mahse a tisual leh a nih ringa ka chhan duhloh hnuah pawh vawi 2 lai a rik leh takah chuan phurlo zet chuan ka chhang leh ta nge nge a...
" Aw....enge ni leh pek a, i tisual leh tihna a ni maw?" bung deuh chuan ka ti a.." oh...nilo e, ka tisual tawh hauhlo, i thin a va rim hmel ve?" a rawn ti let vat a... " Rim hranlo e, Mahse ka hun i la hek deuh a lawm le" ka ti ban chalh a...A ruk tak chuan ka haw deuh a, ka rilru sawr bing laia hetianga min tibuai chhen hi ka duhlo a ni.." aww a ni maw?, i buai tih ka hrelo a lawm le, englo a nia...?" a ti a, a sehchilh deuh nak a, a reh hmak a.." " Enge englo chu?" ka ti leh mai a..." Tukin khan ka thian nu in a bialpa number min hrilh ka type sual a niang, I number kalo call daih dan-ah, ka rawn ang nghal bawrh bawrh si a. Thupha ka rawn chawi lawk dawn a, reilo te min be hman lawk lawm ni?" a ti duah a...A eng phiangsen chu ni maw...? A tisual a, a tisual tih a hriat tawh a hnu, ngaihdam rawn dil leh a tulna ka hrelo....ka ti rilru a, " Ka ngaidam hmak che" ka ti bung nghut a..." Ka lawm e....Enge i tih a, khawi a awm nge i nih a?" a ti ta duah a. " Hmm...Engmah tilo e, ka be mek che tih bak" ka ti leh mai a..." I sual ru zek a nih dawn hi...a nih leh le...Buaia" a ti a, a dah ta daih a...Ka nuih a za ru phian a, a thinchhe ve hlak hlak hmel hle chuan ka hria...

Zanriah kan eikham a, Thutkhawmna pindanah TV enin ka nu nen kan thu dun a, ka nu chuan Phone in mi a be lang lang reng a, an titi dan hmangah sumdawnna thil a nih hmel a, a rawn betu chu Mizo zinga designer lar ber Pu JK-a a ni a, Ka nu loom atanga a thil design vel siam tira, tah tir a duhthu an sawi dun a...Chutih lai chuan keichuan TV ka lo en mek a, Discovery channelah Documentary flim ho ve angreng tak ka en a. Chutih lai chuan ka phone ah text msg a rawn thleng a, ka en a, vawiin a mi bawk kha a lo ni leh a, ka rilruin " he nu te hi a kawlhrawng ru zek dawn a nih hi" ka ti a. Enge a rawn thawn en ka chak deuh a, ka en sak a.." ka tihpalh, ka thin a chhe bik miahlo a nia, i ngeng thei lutuk a, ka insum zolo a nih kha" tih a lo ni a..." Engmah a ni lo" tih zawng ka thawn let a, " Kross-i ka nia, Zotlang ah ka awm" a rawn ti a, " a ni maw" ka ti leh mai a, " nia..I pa ka ti" a rawn ti ta tawl a...ka lai zawk lek lek, miin hetia min tih ka la hre ngailo a, tumah ka ti ngai bawk heklo..." Min hmu tawh a mi?" ka ti a...Ka sen ap ap thei...." Hmu hranlo, mahse i aw leh i tawngkam velah khan, i pa ka ti" a rawn ti leh a..." Bawiha, Pu JKa ten Winter show atana Inbuatsaih nan kan loom an hmang duh a, i rem ti a ngem?" ka nu in a rawn tih takah chuan kan inbiakna chu ka chhunzawm ta lo a..." Ka pa nen in thu thu a ni mai a lawm...engtika tan tur nge?" ka ti a..." Tunkarah Puan tah chu kan tan sak ang kan remtih tlan chuan " a tih hnuah ka pa thu thu ka ti a...Ka ngawih san ta a...

Ka khumah ka thu mu a, ka laptop chu on in ka blog-ah painting ka dah thenkhat order an awm leh awmloh ka enkual thuak thuak a, Mizo pipu thuam a inthuam nufa bawr taka kal lai lem ka ziah chu Thailand atanga order a lo awm a, a bak chu a lun lemlo, mahse ka blog chu nimin aiin tlawhtu an lo tam zawk a, ka nui sak a, ka Ni fapa Sawmtea ka inbox a, Thailand pa thil order chungchang leh a thawn dan tur ka hrilh a...Chutih lai chuan ka phone a rawn ri leh a, chhun ami bawk kha a nih ringin rang deuhin ka en vat a..,Mahse a lo ni huahlo, Ka kawm ve thin Baby a lo ni a..Phurlo zet chuan ka chhang a...a tihdan ngai bawkin a rawn titi leh ta zat zat a...ka um e liam mai mai a...Minute 5 dawn min biak hnuah ka buai deuh thu sawiin ka pawt chat a...Ka rilru te te chuan vawiin nu kha ka lo beisei ani tih ka hriat chuan ka zak lek lek zawk...Tinge ka hmelhriat pawh ni uk silo a, hetia ka awm ka hrethiam chiahlo, mahse ka rilru ah a kap run roh si a...Tinge a reh tak daih le?, ka be tha duhlo kha a thin a rim em ni zawk ?... Mi biak hi ka thiamlo lutuk ve bawk a ni...ka ti rilru a, ka thil tih ah pawh ka phurlo eng emaw deuh tunga in hriatna ka nei a, zanriah eikhama ka msg dawn chu ka en nawn leh a, ka nui tet tet a, “Krossi of Zotlang” tiin ka phun sep a..
****************
Zing ka harh hlawl a, ka phone ka en vata engmah miss call emaw text msg emaw pawh a lo awm lo a, ka tho phurlo sawtin ka hria. Ka ngaihtuah miahlo nia ka hriat rualin ka lo ngaihtuah a ni tih ka hre mai a, Ka vawi 1 hmeichhe call dawnna a ni bawk a min hneh deuh pawh a ni mahna...Tukthuan kan eikham a, ka nu dawrah leng turin ka insiam a, Motora ka lut chiah tih ah ka phone a ri a, ka en vat a, nimin a mi kha a lo ni a. Engvang nge ni ka phur ru zek a...." Hello, enge " ka ti deuh teh tawl nghal a...( phur surh anga lan ka duhlo hrim hrim a) " errh..englo...ka msg i hmu em?" a rawn ti tham deuh tiak a, hmu ka ti duh biklo a, enge a boruak zel ni ang tih hrechak chuan " ka hmuh awm ka van hrelo ve?" ka ti leh mai a. " awww a nih tak chu deliver a tive bawk si a, phone dawheh deuh ka nei a ni ang e" nui hak hak pah chuan a ti reuh a..." a ni ngei ang, phone dang lei daih rawh" ka ti awlsam et a, " Enge i tih leh dawn a, Pu Buai?" a rawn ti kher a. " tunge i biak a, Buaia ka ni silo a??" ka ti ve ngat a..." nangmah mawle, Buaibuta chu" a ti deuh khauh a...ka nuih aza ru viau, " a nih chu kalo hre lo reng reng a lawm, Nghal-i" ka ti let ve sak a, a nui ta hak hak a...
Chhunah ka nu dawrah ka thut lai chuan hmeichhe rualkhat hi an rawn lut ham ham a, ka nu puan zeh ze hrang hrang chu an rawn enkual vel a, hetihlai tak hian ka nu chu a chhuah lawk hlan a ni a, kan dawrnghaktu Puii leh keimah bak kan awmlo, chung nula rawnlut te chu ka uksak duh lemlo, Puii chuan a lo dawngsawng a, an ri barh barh hlawm a...An ti ti vel danah chuan Pu Jka model te an nih hmel, an hmelchhelo tlang hlawm hle a, chumai bakah an pian a nalhin an zen zaih hlawm bawk a, an chevel chu an zang vah mai bawk a...Model ho hi ka hmuh dan a dik zan lo nge? An khawsa ho hrim hrim zawk ni ang, ka ngaisang em em hranlo a, an hmeltha a, an nalh viau angbawkin an sihhnip vek ka lo ring ve ngawt pek a, a dik leh dikloh erawh ka hre chuang hleilo a. Rei pawh an awm hma chuan ka nu chhuak pawh a rawn hawng tawh a...chumi hnu lawkah chuan Pu Jka leh hmeichhe pakhat te chhelo tak mai, kekawr mar tang mai ha, en reng reng pawha zei thlarh ni mai awm hi a rawn lut tel bawk a..
Chung model ho te nen chuan an ti ti nghal bawrh bawrh a, Ka nu puan design hrang hrangte chu an nalh tihzawng an thlang sap sap bawk a...Pu Jka chu an nelin an fiam bawrh bawrh reng a...Pu Jka hi tlema pa vaklo, mahse nupui nei ve tho si, designing a graduate ngat a ni lawi a, Mizo dress design hrang hrang khawvel hriata pho chhuaktu a ni. A hausain a lar tawh hle nangin a nuam tih ber chu a chawlhsan thei meuhlo..." Thante, i lemziah kha i zo leh tawh em?, ka thil ve tur chu min ziah sak hman tawh lawm ni?" tiin min rawn en ha a..." Ahh zo tawh e, project dang engmah ka nei rihlo....nia..ka lo ti dawn nia, Englam pang nge i duh a?" tiin ka be let ve nghal vat a..." Englo...ih Sinnery lam hi a comon ka ti mah mah tawh a, ka duh ang tak ka hre thiam chiahlo, awmze nei taka thil lem ziah...englo...ka sawi thiamlo" a ti ta nuah nuah a...a naute ho chu an nui ham ham reng a, a rawn kalpui nula chuan " chutiangte chu ka thiam ve tho ang chu, plain sheet ah rawng hrang hrang ka chawhpawlh ang a, hmawlhte in ka thai kual deuh pap pap ang a, ka phoro leh ang a, a tawk mai ang" a lo ti a, midangte pawh chuan an lo tuihnih ve tliar tliar a...

Chu nu aw chu ka hriat hnu a ang riau in ka hria a, mahse ka chian ngam bawk silo a...Ka va melh zawk a, minlo en reng chu niin ka hawi sawn leh vat a...ka lum deuh pup chuan ka hria a, A ni lah chuan min rawn melh zauh zauh reng bawk si a, ka zak em em lam pawh a nilo, hetiang a hmeichhe melh a ka awm hi ka la hre ngailo, An ti ti bawrh bawrh renga, Ka tihtur hrelo leh lai deuh chu ka ding hluai a, Ka hawn tawh dawn thu pawh sawi lemlo chuan motor dahna lam ka pan nal nal a..Motor chhungah lutin Ka phone chuan ka nu ka bia a, ka hawn dawn thu ka hrilh a,, makti hmel zetin " kan haw rual dawnlo em ni?" a ti nang nang a, engmah chhang chuanglo chuan Albina ka rawn tir dawn nia..ka ti hmak a...Motor ka ti nunga, Muangchangin kan in lam panchuan ka tlan haw ta vang vang a.
Ka room ah ka lut a, bathroom ah intifai turin ka lut nghal a, Ka mitthla ah kha nu hmel kha a lang reng a, Min melh kiau lai hmel te chu a rawn lang lurh lurh niberin ka hria. Ka inbual chhung zawng chu ka ngaihtuahna a luah a ni ber...Bathroom a tanga ka chhuak chiah chu ka phone a lo vibrate leh chur chur a, hmanhmawh zetin ka la vat a, mahse a tawp hman a, Miss call 6 lai a lo awmhman pek a.. Ka envat a, Krossi of Zotlang tih hlir a lo ni a...Ka call back dawn em aw ka tih lai mekin msg a rawn thleng a. Ka en vat a, " Ehem" tih zawng a lo ni a...Engmah type lo in ka khumah ka thehthla a, ka in thlak san ta daih a...Ka chhan dawn leh dawnloh la la hre mailo, chhan ngei ka duh si a, Mahse "ehem" tih ringawt chhan dan ka hrelo miau si a..
Lemziahna room ah ka awm leh tawh a, Ka tluk zalna ah chuan ka mu ar ar a, Ka suangtuahna vak vel chuan min awi derh derh a ni ber, a hmel ka la hmuh ngailoh tawng ri leh a text msg ka ngaihtuah a, ka nu dawra ka hmeichhe hmuh hmel a lo lang bawk a. Ka ngaihtuahna chuan min hruai delh delh niberin ka hria...Ka tho a, ka apron chu bat in lemziak turin ka ding ta a. Ka rawng chawhpawlh dan tur leh ka lemziak tur chu engmah ngaihtuah buai lo chuan ka bel mawlh mawlh a, ri deuh riai riai in Pianist ropui tak Yanni music Nice to Meet You tih ka ngaithla bawk a. Ka lemziah chu engtia ziah tur nge? Engtin nge a chhuah dawn ka hre hauhlo, ka bel mawlh mawlh mai a ni..

Ka sana ka en a, Zan dar 11:00 chiah a lo ni tawh a, ka lemziak chu ka en renga, hetiang thil hi engtia ziak chhuak thei nge ka nih ka hrelo, ka thlek ngial pawn ka thil ziah phena ka thil dah chu engtia lo tel ngawt nge ka hre heklo.. Chu ka lemziak chu en thuak chuan rawng chawhpawlh hrang hrang thai kual a, hrut pherh vel mai mai a ang ber, mahse chik zawka en chuan chung rawng chi 24 zet chawhpawlh chuan nula sam tawi lungngai hmel deuh a vanvadak, a bianga mittui lung ngiai ngiai, hmel en reng reng pawh a, vei nei tih hriat tak, a hmuh theih a, Painter emaw hetiang ang Painting ngaina viau lo tan pawh thil ho tak anga lang awmze nei taka thaikual a ni tih a hriat theih nangin a phena nula lungngai hmel erawh an hmuh thiam mangloh tur a ni thung. Ka lo thlir doh doh lai chuan kan nula awmpui Kimi chuan ka lemziahna room kawngka chu a rawn kik kauh kauh a, " Mama thingpui ka rawn chawi a, zanriah i la ei mang silo a, " a rawn ti dat dat a, kan nula thingpui min pek tui tak chu ka in khalh khalh a, ka phone ka hrechhuak thut a, ka en vat a, Text msg 2 a lo awm a, ahmasa zawkah chuan " i muhil thei bik a mi?" tih a lo ni a, a dangleh ah chuan " ka hmu chak che" tih a ni leh tawp a...Ka nuih a za ru riau a, he nu phone call leh msg hriat leh chhiar ka chak viau zel ringawt chu mak ka ti ru viau a, ka chak ang ngeia a lo thlenin ka lawmin ka hlim theih zia chu mak ka inti hial a ni..

" La mu biklo e, " tiin ka chhang a, zingah bak min chhan ka rinloh vei nen " I la mulo tak tak elaw?"" tiin a rawn chhang vat a, " aw..ka la buai deuh a" ka ti leh zat a, " buaibuta i ni miau a,,," a rawn ti a, ka then sak a..." Nia Nghaltei i ni ve tho a lawm" ka ti ve ngat a...Chutiang chuan kan inbe ta ngat ngat a, Hemi zan hian kan inbe nasa ve hle a, a thil tih thin te ka zawt a, Private firm ah hna chheteh a neih ve thu leh, a nu leh pa an boral tawh thute min hrilh ta duah a, Champhai lam chhuak a nih thu te, a nu nau aputea bula a awm thu te min hrilh bawk a, tichuan eng eng emaw sawi dunin kan inkawm tlangnel ve ta zel a..Hemi zan atang hian Krossi nen inpawh takin ka inbe ta fo a. Kan hunawl neih a ni emaw nilo emaw kan inbiakna chuan min dal hman meuhlo, min biak a duh chuan enghun pawh nise min rawn text tawp a, kei pawn chutiang tho chu a ni mai, tlang taka sawi chuan hmel a rim ara pawh inhrelo chu kan inngaizawng a ni deuh ber mai. Thuin kan sawi a, chezia in kan lantir a, a tak ramah kan cheng dunlo mai chauh a ni..

Min biak a tuma ka chhan loh leh a lungawilo a, ka biaka min chhan lawk lohin ka lung nilo ve bawk a, Zing ka thawha min wish lohin ka vui a, chutiang bawkin a ni pawh a awm thin. Mangtha lo a ka mut a awm meuhlo a, a ni pawn min mangtha lo ngai chuang heklo. Zan rei leh reiloh lam kan uksak hauhlo a, kan tlin tawk tawkah kan hunawl a awm thei meuhlo thin a ni ber awm e. Chutianga inbe nasa viau e tilo chuan vawi khat mah kan la inhmulo thung, ka awmna chu Aizawl nilo ang takin ka sawi daih a, Ka hming lah min zawhpawn ka chhang duh ngai heklo chuvang chuan Buaibut tiin min ko mai thin, midang min kohdan nise ka haw hle ngei ang, mahse ama min kohdan leh min hriat dan a nih miau vangin ka haw phal thaklo, ka nui ru ver ber zawk thin. Angelai lam ka rilruah a lut lo a, ka chhungte lam a lut heklo, ka thinlungah hmun rawn khuarin chamhlen tum awm fahranin bu a khuar a, Thlasik a lo her anga nipui a thaw leh ang a, a insawn leh mai dawn si a, tih turin a awm heklo, a chelhbeh tumin ka thiamna hmangin ka chelh ve dawr dawr nangin a ngheh leh zual sauh nan ka rilru ngaihtuahna ah bu khuarin a pan ril tawlh tawlh zawk a ni ber... Krismas vawi 30 hmang tawh tlangval, Hmeichhe lama rilru pelhe ngai miahlo, Ka van duhtak tih tur vawi khat pawh la nei ngailo chu engemaw rauin a man a ni teh chek a niang, ka hawi sawn thei tawhlo a, ka tawn chin apiang chu ka first experiance a ni zel zawng a nih hi..Engkim a thar sur vek a, Khawvel mawina a vul chho ve tan mek zel a ni ber..
***************
" Mama, Bawiha i insiam zo tawh em?" tiin ka nu chuan ka room kawngka a rawn kik karh karh a, " la hman hauhlo mai, lo zu kal mai ta che u" ka ti a, Engmah ka ngaihtuah theilo, engtin nge ka awm ang a, engtin nge ka inthuam ang? Tih chiah ka ngaihtuah...achhan pawh JK Winter Show chhim turin kal ka tum a, chu hmunah ngei chuan ka hmuh chak em em nen chuan inhmuh kan tum vang a ni...Khawlai chhuak ngailo, khawiah mah inchei taka chhuak ngailo tan inthuamna tur a vang em a ni..Ka theihtawpa ka inchei ve hian ka lang thing zawk tlat zel ni berin ka hria. ka nu chuan " Bawiha kan lo nghak che" a lo la ti talh bawk si a, ka thiam leh theih ang tawka nalh chuan ka inthuama ka nu leh pa min nghahna lam pan chuan ka room atang chuan ka chhuk thla hnak hnak a..
Ka nu chuan minlo en duh kher mai, a nui seih a..." I duh dan tak maw i incheina kha?" a lo ti a, Ka pa chu a nui tut tut a, " A nalh ve viau a lawm hei" a ti a. Ka ngaih a tha zanlo.." Kimte" ka ti tuar a, Kimtei chuan choka lam atangin " eih enge mama" a lo ti vat a, " Lo phei vat teh ka mamawh che" ka ti a...Kimtei chu a rawn lang phei nghal a..." Ka nalh em?, hei heng mite hian min nuihzat a?" ka ti he haw a...A nu tat tat a..." Nang leh nanglo anga i inchei ve vur hmuh chu a nuihzat thlak deuh a ni ang e, i nalh lohna a awmlo..a simple a, i inhmeh tawp" a ti sarh sarh a..." Kan nuih chhan chu i hrethiam tawh em?" ka nu chuan din pah chuan a ti a. " Kal angu, kan tlai hlauh palh ange" tiin ka pa in a lo ti a, kan inzui chhuak ta hnak hnak a. Ka nu leh pa hian khawiah mah min hruai thei ngailo, Designer hrang hrangin ka nu base in thil anlo ti tawh a, ka u leh ka pa hi chuan an telpui zauh zauh tawh nangin kei erawh chuan ka la telpui ngailo hrim hrim a, Kum engmaw zah hnuah a vawi khat nan ka telpui tur chu ka nu a phur hle...Kawng tluani an thil tih tura Pu JKa tumruh zia leh Mizoram Fashion Organization te nena an inbakkaih lek lek thute, nula zinga top tliang hlang 8 leh India ram pum pawha Fashion world a lar phak ngat a kawl thei maite chu mak a tih thute a sawi bawk a. Chutianga an ti ti bawrh bawrh lai chuan engtin nge amah ka hriat theih ang a, engtin nge kan inhmuh hmasakna berah ka biak ang? Tih bak ngaihtuah dang ka neilo. Ka phur em em rualin ka huphur ru viau lawi si. Ka farnu pasal neih ni a nih ngawtloh chuan huau huau lamah kal tumlo bur hetia phur taka min nawrchhuaktu chu engtiang taka keimah a pawimawh nge a nih ka hre thiam hauhlo..

Aizawl Zawlbuk Multipurpose Centre, Aizawl park a awm chu kan thleng a, Official parking zone lamah chuan Police duty te chuan kan motor chu kal turin minlo hui a, Park chhunga building lianpui mai chu a lo eng pup tawh a, a kawtlaiah chuan Aizawl mai bakah Mizoram leh Khawvel hmun hrang hrang a Thawmhnaw phochhuah lama experiance nei tak tak te, Nula nalh tak tak leh Company lam hotu lian tak tak te an tei suau suau a, Mizo Pasaltha hmingthang India laka Zalenna kan sualna kawnga huaisen taka bei thin tu Capt.Thangrehlova Lim eng mawi taka kah pup mai chu an lo en lat lat bawk a...hmun tin mai chu Zo zia lang thei tur bera chei a ni bawka, hnamdangte chuan an lo bawr laih laih hlawm a.
He Multipurpose centre hi Zoram Chhantu Pawl ten World Bank Sum kal tlanga an sak a ni a, Mizo Consultancy nghialnghet ber mai Royte Group in an sak a ni nghe nghe...Zawlbuk anga design a ni ber a, a bawk duai mai bawk a ni. Kan Motor ka dah fel a, ka nu leh pa te zui chuan ka kal ve hnak hnak zel a, Zawlbuk chhung kan lut a, mi an lo zi liah laih tawh a, a main centre lamah pawh an lo thu khat hmur tawh bawk a...Ka mit chu ka len kual ruai a, Ka la hmuh ngai reng rengloh hmeichhia ka zawng chu a ni a, hmuh a harsat hmel kher mai...Chutih lai tak chuan ka phone a rawn nghawr dat a, ka en vat a, " Khawnge i awm" tih msg a lo ni a, Ka awmna hmun ka hrilh hnuah " Engtin nge chulai hmunah te i awm theih, show tan a hun dawn tawh si a, show neih laiin min hriat theih nan zozehpui Inneih kawr cheimawi ka rawn ha ang, a var" a ti a..."awle" tiin ka chhang a...ka mur seng seng a, boruak dai dup hnuaiah chuan ka lum deuh up up in ka inhria.
Show an tan a, Host zei takin programme a rawn introduce a, ka nu leh pa pawh a din tir ve a, chumi hnuah Mizo nula zaithiam pakhat a rawn zai a, a zahpuiawmloh hlarh hlarh hle. Chutah eng a dim dulh a, Music awmze nei taka mizo clasical music inpawlh a rawn ri a, Dawhsan lam kan melh thuap tawh a...A mal te te in an rawn inzui ta thliah thliah a...Kut beng a lo lawm thawm a awm reng bawk a..Kha nula hawihhawmlo zet mai, mahse a hawihhawmloh ka tih rual ruala ka vei ruk em em si chu ka lo ngaihsan em em ngai bikloh Model maw a lo nih a....mak ka ti tulh tulh a, Enge he nu hian min hre lawk rengtawh ang a, awmze nei taka min hip a tum zawk nge? Min diriam duhin min chawk phul vel mai mai ni ang? ka rilru a insual nasa hle..Ka thil en ah pawh rilru ka pe theilo...Ka u thian nu naupan teta a kawp thin Saii Super Model kha tunah chuan super model a nih vanga a chet khawloh tak dan zawng zawngte hretu leh hmu tu ka ni ve bawk nen, ka hmuh chak em em pawh chu ka hmu hreh ru ta riau a..ka awm hle hle theilo a ni ber..Show chu kalchak deuh se, ka ti em em a, Mahse, Ka hreh bawk si, ka zun a chhuak deuh urh tawh bawk si, ka awmdan chu ka sawithiam chiahlo ka khawr deuh tut niberin ka hria..

Host chuan tunah kan Designer Pu Jka a kutchhuak tharlam ber, Mizo puanzeh mawitak mai zulzuia siam inneih kawr var thianghlim tak nena awmze nei taka thui kan entir leh ang, He dress hi Pu JKa show room ah order theih tura peih a ni der tawh bawk.." a rawn ti lauh lauh a, eng a dul ruih a, Music a ri ruai ruai a, chutah hmeichhe naupang 3 leh mipa naupang 3 hi pangpar bawm khaiin an rawn inzui del del a, an nalh hle mai, Hmeichhe naupangte chuan kawrfual var awmze neitaka an thui an ha veka, veil an khim bawk a, an zawnah theuh mipa suit nena inthuam an kai bawk a, kut beng thawm a tha ngei mai, Chumi zawhah Mo thian niawm tak kawr pink color dal riai mai ha leh Moneitu thian niawm tak mipa nalh deuha inthuam an rawn chhuak leh a, an ni pawh lawm an hlawh kher mai, chutah le Hmeichhe pakhat mo thuam a inthuam, a sam bu tha zet chu awmze nei taka chei danglam, Hmeltha leh vun nalh zet mai hi Mipa lian tha thelhthawlh deuh mai hian a rawn hruai lut ta zan zan mai a...
Kan hnunga thu hmeichhe 2 chuan ka nu chu rawn kheuh zauhin, " In kutchhuak ropui theih zia khi..." an rawn ti a. ka nu chuan lawmthu a lo hrilh zauh a, Show lam kan hawisan leh tawh a. Chu hmeichhia chu mit tla dawnin ka lo en a, a pheichheh nalh zet mai te, a mo kawr hak fual hnalh mai hnung lama Puitlng 3 te hak khawp tur khawpa sei hnuk duah duah in a khuh phak baka a pen zawnga a kethiah fai leh no zet mai rawn lang zauh zauh a kal chu ka en reng a, Kan zawn an thlen chuan an ding det a, a hmel avan tha kher em...a meng pawl ram a, a fiah kuk a, a biang lang thawp sat mai chuan a hmel thatna a tifiah zual a, a khabe dawh kul lek lek anga lang chu a ir no chek nen a inchawih nalh hle mai...Min en hauhlo, min hmuh kan a ni ngei ang, nui ver ver chungin hmundang an hawi leh daih a...An inhera an inzui chhuak leh a, an liam hma hauh atangin standing aviation hmangin mipui kalkhawmte chuan kutbengin an thlir zui hum hum a...A hnung lama a kawrfual hak a ribbon lian zet mai poh lah danah a mawng a nalh a ni tih a chiang kher mai...A hatu in a inhmeh ropui si a, order a huphurh awm viau in ka ring....Ka thaw huai, kha nu kha, ka nu dawra ka hmuh ngei kha maw lo ni, Nghali zet chu...ka ngaihtuah let a, ka sen ap ap a, Mahse min hrelo, kei ka nih a ringlo a ni ang nge...Min bawlzan vel mai mai ni ang...ka buai map mai..

Show a zo a, an zi nuk nuk a, Hall pawna Lawn ah chuan mi an kal a, an ti ti lat lat reng bawk a..Pu Jka ka nu leh pa, kha nula kha an ding khawm a, kei chu table pakhat kil in ka lo thlir reng a, chibai an dawng nasa nak nak hmel hlawm hle.. Chu nu chuan zawn nei niawm takin a hawi ha ha reng a, a nihna takah chuan min zawng chiang a ni...A thiante titi pawh a hre changlo a niang a dak vak vak reng a, keipawh min en lemlo, ka inhriattir ang nge? Hriattirlo ang?" ka ti rilru a...Ka tho a, Ka phone ka phawrh a, Kal pah chuan msg ka type mawlh mawlh a....Ka nu leh pa te bulah chuan ka ding a..." Kan hawng tawh mai dawn lawm ni?" ka ti su su a, Chutih lai tak chuan Nula phone chu a rum dut a, a bag atang chuan a phawrh niap niap a...Msg a en vat a...a hmelah lungawilohna hmel a hmuh theih...A hawi fawk fawk a, a nur nang nang a, lungawilo hmel zet chuan a phone chu bag ah a dah a...Pu Jka'n minin hmelhriat tir a " Kross hei hi Zo Ding Liana a nih hi, Pi Mary fapa neih chhun a nih hi... Mama hei hi kan show stopper Krosshnehzovi a nih hi, Ka U fanu a nih hi" a ti a, kan kut ve ve phar chhuak in nui var var chungin kan inchibai a...ka hik deuh mum mum niberin ka hria...a kut nem nel thap ka hum chuan minti lai lek lek a, " Ka hmu che chu ka lawm khawp mai" zawi sap hian a ti a..." Keipawh," ka ti tham tuak a..ka hrawk a hnawk lai ka hrelo, mahse a richhuak thei tawk a ni ber...ka aw then nan ka khuh kharh kharh a....Engemaw an sawi leh hnuah motor lam panin kan chhungkua chu kan kal ta diah diah a...Ka lehhawi ngamlo, mahse ka tukhum chu a hik cher cher a, ka khabe ah chuan hawilet zauh tura kuaitu awm ang maiin a awm bawk a...Ka insum thei nanglo a niang ka lehhawi ta nge nge a, Pu Jka leh Sappa an inchibai mek a, Krossi chuan minlo en reng chu niin, Min nuih sen sen a..,Rang lutukin ka hawi let ta vat a....

In kan thlenga, ka phone ah chuan Msg 6 lai a lo awm a, " I hmel hmuh i duhlo a nih chuan tinge helai hmunah minti vui tura i lo kal ve si a..." tih ringawt a lo ni hlawm a...Ka chhang let lemlo, ka phone chu ka switch off hmak a, ka khum bula dawhkante pawhdawh chu hawngin ka dah lut ta daih a....Ka be leh tawh tur a nilo...Model reng reng laktlak tumah an awm ngailo...Fashion industry ah zu leh sa bakah hmeichhiat sex drug etc a awm vek, chutiang chu vei em em mah ila ka rilru pek tak tak hmain kalsan katan a him zawk ka ti rilru a...Kei pianphunga rual ban zanlo hian khatiang ang nula nalh lutuk kha ka phulo hrim hrim. Keimah ka ni tih a hriat rual rualin min nuih zat mai mai dawn tih ka hria, chuvangin ka kiansan a, theihnghilh ka tum hi a tha ber. Ka thuam ka hlip sawk sawk a, ka khum lum nuam zet ah chuan ka bawk thlawp a, Kha nu Krosshnehzovi hmel tha uchuak tak mai chu ka suangtuah ta neuh neuh a...Kha nula kha hmuvelo te bulah a hmelthat zia leh analh zia hrilh dawn ta i la, " A hmelthat dan chu kha aia hmeltha tura than that dantur a awm tawh chuanglo" tih a ni mai, chutiang bak a sawi fiah theihna tur sawichhuah dantur hriat ka nei hauhlo.... Chuttiang bak chu sawi fiah leh dan a awm chuanglo...
*********************
Krossi nen kan inbiak tawp ber zan atanga chhiar in Ni 230 zet a ni tawh a, Ka lemziahna room ah ka tawm a, Games Of Throne novels ka chhiar a, khua a chhia in ruah phingphi siau a tla cher cher a, Ka nu, Kimtei leh ka u chawlh hmanga lo hawng te inhnuai lamah an thukhawm a, chutia khawchhe hnuaia Lehkhabu ka chhiar malh malh lai chuan kan kawta motor engine rum dat dat thawm leh engine tawp thawm ka hria a, engvang nge ka hrelo tunge? a nih ang tih hriat ka chak ta riau pek a. Ka tukverh parda chhah leh uai hnuang mai chu ka keu dek dek a, kan tual chu ka zuk en a, Figo car dum chhung atangin Pu JKa leh Hmeichhe pakhat hi an lo chhuak mek a, chutia ka en reng lai chuan nula chu ka rinloh deuhin ka awmna lam chu a rawn en chho thut a, a hmel a lan chian chuan kha nu ngei mai kha a lo ni a, Minrawn hmu ngeiin ka hria, ka pil leh zuk a, dimte in ka keu leh dak dak a, an lo awmtawhlo a..
Ka tlukzalna ah chuan mu lehin Lehkhabu chu ka bih leh ngial a, Ka lehkhabu chhiarah ka rilru a lut thei tawhlo, In hnuai lamah hlir ka rilru a bet tawh a " Enge an rawn tih dawn a, kha nu kha engtia rawn inlar leh thei ngai nge a nih?" ka hrethiamlo...Ka nun atanga ka nawr kian hnuah hetia a rawn lang leh thei hi ka hrethiam chiahlo....Ka nu an mamawh em ni ang? Engthil tak ni ang maw...? Keimah vang zawk em ni? A nilo tawp ang keimah nen engmah inlaichinna kan neilo...Mipa pakhat a hriatloh a be thin a, kei ka ni tih a hrelo hrim hrim a, chuvang chuan kei hi chu min rawn kalchhan dawnlo chiang khawp mai..tiin ka rilru ka lo kawm ve mawlh mawlh a....
Ka mu hle hle thei ta hauhlo, ka thu chhuak a, Ka mu leh a, tihdan tur dang hre heklo le...Ka hmu chak a, Mahse hmuh ka tan atha silo..Ka hmuh vaih chuan ahma ang bawk khan ka rilruah a lut leh muah muah ang a, ka insum theilo emaw a ni anga, a nun lo tluang pang ngai pawh nise Kei rualban manglo, Lu lawk bir ber Naupan laia khawsikpui in a sawp nek, kebai lehnghal, pianphunga rualbanlo nichiah silo, hmeichhia reng reng melh ngam ngailo khan ka rilru hrilh ve tawp ni i la, a nuih a za mai mai dawn si a, ka zak em em zawk dawn si...Ka hmu theilo hrim hrim...Ka ti mawlh mawlh a...Chutia ka phun mawlh mawlh lai chuan ka lemziahna room kawngka chu a ri kauh kauh a, Ka u aw chuan " Mam....i awm tiraw?..kawng minlo hawn hman lawk em?" a rawn ti puam ta talh a...

Phurlo zet chuan kawngka kalhna chu kava hawnga, mahse kawngka hawng tachuanglo chuan ka let leh ta daih a...Ka room kawngka chu a inhawng a, ka u chuan ka room luh pah chuan " Mam..kan tibuai che em..?..Kan tibuai che a nih chuan min ngaidam la, tihbuai lawk i ngai a.." nui sen sen pah chuan a ti a...Ka tlukzalna ka thleng a, ka u en tuma ka lehhawi nak chuan Ka u leh Krossi ngei mai chu ka room hnawk nuaih mai, milem ka ziahna board a la kilh beh thal pheng phung leh rem kawih nuaih mai, chhuat ah pencil leh pawnchhia thildang lo tla darh nuaih bawk chhungah chuan an lo ding dun tau mai a...Ka phu deuh zawk thei hial a..

Ka mitmengah mak tihna a lang deuh emawni dawn ni, ka u chuan phawk hra in " Mam...enge nita...oh ka tihpalh hei hi Pu Jka tunu Krossi a nih hi, Lemziah tir tur che in a rawn kal a...biak lawk che a duh a nih hi" a ti nghal zung zung a, Kawngka chu khar turin ka mitmei zauh a, ka u chuan kawngka chu a nem khar a, chutih lai chuan kan nula hmeltha chuan ka room chhung chu a thlek kual hrek hrek a, a nuih a zat hmel hle..." Arrh...nia..ka hrelo...aih ka buailo...min tibuai lemlo, nia ka hria...oh lo thu rawh u" ka ti bah nuk a, ka mutna bula dawhkan chunga ka lehkhabu dah hnawk nuaih mai chu ka remfel pah sawk sawk a...Ka pensil ka elh bung ringawt lehnghal..." Engmaw i hria maw?" ka u chuan a ti ha a, ka thuamhnaw ka dah nuaih leh chhuata thil tla hnawk nuaih chu a chhar pah bawk a..." aih...nilo...ka sawi sual a nih kha, Kimtei ka phiah tirang ka lo ti mek a, I lem maw ka ziah dawn Mami" tiin ka u chu ka bia a, ka awmdan leh ka tawngkam tehnuaih chuan min ti lungnilo kher mai, Hmeichhe hmaah Lungtum ang maia ngeng thin kha, ka che pelh phung a ni ber, dawhkan a Jug a tui dah chu ka hai baw thei hram zui...

" Ninang, keimah ka nilo...hei Krossi zawk hian, i va mak teh nuaih ve..Mam i nuamsamlo em ni?" tiin ka chal a rawn dek a, " aih damlo..aw...Nia ka dam a lawm...Lo thu rawh u..." ka ti a...Krossi leh ka u chu ka awmna bula sofa upa ve tawhtak ah chuan an thu dun a...Ka mit ka chhing a, tui no a tui awm ka tlak pawp a, ka normal tan ta deuh..." Eng ang lam nge i duh a...?" ka ti thei ta hram a.." Ah..englo a nia, Keima lem hi ziahtir che ka duh a" a ti ta daih a...Ehiau...ka tirilru a..." a harsa lo ang" ka ti hmuk a, " Engtikah nge kan tan ang?" ka ti leh a, " tunah" a lo ti a, ka va melh zauh a, chiang kal mai hian minlo en a, ka kawchhungah a melh tlang zawk niberin ka hria..." umm nia...kan ti dawn nia..,mahse..." ka tih lai chuan " Enge mahse?" a lo tivat a..." a tlai deuh tawh si a, kan zo hmanlo ang, Naktuk lamah tih mai i duh zawk em?" ka ti vat a..." Mam...enteh, next monday ah Londonah a kal dawn a, zanin ah zawh ngei ngei a duh, he a lem i ziah hi University of Designing ah pekluh a ngai dawn a, Zanin kan mikhual mai dawn a nia, midang pawh i tih fo kha" ka u chuan a lo ti vat a..." Nia, i tih dan dan a ni mai, Ka pu pawn a remti mai ang" Krossi chuan alo ti vat a... ka chhan ve hma chuan ro an rel fel nghal zung zung a...." Mam..tihian bul lo tan phawt ula, Pu Jka bulah thil awmdan ka zuk thlen thung a nge" tiin ka u chu ading a, a chhuak ta daih a...
Chutia ka u in min chhuahsan takah chuan ka lai lehzual kher mai, a ni chuan engemaw beisei hmel tak hian min melh kiau mai si a, ka ding hluai a, aw lawi zet hian " Engtia ziah nge i duh" ka ti thei hram a....a ding a, ka lam a rawn pan a...." i aw hi ka hriat hnu a ni, tinge min biak duh takloh a, khang hun zawng zawng chhung khan kei hi nangmah zawngin ka buai nasa teh mai a sin" a ti vawt ta raih a....I si, a hre ta tlat mai, engtia tih chi nge ni ang? Vala lu a hai map map hle...." Engmaw..?...Kan inhretawh thin a mi" a bul atanga kal sawn pah chuan ka ti a, tul hleilo hian ka lemziahna board chu ka va remtha vel teh ngawt a..." i hriat reng kha...Ka zawng nasa che in, nelawm taka i thinrim der vel thawm kha ka hre leh chak a, ka call che a, switch off a ti zel a, ka text che leh achhanna ka hmu ngai heklo...tichuan ka mu theilo a, chaw ka ei thei heklo, ka pu ngaih a tha lo a, min dawp ta tawp a, engkim ka hrilh hnuah ka biak thin number chu min dila ka pe a, a phone atanga an call chhin chu i hming a lo lang ta tlat mai si a..Mak kan ti dunin ka inthiamlo lehling ta zawk a..." a chawl det a....Drawing board khai vu chung chuan hnung chhawn zawngin ka ding vung a..ka tukhum chu a za mer mer a...

" Nangmah i ni tih kan hriat ruala ka inthiamlohna zawk chu miin I pa rosum ka it vangah an ngai ngei angle, a nihloh pawn nang ngei pawn chutiang ka nih chu i ring ngei ang tih ka rin vang zawk a ni..Tichuan ka rilruah paihkian che ka tum a, Ahruaii bialpa Zothanpuia phone number ka hmeh sual a zarah nang nen kan intawn kha accident tak meuh meuh a ni tih hrilh che ka duh, mahse i number chu i deactive tak avangin ka be thei ta silo che a, Londonah thla 1 ka zin bo a, Niminah ah ka rawn kir leh a, chuthu chu hrilh tum che in ka lo kal ta ngat a nih hi...” a ti vawt raih a. Ka board ken chu ka la khai vu reng a, engtia chhan chi nge ka hrelo, ka hawi let ngam chiah bawk silo. “ I mi ngaihdan kha ka ni hauhlo a nia, tinge min biak duhloh ngawt a” a la tit a deuh deuh a.

Zawi muangin ka thil ken chu ka dah a, ka inher a, minlo en kal a. Ka sen deuh a pap in ka hria. Ka room dai raih mai chu a lum ta deuh hup hup bawkin ka hria. “Englo a nia, ka phone a chhia a lawmle” ka ti boh a. “ Ka awih hauhlo, I rin phak bakin ka ngai che a, ka hmu chak che a sin, tinge ka lak atanga I tlanbo a, I bikbo daih ni” a ti leh hmak hmak a. A mitah ka en ngam thlawtlo, ka zah tlat mai chu aawmzia ka hrelo takzet a ni. “ Ka bikbo san che pawh a nilo, hei min enla heti mai hi ka ni a, nangni nula nalh leh hmeltha lutuk tan kawp tlak ka ni hlei nem” ka ti zawi sup a. “ Chutiang vang a nilo, nangmah hre reng chunga bia che ah min ngai a ni’ a ti a, a mittui a parawl a, a khap sek sek a. “I sual lutuk” a ti ringawt a.

Boruak tih zangkhai tum tak chungin “ Khawnge I thut ang? I thu lai nge kan ziah ang I dinglai” ka ti bul bul a, a dik tak chuan ka awm a nuam zanlo, hetiang the thut hi kan boruak tur a nih ka ringlo, ka hamhaih a, nuamlo ka ti tak zet a ni.. “ Ka duh dan dan in ka awm ang” a ti deuh nghoh a, ka hawi let vat a, a hmel chu a tha kher mai. Ka room thim deuh rup, parda tlemte a kau atanga eng rawn lut leh, ka model te awmna atana kan siam dawhkan ( Platform) chunga light kan dah eng chuan a kap eng deuh ruau bawk a, chumi eng kara a tap insum hmel chu a nalh kher mai.. A tak ngal mai bawk si a, ami chhan dan teh tawp chuan ka nuih a tiza tlat pek a, ka nui chhuahloh nan ka hawisawn vat a. naupang titau thlem ka ang dawn dawnin ka hria.

“I duhdan tak chuan sawtah sawn va awm rawh le” ka ti a, “Ka awm dawn bawklo” a lo ti hlak a. ka insum zo talo, ka baw ta hawk a…Ka nui ri-ah chuan a rawn dak vat a “ Enge I nuihzat? Buaia?” a ti hlak a, “Engmah nilo e,” helai ah naupang ka kawl tih reng ka hrelo a, awle..i lungawi deuh hunah kan ti zawk mai dawn nia..” tiin Parda ka pawt hawng a, ka lemziahna room chu a rawn eng zual deuh sawt a. “Ka hmangaih che ni berin ka hria, I laka ka rilru put hmang hi ka hrethiam theilo, khami tuk a ka phone sual che khan I aw khan ka thisen a fan chhuak ve niberin ka hria, Zothanpuia emaw ka la tit ho nang che in, I aw kha adanglam ka ti tak zet a ni” a ti a, a tawngkam leh rawl pawh a nem leh ta deuh a. Tukver darthlalang ruah malin a rawn den per sak sak chu ka en reng a. A thusawi chuan ka thinpu a tirang dup dup kher mai. Sawi chhunzawm thuai thuai se ka ti hle.

“Nilengin ka rilru-ah a awm a, Ngaihdam dilna ka rawn thawn che a, ka call che a, ka bia ka be ta che a nih kha. Nanglah in min thamlo hmel zetin minlo chhang thin a, kha tak khan min hneh tlat a ni. I nu dawra kapu nen in inbiak khan I aw khan min fan nghal vek a, mahse nangem chu I nih ka ring silo. Fiahru tak siin ka chiang ngamlo a ni ber, tichuan ka biak chak n ache chuan engtik hunlai pawn min luah reng a. I hming leh nihna I sawi duh silo kha ka hriatchakna che tizualtu a ni zawmah zawk a. Khami zanpawh khan in haw tur kha ka biak thin kha I ni tih rinna ka nei tlat a. mahse ka prove ngam silo… In ka thlen vel-ah phone ka tum che a, I off a, tun hi kan thleng ta a ni” a ti a, Sofa ah chuan a thu tawh a.
Khawpui a ri der der a, Aizawl chu chum leivakin a bawh deuh chuai bawk a, chung ruah phingphi siau sur chuan ka thinlung a nan zawr vek niberin ka hria, ka bengkawm a sa hlarh hlarh a. ka tha a khur der der niberin ka hria. A thusawi chu ka bengah a fiah kelh kawlh hle mai, Ziaka dahthat kher ngailo turin ka thluak-ah ka paipawn nghal hmak a. “Tichuan, kei ka ni tih I hre tawh a, heti mai hi ka ni a, Hmeichhe tana chenfakawmna tur awm reng renglo, mipa ka ni tih I hre ta bawk a, a tawk viau tawh lawm ni?” ka ti ve thei hram a. “ Nia, min kalsan I duh bawk a, tichuan min kalsan I duh ang ngei chuan keipawn midang kiangah kalsan tur chein ka rilru ka siam felt a chu a nih hi” a ti a, a awri atang chuan a lungchhia tih a hriat theih…Chu a thu chhakchhuah chuan min deng her sawk a ni ber.
Sofa chungah chuan a lo thu a, a hmai a hup a, a lo tap hlap hlap a..”Engmaw?..Pasal I nei dawn nge? Bialpa I nei” tih mai ka chak mahse pa taka awmin ka insum hram hram tur a ni. Ka tawng chhuak mai theilo, ka ka achih deuh tlat, khatiang thu kha dawngsawng turin ka lo inbuatsaih hmanlo a ni ber. Insum tak insum tih hriatloh theih dan tur ber chuan “ Wow..Ka va lawmpui che ve..? Engtikah nge kan lawm dawn a?” ka ti ve thei hram a. Minchhang mai theilo, a insut hraih hraih a, a ding chiang taka min en kal chungin “Ka lem chu ziak vat rawh” ti pahin platform lam chu a pan tau ngauh ngauh a…Ka phur talo tawp mai, ka ziak thei hauhlo angle…Ka sut leh thei tawh silo, engtia tih chi nge ni ang. Ka inlamlet mai dawn nge? Ka kaltlang zel zawk dawn? Engkim a tawp thleng law law a tih duhmi, ka chhiatpui dawn pawn chhiat phah law law ang tia sului mi ka nihna chu sawmkhawmin, Ka hma a nula nalh zet mai, lungawilo leh thinrim hmel taka chair a thu tau bar mai, A rawl ka hriat hmasak ber atanga minute khat pawh ka theihnghilh tawh ngailoh lem ziak tur chuan ka in tintuah ta a.

Ni e..Min kalsan law law se ka hahdam zawk ang..Ka ro khawmtur sum leh pail amah chuan ka huphur pawh a ni lo, Khawvel thil thiamna lamah pawh ka huphurh a ni chuang heklo. Hmeichia a zawng a, Hmeichhe pian fuh ber kawppui nitur atan ka tling thlawtlo, chumi thil vang chuan ka insit in, ka huphurh tak zet vang zawk a ni. Miropui tak tak, Khawvel huapa lar phak thian leh hmelhriat a nei nuaih mai si a, kei rualbanlo ke 3 nena khawlai kal thei ve sawih sawih, Kut 2 ban san zawng in anglo nei hi min zahpui hun athleng fo thin dawn si a. Keimah lam aichuan amah lam rilruna tur ka ngaingam ngang silo a ni. Hrehawm tiin tap tap rih mahse, Nakin hun ka thlirpui lo thei silo, chuvanga kianzai rel mai ka ni si a. Milem ka ziah tawh zawng zawngah tuna ka lemziah tluka ka nervous leh ka ziah rei hi ka la hre ngailo. Zan khat leh nikhat kan In-ah a cham chhung in vawi khat mah kan inbe tawhlo, a awmlohna room ah zel ka awm tlat vang a ni. Hmuh tam ka duhlo, Ka insum zo dawn tlat silo.
*****************

Ka Zingtho chuan Favang nichhuak eng no sut mai thlir pahin Veranda-ah Thingpui ka dawm mek a, Ka nu leh Kimtei chuan rose hmun-ah eng emaw tiin an kun kauh kauh a. Ka pa chu ka piah chiah ah thuin Vanglaini Chanchinbu a chhiar mek a, Ka thingpui inpah chuan ka nu chu eng eng emaw ka sawipui a, kan nui dun kar kar a. Chutihlai tak chuan ka u chuan ka hnunglam atanga ka dar a rawn dawm chungin “ Mam..I vat ho hma ve, I nuamsamlo em ni?” a ti a. Ka farnu tak hi chu..Ka thawh tlai leh “I nuamsamlo a mi?” a ti a, ka thawh hma le chutiang tho chuan min ti leh a, ka nuih a tiza ru riau thin, Min naupang chhe chei reng mai hi..”Ka tha a lawm “ ka ti mai a..Ka malchunga Envelope rawn theh thlak zauh pah chuan “ A lawmawm nasat chu” a ti a, Ka biang-ah a tuai zauh a, ka nu leh Kimtei awmna lam pan chuan a kal ta hnak hnak a. Ka enzui reng a. “Ka U pasal tur tan chuan a nuam khawp ang? A duat dawn si, hetiang nula zaidam hi an awm kher awmlo e” ka ti rilru a.

Ka Malchunga a rawn dah chu ka en a, Inneih Sawmna ( Invitation card) a lo ni a. “ Mam hei tute thil nge ni a, Huau huau a awm leh dawn tihna em ni” Envelope hawng pah chuan ka u kal lai chu ka au zui lang lang a. “ Engmaw Bawiha?” kappa chuan a lo ti dut a. “hawngla I hre mai ang, Dr.James K.Pachuau te inneih sawmna a nih kha” ka u chuan a rawn ti lang lang a. “Wow..Chu damlai lu I sun pek elaw?” ka ti khauh a… Kan nui ham ham a. Dr. James K.Pachuau hi kan Chief Minister fapa neih chhun, tlangval fel leh nunnem zet mai, mi pawi sawi ngailo, Mahni a Hospital din thei ngat mai a ni a. Ka u nen a naupan tet atanga in kawp tlat mai, a kawi a ngil a engkim ti dun, Inkawp reng ang maia mi sawi thin an ni a. Mahse tumah mah in chutiang lam chuan an inen ngailo, an inkawm ngeih em em ringawt a ni. Chutianga nupui neih hial a tumta chu ka phurpui ru viau..
“ Bawiha, tunge a neih ve dawn the tlat a, Doctora chuan” ka pa chuan a lo tih a. Card chu a nalhin a changkang kher mai, a suihna ribbon chu ka pawt phelh a, amah in a inhawng khap a, a chhunga inziak ka en chu ka phu zawk thei hial, ka card ken chu ka tlawh lawp lo kha mak tak a ni zawk, kapa min biakna pawh ka chhang mai theilo. “ I chhiar thiamlo em ni” nui huk huk chunga ka pa in min tih leh takah chuan bah nuaih hian “Pu Jka tunu” ka ti tial ruai a..”Ehe,,,kha nula fel zet kha maw..? avan nihlawh dawn ve James a chu” a ti a. Inneih card chu ka bih reng a. Dr.James K.pachuau leh Krosshnehzovi tih chu ka thinphu chuan a thum rawn tluk tluk a ni ber. Ka inbuatsaih lawk a, “engthil pawh thlengse ka chiai hauhlo ang a, pangngai takin ka awm tur a ni” tiin ka lo intiam thin a ni a. A hun a rawn thleng chiah chu ka inbuatsaih lawkna leh ka thu lo tiam lawk chu awmzia a awm hauhlo, ka bing mum mum a, ka mit a phe ruai niberin ka hria…

Kapa bulah Card chu ka dah a, ka room lam panin ka kal ta nal nal a. Ka room-ah lutin ka thuthleng awn ah chuan ka thu a, Aizawl khawpui lang pe ut mai, Favang nichhuak in a chhun tlet sur mai chu ka thlir vang vang a. Krossi tap hmel te, a hlim nui hmelte, engkim ka mithla ah a lang zut zut a, ka inrin lawk hma in ka biangah mittui a rawn luang lum zawih a. Min hmuru an awm em tia hawi zak zak pahin ka hru hul vat a “enge Mipa ka nilawm ni? Hmeichhia vang mai mai a tah ka duh hleinem” tiin ka phun sap a. Vawi khatna atan Hmeichhia ka ralkhat kawp a, Ka hmangaih nghal a, a zunah ka uia nghal a. Ka lo duh hliam hliam hle a ni tih a Pasal neihna tur card in min den meuh chuanka hre chhuak ta uarh uarh a…Chhun dar 12 thleng ka room-ah ka inkhung a, Zing chaw ka eilo a, ka tih fo thin a nih avangin ka chhungte ngaih a thalo lem lo.
Ka nu chhuak turin ka biangah a rawn fawp zauh a, “I hlimlo..na I nei em ni” a ti a. Na ka neihloh thu leh, ka lehkhabu chhiar in min hneh thu in ka lo chhang a. Ngaihngam zan lo in min chhuahsan a nih kha. Kimi hnenah a chah nge ka hrelo ka awmdan min thlithlai ru reng a. Zanriah ka kil peihlo leh a, Ka mu heklo, ka ding heklo, ka thutna ngai-ah ka thu ngat ngat a. Zanlai dar 1 a rik rual chiahin ka room kawngka ka nu leh ka u in an rawn nam hawng a, Makti leh rilru helhkham nei hmel zetin min en a…”Mam..rilru natna I nei em ni? Tunge I rilru tina? Nge I nuamsam lo zawk?” ka u chuan a rawn ti a, ka lu a chul niap niap a..”Bawihte…Tunge ti thinrim che?” ka nu chuan tahaw deuh tuau chuan a rawn ti chhuak hlawl bawk a.
Engkim a ruhlanga ka sawi hnu-ah ka nu leh ka u chuan ka room tukverh atang chuan Aizawl khawpui eng sep sep, Khawfing chah ruala kawl engin a chhun en tan mek chu an thlir doh doh a..An hmelah chuan an tapnasa tih a hriat kher mai. An unaupa, an fapa thinlung kehsawm chu a dinhmun hrethiam tak siin rilruna takin an tuarpui tak zet a ni tih a hriat. Ka sana ka en a Zing dar 4:45 a lo ni der tawh..Kan 3 chuan kan mu mihalo, Ka u leh ka nu an tap char char a..Vanduai min ti a, min khawngaih a..Min tahpui a ni.. Lusun ang mai ka niiin ka hria…Reitawk fang an din hnu-ah min chhuahsan a, Ka muhil emaw an ti ningei tur a ni, ka chalah an fawp dun zauh zauh a. Kawngka zawite a hawngin Zawite bawkin an khar leh a. An chhuakta tihah ka mit thial ur chu ka meng a, Boruak nuam tak, mahse katana mawina neilo tak mai chu ka thlir leh tar eng a…Darkar khat zet ka thut leh hnu-ah ka rilru ka siam fel a, ka tho a, ka khumah ka let tawp a, Tui takin ka muhil ta siai siai a.
***************
Ni.24.November Zirtawp Ni chawhnu dar 5:00 a ni tawh. Ka car chuan Aizawl khawpui lam panin ka tawlh delh delh a. Naktuk mai hi Krossi pasal neihna ni tur a ni tawh, kawngpui dungah tlan zelin School naupang uniform ha kawng kal dam dam te tlanpel zel in Vaivakawn-ah ka chhuak thla a. Chuta tanga tlan tlang zel chuan Zotlang kawn ka chuang chhuak ta hlawl a. Thuilo te chhangurkawn lam ka pan leh hnu-ah kawn lo awm hmasa berah ka ding a. Ka dinna piah lawka Pu Jka in khawn luah mai kawta mithenkhat phusa leh an tualzawl a naupang hlim taka khek tuar tuar chunga tlan chu ka thlir reng a. Man Inhlan zan a ni a, an kawtah motor a ding thluah bawk a. Ka hawi zau leh deuh a, Ka pa motor pawh ka va hmuve a. Chutia ka thlir reng lai chuan Krossi ngei chu tualzawl-ah chuan a rawn chhuak ta zan zan a, a bulah chuan Dr.James-a chu hlim hmel tak chuan a kal bawk a, an bulah chuan an thiante niawm tak an awm thap bawk a.

Kross-I chuan zawn nei niawm takin a hawi zak zak reng a, khua a thim tan a, boruak pawh a vawt deuh vur tawh. Chutih lai chuan Fatu ten chaw ei an siam mawlh mawlh bawk a. Kross-I chuan hawi kual zak zak pahin an mikhualte chu a chhawn a, a chibai kual den den a. Chutia a hawikual vel chuan ka motor chu a rawn hmu ni ngei tur a ni a ding chat a…min thlir reng a. Midangin an rawn biak avangin a hawisawn leh vat a. Khua a thim a, Thenawm khawveng an lawi lut tan mek tawh a. Mop ate thian dun pawh Motor-ah lutin haw turin an inbuatsaih mek bawk a. Ngawi rengin ka thlir a, Mi chevel chu ka en kar reng bawk a.
Ka sana ka en zauh a, kan huntiam a pel a ni deuh der tawh…Dar 7:30 ah chiah helai hmunah hian inhmu turin kan intiam a ni si a, ka hmanhmawh zek zek tawh a. Ka tho deuh uaih uiah reng tawh. Pawnah naupang an tlan kual zak zak a, hmeichhe tleirawl rual khat leh mipa tleirawl rual khat an thu khawm lat a, a nui ham ham reng a. Ka sana ka en a, a la rawn langlo, ka motor ka tinung dawn chiah tih ah chuan Kawngka pui atanga Krossi rawn chhuak lai ka hmu a…A thiannu nen chuan ka awmna lam panin an rawn kal tih ka hre thei a. Ka thaw avang deuh huai.
Ka bul an rawn thleng a, Kawngka ka hawng a, rang takin Krossi a lo thu lut a, Ka motor ka ti nung a “A nih thiannu ka sawi ang thlap khan aw…kal pahin James chu ka text mai ang, min hrethiam ve mai ang” a ti a. “ Hlim takin inawm dawn nia, in remchan velah min rawn call ang che u” a ti a, ka motor chu tinungin kan thlanliam tanghal a…Ka bula thu Krossi kut nem thlap mail eh vawt raih mai chu ka hum saka, min en a a nui ver ver a “ Ka thil tih hi mualphona min thlentu a ni viau nangin, nang ka neih theihna che a nih phawt chuan, engkim ka tuar mai ang” a ti a… “ Ka hmangaih em che a ni” a tih leh sap a. Chhangurkawn kan thleng a, Aizawl road lamah ka inher leh a, kawngsir zau lai ah motor tidingin a lam ka hawi a, tlema kun deuh chungin ka fawp zauh a…Nui hak hak pahin kan tlan leh ta vang vang a…. Lengpui kan thleng dawn tep tih ah…A nui hawk hawk a…
“ U James-a chu a hrilh hai awm mange…Ka lainat khawp mai” a ti a…Min en kiau chungin “ Nangzawng a khum thei thlawtlo che a ni” a ti a….

A ZO DAIH.


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***